Octubre

Yachaica Jehová Diosmantami shamun. Paica mana mitsashpami yachaita cun. Yachajcuna tucungapajca Dios disciplinajpica chasquinami canchij. Alli yachaita charishpaca mana allicunataca mana rurashunchu. Dioshuan ashtahuan amigomi tucushun (Proverbios 2:10-12). Shinallataj huiñaita causana esperanzatapishmi charishun (Judas 21). Juchayuj cashcamanta o ima shina huiñashcamantami disciplinataca mana chasquisha ninchijlla. Ashtahuanpish ima mana allita shinami ricunchij. Pero disciplinataca ñucanchij allipaj cashcatami ricuna canchij. Chashna rurashpaca disciplinataca ashtahuanmi valorashun. Diospish cꞌuyashpa disciplinaj cashcatapishmi intindishun. Proverbios 3:11, 12-pica: ‘Ñuca huahualla, Mandaj Dios imamanta llaquichijpi o disciplinajpica ama mana alli ningui. Diosca pai cꞌuyashca huahuatamari mana allitaca jarcashpa disciplinan’ ninmi. Caipi ricushca shinaca Jehová Dios ñucanchijpaj allita munashcataca mana cungarinachu canchij (Hebreos 12:5-11). Jehová Diosca ñucanchijta alli rijsishcamantami siempre alli disciplinan. w18.03 pág. 27 párrs. 1, 2

Pedroca ‘Pontopi, Galaciapi, Capadociapi, Asiapi, Bitiniapi causacuj huauqui panicunamanmi’ cai punllapaj versota quillcarca. Paicunaca chꞌican chꞌican ladocunamantami carcacuna. “Nina” shina llaquicunatami chꞌimbapuracurcacuna. Shinaca ¿chai llaqui punllacunapica huauqui panicunaca imatataj rurarcacuna? (1 Pedro 1:1; 4:4, 7, 12). Yuyarishun, Pedroca: “Caishuj chaishuj” nircami. ¿Chaita nishpaca imatataj nisha nicurca? Rijsishcacunata o paicunahuan apanacujcunata chasquinacuna cashcatami nicurca. ¿Chaita rurashpaca ima shinataj beneficiarircacuna? Caishuj chaishuj huasipi chasquinacushpaca tandallami cajcuna carca. Ñucanchijpish yuyashun, ¿shuj huauqui o pani paipaj huasiman invitajpi alli pasashcata yuyaringuichu? Cutin shuj huauqui o panita ñucanchij huasiman invitashpaca ¿manachu ashtahuan apanacushcanchij? Caishujhuan chaishujhuan chasquinacuj cashpaca ashtahuanmi huauqui panicunata rijsishun. Pedro causashca punllacunapica ashtahuan llaquicuna mirashpa caticushcamantami tandalla canata minishtircacuna. Ñucanchijpish ‘cai tucuri punllacunapica’ tandalla canatami minishtinchij (2 Timoteo 3:1). w18.03 págs. 15, 16 párrs. 1-3

Romanos 8:6-pica ‘aichapaj munaita yuyanaca huañuimanmi apan. Ashtahuanpish espiritupajta yuyanaca alli causai, sumaj causaimanmi apan’ ninmi. Cai versocunapi ricushca shinaca Diospaj espirituta charijcuna canami alli can. Diospajta rurangapaj esforzarishpaca Diospaj ñaupajpi allimi ricurishun, ñucanchij shungupipish allimi sintirishun. Shamuj punllacunapicarin huiñai causaitami charishun. Achca gentecunaca Dios yuyashca shina mana yuyanchu. Chai gentecunapurapi causashcamantami ñucanchij yuyaita ama pandachichun achcata cuidarina canchij. Paicunamanta parlashpami Judas 18, 19-pica: “Diospaj espiritutaca mana charincunachu” nin. Diospaj yuyaita charingapaj mana esforzarishpaca aicha munaillata rurajcuna shinami yuyai, rurai callarishun. w18.02 págs. 17, 18 párrs. 5, 7, 8

Achca doctorcuna, enfermeracunaca contagiajlla ungüita charijcunatami atindina can. Paicunaca chai gentecunata ayudasha nishcamantami jambincuna. Pero chai ungüicunahuan ama contagiaringapajmi cuidadota charina can. Diosta mana rijsij gentecunaca contagiajlla ungüicunata charij shinami can. Testigo de Jehovacunaca paicunapurapimi causana canchij, trabajana canchijpish. Chaimantami paicunapaj panda yuyaicunahuan, mana alli munaicunahuan ama contagiaringapaj cuidadota charina canchij. Cunan punllacunapica gentecunaca Diospaj mandashcacunata mana cazuncunachu. Apóstol Pabloca Timoteoman shuj cartata quillcacushpaca Diosta mana rijsij gentecuna ima shina canatami huillarca (2 Timoteo 3:1-5). Ñucanchij paicuna shina canata mana munashpapish, mana cuidadota charishpaca paicuna shinami tucuita rurai callarishun (Proverbios 13:20). Diosta mana rijsij gentecuna shina ama cangapajca cuidadotami charina canchij. Shinallataj Diosta rijsichun shujtajcunatapish ayudanami canchij. w18.01 pág. 27 párrs. 1, 2

Huata 33-pica Jesusca ña causarishcami 500 yalli cꞌaricuna, huarmicuna ñaupajpi ricurirca. Tal vez huahuacunapishmi chaipi cashca canga (1 Corintios 15:6). Chaipimi cai punllapaj versopi nishca shinaca Jesusca paita catijcuna tucuchun yachachichun mandarca. Shinallataj pipish paita catisha nishpaca bautizarina cashcatami nirca (Mateo 11:29, 30). Diospaj ñaupajpi alli ricurisha nijcunaca Jehová Dios paipaj munaita pajtachichun Jesusta agllashcatami alli intindinaraj can. Chai qꞌuipami bautizari tucun. Cashna bautizarishpallami Diospaj ñaupajpica alli ricuri tucun. Jesusta punta catijcunaca bautizarina importante cashcataca allimi intindircacuna. Chaimantami bautizarinataca mana qꞌuipacunapaj saquircacuna (Hechos 2:41; 9:18; 16:14, 15, 32, 33). w18.03 pág. 5 párr. 8

Cai mundopi gentecunaca mapa ruraicunata rurashpa, yanga dioscunata adorashpami causancuna. Babilonia jatun pueblo o tucui cai pachapi tiyaj panda religioncuna pandata yachachijpimi gentecunaca chashna causancuna. Babilonia jatun puebloca ‘supaicuna causanami’ tucushca (Apocalipsis 18:2). Pero ñucanchijcunaca mana cai mundo ruraicunapi chagrurinchijchu. Chaimantami gentecunaca ñucanchijmanta burlarincuna (Marcos 13:13). Chaimanta Diosman ashtahuan cꞌuchuyashunchij. Diospi tucui shunguhuan crijpi, paita tucuipi cazujpi, humildes cajpica Daniel shinami Diospajca valishca cashun (Ageo 2:7, NM). Daniel uchillaraj cajpica Judá llajtapica achca mana alli ruraicunami tiyarca. Chashna jahuapish Danielca paipaj yaya mama Diosmanta alli yachachishcamantami tucui shunguhuan Diosta cꞌuyarca (Proverbios 22:6). Danielpaj yaya mamaca Diostaca cꞌuyarcacunami. Chaimantami Danielta shutichircacuna. Daniel shutica “Diosca ñuca Juezmi” nisha ninmi. ¿Yaya mamacunaca Danielpaj yaya mamamantaca imatataj yachai tucun? Huahuacunamanca pacienciahuanmi Jehová Diosmanta yachachina canguichij. Chaita ruranataca amataj saquichijchu (Efesios 6:4). Huahuacunahuan Diosta mañaichij, paicunamanta mañanatapish amataj cungarichijchu. Diospaj shimita huahuacuna shungupi charichun esforzarijpica Jehová Diosca achcatami bendicianga (Salmo 37:5). w18.02 págs. 6, 7 párrs. 12, 14, 15

Apóstol Juanca shuj muscuipi shinami jahua pachapi angelcunata caita nicujta ricurca: “Jatun Dios, canca jatunmari cangui, allimari cangui, Tucuita rurai tucujmari cangui nishcataca chasquipaj allimari cangui. Canmari tucui ima tiyajtapish rurashcangui. Can munashpa rurashcamantami tucui imapish tiyan” (Apocalipsis 4:11). Caipi ricushca shinaca ñucanchij charishca cosascunahuanmi Jehová Diosta adorana, jatunyachina canchij. Moisesman cushca leypica Jehová Diosca israelitacunataca cada huata quimsa fiestacunata rurachunmi mandarca. Cai fiestacunapica israelitacunaca paicuna charishca cosascunata Jehová Diosman cushpami paita adorana carca. Chaimantami chai leypica: “Ni pi ama Mandaj Diospaj ñaupajpica chushaj maquilla ricurigringuichijchu” nirca (Deuteronomio 16:16). Cunan punllapipish mana imata shuyashpami tucui shunguhuan Jehová Diosman ñucanchij charishca cosascunata cunchij. Chashnami Diosta adoranchij, cai Allpapi paipaj munai pajtarichunpish ayudanchij. w18.01 pág. 16 párrs. 4, 5

Jesusca: ‘Ñuca yugota apaichij’ nircami. Shinallataj paica: “Ñuca yugoca pꞌanguillami, ñuca apachinapish mana llashajchu” nircami (Mateo 11:29, 30). Huaquinpica tandanacuicunaman rishpa, huillanaman llujshishpaca shaicushcami sintirinchij. Pero huasiman tigrashpaca problemacunata ahuantangapajmi ashtahuan fuerzata charinchij. Jesús nishca shimicunaca ciertomi can. Diosta sirvishpaca cushillami sintirinchij. Shuj panimanta parlashun. Paica uma nanai ungüitami charin, imata ruranata munashpapish ratomi fuerza illaj saquirin. Jahuallami imamantapish llaquirin. Huaquinpica tandanacuicunaman rinaca paipajca sinchimi ricurin. Pero shuj punllaca tandanacuiman ringapajmi sinchita esforzarirca. Tandanacuipica desanimarishcacunamantami shuj conferenciata uyarca. Paica: “Chai conferenciata cuj turica cꞌuyaihuanmi yachachirca. Chaita uyashpami huacarcani. Tandanacuicunamanca shamunatajmi cani” nircami. Cai panica tandanacuiman ringapaj esforzarishcamantami dimastij cushicurca. w18.01 pág. 5 párrs. 6, 7

¿Bautizarishca qꞌuipa cambaj churi o ushushi Diosta sirvinata dudai callarijpica imatataj rurai tucungui? Por ejemplo, shuj jovenca cai mundopi tiyashca ruraicunata munashpachari: “¿Bibliapi tiyashca consejocunata cazushpaca allichu causasha?” nishpa yuyanga (Salmo 73:1, 3, 12, 13). Chashna yuyajpica uchilla cajpipish o jatun cajpipish huahuacunahuanca mana pꞌiñarinachu cangui. Mana alli tratajpica ashtahuanchari desanimaringa. Ashtahuanpish paicunata cꞌuyashcamanta ayudasha nishcatami ricuchina cangui. Shuj joven bautizarishpaca tucuita saquishpa cꞌuyaimanta Diosllata sirvinatami ari nin (Marcos 12:30). Chai ari nishcataca Jehová Diosca achcatami valichin. Chaimantami huahuacunaca Diosman ari nishcataca pajtachinataj can (Eclesiastés 5:4, 5). w17.12 págs. 19, 20 párrs. 16, 17

Martapish Diosta shujtaj sirvijcunapish huañushcacuna causarina cashcatami crircacuna. Abrahamca ña yuyaj cashpami Isaactaca charirca. Pero Jehová Diosca: “Cunanca cambaj cꞌuyashca shujlla churi Isaacta pushashpa, Moriah llajtaman ri. Chai urcupi Isaactaca ñucaman cushpa tucui rupachingui” nircami (Génesis 22:2). Abraham ima shina sintirishcata yuyashun. Jehová Diosca paimanca: ‘Cambaj huahua huahuacunamantaca shuj huahuamantami tucui cai Allpapi causajcunaca alli nishca cangacuna’ nircami (Génesis 13:14-16; 18:18; Romanos 4:17, 18). Chai huahuaca Isaacmantami shamuna carca (Génesis 21:12). Pero ¿Abraham Isaacta huañuchijpica ima shinataj chai profeciaca pajtarinman carca? Apóstol Pabloca: ‘Crishcamantami Abrahamca paipaj shujlla churita Diosman cungapaj aparca’ nircami (Hebreos 11:17-19). Abrahamca Jehová Dios paipaj churita chai rato causachinataca mana shuyashcachu canga. Pero Jehová ima hora cashpapish causachinatami seguro cashcanga. w17.12 págs. 6, 7 párrs. 12-14

Jehová Diosca “tucuicuna arrepintirichunmi munan” (2 Pedro 3:9). ¿Jehová shinachu causaica valishca cashcata ricunchij? Apóstol Pablo shina gentecunapaj causai valishca cashcata ricushpaca cushicushpami huillanaman llujshishun. Jehová Dios shina cashcamantami ñucanchij causaitapish cuidana canchij. Chaimantami trabajacushpa, carrota manejacushpa o ima shujtaj cosascunata ruracushpapish cuidadohuan rurana canchij. Chashnallataj huasichicushpa, huasita allichicushpa, tandanacuiman ricushpapish yuyaihuanmi tucuita rurana canchij. Ñucanchij causaita cuidana, saludta cuidanami cullquitapish ima charishcacunatapish yalli valishca can. Jehová Diosca cashcata ruraj cashpami tucuita alli charin. Ñucanchijcunapish pai shinami casha ninchij. Puntapica ancianocunami paicunapaj causaita cuidana can. Shinallataj shujtajcuna ama llaqui tucuchunpishmi ricuna can (Proverbios 22:3). Chaimantami shuj anciano ñucanchij causaita cuidangapaj imata rurachun nijpica cazuna canchij (Gálatas 6:1). Jehová shina causaita valorashpaca mana shujtajcunapaj causaita llaquichishunchu (Deuteronomio 19:10). w17.11 pág. 18 párrs. 11, 12

Apóstol Pablo layallatajmi ungidocunaca “jahua pachapi” Dios cusha nishcata japinata shuyacuncuna (Filipenses 3:14). Ungidocunaca jahua pachapi Jesushuan mandanatami shuyacuncuna. Chashnami cai Allpapi gentecuna jucha illaj cachun ayudangacuna (Apocalipsis 20:6). Jehová Diosca paicunamanca shuj sumaj bendiciontami cunga. Cutin, cai Allpapi causagrijcunaca huiñai huiñaita causanata yachashpami cushilla sintirincuna (2 Pedro 3:13). Pablopaj tiempopi ungidocunaca Diospaj bendicioncunata chasquingapajca achcatami esforzarina carcacuna (Colosenses 1:4, 5). Chaimantami ungidocuna chai bendicioncunata chasquichun ayudasha nishpa Pabloca: “Jahua pachapi tiyajcunallata yuyaichij. Cai pachapi tiyajcunataca ama yuyaichijchu” nirca (Colosenses 3:2). Tucuicunami Jehová Dios cusha nishca bendicioncunapi yuyana canchij (1 Corintios 9:24). w17.11 pág. 27 párrs. 1, 2

Jehová Diosta cushicushpa cantashunchij mushuj libropica huaquin cantocunaca Jehová Diosta mañacushca shinami uyarin. Chashnami ñucanchij shungupi ima shina sintirishcata Diosman cantai tucunchij. Shujtaj cantocunaca ñucanchij huauqui panicunata animachun, cꞌuyaita ricuchichun, alli cosascunata rurachunmi yachachin (Hebreos 10:24). Chaimantami cantocunapaj tonotapish letracunatapish alli rijsina canchij. Cantocunata huasipi repasashpaca tucui shunguhuan cantanatami yachashun. Cantocunata cantashpami Jehová Diostaca alabanchij. Chashnami paita mashnata cꞌuyashcata, pagui nishcata ricuchinchij (Isaías 12:5). Cushicushpa cantajpica shujtajcunapish chashnallatajmi cantangacuna. Joven cashpa, yuyaj cashpa, mushuj cashpapish tucuicunami cantashpa Jehová Diosta adorai tucunchij. Chaimanta Jehová Diosta cushicushpa cantashunchij. w17.11 pág. 8 párrs. 18, 19

Huaquin llajtacunapica Diosmanta huillachunca mana saquinchu. Ñucanchij Diosmanta huillajpimi miticushpa shamujcunaca punta cutin Diosmanta uyacuncuna (Mateo 13:19, 23). Tandanacuiman pushajpica llaquicunata cungarishpami, cushilla sintirincuna. Paicunaca: “Diosca cancunapurapitajmari cashca” nincunami (Mateo 11:28-30; 1 Corintios 14:25). Caru llajtamanta shamujcunaman huillacushpaca alli ricushpa alli yuyashpami huillana canchij (Proverbios 22:3). Paicunahuan parlanacucushpaca pacienciahuanmi uyana canchij. Politicamantaca mana parlanachu canchij. Shinallataj sucursalmanta huauquicuna imata nishcatami catina canchij. Llajtapi tiyaj autoridadcuna nishcatapish cazunami canchij. Chashna rurashpaca ñucanchijllataj mana llaquipi urmashunchu. Shujtajcunatapish mana llaquipi churashunchu. Caru llajtamanta shamujcunaca shujtaj religionta, shujtaj costumbrecunatami charincuna. Chaimantami imata yuyashcata alli yachana canchij. Paicuna yuyashcataca respetanami canchij. Huaquincunaca huarmicuna ima shina churarinamantami chꞌican chꞌican yuyaicunata charincuna. Chaimantami paicunaman huillanaman rishpaca alli yuyashpa ropata churarina canchij. w17.05 pág. 8 párrs. 17, 18

Ñucanchij familiacunahuan alaja shimicunahuan parlanaca huaquinpica sinchimi can. Chaimantami mana pꞌiñarishpa parlangapaj Jehová Diosta paipaj espirituhuan ayudachun mañana canchij. Shinallataj paicunapaj crishcacuna panda cajpipish “pandaricunguimi” nishpalla mana purinachu canchij. Chaipaj randica apóstol Pablo nishcatami catina canchij. Paica: “Llaqui tucunman nijcunatapish paicunapish llaqui tucushca canman mana ninchijchu. Ñucanchijta catirashpa llaquichijpipish, apanchijllami. Ñucanchijta millaita rimajpipish, cꞌuyaihuanmi cutichinchij” nircami (1 Corintios 4:12, 13). Alli shimicunahuan parlashpaca ñucanchij familiacunahuan allimi apanacushun. Pero Dios mandashca shina causashpami paicunata ashtahuan ayudai tucushun (1 Pedro 3:1, 2, 16). Cusandij huarmindij cꞌuyanacushpa causajpi, huahuacunatapish alli huiñachijpi, allita rurashpa causajpica testigo de Jehovacunaca cushilla causaj cashcatami familiacunaca ricungacuna. Ñucanchij familiacuna mana nunca testigo tucujpipish Jehová Diosta cazushcamantami cushilla sintirishun. w17.10 págs. 12, 13 párrs. 13, 14

Achcacunaca Bibliata estudiashpami mana alli ruraicunata saquishcacuna. Ñaupa punllacunapi Jesusta catijcunaca ungidocuna cashpapish huaquin cambiocunatami rurarcacuna (1 Corintios 6:9-11). Apóstol Pabloca: ‘Millaita rurajcunaca, Dios mandanapica imata mana japingachu’ nircami. Chai qꞌuipaca Jesusta catijcunataca: “Cancunapish maijancunaca chashnallatajmi carcanguichij” nircami. Pero Diospaj Shimimanta yachashpa, espíritu santo ayudajpimi cambiai tucurcacuna. Huaquincunaca Jesusta catijcuna cashpapish jatun juchacunata rurashpami Diosmanta caruyarcacuna. Por ejemplo, Bibliaca shuj ungido huauquimantami parlan. Paica jatun juchata rurashcamantami congregacionmanta llujshichircacuna. Qꞌuipaca mana alli causaita saquishpami congregacionman tigrarca (1 Corintios 5:1-5; 2 Corintios 2:5-8). Achcacunaca Jehová Diospaj consejocunata cazushpami cambiashcacuna. Chaita ricushpami cushilla sintirinchij. Bibliata Jehová Dios cushcamantaca allimi utilizana canchij. w17.09 págs. 21, 22 párrs. 2, 3

Cꞌuyaica Diosmantami shamun (1 Juan 4:7). Dios mandashcacunata cazushpami cꞌuyashcata ricuchinchij. Griego rimaipi ñaupa quillcashcacunapica cai cꞌuyaimanta parlangapajca agápe nishpami quillcashcacuna. Agápe cꞌuyaita ricuchingapajca mana ‘llaquinimi’ nishpalla saquirinachu canchij. Ashtahuanpish mana imata shuyashpa ruraicunahuanmi cꞌuyashcata ricuchinchij. Shuj diccionariopica: “Agápe cꞌuyaitaca ruraicunallahuanmi ricuchina can” ninmi. Cashna cꞌuyaita ricuchishpaca cushillami causashun. Jehová Diosca gentecunata manaraj rurashpallatajmi cꞌuyaita ricuchirca. Por ejemplo, gentecuna cai Allpapi causachunmi puntapica tucui minishtishcataraj rurarca. Diosca mana paillapi yuyarcachu. Ashtahuanpish gentecuna cushilla causachun munashpami tucuita alajata rurarca. Cai Allpata rurashca qꞌuipaca Adán Evatami rurarca. Gentecunataca huiñai huiñaita cushilla causachunmi Diosca rurarca. w17.10 pág. 3 párrs. 1, 2

Santiagoca: ‘Cancunaca ñahuita ricushpalla alli nishpaca, juchatami ruranguichij’ nirca (Santiago 2:9). Shinaca estudiashca o mana estudiashca cajpipish, pobre o charij cajpipish, shujtaj ladomanta cajpipish tucuicunatami alli tratana canchij. Mana nij tucushpalla, ashtahuanpish shungumantami tucuicunata cꞌuyana canchij. Cꞌuyajca “llaquita apajmi, alli shunguyujmi, mana jatun tucunchu” (1 Corintios 13:4). Diosmanta yachachishpa catingapajca manso shungu, llaquij, humilde canami minishtirin (Mateo 28:19). Cꞌuyaita ricuchishpaca tandallami tucuicuna Jehová Diosta jatunyachishun. Shinallataj tucui huauqui panicunahuanmi alli apanacushun. Chashna cꞌuyaita ricuchijpica shujtaj gentecunapish Diosmanta yachasha ningacunami. Bibliapica: “Tucuimanta yallica cꞌuyaj canata churarichij. Cꞌuyaimi tucuicunata shujllata rurajca” ninmi (Colosenses 3:14). w17.08 pág. 26 párrs. 18, 19

Achca gentecunaca Jehová Diosta manaraj rijsincunachu. Chaimantami paicunata llaquishpa ayudana canchij. Diosca, ‘shujllapish chingarichunca mana munanchu. Ashtahuanpish tucuicuna arrepintirishpa paipajman cꞌuchuyachunmi munan’ (2 Pedro 3:9, NM). Chaimantami Jehová Diospaj llaquichina punlla manaraj chayamujpi gentecunaman yachachishpa catina canchij. Chashna rurajpica paicunapish quishpiri tucungacunami. Jesuspish cꞌuyaj, llaquijmi carca. ‘Gentecuna michij illaj shina caita chaita puricujta ricushpaca llaquirishpami achcata yachachi callarirca’ (Mateo 9:36; Marcos 6:34). Fariseocunaca pobrecunataca mana ayudasha nijcunachu carca. Pero Jesusca paicunata llaquishpami ayudaj carca (Mateo 12:9-14; 23:4; Juan 7:49). ¿Diosmanta yachasha nijcunataca Jesús shinachu ñucanchijpish tucui shunguhuan ayudacunchij? w17.09 págs. 11, 12 párrs. 6, 9

Prezumanta llujshishca qꞌuipaca Joseca Egiptopi jatun mandajmi tucurca. Chai qꞌuipaca Jehová Diosca Josepaj familia yaricaimanta ama huañuchunmi paita utilizashpa ayudarca. Joseca prezupi cashpaca Dios chashna ayudanataca mana yuyashcallapishchu carca (Génesis 40:15; 41:39-43; 50:20). Cai ejemplopi ricushca shinaca Jehová Diosca Josetaca pai yuyashcatapish yallimi ayudarca. Saratapish yuyarishun. Saraca “ñami yuyaj cani, maitataj huahuataca chari pudishari” nishpami yuyarca. Pero qꞌuipaca Jehová Diosca shuj huahuata charichunmi ayudarca. Chai huahuataca Isaac nishpami shutichirca. Saraca Jehová Dios chashna ayudanataca mana yuyashcallapishchu carca (Génesis 21:1-3, 6, 7). Cai Allpa paraíso tucujpimi llaquicunaca ña mana tiyanga. Chai punlla chayamungacamaca shuj milagrota rurashpa Jehová Dios tucui ñucanchij llaquicunata anchuchichunca mana shuyanchijchu. Shinallataj mancharina cosascunata rurashpa ayudachunca mana mañanchijchu. Pero yuyarishunchij, Jehová Diosca ñaupa punllacunapica paita sirvijcunataca mana yuyashcallapish shinami ayudarca. Diosca mana cambiashcachu (Isaías 43:10-12). Cunanpish paipaj munaita pajtachingapaj ayudanatami tucui shunguhuan crina canchij (2 Corintios 4:7-9). Paimanta mana caruyajpica ima llaquicunapipish ayudangami. w17.08 pág. 13 párrs. 13, 14

Diosta ashtahuan sirvishpaca can shinallataj sirvij huauqui panicunahuanmi alli apanacungui. Chashnami ashtahuan alli crij tucungui. Jovenpi Diosta ashtahuan sirvishpaca cazarashpapish alli cusa, alli huarmimi cangui. Achcacunaca soltero cashpami precursor tucushcacuna. Shinami cazarashca qꞌuipapish ishquindij chashnallataj Diosta sirvishpa catishcacuna (Romanos 16:3, 4). Jehovamanta parlashpaca Salmo 20:4-pica: “Cambaj shungupi munashca shina cushca cachun. Can rurasha nishcacunataca tucuita pajtachichichun” ninmi. Chaimanta joven, cambaj causaipi imata ruranata alli yuyai. Shinallataj cunan punllacunapi Jehová Dios imata ruracushcata yuyai. Paimanta imata ashtahuan ruranata ricui. Chai qꞌuipaca pai munashcata ima shina pajtachinata ricui. Salmo 37:4-pica: “Mandaj Diosllahuan cushicui. Cambaj shungupi yuyashcataca paimi cunga” ninmi. Jovenpi tucui shunguhuan Diosta sirvishpaca paita alabashpami cushilla causangui. w17.07 pág. 26 párrs. 15-18

Shujtajcuna allita rurajpi, cꞌuyaj o llaquij cajpica paicunataca jatunyachinchijmi. Pero tucuicunamanta yallica Jehová Diosllatami alabana canchij. Jehová Diosmi tucuita rurashca. Shinallataj ñucanchijta cꞌuyashcamantami paipaj Churita cacharca. Chaimantami paillata alabana canchij. Salmo 147-ta escribijca tucui shunguhuanmi Jehová Diosta alabasha nirca. Shujtajcunatapish Diosta alabachunmi animarca (Salmo 147:7, 12). Cai Salmota pi escribishcataca mana yachanchijchu. Jehová Dios israelcunata Babiloniamanta llujshichishca tiempopimi causashca canga (Salmo 147:2). Jehová Diosca israelcuna Jerusalenpi paita tigra adorachunmi ayudarca. Chaita ricushpami Salmo 147-ta escribij runaca Diosta alabashcanga. ¿Ñucanchijpish imamantataj Jah-ta alabana canchij? (Salmo 147:1, NM). w17.07 pág. 15 párrs. 1-3

Jesusta catijcunapajca minishtishcata mashcarinaca sinchimi cagrirca. Pero Bibliapi yachachishca shinaca trabajashpalla causachunca Jehová Diosca mana munanchu. Por ejemplo, Edén huertapica Diosca Adán Evamanpish tucui minishtishcata yallimi curca (Génesis 2:15, 16). Shinallataj Jehová Diosca primer siglopi ungidocunaman espíritu santota cujpica pi mana “caica ñucapajmi, chaica ñucapajmi nircacunachu. Tucui imalla charishcacunapish tucuipajmi carca” (Hechos 4:32). Isaiasca shamuj punllacunapi tucui minishtishcata charishpa tucuicuna cushilla causanatami nirca (Isaías 25:6-9; 65:21, 22). Chai punlla chayamungacamaca Diosta sirvijcunaca ‘alli yachaitami’ charina canchij. Causangapajca cai pachapi tiyaj cosascunatami minishtinchij. Chaimantami trabajanchij. Pero Diospaj ñaupajpi alli ricurinatami ashtahuan mashcana canchij (Lucas 16:8). w17.07 pág. 4 párrs. 4-6

Job librotaca achca tiempo huashamanmi quillcarcacuna. Chaipimi Diabloca: ‘Job achca llaquicunata charishpaca Diostaca ladomanmi saquinga’ nishcata ricui tucunchij. Jehová Diosllataj Jobta llaquichichunmi Diabloca mañarca. Pero Jehová Dios mana chaita rurarcachu. Diablo nishcacuna cierto cashcata o mana cierto cashcata ricuchichunmi saquirca. Jobca asha tiempollapimi paipaj tucui charishcacunata chingachirca. Shinallataj paipaj 10 huahuacunapish, sirvijcunapishmi huañurca. Diabloca chai llaquicunata Dios cachashcata yuyachunmi chashna llaquichirca (Job 1:13-19). Chai qꞌuipaca Diabloca shuj millai ungüita cachashpami Jobta llaquichirca (Job 2:7). Jobpaj huarmipish, paipaj quimsa mana alli amigocunapish sinchita rimashpami ashtahuan llaquichircacuna (Job 2:9; 3:11; 16:2). Achca llaquicunata apashpapish Jobca Diosmantaca mana caruyarcachu. Diabloca pandarishcami carca (Job 27:5). w17.06 pág. 17 párrs. 9, 10

Familiata pushajcunaca Dios mandashca shinami familiata mantinina can. Dios mandashcata pajtachingapajmi familiata pushajcunaca sinchita trabajan. Shinapish cai tucuri punllacunapica trabajomantami huaquinpica yallitaj preocuparinchij. Cunan punllacunapica achca gentecunami trabajota mashcancuna. Pero trabajoca mana tiyanllachu. Chaimantami ima trabajo ricurijpica quichunacui trabajota japisha nincuna. Achcacunatacarin dimastij trabajachishpapish mana alli pagancunachu. Empresacunapipish ashalla gentecunata trabajachishpami ashtahuan ganasha nincuna. Chaimantami huaquin trabajadorcunaca shaicushca sintirin, shujtajcunaca ungushcacunami. Cutin shujtajcunaca jefe mandashcata mana cazujpi trabajomanta llujshichishpa cachanatami manchancuna. Diosta sirvijcunaca jefecunata o shujtaj gentecunata yallica Jehová Diosllatami tucuipi cazunchij (Lucas 10:27). Minishtirishcacunallata charingapajmi trabajanchij. Chashnami Jehová Diosta sirvi tucunchij. Shinapish trabajanallapi yuyashpaca Diosmanta caruyashunmi. w17.05 págs. 22, 23 párrs. 5-7

Huaquin yaya mamacunaca cunanllami testigo de Jehovacuna tucushca. Chaimantami huahuacunata Bibliamanta yachachingapaj shujtaj testigocunata ayudachun mañancuna. Huaquin yaya mamacunaca paicunapaj huahuacunaman Bibliamanta estudiota cuchunmi mañancuna. Cutin huaquinpica yaya mamacuna mana testigo cajpipish paicunapaj huahuacunamanmi Bibliamanta yachachinchij. Chashna yachachishpapish chai huahuacunapaj yaya o mama shina cashcataca mana yuyanachu canchij (Efesios 6:1-4). Shinallataj huahuapaj huasipi yaya o mama, o experienciata charij shuj testigo chaipi cajpimi yachachinaman rina canchij. O gentecuna tiyaj pushtucunapimi yachachina canchij. Chashnami ni pi mana pandata yuyangacuna. Qꞌuipaca yaya mamacunallatajchari Jehová mandashca shina paicunallataj huahuacunaman yachachinga. w17.06 pág. 8 párrs. 15, 16

Huahuacuna yaya mamapaj cultura ima shina cashcata mana intindishpaca, paicunapaj shimitapish, religiontapish manachari yachasha ningacuna. Yaya mamacunaca paicunallapaj ima alli cashcata mashcanapaj randica huahuacunapaj ima alli cashcatami mashcana can (1 Corintios 10:24). Samuel shuti huauquica cashnami nin: “Ñucanchij rimashca shimipi Diospaj yachachishcacuna huahuacunapaj shunguman mana chayashcatami ricurcanchij. Chaimantami Diosta ayudahuai nishpa mañarcanchij. Ñucanchij shimita parlaj congregacionman rijpica huahuacunaca mana intindircachu. Chaimantami paicuna ashtahuan intindishca shimita parlaj congregacionman rircanchij. Tandallami tandanacuicunaman, huillanamanpish purij carcanchij. Hermanocunatapish micunamanmi invitaj carcanchij, paicunahuanmi pugllanamanpish rij carcanchij. Chaimantami ñucanchij huahuacunaca huauquicunata panicunata ashtahuan alli rijsishcacuna. Jehová Diospish cꞌuyaj Yaya cashcata, alli Amigo cashcatapishmi ricurcacuna. Chaita ricushpami ñucanchij shimita yachana huahuacunapaj mana tanto minishtirishcata ricurcanchij” ninmi. w17.05 pág. 12 párrs. 11-13

Ñallami Diosta sirvijcunalla cai Allpapica causanga. Chai punlla chayamuchunmi shuyacunchij. Ñucanchijpish Débora, Barac shinami sintirishun. Paicunaca: “Mandaj Dioslla, canta pꞌiñajcunaca tucuicuna chingarishca cachun. Canta cꞌuyajcunaca achijlla inti llujshicuj shina ashtahuan achijyachicuj cachun” nishpami cantarcacuna (Jueces 5:31). Cai mundopi tiyashca mana alli ruraicunata Jehová tucuchijpica Débora, Barac shinami sintirishun. Armagedón callarijpica Diosca paipaj enemigocunata tucuchingapajca gentecunapaj ayudataca mana mañangachu. Ashtahuanpish casijlla shayashpami Jehová Dios ima shina ‘quishpichijta ricushun’ (2 Crónicas 20:17). Chai punlla chayamungacamaca mana manchashpa cushicuihuan Jehová Diosta apoyashpa catishunchij. Macanacui tucurishca qꞌuipaca Deborapish Baracpish Jehová Diosllatami cantashpa alabarcacuna. Paicunaca: “Tucui israelcunapish paicunapaj munaimanta macanacuiman llujshishcamanta, Mandaj Diostaca tucuicuna alabaichij” nishpami cantarcacuna (Jueces 5:1, 2). Ñucanchijpish Dios munashca shinami sirvi tucunchij. Chashna rurajpica shujtajcunapish chashnallatajchari Diosta sirvisha ningacuna. w17.04 pág. 32 párrs. 17, 18

Joseca 13 huatacunatami llaquicunata apashpa causarca. Llaquicunata mana cungari tucushpapish mana llaquilla causarcachu (Génesis 45:5-8). Ashtahuanpish shujtajcunapaj pandarishcacuna Diosmanta caruyachichun mana saquircachu. Joseca Diosmanta mana caruyashcamantami Diosllataj paipaj llaquicunata ima shina allichijta ricurca. Shinallataj paitapish paipaj familiatapish ima shina bendiciajtami ricurca. Ñucanchijpish José layallataj Diosmanta amataj caruyashunchijchu. ¿Manachu Jehová Diosta cꞌuyashcamanta paita alabasha ninchij? Ari. Chaimantami shujtajcunapaj pandarishcacuna Diosmanta caruyachichun manataj saquina canchij (Romanos 8:38, 39). Huauquicuna panicuna llaquichijpica José rurashca shinallataj Diospajman ashtahuan cꞌuchuyashunchij. Llaquicunatapish Dios ricushca shina ricushunchij. Shuj problema tiyajpica Bibliapi mandashca shina allichingapaj tucuita rurashunchij. Chaita rurashca jahua mana allichirijpica Diospaj maquipi mingashunchij. Chashna rurajpica Diosllatajmi pai munashca shina, pai agllashca horaspi chai problemataca allichinga. w17.04 págs. 18-20 párrs. 12, 15, 16

Anaca Diosman cusha nishcataca mana cungarircachu. Chaimantami paipaj churi Samuelta Siló llajtapi tiyaj Diospaj huasiman pusharca. Chaiman chayashpaca Elí curapaj ñaupajpica: ‘Cai huahuata cuchunmi mañacurcani. Mandaj Diosca ñuca mañashcata curcami. Chaimanta ñucapish cai huahuataca pai Mandaj Diosmanmi cuni. Paica tucui paipaj causaipimi Mandaj Diospaj canga’ nircami (1 Samuel 1:24-28). Chai punllamantami Samuelca Diospaj huasipi causarca. Bibliapica: “Samuelca Mandaj Diospaj ñaupajpimi huiñarca” ninmi (1 Samuel 2:21). Anaca paipaj huahua ima shina huiñajta mana ricunata yachashpa, paihuan mana causana cashcata yachashpa llaquirishcangami. Chaimanta paipaj nishcata pajtachina sinchimi cashcanga. Sinchi ricurijpipish pai ima nishcata pajtachircami (1 Samuel 2:1, 2; Salmo 61:1, 5, 8). w17.04 pág. 5 párrs. 7, 8

Apóstol Pabloca: “Cai punllacuna tucurinapajca llaqui punllacunami shamunga”, gentecunapish ashtahuanmi millaicuna tucunga nircami (2 Timoteo 3:2-5, 13). Cai shimicunaca cunan punllacunapimi pajtaricun. Chaimantami shuhuacuna, llaquichijcuna tiyan. Yana, yuraj cajpipish pꞌiñancunami. Huaquincunacarin mana alli cosascunata rurashpapish mana pingarincunachu. Cutin shujtajcunaca nij tucushpallami ayudaj tucuncuna. Ñucanchijta mana llaquichishca cajpipish, chaita ricushpaca llaquillami sintirinchij ¿nachu? Chashnallataj huahuacunapish yuyajcunapish shujtaj gentecunapish mana difindiri tucushcamantami paicunata yallitaj llaquichincuna. Cutin shujtajcunaca animalcuna shina, demoniocuna shinami comportarincuna (Santiago 3:15). Pero Diospaj Shimipica alli huillaicunami tiyan. w17.04 pág. 11 párr. 4