Marzo

Jehová Diosta sirvicushcamanta gentecuna pꞌiñachunca mana munanchijchu. Pero ¿imamantataj gentecuna pꞌiñajpipish cushilla cai tucunchij? Puntapica gentecuna pꞌiñajpipish ahuantashpaca Diospaj ñaupajpimi alli ricurishun (1 Pedro 4:13, 14). Ishquipica ahuantashpaca ñucanchij fetami sinchiyachishun (1 Pedro 1:7). Quimsapica tucui llaquicunata ahuantashpaca huiñai causaitami chasquishun (Romanos 2:6, 7). Jesús causarishca qꞌuipaca apostolcunaca contracuna paicunata macajpipish, huillachun jarcajpipish paicunaca cushillami huillashpa catircacuna. Paicunaca Diosta sirvicushcamanta llaquicunata apacushpami cushilla sintirircacuna (Hechos 5:40-42). Shinallataj Jesusta cꞌuyashcamantami contracunataca mana mancharcacuna. Cunan punllacunapish huauqui panicunaca llaquicunata charishpapish huillanataca manataj saquincunachu. Jehová Diosta sirvingapaj esforzarishcataca paica manataj cungaringachu. w21.03 págs. 24, 25 párrs. 18, 19

Jahua pachaman rigrijcunaca mana chai esperanzahuan huacharincunachu. Paicunataca Jehová Diosmi jahua pachaman rina munaita charichun agllan. Paicunaca paicuna imata shuyacushcata chasquingapajmi Yayitu Diosta mañancuna. Jahua pachapi espíritu cuerpota charina ima shina canata mana yachashpapish jahua pachapi causanatami tucui shunguhuan munancuna (Filipenses 3:20, 21; 1 Juan 3:2). Shujtaj ovejacunaca cai Allpapi huiñaita cushilla causanatami shuyacuncuna. Chashna causanataca tucui gentecunami munancuna. Shujtaj ovejacunaca cai Allpa shuj paraíso tucuchun ayudanatami munancuna. Shinallataj paicunapaj propio huasicunata shayachinata, alaja jardincunata, huertacunata ruranatami shuyacuncuna. Paicunapaj familiacunahuanpish alli saludta charishpa cushilla causanatami shuyacuncuna (Isaías 65:21-23). Paicunaca muyundij Allpata, alaja urcucunata, sachacunata, yacucunata, Jehová Dios tucui rurashcacunata rijsinatami shuyacuncuna. Ashtahuancarin paraíso Allpapi cada punlla Jehová Diospajman ashtahuan cꞌuchuyanatami cushilla shuyacuncuna. w21.01 págs. 18, 19 párrs. 17, 18

Babiloniocuna Jerusalenta tucuchishcata ricushpami chai llajtata pasajcunaca: “Cai llajtaca gentecunapish, animalcunapish illajlla shitashcamari saquirin. Cunanca caldeocunapajmari” nircacuna (Jeremías 32:43). Profeciamanta Joel huillashca 200 huatacuna qꞌuipami Jehová Diosca Jeremiastapish cai profeciamanta shujtaj yuyaicunata quillcachirca. Paica babiloniocunaca tucui millai israelitacunataca mashcashpami japingacuna nircami. Jeremías 16:16, 18-pica: “Mandaj Diosca cashnapishmi nin: ‘Cunanca chalhuata japij achca runacunatami cachagrini. Paicunami Judá runacunataca, chalhuata japij shina japingacuna. Chai qꞌuipaca, sacha animalcunata japijcunatami cachagrini. Paicunami Judá runacunataca tucui urcucunamanta, lomacunamanta, cꞌaca ucu jutcucunamantapish sacha animalcunata shina japingacuna’” ninmi. Shinallataj: ‘Paicuna imalla millaita rurashcamantarajmi shuj cutinhuan yallita pagasha’ ninmi. Mana arrepintirij israelitacunaca mama cuchapipish, sachacunapipish mana paca tucui tucurcacunachu. Babiloniocunaca ima shinapish mashcashpami japina carcacuna. w20.04 págs. 5, 6 párrs. 12, 13

Lotca paipaj causaita quishpichingapajca Jehová Diostami cazuna carca. Pero paica mana utca cazurcachu. Caita ricushpaca paica mana cazujmi carca nishpami yuyai tucunchij. Pero Jehová Diosca paita llaquishpami ayudarca. Chaimantami angelcunaca Lotta, paipaj familiatapish maquimanta aisashpa chai llajtamanta llujshichirca (Génesis 19:15, 16). ¿Jehová Diosca imamantataj Lottaca llaquishpa ayudarca? Jehová Diosca huaquin llaquicunata Lot chꞌimbapurashcatami yachashcanga. Por ejemplo, Sodoma cꞌuchullapi causajcunata manchashcamantami paipaj huasimantaca mana llujshisha nishcanga. Shinallataj cꞌuchullapi tiyaj brea guzucunapi ishqui reycuna urmashcatami yachaj chayashcanga (Génesis 14:8-12). Paipaj huarmimanta, ushushicunamantapishmi preocuparishcanga. Ashtahuancarin cullquiyuj cashcamantami alli huasita charishcanga (Génesis 13:5, 6). Chashna cashpapish Jehová Diostaca utcami cazuna carca. Pero Diosca pai pandarishcallataca mana ricurcachu. Ashtahuanpish Lottaca ‘cashcata rurajta’ shinami Diosca ricurca (2 Pedro 2:7, 8). w20.04 pág. 18 párrs. 13, 14

Maipica cantaca maijancunaca huahuata shinami tratancuna. Pero Jehová Diosca jovencuna imata rurai tucushcata, imata pajtachi tucushcataca allimi yachan (1 Samuel 16:7). Davidca Yayitu Dios tucui rurashcacunata ricushpa, rurashcacunapi yuyashpami Jehová Dioshuan alli apanacurca. Canpish Jehová Dioshuan alli apanacungapajmi esforzarina cangui (Salmo 8:3, 4; 139:14; Romanos 1:20). Shinallataj escuelapi compañerocuna can testigo de Jehová cashcamanta burlarijpica Jehová Diostami ayudachun mañana cangui. Ashtahuancarin Bibliata, publicacioncunata liyishpa, videocunata ricushpami ima yachachishcacunataca cambaj causaipi pajtachina cangui. Jehová Dios canta ayudajta ricushpaca paipajmanmi ashtahuan cꞌuchuyangui. Shujtajcunapish Jehová Diospi can confiajpica paicunapish canpimi ashtahuan confiangacuna. w21.03 págs. 3, 4 párr. 7

Alli amigocunaca paicuna ima shina sintirishcata, imata yuyashcata parlanatami munancuna. Chashnallatajmi Yayitu Diospish paihuan alli apanacuchunca Bibliata cushca. Bibliapimi Jehová Dios ima shina sintirishcata, imata yuyashcata yachanchij. Shinallataj ñucanchijca shuj mañaita rurashpami paihuan parlai tucunchij. Mañacushpaca imata yuyashcata, ima shina sintirishcatami shungumanta parlana canchij. Paica ñucanchijta cꞌuyaj amigomi can. Chaimantami ñucanchij mañashcacunata cutichin. Huaquinpica utcami cutichin. Pero maipica pai cutichingacamami mañashpa catina canchij. Paica ima hora cutichinata, ima shina cutichinataca allimi yachan. Tal vez ñucanchij yuyashca shinaca manachari cutichinga. Por ejemplo, llaquicunata anchuchinapaj randica llaquicunata ahuantangapajchari yachaita, fuerzata cunga (1 Corintios 10:13). ¿Jehová Dios paita mañachun saquishcamantaca ima shinataj agradicishcata ricuchinchij? ‘Taita Diosta mañanata’ manataj saquishpami paita agradicishcata ricuchinchij (1 Tesalonicenses 5:17). w20.05 págs. 27, 28 párrs. 7, 8

Callpajcunaca ama tsagnarishpa urmangapajca ñaupajmanmi alli ricurashpa callpancuna. Pero urmashpapish callpajcunaca chai rato jatarishpami callpashpa catincuna. Paicunaca imamanta urmashcallata yuyashpaca mana saquirincunachu. Ashtahuanpish maiman chayana yuyailla, premiota japina yuyaillami callpancuna. Huiñai causaiman apaj ñanpi callpacushpapish maipica ñitcari tucunchijmi. Huaquinpica imatapish mana allitami ruranchij o mana yuyashpami parlanchij. Maipicarin shuj huauqui o pani ñucanchijta llaquichishcamantami desanimarinchij. Shinapish juchayujcuna cashcatami yuyarina canchij. Pero tucuicunami quichqui ñanpi callpacunchij. Chaimantami huaquinpica shujtajcunahuan tꞌangarinacuj shina llaquichinacui tucunchij (Colosenses 3:13). Ima ñitcachishcapi yuyashpallaca ama saquirishunchijchu. Ashtahuanpish huiñai causaita chasquina yuyailla callpashpa catishunchij. Pꞌiñarishca, llaquilla saquirishpaca maiman chayana cashcamanca mana chayashunchu, premiotapish mana japishunchu. Pꞌiñarishca saquirishpaca carrerapi shujtajcunata ñitcachij shinami tucushun. w20.04 págs. 26, 28 párrs. 1, 8, 9

Profeta Danielca shuj jatun runaman rijchajta chꞌican chꞌican metalcunahuan rurashcatami ricurca. Jatun runaman rijchajpaj cada partecunaca Diosta sirvijcuna causacun llajtacunata mandajtami ricuchin. Cai runapaj fierrohuan, lodohuan rurashca chaquicunaca tucuri gobiernotami ricuchin. Cai gobiernoca Gran Bretaña y Estados Unidosmi can. Danielpi parlashca profeciaca Jehová Dios pai churashca mandanahuan cai Allpapi tiyaj gobiernocunata tucuchinaman shamujpica paicunaca tiyanaraj cashcatami intindichin. Apóstol Juanpish Diosta sirvijcuna causan llajtacunata mandashca gobiernocunamantami parlan. Paica chai gobiernocunataca canchis umacunayuj jatun animalhuanmi chꞌimbapuran. Animalpaj canchis umaca Gran Bretaña, Estados Unidostami ricuchin. Caita yachanaca importantemi can. ¿Imamanta? Cai canchis umapaj qꞌuipaca shujtaj umaca mana tiyanchu. Jesús, angelcunahuan jatun animalta tucui tucuchinaman shamujpica chai punllacamami cai canchis umaca tiyangaraj (Apocalipsis 13:1, 2; 17:13, 14). w20.05 págs. 14, 15 párrs. 11, 12

Diosmi causaita cuj can. Paimi cꞌuyaitapish cuj can. Jehová Diosmi ñucanchijtaca cꞌuyan. Chaimantami tranquilos, cushilla sintirinchij. Diosta sirvijcunapajca cꞌuyaita ricuchinaca shuj mandatomi can (Mateo 22:37-40). Yayitu Diosta ashtahuan rijsishpaca paita tucui shunguhuan cꞌuyangui nishcataca jahuallami pajtachishun. Jehová Diosca jucha illajmi can. Chaimantami ñucanchijtaca cꞌuyaihuan tratan. Shinallataj ñucanchijmantapish preocuparishcatami ricuchin. Shinapish huaquinpica shujtajcunata cꞌuyangui nishca mandashcata cazunaca sinchichari ricuringa. ¿Imamanta? Ñucanchij huauqui panicunaca juchayuj cashcamantami paicunapaj ruraicunahuan, nishcacunahuan huaquinpica ñucanchijta llaquichinga. Chaimantami Jehová Diosca ima shina, imamanta cꞌuyaita ricuchinata yachachingapajca Bibliapi quillcachirca. Apóstol Juanmi caimanta parlarca (1 Juan 3:11, 12). w21.01 pág. 8 párrs. 1, 2

Ñucanchijca achca huatacunata o ashalla huatacunata Diosta sirvicushpapish cashna nishpami tapurina canchij: “Diosta tucui shunguhuan sirvichun Diablo jarcasha nijpipish ¿Jehová Diostaca tucui shunguhuanchu sirvicuni?”. Internetpi o televisionpi shuj fotota, shuj peliculata ricushcamanta mana alli munaicunata chari callarishpaca ¿imatataj rurana canchij? Huaquinpica chaicunaca mana huainayanahuan chagrurishcachu can nishpami yuyai tucunchij. Pero Diosta tucui shunguhuan ama sirvichunca Diabloca chashna yuyachunmi pandachi tucun. Cai fotocunaca yantata chaupingapaj shuj hacha shinami can. Callaripica yantata chaupijca hacha puntatachari yantapica asha asha catichin. Hachata ashtahuan ashtahuan yantapi yaicuchijpica yantaca tucuimi chaupirin. Mana alli fotocunaca chai hacha filo shinami can. Puntapica cai fotocunata ricushpaca mana ima tucushachu nishpachari yuyashun. Pero caicunata ashtahuan ashtahuan ricushpaca hacha yantata chaupij shinami ñucanchij shungutaca chaupinga. Caita rurashpaca jatun juchapimi urmashun. Chaimanta tucui mana alli yuyaicuna ñucanchij shunguman yaicuchun ama saquishunchij. Jehová Diospaj shutita tucui shunguhuan respetashpa catishunchij. w20.06 pág. 12 párrs. 14, 15

Diosmanta caruyashcacuna congregacionman tigrajpica paicunata animashpa, ayudashpami catina canchij. Paicunaca chingarishca jovenmanta Jesús parlashca shinami llaquilla sintirincuna (Lucas 15:17-24). Shinallataj Diosmanta caruyashcamantami espiritualmenteca mana sinchi can. Chaimi paicunapaj fe sinchiyachun ayudana canchij. Jesús nishca shinaca shuj michijca paipaj chingarishca ovejata mashcangapajca tiempota, fuerzatami surcun. Cai ovejita fuerza illaj cashcamantami michijca paipaj rigrapi apashpa caishuj ovejacunahuan tandachin (Lucas 15:4, 5). Huaquincunapajca cutin Diosta sirvinaca sinchimi can. Chaimantami paicuna espiritualmente sinchi cachunca ñucanchij fuerzahuan, tiempo huan ayudana canchij. Diosmanta caruyashcacuna congregacionman tigrajpica ancianocunaca cai huauquita o panita ayudachunmi mañangacuna. Chaipica cushillami ayudana canchij. w20.06 págs. 28, 29 párrs. 14, 15

Diosta alli sirvijcuna cashcata ricuchingapajca cꞌuyanacushpami causana canchij. Shinallataj Diosmanta alli “yachaita, alli intindinatapishmi minishtinchij” (Filipenses 1:9). Chaita mana rurashpaca caita chaita apaj huaira shina panda yachachishcatami crishun. Shinallataj umashpa yachachijcunata o apostatacunatami crishun (Efesios 4:14). Apostolcuna causan punllacunapica huaquincunaca Jesusta catinatami saquircacuna. Chaimantami Pedroca Jesustaca “canmari huiñai causaita cuj shimicunataca charingui” nirca (Juan 6:67, 68). Pedroca chai shimicunata mana tucuita intindishpapish Jesús Mesías cashcatami intindirca. Ñucanchijpish Bibliapi yachachishcacuna verdad cashcata tucui shunguhuan crishpaca llaquicuna ricurijpipish sinchi fetami charishun. Shujtajcunatapishmi paicunapaj fe sinchi cachun ayudashun (2 Juan 1, 2). w20.07 págs. 8, 13 párrs. 2, 18

Huauqui panicunata llaquishpa mana llullapi purichun ayudashunchij (1 Juan 3:10, 11, 16, 17). Llaqui horaspish cushi horaspish caishujmanta chaishujmantami cꞌuyanacuna canchij. Por ejemplo, shuj huauquichari o panichari paipaj familiataca huañuipi chingachirca. Mana cashpaca, terremoto tiyashcamanta o acapana tiyashcamanta paicunapaj huasicunata o tandanacuna huasicunata pirdishcacuna. Chai llaquicuna ricurijpica huauqui panicunata ayudashunchij. Ñucanchij huauqui panicunata cꞌuyashcataca mana shimicunallahuanchu ricuchishun. Ashtahuanpish ruraicunahuanmi ricuchishun. Jehová Dios ñucanchijta cꞌuyashca shinallatajmi huauqui panicunata cꞌuyana canchij (1 Juan 4:7, 8). Chaimantami shuj huauqui o pani ñucanchijta llaquichijpica paita cꞌuyashpaca perdonashun. Shinallataj imata rurashcatapish cungarishun (Colosenses 3:13). w20.07 págs. 24, 25 párrs. 14, 15

¿Cunan punllacunapi Bibliamanta yachachicuj shinallatajchu cada unoman yachachishun? ¿Ashtahuan yachangapajca mai congregacionman rinachu minishtiringa? ¿Paicunatapish shujtaj causarijcunata yachachichunchu mandangacuna? Caicunataca mana yachanchijchu. Pero Isaías 11:9-pi nishca shinaca Jesús mandashpa tucuchicujpica “tucui cai pachaca Mandaj Diosta rijsishcahuanmi junda canga”. Jesús mandacujpica Diosta sirvijcunaca paicunapaj causaipi cambiocunata rurashpami catingacuna. Causarijcunapish Dios munashca shina causangapajca paicunapaj causaipimi cambiocunata rurana canga. Chaimantami Diosta sirvijcunaca causarijcunamanca cꞌuyaihuan yachachingacuna (1 Pedro 3:8). Diosta sirvijcuna humilde cashcata, paita sirvingapaj esforzaricushcata ricushpaca causarijcunapish Diostami sirvisha ningacuna (Filipenses 2:12). w20.08 pág. 16 párrs. 6, 7

Apóstol Pablopaj ejemplota catishpaca ñucanchijpish alli ruraicunata rurai tucushcatami cuentata cushun. Por ejemplo, shuj pushaj huauquica congregacionpica manachari alajata yachachinata yachan. Pero huillanapica alli yachachijmi can. Mana cashpaca, shujtaj ancianocuna shinaca manachari alli organizanata yachan. Pero pai cꞌuyaj cashcamanta, Bibliahuan alli consejaj cashcamantachari huauqui panicunaca paitaca consejachun mañancuna. Shinallataj paitaca alli puzachij cashcatachari rijsincuna (Hebreos 13:2, 16). Congregacionpi imata mana rurai tucunichu nishpa yuyanapaj randica, imata rurai tucushcapimi yuyana canchij. Chashnami cushilla sintirishun. Shinallataj congregacionpi imata rurai tucuj huauqui panicunatapish mana envidiashunchu. Congregacionpi ima mingashcata pajtachicushpapish alli pajtachingapajmi esforzarina canchij. Chashnami alli yachachijcuna tucushun. w20.08 pág. 24 párrs. 16-18

1935 huatapica Washington, Estados Unidos llajtapi shuj jatun tandanacuipimi huauqui Joseph Rutherfordca yallitaj achcacuna nishca conferenciata yachachirca. Huauqui Rutherfordca chai conferenciapica Apocalipsis 7:9-pi parlashca yallitaj achcacuna picuna cashcatami intindichirca. Chai punllacunacamaca Bibliamanta yachacujcunaca: “Yallitaj achcacunaca jahua pachamanmi ringacuna, pero mana sinchi feta charishcamantami Jesushuanca mana mandangacuna” nishpami yuyajcuna carca. Pero huauqui Rutherfordca Bibliahuanmi: “Yallitaj achcacunaca mana jahua pachapichu causangacuna. Paicunaca Jesús parlashca shujtaj ovejacunami can. Yallitaj achcacunaca jatun llaqui punllacunamanta quishpirishpami cai Allpapi huiñaita causangacuna” nishpa yachachirca (Apocalipsis 7:14). Jesusca: “Mana cai corralpi caj shujtaj ovejacunatapish charinimi. Paicunatapish pushamunami cani. Paicunapish ñuca rimaitami uyangacuna. Shuj canllallami tucunga, shuj michijllami tiyanga” nircami (Juan 10:16). Cai shujtaj ovejacunaca cai Allpapi huiñaita causana esperanzata charij testigo de Jehovacunami can (Mateo 25:31-33, 46). w21.01 págs. 14, 15 párrs. 1, 2

Diosta sirvijcunaca huillanata tucuchingacamami tucui pudishcata rurana canchij (Mateo 28:19, 20). Valishca trabajocunata pajtachinaca maipica mana jahuallachu can. Pero juchayuj cashcamantami fácil trabajocunata ruranata munanchij. Chaimantami valishca trabajocunata pajtachingapajca huaquin ruraicunamanta jarcarishpa esforzarina canchij. Shinapish Jehová Dios paipaj espíritu santohuan ayudajllapimi chai trabajocunataca pajtachi tucushun (Gálatas 5:22, 23). Apóstol Pabloca allita rurangapajca paipaj cuerpotaca huajtaj shinami cazuchirca (1 Corintios 9:25-27). Paica Jesusta catijcunataca, cancuna munashcacunamanta jarcarishpa “allita ruraichij, ama maipish cachun ruraichijchu” nircami (1 Corintios 14:40). Ñucanchijpish Jehovata adorashpa catingapaj, gentecunaman predicangapaj, yachachingapajpish achcatami esforzarina canchij (Hechos 2:46). w20.09 págs. 6, 7 párrs. 15-17

Cunan punllacunapica huaquin llajtacunapica huillangapaj ima jarcaicunaca mana tiyanchu. Ñucanchij causan llajtapipish mana jarcaicuna tiyajpica ¿cai tiempotaca huillangapajca allichu aprovechacunchij? Cai tucuri punllacunapica Diosta sirvijcunaca muyundij Allpapimi tucui laya gentecunaman yachachicunchij. Gentecunaman predicangapaj achca trabajota charishcamantami cushilla sintirinchij. Tranquilo causai tiyajpica huillanatami alli aprovechana canchij (2 Timoteo 4:2). Chaimantami can ashtahuan huillasha nishpaca huaquin cosascunata saqui tucungui. Mana cashpaca cambaj familiamanta shuj familia ashtahuan huillachun o precursor tucuchunmi ayudai tucungui. Cai tiempopica cullquiyuj canata o ashtahuan cosascunata charinataca mana mashcanachu canchij. Cai cosascunaca jatun llaqui punllacunapica chingaringallami (Proverbios 11:4; Mateo 6:31-33; 1 Juan 2:15-17). Achca publicadorcunami gentecunaman yachachingapajca mushuj shimita yachashcacuna. Tucuicunaman huillangapajca Diospaj organizacionca chꞌican chꞌican shimicunapimi achca publicacioncunata llujchishca. Cunanca 1.000 yalli shimicunapimi tiyan. w20.09 pág. 16 párrs. 9-11

Pabloca Timoteotaca Diospajta alli rurana yuyaillapi catirangui nircami. Cai consejota catingapajca Timoteoca Diostami ashtahuan cꞌuyana carca. Chashna cꞌuyashcamantami Diosta sirvinataca mana saquina carca (1 Timoteo 4:7). Shuj alli soldadopi yuyashun. Paica pita cꞌuyashcamanta, imata valorashcamantaca tucui fuerzahuanmi macanacun. Ñucanchijpish Diosta cꞌuyashpaca pai yachachishcacunataca mana saquishunchu (1 Timoteo 4:8-10; 6:6). Shuj soldadoca paiman mingashcacunata pajtachingapajca sinchitami esforzarina can. Timoteoca paiman mingashcacunata pajtachingapaj, Diablopaj trampacunapi ama urmangapajmi Pablo nishca consejota catirca. Paica mapa munaicunata huashaman saquingapaj, alli cualidadcunata charingapaj, huauqui panicunahuan alli parlanacungapajmi esforzarirca (2 Timoteo 2:22). Ñucanchijpish mana alli munaicunata huashaman saquingapajmi esforzarina canchij (Romanos 7:21-25). Shinallataj ñaupa causaita huashaman saquishpa, mushuj causaita charingapajmi esforzarina canchij (Efesios 4:22, 24). Ima ruraicunamanta shaicushca cashpapish tandanacuicunaman ringapajmi esforzarina canchij (Hebreos 10:24, 25). w20.09 pág. 28 párrs. 9-11

Yachacujta Diosman mingarichun, bautizarichun ayudangapajca pacienciami minishtirin. Pero Jehová Dios sirvisha nishcata o mana sirvisha nishcatami yachana canchij. Chaipajca: “¿Yachacujca Jesuspaj mandashcacunata pajtachingapajchu esforzarin? ¿Bibliamanta yachana alaja cajta ricushpallachu yachanata munan?” nishpami tapurina canchij. Maipica yachacuj Diosta sirvingapaj esforzaricushcata o mana esforzaricushcatami ricuna canchij. Por ejemplo, ¿Jehová Diosta cꞌuyashcatachu parlan? ¿Paitachu mañan? (Salmo 116:1, 2). ¿Bibliatachu liyinata munan? (Salmo 119:97). ¿Tucui tandanacuicunamanchu rin? (Salmo 22:22). ¿Paipaj causaipica minishtirishca cambiocunatachu rurashca? ¿Ima yachashcacunataca paipaj familiacunaman, amigocunamanchu huillan? (Salmo 9:1). Ashtahuancarin ¿testigo de Jehová canatachu munan? (Salmo 40:8). Caicunata mana pajtachicujta ricushpaca imamanta mana pajtachicushcatami yachana canchij. Ña yachaj chayashpaca chaimantami cꞌuyaihuan parlana canchij. w20.10 pág. 18 párrs. 14, 15

Jehová Diospish Josepish Mariapish Jesuspajca siempremi alli decisioncunata agllarcacuna. Pero Jesús ña huiñashpaca paillatajmi alli decisioncunata agllana carca (Gálatas 6:5). Ñucanchij shinallatajmi Jesusca imata decidinata, pai munashcata ruranata agllai tucurca. Shinapish Diospaj amigo canatami agllarca. Jesusca Diospaj munai maijan cashcata yachaj chayashpaca chaitami pajtachirca (Juan 6:38). Jesusca gentecuna paita pꞌiñana cashcataca allimi yacharca. Chaita yachashpapish Jehová Diosta cazunatami agllarca. Huata 29-pi bautizarishpaca paipaj Yayapaj munaita ruranatami decidirca (Hebreos 10:5-7). Jesusca caspipi huañucushpapish Diospaj munaita rurashpa catinatami agllarca (Juan 19:30). w20.10 págs. 29, 30 párrs. 12, 15

Congregacionpi caj huauqui panicunapi yuyashun. ¿Maijancunaca ima ungüitachu charincuna? ¿Ima problemahuanchu chꞌimbapuracuncuna? ¿Paicunapaj cꞌuyashca familiacunachu huañushca? Shuj huauqui o shuj pani cashna laya llaquicunata chꞌimbapuracujta yachaj chayashpaca paicunaman cushichij shimicunahuan animangapaj, imata rurashpa ayudangapajmi Jehová Diostaca mañana canchij. Chashnami paicuna ayudachun minishticuj rato animota cushun (1 Pedro 4:10). Llaquicunata charishpapish Jehová ayudanata yachashpami mana manchanchij. Diosca paipaj Churihuan, paipaj angelcunahuanmi ñucanchijtaca ayudai tucun. Shinallataj paica paipaj munaihuan de acuerdo cajpica autoridadta charijcunahuanmi ayudai tucun. Yayitu Diosca ñucanchijta ayudangapajpish shujtaj huauqui panicuna ayudana munaita charichunca paipaj espíritu santotami cun. Achcacunami Dios chashna ayudajtaca yachanchij. Chaimanta Apóstol Pablo shinami ñucanchijpish, “Jatun Diosca ñucata ayudajmi. Pipish ñucata imata ruranataca, mana manchanichu” ni tucunchij (Hebreos 13:6). w20.11 pág. 17 párrs. 19, 20

Jehová Diosca apostolcunamanca milagrocunata rurachunmi poderta cushca carca. Chaimantami paicunaca Jehová Dios ayudacushcata crircacuna (Hechos 5:12-16; 6:8). Cunan tiempocunapica Jehová Diosca ñucanchijcuna milagrocunata rurachunca mana poderta cushcachu. Shinapish Jehová Diosca ñucanchijta catirashpa llaquichijpica paipaj espíritu santohuanmi cashna llaquicunata chꞌimbapurachun ayudan (1 Pedro 3:14; 4:14). Shamuj punllapi ñucanchijta catirashpa llaquichinapi yuyacunapaj randica ñucanchij crishcacunata sinchiyachishunchij. Chashnami Jehová Dios ñucanchijta quishpichinata tucui shunguhuan crishun. Jesús ima nishcapi yuyana canchij. Paica: ‘Cancunamanca ñucami imallata rimanata, yachaitapish cusha. Chaipica cancunata pꞌiñajcunaca imata mana juchachi tucushpa upalla saquiringallami. Ñucata catirajcunaca quishpiringuichijmi’ nircami (Lucas 21:12-19). Diosca paita sirvijcuna huañujpipish paipaj yuyaipimi charin. Chaimantami paicunataca causachingalla. w21.01 págs. 4, 6 párr. 12

Apóstol Pabloca huañushcacuna causarinapimi crirca. Pero Pablo caita manaraj nijpimi Jobca Jehová Dios paita causachinataca seguro carca (Job 14:7-10, 12-15). Jesusta catijcunaca huañushcacuna causarinatami crinchij (Hebreos 6:1, 2). Pabloca, 1 Corintios capítulo 15-pi huañushcacuna causarina cashcatami alli intindichirca. Jesusta punta catijcunataca Pablo nishcacunaca achcatami animashcanga. Huañushcacuna causarinata achca huatacunata crishpapish causarinamanta Pablo ima parlashcata yachashpami ñucanchijpish sinchiyanchij. Jesús causarishcamantami ñucanchij cꞌuyashca familiacunapish causaringa. Ñucanchijpishmi huañushpaca causarishun. Apóstol Pabloca corintocunamanmi chaita yachachirca (1 Corintios 15:1, 2). Pabloca paicunataca: “Cristo mana causarishca cajpica, cancuna crishcapish yangallami” canman nircami (1 Corintios 15:17). w20.12 págs. 2, 3 párrs. 2-4

¿Apóstol Pedroca ama desanimaringapajca imatataj rurarca? Pedroca Jesús paimanta Diosta mañashcatami yuyarirca. Jesús Pedromanta mañashcatami Diosca cutichirca. Jesusca Pedrota animangapajmi tal vez paipaj ñaupajpi ricurishcanga (Lucas 22:32; 24:33, 34; 1 Corintios 15:5). Shinallataj apostolcuna tucui tuta mana imata pescashca huashami paicunapaj ñaupajpi ricurirca. Chaipimi Jesusca Pedro paita cꞌuyashcata ricuchichun saquirca. Shinallataj Pedrota perdonashcata ricuchingapajmi valishca trabajocunata mingarca (Juan 21:15-17). Jesusca Pedrotaca cꞌuyaihuanmi tratarca. Chashnami paica paipaj Yaya shina cashcata ricuchirca. Chaimanta imapi pandarishpaca Jehová Diosca manataj perdonangachu nishpaca ama yuyashunchij. Diabloca Diosca mana perdonanchu nishpa yuyachunmi munan. Pero Jehová Diosca ñucanchij juchayuj cajpipish cꞌuyaihuan allimi tratan. Chaimanta pi ñucanchijta mana alli tratajpipish Dios shinami cꞌuyaihuan perdonana canchij (Salmo 103:13, 14). w20.12 págs. 20, 21 párrs. 17-19

Huaquincunaca Diosta sirvishpapish ama yallitaj sustaringapajca Diospi mana confiarcacunachu. Paicuna shina ama pandaringapajmi paicunapaj ejemplomanta estudiana canchij. Por ejemplo, rey Asaca Judá llajtata mandai callarishpaca ima problemacunata charishpaca Jehová Diostami mashcaj carca. Pero asha tiempo qꞌuipaca Jehová Dios ayudachunca mana mashcarcachu. Ima cosascunata rurangapajpish pai munashca shinami rurai callarirca (2 Crónicas 16:1-3, 12). Rey Asaca israelitacunata mishangapajpish siriocunatami ayudachun mañarca. Chaita ruranaca paipajca alli shinami ricurishcanga. Shinapish pai chashna rurashcacunaca imapaj mana valircachu. Jehová Diosca shuj profetamanca: “Canca canta Mandaj Dios ayudachun paipi shunguta churanapaj randica, Siria llajtata jatun mandajtamari ayudachun mañashcangui. Chaimi Siria llajtata jatun mandajpaj soldadocunaca, cambaj maquimanta quishpirishpa ringacuna” nishpami huillachirca (2 Crónicas 16:7). Ñucanchijpish imata ruracushpapish mana ñucanchijllapi confianachu canchij. Chaipaj randica Jehová Dios paipaj Shimihuan ayudachunmi mashcana canchij. Huaquinpica ratochari ima decisionta agllana tucunga. Pero alli decidingapajca mana yallitaj sustarishpami Jehová Diospi confiana canchij. w21.01 pág. 6 párrs. 13-15

Cunan punllacunapica huaquincunaca Yayitu Diosta sirvicushpapish yaricaimanta, cullqui illaimanta, macanacuicuna tiyashcamantami llaquilla causancuna. Shujtajcunacarin Diosta sirvishcamantami carcelpi cancuna. Shinapish yallitaj achcacunaca jatun llaqui punllacunamanta quishpirishpa achca micunatapish, Diosmanta achca yachanacunatapish charinata yachashpami cushilla sintirincuna. Yayitu Diosca Diablopaj ruraicunata tucuchicushpaca yallitaj achcacunatami cuidanga. Jatun llaqui punllacuna qꞌuipaca Jesusca quishpirijcunataca causaita cuj yacu llujshicunmanmi pushanga (Apocalipsis 7:17). Armagedonmanta quishpirij yallitaj achcacunallami mana nunca huañushpa paraisoman pasana esperanzata charingacuna (Juan 11:26). Shujtaj ovejacunaca cai sumaj esperanzata charishcamantami Jehová Diostapish, Jesustapish achcata agradicincuna. w21.01 pág. 17 párrs. 11, 12

Jesusca pai jahua pachaman tigrajpi paipaj catijcunata Diablo catirashpa llaquichinatami alli yacharca. Chaimi Jesusca paita catijcunata Diablo ama llaquichichunca Yaya Diosta ayudachun mañarca (Juan 17:14, 15). Chashnami paicunataca cꞌuyashcata ricuchirca. Jesús jahua pachamanta Diablota shitashca horasmantami Diabloca achcata pꞌiñarishpa caticun (Apocalipsis 12:12). Chaimantami gentecunamanca Diosta sirvijcunata llaquichina yuyaita cun. Huaquincunaca chashna llaquichishpaca Diostami sirvicunchij nishpami yuyancuna (Juan 16:2). Cutin Diospi mana crijcunaca cai mundopaj ruraicunapi mana chagrurishcamantami Diosta sirvijcunataca llaquichincuna. Pero cunan punllapaj versopi nishca shinaca paicuna llaquichijpipish mana manchanachu canchij. w21.03 pág. 26 párrs. 1, 3

Jehová Diosca tucui imallata rurashpapish cꞌuyaimantami ruran. Paica ñucanchijta cꞌuyashcamanta imalla minishtishcacunatami cun. Jehová Diosca ñucanchijta yallitaj cꞌuyashcamantami paipaj Churita curca. Jesuspish ñucanchijta achcata cꞌuyashcamantami ñucanchijmanta huañurca (Juan 3:16; 15:13). Paicunata tucuipi cazujpica Jehová Diospish, Jesuspish ñucanchijta cꞌuyanataca manataj saquingachu (Juan 13:1; Romanos 8:35). Chai shinallatajmi familiata pushajca familiata cꞌuyashcamanta tucuita rurana can. Apóstol Juanca: ‘Maijanpish ricushca huauquita o paipaj familiata mana cꞌuyajca ¿ima shinataj mana ricushca Diostacarin cꞌuyangari?’ nircami (1 Juan 4:11, 20). Familiata cꞌuyaj cusacunaca Jehová Diospaj, Jesuspaj ejemplota catishcamantami familiacuna Dioshuan alli apanacuchun ricuncuna. Shinallataj tranquilo, cushilla sintirichunmi ayudancuna. Minishtirishca cosascunatapishmi cuncuna (1 Timoteo 5:8). Huahuacunatapish yachachishpa, corregishpami huiñachincuna. Jehová Diosta jatunyachingapajpish familiacunata cuidangapajpish imata alli decidingapajpish paicunaca yachashpami catincuna. w21.02 págs. 5, 6 párrs. 12, 13

Ñaupa causaita yuyarishpa ñucanchij desanimari tucushcataca Yaya Diosca allimi yachan. Ñucanchij mana alli cualidadcunata charishcapi yuyajpipish Yayitu Diosca ñucanchij alli cualidadcunatami ricun (1 Juan 3:19, 20). Maijanca ima viciota saquingapaj esforzarishpapish cutin chai viciopi urmashpami desanimarishca sintirin. Tucuicunami ima juchata rurashpaca mana alli sintirinchij (2 Corintios 7:10). Pero imapaj mana valinichu, Jehová Diospish mana perdonangachu nishpaca mana yuyanachu canchij. Chashna yuyashpaca Jehová Diosmantami caruyashun. Ama desanimaringapajca Jehová Diostami perdonachun mañana canchij (Isaías 1:18). Ñucanchij shungumanta arrepintirishcata ricushpaca paica perdonangami. Pushaj huauquicunamanpish huillashunchij. Paicunami pacienciahuan Diosta cutin alli sirvichun ayudangacuna (Santiago 5:14, 15). w20.12 pág. 23 párrs. 5, 6

Jesusca huarmicunatami valorarca. Fariseocunaca huarmicunataca mana allimi tratajcuna carca. Shinallataj shujtajcunapaj ñaupajpipish mana paicunahuanca parlajcunachu carca. Diospaj Quillcachishcacunatacarin huarmicunamanca mana parlajcunachu carca. Cutin Jesusca cꞌaricunamanpish huarmicunamanpish Diospaj Shimimantami valishca yuyaicunata parlaj carca (Lucas 10:38, 39, 42). Jesusca predicacushpaca huarmicuna paita acompañachunmi saquirca (Lucas 8:1-3). Huaquin huarmicunamanpish pai causarishcata apostolcunaman huillachunmi mingarca (Juan 20:16-18). Apóstol Pabloca Timoteotaca huarmicunata valorachun, respetachunmi yachachirca. Pabloca Timoteota paipaj abuela, paipaj mama Bibliamanta alli yachachishcataca allimi yacharca (2 Timoteo 1:5; 3:14, 15). Ashtahuancarin Romapi saquirij congregacionman cartata quillcashpaca panicunataca paicunapaj shuticunata nombrashpami saludarca. Pabloca panicuna Diosta sirvingapaj esforzarishcataca achcatami valorarca (Romanos 16:1-4, 6, 12; Filipenses 4:3). w21.02 pág. 15 párrs. 5, 6