Junio

Jehová Diosca paihuan alli apanacushpa catichun, huiñai causaita charichunmi munan. Chaimantami ñucanchijta cꞌuyaihuan yachachin, disciplinanpish. Disciplinaca maijan ratoca mana consejota cunallachu can. Por ejemplo, shuj huauqui o pani jatun juchata rurashca cajpica congregacionpica ima asignacionta ña mana chasqui tucungachu. Chashna disciplinashpaca Jehová Diosca chai huauquita o panita cꞌuyashcatami ricuchin. ¿Imamantataj chaita ninchij? Ima asignacionta chasquichun ña mana saquijpica tal vez juchata rurajca Bibliata ashtahuan estudiana, yachashcapi ashtahuan yuyangapaj tiempota surcuna, Diosta ashtahuan mañana cashcatachari cuentata cunga. Chaicunata rurashpaca Jehová Diospajman ashtahuanmi cꞌuchuyanga (Salmo 19:7). Tal vez tiempohuanca cutinllatajmi asignacioncunata chasquinga. Congregacionmanta llujchishpapish Jehová Diosca cꞌuyashcamantami chashna ruran. Maijanta congregacionmanta llujchishpaca shujtajcunapish chashnallataj ama rurachunmi Jehová Dios ayudan (1 Corintios 5:6, 7, 11). Jehová Dios disciplinashpaca cashcata ruraj cashcatami ricuchin. Shuj huauqui o pani congregacionmanta llujchishca cashpaca, “jatun juchatami rurashcani” nishpachari yuyanga. Chashnallataj arrepintirishca cashcatachari ricuchisha ninga (Hechos 3:19). w18.03 págs. 22, 23 párrs. 5, 6

Carcelta cuidajca Diospaj Shimimanta mana yacharcachu. Chaimantami Jesusta catij tucungapajca Diospaj Shimimanta ashata yachanaraj carca. Shinallataj Diosta sirvingapaj imata ruranatami yachanaraj carca. Jesús yachachishcatapish cazuna munaitami charina carca. Chai runaca ashalla tiempopi yachashpa, chai yachaicuna valishcata intindishpami bautizarirca (Hechos 16:25-33). Bautizarishca qꞌuipaca Diosmanta yachashpa catinarajmi carca. Caipi yachashca shinaca cambaj huahuapish “Diostami cꞌuyani paita cazusha nishpami bautizarisha nini” nijpica ¿yaya mamacunaca imatataj rurai tucun? Chashna cajpica ancianocunahuan parlachunmi huahuata animana can. Ancianocunami bautizaringapaj listo cashcata o mana cashcata ricungacuna. Shujtaj bautizarijcuna shinallatajmi bautizarishca qꞌuipaca huiñaita Diosmanta ashtahuan yachashpa catina can (Romanos 11:33, 34). w18.03 pág. 11 párrs. 8, 9

Dioshuan alli apanacungapaj esforzarijpica Diosllatajmi paipaj espíritu santohuan ñucanchij panda yuyaicunata cambiangapaj ayudanga. Chashnami asha asha Cristo yuyashca shina yuyai callarishun. Shinallataj Diospaj espíritu ayudajpimi mana alli munaicunata saqui tucushun. Dios munashca shinami cꞌuyaj llaquij cashun. Escuelapipish, trabajopipish ñucanchij rimashcahuan, rurashcahuanmi Jesús yuyashca shina yuyashcata ricuchi tucunchij. Shinallataj tucui punllacuna alli decisionta japishpami Jesusta catij cashcata ricuchishun. Dioshuan alli apanacushpaca imapish Diosmanta caruyachichun mana saquishunchu. Ima tentacioncuna ricurijpipish mana rurashunchu. Ima decisioncunata japigricushpaca: “¿Alli decisionta japingapajca ima versocunataj ayudai tucun? ¿Jesusca imatashi ruranman carca? ¿Diospaj ñaupajpi alli ricuringapajca ima decisiontataj japisha?” nishpami siempre tapurina canchij. w18.02 pág. 26 párrs. 12, 14

Noepaj bisabuelo Enoc causashca punllacunapica gentecunaca yallitaj millaicunami carca. Jehová Diostapish cꞌamijcunami carca (Judas 14, 15). Mana alli ruraicunaca cada punllami mirashpa catirca. Noé causashca punllacunapicarin ‘cai pachaca millanana ruraicunahuan jundami carca’. Millai angelcunapish jahua pachamanta uriyamushpami runacunapaj ushushicunahuan cazarashpa huahuacunata charirca. Chai huahuacunaca millai runacunami tucurca (Génesis 6:2-4, 11, 12). Shinapish Noeca mana chai gentecuna layachu carca. Chai punllacunapica, paillami ima juchachina illajlla carca. Noeca Taita Dioshuanmi purirca (Génesis 6:9). Yuyashun, Noeca mana 70, 80 huatacunallatachu causarca. Ashtahuanpish yacu juillu chayangacamaca millai gentecunapurapimi casi 600 huatacunata Diosta tucui shunguhuan sirvirca (Génesis 7:11). Shinallataj pai causashca punllacunapica congregacioncuna mana tiyarcachu. Chaimantami huauquicunapaj panicunapaj ayudata, animotapish mana chasquirca. Paipaj dueño huauquicunapish panicunapish mana ayudashcachu yuyachin. w18.02 pág. 4 párrs. 4, 5

Charinallata munajcunaca ña tucuita charishpapish ashtahuanmi charisha nincuna. Paicuna munashca cosascunata charingapajmi tucui vida trabajashpalla causancuna. Chaimantami “achca llaquicunata apacuncuna” (1 Timoteo 6:9, 10, Eclesiastés 5:10). Cai mundopi causangapajca imallapajpish cullquitaca minishtinchijmi (Eclesiastés 7:12). Pero, ¿ashalla cullquita charishpapish cushilla causai tucunchijchu? Ari (Eclesiastés 5:12). Jaqué runapaj churi Agurca: “Yalli huajchatapish, yalli charijtapish ama rurahuaichu. Micunapaj pajtallata carahuayari” nircami. ¿Imamantataj mana yallitaj huajcha casha nirca? Paica, yallitaj pobre tucushpa shuhuana juchapi urmashpa Diosta pingaipi churanatami mancharca. Cutin, ¿imamantataj yalli charijtapish ama rurahuaichu nirca? Paica: ‘Yalli charijyashpaca Diosta cungarishpa: ¿Mandaj Diosca pipishchari? nipajmi cani’ nircami (Proverbios 30:8, 9). Jesusca: “Ishqui amopajtaca pi mana rurai tucunchu. Shujtaca pꞌiñanmanmi, caishujtaca cꞌuyanmanmi. Shujtaca alli ninmanmi, caishujtaca yanganchinmanmi. Taita Diostapish, charinacunatapish ishquipajtaca mana rurai tucunchu” nircami (Mateo 6:24). w18.01 pág. 24 párrs. 9-11

Jehová Diosca paipaj Churimantami ñucanchij juchacunata perdonai tucun. Shujtajcunata tucui shunguhuan perdonashpaca Diosta agradicishcatami ricuchishun. Shinallataj Diosta sirvishpa tandalla catingapajmi ayudashun. Mateo 18:23-34-pica perdonana cashcatami Jesusca yachachirca. Cai versocunata liyishca qꞌuipaca cashna tapuri: “¿Cai versocunapi yachachishca shinaca imatataj rurana cani? ¿Huauqui panicuna ima shina sintirishcata ricushpa ayudangapaj esforzaricunichu? ¿Shujtajcuna pꞌiñachijpica perdonai tucunichu?” Huaquinpica ñucanchijta pꞌiñachijpica mana cungarinchijllachu. Shinapish, Jesús yachachishca shinaca Jehová Diosca perdonachunmi munan. Shujtajcunata mana perdonajpica Jehová Diosca ñucanchijta mana perdonangachu. Chaitaca mana cungarinachu canchij. w18.01 pág. 13 párr. 12

Diosta mañanata saquijpica gentecunaca “Danielca Diosta adoranatami saquishca” nincunamanmi carca. Chaimantami huañuchina cajpipish Danielca cada punlla Diosta mañashpa catirca. Danielca mana mancharcachu. Chaimantami leoncunapaj jutcupi Danieltaca shitarcacuna. Pero Diosca shuj milagrota rurashpami leoncuna ama huañuchichun paita quishpichirca. Jehová ima shina Danielta quishpichishcataca tucui Medopersia mandashca llajtacunapimi yachaj chayarcacuna (Daniel 6:25-27). ¿Ima shinataj Daniel shina Diospi cri tucunchij? Bibliataca mana jahua jahualla liyinachu canchij. Ashtahuanpish intindingacamami alli yachana canchij. Chashna rurashpallami Diospi tucui shunguhuan crishun (Mateo 13:23). Shinallataj cai o chai ruraicunamanta Jehová imata yuyashcatami yachana canchij. Chaipajca liyishcapimi cutin cutin yuyana canchij. Shinallataj Diosta tucui shunguhuan mañanataca mana cungarinachu canchij. Llaquicunahuan cashpacarin ashtahuanmi Diosta mañana canchij. Jehová Diosca llaquicunata ahuantangapaj fuerzasta cushpa, sabiduriatapish cushpami ayudanga (Santiago 1:5). w18.02 págs. 12, 13 párrs. 13-15

Joven, ña bautizarishca cashpaca escuelapi compañerocunaman o shujtaj gentecunaman huillangapaj ayudajpimi Jehová Dios alli cajta ricui tucungui. Maijancunaca “ñuca compañerocunaca mana uyasha ningachu” yuyashpami achcata manchancuna. Shujtajcunaca taucacunapurapi parlana cashpami manchancuna. ¿Canpish manchanguichu? ¿Imatataj rurai tucungui? Puntapica Diospipish Bibliapipish imamanta crishcatami yuyana cangui. JW.ORG paginapica guías de estudio nishcami achca shimicunapi tiyan. Chai ayudacunaca imapi crishcata, imamanta chaita crishcata, shujtajcunaman ima shina intindichinatapish yachangapajmi can. Diospipish Bibliapi nishcacunatapish tucui shunguhuanmi crina cangui. Shinallataj allimi prepararina cangui. Chashnami shujtajcunaman Diosmanta parlanata munangui (Jeremías 20:8, 9). w17.12 págs. 24, 25 párrs. 12, 14, 15

Huahuacunaman ñaupa punllacunapi Diosta sirvijcunamanta yachachinaca allimi can. Pero Diospi cringapajca paicunallatajmi Bibliapi nishcacuna cierto cashcata ricuna can. Timoteoca chaitami rurarca. Paica huahuamantapachami Diospaj Shimita yacharca. Pero tiempo qꞌuipaca paillataj intindishpami Jesús Mesías cashcata crirca. Huahuacunaca mana yaya mama Diospi crijpilla paicunapish Diospi cringachu. Chaimantami Diospi crichunca mana utca pꞌiñarishpa yachachina can. Bibliapi nishcacuna cierto cashcata cringapajca huahuacunallatajmi ima alli cashca, ima mana alli cashcata intindina can (Hebreos 5:14). Huahuacuna tapujpi alli contestangapajmi yaya mamacunaca esforzarina can. w17.12 pág. 16 párrs. 3, 5, 6

Martaca Jesusta catij, paipaj alli amigami carca. Paipaj turi Lázaro huañushcamantami dimastij llaquirishca carca. Jesusca Martata animangapajmi: “Cambaj turica causaringami” nirca (Juan 11:20-23). Martaca shamuj punllapi Lázaro causarinatami tucui shunguhuan crirca. Shinapish Jesusca chai punllallatajmi Lazarota causachirca. Ñucanchij yaya mama, cusa, huarmi, abuelo o huahua huañushcamantachari llaquilla canchij. Paicuna cutin causarijpi ugllanata, paicunahuan parlanata, asinatachari munanchij. Jehová Diospish Jesuspish cunan punllapi causachinataca mana shuyanchijchu. Pero Marta shinallatajmi shamuj punllapi huañushcacuna causari tucushcataca tucui shunguhuan crinchij. ¿Imamantataj huañushcacuna causarinataca crinchij? w17.12 pág. 3 párrs. 1, 2

Moisesmanca Jehová Diosmi leycunata curca. Chai leycunatami Jesuspish achcata valichij carca. Cunan punllapaj versopi huillashca shinami chai leycunaca Jesuspajca achca valishca cana carca. Chaimantami pai nishcacunahuan, rurashcacunahuan Dios cushca leycunaca allipaj cashcata ricuchirca. Shinallataj Bibliapi tucui nishcacunaca pajtarinatami ricuchirca (Mateo 5:17-19). Mandashcacunata quillcajcunapish fariseocunapish tucui leycunatami uchilla cajpipish pajtachijcuna carca. Chaimantami Jesusca, mentata, eneldota, cominotapish chungamantaca shujta cujcunami canguichij nirca. Shinapish paicunaca Dios mandashcataca mana alli pajtachicurcacunachu. Chaimantami Jesusca: ‘Cashcata ruranata, llaquij canata, crinatapish, chai ashtahuan alli mandashcatarajmi saquishcanguichij’ nirca (Mateo 23:23). Fariseocunaca Dios mandashcacunata mana alli intindijcunachu carca. Shinallataj shujtajcunamanta yalli cashcatapishmi yuyajcuna carca. Pero Jesusca chai mandashca leycunaca ima nisha nishcata, Jehová Diosmanta imata yachachishcatami alli intindirca. w17.11 pág. 15 párrs. 1, 2

Maijancunaca, “causaipimi imatapish rurana canchij” nincunami. Chaimantami pihuanpish chayarinaca mana juchachu can nincuna. Pero Bibliaca huainayanapi urmanamanta jarcarichun ninmi (1 Tesalonicenses 4:4-8). Jehová Diosmi ñucanchijta rurarca. Chaimantami alli causachun leycunata cushca. Paica cꞌari huarmi cazarashpallami chayarinacuna can ninmi. Diosca ñucanchijta cꞌuyashcamantami alli consejocunata cun. Chaita pajtachishpaca familiacunaca cꞌuyaita ricuchishpa respetohuan tratanacushpami causancuna. Jehová Diosca yachashca jahua mana allita rurajcunataca llaquichingami (Hebreos 13:4). Bibliaca huainayana juchapi ama urmangapaj imata ruranatami yachachin. Chaimantami imata ricushpaca cuidadota charina canchij (Mateo 5:28, 29). Diosta sirvijcunaca televisionpi Internetpi o shujtaj cosascunapi lluchulla, mapata ruracujcunataca mana ricunachu canchij. Huainayanamanta parlaj musicacunatapish mana uyanachu canchij (Efesios 5:3-5). w17.11 pág. 23 párrs. 9, 10

Diosta sirvijcunaca ñaupa punllacunamantami cantocunahuan Diosta alabashcacuna. Israelitacunapish Jehová Diostaca cantashpami alabajcuna carca. Rey Davidca Diospaj templopi instrumentocunata tocachun, cantachunmi 4.000 levitacunata agllarca. Chaicunamanta 288 cꞌaricunaca alli cantajcunami carca (1 Crónicas 23:5; 25:7). Diospaj templota tucuchishpaca tocashpa, cantashpami cushicurcacuna. Bibliapica: ‘Tucuicuna chaipi cashpaca trompetacunatapish, cimbalocunatapish, shujtaj tocanacunatapishmi shuj shinalla tocashpa, cantashpa, Mandaj Diostaca pagui nishpa alabarcacuna. Paicuna chashna cantacujpica caishujcunaca: “Mandaj Diosta cantaichij, paica allimi. Pai llaquij canaca huiñai huiñaipajmi” nishpami cantarcacuna. Chashna cantacujpimi Mandaj Diospaj huasipica pꞌuyu jundarca’ ninmi. Chai tucuita ricushpami israelitacunaca Diospi ashtahuan crishcacuna canga (2 Crónicas 5:13, 14; 7:6). w17.11 pág. 4 párrs. 4, 5

Jesusca pai yachachishcacunata mana tucui gentecuna chasquinatami yacharca. Shinallataj paita catijcunata llaquichigrishcatami yacharca. Jesusca familiacunata chꞌicanyachingapaj mana shamurcachu. Ashtahuanpish “mana llullata huillangapajmi” shamurca (Juan 18:37). Por ejemplo, huaquin familiacuna o amigocuna Diospaj Shimita ama yachachun jarcajpica llaquimi can. Jesusta catishcamantami achcacunataca familiallataj chanzata rurashcacuna, mana ricunayachisha nishcacuna. Pero ahuantashpami catishcacuna. Chashna ahuantashcamantami Jesuspaj ñaupajpi alli ricurishcacuna. Paicunaca Diosta sirvingapajca huaquin cosascunatami huashaman saquishcacuna. Pero cunanca achca bendicioncunatami chasquishcacuna (Marcos 10:29, 30). Diosta sirvichun jarcajpipish ñucanchij familiacunataca cꞌuyanchijmi. Pero Diostapish Jesustapishmi paicunata yalli cꞌuyana canchij (Mateo 10:37). Caitapishmi yuyaipi charina canchij: Familiataraj ashtahuan cꞌuyashpa Diosta mana cazuchunmi Diabloca munan. w17.10 pág. 10 párrs. 3-6

Jehová Diosca paipaj pueblo ucupi ima millai ruraicuna tiyachunca mana saquingachu. Ima millaita Jehová Dios ricushpaca chai ratomi anchuchinga (1 Corintios 5:13). Chai ángel chai huarmita cutin canastapi shitashpami Jehová Dios millaita mana ricunayachishcata ricuchirca. Zacarías ricushca muscuica Jehová Dios paipaj pueblopi millai ruraicuna tiyachun mana saquishcatami ricuchin. Shinallataj cai muscuipi ricushca shinaca israelitacunaca Dios millashcata ama rurangapajmi cuidarina carca. ¿Caimantaca imatataj yachanchij? Jehová Diosllatajmi paipaj puebloman cꞌuchuyachun ñucanchijta ayudashca. Diospaj pueblopi cashcamantami paipaj cꞌuyaitapish, paipaj cuidadotapish charinchij. Chaimantami Diospaj pueblopi millai ruraicuna tiyachunca mana pirmitina canchij. Cada unomi Dios munashca shina causangapaj esforzarina canchij. w17.10 págs. 19, 20 párrs. 14, 15, 17, 18

Bibliapi callari 39 librocunataca judiocunami hebreo o arameo shimipi escribircacuna. ‘Paicunarajmi Yaya Diospaj Shimita chasquircacuna’ (Romanos 3:1, 2). Pero Alejandro Magno mandai callarijpica pai mandashca llajtacunapimi achca gentecunaca griego shimipi parlai callarircacuna (Daniel 8:5-7, 20, 21). Casi 300 huatacuna Jesús manaraj huacharijpica achca judiocunapishmi griego shimita parlajcuna carca. Chaimantami Dios quillcachishcacunataca hebreo shimipica ña mana intindi tucurcacuna. Casi 250 huatacuna Jesús manaraj huacharijpimi Ñaupa Testamentotaca griegoman traducishpa tucuchircacuna. Griegoman traducishca librocunataca Septuaginta nishpami rijsincuna. Punta cutinmi tucui Ñaupa Testamentotaca shujtaj shimiman traducircacuna. w17.09 pág. 17 párrs. 7-9

Yaya mamacuna, familiahuan Diosta adorana punlla, tandanacuiman rina punlla o huillanaman rina punllapichari cancunapaj jefeca ashtahuan horascunata trabajachun ninga. Pero jefehuan parlashpa “mana pudinichu” ningapajmi mana manchana canguichij. Cancunapaj causaipi Diostaraj puntapi churajpica huahuacunapish chashnallatajmi rurangacuna. Shinallataj yaya mamacunaca huahuacuna Diosta ashtahuan sirvichun ayudanataca mana manchanachu can. Huaquin yaya mamacunaca huahuacuna precursor tucuchun, minishtirishca ladopi sirvichun, Betelpi sirvichun, Tandanacuna Huasicunata shayachishpa sirvichun manachari animasha nincuna. Paicunaca: “Huahuacuna Diosta chashna sirvijpica ñucanchij yuyajyajpica pitaj cuidanga” nishpachari preocuparincuna. Pero Jehová Dios cuidanata tucui shunguhuan crishpaca yachaj cashcatami ricuchincuna (Salmo 37:25). Yaya mamacuna Diospi tucui shunguhuan crijpi, mana manchajcuna cajpica huahuacunapish mana manchajmi cangacuna (1 Samuel 1:27, 28; 2 Timoteo 3:14, 15). w17.09 pág. 30 párrs. 14, 15

Yaya mamacuna, ¿mana alli ruraicunamanta jarcarichunca ima shinataj huahuacunata ayudai tucunguichij? Huahuacunaca mana alli ruraicunamanta jarcarinatami yachana can. Chaimantami yaya mamacunaca alli ejemplohuan yachachina canguichij (Efesios 6:4, NM). Huahuacuna paicuna munashcata rurasha nicujta ricushpaca “¿ima ejemplotataj paicunaman cucuni?” nishpami tapurina canguichij. Alli ejemplota cungapajca Diosmanta huillanaman rina, tandanacuicunaman rina, familiahuanpish Diosta adorana importante cashcatami ricuchina canguichij. Paicuna munashcataraj rurasha nijpica “mana” ninataca ama manchaichijchu. Jehová Diosca Adán Evamanpish leycunatami curca. Chai leycunata cazushpaca Adán Evaca Diosta respetashcatami ricuchinman carca. Chashnallatajmi huahuacunata disciplinajpi, alli ejemplohuan yachachijpica millai ruraicunamanta jarcarinata yachangacuna. Yaya mamacuna, Dios mandashcacunata cazuna ashtahuan importante cashcatami huahuacunaman yachachina canguichij (Proverbios 1:5, 7, 8). w17.09 pág. 8 párr. 17

Diablopaj mandana punllacuna tucuringacamami llaquilla causashpa catishun. Por ejemplo, trabajo mana tiyashcamanta, gentecuna llaquichisha nishcamanta, shuhuacunamanta, terremotocuna tiyashcamanta o shujtaj problemacunamantapishmi llaquilla causanchij. Chaimantami caishujhuan chaishujhuan ayudanacungapaj llaquijcuna cana canchij. Shujtajcunata llaquishpaca cꞌuyaihuanmi imatapish rurashun (Efesios 4:32). Shinallataj Jehová Dios llaquishpa ayudaj shinami shujtajcunata ayudashun (2 Corintios 1:3, 4). ¿Shujtaj llajtamanta shamushca o mana achcata charij huauqui pani cambaj congregacionpi tiyanchu? ¿Ima shinataj paicunata cꞌuyashcata ricuchishun? Paicunahuanmi alli apanacuna canchij. Shinallataj “cancunaca congregacionpica achcatami ayudacunguichij” nishpami animana canchij (1 Corintios 12:22). Achca testigocunaca shujtaj llajtamanta cajcunata cꞌuyashcatami ricuchishcacuna. Chaimantami shujtaj shimita yachai callarishcacuna (1 Corintios 9:23). Shujtaj shimita yachashcamantaca achca bendicioncunatami chasquishcacuna. w17.08 pág. 23 párrs. 7-9

Tucuicunami mana pꞌiñarishpa pacienciahuan shuyana canchij. Pacienciahuan shuyangapajca Diospaj espíritu ayudachunmi minishtinchij. Chaimantami Jehová Diostaca rogashpa “cambaj espirituhuan ayudahuai” nishpa mañana canchij (Efesios 3:16; 6:18; 1 Tesalonicenses 5:17-19). Abrahampish, Josepish, Davidpish Jehová Dios cusha nishcata chasquingapajca pacienciahuanmi shuyarcacuna. ¿Chashna shuyangapajca imatataj rurarcacuna? Paicunaca Jehová Diospimi tucui shunguhuan crircacuna. Mana paicunallapi yuyarcacunachu. Paicuna ima shina Diospi shuyashcata mana cungarinachu canchij. Chashnami ñucanchijpish pacienciahuan shuyashun. Achca llaquicunata charishpapish Diospimi shuyana canchij. Huaquinpica: ‘Maicamataj chashna llaquicunahuan causashari’ nishpachari yuyanchij (Isaías 6:11). Pero Diosca paipaj espirituta cushpami ayudanga. Chaipica Jeremías layami cai punllapaj versopi nishcata nishun. w17.08 pág. 8 párrs. 18-20

Eclesiastés 3:4-pica “asingapajpish, bailangapajpish punllami chayan” ninmi. Jesús huahuaraj cashpaca pugllashpami cushicurca. Chashna cashpapish Diospaj Shimita yachashpami Jehová Dioshuan alli apanacurca. 12 huatacunata charishpaca templopi yachachijcuna tapushcataca allimi contestarca. Jesús ‘yachaisapa cashcata ricushpami paicunaca achcata mancharircacuna’ (Lucas 2:42, 46, 47). Jesús ña jatunyashpaca Dios munashcata rurashpami cushilla causarca. Diosca ‘huajchacunaman alli huillaita huillachun, mana ricujcunata ricujta rurachunmi’ munarca (Lucas 4:18). Jesusca Diospaj munaita rurashpami cushicurca. Jesusca paipaj Yayamanta gentecunaman yachachinatami munarca (Lucas 10:21). Shuj cutinca shuj huarmimanmi Diosta ima shina adoranata yachachirca. Chai qꞌuipaca paita catijcunamanca: “Ñuca micunaca ñucata cachaj Yayapaj munaita rurana, pai rurai nishcata pajtachinami” nircami (Juan 4:31-34). Diosta cꞌuyashcata, shujtajcunatapish cꞌuyashcata ricuchishpami Jesusca cushilla causarca. Canpish Jesús laya rurashpami cushilla causai tucungui. w17.07 pág. 22 párrs. 4, 5

Jesús cai Allpapi cashpaca cꞌuyaj, llaquijmi carca. Chashnami Jehová Dios ima shina cashcata ricuchirca (Juan 5:19). Jehová Diosca Jesustaca ‘shungu pꞌaquicunata alliyachichun, tucui llaquilla causacujcunata cushichichunpishmi cacharca’ (Isaías 61:1, 2; Lucas 4:17-21). Jesús paicunamanta preocuparishcata, ayudasha nishcatapishmi tucuicuna ricurca (Hebreos 2:17). Bibliapica: “Jesucristoca cainapish, cunanpish, huiñai huiñaipajpish paillatajmi” ninmi (Hebreos 13:8). Jesusmantami huiñai causaita chari tucunchij. Chaimantami Hechos 3:15-pica ‘Causaita Cuj’ nishpa shutichin. Jesuspish achca llaquicunatami charirca. Chaimantami ‘llaquicunahuan cajcunataca’ ayudai tucun (Hebreos 2:10, 18). Ñucanchij ima llaquihuan cajpica Jesusca llaquirinmi. Chaimantami ñucanchij minishticushca horaspi ayudan (Hebreos 4:15, 16). w17.07 págs. 10, 11 párrs. 6, 7, 10

Jehová Dios yachachishcacunaca achca valishcami can. Shinapish cullquillapi o charinallapi yuyashpaca Dios cushca bendicioncunataca mana valishcata layami ricui callarishun. Ama chaipi urmangapajmi cuidarina canchij. Apóstol Juanca: “Cai pachaca, tucui munaicunandijmi chingaricun” nircami (1 Juan 2:15-17). Chaimantami Dios cushca bendicioncunata valorashpa catingapaj esforzarina canchij. Dios churashca Mandanata apoyashpa, Diosmanta cushilla huillashpa, Bibliata ashtahuan yachashpa catishunchij. Chashnami jahua pachapi charinacunata huaquichij shina canga. Chaicunataca “shuhuapish mana shuhuanchu, polillapish mana micunchu” (Lucas 12:33). w17.06 pág. 14 párrs. 19, 20

Jehová Diosca mana millai Mandajchu can. Chaimantami paita cazujcunaca cushilla sintirin (2 Corintios 3:17, NM). Davidca: “Paipaj ñaupajpica alabanapish, cushicunapishmi tiyan. Pai causacunpica, tucuita rurai tucunapish, cushicuipishmi tiyan” nircami (1 Crónicas 16:7, 27). Etán runapish cashnami nirca: “Mandaj Dioslla, quiquinta mañajcunaca cushichishcami. Quiquinpaj ñahui achijyachishcapimi puringacuna. Quiquinpaj shutipimi punllanta cushicungacuna. Quiquin cashcata rurashcapimi cꞌari cꞌari cangacuna” nircami (Salmo 89:15, 16). Jehová Dios cꞌuyaj cashcata punllanta yuyarishpaca pailla alli Mandaj cashcata mana cungarishunchu. Jehová Diosmi ñucanchijcunata rurarca. Chaimantami cushilla causangapaj imata minishtishcata yachan. Paica tucuitami mana mitsashpa cun. Imata rurachun mandashpapish ñucanchij allipajmi mandan. Imata huashaman saquina cashpapish, Diosta cazushpaca cushillami causashun (Isaías 48:17). w17.06 págs. 23, 24 párrs. 10, 11

Inglaterra llajtapi causaj shuj panimanta parlashun. Paica huahuacunata charinatami achcata munashcarca. Pero huahuacunata mana chari tucushcata yachashpaca achcatami llaquirirca. Chaimantami paipaj cusandij shuj huahuata adoptanata decidircacuna. Cai panica cashnami nin: “Huahuata adoptashpapish ñucallataj shuj huahuata mana chari pudishcamantami llaquilla purij carcani” ninmi. 1 Timoteo 2:15-pica: ‘Huarmica huahuacunayuj tucushpa, mana maipish cachun causashpaca quishpiringami’ ninmi. Cai shimicunaca huahuacunata charishpa huiñai causaita japinataca mana nicunchu. Ashtahuanpish huahuacunayuj huarmica huasita, huahuacunata atindina cashcamantaca manachari shujtajcunapaj causaipi satirishpa, imatapish shujtajcunamanta rimashpa puringa (1 Timoteo 5:13). w17.06 págs. 4, 5 párrs. 6-8

Elihú cashna tapushpaca ¿Diospaj ñaupajpi ñucanchij ruraicuna mana valishcatachu nisha nicurca? Mana. Jehová Diosca paita adorachunca ni pita mana minishtishcatami nisha nicurca. Diosca ñucanchijmanta imata mana minishtinchu, imata rurajpipish paica mana ashtahuan charij tucungachu, mana ashtahuan poderyuj tucungachu. Ashtahuanpish ñucanchij imata rurai tucungapajca Diosmi yuyaita cushca. Paica ñucanchij alli ruraicunatami ricun. Ñucanchij huauquicunata panicunata cꞌuyaita ricuchijpica Diosca ricucunmi. Paicunamanta ima allicunata rurajpica Diosca paimanta chashna ruracushca layami sintirin. Proverbios 19:17-pica cashnami nin: “Maijanpish huajcha runata llaquishpa imata cushpaca, Mandaj Diosman mañachishca shinami. Chai allita rurashcamantaca, cutichishcami canga” ninmi. Shujtajcunata llaquishpa imata cujpica Diosca ricunmi. Paica tucuita ruraj Diosmi can. Chashna jahuapish, shujtajcunamanta allita rurajpica paica ñucanchijman dibiyashca shinami sintirin. Chaimantami achcata bendiciashpa pagan. Jesuspish shujtajcunapaj allita rurajpica Diosca achcata bendiciaj cashcatami yachachirca (Lucas 14:13, 14). w17.04 pág. 28 párrs. 3, 4

¿Diospaj Shimita shungupi huaquichingapajca imatataj ashtahuan rurana canchij? Jehová Diosca tandanacuicunahuanmi ñucanchijman yachachin. Chaimantami siempre rina canchij. Por ejemplo, cada semanami Huillaj revistahuan Bibliamanta ashtahuan yachanchij. Cai tandanacuipi tucuita intindingapajca manaraj rishpami alli prepararina canchij. Tucui versocunata mashcashpami liyina canchij. Achca huauqui panicunaca revistacunata descargashpami liyincuna. Huillaj revistaca jw.org paginapi, JW Library nishcapimi achca shimicunapi tiyan. Huaquin programacunapicarin utcami versocunata mashcai pudinchij. Ima laya estudiashpapish versocunata liyishpami chaipi alli yuyana canchij. Chaita rurashpaca Diospaj Shimipi yachachishcacunata mana cungarishunchu. w17.05 pág. 18 párr. 14

Bautizarishca qꞌuipaca Jehová Diostami sirvishpa catina canchij. Paillata sirvisha nishca cashpaca ña mana huashaman tigrari tucunchijchu. Maijanpish Diosta sirvinata shaicushpaca: “Diosmanca mana shungumanta mingarircanichu, ñuca bautizarishcaca mana valinchu” nishpa mana yuyanachu can. Chai cꞌari o huarmi jatun juchata rurashpaca, Diospaj ñaupajpi, congregacionpaj ñaupajpimi imata rurashcata ricuchina tucunga. Jesusca huaquin crijcunataca: Jehová Diosta ‘punta cꞌuyashca shinaca ña mana cꞌuyacunguichijchu’ nircami. Ñucanchijtapish chashna nichunca mana munanchijchu, ashtahuanpish Jesús cashna nichunmi munanchij: ‘Ñucaca can imallata rurashcatapish, cꞌuyaj cashcatapish, crij cashcatapish, allita ruraj cashcatapish, llaquicunata apai tucushcatapish yachanimi. Shinallataj can ruracushcacunaca callaritapish yalli ashtahuan alli cashcatapish yachanimi’ nichun (Apocalipsis 2:4, 19). Ñucanchijca Jehová Diosllata sirvisha nishpami paiman mingarircanchij. Chaita pajtachijpica Diosca cushicungami. w17.04 pág. 7 párrs. 12, 13

Abrahamca Diostaca: “Canca tucui cai pachapaj Juez cashcamanta imatapish cashcatatajmi rurangui” nircami (Génesis 18:25). ¿Imamantataj Abrahamca chashna nirca? Dios cashcata ruraj cashcamanta Sodoma Gomorra llajtacunata alli juzganatami crirca. Shinallataj cashcata rurajcunata millai gentecunahuan tandachishpa Jehová mana chingachij cashcatami crirca. Jehová Diosca imatapish siempremi alli ruran. Diospaj mandashcacunaca tucuimi alli can. Chaimantami imatapish alli ricushpa juzgan. Paimi tucuimanta yalli, cashcata ruraj can. Bibliapica ‘Diosca cashcata ruranata, imatapish allita ruranatami cꞌuyan’ ninmi (Salmo 33:5). Chaimantami Abrahamca Jehovataca, ‘cashcata ruraj Diosmi cangui’ nirca. w17.04 pág. 15 párrs. 1, 2

Yaya mamacuna, cancunapaj huahuacuna Diosta cꞌuyachun, huiñai causaitapish charichunmi munanguichij ¿nachu? Chaimantami cancunaca alli ejemplo cana canguichij. Cancuna Diosta ashtahuan sirvijpica, ima minishtishcata Yaya Dios cunatami huahuacunaca cringacuna (Mateo 6:33, 34). Charinallapi yuyanapaj randica Diostami ashtahuan sirvina canguichij. Ama imapipish dibiyashpa, minishtirishcallahuan causaichij. Achca cullquita charinapaj randi, “runacuna alli nishca” canapaj randica, Diospaj ñaupajpi alli ricuringapaj esforzarichij. Chashnami ‘jahua pachapi achcata charijcuna’ shina canguichij (Juan 12:43; Marcos 10:21, 22). Yaya mamacunaca huahuacunamanmi tiempota cuna canguichij. Huahuacuna cullquillata mashcanapaj randi, gentecunapaj ñaupajpi alli nishca canapaj randi Diosta ashtahuan sirvicujpica felicitanami canguichij. ‘Huahuacunami ñucanchij alli causangapaj tucuita cuna can’ nishpa ama yuyaichijchu. Ashtahuanpish caita yuyarichij, ‘mana huahuacunachu yaya mamapaj mashcarina can, yaya mamacunami huahuacunapaj mashcarina’ can (2 Corintios 12:14). w17.05 pág. 9, 10 párrs. 3, 4