Octubre

Jehová Dios, Jesús shina gentecunapaj shungupi tiyaj yuyaicunata mana yachai pudishpapish paicuna ima shina sintirishcata intindingapajmi esfuerzota ruranchij (2 Corintios 11:29). Shinallataj millai gentecuna paicunallapi yuyajpipish ñucanchijca mana paicuna shina canchijchu. Ashtahuanpish apóstol Pablo ima nishcatami ruranchij. Paica: “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” nircami (Filipenses 2:4). Ancianocunami ashtahuanca llaquij cashcata ricuchina can. ¿Imamanta? Jehová Diosca paicunamanmi huauqui panicunata cuidachun mingashca. Chaimantami paicunata ima shina cuidashcata Diosman ricuchingacuna (Hebreos 13:17). Huauqui panicunata ayudangapajca ancianocunaca llaquij shungutami charina can. Llaquij shungu cangapajca ¿imatataj rurana can? Jehová cꞌuyashca huauqui panicunaca ima llaquita charishpaca parlanatami munancuna. Pero maipica ima shina huillanata mana yachancunachu. Chaimantami llaquij ancianocunaca paicunata tapuicunata rurashpa, pacienciahuan alli uyana can. Chashnami paicunamanpish tiempota dedicacushcata ricuchingacuna (Proverbios 20:5). Chaita rurajpica huauqui panicunaca ancianocunapimi ashtahuan confiangacuna. Shinallataj ancianocunahuanmi ashtahuan apanacungacuna, cꞌuyaita ricuchingacunapish (Hechos 20:37). w19.03 pág. 17 párrs. 14-17

Shujtajcuna pagui nijpica ñucanchijmi cushilla sintirinchij. Pero ñucanchij pagui nijpica paicunami cushilla sintirincuna. ¿Imamantataj cushilla sintirincuna? Ñucanchijman ima minishticushcata cushpa o imapi ayudashpami cushilla sintirincuna. Chashnami caishuj chaishujpura ashtahuan alli apanacunchij. Cunan punllapaj versopi nishca shinaca shujtajcunata pagui ninaca achca valishcami can. Curi manzanata, cullqui platopi cushcaca sumajmi ricurin. Shinallataj chai manzanaca achcami valin. ¿Shujtajcuna chashna regalota cujpica ima shinataj sintirinchijman? Ñucanchijpish shujtajcunata sumaj shimicunahuan pagui nijpica paicunapajca achca valishcami canga. Ashtahuancarin ima shinami shuj curi manzanaca unai unaicama valishca can. Chashnallatajmi shujtajcunaca ñucanchij pagui nishcata unai unaicama shungupi huaquichingacuna. w19.02 pág. 15 párrs. 5, 6

Adán, Evaca allita mana allita yachaj chayachij yuramantami micurcacuna. Chaita rurashpami Jehovapipish paipaj mandashcacunapipish mana shunguta churashcata ricuchircacuna. Ashtahuanpish paicunallatajmi ima alli cashcata, ima mana alli cashcata agllashcata ricuchircacuna. Pero chaita rurashcamantaca ¿imataj tucurca? Diospaj amigo canatami saquircacuna. Huiñai causaitapishmi pirdircacuna. Ashtahuancarin paicunapaj culpamantami paicunapaj huahua huahuacunapish juchayuj tucushpa huañuncuna (Romanos 5:12). Pero eunuco runaca mana Adán, Eva shinachu carca. ¿Chaitaca ima shinataj yachanchij? Felipe Diospaj Shimita huillajpica eunuco runaca Diostapish Jesustapish pagui nishcatami ricuchisha nirca. Chaimantami utca bautizarirca (Hechos 8:34-38). Ñucanchijpish Diosman mingarishpa, eunuco runa shina bautizarishpaca ¿imatataj ricuchinchij? Jehová Diostapish Jesustapish tucuita cushcamanta pagui nishcatami ricuchinchij. Shinallataj Diosllapi confiashcata, ima alli cashcata o ima mana alli cashcata pailla agllana cashcatami ricuchinchij. w19.03 pág. 2 párrs. 1, 2

Ima pandata mana ruranaca Diosta cꞌuyashcamanta paita tucui causaipi cazuna cashcatami nisha nin. Hebreo rimaipi “ima pandata mana rurana” nishpaca entero o sano cashcatami nicun. Por ejemplo, israelitacunaca Diosmanca sano, alli animaltami cuna carca (Levítico 22:21, 22). Chaimantami Diosta sirvijcunaca Mandaj Diosmanca ciego animalcunata, chaqui pꞌaquirishcacunata, ima utu cajcunata, ungushca animalcunata mana cuna carca. Jehová Diosca sano animalcunata cuchunmi munarca (Malaquías 1:6-9). ¿Imamanta? Caipi yuyashun. Tiendapi o mercadopica pedazo illaj frutacunataca mana randinchijchu. Ashtahuanpish enterotami randinchij ¿nachu? Chashnallatajmi Diosca paita tucui shunguhuan cꞌuyachun, tucui causaipi cazuchun munan. w19.02 pág. 3 párr. 3

Ñucanchij shunguta cuidangapajca mana alli yuyaicuna, mana alli munaicuna ama yaicuchunmi jarcana canchij. Pero shujtaj cutincunapica ñucanchij shunguta pascanami minishtirin. ¿Imapaj? Ñaupa tiempopi punguta cuidajcunapi yuyashun. Paicunaca contracuna ama yaicuchunmi pungutaca huichcajcuna carca. Pero shujtaj cutincunapica granocunata, micunacunata yaicuchingapajmi punguta pascajcuna carca. Mana chaita rurajpica chai llajtapi causajcunaca yaricaihuanmi huañunman carca. Chai shinallatajmi Diospaj yachachishcacunata chasquingapajca ñucanchij shunguta pascana canchij. Bibliapica Diospaj yuyaicunami tiyacun. Chaimantami Bibliata liyishpaca alli yuyaicunata, alli munaicunata, alli causaitapish charishun. Bibliata liyishpa alli intindingapajca puntapica, Yaya Diostami mañana canchij. Chashnami paipaj sumaj yuyaicunata alli intindishun (Salmo 119:18). Qꞌuipaca, imata liyishcatami cutin cutin yuyarina canchij. Chashna rurashpami Diospaj yachachishcacunataca ñucanchij shungupi huaquichishpa charishun. Shinami Diospaj yuyaicunata pajtachinata munashun (Proverbios 4:20-22). w19.01 pág. 18 párrs. 14, 15

Yaya Diosca cada uno imata cui pudishcallatami cuchun mañan. Por ejemplo, israelitacunaca chꞌican chꞌican sacrificiocunatami Diosman cujcuna carca. Huaquincunaca cullquita charishpaca shuj malta ovejata o malta chivotami cujcuna carca. Pobrecunaca ishqui urpita cashpa, ishqui palomata cashpami cujcuna carca. Cutin ni imata mana charishpaca “alli cutatami” sacrificiota rurangapaj cui pudircacuna (Levítico 5:7, 11). Chai tiempocunapica cutaca baratomi carca. Pero alli cutahuan sacrificiota rurajllapimi Diosca chasquij carca. Cunan punllacunapipish Yaya Diosca ñucanchij cui pudishcallata cuchunmi mañan. Chaimantami comentariocunata cucujpica Pablo o Apolos líquido alli rimajcuna cachunca mana shuyan (Hechos 18:24; 26:28). Diosca tucui shungumanta comentariota cuchunmi munan. Yuyashun, shuj viuda huarmi Diospaj huasipi ishqui uchilla cullquita churajpipish chai ofrendataca allimi chasquirca. ¿Imamanta? Chai huarmica imata mana charij cashpapish, pai causanapaj tucui charishcatami curca (Lucas 21:1-4). w19.01 págs. 8, 9 párrs. 3-5

Gentecuna ñucanchijta pꞌiñana cashcataca allimi intindinchij. Jesusca paita catijcunataca, tucuri punllacunapica cancunataca dimastijmi llaquichinga nircami (Mateo 24:9; Juan 15:20). Isaías nishca shinaca gentecunaca ñucanchijta mana pꞌiñangallachu. Ashtahuanpish catirashpa llaquichishpa, tucui laya llullacunata nishpami llaquichingacuna (Mateo 5:11). Jehová Diosca gentecuna ñucanchijta llaquichichunca mana jarcangachu (Efesios 6:12; Apocalipsis 12:17). Pero contracuna chashna rurajpipish mana manchanachu canchij. Yaya Diosca, cancunata llaquichisha nijcunapaj armacunaca imapaj mana valingachu ninmi (Isaías 54:17). Shuj pataca sinchi huairatami jarcan. Jehová Diospish shuj pata shinami ñucanchijtaca llaquichijcunamanta quishpichin (Isaías 25:4, 5). Ñucanchijta pꞌiñajcunaca mana tucui vida llaquichicungallachu (Isaías 65:17). Paicunataca Yaya Diosmi libri tucuchinga. Ima mana cashca shinami chingaringacuna (Isaías 41:11, 12). w19.01 págs. 6, 7 párrs. 13-16

Jovencuna, Jehová Diosca ñucanchijllataj decisioncunata agllachunmi saquin. Ñucanchijtaca chashnami rurashca. Alli decisioncunata agllajpica ñucanchij causaica allimi ringa. Cutin Diosta mana sirvijcunaca computadorapi o tabletapimi lluchulla cꞌari o huarmi mapata ruracujta ricuncuna. Maipicarin shujtajcunahuanpishmi siririncuna. Shinallataj drogatapishmi fumancuna, tragotapish manchanaitami ubyancuna. Mancharina pugllaicunapipishmi participancuna. Paicunaca shuj ratollachari chashna cushilla shina sintirincuna. Pero chashna causashcamantami viciopi urmancuna, unguncuna, huañuncunapish (Gálatas 6:7, 8). Tucuipi libres canchij nishpami yuyancuna pero chashna yuyashpaca pandaricuncunami (Tito 3:3). Jehová Diosta tucuipi cazushpaca alli saludtami charishun, shinallataj libresmi causashun. Chashnami Diosta cazuna ñucanchijpajllataj alli cashcata cuentata cushun (Salmo 19:7-11). Libres cashpapish Dios mandashca shina ima decisioncunata agllajpica ¿Diospish yaya mamacunapish imatataj rurangacuna? Canpi confiashpami canllataj ima decisionta agllachun saquingacuna (Romanos 8:21). w18.12 pág. 19 párrs. 16, 17

Adán juchata rurajpica huaquin cambiocunami tiyarca. Por ejemplo, paipaj juchamantami huañui tiyarca. Chaimantami cusa huarmica mana tucui vida causai pudircacuna. Apóstol Pablopish cusa o huarmi huañujpica matrimonioca chaipimi tucurin. Chaimi causacujrajca shujtajhuan cutin cazarai tucun nirca (Romanos 7:1-3). Jehová Diosca israelitacunaman cushca leypica matrimoniomantami ashata parlarca. Chai leypica cusaca ishqui o yalli huarmicunahuan cazarachun o paita sirvij huarmicunahuan huahuata charichunmi saquirca. Israelitacunaca Dios chai leyta manaraj cujpimi ña chashna causajcuna carca. Pero Diosca huarmicunata, huahuacunata ama maltratachunmi leypica huaquin yuyaicunata churarca. Por ejemplo, shuj israelita paita sirvij huarmihuan cazarashpa, qꞌuipa shujtaj huarmihuan cazarashpaca ¿imatataj rurana carca? Punta huarmimanca cusaca micunata, churanata cushpami catina carca. Paihuanca chayarinacushpapishmi catina carca. Diosca chashna cuidachunmi mandarca (Éxodo 21:9, 10). Cunan tiempoca ñucanchijca chai ley ucupi ña mana canchijchu. Pero Diospajca matrimonio achca valishca cashcatami ricunchij. Chaimantami pai shina valorasha ninchij. w18.12 págs. 9, 10 párrs. 3, 5, 6

Habacuc runaca paipaj preocupacioncunataca Diospaj maquipimi saquirca. Qꞌuipaca Diosca imatashi ruranga nishpami tapurishcanga. Pero Diosca shuj cꞌuyaj yaya shinami Habacuc ima shina sintirishcata intindirca. Habacuc sufricushcamanta ayudahuai nishpa mañacushcatapish allimi yacharca. Chaimantami mana rimarca. Pero mana cazuj israelitacunata ñalla imata rurana cashcatami huillarca. Diosca chaitaca paimanmi puntaca huillashca canga. Diosca Habacucmanca Judapi causaj millai gentecunataca ñallami llaquichisha nircami. ‘Cancuna causai punllacunapi’ nishpaca cai profeta, judiocunapish causan punllacunapi llaquichinatami nisha nicurca. Habacucca ¿chai respuestatachu shuyacurca? Mana. Dios nishcacunaca judiocunataca ashtahuanmi llaquichina carca. w18.11 pág. 17 párrs. 7, 8

¿Diosta manaraj rijsij gentecunataca ima shinataj ricunchij? Apóstol Pabloca sinagogacunapi Diosmanta maillatapish yachaj gentecunata mashcanamanmi rij carca. Shinapish paica judío gentecunallamanca mana huillajchu carca. Ashtahuanpish yanga dioscunata adorajcunamanpishmi huillaj carca. Por ejemplo, Pablopaj punta viajepica, Licaonia ladocunapi causajcunaca Bernabeca Júpiter diosmi, Pabloca Mercurio diosmi can nishpami yuyarcacuna. ¿Paicunata chashna alabajta ricushpaca Pablopish Bernabepish cushillachu sintirishcangacuna? Caishuj llajtacunapi paicunata mana allita tratashca cajpipish ¿caipica allimi pasashun nishpachu yuyashcangacuna? ¿Gentecuna paicunata chashna tratajpica Jehová Diosmanta alli huillaicunataca ashtahuanmi huillashun nishpachu yuyashcangacuna? Mana. Gentecuna chashna tratajta ricushpaca chai ratomi paicunapaj churanacunata lliquirishpa: “Riquichij, ¿ima nishpataj chashnaca ruracunguichij? Ñucanchijpish cancuna shinallataj runacunallami canchij” nishpa caparircacuna (Hechos 14:8-15). w18.09 pág. 5 párrs. 8, 9

Mana llullaj shimita o Dios yachachishcacunata pajtachingapajca ñucanchij yuyaicunata, ruraicunatami cambiana canchij. Apóstol Pedrota yuyarishun. Paica: “Alli cazuj huahuacuna shina caichij. Ñaupa manaraj yachashpa ruracushca mapa munaicunataca ama ruraichijchu”. “Cancunapish tucui causaipi ima jucha illajlla caichij” nircami (1 Pedro 1:14, 15). Por ejemplo, ñaupa Corinto llajtapi causaj gentecunaca Dios yachachishcacunata chasquishpaca achca cambiocunatami paicunapaj causaipica rurana carcacuna. Shinallataj Apóstol Pedroca pai causan punllacunapi Jesusta catijcunataca: “Diosta mana rijsijcuna munashcata ruranataca, ñami sarunman yallitaj rurarcanguichij. Aicha munashcata rurashpa, aichata cushichishpa, machashpa, maipish cachun fiestacunata rurashpa, mana alli yuyaicunallahuan cushicushpa, millanayaj rurashcalla dioscunata adorashpami purircanguichij” nircami (1 Pedro 4:3). Cunan punllacunapish achca gentecunami Dios yachachishcacunata pajtachingapaj mana alli causaita saquina cashcacuna. w18.11 pág. 7 párr. 13

¿Huiñai causaipaj canacunataca ima shinataj tari pudinchij? Ñucanchijpish ñaupa punllacunapi Jesusta catijcuna shinallatajmi huillanaman llujshina canchij. Jesusca paita catijcunataca: “Cancuna mai puebloman, mai llajtaman chayashpaca, maijanpish chasquipaj alli shungu cajta mashcashpa chaiman chayanguichij” nircami (Mateo 10:11). Jatun tucushca gentecuna, Diosmanta yachanata ni shuj interesta charij gentecuna alli huillaicunata chasquinataca mana shuyanchijchu. Chaimantami alli shungu gentecunata, Diosmanta yachanata munajcunata mashcanchij. Cai ejemplopi yuyashun. Jesús carpintero cashpaca pungucunata, yugocunata, shujtaj cosascunata rurangapajmi puntaca alli maderacunata mashcaj cashcanga. Alli maderacunata ña charishpaca chai laya cosascunata rurangapajmi tucui laya herramientacunata alli utilizaj cashcanga. Shinallataj ñucanchijpish puntapica alli shungu gentecunatami mashcana canchij. Chai huashaca yachachingapaj ayudacunata alli utilizashpami Jesusta catijcuna tucuchun ayudana canchij (Mateo 28:19, 20). w18.10 pág. 10 párrs. 3, 4

Jesusta catij Felipemanta yachashun. Paica cambiocuna tiyajpipish huillanapi ocupado canamantami shuj alli ejemplota ricuchirca. Felipeca Jerusalenpi caj congregacionpimi shuj mingashcata pajtachicurca (Hechos 6:1-6). Shinapish Estebanta huañuchishca qꞌuipaca Jesusta tucui catijcunata llaquichingapajmi contracuna jatarirca. Chaimi paicunaca Jerusalenmanta llujshishpa rircacuna. Pero Felipeca Diosmanta huillashpa catinata munashcamantami Samaria llajtaman rirca. Chai llajtapica manaraj tanto Diosmanta huillashcacunachu carca (Mateo 10:5; Hechos 8:1). Felipeca Diospaj espíritu maiman pushajpipish chaiman ringapajmi munarca. Chaimi Yaya Diosca manaraj huillashca ladocunapi huillachun paitaca cacharca. Chai punllacunapica judiocunaca samaritano gentecunataca mana ricunayachijchu carca. Pero Felipe tucuicunata igual trataj cashcata ricushpami samaritano gentecunaca alli sintirishcacuna canga. Chaimi Felipe Diosmanta huillajpica paicunaca alli uyarcacuna (Hechos 8:6-8). Felipeca siempremi Diosmanta huillashpa ocupado carca. Chaimantami paitapish paipaj familiatapish Jehová Diosca achcata bendiciarca (Hechos 21:8, 9). w18.10 pág. 25 párrs. 14-16

Shuj punllaca Jesusca Decápolis nishca lugarpimi carca. Chaipi cajpimi “mana uyaj, mana rimaj runata” pushamurcacuna (Marcos 7:31-35). Chaimi Jesusca paitaca shujtaj lugarman apashpa jambirca. Pero ¿Imamantataj mana gentecunapaj ñaupajpi jambirca? Paica mana uyaj runa achca gentecunapurapi mana alli sintirinatami cuentata curca. Chaimantami pacalla lugarman pushashpa jambirca. Ñucanchijca mana milagrocunata rurai tucunchijchu. Pero huauqui panicuna ima shina sintirishcapi, imata minishtishcapimi yuyai tucunchij. Jesusca mana uyaj runa ima shina sintirishcatami intindirca. Chaimantami cꞌuyaihuan tratarca. Ñucanchijpish mayorllacunamanta, discapacitadocunamanta preocuparishcatami ricuchina canchij. Ñucanchijca Yaya Diospajta achcata rurajcuna cashcamantaca mana rijsishca canchijchu. Ashtahuanpish cꞌuyaita ricuchijcuna cashcamantami rijsishca canchij (Juan 13:34, 35). Cꞌuyaita charishcamantami yuyajllacunata, discapacitadocunatapish tandanacuiman, predicacionman pushashpa ayudanchij. Paicuna Yaya Diospaj mana tanto rurai pudijpipish ayudashpami catinchij (Mateo 13:23). w18.09 pág. 29 párrs. 7, 8

Jehová Diospajpish Jesuspajpish tucuicunami achca valishca canchij (Gálatas 2:20). Ñucanchijpish huauqui panicunataca tucui shunguhuan cꞌuyashcamantami cuidanata munanchij. Paicunahuanca “sumaj causaiman, sinchiyanaman caishuj chaishuj shuj yuyailla catishunchij” (Romanos 14:19). Cai Allpa ña shuj paraíso tucuchunmi shuyacunchij. Chaipica ña ni pi mana llaquilla o desanimado sintirishunchu. Ungüicuna, juchamanta huañui, macanacuicunapish ña mana tiyangachu. Ñucanchijtapish ña ni pi catirashpa mana llaquichingachu. Familia ucupipish ima problemacuna ña mana tiyangachu. Ñucanchij imata rurasha nishcacunapish tucuimi alli llujshinga. Huaranga huatacuna tucurijpica gentecunaca jucha illajcunami cangacuna. Chai qꞌuipaca shuj último pruebami tiyanga. Chai pruebata pasajpica Yaya Diosca paipaj huahuacunata shinami chasquinga. ‘Diospaj huahuacunaca cacharichishpa jatunyachishcami cangacuna’ (Romanos 8:21). Chaimanta, sinchiyachij cꞌuyaita ricuchishpa catishunchij. Chai sumaj paraíso Allpapi causangapaj caishuj chaishuj ayudanacushunchij. w18.09 págs. 11, 13 párrs. 10, 18

Diospaj Shimita estudiacushpaca mana jahua jahuallachu liyina canchij. Tapuicunapaj respuestacunatapish mana señalashpallachu saquirina canchij. Ashtahuanpish chai informacionpi Diosmanta imata yachachishcata, pai imamanta chashna yuyashcata o imamanta chashna rurashcatami analizana canchij. Shinallataj imamanta chaita rurachun nishcata y chaita mana rurachun nishcatami intindina canchij. Ashtahuancarin ñucanchij yuyaipi o causaipi ima cambiocunata rurana cashcatami yuyarina canchij. Cada estudiopi cashna shina yuyangapajca manachari tiempota charinchij. Pero cai yachaicunapi yuyangapajmi tiempota surcuna canchij. Por ejemplo, mashna tiempota estudiarcanchij, chai tiempollatataj yuyaringapajmi dedicarina canchij (1 Timoteo 4:15). Bibliata punllanta estudiashpa, chaipi yuyashpaca Diospaj yuyaicuna imapi mana panda cashcatami yachaj chayanchij. Shinallataj huaquin ruraicunata imamanta Dios chashna ricushcatami intindinchij. Alli intindishpaca ñucanchij yuyaitami cambianchij (Romanos 12:2). Chashnami asha asha Jehová Dios yuyashca shina yuyai callarinchij. w18.11 pág. 28 párrs. 5, 6

Ñaupa tiempopi apóstol Pabloca ñucapish, shujtaj huauquicunapish Dioshuan trabajajcunami canchij nircami. Paicunaca Diospaj Shimimanta huillashpa, yachachishpa purishcamantami chashna nircacuna (1 Corintios 3:6). Ñucanchijpish Dioshuan trabajajcunami cai pudinchij. Chaipajca ¿imatataj rurana canchij? Dios mingashcacunata pajtachingapajca ñucanchij tiempota, fuerzata, charishca cosascunatami cui pudinchij. Chaica shuj sumaj bendicionmi can. Ñucanchij tiempota, fuerzata Diosmanta huillangapaj utilizashpaca cushillami sintirinchij. Bibliamanta estudiota cuj achca huauqui panicunaca chashnami sintirishcacuna. Bibliata estudiajcuna yachachishcata alli intindijpi, paicunapaj crishcacuna sinchiyajpi, alli causai callarijpi, shinallataj imata yachashcatapish shujtajcunaman huillai callarijpica cushillami sintirinchij. Jesusta 70 catijcuna huillanamanta tigramushpaca ‘cushillami carcacuna’. Chaita ricushpami Jesuspish cushilla sintirirca (Lucas 10:17-21). w18.08 pág. 18 párrs. 11, 12

Ñucanchijllapi yallitaj confiashpaca pandarinatami pudinchij. Chaimantami tucuita mana alli yachashpapish, tucuitami alli intindini ninata pudinchij. Shinallataj maijan huauqui panicunahuan mana alli apanacushpaca paicuna allita o mana allita ruracushcata yachanaca mana jahuallachu canga. Imapipish paicunahuan mana de acuerdo cashpaca mana allicunatami ruracunga nishpami yuyai callarishun. Chaimantami paicunamanta shujtajcuna mana allita rimajpica jahualla crishun. Shujtajcunahuan resintirishca cashpaca paicunamantami mana allicunata yuyashun (1 Timoteo 6:4, 5). Ama chashna yuyangapajca shujtajcunata mana envidianachu canchij. Ashtahuanpish ñucanchij huauqui panicunataca shungumanta cꞌuyana, perdonana cashcatami yuyarina canchij (Colosenses 3:12-14). w18.08 págs. 7, 8 párrs. 15, 18

Ñucanchijtaca Jehová Diosmi rurarca. Chaimantami paipaj canchij (Salmo 100:3; Apocalipsis 4:11). Shinapish huatacuna pasajpica huaquin gentecunallatami Diosca paipajlla cachun agllashca. Salmo 135-pica ñaupa punllacunapi Diosta sirvij israelitacunaca paipajllami carcacuna ninmi (Salmo 135:4). Oseas libropica huaquin mana israelitacunapish Diospaj pueblomi tucunga nircami (Oseas 2:23). Cai profeciaca mana israelitacunatapish jahua pachapi Jesushuan mandachun Dios agllai callarijpimi pajtarirca (Hechos 10:45; Romanos 9:23-26). Jesushuan mandangapaj Diospaj espirituhuan agllashcacunaca “jucha illaj llajta” nishcami can. Paicunaca Diospajllami can (1 Pedro 2:9, 10). Cunan punllacunapipish cai Allpapi causagrijcunataca Diosca ñuca pueblo, ‘ñuca agllashcacunami’ can ninmi (Isaías 65:22). w18.07 págs. 21, 22 párrs. 1, 2

Ñucanchijca Jesuspaj ejemplotami catinchij. Paica mana mitsashpami imatapish cuj carca. Chashnami shuj alli ejemplota ricuchishpa saquirca (Mateo 20:28). Chaimantami, “Jesús shina cangapajca ¿imatataj ashtahuan rurana cani?” nishpa tapurina canchij (1 Pedro 2:21). Yaya Diospaj ñaupajpi alli cangapajca paipaj ejemplota y Jesuspaj ejemplotami catina canchij. Chaipajca shujtajcunapi yuyashpami, ima shina ayudai tucushcata ricuna canchij. Jesusca shuj samaritano runamanta parlashpami pi cajpipish, maimanta cajpipish shujtajcunata ayudana cashcata paita catijcunaman yachachirca (Lucas 10:29-37). Jesusca shuj judío, “¿pi shujtajtataj cꞌuyana cani?” nijpimi samaritanomanta parlotaca nirca. Jesús ima shina cutichishcamantaca ¿imatataj yachanchij? Diospaj ñaupajpi alli cangapajca chai samaritano runa shinami imatapish mana mitsashpa shujtajcunaman cuna canchij. w18.08 pág. 16 párrs. 5, 6

Jesusta cuidashcamantaca ¿Diosca Mariata bendiciarcachu? Ari. Chaimantami María imalla nishcacunata, imalla rurashcatapish Bibliapi quillcachirca. Jesús quimsa huata chaupita alli huillaicunata huillacujpica Mariaca manachari paita compañai tucurca. Viuda cashcamantami mana chaita rurai tucushcanga. Jesús imalla rurashcata, yachachishcataca mana shujtajcuna shina beneficiari tucushcachu canga. Shinapish Jesús huañui punllaca Mariaca chaipimi carca (Juan 19:26). Pentecostés fiestapi Jesusta catijcuna Diospaj espirituta manaraj chasquijpipish Mariaca paicunahuanmi Jerusalenpi carca (Hechos 1:13, 14). Chaipi cashcamantami Mariaca jahua pachapi causanaman ringapaj Diospaj espirituta chasquishca canga. Shina cashpaca huiñai huiñaitami jahua pachapi Jesushuan causacunga. Diosta tucui shunguhuan sirvishcamantami Diosca paita chashna bendiciarca. w18.07 págs. 6, 7 párrs. 11, 14

Jesusca valishca yuyaicunatami yachachirca. Chaimantami huaquin ruraicuna llaquicunaman apaj cashcata intindichirca. Por ejemplo, ‘gentecunata pꞌiñashpaca paicunata llaquichinguichijmi. Cutin mapa munaicunata charishpaca huainayanapimi urmai tucunguichij’ nircami (Mateo 5:21, 22, 27, 28). Chaimanta, Bibliapi tiyaj yuyaicunata cutin cutin yuyarishpaca ñucanchij concienciatami allita ruranata yachachishun. Shinallataj alli decisioncunata agllashpami Diosta jatunyachishun. Diosta sirvijcunaca Bibliata yachashpami paicunapaj concienciata allita ruranata yachachin. Chashna jahuapish mana tucuicunachu igual decisioncunata japincuna. Por ejemplo, Bibliapica tragota yallitaj ubyana o machanaca mana allichu can ninmi. Pero ashallata ubyanaca allimi can ninmi (Proverbios 20:1; 1 Timoteo 3:8). Chaimanta, tragota ubyagrishpaca ¿mashnata ubyanallatachu yuyarina canchij? Mana. Asha tragota ubyashpa ñucanchij concienciapi alli sintirishpapish shujtajcunapaj concienciapimi yuyana canchij. w18.06 pág. 18 párrs. 10, 11

Galileocuna Jesús rey cachun munashca qꞌuipallami paica cai shimicunataca nirca. Chashna nishpaca fariseocunapaj, saduceocunapaj, Herodesta catijcunapaj yachachishcacunamanta huaquichirina cashcatami nisha nicurca (Mateo 16:6, 12). Religioncuna politicapi satirijpica siempremi macanacuicuna tiyan. Chaimantami Jesusca paita catijcunataca politicapi ama chagruringuichij nirca. Fariseocunapish, sacerdotecunapish Jesús nishcata uyashpa gentecuna ñucanchijtaca mana uyasha ningachu nishpami mancharcacuna. Shinallataj politicapi, religionpipish alli puestota ña mana charishunchu nircacunami. Paicunaca: ‘Jesús chashna rurashpa catichun saquijpica ñataj paita tucuicuna crinman, ñucanchij Taita Diospaj huasitapish Roma llajtamanta shamushpa urmachishpa shitanman, cai ñucanchij llajtatapish ñataj quichunman’ nircacunami. Chaimantami Jesusta huañuchinata yuyarircacuna (Juan 11:48). Sacerdotecunata mandaj Caifasmi Jesusta ima shina huañuchinata ricurca (Juan 11:49-53; 18:14). w18.06 pág. 7 párrs. 12, 13

Diabloca demoniocunapi crichunca mana yanga religioncunallatachu utilizan. Shujtaj trampacunatapishmi utilizan. Por ejemplo, huaquin peliculacuna, video juegocunaca brujeriata ruranahuan, huañushcacunahuan parlanahuan chagrurishcami can. Chaicunata ricuna o rurana alli laya cashcata crichunmi Diabloca munan. Chai trampacunapi ama urmangapajca ¿imatataj rurana canchij? Diospaj organización cai diversioncunami alli, cutin chai diversioncunaca mana allichu nichunca mana shuyanachu canchij. Chaipaj randica cada unomi Dios mandashcacunata alli yachashpa ima alli cashcata ima mana alli cashcata agllana canchij (Hebreos 5:14). Shinallataj ‘mana nij tucushpalla’ Diosta cꞌuyashpaca alli decisioncunatami agllashun. Chaimanta: “Ima diversioncunata agllagricujpi ñucahuan Bibliamanta yachacujcunaca ¿ñuca yachachishcata pajtachicushcatachu ricunga? Mana cashpaca ¿nij tucushpalla imatapish ruracushcatachu ricunga?” nishpami tapurina canchij. Yachachishca laya causashpaca Diablopaj trampacunapica mana urmashunchu (1 Juan 3:18). w18.05 pág. 19 párr. 13

Pablopaj ejemplota catingapajca puntapica, alli shungu gentecunata mashcana munaitami charina canchij. Ishquipica, huillanaman rijpi alli shungu gentecuna ñucanchijta uyachunmi Jehová Diosta mañana canchij (Hechos 13:48; 16:14, NM ). Silvana panica 30 huatacunatami precursora can. Paica: “Gentecunaman cushilla huillangapajmi Jehová Diosta ayudahuai nishpa mañani” ninmi. Ashtahuanpish alli shungu gentecunapajman angelcuna chayachichunmi Diosta mañana canchij (Mateo 10:11-13; Apocalipsis 14:6). Robert huauquica ñami 30 huatacunata precursor shina sirvicun. Paica: “Gentecuna ima shina causacushcataca angelcunami yachan. Paicunahuan colaboranaca sumajmi can” ninmi. Quimsapica, gentecunapaj alli ruraicunatami ricuna canchij. Carl shuti ancianopish: “Gentecuna cushilla ñahuihuan chasquijpi, tapuicunata rurajpica Diosmanta yachana munaita charishcatami ricuni” ninmi. Cai quimsa pasocunata rurashpami Pablo shina alli granota pꞌucuchishun. w18.05 págs. 6-8 párrs. 13, 15

Shujtajcunata Diosta rijsichun ayudanaca shuj sumaj bendicionmi can. Paicuna Diosta sirvishpa caticujta uyashpaca ¿manachu cushilla sintirinchij? Apóstol Juanca: “Ñuca huahuacuna mana llullapi nishca shina puricun nijta uyashpami, tucuimanta yalli jatunta cushicuni” nircami (3 Juan 4). Achca precursorcunaca: “Ñucahuan Bibliamanta ñaupa yachacujcuna, tucui shunguhuan Diosta sirvishpa caticujta uyashpa, maijancunacarin precursor cashcata yachashpaca achcatami contentarini” nincunami. Shuj precursor llaquilla, desanimado cashcata ricushpaca shujtajcunata ima shina ayudashcatami yuyachi tucunchij. Chashnami paita cushichi tucunchij. Achca superintendente huauquicunaca cashnami nin: “Maijan huauqui panicunaca paicunapaj congregacionta visitashcamantami shuj notitata escribishpa ñucanchijta agradecishcacuna. Chaita chasquishpaca ñucapish ñuca huarmipish cushillami sintirishcanchij” nincunami. Ancianocunapish, misionerocunapish, precursorcunapish, betelitacunapish tucui shunguhuan Diosta sirvishpa catishcamanta felicitajpica allimi sintiringacuna. w18.04 págs. 24, 25 párrs. 14, 15

Salomonca cai leyta mana cazushpami tiempohuanca 700 huarmicunahuan cazararca. Shinallataj shujtaj 300 huarmicunatami charirca (1 Reyes 11:3). Chai huarmicunamanta achcacunaca mana israelitacunachu carca. Yanga dioscunata adorajcunami carca. Diospaj leypi ama shujtaj llajtamanta huarmicunahuan cazarachun nishcatapish Salomonca mana cazurcachu (Deuteronomio 7:3, 4). Salomonca Dios cushca leycunata cazunata asha asha saquishpami millai cosascunata rurai callarirca. Por ejemplo, Astoret shuti huarmi diospajmi shuj altarta rurarca. Quemos shuti diospajpish shujtaj altartami rurarca. Chai yanga dioscunatami paipaj huarmicunandij adorarca. Salomonca Jerusalenpimi Diospaj huasita shayachishca carca. Chashna jahuapish paica Jerusalén chꞌimba lado urcupimi chai altarcunataca rurarca (1 Reyes 11:5-8; 2 Reyes 23:13). Salomonca Diospaj huasipi sacrificiocunata cujpica mana allita rurajpipish Diosca imata mana ningachu nishpami pandarishca canga. Mana allita rurajpi Diosca imata mana ningachu nishpaca mana yuyanachu canchij. w18.07 págs. 16, 17 párrs. 7-9

Diablo ñucanchijta llaquichingapajca Yaya Diosmantami llullacunata nin. Paica: ‘Diosca ñucanchijta mana cꞌuyanchu, paipajca imapajpish mana valinchijchu’ nishpa yuyachunmi munan. 19 huatacunata charij Aidaca: “Yayitu Diosca carupi cashcatami sintini, mana ñuca amigo casha ninchu” ninmi. Pero chashna ama sintiringapajca ¿imatataj ruran? Paica: “Tandanacuicunaman rishpami ñuca crishcacunata sinchiyachini. Ñaupaca tandanacuicunapica ñuca comentariocunata pi mana uyanachijta laya sintishpami maquita mana alzaj carcani. Pero cunanca alli prepararishpami comentariota cungapajpish esforzarini” ninmi. Soldadocunapaj escudoca shuj solo tamañomi carca. Pero Aidapaj ejemplota ricushca shinaca ñucanchij crishcaca ashtahuan jatun o uchillami cai tucun. Ñucanchijmi ima laya feta charisha nishcata agllana canchij (Mateo 14:31; 2 Tesalonicenses 1:3). Chaimantami cada punllami ñucanchij crishcacunata sinchiyachina canchij. w18.05 pág. 25 párrs. 12-14

Terremoto pasashca huashaca carcelta cuidajca paipaj yuyaita cambiashpami Diosmanta yachanata munarca (Hechos 16:25-34). Huaquinpica gentecunaca Diospaj Shimita huillanaman rijpica mana uyasha nincunachu. Pero paicunapaj causaipi ima llaquicuna ricurijpimi Diosmanta yachanata munancuna. Por ejemplo, trabajo illaj saquirishpa, shuj millai ungüi japijpi o shuj familia huañujpimi achca llaquilla sintirincuna. Chashna llaquicuna japijpimi ¿imapajtaj causacunchij? nishpa yuyai callarincuna. Ashtahuancarin carcelta cuidaj shinami ‘quishpiringapajca ¿imatataj rurana cani?’ nishpa tapurincuna. Shina tapurijpimi shamuj punllapi shuj sumaj causai tiyanamanta huillajpica uyanata munancuna. Chashna llaquilla causaj gentecunata cushichingapajmi huillashpa catina canchij (Isaías 61:1). w18.05 pág. 12 párrs. 10-12

Cunan punllacunapica Diabloca casi tucui gentecunatami pandachicun. Chaimantami gentecunaca cullquipi yalli yuyashpa, panda religioncunapi purishpa, politicapi participashpa esclavocuna shina causancuna (2 Corintios 4:4). Ñucanchijcunaca Jesús shinami huillashpa, Diosta rijsichun, paita sirvichunpish gentecunata ayudai tucunchij (Mateo 28:19, 20). Caita ruranaca mana jahuallachu. Maijan ladocunapica gentecunaca mana uyasha nincunachu. Huaquinpicarin Diosmanta huillajpica pꞌiñarincunami. Cashna jahuapish: ‘¿Diosta ashtahuan sirvingapajca imatataj rurai tucuni?’ nishpa tapurishunchij. Achca huauqui panicunaca Jehová Diospaj jatun punlla ña caillapi cashcata intindishpami minishtirishcallahuan causanata decidishcacuna. Chaita rurashpami Diosta ashtahuan sirvi tucushcacuna. Chaita ricushpami cushilla sintirinchij (1 Corintios 9:19, 23). Maijancunaca paicunapaj congregacionllapitajmi ashtahuan ayudacuncuna. Shujtajcunaca shujtaj llajtapi huillashpa ayudangapajmi rishcacuna. Cai huauqui panicunaca huatashcamanta cacharichishca cashcamantaca Diostami ashtahuan sirvicuncuna. Chaimantami achcata cushicunchij (Salmo 110:3). w18.04 pág. 13 párrs. 13, 14