YAĈHAKUNA 01
Bibliaqa yanapamanchikllapa allinta kawsanapaq
Tukuy nuqanchikkuna yaĉhanayanchik imapaqtaq Dios ruramashanchik, imapaqtaq qischakayanchik, imapaqtaq wanunchik, maypitaq mas naypaqpiqa kawsashunllapa ima nir. Chaynullapis, yarpupakunchikllapa imatana mikushun, imanuna mudakushun, maypitaq trabajashun, imatataq rurachuwan alegre kawsayta puytinapaq ima nir. Tukuy chaykunataqa Biblia yaĉhachimanchik. Bibliapipis kusa shumaq consejokunata tarinchikllapa. ¿Ima ninkitaq? ¿Mayqan amigoykita manaqa aylluykita Bibliaqa yanapayta puytiyanqachu?
1. ¿Imakunamantataq Bibliaqa yaĉhachimanchik?
Bibliaqami kaykunamanta yaĉhachimanchik: ¿pitaq tukuy imakunata rurasha kanqa?, ¿imapaqtaq kay pachapi kanchik?, ¿imapaqtaq allin runakunaqa qischakanllapa?, ¿wanurqa uklaw lugarpi kawsar siguinchikchu?, ¿imapaqtaq achka guerrakuna kan runakuna kusa shumaqta kawsanayatinllapamapis?, ¿tukukanqachu kay pachaqa? Tukuy kaykunamantaqa Biblia yaĉhachimanchik, kusala achka runakuna mana yaĉhayashanllapataqa Bibliapi yaĉhakushallapa, chaymi kusala shumaqta kawsayanllapana kananqa.
2. ¿Imanutaq Bibliaqa yanapamanchik alegre kawsanapaq?
Bibliapiqami shumaq consejokunata tarinchikllapa. Biblia yaĉhachimanchik imatataq rurachuwan ayllunchikkunawan shumaqta kawsayta puytinapaq nir. Animachimanchikpis ama masiawta yarpupakunapaqchu, trabajarpis tranquilo trabajanapaq. Uk yaĉhachikuqwan pulla kay librotaqa yaĉhakuy, chaynu mas Bibliamanta yaĉhakurnaqa qamlla cuentata qukanki ‘Dios nitin tukuy escribikashakunaqami [...] kusala shumaqta yaĉhachimanchik’ nir (2 Timoteo 3:16).
Kay libroqa mana Bibliachu. Ashwanmi, yanapashunqa mas Bibliata intrakanaykipaq. Chayraykumi animachishunillapa tukuy versiculokuna kay libropi kaqtaqa liyinaykipaq, chaynu rurarqa Biblia nishanta allita intrakanki.
MAS INTRAKASHUNLLAPA
Yaĉhakushun imanutaq Bibliaqa wakin runakunata yanapasha, yaĉhakushunpis imatataq ruraypaq nuqanchiklla Bibliata liyiyta munanapaq, chaynullapis yaĉhakushun, allita Bibliata intrakanapaqqa uk yaĉhachikuqwan pulla Bibliataqa yaĉhakuypaq nir.
3. Bibliaqami shumaqta purinapaq yanapamanchik
Bibliaqami imanutaq uk focomaqa nanta puriyta puytinapaq achkirachimanchik chaynu. Bibliaqa yanapamanchik shumaq imakunata rurar kawsanapaq, chaynullapis nimanchik imataq pasanqa shamuq tiempopiqa ima nir.
Liyiyllapa Salmo 119:105, chaymantaqa kaykunamanta parlayllapa:
Runito salmo textota escribiran chaypaqqa, ¿ima yupay Bibliaqa kaq?
Qampaqpis, ¿imanutaq Bibliaqa?
4. Pantasha kashaqa Biblia yanapamanchik
Uk warmisita unay mana Diosmanta yaĉhayashankunata Bibliapi yaĉhakuran. VIDEOTA rikayllapa, chaymantaqa kaykunamanta parlayllapa:
Chay videopi rikashanchik warmisitaqa, ¿imakunatataq mana yaĉhayaqchu?
¿Imanutaq paytaqa Biblia yanaparan?
Bibliaqa animachimanchik mana yaĉharqa tapukunapaq. Liyiyllapa Mateo 7:7, chaymantaqa kaykunamanta parlayllapa:
Mana yaĉhayashaykikunataqa, ¿Bibliapichu tariyta puytiyanki kanqa? ¿Imakunamantataq yaĉhachishuyanqa Bibliaqa?
5. Biblianchiktaqa nuqanchiklla munar liyiypaq
Achka runakuna paykunalla munar Bibliantaqa liyinllapa. Chaypi kusa shumaq consejokunata tarishallapa. VIDEOTA rikayllapa, chaymantaqa kaykunamanta parlayllapa:
Chay videopi rikashanchik musukunataqa, ¿imapaqtaq mana Biblianta liyiyta gustaqchu?
Pero, ¿imapaqtaq Bibliata-shuypaqa paykunalla munar liyinllapa?
Diosqa Bibliawan consolamanchik, kusa shumaq bendicionkunata qushushaq ima nir arnimanchik. Liyiyllapa Romanos 15:4, chaymantaqa kaykunamanta parlayllapa:
¿Yaĉhanayankichu imanutaq Diosqa consolamashun, bendecimashun ima nir?
6. Uk yaĉhachikuqwan pulla allita Bibliataqa intrakayta puytinchik
Qamlla Bibliaykitaqa liyiyta puytinki, pero allita intrakanaykipaqqa uk yaĉhachikuq yaĉhachishunanta ministinki. Liyiyllapa Hechos 8:26-31, chaymantaqa kaykunamanta parlayllapa:
Allita Bibliata intrakanaykipaqqa, ¿imatataq rurankiman? (Versiculokuna 30, 31 ima qashan liyiyllapa).
Etiopía shutiq lugarmanta runitu Bibliamanta intrakananpaqqa, uk yaĉhachikuq yaĉhachinanta ministiran. Kanan tiempopipis, achka runakuna Bibliataqa intrakashallapa uk yaĉhachikuq yaĉhachitin.
WAKINKUNAQA KAYNU YARPUNLLAPA: “Bibliaqa mana imatapis yaĉhachimanchikchu, yanqalla liyinchik”.
Qamqa, ¿imaninkitaq? ¿Imaraykutaq chaynu ninki?
KAYKUNATA YAĈHAKUSHANCHIK
Diosqa Bibliawan consejokunata qumanchik shumaq purinapaq, mana yaĉhayashanchikkunata allita yaĉhachimanchik, consolamanchik, bendicionkunata qushushaq ima nir arnimanchik.
¿Imataq ninkiman?
¿Ima consejokunatataq Bibliapi tarinchik?
¿Ima mana yaĉhashanchikkunatataq Bibliaqa allita yaĉhachimanchik?
Qamqa, ¿imatataq Bibliapiqa yaĉhakunayanki?
MAS YAĈHAKUNAYKIPAQ
Yaĉhakuy imanutaq Bibliapa consejonkunaqa yanapamanchik kanan tiemponchikpi shumaqta kawsanapaq nir.
“La eterna sabiduría de la Biblia” (La Atalaya, núm. 1 2018)
Uk runa wamra kashanmanta-pacha kabalta qischakaran. Pero Bibliami yanaparan alegre kawsayta puytinanpaq.
Yaĉhakuy imatataq rurankiman kusala shumaqta aylluykiwan kawsanaykipaq.
“12 claves para una familia feliz” (¡Despertad!, núm. 2 2018)
Achka runakunaqa ninllapa “Dios kay pachapiqa mandakuyan” nir. Chaymi rikay imanutaq Bibliaqa allita intrachimanchik pitaq kay pachapiqa mandakuyan nir.