Abril

¿Diosta sirvijcunaca ima llaquicunahuantaj chꞌimbapuracunchij? Tal vez shuj huauqui o panichari congregacionpi ñucanchijta llaquichincuna (Santiago 3:2). O mana cashpaca Jehová Diosta sirvishcamantachari escuelapi, trabajopi compañerocunaca burlarincuna (1 Pedro 4:3, 4). Shinallataj ñucanchij familiachari tandanacuicunaman ama richun, Jehová Diosmanta shujtajcunaman ama huillachun jarcasha nincuna (Mateo 10:35, 36). Cashna llaquicunata charishpaca maipica Jehová Diosta sirvinatachari saquinata yuyanchij. Pero Jehová Dios chaita ahuantangapaj yachaita, fuerzata cunataca manataj cungarinachu canchij. Jehová Diosca paita sirvijcuna llaquicunata ima shina ahuantashcatami paipaj Shimipi quillcachishca. Apóstol Pabloca: ‘Ñucanchijpish llaquicunata ahuantachunmi Jehová Diosca paita sirvijcunapaj causaimanta quillcachirca’ nircami. Bibliapi Diosta sirvijcunamanta yachashpaca ñucanchijca animarishcami sintirishun, ñucanchij fetapishmi sinchiyachishun. Pero Bibliata liyishpallaca mana saquirinachu canchij. Ashtahuanpish ima liyishcacunatami ñucanchij yuyaipi, shungupi huaquichina canchij. w21.03 págs. 14, 15 párrs. 1, 2

¿Gentecunaman huillacushpaca cozichanalla granocunata shinachu ricunchij? Chashnami cai quimsa yuyaicunata pajtachishun. Puntapica, paicunamanca utcami huillashun. Granocunata cozichana punllacuna ama pasachunca utcami cozichanchij ¿nachu? Ishquipica, alli huillaicunata gentecuna uyajpica cushillami sintirishun. Bibliapica: “Cozicha punllapi cushicuj shinami quiquinpaj ñaupajpica cushicungacuna” ninmi (Isaías 9:3). Quimsapica, gentecuna Jesuspaj discipulocuna tucunatami yuyashun. Chaimantami paicuna yachasha nishca yuyaicunamantaca parlana canchij. Jesusta catijcunaca samaritanocunaca mana nunca Jesusta catijcuna tucungachu nishpami yuyashcangacuna. Pero Jesusca mana chashna yuyarcachu. Ashtahuanpish samaritanocuna paita catijcuna tucunatami crirca. Ñucanchijpish huillacushpaca gentecunataca Jesús shinami ricuna canchij. Apóstol Pablopish sumaj ejemplotami curca. Paica gentecuna imapi crishcatami yacharca. Shinallataj gentecuna imata yachasha nishcatami yuyaipi charirca. Ashtahuanpish Pabloca gentecuna Jesuspaj discipulocuna tucunatami crirca. w20.04 págs. 8, 9 párrs. 3, 4

Shuj huauquita o panita juzganapaj randica, pai ima shina sintirishcata intindingapaj esforzarishunchij. Ñucanchij ima shina sintirijtaca Jehová Diosllami alli intindin. Chaimantami ñucanchijpish pai shina shujtajcunata alli ricungapaj, cꞌuyaihuan tratangapaj ayudachun Yaya Diosta mañana canchij. Huaquin huauqui panicunallata cꞌuyaita ricuchinataca mana yuyanachu canchij. Huauqui panicunaca Jonás, Elías, Agar, Lot shinami llaquicunata charincuna. Huaquinpica paicunallatajmi problemacunapi urmashcacuna. Pero ¿ñucanchijpish manachu ima horasca ima problemapi urmashcanchij? Chaimantami Yayitu Diosca caishujmanta chaishujmanta cꞌuyanacushpa causachun munan (1 Pedro 3:8). Diosta cazushpaca tucui laya huauqui panicunahuanmi tandalla, cushilla causashun. Chaimanta huauqui panicunata, alli uyangapaj, intindingapaj, cꞌuyaita ricuchingapaj esforzarishunchij. w20.04 pág. 19 párrs. 15-17

Jesusca tucuipimi Jehová Diosta cazurca. Chaimantami Dios cushca mandashcacunata cazungapajca Jesuspaj ejemplota catina canchij (Juan 8:29). Mana llullapi purishpa catingapajca Jehová Dios mana llullaj cashcata, paipaj Shimipi verdadta yachachishcatami tucui shunguhuan crina canchij. Shinallataj Jesuspish Dios cachashca Mesías cashcatami crina canchij. Cunan punllacunapica achcacunaca Jesús Diospaj Reinopi mandachun Dios agllashcataca mana crincunachu. Chaimi Juanca “umajcunami” Diospi, Jesuspi mana tanto crijcunataca jahualla pandachinga nirca (2 Juan 7-11). Shinallataj paica: “¿Pitaj llulla? Maijanpish Jesusta mana Cristochu nijmi llullaj” nishpami escribirca (1 Juan 2:22). Panda yachachijcuna ñucanchijtapish ama pandachichunca Bibliatami alli estudiana canchij. Shinami Jehová Diosta Jesustapish alli rijsishun (Juan 17:3). Chashnami mana llullapi puricushcataca tucui shunguhuan crishun. w20.07 pág. 21 párrs. 4, 5

Shujtajcunata mana ñitcachisha o llaquichisha nishpaca ñucanchij munashca shina imatapish rurachunca mana obliganachu canchij. Pudishpaca paicuna munashca shina imatapish rurachunmi saquina canchij (Romanos 14:19-21; 1 Corintios 8:9, 13). Carrerapi callpajcunaca mana chashna yuyancunachu. Paicunaca “ñucami premiota japina cani” nishpami callpancuna. Caishuj callpajcunapica mana yuyancunachu. Chaimantami paicuna mishasha nishpa shujtajcunata tꞌangashpa rinllacuna. Cutin ñucanchijca premiota japisha nishcamantami huauqui panicunahuanca mana pꞌiñarinacunchij (Gálatas 5:26; 6:4). Ñucanchijca tucuicuna huiñai causaita chasquichunmi munanchij. Chaimantami maiman chayana cashcaman huauqui panicunapish chayachun ayudanchij. Chaipajca cai consejotami catinchij: “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” (Filipenses 2:4). Yayitu Diosca cꞌuyaj cashcamantami tucuringacama tucui callpajcunamanca premiota cunga. Cai Allpapi causagrijcunaman, jahua pachapi causagrijcunamanpishmi huiñai causaita cunga. w20.04 págs. 28, 29 párrs. 10, 12

Jatun llaquichicunmanta llujshijcunaca paraíso Allpapi causangapajmi quishpiringacuna. Paicunaca ñaupa tiempopi huañushcacuna causarijta ricushpami cushilla sintiringacuna (Hechos 24:15). Jehová Diosta tucuipi cazujcunaca Adanmanta chasquishca huañuitami mishangacuna. Shinallataj huiñaitami causangacuna. Corintocunaman causarinamanta quillcashcata yachashpaca Diosta tucui sirvijcunami tucui shunguhuan agradicinchij. Pabloca: “Amitopajta ruranapi siempre ocupado caichij” nircami. Chaita pajtachingapajmi tucui pudishcata rurana canchij (1 Corintios 15:58). Diosta tucuipi cazushpa, paipaj obrapi ocuparishpaca maravilla, cushilla causaitami charishun. Chashnami Diosta sirvinaca mana yanga cashcata ricushun. w20.12 pág. 13 párrs. 16, 17

Ezequiel 38:10 al 23; Daniel 2:43 al 45; 11:44 al 12:1 y Apocalipsis 16:13 al 16 y 21-pica chai yuyaillamantataj parlashcatami yuyachin. Chashna cajpica catij yuyaicunapish pajtarinatami shuyanchij. Jatun llaqui punlla callarishca qꞌuipallami ‘tucui Allpa pachapi mandajcunaca’ tandanacungacuna (Apocalipsis 16:13, 14). Bibliapica cai tandanacushcacunataca ‘Magog llajtata mandaj Gog’ nishpami shutichin (Ezequiel 38:2). Paicunami Diospaj pueblotaca llaquichishpa tucuchisha ningacuna. Apóstol Juanca shuj muscuipi ricushpaca Diosta chanzata rurajcunapaj jahuapi jatun rundu urmajtami ricurca. Tal vez cai runduca Jehová Dios ñalla millaicunata tucuchinga nishpa predicanami canga. Chashna huillajpimi Magog llajtata mandaj Gogca Diospaj pueblotaca tucui chingachinata yuyanga (Apocalipsis 16:21). w20.05 pág. 15 párrs. 13, 14

Dios cushca espíritu santotami achcata valorana canchij. Cunan punllacunapi Yayitu Dios paipaj espíritu santohuan imallata ruracujta yuyarishpami ashtahuan valoranchij. Jesusca jahua pachaman manaraj rishpaca paipaj discipulocunamanca: ‘Jucha illaj espíritu cancunapaj jahuaman shamujpimi, imatapish rurai tucuj canguichij. Chashna cashpami cai pachapi tiyaj tucui llajtacunapi huillanguichij’ nircami (Hechos 1:8). Dios paipaj espíritu santohuan ayudajpimi muyundij Allpapica 8 millón y medio gentecuna Diosta sirvijcuna tucushcacuna. Espíritu santo ñucanchijta ayudajpimi cꞌuyaj canata, cushi canata, mana utca pꞌiñarij canata, alli shungu canata, crij canata yachashcanchij. Shinallataj sumaj causaita charinata, manso shungu canata, quiquinllataj jarcarij canatami yachashcanchij. Shinami Diosta sirvijcunaca tandalla, sumajta causacunchij (Gálatas 5:22, 23). Chaimantami espíritu santoca shuj sumaj regalo can. w20.05 págs. 29, 30 párrs. 10, 13

Ñucanchij cꞌuyashca familiacuna causarijpica ratomi rijsi tucushun. ¿Imamantataj chashna ninchij? Bibliapica huañushcacuna causarishcamantami parlan. Por ejemplo, Lazarota ima shina Jesús causachishcapi yuyashun. Lazaroca ñami chuscu punllacunata huañushca carca. Chaimantami paipaj cuerpoca ña ashnacushcanga. Pero Jesús Lazarota causachincami paipaj panicunaca rijsircacuna. Lazaropishmi paipaj panicunata yuyarishcanga (Juan 11:38-44; 12:1, 2). Chashnallatajmi Jehová Dios huañushcacunata causachijpica paicunata rijsi tucushun. Causarijcunaca ñahui ricuipipish, yuyaipipish, rimaipipish chashnallatajmi causaringacuna. Jesusca huañuitaca dorminahuanmi chꞌimbapurarca. Cutin causachinataca dormicushcamanta rijchachinahuanmi chꞌimbapurarca (Mateo 9:18, 24; Juan 11:11-13). Gentecuna rijcharishpaca ñahui ricuipipish, yuyaipipish, rimaipipish mana cambiancunachu. Chashnallatajmi huañushcacunapish causarishpaca mana cambiangacuna. w20.08 págs. 14-16 párrs. 3, 8

Jehová Diospajca jahua pachapi causagrijcunapish, shujtaj ovejacunapish valishcami can. Paicunataca achcatami cꞌuyan. Jahua pachaman rigrijcunamantapish, shujtaj ovejacunamantapish Jehová Diosca paipaj Churitami huañuchun curca. Cai ishqui grupocunami Jehová Diosta, Jesusta tucui shunguhuan sirvina can (Salmo 31:23). Jehová Diosca jahua pachapi causanata shuyajcunamanpish, cai Allpapi causanata shuyajcunamanpish paita sirvichunmi cada unoman espíritu santota cun. Jehová Diosca tucui paita alli sirvijcunamanmi sumaj causaita cusha nishca (Jeremías 29:11). Tucuicunami Jesús huañushcata yuyarina tandanacuiman rishpa Jehová Diostapish Jesustapish alabanchij, pagui ninchij. Cashna tandanacuita cada huata ruranaca Jesuspaj discipulocunapajca tucuimanta yalli valishcami can. w21.01 págs. 18, 19 párrs. 16, 19

Jesús huañushcata yuyarina tandanacuiman rijcunaca achcacunami paraíso Allpapi causana esperanzata charincuna. ¿Cai Allpapi causana esperanzata charijcunaca imamantataj chai tandanacuiman rincuna? Caipi yuyashun, shuj amigo cazaracujpica paicunata cꞌuyashcamanta, apoyashcamantami acompañanchij. Chashnallatajmi shujtaj ovejacunapish Jesusta, jahua pachaman rigrijcunata cꞌuyashcamanta, apoyashcamanta Jesús huañushcata yuyarina tandanacuiman rincuna. Chashna tandanacushpaca Jesús huañushcamanta, paraíso Allpapi causana esperanzata charishcamantami agradicishcata ricuchincuna. Jesusca paipaj apostolcunataca ñuca huañushcata yuyarishpa caitaca ruracunguichijlla nishpami mandarca (1 Corintios 11:23-26). Jesús mandashcata cazushpami shujtaj ovejacunaca Jesús huañushcata yuyarina tandanacuimanca mana faltancuna. Paicunaca jahua pachaman richun agllashcacuna cai Allpapi mana tiyangacamami Jesús huañushcata yuyarina tandanacuita rurashpa catingacuna. w21.01 págs. 17, 18 párrs. 13, 14

Ruraicunahuanmi cꞌuyashcataca ricuchina canchij (Santiago 2:17, 26-ta ricui). Jehová Diosca ñucanchijtaca achcatami cꞌuyan (1 Juan 4:19). Bibliapi sumaj shimicunata quillcashpami ñucanchijta cꞌuyashcata ricuchin (Salmo 25:10; Romanos 8:38, 39). Pero Jehová Diosca pai nishcacunallahuanca cꞌuyaitaca mana ricuchinchu. Ashtahuanpish ruraicunahuanmi cꞌuyashcata ricuchin. Jehová Diosca paipaj Churi llaquicunata apachun, ñucanchijmanta huañuchunmi saquirca (Juan 3:16). Chaimantami Jehová Dios ñucanchijta cꞌuyashcataca tucui shunguhuan crinchij. Jehová Diosta, Jesusta cazushpami paicunata cꞌuyashcata ricuchinchij (Juan 14:15; 1 Juan 5:3). Jesusca huauqui panicunatapish cꞌuyachunmi mandarca (Juan 13:34, 35). Chashna cꞌuyashcataca shimillahuanca mana ricuchinachu canchij. Ashtahuanpish ruraicunahuanmi cꞌuyaitaca ricuchina canchij (1 Juan 3:18). w21.01 págs. 9, 10 párrs. 6, 8

Jahua pachapi causachun agllashca huauqui panicunaca Jesushuanmi mandangacuna. Paicunaca Jesushuan huiñaita causanatami shuyancuna. Jesustaca ñahui ñahuimi ricungacuna, paihuanmi parlangacuna, paihuanmi tiempota pasangacuna (Juan 14:2, 3). Cai Allpapi causagrijcunapish Jesús cꞌuyajpi, pai cuidajpimi cushilla causangacuna. Jehová Diospish Jesuspish sumaj causaita cushcamantami cushilla causangacuna. Chaimi Jesusta mana ricushpapish paihuanca ashtahuan alli apanacungacuna (Isaías 9:6, 7). Jesuspaj amigocuna cashcamantami achca bendicioncunata chasquishcanchij. Por ejemplo, paica ñucanchijtami cꞌuyan, ñucanchijtami cuidan. Ashtahuancarin shamuj punllacunapajpish paimantami huiñai causaita charishun. Jesushuan alli apanacushpami Jehová Dioshuanpish alli apanacushun. Dioshuan apanacunami tucuimanta yalli valishca can. w20.04 pág. 25 párrs. 15, 16

Corinto llajtapi causaj huauqui panicunaca jahua pachapi causarina esperanzatami charircacuna. Apóstol Pabloca chai esperanzata charijcunamantami parlacurca. Paicunaca “Jesuspi shujlla tucujpi jucha illajta rurashca, jucha illaj cachun cayashcacunami” carcacuna. Shinallataj Pabloca ‘Jesusta catishcamanta huañushcacunamantapishmi’ parlarca (1 Corintios 1:2; 15:18, NWT; 2 Corintios 5:17). Cutin Pabloca shujta cartapi Diospaj ayudahuan quillcacushpaca, Jesús “huañushca shina paihuan shujlla tucushca cashpaca, pai causarishca shinallatajmi causarishun” nircami (Romanos 6:3-5). Jesusca shuj espíritu shina causarishpami jahua pachaman rirca. Jahua pachapi causachun agllashcacunaca espíritu shinallatajmi jahua pachapi causaringacuna. Pabloca Cristo huañushcacunamanta punta causarij nishpami quillcarca (1 Corintios 15:20). Jesusca jahua pachapi punta cutin shuj espíritu shina causarirca. Huiñai causaitapishmi chasquirca. w20.12 pág. 6 párrs. 15, 16

Cunan punllacunapish jahua pachaman rigrijcunaca huañushpaca chai ratomi jahua pachapi causarincuna. ¿Caitaca ima shinataj yachanchij? Apóstol Pabloca 1 Corintios 15:51, 52-pimi ricuchirca. Jahua pachapi causarishpaca paicunaca cushillami cangacuna. Ñahui quimllai shinallapi jahua pachaman rigrijcunaca ¿imatataj chaipica rurangacuna? Jesusca: “Tucuita mishashpa ñuca munashcallata rurashpa tucuringacama catijtaca llajtacunata mandajtami ñucaca rurasha. Ñuca Yaya ñucata mandajta rurashca shinallatajmi, paicunaca llajtacunataca allpa mangata ñutuj shina fierro varahuan mandanga” nircami (Apocalipsis 2:26, 27). w20.12 págs. 12, 13 párrs. 14, 15

Apóstol Pabloca Jesús huañushcacunamanta punta causarij nishpaca shujtajcunapish jahua pachapi causarinamantami parlacurca (1 Corintios 15:18). Jesús huañushca shina paita catij cashpa huañushcacunapish, apostolcunapish jahua pachapi causarishpami Jesús shinallataj huiñai causaita charingacuna nircami. Pablo Corinto llajtapi causajcunaman cartata quillcacujpica Jesús huañushca shina paihuan shujlla tucushca cajcunaca jahua pachapica manaraj causarishcacunachu carca. Pabloca: “Ashtahuanpish tucuicunami paicuna causarina cashcapica huashan huashan causaringa: Cristomi puntaca causarirca. Chai qꞌuipaca Cristopaj cajcunami pai tigramujpica chashna causaringacuna” nircami (1 Corintios 15:23, NWT; 1 Tesalonicenses 4:15, 16). Pabloca chashna nishpaca qꞌuipa punllapaj causarinamantami nicurca. Ña ricushca shinaca apostolcunapish jahua pachaman caishuj rigrijcunapish Jesús mandai callaringacamami jahua pachaman ringapajca shuyana carcacuna. Cunanca Jesús mandacui punllacunapimi causacunchij (Romanos 6:5). w20.12 págs. 5, 6 párrs. 12, 16, 17

Apóstol Pabloca jahua pachapi causarijcunamantami parlacurca. Paicunaca espíritu cuerpohuanmi causarincuna (1 Corintios 15:43, 44). Jesús cai Allpapi cashpaca aichayuj, tulluyuj cuerpotami charirca. Pero Jesús causarishpaca jahua pachamanmi tigrarca. Chaipica causaita cuj espiritumi tucurca. Chashnallatajmi jahua pachapi causarijcunapish shuj espíritu shina causarincuna. Pabloca: ‘Ima shinami allpamanta rurashca runa shinallataj canchij, chashnallatajmi jahua pachamanta caj shinallataj cashun’ nircami (1 Corintios 15:45-49). Jesús causarishpaca mana aichayuj, tulluyuj cuerpohuan causarircachu. Pabloca: “Aichapish, yahuarpish Dios mandanapica, ima japinata mana charingachu” nircami (1 Corintios 15:50). Apostolcunapish, jahua pachaman rigrij caishujcunapish aichayuj, tulluyujca mana causarinachu carca. w20.12 págs. 11, 12 párrs. 10-12

Diosca apostolcuna causashca punllacunapica Jesuspaj huaquin discipulocunamanmi jahua pachapi causarinamanta escribichun paipaj espíritu santota curca. Apóstol Juanca: “Ñami Diospaj huahuacuna canchij. Ñucanchij ima shina canataca manaraj ricuchishcachu. Ashtahuanpish pai ricurijpi, pai ima shina caj shinallataj tucuna cashcataca yachanchijmi” nircami (1 Juan 3:2). Cai versopi nishca shinaca jahua pachapi causarina esperanzata charijcunaca cielopi espíritu tucushpa causai ima shina canataca mana yachancunachu. Pero paicunaca caicunata mana alli yachashpapish jahua pachapi causarishpa Jehová Diosta ricunataca allimi yachancuna. Bibliapica jahua pachapi causarinamantaca huaquin yuyaicunallatami parlan. Apóstol Pabloca, Jesús mandajcunata, tucui poderyujcunata, huañuitapish chingachijpimi jahua pachapi causarijcunaca paihuan cangacuna nircami. Qꞌuipaca, Jesusca tucui ima tiyajta paipaj chaqui ucupi churashca huashaca paipish, jahua pachapi causarijcunapishmi Yaya Dios paicunata mandachun saquingacuna (1 Corintios 15:24-28). Chashna pajtarijpica dimastij cushicunami canga. w20.12 págs. 8, 9 párr. 2

Jahua pachapi Jesushuan mana causarijcunaca causarina esperanzatami charincuna. ¿Imamantataj caitaca yachanchij? Bibliapi nishca shinaca jahua pachapi causarijcunaca punta causarijcuna cashcatami ricuchin (Apocalipsis 20:6). Caita ricushpaca shamuj punllacunapipish shujtajcuna causarinatami yachanchij. Jobpish chaillatatajmi crirca (Job 14:15). Jesuspaj cajcunaca pai tucui mandajcunata, tucui poderyujcunata chingachijpimi paihuan cangacuna. Chaimi huañuipish para siempre tucuchishca canga. Chaimanta jahua pachapi causarijcunaca mana nunca huañunatami intindinchij (1 Corintios 15:23-26). Cai Allpapi causana esperanzata charijcunaca Pablo shinallatajmi ni tucuncuna. Cai punllapaj versopi nishca shinaca mana cashcata rurajcunaca jahua pachapica mana yaicui tucunchu. Chaimantami shamuj punllacunapi huañushcacunata Yaya Dios cai Allpapi causachinata yachanchij. w20.12 pág. 7 párrs. 18, 19

Maipica: “¿Jehová Dios ñucata perdonana cashcataca imamantataj seguro cai tucuni?” nishpachari tapurinchij. Cashna tapurishpaca Jehová ña perdonashcatami cuentata cunchij. Huaquin huatacuna huashamanca La Atalaya revistapica: “Jehová Diosta manaraj sirvi callarishpaca ima mana allitachari ruraj carcangui. Tiempo pasajpipish chaillatataj rurashpachari pandarircangui. Pero, chashna juchata rurashcamantaca Diosca nunca mana perdonangachu nishpaca ama yuyaichu. Diablomi chashna yuyachun munan. Mana allita rurashcamanta llaquilla sintirishpaca canca alli cashcatami ricuchingui. Chaimanta alli concienciata charingapaj, ama cutin chashna pandaringapaj Yaya Diosta ayudahuai, perdonahuai nishpami tucui shunguhuan mañashpa catina cangui. Apóstol Pabloca manaraj Jesusta catishpaca jatun juchacunatami rurashca carca. Pero chashna pandarishcata yuyarishpapish Yaya Dios paipaj juchacunata perdonachun Jesusta cachashcatami crirca (1 Timoteo 1:12-15). Paica paipaj pandarishcacunamanta yallitaj llaquirinapaj randica Jehovata alli sirvishpa catingapajmi esforzarirca. w20.11 págs. 27-29 párrs. 14, 17

Diabloca huaquin trampacunatami churan. Diablo trampacunata churajpica ¿imatataj ruranchij? Tal vez huaquincunaca: “Caita ruranaca mana jatun juchachu, congregacionmantapish mana llujchingachu” ningacunami. Chashnaca mana yuyanachu can. Ashtahuancarin cashna nishpami tapurina canchij: “¿Diabloca Diosta ama tucui shunguhuan sirvichunchu pandachicun? ¿Cashna mana alli munaicunata rurashpaca Diospaj shutitaca pingaipichu churani? ¿Caita rurashpaca Diospajmanchu cꞌuchuyasha o paimantachu caruyasha?”. Cai tapuicunapi cutin cutin yuyarishunchij. Cai tapuicunata shungumanta cutichingapaj Dios yachaita cuchun mañashunchij. Chashnami Satanaspaj trampacunapi mana urmashpa Jesús shina Diablotaca: “Anchui, Satanás” nishun (Mateo 4:10). Diosta tucui shunguhuan sirvinami minishtirishca can. w20.06 págs. 12, 13 párrs. 16, 17

Jehová Diosca ñucanchijpaj ima alli cashcataca allimi yachan. Chaimantami paipaj mandashcacunataca mana jatun tucushpa cazunchij (Efesios 4:22-24). Humilde cashpaca Diospaj munai tucuimanta yalli valishca cashcatami yachashun. Shujtajcunapish ñucanchijta yalli cashcatami yuyashun. Chaita rurashpaca Jehová Dioshuanpish huauqui panicunahuanpish allimi apanacushun (Filipenses 2:3). Diosta mana sirvijcunaca jatun tucushpami paicunallapi yuyancuna. Ñucanchijpish mana cuidarishpaca paicuna shinami yuyai tucunchij. Apostolcuna causan punllacunapipish maijan huauqui panicunaca chashnallatajmi yuyai callarishcangacuna. Chaimantami apóstol Pabloca Romapi causaj huauqui panicunaman cai consejota curca. Paica: ‘Cancunapurapica caishujta yalli cashcataca ama yuyaichijchu. Ashtahuanpish canca ima shina cashcata alli yuyaringui’ nircami. Pablo nishca shinaca ñucanchijllataj valishca cashcata yuyanaca allimi can. Pero humilde cashpaca shujtajcunata yalli cashcataca mana yuyashunchu. w20.07 pág. 2 párrs. 1, 2

Rey Asá causashca punllacunapi yuyashun. Etiopía llajtamanta millón soldadocuna judiocunahuan macanacunaman rijpimi chai llajtapi tranquilo causanaca tucurirca. Soldadocunata mandaj Zera shuti runaca Judá llajtata tucuchinatami yuyarca. Pero Asaca Jehová Diospimi confiarca. Chaimantami Diostaca: “Ñucanchijta Mandaj, can Taita Diosllapimi shungutaca churanchij. Ñucanchijta ayudahuaiyari. Cambaj shutipimari, cai soldadocunahuan macanacunaman shamunchij” nishpa mañarca (2 Crónicas 14:11). Etiopiamanta shamuj soldadocunaca Judá llajtamanta soldadocunata yallimi carcacuna. Chashna cajpipish Asaca Jehová Dios paicunata ayudanatami confiarca. Dios paipaj pueblota ayudajpimi chai soldadocunataca tucuchirca (2 Crónicas 14:8-13). Shamuj punllacunapi cada unohuan ima tucunataca mana yachanchijchu. Pero jarcaicuna tiyanataca allimi yachanchij. Jesús ima nishcata yuyarishun. Paica tucuri punllacunapica tucui llajtacunami ñucata caticushcamantaca pꞌiñangacuna nircami (Mateo 24:9). w20.09 págs. 17, 18 párrs. 14-16

Shujtajcuna ñucanchijta cꞌamichunca mana munanchijchu. Pero contracuna cꞌamijpi dimastij preocuparishpaca ñucanchijllatajmi desanimari tucunchij (Proverbios 24:10). Shujtajcuna cꞌamijpi llaquichijpica Apóstol Pablo shinami cushicunimi ni tucunchij. ¿Imamantataj llaquichijpica cushicuna canchij? Ñucanchijta rimajpi llaquichijpica Jesusta alli catijcuna cashcatami ricuchishun (1 Pedro 4:14). Jesuspish paita catijcunataca llaquicunatami charinguichij nircami (Juan 15:18-20). Por ejemplo, maijancunaca Grecia llajtapi tiyaj costumbrecunata, yuyaicunatami catircacuna. Chaimantami Jesusta punta catijcunataca imapaj mana valijcunata shina, imata mana yachajcunata shina ricujcuna carca. Cutin judiocunaca apóstol Pedromanta, Juanmanta parlashpaca: ‘Paicunaca jatun yachanaman mana rishca, yanga runacunami can’ nircacunami (Hechos 4:13). Achcacunaca Jesusta catijcunataca politicapi mana chagrurishcamanta, cuartelman mana rishcamantami irquilla cajcunata shina ricurcacuna. Jesusta punta catijcunaca paicunamanta mana allicunata nijpipish huillanataca manataj saquircacunachu. w20.07 págs. 14, 15 párrs. 3, 4

Apóstol Juanca huauqui panicunata achcata cꞌuyashcamantami paicunapaj fe sinchi cachun ayudarca. Huauqui panicunata cꞌuyashcataca pai quillcashca quimsa cartacunapimi yachai tucunchij. Jesushuan mandangapaj jahua pachaman rigrij huauqui panicunaca Juan shinallatajmi ñucanchijta cꞌuyan. Ñucanchijmanta sustarin. Chaita yachashpami cushilla sintirinchij (1 Juan 2:27). Cai consejocunata tucui shunguhuan cazushunchij. Jehová Diosta cazushpa mana llullapi purishpa catishunchij. Bibliata estudiashunchij, chaipi yachachishcacunatapish crishunchij. Shinallataj Jesuspi ashtahuan crishpa catishunchij. Gentecuna yachachishca yuyaicunata, apostatacuna nishcacunatapish ama uyashunchij, ama crishunchij. Jehová Diosta sirvicushpaca mana allicunataca ama rurashunchij. Imata ruracushpapish Jehová Diospaj mandashcacunata cazushunchij. Ñucanchij huauqui panicuna crinapi sinchi cachunca ñucanchijta llaquichijpipish paicunata perdonashunchij. Ayudata minishtijcunatapish ayudashunchij. Chashnami ima llaquicunata, jarcaicunata chꞌimbapurana cashpapish mana llullapi purishpa causashun. w20.07 págs. 24, 25 párrs. 15-17

Jehová Diosca cꞌuyaimantami paita sirvijcunataca congregacionpi sirvichun saquin. Cada uno chꞌican chꞌican mingashcacunata pajtachishpapish tucuicunami valishca canchij. Shinallataj tucuicunami minishtirishca canchij. 1 Corintios 12:21-pi apóstol Pablo nishca shinaca huauqui panicunataca “cantaca mana minishtinichu” nishpaca mana ninachu canchij. Jehová Diosta congregacionpi tranquilo sirvingapajca tucuicunami valichinacushpa, ayudanacushpa causana canchij (Efesios 4:16). Congregacionpi tandalla cashpaca huauqui panicunahuanmi ashtahuan sinchiyanacushun. Shinallataj cꞌuyaitami charishun. Congregacionta pushajcunataca Jehová Diosca paipaj espíritu santohuanmi agllashca. Pero cada unomi ima rurai tucushcahuan, ima yachashcahuan congregacionpica ayudai tucun (1 Corintios 12:17). Maijancunaca pushaj cachun recienlla nombrashcamanta, ña mayorlla cashcamanta o alli saludta mana charishcamantami congregacionpica mana tucuipi ayudai tucuncuna. Ima laya cajpipish pushajcunaca shujtaj pushajcunataca “cancunataca mana minishtinchijchu” nishpaca mana yuyanachu can. Chaipaj randica Romanos 12:10-pi ima nishcatami pajtachina can. w20.08 págs. 26, 27 párrs. 1, 2, 4

Paita sirvijcunata huiñai causaiman apaj ñanpi pushangapajca Jehová Diosca paipaj organizaciontami utilizan. Diospaj organización mushuj yachachishcacunata Bibliahuan intindichijpi, chuya causaita ima shina charina cashcata yachachijpica tucui chaicunatami alli chasquinchij. ¿Pero shujtaj cambiocuna tiyajpica imatataj ruranchij? Ñucanchij causan lugarpi Tandanacuna Huasicunata cꞌatujpica tal vez chai arreglota apoyanaca sinchimi ricuringa. Pero Jehová Dios paipaj organizacionta ñaupajman pushacushcata, ñucanchij paipaj trabajacushcata intindishpaca cushillami sirvishun (2 Corintios 6:1). Rey Davidca templota shayachingapajmi pai charishca cosascunata curca. Paica: “Ñuca mandacun cai tucuicunapish cai tucuicunata ñucanchij cusha nishcamanta canman cungapajca ¿pitaj canchigari? Tucui imapish cambajmi. Cambaj maquimanta japishcallatami canman cunchij” nircami (1 Crónicas 29:14). Ñucanchijca Diospaj obrata apoyangapaj imallacunatapish cushpa, cullquita cushpaca Dios cushcacunallatajmi cunchij. Ñucanchij tiempota, fuerzata, cullquita Jehová Diosman cushpaca paitami cushichinchij (2 Corintios 9:7). w20.11 págs. 22, 23 párrs. 14-16

Testigo de Jehovacunaca alli publicador cashcata ricuchingapajca achcacunata o ashallacunata Diosta rijsichun ayudashcataca mana nisha ninchu (Lucas 8:11-15). Tucuicuna mana shaicushpa predicashpa, yachachishpaca Diostapish Jesustapish cazucushcatami ricuchinchij. Chaimi Jehová Diosca cushilla sintiringa (Marcos 13:10; Hechos 5:28, 29). Ñucanchijca tucuri punllacuna quichquiyamucushcata yachashpami utca predicana canchij. Chaimantami publicador cangapajca cambaj causaipi tucui alli cachunca mana shuyana cangui. Ashtahuanpish gentecuna quishpirichunmi utca ayudana cangui.Cunanmi predicanata munaj cangapaj Bibliamanta ashtahuan yachangapaj, mana manchashpa huillangapaj esforzarina cangui. Muyundij Allpapica 8 millón yalli Diosmanta huillajcunami tiyan. Canpish paicunahuanmi tandalla huillai tucungui. Chashnami Jehová Dios ‘cushicuita cujpica’ contento sintiringui (Nehemías 8:10; Lucas 5:10). Jehová Dios huillanaca caipimi tucurin ningacamami predicashpa catina cangui. w20.09 pág. 7 párrs. 18-20

Ashtahuan charina munaicuna predicanata jarcachunca mana saquinachu canchij. Charina yuyailla causashpaca Diosta cꞌuyanata, Dios yachachishcacunata valoranatami saquishun. Gentecunaman predicanatapishmi saquishun (Mateo 13:22). Dios yachachishcacunata, pai mingashcacunata ama saquingapajca mana allicunamanta anchuringapajmi listos cana canchij. Ñucanchijca mana allicunamanta utca anchuringapajca imata ruranapi alli yuyana canchij. Tal vez televisionpi, Internetpica huainayanahuan, macanacunahuan chagrushca ricunacunami ricuringa. Mana cashpaca apostatacunapaj panda yachachishcacunapishmi ricuringa. Chaimanta anchuringapajmi alli allichirishca cana canchij. Chaita rurashpaca Jehová Diosmantaca manataj caruyashunchu (Salmo 101:3; 1 Timoteo 4:12). Diosta sirvijcunaca pai yachachishcacunatami valorana canchij. Shinallataj shujtajcunaman huillachun mingashcatapish pajtachinami canchij. Chaita rurashpaca ñucanchij concienciapipish allimi sintirishun. Alli causaitapishmi charishun. Shujtaj gentecunatapish Jehová Diosta rijsichun ayudashcamantami contentos sintirishun. w20.09 pág. 30 párrs. 16-19

Bautizarishca cashpaca shujtajcunapaj ñaupajpi Jehová Diospi crishcata, paipaj organizacionpi sirvisha nishcatami ricuchishcanchij. Jehová Dios cunan punllacunapi paipaj organizacionta ima shina ñaupajman pushacujta ricushpami pai ima shina cashcata, pai munashcata pajtachisha nishcata, pai ima shina causachun munashcatapish yachai tucunchij. Diospaj quimsa cualidadcunata ricushun. Puntapica, Jehová Diosca tucuicunata shuj shinalla ricuj Diosmi can (Hechos 10:34). Yayitu Diosca cꞌuyaimantami tucuicunata quishpichingapaj paipaj churita curca (Juan 3:16; 1 Timoteo 2:6). Diosca achca gentecuna quishpirichunca paipaj pueblotami alli huillaicunata huillachun utilizan. Ishquipica, Diosca tucuita ordenpi charij, tandalla causaita cujmi can (1 Corintios 14:33, 40, NWT ). Chaimantami paita sirvijcunaca tucui ordenpi tandalla sirvina canchij. Quimsapica, “Diosca alli yachachijmi” can (Isaías 30:21, NWT ). Chaimi paipaj organizacionca congregacionpipish predicanapipish Bibliamantaca yachachincuna. w20.10 pág. 20 párrs. 1-3