Octubre

Cunan punllacunapica muyundij Allpapimi Jehovamanta yachachicunchij (Mateo 28:19, 20). Caita rurashpami Diablo llulla cashcata ricuchinchij. Diabloca tucui podertaca mana charinchu. Chaimantami Diosmanta yachachichunca mana jarcai tucun. Diablota, demoniocunataca ama manchashunchijchu. Diosta tucuipi cazujpica demoniocunaca mana llaquichi tucungachu. Jehovami ñucanchijtaca cuidacun. Shinapish tucuicunami demoniocunapaj ruraicunata mishana canchij. Jehová Diospi tucui shunguhuan confiashpaca achca bendicioncunatami chasquishun. Por ejemplo, Diablopaj llullacunataca mana crishunchu. Shinallataj demoniocunata manchashcamanta Diosta sirvinataca mana saquishunchu. Tucuimanta yallica Jehová Diospaj alli amigomi tucushun. Bibliapica: ‘Diablotaca ama ricunachichijchu. Chashna rurajpica paica miticungallami. Diosman cꞌuchuyaichij, paipish cancunapajman cꞌuchuyangami’ ninmi (Santiago 4:7, 8). w19.04 págs. 24, 25 párrs. 15, 18

“Huahuacunaca Mandaj Diosmanta herenciamari”. Chaimanta yaya mamacuna, cancunapaj huahuacunata ama pi llaquichichun cuidaichij. ¿Huahuacunataca ima shinataj cuidana canguichij? Huahuacunata picuna llaquichij cashcata, ima shina llaquichij cashcatami alli yachana canguichij. Shinallataj violajcuna huahuacunata ima shina umaj cashcatami alli yachana canguichij (Proverbios 22:3; 24:3). Casi siempremi huahuacunahuan apanacujcunallataj o rijsishcacunallataj huahuacunata violancuna. Chaimantami huahuacuna pihuan apanacujta o pihuan saquirijta alli ricuna canguichij. Huahuacunahuan alli parlanacunata yachaichij (Deuteronomio 6:6, 7; Santiago 1:19). Huahuacunaca ima tucushcata parlanataca huaquinpica manchancunami. Mana cringachu nishpachari yuyangacuna. O tal vez paita llaquichijca, ñataj huillacunguiman nishpachari huahuata manchachirca. Chaimantami cambaj huahua manchaihuan, llaquilla puricujta ricushpaca cꞌuyaihuan tapuna cangui. Pai imata parlajpica mana pꞌiñarishpami uyana cangui. Huahuacunaman mapa munaicunahuan paicunata pi japisha nijpi imata rurana cashcata yachachichij. w19.05 pág. 13 párrs. 19-22

Jatun tucushca gentecunaca Diablo laya cashcatami ricuchincuna. Chaimantami Jehová Diosca paicunataca manataj ricunayachin. Diabloca jatun tucushcami can. Paica, Jesús Yaya Diosta tucuita rurashpa ayudashcatami yacharca. Caita yachashpapish Diabloca Jesús paita adorachunmi munarca (Mateo 4:8, 9; Colosenses 1:15, 16). Jatun tucushcacunaca tucuita yachashcatami yuyancuna. Pero Diospaj ñaupajpica yuyai illaj shinami ricurincuna (1 Corintios 3:19). Bibliapica ñucanchijllataj cꞌuyarina cashcatami yachachin. Jesusca, ‘ima shinami canllataj cꞌuyaringui, shinallataj shujtajcunatapish cꞌuyangui’ nircami (Mateo 19:19). Pero shujtajcunamanta yalli cashcataca mana yuyanachu canchij. Bibliapica: “Imata rurashpapish mishanacushpa yanga jatun tucunapajllaca ama ruraichijchu. Chaipaj randica, ama jatun tucushpa caishujcunaca canta yalli cashcata yuyashpa, caishuj chaishuj cꞌuyanacuichij” ninmi (Filipenses 2:3; Romanos 12:3). w19.05 págs. 24, 25 párrs. 13, 14

Bibliapi yachachishcacunata intindishpami Diosta sirvinata agllarcanchij. Shinallataj huaquin cambiocunatami rurarcanchij (1 Corintios 6:9-11). Yayitu Diosmi mana alli ruraicunata saquichunca cada unota ayudarca. Chaimantami paitaca achcata agradicinchij. Manaraj bautizarishpaca mana alli ruraicunatami ladoman saquircanchij. Pero, ñami tucuita alli ruracuni nishpaca mana yuyanachu canchij. Ashtahuanpish mana alli ruraicunapi cutin ama urmangapajmi esforzarina canchij. Puntaca, Diablo pandachichunca mana saquinachu canchij. Qꞌuipaca, ñucanchij yuyaicunatami cambiashpa catina canchij. Ñahui ricuillapi cambiana cashcataca mana nisha ninchu. Ashtahuanpish ima shina yuyashcata, imata munashcata cambiana cashcatami nin. w19.06 págs. 9, 10 párrs. 4-6

Yallitaj llaquirishpaca tandanacuicunaman rinataca manataj saquinachu canchij. Chashna rurashpaca Jehová Dios ayudachunmi saquishun. Tandanacuicunapica Diosca paipaj espíritu santohuan, Bibliahuan, paita alli sirvijcunahuanmi animota cushpa ayudan. Shinallataj shujtajcunatami animai tucunchij o paicunapish ñucanchijta animai tucuncuna (Romanos 1:11, 12). Pani Sofiaca: “Ñucataca Yaya Dios, turi ñañacunami ñaupajman catichun ayudan. Ñucapajca tandanacuicunaman rinami ashtahuan importante can. Shinallataj turi ñañacunahuan huillanata mana saquishpaca llaquicunataca jahuallami chꞌimbapurani” ninmi. Llaquilla cashpaca Jehová Dios ñalla tucui llaquicunata tucuchinatami yuyarina canchij. Paica cunan punllacunapish llaquicunata ahuantachunmi ayudashataj nin (Filipenses 2:13). w19.06 pág. 19 párrs. 17, 18

Jesús causarishpaca paipaj catijcunahuanmi shuj tandanacuita rurarca. Chai tandanacuipica achca valishca yuyaicunatami yachachirca. Chai tandanacuipica Jesusca paita catijcunataca: ‘Tucui cai pachata richij, ñuca yachacujcunata ruraichij. Ñuca tucui imalla mandashcacunata paicunapish rurachun yachachichij’ nishpami mandarca. Cunan punllacunapish cai mandashcatami pajtachicunchij (Mateo 28:19, 20). Jesusca cai mandashcataca mana paipaj once apostolcunallatachu nirca. Ashtahuanpish tucui paita catijcuna predicachunmi munan. ¿Imamantataj chashna ninchij? Galilea llajtapi Jesús ñuca yachacujcunata ruraichij nijpica mana once apostolcunallachu carca. Shuj angelca huaquin huarmicunataca Galileapimi Jesustaca ricunguichij nircami (Mateo 28:7). Chashna cashpaca Jesusta catij huarmicunapishmi chaipi cashcanga. w20.01 págs. 2, 3 párrs. 1-4

Cai pachapaj ruraicunapi mana chagrurishcamanta shujtajcuna pꞌiñana cashcatami Jesusca huillarca. Shujtajcuna llaquichijpipish Jehová Diosca mana ayudacunchu nishpaca mana yuyanachu canchij. Chaipaj randica allita ruracushcamanta llaquichicushcatami yuyarina canchij. Contracunaca Diosta sirvijcunata jarcasha nishpapish imata mana rurai tucushcacunachu. Segunda Guerra Mundialpi ima tucushcata yuyarishun. Diosta sirvijcunataca achca llajtacunapimi gobiernocunaca manchanaita llaquichircacuna. Alemania, Australia, Canadá, shujtaj llajtacunapipish Diosmanta huillachunmi jarcasha nircacuna. Shina cajpipish chai tiempopica Diosta catijcunaca ashtahuanmi mirarca. 1939 huatapi guerra callarijpica 72.475 publicadorcunami muyundij Allpapi tiyarca. Pero 1945 huatapi guerra tucurishca huashaca 156.299 publicadorcunami tiyarca. w19.07 pág. 9 párrs. 4, 5

Bibliamantaca manachari shujllamanpish yachachicunchij. Chashnapish shujtajcunata ayudangapajca ¿imatataj rurana canchij? Cunanlla tandanacuicunaman shamujcunatami alli shamushca nishpa chasquina canchij. Shinallataj tandanacuipi alli sintirichunmi ayudana canchij. Paicunaman cꞌuyaita ricuchijpimi Diosta alli sirvijcuna cashcata cuenta japingacuna. Tandanacuicunapi ñucanchijcuna ima shina comentajta ricushpami paicunapish comentanata yachangacuna. Chaimantami ashalla shimicunapi, respetohuan, tucui shunguhuan comentana canchij. Mushuj publicadorcunahuanpish huillanamanmi llujshina canchij. Shinallataj Bibliamanta alli yachachij cachunmi ayudana canchij. Caita rurashpami Jesuspaj ejemplota catichun ayudashun (Lucas 10:25-28). Achca huauqui panicunaca ocupados cashcamantami Bibliamanta yachachingapajca mana tanto tiempota charincuna. Pero chashnapish gentecunaman Bibliamanta yachachingapajmi tiempota surcuncuna. Chaita rurashpami cushilla sintirincuna. w19.07 págs. 17, 18 párrs. 11, 13

Apóstol Pabloca ñaupa ima allicunata, ima mana allicunata rurashcamanta chai yuyaillaca mana causarcachu. Ashtahuanpish “huashaman saquirishcataca cungarishpami” huiñai causaita charingapaj Diosta sirvishpa catirca. Pabloca judiocunapurapi rijsishca, yachaj cashcamantami Diosta sirvinamantaca caruyai tucurca. Pero “tucui chaicunataca yangataj cashcata” shinami ricurca (Filipenses 3:3-8). Shinallataj Jesusta catijcunata catirashpa llaquichishcata yuyarishcamantami Diosmanta caruyai tucurca. Pero cai yuyaicuna paita mishachunca mana saquircachu. Ashtahuanpish Pabloca azutishca, rumicunahuan shitashca, carcelpi churashca, yacupi casi huañushca, yaricaihuan, yacunaihuan, churana illaj cashpapish Diosta sirvinataca manataj saquircachu. Paica chaita rurashpapish ñami tucuita rurarcani nishpaca mana yuyarcachu (2 Corintios 11:23-27). Ñucanchijpish Pablo shinallatajmi Diosta sirvinataca manataj saquina canchij. w19.08 pág. 3 párr. 5

Achca huauqui panicunapish huaquin llajtacunapica huasin huasin, callecunapi Diosmanta huillachunca mana saquincunachu. Chashna jarcajpipish cai huauqui panicunaca ima shina huillanatami ricuncuna (Mateo 10:17-20). Diosmanta huillachun mana saquij shuj llajtapica shuj superintendente huauquica: “Cada publicadorcunami cancunapaj huillana lugarllapitaj predicana canguichij. Por ejemplo, cancunapaj familiacunaman, vecinocunaman, escuelapi, trabajopi, rijsishcacunamanpish huillaichij” nircami. Ishqui huata qꞌuipaca chai llajtapi tiyaj congregacioncunaca achcami mirarirca. ¿Cai ejemplomantaca imatataj yachanchij? Ñucanchij causan llajtapi Diosmanta huillachun saquijpica tucui laya huillangapajmi esforzarina canchij. Jehová Diosmi ima jarcaicunata charijpipish mana manchashpa huillachun fuerzata cushpa ayudanga (Filipenses 2:13). Cunan punllacunapish imacuna ashtahuan importante cashcatami mana cungarina canchij. Shinallataj jucha illaj shina cangapajmi esforzarina canchij. Shujtajcunatapish mana pandachinachu canchij. Alli grano pꞌucuj shinami allita rurana canchij. Caicunata rurashpaca huauqui panicunatami ashtahuan cꞌuyashun. Shinallataj Jehová Diospaj shutitapishmi jatunyachishun. w19.08 pág. 13 párrs. 17, 18

Shujtajcuna consejocunata cujpipish paicuna munashcallata rurajcunahuanca mana tandanacunata munanchijchu. Shinapish llaquij, cꞌuyaj, humilde gentecunahuan cashpaca cushillami sintirinchij ¿nachu? (1 Pedro 3:8). Shujtajcunapish ñucanchijhuan tandanacunata munachunca humildesmi cana canchij. Gentecunaca mana siemprechu cashcata rurancuna. Cai versopi nishca shinaca, imatapish alli yachaj, alli ruraj gentecunataca mana siemprechu jatunyachincuna. Ashtahuanpish ashallata yachaj gentecunatami jatunyachincuna. Chaimantami Salomonca imapish mana pai munashca shina llujshijpi coleranapaj randica, causai chashnataj cashcata intindirca (Eclesiastés 6:9). Salomón shina humildes cashpaca problemacuna ricurijpica causai chashnataj cashcatami intindishun. Chaimantami problemacunata ahuantai tucushun. w19.09 págs. 4, 5 párrs. 9, 10

Yaya mamacuna Diosta cazushpaca shujtajcunatami ayudai tucuncuna. Jehová Diosca yayacunatami familiata pushachun churashca. Shinallataj huahuacunata cuidachun, alli huiñachichunmi mingashca (1 Corintios 11:3). Pero caica mana nisha ninchu yayaca pai munashca shina mandana cashcata. Diosmi familiacunata callarichirca. Chaimantami familiata ima shina cuidashcata yayacunaca Jehová Diospaj ñaupajpi ricuchingacuna (Efesios 3:14, 15, NWT). Yayacunaca Dios munashca shina familiata cuidashpaca Diosta cazushcatami ricuchincuna. Jehová Dios familiata pushachun churajpipish mana maipish cachun mandanachu canguichij. Imapi pandarishcamanta pi consejocunata cujpica allimi chasquina canguichij. Chaita rurajpica huarmi, huahuacunapish respetangacunami. Shinallataj familiahuan Diosta mañacushpaca ima shina sintirishcatami huillana canguichij. Chaimi cancunapaj familiaca Diospaj ayudata minishtishcata yachangacuna. Pero tucuimanta yallica Diosta sirvina yuyaillami causana canguichij (Deuteronomio 6:6-9). Yayacunapaj alli ejemploca familiapajca achca valishcami can. w19.09 págs. 15, 17, 18 párrs. 8, 14; 16

Marcospajca shujtajcunata ayudanami ashtahuan importante carca. Marcosca Pablopish Pedropish Dios mingashcacunata pajtachichunmi ayudarca. Paica mai ratocunaca paicunahuan rishpami maipi saquirinata mashcashpa, micunata randishpa ayudarca (Hechos 13:2-5; 1 Pedro 5:13). Chaimantami Pabloca: ‘Marcosca Dios mingashcata pajtachichun ayudajmi can. Ñucataca achcata cushichijmi can’ nirca (Colosenses 4:11). Marcosca Pablohuanca allimi apanacurca. ¿Imamantataj chashna ninchij? Huata 65-pimi Pabloca Roma carcelpi carca. Chaipi cashpami Timoteopajca shuj cartata escribirca. Chai cartapica Timoteotaca: “Marcosta mashcashpa canhuan pushamungui” nircami (2 Timoteo 4:11). Pabloca Marcos ayudashcata valorashcamantami paita pushanaman cacharca. Marcosca Roma llajtaman chayashpaca chꞌican chꞌican ruraicunapimi Pablotaca ayudarca. Por ejemplo, micunata apashpa, cartacunata quillcachun imalla minishtishcacunata cushpami ayudashcanga. Marcos chashna ayudashcamantami apóstol Pabloca huañuchinata yachashpapish achcata animarishcanga. w20.01 págs. 11, 12 párrs. 12, 13

Jesusca ñucanchijtaca catirashpami llaquichingacuna nishpami huillarca. Chaimantami Jehová Diosta sirvingapajca achcata esforzarina canchij. Pero ima llaquicunatapish chꞌimbapurangapajca Yaya Dios ayudanatami crina canchij. Llaquicunata ahuantashpaca sinchimi tucushun (Santiago 1:2-4). Shinallataj Jehová Dios minishtirishcacunata ñucanchijman cuchun, Jesuspish huauqui panicunapish ñucanchijta animachunmi shuyana canchij (Mateo 6:31-33; Juan 10:14; 1 Tesalonicenses 5:11). Jesusca 12 huatacunata yahuar cacharirishca huarmita jambijpica paica samarishcami sintirirca (Lucas 8:43-48). Pero Jesusta catishcallamantami tucui vida samarishca sintirishcanga. ¿Chai huarmica imatashi rurashcanga? Jesuspaj yugota aparingapajca imacunatami saquina tucushcanga. Chaita rurashca cashpaca cunanca Jesushuanmi jahua pachapi canga. Jesusca: “Ñucapajman shamuichij” nishpami ñucanchijtapish invitashca. Chai invitacionta chasquishcamantami jahua pachapi causagrijcunapish cai Allpapi causagrijcunapish cushilla sintirinchij. w19.09 pág. 25 párrs. 21, 22

Shuj punllaca Davidpaj sirvijcunaca yaricaihuanmi carcacuna. Chaimantami paicunaca: “Achca cullquiyuj Nabalpaj ovejacunatami shitashca pambapi cuidashcanchij. Paiman micunata mañashunchij” nircacuna. Pero Nabal runaca millai cashcamantami ni imata mana cusha nirca. Chaita yachaj chayashpami Davidca achcata pꞌiñarishpa Nabalta, paipaj huasi ucupuracunatapish huañuchisha nirca (1 Samuel 25:3-13, 22). Chaimi Nabalpaj huarmi Abigailca mana manchashpa, Davidhuan tupanaman rirca. Tupashpaca Abigailca paipaj ñaupajpi cungurishpami: “Can paicunata huañuchishpaca paicunapaj yahuarmantaca juchayujmi tucungui. Diospaj maquipi saqui” nishpa respetohuan aconsejarca. Chashna sumajta rimajpimi Davidca Yayitu Dios paita ayudangapaj Abigailta cachashcata cuenta japirca (1 Samuel 25:23-28, 32-34). Abigailca humilde canata, alli yuyaiyuj canatami yachashca carca. Chaimantami Yaya Diosca paitaca Davidta ayudachun cacharca. Cunan punllacunapish Jehová Diosca alli yuyaiyuj panicunahuanmi congregacionta, familiacunata sinchiyachin (Tito 2:3-5). w19.10 pág. 23 párr. 10

Bibliamanta yachacujcunaca Jehová Diosta manaraj rijsishpaca panda religioncunapi participashpachari cullquita cujcuna carca. Chaimantami yachacujcunaca huillanaman manaraj llujshishpaca panda religioncunapaj tucui ruraicunamanta caruyana can. Paicunaca maiman rishca iglesiamanpish shuj cartatami cachai tucun. Chai cartapica cai iglesiamantami llujshini nishpami huillana can. Diosta sirvijcunaca ñucanchij trabajocuna panda religioncunahuan ama chagrurichunmi cuidadota charina canchij (2 Corintios 6:14-17). ¿Imamantataj panda religioncunapaj mana trabajanchij? Panda religioncunaca millai cosascunata rurashcamantami Diospaj ñaupajpica mana alli ricurincuna. Chaimantami ñucanchijca paicunapaj millai ruraicunata mana apoyasha ninchij (Isaías 52:11). w19.10 págs. 12, 13 párrs. 16, 17

Jeremiasca 1 y 2 Reyes librocunatami escribishcanga. Paipaj shutita charij Jeremías librotapishmi escribirca. Escribicushpaca Jeremiasca Jehová Dios juchayujcunata llaquij cashcatami ricurca. Por ejemplo, rey Acab juchacunamanta arrepintirijpica Jehová Diosca can causacujpirajca mana llaquichishachu nishcatami yacharca (1 Reyes 21:27-29). Shinallataj Manasés, Acab runata yalli jatun juchacunata rurashcamanta arrepintirijpica Jehová Dios perdonaj cashcatami Jeremiasca yacharca (2 Reyes 21:16, 17; 2 Crónicas 33:10-13). Caicunata yachashpami paipish Jehová Dios shina llaquij carca. Pacienciatapish ricuchirca. Barucca Dios mingashcata pajtachicushpapish paillapimi yuyai callarirca. Pai chashna yuyai callarijpipish cambiai tucushcatami Jeremiasca crirca. Chaimantami Jeremiasca Jehová Diospaj consejota Barucman cꞌuyaihuan huillarca (Jeremías 45:1-5). w19.11 pág. 6 párrs. 14, 15

Levítico libropi nishca shinaca israelitacunaca Diosta agradicingapajmi ofrendacunata cujcuna carca. Chaita rurashpami paicunaca Diospaj ñaupajpi alli ricurijcuna carca (Levítico 7:11-13, 16-18). Israelitacunaca ofrendacunata cuna cashcallamantaca mana curcacunachu. Ashtahuanpish Diosta cꞌuyashcamantami ofrendacunata cujcuna carca. Ñucanchijpish Diosta tucui shunguhuan cꞌuyashcamantami paita sirvinata agllashcanchij. Jehová Diosca muyundij Allpapi paita tucui shunguhuan sirvijpi, cazujpica cushillami sintirin. Paica ñucanchij sirvishcallataca mana ricunchu. Por ejemplo, mayorlla cashcamantachari Diostaca ña mana tanto sirvi tucunichu nishpa yuyanchij. Pero Jehová Diosca paita cꞌuyashcamanta tucuita rurashcata ricushpami cushicun. w19.11 págs. 22, 23 párrs. 9, 11, 12

Rey Salomonca: “Tarpunapajpish, imata shayachingapajpish, huacanapajpish, asingapajpish, bailangapajpish” shuj punllami chayan nircami (Eclesiastés 3:1-8). Salomón nishca shinaca trabajanapish, samarinapish minishtirishcami can. Jesuspish chaitaca allimi yacharca. Huaquinpica paipish paipaj apostolcunapish mana achcata samari tucushpapish samaringapajmi tiempota surcurca. Shuj punllaca apostolcunaca predicacushcamantami micungapajpish, samaringapajpish tiempota mana charircacuna. Chaimantami Jesusca paicunataca cunan punllapaj versopi nishcata nirca (Marcos 6:30-34). Huaquinpica trabajashca qꞌuipa samarina o shujtaj cosascunata ruranaca allimi can. Ñaupa punllacunapipish Jehová Diosca israelitacunataca sábado punllapi samarichunmi mandarca. Cunanca ñucanchijca israelitacunaman cushca ley ucupica ña mana causacunchijchu. Pero sábado punllapi samarina leymanta yachanaca allimi can. w19.12 pág. 3 párrs. 6, 7

Jehová Diosca can imalla minishtishcacunatami cusha, ñucamantapish yachachishpami ayudasha ninmi (Salmo 31:1-3; Mateo 6:30-33; 24:45). Shinallataj shuj yaya shina ñucanchijta mana cuidajpi ñucanchij llaquilla sintirinataca paica allimi yachan. Chaimantami paipaj nishcacunataca pajtachintaj. Diosca ñucanchijta cuidangapajca tucuitami ruran. Jehová Diosca pai nishcacunata pajtachij cashcamantami ñucanchij cullqui illaj saquirijpipish ayudanga. Apostolcuna causashca punllacunapi Diosta sirvijcunamanta yuyarishun. Jerusalenpi saquirij congregacionta catirashpa llaquichijpica achcacunami shujtaj llajtacunaman rircacuna. “Apostolcunallami mana maiman rircacuna” (Hechos 8:1). Shujtaj llajtaman rijcunaca huasicuna illaj, trabajocuna illajmi saquirishcangacuna. Pero Jehová Diosca paicunataca manataj cungarircachu. Chaimantami cushilla sintirircacuna (Hechos 8:4; Hebreos 13:5, 6; Santiago 1:2, 3). Yayitu Diosca paita alli sirvijcunataca tucuipimi ayudarca. Ñucanchijtapish paicunata shinallatajmi ayudanga (Salmo 37:18, 19). w20.01 págs. 17, 18 párrs. 14, 15

David paipaj yayapaj ovejacunata michicujpimi osopish, leonpish ovejacunata micusha nirca. Chaimantami paica chai animalcunata huañuchirca. Chai animalcunata huañuchishpaca Jehová Dios paita ayudashcatami yachaj chayarca. Shinallataj Jehová Dios ayudajpimi Goliatta mishashcata cuentata curca (1 Samuel 17:37). Rey Saúl Davidta huañuchisha nijpipish Jehová Diosmi miticushpa richun ayudarca (Salmo 18). Davidca jatun tucushca cashpaca ñucallami caicunata rurarcani nishpami yuyanman carca. Pero paica humilde cashcamantami Dios ayudashcata intindirca. ¿Davidmantaca imatataj yachai tucunchij? Ñucanchij mañashcacunata Jehová Dios ima shina cutichijtami ricuna canchij. Humildecuna cashpaca tucuitami rurai tucuni nishpaca mana yuyashunchu. Ashtahuanpish Jehová ayudajllapi imatapish rurai tucushcatami yuyashun. Dios tucuipi ayudajta ricushpaca paihuanmi ashtahuan apanacushun. w19.12 pág. 20 párrs. 18, 19

Ñucanchijca Diospaj valishca cashcatami yachanchij. Chaimantami Yaya Diosca paipajman cꞌuchuyachun ayudashca. Bibliamanta yachashpa ima cambiocunata rurachunpishmi ayudashca (Juan 6:44). Jehová Diospajman cꞌuchuyajpimi paipish ñucanchijpajman cꞌuchuyashca (Santiago 4:8). Paica ñucanchij ima shina cashcata, imata rurai tucushcataca allimi yachan. Chaimantami ñucanchijtaca pacienciahuan yachachin. Shinallataj cꞌuyaimantami corregin. Gentecunaca rey Davidtaca imapaj mana valishcata shinami ricurcacuna. Pero Davidca Jehová Dios cꞌuyaimanta ayudanatami yacharca (2 Samuel 16:5-7). Ñucanchijpish llaquicunahuan cashpaca imapaj mana valinichu nishpami yuyai tucunchij. Pero ama chashna yuyachunmi Jehová Diosca fuerzasta cushpa ayudan (Salmo 18:27-29). Yaya Dios ayudajpica cushillami paita sirvishun (Romanos 8:31). w20.01 pág. 15 párrs. 7, 8

Bibliamanta yachachishpaca Diosta mañashpa callarishunchij. Bibliamanta estudiai callarishca asha semana qꞌuipallami yachashpa callaringapajpish, yachashcata tucuchingapajpish Diosta mañana canchij. Chashnami Bibliamanta yachacujcunaca Jehová Dios paipaj espíritu santota cushpa ayudashcata intindingacuna. Maijan huauqui panicunaca yachacujcunamanca Santiago 1:5-ta liyishpami Diosta mañana cashcata yachachincuna. Chai versopica: “Cancunamanta maijan yachai illaj cashpaca, Diosta mañaichij” ninmi. Chai huashami paicunaca yachacujcunataca: ¿Yaya Dios yachaita cuchunca imatataj rurana canchij? nishpa tapuncuna. Chashna tapujpimi yachacujllataj Yaya Diostami mañana canchij nishpa cutichin. Yachacujcunamanca Jehová Diosta ima shina mañanata yachachishunchij. Bibliamanta yachacujcunamanca: “Jehová Diosca can mañashcatami uyasha nin. Paica can ima shina sintirishcata, can imata yuyashcata ñami tucuita yachan. Piman mana huillai tucushcatapish Diosman huillai” nishpa yachachishunchij (Salmo 139:2-4). w20.01 págs. 2, 3, 5 párrs. 3, 11, 12

Jesushuan mandagrijcunataca Jehová Diosmi ima hora agllanata yachan (Romanos 8:28-30). Jesús causarishca huashami Jehová Diosca jahua pachapi mandagrijcunataca agllai callarirca. Apostolcunapaj punllacunapica Jesusta catijcunaca tucuicunami Dios agllashcacuna carca. Pero apostolcuna huañushca huashaca achcacunami jahua ricuillapi Diosta sirvijcuna shina causarcacuna. Chaimantami Yaya Diosca chai huatacunapica ashalla alli sirvijcunata agllarca. Jesús nishca shinaca cai agllashcacunaca trigo shinami carcacuna. Paicunaca mana alli qꞌuihua chaupipi huiñacuj layami carcacuna (Mateo 13:24-30). Cai tucuri punllacunapipish Jehová Diosca 144 milcunata completangacamami huaquincunataca agllashpa caticun. Jatun llaqui punlla manaraj callarijpi Jehová Dios huaquincunata Jesushuan mandagrichun agllajpica mana mancharinachu canchij (Romanos 9:11). Ñucanchijpish Jesús ima nishcatami yuyarina canchij. Dueñoca achcata trabajajcunamanpish, ashallata trabajajcunamanpish igualtami pagarca. Chaimi achcata trabajajcunaca quejari callarircacuna nircami. Ñucanchijpish chai quejarijcuna shinaca mana casha ninchijchu (Mateo 20:8-15). w20.01 págs. 30, 31 párr. 14

Jehová Diosca paipaj huahuacuna cushilla causachunmi munan. Llaquicunahuan cashpapish cushillami causai tucunchij. Por ejemplo, Jehová Dios ñucanchijta cꞌuyashcata yachashcamanta, paita alli rijsishcamantami cushilla sintirinchij (Jeremías 15:16). Shinallataj shuj shinalla Diosta sirvicushcamanta, paipaj mandashcacunata cazushcamanta, caishuj chaishuj cꞌuyanacushcamantami paipaj pueblo ucupi cushilla sirvicunchij (Salmo 106:4, 5). Jehová Diosca ñallami millai gentecunata tucuchinga. Shinallataj pai mandacujpimi cai Allpaca shuj sumaj paraíso tucunga. Huañushcacunapish paraisopi causarishpami paicunapaj familiacunahuan cushilla causangacuna (Juan 5:28, 29). Shamuj punllacunapi alli causai tiyanata yachashpami cushilla sintirinchij. Ashtahuancarin cai Allpapi causajcunapish jahua pachapi causajcunapish ñallami Yayitu Diostaca shuj shinalla adorangacuna. w20.02 pág. 13 párrs. 15, 16

Shuj jatun juchata rurashpaca mana pacanachu canchij. Ashtahuanpish imata rurashcataca tucuitami Diosman parlana canchij. Chashnami tranquilo sintirishun. Pero Diospaj ñaupajpi cutin alli ricuringapajca mana chaillatachu rurana canchij. Diospaj disciplinatami chasquina canchij. Jehová Diosca profeta Natantami rey David Betsabehuan juchapi urmashcata ricuchingapaj cacharca. Profeta Natán corregijpica Davidca allimi chasquirca. Paica Betsabepaj cusata huañuchishcata, Diospaj ñaupajpipish jatun juchata rurashcatami huillarca. David disciplinata chasquijpimi Diosca perdonarca (2 Samuel 12:10-14). Ñucanchijpish jatun juchata rurashca cashpaca pushaj ancianocunamanmi huillana canchij. Paicunataca Yayitu Diosca ñucanchijta cuidachunmi churashca (Santiago 5:14, 15). Shinallataj ima juchata rurashca jahuaca chaitaca mana rurarcanichu nishpaca mana yuyanachu canchij. Ashtahuanpish Diospaj disciplinata chasquishpaca utcami cambiana canchij. Chashnami tranquilo, cushilla sintirishun. w20.02 págs. 24, 25 párrs. 17, 18

Chunga runacunaca cai Allpapi huiñaita causagrijcunatami ricuchin. Paicunaca, jahua pachapi causagrijcunata Dios agllashcatami intindincuna. Chai agllashcacunaca Judá llajtapi causaj runatami ricuchin. Chaimantami agllashcacunahuan tandalla Diosta sirvicuncuna. Cancunahuanmi risha ninchij nishpaca Judá llajtapi causaj runaca mana shujlla cashcatachu ricuchin. Ashtahuanpish muyundij Allpamanta Dios agllashcacunatami ricuchin. Jesushuan mandanaman rigrij agllashcacunapaj shuticunataca mana tucuita yachanchijchu. Shinapish cai Allpapi causagrijcunaca paicunahuanmi ri tucuncuna. ¿Caica imatataj ricuchin? Cai punllapaj versomi caita ashtahuan intindichun ayudan. Paraíso Allpapi causagrijcunapish, jahua pachapi causangapaj agllashcacunapish Yayitu Diosta tandalla sirvicushcatami ricuchin. Shinallataj cai Allpapi causagrijcunaca jahua pachaman rigrijcunataca mana mandajcunata shinachu ricuncuna. Ashtahuanpish Jesuslla mandaj cashcatami intindincuna (Mateo 23:10, NWT). w20.01 págs. 26, 27 párrs. 1, 2

Jesusca ñuca cancunata cꞌuyashca shina cꞌuyajpimi ñucata alli catijcuna cashcata rijsingacuna nircami. Jesús nishcacunaca apostolcuna causacun punllapimi pajtarirca. Shinallataj cunan punllacunapishmi pajtaricun. Chaimantami huaquinpi sinchi cajpipish cꞌuyanacushpa catina canchij. Huaquin huauqui panicunaca cꞌuyaita ricuchinata mana saquishcachu. ¿Paicunamantaca imatataj yachai tucunchij? Juchayujcuna cashcamantami shujtajcunataca shungumanta cꞌuyanaca sinchi can. Shina cajpipish Jesús shina cangapajmi esforzarina canchij. Jesusca shuj huauqui o pani cancunahuan pꞌiñarishca cajpica paicunahuanmi cutin alli tucuna canguichij nircami (Mateo 5:23, 24). Shinallataj Jehová Diosta cushichingapajca tucuicunahuanmi alli apanacuna canguichij nishpami yachachirca. Yayitu Diosca huauqui panicunahuan alli apanacungapaj esforzarijpica cushillami sintirin. Shujtajcunahuan pꞌiñarishca cajpi, paicunahuan alli apanacungapaj mana tucuita rurajpica Jehová Diosca paita sirvishcataca mana valichingachu (1 Juan 4:20). w20.03 págs. 24, 25 párrs. 1-4

Diabloca llullapaj yayami can. Gentecunataca callari punllamantami llullacunata nishpa pandachishca (Juan 8:44). Paica, gentecuna huañujpica almaca causashpami catin ninmi. Cai llullata crishpami gentecunaca panda costumbrecunata rurancuna. Ñucanchijpajca huañuica shuj enemigo shinami can (1 Corintios 15:26). Diosca gentecunataca para siempre causachunmi rurarca. Chaimantami mana huañunata munanchij (Eclesiastés 3:11, NWT). Chaita yachashpami Diabloca achca llullacunata nishpa gentecunata pandachicun. Gentecuna huañushca qꞌuipa ima tucunamanta Diablo achca llullacunata nijpipish mana tucuicunachu crishca. Achca gentecunaca Bibliapimi huañushca qꞌuipa ima tucunamanta, huañushcacuna causarinamantapish yachacuncuna (Eclesiastés 9:5, 10; Hechos 24:15). Caita yachashpami tranquilo sintirinchij. w19.04 págs. 14, 15 párrs. 1, 5, 6

Jehová Diosca paita alli sirvijcunatami tucui vida cꞌuyashca. Cꞌuyanataca manataj saquingachu. Shinallataj paica tucuitami alli ruran (Salmo 33:5). Diosca paita sirvijcuna llaquilla cajta ricushpaca achcatami llaquirin. Paica ñallami tucui mana allicunata tucuchinga. Chaitaca tucui shunguhuanmi crinchij. Diosca cꞌuyaj, allita ruraj cashcamantami israelitacunamanca leycunata curca (Deuteronomio 10:18). Moisesman cushca leycunaca Yaya Dios paita sirvijcunamanta preocuparishcatami ricuchin. Jesusta catijcunaca huata 33-camallami Moisesman cushca leycunata cazurcacuna. Pero cꞌuyaita ricuchishpa, allita rurashpami causana carca. Chaimantami Jesusca shuj mushuj mandashcata paicunamanca curca. Diosta sirvijcunaca Jesuspaj mandashcatami pajtachina canchij. Jesusca paita catijcunataca ‘caitami, chaitami rurana canguichij’ nishpaca mana tucuita quillcashpa saquircachu. Ashtahuanpish alaja consejocunata cushpami ima shina causanata yachachirca. Jesús yachachishcacunatami ‘Cristopaj mandashca’ ninchij. w19.05 págs. 2, 3 párrs. 1-3

Caita yuyashun. Shuj huahua urmashpa sanpicuna chugririshpaca paipaj yaya o mama ayudachunmi huacaihuan mashcan. Chugririshcata mana chai rato anchuchi tucushpapish cꞌuyaihuanmi yaya mamaca huahuata inquitan. Paicunaca, huahuata marcashpami, ¿imataj tucurcangui? nishpa huiquita pꞌichancuna. Huahuapaj chugritapishmi jambincuna. Yaya mama chashna rurajpimi huahuaca huacanata saquishpa cutin pugllanaman rin. Punllacuna pasajpicarin huahuapaj sanpicunaca cutinmi alliyanga. Cai ejemplota ricushpami tucuicuna ñucanchijta cushichichun, shujtajcunata cushichingapaj rurashca cashcata intindinchij. Shinapish huaquin huahuacunaca jatun llaquicunatami charishcacuna. Paicunataca shuj cutin o achca cutinmi millai gentecunaca violashcacuna. Huahuata violajta autoridadcuna carcelpi churashca cajpipish huahuaca achca huatacunatami dimastij llaquilla sintiringa. w19.05 pág. 14 párrs. 1, 2