Jehovämi consolashunki

1. ¿Imanötan judïukunaqa Babiloniachö sientikuyaq?

BABILONIACHÖ kawaq judïukunaqa, ¿imanöraq sientikuyarqan? Pëkunaqa rikäyashqam kayarqan markankunata chikeqninkuna ushakätsiyanqanta. Pëkunatapis y unë kastankunatapis, jutsata rurayanqampitam Babiloniaman prësu apakuyarqan (2 Crön. 36:15, 16, 20, 21). Rasunmi, Babiloniachöqa ichik librim kawakuyta puëdiyaq (Jer. 29:4-7). Tsënö kaptimpis, tsë markachö kawëqa manam pëkunapaq fäciltsu karqan y manam tsënö kawëtaqa munayarqantsu. Tsëmi imanö sientikunqanta willakur juk judïu kënö nirqan: “Babiloniachöqa mayukuna kuchunchömi jamakoq kantsik, tsëchömi Sion jirkapaq yarparkur waqaq kantsik” (Sal. 137:1). Awmi, judïukunaqa alläpa llakishqam kawakuyaq, peru ¿piraq consolanman karqan?

2, 3. (1) ¿Imanötan Jehoväqa Babiloniaman prësu ëwashqa judïukunata yanaparqan? (2) ¿Imatataq këchö yachakushun?

² Jehovämi ‘tukuynöpa shoqakoq Dios’ (2 Cor. 1:3). Jehoväqa pëman llapan confiakoqkunatam kuyan y consolan. Jehoväqa musyarqanmi Babiloniaman prësu ëwashqa judïukuna correginqanta chaskikuyänampaq kaqta y pë munanqannö yapë adorayänampaq kaqta (Is. 59:20). Tsëmi Babiloniaman prësu apayänampaq 100 watakunanö pishikaptin Isaïasta nirqan kë palabrakunata qellqanampaq: “Teyta Diosnintsikmi këta nin: ‘Sirwimaqnïkunata shoqayë’” (Is. 40:1). Tsënömi Jehoväqa willakoqnin Isaïastawan puntallapitana qellqatsirqan Babiloniaman prësu ëwashqa judïukunata consolanampaq.

³ Noqantsikpis höra höraqa pillapis consolamänatam wanantsik. Tsëmi këchöqa kimallata yachakurishun prësu ëwashqa judïukunata Jehovä imanö consolanqanta. Këkunatam yachakushun: 1) arrepentikoq judïukunata perdonanampaq äninqanta, 2) änikunqankunata shuyaräyänanta munanqanta y 3) mana mantsapakuyänampaq yanapanqanta. Cada ünuta yachakuykarmi rikäshun noqantsiktapis judïukunatanölla Jehovä consolëkämanqantsikta.

JEHOVÄQA ALLÄPA LLAKIPÄKOQMI Y PERDONAMANTSIKMI

4. ¿Imanötan Jehoväqa llakipäkoq Teyta kanqanta rikätsikurqan? (Isaïas 55:7).

⁴ Jehoväqa “llapan shonqunwan llakipäkoq Teyta[m]” (2 Cor. 1:3). Y llakipäkoq kanqantaqa rikätsikurqan Babiloniachö këkaq judïukuna arrepentikuyaptin perdonanampaq änirmi (leyi Isaïas 55:7). Jehovämi kënö nirqan: “Alläpa kuyarnikim imëpis llakipashqëki” (Is. 54:8). Y ¿imatataq llakiparnin rurarqan? Mana cäsukoq kayanqampita judïukuna sufriyaptimpis, Jehoväqa änirqan Babiloniachö pöcu tiempulla kayänampaq kaqta y libranampaq kaqtam (Is. 40:2). Tsënö äninqanta musyarirqa, Babiloniachö këkaq arrepentikoq judïukunaqa alläpachi kushikuyarqan.

5. ¿Imanirtan judïukunapitapis mas següru këta puëdintsik Jehovä llakipäkoq kanqanta?

⁵ ¿Imatataq yachakuntsik? Jehovä Diosnintsikqa perdonamänapaqmi listu këkan. Tsënö kanqantam judïukunaqa musyayarqan, peru noqantsikqa judïukunapitapis masmi Jehovä llakipäkoq kanqanta següru këkantsik. ¿Imanirtan tsënö nintsik? Jehoväqa perdonamänantsikpaqmi imëkata ruramushqa. Jehovä perdonakoq kanqampaq Isaïas parlanqampita setecientus watakunanö pasariptinmi, Jehoväqa Tsurin Jesusta kë Patsaman mandamurqan llapan nunakunapa jutsankunapita wanunampaq. Jesus wanunqanmi yanapamantsik, llapan jutsantsikkunapita chipyëpa perdonashqa kanapaq (Hëch. 3:19; Is. 1:18; Efes. 1:7). Rikärinqantsiknöpis, ¡Jehoväqa llakipäkoq Diosmi!

6. ¿Imanirtan Jehovä llakipäkoq kanqanman alli pensashwan? (Fötukunata rikäri).

⁶ Arrepentikushqana këkarpis unë jutsata ruranqantsikkunapita llakikushqaqa, Isaïas 55:7 textuchö Jehovä nimanqantsikmi yanapamäshun. Wakinkunaqa jutsata unë rurayanqankunapita o tsë jutsata rurayanqampita sufrirmi llakikurlla kakuyan. Peru jutsata ruranqantsikpita willakushqana kar y tsë jutsata manana rurëkarqa, segürum kanantsik Jehovä perdonamanqantsikta. Pë perdonamarnintsikqa, mananam ruranqantsikkunata yarparannatsu (igualatsi Jeremïas 31:34 textutawan). Pëpis mana yarpëkaptinqa, noqantsikpis mananam yarpänantsiknatsu. Jehoväqa kanan witsan ruranqantsikkunatam masqa yarparan y manam unë witsan ruranqantsik jutsakunatatsu (Ezeq. 33:14-16). Llakipäkoq Teytantsik Jehoväqa ichik tiempullachönam jutsata ruranqantsikpita llapan sufrinqantsikkunata ushakäratsinqa.

7. ¿Imaraq yanapamäshun jutsata rurashqa karqa mana mantsakushpa willakunapaq?

⁷ Peru ¿imatataq rurankiman jutsata ruranqëkipita llakikurlla kakur y anciänukunata mana willashqa karqa? Bibliachöqa nin anciänukunata willanapaqmi (Sant. 5:14, 15). Capazchi anciänukunata willanëkiqa fäciltsu kanqa. Peru yarpänëkim, yanapamänapaq anciänukunata Jehovä churashqa kanqanta. Arrepentikushqana karqa y Jehoväpis y anciänukunapis shumaq tratayäshunëkipaq kaqta cuentachö katsiptikiqa, mas fäcil-llam kanqa willakunëkipaq. Arthura jutiyoq wawqita Jehovä imanö llakipanqanta y consolanqanta rikärishun. Pëqa jutsata ruranqampitam llakikurlla kakoq. Kënömi nin: “Cäsi juk watapam pornografïata rikarqä. Peru juk reunionchömi yachatsikayämurqan conciencia asuntupaq, tsëmi warmïta y anciänukunata pornografïata rikëkanqäta willarqä. Willakurirqa mas allinam sientikurqä, peru pornografïata rikanqäpitam mana alli sientikurqä. Anciänukunaqa Jehovä kuyamanqanta y kuyamarnin corregimänampaq kaqtam niyämarqan. Tsënö niyämanqanmi alläpa yanapamarqan y mananam mana alliqa sientikurqänatsu”. Kanan witsanqa, Arthurqa precursor regularmi y siervu ministerialmi. Rasumpa arrepentikushqa Jehovä perdonamanqantsikta musyarqa, ¡alläpam kushikuntsik!

JEHOVÄQA ÄNIKUNQANKUNATA SHUYARÄNATAM MUNAN

8. (1) ¿Imatataq Babiloniachö këkaq judïukunata Jehovä änirqan? (2) Isaïas 40:29 a 31 ninqannö, ¿imanötan judïukunata yanaparqan Jehovä äninqanta shuyaräyanqan?

⁸ Babiloniaqa puëdeq nacionmi karqan y prësunqan nunakunataqa manam libri dejaqtsu. Tsëmi judïukunaqa markankunaman y wayinkunaman kutikuyta puëdiyanmantsu karqan (Is. 14:17). Peru Jehovämi judïukunata änirqan libranampaq. Y libranantaqa, ¡manam imapis michanmantsu karqan! (Is. 44:26; 55:12). Jehoväpaqqa, Babilonia markaqa juk polvu cuentallam karqan (Is. 40:15). Imanömi pükarishqa polvu ushakärin, tsënömi Jehoväpaqqa Babilonia karqan. Tsëta musyarmi judïukunaqa markankunaman kutikuyänampaq kaqta shuyaräyarqan. Y manam tsëllatsu, Isaïaswanmi kënö nirqan: “Teyta Jehoväman confiakoqkunaqa, yapëmi kallpayoq tikrayanqa” (leyi Isaïas 40:29-31). Jehovä äninqanta shuyararmi kallpayoq tikrayänan karqan y ‘pichak volar ëwaqnömi’ markankunaman kutikuyänan karqan.

9. ¿Imanirtan judïukunaqa Jehoväman y änikunqankuna cumplikänampaq kaqman confiakuyarqan?

⁹ ¿Imanirtan judïukunaqa Jehoväman y änikunqankuna cumplikänampaq kaqman confiakuyarqan? Jehovä ninqankuna llapan cumplikaqta rikashqa karmi. Këllaman pensarishun: rikashqam kayarqan norti kaq läduchö Israel markakunata Asiria gobernanti imanö ushakätseqta, nunakunata prësu apakoqta (Is. 8:4), Jerusalenta babiloniukuna ushakätsiyaqta, nunakunata prësu apakuyaqta (Is. 39:5-7) y gobernanti Sedequïasta wiskuyäratsir o qaprayäratsir Babiloniapa gobernantin prësu apakunqanta (Jer. 39:7; Ezeq. 12:12, 13). Jehovä llapan willakunqankunaqa cumplikarqanmi (Is. 42:9; 46:10). Tsëkunata yarpäyanqanchi judïukunataqa yanaparqan libranampaq Jehovä äninqanman confiakuyänampaq.

10. ¿Imatan yanapamäshun Jehovä änimanqantsikkunata mas shuyaränapaq?

¹⁰ ¿Imatataq yachakuntsik? ¿Qelanashqaku këkantsik o kallpannaqku sientikuntsik? Tsënö kaptinqa, Dios änikunqankunaman yarpanqantsikmi kallpayoqta tikratsimäshun. Mana alli tiempuchö kawarpis o chikimaqnintsikkuna puëdeq kayaptimpis, manam qelanäkurinantsiktsu. Jehovä Diosnintsikqa Shumaq Patsachö kawakunapaqmi änimarquntsik, tsëtam imëpis yarpänantsik. Këman pensarishun: ventäna rakcha o qanra kaptinqa manam clärutsu juk shumaq huertata rikäshun. Tsënöllam Jehovä änimanqantsikkunaman höra höralla yarparqa, tsë vïda imanö kanampaq kaqman allillaqa pensëta puëdishuntsu. Peru ¿imatataq rurashwan ventänata limpiarir cläru rikaq cuenta, Diosnintsik änikunqankuna imanö kanampaq kaqman maslla yarparänapaq? Tsëpaqqa Diosnintsik änimanqantsik Shumaq Patsachö imanö kawakunapaq kaqman pensanapaqmi tiemputa rakinantsik y tsëpaq parlaq publicacionkunata, videukunata y cancionkunatam wiyanantsik. Y Jehoväta willashun änikunqankunapita mëqan mas gustamanqantsikta.

11. ¿Imatataq alläpa qeshyëkaq pani ruran kallpayoq sientikunampaq?

¹¹ Joy jutiyoq panintsikqa alläpa grävi qeshyawanmi qeshyan, y Dios änikunqankunaman yarparanqan yanapanqantam willakun, kënömi nin: “Wiyamanqanta següru karmi alläpa yarpachakunqä hörakuna, imanö sientikunqäta Jehoväta llapan shonqüwan willä. Y pëqa ‘nunakuna mana katsiyanqan poderninwanmi’ yanapaman” (2 Cor. 4:7). Tsënöllam panintsikqa nunakuna manana qeshyar kawakuyänampaq kaqman pensan (Is. 33:24). Noqantsikpis imanö sientikunqantsikta Jehoväta willashun y änikunqankunata shuyaräshun, tsënöpam mas kallpayoq tikrashun.

12. ¿Imanirtan Jehoväman y änikunqankuna cumplikänampaq kaqman confiakuntsik? (Fötukunatawan dibüjukunata rikäri).

¹² ¿Imanirtan Babiloniaman apashqa judïukunanöpis Jehoväman y änikunqankuna cumplikänampaq kaqman confiakuntsik? Llapan parlanqankunata cumpleqta rikarmi. Këllaman pensarishun: rikëkantsikmi kanan tiempuchö alläpa puëdeq gobernanti fuerti y dëbil kanqanta (Dan. 2:42, 43), terremötukuna kanqanta y “entëru patsachö” yachatsikuykanqantsikta (Mat. 24:7, 14). Tsëkuna cumplikanqanta rikarmi Jehovä Diosnintsik änikunqankuna cumplikänampaq kaqmampis maslla confiakuntsik.

JEHOVÄQA MANA MANTSAKUNAPAQMI YANAPAMANTSIK

13. (1) Manaraq libri karnin, ¿imakunapatan judïukuna pasayänan karqan? (2) Isaïas 41:10 a 13 ninqannö, ¿imanötan Babiloniachö këkaq judïukunata Jehovä consolarqan?

¹³ Yachakurinqantsiknömi, Babiloniachö këkaq judïukunata Diosnintsik consolarqan libri yarquyänampaq kaqta änirnin. Tsënö karpis, musyarqanmi libri tikrayänan tiempuchöqa mana allikunaparaq pasayänampaq kaqta. Jehovämi willakushqana karqan Babiloniata y amänunchö këkaq markakunata juk puëdeq gobernanti ushakätsinampaq kaqta (Is. 41:2-5). Tsëta musyarir, ¿judïukuna mantsakäyänanku karqan? Tsëkuna manaraq pasakuptinmi, Jehovä Diosnintsikqa judïukunata consolanampaq kënö qellqatsishqa karqan: “Ama mantsakäyëtsu, noqam qamkunawan këkä. Ama llakikuyëtsu, noqam Diosnikikuna kä” (leyi Isaïas 41:10-13). ¿Imanirtan Jehoväqa “noqam Diosnikikuna kä” nirqan? Tsënöqa nirqan manam adorayänanta munarllatsu, sinöqa imëka mana allikunapa pasayaptimpis lädunkunachö yanaparnin këkänampaq kaqta yarpäyänanta munarmi (Sal. 118:6).

14. ¿Imanötan Jehoväqa judïukunata yanaparqan mana mantsakuyänampaq?

¹⁴ ¿Y imanö mastan Jehoväqa judïukunata yanaparqan mana mantsakuyänampaq? Alläpa yachaq y poderösu kanqantam entienditsirqan. Judïukunatam mandarqan ciëluman rikäyänampaq, y poderninwan estrëllakunata kamanqanta y cada ünupa jutinkunata musyanqantam nirqan (Is. 40:25-28). Cada estrëllapa jutinta musyëkarqa, ¿manatsuraq sirweqninkunapa jutinkunata musyanman? Y estrëllakunata kamanampaq podernin këkaptinqa, ¿manatsuraq sirweqninkunata yanapanampaq podernin kanman? ¡Awmi! Tsëmi judïukunaqa pasakunampaq kaqkunapita mantsakäyänantsu karqan.

15. ¿Imanötan Jehoväqa Babiloniachö këkaq judïukunata yanaparqan listu këkäyänampaq?

¹⁵ Tsënöllam Jehoväqa sirweqninkunata yachatsirqan listu këkäyänampaq. Llapan sirweqninkunatam kënö mandarqan: “Ruri cuartuykikunaman yëkuskir punkuta wichqarkayämuy. Cölerä pasanqanyaq juk rätulla tsëchö quedakuyë” (Is. 26:20). Kë textu ninqanqa capazchi cumplikar qallëkurqan gobernanti Cïru, Babiloniata ushakätsinqan witsan. Unë pasakunqankunata willakoq Jenofonti jutiyoq griëgu nunam nirqan Babiloniata Cïru ushakätsirqa, “[wayinkunapita] yarquskir purikaq nunakunata wanutsiyänampaq” soldädunkunata mandanqanta (Ciropedia, traducción de Ana Vegas Sansalvador). Babiloniu nunakunaqa tsëta musyarir, ¡alläpachi mantsakäyarqan! Peru judïukunaqa Jehovä mandanqanta cäsukurchi salvakuyarqan.

16. ¿Imanirtan alläpa sufrimientu witsanman pensarqa mantsakänantsiktsu? (Fötuta rikäri).

¹⁶ ¿Imatataq yachakuntsik? Ichikllachönam llapan nunakuna alläpa sufrimientupa pasayanqa. Tsë sufrimientu qallëkuptinqa, nunakunaqa alläpam mantsakäyanqa y manam ima rurëtapis musyayanqatsu. Peru noqantsikqa Diosnintsik Jehovä kanqanta musyarmi mantsakäshuntsu. ‘Ichikllachöna salvakurinapaq kaqta’ musyarmi tranquïlu kashun (Lüc. 21:28). Hasta juk grüpu nacionkuna atacamashqapis Jehovämanmi confiakushun. Jehovämi angelninkunawan cuidamäshun, y salvakunapaq imakunata ruranapaq kaqtam willamäshun. ¿Imanöraq willamäshun? Tsëtaqa manaraqmi musyantsiktsu. Capazchi congregacionchö dirigeqkunawan willamäshun. ‘Ruri cuartukuna’ nirqa capazchi congregacionkunapaq parlëkan, tsëchömi següru kashun. Alläpa sufrimientu witsampaq listu këta munarqa, manam wawqi panikunapita rakikäkurinantsiktsu, dirigimaqnintsikkuna niyämunqankunatam cäsukunantsik y pëkunata Jehovä yanapëkanqanmanmi confiakunantsik (Heb. 10:24, 25; 13:17).

17. ¿Imatataq rurankiman Jehovä imëpis consolashunëkipaq?

¹⁷ Judïukunapaq Babiloniachö kawë mana fäcil kashqa kaptimpis, Jehovämi wanayanqanmannö consolarqan. Tsënöllam noqantsiktapis consolamäshun. Tsëmi shamoq tiempuchö imakuna pasakuptimpis, Jehovätaqa dejanëkitsu y consolashunqëkitam chaskikunëki. ¡Jehoväqa llakipäkoq Diosmi! Ama qonqëtsu Diosnikiqa Jehovä kanqanta, y änikunqankunata imëpis shuyarë. ¡Ama imatapis mantsëtsu!