Abril

¿Ñucanchijpish Dios shinachu yuyanchij o cai mundo shina? De seguromi Dios munashca shina causacunchij. Pero, Dios yuyashca shina yuyangapajca achca esfuerzotami rurana canchij. Chaita rurajpipish cai mundopaj espirituca tucui partecunapimi can. Ñucanchijllapi yuyachunmi munan (Efesios 2:2). Chaimantami cai mundo shina yuyanaca jahualla can. Cai mundo shina yuyashpaca ñucanchijllapimi yuyashun. Ima alli o ima mana alli cashcatapish ñucanchijllataj agllanatami munashun (Marcos 7:21, 22). Chaimantami Dios yuyashca shina yuyanaca importante can. w18.11 págs. 21, 22 párrs. 1, 3, 4

Jesuspajca Yaya Dios alli nishca canami ashtahuan importante carca. Paipaj Yaya jahua pachamanta quimsa cutin rimajta uyashpaca Jesusca achcatami cushiyarishcanga. Por ejemplo, río Jordanpi bautizarishca qꞌuipaca jahua pachamantami Diosca cai punllapaj versopi nishcata nirca. Chaitaca Jesús y Bautizaj Juanllami uyashca cangacuna. Jesús huañunapaj casi shuj huata faltajpimi quimsa apostolcunapish: “Caimi, ñuca cꞌuyashca Churi. Paipimi cushicuni. Paita uyaichij” nishpa Yaya Dios rimashcata uyarcacuna (Mateo 17:5). Jesús huañunapaj huaquin punllacuna faltajpimi Jehová Diosca cutin jahua pachamanta paihuan parlarca (Juan 12:28). Jesusca pinganaita huañuna cashcataca allimi yacharca. Paita yangamanta juchachishpa gentecuna rimanatapish yacharcami. Shina cajpipish paica: ‘Ama ñuca munashca shina rurapaichu, ashtahuanpish can munashca shina rurapai’ nishpami Diosta mañarca (Mateo 26:39, 42). Jesusca Diospaj ñaupajpi alli ricurinata munashcamantami cai pacha gentecunapaj ñaupajpi alli nishca canataca mana mashcarca. Chaimi asicujpipish paica mana pinganayachishpa huañurca (Hebreos 12:2, NM ). w18.07 págs. 7, 8 párrs. 15, 16

Jesusca pai huañushcata yuyarishpa ruracunguichijlla nishca qꞌuipaca mana manchaj cashcatami ricuchirca. Paita yangamanta juchachishpa, cꞌamishpa pinganaita huañuchinata yachashpapish, Yaya Diospaj munaitami rurasha nirca (Mateo 26:65, 66). Jesusca cashcata rurashpami Jehová Diospaj shutita jatunyachirca. Dioslla mandana derechota charishcatapishmi difindirca. Gentecuna juchamanta arrepintirishpa huiñai causaita charichunpishmi ayudarca. Shinallataj Jesusca paita catijcuna ima shina llaquicunata chꞌimbapurachunmi alli yachachirca. Jesusca paillapi yuyashpa manchaihuan canapaj randica apostolcunata ima shina ayudanatami ricurca. Judas Iscarioteta llujchishca qꞌuipaca shuj uchilla micuitami rurarca. Chai micuita yuyarishpami ungidocunaca Jesús paipaj causaita cushcamanta, mushuj ari ninacuita paicunahuan rurashcamanta beneficiarishcacuna (1 Corintios 10:16, 17). w19.01 pág. 22 párrs. 7, 8

Jehová Diosca Jesustaca: “Ñami ñuca shutita alli cashcata ricuchircani. Cutinpish ricuchisharajmi” nishpami cutichirca. Jesusca paita azotishpa huañuchina cashcatami yacharca. Shinapish huañungacama Diosta tucuipi cazushcatami ricuchina carca. Chaita yachashcamantami sustarishca carca (Mateo 26:38). Shinallataj Jesustaca llullajmi can nishpami juchachishpa huañuchigrircacuna. Pero paipajca Diosta jatunyachinami ashtahuan importante carca. Chaimantami huañushpa Diospaj shutita mana allipi saquichinata mancharca. Jesús shinallatajmi Diospaj shutita allipi saquichinata munanchij. Chaimantami shujtajcuna ñucanchijta deganamanta llaquichijpi o llullacunata nijpi Diospaj shutica ¿ima shinashi saquiricun? nishpa sustarinchij. Shinapish mana yalli sustarinachu canchij. Ashtahuanpish chai ratoca Jehová Dios Jesusman ima nishcatami yuyarina canchij. Diosca paipaj shutitaca jatunyachingami (Salmo 94:22, 23; Isaías 65:17). w19.03 págs. 11, 12 párrs. 14-16

Discipulocunaca Jesús Israel llajtata mandana cashcatami yuyarcacuna. Pero Jesusca pai llaquicunata apashpa huañuna cashcatami huillarca. Chashna nijpimi paicunaca mana crircacuna. Apóstol Pedroca: “Amito, ashtahuanpish can quiquinta llaqui. Chashna tucunataca Dios ama munachun” nircami. Chaimi Jesusca: “¡Ñuca ñaupajmanta anchui, Satanás! Ñuca ñitcanami tucungui. Dios imata pajtachisha nicushcataca mana intindi tucunguichu. Ashtahuanpish runacunapaj yuyaillatami intindi tucungui” nircami (Mateo 16:22, 23; Hechos 1:6). Chashna nishpaca Jesusca Yaya Diospaj yuyaihuan cai mundopaj yuyaihuan mana igual cashcatami intindichirca (1 Juan 5:19). Apóstol Pedro nishcaca cai mundopaj yuyaicunatami ricuchin. Pero Yaya Diosca chai yuyaita mana charircachu. Jesús nishcacunaca cai pachapaj yuyaicunata mana chasquishcata ashtahuanpish Dios shina yuyaj cashcatami ricuchirca. w18.11 pág. 21 párrs. 1, 2

Jesús huañushcata yuyaringapajmi muyundij Allpapi achca gentecuna tandanacun. Huaquincunaca cada huatami cai tandanacuiman shamuncuna. Paicunamantaca maijancunaca sinchi jarcaicunatami charincuna. Shujtajcunaca cada semanapi tiyaj tandanacuicunaman mana purishpapish Jesús huañushcata yuyarina tandanacuimanca mana faltancunachu. Cutin shujtajcunaca ima cashcata yachashun nishpallami punta cutin cai tandanacuiman shamushcacuna. Chai tucuicunatami Yaya Diosca ricucun. Jesús huañushcata yuyarina tandanacuiman achca gentecuna rijpica Jehová Diosca achcatami cushicunga (Lucas 22:19). Pero, paica imamanta chai tandanacuiman rishcatami ricun. ¿Jehová Diospish paipaj organizacionpish ñucanchijta yachachichun munanchijchu? (Isaías 48:17, 18; Juan 6:45). w19.01 pág. 26 párrs. 1-3

Jesusca tucui punllacunami paillapi yuyanapaj randica shujtajcunamanta preocuparij carca. Chashnami shujtajcunata cꞌuyashcata ricuchirca. Por ejemplo, shaicushca, sustarishca cashpapish paipaj catijcunahuanmi tandanacuj carca (Lucas 22:39-46). Mana imata japinata yuyashpami shujtajcunata ima shina ayudanata ricuj carca (Mateo 20:28). Ñucanchijca Jehová Diospaj pueblopi cashcamantami cushilla sintirinchij. Chaimantami shujtajcunatapish ñucanchijhuan tandanacuchun invitangapaj achca tiempota dedicanchij. Ashtahuantajca congregacionmanta caruyashcacunatami ayudanata munanchij (Gálatas 6:10). Paicunataca Jesús huañushcata yuyarina tandanacuiman shamuchun, shinallataj cada semana tandanacuicunaman shamuchun animashpami cꞌuyashcata ricuchinchij. Congregacionmanta caruyashcacuna tigrajpica Jehová Dios shina, Jesús shinami ñucanchijpish achcata cushicunchij (Mateo 18:14). w19.01 págs. 29, 30 párrs. 12, 14, 15

Cai tandanacuita callarichingapajca Jesusca levadura illaj tandata, Pascua fiestapi sobrashca vinollatami utilizarca. Chashna uchilla micuita rurajpica apostolcunaca mana mancharishcacunachu canga. Qꞌuipaca apostolcunamanca, tandaca ñuca jucha illaj cuerpota, vinoca ñuca jichana yahuartami ricuchin nircami. Shuj punllaca Jesusca paipaj amigo Lázaro, Marta, Mariata visitanamanmi rirca. Jesús paicunahuan cashpaca Diosmantami yachachi callarirca. Pero Martaca Jesuspaj shuj alli micuita rurashpami ocupada carca. Chaimi Jesusca, Marta uchilla micuillata ruranami alli can nishpa cꞌuyaihuan aconsejarca (Lucas 10:40-42). Pai huañunapaj ashalla horascuna faltajpimi Jesusca Martaman cushca consejota pajtachirca. ¿Ima shina? Uchilla micuita rurashpami pai huañushcata yuyarichun mandarca. w19.01 págs. 20, 21 párrs. 3, 4

Jehová Diosca Jesusta causachishpami “tucui ima tiyajcunapaj jahuapi jatunyachirca”. Ashtahuantajca nunca mana huañuna causaihuanmi bendiciarca. Chashna causaitaca ni pi mana chasquishcachu carca (Filipenses 2:9; Romanos 6:9). Jesús tucui shunguhuan Yayitu Diosta sirvishcamantami chashna bendicionta chasquirca. Shujtajcunapaj ñaupajpi alli ricurinata ama mashcangapajca ¿imatataj yuyarina canchij? Jehová Dios paita tucui shunguhuan sirvijcunata siempre bendiciaj cashcatami yuyarina canchij. Manapish yuyashca bendicioncunata cuj cashcatapishmi yuyarina canchij. Shamuj punllacunapi Dios ima shina ñucanchijta bendicianataca mana yachanchijchu. Mana alli gentecunaca ñallami tucuringa. Chaitapishmi yuyarina canchij. Shinapish chai punlla chayangacamaca llaquicunata ahuantana canchij (1 Juan 2:17). Ñucanchij cꞌuyaj Yayitu Diosca paipaj imallata rurashcataca manataj cungaringachu. Paita cꞌuyashcatapish siempremi yuyaringa (Hebreos 6:10). w18.07 pág. 8 párrs. 17, 18

Tucuri pascua micuita micucushpaca Jesusca paipaj apostolcuna tandalla cachunmi munarca. Chaimantami apostolcunahuan Diosta mañacushpaca, ‘ima shinami ñucaca canhuan shuj shinalla cani, ñucata catijcunapish shuj shinalla cachun’ nishpa mañarca. Jesusta catijcunaca shuj shinalla cashpami Jehová paipaj Churita cachashcata ricuchina carcacuna. Ashtahuancarin shujtajcunaman cꞌuyaita ricuchishpaca tandallami sumajta causana carcacuna. Chashnami Jesusta alli catijcuna cashcatapish ricuchina carca (Juan 13:34, 35). Chai tutallatajmi apostolcunaca: “¿Maijanshi tucuita yalli jatun nishcaca canchij?” nishpa caishuj chaishuj rimanacushcacuna carca. Paicunaca caimantaca ñami ñaupaman chashna rimanacushcacuna carca (Lucas 22:24-27; Marcos 9:33, 34). Chaita ricushpami Jesusca apostolcunataca tandallami causana canguichij nishpa cutin cutin yachachirca. Shujtaj punllacarin Santiago, Juanpish Jesús mandacujpi paipaj cꞌuchupi shuj alli puestota cuchun nishpami Jesusta mañashcacuna carca (Marcos 10:35-40). w18.06 pág. 9 párrs. 1, 2

Diosca cusa huarmicuna huañungacama cꞌuyanacuchunmi munan (Mateo 19:3-6). Huainayanaca jatun llaquicunamanmi apan. Chaimantami canchis mandamientopica ama huainayangui nin (Deuteronomio 5:18). Shujtajhuan huainayajcunaca Jehová Diospaj ñaupajpipish juchallincunami. Paicunapaj cusata o huarmitapish llaquichincunami (Génesis 39:7-9). Chaimantami mana culpata charij cusa o huarmica achca huatacunata llaquilla causangacuna. Jehová Diosca huahuacunamantapishmi preocuparin. ¿Chaitaca ima shinataj yachanchij? Diosca yaya mamacunataca huahuacunata alli huiñachingapajca ima minishtishcatami cuna canguichij nishpami mandarca. Shinallataj ñucata sirvichunmi yachachina canguichij nishpami mandarca. Chaimi paicunaca maipi cashpapish Diosta cꞌuyachun, paita cazuchun yachachina carcacuna (Deuteronomio 6:6-9; 7:13). Yaya Diosca yaya mamacunamanca huahuacunataca shuj herenciata shinami curca. Chaimi huahuacunataca mana llaquichina carcacuna. Chaipaj randica cꞌuyanami carcacuna (Salmo 127:3). w19.02 pág. 21 párrs. 5, 7

Job runaca Dios cusha nishca bendicioncunatami yuyaipi charirca. Jobca pai cazuj cashcata o mana cazuj cashcata Dios ricucushcatami yacharca. Shinallataj llaquicunata charishpapish Jehová Dios bendicianata yachashcamantami paita tucui causaipi cazurca. Chaimi Yaya Diosca pai juchayuj cajpiraj achcata bendiciarca (Job 42:12-17; Santiago 5:11). Shamuj punllacunapipish Diosca Jobtaca achcatami bendicianga. Diosca paipaj yuyaita mana cambiashcachu (Malaquías 3:6). Yayitu Diosca paita siempre cazujpica mana cungarinchu. Chaita yuyaipi charishpaca shamuj punllapi cushilla causai tiyanata shuyashpami catishun (1 Tesalonicenses 5:8, 9). Shinapish maipica ñucanchijllami chaita ruranata munanchij ninchijchari. Pero mana ñucanchijlla canchijchu. Muyundij Allpapimi achca huauqui panicunaca Diosta cꞌuyashcamanta paita tucui causaipi cazuncuna. Ñaupa punllacunapica Diosta sirvijcunaca huañuna cashpapish Diosta siempremi cazujcuna carca. Ñucanchijpish paicuna shina cashpaca Diosta cazujcunapurapimi cashun (Hebreos 11:36-38; 12:1). w19.02 pág. 7 párrs. 15, 16

Jesús huañushca yuyarina tandanacui punlla pasajpica cai tapuicunapi yuyashunchij: “¿Ima shinataj Jesús shina shujtajcunaman cꞌuyaita ricuchi tucuni? ¿Ñucallapi yuyanapaj randica huauqui panicuna imata minishtishcapichu yuyani? ¿Imapipish ama pandarichunchu shuyani?” Jesuspaj ejemplota catishpaca shujtajcunata llaquij cashcatami ricuchishun. Jesús huañushcata yuyarina tandanacuita ruranataca ñallami saquishun. Jatun llaqui punllacunapi ‘shamushpami’ Jesusca paipaj “agllashcacunataca” jahua pachaman pushanga. Chai punllamantami Jesús huañushcata yuyarina tandanacuitaca ña mana ashtahuan rurashun (1 Corintios 11:26; Mateo 24:31). Jesús huañushcata yuyarina tandanacuita ruranata saquishpapish alaja cashcatami yuyarishun. Cai tandanacuimi Jesús humilde cashcata, mana manchaj cashcata, gentecunata achcata cꞌuyaj cashcata ricuchishca. w19.01 pág. 25 párrs. 17-19

Ucu shunguta cuidanaca ñucanchij saludta cuidacushca shinami can. Por ejemplo, alli saludta charingapajca ejerciciota rurana, sano micunacunata micunami minishtirin. Chai shinallatajmi ucu shunguta cuidangapajca ñucanchij crishcacunata sinchiyachina canchij. Imata yachashcatapish causaipi pajtachishpami, shujtajcunamanpish Diosmanta huillana canchij (Romanos 10:8-10; Santiago 2:26, NM ). Huaquinpica ungushca cashpapish jahua ricuipica sano layami ricurishun. Chai shinallatajmi Diospajta ruranapi ocupado cajpica ñucanchij crishcacunaca sinchi laya ricuringa. Pero shungu ucupica mana alli munaicunami tiyai tucun (1 Corintios 10:12; Santiago 1:14, 15). Millai Diabloca paipaj yuyaicunatami ñucanchij shungupi churasha nin. w19.01 pág. 15 párrs. 4, 5

“¿Ñucapish samaritano runa shinallatajchu rurani? ¿Shujtajcuna llaquita apacujpi paicunata ayudangapajca imatataj rurai pudini?” nishpami tapurina canchij (Lucas 10:30-35). Por ejemplo: “¿Yuyajlla huauqui panicunata, viudacunata imata rurashpa ayudacunichu? ¿Paicunalla Diosta sirvij jovencunata ayudacunichu? ¿Shujtajcuna llaquilla cajpica animai tucunichu?” nishpa tapurishunchij (1 Tesalonicenses 5:14; Santiago 1:27). Shujtajcunata llaquij cashpaca paicunamantami imallatapish rurashun. Chaita rurashpaca Jehová Diospaj shungutami cushichishun. Jesuspish: “Imatapish cujmi, cushcata japijta yalli cushicun” nircami (Hebreos 13:16; Hechos 20:35). Rey Davidpish llaquijcunamantaca: “Paitaca Mandaj Diosmi huaquichinga. Paimi causaita cunga. Cai allpapipish cushichishcami canga” nircami (Salmo 41:1, 2). Shujtajcunata llaquij cajpica, Jehová Diospish ñucanchijtaca llaquingami. Chaimi huiñaita cushilla cashun (Santiago 2:13). w18.09 pág. 18 párrs. 11, 12

Pani Yoshiko doctorpajman rijpimi paitaca: “Ancha ungushcami cangui, asha quillacunallatami causangui” nirca. Chaita uyashpaca pani Yoshikoca cai punllapaj versopi nishcata yuyarirca. Cai versota yuyarishpami Yaya Dios paita ayudanata tucui shunguhuan crirca. Chaimi doctormanca: “Jehová Diosmi ñucahuan, paimi ñucataca ayudanga, imata mana manchanichu” nirca. Ñucanchijpish llaquicunahuan cashpaca cai versollapi nishcata yuyarishpami animari tucunchij. Judiocunaca Babilonia llajtapimi prezupi shina causacurcacuna. Paicunaman animota cungapajmi Jehová Diosca cai shimicunata nirca. Pero Diosca paita tucui sirvijcuna cai versota yuyarishpa animota japichunmi Bibliapi quillcachishca (Isaías 40:8; Romanos 15:4). Llaqui punllacunapimi causacunchij. Chaimantami Isaías nishca shimicuna ñucanchijta animachichun minishtinchij (2 Timoteo 3:1). w19.01 pág. 2 párrs. 1, 2

Cusa huarmica separarishpapish cazadocunami can. Separarishca cashpapish problemacunata chꞌimbapurashpami catingacuna. Pero apóstol Pabloca tandalla causashpa catichunmi cai consejota curca. Paica: ‘Mana crij cusaca crij huarmimantaca, jucha illajta rurashcami. Shinallataj mana crij huarmipish crij cusamantaca chashnallatajmi. Mana chashna cajpica, cancunapaj huahuacunaca mapacunami canman. Ashtahuanpish cunanca, paicunapish jucha illajcunami can’ nircami (1 Corintios 7:14). Diosta alli sirvijcunaca sinchi llaquicunata chꞌimbapurana cashpapish paicuna cazarashca mana testigo cusahuan o huarmihuan causashpa catinatami decidishcacuna. Chaimantami maijancunaca chai sacrificiocunata rurashcamanta cusa o huarmi Diosta sirvi callarijpica cushilla sintirishcacuna (1 Corintios 7:16; 1 Pedro 3:1, 2). Cunan punllacunaca muyundij Allpapi tiyaj congregacioncunapimi alli cusa huarmicuna tiyan. Ñucanchij congregacionpipish achca cusa huarmicunami caishuj chaishuj cꞌuyanacushpa, respetanacushpa cushilla causacuncuna. ¿Manachu shujtaj cusa huarmicunapish cashna shina causashpa matrimoniota valorai pudincuna? Ari (Hebreos 13:4). w18.12 pág. 14 párrs. 18, 19

Edén shimica “cushi” nisha ninmi. Chai lugarpica cushilla causai, achca micunami tiyarca. Gentecunapish animalcunapish tandalla, sumajtami causajcuna carca (Génesis 1:29-31). Huertataca griego rimaipica parádeisos o paraíso ninmi. Shuj libropica: “Griego shimita parlaj runa cai shimita uyashpaca shuj jatun alaja parque cashcata, chaipi ima peligro na tiyashcata, ashtahuanpish yuracunapi tucui laya frutacuna huiñacushcata, yacupish chuya cashcata, antílope nishca tarugacunapish, ovejacunapish qꞌuihua pambapi micucushcatami yuyarca” nircami (Cyclopaedia, de M’Clintock y Strong; Génesis 2:15, 16-ta ricui). Yayitu Diosca chashna shina sumaj paraisopimi Adán Evataca churarca. Pero paicuna mana cazushcamantami qꞌuipataca chaimanta llujshichishpa cacharca. Chaimi paicunapaj huahua huahuacunapish paraisopi causanataca pirdircacuna (Génesis 3:23, 24). Chai alaja lugarpica ña mana pi causarcachu. Ashtahuanpish yacu juillupimi chingarishca cashcanga. w18.12 págs. 3, 4 párrs. 3-5

Yaya mamacunaca huahuacuna honrados cachun, trabajadores cachun, shujtajcunamantapish preocuparichunmi alli consejocunata cun. Huahuacuna yaya mama yachachishcata cazushpaca ima decisioncunata agllashpapish mana llaquiringacunachu. Shinallataj problemacunamanta, preocupacioncunamantapishmi libraringacuna. Jehová Diosca alli yaya shinami paipaj huahuacuna cushilla causachun munan (Isaías 48:18). Chaimantami ima shina comportarinata yachangapaj, shujtajcunata ima shina tratanata yachangapajpish Bibliapi alli consejocunata cun. Diosca pai yuyashca shina yuyachun, pai munashca shina causachunpishmi mandan. Cashna shina causanaca mana sinchichu can. Ashtahuanpish imapipish alli yuyashpa alli decisioncunata agllangapajmi can (Salmo 92:5; Proverbios 2:1-5; Isaías 55:9). Ñucanchijllatajmi ima decisioncunatapish agllai tucunchij. Pero Diosca cushilla causachun nishpami alli decisioncunata agllachun ayudan (Salmo 1:2, 3). Chaimantami pai shina yuyanaca ñucanchijpajllataj alli cashcata ricunchij. w18.11 págs. 22, 23 párrs. 7, 8

Mana llullaj shimipi catingapajca shujtaj gentecuna jarcachunca mana saquinachu canchij. Diospaj Shimita yachai callarijpica mana Testigo familiacunahuan, amigocunahuanca mana tantochari tandanacurcanchij. Huaquincunaca ñucanchij crishcacunataca respetarcacunami, pero shujtajcunaca Diosta ama sirvichunmi jarcarcacuna. Trabajopi, escuelapi compañerocuna o ñucanchij familiacunachari huaquin fiestacunaman invitangacuna. Dios mana munashca fiestacunapi o costumbrecunapi ama participangapajca ¿imatataj rurana canchij? Dios imamanta chai fiestacunata mana munashcatami alli intindina canchij. Shinallataj ñucanchij publicacioncunapimi chai fiestacuna o costumbrecuna ima shina tiyai callarishcata repasana canchij. Imamanta chai fiestacunapi mana participana cashcata yuyarishpaca Dios munashca shina causacushcatami seguros cashun (Efesios 5:10, NM ). Jehová Diospi, paipaj Shimipi confiashpaca shujtajcuna imata ninamantaca mana manchashunchu (Proverbios 29:25). w18.11 pág. 12 párrs. 10, 12

Mana yuyashca cambiocuna ricurijpica, shamuj punllapi ima tucunata yuyashpachari manchaihuan cashun. Jacobpaj churi Josepish chashnami pasanman carca. Pero paica Jehová bendiciachunmi tucui pudishcata rurarca. Chaimantami prezupi cashpapish paita mandaj imata rurachun nishcataca tucuita pajtachirca. Potifarpaj trabajacushpapish chashnallatajmi tucuita alli pajtachirca (Génesis 39:21, 22). Ñucanchijpish José shinallatajmi huaquinpi llaquicunahuan cashpaca mana imata rurai pudishun. Pero pacienciata charijpi tucui ima pudishcata rurangapaj esforzarijpica, Jehová Diosca ñucanchijtapish bendiciangami (Salmo 37:5). Huaquinpica musparishca shinachari sintirinchij. Shinapish “mana llaquirishcalla canchijchu” (2 Corintios 4:8). Huillanapi ashtahuan ocupado cajpica Jehová Diosca ñucanchijta mana saquingachu. w18.10 págs. 24, 25 párrs. 11, 13

Shuj rijsishca y respetashca runahuan tupajpi can ima shuti cashcata, can pi cashcata mana yuyarijpica ¿ima shinataj sintiringuiman? Llaquillami sintiringuiman. ¿Imamanta? Ñucanchijca shujtajcuna rijsichunmi munanchij. Pero pi cashcata yachachunllaca mana shuyanchijchu. Ashtahuanpish ñucanchij ima shina cashcata, ñucanchij imata ruraj cashcamanta valorachunmi munanchij (Números 11:16; Job 31:6). Juchayujcuna cashcamantami huaquinpica shujtajcuna ñucanchijta importanteta laya ricuchun munanchijman. Cai mundopish chashna yuyaicunata charichunmi munan. Chaimantami ama chashna yuyangapaj cuidarina canchij. Importante cashcata sintishpaca Jehová Diosta jatunyachinata, paita adoranatami saquishun (Apocalipsis 4:11). w18.07 pág. 3 párrs. 1, 2

Diablopish paipaj demoniocunapish cai mundopi importante ricurij laya gentecunatami llullacunata nichun utilizancuna (1 Timoteo 4:1, 2). Panda religionta pushajcunami ashtahuantaj culpata charincuna. ¿Imamantataj chaita ninchij? Maijan paicunapaj llullacunata crishpa, Dios mana ricunayachishcacunata rurashpaca huiñai huiñaita causana oportunidadtami chingachi pudin (Oseas 4:9). Jesusca pai causashca punllacunapipish religionta pushajcuna gentecunata llullaj cashcatami yacharca. Chaimantami paicunataca: “Mandashcata quillcajcuna, fariseocuna, mishqui shimi jayaj shungucuna, ¡aij cancunalla! Shujllapish cancuna yachachishcata catichunmi, allpata, mama cuchata, maita rishpapish yachachinguichij. Cancunata ña catijpica, Gehenapi chingachishca canapaj [o huiñaipaj chingachishca canapaj] ishqui cutinhuan cancunata yalli millaicuna cachunmi yachachinguichij” nirca (Mateo 23:15, NM, nota). Jesusca chai panda religionta pushajcunataca: ‘Cancunapaj yayaca Diablomari. Paica callarimanta huañuchijmi’ nircami (Juan 8:44). w18.10 pág. 4 párrs. 5, 6

¿Imamantataj Jesusca cai shimicunata nishcanga? Paillatajmi: “Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish, chashnallatajmi llaquichircacuna” nirca (Mateo 5:12). Apostolcunata macashpa alli huillaicunata ña ama huillachun nishpa mandajpica cushillami “mandajcunapuralla tandanacushcacunapaj” ñaupajmanta rircacuna. Paicunaca mana macashcamanta cushilla rircacunachu. Ashtahuanpish “Jesucristomanta llaquita apajcunatajmi cashcanchij nishpami cushicushpa llujshircacuna” (Hechos 5:41). Cunan punllacunapish Jesusta catijcuna cashcamanta catirashpa llaquichijpi o sinchi problemacunata chꞌimbapuracushpaca cushillami ahuantanchij (Santiago 1:2-4). Llaquicunata charinataca mana munanchijchu. Pero Jehová Diosmanta mana caruyajpica ima llaquicunatapish mana manchashpa chꞌimbapurachunmi paillataj ayudanga. “Cushi Diospaj” ñaupajpi alli cashpami paita sirvishcamanta llaquichijpipish familiacuna jarcasha nijpipish cushilla canchij (1 Timoteo 1:11, NM ). w18.09 págs. 19, 20 párrs. 18-20

Cai llaqui punllacunapi causacushcamantami achca gentecunaca ‘llaquilla, cꞌuyaillata causancuna’. Chaimantami ña mana causashpa catinata munancuna (2 Timoteo 3:1-5). Cada huatami 800.000 yalli gentecuna paicunallataj huañurincuna. Casi cada shuj minutomi shuj persona huañun. Maijan huauqui panicunapishmi chashna llaquilla sintirishcamanta paicunallataj huañurishcacuna. Cunan punllacunapica achca huauqui panicunami llaquicunahuan chꞌimbapuracuncuna. Chaimantami paicunataca cꞌuyachun llaquichun minishtincuna. Huaquincunataca paicunapaj crishcacunamantami llaquichincuna o burlarincuna. Shujtajcunataca trabajopi compañerocunami paicunamanta mana allita nincuna. O achca horascunata trabajana cashcamanta o sinchi trabajocunata rurana cashcamantachari yallitaj shaicushca sintirincuna. Cutin maijancunaca familia ucupimi sinchi problemacunata charincuna. Paicunapaj mana crij cusa o huarmimi yangata rimancuna. Cai laya llaquicunata charishcamantami cai huauqui panicunaca shaicushca, imapaj mana valij laya sintirincuna. w18.09 pág. 9 párrs. 3, 5

Yaya mamacunapish ¿ima shinataj Dioshuan trabajacushcata ricuchi tucuncuna? Paicunapaj huahuacunata Diosta ashtahuan sirvichun animashpa. Achca yaya mamacunaca caitami rurashcacuna. Huahuacuna huiñarishpaca Diosta ashtahuan sirvingapajmi caru ladocunata rishcacuna. Huaquincunaca misionero shinami sirvincuna. Shujtajcunaca mana tanto huillajcuna tiyan lugarcunapimi precursor shina sirvincuna. Cutin maijancunaca Betelpimi sirvincuna. Paicuna carupi sirvicushcamantami familiacunapish mana tanto visitai pudincuna. Pero yaya mamacunaca paicunapaj huahuacuna Diosta sirvinata puntapi churashcata ricushpami cushilla cancuna. Chaimantami paicunapaj huahuacuna maipi cajpipish Diosta ashtahuan sirvishpa catichun animancuna. Ñaupa tiempopi Diosta sirvij Ana huarmica ñuca churi Samueltaca Diosmanmi cuni nircami. Achca yaya mamacunapish Ana shinallatajmi sintirincuna. Pero Dioshuan chashna trabajanaca sumaj cashcatami ricushcacuna (1 Samuel 1:28). w18.08 pág. 22 párr. 4

Jesusca cashna nishpaca charijcuna mana yaicuna cashcataca mana nicurcachu. Ashtahuanpish paica: “Huajchacunaca, cushichishcami canguichij. Taita Dios mandagrinca cancunapajmi” can nircami (Lucas 6:20). Chashna nishpapish tucui pobrecuna paita uyashpa bendicioncunata chasquinataca mana nicurcachu. Achca pobre gentecunaca mana Jesusta catijcuna tucurcachu. Chaimantami shuj persona mashnata charishcallamanta Diospaj amigo cai tucunmi nishpaca mana yuyana canchij. Diospaj pueblo ucupica charij y huajcha huauqui panicunami tiyan. Pero tucui paicunami Diosta cꞌuyashpa tucui shunguhuan sirvincuna. Charijcunamanta parlashpaca Bibliaca chingarijlla charinacunapica ama shunguta churaichijchu. Ashtahuanpish Taita Diospi shunguta churaichij ninmi (1 Timoteo 6:17-19). Shinallataj charij o huajcha cajpipish achca cullquita charinata munashpaca llaquicunatami charinga ninmi (1 Timoteo 6:9, 10). Yaya Dios shina huauqui panicunata ricushpaca paicuna charij o huajcha cashcallamantaca mana juzgashunchu. w18.08 págs. 12, 13 párrs. 11, 12

Diostaca paipaj pueblopi cachun saquishcamantami tucui shunguhuan agradicisha ninchij. Paiman mingarinami tucuimanta yalli alli decisión cashca. Millai cosascunataca manataj rurasha ninchijchu. Cutin ñucanchij huauqui panicunataca Diospajlla cashcamantami cꞌuyashcata, respetashca ricuchinchij (Romanos 12:10). Bibliapica: “Mandaj Diosca, paipaj cajcunataca manataj shitangachu” ninmi (Salmo 94:14). Ñucanchij ima tucujpipish Diosca manataj saquingachu. Huañujpipish manataj cungaringachu (Romanos 8:38, 39). “Causacushpapish, huañushpapish Jehová Diospajmi canchij” (Romanos 14:8, NM ). Yaya Dios paipaj huañushca alli amigocunata cutin causachichunmi shuyacunchij (Mateo 22:32). Shinapish cunan punllacunapimi ña sumaj bendicioncunata chasquishcanchij. Bibliapica: “Mandaj Diosmi ñucanchij Diosca nij llajtaca cushichishcami. Mandaj Diosca paicunataca paipajlla cachunmi chꞌicanchirca” ninmi (Salmo 33:12). w18.07 pág. 26 párrs. 18, 19

Maijan gentecunaca ‘ñucallatajmi imata estudianata, imapi trabajanata decidina cani, pipish imata mana ninachu can’ nincunami. Pero, huaquin decisioncunata ñucanchijllataj agllai tucushpapish mana ñucanchij tucui munashcallata rurai tucunchijchu. Shinallataj, ñucanchij ima decisioncunata japijpi qꞌuipa ima tucunataca mana yachanchijchu. Chaitaca yuyarinami canchij. Chaimantami apóstol Pabloca cai punllapaj versopi nishca shimicunata nirca. Cai versoca ima decisionta agllagricushpapish mana ñucanchij munaicunallapi yuyana cashcatami yachachin. w18.04 pág. 12 párr. 10

Maijan huauqui o panica Diostami alli adoracuni nishpapish mana alli cosascunatami ruracui pudin (Judas 11). Chai huauqui o panica achca horascunatachari huillan, shinallataj tucui tandanacuicunamanchari rin. Shinapish huainayanallapi, achca cosascunata charinallapichari yuyacun. Shinallataj shuj huauqui o panitachari pꞌiñan (1 Juan 2:15-17; 3:15). Chai yuyaicunaca juchapimi urmachi tucun. Shujtajcuna ñucanchij munaicunata, ruraicunata mana yachajpipish Diosca tucuitami yachan. De verdad paipaj lado cashcata o mana cashcatapish Diosca allimi yachan (Jeremías 17:9, 10). Imapi pandarishpa, paimanta caruyacujta ricushpaca Diosca mana chai rato ñucanchijta saquinchu. Ashtahuanpish paica: “Ñucapajman tigramuichij” ninmi. Jehová Diosca ñucanchijcuna imapi jahualla urmai tucushcataca allimi yachan. Pero paica millai cosascunata pꞌiñachunmi munan (Isaías 55:7). Chaita rurajpica mapa munaicunata mishachunmi Diosca fuerzata cunga (Génesis 4:7). w18.07 pág. 16 párrs. 5, 6