Romanos
13 Diosmi autoridadcunataca mandachun saquishca. Chaimantami paicunataca tucuicuna cazuna canchij. Cunan tiyashca autoridadcunaca Dios maipi churashcapimi can. 2 Autoridadcunapaj contra tucushpaca Diospaj contrami tucunchij. Dios churashcacunapaj contra tucujcunaca llaquichishcami cangacuna. 3 Allita rurajcunaca mandajcunataca mana manchancunachu. Shinapish mana allita rurajcunami mandajcunataca manchancuna. ¿Canca autoridadcunata mana manchashpachu causasha ningui? Shinaca allita rurashpa catilla. Chashna rurajpimi cantaca jatunyachingacuna. 4 Autoridadcunaca cambaj allipaj churashcacunami. Diospajta rurajcunami. Shinapish mana allicunata rurashpaca manchanami cangui. Paicunaca mana allita rurashpa catijcunata castigangapajmi poderta* charincuna. Mana yangamantachu chai podertaca charincuna. Ashtahuanpish mana allita rurajcunata castigangapaj Diospajta rurajcunami.
5 Autoridadcunataca cazunatajmi canguichij. Ama cancunata castiganata manchashcallamanta cazuichijchu. Ashtahuanpish cancunapaj concienciapi alli sintiringapaj cazuichij. 6 Chaimantami cancunapish impuestota paganguichij. Autoridadcunaca Diospajta rurajcuna cashpami punllanta tucui gentecunata sirvicuncuna. 7 Cuna cashcataca tucuicunaman cuichij: impuestota pagachun mañajpica impuestota pagaichij. Tributota pagachun mañajpica tributota pagaichij. Respetachun mañajpica paicunata respetaichij. Jatunyachichun mañajpica paicunata jatunyachichij.
8 Ama piman imata dibichijchu. Ashtahuanpish caishuj chaishuj cꞌuyanacuichij. Shujtajcunata cꞌuyajca leypi mandashcatami pajtachin. 9 Leypi mandashcacunaca: “Ama huainayangui, ama huañuchingui, ama shuhuangui, shujtajcunapajta ama munangui” ninmi. Cai mandashcacunapish, shujtaj mandashcapish shujllami tucun. Chai mandashcapica: “Can quiquin cꞌuyarij shinallataj shujtajcunatapish cꞌuyangui” ninmi. 10 Maijanpish cꞌuyajca shujtajcunataca mana llaquichinchu. Shujtajcunata cꞌuyajca leypi nishcatami alli pajtachin.
11 Cancunaca ima punllacunapi causacushcataca allimi yachanguichij. Cunanca dormicushcamanta ña rijcharina tiempomi can. Chaimanta ñuca nishcacunata pajtachichij. Jesusta catijcuna tucujpica ñucanchij quishpirina punllaca cꞌuchullapimi carca. Cunancarin ashtahuan cꞌuchullapimari. 12 Tutaca ñallami tucurigrin, punllapish ñallami chayamugrin. Chaimanta amsapaj ruraicunataca ama rurashunchijchu. Ashtahuanpish luzpaj macanacunacunata churarishunchij. 13 Achij punllapi purij shina alli purishunchij. Chaimanta maipishcachun fiestacunata ama rurashunchij, ama machashunchij, ama huainayashpa purishunchij, millai pinganayai ruraicunata* ama rurashunchij, ama macanacushunchij, ama envidianacushunchij. 14 Chaipaj randica Amito Jesucristopaj ejemplota catichij.* Aicha munaicunata ruranataca amataj yuyacuichijchu.