Septiembre

Lázaro huañujpica paipaj pani Marta, Mariapish llaquillami sintirircacuna. Chaimi Jesuspish huacarca (Juan 11:32-35). Jesusca Lazarota causachi tucushcataca allimi yacharca. Pero ¿imamantataj huacarca? Paipaj amigo paihuan ña mana cashcamantaca mana huacarcachu. Ashtahuanpish paipaj cꞌuyashca amigacuna llaquilla cajta ricushpami huacarca. Jesús llaquij cashcata yachashpami achcata animarinchij. Chaimantami paitaca cꞌuyanchij. Ashtahuancarin Jesús jahua pachapi Rey cashcata yachashcamanta, tucui llaquicunata ñalla tucuchigrishcamantami cushilla sintirinchij. Cai Allpapi cashpaca paica jatun llaquicunatami aparca. Chaimantami Diablo cachashca llaquicunata Jesús tucuchinata crinchij. Shinallataj ‘irqui cajcunata’ llaquij Rey cashcata yachashpami cushilla sintirinchij (Hebreos 2:17, 18; 4:15, 16). w19.03 pág. 17 párrs. 12, 13

Gentecunaman predicashpaca paicuna Diosmanta yachachunmi ayudacunchij (1 Corintios 3:6, 7). Pero Jehová Diosmi gentecuna paipajman cꞌuchuyachun ayudan. Caitaca ama cungarishunchij. Shinallataj gentecunapaj shungupi ima tiyashcami uyanata o mana uyanata munashcata ricuchinga (Mateo 13:4-8). Jesusca tucuicunamanta yalli alli yachachijmi carca. Chashna jahuapish pai yachachisha nijpica la mayoría gentecunaca mana uyasha nircachu. Chaita yuyarishpaca cunanpish Diospaj Shimita gentecuna mana uyasha nijpica mana desanimarishunchu. Predicacionpi gentecunata llaquishcata ricuchishpaca ashtahuan cushillami sintirishun. Shinallataj gentecunaman cuj canata yachashcamantami alli sintirishun. Ashtahuancarin ‘huiñai causaipaj’ cajcuna Diospaj Reinomanta yachachunmi ayudashun (Hechos 13:48). Shinashpaca, ‘tucuicunapaj allita rurai’ pudishpaca rurashunchij (Gálatas 6:10). Shinami ñucanchij Yaya Jehová Diosta jatunyachishpa cushilla causashun (Mateo 5:16). w19.03 pág. 25 párrs. 18, 19

Rey Davidca cashnami nirca: “Mandaj Diosca jatunmari. Tucuimanta yalli jatunmi cangui nishpa alabana Taita Diosmari” (Salmo 145:3). Davidca Yaya Diosta cꞌuyashcamantami “tandanacushcacunapaj chaupipi” alabarca (1 Crónicas 29:10-13; Salmo 40:5). Tandanacuicunapi comentariocunata cushpami Jehová Diostaca alabanchij. Ñucanchij tandanacuicunapica tucuicuna comentariota cuchunmi munanchij. Por ejemplo, shuj huahua jahualla shimicunapi alaja comentariota cujpi, shujtajcuna Bibliamanta sumaj yuyaita nijpica achcatami cushicunchij. Maijancuna ñucanchij shimita mana yachashpapish manchaita saquishpa comentariota cujpimi cushicunchij (1 Tesalonicenses 2:2). Chashna comentariota cujcunataca ¿ima shinataj animai tucunchij? Tandanacui tucurishca qꞌuipami “pagui, cambaj comentarioca alajami carca” ni tucunchij. Ashtahuancarin ñucanchij comentariocunata cushpami shujtajcunata animachi tucunchij. Pero chaipajca tandanacuicunapimi comentanata yachana canchij (Romanos 1:11, 12). w19.01 págs. 8, 9 párrs. 1, 2, 6

Chunga cꞌaricunaca lepra ungüita charishcamantami imata ruranata mana yacharcacuna. Shinapish Jesucristo ungushcacunata jambij cashcatami uyarcacuna. Shuj punllaca cai runacuna Jesusta ricushpaca: “¡Yachachij, Jesús ñucanchijta llaquihuayari!” nishpami caparircacuna. Chaita uyashpami Jesusca chai chunga runacunata jambirca. Tucuicunami paicunata jambishcamanta shungupica pagui nishca cangacuna. Pero shuj runallami Jesusta pagui ningapaj tigramurca. Chai samaritano runaca Diostami alabarca (Lucas 17:12-19). Shujtajcuna ñucanchijpaj ima allita rurajpica samaritano runa shinami agradicisha ninchij. Jehová Diosca pagui nij cashcata ricuchingapajca ¿imatataj ruran? Paita alli sirvijcunamanmi bendicioncunata cun (2 Samuel 22:21; Salmo 13:6; Mateo 10:40, 41). Chaimantami Bibliapica: “Cꞌuyashca huahuacuna cashcamanta, Diosta ricushpa catijcuna caichij” nin (Efesios 5:1). Ñucanchijca Jehová Dios shinami casha ninchij. Chaimantami pagui nij cashcata ricuchina canchij. w19.02 pág. 14 párrs. 1, 2, 4

Shuj joven huarmitami shuj fiestapi participachun nin. Chai fiesta mana alli cashcataca chai joven huarmica allimi yachan. Chaimi chai fiestapi mana participashachu nishpa respetohuan parlan. Cutin shujtaj jovenca Diospaj Shimimantami escuelamanta shuj compañeropaj huasipi huillana can. Pero chai compañeroca testigo de Jehovacunamantami burlarij can. Cutin shuj yayaca trabajopimi can. Chaipimi jefeca gobiernopaj leyta mana cazushpa shuhuachun, llullachun mañan. Shinapish chai yayaca Diosta sirvij cashcamantami gobiernopaj leyta cazuj cashcata huillan (Romanos 13:1-4; Hebreos 13:18). Cai Testigocunaca ¿imatataj ricuchircacuna? Cashcata rurajcuna, mana manchajcuna cashcatami ricuchircacuna. Pero ashtahuanca imapipish mana pandarij o Diosta tucuipi cazujcuna cashcatami ricuchircacuna. Chaimantami Jehová Diosca paicunamanta cushilla sintirishcanga. Ñucanchijmantapish Yayitu Dios cushilla sintirichunmi munanchij. w19.02 pág. 2 párrs. 1, 2

Moisesman cushca leypica paicunallamanta mana ayudarij tucujcunatami ashtahuanca cuidachun mandarca. Por ejemplo, Yaya Diosca Israel llajtamanta caj juezcunataca: “Cancunaca shujtaj llajtamanta cajcunatapish, yaya mama illajcunatapish paicunapaj ima shinalla rurana cashcataca ñataj mana ruranguichijman. Viuda huarmi imata mañajpica tigrachingacama ama ima prendata apanguichijchu” nircami (Deuteronomio 24:17). Jehová Diosca chashna laya gentecunatami cꞌuyaj, llaquij carca. Paicunata llaquichijpica castigajmi carca (Éxodo 22:22-24). Familiapura huainayajcunata, uchillacunata violajcunataca Diosca pꞌiñanmi. Chaimantami paica ñaupajman pushajcuna cada unomanta sustarichun, cuidachun munan. Mana ayudarij tucujcunamantapish cashcata rurachunmi munan (Levítico 18:6-30). Jehová Dios ñucanchijmanta cashcata rurajpimi ñucanchijpish paitaca ashtahuan cꞌuyanchij. Chashnallataj Diosta cꞌuyashcamanta paipaj mandashcacunata shungumanta cazushpaca shujtajcunatapishmi cꞌuyanchij. Paicunamanta cashcatapishmi ruranchij. w19.02 págs. 24, 25 párrs. 22-26

¿Diablopaj trampacunamantaca ima shinataj cuidarishun? Jehová Diosca huainayana yuyaicunata, tucui laya mapacunataca amataj yuyarichunllapish ninmi (Efesios 5:3). Pero ¿trabajopi o escuelapi compañerocuna huainayanamanta parlai callarijpica imatataj rurashun? ¿Ñucanchij conciencia chapaj runa shina mana alli cashcata huillajpica imatataj rurashun? (Romanos 2:15). Ñucanchij compañerocuna parlanacushcata uyashpa saquirinatachari munashun. O mana alli fotocunatachari ricushpa saquirinata munashun. Pero chaita ruranapaj randica punguta huichcaj shinami shujtaj temamanta parlana canchij. Mana cashpaca chaimantami caruyana canchij. Ñucanchij compañerocuna shina ama yuyangapaj, mapa ruraicunata ama rurangapajca mana manchajmi cana canchij. Diablopaj yuyaicunamanta cuidaringapaj esforzaricushcataca Jehová Diosca allimi yachan. Chaimantami paica ñucanchijmanca alli yachaita, fuerzata cunga (2 Crónicas 16:9; Isaías 40:29; Santiago 1:5). w19.01 págs. 17, 18 párrs. 12, 13

Rey Salomonca achca charij runami carca. Paica: “Cunanca tucui laya cushicushpa, alli causashpa ricusha” nircami (Eclesiastés 2:1-10). Chaimantami pai munashca shina huasicunata, jardincunata, parquecunata rurarca. ¿Chaicunata rurashpaca cushillachu sintirirca? Mana. Imallata rurashcata yuyarishpaca cunan punllapaj versopaj shimicunatami quillcarca. Salomón shina mana casha ninguichu ¿nachu? Maijancunaca llaqui atrazopi urmashca qꞌuipami experienciata japincuna. Joven, can chashna tucuchunca Jehová Diosca mana munanchu. Ashtahuanpish tucuipi paita uyashpa cazuchunmi munan. Chaipajca sinchi fetami charina cangui. Shinallataj Dios mandashca shina alli decisioncunata agllashcamantaca mana nunca llaquiringuichu. Diospish paipaj shutipi cꞌuyaihuan trabajajpica manataj cungaringachu (Hebreos 6:10). Chaimanta, cambaj feta sinchiyachingapaj achcata esforzari. Shinami Yaya Dios nishcacunaca cambajllataj alli cashcata ricungui (Salmo 32:8). w18.12 pág. 18 párrs. 14, 15

Sinchi crij runaca Diospi feta churashpami ima ruraitapish pai ricushca shina ricun. Shinallataj paipaj causaita Dios pushachun saquishpami tucui shunguhuan paita cazunata munan (1 Corintios 2:12, 13). Davidca chashna sinchi crij runami carca. Shuj cutinca Diostaca canta sirvishcamantami tucuita charini nircami (Salmo 16:5). Chashnallataj Diospaj amigo cashcamantami achcata pagui nishpa paipi shunguta churaj carca (Salmo 16:1). Chaimi paica: ‘Tucui shunguhuanmi cushicuni’ nishpa quillcarca. Shinaca Diospaj amigo cashcamantami tucuimanta yalli cushilla sintirirca (Salmo 16:9, 11). Cullquillapi yuyajcuna o cushicunallapi yuyajcunaca mana David shinachu cushilla sintirincuna (1 Timoteo 6:9, 10). Joven, Jehovapi tucui shunguhuan crishpa, paita sirvishpallami cambaj causaipica alli ringa. Shinami mana yanga causacushcata cuentata cungui. Pero Diospi tucui shunguhuan cringapajca Bibliata estudiashpa, pai rurashcacunapimi yuyana cangui. Pai cꞌuyaj, llaquij Dios cashcatapishmi yuyarina cangui (Romanos 1:20). w18.12 págs. 22, 23 párrs. 7, 8

Pablo chashna nishpaca cazarana valishca cashcallataca mana nicurcachu. Ashtahuanpish Diosta sirvijcunaca cada uno matrimoniota valishca cashcata ricuchunmi quillcarca. Can cazado cashpaca ¿cambaj matrimoniota chashnachu ricungui? Matrimonio valishca cashcata ricushpaca Jesuspaj ejemplotami caticunchij. Fariseocunaca Jesustaca divorciarinamantami tapurca. Chaimi Jehová Dios imata yuyashcata ricuchingapajca paica: “Chashna cashcamanta cꞌarica, yaya mamata saquishpa, paipaj huarmihuan tandanacushpa, ishquindijmanta shuj aichallami tucunga”. “Chashna cashcamanta Taita Dios tandachishcataca, ni pi amataj chꞌicanyachichun” nirca (Marcos 10:2-12; Génesis 2:24). Jesusca Jehová Dios matrimoniota callarichishcataca allimi yacharca. Chaimantami Jesusca matrimonioca tucui vidapajmi can nirca. Shinallataj Yaya Diosca Adán Evataca divorcianacushpa matrimoniota chaipi tucuchina cashcata mana nircachu. Ashtahuanpish paica “ishquindij” tucui vida shuj shinalla causachunmi munarca. w18.12 págs. 9, 10 párrs. 2-4

Bibliata yachai callarishpaca Dios mandashcacunata cazuna imamanta importante cashcatami intindinchij. Pero espiritualmente huiñarishpaca imata munashcata o imata mana munashcata, shujtaj ruraicunatapish ima shina ricushcatami intindinchij. Shinami Dios munashca laya decisioncunata agllanchij, pai munashca shina imatapish ruranchij Yaya Dios shina yuyanaca sumajmi can. Pero juchayujcuna cashcamantami maipica mana pai shina yuyai tucunchij. Por ejemplo, mapa cosascunamanta, charina cosascunamanta, huillanamanta, yahuarmanta Dios ima shina ricushcata intindinaca sinchichari ricurin. Chaimanta, imapipish Dios shina yuyashpa catingapajca ¿imatataj rurana canchij? Ñucanchij yuyaicunata mushujyachinami canchij. Chaipajca Bibliatami estudiana canchij. Imata yachashcapipish cutin cutinmi yuyana canchij. Dios laya yuyangapajpish achcatami esforzarina canchij. w18.11 págs. 27, 28 párrs. 2-4

Habacuc runaca sinchi punllacunapimi causarca. Tucui gentecuna millaicuna, llaquichijcuna tiyashcamantami dimastij llaquilla carca. ¿Ima horataj llaquichijcunaca tucurina carca? ¿Diosca ima nishpataj mana imata rurarca? Cai profetaca israelcunapurallataj llaquichinacushpa imatapish mana cashcata rurajcuna cajta ricushpami mana imata rurai tucurca. Chaimi ima tucucushcaca Diospajca mana importantechu yuyachin, ayudangapajpish qꞌuipayacunmi nishpa yuyashcanga. Shinapish Yaya Diostaca ricuhuai nishpami mañarca. Ñucanchijpish ¿huaquinpica cai profeta shinachu sintirishcanchij? ¿Habacuc runaca Jehová Diospi confianata pai nishcacunapi crinata saquishcachu canga? Mana. Habacuc runaca problemacunata, dudacunata charishcamantami Diostaca ayudahuai nishpa mañacurca. Shinami Diospi confiashcata, esperanzatapish charishcata ricuchirca. Pero Yaya Dios mana imata rurashcamanta, ashtahuanpish llaquicuna tiyachun saquishcamantami preocupado carca. w18.11 pág. 16 párrs. 4, 5

Jesusta catij Pedro y Andrespi yuyashun. Paicunaca pescadocunata japingapajmi dedicarijcuna carca. Jesusca paicunataca ‘pescadocunata japijta shinallataj, gentecunata pushamujcunatami rurasha’ nircami. Chaimi tucuita saquishpa Jesusta catircacuna (Mateo 4:18-20). Pero Diospaj Shimita yachai callarishpa trabajanata saquina cashcataca mana nisha ninchu. Micunapaj, churanapaj, familiata cuidanapajca trabajanami canchij (1 Timoteo 5:8). Shinapish causaipi ima ashtahuan importante cashcata, charina cosascunata ima shina ricuna cashcatami yuyarina canchij. María imata rurashcata ricushun. Paipajca golf nishca pugllaimi ashtahuan importante carca. Chaimantami alli pugllaj tucushpa achca cullquita ganana munaita charirca. Shinapish Bibliamanta yachai callarishpaca imata yachashcatami pajtachi callarirca. Pero Diosta sirvinatapish, charina cosascunata mashcanatapish ishquindijtaca mana rurai pudina cashcatami cuentata curca (Mateo 6:24). Chaimantami chai pugllaita saquinata decidirca. Cunanca precursorami can. Paica, “cushillami causacuni” ninmi. w18.11 págs. 5, 6 párrs. 9, 10

Jesusca ña 30 huatacunata charishpaca carpintero canata saquishpami, Dios churashca Mandanamanta huillanapi ocuparij carca. Paipajca chai mingashcata pajtachinami ashtahuan importante carca. Paillatajmi, ñucaca chaipajmi cachashca cani nirca (Mateo 20:28; Lucas 3:23; 4:43). Jesusca Diosmanta huillanataca puntapimi paipaj causaipi churarca. Shinallataj shujtajcunapish chaillatataj rurachunmi munarca (Mateo 9:35-38). Achcacunaca mana carpintero canchijchu. Pero tucuicunami alli huillaicunata yachachijcuna canchij. Alli huillaicunata huillana ashtahuan importante cashcamantami Yaya Diospish chaipi participan. Bibliapipish: “Ñucanchijca, Diospajta paihuan rurajcuna o trabajajcunami canchij” ninmi (1 Corintios 3:9; 2 Corintios 6:4). Ñucanchijpish Salmota quillcaj runa shinallatajmi: “Quiquinpaj tucui shimicunaca ima mana pandachu tucuimi alli” can ninchij (Salmo 119:159, 160). Chaimantami huillacushpaca, “mana llulla shimitapish ima shina cashcatataj alli” yachachicushcata ricuna canchij (2 Timoteo 2:15). Jehová Diosmanta, Jesusmanta, Dios churashca Mandanamanta yachachingapajca Bibliatami utilizana canchij. Chaimanta Bibliahuan alli yachachingapaj esforzarishunchij. w18.10 pág. 9 párrs. 1, 2

Cusaca Jesucristopaj ejemplotami catina can. Chaimi huarmica paita tucui shunguhuan respetanga (Efesios 5:22-25, 33). Cusata respetaj huarmica paipaj cusa ima shina sintirishcata intindingapajmi esforzaringa. Yaya mamacuna cancunapura preocuparij cashcata ricuchishpaca huahuacunamanca shuj alli ejemplotami saquicunguichij. Shinallataj huahuacunamanca shujtajcunamanta preocuparina cashcata, allita rurana cashcatami yachachina canguichij. Por ejemplo, Tandanacuna Huasicunapica ama callpashpa purichunmi yachachina canguichij. Chashnallataj huauqui panicunapura imata rurangapaj o micungapajmi shuj rato tandanacunchij. Chaipica mayorcunaraj micunata japichunmi huahuacunataca shuyanata yachachina canguichij. Cutin shuj huahua ñucanchijta ayudangapaj punguta pascajpica felicitanami canchij. Chaimi paica alli sintiringa. Shinallataj “imatapish cujmi, cushcata japijta yalli cushicun” nishca yuyaitami shungupi huaquichinga. w18.09 pág. 28 párrs. 5, 6

Apunchij Jesucristopaj mandashcacunaca siempremi ñucanchijta ayudanga. Chaimanta Diospaj organizacionpi cunanlla tiyashca cambiocunata pajtachishcamanta ima shina beneficiarishcata yuyarishunchij. Familiahuan Diosta adoracushpaca tandanacuicunapi, huillanapi tiyashca cambiocuna ima shina ñucanchij familiata ayudashcatami yachai tucunchij. Chaita yachashpami achcata animarishun. Diospaj organizacionpi mandashcacunata cazushpaca achca beneficiocunatami chari tucunchij. Chaita yuyarishpami cushilla cazushun. Por ejemplo, publicacioncunataca ña mana tanto ñaupa shina impriminchijchu. Shinami cullquita ahorranchij. Shinallataj mushuj tecnologiata utilizashcamantami ashtahuan gentecunaman Diosmanta huillai tucunchij. Pudirijpica ¿ima nishpataj mana publicación electronicacunata, videocunata, audiota ashtahuan utilizanchij? Chaita rurashpaca Jesús shinallatajmi Diosman cushca donacioncunataca alli utilizashun. Jesús ñucanchijta pushachun tucui shunguhuan apoyajpica ñucanchij crishcacunami sinchiyanga, huauqui panicunahuanpish tandallami catishun. w18.10 pág. 21 párrs. 17-19

Llaquilla caj huauqui panicunaca Diostami animota cuhuai nishpa mañancuna. Yaya Dios shina cꞌuyaj cashpaca chai huauqui panicuna minishtishca animotami cui pudishun (2 Corintios 1:3-6). Shinapish huauqui panicuna mana pandaringachu nishpaca ama yuyashunchijchu. Shina yuyashpaca qꞌuipataca llaquillami sintirishun (Eclesiastés 7:21, 22). Jehová Diosca ñucanchij mana rurai pudishcataca mana mañanchu. Pai shina yuyashpaca shujtajcuna pandarijpipish mana utca pꞌiñarishunchu (Efesios 4:2, 32). Shinallataj huauqui panicunataca, “Diosta sirvingapaj mana achcata esforzaricunguichu” nishpa mana malta sintichinachu canchij. Shujtajcunahuanpish mana comparanachu canchij. Chaipaj randica ima allita rurashcamanta siempre felicitanata yachashunchij. Chashnami paicunaca animarishpa Diosta sirvishpa ñaupajman catingacuna (Gálatas 6:4). w18.09 pág. 13 párrs. 16, 17

Diospaj munaita ruranaca Jesuspajca shuj micuita micucushca shinami carca. Ima shinami sano micunata micushpaca alli sintirinchij. Chashnallatajmi Diospaj munaita rurashpaca alli sintirishun y ñucanchij crishcacunapish sinchiyanga. Dios yachachishcacunata causaipi pajtachishpaca yachaisapami tucushun (Santiago 3:13). Yachaisapa cajcunaca achca allicunatami chasquincuna. Bibliapica: “Chai yachashcahuanca, munanayaj sumaj charinacunapish mana chꞌimbapuraipajmi”. Shinallataj: “Chai yachanaca paipi charirijcunapajca, causaita cuj yurami. Paita ña chariracujcunaca cushicunmari” ninmi (Proverbios 3:13-18). Shuj punllaca Jesusca: “Cai nishcacunata alli intindishpa chaitataj rurashpaca cushichishcami canguichij” nircami (Juan 13:17). Jesusta catijcunaca paita cazunata mana saquishpallami cushilla causana carcacuna. Y chaitatajmi rurarcacuna. Paicunaca Jesús yachachishcacunata cazushpa, paipaj ejemplota catishpami causajcuna carca. w18.09 pág. 4 párrs. 4, 5

Adán Evaca Edén huertapica paicunallami carca. Paicunalla cashpapish shujtajcunapimi yuyana carca. ¿Imamanta? Diosca shuj trabajotami paicunamanca mingashca carca. Yaya Diosca, huahuacunayuj tucushpa, cai pachapi jundarishpa shuj sumaj paraisota ruranguichij nishcami carca (Génesis 1:28). Diosca tucuicuna cushilla causachunmi munan. Adán Evapish paicunapaj huahuacuna cushilla causanapimi yuyana carca. Tucui familia tandalla trabajashpami cai Allpataca shuj paraisota rurana carcacuna. Cai Allpa shuj paraíso cachunca jucha illaj gentecunami Dioshuan trabajashpa paipaj munai pajtarichun ayudana carca. Shinami Diospaj samanaman yaicunman carcacuna (Hebreos 4:11). Chai sumaj trabajota rurashpaca cushillami canman carcacuna. Shinallataj paicuna mana mitsa cashcata ricuchijpi, shujtajcunapi yuyashcata ricuchijpica Diosca bendicianmanmi carca. w18.08 págs. 15, 17 párrs. 2, 8, 9

¿Ñucanchijta pi yangamanta juchachijpica imatataj rurana canchij? Jesustapish Bautizaj Juantapish chashna yangamanta juchachishcatami yuyari tucunchij (Mateo 11:18, 19). Pero ¿Jesusca imatataj rurarca? Paica difindirishpa tiempota pirdinapaj randica gentecunataca ñuca ima rurashcata, ima yachachishcatami ricuna canguichij nircami. Shinallataj, “alli yuyaita charishcataca ruraicunahuanmi ricuchi tucunchij” nircami (Mateo 11:19, NM ). ¿Caimantaca imatataj yachanchij? Ñucanchijtapish Jesusta shinallatajmi shujtajcunaca mana allicunata nishpa malpi saquichingacuna. ¿Chaipica imatataj rurana canchij? Shujtajcuna llullacunata nijpipish chai mana cierto cashcatami ñucanchij ruraicunahuan ricuchina canchij. Jesús rurashca shina ñucanchijpish alli causashpaca pi juchachijpi o ima llullacunata nijpipish mana cierto cashcatami ricuchishun. w18.08 págs. 6, 7 párrs. 11-13

Cainpish Salomonpish israelitacunapish Diosta mana cazushcamanta arrepintirishpa cambiana oportunidadtami charircacuna (Hechos 3:19). Shuj huauqui o pani pandarijpica Diosca mana chai rato paimanta caruyanchu. Yuyarishun, Aarón pandarijpica Diosca perdonarcami. Cunan punllacunapish mana alli cosascunata ama rurachunca Diosca Bibliahuan, publicacioncunahuanmi ñucanchijta advertin. Mana cashpaca shuj huauquita o panitami alli consejocunata cuchun utilizan. Chaita cazujpica Diosca ñucanchijta llaquishpami catinga. Diosca ñucanchijtaca jatuntami cꞌuyan (2 Corintios 6:1). Chaimantami paica “cai pacha millai munaicunata” saquina oportunidadta cun (Tito 2:11-14). Tucuri punllacunapi causacushcamantami tucui laya tentacioncuna, mana alli yuyaicuna, mana alli munaicuna ricuringa. Chaipimi Jehová Diosllata tucui shunguhuan adorashcata ricuchina canchij. Diospaj parte cashcata ricuchingapaj sinchita esforzarishunchij. w18.07 pág. 20 párrs. 20,  21

Cai pachapi alli ricurina munaita charinapaj randica Diospaj ñaupajpi alli ricurinatami mashcana canchij. ¿Chaipajca imatataj yuyarina canchij? Puntapica, Jehová Dios paita tucui shunguhuan sirvijcunata mana cungarij cashcata, cꞌuyaj cashcatami yuyarina canchij (Hebreos 6:10; 11:6). Diosta alli sirvijcunaca paipajca achca valishcami can. Cashcata ruraj Dios cashcamantami paita sirvijcunataca siempre yuyarin. “Cashcata rurajcunapaj causaitaca Mandaj Diosca” ricucunmi. Chaimantami llaquicunamanta ima shina quishpichinata paica alli yachan (Salmo 1:6; 2 Pedro 2:9). Shinallataj Yaya Dios ñucanchij mana yuyashca shina cꞌuyaita ricuchishcatami yuyarina canchij. Shujtajcuna ricuchunlla imatapish rurajpica Diosca ñucanchijtaca mana bendiciangachu. ¿Imamantataj chaita ninchij? Jesusca paicuna chashna rurashpaca runacuna alli nishcallatami ña japincuna nircami (Mateo 6:1-5). Cutin cancuna shujtajcunapaj allita rurajpi mana pi felicitajpipish, ‘pacallatapish ricuj cambaj Yayaca’ mana yuyashca shinami bendicianga nircami. w18.07 pág. 5 párrs. 8, 10

Pedrotaca Cesarea llajtapi causaj Corneliopaj huasiman richunmi mandashca carca. Muscuita tucui ricushca qꞌuipaca imamanta chaita nicushcataca Pedroca mana intindircachu. Chai ratomi Cornelio cachashca runacunaca Pedropajman chayamurcacuna. Pedroca Diospaj espíritu pushajpimi Corneliopaj huasiman chai runacunata compañashpa rirca. Judiocunaca mana judiocunapaj huasimanca mana yaicujcunachu carca. Apóstol Pedro gentecunata ñahuillata ricunata yachashca cashpaca Corneliopaj huasimanca nunca mana rinmanchu carca. Shinashpaca ¿imamantataj rirca? Paica shuj muscuita shina ricushcamanta, Diospaj espíritu pushachun saquishcamantami rirca. Corneliohuan parlashca qꞌuipami Pedroca: “Pi cashpapish Taita Diospaj ñaupajpica tucuicuna chai shinallataj cashcatami cunantajca yachani. Maijan llajtapi causaj cashpapish Taita Diosta manchashpa allita rurajtami Taita Diosca alli nin” nirca (Hechos 10:34, 35). Cai mushuj yachaica Pedropajca allimi ricurirca. w18.08 pág. 10 párrs. 3, 4

Ñucanchijca Dios millashca cosascunataca mana ruranchijchu. Shinapish Bibliapica chaitami rurana cangui, chaitaca mana ruranachu cangui nishpaca mana tucuita mandanchu. Shinashpaca Dios munashca shina causacushcataca ¿ima shinataj yachanchij? Bibliata estudiashpami alli concienciata charishun. Chashnami alli decisioncunata agllashpa Dios munashca shina causacushcata ricuchishun. Yaya Diosca ñucanchijtaca achcatami cꞌuyan. Chaimantami ñucanchij conciencia alli cachunca Diosca paipaj yuyaicunataca Bibliapi churashca. Isaías 48:17, 18-pica: “Ñucaca Mandaj Diosmi cani. Cambaj allipaj yachachij cambaj Diosmi cani. Can catina ñanta yachachij Diosmi cani” ninmi. Bibliapi tiyaj yuyaicuna shunguman chayajpimi ñucanchij concienciataca allita rurachun yachachicunchij. Chaita rurashpami alli decisioncunata agllashun. Bibliapica mana mandashcacunallachu tiyan. Shujtaj yuyaicunapishmi tiyan. Chai yuyaicunami alli decisioncunata agllachun ayudan. Bibliapi tiyaj yuyaicunata yachashpaca Dios ima shina yuyashcatami intindishun. Shinallataj imamanta Bibliapi huaquin mandashcacunata churashcatami yachashun. w18.06 págs. 16, 18 párrs. 5, 8-10

Herodes parte cajcunaca ¿imamantataj Jesustaca chashna tapurcacuna? Jesús chai impuestota mana paganachu canguichij nijpica romanocunapaj contra cashcatami ricuchinman carcacuna. Pero paganami canguichij nijpica paita catijcunaca shitashpami rinman carca. Jesusca politicapi mana chagrurishcatami ricuchirca. Paica impuestota cobrajcunaca shuhuajcuna cashcatami yacharca. Pero paica Dios churashca Mandanalla tucui problemacunata tucuchinata yachashcamantami chai problemacunata allichinata mana munarca. Jesús shinallatajmi ñucanchijpish politicapi mana chagrurina canchij. Huaquin politicocuna allita laya ruracujpipish mana apoyanachu canchij. Shinallataj cai politicomi alli, cutin cai politicoca mana allichu nishpa yuyanapaj randica Dios churashca Mandanalla alli causaita apamunatami yuyarina canchij (Mateo 6:33). Achca testigo de Jehovacunami politicapi cana yuyaicunata ladoman saquishcacuna. w18.06 pág. 6 párrs. 9-11

Huaquin angelcunaca Diablopaj trampapi urmashpami cai pacha huarmicunahuan huainayashpa huahuacunata charircacuna. Satanasca angelcunataca mana chai trampallapichu urmachirca. Ashtahuanpish cai angelcunataca gentecunatami mandanguichij nishcami canga. ¿Imamantataj chaicunata rurarca? Diabloca ‘huarmipaj huahua huahuacunamanta’ shamuj profeciata jarcanatami munarca (Génesis 3:15). Pero Jehová Diosca Diablopaj, demoniocunapaj munaicuna ama pajtarichunmi yacu juilluta apamurca. Huainayana munaicuna, jatun tucushca canaca Diablopaj trampacunami can. Chai trampacunapi nunca mana urmashachu nishpaca mana yuyanachu canchij. Yuyarishun, chai mana alli angelcunaca huaranga huaranga huatacunatami Diosta sirvishpa causarcacuna. Pero, mana alli munaicuna paicunapaj shunguman yaicuchunmi saquircacuna. Ñucanchijpish achca huatacunata Diosta sirvicujpipish mana alli munaicuna ñucanchij shunguman yaicui tucunmi (1 Corintios 10:12). Chaimantami ñucanchij shungu ima laya cashcata alli ricuna canchij. Jatun tucuna yuyaicuna, mapa munaicuna ñucanchij shunguman yaicuchunca mana saquinachu canchij (Gálatas 5:26; Colosenses 3:5). w18.05 págs. 18, 19 párrs. 11, 12

Apóstol Pabloca achca judiocuna pai huillashcata mana uyasha nijpimi llaquilla sintirirca. Shina sintirishpapish huillanataca manataj saquircachu. Pabloca Roma llajtapi Diosta sirvijcunamanmi judiocunamanta ima shina sintirishcata huillarca. Paica: “Israelcuna quishpirishca canaman chayachun nishpami, ñuca shungupica chai yuyailla Diosta mañacuni. Paicuna Dios yuyailla cashcataca, ñucapish huillai tucunimi. Chashna cashpapish Diosta rijsina cashca shinatajca mana rijsincunachu” nircami (Romanos 10:1, 2). Pabloca tucui shunguhuanmi huaquin judiocuna quishpirichun munarca. Chaimantami huillanataca manataj saquirca (Romanos 11:13, 14). Shinallataj paicuna Dios churashca Mandanamanta uyachunmi Pabloca Diosta ayudahuai nishpa mañarca. Ashtahuancarin huaquin judiocuna “Dios yuyailla” cashcatami ricurca. Chaimantami pai layallataj Jesusta alli catijcuna tucunata yacharca. w18.05 págs. 4, 6, 7 párrs. 4, 13, 14

Huauqui panicuna imata minishtishcatami ricurayana canchij. Judá llajtapi causajcunamanpish Pabloca, “irquiyashca maquicunata, mana cuyuri tucuj cunguricunata jatarichichij. Shinallataj cojopish ñanmanta ama llujshichun, ashtahuanpish alliyachun cancunapaj huishtu ñancunata derechaichij” nircami (Hebreos 12:12, 13). Jovencunapishmi sinchiyachij shimicunahuan shujtajcunata animai tucuncuna. Pabloca: ‘Cristomanta cushicuna, cꞌuyaihuan animachina, espiritumanta shuj yuyailla cana, ucu shungumanta cꞌuyanacuna, llaquij canapish tiyajpica, chai shinallataj cashcata yuyashpa, chai cꞌuyaillahuantaj cꞌuyanacushpa, shuj munailla, shuj shinalla yuyashpa ñucata ashtahuan cushichipaichij. Imata rurashpapish mishanacushpa yanga jatun tucunapajllaca ama ruraichijchu. Chaipaj randica, ama jatun tucushpa caishujcunaca canta yalli cashcata yuyashpa, caishuj chaishuj cꞌuyanacuichij. Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij’ nircami (Filipenses 2:1-4). w18.04 págs. 23, 24 párrs. 10, 12

Jehová Diosca paita sirvishpa causachunmi Jesusta cachashpa juchamanta, huañuimanta ñucanchijta cacharichirca. ¿Cai pachapaj munaicunata catishpa ama huatashca shina cangapajca imatataj rurana canchij? Diostami tucui shunguhuan, tucui almahuan, sirvina canchij (Gálatas 5:16). Noé runamanta yachashun. Paipish paipaj familiapish millai, huainayaj gentecunapurapimi causarca. Chashnapish, ¿chai gentecuna laya ama tucungapajca paicunaca imatataj rurarcacuna? Paicunaca Jehová mandashcata rurashpami ocupados carcacuna. Por ejemplo, arcatami rurana carca, paicunapajpish animalcunapajpishmi micunata tandana carcacuna. Shinallataj yacu juillu shamunamantapishmi gentecunaman huillana carca. Bibliapica: “Noeca, chashnatajmi rurarca. Taita Dios mandashca shinami tucuita rurarca” ninmi (Génesis 6:22). Noepish paipaj familiapish chashna rurashcamantami quishpirircacuna (Hebreos 11:7). w18.04 págs. 11-13 párrs. 8, 11, 12

Diablopish millai angelcunapish “allpa pachapi causajcunata” pandachingapajca yanga religioncunatapishmi utilizan (Apocalipsis 12:9). Chaimantami panda religioncunapica Diosmanta llullacunata yachachin. Gentecunapish Diospaj shutita ama yachachunmi Diabloca imatapish ruran (Jeremías 23:26, 27). Diablo chashna pandachijpimi panda religionpi cajcunaca Diostami adoracunchij yuyancuna. Pero demoniocunata adoracushcataca mana cuentata cuncunachu (1 Corintios 10:20; 2 Corintios 11:13-15). Shinallataj Satanasca gentecunata pandachingapajca negociocunatami utilizan. Por ejemplo, ‘achca cullquita, cosascunata charishpallami cushilla causaita chari tucunchij’ nishpa yuyachunmi Diabloca munan (Proverbios 18:11). Chaimantami gentecunaca charinallata mashcashpa causancuna (Mateo 6:24). Diosta sirvijcunapish cai pachapaj cosascunata cꞌuyashcamantami Diosta sirvinata ladoman saquishcacuna (Mateo 13:22; 1 Juan 2:15, 16). w18.05 pág. 17 párrs. 6, 7