Abril

Ancianocunaca ñucanchijpaj “allicuna” o regalocuna shinami can. ¿Paicuna cushca ayudamantaca ima shinataj beneficiari tucunchij? Paicunaca sinchi crijcuna, alli ejemplomi cancuna. Chaimanta paicuna shina cangapaj esforzarishunchij. Shinallataj Bibliapi tiyaj yuyaicunahuan consejota cujpica paicunata cazushunchij (Hebreos 13:7, 17). Congregacionpi ancianocunaca ñucanchijta cꞌuyashpami Dioshuan alli amigocuna cachun munan. Por ejemplo, tandanacuicunaman faltacujta cuentata cushpa o llaquilla cajta ricushpaca paicunaca ratitomi ayudancuna. ¿Ima shinataj ayudancuna? Ñucanchijta alli uyashpa, animashpa, Bibliapi tiyaj consejocunata yuyachishpami ayudancuna. ¿Ancianocuna ayudajpica Jehová Dios canta cꞌuyashcata sintishcanguichu? Ancianocunapajca huaquinpica consejota cunaca mana jahualla ricurinchu. Shinaca consejota cuna ancianocunapaj jahualla cachunca ¿imatataj rurai tucunchij? Humildes cashunchij, chashnallataj paicunata alli uyashunchij, ima consejota cujpipish agradicishunchij. Paicuna ayudajpica Jehová Dios canta cꞌuyashpa ayudacushcata ricui. Chashna rurashpami achcata beneficiarishun, ancianocunapish cushillami ayudashpa catingacuna. w18.03 pág. 31 párrs. 15, 16

Yaya mamacunaca huahuacuna ña bautizarichunca mana obliganachu can. Tucui huahuacunami chꞌican chꞌican can. Por ejemplo, maijancunaca huahuaraj cashpapish ima alli cashcata o ima mana alli cashcata intindishpami bautizarisha nincuna. Cutin shujtajcunaca ashtahuan tiempotami minishtincuna. Yaya mamacunaca caitami alli intindina can. Cancunapaj huahuacuna Proverbios 27:11-pi nishcata pajtachijpica cushillami sintiringuichij. Pero cancunapaj huahuacuna Jesusta catijcuna tucuchun ayudanataca mana cungarinachu canguichij. Chaipajca cashna tapurichij: “¿Ñuca huahuaca Diosman mingarishpa bautizaringapajca ñachu minishtirishca yachaicunata yachan?”. w18.03 pág. 10 párr. 6

Maijan “ñuca huasiman shuj ratitota shamupangui” nijpica ¿imatataj rurana canchij? Ari nishca jahua yangamanta mana pajtachinaca mana allichu can. Maijan invitashpaca ñucanchijta chasquingapaj achca esfuerzotami rurashca canga. Mana rishpaca paicuna rurashcata mana valichishcatami sintichishun (Mateo 5:37). Maijancunaca ari nishca jahuami shujtaj invitación alli ricurijpi mana nincuna. Chashna rurashpaca mana cꞌuyashcata, mana respetashcatami ricuchishun. Chaita ruranapaj randica tucui shunguhuanmi pagui nishpa paicuna cushcata chasquina canchij (Lucas 10:7). Manataj ri tucushpaca ñucanchijta invitajmanmi “mana ri pudishachu” nishpa utca huillana canchij. Chashnami cꞌuyaj cashcata, paicunamantapish preocuparishcata ricuchishun. Shinallataj maipi causashca costumbrecunata respetanami canchij. Por ejemplo, maijan ladocunapica mana huillashpa huasiman chayajpica mana pꞌiñarincunachu. Cutin shujtaj ladocunapica manaraj visitanaman rishpami huillanaraj can. Maijan ladocunapica shuj, o ishqui cutin alli shimicunahuan mana nishca huasha ari ninami alli ricurin. Cutin shujtaj ladocunapica chaita ruranaca mana agradicijcuna cashcatami ricuchincuna. Maijan costumbreta charijpipish ñucanchijta invitajcunapish cushicuchunmi esforzarina canchij. w18.03 pág. 20 párrs. 20, 21

Dioshuan alli apanacuj cangapajca mana Bibliata alli yachanalla minishtirinchu (1 Reyes 4:29, 30; 11:4-6). Chaimantami Bibliamanta alli yachashpapish Diospi ashtahuan cringapaj esforzarishpa catina canchij (Colosenses 2:6, 7). Chaipajca “Yaya Diosta cꞌuyashpa cati” librotami estudiana canchij. Cai librota estudiashpaca ñucanchij causaipi Bibliapi mandashcacunata ima shina pajtachinatami yachashun. Cai librota ña estudiashca cashpaca sinchi crij cangapajmi shujtaj publicacioncunata estudiana canchij (Colosenses 1:23). Shinallataj cutin cutinmi chai yachashcacunapi yuyana canchij. Yachashcacunata pajtachingapajpishmi ayudachun Diosta mañana canchij. Diospaj ñaupajpi alli ricurina munaihuan, paita tucuipi cazuna munaihuanmi estudiana, yachashcapi yuyanapish canchij (Salmo 40:8; 119:97). Shinallataj Diospajman ashtahuan cꞌuchuyangapaj ima jarcaicunamantapishmi caruyana canchij (Tito 2:11, 12). w18.02 pág. 24 párrs. 7-9

¿Ima shinataj Noé shina Diospi cri tucunchij? Bibliata allimi estudiana canchij. Diospaj yachaicuna ñucanchij shunguman chayachunmi esforzarina canchij. Chai qꞌuipaca yachashcata pajtachinami canchij. Alli decisioncunata japingapajpishmi esforzarina canchij (1 Pedro 1:13-15). Shinaca Diospaj yachaita charishpa, paipi tucui shunguhuan crishpaca Diablopaj trampacunapi mana urmashunchu. Cai mundopi gentecuna shina mana causashunchu (2 Corintios 2:11, NM). Achca gentecunaca millaita rurashpa, huainayashpa, mana alli munaicunallata rurashpami causancuna (1 Juan 2:15, 16). Shinallataj Bibliapi nishcacuna tucui pajtaricushcata ricushpapish Jehová Diospaj punlla ñalla chayamucushcataca cungarincunami. Yuyashun, Jesusca tucuri punllacunaca Noepaj punllacuna shinami canga nircami. Paica millai gentecuna canamanta o huainayaj canamanta mana parlacurcachu. Ashtahuanpish Diosta sirvinata ama saquingapaj cuidadota charinamantami parlacurca (Mateo 24:36-39). Chaimanta cashna tapurishunchij: “¿Ñuca causaipi Diosta alli rijsishcata ricuchicunichu? ¿Diospi crishcamanta pai mandashcacunata cazucunichu? ¿Dios mandashcacunata shujtajcunaman yachachicunichu?”. Cai tapuicunata cutichishpami quiquinllataj Dioshuan puricushcata o mana puricushcata yachangui (Génesis 6:9). w18.02 págs. 11, 12 párrs. 8-10

Ñucanchijcunaca Diosta mana rijsij gentecunapurapimi causana, trabajana, estudianapish canchij. ¿Shinaca imatataj rurai tucunchij? Paicuna shina ama yuyangapaj, ama rurangapajmi cuidari tucunchij. Chaipajca Diospajman ashtahuan cꞌuchuyangapajmi Bibliata estudiana canchij. Shinallataj Diosta tucui shunguhuan sirvij amigocunatami mashcana canchij. ¿Diosta sirvijcunaca imatataj ashtahuan rurai tucunchij? Diosmanta yachachunmi shujtajcunatapish ayudana canchij. Chaimantami tucui gentecunaman huillangapaj esforzarina canchij. Gentecunaman alli shimicunahuan parlangapajmi Jehová Diosta ayudahuai nishpa mañana canchij. Shinallataj maipi cashpapish testigo de Jehovacuna cashcatami huillana canchij. Allicunata rurashpaca Jehová Diostami jatunyachishun. Jehová Diosca ‘cai pachapaj millai munaicunatapish saquishpa, alli yuyaihuan cashcata rurachun, paipajlla causachunmi yachachin’ (Tito 2:11-14). Jehová Dios shina cꞌuyaita ricuchijpi, paipaj mandashcacunata cazujpica shujtaj gentecunaca: ‘Diosca cancunahuan cashcatami yachaj chayashcanchij. Chaimantami cancunahuan rishun ninchij’ ningacunachari (Zacarías 8:23). w18.01 pág. 32 párrs. 17, 18

Pabloca ¿ñucanchij alli canata mashcanaca mana alli cashcatachu nicurca? Mana. Jehová Diosca ñucanchijllataj alli canata mashcachun o ñucanchijllataj cꞌuyarichunmi rurarca. ¿Imamantataj chaita ninchij? Jesusca: “Can quiquinta shinallataj shujtajcunatapish cꞌuyangui” nircami (Marcos 12:31). Shinallataj Bibliapica: ‘Cusacunaca quiquin cuerpota shinami paicunapaj huarmicunata cꞌuyana can. Maijanpish paipaj huarmita cꞌuyajca, paillatajmi cꞌuyarin. Paipaj quiquin cuerpotaca,pi manataj pꞌiñanchu. Ashtahuanpish allimi micun, allimi cuidan’ ninmi (Efesios 5:28, 29). Cai versocunapi ricushca shinaca ñucanchijllataj mana cꞌuyarishpaca shujtajcunata mana cꞌuyai tucushunchu. Shinashpaca ñucanchijllataj alli canata mashcana alli cajpipish mana chaillapi yuyashpa causanachu canchij. Quiquinlla alli canata munajcunaca shujtajcunamanta yalli cashcatami yuyancuna (Romanos 12:3). Chashna gentecunaca shujtajcunamanta mana preocuparincunachu. Ashtahuanpish ima mana alli llujshijpicarin pi shujtajtami juchachincuna. Paicuna culpata charishcataca mana reconocincunachu. Paicunallapi yuyashcamantami mana alli causancuna. Caipi ricushca shinaca, 2 Timoteo 3:2-pi parlashca gentecuna shina canaca mana allichu can. Chashna gentecunaca mana cushilla causancunachu. w18.01 pág. 22 párrs. 4, 5

Bibliata alli estudiashpami Diostaca uyanchij. Cutin, ¿paihuan parlasha nishpaca imatataj rurana canchij? Diostami mañana cangui. Pero mana imapish alli llujshichun nishpalla chaillatataj chaillatataj ninachu cangui. Diosta mañacushpaca paihuanmi parlanacunchij. Jehová Diosca cambaj mañashcacunata uyasha ninmi (Filipenses 4:6). Achca huauqui panicunami problemata charishpaca Salmo 55:22-pi nishcata pajtachishcacuna. Chaipica: ‘Cambaj llaquitaca, Mandaj Diosman mingai’ ninmi. Canpish cambaj llaquicunata Diosman mingashpaca tranquilomi sintiringui. Diostaca mana llaquicunallapi cashpachu mañana cangui. Paitaca siempremi mañana cangui. Huaquinpica achca llaquicunata charishcamantachari Diospaj bendicioncunamanta pagui ninata cungarinchij. Shinashpaca ¿imatataj rurai tucungui? Cada punlla quimsa cosascunallamantapish Diosta pagui ningapaj esforzari. w17.12 pág. 24 párrs. 10, 11

Cada huatami achca gentecunaca Diosman mingarishpa bautizarincuna. Huaquincunaca mosocuna, solteracunami can. Paicunata uchillamantapacha yaya mama Bibliata yachachishcamantami Jehovata sirvinata agllashcacuna (Salmo 1:1-3). Diosta sirvij yaya mamacunaca paicunapaj huahuacuna bautizarichunmi munancuna (3 Juan 4-ta ricui). Yaya mamacunaca ‘Dios Quillcachishca sumaj shimicunata’ huahuacuna yachachunmi munan. Cai ‘Quillcachishca sumaj shimicunaca’ tucui Bibliami can. Huahuacuna uchillaraj cajpipish ñaupa punllacunapi Diosta sirvijcunamantami yachachi tucunguichij. Diospaj pueblopica huahuacunaman yachachingapajca videocuna, librocuna, folletocunapishmi tiyan. Bibliamanta alli yachachijpimi huahuacunaca Jehová Dioshuan alli apanacungacuna. w17.12 págs. 15, 16 párrs. 1, 4

Shuj panica, ‘ñuca mana crij cusaca mana alli tratanchu’ nishpachari yuyan. ¿Chai panica imatataj rurai tucun? ¿Paihuan chꞌimbapurashpachu tucuita allichinga? Mana. Cusa paita alli tratai callarishpapish manachari Jehová Diosta sirvisha ninga. Pero paipaj cusa familiata pushaj cashcamanta respetashpami familia alli causachun, Diostapish sirvichun ayudanga. Chashna rurashpaca ishquindijcunachari Diospaj bendicionta japingacuna (1 Pedro 3:1, 2). Shuj huauquica, ‘ñuca mana crij huarmica ñucataca mana respetanchu’ nishpachari yuyan. ¿Chai huauquica imatataj ruranga? ¿Huarmita sinchita rimashpachu huasipi pai mandaj cashcata ricuchinga? Mana. Cusaca Jesuspaj ejemplota catishpami huarmita cꞌuyaihuan tratana can. Jesucristoca congregaciontaca cꞌuyaihuan, pacienciahuanmi pushan (Lucas 9:46-48). Cusaca Jesuspaj ejemplotami catina can. Chashna rurajpica huarmica Diosta sirvisha ningachari. w17.11 págs. 30, 31 párrs. 13, 14

Cai mundopaj yuyaita charij gentecunaca Jehová Diospaj mandashcacunataca mana cazuncunachu. Paicunapaj yuyaicunata catishpaca asha ashami Diosmanta caruyashun. Cai mundopaj yuyaicunaca televisionpi, Internetpi, trabajopi, escuelapimi ñucanchijtaca pandachi tucun. Achca llajtacunapi gentecunaca Dios tiyashcataca mana crincunachu. Paicunaca Dios tiyashcata o mana tiyashcata mana alli yachashcamantami chashna yuyancuna. Chaimantami paicuna munashcata rurashpa causancuna (Salmo 10:4). Shujtajcunaca, “yachaisapa cashpaca Diospi crinataca mana minishtinchijchu” nishpami yuyancuna. ¿Tucuita ruraj Dios mana tiyashcataca crinallachu canchij? Cientificocuna ima nishcata tucuita crishpaca pandarishunmi. Dios tiyashcata yachangapajca shuj chꞌimbapuraita ricushun. ¿Shuj huasi dañarishpaca paillataj alli tucunllachu? Mana. Pero ñucanchij maqui chugririshpaca paillataj alliyanllami. ¿Imamantataj maqui chugririshpaca paillataj alliyanlla? Yaya Jehová Diosmi ñucanchijta chashna rurashca. w17.11 pág. 22 párrs. 2-4

Jesús huañushcata yuyarina tandanacuiman rinaca importantemi can. Yuyarishun, tandanacuicunapica Jehová Diostami alabanchij. Chaimantami Jesús huañushcata yuyaringapaj tandanacuimanca mana faltana canchij. Tal vez ungüimanta, o ima atraso japishcamantachari mana ri tucushun. Pero, chai tandanacuiman ringapaj esforzarishpaca ñucanchijpaj importante cashcatami ricuchishun. Shinallataj Jehová Diospish Jesuspish ñucanchij esfuerzocunataca achcatami valorangacuna. Ashtahuanpish Diosca ñucanchij shutitaca ‘causanaman rinapaj libropimi’ quillcanga. Chai libropi quillcashca tiyacujcunamanca huiñai causaitami cunga (Apocalipsis 20:15). ¿Jesús huañushcata yuyarina punlla chayamungacamaca imatataj rurai tucunchij? Jehová Diospaj ñaupajpi ima shina cashcata yuyaringapaj, paita mañangapajpishmi tiempota surcuna canchij (2 Corintios 13:5). w18.01 pág. 10 párrs. 4, 5

Jehová Diosca, chai llajtacunaca ‘miticunapajmi cana can’ nircami (Josué 20:2, 3). Mana munaimanta huañuchij runaca chai llajtaman chayashpami quishpirishca carca. Shinallataj paitapish huañuchisha nicuj runaca miticuna llajtamanca mana yaicui pudircachu. Diospish chai juchallamantataj ama ishqui cutin juzgachun nishpami mandarca. Mana munaimanta huañuchij runa chai llajta ucupi causacushcamanta Dios cuidacujpimi imata mana manchana carca. Mana prezupi shinachu carca. Paica trabajashpa, shujtajcunata ayudashpa, Diostapish sirvishpami casilla chai llajtapica causai pudirca. Huaquincunaca jatun juchamanta arrepintirishca cashpapish llaquillami causancuna. Maijancunacarin Jehová Diosca ñuca pandarishcataca mana cungaringachu nincunami. Canpish chashna yuyacushpaca Jehová Diosca llaquij cashcata, tucuita perdonaj cashcatami yuyarina cangui. Chashnami tranquilo causangui. w17.11 págs. 11, 13 párrs. 6, 13, 14

Jesús huañushcata yuyaringapajca levadura illaj tandatapish vinotapishmi utilizanchij. Tandaca Jesuspaj jucha illaj cuerpotami ricuchin. Cutin, vinoca Jesuspaj yahuartami ricuchin. Tandapish vinopish imata ricuchishcatami Jesús huañushcata yuyarina punlla manaraj chayamujpi, chai tandanacuipi cashpapish alli yuyana canchij (1 Corintios 11:23-25). ¿Imamantataj tandapish vinopish imata ricuchishcata alli yuyana canchij? Jehová Diosca paipaj Churita cachashpami ñucanchijta cꞌuyashcata ricuchirca. Jesuspish paipaj jucha illaj causaita cushpa, paipaj yahuarta jichashpami ñucanchijta cꞌuyashcata ricuchirca. Chaita mana cungarishpaca ñucanchijpishmi Jehová Diostapish Jesustapish cꞌuyashun. Shinallataj huauqui paicunahuanpish tandallami causashun. w18.01 pág. 13 párr. 11

Diospajca achca valishcami canchij. Paica achcata cꞌuyashcamantami ñucanchijta quishpichichun Jesusta cacharca. Chashnami huiñai causaita chari tucushun (Juan 3:16). Jehová Dios cusha nishcacunata mana cumplijpica Diabloca: “Diosca llullami, gentecunata mana alli mandanchu, ima allicunatapish mana cunchu” ninmanmi. Shinallataj Diosta pꞌiñajcunaca: ‘¿Maitagari Cristo cutin shamushami nishcaca? Mana pajtanchu. Ñucanchij yayacunapish ñami huañushca. Tucui imalla tiyajcunata Dios rurashcamantapacha cunancama tucui imapish chashnallatajmari caticun’ nishpami burlarinman (2 Pedro 3:3, 4). Diosca paita cazujcunataca quishpichingami. Chaita rurashpapish pailla mandana cashcatami ricuchinga (Isaías 55:10, 11). Jehová Diosca cꞌuyaihuanmi mandan. Chaimantami paita cazujcunataca cꞌuyaihuan mandanata yachanchij (Éxodo 34:6). w17.06 pág. 16 párr. 7

Gentecunata quishpichisha nishca punllamantaca Jehová Diosca pai nishcacunaca pajtarinataj cashcatami yacharca (Génesis 3:15). Casi cuatro mil huatacuna qꞌuipaca Diosca Jesustami cai Allpaman cacharca. Paipaj shungupi dimastij nanarishpapish ñucanchijta quishpichingapajmi paipaj Churi huañuchun saquirca (Juan 3:16). Chaita rurashcamantami agradecido sintirinchij. Jehová Diosca ñucanchijtaca paiman rijchajtami rurarca. Chaimantami mana imata shuyashpa cꞌuyaita ricuchi tucunchij. Por ejemplo, ñaupa punllapi Diosta sirvij Abelca pai charishca ashtahuan allicunata cushpami Diosta cꞌuyashcata ricuchirca (Génesis 4:3, 4). Noepish Diosmanta mana uyasha nijpipish achca huatacunaca tucuicunaman huillashpami cꞌuyaj cashcata ricuchirca (2 Pedro 2:5). Abrahampish tucuimanta yallimi Diosta cꞌuyarca. Chaimantami Diosmanca, ñuca churi Isaactaca canman cushallami nirca (Santiago 2:21). Cai runacuna shinallatajmi sinchi ricurijpipish tucuimanta yalli Diosta cꞌuyashcata ricuchina canchij. w17.10 pág. 4 párrs. 3, 4

Jesusca sumo sacerdote shina cajpimi Jehová ñucanchij juchacunata perdonanata crinchij. Shinallataj ‘ima llaquipi cajpi Jehová llaquishpa ayudanatami tucui shunguhuan crinchij’ (Hebreos 4:16). Jesusca canmantami huañurca. Chaimantami Jesús huañushcapi tucui shunguhuan crina cangui (Gálatas 2:20, 21). Jesús huañushcamanta Jehová Dios cambaj juchacunata perdonai tucushcata, huiñai causaita chari tucushcatapishmi crina cangui. Canta cꞌuyashcamantami Jehová Diosca paipaj Churita curca. Jehová Dios perdonashcamantami ñucanchijca mana yalli preocuparishpa causai tucunchij (Salmo 103:8-12). Tucui shunguhuan perdonashcatapishmi cri tucunchij. w17.11 págs. 13, 14 párrs. 14-17

Jesuspish paipaj Yayapish tandallami cancuna. Chaimantami cai Allpapi ashalla horascuna huañungapaj faltajpica Jesusca paipaj catijcunapish tandalla cachun Diosta mañarca. Jesús mañashcataca Jehová Diosca uyashcami. Chaimantami Jesús huañushcata yuyaringapaj tandanacunchij. Shinami testigo de Jehovacunaca tandalla cashcata, Jehová Dios paipaj Churita cachashcatapish tucui shunguhuan crishcata ricuchinchij. Shujtaj religioncunaca mana chashna tandalla cancunachu. Ashtahuanpish shujtaj laya gentecunata ricushpacarin pꞌiñancunami. Jehová Diospish Jesuspish ñucanchijcuna tandalla sirvicujta ricushpami cushilla sintirincuna. Jehová Diosca paita sirvijcuna tandalla adorana cashcatami huillarca. Cunan punlla chaita ricushpami cushilla sintinchij (Ezequiel 37:15-17; Zacarías 8:23). w18.01 pág. 11 párrs. 7-9

Jehová Diosca Mesías cachunmi Jesusta agllarca. Shinapish “huasita shayachijcuna” o judiocunata pushajcunaca chaita mana crircacunachu. Chaimantami Jesustaca mana chasquircacuna. Achca judiocunacarin Jesusta huañuchichunmi mañarcacuna (Lucas 23:18-23). Judiocunata pushajcunapaj culpamantami Jesusta huañuchircacuna. Jesús “huasita rurangapaj callaripi churana rumi” tucuchunca paica causarinami carca. Apóstol Pedroca Jesucristomanta parlashpaca: “Cancuna huañuchijpipish Taita Diosmi paitaca huañushcacunapaj chaupimanta causachirca” nircami (Hechos 3:15; 4:5-11; 1 Pedro 2:5-7). Jesusllamantami ñucanchijcunaca huañuimanta quishpiri tucunchij. Chaimantami Bibliapica: “Pi shujtaj Quishpichijca mana tiyanchu. Cai pachapi causajcunata quishpichichunca Taita Diosca pi shujtajtaca mana cushcachu. Jesusllami quishpichi tucun” nin (Hechos 4:12; Efesios 1:20). w17.12 págs. 10, 11 párrs. 6-9

Jesusca, jatun llaqui punlla chayamujpica ‘tucui cai pacha aillucunaca Runa Aichayuj jahua pachamanta pꞌuyupi tucui poderhuan, achijnicuj sumaj shamucujtami ricungacuna. Paipaj angelcunatami cachanga. Paicunami trompetapi sinchita tocashcahuan, Runa Aichayujpaj agllashcacunataca tandachingacuna’ nircami (Mateo 24:29-31). Armagedón macanacui manaraj callarijpica Jesusca cai Allpapi causacuj ungidocunataca jahua pachamanmi apanga. Chaipimi ‘paipaj agllashcacunataca’ tandachinga. Armagedón macanacuipica Jesuspish 144 mil agllashcacunapish cai Allpapi tucui gobiernocunatami tucuchinga (Apocalipsis 17:12-14). Cai Allpapi ungidocuna ña mana tiyajpica Jesús huañushcata yuyarina tandanacuica ña mana tiyangachu. w18.01 pág. 14 párr. 15

‘Huañuica Jesustaca mana ashtahuan mandai tucurcachu’. Cunancarin huiñai huiñaitami jahua cielopi causacun (Apocalipsis 1:5, 18; Romanos 6:9; Colosenses 1:18; 1 Pedro 3:18). Jesusca apostolcunataca, ‘jahua pachaman rishpa ñucahuanmi mandanguichij’ nircami (Lucas 22:28-30). Pablopish caimanta parlashpaca: “Huañushcacunapaj chaupimanta Cristoca causarishcami. Paica huañushcacuna causarinata ricuchishpa punta causarijmi” nircami. Chai qꞌuipami Pabloca: ‘Huashan huashanmi causaringa. Cristomi puntaca causarirca. Chai qꞌuipaca Jesús jahua pachapi mandacujpimi paipaj agllashcacunaca causaringa’ nircami (1 Corintios 15:20, 23). Chai shimicunahuanca shujtajcunapish jahua cieloman rina cashcatami ricuchirca. 1914 huatamantami Jesusca jahua pachapi mandacun. Jesús jahua pachapi mandacui punllacunapirajmi causacunchij. Ñallami cai mana alli causaipish tucuringa. w17.12 págs. 12, 13 párrs. 11, 14-16

Jehová Diosca llaquij Yayami can. Chaimantami Abraham, Isaac, Jacob, Moisés, Davidpish huañujpica paica llaquilla sintirirca (Números 12:6-8; Mateo 22:31, 32; Hechos 13:22). Bibliapica paicunata causachina hora ña chayamuchunmi Diosca shuyacun ninmi (Job 14:14, 15). Paicuna causarishpaca mana ungungacunachu, cushillami causangacuna. Shinallataj Jehová Diosca Jesustaca achcatami cꞌuyan. Jesús huañujpica Diosca yallitajmi llaquirirca (Juan 5:20; 10:17). Jehová Dios ñucanchijta ayudanatami tucui shunguhuan crina canchij. Chaimantami ñucanchij ima shina sintirishcata, imata yuyashcata paiman huillana canchij. Diosca ñucanchij ima shina sintirishcataca allimi intindin. Chaimantami cushichishpa ayudasha nin (2 Corintios 1:3, 4). w17.07 pág. 10 párrs. 3-5

Cunan punllacunapica achcacunami paicunapaj cullquihuan, tiempohuan, fuerzahuan Diosta sirvicuncuna. Shinami Jehová Diosta jatunyachishcata, ‘tucui imalla charishcacunata’ paiman cushcata ricuchincuna (Proverbios 3:9). Diosca cꞌuyaihuan paipaj imalla rurashcataca mana cungaringachu. Jehová Dios ayudajllapi, Jesucristo ñucanchijta ñaupajman pushacujllapimi cai tucuri punllacunapica Diospajta rurashpa catinchij. Zacarías nishca shinaca Diospaj puebloca mana chingaringachu. Chai pueblo ucupi cashcamantaca tranquilomi sintirinchij. Chaimantami Diospaj pueblopi imata ruracushpapish Dios rimashcata alli uyana, tucui shunguhuan imatapish rurana canchij (Zacarías 6:15). Chashna rurajpica Rey Jesucristoca ñucanchijta cuidangami. Jehová Diosllata jatunyachingapaj tucuita alli rurashunchij. Chashna rurajllapimi Jehová Diospish ñucanchijta cai tucuri punllacunapi huaquichinga. Shinallataj huiñaitapishmi cuidanga. w17.10 pág. 26 párrs. 18, 19

Ñallami ashtahuan llaquicuna tiyanga. Panda religioncunapish, politicocunapish ñallami chingaringa. Charinallapi yuyajcunapish ña mana tiyangachu. Gentecunapajca cullquipish oropish achca valishcami cashca. Pero profeta Ezequielpish Sofoniaspish huillashca shinaca cullquipish oropish imapaj mana valingachu (Ezequiel 7:19; Sofonías 1:18). Shuj chꞌimbapuraita ricushun. Shuj runaca achca cullquita charingapajmi tucui vida trabajarca. Pero chai tucui cullqui falso cashcata ricushpaca llaquillami sintirirca. Chashnallatajmi Diosta cungarishpa ashtahuan charingapaj tucui vida trabajai tucunchij. Pero ña yuyajyashpa, chai charishcacuna mana vali cashcata ricushpaca llaquillami sintirishun (Proverbios 18:11). Cai pachapi charishca cosascunaca chingaringami. Chaimanta Jehová Diospaj ñaupajpi, Jesuspaj ñaupajpipish alli ricuringapaj chai cosascunata utilizashunchij. Chaita rurashpaca cushillami sintirishun. w17.07 pág. 8 párr. 16

Maijan huauqui panicunaca mana pingai tucusha nishpa, familiatapish mana llaquichisha nishpami paicuna rurashca juchata mana ancianocunaman huillancuna (Proverbios 28:13). Juchacunata mana huillashpaca mana cꞌuyaj cashcatami ricuchincuna. Shinallataj paicunallataj, familiatapishmi llaquichincuna. Diospish paipaj espirituta cushpa mana ayudangachu. Congregacionpipish huauqui panicunaca mana tandalla cangacunachu (Efesios 4:30). Tucui shunguhuan cꞌuyaj cashpaca ima juchata rurashca cashpaca ancianocunamanmi huillana canchij. Paicunami Diospaj ñaupajpi alli ricurichun ayudanga. Shinallataj cutin juchapi ama urmangapajmi esforzarina canchij (Santiago 5:14, 15). Tucuimantaca cꞌuyaimi ashtahuan yalli can (1 Corintios 13:13). Jehová Dios cꞌuyajpimi ñucanchijpish cꞌuyaita ricuchi tucunchij. Cꞌuyajcuna cajpica Jesusta catijcuna cashcataca tucuicunami cuentata cunga. Pabloca cꞌuyaita mana charishpaca imapajpish mana valinichu nircami (1 Corintios 13:2). Chaimanta ama shimillahuan cꞌuyanimi nishunchij. Ashtahuanpish rurashcacunahuan cꞌuyaj cashcata ricuchishunchij (1 Juan 3:18). w17.10 pág. 8 párrs. 17, 18

Josemanta yachashun. Potifarpaj huarmica Josetaca: ‘Shamui, ñucahuan dormingui’ nircami. Chai huarmita mana cazushcamanta problemacunata charina cashpapish Joseca mana manchashpami ‘canhuanca manataj dormishachu’ nirca (Génesis 39:10, 12). Cunanca Rahab huarmimanta yachashun. Paica Jericó llajtapimi causarca. Shuj punllami ishqui israelitacuna Jericó llajtata ricunaman chayarcacuna. Chaimi Rahabca mana manchashpa paicunataca paipaj huasipi pacarca. Chai qꞌuipaca Jericó llajtamanta llujshichunmi ayudarca (Josué 2:4, 5, 9, 12-16). Jesús mana manchaj cashcata ricushpami apostolcunapish mana manchajcuna carca. Por ejemplo, saduceocunaca, ‘Jesusmanta ama yachachinguichij’ nishpami mandarca. Pero apostolcunaca mana manchashpami Jesusmanta yachachishpa catirca (Hechos 5:17, 18, 27-29). Josepish, Rahabpish, Jesuspish, apostolcunapish mana manchashpami allita rurarcacuna. Paicunalla imatapish rurai tucushcataca mana yuyarcacunachu. Ashtahuanpish Diospi tucui shunguhuan crishpami sinchi tucurcacuna. Ima jarcaicuna, llaquicuna ricurijpica ama ñucanchijllapi yuyashunchij. Ashtahuanpish Jehová Diospi tucui shunguta churashpa mana manchaj cashcata ricuchishunchij (2 Timoteo 1:7). w17.09 pág. 28 párrs. 6-9

Mana alli ruraicunataca ñucanchijllaca mana saqui tucushunchu. Maijancunaca mana alli causaita saquingapajca achcatami esforzarircacuna. Pero ¿ima shinataj ñaupa causaita saqui valircacuna? Jehová Diosmi Bibliahuan yachachishpa, paipaj espíritu santota cushpa ayudarca (Lucas 11:13; Hebreos 4:12). Ñucanchijtapish Jehová Diosca ayudangami. Chaimantami tucui punllacuna Bibliata liyina canchij. Liyishcapimi cutin cutin yuyana canchij. Shinallataj pai mandashcacunata cazungapaj alli yachaita, fuerzatapish cuchunmi mañana canchij (Josué 1:8; Salmo 119:97; 1 Tesalonicenses 5:17). Tandanacuicunaman purijpi, chaipi cutichingapaj alli prepararijpica Diosca paipaj espirituta cushpa, Bibliahuan yachachishpami ayudanga (Hebreos 10:24, 25). Shinallataj Diospaj pueblopica revistacuna, JW Broadcasting nishca programa, JW Library programa, jw.org paginami tiyan. Cai tucui ayudacunahuanmi mana alli ruraicunata saquishun (Lucas 12:42). Diosta sirvijcunaca millai ruraicunata ama rurangapajmi cuidarina canchij. Pero ¿Diospaj ñaupajpi alli ricuringapajca imatataj ashtahuan rurana canchij? Mushuj churarinata churarij shinami cambiana canchij (Colosenses 3:10). w17.08 pág. 20 párrs. 16, 17

Rey Davidca achca llaquicunatami charirca. Huambraraj cajpimi israelcunata mandachun Jehová Diosca agllarca. Pero Davidca paipaj familiacunata mandangapajca casi 15 huatacunatami shuyarca (2 Samuel 2:3, 4). Chai tiempollatajmi Saulca Davidtaca huañuchisha nirca. Chaimi Davidca miticushpa rirca. Shinallataj huaquinpica shujtaj llajtacunapi, mana cashpaca shitashca pamba jutcucunapimi miticushpa causarca. Qꞌuipa punllacunapica Saulca shuj macanacuipimi huañurca. Chashna cajpipish tucui Israel llajtata mandaj cangapajca casi 7 huatacunatami shuyana carca (2 Samuel 5:4, 5). ¿Davidca imamantataj mana pꞌiñarishpa shuyarca? Jehová Dios paita cꞌuyashcatami crirca. Chaimantami Jehová Dios tucui paipaj llaquicunata tucuchingacama cushilla shuyarca (Salmo 13:6). Shinallataj ñaupa punllacunapi ima shina Jehová Dios ayudashcata mana cungarishpami shuyarca. w17.08 pág. 7 párrs. 14, 15

Gentecuna parlashca shimicunaca tiempohuanca cambiashpami catin. Hebreo shimihuanpish griego shimihuanpish chashnallatajmi tucurca. Bibliapaj huaquin librocunataca hebreo, griego shimicunapimi escribircacuna. Shinapish ñaupa tiempopi parlashca hebreo, griego shimicunataca casi ni pi mana intindinchu. Chaimantami Bibliapi nishcacunata tucuicuna intindichunca shujtaj shimicunaman traducishcacuna. Huaquincunaca, ‘ñaupa tiempopi parlashca hebreo, griego shimita yachashpami Bibliata alli intindishun’ nincunami. Pero mana paicuna yuyashca shinachu can. Bibliapi tiyaj tucui librocunata, mana cashpaca huaquin librocunataca 3.200 yalli shimicunapimi traducishca. Chaimantami cushilla sintirinchij. Jehová Diosca tucui llajtacunamanta, chꞌican chꞌican aillucunamanta, chꞌican chꞌican rimaicunamanta gentecuna Bibliata yachachunmi munan (Apocalipsis 14:6). Yaya Diosca cꞌuyaj cashcamantami tucui laya gentecunata chasquin. Caita yachashpami paipajmanca ashtahuan cꞌuchuyanchij. w17.09 pág. 16 párr. 4

Shuj familiata congregacionmanta llujshishca cajpica, ¿imatataj rurana canchij? Chashna cajpica imamantapish paihuan ama tandanacungapajmi cuidadota charina canchij. Caita ruranaca sinchichari canga. Pero Jehová mandashca shina ruracushcatami yuyarina canchij. Chashnami paicunataca Jehová Dios ricushca shina ricushun. Rey Davidmanta yachashun. Saulpish, Simeipish paita llaquichisha nijpipish Davidca mana pꞌiñarircachu. Mandaj cashpapish paicunataca mana llaquichircachu (1 Samuel 26:9-11; 2 Samuel 16:5-10). Davidca jarcarij cashpapish Betsabé (Bat-seba) huarmihuanmi juchapi urmarca. Shinallataj Nabal runa mana ayudasha nijpimi paitaca huañuchisha nirca (1 Samuel 25:10-13; 2 Samuel 11:2-4). ¿Davidmantaca imatataj yachanchij? Ancianocunaca autoridadta charishpapish ‘huauqui panicunaca tucuipimi ñucata cazunataj can’ nishpa ama yuyangapajmi cuidadota charina can. Shinallataj ‘ñucaca juchapica mana urmashachu’ nishpaca mana yuyanachu canchij (1 Corintios 10:12). w17.09 pág. 6 párrs. 12, 13