Ezequiel

16 Jehová Diosca cutinllatajmi ñucamanca cai shimicunata nirca: 2 “Runapaj churi, Jerusalenmanca millanana ruraicunata pai rurashcata yachaj chayachi. 3 Paimanca caita ningui: ‘Tucuita Mandaj Amito Jehová Diosca Jerusalenmanca caitami nin: “Canca cambaj familiamanta, chaipi huacharishcamantami Canaán allpamanta cangui. Cambaj yayaca amorreo runami carca. Cambaj mamaca hitita huarmimi carca. 4 Can huacharishca punllaca cambaj puputaca mana pꞌitircacunachu. Chuya saquirichunpish cantaca yacuhuan mana armachircacunachu. Cachihuanpish mana sobarcacunachu. Telacunahuanpish mana pilluchircacunachu. 5 Canta ni pi mana llaquishcamantami caicunataca mana rurarcacuna. Cꞌuyashcatapish pi mana ricuchircachu. Ashtahuanpish can huacharishca punlla canta pꞌiñashpami campoman shitarcacuna.

6 Ñuca chaita pasacushpaca cambaj yahuarllapitaj can jaitaricujtami ricurcani. Cambaj yahuarpi siricujpimi ñucaca: ‘¡Causashpa cati!’ nircani. Ari, cambaj yahuarllapitaj siricujpimi ñucaca: ‘¡Causashpa cati!’ nircani. 7 Cantaca allpapi huiñaj plantacunata shinami yallitaj achcacuna cachun mirachircani. Canca huiñashpami jatunyarcangui, ashtahuan alli adornocunatami churarircangui. Cambaj chuchucunapish sinchimi tucurca. Cambaj ajchapish huiñarcami. Pero churana illaj lluchullami puricurcanguiraj” ninmi’ ningui.

8 ‘Cutinllataj ñuca chaita pasacushpami canta ricurcani. Cꞌuyaita ricuchingapaj can ña edadta charishcatami cuentata curcani. Chaimantami can lluchulla cajpi ñuca jahua churanahuan canta cꞌatachircani. Shinallataj canhuan shuj ari ninacuita* rurashpami chaita pajtachingapaj jurarcani. Chaimi canca ñucapaj tucurcangui’ ninmi Tucuita Mandaj Amito Jehová Diosca. 9 ‘Ashtahuanpish cantaca yacuhuan armachishpa, yahuartapish maillashpami aceitehuan churarcani. 10 Chai qꞌuipaca bordashca churanatami churachircani. Alli carahuan* rurashca sandaliatapishmi curcani. Cambaj umatapish alli linohuanmi pilluchircani. Shinallataj yallitaj valij ropacunatami churachircani. 11 Canmanca cai adornocunatami churachircani: maquicunapica brazaletecunatami churachircani, cungapica huallcatami apachircani. 12 Singapipish shuj argollata, rinrincunapipish aretescunata, umapipish shuj sumaj coronatami churachircani. 13 Canca orohuan, cullquihuanmi allichirircangui. Alli lino churanahuan, achca valij ahuashcacunahuan, bordashca churanacunahuanmi churarij carcangui. Cambaj micunaca alli* harina, miel, aceitemi carca. Chashnami canca yallitaj sumaj tucurcangui. Reina tucungapajmi ña allichirishca carcangui’” nircami.

14 “‘Canca yallitaj sumaj tucushcamantami llajtacunapurapi rijsishca tucurcangui. Ñuca yallitaj achijnicuj canata canpi churajpimi canca yallitaj sumaj tucurcangui’ ninmi Tucuita Mandaj Amito Jehová Diosca”.

15 “‘Pero canca can sumaj cashcapimi confiai callarircangui. Shinallataj canca rijsishca tucushcamantami huainayaj huarmi tucurcangui. Maijanpish chaita pasajcunahuanmi yallitaj huainayarcangui. Chashnami can sumaj cashcataca paicunaman entregarcangui. 16 Cambaj chꞌican chꞌican color ropacunata japishpami chaicunahuanca cambaj adorana lugarcunata* sumajyachircangui. Canca chaipimi huainayarcangui. Caicunaca mana pasanachu carca, manataj pasanachu carca. 17 Orohuan, cullquihuan rurashca sumaj joyacunatami* canman curcani. Canca chai joyacunata japishpami cꞌariman rijchajcunata rurarcangui. Canca chaicunahuanmi huainayarcangui. 18 Shinallataj cambaj bordashca churanacunata japishpami chaicunahuan tapachircangui.* Ñuca aceitetapish, ñuca inciensotapish paicunamanmi curcangui. 19 Can micuchunmi alli harinahuan, aceitehuan, mielhuan rurashca tandata curcani. Ñuca cushca tandatami chaicunamanca mishquijllata ashnacuj sacrificiota shina curcangui. Canca tucui chaitami chashnataj rurarcangui’ ninmi Tucuita Mandaj Amito Jehová Diosca”.

20 “‘Ñucapajlla cachun can huachashca churicunata, ushushicunata japishpami rurashcalla dioscunaman sacrificiota shina curcangui. ¿Manachu cunancama huainayashpa causacushcamantaca cushilla sintiringui? 21 Ñuca churicunata huañuchishpami paicunataca ninapi rupachishpa rurashcalla dioscunaman sacrificiota shina curcangui. 22 Tucui chai millanana ruraicunata ruracui horas, huainayacui horasca can joven cashca punllacunataca mana yuyarircanguichu. Can lluchulla cashcatapish, churana illaj cashcatapish, cambaj yahuarllapitaj jaitaricushcatapish mana yuyarircanguichu. 23 Can tucui millanana ruraicunata rurashca qꞌuipaca aij, aij imachari tucungui’ ninmi Tucuita Mandaj Amito Jehová Diosca. 24 ‘Yanga dioscunata adorangapajmi shuj altarta rurarcangui. Shinallataj plazacunapimi shuj adorana lugarta rurarcangui. 25 Cada callepimi ashtahuan ricunalla ladocunapi adorana lugarcunata rurarcangui. Chai cꞌuchuta maijan pasacujmanpish cambaj cuerpota cushpami* can sumaj cashcataca millananata rurashcangui. Chashnami canca ashtahuan ashtahuan huainayashpa catircangui. 26 Canca egipciocunahuanmi* huainayarcangui. Paicunapaj charishca aichapish jatunmi carca. Paicunahuan yallitaj huainayashpami canca ñucata pꞌiñachircangui. 27 Cunanca ñuca maquita chutashpami canta castigasha. Can micuna cashcatapish menostami cusha. Canta pꞌiñaj huarmicunamanmi imatapish rurachun cusha. Paicunaca filisteocunapaj ushushicunami can. Paicunaca can pinganayai ruraicunata rurashcata ricushpami mancharishca carcacuna.

28 Shinallataj huainayanata mana shaicushpami asiriocunahuanpish huainayarcangui. Pero paicunahuan huainayashca qꞌuipapish mana cushicurcanguichu. 29 Shinallataj canca caldeocunahuanmi comerciantecunapaj allpapi* ashtahuan huainayarcangui. Chaita rurashpapish mana cushicurcanguichu. 30 ¡Cambaj shunguca ungushcami* carca!* Chaimantami canca pingai illaj huainayaj huarmi shina tucui chaicunata rurarcangui’ ninmi Tucuita Mandaj Amito Jehová Diosca. 31 ‘Pero canca ashtahuan ricunalla ladocunapi, callecunapi, plazacunapi yanga dioscunata adorana lugarcunata ruracushpaca mana shuj huainayaj huarmi shina carcanguichu. Chaimi imata pagajpipish canca mana chasquij carcangui. 32 ¡Canca huainayaj huarmimi cangui. Cambaj cusata cꞌuyanapaj randica mana rijsishcacunatami cꞌuyangui! 33 Tucui huainayaj huarmicunamanmi regalocunata cuncuna. Pero canhuan canata yallitaj munajcunamanmi canca regalocunata cushcangui. Shinallataj tucui ladomanta shamushpa canhuan huainayachunmi paicunamanca camaricunata cushcangui. 34 Canca huainayashpa causaj shujtaj huarmicuna shinaca mana canguichu. ¡Can rurashca shinaca ni maijan huarmi mana huainayanchu! Canhuan canata munajcuna canman paganapaj randica canmi paicunaman pagangui. Chashnami canca tigraman rurangui’.

35 Chaimanta huainayaj huarmi, Jehová Dios nishca shimicunata uyai. 36 Tucuita Mandaj Amito Jehová Diosca caitami nin: ‘Canca yallitaj huainayana munaita charishcatami ricuchishcangui. Cambaj cuerpopish lluchullami saquirishca. Canhuan tucui huainayajcunahuan, tucui millanana rurashcalla dioscunahuanmi huainayarcangui. Chai dioscunamanmi cambaj huahuacunapaj yahuartapish curcangui. 37 Chaimantami can cushichishca huainayajcunata tandachisha. Can cꞌuyashcacunatapish, can pꞌiñashcacunatapishmi tucuicunata tandachisha. Tucui ladocunamantami paicunataca cambaj contra macanacuchun tandachisha. Paicunapaj ñaupajpimi cantaca ropa illajta saquisha. Chashnami paicunaca can tucui lluchulla cashcata ricungacuna.

38 Shinallataj cantaca huainayaj huarmicunata shina, huañuchij huarmicunata shinami castigasha. Ñucaca cantaca yallitaj pꞌiñarishpa, celashpami sinchita juzgasha. 39 Cantaca canhuan huainayajcunapaj maquipimi churasha. Paicunami cambaj yanga dioscunata adorana altarcunataca urmachingacuna. Cambaj adorana lugarcunatapishmi tucuchingacuna. Paicunami cambaj churanataca quichungacuna. Shinallataj cambaj sumaj joyacunatapishmi apangacuna. Chashnami cantaca lluchullata, churana illajllata saquingacuna. 40 Paicunaca canta llaquichingapajmi achca gentecunata apamungacuna. Paicunami cantaca rumicunahuan shitangacuna. Shinallataj paicunapaj espadacunahuanmi huañuchingacuna. 41 Cambaj huasicunatapish ninahuanmi rupachingacuna. Ñuca imallata rurachun nishcacunataca achca huarmicunapaj ñaupajpimi pajtachingacuna. Can huainayashpa catichunca mana saquishachu. Chaimi canca canhuan huainayajcunamanca ña mana pagangui. 42 Ñucaca canhuan yallitaj pꞌiñarishca canata, canhuan colerashca canatapishmi saquisha. Ñucaca calmarishpami ña mana ashtahuan pꞌiñarishca casha’ ninmi.

43 ‘Joven cashca punllacunata mana yuyarishpami tucui chaicunata rurashpa ñucata pꞌiñachircangui. Can ima shina causashcamantami castigasha’ ninmi Tucuita Mandaj Amito Jehová Diosca. ‘Canca pinganayai ruraicunata rurashpa, millanana ruraicunata rurashpaca ña mana catinguichu.

44 Ricui, gentecunaca cai yuyachij shimicunahuanmi* cantaca: “Cai ushushica paipaj mama layallatajmi” ningacuna. 45 Canca cambaj mama shinami cangui. Paica paipaj cusatapish, paipaj huahuacunatapishmi pꞌiñaj carca. Shinallataj cambaj ñañacuna shinami cangui. Paicunaca paicunapaj cusacunata, paicunapaj huahuacunatami pꞌiñajcuna carca. Cancunapaj mamaca hititami carca. Cancunapaj yayaca amorreomi carca’”.

46 “‘Cambaj punta ñañaca Samariami can. Paica paipaj ushushicunahuanmi* cambaj janaj ladoman* causan. Cutin cambaj qꞌuipa ñañaca Sodomami can. Paica paipaj ushushicunahuanmi cambaj ura ladoman* causan. 47 Canca paicunapaj ñancunallapi, paicunapaj millanana ruraicunallapica mana purircanguichu. Ashtahuanpish asha tiempollapimi paicunatapish yalli ashtahuan juchacunata rurarcangui. 48 Ñuca causacushca shinallatajmi jurani’ ninmi Tucuita Mandaj Amito Jehová Diosca. ‘Cambaj ñaña Sodomapish, paipaj ushushicunapish can rurashca shina, cambaj ushushicuna rurashca shinaca mana rurashcacunachu. 49 Cambaj ñaña Sodoma pandarishcaca caimi can: paipish, paipaj ushushicunapish jatun tucushcami carcacuna. Achca micunatapishmi charircacuna. Imamantapish mana preocuparishpami causarcacuna. Shinapish paicunaca sufricujcunata, pobrecunataca mana ayudarcacunachu. 50 Paicunaca jatun tucushpami catircacuna. Shinallataj millanana ruraicunatami ñuca ñaupajpi rurashpa catircacuna. Chaimi ñucaca paicunata tucuchircani.

51 Samariaca can rurashca juchacunamanta chaupillatapish mana rurarcachu. Canca paicunatapish yallimi achca millanana ruraicunata rurarcangui. Cambaj millanana ruraicuna yallitaj achca cashcamantami cambaj ñañacunaca cambaj cꞌuchupica cashcata rurajcuna shina ricurirca. 52 Cunanca cambaj ñañacuna imata rurashcata apoyashcamantami* canta humillachishcataca ahuantana cangui. Cambaj juchamanta, paicunatapish yalli millanana ruraicunata rurashcamantami paicunaca cantapish yalli cashcata rurajcuna can. Chaimanta cambaj ñañacuna cashcata rurajcuna shinata ricuchishcamanta pingari, humillachishcatapish ahuantai’.

53 ‘Ñucaca tucui paicunamanta prezu shina apashcacunatami tandachisha. Sodomatapish, paipaj ushushicunatapish, Samariatapish, paipaj ushushicunatapishmi prezu shina apashcacunataca tandachisha. Jerusalenlla, canmanta prezu shina apashcacunatapish paicunahuanmi tandachisha. 54 Chashnami canta humillachishcatapish ahuantangui. Paicunata cushichishcamantami canca humillashca sintiringui. 55 Cambaj ñaña Sodomapish, paipaj ushushicunapish ñaupa ima shina cashca shinallamantajmi tigrangacuna. Cambaj ñaña Samariapish, paipaj ushushicunapish ñaupa ima shina cashca shinallamantajmi tigrangacuna. Canpish, cambaj propio ushushicunapish ñaupa ima shina cashca shinallamantajmi tigranguichij. 56 Can jatun tucushca punllacunapica cambaj ñaña Sodomataca yangapimi churarcangui. Paipaj shutillatapish mana nombrarcanguichu. 57 Cambaj millanana ruraicunata manaraj ricuchijpimi chashna rurarcangui. Cunanca Siriapaj ushushicunapish, paipaj vecinacunapish cantaca cꞌamincunami. Cambaj muyundijpi caj filisteocunapaj ushushicunapish cantaca yangapimi churancuna. 58 Canllataj pinganayai ruraicunata rurashcamanta, cambaj millanana ruraicunamantapishmi llaquicunata apangui’ ninmi Jehová Diosca”.

59 “Tucuita Mandaj Amito Jehová Diosca caitami nin: ‘Cunanca can imatami rurarcangui, chaillatatajmi ñucapish canhuanca rurasha. Canca ñucahuan ari ninacushcata mana pajtachishpami juramentota mana valichishcangui. 60 Pero ñucallatajmi can joven cai punllacunapi canhuan shuj ari ninacuita rurashcata yuyarisha. Canhuanca huiñai huiñaipajmi ari ninacuita rurasha. 61 Can ima shina comportarishcatami yuyaringui. Shinallataj cambaj punta ñañacunata, qꞌuipa ñañacunata chasquishpami pingaihuan saquiringui. Canhuan shuj ari ninacuita mana rurashca cashpapish paicunataca cambaj ushushicunata shinami cusha’ ninmi.

62 ‘Ñucallatajmi canhuanca shuj ari ninacuita rurasha. Chashnami canca ñuca, Jehová Dios cashcata yachaj chayangui. 63 Can tucui imallata rurashca cajpipish ñuca canta perdonajpica can imallata rurashcatami yuyaringui. Shinallataj can humillashca cashcamantami cambaj shimita pascangapajpish dimastij pingaita charingui’ ninmi Tucuita Mandaj Amito Jehová Diosca”.