Marzo

Génesis capítulo 1 y 2-pi nishca shinaca Adán Evaca mana huatashca shina causarcachu. Paicunaca tucuitami charirca. Micunamanta, trabajomanta, ungüimantapish mana preocuparinachu carca. Ima llaqui, ima pobreza mana tiyarcachu. Pi llaquichijpish mana tiyarcachu. Cunan punllacuna gentecunapajca chashna causanaca shuj muscuillami can (Génesis 1:27-29; 2:8, 9, 15). Caitami yuyarina canchij, Jehová Diosllami tucui munashcata rurai pudin. ¿Imamanta? Tucuita rurai tucuj, Tucui poderta charij, Tucuita Mandaj Dios cashcamantami imata rurasha nishpapish rurai tucunlla (1 Timoteo 1:17; Apocalipsis 4:11). Cutin jahua pachapipish cai pachapipish causajcunaca mana ñucanchij tucui munashcata rurai pudinchijchu. Jehová Dioslla mana llaquichij, minishtirishca, pajtachinalla leycunata churana derechota charishcataca allimi intindina canchij. Paica callari pachamantami leycunata churarca. w18.04 pág. 4 párrs. 4, 6

Cai llaqui tiempopica Jehová Diosllami ahuantachun ayudan (2 Corintios 4:7, 8). Pero Diosta mana sirvij gentecunaca Diospaj ayudata mana charincunachu. Chaimantami paicunapaj causaica ashtahuan sinchi can. Chaita yachashcamantami Jesús shina llaquishpa ‘sumaj causai tiyanamanta’ paicunaman huillana canchij. Bibliamanta yachacujcunahuan pacienciata charishunchij. Ñucanchijca Diospaj Shimipi tiyaj yachaicunataca allimi rijsinchij. Pero chai yachaicunata gentecunaman yachachijpica paicunapajca mushujmi ricurin. Ashtahuancarin achcacunaca ‘ñucanchij crishcacunata mana saquishpami familiahuanpish, comunidadpipish, tandalla canchij. Costumbrecunatapish mana chingachinchij’ nincuna. Paicuna chashna yuyaj cashcata ama cungarishunchij. Bibliamanta yachacujcunataca paicunapaj crishcacunata saquichunca mana obliganachu canchij. Ashtahuanpish mushuj yachaicunata shungupi huaquichichunmi ayudana canchij. Chaimi paicunapaj ñaupa crishcacunataca saquingacuna. Pero chaita saquingapajca achca tiempomi minishtiringa (Romanos 12:2). w19.03 págs. 23, 24 párrs. 10, 12, 13

Jehová Diosca Jesusta cꞌuyashcamantami animachirca. Ñucanchijpish pai shinallatajmi rurana canchij (Juan 5:20). Por ejemplo, shujtajcuna ñucanchijman cꞌuyaita ricuchijpi, felicitajpica cushillami sintirinchij ¿nachu? Chaimantami ñucanchijpish huauqui panicunata, familiacunata cꞌuyana, animachina canchij. Chaita rurajpimi paicunaca Jehová Diosta sirvishpa catingacuna. Yaya mamacunapish paicunapaj huahuacunataca shungumantami cꞌuyaita ricuchina can. Chaimi paicunaca imatapish cushilla rurangacuna. Jehová Dios, “Canpimi cushicuni” nishpaca paipaj munaita Jesucristo pajtachinatami tucui shunguhuan crishcata ricuchirca. Ñucanchijpish Dios imata rurasha nishcata Jesucristo pajtachinatami tucui shunguhuan crina canchij (2 Corintios 1:20). Chaipajca Jesuspaj causaita siempre yuyarishunchij. Chashnami paimanta ashtahuan yachanata munashun, pai laya canatapish munashun (1 Pedro 2:21). w19.03 págs. 8, 9 párrs. 3, 5, 6

Pi ñucanchijman shuj valishca regalota cujpica achcatami agradicinchij ¿nachu? Pero israelitacunaca Jehová Dios Egiptomanta llujshichijpipish mana agradicircacunachu. Asha quillacuna qꞌuipaca cacharichishca cashcamanta Diosta tucui shunguhuan sirvinapaj randica israelitacunaca Egiptopi tiyaj micunacunata, ubyanacunatami munai callarircacuna. Paicunaca pescadocunata, pepinocunata, meloncunata, cebollacunata, ajo micunacunata yuyarishpami Jehová Dios cushca micunamanta quejarishpa cutin Egiptoman tigrasha nircacuna. Chaimantami Diosca paicunahuan pꞌiñarirca (Números 11:5, 6, 10; 14:3, 4). ¿Caimantaca imatataj yachanchij? Jehová Diosca paipaj churita cachashpami ñucanchijta cacharichirca. Chaita mana cungarishpa Diosta agradicichunmi apóstol Pabloca huauqui panicunataca animarca (2 Corintios 6:1). w18.04 págs. 10, 11 párrs. 6, 7

Tucuicunami ñucanchijta cꞌuyachun, alli tratachun munanchij. Pero ñucanchijta llaquichijpi, mana cꞌuyaita ricuchijpica ¿ima shinataj sintirinchijman? Imapaj mana valishca layami sintirinchijman. Jehová Diosca ñucanchijta cꞌuyachun, llaquichun munashcataca allimi yachan (Salmo 33:5). Chaimantami paica ñucanchijtaca achcata cꞌuyan. Shujtajcunapish ñucanchijmanta cashcata rurachunmi munan. ¿Imamantataj chaitaca tucui shunguhuan crinchij? Jehová Diosca israelitacunaman leycunata cushpaca chashna Dios cashcatami ricuchirca. Moisesman cushca leyta estudiashpaca Dios ñucanchijta achcata cꞌuyashcatami yachanchij (Romanos 13:8-10). ¿Dios cushca leypica imamantataj pai cꞌuyaj cashcata ricuchin? Jehová Diosca tucuitami cꞌuyaimanta ruran (1 Juan 4:8). Moisespaj punllacunapica ishqui mandamientocunami ashtahuan valishca carca. Shujca Diosta cꞌuyana, caishujca shujtajcunata cꞌuyana. Cai ishqui mandamientota ricushpami 600 yalli mandamientocunata llujchircacuna (Levítico 19:18; Deuteronomio 6:5; Mateo 22:36-40). Cai tucui mandamientocunami Dios cꞌuyashcata ricuchin. w19.02 págs. 20, 21 párrs. 1-4

Job runaca shujtaj huarmicunataca respetohuanmi trataj carca (Job 31:1). Cazado cashcamantaca shujtaj huarmicunataca mana mapa munaicunahuanchu ricuj carca. Cunan punllacunapish huainayana tentacioncunaca maipipish ricurinllami. ¿Chaipica Job shinachu shujtaj huarmita o shujtaj cꞌarita mapa munaicunahuan ricunamanta jarcarishun? ¿Lluchulla cꞌari o huarmi fotocunapi o videocunapi ricurijpica imatataj rurashun? (Mateo 5:28). Tucui punllacuna jarcarinata yachashpaca Diostaca siempremi cazushun. Shinallataj Jobca charishca cosascunapi shunguta churashpaca mana allita rurashcatami yacharca. Chaita rurashpaca castigota chasquina cashcatapishmi yacharca. Shina yuyashpami Diosta cazushcata ricuchirca (Job 31:24, 25, 28). Cunan punllacunapish gentecunaca charij tucunallapimi yuyancuna. Pero Diosca charina cosascunamanta, cullquimantapish imata yuyashcatami yachachin. Paita cazushpaca ima pandata mana rurashunchu (Proverbios 30:8, 9; Mateo 6:19, 20). w19.02 pág. 6 párrs. 13, 14

Jesusca tucuipimi Yaya Dios shina cꞌuyaj cashcata ricuchirca (1 Juan 4:8-10). Paica achcata cꞌuyashcamantami ñucanchijmanta paipaj causaita curca. Jehová Diospish Jesuspish cꞌuyaita ricuchishcamantami jahua pachapi causagrijcunapish, cai Allpapi causagrijcunapish beneficiarinchij (Juan 10:16; 1 Juan 2:2). Cunanca Jesús shuj uchilla micuita rurashpa paita catijcunaman cꞌuyaj, llaquij cashcata ima shina ricuchishcata yachashun. Jesusca jahua pachapi causagrijcunataca mana nircachu shuj jatun micuita rurashpa pai huañushcata yuyarichun nishpa. Chaipaj randica shuj uchilla micuillatami rurachun nirca. Chashnami paicunata cꞌuyashcata ricuchirca. Cai tucui huatacunatami Jesús huañushcata yuyarina tandanacuita ruranaca maipica mana jahualla cashca. Shinapish ¿Jesús mandashcata pajtachi tucushcanchijchu? Ari. Por ejemplo, maijancunaca cárcel ucupimi chai tandanacuita rurashcacuna (Apocalipsis 2:10). Diosta alli sirvijcunaca Jesús huañushcata cada huata yuyaringapajmi tucui pudishcata rurancuna. w19.01 pág. 24 párrs. 13-15

Cai mana llullami panda religionmanta, mana alli crishcacunamanta, shamuj punllapi ima tucunata manchanamantapish cacharichin. Ashtahuancarin shamuj punllapi ‘Diospaj huahuacunaca cacharichishpa jatunyachishcami canga’ (Romanos 8:21). Pero cunan punllacunapishmi libres cashcamanta cushilla causai pudingui (Juan 8:31). ¿Ima shina? Jesús mandashcacunatami cazuna cangui. Shinami mana llulla shimita alli rijsingui. Chaitaca mana yachacushcallamantachu alli rijsingui. Ashtahuanpish practicapi churacushcamantami alli rijsishcata ricuchingui. Gentecunaca alli, cushilla causashpapish mana toda la vidachu chashna causangacuna. ¿Imamanta? Caya punlla ima tucunataca mana pi yachanchu (Santiago 4:13, 14). Chaimanta, alli decisioncunata cunan agllashpaca cai Allpa paraisopimi huiñai huiñaita causangui (1 Timoteo 6:19). Diosca paita sirvichunca mana pita obliganchu. Shinapish cada unomi imata ruranata decidina can. Shinashpaca Diosta sirvishcamantami tucuita chari tucungui (Salmo 16:5). Chashnallataj pai cushca tucui allicunatapish valoranami cangui (Salmo 103:5, NM ). Joven, cunanpish shamuj punllapish cambaj causai alli richunca Jehová Dios ayudanata tucui shunguhuan crishpa cati (Salmo 16:11). w18.12 pág. 26 párrs. 19, 21

Tucui Diosta sirvijcunaca Jehová Dios shina Jesús shina matrimoniota respetangapajmi esforzarina canchij. Pero juchayujcuna cashcamantami maijancunaca mana respetancuna (Romanos 7:18-23). Chaimantami ñaupa tiempopipish Jesusta catij cusa huarmicuna paicunapaj causaipi problemacunata charishcata ricushpaca mana mancharinchij. Apóstol Pabloca “huarmica cusata ama shitachun” nircami. Pero huaquincunaca paicunapaj cusamanta o huarmimantami separarijcuna carca (1 Corintios 7:10). Pabloca imamanta cusa huarmi separarijcuna cashcataca mana huillarcachu. Pero cusaca mana huainayashcachu carca. Huainayashca cajpica mana culpata charijca divorciarishpami tigra cazarai tucurca. Ashtahuanpish Pabloca separarij huarmitaca cusahuan alli tucungui mana cashpaca shujtajhuan ama cazarangui nircami. ¿Imamanta? Ishquindijmi Diospaj ñaupajpica shujlla aicha shina carcacuna. Chaimantami Pabloca mana huainayashca cajpica ima problemacuna tiyajpipish cutin alli tucuichij nishpa aconsejarca. Shinallataj cusa huarmica ancianocunapaj ayudatami mañai tucurcacuna. w18.12 pág. 13 párrs. 14, 15

Diosca paipaj amigocuna tucuchunmi munan. Shinallataj pudirishcacama paimanta huillachunmi munan (Mateo 28:19, 20; Santiago 4:8). Pero huaquincunaca ñucanchijtaca desanimachisha nincuna. Por ejemplo, cambaj jefeca ashtahuan horascunata trabajajpica achca cullquitachari pagasha nin. Pero ashtahuan trabajashpaca tandanacuicunaman, huillanaman ringapaj mana tanto tiempotachari charingui. Cutin can joven cajpica cambaj profesorcunachari ashtahuan estudiana cangui nincuna. Chaipajca huasimanta rinachari minishtiringa. Shinapish ¿chai ratochu Diosta mañashpa, publicacioncunapi investigashpa, shujtajcunahuan parlashpa alli decisionta agllana cangui? Mana. Cunanmi chaimanta Dios imata yuyashcata yachangapaj estudiana cangui. Pai shina yuyangapajpish esforzarinami cangui. Chaimi cashna shina situación ricurijpica cambajca mana tentación shina canga. Ashtahuanpish Diosta sirvishpa caticushcamantaca imata ruranatami ña yachangui. w18.11 pág. 31 párr. 18

Rey Salomonca joven cashparajmi Israel llajtataca mandai callarirca. Chai qꞌuipallami Yaya Diosca shuj muscuipi ricurishpa Salomontaca: “Can imata nishcata mañailla, ñucaca cushallami” nirca. Chaimi Salomonca, ñucaca huambraraj cashcamantami ima shina mandanataca mana yachani. Alli mandangapajca “yachaita [o cazuj shunguta, NM ] cuhuayari” nirca (1 Reyes 3:5-10). Salomonca chashna mañashpami humilde cashcata ricuchirca. Chaimantami Jehová Diosca cazuj shunguta curca (1 Reyes 3:12). Diosca Salomontaca achcatami cꞌuyaj carca (2 Samuel 12:24, QC, 1989). Salomonca Diosta cazushcamantami achca bendicioncunata chasquirca. Por ejemplo, ‘israelcunata Mandaj Diospajmi’ shuj huasita shayachirca (1 Reyes 8:20). Shinallataj Yaya Dios yachaita cushcamantami tucuicuna rijsishca tucurca. Bibliapaj quimsa librocunatapishmi escribirca. Shujca Proverbios libromi can. w19.01 pág. 14 párrs. 1, 2

Huaquin gentecunaca paicunapaj yuyaicunata cambiachunca mana munancunachu. Paicunaca: “Ñucapaj randi yuyarishpa cuchunca mana munanichu” nincunami. Chashna nishpaca ima decisioncunata paicuna agllana cashcata, chaita rurangapajpish derechota charishcatami ricuchincuna. Chaimantami shujtajcuna imata nichun o shujtaj gentecuna laya yuyana cashcata nichunpish mana munancuna. Jehová Dios shina yuyashpaca ñucanchij propio yuyaita o ñucanchij ima shina cashcata saquinataca mana nicunchu. 2 Corintios 3:17 Traducción del Nuevo Mundo Bibliapica: “Jehová Diospaj espíritu maipi cajpica huatashca shinamanta cacharichinmi” ninmi. Tucuicunami imata yuyangapaj, imata rurangapajpish libres canchij. Jehová Diosmi ñucanchijtaca chashna rurarca. Pero chaica ñucanchij munashcallata rurana cashcataca mana nicunchu (1 Pedro 2:16). Jehová Diosca paipaj Shimipi ricushpa ima alli cashcata o ima mana alli cashcata agllachunmi nin. w18.11 pág. 22 párrs. 5, 6

Bibliamanta yachai callarishpaca charishca cosascunatapish yalli Diosta sirvina ashtahuan importante cashcatami intindircanchij. Chaimantami Diosta sirvingapajca tucui imatapish cushilla saquircanchij. Pero huatacuna pasajpica huaquinpica shujtajcuna mushuj aparatocunata randishcata o cunanlla llujshishca cosascunahuan cushilla causajtachari ricunchij. Chaimi ñucanchijpish chai cosascunatami minishtinchij nishpa yuyai callarinchij. Chashna yuyashpaca Diospajta ruranata ladoman saquishpami charina cosascunallapi dedicarishun. Demas runa ima tucushcapimi yuyai tucunchij. Paica “cai pachapi tiyajcunata” munashcamantami apóstol Pablohuan sirvinata saquirca. Bibliapica Demas runa Diostapish yalli charishca cosascunata cꞌuyashcata o apóstol Pablohuan sirvingapaj ña mana sacrificiocunata rurasha nishcataca mana huillanchu. ¿Caimantaca imatataj yachanchij? Ñaupa charishca cosascunapica mana cutin tigra yuyanachu canchij. Chaipi yalli yuyashpaca Diosta sirvinatami saqui tucunchij. w18.11 pág. 12 párr. 9

Satanasca Evata llaquichingapajmi llullarca. Eva paipaj llullata crishpa mana micuna yuramanta micushpa huañuna cashcataca Satanasca allimi yacharca. Y chaitajmi tucurca. Adanpish Evapish Diosta mana cazushcamantami tiempohuanca huañurcacuna (Génesis 3:6; 5:5). Shinallataj Adán juchallishcamantami huañuica tucui runacunaman shamurca. ‘Dios mandashcata Adán pꞌaquishca shina mana pꞌaquishpapish juchallijcunataca huañuimi mandarca’ (Romanos 5:12, 14). Chaimantami Dios callaripi munashca shina jucha illajca mana canchij. Huiñai huiñaitapish mana causai pudinchij. Ñucanchij causana punllacunaca 70 huatacunallami. Ashtahuan sinchicunapish 80 huatacunallatami causan. Shinapish, llaquilla, cꞌuyaillatami causanchij (Salmo 90:10). Cai tucui llaquicunaca Satanás llullashcamantami can. Satanás ima shina cashcata ricuchingapajmi Jesusca: ‘Paica callarimanta yallitaj jatun llullami. Tucui pai nishcacunapish llullami’ can nirca (Juan 8:44). Diabloca mana cambiashcachu. Ashtahuanpish paica tucui cai “allpa pachapi causajcunata” umashpami catishca (Apocalipsis 12:9). Pero ñucanchijca mana paipaj trampapi urmasha ninchijchu. w18.10 págs. 3, 4 párrs. 1-4

Ñucanchijraj shujtajcunahuan alli canata mashcashpaca cushillami sintirishun. Jesusta catij Santiagoca: “Maijanpish tarpuj shina imatapish cashcata rurashpa sumajta causajca, tarpushcamanta allita tandaj shinami sumaj causaita japinga” nircami (Santiago 3:18, QC, 1989). Congregacionpi maijan huauqui panihuan o ñucanchij familiahuan llaquirinacui tiyajpica chaita allichingapajmi Yaya Diostaca ayudahuai nishpa mañana canchij. Paimi paipaj espíritu santota cushpa ayudanga. Shinallataj allita ruraj cachun, cushi causaita charichunpishmi ayudanga. Jesuspish shujtajcunahuan alli canata ñucanchijraj mashcana imamanta importante cashcatami nirca. Paica: “Taita Diosman cungapaj ofrendata altarman apamucushpa, cambaj huauqui canhuan imamanta pꞌiñarishcata yuyarishpaca, Taita Diosman cuna ofrendata altar ñaupajpi saquishpa, cambaj huauquihuanraj alli tucugringui. Chashna rurashpaca, Taita Diosman cunaman tigranguilla” nircami (Mateo 5:23, 24). w18.09 pág. 19 párr. 17

Jesusca último tutata paipaj catijcunahuan cashpaca cꞌuyaita ricuchinamantami casi 30 cutin parlarca. Paica caishuj chaishuj cꞌuyaita ricuchinacuichij nircami (Juan 15:12, 17). Chashna cꞌuyaita ricuchijpimi shujtajcunaca Jesusta alli catijcuna cashcata ricuna carcacuna (Juan 13:35). Jesús parlashca cꞌuyaica mana ñucanchij shungupi imata sintishcallachu can. Ashtahuanpish mana imata shuyashpa shujtajcunapaj allita ruranami can. Shinallataj Jesusca: “Maijanpish paihuan alli apanacujcunamanta huañujca yallitaj cꞌuyajmi. Chashna cꞌuyajca pi mana tiyanchu. Ñuca ima shina mandashca shinatataj rurashpaca, ñucahuan alli apanacujcunami canguichij” nircami (Juan 15:13, 14). Cunan punllacunapi Diosta sirvijcunaca shungumanta cꞌuyaita ricuchij cashcamanta, tucuicuna tandalla cashcamantami rijsishca canchij (1 Juan 3:10, 11). Ima shina huiñashca cashpapish, ima shimita parlaj cashpapish o maijan llajtamanta cashpapish shungumanta cꞌuyaita ricuchingapajmi esforzarinchij. w18.09 pág. 8 párrs. 1, 2

Diosca ñucanchij familiata cuidachunmi munan. Por ejemplo, huaquincunaca familiata mantiningapajca trabajanami canchij. Achca mamacunapish paicunapaj uchilla huahuacunata cuidangapajmi huasipi saquirincuna. Cutin huaquincunaca paicunapaj yuyajlla yaya mamatami cuidana can. Caicunata ruranaca importantemi can. Familiata chashna cuidana cashcamantachari ñucanchij munashca shina mana tanto Diostaca sirvi pudinchij. Pero mana desanimarinachu canchij. Yaya Diosca ñucanchij familiata cuidachunmi munan (1 Corintios 10:31). ¿Familia ucupi mana tanto responsabilidadta charishpaca imatataj rurai tucunchij? Mayorlla huauqui panicunata, ungushcacunata o imata minishticujcunatami ayudai pudinchij. Cai huauqui panicunata cuidajcunatapishmi ayudai pudinchij. Ñucanchij congregacionpi pi ayudachun minishticujta ricushunchij. Chaita rurashpaca paicuna mañashcata Yaya Dios contestachunmi ayudai pudishun. Shinami Dioshuan trabajacushcata ricuchicushun (1 Corintios 10:24). w18.08 pág. 22 párrs. 3, 5

Jacobca paipaj churi Josetaca achcatami cꞌuyaj carca. Chaimantami Josepaj caishuj huauquicunaca paita envidiashpa esclavota shina cꞌatushpa cacharcacuna. Chaipajca Joseca 17 huatacunatami charirca (Génesis 37:2-4, 23-28). Joseca casi 13 huatacunatami Egipto llajtapica puntaca esclavo shina, qꞌuipaca prezupi llaquita aparca. Paipaj cꞌuyashca yayamantapish carupimi carca. Pero ¿ama yallitaj llaquiringapaj, ama pꞌiñaringapajca imataj paita ayudarca? Prezupi llaquita apacushpaca Joseca de seguromi Yaya Dios paita ima shina chai llaquipi cuidacushcata yuyashcanga (Génesis 39:21; Salmo 105:17-19). José joven cashpaca huaquin muscuicunatami charirca. Chaita yuyarishpami llaquita apacushpaca Diospi ashtahuan confiashcanga (Génesis 37:5-11). Shinallataj cutin cutin Yaya Diosta mañashpami shungu ucupi ima shina sintirishcata huillashcanga (Salmo 145:18). Jehová Diosca José mañashcacunataca, ima pasajpipish paipaj ladopi canata tucui shunguhuan crichun ayudashpami contestarca. w18.10 pág. 23 párrs. 3, 4

Shujtajcuna cullquita charijta ricushpa o mana charijta ricushpami maipica imatapish paicunamanta yuyanchij. ¿Shujtajcuna cullquiyuj cajpi o pobre cajpica imatataj yuyai tucunchij? Espíritu santo yuyachijpimi Salomonca cunan punllapaj verso nishcata quillcarca. ¿Caimantaca imatataj yachanchij? Mana cuidadota charishpaca cullquita charij huauqui panicunallahuanmi apanacunata munashun. Cutin ashalla cullquita charijcunahuanca manachari tandanacunata munashun. ¿Shujtajcuna mashnata charishcallata ricushpa juzganaca imamantataj mana alli can? Chashna juzganata yachashpaca huauqui panicunatami chꞌicanyachinata pudinchij. Ñaupa tiempopi Jesusta catij Santiagoca chashna problema tiyashcamantami huaquin congregacioncunaca chꞌicanyaricuncuna nircami (Santiago 2:1-4). Ñucanchij congregacionpipish chashna pasachunca mana saquinachu canchij. Shujtajcuna mashnata charishcallata ricushpa mana juzganachu canchij. w18.08 págs. 11, 12 párrs. 8-10

Jehová ñucanchijta paipaj amigo cachun saquishcamantaca huauqui panicunata alli tratashpami agradecidos cashcata ricuchina canchij. Paicunapishmi Diospajlla cancuna. Caita yuyaipi charishpaca huauqui panicunataca siempremi cꞌuyaihuan tratashun (1 Tesalonicenses 5:15). Jesusca paita catijcunataca: “Caishuj chaishuj cꞌuyanacujpimi, cancunataca ñuca yachacujcunataj cashcata tucuicuna rijsingacuna” nircami (Juan 13:35). Malaquías libropica Jehová Diosca paita sirvijcuna parlanacucujpica tucuitami uyan ninmi (Malaquías 3:16). Yaya Diosca “paipaj cajcunataca rijsinmi” (2 Timoteo 2:19). Tucui ima nishcata, tucui ima rurashcataca paica allimi yachan (Hebreos 4:13). Huauqui panicunahuan mana cꞌuyaj, mana llaquij cajtaca Diosca ricucunmi. Pero ñucanchij perdonajcuna, llaquij, cꞌuyaj cajpica paica mana cungaringachu (Hebreos 13:16). w18.07 págs. 24, 25 párrs. 15, 17

Jehová Diosllami tucuita yachaj, tucui poderta charij Dios can. Paillami ñucanchijtapish achcata cꞌuyan. Chaimantami paipaj lado casha ninchij, manataj caruyasha ninchijchu (Salmo 96:4-6). Shinapish huaquincunaca paimantami caruyashcacuna. Cainmanta yachashun. Paica yanga dioscunata mana adorajchu carca. Jehová Diostami adorani nijmi carca. Shinapish paipaj adoraciontaca Diosca mana chasquircachu. ¿Imamanta? Cainpaj shungupi mana alli munaicuna tiyashcatami Diosca ricurca (1 Juan 3:12). Jehová Diosca Caintaca allita rurajpica cantaca chasquishami nircami. “Ashtahuanpish mana allita rurajpica, juchami cantaca mana allita rurachingapaj shuyacun. Shina cajpipish mana allitaca canmari mishana cangui” nircami (Génesis 4:6, 7). ¿Chashna nishpaca imatataj Diosca Cainmanca intindichisha nirca? Caín mana alli munaicunamanta arrepintirishpa paipaj lado tucujpica paipish Cainpaj lado casha nishcatami Diosca intindichisha nirca. Pero paica Dios cushca consejotaca mana uyarcachu. w18.07 págs. 15, 16 párrs. 1, 3, 4

Gentecunaman Diosmanta huillashpa, Jesusta catijcuna tucuchun ayudashpami ñucanchij luzta achijyachicuj shina cashun (Mateo 28:19, 20). Gentecunaman Diospaj Shimita huillanaman rijpica paicunaca ñucanchij ima shina comportarishcatami ricucun. Cushilla ñahuihuan saludajpica gentecunaca Diosmantapish, ñucanchijmantapish allitami yuyangacuna. Chashna alli comportarishpami Yaya Diostaca jatunyachicunchij. Jesusca paita catijcunataca: “Huasiman yaicugrishpaca, sumaj causai cancunahuan cachun nishpa yaicunguichij” nircami (Mateo 10:12). Jesús huillashca llajtacunapica gentecunaca mana rijsishcacunatapish huasiman yaicuchunmi invitajcuna carca. Pero cunanca ñucanchij causacushca llajtapica chaitaca ña manachari ruranchij. Maipicarin huillanaman rijpica mana rijsishcacuna paicunapaj huasiman chayajpimi mancharishca saquirincuna. Huaquinpicarin pꞌiñarincunami. Shinapish sumajta respetohuan parlajpica tranquilomi sintirincuna. Carritohuan huillacushpapish cushilla ñahuihuan saludajpica gentecunaca ñucanchij publicacioncunatami chasquishcacuna. Shujtajcunacarin ñucanchijhuanmi parlanacushpa saquirishcacuna. w18.06 pág. 22 párrs. 4, 5

Apóstol Pedroca judiocunallahuanmi apanacuj carca. Pero Diosca tucui laya gentecunata igual tratana cashcatami nirca. Chaimantami Pedroca Roma llajtamanta soldadocunata mandaj Cornelioman Diospaj Shimita huillarca (Hechos 10:28, 35). Chai punllamantami mana judiocunahuanpish Pedroca apanacushpa micuj carca. Pero asha huatacuna qꞌuipaca Antioquía llajtapi cashpami mana judiocunahuan micunata saquirca (Gálatas 2:11-14). Pabloca chaita ricushpami Pedrotaca sinchita cunarca. Pedroca allimi uyarca. Chaitaca ¿ima shinataj yachanchij? Asia Menorpi caj judiocunaman mana judiocunamanmi shuj cartata escribirca. Chaipica ‘tucui huauqui panicunata cꞌuyaichij’ nishpami Pedroca escribishca carca (1 Pedro 1:1; 2:17). Apostolcunaca Jesuspaj ejemplota catishpami ‘tucui laya gentecunata’ cꞌuyanata yacharcacuna (Juan 12:32; 1 Timoteo 4:10). Tiempohuanca shujtajcunamanta mana yalli cashcata intindircacuna. ‘Mushuj runata rurashca’ shina cashcamantami Jesusta catijcunaca Dios shina tucui laya gentecunata igual tratai callarircacuna (Colosenses 3:10, 11). w18.06 pág. 13 párrs. 15, 16

Punta siglopica romano soldadocunaca pechopi fierro churanatami churarijcuna carca. Chai churanaca shuj chaleco shinami fierrocunahuan rurashca carca. Paicunapaj shunguta ama chugrichichunmi chashna churarijcuna carca. Chaimantami chai churanataca alli ajustashca cashcata ricurayana carca. Pechopi fierro churarinaca Dios mandashcacunatami ricuchin. Cai mandashcacunata pajtachishpallami shungutaca alli cuidashun (Proverbios 4:23). Shuj soldadoca pechopi fierro churarinata ladoman saquishpa shujtaj materialhuan rurashca churanataca mana churarijchu carca. Chashnallataj Diospaj mandashcacunata ladoman saquishpa ñucanchij yuyashcacunallataca mana catinachu canchij. Ñucanchij yuyaicuna Diospaj yuyaicunahuan mana igual cashcamantami shungutaca mana cuidai tucunchij (Proverbios 3:5, 6). Chaimantami pechopi fierro churana ñucanchij shunguta cuidacushcata o mana cuidacushcata ricurayana canchij. Biblia yachachishcacunata cꞌuyashpaca Diosta cazunaca jahuallami canga. Chashnami ‘pechopi fierro churanata’ churarishca shina cashun (Salmos 111:7, 8; 1 Juan 5:3). w18.05 págs. 22, 23 párrs. 3, 4, 6, 7

Israelitacunaca yacuta mana charinchijchu nishpami Moisesta culpashpa rimarcacuna. Achca huatacunata Moisés alli pushajpipish quejarishpami catircacuna (Números 20:1-5, 9-11). ¿Israelitacuna chashna quejarijpica Moisesca imatataj rurarca? Jehová Diosca Moisestaca yacuta llujshichichunca rumita rimachunmi mandarca. Pero paica rumita rimanapaj randica israelitacunahuan pꞌiñarishpami ñucami yacuta llujshichisha nirca. Qꞌuipaca paipaj caspihuan rumita ishqui cutin huajtajpimi yacuca llujshirca. Moisesca shuj ratolla jatun tucushpa pꞌiñarishcamantami pandarirca (Salmo 106:32, 33). Chaimantami Diosca paitaca ‘ñuca cushca llajtamanca mana yaicunguichu’ nirca (Números 20:12). ¿Moisesmantaca imatataj yachacunchij? Manso shungu cashpa catingapajmi achca esfuerzota rurana canchij. Mana chaita rurashpaca ñapishmi jatun tucushun. Chaimi mana alli yuyarishcahuan imatapish rimashun, imatapish rurashun. Shinallataj imamanta yallitaj sustarishca cashpaca pihuanpish ratomi pꞌiñarinchijlla. Ama chashna cangapajmi jarcarinata yachana canchij. w19.02 págs. 12, 13 párrs. 19-21

¿Huillanaman rinaca ñucanchijpajca sinchichu can? Mana. Jesusca uvas yuramanta parlashca qꞌuipaca, Dios churashca Mandanamanta huillashpami ñuca shina cushilla canguichij nircami (Juan 15:11). ¿Chaihuanca imatataj nisha nirca? Yuyarishun, Jesusca paipaj apostolcunamanca, ñucaca shuj uvas yura shinami cani, cancunaca cai uvas yurapaj ramacunami canguichij nircami (Juan 15:5). Por ejemplo, ramacunaca yurapi cashpallami yacutapish alimentocunatapish chasquin. Ñucanchijpish Jesusmanta mana caruyashpa, pai shina Diospaj munaita rurashpami cushilla cashun (Juan 4:34; 17:13; 1 Pedro 2:21). Pani Anaca 40 yalli huatacunatami precursora shina sirvicun. Paica: “Huillanamanta tigrashpami cushilla sintirini. Chaimi Diosta sirvishpa catingapaj animan” nircami. Ñucanchijpish cushilla cashpaca gentecuna mana uyasha nijpipish huillashpami catishun (Mateo 5:10-12). w18.05 págs. 9, 12, 13 párrs. 2, 14

Apóstol Pabloca huauqui panicunata animashpami achcata ayudarca. Diospaj espirituca Pablotaca Grecia llajtaman, Roma llajtamanmi cacharca. Chai llajtacunapica gentecunaca achca dioscunatami adorajcuna carca (Gálatas 2:7-9). Pabloca cunan Turquía shuti nishca llajtapimi purirca. Shinallataj Grecia, Italia llajtacunapipishmi carca. Chai llajtacunapica mushuj congregacioncunatami callarichirca. Chaipi mushuj huauqui panicunaca achca animota cuchunmi minishtircacuna. Paicunataca ‘paicunapaj quiquin llajtapi causajcunallatajmi llaquichijcuna’ carca (1 Tesalonicenses 2:14). Huata 50-pica Pabloca Tesalónica llajtapi causaj huauqui panicunamanmi shuj cartata escribirca. Chai cartapica: ‘Taita Diosta ñucanchij mañacushpaca, tucui cancunata mana cungashpami Diosta pagui nicunchijlla. Cancunaca crishcamantami allicunata rurashpa, cꞌuyaihuan trabajashpa, ahuantashpa caticunguichij’ nircami (1 Tesalonicenses 1:2, 3). Ashtahuanpish Pabloca chai cartallapitajmi: “Ima shina cunan ruracushca shinallataj, caishuj chaishujta animachichij caishuj chaishujta sinchiyachichij” nishpami mandarca (1 Tesalonicenses 5:11). w18.04 págs. 19, 20 párrs. 16, 17

Diosta ashtahuan sirvisha nishpaca shujtajcunamanmi paimanta parlana cangui. Jesusca Diosmanta huillana importante cashcatami ricuchirca. Chaimanta, ¿ashtahuan huillanata yuyashcanguichu o precursor canata yuyashcanguichu? Pero huillanaman rinataca mana achcata munanichu ninguichari. Chashna yuyashpaca ¿imatataj rurai tucungui? Allimi allichirina cangui. Shinallataj shujtajcunaman Diosmanta huillanataca mana saquinachu cangui. Chaita rurashpami huillacushpaca cushilla sintiringui. Escuelapi o colegiopi compañerocunaca cambaj crishcacunamanta tapuicunatami ruranga. Chai tapuicunata cutichingapajca allimi allichirina cangui. ¿Ima shinataj allichiri tucungui? Publicacioncunapipish jw.org® paginapipish alli yuyaicunami tiyan. Chai publicacioncunamanta yachashpami tapuicunata alli cutichi tucungui. Por ejemplo, ¿Imamantataj Diospi cringui? nijpica Joven cai 10 tapuicunapi ¿yuyashcanguichu? nishca folletota ricui. Shinami chai tapuimanta ima shina cutichinata yachai tucungui. w18.04 págs. 29, 30 párrs. 10, 11

Adán y Evaca achca cosascunata rurai pudijpipish Jehová Diosca huaquin leycunatami curca. Maijan leycunaca mana sinchichu carca. Por ejemplo, causashpa catingapajca samaita aisana, micuna, dorminapishmi carcacuna. Caicunata rurashpaca paicunaca mana huatashca shina sintirircacunachu. Ashtahuanpish Adán y Evaca chaicunata rurashpaca cushillami sintirircacuna. Diosca chaitami munarca (Salmo 104:14, 15; Eclesiastés 3:12, 13). Jehová Diosca Adán Evataca ‘huahuacunayuj tucushpa, cai pachapi jundarichij, cai pachata cuidanguichij’ nishpami mandarca. ¿Chaita mandajpica Adán Evaca huatashca shina sintirircacunachu? Mana. Ashtahuanpish cai mandashcata pajtachishpaca cai Allpa shuj paraíso tucuchun, paicunapaj huahuacunapish huiñaita causachun ayudana oportunidadtami charircacuna. Chashna causachunmi Jehová Diosca munarca (Salmo 127:3; Isaías 45:18). Caipi ricushca shinaca Adán Evapish paicunapaj huahuacunandij cushillami huiñai huiñaita causanman carca. w18.04 págs. 4, 5 párrs.  7, 8

Pacienciata charishpaca gentecuna punta uyashcahuan ñucanchij yachachishcacunata crina cashcataca mana yuyanachu canchij. Por ejemplo, paraíso Allpapi huiñaita causanamanta ima shina intindichinata yuyashunchij. Achcacunaca pi huañujpica mana tigra causaringachu nincunami. Shujtajcunacarin tucui alli gentecunami jahua pachaman rincuna nincunami. Shuj huauqui Bibliahuan ima shina intindichishcata ricushun. Puntaca Génesis 1:28-tami liyin. Qꞌuipaca ‘¿gentecuna maipi, ima shina causachuntaj Diosca munarca?’ nishpami tapun. Achca gentecunaca ‘cai Allpapi cushilla causachunmi Diosca munarca’ nishpami contestancuna. Chai qꞌuipaca Isaías 55:11-ta liyishpami ‘¿Diospaj munaica cambiashcachu?’ nishpa tapun. Paicunaca ‘mana cambiashcachu’ nishpami contestancuna. Ultimotaca Salmo 37:10 y 11-tami liyin. Qꞌuipaca: ‘Bibliapi nishca shinaca ¿shamuj punllapi gentecunaca ima shinataj causangacuna?’ nishpami tapun. Chashnami cai huauquica achcacunamanca Diosca alli gentecuna cai Allpapi huiñai huiñaita causachun munashcata intindichishca. w19.03 págs. 24, 25 párrs. 14, 15, 19

Chashna nishpaca Jehová Diosca paipaj Churi nishcacunata uyachun, pajtachichun munashcatami ricuchirca. Jesusca paipaj discipulocunaman Diospaj Reinomanta ima shina huillana cashcatami yachachirca. Achca cutincunami “chaparacuj” shina causana cashcatapish yachachirca (Mateo 24:42; 28:19, 20). Shinallataj mana shaicurishpa Diospaj munaita pajtachichunmi cutin cutin paicunata animarca (Lucas 13:24). Ashtahuanpish caishuj chaishuj cꞌuyanacushpa, tandalla causana cashcata, paipaj mandashcacunata cazuna cashcatapishmi intindichirca (Juan 15:10, 12, 13). Cunan punllacunapishmi chai consejocunata uyana canchij. Jesusca: “Ñuca huillashcataca mana llullapaj cajcunallami uyancuna” nircami (Juan 18:37). ‘Caishuj chaishuj ahuantanacushpa, perdonanacushpami’ Jesusta uyacushcata ricuchinchij (Colosenses 3:13; Lucas 17:3, 4). Shinallataj alli punllacuna cajpipish llaqui punllacuna cajpipish cushilla predicashpami paita uyacushcata ricuchinchij (2 Timoteo 4:2). w19.03 pág. 10 párrs. 9, 10