YAĈAKUNA 01
Bibliaqa yanapamanchikllapa allinta kawsanapaq
Tukuy nuqanchikkuna yaĉanayanchik imapaqtaq Dios ruramashanchik, imapaqtaq qischakayanchik, imapaqtaq wanunchik, maypitaq mas nawpaqpiqa kawsashunllapa ima nir. Chaynullapis yarpupakunchikllapa imatana mikushun, imanuna mudakushun, maypitaq trabajashun, imataq rurashunman shumaq purinapaq nir ima. Chay mana yaĉayashanchikkunataqa Biblia yaĉachimanchik. Bibliapipis kusa shumaq consejokunata tarinchikllapa. ¿Qam riqsinkichu pitataq Bibliaqa yanapayta puytiyanqa? nir.
1. ¿Imakunamantataq Bibliaqa yaĉachimanchik?
Bibliaqami kaykunata yaĉachimanchik: ¿pitaq tukuy imakunata rurasha kanqa?, ¿imapaqtaq kay pachapi kanchik?, ¿imapaqtaq allin runakunaqa qischakanllapa?, ¿wanurqa uklaw lugarpi kawsar seguinchikchu?, ¿imapaqtaq achka guerrakuna kan runakuna kusa shumaqta kawsanayatinllapamapis?, ¿chinqanqachu kay pachaqa? Kaykunamantaqa Biblia yaĉachimanchik, kusala achka runakuna chay mana yaĉayashanllapataqa Bibliapi tarishallapana, chaymi kusala shumaqta kawsayanllapa kananqa.
2. ¿Imanutaq Bibliaqa yanapamanchik alegre kawsanapaq?
Bibliapiqami shumaq consejokunata tarinchikllapa. Biblia yaĉachimanchik imata rurartaq ayllunchikkunawan shumaq kawsashunllapa nir. Animachimanchikpis ama masiawta yarpupakunapaqchu, trabajarpis tranquilo trabajanapaq. Uk yaĉachikuqwan pulla kay libritota yaĉakuy, chaynu mas Bibliamanta yaĉakurnaqa qamlla cuentata qukanki ‘Dios nitin tukuy escribikashakunaqami [...] kusala shumaqta yaĉachimanchik’ nir (2 Timoteo 3:16).
Kay libritoqa mana Bibliachu. Ashwanmi yanapashunqa mas Bibliata intrakanaykipaq. Chayraykumi animachishunillapa tukuy versiculokuna kay libritopi kaqtaqa leenaykipaq, chaynu rurarqa Biblia nishanta allita intrakanki.
MAS INTRAKANAPAQ
Yaĉakushun imanutaq Bibliaqa wakin runakunata yanapasha nir, yaĉakushunllapapis imatataq ruraypaq nuqanchiklla Bibliata leeyta munanapaq, chaynullapis yaĉakushun, allita Bibliata intrakanapaqqa uk yaĉachikuqwan pulla Bibliataqa yaĉakuypaq nir.
3. Bibliaqami shumaqta purinapaq yanapamanchik
Bibliaqami imanutaq uk focomaqa nanta puriyta puytinapaq achkirachimanchik chaynu. Bibliaqa yanapamanchik shumaq imakunata rurar kawsanapaq, chaynullapis nimanchik imataq pasanqa shamuq tiempopiqa nir.
Leeyllapa Salmo 119:105, chaymantaqa kaykunamanta parlayllapa:
Runa salmo textota escribiran chayqa, ¿imatataq Bibliamanta yarpuyaq?
Qampaq, ¿imataq Bibliaqa?
4. Biblia yanapamanchik pantasha kashaqa
Uk warmisita unay mana Diosmanta yaĉayashankunata Bibliapi yaĉakuran. VIDEOTA rikayllapa, chaymantaqa kaykunamanta parlayllapa:
Chay videopi rikashanchik warmisitaqa, ¿imakunamantataq mana yaĉayaqchu?
¿Imanutaq paytaqa Biblia yanaparan?
Bibliaqa animachimanchik mana yaĉarqa tapukunapaq. Leeyllapa Mateo 7:7, chaymantaqa kaykunamanta parlayllapa:
Mana yaĉayashaykikunamanta, ¿yaĉachishuyanqachu Bibliaqa?, ¿imakunamantataq yaĉachishuyanqa?
5. Biblianchiktaqa leeypaq nuqanchiklla munar
Achka runakuna paykunalla munar Bibliantaqa leenllapa, chaypi kusa shumaq consejokunata tarishallapa chayrayku. VIDEOTA rikayllapa, chaymantaqa kaykunamanta parlayllapa:
Chay video rikashanchikpi, ¿imapaqtaq musukunataqa mana leeyta gustaqllapachu?
Pero, ¿imapaqtaq Bibliata-shuypaqa paykunalla munar leenllapa?
Diosqa Bibliawan consolamanchik, kusa shumaq bendicionkunata qushushaq ima nir arnimanchik. Leeyllapa Romanos 15:4, chaymantaqa kaykunamanta parlayllapa:
¿Yaĉanayankichu imanutaq Diosqa consolamashun, bendecimashun ima nir?
6. Uk yaĉachikuqwan allita Bibliataqa intrakayta puytinchik
Qamlla Bibliaykitaqa leeyta puytinki, pero allita intrakanaykipaqqa uk yaĉachikuq yaĉachishunanta ministinkipis. Leeyllapa Hechos 8:26-31, chaymantaqa kaykunamanta parlayllapa:
Allita Bibliata intrakanaykipaqqa, ¿imatataq rurankiman? (Versiculokuna 30, 31 ima qashan leeyllapa).
Etiopía shutiq lugarmanta runito Bibliamanta intrakananpaqqa, uk yaĉachikuq yaĉachinanta ministiran. Kanan tiempopipis, achka runakuna Bibliataqa intrakashallapa uk yaĉachikuq yaĉachitin.
WAKINKUNAQA KAYNU YARPUNLLAPA: “Bibliaqa mana imatapis yaĉachimanchikchu, yanqalla leenchik” nir.
Qamqa, chaynu nishanllapamantaqa, ¿imaninkitaq? ¿Imaraykutaq chaynu ninki?
¿IMATATAQ YAĈAKURANCHIK?
Diosqa Bibliawan consejota qumanchik shumaq purinapaq, mana yaĉayashanchikkunata allita yaĉachimanchik, consolamanchik, bendicionkunata qushushaq ima nir arnimanchik.
Yarpushun
¿Ima consejokunatataq Bibliapi tarinchik?
¿Ima mana yaĉashanchikkunatataq Bibliaqa allita yaĉachimanchik?
Qamqa, ¿imatataq Bibliapiqa yaĉakunayanki?
MAS YAĈAKUNAYKIPAQ
Yaĉakuy imanutaq Bibliapa consejonkunaqa yanapamanchik kanan tiemponchikpi shumaq kawsanapaq nir.
“La eterna sabiduría de la Biblia” (La Atalaya, núm. 1 2018)
Uk runa wamra kashanmanta-pacha kabalta llakiran. Pero Bibliami yanaparan alegre kawsayta puytinanpaq.
Yaĉakuy imata rurankiman kusala shumaqta aylluykiwan kawsanaykipaq.
“12 claves para una familia feliz” (¡Despertad!, núm. 2 2018)
Achka runakunaqa ninllapa Dios kay pachapiqa mantakuyan nir. Chaymi rikay imanutaq Bibliaqa allita intrachimanchik pitaq kay pachapiqa mantakuyan nir.