Julio

Ñucanchij familia o shuj cꞌuyashca amigo mana alli tratajpimi llaquilla sintirinchij. Chaimi paihuanca ña mana cutin alli apanacushachu nishpa sustarinchij. Anapaj ejemplomanta yachacushpaca tranquilomi sintirishun. Penina huarmica Anata chanzata rurashpami llaquichirca (1 Samuel 1:12). Ñucanchijpish Ana shina sustarishca cashpaca Yaya Diostami mañarana canchij. Diosta mañacushpaca imamanta preocuparishcata, imapi pandarishcatami huillana canchij. Mañacushpaca pandarishami nishpapish mana yuyanachu canchij. Huaquinpica Diosman ima shina sintirishcata huillacushpaca huacashpachari huillanchij. Pero Jehová Diosca ñucanchij mañashcacunata uyanataca mana shaicungachu. Shinallataj Diosta mañacushpaca Filipenses 4:6, 7-pi Pablo ima nishcatami yuyarina canchij. Apóstol Pabloca Diosta mañacushpaca siempremi agradicina canchij nircami. Jehová Diostaca causaita cushcamanta, tucuita sumajta rurashcamanta, ñucanchijta cꞌuyashcamanta, shamuj punllacunapi pai cusha nishcacunamantami achcata agradicinchij. w20.02 págs. 21, 22 párrs. 3, 6

Parlanaca Jehová Dios cushca sumaj regalomi can (Éxodo 4:10, 11; Apocalipsis 4:11). Paipaj Shimipimi ima shina alli yuyashpa parlanataca yachachin. Jesusca paipaj Yayamanta yachachingapajmi cai Allpaman shamurca (Juan 18:37). Jesús layallatajmi ñucanchijpish Jehová Diosmanta, paipaj gobiernomantaca siempre parlana canchij (Mateo 24:14; Romanos 10:14). Shinallataj ñucanchijca ima shina parlanatami alli ricuna canchij. Shujtajcunahuan Jehová Diosmanta parlacushpaca ‘sumajtami huillana’ canchij. Paicuna crishcacunatapish, ima shina yuyashcacunatapish, respetanami canchij (1 Pedro 3:15, QC, 1989). Chashnami parlashpalla saquirinapaj randica alli yachachishun. Paicunapaj shungumanpishmi chayai tucushun. Shuj huauqui o pani consejota minishtijpica ancianocunaca mana upallachu saquirina can. Pero huauquita o panita ama pingaipi churangapajmi gentecuna mana tiyan horaspi parlana can. w20.03 págs. 18, 19 párrs. 2-4

Diostaca ¿imatataj mañai pudinchij? Diabloca Jesusta catijcunatami llaquichisha ninga (Lucas 22:31). Chaimantami tucui shunguhuan Diosta paipi cringapaj mañana canchij (Lucas 17:5; Juan 14:1). Diospi tucui shunguhuan crishpaca tranquilomi sintirishun. Llaquicunata allichingapaj ña tucuita rurashca huashaca Diospaj maquipimi saquina canchij. Paimi ñucanchijta ima shina ayudanata alli yachan (1 Pedro 5:6, 7). Ima llaquicuna ricurijpipish Diosta mañashpaca tranquilomi sintirishun. 80 huatacunata charij huauqui Robertmanta yachashun. Paica ancianomi can. Robertca: “Shuj tiempoca cullquita mana charircanichu. Anciano canatapishmi saquircani. Pero Filipenses 4:6, 7-pi ima nishcata yuyarishpami cai llaquicunata chꞌimbapurarcani. Llaquicunamanta sustari callarishpaca Jehová Diostami mañani. Diosta ashtahuan mañashpaca tranquilomi sintirini” ninmi. w19.04 págs. 9, 10 párrs. 5-7

Shuj huahuata llaquichishpaca Jehová Diosta llaquichishca layami can. Israelitacunaman cushca leypica: ‘Maijanpish shujtajcunata umashpa shuhuashpaca Jehová Diostami pꞌiñachin’ nircami (Levítico 6:2-4). Chashna layallatajmi maijan huauqui o pani shuj huahuata umashpa llaquichishpaca Jehová Diostapish llaquichin. Diospaj shutitapishmi mapayachin. Huahuacunata violashpa llaquichinaca Diospaj ñaupajpica jatun juchami can. Chaimantami congregacionpi cashna mapa ruraicuna tiyachunca manataj saquina canchij. Llaquichishcacunapajmi Huillaj, Rijchari revistacunapi, shujtaj publicacioncunapipish achca temacunata llujchishcacuna. Chai temacunata liyishpami paicunaca animarishcacuna. Shinallataj paicunata ima shina animanata yachangapaj, yaya mamacunapish huahuacunata ima shina cuidana cashcata yachachunmi huaquin temacunata llujchishcacuna. Cutin, pi shuj huahuata violashpa llaquichijpi imata rurana cashcata yachachunmi ancianocunaca huaquin instruccioncunata chasquishcacuna. Cuerpo Gobernantepi sirvij huauquicunaca siempremi ancianocunamanca ashtahuan instruccioncunata cuncuna. w19.05 págs. 9, 10 párrs. 8, 9

Bibliaca shuj espada shinami can. Chaipimi Diablo nishcacuna llulla cashcata yachachin (Efesios 6:17). Por ejemplo, Bibliapica, huañushcacunaca ni pihuan mana parlai tucunchu ninmi (Salmo 146:4). Shinallataj Bibliapica, Diosllami shamuj punllacunapi imalla tucunataca yachan ninmi (Isaías 45:21; 46:10). Cada punlla Bibliata liyishpa, chaipi nishcacunata alli intindishpaca Diablopaj llullacunataca mana crishunchu. Shinallataj paipaj ruraicunamanta caruyashunchij. Cai mana alli ruraicunapi chagrurishpaca achca llaquicunatami charishun. Ashtahuancarin Diablopaj, demoniocunapaj partemi tucushun. Chaimantami brujocunapajman mana rina canchij. Huañushcacunahuanpish mana parlanachu canchij. Huaquin gentecunaca almaca mana huañunchu nishpami huaquin costumbrecunata rurancuna. Pero ñucanchijca chai costumbrecunapica mana participanachu canchij. Shamuj punllacunapi imalla tucunata yachangapajpish adivinajcunapajmanca mana rinachu canchij. w19.04 págs. 21, 22 párrs. 8, 9

Cai pachapaj yachaicunata catij gentecunaca Dios mandashcacunataca mana valichincunachu. Huaquincunaca, “Diosca chayarina munaihuan ñucanchijta rurashca cashpaca ¿imamantataj chayarina munaimanta jarcarichun nin?” nishpami yuyancuna. Cashna shina yuyaj gentecunaca “tucui ñucanchij shungu munashcatami pajtachina canchij” nincunami. Pero Bibliapica chaitaca mana yachachinchu. Ashtahuanpish Bibliapica, Diosca gentecunata cꞌuyashcamantami mapa munaicunamanta jarcarichun rurarca ninmi (Colosenses 3:5). Jehová Diosca cazarashcacunalla chayarina munaita pajtachichunmi mandashca (1 Corintios 7:8, 9, QC, 1989). Cai mundoca chayarinacunamantaca mana alli yachachinchu. Pero Bibliapica chayarinacunata ima shina ricuna cashcatami yachachin. Chaipica cusandij huarmindij chayarinacushpaca cushilla sintiri tucushcatami nin (Proverbios 5:18, 19). Shinallataj Bibliapica: ‘Tucuicuna, quiquin cuerpota jucha illajta, alli nishpa charinata yachaichij. Millai munaicunahuan maipish cachun ama causaichijchu’ ninmi (1 Tesalonicenses 4:4, 5). w19.05 págs. 22, 23 párrs. 7-9

Diosta sirvijcunaca Yaya Diospaj shutitami jatunyachishpa catishcacuna. Shinallataj Babilonia jatun pueblomanta llujshichij nishcatapishmi cazushcacuna (Hechos 15:16, 17; Apocalipsis 18:4). Ashtahuancarin Babilonia jatun pueblomanta gentecuna llujshichunmi ayudashcacuna. Chaimantami Diosca paita sirvijcunata gobiernocuna tucuchichunca mana saquinga. Diosta sirvijcunaca panda religioncuna shina mana llaquicunata apangacunachu. Chaita yachashpapish chai huasha ima tucugrijta ahuantangapajca sinchi feta charinami minishtiringa. (Ezequiel 38:2, 8). Gobiernocuna panda religioncunata tucuchishca huashami shuj religionlla saquiringa. Paicunaca Jehová Diosta sirvijcunami canga. Diabloca Diosta sirvijcunalla saquirijta ricushpami achcata coleranga. Chaimantami Diabloca gobiernocunata pandachichun demoniocunata cachanga. Chaimi tucui gobiernocunaca Diosta sirvijcunata tucuchisha ningacuna (Apocalipsis 16:13, 14). Cai gobiernocunaca “Magog llajtata mandaj Gog” nishcami can. Paicuna Diosta sirvijcunata llaquichi callarijpimi Armagedón macanacuica callaringa (Apocalipsis 16:16). w19.09 pág. 11 párrs. 12, 13

Diabloca gentecuna aicha munaita rurashpa causachunmi munan. Pai pandachijpimi israelitacunaca yanga dioscunata adorarcacuna, mapa ruraicunatapish rurarcacuna. Cunan punllacunapish panda religioncunaca huainayanataca allita shina ricuchunmi munancuna. Chaimantami achca gentecunaca Diostami sirvinchij nishpapish pai mandashcacunataca mana cazuncuna. Paicunaca tucui laya mapa ruraicunatami rurancuna. Cꞌaripura, huarmipurami huainayashpa causancuna (Romanos 1:24-27, 32; Apocalipsis 2:20). Apóstol Pabloca cai gentecunamantami parlarca (Romanos 1:28-31). Gentecuna chashna causajpipish ñucanchijca Dios mandashcatami cazuna canchij. Cai pacha yachachishcacunata catijcunaca Diospaj yachachishcacunaca imapaj mana valinchu nincunami. Paicunaca Diospajta ruranapaj randica ‘aichapaj ruraicunatami’ rurashpa causancuna (Gálatas 5:19-23). Shinallataj paicunaca jatun tucushcacunami can (2 Timoteo 3:2-4). Pero Diosca chashna jatun tucushca cachunca mana munanchu. Paica humildes cachunmi munan. w19.06 págs. 5, 6 párrs. 12-14

Eliasca sinchi punllacunapi causacushpapish Yaya Diostami sirvishpa catirca. Yaya Diosca Eliastaca cashnami nirca, canta ayudachun Eliseota agllai. Chashnami Diosca Elías llaquilla cai horas shuj amigota curca. Ñucanchijpish alli amigocunata charijpica paicunaca llaquilla cai horasmi ayudangacuna (2 Reyes 2:2). Ñucanchij llaquicunata mana piman parlai tucushpaca, alli amigocunata cuchunmi Jehová Diosta mañana canchij. Paicunami llaquicunahuan cai horas ñucanchijtaca animashpa ayudanga. Eliasca achca huatacunatami llaquicunata ahuantarca. Pero Yayitu Dios ayudajpimi paitaca cushilla sirvirca. Profeta Eliasta Dios ima shina ayudashcata yachashpami cushilla sintirinchij. Ñucanchijpish achca llaquicunata charishpaca huaquinpica shaicushca shinami sintirinchij. Pero Yaya Diospimi tucui shunguhuan confiana canchij. Chaita rurajpica paita alli sirvichunmi fuerzasta cushpa ayudanga (Isaías 40:28, 29). w19.06 págs. 15, 16 párrs. 4, 9, 10

Ama manchangapajca Diosmantami huillana canchij. Chashnami Diospi confianata yachashun. Pitapish mana manchashunchu. Yuyashun. Fuerzata charingapajca ejerciciocunata ruranataca mana saquinachu canchij. Shinallataj mana manchaj cangapajca maipi cashpapish huillanataca manataj saquinachu canchij. Cunan punllacunapi mana manchaihuan huillashpaca, shamuj punllacunapipish Diosmanta huillachun jarcajpica manataj manchashunchu (1 Tesalonicenses 2:1, 2). Diosta sirvij panipaj ejemplomanta yachashun. Pani Nancy Yuenca China llajtamantami carca. Paica shuj metro y mediotami midirca. Pero uchilla cashpapish pitapish mana mancharcachu. Diospaj gobiernomanta huillanata manataj saquijpimi 20 huatata carcelpi churarcacuna. Autoridadcuna chai panita juzgacushpaca, “cai huarmipaj crishcacunataca mana pi cambiai tucuncunaca” nircacunami. w19.07 pág. 5 párrs. 13, 14

Huaquincunaca Bibliamanta yachanatami munancuna. Cutin shujtajcunaca Bibliamanta yachanata mana munaj shinami ricuringa. Paicuna Bibliamanta yachana munaita charichunmi ayudana canchij. Alli huillajcuna cangapajca, allimi prepararina canchij. Shinallataj gentecuna munashca temacunamanta ima shina parlanatami yachana canchij. Predicacushpaca: “Cunan punllacunapica muyundij Allpapimi achca problemacunata charinchij. ¿Pitaj cai llaquicunataca tucuchi tucun? ¿Quiquinca imatataj yuyangui?” nishpami tapui tucunchij. Chai huashaca Daniel 2:44-tami ricuchi tucunchij. Mana cashpaca “¿Huahuacunata alli huiñachingapajca imatataj rurana canchij?” nishpami tapui tucunchij. Chai qꞌuipaca, Deuteronomio 6:6, 7-tami liyi tucunchij. Shujtajcunata ayudashpaca cushillami sintirinchij. w19.07 págs. 15, 16 párrs. 4, 6, 7

Asia llajtapi causaj shuj huauquica achca huatacunatami Diosmanta mana yachasha nijcunaman huillashca. Cai huauquica: “Asiapi causajcunaca achca dioscunatami adorancuna. Pero huaquincunaca chai yanga dioscunataca mana adorancunachu. Chaimantami paicunaca Diospica mana crinichu nincuna. Paicuna chashna nijpica, ñucapish runacuna rurashca dioscunapi mana crinichu ninimi. Chai huashaca Jeremías 16:20-tami liyini. Cai versota liyishca qꞌuipaca: ‘Mana tucui dioscunachu yanga dioscuna can. Shujllami causaj Dios can. Chai Diosca ¿maijanshi canga?’ nishpami tapuni. Paicuna ima nishcata uyashca huashaca, Isaías 41:23-tami liyini. Chaipica: ‘Cancuna diostaj cashcata ñucanchij yachangapajca qꞌuipa punllacuna imalla tucuna cashcata huillaichigari’ ninmi. Ña tucuchingapajca, shamuj punllacunapi ima tucunata Jehová Dios huillashcatami Bibliapi ricuchini” ninmi. Shujtaj huauquica gentecunata visitanaman cutin tigrashpaca ¿imatataj ruran? Paica: “Ñucaca Bibliapi tiyaj consejocunatami ricuchini. Shinallataj maijan profeciacuna ña pajtarishcatami huillani. Cai Allpapi, jahua pachapi imalla tiyashcacunamantapishmi parlani. Chai huashaca tucuita ruraj Diospi imamanta crina cashcatami ricuchini. Paicuna, tal vez shuj Diosmi tiyanga nijpica Bibliapimi Jehová Diosmanta yachachi callarini” ninmi. w19.07 págs. 23, 24 párrs. 14, 15

Cai importante cosascunaca Diospaj shutita jatunyachina, Diospaj munai pajtarichun ayudana, congregacionpi tandalla canami can (Mateo 6:9, 10; Juan 13:35). Ñucanchij causaipi caicunata pajtachishpaca Jehová Diosta cꞌuyashcatami ricuchicunchij. Apóstol Pabloca “jucha illaj cachun” nircapishmi. Caica mana nisha ninchu jucha illaj cana cashcata. Pero Diostapish shujtajcunatapish ashtahuan cꞌuyashpa, imacuna ashtahuan importante cashcata mana cungarishpaca, Diospaj ñaupajpi jucha illaj shinami ricurishun. Ashtahuancarin huauqui panicunata cꞌuyashpaca paicunata mana pandachishunchu. Shujtajcunataca mana pandachinachu canchij. Pero maipica ricushcacunahuan, uyashcacunahuan, churarishcacunahuan, hasta ima agllashca trabajohuanmi shujtajcunata pandachi tucunchij. Chaicunata rurashpaca ima juchataca mana ruracunichu nishpachari yuyashun. Shinapish ñucanchij agllashca decisioncunahuan shujtajcunata pandachishpaca mana allitami ruracunchij.(Mateo 18:6). w19.08 pág. 10 párrs. 9-11

1935 huatamantami testigo de Jehovacunaca: “Juan muscuipi ricushca yallitaj achcacunaca Diosta alli sirvijcunami can. Paicunami cai Allpapi huiñaicama causanata shuyacuncuna” nishpa crinchij. (Apocalipsis 7:9, 10). Yallitaj achcacunaca jatun llaqui punllapi quishpiringapajca Jesús cai pachata manaraj mandacujpimi Jehová Diosta cazushpa, sinchi feta charishpa causana can (Lucas 21:34-36). Yallitaj achcacunaca cai Allpapi causanata yachashpami cushilla sintirincuna. Shinallataj picuna jahua cielopi causanata, picuna cai Allpapi causanata Jehová Dioslla agllaj cashcatami yachancuna. Ashtahuancarin 144 mil agllashcacunapish, yallitaj achcacunapish Dios paipaj Churita cushcamanta bendicioncunata chasquina cashcatami intindinchij (Romanos 3:24). w19.09 págs. 28, 29 párrs. 10, 12, 13

¿Shujtaj ladopi sirvinaman cachashcachu? Dios mingashca mushuj trabajotaca cushillami pajtachi tucungui. Mana alli trabajashcamantami cachan nishpa o imapaj mana sirvijpimi cachan nishpaca mana yuyanachu canchij. Dios mingashca mushuj trabajotaca cushillami pajtachi tucunchij. Jehová Dios ima shina ayudacushcata yuyarishpami huillashpa catina canchij. Ñaupa punllapi Diosta alli sirvij huauqui panicunapaj ejemplota catishunchij. Paicunaca “maita rishpapish alli huillaita huillashpami rircacuna” (Hechos 8:1, 4). Ñucanchijpish huillanata mana saquishpaca achcacunatami ayudashun. Por ejemplo, huaquin precursorcunataca autoridadcunami shuj llajtamanta llujshichishpa cacharcacuna. Chaimantami chai precursorcunaca paicunapaj propio shimipi huillana minishtirishca llajtapi sirvinaman rircacuna. Asha quillacuna qꞌuipallami chaipica achca gentecuna chꞌican chꞌican grupocunapi tandanacui callarircacuna. Paicuna shina Diosta sirvishcamantami cushilla causaita charishun. Ashtahuanpish Jehová Diospaj ñaupajpi alli ricurishpami cushilla causashun. Chaimanta, Yaya Diosllataj ñucanchij causaita pushana cashcata, ayudana cashcata, yachaita cuna cashcataca tucui shunguhuan crishunchij. Yuyarishun, ¿imamantataj shuj lugarpi Diosta sirvinataca munarcanchij? Gentecunata tucui shunguhuan ayudasha nishcamantami chaipi sirvinata munarcanchij. Shujtaj lugarpipish Dios mingashcata tucui shunguhuan pajtachijpica paillatajmi cushilla sirvichun ayudanga (Eclesiastés 7:10). w19.08 págs. 24, 25 párrs. 15, 16

Jehová Diostaca tucuipimi cazuna canchij. ¿Imamanta? Paimi ñucanchijta rurarca. Chaimantami imata rurana cashcata mandai tucun (Apocalipsis 4:11). Cai tucui huatacunapica achca gentecunami shujtajcunata mandashpa causashcacuna. Shinapish Jehová Diosllami yachaj, cꞌuyaj mandaj can. Chaimantami paita cazuna canchij (Éxodo 34:6; Romanos 16:27; 1 Juan 4:8). Mana ñucanchij yuyashca shina imatapish rurashpami Jehová Diosta cazushcata ricuchishun (Proverbios 3:5). Shinallataj Yaya Dios yachaj, cꞌuyaj, llaquij cashcata intindishpaca paitaca jahuallami cazushun (Salmo 145:9). Diosta alli rijsishpaca paitaca ashtahuanmi cꞌuyashun. Diosta cꞌuyashcamantami mana achca mandashcacunata minishtishun. w19.09 págs. 14, 15 párrs. 1, 3

Diabloca llullacunata nishpami gentecunataca desanimachisha nin. Por ejemplo, paica “Jehová Diosca ñucanchijtaca maitataj cꞌuyangari, ñucanchij juchacunatapish maitataj perdonangari” nishpa yuyachunmi munan. Caicunata nishpami gentecunata achcata llaquichin (Juan 8:44). Shinapish Jesuspajman cꞌuchuyashpaca Yayitu Dios ñucanchijta achcata cꞌuyashcatami crinchij (Mateo 11:28). Ñucanchij juchacunata perdonashcatapishmi intindinchij (Romanos 8:32, 38, 39). Jesuspaj yugota aparinaca mana shuj llashaj quipita aparicuj shinachu can. Por ejemplo, imapi trabajashpaca mana cushilla sintirinchijchu, shaicushcami sintirinchij. Pero Jehová Diospaj, Jesuspaj trabajashpaca cushillami sintirinchij. Huaquinpica shaicushca cashpapish tandanacuicunaman ringapajca achcata esforzarinchij. Shinapish huasiman tigrashpaca samarishca layami alli sintirinchij. Huillanaman llujshishpa, Bibliamanta estudiashpapish sinchiyarishcami sintirinchij. w19.09 págs. 20, 23, 24 párrs. 1, 15, 16

Jehová Diosca paipaj punlla manaraj chayamujpimi gentecunaman huillachun munan. Chaimantami Diospajta ruranapi ocuparina canchij (1 Corintios 15:58). Jesusca tucuri punllacunapi ima tucunamanta parlashpaca, Diosta sirvijcunaca ‘alli huillaitami tucui cai pachapi huillanga’ nircami (Marcos 13:4, 8, 10; Mateo 24:14). Huillanaman llujshishpaca Jesús nishcatami pajtachicunchij. Huatan huatanmi achca gentecunaca Diospaj gobiernomanta yachacuncuna. Chaimi cai tucuri punllacunapica muyundij Allpapi predicajcunaca ashtahuan mirarishcacuna. 1914-pica 5.155 predicajcunami 43 llajtacunapi tiyarca. Cunan punllacunapica 8.500.000 yalli predicajcunami 240 llajtacunapi tiyan. Pero predicanataca manaraj tucuchishcanchijchu. Chaimantami Diospaj gobiernollami tucui llaquicunata tucuchinga nishpa huillana canchij (Salmo 145:11-13). w19.10 págs. 8, 9, 10 párrs. 3, 7, 8

Absalón huañuchisha nijpimi rey Davidpish paita sirvijcunapish miticushpa rircacuna. Paicunaca shitashca pambapimi yaricaihuan, shaicushca carcacuna. Chaimantami Yaya Diosca paicunaman carachun Barzilai runata, shujtajcunatapish cacharca. Barzilai runaca mayorlla cashpapish “Jehová Dios nishcata mana rurai pudishachu” nishpaca mana mancharcachu. Ashtahuanpish imalla charishcacunahuanmi ayudarca (2 Samuel 17:27-29). ¿Barzilai runamantaca imatataj yachanchij? Diosca ñucanchij mashna huatacunata charijpipish huauqui panicunaman ima minishtishcata cuchunmi cachai tucun (Proverbios 3:27, 28; 19:17). Mana ayudanaman ri tucushpapish tucui Allpapi caj huauqui panicunata ayudangapajmi cullquita cui tucunchij (2 Corintios 8:14, 15). w19.10 pág. 21 párr. 6

Ñucanchijta pi llaquichijpica, shujtajcunaman ima shina sintirishcata huillanaca sinchichari ricuringa (Proverbios 18:19). Mana cashpaca shujtajcunahuan alli apanacungapajca tiempota, fuerzata mana charinichu nishpachari yuyai tucunchij. Pero ima jarcaicuna tiyajpipish shujtajcunahuanmi alli apanacui tucunchij. Llaquicuna ricurijpi ñucanchij huauqui panicuna ayudachunca cunanmantami paicunahuan alli apanacuna canchij. Chaipajca ima shina sintirishcata, imata yuyashcatapishmi huillana canchij (1 Pedro 1:22). Jesusca tucuitami paipaj amigocunaman huillarca. Chashnami paicunapi confiashcata ricuchirca (Juan 15:15). Jesús shinallatajmi huauqui panicunamanca imamanta cushilla o llaquilla cashcata huillana canchij. Ñucanchijpish ima shina sintirishcata pi parlajpica allimi uyana canchij. Chashnami paipish ñucanchij layallataj yuyashcata, sintishcata cuentata cushun. Huauqui panicunahuan shungumanta parlanacushpaca allimi apanacushun (Proverbios 27:9). w19.11 págs. 4, 5 párrs. 8, 9

¿Jatun llaqui punllapica cunan punllacunapi huillacuj shinallatajchu huillashun? Jatun llaqui punllapica alli huillaicunataca ña mana huillashunchu. Ashtahuancarin Diablopaj ruraicuna, millai gentecunapish ñalla tucurina cashcatachari mana manchashpa huillashun. Bibliapica cai huillaicunaca jatun rundu gentecunapi urmacuj shinami canga ninmi (Apocalipsis 16:21). Tiempohuanmi imata huillana cashcata, ima shina huillana cashcatapish alli yachashun (Ezequiel 2:3-5). Llaquichij huillaita huillai callarijpica gobiernocunaca ama huillachunmi jarcasha ningacuna. Pero ima shinami cunan punllacunapi Jehová Diosca predicacionpi ayudan, chashnallatajmi chai punllacunapipish ayudanga. Chaitami tucui shunguhuan crinchij (Miqueas 3:8). w19.10 pág. 16 párrs. 8, 9

Apóstol Pablo nishca shinaca charijyanata mashcajpica mana allita rurana yuyaicunami shamunga. Diosta sirvinatapishmi saquishun (1 Timoteo 6:9). Chaimantami ñucanchij fe sinchi cachunca rijcharishca cana canchij. Diabloca charina cosascunallapi yuyashpa Diosta sirvinata saquichunmi munan. Chaitaca mana cungarinachu canchij. Imacunata randingapajchari cullquita charinchij. Pero cullquita charishpapish caipi yuyashun. Ñaupa tiempopica Jesusca shuj charij runataca Diosta ashtahuan sirvichunmi invitarca. Shinapish cai runaca achcata charishcamantami mana chasquirca (Marcos 10:17-22). ¿Ñucapish achca cosascunata charishcamanta Diosta ashtahuan sirvinata saquishachu? ¿Imata randishpaca cuidangapaj tiempota, fuerzata charishachu? ¿Randishca cosascunapica yallichu ocuparisha? nishpami tapurina canchij. Achca cosascunata charinapaj randica minishtirishcacunallahuanmi causana canchij. Chashnami Diosta sirvingapaj tiempota, fuerzata charishun. w19.11 págs. 18 párrs. 15, 16

Ñucanchij ima decidishcata pajtachingapajca Yaya Diosmi fuerzata cushpa ayudanga (Filipenses 2:13). Chaimanta fuerza illaj sintirishpaca Dios paipaj espíritu santota cushpa ayudachun mañashunchij. Mañashcacunata cutichichunpish mañashpa catishunchij. Jesusca: ‘Diostaca mañacuichijlla paica espíritu santota cungami’ nircami (Lucas 11:9, 13). Ashtahuanpish ima shina pajtachinata ricushunchij. Imata decidishpaca shuj listapi ima shina pajtachinatami quillcana canchij. Imata rurana achca cajpica asha asha rurangapajmi ricuna canchij. Chashnami ña tucuita pajtachicushcata ricushun. Shinallataj asha asha pajtachicushcamantami shaicushca mana sintirishun. Por ejemplo, Corinto llajtamanta huauqui panicunataca apóstol Pabloca: ‘Cada semana callari punllapi chꞌicanyachishpa cullquita huaquichichij’ nircami (1 Corintios 16:2). w19.11 pág. 29 párrs. 13, 14

Diospaj shutita, pai imata rurashcacunata, pai ima nishcacunata yachashcamantami paita alli rijsishcata yuyanchij. Pero, Diosta alli rijsingapajca pai cꞌuyaj, llaquij, tucuita ruraj cashcata yachangapajmi tiempota surcuna canchij. Chaita rurashpaca Jehová imamanta chashna rurashcata, imamanta chaita nishcatami alli intindishun. Ñucanchij yuyaicunapish ruraicunapish Diospaj alli cashcata, mana alli cashcatami cuentata cushun. Shinami Jehová Dios imata rurachun munashcata yachashpa pajtachishun. Jehová Diosta sirvi callarijpi, tandanacuicunaman rijpica shujtajcunami ñucanchijmanta tal vez burlaringacuna. Pero, Yaya Diosta alli rijsishpa paipi tucui shunguhuan confiajpica paica manataj saquingachu. Ashtahuancarin Diospaj alli amigocunami tucushun. ¿Jehová Diostaca alli rijsi tucunchijchu? Ari, rijsi tucunchijmi. w19.12 págs. 16, 17 párrs. 3, 4

Maijan yaya mamacunaca huahuacunata alli huiñachinaca sinchimi can nishpami yuyancuna. Pero huahuacunaca Dios cushca regalomi can. Chaimantami Jehová Diosca yaya mamacunata ayudasha nin. Yaya mamacuna Diosta mañajpica paica Bibliahuan, publicacioncunahuan, shujtaj yaya mamacunapaj alli ejemplohuanmi ayudan. Maijancunaca huahuacunata huiñachingapajca 20 huatacunallami minishtirin nincunami. Pero yaya mamacunaca huahuacunataca tucui vidami yachachina can. Shinallataj huahuacunata alli huiñachingapajca cꞌuyaita ricuchina, paicunahuan pasangapaj tiempota surcuna, Bibliamanta yachachinami ashtahuan valishca can. Huahuacunaman Bibliamanta yachachijpipish cada huahuami imata ruranata agllancuna. Asia llajtamanta pani Annaca: “Ñuca yaya mamataca Jehová munashca shina yachachishpa alli huiñachishcamantami agradicini. Chaimantami cushi causaita charini” ninmi (Proverbios 23:24, 25). Diosta sirvij familiapi huiñashca jovencunaca pani Anna shinami sintirincuna. w19.12 pág. 27 párrs. 21, 22

Ñucanchij congregacionpi huauqui panicunaca paicunata animachunmi minishtincuna. Llaquilla cajcunata animangapajca imata ninata, imata ruranataca mana pudishachu nishpachari yuyai tucunchij. Chashna manchaihuan cashpapish paicunata animangapajmi esforzarina canchij. Shujtajcunamanta preocuparijpica paicunaca cushillami sintiringacuna. Cai tucuri punllacunapi causacushcamantami llaquicunaca ashtahuan mirarishca (2 Timoteo 3:13). Ñucanchijpish juchayujcuna cashcamantami imapipish pandarinchijlla. Chaimantami shujtajcuna animachun minishtinchij. Apóstol Pabloca shujtaj huauquicuna animajpimi huañuna horascama Diosta alli sirvirca. Ñucanchijpish, chashna rurashpaca shujtajcuna Diosta alli sirvichunmi ayudashun (1 Tesalonicenses 3:2, 3). w20.01 págs. 12, 13 párrs. 17-19

Dios agllashcacunaca shujtajcuna paicunata jatunyachichunca mana munancunachu (Filipenses 2:2, 3). Jahua pachaman rina cashcataca Jehová Diosca agllashcacunallamanmi huillashca. Chaimantami jahua pachaman rigrijcunaca paicunata Dios agllashcata shujtajcuna mana crijpica mana llaquirincuna. Bibliapi nishca shinaca shujtajcuna imata nijpica mana chai rato crinachu canchij. Shinallataj Dios agllashcacunaca shujtajcuna paicunata alli tratachunca mana shuyancunachu. Pihuanpish tupashcahuanca Dios agllashcami cani nishpaca mana huillancunachu (1 Corintios 4:7, 8). Jehová Diospaj espíritu santota chasquijcunaca tucuicunahuanmi tandalla, sumajta causancuna (Romanos 16:17, 18). Chaimantami paicunapuralla Bibliamanta yachangapajpish, Dios ima shina paicunata agllashcata parlangapajpish mana tandanacuncuna (Gálatas 1:15-17). Chashna rurashpaca huauqui panicunatami chꞌicanyachingacuna. w20.01 pág. 28 párrs. 6, 7

Gentecunaca paicunapaj religión chingarishca qꞌuipa testigo de Jehovacunalla Diosta adorashpa caticushcatami ricungacuna. Chaimantami paicunaca achcata pꞌiñarishpa tucui ladocunapi, internetpipish alborotota rurangacuna. Gobiernocuna, Diablopish testigo de Jehovacunalla saquirijta ricushpami pꞌiñaringacuna. Chaimantami Mandaj Gogca Diosta sirvijcunata llaquichisha ninga (Ezequiel 38:2, 14-16). Diosta sirvijcunaca chai punllacunapi imalla tucunata mana alli yachashcamantami maipica ashata preocuparinchij. Shinapish jatun llaqui punlla chayamunataca mana manchanachu canchij. Jehová Diosmi ñucanchij quishpirichunca imata ruranata huillanga (Salmo 34:19). w19.10 págs. 16, 17 párrs. 10, 11

Ñucanchij nishcacunahuan, rurashcacunahuanmi Diosta agradicishcataca ricuchina canchij. Tucuri punllacunapi causacushcamantami Diosta mana agradicij gentecuna tiyan (2 Timoteo 3:1, 2). Ñucanchijca paicuna shinaca mana casha ninchijchu. Jehová Diosca paipaj huahuacuna cꞌuyanacushpa causachunmi munan. Caishuj chaishuj cꞌuyanacushpaca Diosta sirvijcuna cashcatami ricuchinchij (Juan 13:35). Salmota quillcajca: “Riquichij, ¡Huauquindijcuna tandalla, shuj shinalla causanaca yallitaj alli, yallitaj sumajmari!” nircami (Salmo 133:1). Huauqui panicunata cꞌuyashpaca Jehová Diosta cꞌuyashcatami ricuchinchij (1 Juan 4:20). Cꞌuyaj, llaquij huauqui panicunahuan tandalla Diosta sirvishcamantami contento sintirinchij (Efesios 4:32). w20.02 pág. 9 párrs. 6, 7

Jehová Diosca Anapaj problemacunataca mana utca anchuchircachu. Paica Peninahuanmi chai huasillapitaj causashpa catirca. Bibliapica Penina huarmi Anata llaquichinata saquishcataca mana huillanchu. Chaimi Anaca tucuita ahuantashpa causashcanga. Pero paipaj llaquita Jehová Diospaj maquipi saquishcamantami paica tranquila sintirirca. Asha tiempo huashacarin Ana mañashcatami Jehová Diosca cutichirca. Chaimantami huahuacunata charirca (1 Samuel 1:2, 6, 7, 17-20). Llaquicuna mana tucurijpipish tranquilomi sintiri tucunchij. Yayitu Diosta mañajpipish tandanacuicunaman rijpipish ima problemacunaca manachari utca anchunga. Pero Jehová Diosca Anata ima shinami ayudarca, chashnallatajmi ñucanchijtapish tranquilo sintirichun ayudanga. Paica manataj cungarishpami ñucanchijtaca bendicianga (Hebreos 11:6). w20.02 pág. 22 párrs. 9, 10

Ancianocunaca shuj huauqui o pani allita rurachunca Bibliapi tiyaj consejocunahuanmi ayudana can. ¿Imamantataj mana manchashpa parlana horaspica parlanalla canchij? Sumo sacerdote Elipaj ejemplomanta yachashun. Paica ishqui churicunatami charirca, paicunataca achcatami cꞌuyarca. Cai churicunaca Diospaj carpa huasipimi sacerdotecuna shina trabajarcacuna. Pero Jehová Diostapish, paipaj ofrendacunatapish mana respetashpa, huainayashpami causajcuna carca (1 Samuel 2:12-17, 22). Moisesman cushca Leypi mandashca shinaca paicunaca huañunami carca. Pero paicunapaj yaya Elica paicuna munashcata rurachunmi saquijlla carca. Chaimantami paicunataca mana sinchita rimarca. Ashtahuanpish Diospaj carpa huasipi sirvishpa catichunmi saquirca (Deuteronomio 21:18-21). ¿Jehová Dios chaita ricushpaca imatataj nirca? Paica: “Ñucata alli ninapaj randica cambaj churicunatarajmari alli ningui” nircami. Chaimantami cai ishqui millai runacunataca huañuchirca (1 Samuel 2:29, 34). w20.03 pág. 19 párrs. 4, 5