Julio

Sebná runaca Ezequiaspaj huasipi ‘mayordomomi’ cashca yuyachin. Chashna cashcamantami achca autoridadta charirca (Isaías 22:15). Pero jatun tucushpami pailla ashtahuan importante cashcata gentecuna yuyachun munarca (Isaías 22:16-18). Sebnaca tucuicunamanta ashtahuan importante canatami mashcarca. Chaimantami Diosca Sebnapaj puestota quichushpa Eliaquim runaman curca (Isaías 22:19-21). ¿Ima horataj chashna tucurca? Asiriamanta rey Senaquerib Jerusalenta ima shina llaquichinata yuyacujpimi chashna tucurca. Asha tiempo qꞌuipaca Senaqueribca judiocuna mancharichun, rey Ezequiaspish pai nishcata rurachun munashpami mandajcunata, achca soldadocunatapish Jerusalenman cacharca (2 Reyes 18:17-25). Ezequiasca chai runacunata chasquichunca Eliaquimta shujtaj ishqui cꞌaricunatapishmi cacharca. Shuj cꞌarica Sebnami carca. Cunanca paica Ezequiaspaj secretariomi carca. Caipica disciplinata chasquishpapish shungupi pꞌiñarishca o llaquirishca saquirishcataca mana ricunchijchu. Ashtahuanpish Sebnaca humilde tucushcatami ricunchij. ¿Imamantataj chaita ni tucunchij? Sebná runaca cunanca ashtahuan humilde puestotami chasquishca carca. w18.03 págs. 23, 24 párrs. 7, 8, 10

Aicha munaillata rurana o charinallapi yuyana mishachunca ama saquishunchijchu. Jehová Diosta paipaj espíritu santota cuchun mañashpa catishunchij. Chashna rurajpica Jehová Diosllatajmi alli yuyaicunata charingapaj ayudanga (Lucas 11:13). Apóstol Pedrota yuyarishun. Paipish huaquinpica Cristo yuyashca shina yuyanatami cungarirca (Mateo 16:22, 23; Lucas 22:34, 54-62; Gálatas 2:11-14). Pero paica mana chaipi saquirircachu. Diospaj ayudahuanmi asha asha Cristo yuyashca shina yuyai callarirca. Ñucanchijpish chashnallatajmi rurai tucunchij. Qꞌuipaca Pedrollatajmi quiquinllataj jarcarij, mana pꞌiñarij, quiquin huauquindij shina cꞌuyanacuj cangapaj esforzarichij nishpa yachachirca (2 Pedro 1:5-8). Pedro nishca shina cangapajmi esforzarina canchij. Chashnami Diospajman ashtahuan cꞌuchuyashun. Chaimanta cada punllacuna “¿Diospajman ashtahuan cꞌuchuyangapajca imatataj rurai tucuni?” nishpa tapurishunchij. w18.02 pág. 26 párrs. 12, 13

Diosta alli rijsishcamantami Jobca Dios imata yuyashcata alli yacharca. Chaimantami allita rurashpa causarca. Por ejemplo, Diostami cꞌuyani nishpapish, shujtajcunata pꞌiñanaca mana alli cashcatami yacharca (Job 6:14, NM). Shinallataj paica shujtajcunamanta yalli cashcataca mana yuyarcachu. Pobre cajpipish, charij cajpipish familiata shinami trataj carca. Ashtahuanpish Jobca, ñucata ruraj Diosca, ¿manachu paitapish rurarca? nishpami yuyaj carca (Job 31:13-22). Caipi ricushca shinaca charij cashpapish Jobca mana jatun tucushca carcachu. Cunan punllapica charij gentecunaca mana Job shinachu cancuna. Jobca imapish Diosmanta caruyachichunca mana saquircachu. Paipajca Diosta sirvinami ashtahuan importante carca. Charina cosascunallapi yuyashpaca Jobca ‘Taita Diostaca cungarinmanmi’ carca (Job 31:24-28). Shinallataj Jobca shuj huarmillahuan cazarana cashcataca allimi yacharca. Chaimantami paica shujtaj huarmita mana alli munaihuan ama ricungapaj paipaj ñahuihuan ari ninacurca (Job 31:1). w18.02 pág. 14 párrs. 16, 18, 19

Noeca alli runa cashcallahuan mana saquirircachu. Ashtahuanpish paica mana manchashpami Diosmanta gentecunaman huillarca. Chaimantami Bibliapica: “Cashcata rurashpa causanata huillaj” nishpa shutichin (2 Pedro 2:5). Apóstol Pablopish, ‘cai pachapi causaj millaita rurajcunaca, jatun llaqui tucuna cashcatami huillarca’ nircami (Hebreos 11:7). Noetaca Diosta sirvishcamantami asishpa chanzata rurarcacuna, jarcaicunata churarcacuna, llaquichisha nircacunapish. Pero paica gentecunata mana mancharcachu (Proverbios 29:25). Noeca Diospimi tucui shunguhuan crirca. Chaimantami Diosca mana manchaj runa cachun ayudarca. Cunanpish paipi tucui shunguhuan crijpica chashnallatajmi ayudan. Noeca ña casi 500 yalli huatacunatami Diosta sirvishpa causacurca. Chashna causacujpimi Jehová Diosca Noetaca, ‘gentecunapish, animalcunapish quishpirichun shuj arcata rurai’ nishpa mandarca (Génesis 5:32; 6:14). Cai jatun arcata ruranaca Noepajca sinchimi ricurishca canga. Shinallataj arcata ruracujta ricushpa gentecuna ashtahuan burlarinata, jarcaicunata churanatapish yachashcami canga. Chashna jahuapish tucui shunguhuan crishpami Diosta tucuipi cazurca. Bibliapica: “Taita Dios mandashca shinami tucuita rurarca” ninmi (Génesis 6:22). w18.02 págs. 4, 5 párrs. 4, 6, 7

Tucuicuna tandalla cangapajca Jehová Dios cꞌuyashca shinami cꞌuyana canchij (1 Juan 4:8). Chaimantami “huauqui panicunata cꞌuyashpapish paicunahuan canataca mana minishtinichu” nishpaca mana yuyana canchij. Chashna yuyashpaca Pablo nishcata mana cazushcatami ricuchishun. Paica: ‘Caishuj chaishuj mana pꞌiñarishpa cꞌuyaihuan llaquinacuj caichij’ nircami (Efesios 4:2, QC, 1989). Yuyashun. Pabloca caishuj chaishuj mana pꞌiñarishpa llaquinacuj caichij nishca jahuapish “cꞌuyaihuan” nircami. Jehová Diosca tucui laya gentecunata cꞌuyashcamantami paipaj pueblopi chasquishca (Juan 6:44). Chaimantami huauqui panicunaman cꞌuyaita ricuchina canchij (1 Juan 4:20, 21). w18.01 pág. 14 párr. 14

Huaquin yaya mamacunaca “manaraj bautizarishpami universidadpi estudiana, shuj alli trabajota mashcana can” nishpami yuyancuna. Paicunaca huahuacunamanta preocuparishpami chashna yuyancuna. Pero ¿chaicunaca cushilla causangapaj huahuacunata ayudangachu? ¿Bibliaca chaitachu yachachin? Cai mundopica gentecunapaj ruraicunapish, yuyaicunapish mana Jehová Dios munashca shinachu can. Chaitaca mana cungarinachu canchij (Santiago 4:7, 8; 1 Juan 2:15-17; 5:19). Huahuacunaca Diablomanta, mana alli ruraicunamanta, mana alli yuyaicunamantapish jarcaringapajca Dioshuanmi alli apanacuna can. Yaya mamacuna estudianallapi, alli trabajota charinallapi yuyajpica huahuacunapish Dioshuan apanacunapaj randica chaicuna ashtahuan importante cashcatami yuyangacuna. Diosta sirvij yaya mamacunaca huahuacuna cai mundopi gentecuna laya yuyachun, imatapish rurachunca mana munanguichijmanchu. Chaimantami cushilla causangapajca Diostaraj puntapi churashpa causana canguichij (Salmo 1:2, 3). w18.03 págs. 11, 12 párrs. 10, 11

Achca testigo de Jehovacunaca ashallata charishpapish cushillami causancuna. Chashnami Jehová Diosta sirvingapaj ashtahuan tiempota charincuna. Jack shuti huauquimanta parlashun. Paipaj huarmica precursorami can. Paipish precursor tucungapajmi huasita, alli negociotapish cꞌaturca. Paica: “Trabajopi problemacuna tiyashcamantami tucui punllacuna shaicushca huasiman chayamuj carcani. Achca huatacunatami chashna pasarcani. Pero ñuca huarmisitaca siempremi cushilla pasaj carca. Paica, ‘ñucaca shuj alli amotami charini’ nijmi carca. Cunanca ñucapishmi precursor cani. Ishquindijmi Jehová Diosta sirvicunchij. Paica shuj alli amomi can” ninmi. Charinallapi yuyacushcata o mana yuyacushcata yachangapajca tapurishunchij: “¿Bibliapi nishca shina charinallapi mana yuyashpachu causacuni? ¿Cullquita gananallapichu yuyacuni? ¿Charinallapi yuyacunapaj randica Dioshuanpish shujtajcunahuanpish alli apanacungapajchu esforzaricuni? ¿Ñuca minishtishcacunata Jehová Dios cunataca tucui shunguhuanchu crini?”. Jehová Diosca paipi shunguta churajpica mana saquingachu. w18.01 págs. 24, 25 párrs. 12, 13

Quishpiringapajca Diospaj ñaupajpi ari nishcata pajtachinatajmi cangui. Chaimantami Bibliata liyina cangui, liyishcapipish alli yuyanami cangui. Shinallataj Diostami mañana cangui, pai cushca bendicioncunamanta pagui ninatapish mana cungarinachu cangui. Chashna rurashpaca Jehová Diosca cambaj amigo cashcatami cringui. Shujtajcunamanpish mana manchashpami paimanta parlangui (Salmo 73:28). Bibliapi nishca shinaca Jesusta catijcuna cangapajca tucuitami saquina canchij (Mateo 16:24). Chaipajca ñucanchij causaitami Jehová Diosman mingana canchij, bautizarinapish canchij. Chaita rurashpaca achca bendicioncunatami chasquishun. Shamuj punllacunapipish huiñai causaitami japishun. Chaimanta quishpiringapaj Diosman ari nishcata pajtachishpa catishunchij. w17.12 pág. 26 párrs. 18, 19

Huahuacunaca asha ashami Diospaj nishcacunata intindishpa catin. Chaimantami yaya mamacunaca pacienciahuan yachachina can (Efesios 3:18). Alli intindichunca jahualla shimicunapimi yachachina can. Chashnami uchillaraj cashpapish Diosmanta yachachijpica alli intindingacuna. Diospaj yachaicuna paicunapaj shunguman chayajpica escuelapipish shujtaj ladocunapipishmi Diosmanta huillai tucungacuna (1 Pedro 3:15). Por ejemplo, ¿gentecuna huañushpa ima tucushcataca cambaj huahuacunaca Bibliahuan yachachi tucuncunachu? ¿Bibliapi nishcacunataca paicunaca crinchu? Huahuacuna Bibliapi nishcacunata tucui shunguhuan crichunca pacienciahuan yachachinami minishtirin. Huahuacuna Diosta cꞌuyajpica cushillami sintiringuichij (Deuteronomio 6:6, 7). Diostapish paipaj mandashcacunatapish huahuacuna shungupi charichunca yaya mamacunarajmi alli ejemplota cuna can. Quimsa ushushicunata charij Stephanie shuti panica: “Shuj cꞌuyaj, llaquij Dios tiyashcata crichunca ñucapish imamanta chaita crishcatami paicunaman parlani. Diosta ñucaraj mana cꞌuyashpaca Diostaca cꞌuyanami canguichij mana ni tucuimanchu” ninmi. w17.12 pág. 17 párrs. 8-10

¿Martaca paipaj turi causarinataca imamantataj seguro carca? Paica huambraraj cashpami causarina milagrocunamanta paipaj huasipi o sinagogapi yachashca canga. Chai milagrocunamanta Bibliapi ricushun. Profeta Eliasta yuyarishun. Bibliapica paica Diospaj poderhuan shuj huahuata causachishcatami parlan. Chai punllacunapica shuj viuda huajcha huarmimi Sarepta llajtapi causarca. Paica profeta Eliastami llaquishpa paipaj huasipi chasquishca carca. Chaimantami Jehová Diosca micungapaj harinapish aceitepish manataj tucuringachu nirca. Chashnami viuda huarmipish paipaj shujlla churipish causashpa catircacuna (1 Reyes 17:8-16). Asha tiempo qꞌuipaca chai viudapaj churimi ungushpa huañurca. Chaimantami profeta Eliasca chai huañushca huahuata tuparishpa: “Mandaj ñuca Taita Dioslla, cai huambrapaj almata paillamantaj tigrachi” nishpa mañarca. Chaimi Jehová Diosca Elías mañashcata uyashpa chai huahuapaj almata tigrachirca. Alma nishpaca Eliasca causaimantami parlacurca (1 Reyes 17:17-24). Cai milagromi punta cutin Bibliapica ricurin. Martaca cai milagromantami de seguro yachashcanga. w17.12 págs. 3, 4 párrs. 1, 3, 5, 6

Achca gentecunaca, “alli profesionta charingapajmi sinchita esforzarina canchij. Chashnami tucuicuna respetashca, famoso, cullquiyujpish cashun” nincunami. Gentecunaca chai cosascunata charinallapi yuyashpami causancuna. Diosta sirvijcunapish mana cuidadota charishpaca paicuna shinallatajmi yuyashun. ¿Famoso, tucuicuna respetashca, cullquiyuj cashpachu cushilla causashun? Mana. Diablo ima tucushcata yuyashun. Paica tucuita mandaj canata, tucuicuna respetashca canatapishmi munarca. Pai munashcata charishpapish pꞌiñarishcami causacun (Mateo 4:8, 9; Apocalipsis 12:12). Yuyashun, gentecuna quishpirichun Diospaj Shimita paicunaman yachachishpaca ¿manachu cushilla sintirinchij? Ima profesionta charishpapish mana chashna cushilla sintirishunchu. Shinallataj maijan gentecunaca shuj alli trabajota japisha nishpami envidianapi, pꞌiñanacuicunapi urmashcacuna. Pero chai trabajota japishpapish mana cushilla causancunachu. Tucui imapish yangami cashca (Eclesiastés 4:4). w17.11 pág. 24 párrs. 11-13

Jesuspaj punllacunapipish cantashpa Jehová Diosta adoranaca importantemi carca. Ñuca huañushcata yuyaringuichij nishca qꞌuipaca Jesusca paipaj discipulocunahuanmi Taita Diosta cantarca. ¿Jesusta punta catijcuna Diosta cantashpa alabashcamantaca imatataj yachanchij? Paicunaca mana jatun templopi tandanacushpapish huasicunapi tandanacushpami tucui shunguhuan cantajcuna carca. Apóstol Pablopish paipaj huauqui panicunamanca: ‘Cancuna tucui imalla yachashcata caishuj chaishuj yachachinacuichij yuyachinacuichij. Salmocunata, cantanacunata, Diosta yuyarishpa sumaj cantocunatapish Diosta pagui nishpa tucui shunguhuan cantaichij’ nircami (Colosenses 3:16, NTQC, 1973). Ñucanchijcunapish chashnallatajmi Jehová Diostaca tucui shunguhuan cantana canchij. Cai cantocunata rurashpapishmi ‘alli cazuj, alli yuyaiyuj sirvij’ huauquicunaca ñucanchijta Jehovamanta yachachin (Mateo 24:45, QC, 1989). w17.11 pág. 4 párrs. 7, 8

Miticuna llajtacunaca quimsaca río Jordán cai ladoman, cutin caishuj quimsaca río chꞌimba ladomanmi carca. Chai llajtacunaman rina ñancuna jahualla chayana cachunmi Diosca mandashca carca. Chashnami mana munaimanta huañuchijcunaca utca chai llajtacunaman chayai tucurca (Números 35:12-14). Israelitacunaca miticuna llajtaman apaj ñancunataca allichishpami charijcuna carca (Deuteronomio 19:3). Judiocunapaj huaquin librocunapica: ‘Miticuna llajtaman chayachunca ñanpi señalcunami tiyarca’ ninmi. Chai llajtacuna tiyashcamantami maijan runa mana munaimanta pita huañuchishpaca caru llajtacunaman mana rina carca. Caru llajtaman rishpaca yanga dioscunata adoranapimi urmanman carca. Jehová Diosca maijan runata pꞌiñashpa huañuchijpica paitapish huañuchichunmi mandarca. Pero mana munaimanta huañuchishca cajpica paita llaquishpa juzgachun, cuidachunpishmi mandarca. Bibliamanta yachaj shuj runaca: “Dios cushca leycunaca tucuimi claro, jahualla, intindinalla carca. Cai leycunami Jehová Dios llaquij cashcata ricuchirca” nircami. Jehová Diosca imapi pandarishcamantaca mana llaquichina yuyaillachu can. Ashtahuanpish paica yallitaj llaquishpami pitapish juzgan (Efesios 2:4). w17.11 pág. 16 párrs. 4, 5

Profeta Zacariasca pillushca cara shina huairapi callpacujta, shuj huarmi canasta ucupi tiyacujta, cigüeñapaj alasta laya charij ishqui huarmicuna volacujtami shuj muscuipi shina ricurca. Cai mancharina muscuicunataca Zacarías libropimi liyi tucunchij (Zacarías 5:1, 7-9). ¿Jehová Diosca imamantataj Zacariasmanca chaicunata ricuchirca? Zacarías capítulo 5-pi nishca shinaca millaita rurajcunaca llaquimi tucunga. Jehová Diosca millai ruraicunataca mana ricunachinchu. Chaimantami paita sirvijcunapish mana alli ruraicunataca millanayachina canchij. Chashna rurajpica Diosca ñucanchijta mana llaquichingachu. Ashtahuanpish paica allimi cuidanga, bendiciangapishmi. Cai mundopica achca mana alli ruraicunami tiyan. Pero Jehová Diosllatajmi chai mana alli ruraicunapi ama chagrurichun ayudanga. w17.10 págs. 15, 20 párrs. 1, 19

Soltera panicunapish Diosta ashtahuan sirvi tucuncunami. Paicunaca precursorasmi cai tucuncuna. Mana cashpaca shujtaj ladocunapimi Diosmanta huillanaman ri tucuncuna o Departamento Local de Diseño y Construcción nishcapipishmi ayudai tucuncuna. Shinallataj Escuela para Evangelizadores del Reino nishcaman ringapajmi solicitudta jundachi tucuncuna. Maijancunacarin Escuela de Galaad nishcamanmi ri tucuncuna. Yuyajlla panicunaca congregacionpica valishcami can. Mayorlla cashcamanta ña mana tanto rurai tucushpapish congregacionpica mana manchashpami ayudai tucuncunaraj. Por ejemplo, ancianocunaca shuj jovenlla pani maipish cachun ropata churarishpa puricujtachari ricun. Chaimantami yuyajlla panitaca joven panita ayudachun mañan. Chai joven panitaca mana manchashpami cunana can. Sinchita rimanapaj randica, “chashna churarishpaca shujtajcunatami ñitcachingui” nishpami cꞌuyaihuan cunana can (1 Timoteo 2:9, 10). Yuyajlla panicuna cꞌuyaita ricuchijpica tucuicunami congregacionpica Diosta alli sirvishun. w17.09 pág. 31 párrs. 17, 18

Maijancunaca Bibliata ama charichun, ama liyichunmi jarcashcacuna. Pero Diosta cꞌuyajcunaca tucuicuna Bibliata paicunapaj shimipi charichunmi achcata lucharcacuna. Por ejemplo, John Wyclef runamanta parlashun. Paica 600 huatacuna huashamanmi Inglaterra llajtapi causarca. Cai runaca tucuicuna Diospaj Shimita intindichunmi munarca. Pero chai tiempopica Bibliataca casi ni pi mana charircachu. John Wyclef runaca paita ayudajcunandijmi 1382 huatapi inglés shimiman Bibliata traducirca. Paicunataca lolardos nishpami rijsijcuna carca. Paicunaca Diospaj Shimitaca achcatami valorarcacuna. Chaimantami chaquillahuan tucui Inglaterra llajtata Bibliamanta yachachishpa purircacuna. Huaquin copiashca versocunatapishmi gentecunaman cujcuna carca. Qꞌuipa huatacunaca achca llajtacunapimi Bibliataca shujtaj shimicunaman traduci callarircacuna. Chashnami gentecunaca paicunapaj shimipi Bibliata liyi tucurcacuna. w17.09 pág. 18 párrs. 10-12

Huaquin cazadocunaca huahuata mana chari tucushpami llaquilla sintirincuna (Proverbios 13:12). Ñaupa punllacunapica huahuata mana charinaca huarmipajca jatun llaquimi carca. Por ejemplo, Jacobpaj huarmi Raquelca huahuata mana chari pudircachu. Paipaj ñaña huahuacunata charijta ricushpaca Raquelca llaquillami sintirirca (Génesis 30:1, 2). Shinallataj, cusa o huarmi huañunataca mana yuyanchijchu. Cai llaquitaca ni pi mana charisha ninchijchu. Diosta sirvijcunaca huañushcacunata Dios causachinatami tucui shunguhuan crinchij. Chaimantami cusa o huarmi huañujpica paicunata cutin ricunata yachashpa ñaupajman catinchij (Juan 5:28, 29). Ñucanchij Yayito Diosca llaquihuan cajpica Bibliahuan yachachishpa, cushichishpami ayudan. w17.06 págs. 3-5 párrs. 1, 6, 9

Shuj punllaca Jehová Diosca Moisesmanca paipaj shutita, pai ima shina cashcatapishmi huillarca. Paica tucuita ruraj, tucuicunamanta ashtahuan yachaj cashpapish ‘cꞌuyaj, llaquijmi cani’ nircami (Éxodo 34:5-7). Jehová Diosca ayudaj cashcata Moisés tucui shunguhuan crichunmi cꞌuyaj, llaquij cashcata huillarca (Éxodo 33:13). Diosca llaquijcuna cachunmi ñucanchijtaca rurarca. Shinapish juchayujcuna cashcamantaca llaquijcuna mana canchijllachu. Maipica shujtajcunata llaquishpa ayudanapaj randica ñucanchijllapimi yuyanchij. ¿Llaquijcuna cangapajca imatataj rurana canchij? Puntapica Diospish, huaquin runacunapish llaquijcuna cashcamanta shujtajcunata ayudashcatami yuyarina canchij. Shinallataj Jehová Dios shina llaquijcuna cangapaj imata ruranatami ricuna canchij. Qꞌuipaca llaquij cashcamanta ima bendicioncunata chasquinatami yuyarina canchij. w17.09 págs. 9, 10 párrs. 1, 3

Imata rurashpapish Diosta jatunyachingapajmi rurana canchij. Mana gentecunapaj ñaupajpi alli ricuringapajllachu rurana canchij. Shuj angelca jucha illaj cashpapish qꞌuipaca jatun tucushpami juchapi urmarca (Ezequiel 28:17-ta ricui). Ñucanchijcunacarin juchayujmi canchij. Chaimantami huaquinpica jatun tucusha ninchijlla. Shinapish humildes cai tucunchijmi. ¿Humildes cangapajca imatataj rurai tucunchij? Tucui punllacunami Bibliata liyingapaj tiempota llujchina canchij. Shinallataj liyishcapimi alli yuyana canchij (Deuteronomio 17:18-20). Por ejemplo, Jesús yachachishcacunata, pai ima shina humilde cashcatami cutin cutin yuyana canchij (Mateo 20:28). Shuj cutinca Jesusca apostolcunapaj chaquicunatami maillarca. Chashnami paica humilde cashcata ricuchirca (Juan 13:12-17). Ñucanchijcunaca, “shujtajcunamantaca ñucami ashtahuan yalli cani” nishpachari yuyashun. Chashna yuyaicunata ama charingapajca Diostami paipaj espirituhuan ayudachun mañana canchij (Gálatas 6:3, 4). w17.08 pág. 24 párrs. 11, 12

Ima decisionta agllangapajchari Diosta mañarcanchij. Jehová Dios paipaj espirituhuan ayudacushcata yuyajpipish manachari ñucanchij munashca shina llujshirca. Ashtahuanpish chashna decidishcamantaca achca problemacunatachari charircanchij o ñucanchij causaipi achca cambiocunatachari rurana carcanchij (Eclesiastés 9:12). ¿Llaquicunahuan cashpapish Diospaj ‘sumaj causaita’ charingapajca imatataj rurana canchij? Pabloca Filipospi causaj huauqui panicunamanca, ama preocuparingapajca Diosta mañanguichij nircami. Ñucanchijpish llaquicunamanta preocupados cashpaca Jehová Diostami mañana canchij (1 Pedro 5:6, 7). Jehová Dios ayudanata crishpa, pai cushca bendicioncunamanta pagui nishpami tucui shunguhuan mañana canchij. Shinallataj ‘ñucanchij imata mañashcatapish, yuyashcatapish ashtahuan yallita ruraj’ cashcatami tucui shunguhuan crina canchij (Efesios 3:20). w17.08 págs. 10-12 párrs. 4, 6, 10

Achcacunaca joven cashpaca precursorcunami tucurcacuna. Chashnami cushilla causarcacuna. Can joven cashpaca imata ruragrishcatami paicunaman parlai tucungui. “Precursor cashpaca achca cosascunatami yachangui. Chai yachashcacunaca cambaj causaipimi sirvinga” nishpami animangacuna. Jesusca jahua pachapi cashpaca paipaj Yayamanta achcatami yacharca. Cai Allpapi cashpapish ashtahuanmi yachashpa catirca. Shujtajcunata Diosmanta yachachishpa, llaquicunata ahuantashpami cushilla sintirirca (Isaías 50:4; Hebreos 5:8; 12:2). Jesusca gentecunaman yachachigrichij nishpami mandarca (Mateo 28:19, 20). Shujtajcunaman Diosmanta yachachishpaca cushillami causangui, Diostapishmi jatunyachingui. Alli yachachij cangapajca tiempomi minishtirin. w17.07 págs. 22, 23 párrs. 6, 7

Llaquilla cajpica Yayito Jehová Diosmi ñucanchijta cushichi tucun (2 Corintios 1:3, 4). Shuj familia o amigo huañujpica huauqui panicunami ayudai tucun (1 Tesalonicenses 5:11). ¿Shungupi llaquilla sintirijcunataca ima shinataj ayudai tucunchij? (Proverbios 17:22). Puntapica, Eclesiastés 3:7-pi nishcatami yuyarina canchij. Chaipica: “Upalla cangapajpish, rimanacungapajpish punllami chayan” ninmi. Dalene shuti panica viudami saquirirca. Paica cashnami nin: “Shuj familia o amigo huañujpica ñucanchij ima shina sintirishcata uyachunmi minishtinchij. Chaimantami mana imatapish nishpa alli uyana canchij” ninmi. Cunanca Junia shuti panimanta parlashun. Paipaj turica paillatajmi huañurca. Pani Juniaca: “Familia huañushcamanta shungupi ima shina sintirishcata mana tucuita intindishpapish paicunata ayudangapajmi esforzarina canchij” ninmi. Huañui tiyajpica maijancunaca yallitaj llaquirishpami huacancuna. Cutin shujtajcunaca llaquilla cashpapish mana huacancunachu, tranquilo layami ricurincuna. w17.07 págs. 10-12 párrs. 3, 11-13

Achca gentecunapajca cullquimi ashtahuan valishca can. Chaimantami ashtahuan charinallapi yuyancuna, mana cashpaca ña charishcacunata ama pirdingapajmi imatapish rurancuna. Shujtajcunapajca alli saludta charina, familiacuna, paicunapaj munaita ruranami ashtahuan valishca can. Pero ¿imataj ashtahuan importante can? Jehová Dioslla tucuita mandana cashcata ricuchinami ashtahuan importante can. Pero mana cuidarishpaca Diosta apoyanapaj randica ñucanchij ruraicunallapi, problemacunallapimi yuyai callarishun. Cutin, Dioslla tucuita mandana cashcata mana cungarishpaca, llaquicuna tiyajpipish chai llaquicunata chꞌimbapurai tucushun. Ashtahuanpish Jehová Diospajman ashtahuanmi cꞌuchuyashun. w17.06 pág. 15 párrs. 1, 2

Jehová Diosca cꞌuyaihuanmi mandan. Chaimantami familiata pushajcunapish, ancianocunapish cꞌuyaihuan pushana can. Mana paicuna munashca shina ruranachu can. Ashtahuanpish Jehová Diospaj ejemplotami catina can. Pabloca chaitami rurarca. Paica Jehovapaj, Jesuspaj ejemplotami catirca. Chaimantami shujtajcunataca mana pingaipi churarca. Shinallataj ‘allita ruranatajmi canguichij’ nishpa mana obligarcachu. Ashtahuanpish cꞌuyaihuanmi allita rurachun animarca (Romanos 12:1; Efesios 4:1; Filemón 8-10). Jehová Diosca cꞌuyaihuanmi imatapish ruran. Ñucanchijpish chashnallatajmi rurana canchij. Chashnami Mandaj Diosta tucui shunguhuan apoyashun. Diosca huaquin huauquicunatami congregacionpi pushachun agllashca. Paicunaca decisioncunatami japincuna. Imamanta chashna decidishcata mana alli intindishpapish, o chai decisión mana alli cashcata yuyashpapish paicunata respetana, cazunami canchij. Diosta mana rijsijcunaca pitapish mana cazuncunachu. Pero ñucanchijca tucuita Mandaj Jehová Diosta apoyashcamantami pushajcunata cazunchij (Efesios 5:22, 23; 6:1-3; Hebreos 13:17). w17.06 págs. 24, 25 párrs. 14, 15

Huaquincunaca ima problemata charishcamantachari llaquilla puricuncuna. Paicunata animota cushpami ayudai tucunchij (Proverbios 12:25; Colosenses 4:11). Ñucanchij rurashcahuan, rimashcahuanmi Diosta sirvijcunapura cꞌuyanacushcata ricuchinchij (Gálatas 6:10). Bibliapica, ‘tucuri punllacunapi gentecunaca paicunalla alli canata munajcuna, quiquinpajlla charinata munajcunami canga’ nircami (2 Timoteo 3:1, 2). Chaimantami Diosta sirvijcunaca Diostapish, shujtaj huauqui panicunatapish ashtahuan cꞌuyangapaj esforzarina canchij. Shinallataj Jehová mandashcacunatapish ama cungaringajmi esforzarina canchij. Juchayujcuna cashcamantaca huaquinpica ñucanchij huauqui panicunahuanchari pꞌiñanacushun. Shinapish paicunata cꞌuyashcamantaca ima problematapish sumajtami utca allichina canchij (Efesios 4:32; Colosenses 3:14). Ashtahuanpish Jehová Diostapish, Bibliapi yachachishcacunatapish, ñucanchij huauqui panicunatapish tucui shunguhuan cꞌuyashpa catishunchij. w17.05 pág. 20 párrs. 17, 18

Diosta mana sirvijcunaca huaquinpica ñucanchijtachari llaquichi tucun. Pero shuj huauqui o pani ñucanchijta o shujtajcunata llaquichishca laya ricurijpica ¿imatataj rurashun? ¿Diosmanta caruyashunchu? Tucuicuna juchayujcuna cashcamantami pandarinchijlla. Chaimantami ima horapish shuj huauqui o shuj pani ñucanchijta llaquichi tucun. O ñucanchijpish shujtajcunatachari llaquichi tucunchij. Chai problemacunataca congregación ucupi mana tanto uyashcanchijchu. Pero chai problemacuna tiyajpica mana mancharinachu canchij. Diosmantapish mana caruyanachu canchij. Shuj hermano o shuj hermana llaquichijpipish Diosmanta ama caruyangapajca Bibliapi mandashcacunatami cazuna canchij (Salmo 55:12-14). w17.04 pág. 16 párrs. 4, 5

Cusa o huarmi Diosta mana sirvijpicarin ashtahuan problemacunatachari charishun. Cusa o huarmi Diosta mana sirvijpipish mana separarina o divorciarinachu canchij. Chaita ruranaca Diospaj ñaupajpica mana alli canchu (1 Corintios 7:12-16). Mana crij cusaca manachari Dios mandashca shina familiata ñaupajman pushanga. Shinapish familiapaj uma cashcamantami huarmica paitaca respetana can. Shinallataj cusaca paipaj huarmi Diosta mana sirvijpipish cꞌuyaihuanmi cuidana can (Efesios 5:22, 23, 28, 29). ¿Cusa o huarmi Diospajta mana tanto rurachun saquijpica imatataj rurashun? Por ejemplo, shuj panipaj cusaca, ‘asha punllacunallatami huillanaman llujshina cangui’ nircami. ¿Cambaj cusapish o huarmipish chaillatataj nijpica imatataj ruranguiman? Chaipica, “¿Diosta ama sirvichun nishpachu chashna nicun? Mana chashna cajpica ¿pai mañashcata rurai tucunillachu?” nishpami tapurina cangui. Imatapish alli yuyashpa decidishpaca mana tanto problemacunata charishunchu (Tito 3:2). w17.10 págs. 10, 11 párrs. 7, 8

Bibliapi nishca shinaca “tucui llajtacunamanta shujtaj shujtaj rimaita rimaj” gentecunami Diospaj puebloman yaicucuncuna (Zacarías 8:23). Yaya mamacuna, cancunapaj shimita huahuacuna mana alli intindijpica Diospaj Shimita yachachinaca sinchimi canga. Shujtajcunaman Diospaj Shimita yachachishpapish huahuacunaman Diosmanta yachachinataca manataj cungarinachu canguichij. Huahuacuna Diosta alli rijsishpallami huiñai causaita charingacuna (Juan 17:3, QC, 1989). Chaimantami mana saquishpa Diosmanta yachachirana canguichij (Deuteronomio 6:6, 7). Huahuacunaca escuelapi o shujtaj gentecunahuan tandanacushpaca chai llajtapi parlashca shimitami yachangacuna. Pero cancunapaj shimipi tigra tigra parlajllapimi huahuacunaca cancunapaj shimita yachangacuna. Cancunapaj shimita yachajpica jahuallami imatapish parlanacui tucunguichij. Paicuna ima shina sintirishcatapish allimi intindinguichij. Huahuacuna shujtaj shimita yachashpaca imatapish ashtahuanmi yachangacuna. Shinallataj shujtaj gentecuna ima shina yuyashcatapishmi intindi tucungacuna. w17.05 pág. 10 párrs. 5, 6

Rey Jabinca 900 macanacuna carrocunatami charirca. Pero israelitacunaca macanacungapaj alli armacunataca mana charircacunachu (Jueces 4:1-3, 13; 5:6-8). Chashna cajpipish Jehová Diosca israelitacunataca macanacunaman richun mandarca. Chaimantami 10 mil cꞌaricunaca Taanac shuti quingripimi Jabinpaj soldadocunahuan macanacunaman rirca (Jueces 4:14-16). ¿Israel cꞌaricunataca Diosca ayudarcachu? Ari. ¿Ima shinataj ayudarca? Diosca animalta tamyachijpimi macanacuna pambaca ñapish lodoyarca. Chaimi Baracpish Israel cꞌaricunapish Haróset pambacunacama Sisaratapish, paipaj soldadocunatapish 24 kilometrocunata catishpa rirca. Harosetman manaraj chayashpaca Sisarapaj carroca lodopi pambarishpa, mana puri tucushcamantami Sísara runaca Zaananim pushtucama callpashpa rirca. Chaiman chayashpaca Jael huarmipaj carpa huasipimi pacatucurca. Sísara runaca yallitaj shaicushca cashcamantami dormishca saquirirca. Jael chaita ricushpaca manchaita ladoman saquishpami Sisarataca huañuchirca (Jueces 4:17-21). Jehová Diosmi israelitacunata mishachirca w17.04 pág. 29 párrs. 6-8

¿Armagedón jatun macanacui qꞌuipaca shujtaj organización cai Allpapi tiyangachu? Diospaj Shimipica: ‘Ñucanchijca, pai rurasha nishca shinallataj mushuj jahua pachata, mushuj cai pachatami shuyacunchij. Chaipica tucuicunami cashcata rurajcunalla canga’ ninmi (2 Pedro 3:13). ‘Mauca jahua’ pacha nishpaca millai gobiernocunatami nin. Cutin ‘mauca cai pacha’ nishpaca gobiernocunapaj maquipi caj gentecunatami nin. ¿Chai millai gobiernocuna tucurijpica pitaj mandanga? Bibliapica mushuj jahua pacha nishpaca mushuj gobiernomantami parlan. Cai gobiernopica Jesucristomi mandanga. 144 mil ungidocunapishmi Jesushuan mandanga. Cutin ‘mushuj cai pacha’ nishpaca Jesús mandagrij alli gentecunamantami parlan. Jehová Diosca tucuita alli charij Diosmi can. Chaimantami Jesuspish ungidocunapish Jehová Dios shina gentecunata alli mandanga (1 Corintios 14:40). Cai Allpapica huaquin cꞌaricunapish Jesús nishcata, ungidocuna nishcata uyashpami ñaupajman pushangacuna (Salmo 45:16). Dios churashca Mandanalla cai Allpata mandajpica millai ruraicunapish mana tiyangachu. Chaipica tucuicunami tandalla, cushilla causashun. Chaita yachashpaca ¿manachu cushilla sintirinchij? w17.04 pág. 12 párrs. 8, 9

Pihuan cazaranata ari ninaca Diospaj ñaupajpica achca valishcami can. Mana pugllaichu can. Noviocunaca Diospaj ñaupajpi, compañajcunapaj ñaupajpimi ari nincuna. Paicunaca: ‘Dios mandashca shinami huañungacama ishquindijmanta cꞌuyanacushpa, cuidanacushpa, respetanacushpa causashun’ nishpami ari nincuna. Huaquin noviocunaca mana chai shimicunallatataj ningacunachu. Shinapish Diospaj ñaupajpimi ari nincuna. Chai punllamantami noviocunaca cusa huarmi cancuna. Cazarashcacunaca tucui causaipimi tandalla causana can (1 Corintios 7:39). Jesusca: “Taita Dios tandachishcataca, ni pi amataj chꞌicanyachichun” nircami. Chaimantami cazaragrijcunaca, ‘ima llaqui ricurijpica divorciarishunllami’ nishpa mana yuyana can (Marcos 10:9). Tucuicunami juchayujcuna canchij. Chaimantami Bibliapi nishca shinaca huaquinpica cazadocunapish llaquicunata charin (1 Corintios 7:28). w17.04 pág. 8 párrs. 14, 15