Marzo

Shuj familia huañujpica huaquin familiacuna, amigocunaca panda costumbrecunapi participachunmi munangacuna. Tal vez paicunaca: “Almitata mana respetashcamantami mana participasha ningui. Cambaj culpamantami ñucanchijta llaquichinga” ningacunami. Paicuna chashna nijpipish ñucanchijca Jehová Diostami cazuna canchij. Shuj llajtapica achca gentecunaca: “Pita causaipi mana alli tratajpica huañushpaca paipaj almami ñucanchijta llaquichinga” nishpami yuyancuna. Chai panda crishcacunamantami shuj libropica: “Huañushcapaj almaca tucui comunidadtami llaquichi tucun” nin. Cutin, Africapica pi huañujpica paillataj ama ricurichun nishpami maijancunaca huasipi espejocunata tapancuna. Paipaj fotocunatapish pata ladoman tigrachishpami churancuna. Pero Diosta sirvijcunaca cai costumbrecunapica mana chagrurinachu canchij (1 Corintios 10:21, 22). w19.04 págs. 16, 17 párrs. 11, 12

Jesusca allita ruranamantami yachachirca. Pero ñucanchijta mana alli tratajpica ¿imatataj rurana canchij? Jesusca paita catijcunamanca Jehová Diospi confiana cashcatami yachachirca. Paica, pi llaquichishcamanta tutapish punllapish caparijcunatami Diosca mana uniyashpa ayudanga nircami (Lucas 18:6, 7). Cai nishca shimicunaca pajtaringatajmi. Diosca ñucanchijcuna cai tucuri punllacunapi achca llaquicunata charijtaca allimi yachan. Chaimantami pai agllashca punllapi ñucanchijta ayudanga (2 Tesalonicenses 1:6). Jesús mandashcata pajtachishpaca tucuicunatami alli tratashun. Pi ñucanchijta llaquichishca cajpipish Jehová Dios ayudanata yachashpami cushilla sintirinchij. w19.05 pág. 5 párrs. 18, 19

Canca ¿escuelapi o colegiopichu cangui? Tal vez cambaj compañerocunaca cumpleañoscunatachari rurancuna. Chai fiestacunapi imamanta mana participashcata cambaj compañerocunaman yachachinatachari munangui. Pero mana manchashpa parlangapajca chai temamantami alli yachana cangui. Yaya Dios chai fiestacunata mana munashcata tucui shunguhuan cringapajmi estudiana cangui. Shinallataj Biblia yachachishcacunata shujtajcunaman alli yachachingapajmi estudiana cangui (Mateo 14:6-11). Callaringapajca cambaj compañerocuna imamanta cumpleañosta rurasha nishcatami intindina cangui. Chai huashaca ñucanchij publicacioncunapi cumpleañoscunamanta imata yachachishcatami mashcana cangui. Chashnami cambaj crishcacunata jahualla yachachi tucungui. Achca gentecunaca “tucuicunami cumpleañosta rurancuna” nishpami paicunapish cumpleañosta rurancuna. Pero maijancunaca cumpleañoscunamanta Bibliapi imata nishcatami yachasha ningacuna. Paicunaman shuj o ishqui yuyaicunata ricuchishpami Bibliamanta yachachi tucungui (Colosenses 4:6). w19.05 pág. 29 párr. 13

Profeta Eliasca paita huañuchisha nijpimi manchaimanta shujtaj ladoman rirca. Chaipi cashpaca pai solo cashcata yuyashcamantami huañusha nirca. Chaita ricushpami Jehová Diosca Eliasta animachun shuj angelta cacharca. Chai angelca ‘jatari, micuhuai’ nishpami Eliasmanca cunujlla micunata cararca (1 Reyes 19:5-8). ¿Caica imatataj yachachin? Maijan huauqui o pani llaquilla cajta ricushpaca cꞌuyaihuanmi ayudana canchij. Por ejemplo, micunitatami carai tucunchij, o imallatapish regalai tucunchij. Chashnami paicunahuan mana parlai tucushpapish cꞌuyaita ricuchishun. Eliasca Horeb urcuman ringapajca achcatami purina carca. Jehová Dios fuerzata cujpimi chaiman chayarca. Chai urcuman chayashpaca ñucataca mana pi llaquichingachu nishpami Eliasca tranquilo sintirirca. Caimantaca ¿imatataj yachanchij? Llaquilla cajcunata animasha nishpaca puntapica tranquilo sintirichunmi ayudana canchij. Llaquichishca huauqui o panica paipaj huasipimi tranquilo parlanata munanga. Cutin shujtajcunaca Tandanacuna Huasipimi parlanata munanga. Chaipimi paicunaca tranquilo sintiringa. w19.05 págs. 16, 17 párrs. 11, 13, 14

Zacarías capítulo 12-tachari liyicunchij. Chai capitulopica Mesías huañuna cashcatami parlan (Zacarías 12:10). Verso 12-pica, ‘Natanpaj huahua huahuacunapish Mesías huañuna cashcata yachashpami achcata huacangacuna’ ninmi. Cai nishcacunata liyishpalla saquirinapaj randica: “Mesiasmanta parlashpaca ¿caipica imamantataj Natanpaj huahua huahuacunamantapish parlacun?” nishpami tapurina canchij. Por ejemplo, Traducción del Nuevo Mundo Bibliapica Zacarías 12:12-pimi uchilla letracuna ricurin. Paginapaj chaupipi chai letracunallatataj mashcashpaca ishqui versocunatami ricushun. Shujca 2 Samuel 5:14-mi can. Chaipica, Natanca Davidpaj churimi can ninmi. Caishujca Lucas 3:31-mi can. Chaipica, Jesusca Natanpaj huahua huahuacunamanta Mariapi huacharina cashcatami ricuchin. Jesusca Davidpaj huahua huahuacunamanta shamuna cashcataca yacharcanchijmi (Mateo 22:42). Shinapish Davidca 20 yalli huahuacunatami charirca. Cunanca Davidpaj churi Natanmanta Jesús shamuna cashcatami intindinchij. Shinallataj profeta Zacarías ‘Jesús huañujpica Natanpaj huahuacunami huacangacuna’ nishpaca imata nisha nishcatami intindinchij. w19.05 págs. 30, 31 párr. 17

¿Imatataj rurana canchij? Bibliata tucui punllacuna estudiashpaca Dios mandashcacuna ima mana panda cashcatami tucui shunguhuan crishun. Chashnami shuj yura sinchi sapicunata charij shina, “crinapi sinchi” cashun (Colosenses 2:6, 7). Yuyarishunchij, Diospi tucui shunguhuan crichunca ni pi mana obligangachu. Cada unomi Diospi crinata o mana crinata agllana canchij. Mana alli yuyaicunatapish ladomanmi saquina canchij. Jehová Diostapish paipaj espíritu santota cuchunmi siempre mañana canchij. Ñucanchij munashca shina ama yuyangapajmi esforzarina canchij. Amigocunatapish allimi agllana canchij. Bibliapica: “Diosmanta ama yachachun nishpa jatun tucushpa jarcaj yuyaicunataca chingachinchij” ninmi (2 Corintios 10:5). Chaita rurajpica Diabloca mana pandachi tucungachu. w19.06 pág. 13 párrs. 17, 18

Ima shinami Rutca Noemita ayudarca, shinallatajmi sapalla cajcunata ayudana canchij (Rut 1:16, 17). Paulaca: “Ñuca cusa huañushcamantaca ña mana paihuan shina causai tucurcanichu. Pai huañushca qꞌuipallami turi ñañacunaca achcata ayudarcacuna. Pero punllacuna pasajpica ña mana tanto ayudai tucurcacunachu. Sapalla saquirijcunaca quillacuna, huatacuna pasajpipish ayudachunmi minishtinchij” ninmi. Maijancunaca sapalla causanataca ratomi amañarincuna. Cutin shujtajcunaca huatacuna pasajpipish paipaj cusahuan o huarmihuan imata rurashcata yuyarishpami llaquilla sintirincuna. Jehová Diosca sapallacunata ayudachunmi ñucanchijta mandashca. Chaimantami paicunata ayudanataca manataj saquina canchij. w19.06 págs. 24, 25 párr. 16

Diosta sirvichun jarcacuj punllacunapica huaquinpica upallachari saquirina canga (Eclesiastés 3:7). Huauqui panicunapaj shuticunata, maipi tandanacucushcata, publicacioncunata ima shina chasquicushcata, ima shina huillacushcata autoridadcunamanca mana parlanachu canchij. Shinallataj vecinocunaman, ñucanchij llajtapi o shujtaj llajtapi causaj familiacunaman, amigocunamanpish imata mana ninachu canchij. Ñucanchij huauqui panicunamanta shujtajcunaman parlashpaca paicunapaj causaitami peligropi churashun. Huauqui panicunamanta amataj separarishunchij. Jesusca: ‘Shuj huasipi causajcunapish paicunapurallataj pꞌiñanacushpa chaupirinacujpica, chai huasi familiaca chingaringallami’ nircami (Marcos 3:24, 25). Caita yachashpami Diabloca paihuan macanacunapaj randica, ñucanchijpurallataj pꞌiñanacushpa causachun munan. Paica huauqui panicunamanta chꞌicanyarichunca tucuitami rurasha nin. Diosta achca huatacunata alli sirvicushpapish mana cuidarishpaca Diablopaj trampacunapimi urmashun. Ñucanchij huauqui panicunahuan alli apanacungapaj esforzarishpaca, paicunamantaca manataj separarishunchu (Colosenses 3:13, 14). w19.07 págs. 11, 12 párrs. 14-16

Cꞌuyaita ricuchijpi, alli yuyashpa imatapish nijpica ñucanchijtami uyasha ningacuna. Pero, paicuna mana uyasha nijpica mana obliganachu canchij. Paicunapaj yuyaicunatami respetana canchij. Apóstol Pabloca judiocunaman huillacushpaca Diospaj Shimimantami paicunamanca yachachirca. Pero Areópago nishca huasipi griegocunaman huillacushpaca, “Diospaj Shimipica caitami, chaitami nin” nishpaca mana huillarcachu (Hechos 17:2, 3, 22-31). ¿Ima shinataj apóstol Pablopaj ejemplota catina canchij? Bibliamanta mana yachasha nijcunaman huillacushpaca “Bibliapica caitami, chaitami nin” nishpaca mana huillanachu canchij. Shinallataj huaquincunaca ñucanchijhuan Bibliata liyicujta shujtajcuna ricuchunca manachari munangacuna. Chashna cajpica Bibliapi ricuchinapaj randica tabletpi o celularpimi shuj versota ricuchi tucunchij. w19.07 pág. 21 párrs. 5, 6

Diabloca israelitacunatami yanga dioscunata adorachun pandachirca. Paica israelitacuna micunata minishtishcatami yacharca. Egipto llajtapica río Nilo nishca yacuca tucui campocunata regangapajmi tiyarca. Pero Dios cushca allpaca mana Egipto shinachu carca. Chai allpapica regadío yacuca mana tiyarcachu. Chaimantami israelitacunaca allpapi ima shina tarpunata, ima shina cozichanata yachana carcacuna. Paicunaca allpapi granocunata tarpungapajca tamya punllacunatami shuyana carca (Deuteronomio 11:10-15; Isaías 18:4, 5). Diosca ima shina tarpunata yachachicushpaca ¿imamantashi ‘yanga dioscunata ama adoranguichij’ nishcanga? Israelitacunapaj cꞌuchullapica cananeo gentecunami causajcuna carca. Cananeocunaca Baal diosmi cielopaj dueño, paimi tamyata cun nishpami paita adorajcuna carca. Jehová Diosca israelitacunapish cai panda yuyaicunata crichunca mana munarcachu (Números 25:3, 5; Jueces 2:13; 1 Reyes 18:18). w19.06 págs. 3, 4 párrs. 4-6

Apóstol Pablo, Silas, Lucas, Timoteo huauquicuna Filipos llajtaman chayajpica achca gentecunami Diospaj Shimita uyanata munarcacuna. Cai huauquicunaca chai llajtapi mushuj congregación tiyachunmi ayudarcacuna. Tucui discipulocunami pani Lidiapaj huasipi Diosta adorangapaj tandanacui callarishcangacuna (Hechos 16:40). Mushuj congregacionpi caj huauqui panicunaca ñapishmi llaquicunata charirca. Diabloca Jesusta catijcuna ama huillachunmi huaquin contracunata jarcachun churarca. Chaimantami autoridadcunaca Pablota, Silastapish macashpa prezupi churarcacuna. Cayandij punllaca prezumantami llujshichircacuna. ¿Pablo, Silasca prezumanta llujshishpaca imatataj rurarcacuna? Mushuj huauqui panicunatami visitashpa animarcacuna. Paicunata animajpica ¿imatataj rurarcacuna? Diospaj espíritu santo ayudajpimi Jehová Diosta sirvishpa catircacuna (Filipenses 2:12). Chaimantami Pabloca cushilla sintirirca. Qꞌuipaca paipish, Silaspish Timoteondijmi Filipos llajtamanta rircacuna. Pero Lucasca chai llajtapimi saquirirca. w19.08 pág. 8 párrs. 1, 2

¿Shujtaj lugarman causangapaj rishcanguichu? Shujtaj lugarpi causana tucujpica cosascunata apanaca achca cullquichari minishtiringa (Proverbios 22:3). Shinallataj imata charingapajca jahuallami deudari tucunchij. Chaimantami mana ministirishca cosascunataca mana randina canchij. Ashtahuanpish shuj familia ungujpica prestamopi mashna cullquita llujchinata decidinaca sinchichari ricuringa. Alli decidingapajca Jehová Dios ayudachunmi tucui shunguhuan mañana canchij. Paica ñucanchij shungupipish yuyaipipish tranquilo sintirichunmi ayudanga (Filipenses 4:6, 7; 1 Pedro 5:7). Alli amigocunata charishunchij. Maijan amigocunaca ñucanchij shinallatajmi sintirishcacuna. Chaimanta, ñucanchij ima shina sintirishcata paicunaman parlashunchij. Chaita rurashpaca allimi sintirishun (Eclesiastés 4:9, 10). Shujtaj ladoman cambiashpapish ñaupa amigocunata charishpami catinguichij. w19.08 pág. 22 párrs. 9, 10

¿Jehová Diosca paipaj jatun macanacuitaca imamantataj Meguido urcu nishpa shutichirca? Meguido llajtapipish, Jezreel pambapipish achca macanacuicunami tiyarca. Maipica Jehová Diosmi paita sirvijcuna macanacushpa mishachun ayudaj carca. Por ejemplo, Barac juezpish israelitacunapish Canaán llajtamanta Sisarahuan, paipaj soldadocunahuanmi Meguido yacu cꞌuchullapi macanacucurcacuna. Barac juez mishachunca Jehová Diosmi ayudarca. Chaimantami Baracpish Débora huarmipish Jehová Diosta agradicircacuna. Shuj cantopica paicunaca: ‘Jahua pachamanta luzerocunapish Sisarahuanmi macanacurca. Mandaj Dioslla, canta pꞌiñajcunaca tucuicuna chingarishca cachun. Canta cꞌuyajcunaca achijlla inti llujshicuj shina ashtahuan achijyachicuj cachun’ nircacunami (Jueces 5:19-21, 31). Armagedón macanacuipipish Jehová Diospaj contracunaca huañungacunami. Diosta cꞌuyajcunallami quishpiringacuna. Shinapish Armagedonpica Barac macanacushca shinaca Diosta sirvijcunaca mana macanacushunchu. Armacunallatapish mana apashunchu. Quishpiringapajca tranquilomi cana canchij. Jehová Diospi, paipaj angelcunapipish tucui shunguhuanmi confiana canchij (Isaías 30:15; Apocalipsis 19:11-15). w19.09 pág. 9 párrs. 4, 5

Jesuspajman cꞌuchuyangapajca Bibliapimi pai imalla rurashcata, imalla yachachishcata estudiana canchij (Lucas 1:1-4). Shinallataj paipaj ejemplota catishpami bautizarina canchij. Jesuspajman cꞌuchuyangapajca ancianocuna ayudachunpishmi mañana canchij. Paicunaca Jesús cushca regalomi can. Jesusca ñucanchijta cuidachunmi ancianocunaman mingashca (Efesios 4:7, 8, 11; Juan 21:16; 1 Pedro 5:1-3). Pero ancianocunaca ñucanchij ima shina yuyashcata, imata minishtishcataca mana yachai tucuncunachu. Chaimantami ñucanchijraj paicunataca ayudahuai nishpa mañana canchij. Huauqui Julianca: “Ancianocuna visitachunmi mañarcani. Chai visitaca valishca regalomi carca” ninmi. Julianta ayudashca shinallatajmi ancianocunaca ñucanchijtapish Jesús yuyashca shina yuyachun ayudancuna (1 Corintios 2:16; 1 Pedro 2:21). Chashna ayudashpaca ancianocunaca shuj sumaj regalota cucuj shinami can. w19.09 pág. 21 párrs. 4, 5

Bibliapica Diosta alli sirvijcunamantami parlan. Por ejemplo, Bautizaj Juan, rey Davidca 144 milpurapi mana cashpapish Diospaj espirituta chasquishpami Diosta alli sirvijcuna carca (Mateo 11:11; Hechos 2:34). Bautizaj Juan, rey David, shujtajcunapish paraíso Allpapimi causaringacuna. Jesús cai pachata mandacujpica causarijcunapish, yallitaj achcacunapish Diosllata cazushpa, paipaj gobiernota apoyashcatami ricuchingacuna. Jehová Diosca tucui llajtacunamanta achca gentecuna paita adorachunmi tandachishca. Caitaca mana nunca chashna rurashcachu. Jahua pachapi causanata shuyajcunapish, cai Allpapi causanata shuyajcunapish, gentecuna yallitaj achcacunapurapi cachunmi ayudana canchij. Ñallami Jehová Diosca jatun llaqui punllata cachanga. Chaipica gobiernocunata, panda religioncunatami tucuchinga. Chai huashaca yallitaj achcacunaca Diosta sirvicushcamantami cai Allpapi huiñai huiñaicama cushilla causangacuna (Apocalipsis 7:14). w19.09 pág. 31 párrs. 18, 19

Diablopaj ruraicunaca ñallami tucuringa. Chai punlla ña cꞌuchuyamucushcamantami llaquicunapish ashtahuan miraringa. Shinallataj politicapi mana chagrurishcamantami gentecunaca ñucanchijmanta burlaringacuna. Chaimantami cunanmanta Diosta cazushcata, paipaj gobiernota apoyashcata ricuchina canchij. Chashnami Diosmanta manataj caruyashun. Jatun llaqui punllapica cai Allpapi pushaj huauquicunahuanmi shuj cambio tiyanga. Cai Allpapi saquirij tucui agllashcacunami jahua cieloman rishpa Armagedonpi macanacungacuna (Mateo 24:31; Apocalipsis 2:26, 27). Agllashcacuna jahua cieloman rijpica Cuerpo Gobernanteca cai Allpapica ña mana tiyangachu. Paicuna ña mana caipi cajpipish shujtaj ovejacunamanta huaquin huauquicunami Diospaj pueblota ñaupajman pushangacuna. Chaimi Diospaj puebloca organizado catinga. Ñucanchijca cai huauquicuna ima nishcatami cazuna canchij. Chaita rurashpallami jatun llaqui punllapica quishpirishun. w19.10 págs. 17, 18 párrs. 13, 14

Noemí huarmica tucuipimi Diosta alli sirvirca. Paipaj cusa, paipaj ishqui churicuna huañujpimi dimastij llaquilla sintirirca. Chaimi paipaj shutitaca Mara shutiman cambiasha nirca. Mara shutica “dimastij llaquilla” nisha ninmi (Rut 1:3, 5, 20, 21). Noemí chashna llaquicunahuan cajpimi paipaj nuera Rutca paipaj ladopi carca. Paica imalla minishtishca cosascunata cushpami ayudarca. Shinallataj shungumantami cushichij shimicunahuan animarca. Shuj huauquipaj huarmi o panipaj cusa huañujpica paicunatami ayudana canchij. Cazarashcacunaca ishqui yura shujllapi huiñashca shinami can. Huatacuna pasajpica chai yuracunapaj sapicunaca tandarishpami sinchi tucun. Chaimantami shuj yurata pꞌitishpa shitajpica saquirij yuraca chaquiri o urmai tucun. Shinallatajmi cusa o huarmi huañujpica saquirij cusa o huarmica achca huatacunata llaquilla causan. w19.06 pág. 23 párrs. 12, 13

Alli ricunacunata, alli pugllanacunata agllashpapish mashna tiempota chaipi ocuparishcatami yuyarina canchij. Mana cuidadota charishpaca Diosta sirvinapaj randica chaicunapimi yalli ocuparishun. Puntapica televisionpi, Internetpi mashna horascunata pasaj cashcata, pugllaicunapipish mashna tiempota dedicarishcata shuj hojapi anotashunchij. Chaicunapi yalli ocuparicushcata cuentata cushpaca shuj horariotami rurana canchij. Chai horariopica Diospajta ruranacunataraj anotashunchij. Chai qꞌuipaca ricunacunapi, pugllaicunapi mashna tiempota pasasha nishcata anotashunchij. Chai huashaca Jehová Diosta chai horariota pajtachingapaj ayudahuai nishpa mañashunchij. Chai horariota pajtachishpaca Bibliata estudiangapaj, familiahuan Diosta adorangapaj, tandanacuicunaman ringapaj, huillanaman llujshingapaj, gentecunaman Bibliamanta yachachingapajmi tiempota, fuerzasta charishun. Diosta punta lugarpi churashcamantami ricunacunapi, uyanacunapi, pugllanacunapi ashata pasashpapish tranquilo sintirishun. w19.10 págs. 30, 31 párrs. 14, 16, 17

Huata 55-pimi Jerusalenpi, Judea llajtapi causaj huauqui panicunaca ayudachun minishtircacuna. Chaita yachaj chayashpami Corinto llajtamanta huauqui panicunaca ayudasha nircacuna (1 Corintios 16:1; 2 Corintios 8:6). Pero asha quillacuna qꞌuipaca Corinto llajtapi causajcunaca mana imata rurashcacunachu carca. Mana imata rurashcamantami Jerusalenman, Judea llajtamanca cullquita mana cachai tucushcanga (2 Corintios 9:4, 5). Corinto llajtamanta huauqui panicunaca shujtajcunata ayudangapajmi decidircacuna. Chaimi apóstol Pabloca felicitarca. Pero shujtajcunata ayudasha nishcata pajtachichunmi animarca (2 Corintios 8:7, 10, 11). Ñucanchijpish sinchi crijcuna cashpapish imata decidishcata pajtachingapajmi tucui pudishcata rurana canchij. Pero juchayujcuna cashcamantami imata decidishpapish mana utca pajtachinchij. Huaquinpica mana yuyashcapimi imapish pasai tucun. Chaimantachari imata decidishcataca mana pajtachi tucunchij (Eclesiastés 9:11). w19.11 págs. 26, 27 párrs. 3-5

Sinchi feta charishpaca huainayanamanta, mana alli ruraicunamantami cuidarishun. Supaicunahuan macanacungapaj, llaquicunata ahuantangapajpish listosmi cashun (Efesios 6:10-12). ¿Sinchi feta charingapajca imatataj rurana canchij? Puntapica, Jehová Diostami pai ayudachun mañana canchij. Qꞌuipaca, Bibliatami liyina canchij. Chashnami ñucanchijmanta Dios imata yuyashcata yachashun (Hebreos 4:12). Bibliapica: “Mandaj Diospi cambaj tucui shunguta churangui. Ama can alli yuyaiyuj cashcallapi shunguta churanguichu” ninmi (Proverbios 3:5, 6). Ñucanchij fe sinchi cashcata yachangapajca cai tapuicunapi yuyashun. ¿Cullqui illaj saquirishpaca Hebreos 13:5-pi Jehová Dios imata cusha nishcata yuyarishcanchijchu? Chai versopica Diosca: “Cantaca manataj shitashachu, manataj cungarishachu” ninmi. ¿Cai versota yuyarishpaca Jehová Dios ayudanata crishcanchijchu? Chashna cajpica ñucanchij feca sinchimi can. w19.11 págs. 14, 15 párrs. 1, 4

Yaya mamacunaca huahuacunata cuidangapajmi tiempota, fuerzata minishtincuna. Maijan yaya mamacunaca achca huahuacunata charishcamantami paicunata cuidanaca sinchi can nincuna. Por ejemplo, mamaca paicunata cuidacushcamantami Diosta mañangapaj, Bibliata estudiangapaj, huillangapajpish fuerzata mana charin. Shinallataj tandanacuicunaman rishpaca huahuacunata cuidana cashcamantami yachachishcacunataca mana tucuita intindincuna. Shinapish cusaca paipaj huarmita cꞌuyashpaca tandanacuicunapi cashpapish huasipi cashpapish tucuipimi ayudana can. Yayaca familiahuan Diosta adoranataca cada semanami rurana can. Paipaj familiahuanpish huillanamanmi llujshina can. w19.12 pág. 24 párr. 8

¿Cacharirina huataca imamantataj israelitacunapajca alli carca? Tal vez shuj israelita piman dibiyashpaca allpata cꞌatushpami pagana carca. Pero cacharirina huata chayamujpica chai cꞌatushca allpataca paillamantajmi tigrachina carca. Chaimantami chai allpataca paipaj huahuacunaman herenciata shina saquij carca. Shinallataj shuj israelitaca shuj dibita pagangapajchari paipaj churita cashpa o paipaj ushushita cashpa esclavo shina sirvichun cꞌatuj carca. Mana cashpaca paillatajmi cꞌaturij carca. Shinapish cacharirina huata chayamujpica esclavo canata saquishpami paipaj familiapajman tigrajcuna carca (Levítico 25:10). Chashnami Jehová Diosca paita sirvijcunamanta preocuparishcata ricuchirca. Jehová Diosca israelitacunataca: “Chashna rurajpimi cancunapurapica, huajchacunaca mana tiyanga. Mandaj Dios cancunapaj Taita Diosmi cancunapaj cachun cugricun llajtapica cancunamanca jahuanpi jahuanpi allicunata cunga” nircami (Deuteronomio 15:4). Pero cunan punllacunapica mana chashnachu can. Charijcunaca ashtahuanmi charijyancuna. Cutin pobrecunaca ashtahuanmi pobreyancuna. w19.12 págs. 8, 9 párrs. 3, 4

Jesusca llaquicunahuan cashpaca paipaj Yaya ayudachunmi huacashpa mañarca (Hebreos 5:7). Jesús mañashcacunaca Diospaj ñaupajpica mishquijlla ashnacuj inciensota rupachishca shinami carca. Jesusca Dioslla mandana derechota charishcatami ricuchirca. Chaita ricushpaca Jehová Diosca cushillami sintirirca. ¿Jesuspaj ejemplota catingapajca imatataj rurana canchij? Jehová Diospaj mandashcacunatami tucuipi cazuna canchij. Llaquicunahuan cashpaca Dios ayudachunmi mañana canchij. Caicunata rurashpaca Jehová Dios ñucanchijta mandachunmi saquishun. Mana allita rurashpa mañajpica Yaya Diosca ñucanchij mañashcacunataca mana chasquingachu. Pero pai munashca shina causajpica ñucanchij mañashcacunaca Diospajca mishquijlla ashnacuj inciensota rupachishca shinami canga. Jehová Diosta tucuipi cazujpica paica contentomi sintiringa. w19.11 págs. 21, 22 párrs. 7, 8

1919 huatapimi Jesusca “alli cazuj alli yuyaiyuj” sirvij huauquicunata agllarca. Paicunaca jahua pachaman rigrijcunamanta ashallacunami can. Cai huauquicunami huillashpa catichun, Bibliamanta yachachun minishtirishca horaspi ayudancuna. Diabloca, paita catijcunandijmi alli cazuj alli yuyaiyuj sirvij huauquicunata jarcasha nishcacuna. Por ejemplo, ishqui jatun macanacuicunami tiyashca. Muyundij Allpapipish minishtirishca cosascunata charinaca maipica sinchimi cashca. Shinallataj gobiernocunaca Diosta sirvijcunatapishmi llaquichishcacuna. Chashna jarcajpipish alli cazuj alli yuyaiyuj sirvij huauquicunaca Diospaj ayudahuanmi tucuicunaman yachachishpa catishca. Cunan punllacunapica novecientos yalli shimicunapimi achca publicacioncuna gratis llujshishca. Shinallataj muyundij Allpapimi Diospaj alli huillaicunataca predicacunchij (Mateo 24:14). w19.11 págs. 24, 25 párrs. 15, 16

Israelitacunaca cada huatami paicunapaj juchacunamanta Diosman ofrendata cungapaj tandanacujcuna carca. Chai punllapica sacerdotecunata mandajca Diospaj ñaupajpi alli ricuringapajmi, manaraj ofrendata cushpa inciensota rupachij carca. Jesusca ñucanchijmanta manaraj paipaj causaita cushpami tucui causaipi Diosta cazurca. Chaita rurajpimi Jehová Diosca paipaj causaita chasquirca. Jesusca Dios munashca shina causashpami Jehová Dioslla alli mandaj cashcata ricuchirca. Jesusca cai Allpapi cashpaca tentacioncunata, pruebacunatami charirca. Pero shungumanta mañashpami tucuipi Diosta cazushpa causarca (Filipenses 2:8, NWT). w19.11 pág. 21 párrs. 6, 7

Jesusca Diosmanta huillacushpaca achca llaquicunatami charirca. Chashna jahuapish apostolcunaca paita mana saquircachu (Proverbios 18:24). Apostolcunaca Jesuspaj alli amigo cashcata ricuchircacuna. Chaimi Jesusca paicunatapish achcata cꞌuyarca. Chai tiempopica Jesuspaj propio huauquicunaca mana paipi crircacunachu (Juan 7:3-5). Huaquinpicarin paipaj familiaca locomi can nircacunami (Marcos 3:21). Pero apostolcunaca mana chashna carcacunachu. Chaimi Jesús huañuna tutaca cai punllapaj versopi tiyaj shimicunata nirca. Apostolcuna pandarijpipish Jesusca mana chaita ricucurcachu. Chaipaj randica paipi tucui shunguhuan crishcatami ricucurca (Mateo 26:40; Marcos 10:13, 14; Juan 6:66-69). Chaimi último tutata paicunahuan cashpaca: “Cancunamanca ñuca Yaya imallata ruracujtaca tucuitami yachachircani. Chaimanta cancunaca ñucahuan alli apanacujcunami canguichij” nirca (Juan 15:15). Paipaj amigocunapish Diosmanta huillacujta ricushpami Jesusca cushilla sintirirca. w19.04 pág. 11 párrs. 11, 12

¿Agllashcacunaca Jesushuan jahua pachapi mandagrishcataca ima shinataj yachancuna? Apóstol Pabloca Romapi caj agllashcacunataca cai punllapaj versopi shimicunatami nirca. Chai qꞌuipaca: ‘Jucha illaj cachun cayashcacuna. Cancunaca manchaihuan cachunllataj huatashcata charij espiritutaca mana chasquircanguichijchu. Ashtahuanpish quiquin huahuata shina ruraj espiritutamari chasquircanguichij’ nircami (Romanos 1:7; 8:15). Jehová Diosca agllashcacunamanca paipaj espíritu santota cushpami jahua pachapi mandanaman rina cashcata ricuchin (1 Tesalonicenses 2:12). Jehová Diosllatajmi agllashcacunataca jahua pachapi mandanaman rina cashcataca mana dudashpa tucui shunguhuan crichun ayudan (1 Juan 2:20, 27). Agllashcacunaca shujtajcuna canca agllashcami cangui nishpa yachachichunca mana minishtincunachu. w20.01 pág. 22 párrs. 7, 8

Jesusca paipaj mandashcacunata cungapajca puntapica alli yuyarirca. Paica cꞌuyaj cashcamantami chai mandashcacunata curca (Gálatas 6:2). Chaimantami gentecunaman yachachirca, ungushcacunata jambirca, yaricachijcunaman cararca, huañushcacunatapish causachirca (Mateo 14:14; 15:32-38; Marcos 6:34; Lucas 7:11-15). Paica cushillami shujtajcunata ayudarca. Ashtahuantajca paipaj causaita cushpami cꞌuyashcata ricuchirca. Ñucanchijpish Jesuspaj ejemplotami catina canchij. Ñucanchijllapi yuyanapaj randica shujtajcunatami cꞌuyaihuan ayudana, yachachina canchij. Cꞌuyaimanta shujtajcunata yachachishpaca Jesuspaj mandashcacunatami pajtachicunchij. w19.05 pág. 4 párrs. 8-10

Religionta pushajcunaca achca judiocunataca panda yachachishcacunata, panda costumbrecunata catichunmi obligajcuna carca (Mateo 5:31-37; 15:1-11). Shinallataj religionta pushajcunaca gentecuna Diosta sirvichun mana ayudajcunachu carca. Paicunaca Jesús Mesías cashcata, paipaj yachachishcacunata mana chasquishcamantami ciegocuna shina carca. Chaimantami juchapi huatashca shina causashpa catircacuna (Juan 9:1, 14-16, 35-41). Pero Jesusca paipaj yachachishcacunahuan, paipaj ejemplohuanmi gentecunataca panda yachachishcacunamanta cacharichirca (Marcos 1:22; 2:23-3:5). Jesusca ñucanchij juchacunamantapishmi cacharichirca. ¿Ima shinataj cacharichirca? Paipaj causaita cushpami cacharichirca. Chaimantami Jehová Diosca gentecunapaj juchacunata perdonan. Jehová Dios ñucanchijta perdonachunca Jesús ñucanchijmanta huañushcapimi feta churana canchij. Ñucanchij causaihuanpish Diosta cazushcatami ricuchina canchij (Hebreos 10:12-18). w19.12 págs. 10, 11 párrs. 8, 10, 11

Espíritu santota cushpami Jehová Diosca jahua pachapi mandachun agllashcacunahuanca ari ninacushca. Chaimantami agllashcacunaca jahua pachapi mandagrishcata tucui shunguhuan crincuna (2 Corintios 1:21, 22). Shinapish Dios agllashcacunaca jahua pachapi mandangapajca nombrashcallami can. Chaimantami paicunaca 2 Pedro 1:10-pi ima nishcata yuyarina can. Chaipica: “Cancunata cayashpa agllashcapica ashtahuan sinchiyarina yuyailla caichij. Chaicunata rurashpaca manataj urmanguichijchu” ninmi. Agllashcacunaca Diosta mana alli sirvishpaca jahua pachamanca mana ringacunachu (Filipenses 3:12-14; Hebreos 3:1; Apocalipsis 2:10). w20.01 págs. 21, 22 párrs. 5, 6

Llaquilla cajta ricushpapish Jobpaj quimsa amigocunaca animanapaj randica, llaquichij shimicunatami nircacuna. Paicunaca Job imamanta achca llaquicunata charishcataca mana intindircacunachu. Chaimantami mana alli yuyashpa sinchi shimicunata nishpa rimarcacuna. Ñucanchijpish cashna shina ama rurashunchij. Jehová Diosllami cada uno ima llaquicunata charijtaca alli yachan. Shinallataj llaquilla caj huauqui o pani parlacujpica allimi uyana canchij. Pero paicuna parlashcata uyashpallaca mana saquirinachu canchij. Ashtahuanpish paicuna ima shina sintirishcata intindingapajmi esforzarina canchij. Chashnami llaquijcuna cashcata ricuchishun. Llaquicunata chꞌimbapuracuj huauqui panicunamanta ama malta rimashunchij. Paicunamanta mana allicunata parlajpica huauqui panicunapurami llaquirinacui tiyanga (Proverbios 20:19; Romanos 14:19). Llaquicunata chꞌimbapuracuj huauqui panicunamanta mana allicunata nishpaca paicunatami ashtahuan llaquichishun (Efesios 4:31, 32). Chaimanta paicunapaj pandarishcallata ricunapaj randica ima allita rurashcata ricushunchij. Paicunata ima shina ayudanatapish yachashunchij. w19.06 págs. 22, 23 párrs. 8, 9