Marzo

¿Congregacionpica pihuan mana alli apanacunchijchu? Tal vez shuj huauqui o pani ima nishcatapish, imata rurashcatapish manachari munanchij. Alli apanacungapaj imata mana rurashpaca paicunahuan chashnallatajmi catishun. Bibliapica, caishujhuan chaishujhuan chasquinacuj cashpaca shujtajcunahuanpish, ñucanchijta pꞌiñajcunahuanpish alli apanacuna cashcatami yachachin (Proverbios 25:21, 22). Pita ñucanchij huasiman invitashpaca paicunahuan pꞌiñarishca cashcatami cungarishun. Chashnami ashtahuan alli apanacushun. Shinallataj ima shinami paicunata Jehová Dios allicunata ricushpa, paipaj puebloman pushamurca. Chashnallatajmi ñucanchijpish allicunata ricui callarishun (Juan 6:44). Mana alli apanacuj huauqui o panica manachari huasiman invitachun shuyacurca. Shinapish paita cꞌuyashcamanta huasiman invitajpica allichari apanacui callarishun. ¿Cꞌuyaimanta invitangapajca imatataj rurai tucunchij? Cunan punllapaj versopi nishca shinaca humildemi cana canchij. Shinallataj shujtajcuna ñucanchijta yalli cashcatami yuyarina canchij. Tucuicunami imapica ñucanchijmanta yalli can. Por ejemplo, maijancunaca ashtahuan sinchi crijmi can, cutin shujtajcunaca llaquicunata charishpapish ahuantashpami catincuna. Ñucanchij huauqui panicuna imapi ashtahuan yalli cashcata ricushpami cꞌuyaimanta ñucanchij huasiman invitashun. w18.03 pág. 19 párrs. 18, 19

Shuj churi o ushushi congregacionmanta llujshichishca cajpica yaya mamapajca Diosta cazunaca sinchimi can. Shuj panimanta parlashun. Paipaj ushushica congregacionmanta llujshichishcami carca, huasimantapishmi rirca. Cai panica: “Ñuca ushushihuan, nietahuan pasanatami munarcani. Chaimantami ‘congregacionmanta llujshichishcacunahuan tandanacunalla cashcata parlaj temacunaca tiyangami’ nishpa publicacioncunapi mashcai callarircani” ninmi. Pero paipaj cusaca cꞌuyaihuanmi Jehová Diospaj maquipi paipaj ushushita saquina cashcata, ashtahuanpish Diosta cazushpa disciplinata chasquichun saquina cashcata intindichirca. Asha huatacuna qꞌuipaca chai panipaj ushushica cutinmi congregacionpi chasquishca carca. Chai panica: “Sinchi cajpipish Diosta cazushcamantami paica ñucanchijta respetan” ninmi. Cambaj churi o ushushi congregacionmanta llujchishca cajpica ¿Diospichu confiashpa catinguiman? Mana cashpaca ¿cambaj yuyashcatachu ruranguiman? (Proverbios 3:5, 6). Jehová Dios disciplinajpica paipi confiashpa, pai pushachun saquishpa catishunchij. Dios disciplinachun ama jarcashunchij. w18.03 pág. 30 párrs. 12, 13

Bibliapica mashna huatacunata charishpa bautizarinataca mana huillanchu. Mateo 28:19-pica: “Ñuca yachacujcunata ruraichij” ninmi. Griego rimaipica “yachacujcunata ruraichij” nishpaca Jesusta catijcuna tucungacama yachachinatami nisha nin. Jesusta catijca Jesús yachachishcatami yachana, intindina, cazunapish can. Chaimantami yaya mamacunaca Jesusta catijcuna tucuchun, bautizarichunpish huahuacunata llullumanta yachachina can. Shinapish yuyari, shuj llullu huahuaca bautizaringapajca manaraj tucuita pajtachi tucunchu. Chaimantami mana bautizari tucun. Pero Bibliapica uchilla huahuacunapish Diospaj shimipi yachachishcacunataca intindishpami paicunapaj shungupi huaquichi tucun ninmi. Jesusta catij Timoteoca jovenraj cashpami Diosta sirvinata agllarca. Shinallataj tucui shunguhuanmi paipi crij carca (2 Timoteo 1:5; 3:14, 15). Ña casi 20 huatacunata charijpicarin apóstol Pabloca paihuan huillanaman richunmi mañarca (Hechos 16:1-3). w18.03 pág. 10 párrs. 4, 5

Diosta sirvingapajca achca cambiocunatami rurana carcanchij. Bautizarishca qꞌuipapish cambiocunata rurashpami catina carcanchij. Juchayuj cashcamantaca tucuicunami cambiocunata rurashpa catina canchij (Filipenses 3:12, 13). Jovencuna, mayorcuna cashpapish: ‘¿Dioshuan ashtahuan cꞌuchuyacushcata sintinichu? ¿Jesús shina cangapajca esforzaricunichu? ¿Ñuca ruraicunapish, rimaipish tandanacuipica imatataj ricuchin? ¿Ñuca parlashcacunahuanca imata munashcatataj ricuchini? ¿Bibliata alli estudiajchu cani? ¿Pi consejota cujpica ima shinataj chasquini? ¿Ñuca ropa churashcahuanpish imatataj ricuchini? ¿Tentacioncuna ricurijpica imatataj rurani? ¿Diosta alli rijsij, alli cazujchu tucushcani?’ nishpami tapurina canchij (Efesios 4:13). Cai tapuicunapi yuyashpami Diospajman ashtahuan cꞌuchuyacushcata o imapi esforzarina cashcata yachashun. w18.02 pág. 23 párrs. 4, 5

Cunan punllacunapica Bibliapi nishca shimicunami pajtaricun. Jehová Diosca “tucui llajtacunamanta, chꞌican chꞌican aillucunamanta, chꞌican chꞌican pueblocunamanta, chꞌican chꞌican rimaicunamanta” gentecunatami tandachicun. Chaimantami ña 8 millón yalli gentecuna cushicushpa ‘punllapish, tutapish Diospajta ruracunchij’, ‘imatapish rurai tucuj pueblomi’ canchij (Apocalipsis 7:9, 15; Isaías 60:22). Shinallataj Jehová Diostapish shujtajcunatapish cꞌuyashcatami ricuchinchij. Apóstol Pabloca: ‘Tucuri punllacunapica quiquinlla alli canata munajcuna, quiquinpajlla charinata munajcuna, Taita Diosta mashcanapaj randica aicha munaipi cushicunallatami cꞌuyangacuna’ nircami (2 Timoteo 3:1-4). Pablo nishca shimicunaca cunan punllacunapimi pajtaricun. Chaimantami Diosta mana rijsijcunaca paicunallapi yuyashpa imatapish rurancuna. Shujtajcunapish paicuna shinallatajmi rurai callarincuna. Chaimantami causaipish sinchi tucushca. Ñucanchijllapi yuyashpaca Dios cꞌuyashca shinaca mana cꞌuyai tucushunchu. w18.01 pág. 21 párrs. 1, 2

Noeca Diosta alli rijsishpami paipi tucui shunguhuan crirca, Diosmanta alli yachaitapish charirca. Chaimantami imapish Diosmanta ama caruyachichun cuidarirca. Bibliapica: “Noeca Taita Dioshuanmi purirca” ninmi. Caipi nishca shinaca Noeca Diosta mana respetajcunahuanca mana purircachu. Shinallataj millai angelcunaca jahua pachamanta uriyamushpami runa aichayujcuna tucurca. Paicunaca gentecunatapish yallimi fuerzayujcuna carca. Diosta mana rijsij gentecunaca chai angelcunatami alabasha nishcacuna canga. Pero Noeca chaita mana yuyarcallapishchu (Génesis 6:1-4, 9). Chashnallataj Noeca Jehová Dios gentecunata huahuacunayuj tucushpa cai pachapi jundarichun mandashcatapishmi yacharca (Génesis 1:27, 28). Millai angelcunapaj huahuacunaca shujtaj huahuacunamanta ashtahuan jatun, fuerzayujcunami carcacuna. Chaita ricushpami Noeca millai angelcuna gentecunapaj ushushicunahuan cazaranaca mana alli cashcata intindishca canga. Tiempo pasashca qꞌuipaca Taita Diosca millai gentecunata tucuchingapajmi jatunta tamyachigrini nirca. Noeca Diosta cazushpami jatun arcata rurarca. Chaimantami Noepish paipaj familiapish quishpirirca (Hebreos 11:7). w18.02 pág. 11 párr. 8

Shuj jatun juchata rurashca cajpica Jehová Diosca canta ayudasha ninmi. Pero, Jehová ayudachunca ancianocunapaj ayudatami mashcana cangui. Paicuna ima consejota cujpipish chasquinami cangui (Proverbios 24:16; Santiago 5:13-15, NM). Tiempo pasachun ama saquichu. Ancianocunaman utca huillai. Chashna rurashpallami huiñai causaita chari tucungui. ¿Jehová Dios juchata ña perdonashca qꞌuipa shungupi mana alli sintirishpaca imatataj rurai tucungui? Apóstol Pablota yuyarishun. Paica ñaupa pandarishcacunata yuyarishpami llaquilla sintirirca. Chaimi: “Diospaj tandanacushca crijcunata catirashpa llaquichij cashcamantaca, caishuj apostolcunapaj qꞌuipallami cani. Apóstol nishcapish mana caipajmi cani” nircami (1 Corintios 15:9). Pabloca juchayuj cashcamanta pandarijllami carca. Chaitaca Jehová Diosca allimi yacharca. Shinapish paipaj pandarishcacunamanta arrepintirijpica Diosca perdonashpami paita chasquirca. Jehová Dios perdonashcataca Pablollatajmi tucui shunguhuan crina carca. Jehová Diosca cantapish perdonai tucunmi. Chaipajca cambaj pandarishcacunamantaca arrepintirishpami Jehová Diosman huillana cangui. Jatun juchapi urmashca cashpaca ancianocunamanpishmi huillana cangui. Chaita ña rurashca cajpica Jehová Dios canta perdonashcatami tucui shunguhuan crina cangui (Isaías 55:6, 7). w18.01 págs. 7, 8 párrs. 17, 18

Diospaj alli amigo cangapajca paita uyana, paihuan parlanacunami cangui. ¿Ima shinataj chaita rurai tucungui? Bibliata estudiashpami pai nishcataca uyangui. Chaimantami Bibliatapish publicacioncunatapish liyina cangui. Qꞌuipaca liyishcapi yuyangapajmi tiempota surcunaca cangui. Bibliata estudianaca mana escuelapi examenta cungapaj ima nishcata yuyaringapajllachu. Ashtahuanpish Bibliata estudiacushpaca Jehovamanta shujtaj yuyaicunata intindingapajmi esforzarina cangui. Chashnami Jehová Diospajman ashtahuan cꞌuchuyangui. Paipish cambajman cꞌuchuyangami. Bibliata alli intindingapajmi achca ayudacuna tiyan. Por ejemplo, jw.org paginapica guías de estudio “¿Qué enseña realmente la Biblia?” nishca ayudami tiyan. Chai ayudacunahuan Bibliata yachashpaca Diospajmanmi ashtahuan cꞌuchuyangui (Salmo 119:105). w17.12 págs. 23, 24 párrs. 8, 9

Ñallami cai pachapica alli, manso gentecunalla causanga. ¿Imamantataj chaita ninchij? Bibliapica: “Tucui cai pachapimi Mandaj Diosta rijsishcahuan junda canga” ninmi. Animalcunaca Diosmantaca mana yachai tucunchu. Chaimantami cai profeciapica millai gentecuna cambianamanta parlacushcata yachanchij (Isaías 11:6, 7). Achca gentecunaca ñaupaca atujcuna shinami pꞌiña, millaicuna carca. Pero cunanca shujtajcunahuan alli apanacushpami causancuna. Ima shina paicuna cambiai tucushcata yachangapajca jw.org paginapimi “Bibliata yachashpami cambiashcacuna” nishcata ricui tucungui. Diosta sirvijcunaca ‘mushuj causaita churarishcamantami cashcata ruraj cashcatapish, Diospajlla cashcatapish, mana llullaj cashcatapish ricuchincuna’ (Efesios 4:23, 24, QC, 1989). Gentecunaca Bibliamanta yachai callarishpami Dios mandashcata cazuna alli cashcata intindincuna. Shinallataj paicunapaj panda yuyaicunata, mapa ruraicunatapish saquina cashcatami intindincuna. Cashna mana alli yuyaicunata, ruraicunata saquinaca mana jahualla canchu. Pero Diospaj espíritu ayudajpimi achcacunaca chai mana allicunata saqui tucushcacuna. Chashnami cunanca tucui shunguhuan Diospaj munaita pajtachishpa causacuncuna. w18.01 págs. 31, 32 párrs. 15, 16

Bibliapica: ‘Jahua pachapi causagrijcunaca huashan huashanmi causaringacuna’ ninmi. ¿Caimantaca imatataj yachanchij? Jehová Diosca cai Allpapi causagrijcunatapish ordenpimi huashan huashan causachinga. Caita yachashpaca cashnachari tapurishun: “¿Cunan punlla huañujcunaca ima horashi causaringacuna? ¿Jesús cai Allpata mandai callarishca qꞌuipallachu causaringacuna? ¿Paicunataca picunataj chasquinga?”. Shinallataj, “¿ñaupa punllacunapi Diospaj pueblota alli pushajcunaca causaringachu? ¿Paicunaca Diosta sirvijcuna shuj shinalla causachun ayudangacunachu?”. Cutin, “¿Diosta mana rijsishpa huañujcunaca causaringacunachu? ¿Paicunaca ima hora, maipishi causaringacuna?”. Shujtaj cosascunamantapishmi yachanata munanchij. Pero chai cosascunamanta tucuita yachasha nishpa mana preocuparinachu canchij. Preocuparinapaj randica Dios imata rurajta ricungacamami shuyana canchij. Chai punlla chayangacamaca Diospi tucui shunguhuan cringapajmi ashtahuan esforzarishpa catina canchij. Jesusca: ‘Diosca paipaj yuyaipi cajcunataca causachingatajmi’ nircami (Juan 5:28, 29; 11:23). w17.12 pág. 14 párrs. 20, 21

¿Pablopaj consejocunata catishpaca cambaj familiaca ima shinataj causacun? Bibliaca: “Cusacuna, cancunapaj huarmicunata cꞌuyaichij. Paicunahuanca ama millaicuna caichijchu” ninmi. Cusaca paipaj huarmi ima nishcata alli uyashpa, valorashpami cꞌuyashcata ricuchin (1 Pedro 3:7). Huarmi tucui ima nishcata mana rurai tucushpapish pai imata yuyashcatami tapuna can. Chashnami alli decisioncunata japinga (Proverbios 15:22). Cusaca paipaj huarmitaca, ‘ñucataca respetanatajmi cangui’ nishpa mana rimanachu can. Ashtahuanpish cꞌuyaihuan tratajpica huarmillatajmi respetota ricuchinga. Shuj cusa paipaj huarmita huahuacunata cꞌuyaihuan alli tratajpica tucuicunachari cushilla Jehová Diosta sirvisha ningacuna. Shinami paicunapish Dios cusha nishca bendicioncunata japingacuna. w17.11 págs. 30, 31 párrs. 12, 15

Apóstol Pabloca Roma llajtapimi punta cutin prezu cashpa Colosas llajtapi caj huauquicunaman shuj cartata escribirca. Tal vez huata 60 o 61-pimi chai cartataca escribishcanga. Chaipica Jehová shina yuyanatami yachachirca (Colosenses 1:9). Chai cartapica: ‘Caitaca crinalla shimicunahuan huillaj tucushpa cancunata pipish ama umachunmi chashnaca nini. Riquichij yanga yachaicunahuan, ñaupamanta runacuna apamushca chushaj yuyaicunahuan, manapish Cristopaj caj, cai pacha yuyaicunahuanca pipish cancunataca ama umachun’ nircami (Colosenses 2:4, 8). Chai qꞌuipaca cai mundopaj yuyaicunata charinaca mana alli cashcatami intindichirca. Shinallataj chai panda yuyaicunata gentecuna imamanta munaj cashcatami ricuchirca. Por ejemplo, achca gentecunaca shujtajcunata yalli, yachaisapa cashcatami yuyajcuna carca. Chaimantami apóstol Pabloca cai mundopaj yuyaicunamanta, shujtaj mana alli cosascunamanta jarcarinata yachachirca (Colosenses 2:16, 17, 23). w17.11 pág. 21 párr. 1

¿Dios ñucanchijta llaquishpa catichunca imatataj rurana canchij? Imata ruranata munashpapish juchapi urmachigrijpica utcami caruyana canchij (Mateo 18:9). Por ejemplo, ñucanchij amigocuna mana allita rurajcuna cajpica paicunahuan apanacunatami saquina canchij. Shinallataj tragota yalli ubyanamanta jarcarinaca sinchichari ricuringa. Chaimantami maipi cashpapish pihuan cashpapish ama yalli ubyangapaj cuidarina canchij. Huainayana yuyaicunamanta jarcarinapish sinchichari ricuringa. Chaimantami Internetpi, televisionpi mapa cosascunata mana ricuna canchij. Mana cazushpa Diosmanta caruyashpaca llaquimi causashun. Pero paipaj ñaupajpi alli ricuringapaj esforzarishpaca cushillami sintirishun. Shinami Diosca ñucanchijtaca huiñaipaj llaquishpa cꞌuyanga (Isaías 54: 7, 8). w17.11 pág. 12 párr. 12

Zacarías 5:4-pica, ‘jatun llaquica shuhuacunapaj huasimanpish yaicungami’ ninmi. ¿Caica imatataj nisha nin? Paita sirvijcuna ima juchata pacalla rurajpipish Jehová Diosca ricucunmi. Chaimantami ima horapish chai juchacunata ricuchishpa juzganga. Policiacunata, jefecunata, ancianocunata, yaya mamacunata umashpachari juchacunata pacai tucushun. Pero Diosmantaca mana pacai tucushunchu. Ima horapish yachaj chayaringami (Hebreos 4:13). Testigo de Jehovacunaca tucuipi honrados cangapajmi esforzarinchij. Chaimantami huauqui panicunahuan Diosta tandalla cushicushpa sirvinchij (Tito 2:10). Ashallata shuhuana o achcata shuhuanaca Diospaj ñaupajpica mana allichu. Ñucanchijca Diospaj Shimita yachashpa, pai mandashcata cazushpami cushilla causanchij. Jehová Dios mandashca shina causashpami paipaj shutita jatunyachinchij. Shinallataj mana alli gentecunata tucuchicui punllapica mana llaquita apashunchu. w17.10 págs. 16, 17 párrs. 6, 7

Shuj huauqui o shuj pani mana allita rurashpa ñucanchijta pꞌiñachijpipish o llaquichishcata yuyashpapish paicunahuan alli apanacungapajmi esforzarina canchij (Romanos 12:17, 18). Ñucanchij imapi pandarishpa shujtajcunata pꞌiñachishpaca shungumantami perdonahuai nina canchij. Cazadocunapish alli apanacushpa causangapajmi shuj esfuerzota rurana can. Por ejemplo, huaquin cazadocunaca shujtajcunapaj ñaupajllapimi cꞌuyanacushpa causaj laya purincuna. Pero huasipica mana parlanacunllapishchu, ashtahuanpish rimanacushpalla, macanacushpallami causancuna. Chashna causashpaca Diospaj ñaupajpi mana alli ricurincunachu. Pi ñucanchijta pꞌiñachijpica resintirishca puricunapaj randica perdonanami canchij. Shungumanta perdonajcuna cangapajca shujtajcunapaj pandarishcacunata mana yuyaipi charicunallachu canchij (1 Corintios 13:4, 5). Huauqui panicuna pandarishcata mana cungarishpaca Diosmantapish paicunamantapishmi caruyashun (Mateo 6:14, 15). w17.10 pág. 7 párrs. 14, 15

¿Zacarías huillashca profeciaca ima shinataj israelitacunapajca ricurirca? Jehová Diosca templota tucuchichunmi ayudasha, cuidasha nircapish. Chaimi paicunataca ñaupajman catichun animashcanga. Ashallacuna cashpami chai tucuita ruranataca manchashcacuna canga. Chaimantami Jehová Diosca: ‘Achca runacunami Heldai, Tobías Jedaias shina ñuca huasita shayachichun ayudanga’ nirca. Zacarías chaita huillajpimi israelitacunaca manchanata saquishcacuna canga. Jehová ayudanatami israelitacunaca crircacuna. Chaimantami Persia llajtata mandaj jarcasha nijpipish cutin trabajai callarircacuna. Jehová Diosmi paicunapaj jarcaicuna jatun urcu shina cajpipish tucuita anchuchirca. 515 huatapimi templotaca shayachinata tucuchircacuna (Esdras 6:22; Zacarías 4:6, 7). Cai profeciacunaca cunan punllacunapipish pajtaricushcatami ricunchij. w17.10 pág. 26 párr. 17

Jehová Diosca Jerusalenpimi paipaj huasita shayachisha nirca. Chai huasita alli rurachunmi Salomonta agllarca. Shinallataj Jehová Diospaj huasica tucuicuna rijsishca, jatun, sumaj huasimi cana carca (1 Crónicas 22:1, 5, 9-11). Salomonta Jehová Dios ayudanatami rey Davidca yacharca. Pero Salomonca huambrarajmi carca. Experienciatapish mana charircachu. Chaimantami Davidca preocuparirca. ¿Salomonca Diospaj huasita rurachun mingajpica mana manchashpachu pajtachirca? ¿Huambraraj cashpapish, mana achca experienciata charishpapish Dios mingashcataca pajtachircachu? Salomonca tucui alli llujshichun munashpaca sinchi tucushpami trabajana carca. Salomón manchaita charishpaca Diospaj huasitaca manachari shayachi callarinman carca. Manchaimanta Diospaj huasita mana rurai callarishpaca Diospaj ñaupajpi mana alli ricurinmanchu carca. Dios ayudajpimi Salomonca paiman mingashcata mana manchashpa pajtachirca. Ñucanchijpish Diospajta mana manchashpa pajtachingapajca paillataj ayudachunmi minishtinchij. w17.09 págs. 27, 28 párrs. 1, 2, 4, 5

Biblia mana tiyajpica alli causangapaj imata ruranataca mana yachanchijmanchu. Diosmantapish mana yachai tucunchijmanchu. Jehová Dios ñaupa punllacunapi imata rurashcata, shamuj punllacunapi imata ruranatapish mana yachanchijmanchu. Jehová Dios Bibliata cushcamantami agradicinchij. Paica, ñuca nishcacunaca manataj chingaringachu nircami. Apóstol Pedroca Isaías 40:8-mantami parlarca. Cai versopica Biblia libromantaca mana parlanchu. Ashtahuanpish chaipi tiyaj consejocunamantami parlan (1 Pedro 1:24, 25). Jarcaicuna tiyajpipish maijancunaca Bibliata traducishpami tucuicuna charichun esforzarishcacuna. Chashnami Diospaj munai pajtarichun ayudashcacuna. Paica ‘tucui runacuna quishpirichun, mana llullata yachaj chayachunmi munan’ (1 Timoteo 2:3, 4). w17.09 pág. 15 párrs. 1, 2

Diosta sirvij mosocunapish, solteracunapish José shinallatajmi huaquin tentacioncunata charincuna (Génesis 39:7). Kim shuti solteramanta parlashun. Colegiopi compañerocunaca sábado y domingopi pihuan siririshcatami parlajcuna carca. Pero Kimca paicuna laya mana rurashcamantami mana chashna parlai tucurca. Kimca: “Huaquinpica ñucallami sintirij carcani. Ñuca compañerocunaca, ‘¿manarajchu enamoradota charingui? ¿muspachu cangui, imamí?’ nijcunami carca” ninmi. Kimca jovenpi huainayana juchapi urmana jahualla cashcataca allimi yacharca (2 Timoteo 2:22). Paipaj compañerocunaca “¿manarajchu pihuan siririshcangui?” nishpami tapujcuna carca. Chashna tapujpica imamanta mana chaita rurashcataca Kimca Bibliahuanmi yachachij carca. Huainayana juchapi ama urmangapaj jovencuna esforzaricushcamantami cushicunchij. Jehová Diospish cushillami sintirin. w17.09 pág. 5 párrs. 8, 10

Achca gentecunaca imamantapish jahualla pꞌiñarishpami mana allita rimashpa llaquichincuna. Chashna jahualla pꞌiñarijpica tucui familiami llaquilla causan. Bibliaca pꞌiñarinata, mana allita rimanata, cꞌaminata saquichij nishpami mandan (Efesios 4:31). Huaquin gentecunaca chashna pꞌiñarina, cꞌaminaca mana juchachu can nincunami. Pero Jehová Diostami pingaipi churancuna. Huaquin gentecunacarin rato pꞌiñarij, cꞌamij cashcamantami shujtajcunata llaquichishcacuna. Chaimantami Diosta sirvijcunaca chai mana allicunata saquishpa mushuj ropata churarij shina cambiashcacuna (Colosenses 3:8-10). Shinallataj llullashpaca ñaupa causaita charishcatami ricuchishun. Achca gentecunaca impuestocunata mana pagangapajmi llullancuna. Ima mana allita rurashcamanta ama malpi quedangapajpishmi llullancuna. Pero Diosca mana paicuna shinachu can. Paica ‘mana llullaj Diosmi can’ (Salmo 31:5, QC, 1989). Chaimantami paita sirvijcunataca, ‘llullanata saquishpa, tucuicuna caishujta chaishujta ama llullanacushpa parlanacuichij’ nishpa mandan (Efesios 4:25; Colosenses 3:9). Shinaca sinchi cajpipish o pingai tucuna cashpapish mana llullanachu canchij (Proverbios 6:16-19). w17.08 págs. 16, 18, 20 párrs. 3, 5, 12, 13, 15

Cunan punllacunapica Jehová Diosca Bibliahuan yachachishpami ñucanchijta ayudan. Salmota escribijca, ‘Diospaj Shimica utcami tucuita rin’ nircami. ¿Chaita nishpaca imatataj nicurca? Minishticushca rato Jehová Dios ayudaj cashcatami nicurca. ¿Ima shinataj Diosca ayudan? Bibliahuan, JW Broadcasting programacunahuan, Internetpi jw.org paginahuan, congregacionpi ancianocunahuan, shujtaj huauqui panicunahuanpishmi ayudan. Shinallataj ‘alli cazuj, alli yuyaiyuj sirvij’ nishca huauquicuna rurashca publicacioncunahuanpishmi ayudan (Mateo 24:45). ¿Cantapish minishticushca rato Jehová Dios ayudashcachu? Jehová Diosca israelcunata paipaj llajta cachunmi agllarca. Israelcunallamanmi Diosca paipaj Shimita, pai mandashcacunata yachachij carca. Salmo 147-ta escribijca caitaca allimi yacharca (Salmo 147:19, 20). Cunanpish Jehová Diosca paipaj testigocuna cachunmi ñucanchijta agllashca. Paipaj Shimita yachachishcamanta, paipaj ñaupajpi alli ricuringapaj ayudashcamantami Diosta pagui ninchij. Jehová Diosca tucuitami cushca. Chaimantami Salmo 147-ta escribij layallataj Jehová Diosta alabasha ninchij. Shinallataj shujtajcunapish Diosta alabachunmi ayudashun ninchij. w17.07 págs. 19, 20 párrs. 15, 16, 18

Cunan punllacunapica precursorcunapish, betelitacunapish, shujtaj huauqui panicunapishmi Pablo nishcata cazuncuna. Paicunaca mana charinallata yuyancunachu. Ashtahuanpish Proverbios 22:7-pi nishcatami yuyarincuna. Chaipica: ‘Cullquita surcujcunaca cullquiyujpajta rurajmi tucun’ ninmi. Maijancunaca huasita shayachingapaj, carrota randingapaj, estudiangapaj, o bodata rurangapajmi achcata deudarishcacuna. Diabloca chaicunallapi ocuparichunmi munan. Yangamanta dibiyashpaca achca huatacunatami pagana tucunga. Alli yachajcuna cashpaca minishtishcallahuanmi causashun. Shinallataj mana dibiyangapajmi fuerzarishun. Chashnami cai pachapi charijyana munaita saquishpa Diosta ashtahuan sirvishun (1 Timoteo 6:10). w17.07 pág. 6 párr. 13

Jehová Diosca cashcata ruraj Diosmi can. Chaimantami pailla mandana can. Paillatajmi: ‘Ñucaca Jehovami cani. Cai pachapipish ñucaca cꞌuyaihuanmi allita rurani. Chaita rurashpami cushicuni’ ninmi (Jeremías 9:24, NM). Diosca tucuitami allita ruran. Chaimantami ima alli cashcata o ima mana alli cashcata yachangapajca runacunapaj leycunata mana minishtin. Pai cushca leycunaca mana pandachu. Bibliaca ninmi: “Can mandacuntaca cashcata rurashpa allita mandanami pilarcuna shina charicun” ninmi. Chaimantami Diospaj tucui leycunaca mana panda cashcata yachanchij (Salmo 89:14, QC, 1989). ‘Diosca mana alli mandajchu’ nishpapish Diabloca cai pachapi mana alli ruraicunataca mana anchuchi tucushcachu. w17.06 pág. 22 párr. 5

“Mana llullaj Diosmi” ñucanchijtaca yachachishca (Salmo 31:5). Jehová Diosca mana mitsashpa cuj Yayami can. Chaimantami sumajta yachachin. Cunancamaca Bibliata, publicacioncunata liyishpa, tandanacuicunaman rishpami Diosmanta yachashcanchij. Jesús parlashca shinaca mauca charinacunatapish mushuj charinacunatapish huaquichij shinami Diosmanta achcata yachashcanchij (Mateo 13:52). Dios yachachishcacunata orota, cullquita shina mashcajpica paillatajmi ashtahuan yachachun ayudanga (Proverbios 2:4-7). ¿Ima shinataj orota, cullquita shina mashcashun? Bibliatapish, publicacioncunatapish alli intindingacamami punllanta estudiana canchij. Chashnami mushuj yuyaicunata yachashun (Josué 1:8, 9; Salmo 1:2, 3). Diosmanta ashtahuan yachangapajca mashcashpami catina canchij, mana ña yachashcallahuan saquirinachu canchij. w17.06 pág. 13 párrs. 13, 14

Huauqui Eduardoca asha preocupado cashcatami shuj cazado ancianoman huillarca. Eduardoca 1 Corintios 7:28-pi nishcatami yuyacushca carca. Chai versopica, ‘cazarashcacunaca llaquicunatami charingacuna’ ninmi. Chaimantami Eduardoca chai ancianotaca: “¿Chai ‘llaquicunaca’ imataj can? ¿Ñuca cazarashpaca ima shinataj chai llaquicunata chꞌimbapurasha?” nishpa tapurca. Huauqui ancianoca manaraj chai tapuicunata cutichishpami Eduardotaca: “2 Corintios 1:3, 4-pi ima nishcatapish yuyarinami cangui. Chaipica: ‘Yaya Diosca, ñucanchijta jatunta llaquij Yayami, tucui imapipish cushichij Diosmi’ ninmi” nircami. Jehová Diosca cꞌuyaj Yayami can. Llaquicunahuan cajpica ñucanchijta cushichishpami ayudan. ¿Bibliapi consejocunahuan Jehová Dios quiquinta ima shina ayudashcata yuyaringuichu? Ñaupa punllacunapi paita sirvijcunata ayudashca shinallatajmi ñucanchijtapish ayudasha nin (Jeremías 29:11). w17.06 pág. 3 párrs. 1, 2

Shujtaj llajtamanta miticushpa shamuj Testigocunaca mana micunallata, ropallata minishtinchu. Paicunaca cushichichunmi minishtin. Diosmanta ama caruyangapajpish ayudachunmi minishtin (Mateo 4:4). Ancianocunaca paicunapaj shimipi publicacioncunata charichunmi ayudai tucun. Paicunapaj shimita parlaj huauqui panicunata rijsichishpami ayudai tucun. Shujtaj llajtamanta shamujcunaca tucuita saquishpami shamuncuna. Chaimantami paipaj llajtata, congregacionta, familiata yuyarishpa llaquilla sintirincuna. Paicunata llaquijpi, cꞌuyaita ricuchijpica Jehová Dios paicunata cꞌuyashcatami ricungacuna. Cꞌuyaita mana ricuchijpica llajtapura Diosta mana sirvij gentecunapaj ayudatami mashcangacuna (1 Corintios 15:33, QC, 1989). Ashtahuanpish paicunata alli tratashpaca “caru llajtamanta cajcunata” cuidashpami Jehová Diosta ayudacunchij. Caru llajtamanta shamujcunaca paicunapaj llajtamanca manachari tigrai tucungacuna. Huaquincunataca paicunapaj llajtacunapica achcatami llaquichishcacuna. Chaimanta, ‘¿ñucanchij chashna llaquita apacushpaca ima shinataj tratachun munanchijman?’ nishpami yuyarina canchij (Mateo 7:12). w17.05 pág. 7 párrs. 15, 16

Cai mundota Diablo mandacushcamantami maijan ratoca triste tristella purinchij (1 Juan 5:19). Pero yallitaj llaquilla purishpaca Diosmanta caruyai tucunchijmi. Maipica cullquita mana charishcamanta, ungushca cashcamanta o yuyaj cashcamantachari problemacunata charinchij. Mana cashpaca imatapish alli rurasha nishpa mana rurai pudishcamantachari llaquirinchij. O imapish ñucanchij munashca shina mana pajtarishcamantachari llaquirinchij. Ima problemacunata charijpipish Jehová Diosca ñucanchijta manataj cungarinchu. Salmo 136:23-pica: ‘Ñucanchij llaquihuan cajpica Diosca ñucanchijta yuyarircami. Pai llaquij canaca huiñaipajmari’ ninmi. Diosca ñucanchij mañashcacunataca uyanmi. Chaimanta ima llaquicunata charishpapish Diosta rogarishpami mañana canchij. Paica ñucanchij mañashcacunata cutichingami (Salmo 116:1; 136:24-26). w17.05 pág. 17 párr. 8

Gálatas 2:11-14-pi nishca shinaca Pedroca shujtajcunata manchashcamantami pandarirca (Proverbios 29:25). Mana judiocunata Jehová Dios chasquishcata Pedroca allimi yacharca. Shinapish Jerusalenmanta shamuj huauquicuna imata yuyanata manchashpami mana judío crijcunamanta caruyarca. Apóstol Pabloca Pedrotaca: ‘Jerusalenpica mana manchashpami mana judiocunata difindircangui, ¿imamantataj cunanca chashna puricungui?’ nishpami rimarca (Hechos 15:12; Gálatas 2:13). Pablo cunashcataca Pedroca allimi chasquirca. Pedro chashna pandarishpapish Jesús mingashcacunata ruranata saquishcataca Bibliapica mana parlanchu. Ashtahuanpish Jehová Diosca ishqui cartacunata quillcachunmi mingarca. Chai cartacunaca Bibliapimi tiyacun. Pedro chashna pandarijpipish Jesusca shujtaj ruraicunatami paiman mingashpa catirca (Efesios 1:22). Jehovapaj, Jesuspaj ejemplota catishpami mana judío crijcunaca Pedrotaca perdonana carca. Shuj juchayuj runa pandarishcamanta mana judío crijcunapuramantaca shujllapish Diosmantaca manachari caruyarcacuna. w17.04 págs. 25, 26 párrs. 16-18

Qꞌuipa punllacunapipish Diosta mana manchashpa causajcunatapish, ima shina llaquichina cashcata ricuchingapajmi Diosca Sodoma Gomorratapish llaquichirca. Ima shinami Lot causacun punllacunapi huainayaj gentecunata chingachirca, chashnallatajmi millaita rurajcunataca Diosca chingachinga. ¿Millai ruraicuna tucurijpica causaica ima shinashi canga? Paraíso Allpapica achca trabajomi tiyanga. Por ejemplo, cai Allpa sumaj, verdijlla cachunmi tucuicuna tandalla cushilla trabajashun. Ñucanchijpajpish, shujtajcunapajpish huasicunatami shayachishun. Huañushcacuna causarijpica paicunatapish chasquishunmi. Ashtahuancarin paicunamanca Diosmantami yachachishun, pai ñucanchijmanta tucuita rurashcatapishmi yachachishun (Isaías 65:21, 22; Hechos 24:15). Paraíso Allpapica ima trabajota rurashpapish cushillami causashun, Jehová Diostapish jatunyachishunmi. w17.04 pág. 13 párrs. 11, 12

Jefteca Diosman cusha nishpaca paipaj ushushi paita tupanaman shamuna cashcatami ña yuyashcanga. Chashnapish ima nishcata pajtachinaca paipajpish paipaj ushushipajpish sinchimi cashcanga. Jefteca paipaj ushushita ricushpaca shungu pꞌaquirishca shinami sintirirca. Paipaj ushushipish huacanamanmi rirca. ¿Imamantataj huacanaman rirca? Paica “mana cazarashpa” huahuacunata mana charishpami tucui vida Diospaj huasipi causana carca. Jeftepish shujtaj huahuacunata mana charishcamantami paipaj familiapaj shutica chingarina carca. Pero Jeftepish paipaj ushushipish mana paicunallapi yuyajchu carca. Ashtahuanpish Jefteca: “¡Mandaj Diosman ñuca shimihuantaj nishcataca maitataj pꞌaquishari!” nircami. Paipaj ushushipish: “Cambaj shimihuan Diosman imata cusha nishca cashpaca ñucata cushpa pajtachilla” nircami (Jueces 11:35-39). Jeftepish paipaj ushushipish Diosta cazujcunami carca. Chaimantami sinchi ricurijpipish paicuna pajtachisha nishcataca Diospaj ñaupajpi manataj pꞌaquircacuna (Deuteronomio 23:21, 23; Salmo 15:4). w17.04 pág. 4 párrs. 5, 6

Joseca ima mana allitaca mana rurarcachu. Pero achca llaquicunatami charirca. Puntapica, 17 huatacunallata charijpimi paipaj huauquicunaca cꞌatushpa Egiptoman cacharca. Qꞌuipaca “amopaj huarmitami violasha nicushca” nishpami juchachircacuna. Llulla cajpipish carcelpimi Josetaca churarcacuna (Génesis 39:11-20; Salmos 105:17, 18). Diosta tucui shunguhuan sirvicujpipish bendicioncunata chasquinapaj randi llaquicunata charishca layami ricurishca canga. Pero 13 huatacuna qꞌuipaca paipaj causaica cambiarcami. José carcelmanta llujshishca qꞌuipaca Faraonca Josetaca tucui Egipto llajtata mandachunmi churarca. Faraonllami Josemantaca ashtahuan jatun mandaj carca (Génesis 41:14, 37-43; Hechos 7:9, 10). ¿Joseca llaquicunahuan cashpaca yallitajchu llaquirirca? ¿Diospi crinata saquircachu? ¿Imamantataj paica mana pꞌiñarishpa shuyanata minishtirca? Joseca Jehová Dios tucui llaquicunata anchuchina cashcatami crirca. Chaimantami paipaj huauquicunataca cashna nirca: ‘Cancunaca ñucataca llaquichinchijmi yuyarcanguichijchari, ashtahuanpish cancuna chashna rurashcataca Taita Diosca achcacuna ama huañuchunmari cunan ricushca allita rurarca’ nircami (Génesis 50:19, 20, QC, 1989). w17.08 págs. 4, 6, 7 párrs. 6, 12, 13