Septiembre

Diosta sirvij yaya mamacunapajca huahuacuna Diosta cꞌuyachun yachachinami ashtahuan importante can (Salmo 127:3). Israelitacunapaj huahuacunaca Diosman mingarishcami huacharijcuna carca. Pero cunan punllapica yaya mama Diosta sirvijcuna cajpipish huahuacunaca mana Diosta sirvijcuna cashpa huacharinchu. Shinallataj yaya mama Diosta cꞌuyajpipish, paimanta yachashcacunata valorajpipish huahuacunaca mana chaita rurangacunachu. Chaimantami llullumantapacha Jesusta catij tucuchun, Diosman mingarishpa bautizarichun ayudana can. Chashna ayudanaca importantemi can. ¿Imamantataj chaita ninchij? Paicunaca Diosman mingarishpa, bautizarishpa, Diosta alli sirvishpallami jatun llaqui punllapica salvaringacuna (Mateo 24:13). Caipi ricushca shinaca huahuacuna Diosman mingarishpa, bautizarishpa Diosta sirvij tucujpi tucui yaya mamacuna cushilla sintirichunmi munanchij. w18.03 pág. 14 párrs. 16, 17

Ancianocuna, yayacunapish Bibliapi tiyaj consejocunahuan disciplinata cucushpaca Jesús shina cangapajmi esforzarina can. Chashna rurashpaca Jehovapish Jesuspish ayudachun munashcatami ricuchincuna. Shinallataj Jehová ñucanchijta disciplinajpica allimi chasquina canchij. Y Jehová Dios shina, Jesús shinami shujtajcunatapish disciplinana canchij. Chaimi achca bendicioncunata charishun. ¿Ima bendicioncunatataj charishun? Por ejemplo, familiapipish, congregacionpipish sumaj causaitami charishun. Chashnallataj tucuicunami cꞌuyashca, valorashca, tranquilos sintirishun. Caicunaca paraíso Allpapi ima bendicioncunalla tiyagrishcatami ricuchin (Salmo 72:7). Diospaj disciplinata chasquishpaca paraisopi huiñaita tandalla, sumajta causangapajmi listos cashun. Jehovami ñucanchij yaya canga (Isaías 11:9). Caita mana cungarishpaca Dios disciplinajpica paica cꞌuyaimanta cashna rurashcatami intindishun. w18.03 págs. 25, 26 párrs. 15, 17, 19

¿Gentecunaca imamantataj Juanta bautizachun nishpa mañajcuna carca? Paicunaca Moisesman cushca leycunata mana pajtachishcamantami arrepintirishcata ricuchingapaj Juanpajman rijcuna carca (Mateo 3:1-6). Shinallataj Juanca Diospaj Churita bautizana sumaj bendiciontami charirca (Mateo 3:13-17). Pero ¿Jesusca imamantataj Juanta bautizachun mañarca? Paica mana ima juchata rurarcachu. Imamanta arrepintirinatapish mana minishtircachu (1 Pedro 2:22). Jesusca paipaj Yayapaj munaita rurangapaj listo cashcata ricuchingapajmi bautizarirca (Hebreos 10:7). Jesús yachachicui punllacunapica paita catijcunapishmi huaquin gentecunata bautizarcacuna (Juan 3:22; 4:1, 2). Chai gentecunapish Moisesman cushca leycunata mana cazushcamanta arrepintirishcata ricuchingapajmi bautizarijcuna carca. Pero Jesús huañushpa causarishca qꞌuipaca Jesusta catisha nijcunaca ¿imamantataj bautizarijcuna carca? w18.03 pág. 5 párrs. 6, 7

Diospaj espirituta charijca Dioshuan alli apanacungapaj, pai shina cꞌuyaj, llaquij cangapajmi esforzarin (Efesios 5:1). Diospaj espirituta charijpajca Diosca paipaj ladopi cashca shinami can. Chaimantami Dios mandashcacunataca siempre cazun, pai yuyashca shina yuyangapaj esforzarin (Salmo 119:33; 143:10). Aicha munaillata ruranapaj randica Gálatas 5:22, 23-pi parlashca ‘espiritupaj granota’ ricuchingapajmi esforzarin. Yuyashun, pi musicallamanta parlajpica paitaca musicatami munan ninchijmi. Shinallataj Diospajllata ruranata munajpica Diospaj espiritutami charin ninchijmi. w18.02 pág. 17 párrs. 3, 6

Danielca Babiloniapimi prezu shina carca. Chai llajtapica yanga dioscunatami adorajcuna carca. Brujocuna nishcapishmi tiyarca. Shinallataj babiloniocunaca judiocunata mana ricunayachijcunachu carca. Chaimantami judiocunamantapish Jehová Diosmantapish burlarijcuna carca (Salmo 137:1, 3). Chashna burlarijpica Diosta alli sirvij judiocunapish, Danielpish shungupi nanarishcami sintirishcacuna canga. Chashnallataj Babiloniocunaca jatun mandajpaj micunatapishmi carasha nircacuna. Pero Danielca ‘jatun mandajpaj micunata micushpa mana mapayasha nishpami paipaj shungupica manataj micunata yuyarirca’ (Daniel 1:5-8, 14-17). Danielca alli yachaj, imatapish alli ruraj huambrami carca. Chaimantami Babiloniata mandajca alli puestocunata curca (Daniel 1:19, 20). Chashna cashpapish Danielca mana tucuita yachashcata yuyarcachu. Paica humildemi carca. Imata charishpapish Jehová Diosmanta chasquishcatami yuyaipi charirca (Daniel 2:30). Jehová Diosca ‘Noepish, Danielpish, Jobpish cashcata rurajcunami can’ nircami. Pero yuyashun, Danielca huambrarajmi carca. Cutin Noepish Jobpish achca huatacunatami huañungacama Diosta ña sirvishcacuna carca. Daniel huambraraj cajpipish ‘cashcata rurajmi’ nishpaca Diosca mana pandarircachu (Ezequiel 14:14). ¿Imamantataj chaita ninchij? Danielca tucui vidami Diospi crishpa paita cazushpa causarca. w18.02 págs. 5, 6 párrs. 11, 12

Shuj punllaca Jesusca shuj ‘cazamiento bodamanmi’ rirca. Chai bodapica vino tucurijpimi, milagrota rurashpa yacutaca vinoman tigrachirca (Juan 2:1-10). Shinallataj shujtaj cutinca, shuj ‘jatun micunamanmi’ rirca. Caipi ricushca shinaca Jesuspish shujtajcunahuan alli pasana, cushicunatami munaj carca. Pero mana chai cosascunallapi yuyashpa causarcachu. ¿Mana cushicunallapi yuyashpa Jesús causashcataca ima shinataj yachanchij? Jesusca paipaj Yaya mandashcataraj rurashpa, shujtajcunata ayudashpami causarca. Shinallataj gentecuna quishpirichunmi achcata sufrishpa huañurca. Chaimantami Jesusca paita catijcunamanpish: “Ñucata caticushcamanta tucui laya millai shimicunata rimashpa, llullashpa, cꞌamishpa, llaquichina yuyailla llaquichijpi llaquita apajcunaca cushichishcami. Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari” nirca (Mateo 5:11, 12). Diosta tucui shunguhuan cꞌuyashpaca pai mana munashcataca mana rurashunchu. Shinallataj ñucanchij ruraicuna paipaj shunguta llaquichi tucushcata yuyashpaca chaicunatapish mana rurashunchu (Mateo 22:37, 38). w18.01 págs. 25, 26 párrs. 16-18

Jehová Diosca ñucanchijmanca tucuitami cushca. Chaimantami paita tucui shunguhuan agradicishcata, cꞌuyashcata ricuchingapaj ñucanchij charishca cosascunata paiman cuna canchij. Jehová Dios tucuita cushcata mana cungarishpaca David layami sintirishun. Mandaj Davidca: ‘Jehová Dioslla tucui imapish cambajmi. Cambaj maquimanta japishcallatami canman cunchij’ nircami (1 Crónicas 29:11-14). Imata ñucanchijman cujpica cushillami sintirinchij. Chashnallatajmi ñucanchijpish cushicushpa cuna canchij. Yuyashun, shuj huahuamanca paipaj yaya mamami asha cullquita cun. Chai cullquillahuantaj randishpa paicunaman shuj regalota cujpipish ¿manachu yaya mamaca cushicunga? Ari. Cutin, shuj joven precursorpi yuyashun. Paica paipaj yaya mamahuanmi causan. Arriendomanta, micunamanta pagachunchari yaya mamaman asha cullquita cun. Chashnami churica yaya mamata agradicishcata ricuchin. Chaimantami chai cullquita mana minishtishpapish yaya mamaca chasquincuna. Cai yaya mamacuna shinallatajmi Jehová Diospish shungumanta ñucanchij charishca cosascunata paiman cuchun munan. w18.01 pág. 16 párrs. 4, 6

Yaya mamacunaca “caita runaca allimi o chaita ruranaca mana allichu” nishpallaca mana yachachinachu can. Ashtahuanpish “¿alli laya ricurijpipish imamantataj Bibliaca chaita ama rurachun nin? ¿Bibliapi mandashca shina ruranaca imamantataj alli can?” nishpami yachachina can (Isaías 48:17, 18). Cambaj churi o ushushi bautizarisha nijpica bautizarishpa ima responsabilidadta charina cashcatami intindichina cangui. Por ejemplo, “¿imamantataj bautizarisha ningui? ¿Bautizarishpaca ima bendicioncunatataj charingui? ¿Jarcaicunata charishpapish imamantataj Diosta sirvina cangui?” nishpami tapui tucungui (Marcos 10:29, 30). Manaraj bautizarishpami chai tapuicunapi huahuacunaca alli yuyanaraj can. Chashnami Bibliapi nishcacunata cazuna alli cashcata yachangacuna. w17.12 págs. 18, 19 párrs. 14, 15

Maijan huauqui panicunaca ancha ungushcacunami can. Cutin, shujtajcunaca ña yuyajllacuna cashpapish paicunapaj ashtahuan yuyaj familiacunatami cuidacuncuna. Huaquincunaca paicunapaj familiaman ima minishtirishcallatapish cungapajmi sinchita esforzaricuncuna. Maijancunatacarin cai tucui llaquicunami jahuanpi jahuanpi japishca. Pero yuyashun, luzerocuna vidata mana charijpipish Diosca preocuparinmi. Ñucanchijcunaca cꞌuyaimantami Diosta sirvinchij. Chaimantami Diosca ashtahuan preocuparin (Salmo 19:1, 3, 14). Diosca ñucanchijcunataca allimi rijsin. Jesusca: “Cancunapaj uma ajchapish tucui yupashcami canguichij” nircami (Mateo 10:30). Shinallataj salmocunata escribij shuj runaca: “Ima pandata mana rurajcunataca, punllantami Mandaj Diosca huaquichinga” nircami (Salmo 37:18). Cai versocunapi ricushca shinaca ima llaquicunata charijpipish Diosca ahuantachunmi ayudanga. w18.01 págs. 3, 4 párrs. 1, 4

Tabita huarmita Pedro causachishcata ricushpami achcacunaca Jesusta catijcuna tucurca. Jesusta mushuj catijcunaca paimantami huillai tucurcacuna. Jehová Dios huañushcacunata causachingapaj poderta charishcatapishmi shujtajcunaman parlai tucurcacuna (Hechos 9:36-42). Cunanca shujtaj runa ima shina causarishcata yachashun. Caitaca achca gentecunami ricurca. Shuj tutaca apóstol Pabloca Troas llajtapimi chaupi tutacama conferenciata cucurca. Troas llajtaca cunan Turquiapimi carca. Eutico shuti shuj jovenmi apóstol Pablopaj conferenciata uyacurca. Paica ventanapi tiyacushpami dormi atijpi quimsa piso huasimanta urmarca. Tal vez Lucasmi puntapi uriyashpa chai huambra huañushcata ricushcanga. Pabloca gradacunata uriyashpami huambrata ugllarishpa causachirca. Chaimi: ‘Huambraca mana huañushcachu, causacunmi’ nirca. Pablo chai huambrata causachijta ricushpami chaipi cajcunaca cushicushcacuna canga (Hechos 20:7-12). w17.12 págs. 5, 6 párrs. 10, 11

¿Llaquicunata gentecunaca tucuchi tucushcachu? Mana. Cunancarin Internetpimi shuhuancuna. Familia ucupipish macanacushpalla, rimanacushpallami causancuna. Maijan gentecunaca paicuna layallataj mana yuyashcamantami llaquichincuna. Politicocunapish shujtaj organizacioncunapish paicunallapi yuyashpami imatapish rurancuna. Chashnallataj paicunaca ungüicunata, shuhuajcunata, huañuchijcunata, guerracunata, pobrezatapish mana tucuchi valishcachu. Jehová Diosca cai tucui llaquicunata tucuchichunmi Jesusta agllashca. Paimi shuhuaj gentecunata, panda religioncunata, Diablotapish tucuchinga (Salmo 46:9). Chashnami guerracunaca ña mana tiyanga. Cunan punllacunapica Jesusca muyundij Allpapimi gentecuna cꞌuyanacuchun, allita rurachun yachachicun. Tucuicuna Diosta cazunata yachashpaca ña mana shuhuangacunachu, ña mana llaquichingacunachu (Isaías 11:9). Pobrezatapish ungüicunatapish Jehová Diosmi tucuchinga (Salmo 72:12, 13; Isaías 35:5, 6). Diosca ima mana faltachunmi paita cazujcunata bendicianga. w17.11 págs. 25, 26 párrs. 14-16

Shuj israelita mana munaimanta pita huañuchishpaca ama juchachishca cangapajmi miticuna llajtaman rina carca. Causaica Jehová Diospajca valishcami can. Chaimantami shuj runata yangamanta huañuchijtaca pꞌiñan (Proverbios 6:16, 17). ¿Diosca ima shinataj causaica valishca cashcata israelitacunaman ricuchirca? Jehová Diosca cashcata ruraj, jucha illaj Diosmi can. Chaimantami shuj israelita mana munaimanta huañuchijpipish Diospaj ñaupajpica culpayuj carca. Mandashcata quillcajcunapish fariseocunapish mana Jehová Dios shina carcacunachu. Shujtajcunapaj causaitapish mana valishcata layami ricujcuna carca. Chaimantami Jesusca: “Taita Diosmanta yachana yuyaitaca huichcashpami cancunaca mana yachashun nircanguichij. Cancunallataj mana yachashun nij cashpami, shujtajcuna yachashun nijpipish mana saquinguichij” nirca (Lucas 11:52). Paicunaca Diospaj Shimita intindichishpa huiñai causaita charichunmi gentecunata ayudana carca. Chaita ruranapaj randica ‘Mandaj Jesusta’ catinatami jarcarcacuna (Hechos 5:31). Paicuna jarcashcamantami gentecunaca mana huiñai causaita chari tucurcacuna. ¡Mandashcata quillcajcunapish fariseocunapish yallitaj millaimi carcacuna! Jatun tucushca cashcamantami shujtajcunapaj causai mana importashcata ricuchircacuna. w17.11 págs. 17, 18 párrs. 9, 10

Testigo de Jehovacunahuan Bibliata yachai callarishpaca manachari ñucanchij familiacunaman huillarcanchij. Pero chai yachaicuna ñucanchij shunguman chayajpica ‘Diostami sirvisha nini’ nishpachari familiacunaman huillarcanchij. ¿Diosta cazusha nishcamanta familia ucupi problemacunata charishcanguichu? Shinaca, ¿familiahuan tandalla cangapaj, Diosmantapish ama caruyangapajca imatataj rurana cangui? Ñucanchij familiacuna imata yuyashcata alli intindishunchij. Bibliamanta yachai callarishpaca cushillami sintirircanchij ¿nachu? Shinapish ñucanchij familiacunaca pandata yachacushcata yuyashpa, mana alli religionta caticushcata yuyashpachari preocuparingacuna. Shinallataj huaquin fiestacunata ña mana rurajpichari paicunata mana cꞌuyashcata yuyangacuna. Chai jahuapish, “huañujpica Diosca castigangami” nishpachari preocuparingacuna. Paicuna imata nijpipish alli uyashpami imamanta preocuparishcata alli intindina canchij (Proverbios 20:5). Ñucanchijpish apóstol Pablo layami cai tucunchij. Paica Diosmanta tucui gentecunaman huillangapajmi paicuna imata yuyashcata intindingapaj esforzarirca. Ñucanchij familiacuna imata yuyashcata, ima shina sintirishcata alli intindishpaca paicunamanpish Diosmanta huillai tucushunmi (1 Corintios 9:19-23). w17.10 pág. 12 párrs. 11, 12

Ima shina cantanata mana yachashcamantachari manchaita charinchij. Ashtahuan alli cantangapaj imata ruranata ricushun. ¿Tucui fuerzahuan alli cantangapajca imatataj rurana canchij? Yuyashun, shuj focota japichingapajca corrientetami minishtinchij. Shinallatajmi fuerzahuan cantangapajca samaita alli aisanata minishtinchij. Allimanta cantanapaj randica sinchitami cantana canchij. Bibliapica Diosman cantacushpaca caparishpa cantaichij ninmi (Isaías 24:14). Caita rurashun: Puntapica shuj munashca cantota agllashpa sinchita liyishun. Qꞌuipaca samaita aisashpa shuj yuyaita ama shayarishpa sinchita liyishun. Chai huashaca chai liyishca yuyaillatataj tucui fuerzahuan cantashun (Salmo 33:1-3). Chashnami mana pingashpa sinchita cantashun. w17.11 pág. 6 párrs. 11-13

Ñaupa yaya mamacunaca paicunapaj huahuacunamanca Jerusalenpish chaipi tiyaj templopish sumajmi carca nishpami parlashcacuna canga. Chaimantami israelitacunaca Jerusalenman ricushpaca ¿chai llajtaca cunanca ima shinashi canga? nishpa tapurishcacuna canga (Esdras 3:12). ¿Canpish paicunahuan Jerusalenman chayashpaca ima shinashi sintiringuiman carca? ¿Mapa qꞌuihua jundashca, pircacuna urmashcata ricushpaca llaquiringuimanchu carca? Pungucunapish torrecunapish urmashcami carca, patacunapipish jatun jutcucunami tiyarca. ¿Chaita ricushpaca mana Babilonia llajta layachu cashca ninguimanchu carca? Jehová Diosca israelitacunataca viajepica cuidarcami. Chaita yuyarishpami israelitacunaca mana desanimarircacuna. Chaimantami Jerusalenman chayashcahuan ñaupa tiyashca templo jahuapi shuj altarta rurarcacuna. Chaipimi tucui punllacuna Jehová Diosman sacrificiocunata rurai callarircacuna (Esdras 3:1, 2). w17.10 págs. 21, 22 párrs. 2, 3

Salomonca paipaj yaya mana manchaj cashcata ricushpami paipish chashnallataj Diosta sirvinata yacharca. Jehová Dios ayudajpimi Davidca mana manchashpa jatun runa Goliathuan macanacurca. Chai alli macanacuj soldadotaca shuj uchilla rumillahuanmi Davidca huañuchirca (1 Samuel 17:45, 49, 50). Davidca mana manchaj runa cashcamantami paipaj churi Salomontaca: ‘Diospaj huasita ruranataca ama manchaichu, Jehová Diosmi templota shayachingapajca canta ayudanga’ nircami. Salomonca paipaj yaya David nishcatami yuyarishca canga. Chaimantami huambraraj cashpapish, mana achca experienciata charishpapish mana manchashpa Diospaj huasita casi 8 huatacunapi tucuchirca. Jehová Diosca Salomonta ayudashca shinallatajmi ñucanchijtapish ama manchangapaj ayudanga. Chashnami familia ucupipish Diospaj pueblopipish mana manchashpa ayudashun (Isaías 41:10, 13). Jehová Diosta chashna sirvijpica cunanpish shamuj punllacunapipish ñucanchijta bendiciangami. w17.09 págs. 27, 28, 32 párrs. 3, 4, 20, 21

Ñucanchijca Diospaj Shimica causaj, tucuita rurai tucuj cashcatami tucui shunguhuan crinchij. Bibliapi tiyashca consejocunata cazushpami ñucanchij causaita cambiashcanchij. Shujtajcunapish paicunapaj causaita cambiashcacunami. Huaquincunaca manaraj testigo tucushpaca shuhuajcuna, drogarijcuna, huainayajcunami carca. Achcacunaca famoso, cullquiyujcunapishmi carca. Pero mana cushilla causajcunachu carca (Eclesiastés 2:3-11). Jehová Dios paipaj Shimita yachachijpimi cunanca alli causancuna, shamuj punllacunapi ima tucunatapish mana manchancunachu. Huillaj revistapica “Bibliata yachashpami cambiashcacuna” nishca temacunami llujshin. Chaipica huaquincuna Bibliapi consejocunata cazushpa paicunapaj causaita cambiashcatami parlan. Chaicunata liyinataca achcatachari munanchij. Ña testigo de Jehovacuna cashpapish Diospajman ashtahuan cꞌuchuyangapajmi Bibliata yachashpa catina canchij. w17.09 pág. 21 párr. 1

Cai versopi ricushca shinaca Jehová Diosca ñucanchijcuna ima llaquicunata charishcataca allimi yachan (Isaías 63:7-9; Santiago 5:11; 2 Pedro 2:9). Jehová Diosca ñaupa punllacunamantami paita sirvijcunataca cꞌuyajcuna, llaquijcuna cachun yachachishca. Israelcunaman cushca leyta yuyarishun. Maijanpish cullquita mañachishpaca pagangacamami mañajpaj churanahuan saquiri tucurca (Éxodo 22:26, 27). Chaimantami cullqui mañachijtaca Diosca: ‘Cullquita mañajmanca inti manaraj huashicujpimi paipaj churanata tigrachina cangui’ nishpa mandarca. Chai leyta mana pajtachijpica dibiyajca tutapi imata churarinataca mana charinmanchu carca. ¿Cai leymantaca imatataj yachanchij? Shuj huauqui o pani ayudachun minishticujpica ayudanami canchij (Colosenses 3:12; Santiago 2:15, 16; 1 Juan 3:17). w17.09 pág. 10 párrs. 4, 5

Jesusca dimastij llaquichijpipish manso shungumi carca. Ñucanchijpish pai layami manso shungu cana canchij (1 Pedro 2:21-23). ¿Ima shinataj mana utca pꞌiñarij, manso shungu cashcata ricuchi tucunchij? Pabloca: ‘Caishujhuan chaishujhuan alli caichij. Cristopi cancunata Dios perdonashca shinallataj, caishuj chaishuj llaquijcuna, perdonajcuna caichij’ nircami (Efesios 4:32). Perdonajcuna cashpaca congregacionpi huauqui panicuna tandalla Diosta sirvichunmi ayudashun. Jehová Diosca shujtajcunahuan mana utca pꞌiñarij, manso shungu cachunmi mandan. Paraíso Allpapi causasha nishpaca chaitami pajtachina canchij (Mateo 5:5; Santiago 1:21). Mana utca pꞌiñarij, manso shungu cangapaj esforzarishpaca Jehová Diostami jatunyachishun. Shujtajcunapish chashnallataj cachunmi ayudashun (Gálatas 6:1; 2 Timoteo 2:24, 25). w17.08 pág. 25 párrs. 15-17

Bibliapica mana yuyashca shina Jehová Dios achcacunata ayudashcatami parlan. Por ejemplo, Ezequías mandacui punllacunapica, Asiria llajtata mandaj Senaqueribca Judapi tiyaj tucui llajtacunatami llaquichirca. Pero Jerusalentaca mana llaquichircachu (2 Reyes 18:1-3, 13). Asiriocuna Jerusalenta llaquichinaman shamucujta uyashpaca ¿Ezequiasca imatataj rurarca? Puntapica Jehová Diostami ayudachun mañarca. Qꞌuipaca profeta Isaiastami consejota cuchun mañarca (2 Reyes 19:5, 15-20). Shinallataj Asiriata mandaj pagachun nishcatami pagarca (2 Reyes 18:14, 15). Chai huashaca Asirio soldadocuna ama llaquichichunmi pircacunatapish allichirca, yacucunatapish tapanata yuyarirca (2 Crónicas 32:2-4). ¿Diosca ima shinataj Jerusalenta quishpichirca? Jehová Diosca shuj angelta cachashpami 185 mil asirio soldadocunata shuj tutallapi huañuchirca. Mandaj Ezequiasca Jehová Dios chashna quishpichinataca mana yuyashcallapishchu carca (2 Reyes 19:35). w17.08 págs. 11, 12 párrs. 7, 12

¿Diosta ashtahuan sirvingapajca imatataj rurai tucungui? Cꞌuyaj canata, mana utca pꞌiñarij canata, pacienciata charinatami yachana cangui. Chaicunata yachashpaca Diostaca allimi sirvingui. Chaipajca punllantami Bibliata liyina cangui. Tucui liyishcapipish cutin cutinmi yuyana cangui. Tandanacuicunapipish tapuicunata cutichishpami Diospi tucui shunguhuan crishcata ricuchi tucungui. Colegiota manaraj tucuchishca cashpaca alli huillaj cangapajmi preparari tucungui. Huauqui panicunata respetashpa, paicunata uyashpami shujtajcunata ayudanata yachai tucungui. Shinallataj Tandanacuna Huasita pꞌichashpa, allichishpapishmi ayudai tucungui. Jehová Diosca humilde, tucui shunguhuan ayudasha nijcunallatami paipajta rurachun mañan (Salmo 110:3; Hechos 6:1-3). Huauqui panicunaca, ‘Timoteoca alli causajmi’ nijcunami carca. Chaimi apóstol Pabloca paihuan Diosmanta huillagrichun Timoteota invitarca (Hechos 16:1-5). w17.07 págs. 23, 26 párrs. 7, 14

Angelcunapish, gentecunapish Diablo llulla cashcata alli intindingacamaca sumaj causaica mana tiyangachu. Pero Jehová Dioslla Mandaj cashcata ricuchishca qꞌuipaca, tucuicunami tranquilo, maravillata causashun (Efesios 1:9, 10). Jehová Diosca pailla alli Mandaj cashcatami ricuchinga. Diablopish gentecunapish mana alli mandashcamantami paicuna mandashpa catichun ña mana saquinga. Dios churashca Mandanami mishanga. Alli gentecunaca Diosta cazushpami pailla mandana cashcata ricuchingacuna (Isaías 45:24). ¿Diosta cazushpa pailla mandana cashcata ricuchisha ninguichu? Chaipajca Dioslla alli Mandaj cashcata ricuchina ashtahuan importante cashcatami intindina canchij. w17.06 pág. 16 párrs. 4, 5

Shuj familia huañujpica maijancunaca ashalla tiempopimi llaquilla canata saquincuna. Cutin shujtajcunaca achca tiempo pasajpipish llaquillami sintirishpa catincuna. Huañui punllacunaca familiacunapish amigocunapishmi ayudangapaj can. Pero qꞌuipa punllacunaca solollami saquirincuna. Chaimantami qꞌuipa quillacunapish paicunata ayudashpa catina canchij. Llaquilla cajcunata mashna tiempota ayudachun minishtijpica ayudanallami canchij (1 Tesalonicenses 3:7). Shuj familia o amigo huañushcata yuyarishpachari llaquilla sintiri tucunchij. Cazarashca punlla chayamucujpi, huañushca punlla chayamujpichari llaquilla sintiri tucunchij. Shinallataj shuj fotota ricushpa, shuj musicata uyashpa, imata mutquishpa o imata ruracushpachari huañushcata yuyarinchij. Viudashcacunapajca paicunalla imata ruranaca sinchichari ricuringa. Por ejemplo, jatun tandanacuicunaman o Jesús huañushcata yuyarina tandanacuiman sololla rinaca sinchichari ricuringa. Chaimantami familiacuna huañujpica siempremi animota minishtincuna. w17.07 pág. 14 párrs. 17-19

Shujtajcunaman cꞌuyashcata ricuchishpaca allimi sintirishun. Achca panicunaca cazarashca o mana cazarashca cashpapish Diosmanta yachachishpami paita jatunyachincuna. Chashnami cushilla sintirincuna. Gentecunaman Diosmanta yachachishpaca paicunamanta preocuparishcatami ricuchinchij. Ñucanchij huauqui panicunamanta preocuparishpacarin congregacionpica tandallami causashun. Ima shinami ‘shuj mamaca’ paipaj huahuata cuidan, chashnallatajmi apóstol Pabloca Tesalonicapi causaj huauquicunata panicunata cuidarca. Shinallataj Pabloca ‘shuj yaya’ layami paicunata cushichishpa ayudarca (1 Tesalonicenses 2:7, 11, 12). Diosta cazuj jovencunaca yaya mamata respetashpa, imapipish ayudashpami cushichincuna. Huahuacuna Diosmanta mana caruyajpicarin tucui familiami cushicuncuna. w17.06 págs. 6, 8 párrs. 13, 14, 17

Asha gentecunallami achca cullquita charincuna, paicunapaj huahua huahuacunapajpish saquingapajmi charincuna. Cutin, achca gentecunaca micunallapajpish casi mana charincunachu. Cai pachapica organizacioncunapish, empresacunapish cullquita charinallapimi yuyancuna. Paicunaca mana minishtishca cosascunata randichunmi animancuna. Apocalipsis 18:3-pica, chaicunataca “allpa pachapi randishpa cꞌatushpa causajcuna” ninmi. Jesusca ima horapish chaicuna tucurinatami yacharca. Politicocunapish, panda religioncunapish Diablopaj maquipimi can. Diosta sirvijcunaca politicapi, panda religioncunapipish mana chagrurincunachu. Pero cai pachapi charijyana munaita saquinaca sinchimi ricurin. Diosta sirvijcunaca charijyanallapi yuyacushcata o mana yuyacushcatami ricuna canchij. Chaimantami: “¿Diosta sirvingapaj ñuca charishcacunataca ima shinataj utilizai tucuni? ¿Charijyana munaicunata ama charingapajca imatataj rurai tucuni? ¿Diospi tucui shunguta churangapajca picunamantataj yachai tucuni?” nishpami tapurina canchij. w17.07 págs. 3, 4 párrs. 1-3

Jesusca cunan punllacunapi problemacunamanta gentecuna shaicushca sintirinata allimi yacharca. Paica shuj tarpujmanta parlashpami cashna nirca: Achca gentecuna Diospaj yachachishcacunata cushicushpa chasquishpapish qꞌuipa punllacunapica ‘cai causaillapi imatapish charinata yuyashcallamantami Diosta cungaringacuna’ nircami (Mateo 13:19-22; Marcos 4:19). Yallitaj preocuparishpaca Diosta sirvinatachari saquishun. Ñucanchijca Jesusta cꞌuyangapajca Diosmantami huillana canchij. Chaita ruranami ñucanchij causaipica ashtahuan importante cana can. Pero, ¿Jesusta tucui shunguhuan cꞌuyashcataca ima shinataj yachanchij? Chaipajca: “¿Ñuca causaipica imataj ashtahuan importante can? ¿Imata rurashpataj ashtahuan cushilla sintirini? ¿Diosta sirvishpa o shujtaj cosascunata rurashpachu cushilla sintirini?” nishpa yuyarishunchij. w17.05 pág. 22 párrs. 3, 4

¿Cancunapaj shimita parlaj congregación carupi saquirijpica? Shujtaj shimipi cajpipish cꞌuchullapi tiyaj congregacionmanmi rina canguichij (Salmo 146:9). Pero causacushca cꞌuchullapi cancunapaj shimipi shuj congregación tiyajpica yayami maijan congregacionman rinata decidina can. Shinapish manaraj imata decidishpami alli yuyanaraj can, Diostapish ayudahuai nishpami mañana can. Shinallataj paipaj huarmihuan, huahuacunahuanpish parlanacunami can (1 Corintios 11:3). Yaya mamacunaca paicunapaj huahuacuna imata minishtishcatami ricuna can. Huahuacuna tandanacuicunaman rishpallaca Diosmanta mana tucuita alli yachangacunachu. Pero paicuna ashtahuan intindishca shimipi tandanacuicunaman pushajpica mana atencionta churacuj laya ricurijpipish chaipi imalla yachachicushcataca allimi intindingacuna. Cutin paicuna mana intindishca shimipi tandanacuicunaman pushajpica manachari tucuita intindingacuna (1 Corintios 14:11). w17.05 págs. 11, 12 párrs. 10, 11

¿Tucui ñuca charishcacunahuan Diosta sirvicunichu?” nishpami yuyana canchij. Ashtahuan alli causasha nishpa cullquita ganangapaj ¿caru llajtacunaman rinata yuyacunguichu? Chaita rurasha nicushpaca: “Ñuca familiapajpish, huauqui panicunapajpish, caita rurana alli canata o mana alli canata intindichihuai” nishpa Diosta mañanami cangui. Jehová Diosca paita ayudachunmi invitan. Adán y Eva causashca punllamantami Diabloca gentecunata Diosmanta caruyachisha nishca. Pero Jehová Diosta apoyashpaca paipaj lado tucushcatami ricuchishun. Diospi tucui shunguhuan crishcamantami paita apoyasha ninchij. Chashnami Jehovata cushichinchij (Proverbios 23:15, 16). Ñucanchijcuna tucuipi cazujpica Diablo nishcacuna llulla cashcatami Diosca ricuchi tucunga (Proverbios 27:11). Tucuipi cazujpica paica allimi ricun. w17.04 págs. 31, 32 párrs. 15, 16

Moisesman cushca leypica: ‘Maijanpish paipaj shimihuan imata rurasha nishcataca chaitataj rurachun’ ninmi (Números 30:2). Qꞌuipaca rey Salomonpish cai punllapaj versotami escribirca. Jesuspish: “Manapish pajtachingapajca, pajtachishami ama ningui. Ashtahuanpish can pajtachishami nishcataca Jatun Diospaj ñaupajpi pajtachingui” nircami. Chai shimicunahuanca Jesusca Diospaj ñaupajpi imata ruranata ari ninaca mana pugllai cashcatami yachachirca (Mateo 5:33). Imata ruranata Diosman ari ninaca mana pugllai cashcatami ricushcanchij. Ari nishcata pajtachishpaca Diospajman ashtahuanmi cꞌuchuyashun. Pero mana pajtachishpaca paimantami caruyashun. Rey David nishca shinaca, ari nishcata pajtachijcunallami ‘Jehová Diospaj urcumanca huichiyai tucungacuna’ (Salmo 24:3, 4). w17.04 pág. 4 párrs. 3, 4

Huauquicuna panicuna ñucanchijta llaquichishcata yuyashpaca mana shujtajcunaman huillashpa purinachu canchij. Pero shuj huauqui o shuj pani juchata rurashca cajpica ancianocunahuan parlashpami ayudata mashcana canchij (Levítico 5:1). Pero maipica mana juchata rurashpachu ñucanchijta llaquichishcanga. Chashna llaquichishca cajpica shujtajcunaman parlana mana minishtiringachu. Ancianocunamanpish manachari huillana minishtiringa. Ashtahuanpish paillahuan parlashpami alli tucuna canchij (Mateo 5:23, 24; 18:15). Chashna llaquicuna tiyajpica Dios nishcata cazushpa, paimanta ama caruyashunchij. Huaquinpica ñucanchijta llaquichishcata yuyashpapish qꞌuipaca pandata yuyacushcatachari cuentata cushun. Ña cuentata cushpaca shujtajcunamanta ima mana allita mana rimashcamanta tranquilomi cashun. Ñucanchijta llaquichishca o mana llaquichishca cajpipish shujtajcunamanta mana allita rimashpaca mana imata japishunchu. Diostapish, shujtajcunatapish cꞌuyashpaca mana pitapish llaquichishunchu. w17.04 pág. 19 párr. 14