Mayo

¿Jehová Diosta huahuacuna cꞌuyachunca yaya mamacunaca imatataj rurana can? Manoa shina cancunaca Jehová Diosman ayudachun mañaichij. Ashtahuanpish cancunapaj ejemplohuan yachachichij. Chashnami huahuacunapish allita ruranga. Josepish Mariapish paicunapaj ejemplohuanmi huahuacunaman yachachirca. Joseca familiata mantiningapaj trabajashpapish Jehová Diosta cꞌuyachunmi huahuacunaman yachachirca (Deuteronomio 4:9, 10). Huaquin yaya mamacunaca Jerusalén Pascua fiestaman rinaca shaicushcami can. Cullquipish minishtirishcami can nishpami yuyajcuna cashcanga. Shinapish Joseca cada huatami paipaj familiahuan Jerusalenman rij carca (Lucas 2:41, 42). Chashnami huahuacunamanca Diosta sirvina importante cashcata yachachirca. Mariaca Diospaj mandashcacunataca allimi rijsirca. Chaimantami paipaj huahuacuna Jehová Diosta cꞌuyachunca sumaj shimicunahuan, ruraicunahuan yachachirca. w19.12 págs. 24, 25 párrs. 9-12

Adán mana cazujpipish Yaya Diosca cꞌuyaj cashcatami ricuchirca. Juchamantami Adanpish ñucanchijpish Diospaj huahuacuna canata saquishcanchij (Romanos 5:12). Pero gentecunata ayudangapaj Jehová Dios imata rurashcata ricushun. Adán mana cazujpipish Diosca, Adanpaj huahuacunaca cutinmi ñuca familia tucunga nircami (Génesis 3:15; Romanos 8:20, 21). Chaimantami paipaj cꞌuyashca Churi Jesusta ñucanchijmanta huañuchun curca. Chashnami Yaya Diosca ñucanchijtaca dimastij cꞌuyashcata ricuchirca (Juan 3:16). Paica ñucanchij mañashcacunatami uyan. Shinallataj imalla minishtishcacunatami cun. Paipajman cꞌuchuyachunpishmi yachachin. Ashtahuancarin shamuj punllacunapimi ñucanchijmanca sumaj bendicioncunata cusha nin. Chaimantami paica tucuimanta yalli alli Yaya can. Yayitu Dios cꞌuyaj cashcata, cuidaj cashcata yachashpaca cushillami sintirinchij. w20.02 págs. 6, 7 párrs. 16, 17, 20

¿Maipica yallitaj sustarishcachu sintirishcanchij? Pi rimashcamanta, mana cashpaca ñucanchijllataj chugrichij shimicunata nishcamanta, mana allita rurashcamantachari yallitaj sustarinchij. Juchata rurashpacarin Jehová Diosca manataj perdonangachu nishpami preocuparinchij. Chashna sustarishcamantachari mana sinchi feta charinichu, imapaj mana valinichu nishpa yuyashun. Bibliapi tiyaj huaquin ejemplocunamanta yachashun. Profeta Samuelpaj mama Anaca sinchi fetami charirca. Shinapish paipaj cusapaj shujtaj huarmi paita llaquichishcamantami Anaca llaquilla sintirirca (1 Samuel 1:7). Apóstol Pablopish sinchi feta charishpapish huauqui panicunamantami sustarirca (2 Corintios 11:28). Rey Davidtaca sinchi feta charishcamantami Yayitu Diosca paitaca achcata cꞌuyarca (Hechos 13:22). Pero Davidca jatun juchata rurashcamantami dimastij llaquilla sintirirca (Salmo 38:4). Jehová Diosca paicunata ayudashpami cushichirca. w20.02 pág. 20 párrs. 1, 2

Diosman mingarishpaca “tucui causaipimi canta sirvisha” nishpami cambaj causaitaca paiman mingana cangui. Jehová Diosman mingarishca horasmantaca ña mana can munashca shina causanguichu. Ashtahuanpish paipajllami causangui (Romanos 14:8). Chai punllamanta huichimanca paita sirvinami ashtahuan importante canga. Diosman mingarishpaca paihuan ari ninacushcatami ricuchingui. Pero Jehová Diosca mingarichunca mana obliganchu. Shinapish can ari nishcata pajtachichunmi munan (Salmo 116:12, 14). Diosman mingarinaca canlla Jehová Dioshuan parlanami can. Cutin bautizarinaca jatun tandanacuipi tucuicunapaj ñaupajpi cambaj causaita Jehová Diosman mingarishcata ricuchinami can. Bautizarishpaca tucuicunapaj ñaupajpimi Jehová Diosta tucui shunguhuan, tucui almahuan, tucui yuyaihuan, tucui fuerzahuan cꞌuyashcata ricuchingui. Paillata tucui causaipi sirvisha nishcatapishmi ricuchingui (Marcos 12:30). w20.03 pág. 9 párrs. 4, 5

Jehová Diosta gentecuna alli rijsichunca Diabloca mana munanchu. Apostolcuna huañushca qꞌuipaca panda yachachijcunami tiyai callarirca. Paicunaca llullacunata nishpami yachachi callarircacuna (Hechos 20:29, 30). Cai panda yachachijcunaca Jehová Diospaj shutitami Bibliamanta anchuchishcacuna. Paicunaca “Señor”, “Amito”, “Mandaj Dios” nishpami churashcacuna. Caita rurashcamantami gentecunaca Diospaj shutitaca mana rijsincuna (1 Corintios 8:5). Shinallataj paicunaca Jehovapaj, Jesuspaj shuticunata Bibliapi churanapaj randica “Señor” nishpallami churashcacuna. Caita rurashcamantami gentecunaca Diospish Jesuspish shujlla Diosmi can nishpa crincuna. Shujtaj gentecunacarin Diostaca mana rijsi tucunchijchu nincunami. Pero Bibliapica mana chaita yachachinchu (Juan 17:3, Hechos 17:27). w19.06 pág. 5 párr. 11

Diospaj Shimita alli yachachingapajmi imata rurana cashcata ashtahuan yachashpa catina canchij (Proverbios 1:5; 1 Timoteo 4:13, 15). Ñucanchijca “Diospajta paihuan rurajcunami canchij”. Chaica shuj jatun bendicionmi can (1 Corintios 3:9). Ima ashtahuan importante cashcata mana cungarishpa, Diosta sirvina yuyailla causashpaca cushicuihuanmi paipajta rurashun (Filipenses 1:10, NWT; Salmo 100:2). Ima problemata charishpapish, imata mana rurai tucushpapish Yayitu Diosca paipaj Shimita alli huillachunmi fuerzata cunga (2 Corintios 4:1, 7; 6:4). Shinallataj ashallata o achcata predicai tucushpapish tucui shunguhuan rurashpaca cushillami sintirishun (Gálatas 6:4). Ashtahuancarin Diospaj Shimita alli huillashpaca Jehová Diostapish, gentecunatapish cꞌuyashcatami ricuchishun. Bibliapica: “Chashna rurashpaca canllatajpish quishpiringuimi, can huillashcata uyajcunapish quishpiringami” ninmi (1 Timoteo 4:16). w19.04 págs. 6, 7 párrs. 15, 17

¿Diablopish, demoniocunapish gentecunataca ima shinataj pandachicun? Por ejemplo, maijancunaca: “Ñucanchijca podertami charinchij. Chaimantami estrellacunata ricushpa, adivinashpa imalla tucunataca yachai tucunchij” nincunami. Cutin shujtajcunaca: “Huañushcacunahuanmi parlai tucunchij” nincunami. Maijancunacarin: “Magiata rurashpami shujtajcunata llaquichi tucunchij” nincunami. Maipi causashpapish Diablopaj ruraicunamantaca cuidarinami canchij. Shuj organización nishca shinaca, Ecuador llajtapi, shujtaj 17 llajtacunapica quimsa gentecunamantaca shujmi magiapi crin. Shinallataj chai llajtacunapica quimsa gentecunamantaca shujmi, “huañushcacunahuanca parlai tucunchij” nin. Cutin shuj organización nishca shinaca, Africapi tiyaj 18 llajtacunapica casi tucuicunami brujeriacunapi crincuna. w19.04 págs. 20, 21 párrs. 3, 4

Jehová Diosca tucui millai ruraicunatami pꞌiñan (Salmo 5:4-6). Chaimantami huahuacunata llaquichina o violana ruraicunataca Jehová Diosca manataj ricunayachin. Ñucanchijpish chai mapa ruraicunatami pꞌiñana canchij. Congregacionpi tiyachunpish manataj saquinachu canchij (Romanos 12:9). Jesusca paipaj rurashcacunahuan, rimashcacunahuanmi ima shina causana cashcata ricuchirca. Chaitami Bibliapica ‘Cristopaj mandashcacuna’ nin (Gálatas 6:2). Jesusca cꞌuyaj cashcamanta, allita ruraj cashcamantami alli causanata yachachirca. Diosta sirvijcunaca Jesuspaj mandashcacunatami cazunchij. Chaimantami huahuacunata llaquichinapaj randica cꞌuyaihuan alli tratana, alli cuidana canchij. Huahuacunata violajcuna, llaquichijcunaca Jesuspaj mandashcataca mana cazuncunachu. Paicunapaj culpamantami llaquichishca huahuacunaca, ñucataca ni pi mana cꞌuyanchu nishpa llaquilla sintirincuna. Cunan punllacunaca achca millai, umaj gentecunami tiyan. Cashna shina millai gentecunami huaquinpica congregacionman yaicusha nishcacuna (2 Timoteo 3:13). Chaimi congregacioncunapipish huaquinpica mapa ruraicuna tiyashca. Maijancunaca Diosta sirvijcuna cashpapish paicunapaj mapa munaicunamantaca mana jarcarishcacunachu. Chaimantami huahuacunataca jatunta llaquichishcacuna o violashcacuna. w19.05 págs. 8, 9 párrs. 1-3

Llaquilla caj huauqui panica Diostaca mana mañasha ningachu. Juchasapa cashcamantami Diosca ñucataca mana uyanga nishpachari yuyanga. Chaita ricushpaca paipaj shutita nombrashpami ishquindij Diosta mañana canchij. “Ñucapish, tucui huauqui panicunapishmi paitaca cꞌuyanchij. Cambaj cꞌuyashca sirvij tranquilo sintirichun ayudahuai” nishpami mañana canchij. Cashna shina mañashpami paicunata cushichishpa ayudashun. Manaraj rimarishpa alli yuyashunchij. Mana alli yuyashpa parlashpaca llaquilla cajcunataca ashtahuanmi llaquichishun. Pero imatapish alli yuyashpa parlashpaca paicunatami cushichishun (Proverbios 12:18). Cushichij shimicunahuan parlangapajca Dios ayudachunmi mañana canchij. Shinallataj shujtajcunata ayudangapajca shuj versotami liyina canchij (Hebreos 4:12). Llaquilla cajcunata ayudacushpaca Jehová Dios cꞌuyaj cashcatami yuyachina canchij. Paicuna imalla tucushcataca Diosca tucuitami yachan. Violajcuna mana arrepintirijpica paica tucuchingami (Números 14:18). w19.05 págs. 18, 19 párrs. 18, 19, 21

Diabloca Jehová Diosmantami caruyachisha nin. Paica tucuicuna pai shina yuyachunmi munan. Gentecunata pandachingapajca imallata munashcata, imallata yuyashcatami ricun (Colosenses 2:4). ¿Diabloca ñucanchijtaca pandachi tucunchu? Ari, paica pandachi tucunmi. Colosenses 2:8-pi tiyaj shimicunataca apóstol Pabloca Diosta mana sirvijcunapajca mana quillcarcachu. Ashtahuanpish ungido huauqui panicunapajmi quillcarca (Colosenses 1:2, 5). Diabloca cai Allpamanmi shitashca cashca. Ima shinami Pablopaj tiempopi huauqui panicunata pandachisha nirca, chashnallatajmi ñucanchijtapish pandachisha nin (1 Corintios 10:12; Apocalipsis 12:9, 12, 17). Shinallataj millaicuna, umajcunaca ashtahuan millai tucushpami caticuncuna. Paicunapishmi ñucanchijta pandachisha nin (2 Timoteo 3:1, 13). w19.06 pág. 2 párrs. 1, 2

Jezabel huarmica Eliastami huañuchisha nirca. Chaita yachaj chayashpami Eliasca achcata mancharirca. Chaimantami Beerseba ladoman miticushpa rirca. Chaiman chayashpami Eliasca, cunanca huañushatajmi nini nirca. ¿Imamantataj chashna llaquilla sintirirca? “Eliasca tucuipi ñucanchij shinallatajmi carca” (Santiago 5:17). Paica yallitaj shaicushca cashcamanta, achca llaquicunata charishcamantami huañunata munashcanga. Eliasca: Cai tucui huatacunata Jehovapaj imalla rurashcapish imapaj mana valinchu, israelitacunapish mana cambiasha nincunachu, ñucallami Diosta sirvicuni nishpami yuyashcanga (1 Reyes 18:3, 4, 13; 19:10, 14). Jehovami pai ima shina sintirishcataca alli yacharca. Elías ima shina sintirishcata huillajpica mana rimarcachu. Chaipaj randica pacienciahuanmi animarca (1 Reyes 19:5-7). Shinallataj cꞌuyaihuanmi imapi mejorana cashcata consejarca. 7 mil israelitacuna Baal diosta mana adorashcatapishmi huillarca (1 Reyes 19:11-18). Chashnami Jehová Diosca Eliasta cꞌuyashcata ricuchirca. w19.06 págs. 15, 16 párrs. 5, 6

Ñaupajman pushaj huauquicunata cazushunchij. Paicunata cazushpaca llaquicunapi mana urmashunchu. Diosmanta huillachun jarcacuj llajtapi ima tucushcata ricushun. Pushaj huauquicunaca chai llajtapi causaj huauqui panicunataca, “huillacushpa revistacunata, tratadocunatapish ña mana saquinachu canguichij” nishpami huillarcacuna. Pero shuj precursorca pai yuyashcata rurasha nishpami mana cazurca. Paica shujtaj gentecunamanmi revistacunata saquirca. Chaita ricushpami policiacunaca precursor saquishca revistacunata tandai callarircacuna. Chai huashaca, imamanta chaita ruracushcata yachangapajmi policiacunaca precursortapish, shujtaj huauqui panicunatapish cayarcacuna. ¿Caimantaca imatataj yachanchij? Ñucanchijca tucuitami yachanchij nishpa yuyanapaj randica pushaj huauquicunatami siempre cazuna canchij. Chaita rurajpica Jehová Diosmi bendicianga (Hebreos 13:7, 17). w19.07 págs. 12, 13 párr. 17

Jesusca huañunapaj shuj tuta faltajpimi paita catijcunamanca cancunataca ñucata catishcamantami shujtajcunaca pꞌiñangacuna nirca (Juan 17:14). Chai punllacunamantami Diosta catijcunataca llaquichingapaj catirashcacuna. Armagedón chayamucujpimi millaicunaca ashtahuan catirashpa llaquichingacuna (Mateo 24:9). ¿Llaqui punllacunapajca ima shinataj allichirishun? Jatun llaquicunami tiyanga nishpaca mana yuyacunallachu canchij. Chashna yuyacushpallaca dimastijmi sustarishun. Manaraj llaquicuna shamujpipish manchaimantami Jehová Diosta sirvinata saquishun (Proverbios 12:25; 17:22). Ñucanchij chashna mancharishca cajpica ‘pꞌiñaj Diabloca’ pandachi tucunmi (1 Pedro 5:8, 9). Pero ama manchangapajca Jehová Dioshuan alli amigo cangapajmi esforzarina canchij. w19.07 pág. 2 párrs. 1-3

Jesús causarishca huashaca apostolcunataca ‘Galileapi tiyaj urcupi tupangapaj’ nircami (Mateo 28:16). Apostolcunaca paihuan tandanacushpaca cushillami sintirishcangacuna. Chai urcupica ‘500 yalli huauqui panicunamanmi’ Jesusca ricurishcanga (1 Corintios 15:6). ¿Jesusca imapajtaj paipaj catijcunataca chai urcupi tandachirca? “Tucui cai pachata richij, ñuca yachacujcunata ruraichij” nishpa mandangapajmi paicunata tandachirca (Mateo 28:18-20). Jesús mandashcata chai urcupi uyajcunami punta congregación tucurcacuna. Paicunaca shujtaj gentecunatapish Jesusta catijcuna tucuchunmi ayudana carca. Cunan punllacunapica muyundij Allpapimi achca huauqui panicuna tiyan. Paicunaca ñaupa punllapi causaj huauqui panicuna shinallatajmi huillacuncuna. w19.07 pág. 14 párrs. 1, 2

Noruega llajtapi causaj superintendenteca: “Gentecunaca Diosmantaca mana tanto parlasha nincunachu. Pero muyundij Allpapi imalla tucucushcata parlanatami munancuna. Chaimantami paicunata saludashca huashaca cashna nishpa tapuni: ‘¿Shamuj punllacunapica alli causaitachu charishun? ¿Politicocuna, cientificocunaca alaja causaitachu cui tucuncuna?’ Cai tapuicunata paicuna cutichishca qꞌuipaca paraisomanta parlaj versotami ricuchini. Yaya Dios cai Allpata mana tucuchinata yachashpa, cai Allpallapitaj huiñaita causanata yachashpaca cushillami sintirincuna” ninmi (Salmo 37:29). Tucuicunami chꞌican chꞌican yuyaicunata charinchij. Chaimantami cada uno ima shina cashcata ricushpa huillana canchij. Maijan gentecunaca Diosmanta uyanatami munancuna. Pero shujtajcunaca manaraj Diosmanta parlashpa shujtaj cosascunata parlachunmi munancuna. Chashna cajpipish tucuicunamanmi huillana canchij (Romanos 1:14-16). Jehová Diosllatajmi alli shungu gentecunaman huillachun ayudanga (1 Corintios 3:6, 7). w19.07 págs. 22, 23 párrs. 10, 11

Jehová Dios ima shinami ñucanchijta cꞌuyan, shinallatajmi huauqui panicunata cꞌuyana canchij (1 Juan 4:20, 21). Maipica Jehová Diosta sirvicushcamanta, pai shina cangapaj esforzaricushcamanta huauqui panicunataca cꞌuyashallami ninchijchari. Shinallataj Jesusca ñucanchijta cꞌuyashcamantami paipaj causaita curca. Pai shina cangapajpish esforzaricushcamanta huauqui panicunataca cꞌuyashallami ninchijchari. Pero caishuj chaishuj cꞌuyanacuichij nishpa mandashcata pajtachinaca maipica sinchimi ricurin. Evodia y Síntique huarmicunaca tandallami apóstol Pablohuan Diosta sirvishca carcacuna. Shinapish paicunapura pꞌiñanacushcamantami chꞌicanyarircacuna. Chaimantami Pabloca paicunapaj shuticunata cartapi quillcashpa consejota curca. “Shuj yuyailla tucuchunmi rogani” nircami (Filipenses 4:2, 3). Pabloca tucui huauqui panicunamanpishmi: “Ama huashalla parlanacushpa, ama rimanacushpa tucui imatapish alli ruraichij” nirca (Filipenses 2:14). w19.08 págs. 9, 10 párrs. 6, 7

Tucui punllacuna Diosta sirvijcunataca chꞌican chꞌican huauqui panicunami ayudancuna. Por ejemplo, paicunapaj familiacunata cuidashpa, ima minishtishcacunata cushpa, cullquita cushpami ayudancuna. Shinallataj Diosta sirvishpa catichunmi sumaj shimicunahuan animancuna. Tucui punllacuna Diosta sirvij shuj huauqui o pani ñucanchij congregacionpi sirvinaman shamujpica ¿imatataj rurana canchij? Paiman mingashca trabajota mana alli pajtachishcamanta o mana alli cosascunata rurashcamantami shamun nishpaca mana yuyanachu canchij. Chaita yuyanapaj randica cꞌuyaihuanmi chasquina canchij. Paipaj ungüimanta mana ñaupa laya Diosta sirvi tucujpipish imallata rurashcamantami felicitana canchij. Shinallataj cai huauqui o panica achca experienciatami charin. Preparaciontapishmi chasquishca canga. Chaimantami paita rijsingapaj esforzarina canchij. Shujtaj lugarmanta Diosta sirvinaman shamuj huauquica maipi causanata, ima shina carrota japinata, maipi trabajanatami yachasha ninga. w19.08 págs. 23, 24 párrs. 12, 13

Mandaj Gogca paipaj soldadocunapi, armacunapimi confianga (2 Crónicas 32:8). Pero ñucanchijca Jehová Diospimi confiashun. Chaica Mandaj Gogpajca yanga shinami ricuringa. Babilonia jatun puebloca achca podertami charirca. Shinapish paipaj yanga dioscuna ‘chunga gachuyuj pucanicuj jatun animalmantaca’ mana quishpichi tucurcachu (Apocalipsis 17:16). Chaimantami Mandaj Gogca Diosta sirvijcunata mishanaca jahuallami nishpa yuyanga. Achca pꞌuyucuna shuj llajtata tapai callarij shinami Diosta sirvijcunata llaquichi callaringa. Pero Mandaj Gogca shuj trampapimi urmanga. Ima shinami puca cuchapi Faraón runahuan tucurca. Chashnallatajmi Mandaj Gogca Jehová Dioshuan macanacucushcata cuenta japinga (Éxodo 14:1-4; Ezequiel 38:3, 4, 18, 21-23). Jesuspish angelcunapish Diosta sirvijcunata ama llaquichichunmi Mandaj Gogta, paipaj soldadocunatapish tucuchingacuna (Apocalipsis 19:11, 14, 15). ¿Pero gobiernocunata umachij Diablohuanca imataj tucunga? Jesusca Diablota, demoniocunataca mil huatatami jatun jutcupi huichcashpa churanga (Apocalipsis 20:1-3). w19.09 págs. 11, 12 párrs. 14, 15

Dios cusha nishcacuna pajtarichunmi munanchij. Ñucanchij shuyashcacuna mana utca pajtarijpica llaquillami sintiri tucunchij. Hasta desanimari tucunchij (Proverbios 13:12). Por ejemplo, 1914 huata chayajpimi huauqui panicunaca cieloman rinata shuyacurcacuna. Pero maijancunaca paicuna shuyacushca mana pajtarijpipish ¿imatataj rurarcacuna? Paicunaca Diosta tucui shunguhuan sirvingapajmi dedicarircacuna. Cieloman rinallapica mana yuyarcacunachu. Huañuna horascamami Diosta sirvishpa causarcacuna. Ñucanchijpish Jehová Dios paipaj shutita jatunyachichun, pailla jatun mandaj cashcata ricuchichunmi shuyanchij. Shinallataj pai nishcacunata pajtachichunmi munanchij. Yaya Diosca pai agllashca horaspimi chaitaca pajtachinga. Chaicamaca Diosta sirvishpa catishunchij. Ñucanchij shuyacushcacuna mana utca pajtarijpipish ama desanimarishunchij. w19.08 págs. 4, 5 párrs. 9, 10

¿Gentecunaca ñucamanta parlashpaca paica mana utca pꞌiñarij, humildemi can nincunachu? ¿Shujtajcunata sirvingapajca humilde trabajocunata rurashpachu ayudani? ¿Gentecunataca cꞌuyaihuanchu tratani? nishca tapuicunapimi yuyana canchij. Jesusca paipaj discipulocunataca tranquilo, alli sintirichunmi ayudarca. Shinallataj cushicushpami paicunaman yachachirca (Lucas 10:1, 19-21). Jesusca tapuicunatapish rurachun, ima shina yuyashcatapish huillachunmi animarca (Mateo 16:13-16). Caipi yuyashun. Invernadero ucupi plantacunaca sumajta sisashpami alli granota pꞌucuncuna. Chashnallatajmi Jesusca paipaj discipulocunata alli tratarca. Chaimantami paipaj yachachishcacunata intindishpa, alli granota pꞌucuj shina allicunata rurarcacuna. Fariseocunaca paicunata tapujpica colerajcunami carca. Paicuna shina mana yuyajpica gentecunatapish llaquichijcunami carca. Ñucanchijca mana fariseocuna shinachu cana canchij (Marcos 3:1-6; Juan 9:29-34). Autoridadta charishpaca: “¿Trabajopi, huasipica ima shinataj shujtajcunata tratani? ¿Paicunahuanca sumajtachu cainani? ¿Shujtajcuna ñucata tapuicunata rurachunchu animani? ¿Paicuna ima shina yuyashcata huillajpica atentochu uyani?” nishpami tapurina canchij. w19.09 págs. 20, 21, 23 párrs. 1, 9-11

Cunan punllacunapica gobiernocunaca chꞌican chꞌican llajtacunapura tranquilo causanamantami parlancuna. Shinapish Jehovapaj punlla chayanapajca mana gobiernocunallachu tranquilo causai tiyashcata yuyangacuna. ¿Imamantataj chashna ninchij? Gobiernocuna “sumajtami causacunchij” nishpa huillajpica achca gentecunami muyundij Allpapi de verdad alli causacushcata cringacuna. Shinapish gobiernocuna chaita nijpica “jatun llaqui punllaca” ñapishmi chayamunga (Mateo 24:21). Gobiernocuna imamanta sumajtami causacunchij nigrishcataca mana yachanchijchu. Ima shina nigrishcatapish mana yachanchijchu. Shuj cutinlla o achca cutin chashna nigrishcatapish mana yachanchijchu. Pero gobiernocuna muyundij Allpapi sumajtami causacunchij nijpica mana crina cashcatami alli yachanchij. Ashtahuancarin caita nijpica “Jehovapaj punlla” ña callarigrishcatami ricushun (1 Tesalonicenses 5:2). w19.10 págs. 8, 9 párrs. 3, 4

Armagedón macanacuipimi cai llaqui causaica tucuringa. Shinapish Armagedón macanacuitaca mana manchanachu canchij (Proverbios 1:33; Ezequiel 38:18-20; Zacarías 14:3). ¿Imamantataj mana manchana canchij? Jehová Diosca Diablohuan, demoniocunahuan, cai Allpapi tiyaj soldadocunahuan macanacuchunmi Jesusta, ungidocunata, huaranga huaranga angelcunatapish cachanga. Chashnami Diosca contracunata mishanga (Apocalipsis 6:2; 17:14). Isaías 54:17-pica Diosca: “Canta tucuchingapaj ashtahuan ima macanacunacunata rurajpipish, cantaca chaicunaca imata mana rurai tucungachu” ninmi. “Paillapi shunguta churajcunataca Mandaj Diosmi huaquichin” (Salmo 31:23). Chaimantami “yallitaj achcacunaca” jatun llaqui punllamanta quishpirishun. Shinallataj Diosta sirvishpami catishun (Apocalipsis 7:9, 13-17). Jehová Diosta cꞌuyajcunaca paipaj shutita jatunyachijpica cushillami sintirishun (Ezequiel 38:23). w19.10 págs. 18, 19 párrs. 17, 18

Cai shina causai ñalla tucurigrishcamantami sinchi llaquicuna ricuringa (2 Timoteo 3:1). Por ejemplo, Africapi caj shuj llajtapica candidatocunata agllashca huashami 6 quillacuna yallita pꞌiñanacuicuna, macanacuicuna tiyarca. Ñucanchij huauqui panicunaca macanacui pushtupi cashcamantami llaquipi carcacuna. Chaimantami maijancunaca tranquilo lugarpi causaj huauqui panicunapaj huasiman miticushpa rircacuna. Shuj huauquica: “Chai llaqui horaspica amigocunami ñucanchijhuan carca. Caishuj, chaishujcunapurami animarinacurcanchij. Chaimantami cushilla sintirircani” ninmi. Jatun llaqui punlla callarijpica alli amigocunata charishcamantami contentos sintirishun (Apocalipsis 7:14). Chaimantami cunan punllacunapi huauqui panicunahuan alli apanacuna canchij (1 Pedro 4:7, 8). ¿Imamantataj alli apanacuna canchij? Diospaj contracunaca paicunapaj llullacunahuanmi ñucanchijta chꞌicanyachisha ningacuna. Caishuj chaishujpi ama confiachun, ama ayudanacuchunmi pandachisha ningacuna. Pero tucui laya pandachisha nishpapish mana pudingacunachu. w19.11 págs. 2, 7 párrs. 1, 2, 19

Diabloca llullapaj yayami can. Chaimantami paica mana alli gentecuna Jehová Diosmanta, huauqui panicunamantapish llullacunata nichun pandachin (Juan 8:44). Por ejemplo, apostatacunaca testigo de Jehovacunamantami Internetpi, televisionpi, radiopi, periodicopi llullacunata nincuna. ¿Pi chai llullacunamanta parlajpica imatataj rurana canchij? Mana uyanachu canchij. Mana uyashpaca Jehová Diospi, huauqui panicunapi confiashcatami ricuchishun. Shinallataj ñucanchij fe ama chiriyachunca apostatacunahuan pꞌiñanacunataca mana mashcanachu canchij. Paicunata uyana munaillatapish mana charinachu canchij. Chashnami paicunapaj tucui ruraicunamanta caruyashun. ¿Apostatacunapaj llullacunamanta, paicunahuan pꞌiñanacunamanta caruyashcanguichu? Ari nishpaca allitami rurashcangui. Pero Diabloca ñucanchijta ima shina ashtahuan pandachinatami mashcashpa caticun. w19.11 págs. 15-17 párrs. 8, 11

Diosta cꞌuyashcamanta imatapish alli decidishunchij. Imata rurajpica Jehová Diosca imamanta chashna decidishcatami ricun. Chaimantami imata manaraj rurashpaca imamanta chaita decidigrishcata alli ricunaraj canchij. Chaita mana rurashpaca ñucanchij decidishcataca tal vez mana pajtachi tucushunchu. Por ejemplo, shuj jovenca precursor canatami agllan. Paica Jehová Diosta cꞌuyashcamantami precursor tucusha nini nishcanga. Shinapish asha tiempo qꞌuipaca horascunata mana pajtachinchu. Huillanapipish cushilla canapaj randica llaquillami sintirin. ¿Imamantataj chashna sintirin? Cai jovenca yaya mamata, o shujtajcunata cushichingaraicullami precursor tucushca canga. Shujtaj ejemplopi yuyashun. Bibliata estudiajca tabacota fumanatami saquisha nin. Ishqui semanacunatami ama cutin fumangapaj tucui pudishcata ruran. Tucuita rurashpapish cutinmi fumanapi urman. Pero Jehová Diosta cꞌuyashcamanta, paipaj ñaupajpi alli ricurisha nishpami fumanata saquin (Colosenses 1:10; 3:23, NWT). w19.11 págs. 27, 29 párrs. 9, 10

Apóstol Pabloca huañuna horascama Diosta sirvishpa imata japina cashcataca tucui shunguhuanmi crirca. Paica ungido cashcamantami cielopi causagrinata shuyarca. Pero chaita chasquingapajca Diosta sirvishpami catina carca (Filipenses 3:14). Filipos llajtapi causaj huauqui panicuna Dios cusha nishcata japichunca Pabloca shuj chꞌimbapuraitami churarca. Cunanca chaimanta yachashun. Apóstol Pabloca Filipos llajtapi causaj huauqui panicunamanca ñuca causanaca jahua pachapimi can nircami (Filipenses 3:20). ¿Paicunaca Pablo nishcataca imamantataj mana cungarina carca? Chai tiempopica Roma llajtamanta canaca dimastij valishca shinami ricurirca. Roma llajtamanta cajcunaca chai llajtapica gobiernocuna mandashcatami cazuna carca. Pero Dios agllashca huauqui panicunaca cielopimi ashtahuan alli causaita charina carca. Cunan punllacunapish Dios agllashca huauqui panicunaca jahua pachapi huiñai causaita charingapajmi Diosta sirvishpa caticuncuna. Paicunaca alli ejemplotami ñucanchijman cun. w19.08 págs. 6, 7 párrs. 14, 15

Israelitacunapaj punllacunapica cacharirina huata chayajpipish cutin tigra dibiyashpachari esclavo tucujcuna carca (Levítico 25:8-12). Maipicarin huañungacamami esclavocuna carca. Pero Jesusca ñucanchij juchacunamantaca huiñaipajmi cacharichin. Puntaca apostolcuna, shujtaj discipulocunami cacharichishcacuna carca. Yaya Diosca huata 33-pimi paicunata espíritu santohuan agllarca. ¿Imapajtaj agllarca? Paicunapaj churicuna cachunmi agllarca. Chaimantami chai agllashcacunaca jahua pachapi Jesushuan mandangapaj causarina carcacuna (Romanos 8:2, 15-17). Shinallataj paicunaca religionta pushajcunapaj panda yachachishcacunamanta, panda costumbrecunamantami cacharichishca carca (Lucas 4:16-19, 21). Ashtahuancarin Diospaj ñaupajpimi huañuiman apaj juchamanta quishpirishca carcacuna. Shinami Nazaret tandanacuna huasipi Jesús huillashca cacharichinamanta ña beneficiarircacuna. Cacharichina tiempoca huata 33-pimi callarirca. Jesucristo mil huatacunata mandashpa tucuchijpimi cacharichina tiempoca tucuringa. w19.12 págs. 11, 12 párrs. 11, 12

Yaya mamaca huahuacuna alli amigocunata agllachunmi ayudana can. Shinallataj huahuacuna pihuan apanacucujta, imata ruracujtami yachana can. Ashtahuanpish internetpi, celularpi pihuan parlacujtami ricuna can. Chaita mana rurajpica mana alli amigocunapaj yuyaicuna, ruraicunami huahuacunata pandachi tucun. Huaquin yaya mamacunaca paicunapaj huahuacuna Diosta alli sirvij amigocunahuan tiempota pasachunmi ayudancuna. Costa de Marfil llajtamanta Dani y Bella shuti cusa huarmica superintendente de circuito huauquitami paicunapaj huasipi saquirichun siempre invitajcuna carca. Huauqui Danica: “Superintendente de circuito huauqui ñuca churita animajpimi paica precursor tucurca. Cunancarin superintendente de circuito shinami ayudan” ninmi. Huahuacuna llulluraj cajpi yachachichij. Chashna yachachijpimi Diosta alli sirvijcuna tucunga (Proverbios 22:6). Timoteopaj ejemplopi yuyai. Paipaj mama Eunice, paipaj abuela Loidaca pai huacharishca punllamantami Jehová Diosmanta yachachircacuna (2 Timoteo 1:5; 3:15). w19.12 págs. 25, 26 párrs. 14, 16, 17

Alli amigocunami cana canchij. Huauqui panicunata ayudangapaj ari nishca cashpaca pajtachishpami ayudana canchij (Mateo 5:37; Lucas 16:10). Ayudachun minishtijcunaca ñucanchij ayudanata yachashpaca tranquilomi sintirincuna. Shuj panica: “Turi ñañacuna imapi ayudasha nishcata pajtachinata yachashpaca cushillami sintirini” ninmi. Llaquicunahuan cajcunaca alli amigocunatami minishtincuna. Ima tucushcata paicunaman parlashpami tranquilo sintirincuna. Pani Sandrataca paipaj cusami shitashpa rirca. Chaimi tranquila cangapajca ima shina sintirishcata paipaj amigocunaman parlarca. Sandraca: “Ñuca ima shina sintirishcataca cutin cutin parlajpipish ñuca alli amigocunaca pacienciahuanmi uyarcacuna” ninmi. Ñucanchijpish alli amigocuna cangapajca pacienciahuanmi alli uyana canchij. w20.01 pág. 11 párrs. 9-11

Ñaupa tiempopi Diosta sirvijcunaca espíritu santotami chasquircacuna. Pero paicunaca mana jahua pachaman ringapajchu espíritu santota chasquircacuna. Por ejemplo, Davidca espíritu santotami chasquirca (1 Samuel 16:13). Espíritu santota chasquishcamantami Dios ima nisha nishcataca intindirca. Chaimi Bibliapaj huaquin salmocunata escribirca (Marcos 12:36). Shinapish apóstol Pedroca ‘Davidca mana jahua pachaman rishcachu’ nishpami huillarca (Hechos 2:34). Bautizaj Juanpish Diospaj espíritu santohuan jundami carca (Lucas 1:13-16). Jesusca: ‘Bautizaj Juanta yalli allica pi mana tiyashcachu’. Shina cashpapish Juanca mana jahua pachapi mandangachu nishpami yachachirca (Mateo 11:10, 11). Jehová Diosca cai runacunata jahua pachaman richunca mana agllarcachu. Pero paipaj espíritu santohuanmi paipaj munaita rurachun ayudarca. ¿Cai runacunaca Diosta mana alli sirvishcamantachu jahua pachamanca mana rircacuna? Mana. Ashtahuanpish Yayitu Diosca paicunataca cai Allpapi huiñai causaita charichunmi bendicianga (Juan 5:28, 29; Hechos 24:15). w20.01 págs. 23, 25 párr. 15

Jehová Diosca paipaj familia ucupi cachunmi ñucanchijta invitashca. Chaimantami Diospaj familia ucupi cangapajca paiman mingarishcanchij. Jesús ñucanchijmanta huañushcatapishmi crishcanchij. Chashnami tucuicuna shuj shinalla cushilla Yayitu Diosta sirvicunchij. Cai Allpapi causanata shuyajcunapish jahua pachapi causanata shuyajcunapish huiñai causaita chasquinatami shuyacunchij. Jehová Diosca ñucanchijta cꞌuyashcamantami paipaj cꞌuyashca Churita curca. Chaimantami ñucanchijca paipaj familia ucupi cai tucunchij (Juan 3:16). Bibliapica: “Achca valijhuan randishcacunami canguichij” ninmi (1 Corintios 6:20). Jesús huañushcamantami Jehová Dioshuanca alli apanacui tucunchij. Chaimantami tucuita ruraj Jehová Diostapish “Yaya” ni tucunchij. Jehová Diosllami tucuicunamanta yalli alli Yaya can. Salmota quillcaj runa shinallatajmi mai ratoca cashna nishpa tapurishcanchij: “Ñucapaj tucui allicunata rurashcamantaca, Mandaj Diosmanca ¿imatataj cushari?” (Salmo 116:12). Chashna tapurishpaca Yayitu Diosman imata mana pagai tucushcatami cuentata cunchij. Shinapish Jehová Dios ñucanchijta cꞌuyashcamantami paitaca cꞌuyanchij. w20.02 pág. 8 párrs. 1-3