Junio

Profeta Samuelpaj mama Anaca huahuacunata mana charishcamantami achca llaquicunata charirca (1 Samuel 1:2). Israelitacunaca huahuacunata mana chari tucuj huarmicunataca Diosca mana bendicianchu nijcunami carca. Chaimi Anaca imapaj mana valishca shina sintirirca (Génesis 30:1, 2). Anapaj cusaca shujtaj huarmitami charirca. Paica Penina shutimi carca. Cai huarmica achca huahuacunatami charirca. Chaimantami Anataca chanzata rurashpa pꞌiñachishpa llaquichirca. Chashna llaquichijpimi Anaca huacai solo pasashpa mana micurca (1 Samuel 1:7, 10). ¿Jehová Diosca Anataca ima shinataj cushichirca? Anaca ima shina sintirishcataca Yayitu Diosmanmi tucuita huillarca. Diosta mañashca qꞌuipaca sacerdote Elimanpishmi tucuita huillarca. Chaimantami Elica: “Can imata mañashcataca israelcunapaj Taita Dios cushca cachun. Cushicushpa rilla” nirca. Jehová Diosta mañashca qꞌuipami Anaca chaimanta rishpa micurca. Shinallataj ña mana ashtahuan llaquilla sintirircachu (1 Samuel 1:17, 18). w20.02 pág. 21 párrs. 4, 5

Diosca ñallami Diablopaj ruraicunata tucuchinga. Pero huiñai causaipaj cajcunallami quishpiringacuna (Hechos 13:48). Ñucanchij familiacunapish Diosta sirvichun nishpami paicunaman predicanchij. Shinallataj Yayitu Diosca, “shujllapish chingarichunca mana munanchu. Ashtahuanpish tucuicuna arrepintirichunmi munan” (2 Pedro 3:9). Diospaj Shimitaca maipica alajata o mana alajatachari huillanchij. Por ejemplo, mana rijsishca gentecunamanca alli yuyashpachari predicashcanchij. Cutin ñucanchij familiacunamanca sinchi sinchitachari predicashcanchij. Familiacunaman punta cutin Diosmanta huillacushpaca mana alli yuyashpachari predicarcanchij. Chaimi sumajta parlashpami predicana carcani nishpa llaquilla sintirinchij. Familiacunaman predicacushpaca Pablo nishcacunatami yuyaipi charina canchij. Cai punllapaj verso nishca shinaca caita mana rurajpica paicunaca mana allimi sintiringacuna. Diosmantapish ña mana uyanata munangacunachu. w19.08 págs. 14, 15 párrs. 3-5

¿Jesusmanta yachashpaca ima shinataj sintirircangui? Jesusca tucuicunata quishpichingapajmi paipaj causaita curca. Chaimantami paitaca respetana canchij. Jesús huañushcapi crishcataca ruraicunahuanmi ricuchina canchij. Chaita rurajpimi Jehová Diosca ñucanchij juchacunata perdonanga. Ashtahuancarin Jehová Dioshuanmi alli apanacushun, huiñai causaitapishmi charishun (Juan 3:16). Jesusmi ñucanchij Sumo Sacerdote can. Chaimantami paica tucuicuna quishpirichun, Jehová Dioshuanpish alli apanacuchun munan (Hebreos 4:15; 7:24, 25). Jehová Diosca paipaj gobiernopi mandachunmi Jesusta churashca. Paipaj shutitapish ñalla jatunyachichun, millai ruraicunatapish tucuchichunmi agllashca. Shinallataj paimantami paraíso Allpapipish achca bendicioncunata chasquishun (Mateo 6:9, 10; Apocalipsis 11:15). Jesusca Jehová Diospaj munaita pajtachishpami causarca. Ñucanchijpish paipaj ejemplotami catina canchij (Juan 4:34). Jesusmanta Bibliapi ima yachashcata tucui shunguhuan crishpami paitaca cꞌuyai callaringui. Jesusta cꞌuyashcamantami pai shina Diospaj munaita pajtachishpa causanata munangui. w20.03 pág. 10 párrs. 12, 13

Jesusca pai huañuna punllapica achca cutinmi Diosta mañarca. Por ejemplo, pai huañushcata ima shina yuyarina cashcata yachachicushpami manaraj tandata, vinota pasachishpa Diosta mañarca (1 Corintios 11:23-25). Qꞌuipaca pascua micuita rurashca lugarmanta manaraj rishpami paita catijcunahuan Diosta mañarca (Juan 17:1-26). Chai huashaca paita catijcunandij Getsemaní shuti huertaman chayashpami tauca cutin Diosta mañarca (Mateo 26:36-39, 42, 44). Ña huañucushpapish Diostami mañarca (Lucas 23:46). Jesusca chai tutaca Diosta mañanata mana saquishcamantami llaquicunata ahuantarca. Pero apostolcunaca mana chaita rurarcachu. Chaimantami llaquicuna japijpica mancharcacuna (Mateo 26:40, 41, 43, 45, 56). Ñucanchijpish Jesús shina Diosta mañarashpami llaquicunata ahuantashun. w19.04 pág. 9 párrs. 4, 5

Diosca tucui Diablopaj ruraicunatami pꞌiñan. Israelitacunamanca Diosca: “Cancunapuramanta maijanpish rurashcalla dioscunaman paipaj churita cashpa, ushushita cashpa cushpa rupachijca ama tiyachun. Shinallataj adivinaj canata, brujo canata, yumbu canata, muspachij canata yachashpa rurajcunaca ama tiyachun. Muspachij yumbupish, adivinajpish, ima shinapish muspachijpish, huañushcacunata tapujpish ama tiyachun. Maijanpish chashna rurajcunaca Mandaj Diospajca millananami” nircami (Deuteronomio 18:10-12). Cuna punllacunapica Diosta sirvijcunaca israelitacunaman cushca leycunataca mana cazunchijchu. Pero Diosca Diablopaj ruraicunataca ñaupa punllacunapi shinallatajmi pꞌiñan. Diabloca gentecunataca achcatami llaquichicun. Paica, almaca causashpami catin nishpami llullan (Eclesiastés 9:5). Shinallataj Diabloca gentecuna manchaita charichun, Diosmantapish caruyachunmi munan. Ashtahuancarin Diabloca, gentecuna Diospi confianapaj randica demoniocunapi confiachunmi munan. Chaimantami Diosca, demoniocunapaj ruraicunapica amataj chagruringuichij nin. w19.04 pág. 21 párrs. 5, 6

Huahuacunata violana, llaquichinaca jatun juchami can. Shuj huahuata umashpa pi llaquichijpica huahuaca achca manchaihuanmi causanga. Chaimantami huahuacunata violashpa pi ama llaquichichunca cuidana canchij. Shinallataj violashca huahuacunataca cꞌuyaihuanmi ayudana canchij (1 Tesalonicenses 5:14). Shuj huauqui o pani huahuacunata violashpa llaquichishpaca muyundij Allpapi Diosta alli sirvicuj huauqui panicunatami pingaipi churan (Mateo 5:16; 1 Pedro 2:12). Maijanpish jatun juchata rurashcamanta mana arrepintirishpaca ña mana testigo de Jehová cai tucunchu. Huahuacunata violashpa llaquichijcunaca leycunata mana cazushcatami ricuchincuna (Hechos 25:8-ta ricui). Ancianocunaca gobiernopaj leycunata shuj huauqui o pani mana cazujpica mana castigai tucuncunachu. Pero huahuacunata pi violajpica autoridadcuna ama castigachun nishpa ancianocunaca mana pacancunachu. w19.05 pág. 9 párrs. 4-7

Jehová Dios shina yachachijca pi mana tiyanchu. Paipaj ayudahuanmi ima llaquicunatapish chꞌimbapurai tucushun (Job 36:22). Bibliata liyishpami tucuita allita rurangapajca ‘alli allichishca’ cashun (2 Timoteo 3:17). Bibliapi yachachishcacunata pajtachishpaca cai mundopaj yachaita catijcunata yallimi yachaisapa tucushun (Salmo 119:97-100). Diabloca aicha munaillata rurashpa causachunmi pandachicun. Mana alli yuyaicunamanta, mapa ruraicunamanta caruyanaca maipica sinchichari ricuringa. Chaimantami Bibliapica: ‘Riquichij yanga yachaicunahuan, ñaupamanta runacuna apamushca chushaj yuyaicunahuan, cai pacha yuyaicunahuanca pipish cancunataca ama umachun’ ninmi (Colosenses 2:8). Tucuri punllapi causaj gentecunaca aicha munaipi cushicunallata cꞌuyashcata ricuchishcacuna (2 Timoteo 3:4). Shinallataj sida ungüita, o cai laya shujtaj ungüicunatami charishcacuna. Caita ricushpami cai mundopaj yachaica imapaj mana valij cashcata intindinchij (2 Pedro 2:19). w19.05 págs. 21, 22 párrs. 1, 2, 4, 5

Diabloca israelitacunataca achca granocunata charingapaj, alli causaita charingapajca chai llajta cꞌuchullapi causajcuna shina yanga dioscunata adorana cashcatami crichirca. Chaimantami huaquin israelitacunaca achca yacuta charisha nishpa chꞌican chꞌican costumbrecunata rurashpa Baal diosta adorai callarircacuna. Diabloca israelitacuna mapa munaicunata charichunmi pandachirca. Chai cꞌuchullapi causajcunaca mapa ruraicunata rurashpami yanga dioscunata adorajcuna carca. Por ejemplo, paicunapaj templocunapica cꞌaripura huarmipurami huainayajcuna carca. Yanga dioscuna alli granocunata cuchun nishpami chaita rurajcuna carca. Paicunaca caita ruranaca mana juchachu can nishpami yuyajcuna carca (Deuteronomio 23:17, 18; 1 Reyes 14:24). Israelitacunapish chai millai ruraicunata ricushpami yanga dioscunata adorai callarircacuna. w19.06 págs. 2-4 párrs. 3, 7, 8

Diosta sirvij huauqui panicunami, achca Betelpi sirvijcunapish paicunaman mingashca trabajota saquina tucushcacuna. Cai huauqui panicunapajca paicuna munashca trabajota saquinaca sinchimi cashcanga. Paicuna, shina cashpaca ¿Amañaringapajca imatataj rurai pudingui? Diospajman ashtahuan cꞌuchuyangapajca Bibliatami tucui punllacuna liyina canchij. Liyishcacunapipish cutin cutinmi yuyana canchij. Mushuj congregacionpi huauqui panicunahuan ashtahuan predicashpa catishunchij. Yaya Diostaca ñaupa punllacunapi laya ña mana tantochari sirvi tucunchij. Pero tucui shunguhuan sirvijpica Diosca mana cungaringachu. Minishtirishcacunallahuan causashunchij. Cai tiempopica achca gentecunaca cai mundopaj cosascunata charina yuyaillami causancuna. Pero ñucanchijca Diostami punta lugarpi churana canchij (Mateo 13:22). Maipica familiacuna, rijsishcacunaca alli causachun munashcamantami cai mundopi cosascunata charichun animancuna. Paicunataca mana uyanachu canchij (1 Juan 2:15-17). Jehová Diospi confiajpica pai agllashca horaspimi ñucanchij feta sinchiyachinga. Tranquilo sintirichunpishmi ayudanga. Minishtirishca cosascunatapishmi cunga (Hebreos 4:16; 13:5, 6). w19.08 págs. 20-22 párrs. 4, 7, 8

¿Llaquicunatachu charinchij? Chashna sintirishpapish Jehová Dios ayudajta yachashpaca cushillami sintirinchij. Diosca ñucanchij imata munashcata, imata yuyashcataca allimi yachan (Salmo 103:14; 139:3, 4). Llaquicunata charishpaca paipaj ayudashcatami de seguro chasquishun. Achca llaquicunahuan cashpaca imapaj mana valishca shinachari sintirishun. Chashna sintirishpapish Jehová Dios ayudanataca mana cungarinachu canchij. Paica llaquicunahuan cashpa ima shina sintirishcata huillachunmi munan. Tucuita paiman huillajpica paica cutichingami (Salmo 5:3; 1 Pedro 5:7). Chaimantami problemacunata charishpaca Diosmanca tucuita huillana canchij. Paica ñucanchijhuanca mana parlangachu. Pero cunanpica ñucanchijta ayudangapajca Bibliata, paipaj organizaciontami cushca. Bibliata liyishpami tranquilo sintirishun. Shinallataj huauqui panicuna animajpimi cushilla sintirishun (Romanos 15:4; Hebreos 10:24, 25). w19.06 pág. 16 párrs. 7, 8

Diosta sirvishcamanta llaquichijpica ima shina sintirishcata, imata manchashcata Yayitu Diosman tucuita huillashunchij (Lamentaciones 2:19). Diosta mañanata manataj saquishpaca paipajmanmi ashtahuan cꞌuchuyashun (Romanos 8:38, 39). Dios cusha nishca bendicioncuna pajtarinataj cashcata crishunchij (Números 23:19). Ñucanchij crishcacuna mana sinchi cajpica Diablopish, paita catijcunapish jahuallami pandachingacuna (Proverbios 24:10; Hebreos 2:15). Dios cusha nishcacuna pajtarinataj cashcata cringapajca estudiangapajmi tiempota surcuna canchij. Caimanta ashtahuan yachangapajca huauqui Stanley Jonespaj causaimanta yachashun. Paica 7 huatacunatami carcelpi carca. Cai huauquica: “Dios cusha nishcacuna pajtarina yuyaillami causarcani. Chaimi llaquichijcuna Diosta sirvichun jarcasha nijpipish paita sirvinataca manataj saquircani” ninmi. Ñucanchijpish Dios cusha nishcapi tucui shunguhuan crishpaca imatapish mana manchashunchu (Proverbios 3:25, 26). w19.07 págs. 2, 3 párrs. 1, 6, 7

Jesusta catijcunallami Diospaj amigo cai tucuncuna. Shinallataj cunan punllacunapish alli causaitami chari tucuncuna. Shamuj punllacunapicarin huiñai causaitami charingacuna. Chaimantami tucuicunata Jesusta catijcuna tucuchun ayudana canchij (Juan 14:6; 17:3). Cai trabajota alli pajtachingapajca Jehová Diosllatajmi ñucanchijta ayudanga. Chaimantami apóstol Pabloca: “Ñucanchijca, Diospajta paihuan rurajcunami canchij” nirca (1 Corintios 3:9). Jehová Diospish Jesuspish ñucanchijman cai trabajota mingashcamanta, shujtajcunata ayudashcamantami cushilla sintirinchij. Diosmanta yachasha nijcunatami mashcana canchij. Tucui gentecunaman Diosmanta huillashpami Testigo de Jehovacuna cashcata, Jesusta alli catijcuna cashcata ricuchishun. w19.07 pág. 15 párrs. 3-5

Bibliapi tiyaj consejocuna valishca cashcata ricushpami maijancunaca ashtahuan yachanata munancuna. Nueva York llajtapi causaj shuj panimanta parlashun. Cai panica chino shimipimi huillan. Paica: “Gentecuna parlajpica allimi uyani. Cunanlla cai llajtaman chayamushcata yachashpaca, ‘¿imanalla cangui? ¿Ñachu trabajota japircangui? ¿Gentecunaca allichu tratacun?’ nishpami tapuni. Paicunamanta sustarishcata ricushpami Bibliamanta yachanata munancuna. Shinallataj huaquinpica ‘tucuicuna alli apanacungapajca ¿imatataj rurana canchij?’ ninimi. Chai huashaca ‘¿Bibliapi shuj versota ricuchi tucunichu?’ nishpami tapuni. Cai versopica: ‘Pꞌiñanacuita callarichijca, jatun yacuta cacharij shinami. Pꞌiñanacui manaraj callarijpi anchuringui’ ninmi. Chai versota liyishca qꞌuipami: ¿Cai versota pajtachishpaca shujtajcunahuanca allichu apanacui tucushun? nishpa tapuni” ninmi (Proverbios 17:14). Cashna tapuicunata rurashpami maijancunataj Diosmanta ashtahuan yachasha nishcata yachashun. w19.07 pág. 23 párr. 13

Shujtaj lugarmanta Diosta sirvinaman shamuj huauquicunaca paicunamanta llaquirichunllaca mana munangacunachu. Ashtahuanpish paicunapaj causai ima shina cashcata intindichunmi munangacuna. Maipica paicunallataj o paicunapaj familiachari ungushca can. Mana cashpaca paicunapaj familiachari huañurca. Shinallataj paicunapaj amigocunata ricunatachari munancuna. Chaicunamantami llaquilla sintiringacuna. Paicunapaj yuyaipi tranquilo sintiringapajca tiempo pasanami minishtiringacuna. Shujtaj lugarmanta Diosta sirvinaman shamuj huauqui o pani amañarichunca paihuanmi predicana canchij. Alli ejemplotapishmi ricuchina canchij. Shuj panica achca huatacunatami shujtaj llajtapi Diosta sirvirca. Paica: “Ñaupaca tucui punllacunami Bibliamanta yachachij carcani. Pero cunanca predicacushpa Bibliamanta shuj versota liyina, shuj videota ricuchinallapish ñucapajca sinchimi can. Shinapish turi ñañacunami paicunahuan gentecunata visitachun, estudiocunata cuchun invitajcuna carca. Chaita ricushpami ñucapish animarircani. Mushuj lugarpi gentecunahuan ima shina parlanacunatami yacharcani. Chaimantami cutin cushilla sintirircani” ninmi. w19.08 págs. 22, 24 párrs. 10, 13, 14

Tucuicunami cada punlla pandarinchij. Pero shujtajcunapaj pandarishcallata ricushpaca Evodia y Síntique panicuna shinami problemacunata charishun. Chashna tucujpica shujtajcunata cꞌuyanaca sinchimi canga. Caipi yuyashun. Shuj huauquica Tandanacuna Huasita pꞌichanatachari cungarin. Chaimantachari paihuanca pꞌiñarinchij. Pero cada punlla paipaj pandarishcacunallata yuyarishpaca ashtahuanmi pꞌiñarishun. Chai huauquitaca ña mana tanto cꞌuyashunchu. Ñucanchij congregacionpi cashna shina problemata charishpaca caita yuyarishun. Jehová Diosca ñucanchij juchayujcuna cashcataca allimi yachan. Shinapish tucuicunatami cꞌuyashpa catin. Chaimantami ñucanchijpish Jehová Dios shina shujtajcunata cꞌuyashpa, paicunapaj alli ruraicunata ricuna canchij. Huauqui panicunata cꞌuyangapaj esforzarishpaca ashtahuanmi tandalla sintirishun (Filipenses 2:1, 2). w19.08 págs. 9, 10 párrs. 7, 8

Jehová Diosca humildecunatami cꞌuyan. Humilde gentecunallami Diospaj amigo cai tucuncuna. Jehová Diosca humildecunataca cꞌuyaihuanmi ricun. Pero “jatun tucushcataca carullamantami ricun” Tucuicunami Yaya Diosta cushichishun ninchij. Paipaj cꞌuyaitapishmi chasquisha ninchij. Chaimantami humildes canata yachana canchij. Humildes gentecunaca shujtajcunata yalli cashcataca mana yuyancunachu. Bibliapica humildecunaca Jehová Dios ashtahuan yalli cashcatami yuyancuna. Shujtajcunapish paicunata yalli cashcatami yuyancuna ninmi (Filipenses 2:3, 4). Maijancunaca ñahui ricuillapimi humildes laya cancuna. Paicunaca manchai siqui cashcamantachari mana tanto parlancuna. Mana cashpaca paicunapaj yaya mamacuna yachachishcamantachari shujtajcunata respetohuan tratancuna. Pero shungu ucupica jatun tucushcacunachari can. Chaimantami paicuna ima shina cashcataca shuj punlla ricuchingacuna (Lucas 6:45). w19.09 págs. 2, 3 párrs. 1, 3, 4

Jesucristomanta alli huillaicunaca Jesús yachachishcacunatami ricuchin. Cai yachachishcacunata cazushcata ricuchingapajca Diostami punta lugarpi churana canchij. Shinallataj pai mandashcacunatami respetana canchij. Diospaj gobiernomantapishmi huillana canchij (Mateo 6:33; 24:14). Ungidocunaman mingashca trabajotapishmi apoyana canchij (Mateo 25:31-40). Ñallami paicunaca “shujtaj ovejacuna” paicunata ayudashcamanta cuidangacuna (Juan 10:16). ¿Ima shinataj cuidangacuna? Manaraj Armagedón macanacui callarijpimi 144.000 ungidocunaca, jahua pachapi mana nunca huañuna causaita chasquingacuna. Chai qꞌuipaca ungidocunapish angelcunapish Mandaj Gogtami tucuchingacuna. Pero oveja shina alli shungu gentecunataca quishpirichunmi cuidangacuna (Apocalipsis 2:26, 27; 7:9, 10). Quishpirishcacunaca ungidocunata cai Allpapi ayudashcamantami cushilla sintiringacuna. w19.09 págs. 12, 13 párrs. 16-18

¿Jesús mingashcata pajtachishpaca imamantataj samarishca shina sintirishun? Alli pushajcunata charishcamantami. Jehová Diosca jatun Mandaj cashpapish mana millai canchu. Ashtahuanpish ñucanchij trabajotaca achcatami valichin (Hebreos 6:10). Pai mingashcata pajtachingapajpish fuerzata cushpami ayudan (2 Corintios 4:7; Gálatas 6:5). Shinallataj mandaj Jesusca shujtajcunata alli tratachunmi alli ejemplota cushca (Juan 13:15). Ñucanchijta cuidaj ancianocunapish Jesuspaj ejemplotami catincuna (Hebreos 13:20; 1 Pedro 5:2). Paicunaca animangapaj, yachachingapajmi esforzarincuna. Shinallataj mana manchashpami cuidancuna. Ashtahuanpish alli amigocunatami charinchij. Cai mundopi caj gentecunaca mana ñucanchij shina alli amigocunata charincunachu. Valishca trabajocunatapish mana charincunachu. Caipi yuyashun: Ñucanchijca alli huauqui panicunahuanmi trabajanchij. Paicunaca imata alli ruranata yachashpapish humildecunami can. Ashtahuancarin ñucanchijtaca shuj compañero cashcallataca mana yuyancunachu. Alli amigocuna cashcatami yuyancuna. Ñucanchijta achcata cꞌuyashcamantami canmanta huañuna cajpipish huañushami nincuna. w19.09 págs. 20, 23 párrs. 1, 12-14

1 Tesalonicenses 5:1-6-pica apóstol Pabloca Jehovapaj punllamantami parlarca. Jehovapaj punllaca Babilonia jatun pueblota o tucui panda religioncunata llaquichijpimi callaringa. Shinallataj Jehovapaj punllaca Armagedón macanacuipimi tucuringa (Apocalipsis 16:14, 16; 17:5). Pabloca: ‘Jehovapaj punlla cꞌuchuyamucujpi shujtajcuna shina dormicujcunaca ama cashunchij’ nircapishmi. Ashtahuanpish: ‘Chaparashpa, alli yuyaihuan cashunchij’ nircami. Chaimantami politicapi ama chagruringapaj cuidarina canchij. Politicapi chagrurishpaca ‘cai pachapi causajcuna shinami’ tucushun (Juan 15:19). Ñucanchijca Diospaj gobiernolla alli causaita apamunatami crinchij. Shujtajcunapish rijcharishca cachunmi ayudana canchij. Chaipajca Bibliamantami yachachina canchij. Jatun llaqui punlla callarijpica gentecunaca Jehová Diosta ña mana mashcai tucungacunachu. Chaimantami utca huillana canchij. w19.10 págs. 8, 9, 10 párrs. 3, 5, 6

Jeremiasca pai quillcachishca rollopi imalla nishcata huillachunmi paipaj amigo Barucman mingarca (Jeremías 36:5, 6). Barucca mana manchashpami Diospaj huasi canllaman rishpa chai rollopi imalla nicushcata gentecunapaj ñaupajpi liyirca. Chaita rurajpica Jeremiasca cushillami sintirishcanga ¿nachu? (Jeremías 36:8-10). Judá llajtata mandajcuna Baruc imata rurashcata yachaj chayashpaca paicunapaj ñaupajpipish liyichunmi paita pushamuchun cacharca (Jeremías 36:14, 15). Chai qꞌuipaca Judá llajtata mandajcunaca rollopi ima nishcatami rey Joacimman huillanaman rircacuna. Rey Joacimca Jeremías ima nishcata yachaj yachashpaca achcatami pꞌiñarirca. Chaimantami rollotaca rupachirca. Jeremiasta, Baructapish prezupi churachunmi mandarca. Pero Jeremiasca shujtaj rollota japishpami Dios imalla nishcata Barucllatataj cutin quillcachirca. Barucca ‘mandaj Joacim rupachishca rollopi quillcashca shimicunallatatajmi cutin quillcarca’ (Jeremías 36:26-28, 32). w19.11 págs. 3, 4 párrs. 4-6

Huaquin yachajcunaca Diospaj shutica imatapish rurai tucuj cashcatami ricuchin nincunami. Chaica ciertomi can. Jehová Diosca paipaj munaita pajtachingapajmi imatapish rurai tucun. Por ejemplo, alli yachachij, alli huillaita huillaj, cushichij yaya tucushpami paipaj munaita pajtachishca (Isaías 48:17; 2 Corintios 7:6; Gálatas 3:8). Shinallataj paita sirvijcunata ima ruraicunapi ayudashpami paipaj munaita pajtachishca (Mateo 24:14; 28:19, 20; 2 Corintios 1:3, 4). Diosca paipaj munaita pajtachingapajca pimanpish yachaita, espíritu santotami cui tucun. Tucuicunami Diospaj munaita pajtachisha ninchij. Pero maipica ñami Diospajca achcata ruracuni. Ña mana ashtahuan ruranata minishtinichu nishpami yuyai tucunchij. Mana cashpaca mayorlla cashcamanta, causaipi ima jarcaita charishcamantami Dios mingashcata mana pajtachi pudisha nishpa yuyai tucunchij. w19.10 pág. 20 párrs. 1, 2

Charina cosascunallata mashcajpica ñucanchij femi chiriyanga. Apóstol Pabloca: “Maijanpish soldado tucushpaca, paita mandajpaj munashcata rurana yuyaillami. Paipaj munaita ruranataca mana yuyanchu” nircami (2 Timoteo 2:4). Romano soldadocunataca negociocunata churachunca mana saquijcunachu carca. Entrenaj soldadocuna shinami ñucanchijpish Diospaj ñaupajpi, Jesuspaj ñaupajpi alli ricurinata munanchij. Caita ruranami charina cosascunamanta yalli valishca can. Chaimantami Diosta sirvishpa feta sinchiyachingapajca yanga cosascunapi tiempota, fuerzata mana gastana canchij. Apóstol Pabloca: ‘Charijyashun nijcunaca crishcatami saquishcacuna’ nishpami advertirca (1 Timoteo 6:9, 10). w19.11 págs. 17, 18 párrs. 12, 14, 15

Jehovapaj punlla manaraj chayamujpica “allitaj, sumajtami causacunchij” ningacunami (1 Tesalonicenses 5:3). La Biblia. Traducción del Nuevo Mundo, 1 Tesalonicenses 5:2-pica Jehovapaj punlla nishpaca jatun llaqui punllamantami parlacun (Apocalipsis 7:14). ¿Jatun llaqui punlla ñalla callarigrishcataca ima shinataj yachashun? Bibliapi nishca shinaca gobiernocunaca “allitaj, sumajtami causacunchij” nishpami caparingacuna. Chashna huillajpica jatun llaqui punlla ña callarishcatami yachashun. ¿Religionta pushajcunapish chashnachu ningacuna? Tal vez paicunapish chashnami ningacuna. Shinapish chai huillaica demoniocunapaj llullami canga. Gentecunaca chai llullata crishpami allimi causacunchij nishpa yuyangacuna. Chashna yuyacujpica “chichu huarmita nanai japij shinami paicunapajmanca, jatunta llaquichinaca ñapish shamunga”. Pero ¿Diosta alli sirvijcunahuanca imashi tucunga? Jatun llaqui punlla ñapish callarijpica listosmi cashun. w19.09 págs. 9, 10 párrs. 7, 8

Imata decidishcata pajtachingapaj alli yuyashunchij. Por ejemplo, Bibliata liyingapajmi decidishcanchij. Pero Bibliata liyingapajca shuj horariotami agllana canchij. Shinallataj ancianocunaca huauqui panicunata visitangapajmi decidincuna. Pero imata decidishcata pajtachingapajca cai tapuicunapimi yuyana can: ¿Maijan huauqui panicunataj animachun minishtincuna? ¿Ima punlla ima horataj paicunata visitashun? Ashtahuanpish imata mana rurai tucushcataca ama decidishunchij. Ñucanchij munashcata pajtachingapajca maipica tiempota, cullquita o fuerzata manachari charinchij. Chaimantachari huaquinpica imata decidishcata mana pajtachi tucushpaca saquina canchij. w19.11 pág. 29 párrs. 11, 12

Isaías 65:21 al 23-pica Diosta sirvijcunaca paraíso Allpapimi sumaj, cushicui trabajocunata charingacuna ninmi. Jesús mil huatacunata mandashca qꞌuipaca Bibliapica: ‘Dios rurashcacunapish, ismunapaj huatashcamantaca cacharichishcami canga. Diospaj huahuacunata cacharichishpa jatunyachishcapi cachunmi, Yayitu Diosca chashna ruranga’ ninmi (Romanos 8:21). Jehová Diosca israelitacuna trabajachun, samarichunmi munarca. Chashnallatajmi Jesús mil huatacunata mandacujpipish trabajangapaj, samaringapajpish tiempota charishun. Ashtahuancarin Diosmanta yachangapaj, paita sirvingapajmi tiempota charishun. Diosta adoranallami cushi causaita cun. Chaimantami paraíso Allpapica Diosta sirvijcunaca sumajta trabajashpa, Diosta adorashpa cushilla causashun. w19.12 pág. 13 párrs. 15, 17, 18

Huahuacunaman Diosmanta cutin cutin yachachijpica paicunaca yachashcata manataj cungaringacunachu. Chaimantami yaya mamacunaca huahuacunaman yachachingapajca tiempota surcuna can. Huaquinpica huahuacunaman chaillatataj cutin cutin yachachina cashcamantachari shaicushca sintirincuna. Pero chaita rurajpimi huahuacunaca Bibliata intindishpa cazungacuna. Shinallataj huahuacunata alli rijsichij. Salmo 127-pica huahuacunaca flechacuna shinami can ninmi (Salmo 127:4). Chꞌican chꞌican flechacunami tiyan. Huahuacunapish mana tucuicunachu igual can. Chaimantami yaya mamacunaca paicunapaj huahuacunataca cada unota ima shina yachachinata ricuna can. Israel llajtapi causacuj cusa huarmica paicunapaj ishqui huahuacuna Jehová Diosta sirvichunmi ayudarcacuna. Paicunaca: “Cada huahuamanmi Bibliamanta yachachircanchij” nincunami. Shinapish cada yayami paicunapaj huahuacunata ima shina yachachinata agllana can. w19.12 págs. 26, 27 párrs. 18-20

Llaqui horaspi amigocuna ayudajpica shungumantami agradicinchij. Huauqui Raulpaj yayaca shuj accidentepimi huañurca. Raulca: “Jatun llaqui japijpica imata ruranapish sinchimi ricurin. Pero alli amigocuna imallatapish rurashpa ayudajpica tranquilomi sintirini” ninmi. Ñucanchijpish tucui pudirishcahuan ayudajpimi shujtajcunaca cushilla sintiringa. Jesuspaj punllacunapi causaj Marcospi yuyashunchij. Dios mingashcacunata pajtachina cashpapish apóstol Pablota animashpami ayudarca. Chaimantami Pabloca Marcostaca imapipish ayudachunca mañajlla carca. Ñucanchijpish Marcos shinami huauqui panicunataca animana canchij. Por ejemplo, Angelapaj shuj familiataca millai gentecunami huañuchishca carca. Chaimi huauqui panicunaca cai panita animangapajca tucui pudishcata rurarcacuna. Angelaca: “Turi ñañacuna shungumanta ayudajpica paicunataca jahuallami ayudachunca mañai tucuni” ninmi. w20.01 pág. 12 párrs. 14-16

Cai versopica agllashcacunaca mana alli shunguhuanmi tandata micun, vinota ubyan nishpaca ¿imatataj nisha nin? Dios mandashcacunata mana cazushpami paicunaca yangamanta tandata micucuncuna, vinota ubyacuncuna nisha ninmi (Hebreos 6:4-6). Jesushuan mandasha nishpaca agllashcacunaca Jehová Diostami tucuipi cazuna can (Filipenses 3:13-16). Jehová Diospaj espíritu santohuan agllashcacunaca mana jatun tucuncunachu (Efesios 4:1-3; Colosenses 3:10, 12). Chaimantami paicunaca shujtajcunata yalli cashcataca mana yuyancuna. Shinallataj Jehová Diospish shujtajcunaman yallimi espíritu santota cunga nishpaca mana yuyancunachu. Agllashcacunaca shujtajcunatapish yallimi Bibliata intindinchij nishpaca mana yuyancunachu. Shujtajcunatapish ‘canca Dios agllashcami cangui, Jesús huañushcata yuyarina tandanacuipica tandata micunami cangui, vinota ubyanami cangui’ nishpapish mana nincunachu. Chaipaj randica Jehová Dioslla jahua pachapi causachun agllana cashcatami alli intindincuna. Chashnami humildes cashcata ricuchincuna. w20.01 págs. 27, 28 párrs. 4, 5

Jehová Diosca paipajman cꞌuchuyachun, paihuan parlachunmi munan. Chaimantami paica cutin cutin mañaichij nin. Diosta mañajpica paica siempremi uyan (Romanos 12:12). Ñucanchij mañashcacunata uyangapajpish mana ocupadochu can. Cutin ¿ñucanchijca Diosta uyangapajca imatataj rurana canchij? Bibliata, publicacioncunatami alli estudiana canchij. Shinallataj tandanacuicunapipish allimi uyana canchij. Yaya Diosta mañashpa, paita uyashpaca paihuanmi alli apanacushun. Diosca shungumanta ima shina sintirishcata parlachunmi munan (Salmo 62:8). Chaimantami cashna nishpa tapurina canchij. ¿Shuj mensajepi chaillatataj chaillatataj cachacuj shinachu Diostaca mañanchij? O ¿shuj cartata escribicuj shinachu shungumanta Diostaca mañanchij? Yayitu Diosta cꞌuyashcamantami paimantaca manataj caruyasha ninchij. Pero chaipajca paita mañanatami manataj saquina canchij. Cushilla sintirishpapish llaquilla sintirishpapish Diosmanca tucuitami parlana canchij. Paica ñucanchijta ayudangapajmi siempre listo can. w20.02 pág. 9 párrs. 4, 5

Jehová Diosca paita sirvijcunata alli cuidachunmi ancianocunaman mingashca. Ancianocunaca alli cuidangapajca mandaj Nehemías Diospaj pueblota ima shina tratashcamantami yachai tucuncuna. Nehemiasca Judá llajtata mandaj cashcamantami achca autoridadta charirca (Nehemías 1:11; 2:7, 8; 5:14). Paica judiocuna Diospaj huasita mapayachishcata, levitacunamanpish leypi mandashca shina contribucioncunata mana cushcatami yachaj chayarca. Shinallataj judiocuna sábado punllata mana respetajcuna cashcata, huaquincunacarin shujtaj llajtamanta caj huarmicunahuan cazarajcuna cashcatami yachaj chayarca (Nehemías 13:4-30). Nehemiasca mandaj cashpapish judiocuna paita cazuchunca mana obligarcachu. Chaipaj randica paicunata Jehová Dios ayudachunmi tucui shunguhuan mañarca. Shinallataj Diospaj mandashcacunatami yachachirca (Nehemías 1:4-10; 13:1-3). Nehemiasca humilde runami carca. Chaimantami Jerusalén pircacunata cutinllataj shayachishpa ayudarca (Nehemías 4:15). w19.09 págs. 15, 16 párrs. 9, 10