Agosto

Jesusca paita llaquichicujpipish tranquilomi sintirirca. Paica llaquicuna horaspimi Diosta tucui shunguhuan cazurca. Paipaj Yayata cushichicushcamantami tranquilo sintirirca. Shinallataj Jehová Diosta cꞌuyashcamantami paita sirvina yuyailla causarca. Por ejemplo, Jesusca jahua pachapi cashpaca paipaj Yayatami tucuita rurashpa ayudarca (Proverbios 8:30). Cutin cai Allpapi cashpaca tucui shunguhuanmi paipaj Yayamanta yachachirca (Mateo 6:9; Juan 5:17). Chaimantami contento sintirirca (Juan 4:34-36). Jesús shina cashcataca ¿ima shinataj ricuchishun? Pai shinami Diosta tucui shunguhuan cazuna canchij. Diospajta ruranapipish ocupadomi cana canchij (1 Corintios 15:58, NWT). Huillanaman rishpaca ñucanchij problemacunamantaca mana llaquiricushunchu (Hechos 18:5). Por ejemplo, predicacionpica gentecunaca ñucanchijtapish yallimi problemacunata charishcata ricunchij. Pero chai gentecuna Diosta cꞌuyai callarishpa, paita cazushpaca paicunapaj causaica allimi rin. Chaimi cushilla causancuna. Chaita ricushpami ñucanchijtapish Jehová Dios cuidanata tucui shunguhuan crinchij. w19.04 págs. 10, 11 párrs. 8, 9

Chai librocunaca achca cullquimi valij carca. Chashnapish shujtajcunaman convidanapaj randi o cꞌatunapaj randica tucuimi rupachircacuna. Chashnami Jehová Diospaj ñaupajpi alli casha nishcata ricuchircacuna. Tal vez huaira ama shitachun, ama ojiachun nishpami puca puchcata o cai laya shujtaj cosascunata charinchij. Pero Efesopi causajcuna shinami ñucanchijpish chai cosascunata ñutushpa chingachina canchij (1 Corintios 10:21, NWT). Imata ricunata, imata pugllanata alli agllashunchij. ¿Diablopaj ruraicunahuan chagrurishca cosascunata ricushpa, uyashpachu cushicunchij? Tucuicunami Diospaj ñaupajpi alli ricurisha ninchij. Chaimanta, Dios millanayachishca cosascunahuanca amataj cushicushunchij (Hechos 24:16). w19.04 págs. 22, 23 párrs. 10-12

Maijanpish jatun juchata rurajpica ancianocunaca Jesuspaj mandashcata cazushpami cashcata rurana can. Chaimantami Diosta sirvijcunataca cꞌuyaihuan tratana can. Pero, tucuimanta yallica Diospaj shutita pi ama mapayachichunmi ricuna can (Levítico 22:31, 32; Mateo 6:9). Shinallataj ancianocunaca huauqui panicuna Diosmanta ama caruyachunmi ayudana can. Ashtahuanpish llaquichishca cajcunata ayudangapajmi esforzarina can. Shuj huauqui o pani jatun juchata rurajpica ancianocunaca Diospaj ñaupajpi cutin alli ricurichunmi ayudana can (Santiago 5:14, 15). Maijanpish paipaj mapa munaicunamanta mana jarcarishpa jatun juchapi urmashpaca Diospaj ñaupajpica ungushca runa layami can. Cutin, ancianocunaca jambij runa shinami can. Chaimantami Bibliamanta consejocunata cushpa juchata ruraj Diospaj ñaupajpi cutin alli ricurichun ayudancuna. Juchata ruraj shungumanta arrepintirijllapimi Diosca perdonanga (Hechos 3:19; 2 Corintios 2:5-10). w19.05 pág. 10 párrs. 10, 11

Jehová Diosmi paita ashtahuan sirvina munaita charichun ayudan. Ñucanchij congregacionpi o shujtaj congregacionpichari maijan huauqui o pani paicunata ayudachun minishtincuna. Caicunata yachaj chayashpaca ¿ima shinataj ayudasha? nishpachari tapurinchij. Shinallataj Diosca ñucanchijman shuj trabajota mingajpica, ¿cai mingashcataca pajtachinata pudishachu? nishpachari yuyanchij. Chashnallataj Bibliapi valishca yuyaicunata tarishpaca shujtajcunata ayudangapajca ¿cai yuyaicunataca ima shinataj pajtachi tucuni? nishpachari yuyanchij. Jehová Diosca pai mingashcata pajtachichunmi ayudan (Isaías 40:29). Por ejemplo, imata alli rurachunmi Diosca paipaj espíritu santota cushpa ayudan (Éxodo 35:30-35). Shinallataj paipaj organizacionhuanmi alli trabajadorcuna cachun yachachin. Dios mingashcata mana pajtachi tucushpaca huauqui panicunata ayudachun mañashunchij. Yayitu Diostapish ayudachun mañashunchij (2 Corintios 4:7; Lucas 11:13). w19.10 págs. 20, 21 párrs. 3, 4

Chai nishcacuna ima shina pajtaricushcataca tucuicunami ricunchij. Shuj libropica: ‘1970 huatamantaca achca librocunapimi gentecuna alli causachunca tucui laya consejocunata llujchishca’ ninmi. Por ejemplo, huaquin librocunapica: ‘Ñucanchij causaipica imatapish mana cambianachu canchij’ nishpami yachachin. Cutin shujtaj libropica: ‘Canllata cꞌuyari. Canca sumajmari cangui. Can layaca pi mana tiyanchu. Can yuyashca shinami imatapish decidina cangui’ ninmi. Diablopish cashna yuyaicunahuanmi Evataca pandachirca. Paica: ‘Taita Dios shinami ima alli cashcatapish, ima mana alli cashcatapish yachai tucungui’ nircami (Génesis 3:5). Cunan punllacunapipish gentecunaca paicunallapimi yuyancuna. Chaimantami cazaranamantaca Jehová Dios o shujtaj gentecuna ima alli cashcata, ima mana alli cashcata yachachichunca mana saquincuna. w19.05 págs. 23, 24 párrs. 10, 11

Rey Davidpish sinchi llaquicunatami chꞌimbapurarca. Paica ñaupa punllacunapi jatun juchacunata rurashcamantami llaquilla sintirirca (Salmo 40:12). Shinallataj paipaj churi Absalonmi paipaj contra tucurca. Qꞌuipaca Absalontami huañuchircacuna (2 Samuel 15:13, 14; 18:33). Paipaj cꞌuyashca amigopishmi paita saquishpa rirca (2 Samuel 16:23–17:2; Salmo 55:12-14). Davidca dimastij llaquilla sintirishcamantami achca salmocunata quillcarca. Pero chai salmocunallapitajmi Davidca tucui shunguhuan Diospi confiashcata ricuchirca (Salmo 38:5-10; 94:17-19). Diospaj huasipi sirvij salmista runapishmi desanimado sintirirca. Paica Asaf runapaj familiami cashcanga. Salmistaca millai gentecuna causashca shinami causanata munai callarirca. Shinallataj Diosca paita sirvijcunataca mana bendicianchu nishpami yuyai callarica. Chaimantami achcata llaquirirca (Salmo 73:2-5, 7, 12-14, 16, 17, 21). w19.06 pág. 17 párrs. 12, 13

Diabloca ñucanchij imata minishtishcata ricushpami pandachin. Causaipi imata minishtishcamanta, familiacunata mantiningapajmi trabajana canchij. Tucuicunami alli trabajadorcuna canata munanchij (1 Timoteo 5:8). Chaipajca escuelamanmi rinchij. Escuelacunapica causaipaj alli prepararingapajmi yachachin. Pero huaquinpica panda yuyaicunatami yachachincuna. Por ejemplo, Diosca mana tiyanchu, Bibliapish yanga librollami can nishpami yachachincuna. Shinallataj profesorcunaca “inteligente cashpaca evolucionpimi crina cangui” nincunami (Romanos 1:21-23). Pero Jehová Diosca chaitaca mana yachachinchu (1 Corintios 1:19-21; 3:18-20). Chushaj yachachishcacunahuan, yanga yuyaicunahuan Diablo pandachichun amataj saquishunchij (1 Corintios 3:18; Colosenses 2:8). Jehová Diosmanta amataj cungaringapaj, pai munashca shina causangapajmi esforzarina canchij. w19.06 págs. 5-7 párrs. 13, 17

Gentecunaca Bibliapi nishcacunata pajtachishpaca allimi causangacuna. Chaimantami huillangapaj shuj temata agllacushpaca paicunapi yuyana canchij. Ña huillacushpaca gentecuna ima nishcatami alli uyana canchij. Paicunapaj crishcacunata parlajpipish mana burlarinachu canchij. Chashnami imata yuyashcata intindishun. Paicunapish ñucanchijtami uyasha ningacuna. Shuj planta alli huiñachunca cutin cutinmi yacuta regana canchij. Shinallataj gentecunaman Bibliamanta cutin cutin yachachijpica Jehová Diosta, Jesustami cꞌuyai callaringacuna. Pero yachachinaman rijpica paicunaca mana huasipichu canga. O ocupadochari canga. Ñucanchijpi confiachunpish tiempomi minishtiringa. Chaimantami Bibliamanta yachana munaita charichunca cutin cutin visitana canchij. w19.07 págs. 14-16 párrs. 1, 7, 8

Ñucanchijta pꞌiñachunca mana munanchijchu. Pero Jesús mandashcacunata pajtachishcamanta, Diosmantapish huillashpa causashcamantami ñucanchijta pꞌiñancuna. Jesusca chashna tucuna cashcatami huillarca (Juan 15:18-21). Diosta cꞌuyashcamanta, gentecuna pꞌiñajpica mana llaquilla sintirinachu canchij. Gentecunata cushichinapaj randica Yayitu Diostami cushichina canchij. Gentecuna ñucanchijta mana respetajpica imapaj mana valinichu nishpaca mana yuyanachu canchij. Diosmanta huillachun ima hora jarcanataca mana yachanchijchu. Pero cunan punllacunami Jehová Diosmanta ashtahuan yachashpa catina canchij. Shinallataj mana manchaj cangapajmi esforzarina canchij. Shujtajcuna pꞌiñajpipish imata rurana cashcatami yuyarina canchij. Cunanmanta chaita rurashpaca shamuj punllacunapipish Jehová Diosta sirvinataca manataj saquishunchu. w19.07 págs. 6, 7 párrs. 17, 18, 21

Diospi mana crijcunaman Bibliamanta yachachicushpaca Dios tiyashcata crichunmi ayudana canchij. Shinallataj imalla yachachishcacunatami cutin cutin yuyachina canchij. Biblia yachachishcacunapi imamanta crina cashcatami yachachina canchij. Chaipajca, huaquin profeciacuna ima shina pajtarishcatami ricuchina canchij. Cienciamanta, historiamanta parlashpapish Biblia mana pandarij cashcata, chaipi tiyaj consejocunapish alli cashcatami yachachina canchij. Achca gentecunaca manaraj bautizarishpaca ima religiontapish mana charijcunachu carca. Pero cai gentecunaca Jehová Diostami cꞌuyai callarishcacuna. Chaimanta tucui gentecunaman cꞌuyaita ricuchishunchij. Paicuna imata parlajpipish uyanata yachashunchij. Ima shina yuyashcatapish alli intindishunchij. Chashna rurajpimi paicunapish Diosta cꞌuyai callaringacuna (1 Corintios 13:1). w19.07 pág. 24 párrs. 16, 17

Jehová Diosca Salumpaj ushushicunatami Jerusalén pircacunata shayachishpa ayudachun cacharca (Nehemías 2:20; 3:12). Salumpaj ushushicunaca paipaj yaya mandaj cajpipish tucui shunguhuanmi sinchi trabajopi ayudarcacuna (Nehemías 4:15-18). Cunan punllacunapish achca panicunami Diospaj huasita shayachinapi, allichinapi ayudashpa cushilla sintirincuna. Cai panicuna ayudajpimi Dios mingashca trabajota alli pajtachi pudinchij. Tabita huarmica shujtajcunamanta allita ruraj, viudacunaman ima minishtishcacunata cujmi carca. Diosmi chashna ayudachun paimanca yuyaita cuj carca (Hechos 9:36). Tabita huarmi chashna alli cajpimi achcacunaca pai huañujpi huacarcacuna. Pero apóstol Pedro Tabita huarmita causachijpica cushillami sintirircacuna (Hechos 9:39-41). ¿Tabitamantaca imatataj yachanchij? Jovencuna, mayorcuna, cꞌaricuna, huarmicuna cashpapish tucuicunami huauqui panicunata imapipish ayudai tucunchij. w19.10 pág. 23 párr. 11, 12

¿Imashinataj shujtajcunataca juchapi urmachun pandachi tucunchij? Caipi yuyashun. Bibliamanta yachacujca tragota ubyana viciotami saquishca. Chaimantami chai viciopi cutin ama urmangapaj ni imata mana ubyana cashcata alli yachan. Paipaj causaipi cambiocunata rurashpami bautizarin. Pero shuj punllaca shuj huauquimi paita, shujtaj huauqui panicunatapish paipaj huasiman invitan. Chaipimi huasiyuj huauquica tragota ricuchishpa: “Canllataj jarcarishpaca ashallatami ubyai tucungui” nin. Cai huauquipaj consejota uyashpaca cunanlla bautizarishca huauquica machana viciopimi cutin urmai tucun. Chaica llaquimi canman. Cai punllapaj versopi nishca consejoca tandanacuicunapi pajtachinatami ayudan. Tandanacuicunapica Diospaj imacuna importante cashcatami yuyarinchij. Shinallataj Diospaj ñaupajpi jucha illaj shina ricuringapaj pai munashcata rurana cashcatami yachachin. Huauqui panicuna ñucanchijta animajpica Yayitu Diosta, paicunatapishmi ashtahuan cꞌuyashun. Shungumanta cꞌuyashpaca huauqui panicunataca mana pandachishunchu. w19.08 págs. 10-12 párrs. 9, 13, 14

Imapish allimi llujshinga nishpa yuyajcuna, imata ninatapish mana manchaj gentecunaca mana siemprechu jatun tucushcacuna can (Juan 1:46, 47). Ima laya gentecuna cashpapish tucuicunami shungumanta humildes cangapaj esforzarina canchij. Apóstol Pablomanta yachashun. Jehová Diosca chꞌican chꞌican lugarcunapi congregacioncuna tiyachunmi Pablota huillanaman cacharca. Paica shujtaj apostolcunata yallimi huillashcanga. Chashnapish mana jatun tucurcachu. Pabloca imatapish alli rurai tucushcamanta Diospaj amigo cashcataca mana yuyarcachu. Ashtahuanpish Yaya Dios cꞌuyashcamantami paipaj amigo tucushcani nircami (1 Corintios 15:10). Chai punllacunaca Corinto llajtamanta huaquin huauqui panicunami paita cꞌamijcuna carca. Shinapish Pabloca mana jatun tucushpami paicunaman cartata escribishpa cacharca. Chashnami alli ejemplota curca (2 Corintios 10:10). w19.09 pág. 3 párrs. 5, 6

Tucuicunami juchayujcuna canchij. Chaimantami maipica Diosta tucuipi cazunaca sinchi ricurin. Adán Evaca Yaya Dios ama micungui nishca frutatami micurcacuna. Chashnami Diosta mana cazurcacuna (Génesis 3:22). Cunan punllacunapish paicuna shinallatajmi achca gentecunaca Diosta mana cazuncuna. Cai gentecunaca imatapish paicuna munashca shinami decidincuna. Diosta cꞌuyashpapish pai munashca shinaca manachari tucuita pajtachinchij. Apóstol Pablohuanpish chaimi tucurca (Romanos 7:21-23). Pero paica Diosta cazungapajmi esforzarirca. Ñucanchijpish Pablo shinami mana alli yuyaicunata punllanta anchuchingapaj esforzarina canchij. Ñucanchij huiñashca llajtapi causajcuna shina yuyashcamantami maipica Diosta cazunaca sinchi canga. Diospaj yuyaihuan gentecunapaj yuyaihuanca mana igualchu can. Chaimantami gentecuna shina ama yuyangapaj esforzarina canchij. w19.09 pág. 15 párrs. 4-6

Ñucanchijcunaca rato shaicurijlla cashcatami yachanchij. Chaimantami imapitaj yalli ocuparini nishpa yuyarina canchij. Por ejemplo, achca cullquiyuj tucusha nishpachari mana samarishpa sinchita trabajanchij. Ñaupa punllacunapica shuj jovenca Jesustaca ¿huiñai causaita charingapajca imatataj rurana cani? nishpami tapurca. Cai jovenca alli runami carca. Marcos libropica Jesusca cai joventaca cꞌuyarcami ninmi. Chaimantami Jesusca cunan punllapaj nishca versopi invitacionta rurarca. Chashna nijpica cai jovenca charishcacunata ashtahuan llaquishcamantami Jesusta mana catisha nirca (Marcos 10:17-22). Jesuspaj yugota aparinapaj randica cosascunata charinapimi ocuparirca (Mateo 6:24). Chaipi cashca cashpaca ¿imatataj agllanchijman carcanchij? ¿Imatataj punta lugarpi churacuni? nishpami tapurina canchij. ¿Imamanta? Chaita rurashpallami mana imapipish denvaldi ñucanchij fuerzasta gastashun. w19.09 pág. 24 párrs. 17, 18

Yayitu Dios, huillanaca caipimi tucurin ningacamami huillashpa catina canchij. ¿Gentecunaca Jehová Diosta, Jesusta rijsingapajca mashna tiempotataj charincuna? (Juan 17:3). Mana yachanchijchu. Pero alli shungu gentecunaca manaraj jatun llaqui punlla callarijpimi Diosmanta yachai tucuncuna (Hechos 13:48, NWT). ¿Cai alli shungu gentecuna Diosta rijsichunca imatataj rurana canchij? Jehová Diosca gentecunaman yachachingapajmi minishtirishca ayudacunata cushca. Por ejemplo, chaupi semana tandanacuipimi punta parlanacuipi, primera visitapi imata ruranata yachachin. Ashtahuanpish, maijan ashtahuan yachanata munajpica tigramungacamami shuj tratadota o revistata liyichun saquina canchij. w19.10 págs. 10, 11 párrs. 7, 9, 10

Simeón runaca Jerusalenmanta shuj mayorlla runami carca. Paica Mesiasta ricungapajmi achca huatacunata shuyacushca carca. Shuj punllaca Jehová Diosca: “Canca manaraj huañushpami Mesiasta ricungui” nircami. Chaimantami cushilla carca. Shujtaj punllaca Simeonca espíritu santota chasquishcamantami Diospaj huasiman rirca. Simeonca huahua Jesusta ricushpami cai huahua Cristo tucuna cashcata huillarca. Chaitaca Diosmi rimachirca (Lucas 2:25-35). Simeonca Jesús tucui imallata rurashcataca mana ricushcangachu. Pero Jesusmanta pai imata nishcata yuyarishpami cushilla sintirirca. Simeonca paraíso Allpapimi ñalla causaringa. Chaipimi mandaj Jesús cai Allpapi causajcunata bendiciashcata ricunga (Génesis 22:18). Ñucanchijpish Jehová Dios paita sirvingapaj imata rurachun saquijpica cushillami sintirina canchij. w19.10 págs. 22, 23 párrs. 7, 12

Charijcuna o huajchacuna cashpapish ñucanchij shungutami cuidana canchij. ¿Ima shinataj cuidashun? Cullquita mana cꞌuyanachu canchij. Trabajopipish mana yalli ocuparinachu canchij. Cullquita cꞌuyaj cashcata yachangapajca cashna tapurishunchij. “¿Tandanacuipi cashpa, predicacushpaca ñuca trabajopichu yalli yuyani? Shamuj punllacunapish alli causangapajca cunanmi achcata trabajana cani ¿nishpachu sustarini? ¿Cullquimanta, charina cosascunamantachu familiahuan problemacunata charini? ¿Jehová Diosta ashtahuan sirvingapajca shujtajcuna mana munashca trabajotachu chasquini?” (1 Timoteo 6:9-12). Cai tapuicunapi yuyacushpaca Jehová Dios ñucanchijta cꞌuyashcatami yuyarina canchij. Diosca paita tucui shunguhuan sirvijcunataca: “Cantaca manataj shitashachu, manataj cungarishachu” ninmi. Chaita yachashpami apóstol Pablopish: “Cancunaca quiquinpajlla ashtahuan charij canataca ama munaichijchu” nirca (Hebreos 13:5, 6). w19.10 pág. 29 párr. 10

Huauqui panicunahuan tandalla imata rurashpaca paicunapica allicunatami ricushun. Chashnami ashtahuan alli apanacushun. Por ejemplo, shuj huauquihuanchari predicanaman llujshinchij. Cai huauquica Yaya Diosmanta mana manchashpachari tucui shunguhuan huillan. Chaita ricushpaca chai huauquitaca ashtahuanmi cꞌuyanchij. 23 huatata charij pani Adelinepi yuyashun. Paica paipaj amiga Candicetaca mana tanto huillashca pushtucunapi huillanaman ringapajmi invitarca. Pani Adelineca: “Gentecunaman cushilla predicanatami munarcanchij. Jehová Diosta tucui shunguhuan sirvishpa catingapajca animotami minishtircanchij” ninmi. ¿Ishquindij predicashcamantaca ima shinataj sintirircacuna? Adelineca: “Huillashca qꞌuipaca predicangapaj Jehová ima shina ayudashcata, gentecunaman huillashpa cushilla sintirishcatami parlanacurcanchij. Chashnami alli rijsinacurcanchij” ninmi. w19.11 pág. 5 párrs. 10, 11

Ñaupa tiempopica macanacuj soldadocunaca escudo illaj tigrajpica pingaipimi churajcuna carca. Roma llajtamanta Tácito shuti runaca soldadocunamanta escribishpaca: “Escudota saquishpa shamunaca jatun pingaimi can” nircami. Chaimantami soldadocunaca paicunapaj escudocunataca charirajcuna carca. Ñucanchijca sinchi feta charingapajca tandanacuicunamanmi rina canchij. Gentecunamanpishmi Diospaj shutimanta, paipaj gobiernomanta huillana canchij (Hebreos 10:23-25). Shinallataj punllantami Bibliata liyina canchij. Pai yachachishcacunata pajtachingapajpish Dios ayudachunmi cutin cutin mañana canchij (2 Timoteo 3:16, 17). Caicunata rurajpica Diabloca mana pandachi tucungachu (Isaías 54:17). Ashtahuancarin sinchi feta charishcamantami huauqui panicunahuan tandalla Diosta sirvishun. Shamuj punllacunapicarin Diablota, millai gentecunata Jesús mishajtami ricushun (Apocalipsis 17:14; 20:10). w19.11 pág. 19 párrs. 18, 19

Imata ruragrishcata shuj listapi anotashpaca allimi pajtachishun (1 Corintios 14:40). Caipi yuyashun. Ancianocuna tandanacujpica shuj ancianomi imata decidishcata anotan. Decidishcataca maijan pajtachinata, ima hora pajtachinatami anotan. Chashnami ancianocunaca imata ruragrishcata alli pajtachingacuna. Ñucanchijpish chashnallatajmi rurai tucunchij. Por ejemplo, shuj punllapaj imata ruragrishcataca shuj listapimi anotai tucunchij. Chashnami imata decidishcataca rato pajtachishun. Shinallataj ima decidishcata pajtachishpami catina canchij (Romanos 12:11). Apóstol Pabloca Timoteotaca alli yachachij cashpapish chaita ruranataca ama saquinguichu nishpami consejarca. Pablo nishca shinaca ñucanchijpish Diospaj imata ruracushpaca pajtachishpami catina canchij (1 Timoteo 4:13, 16). w19.11 pág. 29, 30 párrs. 15, 16

Jehová Diosca Moisestaca israelitacunata Egiptomanta llujchichunmi mandarca. Pero paica manchaita charishcamantami cutin cutin chaitaca mana pajtachi tucunichu nirca. Chaimi Diosca paita llaquishpa ayudarca (Éxodo 4:10-16). Yaya Dios ayudajpimi Moisesca Faraonmanca Egipto llajtata Dios llaquichigrishcata huillarca. Qꞌuipaca Jehová Diosca diez llaquicunatami Egipto llajtaman cacharca. Shinallataj Faraontapish, paipaj soldadocunatapish puca cucha yacupimi tucuchirca. Chashnami Moisesca Dioslla tucui poderta charishcata ricurca (Éxodo 14:26-31; Salmo 136:15). Israelitacunata Moisés Egiptomanta llujchishca qꞌuipaca paicunaca achcatami quejarircacuna. Chashnapish israelitacunataca Jehová Dios pacienciahuan ayudashcatami Moisesca ricurca (Salmo 78:40-43). Moisesca israelitacunata ama llaquichichun nishpami Jehová Diosta mañarca. Moisesta uyashpaca Diosca humilde cashcatami ricuchirca (Éxodo 32:9-14). Egiptomanta llujshishca huashaca Moisesca Jehová Diosta ricucuj shinami paihuanca alli amigo tucurca (Hebreos 11:27). w19.12 págs. 17, 19 párrs. 7-9

Jesusta catijcunaca ashtahuantajca Galileamantami carca. Cai tucui discipulocunata tandachingapajca mana Jerusalenpi shuj huasillachu minishtirirca. Ashtahuanpish Galileapi saquirij shuj urcuman rinami minishtirirca. Shinallataj causarishca huashaca Jesusca Jerusalenpi tiyaj shuj huasipimi paipaj once apostolcunahuan ña tandanacushca carca. Once apostolcunalla predicachun, paita catijcunata rurachun mandasha nishpaca Jerusalén llajtallapitajmi chaitaca mandanman carca. Ashtahuanpish Jesusca once apostolcunata, paita catijcunata, huaquin huarmicunataca Galileapi paihuan tandanacuchunmi mandarca (Lucas 24:33, 36). Jesusca ñuca yachacujcunata ruraichij nishpaca mana ñaupa punllacunapi causajcunallamanchu mandarca. ¿Imamantataj chashna ninchij? Jesusca paita catijcunataca: “Cai shina causai tucuringacamami, tucui punllacuna ñucaca cancunahuan casha” nircami (Mateo 28:19, 20, NWT). Jesús nishcacunaca cunan punllacunapimi muyundij Allpapi pajtaricun. Cada huatami casi 300 mil gentecunaca testigo de Jehová tucuncuna. w20.01 págs. 2, 3 párrs. 1, 5, 6

Shuj joven huauquitami shuj millai ungüi japishcata huillan. 50 yalli huatacunata charij huauquimi trabajo illaj saquirin. Cutin shuj mayorlla panica Diostaca ña mana tanto sirvi tucunichu nishpami yuyan. Cashna shina problemata charishpaca imapaj mana valishca shinami sintirishun. Chaimantachari shujtajcunahuan alli apanacunaca sinchi ricuringa. Diabloca millai cashcamantami ñucanchijtaca imapaj mana valishcata shina tratashca. Paica Evataca Diosta mana cazushpaca alli causaitami charingui nircami. Pero Diabloca allimi yacharca Diosta mana cazushpa huañuna cashcata. Shinallataj Diabloca cai pachatami mandacun. Chaimantami cai pachapi tiyaj mandajcunaca paicunallapi yuyashpa gentecunataca llaquichishcacuna. Ashtahuanpish Jehová Diosca ñucanchij problemacunahuan cajpipish ama llaquilla sintirichunmi ayudan (Romanos 12:3). w20.01 págs. 14, 15 párrs. 1-4

Jeremiasca Anatot llajtamantami carca. Chai llajtapi causaj vecinocuna, huaquin familiacunaca Jeremiastaca yangamanta juchachishpami huañuchisha nircacuna. Jeremiasca 40 huatacuna yallitami chai gentecunapurapi causashcanga (Jeremías 12:6). Chashna gentecunapurapi causashpapish alli amigocunatami charirca. Por ejemplo, Jeremiasca paipaj secretario Barucmanmi ima shina sintirishcata, imallata rurashcata huillarca (Jeremías 8:21; 9:1; 20:14-18; 45:1). Tucuita huillacushpaca paica Baruc-huanmi achca tiempota pasashca canga. Chaimantami ishquindijpura respetanacushpa alli amigocuna tucurca. Barucca Jeremías ima nishcataca tucuitami quillcarca. Chaimantami ñucanchijpish Jeremías ima shina sintirishcata yachashcanchij (Jeremías 20:1, 2; 26:7-11). Jeremiasca achca huatacunatami mana manchashpa Jerusalenpi ima tucunata israelitacunaman huillarca (Jeremías 25:3). Jehová Diosca gentecuna juchacunamanta arrepintirichunmi munarca. Chaimantami Jeremiastaca paipaj advertenciacunata rollopi quillcachun mandarca (Jeremías 36:1-4). Jeremiasca rollota quillcangapajca Baructami ayudachun mañarca. Tucuita quillcangacamaca ishquindijmi sinchiyachij yuyaicunamanta parlanacushpa huaquin quillacunata pasashcacuna canga. w19.11 págs. 2, 3 párrs. 3, 4

Jesushuan mandachun agllashcacunaca shujtajcunata yallimi can nishpaca mana yuyanachu canchij (Mateo 23:8-11). Pushaj huauquicunamanta parlashpaca Bibliapica: “Paicuna crishpa ima shina caticushca shina cancunapish catichij” ninmi. Pero chaica mana nisha ninchu runacunata catina cashcata (Hebreos 13:7). Shinallataj Bibliapica pushaj ancianocunaca ishquiman cuna cashcata japichun ninmi. Pero mana paicunata jahua pachapi causachun agllashcamanta. Ashtahuanpish alli michij, alli trabajaj, alli yachachij cashcamantami paicunata valorana canchij (1 Timoteo 5:17). Agllashcacunata dimastij jatunyachijpica paicunaca mana alli sintiringacunachu. Mana cashpaca jatun tucushcachari sintiringacuna (Romanos 12:3). Chaimanta agllashcacunata ama pandachingapaj esforzarishunchij (Lucas 17:2). w20.01 págs. 28, 29 párr. 8

Apóstol Pabloca chꞌican chꞌican llaquicunatami chꞌimbapurarca. Paica huauqui panicuna llaquicunata charishcata ricushpami sustarirca (2 Corintios 2:4). Shinallataj Diospaj contracunaca Pablotami macarcacuna, carcelpipish churarcacuna. Ashalla cosascunahuan causacushcamantapishmi preocuparirca (Filipenses 4:12, NWT). Pai ricushca barcocunapish quimsa cutinmi yacupi pambarirca. Chaimantami paica barcopi viajacushpaca yallitaj sustarishcanga (2 Corintios 11:23-27). ¿Pabloca tranquilo sintiringapajca imatataj rurarca? Pabloca huauqui panicunapaj problemacunamantami preocuparirca. Pero paica humilde cashcamantami Timoteoman, Titomanca huauqui panicunata cuidachun mingarca. Chaimantami tranquilo sintirirca (Filipenses 2:19, 20; Tito 1:1, 4, 5). w20.02 págs. 22, 23 párrs. 11, 12

Jehová Diosca paitapish cazuchunmi munan. Jehová Dios ñucanchijta rurashcamanta, causaita cushcamanta, yachaj Yaya cashcamantami paita cazuna canchij. Pero tucuimanta yallica paita cꞌuyashcamantami cazuna canchij (1 Juan 5:3). Yayitu Diosca paita cazuchunca mana obliganchu. Ashtahuanpish cada uno imata decidichunmi saquin. Cꞌuyaimanta Diosta cazujpica paica cushillami sintirin. Yaya mamacunaca paicunapaj huahuacuna alli causachunmi munan. Chaimantami paicunamanca caitami rurana cangui, caitaca mana ruranachu cangui nishpa yachachincuna. Huahuacunaca yaya mamata cazushpaca paicunata respetashcata, paicunapi confiashcatami ricuchincuna. Ñucanchijpish alli causasha nishpaca Yayitu Dios mandashcacunatami rijsina, cazuna canchij. Chashnami paita cꞌuyashcata, respetashcata ricuchinchij (Isaías 48:17, 18). Diospaj mandashcacunata mana cazushpaca ñucanchijllatajmi llaquipi urmashun (Gálatas 6:7, 8). w20.02 págs. 9, 10 párrs. 8, 9

Ñucanchij maijan imapi pandarigrijta ricushpaca Abigail shinami mana manchashpa, respetohuan parlana canchij (Salmo 141:5). Cꞌuyaihuan consejashpaca alli amigocuna cashcatami ricuchishun (Proverbios 27:17). Ancianocunaca juchata rurajcunahuanca mana manchashpami parlana can (Gálatas 6:1). Ancianocunaca humildecuna cashcamantami shuj punllaca paicunaman pi consejota cuchun shuyancuna. Caita yuyaipi charishpapish pandarijcunata correginataca mana saquincunachu (2 Timoteo 4:2; Tito 1:9). Piman consejashpaca pacienciahuan, alajata intindichishpami parlancuna. Huauqui panicunata cꞌuyashcamantami chashna ayudancuna (Proverbios 13:24). Pero tucuimanta yallica Jehová Diosta jatunyachinatami munancuna. Chaimantami Diospaj mandashcacunata huauqui panicuna pajtachichun ayudancuna. Congregacionpi problemacuna ama tiyachunpishmi cuidancuna (Hechos 20:28). w20.03 págs. 20, 21 párrs. 8, 9

Jehová Diosca israelitacunata quishpichichunca Moisestami cacharca. ¿Pero ima horataj cacharca? ¿Moisés Egipto llajtapaj tucui yachanacunata yachashca qꞌuipachu paitaca cacharca? (Hechos 7:22-25). Mana. Alli shungu canata, humilde canata yachachishca huashami cacharca (Hechos 7:30, 34-36). Moisesca israelitacunata quishpichingapajca mana manchashpami faraonhuan parlarca. Pero Jehová Diosmi paitaca ayudacurca (Éxodo 9:13-19). Caimanta Yaya Diosca manso shungucunata, allita rurajcunata, paipi confiajcunatami paipaj munaita pajtachichun agllashcata yachanchij. Yaya Diosca paipaj munaita pajtachingapajmi paita sirvijcunataca tucui laya ayudashca. Ñucanchijtapish Dios ayudachunca paita ashtahuan sirvina munaitami charina canchij (Colosenses 1:29). Paita tucui shunguhuan sirvisha nijpica Diosca cushilla predicachun, alli yachachij cachun, shujtajcunata cushichichun, alli trabajadorcuna cachun, shujtajcunapajpish alli amigocuna cachunmi ayudanga. w19.10 págs. 21, 25 párrs. 5, 14

Alli amigocunaca Diosta tucui shunguhuan cazuchunmi ayudan. Chashna amigocunata charingapajca ñucanchijrajmi alli amigocuna cana canchij (Mateo 7:12). Por ejemplo, Bibliapica: ‘Shujtajcunata ayudangapaj tucuita ruraichij. Imata mana charijcunamanpish cuichij’ ninmi (Efesios 4:28). Shujtajcunata ayudashpaca contentomi sintirishun (Hechos 20:35). Llaquicunata charijpica ñucanchij amigocunaca mana saquingachu. Ashtahuanpish tranquilo sintirichunmi ayudangacuna. Por ejemplo, Job runa ima shina sintirishcata parlajpica Eliú runaca allimi uyarca. Ñucanchijpish ima shina sintirishcata amigocunaman huillajpica pacienciahuanmi uyangacuna (Job 32:4). Shinapish paicuna ñucanchijpaj randi ima decisioncunata agllachunca mana shuyanachu canchij. Ashtahuanpish paicuna Bibliahuan ima consejota cujpica cazunami canchij. Chaimi yachaisapa runa shina cashun (Proverbios 15:22). Cutin imata minishticushpaca rey David shina cashunchij. Paica amigocuna ayudasha nijpica mana jatun tucushpami ayudachun saquirca (2 Samuel 17:27-29). Chashna amigocunaca Dios cushca regalo shinami can (Santiago 1:17). w19.04 págs. 11-13 párrs. 12, 14, 15