Mayo

Último huatacunapica achca gentecunaca guerramanta, pobrezamantami paicunapaj llajtata saquishpa shujtaj llajtacunaman rishcacuna. Chai gentecuna Diosta rijsichunca paicuna rimashca shimipimi saludanata yachana canchij. Parlanacungapajpish huaquin palabracunatami yachana canchij. Ashtahuancarin paicunapaj shimipimi videocunata, publicacioncunata jw.org® paginapi ricuchi tucunchij. Jehová Diosca Jesús shina causashunchij huillashunchij nishca tandanacuiman richunmi munan. Chaipimi huillangapajpish estudiota cungapajpish alli yuyaicunata yachanchij. Yaya mamacuna, huahuacuna paicunapaj yuyaimanta comentariota cuchunmi yachachina canguichij. Huahuacuna jahualla shimicunahuan, shungumanta comentashcata uyashpami huaquin gentecunaca Diosta sirvinata munashcacuna (1 Corintios 14:25). w18.06 págs. 22, 23 párrs. 7-9

Yaya Diosta manaraj rijsishpaca paimanta carupimi carcanchij. Chaitaca mana cungarinachu canchij (Efesios 2:12). Pero Diosmi ñucanchijtaca ‘huascahuan huataj shina cꞌuyaihuan paipajman pushamurca’ (Oseas 11:4; Juan 6:44). Jesuspish ñucanchijtaca cushicuihuanmi chasquirca. Paimantami Diospaj familia ucupi cana oportunidadta charinchij. Juchayujcuna cajpipish Jesús ñucanchijta chasquishcata yachashpaca ¿manachu ñucanchijpish shujtajcunata alli chasquina canchij? Diospaj jatun punlla quichquiyamujpica gentecunaca shujtajcunamanta yalli cashcatami ashtahuan yuyangacuna. Shinallataj pꞌiñanacushpalla causashcamantami ashtahuan chꞌicanyaringacuna (Gálatas 5:19-21; 2 Timoteo 3:13). Pero ñucanchijca Dios cushca yachaitami mashcanchij. Cai yachaita charishpami tucuicunata sumajta tratashun (Santiago 3:17, 18). Shinallataj shujtaj llajtamanta gentecunata rijsishpa, paicunapaj costumbrecunata yachashpaca cushillami sintirinchij. Maipicarin paicunapaj rimaitapishmi yachanchij. Chashnami ‘jatun yacu shina’ sumajta causashun. ‘Mama cucha yacu caiman chaiman ricuj shina’ alli causashun (Isaías 48:17, 18). w18.06 pág. 14 párrs. 18, 19

Romano soldadocunaca zapatocunata mana churashca cashpaca macanacunapaj mana listo cashcatami ricuchijcuna carca. Chai zapatocunaca cuero materialhuanmi shuj sandaliata shina rurashca carca. Chashna rurashca cashcamantami chai zapatocunaca mana rato dañarij carca. Purinapajpish jahuallami carca. Chai soldadocuna shinami Diosta sirvijcunapish cai zapatocunata churarishca laya cushichij huillaita huillanaman rinchij (Isaías 52:7; Romanos 10:15). Chashna churarishca cashpapish gentecunaman mana manchashpa huillangapajmi esforzarina canchij. 20 huatacunata charij Robertoca: “Escuelapica ñuca amigocunaman huillanataca achcatami mancharcani. Pingaisiqui cashcamantachari chashna sintirircani. Pero cunanca ñuca edadta charij jovencunaman Diosmanta huillanataca achcatami munani” ninmi. Achca jovencunami alli prepararishpaca Diosmanta tranquilo huillai tucushcacuna. w18.05 págs. 23, 24 párrs. 9-11

Jesusca paita catijcunataca: “Cancunamanca ñuca sumaj causaitami cuni” nirca (Juan 14:27). Jesús nishca shimicunaca ¿ima shinataj ñucanchijtapish ayudan? Ima llaquicuna ricurijpipish Diosmanta huillanata mana saquishpaca Diospaj ñaupajpi, Jesuspaj ñaupajpipish allimi ricurishun. Chaita yachashcamantami tranquilo sintirinchij (Salmo 149:4; Romanos 5:3, 4; Colosenses 3:15). Jesusca paipaj apostolcunamanca ñuca shinami cushilla cana canguichij, cꞌuyaitapish ricuchishpami catina canguichij nircami (Juan 15:11-13). Chai qꞌuipaca: “Ñucahuan alli apanacujcunami canguichij” nircami. ¿Manachu Jesushuan apanacunaca sumaj can? Ari. Pero, ¿apostolcunaca Jesushuan apanacushpa catingapajca imatataj rurana carca? Jesusca: ‘Granota cancunapi pꞌucuchishpa catichij’ nircami (Juan 15:14-16). Chashna nishpaca Diosmanta huillanamantami parlacurca. Jesusca paipaj apostolcunamanca ishqui huatacuna huashamanca: “Jahua pachamanta mandanamari ña mandagrin” nishpa huillaichij nircami (Mateo 10:7). Chaimantami Jesusca pai huañuna tutaca llaquicuna shamujpipish ahuantashpa catinguichij, huillashpa catinguichij nishpa achcata animarca (Mateo 24:13; Marcos 3:14). w18.05 pág. 13 párrs. 15, 16

Jovencuna Diosta ashtahuan sirvingapaj metacunata churarichij. Shujtaj jovencunaca paicunapaj munashcallata rurashpa cushicunallapimi yuyancuna. Cantapish chaillatataj rurachunmi invitangacuna. Chashna inquitajpica caita yuyari: Cada cualmi ñucanchij causaihuan imata ruranata agllana canchij. Chaimanta, cambaj metacunata pajtachingapaj shujtajcuna jarcachunca ama saquinguichu. Shujtaj jovencuna mana allita rurachun cutin cutin nijpica ¿imatataj rurai tucungui? Chai jovencunahuanca mana tandanacunachu cangui (Proverbios 22:3). Chashnallataj mana alli cosascunata rurashpaca llaquicunapi urmana cashcatami yuyarina cangui. Shujtajcunapaj consejocunatapish minishtishcatami yuyarina cangui. Humilde cashpaca yaya mamacuna, experienciata charij huauqui panicuna consejota cujpica cushillami chasquingui (1 Pedro 5:5, 6). ¿Shujtajcuna canman consejota cujpica cazushpa humilde cashcata ricuchinguichu? w18.04 pág. 31 párrs. 14-16

Jesusca Asia Menor llajtapi caj huaquin congregacioncunamantami parlarca. Chai congregacioncunapi caj huauqui panicunaca Diosta alli sirvijcunami carca. Chaimantami Jesusca paicunata pagui nishcata ricuchirca. Por ejemplo, Tiatira llajtapi caj congregacionmanta parlashpaca: “Ñucaca can imallata rurashcatapish, cꞌuyaj cashcatapish, crijtaj cashcatapish, allita ruraj cashcatapish, mana pꞌiñarij alli shungu cashcatapish yachanimi. Shinallataj can ruracushcacunaca callaritapish yalli ashtahuan alli cashcatapish yachanimi” nircami (Apocalipsis 2:19). Jesusca paicuna Diosta ashtahuan sirvicushcallataca mana parlarcachu. Ashtahuanpish cꞌuyaj, allita ruraj, sinchi crij cashcamantami felicitarca. Shinapish Tiatira llajtapi caj maijan huauqui panicunata cunana cajpica cunarcami. Chashna jahuapish sumaj shimicunahuanmi paicunata animarca (Apocalipsis 2:27, 28). Jesusca congregacioncunata alli pushaj cashcamantami pagui ninata mana minishtin. Shinapish paipaj ruraicunahuanmi agradicishcata ricuchin. Ancianocunaca pai shinami rurana canguichij. w19.02 pág. 16 párr. 10

Primer siglopica Jehová Diosca Jesusta catijcunata, congregacioncunata pushajcunatapish animangapajmi cuerpo gobernantepi sirvij huauquicunata utilizarca. Samariapi Jesusta mushuj catijcunaca Diospaj espirituta manaraj chasquishcacunachu carca. Chaimantami Diospaj espirituta chasquichun, paicunamanta Diosta mañachun Pedrotapish Juantapish cacharcacuna (Hechos 8:5, 14-17). Cuerpo gobernantepi sirvij huauquicuna ima shina apoyajta ricushpaca Felipepish, Samariapi Jesusta mushuj catijcunapish achca animarishcami sintirishcacuna canga. Cunan punllacunapica testigo de Jehovacunapaj Cuerpo Gobernantepi sirvij huauquicunaca Betelpi sirvijcunata, construccionpi trabajaj huauqui panicunata, misionerocunata, chashna laya sirvijcunata, muyundij Allpapi tucui huauqui panicunatapishmi animota cushpa ayudancuna. Primer siglopi shinallatajmi animota chasquishpaca cushilla sintirinchij. Jehová Diosca paimanta caruyashcacunapish paipajman tigrachunmi munan. Chaimantami Cuerpo Gobernantepi sirvij huauquicunaca Jehová Diospajman tigrachun paicunata animangapaj 2015 huatapica Jehová desea que vuelva nishca folletota llujchircacuna. w18.04 pág. 20 párrs. 18-20

Achca gentecunaca “mana tanto leycuna tiyajpica mana huatashca shina canchijmanchu. Ashtahuanpish allimi causanchijman” nincunami. Pero, ¿leycuna mana tiyajpi, ñucanchij ima munashcatapish rurashpaca manachu llaquicunapi urmanchijman? The World Book Encyclopedia nishca libropica: “Leycunaca gentecunapaj derechocunatami difindina can. Pero chai leycunallatajmi gentecuna tucui paicuna munashcata rurachun mana saquina can. Chaimantami gobiernocunapajca leycunata churanaca sinchi can” ninmi. Yuyashun. Gobiernocunaca achca leycunatami churashcacuna. Leycuna ima nishcata yachangapaj, ima shina pajtachinata yachangapajpish achca abogadocuna, juezcuna tiyachunmi minishtirin. Cunan punllapaj tiyaj consejota pajtachingapajca cai ishqui yuyaicunatami rurana canchij: 1) Jesús yachachishcacunatami chasquina canchij. 2) Jesusta catijmi tucuna canchij. Chaicunata rurashpaca huatashca shinamanta cacharichishcami cashun. Jesusca caitapishmi nirca: ‘Pipish juchata rurana yuyailla causajca, huatashca shinami juchapi causan. Shinapish Taita Diospaj Churi cacharichijpica ña cacharichishcatajmi canguichij’ nircami (Juan 8:34, 36). w18.04 págs. 7, 8 párrs. 13, 14

Huaquincunaca ñucanchij ima shina sintirishcata ricushpami sustarincuna. Chaimantami ñucanchij imata yuyashcata intindinata munancuna. Shinallataj ñucanchij imata manaraj mañajpimi paicunaca ayudangapaj listo can. Chashnami paicunaca “llaquilla cajcunahuanpish llaquirij” cashcata ricuchincuna. Chashna gentecunahuanca cushillami sintirinchij. Paicunataca ashtahuanmi cꞌuyanchij. Diosta sirvijcunaca shujtajcunata llaquinatami munanchij. Pero huaquinpica chaita ruranaca sinchimi can. ¿Imamanta? Huaquin jarcaicuna tiyashcamanta. Por ejemplo, juchayujcuna cashcamantami ñucanchijllapi yuyanata yachanchij. Chaimantami shujtajcunapi yuyangapaj achca esfuerzota rurana canchij (Romanos 3:23). Cutin shujtajcunapajca uchillapi ima shina huiñashcamanta, causaipi ima experienciata charishcamantami shujtajcunapi yuyanaca sinchi can. Ashtahuancarin cai tucuri punllacunapi la mayoría gentecunaca paicunallapimi yuyancuna. Chaimi ñucanchijpish paicuna shina cai tucunchij (2 Timoteo 3:1, 2). Pero shujtajcunata llaquingapajca Jehová Dios shina Jesús shinami cana canchij. w19.03 pág. 14 párrs. 1-3

Diosca chunga mandamientopica “shujtajpajta ama munangui” nircami (Deuteronomio 5:21; Romanos 7:7). Chashna nishpaca Jehová Diosca ¿imatataj yachachisha nirca? Paica mana alli yuyaicuna millaita ruranaman apaj cashcataca allimi yacharca. Chaimantami israelitacunataca paicunapaj yuyaicunata, paicunapaj shunguta cuidachun Rey Davidca chaitami rurarca. Paica alli shunguta charishpapish cazada huarmitami munarca. Chaimantami chai huarmihuan huainayarca (Santiago 1:14, 15). Chaita rurashca huashapish chai huarmipaj cusatami umasha nirca. Qꞌuipaca huañuchircapishmi (2 Samuel 11:2-4; 12:7-11). Jehová Diosca ñucanchij shungupi ima yuyaicunata, ima munaicunata charishcataca allimi yachan (1 Samuel 16:7). Chaimantami paipaj ñaupajpica ni imata mana pacai tucunchij. Pero paica ñucanchijpica allitami ricunata munan. Chaimantami alli shungucuna cachun ayudan. Chashna jahuapish ñucanchij shungupi ima mana alli munaicuna tiyashcata o mana tiyashcata ricuchunmi Diosca munan. Tiyajpica millai cosascunapi ama urmangapajmi jarcarichun nin (2 Crónicas 16:9; Mateo 5:27-30). w19.02 pág. 22 párrs. 9, 11

Bibliapica: “Moisesca tucui cai pachapi causaj cꞌaricunamantaca, paillami yalli alli shungu” o manso shungu carca ninmi (Números 12:3). Chashna nishpaca ¿imatapish manchaj, mana sinchi runa cashcatachu nicun? Huaquin gentecunaca manso shungucunaca chashnami can nincunami. Pero mana ciertochu can. Moisesca imatapish mana manchaj, sinchi runami carca. Dios ayudajpimi paica Egipto llajtata mandajpaj ñaupajpi shayarishpa parlai tucurca. Chai qꞌuipaca casi 3 millón gentecunatami shitashca pambata pusharca. Shinallataj Moisesca contracunata israelitacuna mishachunmi ayudarca. Moisés charishca problemacunataca mana charinchijchu. Shinapish tucui punllacunami imatapish ruracushpa, o pihuanpish cashpa manso shungu canaca sinchi ricurin. Pero ¿imamantataj manso shungu cana canchij? Jehová Diosca: “Alli shungucunami, Dios cusha nishca allpataca japingacuna” ninmi (Salmo 37:11). Chaimanta, ¿ñucaca manso shunguchu cani? ¿Shujtajcunaca ñuca manso shungu cashcatachu ricun? nishpa tapurishunchij. w19.02 pág. 8 párr. 1, 2

Ñucanchijca shuj concienciatami charinchij. Por ejemplo, Adán Evaca Dios mandashcacunata mana cazushca huashami pacatucunaman rircacuna. Paicunapaj conciencia mana alli sintichishcamantami chaita rurarcacuna. ¿Concienciaca imataj can? Shungu ucupi ima alli cashcata, ima mana alli cashcata sintichijmi can. Ñucanchij concienciaca barcopaj volante shinami can. Barcopaj volante alli ajustashca cajpica barcota pushajca jahuallami maiman chayana cajpica alli chayanga. Pero, ¿mana alli ajustashca cajpica? Yacu jatarishpaca jahuallami chai barcotaca shujtaj ladoman apanman. Barcopaj volante shina ñucanchij conciencia alli cajpica alli decisioncunatami agllashun. Cutin conciencia mana alli cajpica mana alli cosascunatami rurashun. Ñucanchij conciencia mana alli cajpica mana alli cosascunata ruranamantaca mana jarcarishunchu. Ashtahuancarin ‘mana allitaca alli cashcata’ layami ricushun (1 Timoteo 4:1, 2). w18.06 pág. 15 párrs. 1-3

Huaquinpica cai mundoca ñucanchij mana yuyashcapimi pandachisha nin. Por ejemplo, maijan noticiacunapica politicata apoyachun nishpami imatapish nincuna. Shujtajcunaca shuj persona paipaj causaipi ima carrerata pajtachishcatami parlancuna. Cutin peliculacunapi o librocunapica familiapaj causai o ñucanchijpaj causaimi ashtahuan importante can nishpami yachachincuna. Pero cai yuyaicunaca mana Dios yachachishca shinachu can. Bibliapica tucuimanta yalli Diosta cꞌuyashpami ñucanchijpish, familiacunapish cushilla causashun ninmi (Mateo 22:36-39). Chaihuanca sano diversioncunapi participana mana alli cashcataca mana nicunchu. Chashna jahuapish ¿huaquin ruraicuna cai mundopaj yuyaicunata charishcataca jahuallachu cuentata cuni? ¿Ñuca huahuacuna, ñucapish imata ricunamanta o imata liyinamanta cuidaricunchijchu? ¿Ñuca huahuacuna cai mundo shina ama yuyachunca Jehovapaj yuyaicunatachu yachachicuni? nishpami tapurina cangui. w18.11 pág. 26 párrs. 18, 19

Jehová Diosca cꞌuyaj cashcamantami tucuipi ñucanchijta ayudan. Chaimantami: “Ñuca ñahuipica canca munananquimi cangui. Ñuca cꞌuyashcami cangui. Alli nishcami cangui” nin (Isaías 43:4). Yaya Dios ñucanchijta cꞌuyashpa catichunca pipish mana jarcai tucungachu. Paica ñucanchijtaca manataj saquingachu (Isaías 54:10). Jehová Diosca tucui ñucanchij llaquicunata anchuchinataca mana ninchu. Pero llaquicunahuan yacupi pambarishpa aguaricuj shina o ninapi rupacuj shina catichunca mana saquingachu. Diosca llaquicunata ahuantachunmi ñucanchijta ayudasha nin. Huañuna cajpipish paimanta amataj caruyachunmi fuerzata cushpa ayudanga (Isaías 41:13; 43:2). Dios ñucanchijcunahuan canata crishpaca llaquicunata ahuantangapajmi fuerza, animota charishun. w19.01 pág. 3 párrs. 4-6

Canca jovenchari cangui. Chaimantachari profesorcuna o shujtaj gentecunaca achca cullquita ganangapajca, shuj carreratami japina cangui ninchari. Yayitu Diospish causaipi ima minishtirishcallata charichunca colegiopi alli estudiante cachunmi munan (Colosenses 3:23, NM ). Pero paica causaipi ima ashtahuan importante cashcata agllana horasca paipaj Shimipi ricushpami agllachun munan. Chaita rurashpami cai tucuri punllacunapi Dios imata munashcata yachangui (Mateo 24:14). Jehová Diosca millai gentecunahuan ñalla ima tucuna cashcata, chaipaj ashalla tiempo illashcataca allimi yachan (Isaías 46:10; Mateo 24:3, 36). Diosca cantapish allimi rijsin. Paica imalla cosascuna cushilla causaita cuj cashcata, shinallataj imalla llaquilla causaita cuj cashcataca allimi yachan. Chaimantami gentecunapaj consejocuna alli shina ricurijpipish Biblia yachachishca shina mana aconsejajpica mana alli consejocuna can. w18.12 pág. 15 párrs. 1, 2

Davidca “alli shungucunami, Dios cusha nishca allpataca japingacuna. Yallitaj sumaj causaipimi cushicungacuna”. Shinallataj ‘cashcata rurajcunallami Dios cusha nishca [“Allpataca”, NM ] japingacuna. Tucui causaipimi chaipi causangacuna’ nircami (Salmo 37:11, 29; 2 Samuel 23:2). Diospaj munaita rurasha nijcuna caita yachaj chayashpaca ¿imatashi rurarcacuna? Cai Allpa Edén huerta shina shuj sumaj paraíso tucunata, chaipi alli shungu gentecuna causanatami shuyarcacuna. Tiempohuanca achca israelitacunaca Diosta adoranchij nishpapish mana cazurcacunachu. Chaimantami Babiloniocuna paicunapaj llajtata tucuita chingachichun, achcacunatapish shujtaj ladoman prezu shina apachun Diosca saquirca (2 Crónicas 36:15-21; Jeremías 4:22-27). Pero Diospaj profetacunaca 70 huatacuna qꞌuipa israelitacuna cutin paicunapaj llajtaman tigranatami huillarcacuna. Chai profeciacunaca pajtarircami. Pero caica ñucanchijhuanca ¿imatataj ricunata charin? Shamuj punllapimi shuj paraíso cai Allpapi tiyanga. w18.12 págs. 4, 5 párrs. 9, 10

Cai mundopi caj gentecunapaj consejocunaca mana Dios yuyashca shinachu can. Chashna cajpipish mundopaj consejocunaca Bibliapi tiyaj consejocunatapish ashtahuan alli ricurij layami can. Jesusca: “Alli yuyaita charishcataca ruraicunahuanmi ricuchi tucunchij” nircami (Mateo 11:19, NM ). Cai mundoca achca tecnologiatami llujchishca. Pero cushilla causangapaj jatun problemacunataca mana tucuchi pudishcachu. Por ejemplo, guerracuna, shuhuacuna, huañuchijcunapish tiyashpami catin. Huaquincunapish ñucanchij razami ashtahuan yalli can nishpami catincuna. Shinallataj huainayanatapish alli cashcata shinami ricuncuna. Achca gentecunaca cai ruraicunamantami familia ucupica ashtahuan problemacuna, ungüicuna, shujtaj problemacunapish tiyan nincunami. Pero Jehová Diosta sirvijcunaca pai yuyashca shina yuyashcamantaca familiahuanpish cushillami causancuna. Huainayanapi mana urmashcamantami ungüicunamantapish librarincuna. Tucui ladopi tiyaj huauqui panicunahuanpish allimi apanacuncuna (Isaías 2:4; Hechos 10:34, 35; 1 Corintios 6:9-11). Caica ¿manachu Diospaj yuyaicuna cai mundopaj yuyaicunatapish ashtahuan yalli cashcata ricuchin? w18.11 pág. 23 párrs. 8-10

Ñucanchijca familiacunahuan alli apanacungapaj, alli tratangapajmi esforzarinchij. Pero paicunata cushichina raiculla Dios mandashcacunata huashaman saquinamantami cuidarina canchij. Shinashpaca Diosta cꞌuyajcunallahuanmi amigos cana canchij. Dios yachachishcacunata pajtachijcunaca tucuipimi chuya cana canchij (Isaías 35:8; 1 Pedro 1:14-16). Bibliamanta yachai callarishpaca tucuicunami ñucanchij causaipi cambiocunata rurarcanchij. Huaquincunaca tucuipimi cambiana carcacuna. Ñucanchij limpio causaita cai mundopaj mapa ruraicunahuan ama cambiangapajmi cuidarina canchij. Tentacioncunapi ama urmangapajca ¿imatataj rurana canchij? Yayitu Diosca paipaj Churita cushpami ñucanchij causaitaca chuyayachirca. Dios chaita rurashcataca mana cungarinachu canchij (1 Pedro 1:18, 19). Jesús paipaj causaita cushcata ñucanchij shungupi yuyaihuan cashpaca Diospaj ñaupajpimi chuya ricurishun. w18.11 pág. 12 párrs. 10, 11

Tiempo completopi Diosta sirvij achca huauqui panicunaca, cambiocuna tiyajpipish huillanapi ocupado canami cushilla sintirichun, ñaupajman catichun ayudashca nincunami. Ñucanchijcunapish ima pudirishcata rurashpa, Jehová Diospi confiashpaca shungu ucupimi tranquilo sintirishun. Shinallataj cambiocuna tiyajpi amañaringapaj esforzarishpaca espiritualmente sinchi tucushcatami cuentata cushun. Ñucanchij mana pensashcapimi cambiocunaca japi tucun. Shuj mushuj asignacionta chasquishpa, ungüi japijpi, familia ucupi cambiocuna tiyajpica Jehová Dios minishtirishca horaspi ayudanatami seguros cai tucunchij (Hebreos 4:16; 1 Pedro 5:6, 7). Pero chaicamaca tucui ima pudishcatami rurana canchij. Yaya Diosta mañashpa ashtahuan paipajman cꞌuchuyashunchij, pai ñucanchijta cuidachun saquishunchij. Shina rurashpami cambiocuna tiyajpipish shungu ucupi tranquilo sintirishun. w18.10 págs. 26, 27 párrs. 17, 19, 22

Bibliapica Diosca paita sirvijcunamanta achcata preocuparij cashcatami parlan. Por ejemplo, Jehová Dios sumo sacerdote Elita, paipaj familiatapish llaquichigrishcata huillanaman richun ima shina joven Samuelta ayudashcatami yuyashun (1 Samuel 3:1-18). Moisesman cushca leypica Diosca huahuacunaca mayorllacunataca respetanami can nishpami mandarca. Ashtahuantajca “llajtata mandajta” o pushajcunatami respetana can nircami (Éxodo 22:28; Levítico 19:32). Chaimanta, cayandij tutamanta Elita, Elipaj familiatapish Dios llaquichigrishcata huillanaca ¿Samuelpajca jahuallachu cashcanga? Mana jahuallachu cashcanga. Ashtahuanpish Bibliapica, “Samuelca muscuipi shina ricushcata, uyashcataca Eliman parlanataca mancharcami” ninmi. Pero Jehová Diosca pai Samuelta cayacushcatami Elimanca intindichirca. Chaimantami Elica Samueltaca ama pacashpa tucuita huillangui nirca. Samuelca chaita cazushpami “imata mana pacashpa tucuita” huillarca. Paica shuj runa ñaupaman huillashca shinallatajmi huillarca (1 Samuel 2:27-36). Samuelhuan Elihuan ima tucushcata ricushpami Jehová Dios yachaisapa, shujtajcunamanta preocuparij cashcata yachanchij. w18.09 págs. 21, 22 párrs. 2, 4, 5

Cunan punllacunapi llullata ninaca gentecunapajca normalmi can. Shuj revistapica “Por qué mentimos” (Imamantataj llullanchij) nishca temami llujshirca. Chai temapica: ‘Gentecunaca llullana costumbretaca shungu ucupimi charincuna’ ninmi. Gentecunaca pandarishcacunata o millaita rurashcacunata pacangapaj, alli puestocunata charingapaj, ashtahuan cullquita charingapaj o ima allita charingapajmi llullancuna. Shinallataj chai temapica: “Gentecunaca mana rijsishcacunaman, amigocunaman, familiacunamanpish jahuallami llullancuna” ninmi. ¿Gentecuna llullata nijpica imataj tucunga? Llullajpica shujtajcunaca ña mana confianzata charingacunachu. Apanacunatapishmi saquingacuna o separaringacuna. David Jehová Diosta mañacushpaca: “Quiquinca mana llullatami yallitaj cꞌuyangui” nircami (Salmo 51:6). Paica shungupi mana llullana munaita charina importante cashcatami yacharca. Diosta alli sirvijcunaca tucui ñucanchij causaipimi caishuj chaishuj imatapish verdadta ninacunchij (Zacarías 8:16). w18.10 págs. 4, 5, 8 párrs. 4, 9, 10, 19

Jesús manaraj huacharijpi huata 1513-pimi israelitacunaca Egipto llajtamanta llujshircacuna. Tucuica 3 millones yalli runacunami cashcanga. Paicunapurapica huahuacuna, yuyajcunami carca. Shinallataj ungushcacuna, mancocuna, ciegocuna, paraliticocunapishmi cashcanga. Chai tucuicunata pushangapajca paicuna ima shina sintirishcata intindij, llaquij canami minishtirirca. Jehová Diosca Moisesta pushaj cachun churashpami pai chashna cashcata ricuchirca. Chaimantami mana rijsishca lugarcunaman llujshigrishpaca israelitacunaca tranquilo sintirishcangacuna (Salmo 78:52). ¿Israelitacunata cuidacushcata ricuchingapajca Jehová Diosca imatataj rurarca? Paica Egiptomantaca soldadocunata shinami mirga mirgapi llujshichirca (Éxodo 13:18). Chashna grupopi organizados llujchijpimi Yaya Dios imata ruranata yachashcata seguros carcacuna. Shinallataj Jehová Diosca “punllaca pꞌuyuhuan”, “tutaca ninahuan” pushashpami paicunahuan cashcata ricuchirca (Salmo 78:14). Chaita rurashpaca: “Cancunata cuidangapaj, pushangapajca caipimi cani. Ama manchaichijchu” nicushca layami carca. w18.09 pág. 24 párrs. 11, 12

Ñaupa tiempopi Diosta alli sirvijcunapish yallitaj llaquilla sintirishcamantami huañunata munarcacuna. Por ejemplo, Jobca dimastij llaquilla cashcamantami, ñuca causaitaca pꞌiñanayanmi, ña mana causasha ninichu nirca (Job 7:16). Jonaspish yallitaj llaquilla cashpami: “Cunanca Mandaj Dioslla, ñucataca huañuchihuailla. Ñucapajca causanapaj randica, huañunami alli” can nirca (Jonás 4:3). Profeta Eliaspish llaquilla cashcamantami: “Mandaj Dioslla, caicamallami causasha nini. Ñucaca ñuca ñaupa yayacunata yallica mana canichu. Ñuca causaita quichuhuailla” nirca (1 Reyes 19:4). Pero Jehová Diosca cai runacunataca achcata cꞌuyashcamantami causashpa catichun munarca. Paicuna chashna sintirishcamantaca mana rimarcachu. Ashtahuanpish alli sintirichunmi cꞌuyaihuan paicunataca ayudarca. Causana munaita charichun, paita sirvishpa catichunpishmi ayudarca. w18.09 pág. 9 párr. 4

Dioshuan trabajajcunaca shujtajcunaman pozadata mañachij cashcamantami rijsishca canchij. Mushuj Testamentopi “puzachina” nishca shimica “mana rijsishcacunahuan alli cana” nisha ninmi (Hebreos 13:2). Chashna alli cangapajca Bibliapi tiyaj huaquin ejemplocunamantami yachai tucunchij (Génesis 18:1-5). Ñucanchij huauqui panicuna cajpi o shujtaj gentecuna cajpipish ayudana oportunidadta charishpaca ayudanallami canchij (Gálatas 6:10). Dioshuan trabajangapajca tiempo completopi Diosta sirvijcuna congregacionta visitacujpimi ñucanchij huasipi chasqui tucunchij (3 Juan 5, 8). Paicuna visitajpica caishuj chaishujmi sumajta animanacunchij (Romanos 1:11, 12). Diospaj Shimipica cꞌaricunataca Dioshuan trabajachunmi animan. Chaipajca siervo ministerial o anciano cangapajmi esforzarina cancuna (1 Timoteo 3:1, 8, 9; 1 Pedro 5:2, 3). Chashna esforzarijcunaca huauqui panicuna Diosta alli sirvishpa catichun, imata minishtijpipish chaita rurashpami ayudanata munancuna (Hechos 6:1-4). Congregacionpica huaquin cosascunata rurachunmi minishtirin. Chashna trabajashpa ayudajcunaca cushillami sintirincuna. w18.08 págs. 23, 24 párrs. 6, 7, 10

Timoteoca yuyaj huauquicunata mandana derechotami charirca. Pero mana tucuipi mandana cashcamantami paicunataca llaquishpa respetohuan tratana carca. ¿Shuj mayorlla huauqui yachashca jahua mana allicunata rurajpi o shujtajcunata mana allita rurachun animajpica imataj tucunga? Diosca mana ñahuita ricushpallachu juzganga. Mayorlla cajpipish juzganataca mana saquingachu. Ezequiel 9:5, 6-pica: “Ñuca uyacuitami caishuj runacunatapish cashna nirca: ‘Cancunapish chai runata catishpa chai pueblollatataj pasanguichij. Chaipi causajcunataca huañuchinguichijlla. Yuyajcunatapish, mosocunatapish, solteracunatapish, huahuacunatapish, huarmicunatapish shujllapish ama saquirichun tucuicunata huañuchinguichijlla’ nircami” ninmi. Isaías libropipish cai shina yuyaillamantatajmi parlan (Isaías 65:20). Ñucanchijpajca “Uni huatacunayuj Yuyaj” Jehová Diosta respetanami ashtahuan importante can (Daniel 7:9, 10, 13, 14). Chaita rurashpaca pi mashna huatacunata charijpipish consejota cuchun minishtijpica mana manchashpa cunallami canchij (Gálatas 6:1). w18.08 pág. 13 párrs. 13, 14

Diosta sirvijcunaca ima información cierto o mana cierto cashcata yachangapajca allimi intindinaraj, ricunaraj canchij. Shinami imata ruranata yachashun (Proverbios 3:21-23; 8:4, 5). Chaita mana rurajpica Satanaspish cai millai mundopish ñucanchij yuyaicunatami pandachinga (Efesios 5:6; Colosenses 2:8). Chaimanta, tucuita alli yachashpami imata ruranata yachashun. Cunan punllacunaca Internetpi, televisionpi y shujtaj ladocunapimi gentecunaca tucui laya yuyaicunata nin. Shinallataj achca gentecunami paicunapaj amigocuna cachashca correocunata, mensajecunata chasquincuna. Chai mensajecunataca huaquincunaca alli yuyaihuanmi cachancuna. Pero shujtajcunaca panda yuyaicunata o llullacunata nishpami cachancuna. Chaicunamantami cuidarina canchij. w18.08 págs. 3, 4 párrs. 1, 3

Diosca paipaj Churi cai Allpapi huacharichunca María shuti soltera huarmitami agllarca. Paica Nazaret uchilla pueblopimi causarca. Nazaretca Jerusalenpi caj templomanta carupimi carca (Lucas 1:26-33). Asha tiempo qꞌuipami Mariaca Elisabetta visitanaman rirca. Elisabethuan parlanacucushpaca Dioshuan alli amiga cashcatami ricuchirca (Lucas 1:46-55). María tucui shunguhuan sirvij cashcataca Jehová Diosca allimi yacharca. Chaimantami paitaca Jesuspaj mama cachun agllarca. Mariaca chashna bendicionta charinataca mana yuyashcachu canga. Jesús huacharishcataca Jehová Diosca Jerusalenpi, Belenpi mandajcunamanca mana huillarcachu. Ashtahuanpish huaquin angelcunata cachashpami Belén canlla ladopi ovejacunata michijcunallaman Jesús huacharishcata huillanaman cacharca (Lucas 2:8-14). Chaimi ovejacunata michijcunaca Jesusta ricunaman rircacuna (Lucas 2:15-17). Jehová Diosca ovejata michijcunata cachashpami Jesusta alli nishcata ricuchirca. Jehová chaita ruranataca Josepish Mariapish mana yuyashcallapishchu canga. w18.07 pág. 6 párrs. 11, 12

¿Diosca Salomonhuanca imamantataj pꞌiñarirca? Bibliapica: “Mandaj Diosmanta Salomonpaj shungu anchurishcamantami Mandaj Diosca paihuan pꞌiñarirca. Salomonmanca ñaupaman ishqui cutin ricurishpami, shujtajcunapaj dioscunataca ama catinguichu nishpa mandashca carca. Ashtahuanpish Salomonca, Mandaj Dios mandashcataca mana cazurcachu” ninmi. Chaimantami Salomonca Diospaj ñaupajpi mana alli ricurirca. Diospish paitaca ña mana ayudarcachu. Shinallataj paipaj huahua huahuacuna Israel tucui llajtacunata mandachunca Diosca mana saquircachu. Ashtahuanpish Salomonpaj huahua huahuacunaca achca huatacunatami llaquicunata charirca (1 Reyes 11:9-13). Huaquin amigocuna Dios mandashcacunata mana respetajpi o mana intindijpica ñucanchijpish paicuna shinami yuyai callarishun. Paicunapuramanta maijancunaca espiritualmente mana sinchi caj huauqui panicunami canga. Mana cashpaca Diosta mana sirvij familiacuna, vecinocuna, trabajopi o escuelapi compañerocunami canga. Pi cashpapish Dios mandashcacunata mana respetashpaca Diosmantami caruyachi pudingacuna. w18.07 pág. 17 párrs. 9, 10

Diabloca televisionpaj programacunapi, peliculacunapaj historiacunapimi mana alli yuyaicunata churan. Paica historiacunata ricushpa ñucanchij yuyaicunata, ñucanchij causaita cambiai tucushcataca allimi yachan. Jesuspish historiacunamantami parlaj carca. Por ejemplo, alli samaritano runamanta, chingarishca churimanta parlashpami gentecunaman yachachij carca (Mateo 13:34; Lucas 10:29-37; 15:11-32). Maijan programacuna o peliculacunaca mana dañota ruranchu. Pero Diablopaj yuyaicunahuan chagrurishca programacuna, peliculacunaca ñucanchij yuyaitami llaquichi tucun. Chaimanta imata manaraj gushtai callarishpa, “¿cai programa o cai peliculaca mana alli munaicunapi urmanalla cashcatachu yachachin?” nishpa tapurishunchij (Gálatas 5:19-21; Efesios 2:1-3). Chai programa o película Diablopaj yuyaicunahuan chagrurishca cajpica, contagiaj ungüimanta anchurij shina utca anchurishunchij. w19.01 págs. 15, 16 párrs. 6, 7

Cascoca uma ama ima tucuchunmi jarcan. Chai layallatajmi ‘quishpichishca canata shuyanapish’ ñucanchij yuyaicunata cuidan (1 Tesalonicenses 5:8; Proverbios 3:21). Diabloca ñucanchij umamanta cascota anchuchingapajca ñucanchijtami pandachisha nin. ¿Ima shina? Yuyarishun, Jesucristo cai Allpata mandana cashcataca Diabloca allimi yacharca. Pero chaipajca Jesucristoca achca llaquicunata apashpami huañuna carca. Chai qꞌuipaca Yaya Dios paita Rey shina agllachunmi shuyana carca. Chaimantami Diabloca Jesús utca Mandaj tucuchun pandachinata munarca. ¿Ima shinataj pandachisha nirca? Diabloca: “Ñuca ñaupajpi cungurijpica tucui chai mandanacunatami canman cusha” nircami (Lucas 4:5-7). Ñucanchijcunamanpish paraisopi Dios tucui cosascunata cusha nishcataca Diabloca allimi yachan. Pero chaicunata chasquingapajca ñucanchijcunaca shuyanatami yachana canchij. Huaquinpicarin achca problemacunatami chꞌimbapurana canchij. Chaita yachashpami Diabloca cunan alli causaita mashcachun, charinacunata mashcachun pandachisha nin. Chashnami Diosta sirvinata ladoman saquichun munan (Mateo 6:31-33). w18.05 pág. 25 párrs. 15-17

Joven, Diosca can cushilla causachunmi munan. Cushilla causangapajca Diosta ashtahuan sirvishpami causana cangui. Ima decisioncunata japigricushpapish paitami yuyaipi charina cangui. Chaitaca cunanmantami ña rurai callarina cangui. Chaimi Diosca cantaca achcata bendicianga, cuidanga, alli ñanta pushanga. Chashnallataj Bibliapi tiyaj tucui alli consejocunatapish yuyari. Eclesiastés 12:1-pi nishcatapish cazui. Chaipica “Chairaj cashpami, canta Ruraj Diostaca yuyarina cangui” ninmi. Achca jovencunaca Diosta ashtahuan sirvishpami catincuna. Chashnallataj Diosmanta huillana importante cashcatami ricuchincuna. Shujtajcuna mana allita rurachun nijpipish Diosta cazushpami catincuna. Chaimantami paicunata achcata felicitana canchij. Joven, cambaj tucui esfuerzocunaca mana yangachu can. Tucui huauqui panicunami cantaca achcata cꞌuyanchij. Imata ruragricushpapish Diosta yuyaipi charingui. Chashnami cushilla causangui. w18.04 pág. 32 párrs. 17, 19