Mayo

Jesusca uchillamantami paita huiñachij yaya mamata cazunata agllarca. Paica ñuca yaya mamata yallimi yachani nishpaca mana nunca yuyarcachu. Jesusca punta churi cashcamantami huaquin responsabilidadcunata pajtachina cashcanga. Paica familiata mantiningapajmi paipaj yayapaj trabajota alli ruraj carca. Josepish Mariapish Diospaj milagromanta Jesús huacharishcatami paiman huillashcangacuna. Shinallataj angelcunapish imallata nishcatami huillashcangacuna (Lucas 2:8-19, 25-38). Pero yaya mama yachachishcallahuanca Jesusca mana saquirircachu. Paillatajmi Dios Quillcachishcacunataca estudiarca. ¿Ima shinataj chaitaca yachanchij? Shuj punllaca Jesusca doce huatacunata charishpaca Jerusalenpi yachachijcunapaj tapuicunatami cutichirca. Chaimi yachachijcunaca Jesús ima shina cutichijta ricushpaca mancharishca saquirircacuna (Lucas 2:46, 47). Paica huambraraj cashpapish Jehová Dios paipaj Yaya cashcatami seguro carca (Lucas 2:42, 43, 49). w20.10 págs. 29, 30 párrs. 13, 14

Jesús causarishcapi crishcamantami shujtajcunapish causarinata tucui shunguhuan crinchij. Apóstol Pabloca: ‘Cristoca ñucanchij juchacunamantami huañurca. Shinallataj pambashcami carca. Quimsa punllacuna qꞌuipaca causachishcami carca’ nishpami yachachirca (1 Corintios 15:3, 4). Ñucanchijpajca Jesús huañushca, pambashca, causarishcaca ¿imatataj nisha nin? Profeta Isaiasca Mesiasmanta parlashpaca: ‘Cai pachapi causajcunapuramanta anchuchishcami canga. Diosta mana rijsijcunahuanmi pambanalla tucunga. Achcacunapaj juchacunatami apanga’ nircami. ¿Jesusca ima shinataj caita pajtachirca? Shujtajcunata quishpichingapaj paipaj causaita cushpami chaita pajtachirca (Isaías 53:8, 9, 12; Mateo 20:28; Romanos 5:8). Jesús huañushcamantami ñucanchijpish juchamanta, huañuimanta quishpichishca cashun. Shinallataj Jesusmantami ñucanchij huañushca familiacunatapish cutin ricushun. w20.12 págs. 2, 3, 5 párrs. 4-6, 11

Apóstol Pabloca sinagogacunapimi judiocunaman huillaj carca. Por ejemplo, Tesalónica llajtapi tiyaj sinagogapimi Pabloca “quimsa semanata chaipi cashpa samana punllacunapica chai huasipi tandanacujcunata yachachirca” (Hechos 17:1, 2, QC, 1989). Paica uchillamanta judiocunahuan huiñashcamantami sinagogacunapi yachachishpa cushilla sintirishcanga (Hechos 26:4, 5). Judiocunata alli rijsishcamantami mana manchashpa predicarca (Filipenses 3:5). Pablopaj contracunaca Tesalónica llajtamanta, Berea llajtamantapishmi llujchishpa cacharcacuna. Chaimi Pabloca Atenas llajtaman rirca. Chai llajtapimi cutin Pabloca ‘sinagogapi judiocunahuan, Taita Diosta yuyarijcunahuan parlanacurcacuna’ (Hechos 17:17). Cutin mercadocunapi predicacushpaca shujtaj gentecunahuanmi parlarca. Cai gentecunapuramantaca huaquincunaca yachaj runacunami carca. Cutin shujtajcunaca mana judiocunami carca. Paicunapajca Pablo huillashcacunaca mushuj ‘yachachishcacunami’ carca. Paicunaca: “Can yachachishcacunaca ñucanchij manaraj uyashcamari” nircacunami (Hechos 17:18-20). w20.04 pág. 9 párrs. 5, 6

Diospaj ñaupajpica mana nunca alli ricurishachu nishpaca mana yuyanachu canchij. Tucuicunami juchayuj cashcamantaca imapipish pandarinchij. Pero Jehová Dios paipaj Churita cushcamantami Diospaj ñaupajpipish alli ricuri tucunchij (Efesios 1:7; 1 Juan 4:10). Desanimarishca cashpaca huauqui panicunapaj ayudata mashcashunchij. Paicunaca ñucanchij ima shina sintirishcata uyangapaj, animangapajmi listos can (Proverbios 12:25; 1 Tesalonicenses 5:14). Nigeria llajtamanta pani Joy ama desanimarishca sintirichun paita ima shina ayudashcata ricushun. Paica: “Turi ñañacuna congregacionpi mana tiyajpica ima shinachari caiman. Ñuca mañashcata Jehová Dios turi ñañacunahuan cutichishcatami cuentata cuni. Paicunaca shujtajcuna desanimarishca cajpi ima shina ayudanatami yachachishcacuna” ninmi. Pero huauqui panicunaca ñucanchij animachun minishtishcataca mana siempre cuentata cungacunachu. Chaimantami desanimarishca cashpaca ñucanchijta animachun experienciata charij huauqui panicunapaj ayudata mashcana canchij. w20.12 págs. 23, 24 párrs. 7, 8

Pihuan alli amigocuna tucungapajca achca tiempota pasana, imata yuyashcata, ima shina sintishcata, ima shina causashcata parlanami minishtirin. Pero huaquinpica Jesuspaj amigocuna tucungapajca sinchimi ricurin. ¿Imamanta? Jesustaca mana ñahui ñahui rijsinchijchu. Apostolcuna causashca punllacunapipish huaquin huauqui panicunaca Jesustaca mana ñahui ñahui ricurcacunachu. Chaimantami apóstol Pedroca: ‘Cancunaca mana ricushpapish, Jesucristotaca cꞌuyanguichijmi. Cunan mana ricushpapish paipimi cringuichij’ nirca (1 Pedro 1:8). Pedro nishca shinaca Jesuspaj amigo cangapajca paita ñahui ñahui ricunaca mana minishtirinchu. Ashtahuanpish, Jesushuanca mana parlai tucunchijchu. Shuj mañaita ruracushpaca Jehová Diostami mañanchij. Jesuspaj shutipi ‘chashna cachun’ nishpa mañashpapish mana paihuan parlanchijchu. Shuj mañaita rurashpaca Diostami adoranchij. Jesuspish Diosllata adorachunmi munan. Paita mañachunca mana munanchu (Mateo 4:10). Shina cajpipish Jesusta cꞌuyashcatami ricuchi tucunchij. w20.04 pág. 20 párrs. 1-3

Ñaupa punllacunapi tiyaj Grecia llajtapica callpajcunaca shaicushcacuna cashpapish, nanaihuan cashpapish callpashpami catijcuna carca. Paicunaca entrenacujpaj yachachishcacunata yuyarishpa, paicunapish esforzarishpami callpajcuna carca. Paicunata shinallatajmi ñucanchijtapish huiñai causaiman apaj ñanpi callpachun yachachincuna. Callpajcunaca paicunapaj fuerzallahuanmi callpajcuna carca. Pero ñucanchij callpashpa catichunca tucuita rurai tucuj Jehová Diosmi fuerzata cun. Paipi confiajpica paica ima shina callpanatami yachachisha nin. Shinallataj fuerzatami cusha nin. Apóstol Pabloca achca llaquicunatami chꞌimbapurana carca. Paitaca cꞌamishpami llaquichishpa catirajcuna carca. Huaquinpica fuerza illaj shinami paica sintirirca. Shinallataj garrochahuan tujsicuj shinami paipaj aichapica sintirca (2 Corintios 12:7). Pero cashna llaquicunata charishpapish shaicurinapaj randica Jehová Diospi confiashcatami ricuchisha nirca (2 Corintios 12:9, 10). Chaimantami Jehová Diosca paitaca siempre ayudarca. w20.04 pág. 29 párrs. 13, 14

Jehová Dioshuan, Jesushuan, angelcunahuan tandalla trabajana sumaj regalotami chasquishcanchij (2 Corintios 6:1). Huillacushpaca paicunapaj ayudatami chasquinchij. Pabloca Diosta sirvijcunamanta, paimanta parlashpaca: “Diospajta paihuan rurajcunami” canchij nircami (1 Corintios 3:9). Predicacushpaca Jesustapish apoyacushcatami ricuchinchij. Jesusca paita catijcunata “tucui cai pachata richij, ñuca yachacujcunata ruraichij” nishca qꞌuipaca: ‘Cancunahuanmi casha’ nircami (Mateo 28:19, 20). Angelcunapish huillachun ayudashcamantami agradicinchij. Paicunaca ‘Allpapi causajcunaman huiñaipaj alli huillaita’ huillachunmi ayudashcacuna (Apocalipsis 14:6). Diospaj gobiernomanta huillacushpaca allpapi muyucunata tarpucuj shinami canchij. Gentecuna Diosmanta uyajpica muyucuna alli allpapi urmashpa huiñacuj shinami can (Mateo 13:18, 23). ¿Gentecuna Diosmanta yachachun, Diosta sirvichunca pitaj ayudan? Jesusca cunan punllapaj versopi caitami yachachirca. w20.05 pág. 30 párrs. 14, 15

Achca cusa huarmicunaca mana alli apanacushcamantami divorciarishcacuna. Cutin maijan familiacunaca huasipi tandalla causashpapish mana rijsishcacuna shinami sintirincuna. Familiacunata ayudaj shuj runaca: “Yaya mamacunapish huahuacunapish computadorapi, tabletpi, celularpi o video juegollapi yallitaj tiempota pasashcamantami paicunapura mana parlanacuncuna” ninmi. Ñucanchijpish Diosta mana sirvij gentecuna shina cꞌuyai illajca mana casha ninchijchu. Chaipaj randica ñucanchij familiacunaman, huauqui panicunamanmi ashtahuan cꞌuyaita ricuchishpa catina canchij (Romanos 12:10). Ima shinami ñucanchij propio familiata achcata cꞌuyanchij, paicunahuan alli apanacunchij. Chashnallatajmi huauqui panicunatapish cꞌuyana canchij, alli apanacunapish canchij. Caishujmanta chaishujmanta cꞌuyanacushpaca Jehová Diostami tandalla, shuj familia shina sirvishun (Miqueas 2:12). w21.01 pág. 20 párrs. 1, 2

Shuj equipo de futbolpi pugllajcunaca shuj shinalla alli apanacushpaca mishai tucungacunami. Ñucanchij yuyaicuna, munaicunapish shuj shinalla cashpaca Diostami alli sirvi tucushun. Pero Diabloca Diosta tucui shunguhuan sirvichunca mana munanchu. “¿Ñuca munashcatachu rurasha o Dios munashcatachu rurasha?” nishpa dudachunmi Diabloca munan. Pero Diosta sirvisha nishpaca tucui shunguhuanmi sirvina canchij (Mateo 22:36-38). Shungumanta Diosta sirvinata Diablo jarcachunca manataj saquinachu canchij. Ñucanchijpish David shina Jehová Diosta mañashunchij. Paica: “Ñuca shungupi sinchiyachiyari” nircami. Cai nishcacunata ñucanchij causaipi pajtachingapaj esforzarishunchij. Ima decisionta agllacushpapish Diospaj shutita tucui shunguhuan respetashcatami ricuchina canchij. Caicunata pajtachishpaca testigo de Jehová canatami allipi saquishun (Proverbios 27:11). Ñucanchijpish profeta Miqueas shinami: “Ñucanchijca Jehová Diospaj shutitami punllanta, huiñai huiñaicama jatunyachishun” ni tucunchij (Miqueas 4:5, NWT ). w20.06 pág. 13 párrs. 17, 18

Janaj ladomanta mandaj, cai Allpapi tiyaj gobiernocuna Diospaj pueblota llaquichi callarijta ricushpami Jehová Diosca achcata pꞌiñaringa. Chaimi Armagedón macanacuitaca callarichinga (Apocalipsis 16:14, 16). Chai ratomi janaj ladomanta mandajta ‘ayudajca pi mana tiyanga’ (Daniel 11:45). Chashnallatajmi Mandaj Gog nishca tandanacushca llajtacunatapish tucuchinga. Daniel 12:1-pica janaj ladomanta mandajta, shujtaj gobiernocunata ima shina tucuchinamantami ashtahuan parlan. Shinallataj Diosta sirvijcunatapish ima shina ayudanamantami parlan (Daniel 12:1). ¿Cai versopi nishcacunaca imatataj nisha nin? Cai versopi Miguelmanta parlashpaca mandaj Jesusmantami parlacun. Paica 1914 huatapimi Diospaj gobiernopi mandai callarirca. Chai huatamantami Diospaj pueblotaca cuidacushca. Shamuj punllacunapica Armagedón macanacuipimi paipaj contracunata tucuchinga (Apocalipsis 6:2; 7:14). w20.05 págs. 15, 16 párrs. 15-17

Joseca carcelpi cashpa, esclavo cashpapish paipaj llaquicunata anchuchingapajca imata mana rurai tucurcachu. Pero ¿Joseca ama desanimaringapajca imatataj rurarca? Imata mana rurai tucushcapi yuyanapaj randica paiman mingashca trabajocunata alli pajtachingapajmi esforzarirca. Ashtahuancarin paipaj causaipica Jehová Diostami punta lugarpi churarca. Chaimantami Jehová Diosca tucui pai imata rurashcapish alli llujshichun ayudarca (Génesis 39:21-23). Cai mundopica achca gentecunami Joseta shinallataj yangamanta juchachishpa maipica mana alli tratancuna. Huaquinpica huauqui panicunachari ñucanchijtapish llaquichingacuna. Pero Jehová Diosca jatun rumi shina, ñucanchij miticunami can. Caita yuyaipi charishpaca paita sirvinataca mana saquishunchu (Salmo 62:6, 7; 1 Pedro 5:10). José jovenraj cajpimi Jehová Diosca paiman muscuchirca. Caita ricushpami Jehová Diosca jovencunapi confiaj cashcata intindinchij. Cunan punllacunapish achca jovencunami José shinallataj Jehová Diospi confiancuna. Huaquin jovencunaca Jehová Diosta sirvinata mana saquishcamantami carcelpi cancuna (Salmo 110:3). w20.12 págs. 16-18 párrs. 3, 5, 7

Apóstol Pedro, apóstol Juanca Jesusmanta huillashcamanta, Jesusta catishcamanta llaquicunata apashpaca cushillami sintirircacuna (Hechos 4:18-21; 5:27-29, 41, 42). Jesusta catijcunaca imamantapish mana pinganayachijcunachu carca. ¿Imamantataj caita ninchij? Jesuspaj discipulocunaca contracunatapish yallimi gentecunataca ayudarcacuna. Jehová Diosca paipaj espíritu santohuanmi huaquincunataca Bibliapi tiyaj huaquin librocunata quillcachirca. Cai librocunami achca gentecunata ayudashpa caticun. Diospaj Gobiernomanta huillashcaca cunancamami tiyan. Shinallataj cai Gobiernoca ñallami tucui muyundij Allpata mandanga (Mateo 24:14). Pero ñaupa punllacunapi Roma llajtata mandajcunaca cunan punllacunapica ña mana tiyanchu. Cutin paicuna llaquichishca Jesusta catijcunaca cunanca jahua pachapimi mandacuncuna. Shinallataj tal vez contracunata Yaya Dios causachijpica Diospaj Gobiernomi paicunataca mandanga (Apocalipsis 5:10). w20.07 pág. 15 párr. 4

Abrahamca sinchi feta charishcamantaca Diospaj Gobiernopi agllashca Reyta ricucuj shinami carca. Chaimantami Jesusca judiocunamanca: “Cancunapaj ñaupa yaya Abrahamca, ñuca shamuna punllata ricuna cashcamanta cushicurcami. Ricushpacarin, ashtahuanmi cushicurca” nirca (Juan 8:56). ¿Abrahamca Diospaj Gobierno mandachun shuyacushcataca ima shinataj ricuchirca? Paica shuj solo llajtacunapi causanataca mana agllarcachu. Cai Allpapi tiyaj gobiernocunapaj partepish mana tucurcachu. Shinallataj paipaj propio mandanatapish mana rurarcachu. Chaipaj randica Jehová Diostaca tucuipimi cazurca. Shinallataj Dios cusha nishcacunapimi shuyarca. Chashnami Jehová Diospi sinchi feta charishcata ricuchirca. w20.08 pág. 3 párrs. 4, 5

Jehová Diosca paraisopica: “‘Ungushcami cani’ nishpaca ni pi mana ningacunachu” ninmi (Isaías 33:24). Jehová Dios huañushcacunata causachijpica causarijcunaca sano cuerpohuanmi causaringacuna. Pero chai ratoca jucha illaj cuerpohuanca mana causaringacunachu. Paicuna jucha illaj cuerpohuan causarijpica paicunapaj familiaca manachari rijsi tucungacuna. Chaimantami Jesús cai Allpata mandacujpi tucui gentecunaca asha asha jucha illaj tucungacuna. Chashnami Jesusca Diospaj munaita pajtachinga. Jesusca mil huatacunata mandashca qꞌuipaca chai mandanataca paipaj yayamanmi tigrachinga (1 Corintios 15:24-28; Apocalipsis 20:1-3). Huañushcacuna causarijpi paicunata cutin ricushpaca ¿ima shinashi sintirishun? ¿Cushilla cashcamantachu huacashun? ¿Cushilla sintirishcamantachu Jehová Diostaca alabashun? Ima laya cashpapish Jehová Dios paipaj Churihuan huañushcacunata causachishcamantami paicunataca ashtahuan cꞌuyashun. w20.08 págs. 16, 17 párrs. 9, 10

Apóstol Pabloca mana cazarashpa Yaya Diosta sirvi tucushpaca chaitami rurai tucungui nishpami animarca (1 Corintios 7:8, 9). Pabloca solterocuna cazadocunata menos cashcataca mana yuyarcachu. Por ejemplo, Timoteo mana cazarashca cajpipish paimanca congregacionpi sinchi responsabilidadcunata pajtachichunmi mingarca (Filipenses 2:19-22). Chaimanta shuj huauquica cazado cashpalla o soltero cashpallami Diostaca alli sirvi tucun nishpaca mana yuyanachu canchij (1 Corintios 7:32-35, 38). Jesuspish Pablopish “cazaranatajmi cangui” o “mana cazaranachu cangui” nishpaca mana yachachircacunachu. Caita intindishpaca cazado o soltero canamantaca ¿imatataj yachanchij? La Atalaya del 1 de octubre de 2012-pica: ‘Soltero canapish cazado canapish Dios cushca valishca regalomi can. Jehová Diosca solterocunataca llaquilla cajta shina, pingaihuan cajta shinaca mana ricunchu’ ninmi. Congregacionpi caj solterocunataca respetana, valoranami canchij. w20.08 págs. 28, 29 párrs. 8, 9

Huaquin llajtacunapica gentecunaca Diosmanta uyanatami munancuna. Cutin shujtaj llajtacunapica Diosmanta Bibliamantaca mana tanto uyanata munancunachu. Pero gentecuna uyasha nijpipish mana uyasha nijpipish Jehová Diosca predicashpa catichunmi munan. Chaimantami caicamalla huillaichij ningacama huillashpa catina canchij. Jehová Dios caicamalla huillaichij nishca “qꞌuipami cai shina causaica tucuringa” (Mateo 24:14). Jesusca Noepaj punllacunapi ima shinami gentecunaca micunallapi, ubyanallapi, cazaranallapi yuyarcacuna chashnallatajmi tucuri punllacunapica gentecunaca causanga nircami (Mateo 24:37-39; 2 Pedro 2:5). Jesuspaj discipulocunapish chaicunallapi yuyashpaca predicanatami saqui tucunman carca. Chaimantami Jesusca: “Chaparacuichij” nirca (Mateo 24:42). Ñucanchijpish Jehová Diospaj obrata pajtachina yuyaillami causana canchij. w20.09 págs. 8, 9 párrs. 1, 2, 4

Diabloca dimastij pꞌiñarishcami can. Chaimantami llaquicuna tiyanataca alli intindinchij (Apocalipsis 12:12). Ñallami jatun llaqui punllacuna tiyanga. Chai punllacunamanta parlashpaca Bibliapica: “Cai pacha callarimanta cunancama chashna llaquica mana tiyashcachu” ninmi (Mateo 24:21). Chai punllacunapica ñucanchij familiacunallatajmi tal vez ñucanchijpaj contra tucunga. Huillachunpishmi gobiernocunaca jarcangacuna (Mateo 10:35, 36). ¿Ñucanchijpish Rey Asá shinachu Jehová Dios ñucanchijta cuidanapi, ayudanapi confiashun? (2 Crónicas 14:11). Chai punlla chayamungacamaca Jehová Diosca allichirishca cachun, ñucanchij feta sinchiyachishpa catichunmi munan. Cunanca paica minishtishca horaspi yachachichunca “alli cazuj alli yuyaiyuj” huauquicunatami utilizacun (Mateo 24:45, QC, 1989). Pero ñucanchijpish Diospi sinchi feta charingapaj esforzarishunchij (Hebreos 10:38, 39). w20.09 pág. 18 párrs. 16-18

Jehová Diosca paipaj munaita pajtachingapajca autoridadta charijcunahuanmi paipaj espíritu santohuan pai munashcata rurai tucun. Runacunaca yacuta maiman apangapajca jatun larcacunatami rurancuna. Chashnallatajmi Diosca paipaj munaita pajtachingapajca autoridadta charijcunapaj yuyaicunata cambiai tucun. Jehová Diosca imapish paipaj munaihuan de acuerdo cajpica paipaj espíritu santohuanmi autoridadcunapaj shunguta, yuyaitapish cambiai tucun. Chaimi chai autoridadta charijcunaca Diosta sirvijcunata ayudanata decidishcacuna (Esdras 7:21, 25, 26-ta ricui). ¿Ñucanchijca imatataj rurai tucunchij? Jehová Diosta sirvingapaj autoridadta charijcuna jarcaicunata churajpica paicunamantami Diosta mañai tucunchij (1 Timoteo 2:1, 2; Nehemías 1:11). Apostolcuna causashca punllacunapi shinallatajmi ñucanchijpish huauqui panicunamanta Yaya Diosta mañana canchij (Hechos 12:5; Hebreos 13:3). w20.11 págs. 15, 16 párrs. 13, 14

Ñucanchijhuan yachacuj bautizarijpica ashtahuanmi cushiyarinchij (1 Tesalonicenses 2:19, 20). Cunanlla bautizarishca huauqui panicunaca paicunapaj yachachijcunamantapish, congregacionpi caj shujtaj huauqui panicunamantapish alajatami parlancuna (2 Corintios 3:1-3). Chuscu huatacunapi muyundij Allpapi 10 millón gentecuna Bibliata estudiacujta yachashpaca cushillami sintirinchij. Cai huatacunapica 280 mil gentecunami bautizarishcacuna. Shinapish achcacunaca manaraj bautizarishcacunachu. ¿Paicunataca ima shinataj ayudai tucunchij? Jehová Diosca pacienciata charishcamantami gentecuna paita sirvichun shuyacunraj. Ashalla tiempo faltashcamantami achca gentecuna Yayitu Diosta rijsichun, bautizarichun esforzarina canchij (1 Corintios 7:29a; 1 Pedro 4:7). w20.10 pág. 6 párrs. 1, 2

Rey Saulca mana cazurcachu. Profeta Samuel Diosta imamanta mana cazushcata Saulman huillajpica Saulca paipaj pandarishcataca mana reconocircachu. Pai pandarishcata ricunapaj randica Diosta mana cazushcamantami shujtajcunata juchachirca (1 Samuel 15:13-24). Paica achca cutincunami chashna rurarca (1 Samuel 13:10-14). Saulca paipaj shunguta mana cuidashcamantami jatun tucurca. Paipaj yuyaita mana cambiajpica Jehová Diosca consejarcami. Pero mana cazujpica paitaca ña rey shinata mana chasquircachu. Saulhuan ima tucushcata yachashpaca cashna nishpa tapurishunchij: “¿Maipica Bibliapaj consejocunata ñucanchij causaipi mana pajtachingapajca ima pretextocunatachu churanchij? ¿Bibliapaj consejocunata mana cazushpaca mana imachu tucusha nishpachu yuyanchij? ¿Ñucanchijllataj imamanta pandarishpaca shujtajcunatachu juchachinchij?”. Ñucanchij yuyaipi, causaipi cashna cambiocunata rurana cashpaca utcami cambiana canchij. Mana utca cambiajpica ñucanchij shungu jatun tucunga. Jehová Diospish ñucanchij amigo canatami saquinga. w20.11 pág. 20 párrs. 4, 5

Jovencuna pita sirvinata agllai. Canllatajmi Jehová Dios pi cashcata, paipaj munai maijan cashcata, chai munaitaca ima shina pajtachi tucushcata yachai tucungui (Romanos 12:2). Chashnami cambaj causaipi Jehová Diosta sirvinata agllangui (Josué 24:15). Bibliata cada punlla liyishpa, estudiashpaca Jehová Diostami ashtahuan cꞌuyangui. Shinallataj cambaj fepish ashtahuanmi sinchiyanga. Cambaj causaipi Jehovapaj munaita pajtachinata agllai. Diabloca can yachashcacunahuan canllataj beneficiarishpaca cushillami causangui nishpa yuyachunmi munan. Pero cai mundopaj charina cosascunallapi yuyajcunaca achca llaquicunatami apancuna (1 Timoteo 6:9, 10). Cutin Jehová Diosta uyashpa, paipaj munaita punta lugarpi churashpaca tucuipimi alli ringa. Chashnami yachaj cashcatami ricuchingui (Josué 1:8, NWT ). w20.10 págs. 30, 31 párrs. 17, 18

Apostolcuna causashca punllapica Jesús predicashcami tucui gentecuna esperanzata charichun ayudarca. Jesusca paipaj discipulocunamanca ñuca huillai callarishcataca “cai pachapi tiyaj tucui llajtacunapi huillanguichij” nishpa mandarca (Hechos 1:8). ¿Ima shinataj chai mingashcataca pajtachi tucurcacuna? Jesusca cancuna minishtishca “espíritu santotami cusha” nircami (Juan 14:26, NWT; Zacarías 4:6). Huata 33 Pentecostés fiestapica Jesuspaj discipulocunaca espíritu santotami chasquircacuna. Espíritu santota chasquishpaca chai ratomi huillai callarircacuna. Asha tiempo qꞌuipallami Diospaj alli huillaicunataca achca gentecuna chasquircacuna (Hechos 2:41; 4:4). Discipulocunaca paicunata catirashpa llaquichi callarijpipish mana mancharcacunachu. Paicunaca Diostaca: “Ñucanchij cambajta rurajcunataca, canmanta huillangapaj imatapish mana manchana yuyaita cuhuai” nishpami mañarcacuna. Ña Diospaj espíritu santota chasquishpaca Diospaj Shimitami huillashpa catircacuna (Hechos 4:18-20, 29, 31). w20.10 pág. 21 párrs. 4, 5

¿Jehová Dios paipaj churita causachishcataca imamantataj crinchij? Jesús causarishcataca achca gentecunami ricurcacuna (1 Corintios 15:5-7). Apóstol Pabloca Jesusca puntaca Cefas o apóstol Pedromanmi ricurirca nircami. Jesusta huaquin catijcunapishmi Pedroca Jesús causarishcatami ricurca nircacuna (Lucas 24:33, 34). Shinallataj Jesuspaj 12 apostolcunapishmi Jesús causarishcata ricurcacuna. Qꞌuipaca 500 yalli huauqui panicunapishmi ricurcacuna. Paicunaca Galileapimi Jesushuan tupashcangacuna. Caitaca Mateo 28:16-20-pimi ricui tucunchij. Shinallataj Santiagomanpishmi ricurirca. Paica Jesuspajlla huauquimi cashcanga. Chaicamaca Santiagoca Jesús Mesías cashcataca mana crircachu (Juan 7:5). Pero pai causarishcata ricushpami Santiagoca Jesús Mesías cashcata crirca. Huata 55-pi Pablo corintocunaman quillcacujpica Jesús causarishcata ricujcunaca chai punllacunapica causacurcacunarajmi. Jesús causarishcata mana seguro cajcunaca paicunahuanmi parlai tucurcacuna. w20.12 pág. 3 párrs. 5, 7, 8

Ancha ungüihuan cashpaca cushilla canaca sinchimi ricuringa. Chashna ancha ungushca cajpica Jehová Diosca shuj milagrota rurashpa ñucanchijtaca mana jambingachu. Pero ahuantachun, fuerzasta charichunmi animota cunga (Salmo 94:19). ¿Animangapajca Diosca imatataj ruran? Paica huauqui panicunamanca ungushcacunata ayudana munaitami cun. Chaimantami huaquin huauqui panicunaca ungushcacunapajca huasi ucupi ima ruraicunahuan ayudancuna. Shinallataj ungushcacunahuan Diosta mañashpami ayudancuna. Yayitu Diospish ungushcacuna animachij versocunata yuyarichunmi ayudan. Paraíso Allpapi ungüicuna, llaquicuna mana tiyanata yuyarishpa cushilla sintirichunmi animan (Romanos 15:4). Huaquin huauqui panicunaca paicuna munashca shinaca mana tanto huillai tucuncuna. Chaimantami paicunaca desanimarishca sintirincuna. Estados Unidosmanta pani Laurelca 37 huatacunatami pulmón de acero nishca máquina ucupi causarca. Shinallataj cáncer ungüitami charirca, operarinapishmi carca. Cuerpopipish chꞌican chꞌican ungüicunatami charirca. Enfermerocunaman, paipaj huasipi ayudanaman rijcunamanpishmi predicaj carca. Paica casi 17 gentecunatami Jehová Diosta sirvichun ayudarca. w20.12 págs. 24, 25 párrs. 9, 12

Huata 56 punllacunapimi achca gentecunaca Apóstol Pablota japishpa Taita Diospaj huasimanta canllaman sirijta aisashpa huañuchinata munarcacuna. Cayandij punllaca Pablotaca mandajcunapaj ñaupajmanmi pusharcacuna. Chaimi paipaj contracunaca paitaca mana alli tratashpa ñutuchinata munarcacuna (Hechos 21:30-32; 22:30; 23:6-10). Chaipica Pabloca, “¿cai llaquicunataca ima horascamataj charisha?” nishpami tapurishcanga. Paica pi ayudachunmi minishtirca. ¿Jesusca ima shinataj Pablotaca ayudarca? Pablota carcelpi churangapaj japishca qꞌuipami Jesús chai tuta ricurishpa Pablotaca cashna nirca: “Pablo, ama manchaichu. Ima shinami cai Jerusalenpi ñucamanta huillacungui, chashnallatajmi Romapipish huillana cangui” nirca (Hechos 23:11). Pablo alli huillaicunata Jerusalenpi huillashcamantami Jesusca felicitarca. Shinallataj: ‘Roma llajtamanpish sano, allimi chayangui. Chaipipish huillanguimi’ nircami. Pabloca caita uyashpaca achcatami animarishcanga. Paica shuj Yaya paipaj huahuata rigrapi ugllashpa apacujta shinami sintirishcanga. w20.11 págs. 12, 13 párrs. 1, 3, 4

Diospaj Gobiernopi shuyanaca barcota charicuj fierro shinami ñucanchijtaca sinchita ruran. Problemacunata charishpapish ama yallitaj sustarichunmi ayudan. Chaimanta shamuj punllacunapi paraíso Allpapi tranquilo causai tiyanapi, mana alli cosascunaca ña mana tiyanapi yuyashunchij (Isaías 65:17; Miqueas 4:4). Yayitu Dios imallata ruragrishcatapish shujtajcunaman huillashunchij. Shujtajcunatapish Jesuspaj discipulocuna tucuchun ayudashunchij. Caicunata rurashpaca ñucanchij shuyacushcacuna pajtaringacamami seguros cashun (Hebreos 6:11). Cai tucuri punllacuna cꞌuchuyamucushcamantami ashtahuan problemacunata, preocupacioncunata charishun. Problemacunata charishpapish mana yallitaj sustarishpa Jehová Diospi confiashun. Chaimanta Isaías 30:15-pi ima nishcata yuyashunchij. Chaipica Jehová Diosca: “Ñucapi shunguta churashpa, casijlla causajpica muyujta pirca shinami casha” ninmi. w21.01 pág. 7 párrs. 17, 18

Santiago 5:11-pica Jehová Diosca yallitaj llaquijmi can ninmi (Éxodo 34:6). Chaimantami Jehová Diosca ñucanchij juchacunata perdonan (Salmo 51:1). Bibliapica llaquij cana nishpaca mana perdonanallamantachu parlacun. Ashtahuanpish Jehová Diosca llaquij cashcamantami ñucanchij llaquicunahuan cajpi tucui shunguhuan ayudasha nin (Salmo 37:39; 1 Corintios 10:13). Bibliapica shuj mama paipaj huahuata ima shinami ayudan, chaitapish yallimi Jehová Diosca ñucanchijtaca ayudasha nin ninmi (Isaías 49:15). Huauqui panicuna pandarijpipish, ñucanchijta llaquichijpipish Jehová Dios shinami perdonana canchij. Resintirishcapish mana saquirinachu canchij (Efesios 4:32). Huauqui panicuna llaquicunahuan cajpicarin paicunata llaquishpami ayudana canchij. Cashna apoyashpaca Jehová Diospaj alli ejemplotami catinchij (Efesios 5:1). w21.01 pág. 21 párr. 5

Familiata pushajcunaca Jehová Diospaj ñaupajpi alli ricuringapajca trabajollapica mana yallitaj dedicarinachu can. Ashtahuanpish tucuimanta yallica familiata sinchi feta charichunmi ayudana can. Cꞌuyaitapishmi ricuchina can. Jehová Diosca ñucanchijta cꞌuyashcamantami yachachin, corregin (Hebreos 12:7-9). Jesuspish Jehová Dios shinami paipaj discipulocunataca cꞌuyaihuan yachachirca, corregirca (Juan 15:14, 15). Cunan punllacunapish Jesusca siempremi cꞌuyaihuan consejan (Mateo 20:24-28). Paica ñucanchij juchayuj cashcata, pandarijlla cashcataca allimi intindin (Mateo 26:41). Jehovapaj, Jesuspaj ejemplota catij cusaca huarmi, huahuacuna imapi mana pandarichunca mana shuyanchu. Paicunahuanca mana dimastij pꞌiñarinchu (Colosenses 3:19). Ashtahuanpish paipish juchayuj cashcata yachashcamantami paipaj familiataca cꞌuyaihuan, manso shunguhuan corregin (Gálatas 6:1). Jesús shinallatajmi familiamanca alli ejemplota churashpa yachachin. w21.02 págs. 6, 7 párrs. 16-18

Jehová Diosca paipaj Churita cushpami Jesuspi feta churajcunataca paipaj cachun randirca (Marcos 10:45; Hechos 20:28; 1 Corintios 15:21, 22). Jesús ñucanchijmanta huañushcamantami Jehová Diosca paitaca congregacionpaj uma cachun agllarca. Jesusca congregacionpaj uma cashcamantami gentecunapajpish familiacunapajpish congregacionpi huauqui panicunapajpish leycunata churan. Shinallataj pajtachichunpish ricun (Gálatas 6:2). Ashtahuancarin paica tucuicunatami cꞌuyan, cuidan (Efesios 5:29). Panicunaca congregacionta pushajcunata cazushpami Jesusta respetashcata ricuchincuna. Huauquicunaca panicunata respetashpa paicunata valorashpaca Yaya Dios cushca autoridadta valichishcatami ricuchincuna. Congregacionpi tucuicuna Dios churashca autoridadta respetashpaca tandalla cushillami causashun. Ashtahuancarin Jehová Diostami jatunyachishun. w21.02 págs. 18, 19 párrs. 14-17

Davidca paipaj runacunahuanmi rey Saulmanta miticushpa puricurcacuna. Shuj cutinca miticushpa puricushcamantami paicunapaj familiacunataca huasipi saquishpa rircacuna. Chaimi Davidpaj contracunaca Davidpaj familiacunataca tucui prezu apashpa rircacuna. Chaita yachaj chayashpaca Davidca ‘ñucaca alli macanacujmi cani, paicunataca catishpa rishpa japimushami’ ninapaj randica Jehová Diostami imata ruranata tapurca. Davidca Jehová Diostaca: “¿Prezu apashpa ricujcunataca catishpa rishachu? ¿Paicunataca cati japishachu?” nishpami tapurca. Chaimi Mandaj Diosca: “Cati japinguimi. Paicunataca prezushpa apamushcatapish quishpichinguimi. Rilla” nishpa cutichirca (1 Samuel 30:7-10). ¿Caimantaca imatataj yachai tucunguichij? Jovencuna, ima alli decisionta agllangapajca cancunapaj yaya mamata, congregacionta pushajcunatapishmi consejota cuchun mañana canguichij. Congregacionta pushajcunaca achca experienciatami charincuna. Paicunataca Jehová Diosca congregacionta pushachun, huauqui panicunata cuidachunmi agllashca. Diosca paicunataca shuj regalota shinami ricun (Efesios 4:8). Chaimantami paicunapi confiai tucunguichij. Paicunapaj ejemplota catishpa, paicunapaj consejocunata chasquishpaca alli decisioncunatami agllanguichij. w21.03 págs. 4, 5 párrs. 10, 11

Jesusca Bibliapi yachachishcacunata maijanpish mana pajtachishpaca shuj runa paipaj huasita allpa jahuapi shayachij shinami can nircami. Pai sinchita trabajajpipish imapaj mana valingachu. Por ejemplo, achcata tamyajpi, achca huaira shamujpica huasica ratomi urmanga (Mateo 7:24-27). Shinallataj Bibliapi yachachishcacunata mana ñucanchij causaipi pajtachishpaca imapaj mana valingachu. Ima llaquicuna ricurijpi, contracuna catirashpa llaquichijpica ñucanchij fepish mana sinchichu canga. Pero Bibliapi yachachishcacunata ñucanchij causaipi pajtachishpaca ima decisioncunatapish allimi agllashun, tranquilo causaitami charishun. Shinallataj ñucanchij feca sinchimi canga (Isaías 48:17, 18). Pero tucuimanta yallica Jehová Diostami jatunyachina canchij. Pruebacunata chꞌimbapurangapajca Jehová Diosta mañanata, paipi confianatami manataj saquina canchij. Bibliata estudianatapish manataj saquinachu canchij. Chaita rurajpica Jehová Diosca ñucanchijtaca manataj saquingachu. Paita cꞌuyashpa catichunpish pi mana jarcai tucungachu (Hebreos 13:5, 6). w21.03 págs. 15, 18 párrs. 6, 20