Julio

Ñucanchij mañashcacunata Yayitu Dios cutichichunca Jesuspaj alli amigocunami cana canchij. Jesuspaj shutipi chashna cachun nishpallaca mana saquirinachu canchij. Ashtahuanpish ñucanchij mañashcacunata Jehová Dios cutichichunca Jesús ima shina ayudashcatami alli intindina canchij. Jesusca paipaj apostolcunataca: ‘Tucui imatapish ñucamanta Yayata mañajpica ñucaca cushami’ nircami (Juan 14:13). Jehovami ñucanchij mañashcacunata uyashpa cutichin. Pero pai imata ruragrishcata pajtachichunca paipaj Churimanmi mingashca. Jehová Diosca manaraj ñucanchij mañashcacunata cutichishpaca Jesusta cazushcata, mana cazushcatami ricun. Por ejemplo, Jesusca: “Shujtajcuna cancunata ima mana allita rurajpi cancuna paicunata perdonajpica, jahua pachapi caj cancunapaj Yayapish cancunapaj juchacunata perdonangami. Shujtajcuna cancunata ima mana allita rurajpi cancuna mana perdonajpica, cancunapaj Yayapish cancunapaj juchacunata mana perdonangachu” nircami (Mateo 6:14, 15). Chaimantami Jehová Dios shina, Jesús shina shujtajcunataca cꞌuyaihuan tratana canchij. w20.04 págs. 21, 22 párr. 6

Apóstol Pabloca gentecuna imata parlasha nishcata, imata yachasha nishcatami ricurca. Chaimi paicuna munashca shina yachachirca. Por ejemplo, Pabloca Listra llajtapi gentecuna Diospaj Shimimanta mana tanto yachashcatami cuentata curca. Chaimantami paica intindirinalla shimicunahuan, rijsishca chꞌimbapuraicunahuan huillaj carca. Pabloca cozichacunamanta, alli causaimantapishmi parlaj carca. Gentecunapajman o paicunapaj huasiman cꞌuchuyacushpaca paicuna imata munashcata, imata ruraj cashcata alli ricushunchij. Chashnami paicuna munashca yuyaicunamanta yachachishun. Huaquincunaca chagrapichari trabajacuncuna, yantatachari parbacuncuna o shujtajcunaca bordacuncunachari. Mana cashpaca imatachari cꞌatucuncuna. Pudishpaca paicuna imallata ruracujta ricushpami huillana canchij (Juan 4:7). Paicuna churarishcata ricushpami maimanta cashcata, imata ruraj cashcata, ima equipo deportivota munashcata yachai tucunchij. w20.04 pág. 11 párrs. 11, 12

Ansiedad ungüita charishcamantami maijan huauqui panicunaca shujtajcunahuan tandanacunata, parlanata manchancuna. Gentecunahuan tandanacunata manchashpapish tucui tandanacuicunaman ringapajmi esforzarincuna. Shujtajcunahuan parlanata manchashpapish huillanamanmi llujshincuna. ¿Canpishchu shina sintirishcangui? Ama sustarichu. Achcacunami cashna llaquicunata chꞌimbapurancuna. Jehová Diosta shungumanta sirvijpica paica cushillami sintirin. Yayitu Dios bendiciashcamanta, fuerzata cushcamantami mana shaicurishcanchij (Filipenses 4:6, 7). Ungüicunahuan cashpapish, llaquicunata charishpapish Jehová Diosta sirvinata manataj saquishpaca paita cushichicushcatami yuyarina canchij. Ñucanchijca mana sano cashpapish callpashpami caticunchij (2 Corintios 4:16). Jehová Diospaj ayudallahuanmi tucuicuna cai carrerataca mishangacama callpai tucushun. w20.04 pág. 31 párrs. 20, 21

Jehová Dios cai Allpata ima shina rurashcata ricushpami pai yachaj cashcata yachanchij (Hebreos 3:4). Allpallapimi causai tiyan. Chaimantami cai Allpaca mana shujtaj planetacuna shina can. Caipi yuyashun. Allpaca carupi tiyaj llavishca huasi shinami can. Chaipica achca gentecunami causan. Pero gentecuna rurashca huasihuan, Dios rurashca Allpahuanca mana igualchu can. Por ejemplo, ¿chai huasipi causajcunaca paicunallataj huairata, micunata, yacuta rurai tucuncunachu? ¿Basuracunatapish huasi canllaman mana shitashpaca causai tucuncunamanchu? Mana. Ashtahuanpish Allpapica achca gentecuna, animalcunami causan. Cai Allpapica huairata, micunata, yacutami charinchij. Caicunaca mana nunca tucurinchu. Ashtahuancarin basuracunataca shujtaj planetamanca mana shitancunachu. Chaicunata mana shitajpipish cai Allpaca alajami can. Causangapajpish allimi can. ¿Imamantataj chashna sumaj Allpa can? Jehová Diosmi cai Allpapi utilizashcacunataca cutin tigra utilizachun rurashca. w20.05 págs. 20, 22 párrs. 3, 4

Satanasmi Diospaj shutitaca yanganchirca. Shinami Satanasca Diablo, llullaj tucurca. Evaca Diablotami crirca (1 Timoteo 2:14). Evaca Jehová Diospi confianapaj randica Diablopimi confiarca. Chashnami Yaya Diosta mana cazushpa Jehová Dios ama micungui nishca frutata micurca. Qꞌuipaca Adanmanpishmi chai frutata curca (Génesis 3:6). Diabloman Eva ima shina cutichina cashcapi yuyashun. Paica: “Cantaca mana rijsinichu. Ñuca Jehová Diosta sí, alli rijsini. Paitaca achcatami cꞌuyani. Paipimi confiani. Paimi ñucanchijmanca tucuita cushca. ¿Maitataj chaitaca ninguiyari? ¡Ñucamanta anchui! ¡Ama ñucata molestai!” ninami carca. Jehová Diosca paipaj ushushi paita cꞌuyashca cajpi, paita tucuipi sirvishca cajpica cushillami sintirinman carca (Proverbios 27:11). Pero Evapish Adanpish Jehová Diosta cꞌuyashcataca mana ricuchircacunachu. Chaimantami Jehová Diospaj shutitaca mana difindircacuna. w20.06 pág. 4 párrs. 10, 11

Panicuna Jehová Diospaj sinchita trabajashcamantami agradicina canchij. Paicunaca tandanacuna huasicunata shayachishpa, chaicunata allichishpami ayudancuna. Shinallataj mushuj shimipi huillangapaj, Betelpi voluntaria shina trabajangapajmi sinchita esforzarincuna. Paicunaca jatun acapana tiyajpi, shuj terremoto tiyajpi, sinchita tamyajpica chaicunapi ayudanamanmi rincuna. Chashnallataj shujtaj panicunaca publicacioncunata traducishpami ayudancuna. Cutin maijancunaca precursoras, misioneracunami can. Cazada panicunapish paicunapaj cusacuna Diospaj organizacionpi Dios mingashcacunata pajtachichunmi paicunataca ayudancuna. Paicuna chashna ayudajpimi cusacunaca mingashcataca jahualla pajtachincuna (Efesios 4:8). Congregacionta alli pushajcunaca panicuna congregacionpi alli trabajaj cashcata, paicunapuramanta alli huillajcuna cashcatami yachancuna. Congregacionta pushaj huauquicunaca achca experienciata charij panicuna jovenlla panicunataj ayudai tucushcataca allimi yachancuna (Tito 2:3-5). Chaimantami cai tucui panicunataca cꞌuyaita ricuchina canchij, agradicinapish canchij. w20.09 págs. 23, 24 párrs. 13, 14

Jehová Diosca paimanta caruyashcacunataca manataj cungarinchu. Paita sirvingapaj imallata rurashcatapish yuyaipimi charin (Hebreos 6:10). Jehová Diosca paipaj pueblota ima shina cuidashcata ricuchingapajca profeta Isaiasca shuj chꞌimbapuraitami churarca. Paica: ‘Diosca ovejacunata michij shinami paipaj ovejacunataca michinga. Malta cꞌari ovejacunataca paipaj rigrapimi apanga. Marcashpami apanga’ nircami (Isaías 40:11). Alli michij Jehová Diosca paipaj ovejacuna paimanta caruyajpica ¿ima shinataj sintirin? Jesusca paipaj Yaya ima shina sintirishcatami paipaj discipulocunaman intindichirca. Paica: “Shuj runa patsaj ovejacunata charijca, shuj chingarijpica ¿imatashi ruranman? ¿Manachu iscun chunga iscunta saquishpa, urcucunata rishpa chai chingarishcata mashcagrin? Chaita japishpaca, caishuj iscun chunga iscun mana chingarishcacunamanta yallimi cushicunman. Chaica chashnatajmi” nircami (Mateo 18:12, 13). w20.06 págs. 19, 20 párrs. 8, 9

Ñucanchijpajca Jehová Diosta sirvinami tucuimanta yalli valishca can (Salmo 27:4; 84:10). Shuj huauqui, Jehová Diosta ashtahuan sirvisha nishpaca allitami ruracun. Pero Dios mingashcacunata chasquishpaca shujtajcunata yallimi cani nishpaca mana yuyanachu can (Lucas 17:7-10). Ashtahuanpish shujtajcunata ayudana yuyaillami cana can (2 Corintios 12:15). Bibliapica huaquin runacuna jatun tucushcatami parlan. Por ejemplo, Diotrefesca jatun tucushpa congregacionpi pai mandaj canatami munarca (3 Juan 9). Uziaspish Dios mana mingashca trabajota rurashcamantami jatun tucushcata ricuchirca (2 Crónicas 26:16-21). Absalonpish rey tucusha nishpami gentecunataca nij tucushpalla cꞌuyarca (2 Samuel 15:2-6). Cai versocunapi ricushca shinaca Jehová Diosca jatun tucushcacunataca manataj ricunachinchu (Proverbios 25:27). Jatun tucushcacuna, paicunata alabachun munajcunaca llaquipimi urmancuna (Proverbios 16:18). w20.07 pág. 4 párrs. 7, 8

Huaquin familiacunaca paicunapaj llajtapi llaquicuna tiyashcamantami shujtaj llajtapi causanaman o trabajanaman rishcacuna. Paicuna maipi saquirinata agllashca llajtapica shujtaj shimitachari parlan. Chaimi paicunapaj huahuacunaca escuelaman rishpaca chai shimita yachana minishtiringa. Tal vez yaya mamacunapish trabajota mashcangapajca chai llajtapi tiyaj shimita yachanami minishtiringa. Pero chai llajtapica paicuna parlashca shimipichari shuj congregación o shuj grupo tiyanga. ¿Cai familiaca maijan congregacionmantaj rina can? ¿Paicunapaj propio shimita parlaj congregacionman o chai llajtapi tiyaj shimita parlaj congregacionman? Familiata pushajcunami maijan congregacionman rinataca decidina can. Chaipajca familiapaj ima alli cashcatami alli ricuna can. Familiata pushaj imata decidishcatami respetana canchij. Imata decidishca cajpipish paipaj familiataca congregacionpi cushilla chasquishunchij (Romanos 15:7). w20.08 pág. 30 párrs. 17, 18

Alli saludta charishcamanta, estudiashca cashcamanta, rijsishca llajtapi huacharishcamanta, achca cullquita charishcamantami Diospajca valishcami cani nishpa mana yuyana canchij. Chashna mana yuyajpica Diosca ñucanchijmanmi fuerzata cushpa ayudanga. Cai pachapica achca yachajcuna, achca poderyujcunami tiyan. Shinapish Diospaj pueblo ucupica cai mundopaj yachajcuna shina mana tiyanchu (1 Corintios 1:26). Cai mundopi charij shina o yachaj shina mana cashpapish Jehová Diostami sirvi tucunchij. Chashnami Jehová Dios ima shina ñucanchijta ayudashcataca ricui tucunchij. Por ejemplo, maijancunaca ñucanchij crishcacunamanta dudachunmi munangacuna. Paicunata manchashpaca Diospaj ayudatami mañana canchij (Efesios 6:19, 20). Ungushca cashpapish paita sirvishpa catingapajmi fuerzata cuchun mañana canchij. Jehová Dios ayudajpimi ñucanchij feca ashtahuan sinchiyanga. w20.07 págs. 16, 17 párr. 9

Diospaj Gobiernota punta lugarpi churangapajca Abraham shinami huaquin cosascunata saquingapaj listos cana canchij (Marcos 10:28-30; Hebreos 11:8-10). Llaquicuna illaj causanata ama shuyashunchij. Diosta sirvijcunapish llaquicunatami charin (Santiago 1:2; 1 Pedro 5:9). Tucuri punllacunapi causacushcamantami chꞌican chꞌican llaquicuna ricurin. Chaimantami Dios cusha nishcacunapi shuyashpa causana canchij. Diospaj Gobierno mandai callarijpica achca bendicioncunatami charishun. Huañushca familiacunatapishmi cutin ricushun. Abraham sinchi feta charishcamanta, pacienciahuan shuyashcamantami paitapish, paipaj familiatapish Jehová Diosca causachinga. Paraisopi paicunata chasquingapajca ¿imatataj rurana canchij? Abraham shinami Diospaj Gobiernotaca punta lugarpi churana canchij. Llaquicunahuan chꞌimbapuracushpapish sinchi fetami charina canchij. Shinallataj Jehová Dios cusha nishcacuna pajtaringacamami pacienciahuan shuyana canchij (Miqueas 7:7). w20.08 págs. 5-7 párrs. 13, 14, 17

Contracuna ñucanchijta huañuchijpipish Jehová Dios causachinataca allimi yachanchij. Diospaj cꞌuyaimanta pi mana anchuchi tucushcatapish allimi yachanchij (Romanos 8:35-39). Ñucanchijca Diablota apoyajcunata mana manchashcamantami mana manchashpa Diosta sirvi tucunchij. Jehová Diosca huañushcacunata causachina esperanzata cushpami Diablota ama manchachun ayudan. Chashnami tucuita yachaj cashcata ricuchin. Contracuna ñucanchijta huañuchisha nijpica Jehová Dios causachinatami crina canchij. Chaimanta cashna nishpa tapurishunchij: ¿Cada punlla imata decidicushpapish Yaya Diospi confiashcatachu ricuchini? (Lucas 16:10). Diospaj Gobiernota punta lugarpi churashpa ¿Jehová Dios ayudanapichu confiani? (Mateo 6:31-33). Caicunata pajtachishpaca ima llaquicuna ricurijpipish ñaupajmanmi catishun (Proverbios 3:5, 6). w20.08 pág. 18 párrs. 15, 16

Diosta sirvijcunaca Bibliatami alli utilizanata yachana canchij. Tandanacuicunapimi Bibliata ima shina alli utilizanata yachai tucunchij. Pero Biblia yachachishcacunata gentecuna valorachun ayudasha nishpaca ñucanchijrajmi Bibliataca alli estudiana canchij. Shinallataj ñucanchij fetami sinchiyachina canchij. Chaipajca Bibliataca mana liyinallachu canchij. Ashtahuanpish imata yachachishcacunapimi cutin cutin yuyana canchij. Huaquin versocunata mana alli intindishpa chai versocunata alli intindichingapajca ñucanchij publicacioncunapimi investigana canchij (1 Timoteo 4:13-15). Chashnami gentecunamanca Bibliahuan alli yachachi tucushun. Pero shuj versota liyicushpaca chai verso imata yachachisha nishcatami alli intindichina canchij. Chai verso paicunapaj causaipi ima shina yuyai tucushcatapishmi intindichina canchij. Bibliaca alli estudiajcuna cashpaca alli yachachijcunami tucushun (2 Timoteo 3:16, 17). w20.09 págs. 28, 29 párr. 12

Predicana yuyailla causangapajca Jehová Dios ima shina ayudacushcatami yuyarina canchij. Por ejemplo, achca publicacioncunatami charinchij. Jw.org paginapica achca publicacioncunata, huaquin grabacioncunata, videocunata, JW Broadcasting programatami ricui tucunchij. Tucui caicunataca mil yalli shimicunapimi ricui tucunchij (Mateo 24:45-47). Huillashpa catingapajca Jesuspaj ejemplotami catina canchij. Jesusca tucui tiempopimi predicana yuyailla causarca (Juan 18:37). Diablo tucui cai pachapi tiyaj mandanacunata cusha nijpi, gentecunapish paita reyta rurasha nijpica Jesusca mana chasquircachu (Mateo 4:8, 9; Juan 6:15). Jesusca cai mundopi tiyaj cosascunataca mana munarcachu. Shinallataj jarcaicuna ricurijpipish huillashpami catirca (Lucas 9:58; Juan 8:59). Ñucanchijpish pruebacuna ricurijpica huillashpa catingapajmi cai punllapaj versopi apóstol Pablo nishcata catina canchij. w20.09 págs. 9, 10 párrs. 6, 7

Ñucanchij congregacionpi sinchita trabajaj panicuna tiyashcamantami achcata agradicinchij. Paicunaca tandanacuicunapimi participancuna. Huauqui panicunamantapishmi preocuparincuna. Tandanacuna Huasicunatapish allichishpami ayudancuna. Shinapish cai panicunaca chꞌican chꞌican problemacunatami charincuna. Huaquincunaca familiacunamantami huaquin jarcaicunata charincuna. Shujtajcunaca paicunapaj mayorlla yaya mamacunatami cuidancuna. Cutin maijancunaca paicunallami huahuacunata cuidangapaj, mantiningapajpish esforzarincuna. Cai mundopi causaj gentecunaca huarmicunataca mana respetancunachu. Pero Bibliapica huarmicunaman animota cuchunmi yachachin. Por ejemplo, apóstol Pabloca Roma llajtapi Diosta sirvij Febeta alli chasquichun, pai minishtirishca cosascunata cuchunmi mañarca (Romanos 16:1, 2). Apóstol Pabloca huarmicunataca imapaj mana valijta shinami ricuj carca. Shinapish Jesusta cati callarishpaca paipaj ejemplota catishpami huarmicunataca cꞌuyaihuan, respetohuan tratarca. Ñucanchijpish panicunatami apoyana canchij. w20.09 pág. 20 párrs. 1, 2

¿Jesús mandashcata shujtajcunapish pajtachichunca imallatataj rurana canchij? Yachacujmanca cai tapuicunatami rurai tucunchij. ¿Biblia yachachishcata cambaj causaipi pajtachishpaca imallapitaj mejorashcangui? ¿Shujtajcunapish Bibliamanta yachanatachu minishtincuna? ¿Canpish paicunata ayudangapajca imatataj rurai tucungui? (Proverbios 3:27; Mateo 9:37, 38). Jesusca, “ñuca tucui imalla mandashcacunata paicunapish rurachun yachachinguichij” nishcatami yuyarina canchij. Chashna nishpaca Jesusca Jehová Diosta tucui shunguhuan cꞌuyanata, shinallataj shujtajcunatapish cꞌuyanatami nisha nicurca (Mateo 22:37-39). Jesús mandashcacunata cazuchun ayudashpaca paicunapish predicachunmi ayudashun. Maijan yachacujcunaca predicanatami manchancuna. Pero gentecunaman mana manchashpa huillachun, Jehová Dios ayudanatami intindichina canchij (Salmo 18:1-3; Proverbios 29:25). w20.11 págs. 3, 5 párrs. 6-8

Bibliamanta yachacujcuna imalla minishtishcamantami Jehová Diosta mañana canchij. Shina rurashpami prepararishcata ricuchinchij. Paicunaman Biblia yachachishcata alli intindichingapaj Dios ayudachunmi mañana canchij. Chashnami Biblia yachachishcacunaca paicunapaj shunguman chayanga. Yachacujcunata ayudanataca mana cungarinachu canchij. Bibliata yachacujca paillatajmi Diosta uyanata paihuan parlanata yachana can. ¿Ima shinataj Diosta uyai tucun? Bibliata tucui punllacuna liyishpa (Josué 1:8; Salmo 1:1-3). Yachacujtaca cada punlla Yayitu Diosta mañachunmi yachachina canchij. Estudiota callaringapajpish tucuchingapajpish Yaya Diostami shungumanta mañana canchij. Yachacujtapish ayudahuai nishpami mañana canchij. Chashnami yachacujca Jesuspaj shutipi shungumanta Jehová Diosta mañanata yachanga (Mateo 6:9; Juan 15:16). Caipi yuyashun. Yachacuj cada punlla Bibliata liyishpa, Diosta mañashpaca paipajmanmi cꞌuchuyanga (Santiago 4:8). w20.10 págs. 8-10 párrs. 8, 10, 11

Apostolcuna causashca punllacunapi shinallatajmi cunan punllacunapipish Diospaj organizacionca tandalla cachun, orden tiyachun ayudacun (Hechos 16:4, 5). Por ejemplo, maijan llajtaman rishpa o mai congregacionman rishpaca Huillaj revistata ima shina yachachijta, ima temamanta parlashcataca allimi yachanchij. Chaita yachashpami cushilla sintirinchij. Diospaj espíritu santomi cashna tandalla cachunca ayudan (Sofonías 3:9). ¿Ñucanchijpish imallatataj rurai tucunchij? Cashna nishpa tapurishunchij: “¿Congregacionpica tandalla, tranquilo causachunchu ayudani? ¿Pushajcunatapish cazunatachu yachani? ¿Congregacionpi ima mingashcacunata pajtachijta ricushpaca ñucapichu confiancuna? ¿Huauqui panicunata ayudajchu cani? ¿Tucuipi puntualchu cani?” (Santiago 3:17). Imapi mejoranata yachashpaca Jehová Dios paipaj espíritu santohuan ayudachunmi mañana canchij. Ñucanchij causaipi ima cambiocunata rurangapajpish Diospaj espíritu santo ayudachunmi saquina canchij. Chaita rurajpimi huauqui panicunaca ñucanchijtaca cꞌuyangacuna, valorangacunapish. w20.10 págs. 23, 24 párrs. 12, 13

Ñucanchijpajca Diospaj Shimica shuj espejo shinami can (Santiago 1:23-25). Casi tucuicunami huasimanta llujshingapajca espejopi ricurinchij. Imapi allichirinata cuentata cushpaca shujtajcuna manaraj ricujpimi allichirinchij. Chashnallatajmi Bibliata cada punlla liyishpaca ñucanchij causaipi ima cambiocunata ruranata o allichinata cuentata cunchij. “Diospaj Shimita punllanta yachashunchij” nishca folletotami achca huauqui panicunaca manaraj huasimanta llujshishpa liyinata yachancuna. Chashna liyishpami paicunapaj yuyaita cambiachun saquin. Ima liyishcatapish paicunapaj causaipi pajtachinatami ricuncuna. Ñucanchijpish Bibliata liyinataca manataj saquinachu canchij. Imata liyishcatapish cada punllami cutin cutin yuyarina canchij. Caita ruranaca mana sinchi layami ricurin. Pero chashna rurashpaca huiñai causaiman apaj ñanpimi purishpa catishun. Bibliaca ecota rurangapaj maquina shinami can. Cai maquinaca cuerpo ucupi imalla tiyashcatami ricuchin. Pero Bibliapi tiyaj consejocunamanta, ñaupajman pushaj huauquicunapaj consejocunamanta beneficiaringapajca humildesmi cana canchij. w20.11 págs. 18, 20, 21 párrs. 3, 8

Jesusta punta catijcunataca achca cutinmi contracunaca catirashpa llaquichircacuna. Pero maipica tranquilo causaitami charircacuna. Tranquilo causai tiyajpica tucuicunami Diosmanta huillanapi, Diosta sirvinapi ocuparircacuna. Hechos libropica, huillanata mana saquishcamanta Jehová Dios bendiciajpimi Jesusta catijcunaca ashtahuan mirarishcata parlan (Hechos 9:26-31). Jesusta punta catijcunaca huillangapajmi tucui oportunidadcunata aprovecharcacuna. Por ejemplo, apóstol Pabloca Éfeso llajtapi ashtahuan huillana oportunidadta charishcamantami chaipi predicashpa catingapaj saquirirca (1 Corintios 16:8, 9). Apostolcuna ima decidishcata congregacioncunaman huillajpica discipulocunaca Diospaj Shimimanta alli huillaitapish huillashpami catircacuna (Hechos 15:30-35). ¿Huillashpa catishcamantaca imataj tucurca? Cai punllapaj versopi ashtahuan intindichin. w20.09 pág. 16 párrs. 6-8

Adanca juchata rurashcamantami paillataj huañurca. Paipaj huahua huahuacunapish cunan punllacunacama huañushpa catin. Pero Jehová Dios paipaj Churita causachishcamantami shuj alaja esperanzata charinchij. Apóstol Pabloca Jesusmanta parlashpaca: ‘Huañushcacunapaj chaupimanta causarinapish shuj runallamantami tiyan. Ima shinami Adanmantaca tucuicuna huañun, chashnallatajmi Cristopi cajcunaca tucuicuna causachishca canga’ nircami (1 Corintios 15:22). Apóstol Pabloca ‘Adanmantaca tucuicunami huañun’ nishpaca ¿imatataj nisha nicurca? Adanpaj tucui huahua huahuacunamantami parlacurca. Paipaj huahuacuna cashcamantami juchayujcuna canchij. Shinallataj tucuicunapish huañunchij (Romanos 5:12). Adanca huiñai causaita chasquigrijcunapaj ucupica mana canchu. ¿Imamanta? Paica jucha illaj runami carca. Chashna jucha illaj cashpapish Diosta mana cazunatami decidirca. Chaimantami Jesuspaj sacrificiomantaca paica mana beneficiari tucun. Ima shinami chivocuna shina caj gentecunata Jesús juzgashpa huiñaipaj tucuchinga. Chashnallatajmi Adanpish huiñaipaj huañushca carca (Mateo 25:31-33, 46; Hebreos 5:9). w20.12 pág. 5 párrs. 13, 14

Ima responsabilidadta mana chasquishpa ama desanimaringapajca Diosta alli sirvij angelcunapaj ejemplomanta yuyashun. Shuj cutinca Jehová Diosca huaquin angelcunatami rey Acabta ima shina pandachingapaj huaquin yuyaicunata paicunapish nichun mañarca. Cada unomi paicuna ima yuyashcata Diosman huillarcacuna. Pero Diosca shuj ángel ima nishcallatami chasquirca. Can ima nishcami tucui alli llujshinga nircami (1 Reyes 22:19-22). Caita yachashpaca ¿caishuj angelcunaca desanimarircacunachu? ¿Paicunaca ‘ñucanchij nishcacunataca mana chasquinchu, deganami nishcanchij’ nishpachu yuyarcacuna? Paicuna chashna nishcataca ni maipi mana huillanchu. Angelcunaca humildecuna cashcamantami Jehová Diostaca siempre jatunyachisha nincuna (Jueces 13:16-18; Apocalipsis 19:10). Testigo de Jehová cana, Diospaj Gobiernomanta huillana tucuimanta yalli valishca cashcata yuyarishunchij. Jehová Diospaj, huauqui panicunapajca humilde canami ashtahuan importante can. Chaimanta Jehová Diosta cashna humilde canata amataj saquingapaj mañashunchij. Bibliapi Diosta sirvijcunamanta humilde canatapish yachashunchij. Huauqui panicunata ayudangapajpish tucui pudishcata rurashunchij (1 Pedro 5:5). w20.12 pág. 26 párrs. 16, 17

Cascota churarij shina canaca Dios cusha nishcacunapi yuyailla canami can. Diosca sumaj causaitami paita sirvijcunamanca cunga (1 Tesalonicenses 5:8; 1 Timoteo 4:10; Tito 1:1, 2). Huañujpipish paimi causachinga. Chaicuna yuyaillami causana canchij. Chashnallatajmi problemacuna ñucanchij yuyaita ama pandachichunca Dios cusha nishcacunapi yuyailla causana canchij. Chaipajca Jehová Dios shina yuyangapajmi esforzarina canchij. Por ejemplo, charinalla cosascunapi confianapaj randica Jehová Diospimi confiana canchij (Salmo 26:2; 104:34; 1 Timoteo 6:17). Espiritupaj espadaca Diospaj Shimimi can. Diospaj Shimica panda yachachishcacunamanta caruyachun, mana alli ruraicunata saquichunmi ayudan (2 Corintios 10:4, 5; 2 Timoteo 3:16, 17; Hebreos 4:12). Chaimantami ñucanchijca Bibliataca alli estudiana canchij. Jehová Diosca Bibliamanta alli yachajcuna cachunca tandanacuicunahuan, Bibliamanta yachana escuelacunahuanmi yachachin (2 Timoteo 2:15). w21.03 págs. 27-29 párrs. 4, 10, 11

Juanca prezupi cashpapish shujtajcunamanta preocuparishcatami ricuchirca. Por ejemplo, paica Apocalipsis librotami quillcarca. Imalla tucunata yachachunmi Juanca chai librotaca congregacioncunaman quillcashpa cacharca (Apocalipsis 1:1). Paica Patmos islamanta llujshishca qꞌuipami Jesuspaj causaimanta parlaj Juan librota quillcarca. Shinallataj huauqui panicunata animangapaj, sinchiyachingapajmi quimsa cartacunata quillcarca. ¿Paipaj ejemplotaca cati tucunchijchu? Diabloca cullquita charingapaj, famoso tucungapaj ñucanchij tiempota, fuerzata gastachunmi munan. Pero muyundij Allpapica huauqui panicunaca gentecunaman predicangapaj, Jehová Diospajman cꞌuchuyachun ayudangapajmi tucui pudishcata rurancuna. Chashnami paicunaca shujtajcunata cꞌuyashcata ricuchincuna. w21.01 pág. 10 párrs. 9, 10

Jonatanca Saulpaj churi cashpapish Davidpaj randica ñucami mandana derechota charini nishpaca mana yuyarcachu (1 Samuel 20:31). Paica humilde cashcamantami Jehová Dios Davidta rey cachun agllashcataca shungumanta apoyarca. Saúl pꞌiñarijpipish Jonatanca Davidtaca apoyashpa, cꞌuyaita ricuchishpami catirca (1 Samuel 20:32-34). Jonatanca quiquin huauquita shina Davidta cꞌuyashcamantami paitaca shuj enemigota shinaca mana ricurca. Jonatanca macanacungapajpish alli entrenashcami carca. Bibliapica paita, paipaj yayataca: ‘Aguilacunata yalli callpajcunami can. Leoncunata yalli fuerzayujcunami can’ ninmi (2 Samuel 1:22, 23). Shinapish Jonatanca alli macanacujmi cani nishpaca mana jatun tucurcachu. Paica Davidpaj alli ruraicunata ricushpaca mana envidiarcachu. Ashtahuanpish David mana manchaj Jehová Diospi confiashcata yachashpami cushilla sintirirca. David Goliatta huañuchishca horasmantami Jonatanca paita ashtahuan cꞌuyai callarirca. w21.01 págs. 21, 22 párrs. 6, 8, 9

Diosta sirvijcunapaj uma o pushajca Jesusmi can. Paica jucha illaj cashcamantami alli pushaj can. Pero, shuj pani cazarajpica paipaj cusami familiata pushaj can. Paipaj cusa juchayuj cashcamantami maipica paita cazunaca sinchi ricuringa. Maijan panicuna cazaranata yuyacushpaca cai tapuicunapimi yuyarina canguichij: ¿Chai soltero huauquica familiata alli cuidaj, alli pushaj cashcataca ima shinataj ricuchicun? ¿Jehová Diostachu paipaj causaipica punta lugarpi churan? Caita mana pajtachicujpica ¿cazarashca huasha Yayitu Diosta alli sirvichunca de verdadchu ayudanga? Shinallataj ¿ñucapish matrimonio ucupi cushilla cangapajca cꞌuyaj, perdonaj, mana mitsachu cani? ¿Pacienciatapish charinichu? ¿Jehová Dioshuanpish allichu apanacuni? (Eclesiastés 4:9, 12). Shuj huarmi manaraj cazarashpa alli decisioncunata agllashpaca cazarashca qꞌuipaca cushillami causanga. Achca panicunami paicunapaj cusacunata cazushpaca alli ejemplota cuncuna. Cashna panicunahuan Jehová Diosta tandalla sirvinaca alajami can. w21.02 pág. 8 párrs. 1, 2

Cai último huatacunapica achca publicadorcunaca ashtahuan predicangapajmi mushuj shimita yachai callarishcacuna. Chaimantami paicunaca shujtaj congregacionpi ayuda minishtirijta ricushpaca chai congregacionman pasashcacuna. Mushuj shimipi huillangapajca cada unomi decidincuna. Mushuj shimita yachangapaj achca tiempo minishtirijpipish congregacionpica achcatami ayudancuna. Paicunapaj experienciacunahuan, cualidadcunahuanmi huauqui panicunataca achcata sinchiyachincuna. Paicuna chashna esforzarijta ricushpaca cushillami sintirinchij. Shuj huauqui siervo ministerial cangapaj o congregacionta pushaj cangapajca mushuj shimita alli yachanaca mana shuj requisitochu can. Chaipaj randica pushajcunaca siervo ministerialcunata, congregacionta pushajcunata agllangapajca Bibliapi tiyaj requisitocunata pajtachishcatami ricuna can (1 Timoteo 3:1-10, 12, 13; Tito 1:5-9). w20.08 pág. 30 párrs. 15, 16

Achca gentecunaca alli saludta, achca cullquita, familiapi cushilla causaita charishpallami alli causaita chari tucunchij nincunami. Pero Santiagoca mana chaimanta parlacurcachu. Ashtahuanpish Santiagoca Jehová Diospaj espíritu santomanta cushilla cai tucushcatami parlacurca (Gálatas 5:22). Chaimantami llaquicunahuan cashpapish Diospaj ñaupajpi alli ricurishpa, Jesuspaj ejemplota catishpaca cushilla sintirinchij (Lucas 6:22, 23; Colosenses 1:10, 11). Caipi yuyashun. Shuj focota vidriohuan alli tapajpica focotaca huairapish tamyapish mana dañai tucunchu. Ashtahuanpish fococa japirishcami catin. Dios cushca cushicunaca cai focota tapashca layami can. Chaimantami cullqui illaj cashpapish, ima ungüi japijpipish Yayitu Diostaca cushilla sirvishpa catishun. Familiacuna o contracuna ñucanchij crishcacunamanta burlarishpa jarcajpipish mana desanimarishunchu. Cashna pruebacunata charishpaca Jesusta catijcuna cashcatami ricuchinchij (Mateo 10:22; 24:9; Juan 15:20). Chaimantami Santiagoca cai punllapaj versopi nishcata quillcarca. w21.02 pág. 28 párr. 6

Bibliata liyicushpaca tranquilo sintirinamanta, Yayitu Diospi confianamanta parlaj versocunatami de memoria yachai tucunchij. Chai versocunata alta vozpi liyishpa, escribishpa o repasashpami yachai tucunchij. Jehová Diosca Josuetaca pai Quillcachishcacunata liyichun, liyishcapi punllapish, tutapish cutin cutin yuyarichunmi mandarca. Chashnami paica mana manchashpa Diospaj pueblota ñaupajman alli pusharca (Josué 1:8, 9). Ñucanchijpish imamantapish ama yallitaj sustaringapajmi de memoria huaquin versocunataca yachai tucunchij (Salmo 27:13; Proverbios 3:25, 26). Tandanacuicunapica ñaupajmanta yachachijcunamanta, huauqui panicunapaj comentariocunamanta, tucui huauqui panicunahuan parlanacushcamantami beneficiarinchij (Hebreos 10:24, 25). Congregacionpipish ñucanchij amigocunamanca ima shina sintirishcatami parlana canchij. w21.01 págs. 6, 7 párrs. 15, 16

Cancunaca bautizarishpaca Jehová Diospi sinchi feta charishcata, paipi confiashcatami ricuchircanguichij. Chaimi Yayitu Diospish paipaj pueblopica cushilla chasquishca. Pero cunanca Yayitu Diospimi confiashpa catina canguichij. Huaquinpica ima decisioncunata agllacushpaca Jehová Diospi confiashcatami ricuchinguichij. Shinapish tal vez imapi pugllanata agllacushpa, imapi trabajanata agllacushpa o causaipaj imata ruranata agllacushpaca Jehová Diospi confianaca sinchichari canga. Pero cancunapaj yuyaillapi confianapaj randica Bibliapi ima yachachishcacunatami pajtachina canguichij (Proverbios 3:5, 6). Chashnami Jehová Diostapish cushichinguichij y huauqui panicunapish cancunatami respetangacuna. Jovencuna, cancunapish ñucanchij shinallatajmi huaquinpica pandaringuichij. Pandarishpapish Jehová Diosta sirvinataca manataj saquinachu canguichij. w21 03 pág. 6 párrs. 14, 15

¿Ñucanchij familiaca Diosta sirvichunchu jarcancuna? ¿O mana cashpaca ñucanchij causan lugarcunapica gobiernocunachu Diosta ama sirvichunca catirashpa llaquichincuna? Cashna llaquicunahuan cashpaca 2 Timoteo 1:12-16; 4:6-11, 17-22 nishca versocunatami yuyaipi charina canchij. Apóstol Pabloca carcelpi cashpapish cai shimicunatami quillcarca. Contracuna ñucanchijta catirashpa llaquichijpica ima shina sintirishcatami Jehová Diosmanca tucuita parlana canchij. Shinallataj cai llaquicunata ahuantangapajca apóstol Pablopaj causaimantami valishca yuyaicunata yachachichun ayudata mañana canchij. Jehová Diosca Pablota contracuna catirashpa llaquichina cashcataca ñami huillashca carca (Hechos 21:11-13). Pero ¿Paica ima shinataj Pablotaca ayudarca? Pablo mañashcacunata cutichishpami ayudarca. Shinallataj fuerzastami curca. Pablo shuyacushcatapish Diosca cusha nishpami animarca. Paipaj amigocunapish ayudachunmi animarca. w21.03 págs. 17, 18 párrs. 14, 15, 19