Abril

Macedonia llajtamanta Aristarcoca Apóstol Pablopaj alli amigomi carca. Bibliapica Aristarcomanta punta cutin parlashpaca, Éfeso llajtapimi Pablohuan carca ninmi. Chai tiempopica Pabloca quimsa cutinmi congregacioncunata visitacurca. Chaipi cajpimi contracunaca pꞌiñarishpa Aristarcotaca huaicashpa japircacuna (Hechos 19:29). Shinapish gentecuna Aristarcota cacharijpica mana chai rato shujtaj ladoman rinata agllarcachu. Ashtahuanpish Pablohuanmi saquirirca. Huaquin quillacuna qꞌuipaca Grecia llajtapimi Diospaj contracunaca apóstol Pablota huañuchisha nircacuna. Pero Aristarcoca Pablotaca manataj saquircachu (Hechos 20:2-4). Huata 58-pica Pablotaca Roma llajta carcelmanmi aparcacuna. Chaimi Aristarcoca Pablohuan Roma llajtaman rirca. Paicuna barcopi viajacujpica barcoca yacupimi pambarirca (Hechos 27:1, 2, 41). Shinallataj Aristarcoca Roma llajtapimi Pablohuan carcelpi cashcanga (Colosenses 4:10). Pabloca Aristarco mana nunca saquishcamantami cushilla sintirishcanga. Ñucanchijpish Aristarco shinami huauqui panicunataca alli horaspi cajpi, llaqui horaspi cajpipish manataj saquina canchij. w20.01 págs. 9, 10 párrs. 4, 5

Dios agllashcacunaca tal vez chai bendicionta mana chasquina cashcatami yuyangacuna. Pero Yayitu Dios paicunata agllashcataca tucui shunguhuanmi crincuna. Ima dudasta mana charincunachu. Ashtahuanpish jahua pachapi causanata yachashpacarin cushillami sintirincuna (1 Pedro 1:3, 4). ¿Jesushuan mandagrijcunaca jahua pachapi causaringapajchu huañusha nincuna? Mana. Paicuna ima shina sintirishcataca apóstol Pabloca cashnami huillarca: “Cai carpa huasi shina cai aichapi causacushpaca, llaquihuan aij nicunchijmi. Ñucanchijca mana lluchulla cashun ninchijchu, ashtahuanpish churachishcacunami cashun ninchij. Cai huañuj aichataca, causai chingachishpa mushujyachichunmi shuyacunchij” nirca (2 Corintios 5:4). Agllashcacunaca paicunapaj causai, cai Allpapi rato tucurichunca mana munancunachu. Ashtahuanpish paicunapaj familiacunahuan, amigocunahuanmi cai Allpapica Diosta sirvishpa cushilla causancuna. Paicunaca imata rurashpapish jahua pachaman ringapajmi pacienciahuan shuyacuncuna (1 Corintios 15:53; 2 Pedro 1:4; 1 Juan 3:2, 3). w20.01 pág. 23 párrs. 12, 13

Yayitu Diosca minishtishca horaspimi corregin. ¿Ima shinataj corregin? Por ejemplo, Bibliata liyishpa o tandanacuipi imata uyashpachari ñucanchij causaipi cambiana cashcata ricunchij. Mana cashpaca ancianocunahuanchari ñucanchijtaca ayudan. Ima shina cashpapish Diosca ñucanchijta cꞌuyashcamantami chashna corregin (Jeremías 30:11). Jehová Diosca llaquicunata ahuantachunmi ayudan. Shuj cꞌuyaj yaya paipaj huahuata cuidaj shinallatajmi Yaya Diospish llaquicunahuan cai horasca ñucanchijta cuidan. Shinallataj paimanta ama caruyachunca paipaj espíritu santotami cun (Lucas 11:13). Ashtahuancarin ñucanchij tranquilo sintirichunmi ayudan. Por ejemplo, shamuj punllapi sumaj causai tiyanata yachachishpami ima problemacunata ahuantachun ayudan. Yayitu Diosca ima llaquicunatapish tucuimi allichinga. Cai llaquicunaca mana tucui vidapajchu can. Ashtahuanpish Paica huiñaipajmi bendiciasha nin (2 Corintios 4:16-18). w20.02 págs. 5, 6 párrs. 14, 15

Josepaj huauquicunapi yuyashun. Joseta huaquin huatacuna huashaman cꞌatushca qꞌuipami paihuanca Egiptopi cutin tuparcacuna. Shinapish Joseca pi cashcataca paipaj huauquicunamanca mana utca huillarcachu. Paica huauquicuna cambiashcata o mana cambiashcata yachangapajmi shuj micuiman invitarca. Joseca, paipaj qꞌuipa huauqui Benjaminmanca caishuj huauquicunaman carashcata yalli carachunmi mandarca (Génesis 43:33, 34). Pero huauquicunaca mana envidiarcacunachu. Ashtahuanpish Benjaminmanta, paicunapaj yaya Jacobmantami preocuparircacuna (Génesis 44:30-34). Josepaj huauquicunaca shungumanta envidiana munaitami anchuchishcacuna carca. Chaimantami paicunapaj familiaca cutin tandalla causarcacuna (Génesis 45:4, 15). Ñucanchijpish shungumantami envidiana munaitaca anchuchina canchij. Chashnami familiapi, congregacionpipish tandalla causashun. Jehová Diosca ama envidiashpa alli apanacuchunmi munan. Chaimantami humildes, agradecidos cana canchij. Dios cushcacunahuanpish cushillami causana canchij. Chashnami tandalla Dios munashca shina causashun. w20.02 pág. 19 párrs. 17, 18

Jehová Dios canta cꞌuyashcamantaca paita mañashpami agradicishcata ricuchina cangui. Paiman ima shina sintirishcata parlashpa, cambaj imallata rurashcamanta agradicishpaca ashtahuanmi cꞌuyangui. Yayitu Dios can mañashcacunata cutichijta ricushpacarin paihuanmi alli apanacungui. Shinallataj can ima shina sintirishcata Yaya Dios intindij cashcatami cringui. Jehová Diospaj amigo tucungapajpish pai ima shina yuyashcata, canpish paita cushichingapaj imata ruranatami intindina cangui. Chaipajca Bibliatami alli estudiana cangui. Diospaj Shimita valoranata yachangui. Bibliallapimi Jehová Diosmanta, pai cambaj imata munashcata yachangui. ¿Diospaj Shimita valorashcataca ima shinataj ricuchingui? Punllanta Bibliata liyishpa, Bibliamanta yachangapajpish alli prepararishpa, yachashcatapish cambaj causaipi pajtachishpami valorashcata ricuchingui (Salmo 119:97, 99; Juan 17:17). ¿Tucui punllacunachu Bibliata estudiangui? w20.03 págs. 4, 5 párrs. 8, 9

Mana achcata puri tucushpaca ¿imatataj rurai tucungui? Gentecuna maita pasajta ricushpami chaipi tiyarishpa paicunaman huillai tucungui. Chashnallataj telefonopi cayashpa, cartacunata rurashpa, imata ruracushpapishmi huillana canchij. Chashna shina huillashpami achca huauqui panicunaca ungushca cashpa, ima llaquicunata charishpapish cushilla sintirincuna. Shuj cutinca Apóstol Pabloca huauqui panicunata visitanaman rishpami ungurca. Chaimi Diosca fuerzasta cushpa ayudarca (2 Corintios 4:7). Pabloca ungushca cashpapish Galacia llajtapi causajcunamanmi Diospaj Shimita huillarca. Paica: “Alli huillaita cancunaman callaripi huillashpaca, aichapi ungushca cashpapishmi huillarcani” nircami (Gálatas 4:13). Ñucanchijpish ungushca cashpapish Diosmantami huillai pudinchij. Yuyashun. Diospaj Shimita huillanaman rishpaca doctorcunahuan, enfermerocunahuanca paicunapaj huasipi mana tupanchijchu. Pero ungushca cashcamanta hospitalman rina tucujpica paicunamanmi huillai tucunchij. w19.04 págs. 4, 5 párrs. 10, 11

Huata 2018-pajca 223 mil yalli publicadorcunami Diosmanta huillachun mana saquij llajtacunapi causacurcacuna. Diosta sirvijcunata llaquichina cashcataca ñami yacharcanchij. Chaimantami mana mancharina canchij. Maijan llajtapi causacujpipish autoridadcunaca Jehová Diosta ama sirvichunmi ñapish jarcai tucuncuna. Diosmanta ama huillachun nijpica Diosca ñucanchijtaca ña mana ayudacunchu nishpachari yuyashun. Pero mana chashnachu can. Apóstol Pablopi yuyashun. Jehová Dios ayudajpimi Mushuj Testamentopi tiyaj 14 cartacunata escribirca. Achca llajtacunapipish Diosmantami huillarca. Chashna rurajpipish paitaca catirashpami llaquichircacuna (2 Corintios 11:23-27). Apóstol Pablopaj causaimanta yachashpami Jehová Dios paita sirvijcunata llaquichichun saquishcata intindinchij. w19.07 págs. 8, 9 párrs. 1, 3

Jehová Diosca cꞌuyajmi can. Chaimantami Diablopish, demoniocunapish ñucanchijta ama pandachichun imata rurana cashcata yachachin (Efesios 6:10-13). Diospaj ayudata chasquishpa, paipi tucui shunguhuan confiashpaca Diablo ñucanchijta pandachichunca mana saquishunchu. Apóstol Pablo shinami Diospi tucui shunguhuan confiana canchij. Pabloca: “Dios ñucanchijhuan cajpica ¿pitaj ñucanchijtaca imata ni tucungari?” nircami (Romanos 8:31). Diosta sirvijcunaca Diablopaj, demoniocunapaj ruraicunamantaca mana parlanchijchu. Chaipaj randica Jehová Diosmanta yachanapi, paipajta ruranapimi ocuparinchij (Salmo 25:5). Pero Diablo ñucanchijta ama pandachichunca pai ima shina pandachij cashcatami yachana canchij (2 Corintios 2:11). w19.04 pág. 20 párrs. 1, 2

Pi parlacujpica ¿imata mana nishpachu upalla saquirina canchij? Mana. Llaquilla cajcunata uyacushpaca imatapish alli yuyashpami animana canchij. Por ejemplo, “can llaquilla cashcamantami ñucapish llaquilla sintirini” nishpami animai tucunchij. Shinallataj paicuna imata nisha nishcata yachangapajca huaquin tapuicunatami rurana canchij. Cashna shina tapuicunata rurashpami alli uyajcuna cashcata, cꞌuyajcuna cashcata ricuchishun (1 Corintios 13:4, 7). Shuj huauqui o pani ima shina sintirishcata parlacujpica mana interrumpinachu canchij. Shinallataj mana chai rato, caitami chaitami rurana cangui nishpa rimanachu canchij. Chaipaj randica pacienciahuan uyana canchij. Shinallataj caitami chaitami rurana cangui ninapaj randica cꞌuyaihuanmi ayudana canchij (1 Pedro 3:8). w19.05 págs. 17, 18 párrs. 15-17

Familia ucupi: “Cristoca tandanacushca crijcunata cꞌuyashca shinallataj” cusaca quiquin huarmita cꞌuyanami can (Efesios 5:28, 29). Jesús mandashcata cazuj cusaca paillapi yuyanapaj randica huarmi imalla minishtishcatami ricun. Huaquin cꞌaricunatami uchilla cajpica yaya mamacunaca maipish cachun tratajcuna carca. Chaimantami paicunapajca cꞌuyaita ricuchinaca sinchi can. Pero Jesús mandashcata catingapajca cꞌuyaita ricuchinatami yachana can. Cusa chaita rurajpica huarmipish paitaca cꞌuyaita, respetotami ricuchinga. Yaya mamacunapish paicunapaj huahuacunata cꞌuyashpaca llaquichij shimicunahuanca mana tratanachu can (Efesios 4:31). Chaipaj randica huahuacuna tranquilo sintirichun, paicunapi confiachun, paicunata cꞌuyachunmi alli tratana can. w19.05 págs. 5, 6 párr. 21

Mariaca cai shimicunata uyashpaca ¿imatashi intindishcanga? ¿Paica, “Jesusca Herodespaj randimi mandanga” o mana cashpaca “paipaj churipaj randimi mandanga” nishpachu yuyashcanga? ¿Mariaca, “rey Jesuspaj mama cashcamantami jatun palaciopi ñuca huahuacunahuan causasha” nishpachu yuyashcanga? Shinallataj Diospaj gobiernopi paiman alli puestota cuchun mañashcatapish mana maipi ricurinchu. Mariaca humilde cashcamantami chaitaca mana rurarca. Bibliata, publicacioncunata alli yachashpami imapi cambiana cashcata cuenta japishun. Ashtahuantajca Diospajmanmi cꞌuchuyashun (Santiago 1:22-25; 4:8). Chaimantami imata estudiagrishpaca Yaya Diostaca, “tucuita alli intindingapaj, yachashcata causaipi pajtachingapajpish cambaj espíritu santota cuhuai” nishpa mañana canchij. w19.05 pág. 31 párrs. 18, 19

Huaquinpica llaquicunaca jahuanpi jahuanpimi shamun. Huauqui Johnmanta parlashun. Paica esclerosis múltiple nishca ungüitami charin. 19 huatacunata cazarashca cajpimi paipaj huarmica shitashpa rirca. Shinallataj paipaj ishqui ushushicunapish Diosta sirvinatami saquirca. Chaimi huauqui Johnca llaquilla sintirirca. Huauqui Bob paipaj huarmi Lindapish achca llaquicunatami charircacuna. Paicunaca trabajo illaj, huasi illajmi saquirircacuna. Qꞌuipaca pani Linda shungupi millai ungüita charishcatami doctorcunaca huillarcacuna. Shinallataj artritis nishca ungüi paipaj tucui cuerpopi regarishcatami huillarcacuna. Tucuita ruraj Yayitu Diosca llaquicunahuan cajtaca allimi yachan. Chaimantami paica llaquicunata chꞌimbapurachunca ayudasha nin (Filipenses 4:6, 7). Bibliapica ñaupa punllacunapi paita sirvijcuna ima shina llaquicunata ahuantashcatami ricuchin. Jehová Dios paicunata ima shina ayudashcatapishmi Bibliapica huillan. w19.06 págs. 14, 15 párrs. 2, 3

Huarmi illaj, cusa illajlla saquirijcunaca amigocuna ayudachunmi minishtincuna. Paicunata cꞌuyashcata ricuchingapajca imatapish rurashpami ayudana canchij. Por ejemplo, micunitata carangapajmi huasiman invitai tucunchij. Ñucanchijhuan huillanaman llujshichunpishmi invitai tucunchij. Shinallataj ñucanchij familiahuan Diosta adorachunmi invitai tucunchij. Huarmi illaj, cusa illajcunata ayudashpaca Jehová Diostami cushichishun. Paica tucui llaquilla cajcunapaj cꞌuchullapimi. Paicunamantaca manataj cungarinchu (Salmo 34:18; 68:5). Diospaj gobiernoca ñallami tucui llaquicunata tucuchinga. Chaipica ‘ñaupaman imapish tucushcataca pipish mana yuyaringacunachu. Pipaj yuyaimanpish chaicunaca ña mana shamungachu’ (Isaías 65:16, 17). Chai punlla chayangacamaca huauqui panicunahuan shuj shinalla caishujmanta chaishujmanta ayudanacushpa catishunchij. Shimillahuan cꞌuyanimi ninapaj randica rurashcacunahuan ricuchishunchij (1 Pedro 3:8). w19.06 pág. 25 párrs. 18, 19

Achca huatacuna ñaupaman shuj Atalaya revistapica: “Diosta alli rijsijcunaca llaqui punllacuna shamujpica tucui shunguhuanmi paipi confiangacuna” nircami. Yayitu Diostami cꞌuyana canchij. Shinallataj pai cꞌuyaj cashcatapish tucui shunguhuanmi crina canchij. Chashnami llaqui punllacunata chꞌimbapurashun (Mateo 22:36-38; Santiago 5:11). Jehová Diospajman ashtahuan cꞌuchuyangapaj Bibliata cada punlla liyishunchij (Santiago 4:8). Bibliata liyicushpami Yaya Dios ima nishcata, imata rurashcata yachanchij. Chashna rurashpami pai cꞌuyaj, llaquij cashcata cuenta japishun (Éxodo 34:6). Huaquincunaca pi paicunata mana cꞌuyajpimi Yaya Diospish ñucataca mana cꞌuyanchu nishpa yuyancuna. Ñucanchijpish chashna sintirishpaca ¿imatataj rurana canchij? Jehová Dios ima shina ñucanchijman cꞌuyaita ricuchishcatami cada punlla quillcai tucunchij (Salmo 78:38, 39; Romanos 8:32). Chaipajca Bibliapi imata liyishcatami cutin cutin yuyarina canchij. Ñucanchijta Yayitu Dios ima shina ayudashcatapish yuyarinami canchij. Chashnami paipajman ashtahuan cꞌuchuyashun (Salmo 116:1, 2). w19.07 págs. 2, 3 párrs. 4, 5

Jehová Diosca shujtajcunamanta decisionta agllachunca mana munanchu. Pushajcunaca paicuna munashca shina Diosta sirvichun mandashpaca, huauqui panicunamanca mana cꞌuyaita ricuchincunachu. Pꞌiñaj Diabloca ñucanchijta catirashpami llaquichisha ninga (1 Pedro 5:8; Apocalipsis 2:10). Diablota apoyajcunapish Diosta sirvichunmi jarcasha ningacuna. Pero manchaita charishpapish Jehová Diosta sirvinataca manataj saquinachu canchij (Deuteronomio 7:21). Diosca paimanta huillachun gobiernocuna jarcajpipish cuidashpami catinga (2 Crónicas 32:7, 8). Ñaupa tiempopi Jesusta catijcunapaj ejemplota catishunchij. Paicunaca chai punllacunapi causaj gobiernocunamanca: “Taita Diosta cazunapaj randica ¿cancunata cazunachu alli? Chaitaca cancunallataj Taita Diospaj ñaupajpi alli yuyarichij. Ñucanchij imallata ricushcata, uyashcata huillanataca mana saqui tucunchijchu” nircacunami (Hechos 4:19, 20). w19.07 pág. 13 párrs. 18-20

Huillashpaca gentecuna imamanta chꞌican chꞌican yuyaicunata charishcatami intindina canchij. Apóstol Pabloca judío cashcamantami Jehová Diosta, paipaj mandashcacunata alli rijsirca. Pero shujtaj llajtacunapi causajcunaca chaitaca mana yacharcacunachu. Chaimantami paicunaman huillashpaca alli yuyashpa Diospaj Shimimanta yachachirca. Ñucanchijpish alli huillangapajca gentecuna ima shina yuyashcatami alli intindina canchij. Chaipajca publicacioncunapimi mashcana canchij (1 Corintios 9:20-23). Diosmanta yachasha nijcunatami mashcana canchij (Mateo 10:11). Caita rurangapajca paicuna imata nishcatami alli uyana canchij. Inglaterrapi causaj shuj huauquica: “¿Cusa huarmi cushilla causangapaj, huahuacunata alli huiñachingapaj, llaquicunata chꞌimbapurangapajca imatataj rurana canchij?” nishpami tapuicunata ruran. Cai tapuicunata gentecuna contestashca huashaca paipaj telefonopimi shuj versota ricuchin. Pero, “Bibliapimi caita nin” ninapaj randica, “dos mil huatacuna huashaman quillcashca yuyaitami ricuchisha nini” ninmi. w19.07 págs. 21, 22 párrs. 7, 8

¿Yaya Diostaca mashnatataj cꞌuyana canchij? Jesusca shuj fariseotaca: “Cambaj Mandaj Taita Diosta tucui shunguhuan, tucui almahuan, tucui yuyaihuan cꞌuyangui” nircami (Mateo 22:36, 37). Jehová Diostaca mana jahua jahuallachu cꞌuyana canchij. Ashtahuanpish cada punllami shungu ucumanta cꞌuyana canchij. Jehová Diosta cꞌuyangapajca paitami rijsinaraj canchij. Bibliapica: “Maijanpish mana cꞌuyajca, Diostaca manaraj rijsishcachu. Diosca cꞌuyajmari” ninmi (1 Juan 4:8). Apóstol Pabloca Yayitu Diosta ashtahuan cꞌuyangapajca paimantami ‘alli yachana’, pai ima shina yuyashcatapish ‘intindinami’ canchij nircami (Filipenses 1:9). Bibliata yachai callarishpaca Jehová Diosmantami huaquin cosascunata yacharcanchij. Chaimantami paitaca cꞌuyai callarircanchij. Pero Diosmanta ashtahuan yachashpaca paitaca ashtahuanmi cꞌuyarcanchij. Yaya Diosta cꞌuyashpa catingapajca punllantami Bibliata estudiana, chaipi imalla yachashcatapish yuyarina canchij (Filipenses 2:16). w19.08 pág. 9 párrs. 4, 5

Dios mingashca trabajopi ñaupa amigocunata charishpapish shujtaj amigocunatami minishtinchij. Chaipajca caishuj huauqui panicunamanmi Dios ima shina bendiciashcata parlana canchij. Chashnami paicunaca Diosta cushilla sirvicushcata ricungacuna. Huarmi o cusa ungujpica canmantami Diostaca ña mana tucui punllacuna sirvi tucunchij nishpaca mana culpanachu canchij. Cutin ñucanchij ungushca cashpaca ñuca culpamantami Diostaca ña mana tucui punllacuna sirvi tucunchij nishpapish mana yuyanachu canchij. Yuyarishunchij, cusa huarmica “shuj aichallami” canchij. Jehová Diosmanca llaqui horaspi, cushi horaspipish cuidanacushpami causashun nishcataca mana cungarinachu canchij (Mateo 19:5, 6). Shinallataj maipica mana yuyashcapimi huahuata chari tucunchij. Chaimantachari Diosta tucui punllacuna sirvinataca saquishun. Chashna tucujpica huahuata huiñachina, cuidana ashtahuan importante cashcatami ricuchina canchij. Huahuamanca canca Dios cushca sumaj herenciami cangui ninami canchij (Salmo 127:3-5). Yayitu Diosta tucui punllacuna sirvishca sumaj experienciacunamantapish ñucanchij huahuaman parlashunchij. Chaimi huahua jatunyashpaca chashnallataj Diosta tucui punllacuna sirvinata munanga. w19.08 págs. 22, 23 párrs. 10, 11

Bibliapica tucui panda religioncunataca Babilonia jatun pueblo nishpami shutichin. Cai panda religioncunaca Diosmantami llullacunata yachachishcacuna. Shinallataj huainayaj huarmi shinami Jehová Diosmanta caruyashpa gobiernocunapaj ruraicunapi chagrurishcacuna. Ashtahuancarin religionta pushajcunaca paicunapaj iglesiaman rijcunatami mana alli tratashcacuna. Cullquitapishmi shuhuashcacuna. Shinallataj achca gentecunata, Diosta sirvijcunatapishmi huañuchishcacuna. Chashnami Diospaj shutita yangapi churashcacuna (Apocalipsis 18:24; 19:2). Jehová Diosca “chunga gachuyuj pucanicuj jatun animal” huainayaj huarmita tucuchichunmi saquinga. Cai pucanicuj jatun animalca Organización de las Naciones Unidas nishcatami ricuchin. Pucanicuj jatun animalpaj chunga gachuca chai organizacionta apoyacuj gobiernocunatami ricuchin. Dios agllashca horaspimi chai gobiernocunaca Babilonia jatun pueblotaca tucui charishcacunata quichunga. Paicuna millai cashcatapishmi ricuchingacuna (Apocalipsis 17:3, 16). Panda religioncuna: “Ñucaca ima llaquitapish mana charishachu” nishpa yuyacujpipish Diosca “shuj punllallapimi” tucuchinga. Panda religioncunata apoyajcunaca chaita ricushpaca mancharishcami saquiringacuna (Apocalipsis 18:7, 8). w19.09 págs. 10, 11 párrs. 10, 11

Jehová Diosta tucui shunguhuan sirvisha nijcunataca siempremi chasquinga. Jehovaman mingarishpa, bautizarishpami Jesuspaj invitacionta chasquinchij (Juan 6:37, 38). Jehová Diosca Jesusmanmi alli huillaicunata yachachichun mingashca. Jesusta catijcunapish cai valishca trabajotami pajtachi tucunchij. Chaipajca Jesús ayudanatami tucui shunguhuan crina canchij (Mateo 28:18-20). Humilde gentecunaca Jesuspajman cꞌuchuyanatami munarcacuna (Mateo 19:13, 14; Lucas 7:37, 38). ¿Imamantataj cꞌuchuyanata munarcacuna? Jesusca mana fariseocuna shinachu carca. Fariseocunaca jatun tucushcacunami carca (Mateo 12:9-14). Cutin Jesusca cꞌuyaj, humildemi carca. Fariseocunaca paicunallapi yuyashpami rijsishca canata munarcacuna. Pero Jesusca paita catijcunamanca humildecuna cachun, shujtajcunata sirvichunmi yachachirca (Mateo 23:2, 6-11). Fariseocunaca shujtajcunata manchachishpami mandaj carca (Juan 9:13, 22). Cutin Jesusca alaja shimicunahuan parlashpami shujtajcunata cushichij carca. ¿Ñucapish Jesuspaj ejemplotachu caticuni? nishca tapuipimi yuyana canchij. w19.09 págs. 20-23 párrs. 1, 7-9

Tandanacuicunaman rishpaca Jehová Diospajmanmi ashtahuan cꞌuchuyashun. Tandanacuicunaman ringapaj imapish jarcachunca mana saquinachu canchij. Chashnami shamuj punllacunapi gobiernocuna jarcajpipish tandanacuicunaman rinataca manataj saquishun (Hebreos 10:24, 25). Shinallataj gentecunata cazunapaj randica Diostami cazushun (Hechos 5:29). Huaquin versocunata de memoria yachashunchij (Mateo 13:52). Huaquincunaca imata liyishcataca ratomi cungarinchij. Pero Jehová Diosmi paipaj espíritu santohuan imata liyishcata yuyarichun ayudanga (Juan 14:26). Achca textocunata de memoria yachashcamantami llaquicunahuan cashpapish Diosmanta manataj caruyashun. w19.07 págs. 3, 4 párrs. 5, 8, 9

1914 huata huashamanta huacharishcacunaca tucuri punllacunapimi causacunchij. Jesusca tucuri punllacunapica terremotocuna, macanacuicuna, yaricaicuna, ungüicuna, millai gentecuna, Diosta sirvijcunatapish llaquichijcunami tiyanga nircami (Mateo 24:3, 7-9, 12; Lucas 21:10-12). Jesús nishcacuna pajtaricushcatami noticiacunapi uyashcanchij. Ashtahuancarin apóstol Pablo nishca shinami gentecunaca mana allita rurashpa causacuncuna. Chaimantami Diosta sirvijcunaca tucuri punllacunapi causacushcata crinchij (Miqueas 4:1). 1914 huatamanta cunancamaca achca tiempomi pasashca. Chaimantami cai shina causai ñalla tucurigrishcata yachanchij. ¿Tucuri punllacunapica imataj tucunga? ¿Tucuri punllacunapi cashcamantaca Jehová Diosca imata rurachuntaj munan? w19.10 pág. 8 párrs. 1, 2

Alli causaita charishpalla mana ahuantanachu canchij. Ashtahuanpish ima llaquicunata ahuantangapajca Diospimi confiana canchij (Romanos 12:12). Cai punllapaj versopi nishcata Jesusca ima llaquicuna ricurijpipish Diosta sirvishpa catinatami nisha nicurca. Cunan punllacunapi llaquicunata ahuantashpaca jatun llaqui punllapipishmi ahuantashun. Jatun llaqui punllapi gobiernocuna ñucanchijta llaquichisha nijpica mana manchaj canami minishtiringa. Yaya Diospipish confianami minishtiringa (Salmo 112:7, 8; Hebreos 13:6). Diospi cunanmanta confiangapajca Bibliatami punllanta liyina canchij. Shinallataj ñaupa punllacunapi Yaya Dios paita sirvijcunata ima shina quishpichishcatami yuyarina canchij (Salmo 68:20; 2 Pedro 2:9). Chashnami Mandaj Gog llaquichisha nijpica mana manchashun. Jehová ñucanchijta cuidanatami crinchij (1 Corintios 13:8). w19.10 pág. 18 párrs. 15, 16

Diablomi cai mundota mandacun. Chaimantami paica cai mundopaj cosascunapi yalli ocuparichun, ñucanchij munaicunatapish ama jarcarichun pandachisha nin (Efesios 2:1-3). Diablo pandachijpica Jehová Diosllataca mana adorashunchu. Apóstol Pedroca Diablopaj ruraicuna tucurinamanta, cai Allpapi ima laya causai tiyanamantami escribirca. Chai huashami Pedroca: “Cꞌuyashcacuna, chashna canata shuyacushpaca, ima mapa illaj, pi mana juchachipaj, alli sumajta causacujta Dios japichun tucui imatapish allita rurana yuyailla ruraichij” nirca (2 Pedro 3:14). Apóstol Pedro nishca shina Jehová Dios munashcata rurashpaca paillata adoracushcatami ricuchinchij. Diablopish paita catijcunapish shujtaj cosascunata punta lugarpi churachunmi pandachishpa catisha ningacuna (Lucas 4:13). Pero Jehová Diosta punta lugarpi churangapajca ima jarcachunca mana saquinachu canchij. Shinashpaca Jehová Diosllata adorashpa causashunchij. w19.10 págs. 26, 27, 31 párrs. 4, 18, 19

Imamantapish siempremi preocuparinchij. Por ejemplo, Jehová Diosta, Jesusta cushichisha nishpami preocuparinchij (1 Corintios 7:32). Shinallataj jatun juchata rurashca cashpaca Jehová Dioshuan alli tucusha nishpami preocuparinchij. Cazarashcacunapish paicunapaj huarmita o cusata cushichingapajmi preocuparincuna. Ima shina cashpapish tucuicunami ñucanchij familiamanta, huauqui panicunamantapish preocuparinchij (1 Corintios 7:33; 2 Corintios 11:28; Mateo 6:31, 32). Pero micunamanta, churarinamanta yallitaj sustarishpaca charina cosascunallapi yuyashpami cullquita cꞌuyai callarishun. Ashtahuancarin Jehová Diosmantami caruyashun (Marcos 4:19; 1 Timoteo 6:10). Shujtajcunapaj ñaupajpipish alli ricurisha nishpami yallitaj preocupari tucunchij. Chashna preocuparishpaca Diospaj ñaupajpi alli ricurinapaj randica shujtajcuna ñucanchijmanta burlarinata, llaquichinatami ashtahuan manchashun. ¿Ama yallitaj sustaringapajca imatataj rurana canchij? Jehová Diostami ñucanchij feta sinchiyachichun, manchaita anchuchichunpish mañana canchij (Proverbios 29:25; Lucas 17:5). w19.11 pág. 15 párrs. 6, 7

Huaquinpica imata decidishcataca mana cambianachu canchij. Por ejemplo, Jehová Diosta sirvingapaj agllashca cashpaca, paita sirvinataca mana saquinachu canchij. Shinallataj cusandij huarmindij ari ninacushcata pajtachinataca mana saquinachu can (Mateo 16:24; 19:6). Cutin ima cambiocuna tiyajpica shujtaj decidishcacunatami tal vez cambiana minishtiringa. ¿Alli decidingapajca imatataj rurana canchij? Jehová Dios yachaita cuchunmi mañana canchij. Manaraj imata decidishpa alli ricushunchij. Maipica Diosta sirvingapajmi shujtaj trabajota mashcana canchij. Mana cashpaca shujtaj ladopi causanamanmi rina canchij. Shinallataj trabajangapajmi imata estudianata agllana canchij. Manaraj caicunata decidishpaca Bibliata, publicacioncunatami liyina canchij. Shuj amigohuanpishmi parlana canchij (Proverbios 20:18). w19.11 pág. 27 párrs. 6-8

Jehová Diosca ñucanchij juchacunamanta cacharichingapajca Jesustami cai Allpaman cacharca. Jesús shamunapaj 700 huatacuna illajpirajmi profeta Isaiasca shuj jatun cacharichina tiempomanta parlarca. Chai jatun cacharichina tiempoca israelitacunapaj punllacunatapish ashtahuan yalli allimi cana carca. Profeta Isaiasca: “Mandaj Jatun Diospaj Espiritumari ñuca jahuapi. Mandaj Diosmari ñucataca aceitehuan churarca. Ñucatamari alli huillaita huajchacunaman huillachun cacharca. Shungu pꞌaquicunata alliyachichun, prezu apashcacunaman ña llujshina tiyashcata huillachunmi cacharca. Prezucunata cacharichichunmi cacharca” nircami (Isaías 61:1). Profeta Isaiasca chashna nishpaca ¿pimantataj parlacurca? Jesús huillai callarishca qꞌuipami Isaías nishca shimicunaca pajtari callarirca. Shuj punllaca Jesusca pai huiñashca Nazaret pueblomanmi rirca. Chayashpaca tandanacuna huasiman yaicushpami judiocunapaj ñaupajpi Isaías quillcashcata liyirca. Jesús liyinata tucuchishpaca Isaías quillcashca shimicuna paipi pajtaricushcatami ricuchirca (Lucas 4:16-19). w19.12 págs. 9, 10 párrs. 6-8

Llaqui punllacunata chꞌimbapurangapajca mana manchajcunami cana canchij. ¿Manchaihuan shina sintirishpaca imatataj rurana canchij? Mana manchaj cangapajca jatun cana, sinchi cana, yachaj canaca mana minishtirinchu. Davidpaj ejemplota ricushun. Paica jovenraj cashpaca Goliat runahuanmi macanacurca. Goliatca manchanai jatun runami carca. Davidca gentecunahuan macanacungapajpish mana preparadochu carca. Shuj lanzallatapish mana charircachu. Pero mana manchaj cashcamantami chai jatun tucushca runahuan macanacungapaj callpashpa rirca. ¿Davidca imamantataj mana manchaj carca? Paica tucui shunguhuanmi Jehová Dios ayudanata crirca (1 Samuel 17:37, 45-47). Davidca, Goliatca dimastij jatun runami can. Paitaca mana mishai tucushachu nishpaca mana yuyarcachu. Ashtahuanpish Jehovapaj ñaupajpi Goliat uchilla cashcatami yuyarca. Ñucanchijpish Jehová Dios ayudanatami crina canchij. Shinallataj ñucanchijta jarcajcunaca Diospaj ñaupajpi imapaj mana valishca cashcatami yuyana canchij. Chashna yuyashpaca mana manchashunchu (2 Crónicas 20:15; Salmo 16:8). w19.07 págs. 4, 5 párrs. 11-13

Tiquicoca apóstol Pablopaj alli amigomi carca (Hechos 20:4). Huata 55-pica Pabloca Judea llajtapi causaj huauqui panicunata ayudangapajmi cullquita tandana carca. Chaimi tal vez Pabloca chai trabajota pajtachichun Tiquicoman mingashcanga (2 Corintios 8:18-20). Asha huatacuna qꞌuipaca Pablotaca Roma llajta carcelpimi churarcacuna. Chaimi Tíquico shuti huauquica Pablo quillcashca cartacunata Asiapi tiyaj congregacioncunata animangapaj apashpa ayudarca (Colosenses 4:7-9). Tiquicopimi Pabloca confiashpa catirca (Tito 3:12). Chai punllacunapica huaquincunaca Diosta sirvijcuna cashpapish mana Tíquico shina carcacunachu. Chaimi Pabloca paicunapi mana confiarca. Por ejemplo, huata 65-pica Pabloca cutinmi Roma llajtapi prezu carca. Paica Asiamanta huauqui panicunaca Diospaj contracunata manchashcamantami ñucataca saquishcacuna nishpami quillcarca (2 Timoteo 1:15). Shinapish Pabloca Tiquicopi confiashcamantami shujtaj trabajotapish paiman mingarca (2 Timoteo 4:12). Tíquico alli amigo cashcamantami Pabloca cushilla sintirishcanga. w20.01 págs. 10, 11 párrs. 7, 8

Jehová Diosca paipaj espíritu santohuanmi ñucataca agllashca canga nishpachari yuyangui. Shina yuyacushpaca cashna tapuri: ¿Diospaj munaitaca tucui shunguhuanchu rurani?, ¿cushillachu predicani?, ¿Bibliataca allichu estudiani?, ¿huillacushpaca Yayitu Dios bendiciacushcatachu sintini?, ¿shujtajcunapish Yayitu Dioshuan alli apanacuchunchu ayudani?, ¿imata ruracushpapish Jehová Dios siempre bendiciashcatachu ricuni? Cai tapuicunata ari nishpaca ¿jahua pachaman ringapaj agllashca cashcatachu yuyana canchij? Mana. Yayitu Diosca tucui paita sirvijcunamanmi espíritu santota cun. Pero jahua pachaman rigrishcata mana seguro cashpaca Jehová Dios canta mana agllashcatami cuentata cungui. ¿Imamantataj chashna ninchij? Agllashcacunaca Yayitu Dios paicunata cayashcataca segurosmi cancuna. w20.01 pág. 23 párr. 14