Septiembre

¿Jehovapaj, Jesuspaj ejemplocunaca mana samarina cashcatachu ricuchin? Mana chashnachu can. Jehová Diosca imata rurashpapish mana nunca shaicunchu. Chaimantami paica ñucanchij laya samarinata mana minishtin. Pero Éxodo 31:17-pica Yaya Diosca jahua pachata, cai pachata rurashca qꞌuipaca ‘imata mana rurashpami samarirca’ ninmi. Cai versopica Jehová Diosca imallata ruranata saquishpa, paipaj rurashcacunata ricushpa cushicushcatami ricuchin. Jesuspish cai Allpapi cashpaca achcatami trabajarca. Shinapish paipaj amigocunahuan micungapaj, samaringapajmi tiempota surcuj carca (Mateo 14:13; Lucas 7:34). Bibliapica Diosta sirvijcunataca ama qꞌuillacuna cashpa trabajajcuna canguichij ninmi (Proverbios 15:19). Diosta sirvijcunaca familiata mantiningapajmi trabajana canchij. Shinallataj predicangapaj, samaringapajmi tiempota surcuna canchij. w19.12 págs. 2, 3 párrs. 2, 4, 5

Demoniocunapaj ruraicunamanta ama parlashunchij. Tucuipimi Jesuspaj ejemplota catina canchij. Jesusca jahua pachapi causashpaca Diablopish demoniocunapish millai cosascunata rurashcatami ricurca. Pero Jesús cai Allpaman shamushpaca, Diablopish, demoniocunapish caitami chaitami rurancuna nishpaca mana parlarcachu. Chaipaj randica Jehová Diosmanta yachachinapimi ocuparirca. Ñucanchijpish Diablopaj ruraicunamanta parlanapaj randica Diosmantami parlana canchij (Salmo 45:1). Diablota, demoniocunata ama manchashunchij. Llaquicunaca mana yuyashcapimi japi tucun. Pero cai tucui llaquicunata charishpaca Diablomantami shamun nishpaca mana yuyanachu canchij. Bibliapica: “Llaquicunaca mana yuyashcapimi japinlla” ninmi (Eclesiastés 9:11, NWT). Jehová Diosca demoniocunata yallimi tucui poderta charin. w19.04 págs. 23, 24 párrs. 13, 14

Shuj huahuatami violashca nishpa ancianocunaman pi huillajpica ¿ancianocunaca autoridadcunamanca huillanachu can? Ari. Maijan llajtacunapi autoridadcuna chashna rurachun mañajpica ancianocunaca cazuncunami. Chai leycunata cazunaca mana juchachu can (Hechos 5:28, 29). Chaimantami, shuj huahuatami violashca nishpa ancianocunaman pi huillajpica paicunaca Betelman cayana can. Betelmanta huauquicunaca imata rurana cashcata, leycunata ima shina pajtachina cashcatami huillangacuna. Shinallataj ancianocunaca violashca huahuacunaman, yaya mamacunaman, ima tucushcata yachajcunamanmi autoridadcunaman denunciai tucushcata huillana can. Shuj huauqui o panica “shuj huahuatami violarca” nishpa shujtaj huauquita o panitachari denuncianga. Chaitaca tal vez achca gentecunami yachai chayangacuna. Chashna tucujpica ¿denunciajca “Diospaj shutitami pingaipi churashcani” nishpachu yuyana can? Mana. Ashtahuanpish maijanmi huahuata violarca, chaimi Diospaj shutitaca pingaipi churan. w19.05 págs. 10, 11 párrs. 13, 14

Bibliapica cusa huarmi paicuna ari ninacushcata pajtachichun, paicunapura respetanacuchunmi yachachin. Shinallataj cazarashcacunaca imamantapish mana chꞌicanyarina cashcatami yachachin. Bibliapica: “Cꞌarica, paipaj yayata mamata saquishpa paipaj huarmihuan tandanacushpa ishquindijmanta shuj aichallami tucunga” ninmi (Génesis 2:24). Cai mundopaj yachachishcacunata catijcunaca, cusa huarmica cada unomi paicuna munashcata rurana can nincunami. Divorciarinamanta parlaj libropica: “Huaquincuna cazaracushpaca ‘huañungacamami ishquindij causashun’ ninapaj randica ‘cꞌuyai tucuringacamallami ishquindij causashun’ nincunami” ninmi. Chashna yuyashcamantami achca cusa huarmicunaca separarishcacuna. Chaimantami llaquilla causancuna. Caipi ricushca shinaca cai mundopaj yachachishcacunaca imapaj mana valinchu. w19.05 pág. 24 párr. 12

Diabloca panda yachachishcacunahuanmi huaquin huauqui panicunataca pandachishca carca. Chaimi Pabloca preocuparirca (Efesios 4:17-19). Diabloca cai Allpata mandacushcamantami ñucanchijtapish rato pandachi tucun. Paica Diosmanta caruyachingapajca huaquin trampacunatami churan. Por ejemplo, shujtajcunapaj ñaupajpichari alli ricurisha ninchij. O famosochari tucusha ninchij. Shinallataj ima shina huiñashcata, pihuan apanacuj cashcatapish Diabloca allimi yachan. Chaita yuyaipi charishpami Diabloca rato pandachi tucun. ¿“Jarcacuj pirca” shina mana alli yuyaicunataca anchuchi tucunchijchu? Ari (2 Corintios 10:4). Pabloca: “Diosmanta ama yachachun nishpa jatun tucushpa jarcaj yuyaicunataca chingachinchij. Cristota cazungapajmi ñucanchij tucui yuyaicunataca paiman curinchij” nircami (2 Corintios 10:5). Mana alli yuyaicunataca Yayitu Diospaj ayudahuanmi mishai tucunchij. w19.06 págs. 8, 9 párrs. 1-3

Ana, David, Salmista runapish Diostami mashcarcacuna. Paicunaca siempremi Diosta mañajcuna carca. Ima shina sintirishcatapish paimanmi huillajcuna carca. Diosta adorana huasiman rinatapish manataj saquircacunachu (1 Samuel 1:9, 10; Salmo 55:22; 73:17; 122:1). Cꞌuyaj Yaya Diosca paicuna mañashcacunatami cutichirca. Chaimantami Anaca tranquila sintirirca (1 Samuel 1:18). Davidpish salmota escribishpaca: “Cashcata rurajcunapajca achca llaquicunami tiyan. Ashtahuanpish chai llaquicunamantaca Mandaj Diosmi quishpichin” nircami (Salmo 34:19). Salmista runapish Jehová Dios paita tucuipi cꞌuyaihuan ayudashcatami cuenta japirca. (Salmo 73:23, 24). Maipica achca llaquicunahuan cashpaca ñucanchijpish paicuna shinami sintirishun. Pero Yaya Dios paita sirvijcunata ima shina ayudashcatami yuyarina canchij. Shinallataj siempremi Diosta mañana, paipaj mandashcacunatapish cazuna canchij. Chashnami cushilla causashun (Salmo 143:1, 4-8). w19.06 pág. 18 párrs. 14, 15

Testigocuna cashcamanta shujtaj gentecuna rimajpipish mana manchanachu canchij (Miqueas 4:5). Gentecunata ama manchangapajca apostolcunapaj ejemplotami catina canchij. Panda yachachijcunaca paicunataca achcatami pꞌiñajcuna carca (Hechos 5:17, 18, 27, 28). Chashnapish Jesús huañushca qꞌuipaca apostolcunaca Diospaj huasiman rinataca manataj saquircacunachu. Shinallataj Diosmanta huillashpami Jesusta catijcuna cashcataca tucui gentecunaman ricuchircacuna (Hechos 5:42). Ñucanchijpish escuelapi, colegiopi, trabajopimi testigo de Jehovacuna cashcata huillana canchij. Chashnami mana manchaj cashcata ricuchishun (Hechos 4:29; Romanos 1:16). Apostolcunaca Diospaj munaita pajtachijpi shujtajcuna pꞌiñashcataca allimi yacharcacuna. Chaimantami llaquilla sintirinapaj randica cushilla sintirircacuna (Lucas 6:23; Hechos 5:41; 1 Pedro 2:19-21). Ñucanchijcuna allita rurangapaj esforzarijpi shujtajcuna pꞌiñanataca allimi yachanchij. Pero paicuna pꞌiñajpipish Jehová Diosta sirvinataca manataj saquinachu canchij. w19.07 pág. 7 párrs. 19, 20

Jesuspish apostolcunapish Moisesman cushca leyta cazushcamantami sábado punllapica samarijcuna carca. Paica sábado punllapica allita rurashpami shujtajcunata ayudarca (Mateo 12:9-11). Shinallataj Jesusca sábado punllapimi Diosta adoraj carca. Por ejemplo, Jesuspaj familiaca tucuita ruranata saquishpami sábado punllaca Diosmanta yachanaman rijcuna carca. Shinallataj Jesús huiñashpaca Samana punllapi tandanacuna huasiman rishpami Dios Quillcachishcata liyinaman rij carca (Lucas 4:15-19). Jesusta catijcunapish sábado punllapi samaj cashcamantami Jesusta pambangapaj mishquijlla ashnacujcunata ruranata saquircacuna (Lucas 23:55, 56). w19.12 págs. 4, 5 párr. 10

Quimsa huatata charij huahuahuan ima tucushcata ricushun. Cai huahua chingarijpica 500 yalli gentecunami mashcangapaj ayudarcacuna. 20 horasta mashcashca huashami shuj runaca sara chagrapi huahuata japirca. Pero huahuata japishcamanta paillata agradicichunca mana munarcachu. Chaipaj randica paica, “tucuicuna shuj shinalla trabajashcamantami huahuata japircanchij” nircami. Chai huahuata mashcaj shinami ñucanchijpish shuj shinalla muyundij Allpapi alli shungu gentecunata mashcacunchij. Achca gentecunami chai huahua shinallataj chingarishca shina llaquilla causancuna. Chaimantami paicunaca ayudachun minishtincuna. 8 millón yalli Testigocunami chashna gentecunata mashcacunchij. Ñucanchij causan lugarpica Bibliamanta yachasha nijcunahuanca manachari parlai tucushun. Pero shuj huauqui o pani shujtajcunata Diosta rijsichun ayudajpica ñucanchijpish cushillami sintirinchij. w19.07 págs. 16, 17 párrs. 9, 10

Apóstol Pabloca carrerapi callpacuj shina ñaupajman catichunmi animarca. Filipos llajtapi causaj huauqui panicunaca callari punllacunamantami huaquin jarcaicunata chꞌimbapurarcacuna. Huata 50-pi Pablo, Silas, Filipos llajtaman chayajpimi cai sinchi jarcaicunaca callarirca (Hechos 16:9). Chai llajtapi Pablo, Silas huillacujpimi Lidia huarmica Diosmanta yachai callarirca. Diosmi alli huillaicuna paipaj shunguman yaicuchun ayudarca (Hechos 16:14). Asha punllacuna huashallami Lidia huarmipish paipaj huasi ucu familiapish bautizarirca. Pero Diabloca caita ricushpami achcata pꞌiñarirca. Chaimantami chai llajtapi causaj huaquin cꞌaricunaca: “Gentecunatami pandachicun” nishpa Pablota, Silasta sirijta aisashpa mandajcunapaj ñaupajman aparcacuna. Chaimi paicunataca macashpa carcelpi churarcacuna. Filipos llajtamantapish richij nircacunami (Hechos 16:16-40). Chaita rurajpipish Pablo, Silasca Diosta sirvinataca manataj saquircacunachu. Paicunapaj alli ejemplota ricushpami Filipos llajtapi caj mushuj congregacionca Diosta sirvishpa catircacuna. w19.08 págs. 2, 3 párrs. 1, 2

Yaya Diosta, huauqui panicunatapish cꞌuyashpami allita ruracunchij. Jesuspish paita catijcunamanca predicachun, yachachichunmi mandarca. Caicunata pajtachishpaca ‘alli granota’ pꞌucuj shinami cashun. (Mateo 28:18-20). Diosta sirvijcunaca cai pachapi achijyachijcuna shinami cana canchij. Chaipajca jarcaicuna ricurijpipish Diospaj Shimitami huillana canchij. Apóstol Pabloca chaitami rurarca. Paica Filipos llajtaman cachangapaj cartata quillcacushpaca Roma llajtapimi carcelpi carca. Pero carcelpi cashpapish paita visitajcunaman, paita cuidajcunamanmi Diosmanta cushilla huillaj carca. Paipaj alli ejemplomi huauqui panicuna Diospaj Shimita mana manchashpa huillachun animarca (Filipenses 1:12-14; 4:22). w19.08 págs. 12, 13 párrs. 15, 16

Diosta cushichinami tucuimanta yalli valishca can. Cai punllapaj versopi Apóstol Pedro quishcashca shinaca humildes cashpallami Jehová Diosta cushichishun (Proverbios 23:15). “Ven, sé mi seguidor” nishca libropi capítulo 3, párrafo 23-pica: “Jatun tucushpaca shuj venenota ubyacuj shinami llaquipi urmashun. Jatun tucushcacunaca imata alli rurashpapish Diospaj ñaupajpica mana imapaj sirvincunachu. Pero humildecunaca imata mana alli rurai tucushpapish Diospaj ñaupajpica valishcami can. Ñucanchijpish tucuipi humildes cajpica Diosmi bendicianga” ninmi. Humildes cajpica shujtaj gentecunaca ñucanchijhuan tandanacunatami munangacuna. Caita alli intindingapajca caipi yuyashun. ¿Ima shina gentecunahuantaj tandanacunata munanchij? (Mateo 7:12). w19.09 pág. 4 párrs. 8, 9

Ancianocunaca huauqui panicunata ayudangapajmi achcata trabajancuna. Autoridadta charishpapish mana jatun tucushpami tucuicunaman cꞌuyaita ricuchincuna (1 Tesalonicenses 2:7, 8). Shinallataj sumaj shimicunahuan parlashpami humilde cashcata ricuchincuna. Andrew shuti huauquica achca huatacunatami anciano can. Paica: “Huauqui panicunaca ancianocuna cꞌuyaihuan, alli tratajpica cushillami sintirincuna. Chashna cꞌuyaita ricuchijpica ancianocunataca jahuallami cazuncuna” ninmi. Tony shuti huauquipish achca huatacunatami anciano can. Paica: “Ñucaca Filipenses 2:3-pi ima nishcata cazushpami shujtajcunata yalli cashcata ama yuyangapaj esforzarini. Chaimantami shujtajcuna ñucata cazuchunca mana obligani” ninmi. Jehová Diosca tucuita mandaj cashpapish cumurij shinami humildecunataca ñutu allpamanta jatarichin (Salmo 18:35; 113:6, 7). Pero jatun tucushcacunataca manataj ricunachinchu. Chaimantami ancianocunaca Jehová Dios shina humildes cana can. w19.09 págs. 16, 17 párrs. 11, 12

Jesuspaj yugota aparishpa samarishca shina sintiringapajca Jehová Dioslla amo cashcata, ñucanchijca paita sirvijcunalla cashcatami yuyaipi charina canchij (Lucas 17:10). Chashnallatajmi Dios mingashcata ñucanchij munashca shina rurashpaca llaquipi urmashpa shaicurishun. Chaimantami Yaya Dios mingashca trabajotaca pai munashca shina rurana canchij. Dios munashca shina rurashpaca mana rurai tucushcataca allimi rurashun. Yuyarishunchij, Diospaj munai pajtarichunca mana pi jarcai tucunchu (Romanos 8:31; 1 Juan 4:4). Diosta jatunyachingapajmi paitaca sirvina canchij. Huaquincunaca Jesuspaj punllacunapica paicunallapi yuyashpami Diosta sirvijcuna carca. Chaimantami Jesuspaj yugota aparinata saquircacuna (Juan 6:25-27, 51, 60, 66; Filipenses 3:18, 19). Pero shujtajcunaca Yaya Diostapish gentecunatapish cꞌuyashcamantami Diosta sirvircacuna. Paicunaca cieloman rinata yachashpapish Jesuspaj yugota aparishpami Diosta cushilla sirvircacuna. Ñucanchijpish Jehová Diosta cꞌuyaimanta sirvishpaca Jesuspaj yugotami cushilla aparishun. w19.09 págs. 20, 24, 25 párrs. 1, 19, 20

Panda yachachishcacunamanta cacharichishca cashcamantami alli sintirinchij. Ñucanchijta Jesús cacharichishcamantami achcata cushicunchij. Shamuj punllacunapicarin ashtahuanmi cacharichishca cashun. ¿Imamantataj chashna ninchij? Jesusca ñallami tucui panda religioncunata, gobiernocunatapish tucuchinga. Chaipimi Yaya Diosca paita sirvijcunataca cuidanga. Chai qꞌuipami paita sirvijcunamanca paraíso Allpapi achca bendicioncunata cunga (Apocalipsis 7:9, 14). Shinallataj Yaya Diosca achca gentecunatami causachinga. Chai causarishcacunaca Adanpaj juchamantami cacharichishca cangacuna (Hechos 24:15). Israelitacunapaj punllacunapica cacharirina huataca cushicuimi carca. Chashnallatajmi Jesuspish paihuan mandagrijcunapish mil huatacunata mandacushpaca Diosta sirvijcunataca alli saludta charichun, Diospaj huahuacuna tucuchunpish ayudangacuna. Diosta tucuipi cazujcunapish juchamantami cacharichishca cangacuna. w19.12 págs. 12, 13 párrs. 14-16

Apostolcuna causashca punllacunapica Diosca José runatami huauqui panicunata cushichichun cacharca (Hechos 4:36, 37). Josetaca apostolcunaca Bernabé nijcunami carca. Saulo runa Jesuspaj discípulo tucujpica achca huauquicunami: “Cai runaca ñucanchijtami llaquichishca” nishpa paipajman cꞌuchuyanata mancharcacuna. Chaimi Saulo ama llaquilla sintirichun Bernabeca animarca (Hechos 9:21, 26-28). Qꞌuipaca Jerusalenpi tiyaj ancianocunami Antioquía de Siria llajtapi caj huauqui panicuna animota cuchun minishtishcata yachaj chayarcacuna. Chaimantami ancianocunaca Bernabeta cacharca. Bibliapica Bernabeca Diosta sirvishpa catichunmi huauqui panicunata sinchiyachirca ninmi (Hechos 11:22-24). Cunan punllacunapish maijan huauqui panicunami ungushca o desanimado can. Mana cashpaca paicunapaj familiami huañushca can. Paicunata celularpi cayashpa, visitashpa animachunmi Jehová Diosca ñucanchijman yuyaita cun (1 Tesalonicenses 5:14). w19.10 pág. 22 párr. 8

Huauqui panicunahuan tandalla imata rurashpaca maipica paicunapaj pandarishcacunatami ricunchij. ¿Huauqui panicuna pandarijpipish paicunamanta ama caruyangapajca imatataj rurana canchij? Ñucanchij huauqui panicunaca juchayuj cashcamantami imapipish pandarincuna. Pero paicunahuan alli apanacungapajmi esforzarina canchij. Por ejemplo, shuj amigo pandarijpica cꞌuyaihuanmi Bibliahuan consejana canchij (Salmo 141:5). Ñucanchijta pi llaquichijpica perdonanami canchij. Ña perdonashpaca pai ima shina llaquichishcataca mana yuyachinachu canchij. Sinchi punllacunapi causacushcamantami ñucanchij huauqui panicunapica allicunallata ricuna canchij. Chashnami paicunahuanca alli apanacushun. Jatun llaqui punllapicarin alli amigocunatami minishtishun. w19.11 pág. 6 párrs. 13, 16

Yachacujcunamanca Diosta sirvina importante cashcata, Diospaj gobiernotapish apoyana cashcatami yachachina canchij. Shinallataj Jesuspaj discipulocuna tucuchunca Diosman mingarina cashcata, bautizarina cashcatami yachachina canchij. Yachacujcunaca chaita rurashpallami Jehovapaj punlla chayamujpica quishpiringacuna (1 Pedro 3:21). Cai shina causaica ñallami tucuringa. Chaimantami Bibliamanta yachacujcuna paicunapaj causaipi mana cambiocunata rurajpica yachachinata saquina canchij (1 Corintios 9:26). Shujtaj gentecunaca Diospaj gobiernomantami yachanata munancuna. Manaraj jatun llaqui punlla chayamujpimi paicunamanca predicana canchij. w19.10 págs. 11, 12 párrs. 14, 15

Israelitacunaca cada huatami paicunapaj juchacunamanta Diosman ofrendata cungapaj tandanacujcuna carca. Chaita rurashpaca israelitacunaca juchata mana rurana cashcatami yuyarircacuna. Chai punllapica sacerdotecunata mandajca manaraj ofrendata cushpami puntaca inciensota ninapi churana carca. Chaita rurajpimi chai ucuca mishquiman ashnacuj cushnihuan jundaj carca. ¿Caimantaca imatataj yachanchij? Bibliapica Diosta alli sirvijcunapaj mañaicunataca inciensohuanmi chꞌimbapuran (Salmo 141:2; Apocalipsis 5:8). Sacerdotecunata mandajca inciensotaca Diospaj ñaupajmanca respetohuanmi apaj carca. Ñucanchijpish Jehová Diosta mañacushpaca respetohuanmi mañana canchij. Shuj yayaca paipaj churi cꞌuchuyachunmi saquin. Chashnallatajmi Jehová Diospish paita mañajpica paipajman cꞌuchuyachun saquin (Santiago 4:8). Shinallataj paica shuj amigo shinami ñucanchijtaca chasquin (Salmo 25:14). Chaimantami paita tucuipi cazushpaca cushilla sintirinchij. w19.11 págs. 20, 21 párrs. 3-5

¿Ñucanchij causan lado gentecunaca trabajomantaca imatataj yuyancuna? Achca llajtacunapica gentecunaca trabajashpallami causancuna. Chaimantami samaringapaj, familiahuan pasangapaj, Diosmanta yachangapajpish mana tiempota charincuna (Eclesiastés 2:23). Cutin shujtaj gentecunaca mana trabajasha nishpami caita chaita nincuna (Proverbios 26:13, 14). ¿Jehovapish Jesuspish trabajomantaca imatataj yuyancuna? Jehová Diosca trabajanataca achcatami munan. Chaimantami Jesusca: “Ñuca Yayaca, trabajanataca mana saquinchu. Ñucapish trabajanataca mana saquinichu” nirca (Juan 5:17). Caipi yuyashun. Jehová Diosca achca angelcunatami rurarca. Shinallataj jahua pachapi, cai Allpapipish tucui imalla tiyajcunatami sumajta rurarca. Chashnami alli trabajaj cashcata ricuchirca. w19.12 pág. 2 párrs. 1, 2

¿Davidca Dioshuan alli apanacungapajca imatataj rurarca? Dios rurashcacunata ricushpami Davidca paita ashtahuan rijsirca. Pai huambraraj cashpaca paipaj yayapaj ovejacunata michishpami pasaj carca. Davidca Jehová Dios imallata rurashcata ricushpami chaipi yuyaj cashcanga. Por ejemplo, tutapica jahua pachapi achca estrellacunata ricushpaca Dios cꞌuyaj, llaquij, tucuita rurai tucuj cashcatami intindirca (Salmo 19:1, 2). Shinallataj gentecunata Jehová Dios ima shina rurashcata ricushpami pai yachaj cashcata intindirca (Salmo 139:14). Tucui imalla rurashcacunapi yuyarishpaca Davidca Jehová Dios tucuimanta yalli jatun cashcatami ricurca (Salmo 139:6). ¿Caimantaca imatataj yachanchij? Cada punlla imata ruracushpapish plantacunata, animalitocunata, gentecunata Dios ima shina rurashcapi yuyashunchij. Chashnami cada punlla Diostaca ashtahuan rijsishpa cꞌuyashun (Romanos 1:20). w19.12 págs. 19, 20 párrs. 15-17

Moisesca Diosta sirvinatami agllarca. Paica 40 huatacunata charishpaca Faraonpaj ushushipaj churi nishca canatami saquirca. Shinallataj Diosta sirvijcunapaj ladomi tucurca. Israelitacunaca Egipto llajtapimi esclavo shina causacurcacuna. Egipto llajtapica Faraón jatun mandaj cajpimi paitaca shuj diosta shina ricujcuna carca. Chashnapish Moisesca israelitacunapaj lado tucushpami Faraón llaquichinata mana mancharca. Moisesca sinchi feta charishcamantami Jehová Diospi tucui shunguhuan confiarca. Shinami Diospaj alli amigo tucurca (Proverbios 3:5). ¿Moisesmantaca imatataj yachanchij? Moisés shinami tucuicuna Diosta sirvinata agllana canchij. Jehová Diosta sirvingapajca tiempo, fuerzami minishtirin. Huaquinpica Diosta sirvicujta ricushpami gentecunaca jarcasha ningacuna. Pero Jehová Diospi tucui shunguhuan confiajpica paillatajmi ayudanga. w19.12 pág. 17 párrs. 5, 6

Ñucanchijca allpamanta rurashca cashpapish Diospajca valishcami canchij. ¿Imamantataj chashna ninchij? Jehová Diosca ñucanchijtaca paiman rijchajtami rurashca (Génesis 1:27). Chashna rurashcamantami runacunaca cai Allpapi imalla tiyashcacunatapish yalli canchij. Chaimantami Diosca cai Allpata, animalcunatapish cuidachun churashca (Salmo 8:4-8). Adán juchapi urmashca cajpipish gentecunaca Jehová Diospajca valishcami canchij. Yayitu Diosca ñucanchijta achcata cꞌuyashcamantami paipaj Churita ñucanchij juchacunamanta huañuchun curca (1 Juan 4:9, 10). Jesús huañushcamantami cashcata rurajcunatapish mana cashcata rurajcunatapish Yayitu Diosca causachinga (Hechos 24:15). Bibliapica ungushcacunapish pobrellacunapish mayorllacunapish Diospajca valishca cashcatami ricuchin (Hechos 10:34, 35). w20.01 pág. 15 párrs. 5, 6

Diosta sirvijcunaca agllashca canataca mana paicunapaj familiamantachu chasquincuna. Ashtahuanpish Diosmantami chasquincuna (1 Tesalonicenses 2:12). Paicunamanca llaquichij shimicunahuanca mana parlanachu canchij. Por ejemplo, agllashcapaj huarmitaca canca cusa illaj cashpaca paraíso Allpapica ¿ima shinashi causangui? nishpaca mana tapunachu canchij. Ima shina cashpapish Jehová Diosca paraíso Allpapi tucuicuna cushilla causachunmi ayudanga (Salmo 145:16). Bibliapica jahua pachaman ringapaj agllashcacuna mana allita rurashpaca Diosmantami caruyai tucun ninmi (Mateo 25:10-12; 2 Pedro 2:20, 21). Chaimantami runacunataca manataj catina canchij. Agllashcacuna rijsishca cajpipish, achca huatacunata Diosta sirvicujpipish paicunataca manataj jatunyachinachu canchij (Judas 16). Chashnami agllashcacuna Yayitu Diosta sirvinata saquijpipish, congregacionmanta caruyajpipish ñucanchijca Diosta sirvinataca manataj saquishun. w20.01 pág. 29 párrs. 9, 10

Jehovapaj huahuacuna cashcamantami pai laya cꞌuyaj, llaquij, perdonaj cana canchij. Allita rurajta ricushpami gentecunaca Diosta rijsisha ningacuna (1 Pedro 2:12). Diosta sirvij yaya mamacunaca Jehová cuidashca shinallatajmi huahuacunataca cuidana can. Chashna rurajpimi huahuacunaca Diosta sirvisha ningacuna. Ñucanchijca Yayitu Diosta cꞌuyashcamantami shujtajcunaman paimanta yachachinchij. Rey David shinami ñucanchijca “Jehová Diosmantaca cushicuihuan huillasha” ninchij (Salmo 34:2, NWT). Maijancunaca manchaimantami Diosmantaca mana parlasha nincuna. ¿Ama manchaita charingapajca imatataj yuyarina canchij? Predicashpa Yaya Diosta cushichinata, gentecunapish Diosmanta yachanata minishtishcatami yuyarina canchij. Apostolcuna causashca punllacunapi ayudashca shinallatajmi ñucanchijtapish Jehová Diosca paita sirvichun ayudanga (1 Tesalonicenses 2:2). w20.02 págs. 11, 13 párrs. 12, 13

Bibliamanta yachashpami achcacunaca bautizarishca. Pero huaquincunaca Jesusta catinataca manaraj decidishcacunachu. Paicunaca yachanallatami munancuna. Shinapish bautizarinataca mana munancunachu. Ñucanchijcunaca Bibliamanta yachacujcuna Yaya Diospaj mandashcacunata pajtachichun, Jesusta catichunmi ayudasha ninchij. Jehová Diosca gentecuna paita cꞌuyaimanta sirvichunmi munan. Bibliamanta yachacujcunamanca Jehová Dios, yaya mama illajcunapaj yaya cashcata, viudacunata cuidaj cashcatami yachachina canchij (Salmo 68:5). Bibliamanta yachacujcunaca Yaya Dios cꞌuyaj cashcata yachashpami paitaca cꞌuyaimanta sirvisha ningacuna. Pero yachacujcunamanca Jehová Diosca paicuna huiñai causaita charichun ayudangapaj listo cashcata intindichishunchij. w20.01 págs. 3, 4 párrs. 7, 8

Apóstol Pabloca humilde cashcamantami shujtajcuna cushichichun saquirca. Paipaj amigocuna animashcamanta shujtajcuna riparangami nishpaca mana pingarircachu (Colosenses 4:7-11). Ñucanchijpish humildecuna cashpaca shujtajcuna ayudachunmi saquishun. Chaita rurajpica paicunaca cushicushpami ñucanchijta animanga. Pabloca Roma carcelpi cashpami ñalla huañuna cashcata yacharca. Chai llaquicunata chꞌimbapurangapajmi Timoteotaca: “Ñucata ricunaman utca shamungui. Quillcachishcacunatapish apashpa shamungui” nirca (2 Timoteo 4:6, 7, 9, 13). ¿Imamantataj quillcachishcacunataca apamuchun nirca? Tal vez chai quillcachishcacunapica Ñaupa Testamentomanta huaquin partecunami tiyashcanga. Pabloca Dios Quillcachishcacunata estudiasha nishcamantami chaita apamuchun nirca. Paica Diospaj Shimita liyishpami animarirca (Romanos 15:4). Llaquicunata ima shina chꞌimbapuranatapishmi yacharca (2 Timoteo 3:15, 16). Ñucanchijpish llaquicunahuan cashpaca Pablo shinallatajmi Bibliata estudiana canchij. Chaita rurajpica Jehová Diosca tranquilo sintirichunmi ayudanga. w20.02 págs. 23, 24 párrs. 14, 15

Elifaz, Bildad y Zofarca Jobta ima shina cushichinata yuyanapaj randica ‘Jobca paipaj culpallamantatajmi chashna llaquicunata charin. Chaitami paitaca ricuchishun’ nishpami yuyacurcacuna. Paicunapaj huaquin nishcacuna cierto cashpapish Jobmanta, Jehová Diosmantaca panda yuyaicunatami nircacuna. Shinallataj Jobtapish sinchita rimashpami juchachircacuna (Job 32:1-3). ¿Jehová Diosca ima shinashi sintirirca? Paica cai cꞌaricunahuanca dimastijmi pꞌiñarirca. Chaimantami ‘cancunaca yuyai illajmi canguichij. Jobtami cancunamanta ñucata mañachun rogarina canguichij’ nirca (Job 42:7-9). Elifaz, Bildad, Zofar mana allita rurashcata ricushpami huaquin yuyaicunata yachashcanchij. Puntaca, ñucanchij huauqui panicunata yangamanta juchachishpa mana rimanalla cashcatami yachashcanchij (Mateo 7:2-5). Ashtahuanpish paicunata manaraj imata nishpami alli uyanaraj cashcanchij. Chashnami paicuna ima shina sintirishcataca intindishun (1 Pedro 3:8). Qꞌuipaca, paicunahuan parlacushpaca alli yuyashpa, cꞌuyaihuan parlana cashcatami yachashcanchij (Efesios 4:25). Shinallataj Jehová Diosca shujtajcunahuan ima shina parlashcata ricuracuj cashcatami yachashcanchij. w20.03 págs. 22, 23 párrs. 15, 16

Gentecunaman predicashpaca Yayitu Diostami ashtahuan rijsishun. Por ejemplo, Diosmanta yachana munaita charij gentecunapajman chayashpaca Jehová Dios paicunata llaquishcatami ricunchij (Juan 6:44; Hechos 13:48). Bibliamanta yachacujcunaca paicunapaj ñaupa causaita saquishpami alli causaita charishcacuna. Chashnami Jehová Dios paicunata ayudashcata ricunchij (Colosenses 3:9, 10). Diosca gentecunaman cutin cutin yachachichun cachashpami pacienciata charishcata ricuchin (Romanos 10:13-15, NWT). Pero achca huatacunata Diosta sirvicushpapish paihuan alli apanacunaca valishca cashcatami mana cungana canchij. Chaimantami paita mañanataca manataj saquina canchij. Maijanta alli rijsingapajca paihuanmi cutin cutin parlanacuna canchij. Shinallataj ñucanchij ima shina sintirishcata Diosman cutin cutin parlashpaca paitami ashtahuan rijsishun. w19.12 pág. 19 párrs. 11, 13, 14

Caita yachashpaca ¿manachu cushilla sintirinchij? Shinallataj Jesús jahua pachapi ña mandacushcata yachashpa, Diablopaj ruraicunata ñalla tucuchigrishcata yachashpami tranquilo sintirinchij (Isaías 65:17; 1 Juan 3:8; Apocalipsis 21:3, 4). Ashtahuancarin mana manchashpa predicachun Jesús ayudacushcata yachashpami cushilla sintirinchij (Mateo 28:19, 20). Cushilla sintirishcamanta, esperanzata charishcamanta, manchaita ña mana charishcamantaca sumajtami causanchij ¿nachu? Tranquilo causangapajca Jesuspaj ejemplotami catina canchij. Chaimantami Diostaca punllanta mañana canchij. Pai mandashcatapish tucui shunguhuanmi cazuna canchij. Predicacionpipish ocupadosmi causana canchij. Amigocuna ayudasha nijpipish diosolopagui ninami canchij. Chaita rurajpimi Diospaj sumaj causaica ñucanchij shunguta, yuyaita huaquichinga (Filipenses 4:6, 7). Shinallataj Jesús layami ima llaquicunatapish ahuantashun (Juan 16:33). w19.04 pág. 13 párrs. 16, 17