Junio

Shungumantami yachacujcunamantaca preocuparina canchij. Ñucanchij huauqui panicunata shinami ricuna canchij. Diosta sirvingapaj paicunapaj causaipi cambiocunata ruranaca mana jahuallachu can. Chaimantami yachachijcunaca congregacionpi huauqui panicunata rijsichun ayudana canchij. Chaita rurajpica yachacujca Jehová Diospajmanmi cꞌuchuyanga. Dioshuan alli amigopishmi tucunga. Problemacunata charishpapish ñaupajmanmi cati tucunga. Yachacujtaca congregacionpaj parte cashcata, huauqui panicunata familiata shina ricuchunmi ayudai tucunchij. Diosta sirvijcunahuan alli apanacuchun ayudajpica Diosta mana sirvij amigocunamantapish jahuallami caruyanga (Proverbios 13:20). Diosta mana sirvij amigocuna paimanta caruyajpica Diospaj pueblopimi alli amigocunata taringa (Marcos 10:29, 30; 1 Pedro 4:4). w20.10 pág. 17 párrs. 10, 11

Jehová Dioshuan alli apanacungapajca Jesushuanmi alli amigos cana canchij. Ishqui yuyaicunata ricushun. Puntapica, Jesusca paipaj discipulocunamanca: “Ñucata cꞌuyashcamantami cancunataca ñuca Yayallataj cꞌuyan” nircami (Juan 16:27). Shinallataj paica: “Yayapajmanca pi mana paillatajca chayai tucunchu. Ñucami Yayapajman chayachij ñan cani” nircami (Juan 14:6). Jesushuan manaraj alli apanacushpa Jehovapaj amigos tucusha nishpaca shuj punguta mana yaicushpa huasiman yaicusha nicuj shinami can. Jesuspish chai laya chꞌimbapuraimantami parlarca. Paica: “Ñucaca ovejacunapaj pungumi cani” nircami (Juan 10:7). Ishquipica, Jesusca tucuipimi paipaj Yaya shina cashcata ricuchirca. Jesusca: “Pipish ñucata rijsijca, ñuca Yayatapish ñami rijsin” nircami (Juan 14:9). Jehová Diosta alli rijsingapajca Jesustami alli rijsina canchij. Jesusmanta ashtahuan yachashpaca paitaca ashtahuanmi cꞌuyashun. Shinami Yaya Diostapish ashtahuan cꞌuyashun. w20.04 págs. 21, 22 párrs. 5, 6

Huaquincunaca camapimi pasancuna o silla de ruedaspimi purincuna. Shujtajcunaca sanpi nanaihuanmi causancuna. Cutin caishujcunaca mana ricui tucuncunachu. ¿Paicunaca sanocunahuan, jovencunahuanca callpai tucuncunachu? Ari. Achca mayorlla o ungushca huauqui panicunaca huiñai causaiman apaj ñanpimi callpai tucuncuna. Pero paicunaca mana paicunapaj fuerzallahuanchu callpancuna. Ashtahuanpish tandanacuicunata telefonopi uyashpa, o internetpi ricushpami Dios cushca fuerzata chasquincuna. Shinallataj familiacunaman, doctorcunaman, enfermeracunaman predicashpami paicunapish Diosta sirvichun ayudancuna. Jehová Diosta mana tanto sirvi tucushpaca ama llaquirishunchijchu. Huiñai causaiman apaj ñanpi mana callpai tucushcatapish ama yuyashunchijchu. Jehová Diosca paipi crishcamanta, paita sirvingapaj avanzashcata rurashcamantami ñucanchijta cꞌuyan. Jehová Dios ayudachunmi minishtinchij. Paica ñucanchijtaca manataj saquingachu (Salmo 9:10). Ñucanchijpaj cꞌuchullapi shinami can. w20.04 págs. 29, 30 párrs. 16, 17

¿Religionta charijcunahuanca ima yuyaicunamantataj parlai tucunchij? Paicunahuan imapi de acuerdo cashcata ricushunchij. Por ejemplo, paicunaca shuj solo Diostachari adorancuna. O Jesús tucuicunata quishpichij cashcatachari crincuna. Mana cashpaca cai Allpapi tiyaj llaquicuna ñalla tucurina cashcatachari crincuna. Diospaj Shimimanta huillacujpi paicunapaj crishcacuna ñucanchij crishcacuna shina cajpica, chai yuyaicunata japishpami paicunahuan parlana canchij. Gentecunaca paicunapaj religionpi yachachishcacunataca manachari tucuita crincuna. Ima religionmanta cashcata yachashpaca paicuna imallapi crishcatami ricuna canchij. Shuj misioneroca: “Huaquin gentecunaca trinidadpimi crinchij nishpapish Yayapish, Churipish, espíritu santopish mana chaillataj cashcatami crincuna. Caicunata yachashpami paicunahuanca jahualla parlani” ninmi. Ñucanchijpish gentecuna imapi crishcata yachangapaj esforzarishunchij. Chaita rurashpaca Apóstol Pablo shinami: “Tucuicunahuanmi paicuna ima shina cajpipish, paicuna shina tucurcani” nishun (1 Corintios 9:19-22). w20.04 págs. 10, 11 párrs. 9, 10

Daniel, Juan nishca shinaca Jehová Diosta, Jesusta sirvijcunaca jatun llaqui punllacunapimi quishpiringacuna. Chaimantami shamuj punllacunapi ima tucunamanta mana manchana canchij. Daniel nishca shinaca ‘libropi quillcashca’ shuticunata charijcunami quishpiringacuna. Ñucanchij shuticuna chai libropi quillcashca tiyachunca Jesuspimi tucui shunguhuan crina canchij (Juan 1:29). Shinallataj Diosman mingarishpami bautizarina canchij (1 Pedro 3:21). Ashtahuancarin Jehová Diosmanta gentecunaman huillashpami paipaj gobiernota apoyana canchij. Cunan punllacunami Jehová Diospi, paipaj organizacionpipish ashtahuan confiana canchij. Paipaj gobiernotapish apoyanami canchij. Chaita rurashpaca Jehová Dios paipaj gobiernohuan janaj ladomanta mandajta, ura ladomanta mandajta tucuchijpica quishpirishunmi. w20.05 pág. 16 párrs. 18, 19

Adán y Evaca Diospaj shuti Jehová cashcatami rijsircacuna. Shinallataj paicunaca Jehová Dios tucuita rurashcata, paicunaman causaita cushcata, sumaj paraisota cushcata, alli cusata, alli huarmita cushcatapishmi yacharcacuna (Génesis 1:26-28; 2:18). ¿Adán y Evaca Jehová Dios paicunapaj imallata rurashcacunapi yuyashpa catircacunachu? ¿Jehová Diosta cꞌuyashpa, paita agradicishpachu catircacuna? Diablo paicunata pandachijpica caicunata mana pajtachishcatami yachanchij. Diabloca shuj culebrata parlachishpami Evataca: “¿Cancunataca Taita Diostajchu, cai huertapi tiyaj yuracunamantaca ama micunguichij nirca?” nishpa tapurca (Génesis 2:16, 17; 3:1). Chai tapuita rurashpaca Diabloca Diosmantami llullarca. Chaimi Evaca Diosmanta mana alli yuyai callarirca. Diosca, tucui yuracunamantami micui tucunguichij. Pero shuj yurallamantami mana micuna canguichij nircami (Génesis 2:9). Diablo chashna tapushpaca Dios mitsa cashcata yuyachunmi munarca. Evaca: “¿Diosca imatashi ñucamanca mana cusha nin?” nishpami tapurishcanga. w20.06 págs. 3, 4 párrs. 8, 9

Maijan huauqui panicunaca shuj huauqui o shuj pani llaquichijpimi pꞌiñarishcacuna. Apóstol Pabloca maijan ñucanchijta pꞌiñashpa juchachijpica mana alli sintirij cashcatami yacharca. Maipica maijan huauqui panicunaca yangamantachari mana alli tratangacuna. Pero resentirishca saquirishpaca congregacionmantami caruyai tucunchij. Chaimantami cuidarina canchij. Sudamérica ladopi causaj huauqui Pablotaca yangamantami juchachircacuna. Chaimantami ancianocunaca chaita crishpa Pabloca mana allitami rurashca nishpa disciplinarcacuna. Paica ¿ima shinataj sintirirca? Pabloca: “Ñucaca dimastij colera sintirishcamantami congregacionmantaca asha asha caruyarcani” ninmi. Maijancunaca jatun juchata rurashcapi cutin cutin yuyashpami, “Diosca ñucataca mana cꞌuyangachu” nishpa llaquilla sintirincuna. Arrepintirishpapish Diospaj pueblopica mana cai tucunichu nishpami yuyancuna. Huauquicuna chashna llaquicunata chꞌimbapurashcata ricushpaca paicunamantaca ¿imatataj yuyanchij? w20.06 pág. 19 párrs. 6, 7

Ima llaquicuna ricurijpica chai llaquicuna ñucanchijta dañota rurai tucushcata yachashpami utca anchurina canchij (Hebreos 5:14). Por ejemplo, televisionpi, peliculacunapica huainayanahuan chagrushca ricunacunami ricurin. Jehová Diosca huainayanataca mana ricunayachinchu. Huainayashpa causaj gentecunaca paicunallatajmi dañota rurancuna, shujtajcunatapishmi llaquichincuna (Efesios 5:5, 6). Chaimantami Diosta sirvijcunaca ima ricunacunata, ima pugllanacunataca alli ricushpa agllana canchij. Chashnami Yayitu Diosmantaca mana caruyashun. Apostatacunapaj yachachishcacunamantami caruyana canchij. Paicunaca ñucanchij huauqui panicunamanta, Diospaj organizacionmantaca llullacunatami nincuna (1 Timoteo 4:1, 7; 2 Timoteo 2:16). Cai llullacunami ñucanchij fetaca chiriyachi tucuncuna. Apostatacunaca ñucanchij pꞌiñanacuchun, huauqui panicunapi ama confiachunmi munan. Chaimantami paicuna ñucanchijta pandachichun, umachunca mana saquina canchij (1 Timoteo 6:4, 5). w20.09 págs. 29, 30 párrs. 13, 15

Cusandij huarmindij cꞌuyanacushpa respetohuanmi tratana can (Efesios 5:33). Bibliapica: “Imatapish cujmi, cushcata japijta yalli cushicun” ninmi (Hechos 20:35). Cꞌuyaita, respetota ricuchingapajca ishquindijpurami humilde cana can. Humilde cusa huarmicunaca cushillami causancuna. Por ejemplo, Estiven shuti huauquica: “Ñuca huarmihuan shujlla shina trabajashpaca problemacuna ricurijpipish ñucanchijpurami ayudanacunchij. Caimi ñucapajca alli can nishpa yuyanapaj randica caimi ñucanchijpajca alli can nishpami yuyanchij” ninmi. Shinallataj paipaj huarmi Estefanica: “Pꞌiñanacushpalla causajhuanca pi mana causanata munanchu. Ñucanchijca ima problemata charishpapish chai problema imamanta tiyashcatami ricunchij. Chai qꞌuipaca Jehová Diostami mañanchij. Publicacioncunapimi huaquin informacioncunatapish mashcanchij. Chashnami ishquindijpura pꞌiñanacunapaj randica problemacunata allichinchij” ninmi. Cusapish huarmipish caishujmanta chaishujmanta preocuparishpaca cushillami causangacuna. w20.07 págs. 3, 4 párrs. 5, 6

Jehová Diosta sirvingapajca mana ñucanchijllapichu confiana canchij. Apóstol Pablotaca rijsishca, respetashca Gamaliel runami yachachirca (Hechos 5:34; 22:3). Shuj tiempoca Pablopish judiocunapaj rijsishcami carca (Hechos 26:4). Chashna cashpapish Pabloca mana jatun tucurcachu. Paillapitaj mana confiarcachu. (Filipenses 3:8). Jesuspaj discípulo tucujpimi Pablotaca pai huacharishca llajtapi causajcunallataj pꞌiñarcacuna (Hechos 23:12-14). Pablotaca romano cajpipish romanocunallatajmi macarcacuna, carcelpipish churarcacuna (Hechos 16:19-24, 37). Pabloca juchayuj cashcataca allimi yacharca. Chaimantami allicunata ruranaca paipajca sinchi cashcanga (Romanos 7:21-25). Contracuna llaquichijpipish, juchayuj cashpapish ñaupajmanmi catirca. Paica irquilla cashpapish cushicuihuanmi cani nircami. ¿Imamantataj chashna nirca? Pabloca irquilla shina sintirishpaca Jehová Dios ima shina ayudashcatami ricurca (2 Corintios 4:7; 12:10). w20.07 pág. 16 párrs. 7, 8

Cunan punllacunapish Diospaj Gobiernomanta huillanapimi ocuparishpa causana canchij. Jesusca ñuca huañushca qꞌuipapish huillanaca mirarishpami catinga nircami. Chaimi Jesús causarishca qꞌuipaca paipaj discipulocunataca achca pescadocunata japichun ayudarca. Chai huashaca tucui ruraicunamanta yalli predicana importante cashcatami intindichirca (Juan 21:15-17). Shinallataj Jesusca manaraj cieloman rishpaca paipaj discipulocunamanca: ‘Ñuca huillai callarishcataca tucui llajtacunapimi huillana canguichij’ nircami (Hechos 1:6-8). Huaquin huatacuna qꞌuipaca Jesusca apóstol Juanmanca shuj muscuipimi paipaj punlla ima shina canata ricuchirca. Apóstol Juanca angelcuna tucui laya gentecunaman huillachun pushacujtami ricurca (Apocalipsis 1:10; 14:6). Jehová Diosca alli huillaicunata muyundij Allpapi ultimocama predicachunmi munan. w20.09 pág. 9 párr. 5

Abrahamca sinchi problemacunatami charirca. Paipaj cꞌuyashca huarmi Saraca huahuacunataca mana chari tucurcachu. Chaimantami achca huatacunataca llaquilla causarcacuna. Saraca huahuacunata mana chari tucushcamantami Abrahamtaca: “Ñucata sirvij Agar huarmihuan huahuacunata chari” nirca. Pero Agarca Ismaelta chichu saquirishpaca Sarataca pꞌiñai callarircami. Chaita ricushpami Saraca Agartaca llaquichi callarirca. Chaimi Agarca miticushpa rirca (Génesis 16:1-6). Qꞌuipaca Saraca Isaac shuti huahuatami charirca. Abrahamca Ismaeltapish, Isaactapishmi cꞌuyaj carca. Pero Ismael Isaacta mana alli tratajta ricushpami Abrahamca Agartapish Ismaeltapish huasimanta llujshichishpa cacharca (Génesis 21:9-14). Achca huatacuna huashaca, Jehová Diosca Abrahamtaca paipaj churi Isaacta shuj ofrendata shina cuchunmi mandarca (Génesis 22:1, 2; Hebreos 11:17-19). Cai ishqui cutinmi Abrahamca Jehová Dios paipaj churicunapi ima nishcata pajtachinata crirca. w20.08 pág. 4 párrs. 9, 10

Causarijcunaca ñaupa causaita huashaman saquishpa, Diospaj mandashcacunata cazushpaca achcatami cushicungacuna. Paicunapaj causaipi cambiocunata rurajcunaca huiñaita causangapajmi causaringacuna. Cutin Diosta mana cazujcunataca Yayitu Diosca paraisopi ima millaita rurachunca mana saquingachu (Juan 5:28, 29; Isaías 65:20). Proverbios 10:22-pica: “Mandaj Diostaj cushca allicunaca charijyachinmi. Chaica ima llaquipipish mana churanchu” ninmi. Jesús mandacujpimi Diosta sirvijcunaca cai shimicuna pajtarishcata ricungacuna. Jehová Dios paipaj espíritu santohuan ayudajpimi paicunaca Jesús yachachishcacunata cazushpa catingacuna. Shinallataj asha ashami jucha illaj tucungacuna (Juan 13:15-17; Efesios 4:23). Cada punllami allicunata rurashpa catingacuna. Cuerpopipish alli saludtami charingacuna. Chaipi causacushcamantami cushilla sintiringacuna (Job 33:25). w20.08 pág. 17 párrs. 11, 12

Maijan solterocunaca paicunallataj mana cazaranatami decidishcacuna. Shujtajcunaca cazaranata munashpapish paicunapaj alli cashca shuj huauquita o shuj panita mana tarishcamantami mana cazarashcacuna. Cutin maijancunaca viudacuna, viudocunami saquirishcacuna. Ima shina cajpipish solterocunataca: “¿Imamantataj mana cazarangui?” nishpaca mana tapunachu canchij. Shinallataj paicuna ayudata mana mañajpica pihuan cazaranata mashcashpaca mana ayudanachu canchij. Ñucanchij ayudasha nijpica: “¿Paicunaca ima shinashi sintiringa?” nishpami tapurina canchij (1 Timoteo 5:13). Solterocunaca mana cazarashcamanta paicunata juzgachunca mana munancunachu. Cutin paicunapaj alli cualidadcunamanta valorajpica paicunaca achcatami agradicincuna. Paicunamanta llaquirinapaj randica Yayitu Dios mingashcacunata pajtachishcata valorashunchij. Caicunata rurajpica paicunaca cancunataca mana minishtinchijchu nicujta shinaca mana sintingacunachu (1 Corintios 12:21). Ashtahuancarin congregacionpi paicunata valorashcata, respetashcatami cuentata cungacuna. w20.08 págs. 29, 30 párrs. 10, 14

Qꞌuipaca Jesusca apóstol Pablomanmi ricurirca (1 Corintios 15:8). Pablotaca Saulo nishpami rijsijcuna carca. Paica Damascoman viajacushpami Jesús jahua pachamanta shuj muscuipi shina rimashcata ricurca (Hechos 9:3-5). Pabloca Jesusta uyashcamanta, ricushcamantami Jesús causarishcataca seguro carca (Hechos 26:12-15). Pabloca Jesusta catijcunataca catirashpami llaquichij carca. Chaimanta Jesús ricurishcata Pablo gentecunaman parlajpica paicunaca ima tucushcata yachanatami munashcangacuna. Pabloca Jesús causarishcata seguro cashpaca shujtajcunapish pai causarishcata crichunmi ayudarca. Jesús causarishcata gentecunaman huillacushpaca Pabloca llaquicunatami charirca. Paica azotishca, carcelpi churashca, viajacushpapish yacupi casi ahogarishcami carca (1 Corintios 15:9-11; 2 Corintios 11:23-27). Jesús causarishcata seguro cashpaca pai crishcataca huañuna cashpapish difindishpami catirca. Caimanta yachashpaca Jesús causarishcata, huañushcacuna causarinatami crinchij. w20.12 pág. 3 párrs. 8-10

Cashna nishpa tapurishunchij: “¿Tucui tandanacuicunaman ringapajchu esforzarinchij?” Tandanacuicunapimi Diosta sirvingapaj animota chasquinchij. Huauqui panicunahuan cashcamantapishmi cushilla sintirinchij (Mateo 11:28). Cashna nishpapish tapurishunchij: “¿Ñucallatajchu Bibliata estudiangapajca tiempota surcuni? ¿Ñuca familiahuan causashpaca cada semanachu Bibliamanta tandalla yachanchij? ¿Gentecunaman predicangapaj, yachachingapajpish tucui pudishcatachu ruranchij?”. ¿Imamantataj cashna nishpa tapurina canchij? Bibliapica Jehová Diosca ñucanchij yuyaipi, shungupi imata yuyacushcataca allimi yachan ninmi. Shinallataj ñucanchij yuyaipi, shungupi imata yuyacushcataca allimi yachana canchij (1 Crónicas 28:9). Ñucanchij causaipi ima cambiocunata rurasha nishpaca Jehovatami ayudahuai nishpa mañana canchij. Cunanmi shamuj punllacunapi tiyana pruebacunata ahuantangapajca allichirina canchij. w20.09 pág. 19 párrs. 19, 20

Gentecuna paipaj discipulocuna tucuchunca Jesusca huaquin ejemplocunata churashpami yachachirca. Paica torreta shayachisha nij runamantami parlarca. Jesusca: “Maijantaj shuj torreta shayachisha nishpaca, tucuringacama rurangapajca mashna pajtana cashcata ricungapajca ¿manachu tiyarishpa ricunguichijraj?” nircami. Shinallataj macanacungapaj risha nij shuj mandajmantami parlarca. Chai jatun mandajca paipaj soldadocuna shujtaj soldadocunata mishai tucushcatami alli ricunaraj can nircami (Lucas 14:28-32). Gentecunaca manaraj Jesuspaj discipulocuna tucushpami paita catisha nishpaca alli yuyanaraj can. Paicunataca cada semanami Bibliamanta estudiachun animana canchij. Yachachijca shuj estudiota cungapajmi alli prepararina can. Qꞌuipaca yachacuj imalla minishtishcata ricushpa jahualla shimicunahuan, intindirinalla yuyaicunahuan yachachingapajmi esforzarina canchij. Chashnami paicunapaj causaipi ima yachachishcacunataca pajtachinga (Nehemías 8:8; Proverbios 15:28a). w20.10 págs. 7, 8 párrs. 5, 7

Jesusca shujtajcunaman huillachunmi mandarca. Chaimantami paica, “cancunata ñuca tucui imalla mandashcacunata yachachinguichij” ninapaj randica, “cancunata ñuca tucui imalla mandashcacunata paicunapish rurachun yachachinguichij” nirca. Bibliamanta yachacujcunatapish Jesús mandashcata ima shina pajtachina cashcata, imata rurana cashcatami yachachina canchij (Hechos 8:31). ¿Jesús mandashcata shujtajcunapish cazuchunca ima shinataj yachachina canchij? Piman Bibliamanta yachachicushpaca Yayitu Dios imata rurachun munashcatami yachachinchij. Pero mana chaillatachu rurana canchij. Ashtahuanpish ima yachashcacunata paicunapaj causaipi pajtachichunmi yachachina canchij (Juan 14:15; 1 Juan 2:3). Escuelapi, trabajopi cashpa o ima ricunacunata, pugllanacunata agllacushpaca shujtajcunapajca alli ejemplomi cana canchij. Yachacujhuan Diosta mañacushpaca Diospaj espíritu santo paita ayudachunmi mañana canchij (Juan 16:13). w20.11 págs. 2, 3 párrs. 3-5

Jesuspaj discipulocunaca chꞌican chꞌican shimicunapimi huillana carca. Pero Dios Quillcachishcacunamantaca asha copiacunallatami charircacuna. Paicunaca Bibliata alli intindingapajca cunan punllacunapi shinaca mana publicacioncunata, librocunata charircacunachu. Cashna jarcaicunata charishpapish casi 30 huatacunataca tucui cai pachapi causajcunamanmi huillashcacuna carca (Colosenses 1:6, 23). Cunan punllacunapipish Jehová Diosca paipaj pueblotaca ñaupajmanmi pushacun. Shinallataj fuerzasta cushpa, Bibliapi yachachishpami ñaupajman pushacun. Bibliapimi Jesús ima shina huillashcata paipaj discipulocunamanpish huillachun mandashcata yachai tucunchij (Mateo 28:19, 20). Jehová Diosca tucuicunata shuj shinalla ricuj cashcamantami “tucui llajtacunaman, chꞌican chꞌican aillucunaman, chꞌican chꞌican rimaicunaman, tucui pueblocunamanpish huiñaipaj alli huillaita” huillashca canga nirca (Apocalipsis 14:6, 7). Yayitu Diosca tucui laya gentecuna paipaj Mandanamanta yachaj chayachunmi munan. w20.10 págs. 21, 22 párrs. 6-8

Rey Davidca Yaya Dios mandashcacunatami cꞌuyarca (Salmo 1:1-3). Davidca Jehová Dios humildecunata quishpichij cashcata, cutin jatun tucushcacunataca mana ricunayachishcataca allimi yacharca. Chaimantami Davidca Dios paipaj yuyaicunata, paipaj ruraicunata corregichun saquirca. Paica: “Ñucata cunaj Mandaj Diostaca alli nicushallami. Tuta cajpipish ñuca yuyaita yachachicunguillami” nircami (Salmo 16:7). Humildecuna cashpaca Bibliapaj consejocuna ñucanchij yuyaicunata cambiachunmi saquishun. Chashnami ñucanchij mana alli yuyaicunataca mana rurashun. Bibliapaj consejocunaca caimari ñan caillapi purichij nicuj shinami canga. Mana alli ruraicunatapish ama rurachun nicuj shinami canga (Isaías 30:21). Jehová Diosta tucuipi cazushpaca achcatami beneficiarishun (Isaías 48:17). Allita rurangapaj esforzarishpaca shujtajcunapaj ñaupajpica mana pingaipi saquirishunchu. Shinallataj Jehová Dioshuanca allimi apanacushun. Paica ñucanchijtaca shuj cꞌuyaj yaya layami ricunga (Hebreos 12:7). w20.11 pág. 20 párrs. 6, 7

Chaimi Corinto llajtapi causaj huaquin huauqui panicunapish paicuna shina cri callarishcangacuna (1 Corintios 15:12). Cutin shujtaj huauqui panicunaca Jesusta manaraj catishpa juchayuj cashcamanta huañushca shina cashcatami yuyashcangacuna. Pero Jesusta catishpa paicunapaj jucha perdonashca cajpica cutin causai callaricushcata shinami yuyashcangacuna. Chaimantami huaquincunaca Jesús causarishcata, huañushcacuna causarinataca mana crircacuna. Chashna crishcamantami paicunapaj feca imapaj mana valirca. Dios paipaj Churita mana causachishca cajpica tucuicunapaj juchacunaca mana perdonashca, mana quishpichishcachu canman carca. Huañushcacuna causarinata mana crijcunaca esperanza illajpishmi causarcacuna (1 Corintios 15:13-19; Hebreos 9:12, 14). Apóstol Pabloca Jesús huañushcacuna chaupimanta causarishcatami alli yacharca. Huaquincunaca Jesús manaraj causarishca cajpimi cai Allpapi paicunaraj ña causachishcacuna carca. Pero paicunaca cutinmi huañurcacuna. Pabloca Jesusmanta parlashpaca: “Paica huañushcacuna causarinata ricuchishpa punta causarijmi” nircami. Jesusca punta cutin espíritu shina causarishpami jahua pachaman rirca (1 Corintios 15:20; Hechos 26:23; 1 Pedro 3:18, 22). w20.12 pág. 5 párrs. 11, 12

Apostolcuna causashca punllapica Cuerpo Gobernante huauquicunaca Jerusalenpimi carcacuna. Paicunaca congregacionpi orden tiyachun, huauqui panicuna tandalla cachunmi ayudarcacuna (Hechos 2:42). Por ejemplo, huata 49-pimi huaquin huauqui panicunaca circuncisionmantaca chꞌican chꞌican yuyaicunata charircacuna. Chaimi paicunaca Diospaj espíritu santo ayudachun saquircacuna. Huauqui panicuna chꞌicanyashca cajpica huillanaca sinchimi canman carca. Apostolcuna, ancianocunaca judiocuna cashpapish paicunapaj costumbrecunata, pi yachachishcacunataca mana catircacunachu. Ashtahuanpish Diospaj Quillcachishcacuna, Diospaj espíritu santo ayudachunmi mashcarcacuna (Hechos 15:1, 2, 5-20, 28). Diospaj ayudata mashcashcamantami paicuna ima decidishcataca bendiciarca. Chaimi congregacionpica tranquilo, tandalla causaita charircacuna. Shinallataj huillashpami catircacuna (Hechos 15:30, 31; 16:5). Cunan punllacunapipish Diospaj organizacionca huauqui panicunapish shuj orden tiyachun, tandalla causachunmi ayudacun. w20.10 págs. 22, 23 párrs. 11, 12

Congregacioncunapica Jehová Diosta ashtahuan sirvingapajmi huaquin responsabilidadcunata chasquinata yuyanchij. Pero ungushca cashcamanta, mayorlla cashcamanta o shujtaj cosascunamantami mana chasqui tucunchij. Cashna desanimarishca sintirijpica rey Davidpaj ejemplomi ayudai tucun. Davidca Diospaj huasitami shayachinata yuyarca. Pero Diosca chai huasita shayachichunca paitaca mana saquircachu. Shinapish chai huasita shayachichun Yayitu Dios agllashcatami apoyarca. Paica achca cullquihuan, orohuanmi ayudarca. Cai ejemplomi ñucanchijpajca alli can (2 Samuel 7:12, 13; 1 Crónicas 29:3-5). Francia llajtamanta Hugues shuti huauquica ungüimantami congregacionpi pushaj canata saquirca. Huasipipish imata mana rurai tucurcachu. Paica: “Callaripica imapajpish mana valinichu nishpami dimastij llaquilla sintirircani. Pero qꞌuipaca imata mana rurai tucushcapi yuyanapaj randica allita rurashcapimi yuyarcani. Ñucaca Gedeón shina paihuan caj 300 runacuna shinami shaicushca cashpapish ñaupajman caticuni” ninmi (Jueces 8:4). w20.12 págs. 25, 26 párrs. 14, 15

Apóstol Juanca Diosta sirvijcuna cꞌuyaita ricuchinamantami yachachirca. Mateo, Marcos, Lucas librocunamanta yallica Juan libropimi cꞌuyaimanta parlan. Cai librocunapica Diosta sirvijcuna imata ruracushpapish cꞌuyaimanta rurana cashcatami ricuchin (1 Juan 4:10, 11). Juanpish cꞌuyaita ricuchinatami yachana carca. Juanca jovenraj cashpaca mana siempre cꞌuyaita ricuchircachu. Por ejemplo, shuj cutinca Jesuspish, paita catijcunapish Samariata pasashpami Jerusalenman rina carcacuna. Pero Samariapica Jesustapish, paita catijcunatapish mana puzachisha nircacunachu. Juanca Jesustaca cai tucuicunata chingachingapaj jahua pachamanta ninata cachachun mañashun nirca (Lucas 9:52-56). Shuj cutincarin Juanca paipaj huauquihuanmi paicunapaj mamataca Jesús mandacujpi shujtaca alli ladoman, caishujtaca lluqui ladoman tiyachingui nishpa mañachun cacharcacuna. Shujtaj apostolcunaca cashna nishcata yachaj chayashpaca achcatami pꞌiñarircacuna (Mateo 20:20, 21, 24). Juan chashna pandarijpipish Jesusca paitaca cꞌuyashpami catirca (Juan 21:7). w21.01 págs. 8, 9 párrs. 3, 4

Jehová Diosca shujtajcuna beneficiarichunmi ima decisionta alli ricushpa agllan. Por ejemplo, Jehová Diosca ñucanchijmanmi causaita cushca. Pero pailla beneficiaringapajca causaitaca mana cushcachu. Ashtahuanpish ñucanchij cushilla, alajata causachunmi cushca. Jehová Dios paipaj Churita cai Allpaman cachachun, paipaj Churi ñucanchijmanta huañuchunca pi mana obligarcachu. Pero ñucanchijta ayudangapajmi chaita rurarca. Jesuspish shujtajcunata ayudangapajmi alli decisioncunata agllarca. Por ejemplo, shuj cutinca Jesusca shaicushca cashpapish samarinapaj randica achca gentecunamanmi yachachirca (Marcos 6:31-34). Familiata pushajcunapajca familiapaj alli decisioncunata agllanaca shuj valishca responsabilidadmi can. Chaimantami alli ricushpa, paicunapaj familiapi yuyashpa imatapish alli decidincuna. Shinallataj ima decisionta agllangapajpish Jehová Dios ayudachunmi saquin. Chaita rurajpica paicunapaj familiaca achcatami beneficiaringa (Proverbios 2:6, 7; Filipenses 2:4). Cusacunaca Jehová Diospaj, Jesuspaj ejemplota catishpaca familiataca allimi cuidangacuna. w21.02 pág. 7 párrs. 19-21

Asaca jovenraj cashpaca humilde, mana manchajmi carca. Por ejemplo, paipaj yaya huañujpica paimi paipaj yayapaj randi mandai callarirca. Shinallataj chai llajtapi tiyaj tucui yanga dioscunata tucuchingapajmi shuj campañata rurarca. Paica Judá llajtapi causajcunataca Yayitu Diosta sirvichun, Diospaj mandashcacunata cazuchunmi ayudarca (2 Crónicas 14:1-7). Shinallataj Etiopía llajtamanta mandaj Zera paipaj millón soldadocunahuan Judá llajtapi causajcunata llaquichinaman shamujpica rey Asaca Jehová Diostami ayudachun mañarca. Paica: “¡Mandaj Taita Dioslla, can ayudashpallami achca soldadocuna cajpipish mishachingui! Ashacunalla cajpipish, can ayudashpaca mishachinguillami. Chaimantami ñucanchijta Mandaj, can Taita Diosllapi shungutaca churanchij. Ñucanchijta ayudahuaiyari” nircami. Chashna mañashpaca Asaca Jehová Diospi confiashcatami ricuchirca. Diospi confiashcamantami paitaca etíope soldadocunata mishachun Diosca ayudarca (2 Crónicas 14:8-12). Asapajca millón soldadocunahuan macanacunaca sinchimi cashcanga. Pero Asaca Jehová Diospi confiashcamantami paicunataca mishai tucurca. w21.03 págs. 5, 6 párrs. 12, 13

Bibliapica Diosta sirvijcunaca caishujmanta chaishujmanta cꞌuyanacushcatami parlan. Por ejemplo, David y Jonatanca alli amigocunami tucurcacuna. Bibliapica Jonatanca Davidtaca pai quiquinta shinallatajmi cꞌuyarca ninmi (1 Samuel 18:1). Jehová Diosca Saulpaj randica Davidtami rey cachun agllarca. Chaimi Saulca achcata pꞌiñarishpa Davidtaca huañuchinata yuyarca. Pero Jonatanca paipaj yaya Saúl rey cajpipish Davidtami rey cachun apoyarca. Jonatanpish, Davidpish siempremi amigocuna cashun, ñucanchijpurami apoyanacushun nishpami ari ninacurcacuna (1 Samuel 20:42). Jonatanpish, Davidpish alli amigos cangapajca imapish jarcachunca mana saquircacunachu. Por ejemplo, Jonatanca 30 huatacunahuan ñaupami Davidpajca carca. Chashna cashpapish Jonatanca: “Davidca jovenrajmi can, ima experienciata mana charinchu, paipaj amigopish mana cashachu” nishpaca mana yuyarcachu. Chashna yuyanapaj randica Davidtami achcata respetarca. w21.01 págs. 21, 22 párrs. 6, 7

Jesusca paita catijcunataca cushilla causaitami charinguichij nircami. Pero llaquicunatapishmi charinguichij nircami (Mateo 10:22, 23; Lucas 6:20-23). Jesusta catinaca cushicuitami cun. Shinapish maipica ñucanchij familiacuna Diosta sirvichun jarcajpi, o gobiernocuna catirashpa llaquichijpi o trabajopi, o escuelapi ñucanchij compañerocuna mana allita rurachun obligasha nijpimi llaquilla sintirinchij. Shujtajcuna ñucanchijta catirashpa llaquichichunca mana munanchijchu. Pero Santiago libropica problemacunata charishpaca cushillami cai tucunchij ninmi (Santiago 1:2, 12). Jesuspish paita catijcunataca catirashpa llaquichijpica cushichishcami canguichij nircami (Mateo 5:11). Jehová Diosca paita sirvijcuna llaquicunata charishpapish cushilla causachunmi paipaj espíritu santohuan Santiagota quillcachun ayudarca. w21.02 págs. 26, 27 párrs. 1, 2, 5

Timoteopaj punllapica Dios mingashcacunataca huaquin discipulocunaca mana valorarcacunachu. Por ejemplo, Demas, Figelo, Hermogenes, Himeneo, Fileto, Alejandropish (1 Timoteo 1:19, 20; 2 Timoteo 1:15; 2:16-18; 4:10). Paicunaca callaripica sinchi feta charishpapish Diospaj yachachishcacunata mana valorashcamantami paita sirvinata saquircacuna. ¿Dios mingashcacunata saquichunca Diabloca ima trampacunatataj churan? Paica Dios yachachishcacunata saquichunca Internetpi, televisionpi, peliculacunapimi panda yuyaicunata churan. Shinallataj gentecuna ñucanchijmanta mana allicunata nijpi o ñucanchijta catirashpa llaquichijpi manchaimanta predicanata saquichunmi munan. Apostatacunapaj panda yuyaicunatapish uyashpa Dios mingashcacunata saquichunmi munan. Mana cuidadota charishpaca Diospaj yachachishcacunatami asha asha saquishun (1 Timoteo 6:21). w20.09 págs. 27, 28 párrs. 6-8

¿Cantaca shuj amigo, shuj familia llaquichishcachu? Cashna llaquita charishpaca rey Davidmantami yachai tucungui (2 Samuel 15:5-14, 31; 18:6-14). Pi ñucanchijta llaquichijpica ima shina sintirishcatami Jehová Diosmanca tucuita huillana canchij (Salmo 6:6-8). David ima shina sintirishcapi yuyashpa catishunchij. Paica Absalontaca achcatami cꞌuyarca. Ahitofelpipish achcatami confiarca. Pero paicunaca ishquindijmi Davidtaca huañuchisha nircacuna. Paicuna chashna rurajpipish Davidca ‘ñuca shujtaj amigocunapish paicunatami apoyanga’ nishpaca mana yuyarcachu. Shinallataj dimastij llaquilla cashpapish shujtaj ladoman miticushpa ringapajca mana paillachu rirca. Ashtahuanpish Jehová Diosta mañashpami alli decidirca. Shinallataj paipaj amigocunapaj ayudatapishmi mashcarca. Paica ima decisionta agllashpaca paipaj causaipica ratomi pajtachij carca. Paica Jehová Diospi, paipaj amigocunapimi confiashpa catirca. w21.03 págs. 15, 17 párrs. 7, 8, 10, 11