Agosto

Tandanacuicunapi Jehová Dios, Jesuspish ñucanchijmanta imallata rurashcata yachanchij. Ñucanchijca Jesús paipaj causaita cushcata agradicishpami paipaj ejemplota catisha ninchij (2 Corintios 5:14, 15). Jehová Diostaca Jesuspaj causaita cushcamantami shungumanta alabasha ninchij. Chaipajca tandanacuicunapimi comentariocunata tucui shungumanta cuna canchij. Jehová Diosta, Jesusta cꞌuyashpami tucui pudishcata rurasha ninchij. Por ejemplo, trabajopi cainashca qꞌuipa shaicushca cashcamantami tandanacuiman rinaca maipica sinchi can. Achca congregacioncunami chaupi semana tandanacuitaca chishi lado charincuna. Cutin caishuj tandanacuica sábado o domingo punllapimi can. Chai punllaca huaquincunapajca samana punllami can. Shinapish ¿shaicushca cashca jahua tandanacuiman rijpica Jehová Diosca ñucanchijta valorangachu? Ari. Paita cꞌuyashcamanta ashtahuan esfuerzota rurajpica Yaya Diosca ashtahuanmi ñucanchijtaca valoranga (Marcos 12:41-44). w19.01 pág. 29 párrs. 12, 13

Gentecuna shinami Jesusca huaquin problemacunata charirca. Por ejemplo, shuj pobre familiahuanmi huiñashca yuyachin. Chaimantami paipaj huiñachij yayaca sinchi trabajota yachachirca (Mateo 13:55; Marcos 6:3). Shinallataj Jesús manaraj Diosmanta huillai callarijpimi Joseca ña huañushca yuyachin. Paipaj huiñachij yaya huañujpica Jesusca achcatami llaquirishcanga. Ashtahuancarin paipaj familiaca pai yachachishcacunataca mana crijchu carca (Juan 7:5). Chashna causaita charishcamantami Jesusca shujtajcunapaj problemacunata intindij carca. Paicuna ima shina sintirishcatapish yachaj carca. Jesusca milagrocunataca mana pi obligajpichu ruraj carca. Ashtahuanpish gentecunata llaquishcamantami milagrocunata ruraj carca (Mateo 20:29-34; Marcos 1:40-42). Gentecuna ima shina sintirishcata alli intindishpami Jesusca ayudarca (Marcos 7:32-35; Lucas 7:12-15). w19.03 pág. 16 párrs. 10, 11

Pai huañungapaj ashalla horascuna illajpica Jesusca yallitajmi preocupado carca. ¿Imamanta? Paica huañungacama Diospaj munaita rurashpaca achca gentecunapaj causaitami quishpichina carca (Romanos 5:18, 19). Shinallataj Diospaj shutita allipimi saquichina carca (Job 2:4). Tucuri pascuata micucushpaca apostolcunaca: “¿Maijanshi tucuita yalli jatun nishcaca canchij?” nishpami caishuj chaishuj rimanacurcacuna. Chashna jahuapish Jesusca mana paicunahuan colerarcachu. Ashtahuanpish humildecuna cachunmi sumajta parlashpa cutin ayudarca. Qꞌuipaca apostolcunataca paipaj lado tucushcamantami Jesusca felicitarca (Lucas 22:24-28; Juan 13:1-5, 12-15). Imamanta yallitaj sustarishca cashpaca mana utca pꞌiñaringapajmi Jesús shina cana canchij. Tucuicunami mai ratoca shujtajcunata ñucanchij rimaicunahuan, ruraicunahuan llaquichinchij. Chaita yuyarishpaca Jesús shinami cashun (Proverbios 12:18; Santiago 3:2, 5). Shinallataj shujtajcuna llaquij, cꞌuyaj cajpica allitami ruracunguichij ninami canchij (Efesios 4:29). w19.02 págs. 11, 12 párrs. 16, 17

Moisesman cushca leypica pitapish mana deganallamanta juchachinallachu canguichij nishpami mandarca. Chaimantami juchachishca runaca pi paita culpashcata yachana carca (Deuteronomio 19:16-19; 25:1). Ashtahuanpish pai culpata charishcata ricuchichunca ishqui testigocunami juezpajman rina carca (Deuteronomio 17:6; 19:15). Pero ¿shuj runa ciertotaj juchata rurashca cajpica? ¿Chaita shujlla runa ricushca cajpica? Diosca tucuitami ricucurca. Chaimantami juchata ruraj runaca mana paipaj munashcata rurai pudirca. Jehová Diosca siempremi cashcata ruran. Chaimantami paita cazujcunataca bendician. Pero pushajcunataca shujtajcunata llaquichijpica castiganmi (2 Samuel 22:21-23; Ezequiel 9:9, 10). Huaquincunaca mana allita rurashpaca mana ima tucushca layami ricurincuna. Pero Diosca pai agllashca punllapimi paicunata juzganga (Proverbios 28:13). Ashtahuancarin mana arrepintirijpica “¡Causaj Diospaj maquipi urmanaca, mancharina jatun llaquimari!” canga (Hebreos 10:30, 31). w19.02 págs. 23, 24 párrs. 20, 21

Moisesca paipaj causaita Jehová Dios pushachunmi saquirca. Chaimantami ‘paica mana ricuipaj Diosta ricucuj shina carca’ (Hebreos 11:24-27). Israelitacuna Egipto llajtamanta llujshishca ishqui quillacuna qꞌuipa, manaraj Sinaí urcuman chayajpimi shuj problema tiyarca. Israelitacunaca yacu mana tiyashcamantami yallitaj quejarishpa Moisestapish cꞌami callarircacuna. Chaimi Moisesca Yaya Diostaca: “Cai gentecunataca ¿imatataj rurashari? Rumicunahuan shitanallamari illan” nishpa mañarca (Éxodo 17:4). Yacu llujshichunca Horebpi tiyaj rumita cambaj caspihuan huajtai nishpami Yaya Diosca mandarca. “Moisesca israelcunata cunaj yuyajcunapaj ñaupajpimi chashna rurarca”. Yacu llujshijpimi israelitacunaca mashnata munashcata ubyarcacuna. Shinami quejarinata saquircacuna (Éxodo 17:5, 6). w18.07 pág. 10 párrs. 4, 5

Diosca ñucanchijta cꞌuyaihuan sinchiyachingapajca congregacionpi huauqui panicunatami utilizan. Ñucanchij huauqui panicunata cꞌuyashpaca Diosta cꞌuyashcatami ricuchinchij. Shinallataj Yaya Dios paicunata cꞌuyashcata, paipajca achca valij cashcata yachachunmi ayudanchij (1 Juan 4:19-21). Apóstol Pabloca: “Cunan ruracushca shinallataj, caishuj chaishujta animachichij caishuj chaishujta sinchiyachichij” nircami (1 Tesalonicenses 5:11). Mana ancianocunallachu huauqui panicunataca animana can. Tucuicunami Jehová Dios shina, Jesús shina shujtajcunata cushichinata, animanata pudinchij (Romanos 15:1, 2). Maijan huauqui panicunaca depresión ungüita charishcamantami jambicunata, shinallataj doctorcuna ayudachun minishtincuna (Lucas 5:31). Ancianocunapish shujtaj huauqui panicunapish depresión ungüita tratangapajca manachari doctorcuna can. Pero chai ungüita ima shina tratanata mana yachashpapish Bibliapi ima nishcata pajtachinatami yuyarincuna. Bibliapica: “Llaquihuan cajcunatapish cushichipanguichij. Manaraj sinchi crijcunatapish yachachipanguichij. Tucuicunallahuantaj ama utca pꞌiñarij caichijchu” ninmi (1 Tesalonicenses 5:14, QC, 1989). w18.09 pág. 11 párrs. 10, 11

Yaya Diosta alli rijsishpami paipi ashtahuan confiashun. Chaipajca Bibliatami liyina canchij, imata liyishcapipish allimi yuyana canchij. Bibliapimi ñaupa punllacunapi Jehová paita sirvijcunata ima shina cuidashcata yachachin. Chaimantami cunan punllacunapish pai ñucanchijta cuidanata crinchij. Profeta Isaiasca Jehová Dios ñucanchijta alli cuidaj cashcata ricuchingapajmi ovejacunata michijhuan chꞌimbapurarca. Paica: ‘Ovejacunata michij shinami, ovejacunataca paipaj rigrapi apanga’ nircami (Isaías 40:11). Yaya Dios cai michij shina ñucanchijtapish cuidana cashcata yachashpami tranquilo sintirinchij. Llaquicunamanta ama yallitaj sustaringapaj cai punllapaj versopi cutin cutin yuyashunchij. Shinami llaqui punllacuna shamugrijpipish Jehová Diospi confiashpa achca fuerzata charishun. w19.01 pág. 7 párrs. 17, 18

Joven, ¿Yaya Diosta ashtahuan sirvingapaj esforzaricunguichu? Bibliata cada punlla liyingapaj, tandanacuicunapi participangapaj, huillanaman llujshingapajchari esforzaricungui. Chaita rurashpaca tucui alli llujshijpi o shujtajcuna felicitajpica de seguromi cushilla sintiringui. ¿Imamanta? Jesús shina Yaya Diospaj munaitaraj ruracushcamantami chashna sintiringui (Proverbios 27:11). Diosta ashtahuan sirvingapaj esforzarishpaca cushillami sintiringui. Shinallataj mana yangamanta causacushcatami cuentata cungui. Apóstol Pabloca: “Chashna cajpica ñuca cꞌuyashca huauquicuna, Mandaj Jesuspajta ruranapi huiñashpa, sinchiyashpa, pi mana cuyuchipaj catiraichij. Cancuna Mandaj Jehová Diospi shujlla tucushpa paipajta trabajashca mana yanga cashcataca yachanguichijmi” nircami (1 Corintios 15:58, NM ). Cai mundopaj gentecunaca cullquita charinallapi, famoso tucunallapimi yuyancuna. Chaimi paicunapaj metacuna can. Shinapish paicunaca mana cushilla causancunachu (Lucas 9:25). w18.12 pág. 18 párrs. 12, 13

David chashna nishpaca cai Allpapi tucui causajcuna Dios mandashcacunata cazuna punllacunamantami parlacurca (2 Pedro 3:13). Cutin Isaías 65:22-pica: “Ñuca agllashcacunaca yuracuna shina unitamari causangacuna” ninmi. Cai versopica gentecunaca huaranga huaranga huatacunata causana cashcatami ricuchin. Apocalipsis 21:1-4-pica paraíso Allpapica huañuica mana tiyangachu ninmi. Diosca paita alli sirvijcunataca achcatami bendicianga. Adán, Evaca paraisopi huiñai huiñaita causanatami pirdircacuna. Pero cai Allpaca tigrami shuj paraíso tucunga. Diosca pai nishca shinaca achcatami bendicianga. Shinallataj Davidca alli gentecunapish cashcata rurajcunapish cai Allpatami japingacuna, chaipimi huiñai huiñaita causangacuna nircami (Salmo 37:11). Isaías nishcacunapish sumaj causai tiyanata cushilla shuyana cashcatami ricuchin (Isaías 11:6-9; 35:5-10; 65:21-23). ¿Ima horataj chaica pajtaringa? Jesús chai shuhua runaman ima nishcata pajtachijpimi pajtaringa (Lucas 23:43, NM ). Quiquinpish paraíso Allpapimi causai pudingui. w18.12 pág. 8 párrs. 22, 23

Cai mundopaj yuyaicunamantaca mana caruyai tucunchijchu. ¿Imamanta? Cai mundollapitaj causacushcamanta (1 Corintios 5:9, 10). Por ejemplo, huillacushpaca gentecunapaj panda yuyaicunatami uyanchij. Chashna panda yuyaicunamanta mana caruyai tucushpapish chaipica mana yuyashpa catinachu canchij. Diabloca panda yuyaicunapi yuyashpa catichunmi munan. Pero ñucanchijca Jesús shinami Diablopaj yuyaicunata chai rato anchuchina canchij. Shinallataj cai mundopi tiyaj ricunacunamanta, uyanacunamantami cuidarina canchij. Amigocunatapish alli ricushpami agllana canchij. Bibliapica Diosta mana adorajcunahuan amigos tucushpaca paicuna shinami yuyai callarishun ninmi (Proverbios 13:20; 1 Corintios 15:12, 32, 33, QC, 1989). Ashtahuanpish huaquin peliculacunapi, librocunapica evolucionmanta, macanacunamanta, huainayanamantami ricuchin o parlan. Caicunamanta anchurishpaca Dios mana ricunayachishca yuyaicuna ñucanchij umaman yaicuchunca mana saquishunchu (2 Corintios 10:5). w18.11 pág. 25 párrs. 16, 17

Mana llullapi ashtahuan sinchiyashpa catingapajca ¿imatataj rurana canchij? Dios yachachishcacunata shujtajcunaman huillangapaj achcata esforzarishunchij. Ima shinami shuj soldadoca espadata charirana carca. Shinallatajmi ñucanchijpish Diospaj Shimitaca charirana canchij (Efesios 6:17). Tucuicunami alli yachachijcuna cangapaj, ‘mana llulla shimitapish ima shina cashcata alli yachachingapaj’ esforzari tucunchij (2 Timoteo 2:15). Shujtajcunata Bibliahuan yachachishpaca ñucanchij shungupi, yuyaipimi imata yachachishcata huaquichishun. Shinami mana llullapi purishpa catinata munashun. Yaya Diosca paipaj mana llullaj shimitaca shuj sumaj regalota shinami cushca. Chai mana llullaj shimica Diospaj ñaupajpi alli ricurichunmi ayudan. Tucui pai yachachishcacunaca callarillami can. Diosca huiñai huiñaicamami paimanta yachachishpa catinata munan. Chaimantami Dios yachachishcacunataca shuj perlata shina valorana canchij. Mana llullaj shimita randishpa ama nunca tigra cꞌatushunchijchu (Proverbios 23:23). w18.11 págs. 9, 13, 14 párrs. 2, 15-17

Manaraj yacu juillu shamujpimi Noeca mana alli gentecuna tucuchishca canata huillarca. Caimanta parlashpami Jesusca: ‘Yacu juilluta Dios cachanapajpish allita micushpa, ubyashpa, cazarashpa, cazarachishpami causarcacuna. Huambuj huasiman Noé yaicungacamami, chashnallataj catircacuna. Paicunaca yacu juillu shamushpa, tucuicunata chingachingacama mana cazurcacunachu. Runa Aichayuj shamunapajpish chashnallatajmi canga’ nircami (Mateo 24:38, 39). Gentecuna mana uyajpipish Noeca yacu juillu shamunamantaca huillashpami catirca. Diosca tucui gentecuna paita uyashpa quishpirichunmi munan. Ñucanchijpish chaillatatajmi munanchij (Ezequiel 18:23). Chaimantami gentecuna Diospaj munai maijan cashcata alli yachachun Dios churashca Mandanamanta huillanchij. Shinallataj millai gentecunata Dios ñalla tucuchigrishcata yachachunmi huasin huasin huillanchij. Achca gentecuna tiyaj puestocunapipishmi huillanchij (Ezequiel 3:18, 19; Daniel 2:44; Apocalipsis 14:6, 7). w18.05 pág. 11 párrs. 8, 9

Ñucanchij causan llajtapi gobiernocuna Diosmanta huillanata jarcashpa, ñucanchij huauqui panicunamanta tapuicunata rurajpica, ¿tucuitachu paicunaman huillana canchij? Roma llajtata mandaj Jesusta tapuicunata rurajpi ima tucushcata yuyashun. Jesusca, “upalla cangapajpish, rimanacungapajpish punllami chayan” nishca yuyaitami catirca. Chaimantami maipica imata mana nishpa upalla saquirirca (Eclesiastés 3:1, 7; Mateo 27:11-14). Chashna cajpica ñucanchijpish huauqui panicunata ama peligropi churangapajmi alli yuyashpa imatapish rurana canchij (Proverbios 10:19; 11:12). Cunanca caipi yuyashun. Ñucanchij amigo o familia jatun juchata rurashcata yachaj chayashcanchij. ¿Chaipica imatataj rurashun? Bibliapica: “Mana llullaj runaca cashcallatami huillan” ninmi. Chaimantami ancianocunamanca tucuita huillana canchij. Paicunaca tucuitami yachanata minishtincuna. Shinami juchata ruraj, Dioshuan cutin alli tucuchun ima shina ayudanata yachangacuna (Santiago 5:14, 15, NM ). w18.10 págs. 7, 8 párrs. 17, 18

¿Ima shinataj sinchiyachij cꞌuyaita ricuchi tucunchij? Alli uyanata yachanami canchij (Santiago 1:19). Llaquilla cajcunataca alli uyashpami paicunata cꞌuyashcata ricuchishun. Llaquilla caj huauqui o pani ima shina sintirishcata intindingapajca alaja shimicunahuanmi tapuicunata rurana canchij. Ñucanchij ñahui ricuipish paimanta sustarishcatami ricuchina can. Chai huauqui o pani tucuita huillai callarijpica tucuita alli uyashunchij. Pacienciahuan uyashpaca paitami alli intindishun. Shinami ñucanchijpi ashtahuan confianga. Ayudangapaj ñucanchij imata nijpipish allimi uyanga. Huauqui panicunaca paicunamanta sustarijta ricushpaca cushillami sintiringacuna. w18.09 págs. 11, 12 párrs. 10, 13

Dios churashca Mandanamanta yachangapaj, Bibliata liyingapaj, publicacioncunata liyingapajca tiempomi minishtirin. Shinallataj quiquinllataj Bibliata yachangapaj, tandanacuicunapaj prepararingapaj, tucui tandanacuicunaman ringapajpish tiempomi minishtirin. Chaicunata rurangapajca mana tanto importante cosascunataca ladomanmi saquina canchij (Efesios 5:15, 16). ¿Bibliamanta minishtirishca yuyaicunata yachangapajca mashna tiempotaj minishtirin? Mana tucuicunachu igual yachai tucunchij. Pero Jehová Diosmanta, pai ima shina cashcamanta, pai rurashcacunamantaca mana nunca yachanata saquishunchu (Romanos 11:33). Inglés shimipi punta cutin llujshishca cai laya revistapica mana llullaj shimita yachanataca shuj “uchilla sisahuanmi” chꞌimbapurarca. Qꞌuipaca: “Shuj sisallahuanca ama saquirichijchu. Diosmanta yachana shujlla sisa shina suficiente cajpica Diosca mana achca yachaitaca cunmanchu. Chaimanta, sisacunata mashcaj shina japishpa catichij” nircami. Huiñaita causashpapish Jehová Diosmantaca ashtahuanmi yachashpa catishun. Cunan punllacunapica mana llullaj shimita ashtahuan yachangapajmi tiempotaca mana desperdiciana canchij. w18.11 pág. 5 párr. 7

Bibliapica cusacunaca paicunapaj huarmicunamanta preocuparij, intindijmi cana can ninmi (1 Pedro 3:7). Intindij cusaca paipaj huarmi ima ruraicunapipish chꞌican cashcata, yuyaipipish mana igual cashcatami yachan. Chaita yuyarishpami huarmimanta ashtahuan yalli cashcataca mana sintin (Génesis 2:18). Ashtahuanpish huarmi ima shina sintirishcapi yuyashpami respetohuan tratashpa paita valorashcata ricuchin. Paipaj huarmimanta preocuparij cusaca huarmi ima shina sintirinapimi yuyan. Chaimantami shujtaj huarmicunahuanca mana asirishpa, pugllarishpa purin. Redes socialescunapipish mana chaita ruranchu (Job 31:1). Internetpipish mapa cosascunataca mana ricunchu. Ashtahuanpish paipaj huarmimantami mana caruyanata munan. Pero mana huarmita cꞌuyashcallamanta. Ashtahuanpish Diosta cꞌuyashcamanta, mana allitaca mana ricunayachishcamantami chaita ruran (Salmo 19:14; 97:10). w18.09 pág. 28 párrs. 3, 4

Bibliapi ima yachashcata pajtachinaca mana facilchu can. ¿Imamanta? Allita rurangapajca humilde canami minishtirin. Pero cai tucuri punllacunapi gentecunaca quiquinlla alli canata munajcuna, quiquinpajlla charinata munajcuna, jatun tucushcacuna, imapipish mana jarcarijcunami can. Chai gentecunapurapi causacushcamantami humilde canaca sinchi can (2 Timoteo 3:1-3). Ñucanchijca chai ruraicuna mana alli cashcataca yachanchijmi. Shinapish chashna causaj gentecunaca cushilla causaj layami ricuringa (Salmo 37:1; 73:3). Chaimantami, “¿ñucapajlla alli canata mashcanapaj randi, shujtajcunapaj allita mashcanaca allichu canga? ¿‘Tucuicunamanta yalli uchilla’ o humilde cajpica gentecunaca ñucata respetanata saquingachu?” nishpa yuyai callarishun. Shujtaj gentecuna laya yuyai callarishpaca ñucanchij huauqui panicunahuanmi mana alli apanacushun. Diosta sirvijcuna cashcatapish mana ricuchishunchu. Chaimantami Diosta alli sirvijcunamanta yachashpa paicunapaj ejemplota catina canchij. Shinami alli causashun. w18.09 pág. 3 párr. 1

Jehová Diosca tucui tiyashcata manaraj rurashpaca pai solomi carca. Pero paillapi yuyanapaj randica jahua pachapi angelcunaman, cai pachapipish gentecunamanmi causaita curca. Jehová Diosca ‘cushi Diosmi’ can. Tucui allicunatami gentecunaman cunata yachan (1 Timoteo 1:11; Santiago 1:17). Ñucanchijtapish cushilla causachun munashpami shujtajcunaman cuj canata yachachin (Romanos 1:20). Diosca ñucanchijtaca paiman rijchajtami rurarca (Génesis 1:27). Chaimantami Dios shina cꞌuyaj, llaquij cashcata ricuchi tucunchij. Cushilla causanata munashpa, bendicioncunata chasquinata munashpaca Diospaj ejemplotami catina canchij. Chaipajca shujtajcunapi yuyashpami mana mitsacuna cana canchij (Filipenses 2:3, 4; Santiago 1:5). ¿Imamanta? Diosmi ñucanchijtaca chashna cachun rurashca. Juchayujcuna cashpapish Dios shinami mana mitsa canata yachai pudinchij. Jehová Diosca pai laya cachunmi munan. Chaimantami mana mitsashpa shujtajcunaman imatapish cujpica cushilla sintirin (Efesios 5:1). w18.08 págs. 15, 16 párrs. 1, 2, 4

Jesusta uyacushcata ricuchingapajca pai nishcacunatami pajtachina canchij. Alli causanallapi mana ñucanchij shunguta churanachu canchij (Lucas 21:34). Tucuimanta yallica Jesustami cazuna canchij. Achca huauqui panicunaca jatun problemacunata charishpapish chaitami rurashcacuna. Paicunaca ima laya tucushpapish Diosta cazushpami caticuncuna. Shinallataj Jesusta uyangapajca pai agllashca pushaj huauquicunatami apoyana canchij (Hebreos 13:7, 17). Cai último huatacunapica Diosta sirvijcunata pushajcunaca huaquin cosascunatami cambiashca. Por ejemplo, shujtaj laya huillanatami yachachishca. Huillangapaj mushuj publicacioncunata, videocunatapishmi cushca. Chaupi semanacunatapish shujtaj laya tandanacuita charichunmi rurashcacuna. Shinallataj Tandanacuna Huasicunata ima laya rurana, ima laya allichina cashcatami yachachishcacuna. Cai pushaj huauquicuna cꞌuyaihuan, alli yachachishcamantaca ¿manachu paicunata agradicisha ninchij? Paicuna ima nishcata shungumanta cazujpica Yayitu Diosca bendiciangami. w19.03 págs. 10, 11 párrs. 11, 12

Ñaupa punllapi israelitacunahuan ima tucushcata yuyarishun (Josué 22:9-34). Huaquin israelitacunaca río Jordanmanta inti huashicun ladomanmi causarcacuna. Cutin caishuj israelitacunaca inti llujshin ladomanmi causarcacuna. Inti llujshin ladopi caj israelitacunami shuj jatun altarta rurashcarcacuna. Chaica ciertomi carca, pero imamanta chaita rurashcataca inti huashicun ladomanta israelitacunaca mana tucuita yacharcachu (Josué 22:9-12). Pero manaraj macanacunaman rishpami huaquin cꞌaricunata tucuita alli yachanaman cacharcacuna. Chai cꞌaricunaca chai altartaca mana yanga dioscunaman sacrificiota cungapaj rurashcatami yachaj chayarcacuna. Ashtahuanpish qꞌuipa huiñaicuna paicunapaj yayacuna Diosta alli sirvijcuna cashcata yuyarichunmi rurashcacuna carca. Inti huashicun ladopi causaj israelitacunaca manaraj paicunapaj huauquicunata huañuchinaman rishpa tucuita alli yachaj chayangapaj tiempota llujchishcamantami cushilla sintirishcangacuna. w18.08 pág. 6 párrs. 9, 10

Pablo nishca shinaca Diosta adorajcunapishmi mana alli cosascunata rurai tucun. Huaquincunaca tentacioncunapi urmashpapish Dioshuanca allimi canchij nishpami yuyancuna. Pero shuj persona Diospaj amigo casha nijllapi o paita tucui shunguhuanmi sirvicuni nijllapica Diosca mana siemprechu paita chasquishcata ricuchinga (1 Corintios 10:1-5). Yuyarishunchij. Sinaí urcumanta Moisés mana utca uriyamujpimi israelitacunaca yallitaj sustarishpa mana pacienciata charishcata ricuchircacuna. Ñucanchijpish Dios agllashca punlla mana utca chayamunchu nishpami sustari tucunchij. Chashna sintirijpica Dios cusha nishcacuna pajtarichunca achca huatacuna illashca layami ricuringa. O “shamuj punllapi huiñaita cushilla causanaca yallitaj sumajmi, tal vez mana pajtaringachu” nishpami dudai callarishun. Chashna yuyanata mana saquishpaca Diospaj munaita ruranapaj randica ñucanchij munaitarajmi rurashun. Tiempohuancarin Diosmanta caruyashpami mana nunca yuyashca cosascunata rurashun. w18.07 págs. 19, 20 párrs. 17, 18

Cada unotami Diosca rijsisha nin. Pero paipaj amigo tucungapajca ¿imatataj rurana canchij? Paitami shungumanta cꞌuyana canchij. Tucui ñucanchij causaipimi paita sirvina canchij (1 Corintios 8:3). Yaya Dioshuan alli amigo canataca mana saquinachu canchij. Galacia llajta crijcunaman Pablo consejashcatami ñucanchijpish cazuna canchij. “Manapish imapaj alli cajta huajcha ruranahuanca” esclavo shina mana tucunachu canchij. Chashnami cai mundopaj rijsishca cana munaimanta jarcarishun (Gálatas 4:9, QC, 1989). Galaciapi causajcunaca ñami Diosta alli rijsishca carcacuna. Diospish paicunataca ñami alli rijsishca carca. Shinapish cai huauquicuna ñaupa causaiman tigracushcatami Pabloca nicurca. Chashna nishpaca “¿ima nishpataj cancuna imapish mana valicunata sirvinaman cutin tigracunguichij?” nicuj layami carca. w18.07 pág. 4 párrs. 5, 6

Ima alli cashcata, ima mana alli cashcata yachangapajca Diosta mana cazushpa llaquicunata apanataca mana minishtinchu. Bibliapica ñaupa tiempopi shujtajcuna pandarishcamantami parlan. Paicunamantaca achcatami yachai tucunchij. Dios yachachijllapimi yachaisapa tucunchij. Por ejemplo, Davidca Diosta mana cazushpami Betsabehuan juchapi urmashpa llaquicunata charirca (2 Samuel 12:7-14). Davidmanta yachacushpaca ¿Davidca chai llaquicunata ama charingapajca imatataj rurana carca? Chai tentación ricurijpica ¿David shinachu juchapi urmaiman o José shinachu chai tentacionmanta caruyaiman? nishpami tapurina canchij (Génesis 39:11-15). Juchapi urmashpa llaquicunata charinata yuyarishpaca mana allita ruranataca ashtahuanmi pꞌiñashun (Amós 5:15). w18.06 pág. 16 párrs. 5, 7

Gentecunaca mana alli ruraicunata ricushpaca politicapi chagrurinatami munancuna. Jesús causacui punllacunapipish impuestota pagana cashcamantami gentecunaca politicapi chagrurircacuna. Chai punllacunaca allpamanta, charishca cosascunamanta, huasimantami judiocunaca impuestota pagana carcacuna. Pero impuestota cobrajcunaca yalli yallimi cobrajcuna carca. Chaimantami gentecunapajca paganaca sinchi ricurirca. Maipicarin impuestota cobrajcunaca mandajcunaman cullquita cushpami politicapi alli puestocunata charijcuna carca. Chashnami paicunaraj cullquiyuj tucurcacuna. Impuestota cobrajcunata pushaj Zaqueo runapish gentecunata achcata cobrashpami charij tucurca (Lucas 19:2, 8). Herodes parte cajcunaca Jesús politicapi chagrurichunmi munarcacuna. Chaimantami: “Cesarman impuestota cunaca ¿allichu canga? “ nishpa tapurcacuna. Chai impuestota cungapajca romanocunapish judiocunapish shuj denario cullquitami pagana carcacuna (Mateo 22:16-18). Romata mandajca chaita pagachishpami pailla tucuicunata mandaj cashcata ricuchirca. Chaimantami judiocunaca pꞌiñarircacuna. w18.06 pág. 6 párrs. 8-10

Adán, Eva, demoniocunapish Diosta mana cazushcamantami achca llaquicuna tiyan (Job 21:7-17; Gálatas 6:8). Diablo cai pachata mandacushcamantami Diosca autoridadcunata, gobiernocunata ima shina respetana cashcata yachachin (1 Pedro 2:17). Diosca paipaj mandashcacunata mana huashaman saquishpa, gobiernocunapaj leycunata cazuchunmi munan (Romanos 13:1-4). Chai leycunata cazushpapish politicapi mana chagrurina cashcatami yachanchij (Juan 17:15, 16; 18:36). Diabloca, Yaya Diospaj shutita gentecuna ama rijsichun, Jehová millai Dios cashcatapish crichunmi tucuita ruran. Chaimantami Diosmanta alli yachachishpa Diablo nishcacuna mana cierto cashcata ricuchishun. Shinallataj testigo de Jehová cashcamanta, Diospaj shutita huillacushcamantami cushilla sintirinchij. Ñucanchijpajca charishca cosascunatapish yallica Diosta sirvinami cushi causaita cun (Isaías 43:10; 1 Timoteo 6:6-10). w18.05 págs. 17, 18 párrs. 8, 9

Cazarashcacuna ima problemacuna tiyajpica ¿separarinallachu canga? Bibliapica imacunallamanta separari tucushcataca mana huillanchu. Apóstol Pabloca: “Maijan crij huauquipaj huarmi mana crij cashpapish paihuan causasha nijpica, ama shitachun ninimi” nircami (1 Corintios 7:12, 13). Cai yuyaicunaca cunan punllacamami valishca can. Huaquinpica ‘mana crij cusaca’ paipaj huarmihuan causanataca mana munanchu. Chaimantachari huarmitaca dimastij maltratan. Chaimi huarmica paipaj saludta o causaita peligropi churashcata yuyan. Shinallataj cusaca familiatapish manachari mantininata munan. Huarmitapish Diosta sirvichunca manachari saquin. Chashna tucujpimi Diosta sirvij huaquin huarmicunaca cusacuna paicunahuan causanata ña mana munashcamanta separarinata decidincuna. Pero Diosta sirvij shujtaj huarmicunaca mana chaita rurashcacunachu. Ashtahuanpish imatapish ahuantashpami matrimoniopi imapi mejorana cajpica achcata esforzarishcacuna. w18.12 págs. 13, 14 párrs. 14, 16, 17

Lucas 8:5-8, 11-15-pi tarpuj runamanta parloca caitami nisha nin: Muyuca “Taita Diospaj Shimimi” o Dios churashca Mandanamanta alli huillaicunami can. Cutin allpaca gentecunapaj shungutami ricuchin. Tarpuj runa muyuta alli allpapi tarpujpica sapicunayuj tucushpami shuj mushuj yura tucurca. Chai yuramantami patsaj cutincama granoca pꞌucurca. Ñucanchijman Diosmanta yachachishpaca shuj muyuta ñucanchij shungupi tarpucuj shinami carca. Diosmanta ashtahuan yachashpaca granota pꞌucuj yura layallatajmi ricurircanchij. Yuyarishun, trigo yura huiñashpaca mana yuracunatachu pꞌucun ashtahuanpish muyucunatami pꞌucun. Cai ejemplopi ricushca shinaca muyuta pꞌucuchingapajca Jesusta catijcunata ruranaca mana minishtirinchu. Pero, ¿ima shinataj muyuta pꞌucuchicushcata ricuchinchij? Cutin yuyarishun, ñucanchijman Diosmanta yachachishpaca muyuta tarpuj shinami carca. Ñucanchijpish Dios churashca Mandanamanta tucui laya huillashpami muyuta tarpushpa pꞌucuchicushcata ricuchinchij (Lucas 6:45; 8:1). Chaimanta alli granota pꞌucuchingapajca mana shaicushpami Diosmanta huillashpa catina canchij. w18.05 págs. 5, 6 párrs. 10, 11

Pabloca cushichij shimicunahuan animashpapish ruraicunahuanmi animarca. Chaimantami: “Ñucapaj imalla tiyashcacunataca, cushicuihuan tucuchishallami. Cancunapaj almacunata cꞌuyashcamantaca ñucallatajpish tucurishallami” nircami (2 Corintios 12:15). Apóstol Pablo rurashca shinallatajmi ancianocunaca ruraicunahuan shujtajcunata animana can. Chashnami shungumanta shujtajcunamanta preocuparishcata ricuchincuna (1 Corintios 14:3). Huauqui panicunata sinchiyachingapajca huaquinpica ancianocunaca consejotami cuna can. Huauqui panicuna consejota chasquishpa animarichunca ancianocunaca Biblia yachachishca shinami consejana can. Jesusllatajmi ña causarishca qꞌuipaca shuj alli ejemplota curca. Paica Éfeso, Pérgamo y Tiatira pueblocunapi sirvij huauqui panicunatami consejana carca. Pero manaraj consejashpami paicunataca cꞌuyaihuan felicitarca (Apocalipsis 2:1-5, 12, 13, 18, 19). Caipi ricushca shinaca Jesuspaj ejemplota catishpami ancianocunaca consejana can. w18.04 pág. 23 párrs. 8, 9

Yaya mamacuna huahuacunapaj shunguta Diablo ama llaquichichunca cancunami cuidana canguichij. Caipi yuyashun: Cancunapaj huahuacuna ama ungurichun nishpami huasitaca limpio, ima mapacunata pꞌichashpa charinguichij ¿nachu? Chai shinallatajmi Diablopaj yuyaicuna huahuacunapaj shunguta ama llaquichichunca peliculacunamanta, televisionpaj programacunamanta, videojuegocunamanta, Internetpaj paginacunamanta cuidana canguichij. Jehová Diosca yaya mamacunatami huahuacunata cuidachun, yachachichun mingashca (Proverbios 1:8). Yaya mamacunaca Bibliapi mandashca shinami huahuacunataca consejana canguichij. Imata ricunata, imata mana ricunata, imamanta chaita mandashcatapish ninallami canguichij (Mateo 5:37). Huahuacuna huiñashpa caticushcamantami paicunallataj ima alli cashcata, ima mana alli cashcata Bibliapi ricushpa intindichun yachachina canguichij (Hebreos 5:14). Pero, cancunapaj huahuacunaca cancuna imallata rurashcata ricushpami ashtahuan yachangacuna (Deuteronomio 6:6, 7; Romanos 2:21). w19.01 pág. 16 párr. 8

Jovencunaca yuyajlla huauqui panicunahuan apanacungapajmi esforzarina can. Paicunataca cai tucui huatacuna Diosta sirvishpa catingapaj imata rurashcatami tapui tucunguichij. Chashnami cancunapish yuyajlla huauqui panicunapish animaringuichij. Tucuicunami tandanacuiman shamujcunatapish cushilla ñahuihuan chasquina canchij. Huillanaman grupota llujchij huauquipish yuyajlla huauqui panicuna paicunapaj luzta achijyachishpa catichunmi ayudana can. Chaipajca cai huauqui panicuna maipi huillai pudishcatami ricuna can. Shinallataj jovencuna paicunahuan huillanaman llujshichunmi mañai tucunguichij. Shujtajcunapish ungushcamanta o ima problemata charishcamantami mana huillai pudishpa llaquilla sintirincuna. Pero paicuna ima shina sintirishcata intindishpa ayudajpica allimi sintiringacuna. Shinami achca huatata Diosta sirvijcunatapish, jovencunatapish cushilla huillashpa catichun ayudanguichij (Levítico 19:32). w18.06 págs. 23, 24 párrs. 10-12

Ñucanchijtapish Jehová Diosmi juchamanta, huañuimantapish cacharichishca. Chaimantami paita agradicinataca mana cungarina canchij. Jesús huañushcamantami cushilla Diosta sirvi tucunchij (Salmo 40:8). Ñucanchijta cacharichishcamantami Jehová Diostaca pagui nina canchij. Chai jahuapish alli decisioncunata agllangapajmi esforzarina canchij. Apóstol Pedroca ña cacharichishca cashcamanta ‘millai munaicunata rurai tucunchijllami’ nishpa ama yuyanguichijchu nircami. Cai consejoca chaquishca pambapi israelitacuna imata rurashcatami yuyachin. Cunan punllacunapica chꞌican chꞌican ropacuna, micunacuna, ubyanacuna, diversioncunapishmi tiyan. Munashca cosascuna cashcamantami, chaicunapi jahualla dedicari tucunchij. Diabloca chaitami munan. Empresacunaca rijsishca, sumaj ricurij gentecunata utilizashpami mana minishtirishca cosascunata randichun gentecunata animan. Cai trampacunapi urmanaca jahuallami can. w18.04 págs. 11, 12 párrs. 7, 8