Agosto

Jesuspaj alli amigocuna cashpallami pai huañushcamantaca quishpirishun. Paillatajmi, ñuca amigocunamanca ñuca causaitami cusha nirca (Juan 15:13). Ñaupa tiempopi Diosta sirvijcunaca Jesustaca mana rijsircacunachu. Pero paicuna causarishpaca Jesusmantami yachangacuna, paitami cꞌuyangacuna. Paicunapishmi huiñai causaita charingapajca Jesuspaj amigocuna cana can (Juan 17:3; Hechos 24:15; Hebreos 11:8-12, 24-26, 31). Gentecunaman Diospaj gobiernomanta huillashpaca Jesushuanmi shuj shinalla trabajanchij. Jesusca cai Allpapi cashpaca Yayitu Diosmantami yachachirca. Cutin jahua pachaman rishpaca congregacioncunapaj uma cashcamantami Diospaj obra ñaupajman catichun ayudacun. Jesusca Jehová Diosmantapish paimantapish gentecunaman rijsichishpa ayudashcamantami ñucanchijtaca valoran. Jehová Dios, Jesús ayudashcallamantami alli huillaicunataca predicai tucunchij (Juan 15:4). w20.04 pág. 22 párrs. 7, 8

¿Ñaupa punllacunapica picunatataj ‘janaj ladomanta mandaj, ura ladomanta mandaj’ nijcuna carca? Israel llajtapi mandajcunatami chashna nijcuna carca (Daniel 10:14). Huata 33 Pentecostés punllacamami Israel llajtaca Jehová Diospaj pueblo carca. Pero chai huatamantami Jesusta catijcunalla paipaj pueblo tucurca. Chaimantami cunanca Daniel 11-pi parlashca huaquin versocunaca ña mana Israel llajtamanta parlacun. Ashtahuanpish Jesusta catijcunamantami parlacun (Hechos 2:1-4; Romanos 9:6-8; Gálatas 6:15, 16). Ashtahuancarin huatacuna pasajpimi janaj ladomanta mandaj, ura ladomanta mandajca ña cambiarishcacuna. ¿Cai mandajcunaca imatataj igual rurashcacuna? Puntapica, Diosta sirvin llajtacunapimi mandashcacuna. Huaquincunacarin Diospaj pueblotami catirashpa llaquichishcacuna. Ishquipica, Diospaj pueblota llaquichishpami Yayitu Diosta pꞌiñashcata ricuchishcacuna. Quimsapica, ura ladomanta mandaj, janaj ladomanta mandajca paicunamanta shujlla mandasha nishpami macanacushpa catishcacuna. w20.05 págs. 2, 3 párrs. 3, 4

Jehová Diosca paipaj munaita pajtachingapajca imatapishmi rurai tucun. Ashtahuanpish Jehová Diosca paita sirvijcuna paipaj munaita pajtachichunmi imatapish rurai tucun (Isaías 64:8). Chashnami Jehová Diosca paipaj munaita pajtachin. Yayitu Dios paipaj munaita pajtachichunca mana pi jarcai tucunchu (Isaías 46:10, 11). Jehová Diosta ashtahuan respetangapajca ¿imatataj rurana canchij? Pai imata rurashcapi, ñucanchijta ayudangapajpish imallata rurashcapimi yuyana canchij. Por ejemplo, pai tucuita rurashcacunapi cutin cutin yuyashpami cushilla sintirinchij (Salmo 8:3, 4). Ñucanchijtapish paipaj munaita pajtachichun ayudashcapi yuyashpami paitaca shungumanta respetashun. Jehová Diospaj shutica sumajmi can. Cai shutica pai ima shina cashcata, imallata rurashcata, imallata ruragrishcatami ricuchin (Salmo 89:7, 8). w20.06 págs. 9, 10 párrs. 6, 7

Gentecuna, animalcunaca huairata mana aisashpaca mana causai tucunmanchu. Huatan huatanmi cai Allpapi tucui causaita charijcunaca achca huairata samaita aisancuna. Samaita aisashpaca chuya huairatami aisanchij. Cutin samaita shitashpaca mapayashca huairatami shitanchij. Chaita rurajpipish chuya huairaca achca cashcamantami mana tucurin. ¿Chuya huaira illajca imamantataj mana saquirinchij? Jehová Diosca tucui laya plantacunatami rurashca. Cai plantacunaca mapayashca huairata aisashpapish chuya huairatami shitan. Huaira mana tucurishcata intindishpaca Diosmanta cai punllapaj versopi nishcacunaca cierto cashcatami crinchij. Cai Allpata, caipi tiyaj chꞌican chꞌican cosascunata valorashcata ricuchingapajca Jehová Dios imallata rurashcapimi cutin cutin yuyana canchij (Salmo 115:16). Chashnami Yayitu Dios cada punlla ñucanchijman imallata cushcamantaca agradicishun. Shinallataj ñucanchij causan lugarcunata cuidashpa, limpiota charishpami paita agradicishcata ricuchishun. w20.05 pág. 22 párrs. 5, 7

Diablo Jehovapaj contra tucujpipish Diosca alli yachaihuan, cashcata ruranahuan, pacienciahuanmi tucuita alli ruraj cashcata ricuchirca. Pai achca poderta charishcataca chꞌican chꞌican ruraicunahuanmi ricuchishca. Ashtahuancarin paica imata rurashpapish tucuipimi cꞌuyaita ricuchishca (1 Juan 4:8). Jehová Diosca paipaj shutita jatunyachinataca manataj saquishcachu. Cunan punllacunapish Diabloca Diospaj shutimantami huaquin llullacunata nin. Paica gentecuna Jehová Dios tucuita ruraj, cashcata ruraj, yachaj, cꞌuyaj cashcata ama crichunmi llullacunata nin. Por ejemplo, Diabloca Dios mana tiyashcata crichunmi gentecunata pandachin. Cutin gentecuna Diospi crijpica Dios mandashcacuna mana alli cashcata, chaicunata pajtachishpaca mana cushilla causana cashcatapish yuyachunmi munan. Shinallataj Jehová Diosca millai gentecunatapish infiernopimi rupachin nishpa yuyachunmi Diabloca pandachin. Gentecunaca cai llullata crishpami Diospaj mandashcacunataca mana cazuncuna. Diablota Jehová Dios tucuchingacamami paica Yayitu Diosmanta caruyachunmi munanga. ¿Diabloca paipaj munashcata pajtachingachu? w20.06 págs. 5, 6 párrs. 13-15

Achca congregacioncunapica huaquin huauqui panicunami mushuj shimita yachangapaj esforzaricuncuna. Chaimantami ima shina sintirishcata, imata yuyashcata parlanaca paicunapajca sinchi canga. Pero paicuna mushuj shimita ima shina parlashcata ricunapaj randica Jehová Diosta cꞌuyaimanta sirvishcatami ricuna canchij. Chashnami paicunata respetashcata, valorashcata ricuchishun. Shinallataj ñucanchij shimita mana alli parlashcamanta ‘cantaca mana minishtinchijchu’ nishpaca mana yuyashunchu (1 Corintios 12:21). Congregacionpi paita sirvichun saquishcamantami Jehová Diostaca achcata agradicinchij. Cꞌaricunapish, huarmicunapish, solterocunapish, cazadocunapish, jovencunapish, mayorllacunapish, mushuj shimita alli parlanata yachajcunapish o mana tanto alli parlanata yachajcunapish tucuicunami Jehová Diospajpish huauqui panicunapajpish valishca canchij (Romanos 12:4, 5; Colosenses 3:10). Imalla yachashcata pajtachishpaca huauqui panicunata valorangapaj, animangapajmi esforzarishun. Chashnami paicunata cꞌuyashcata, respetashcata ricuchishun. w20.08 pág. 31 párrs. 20-22

Atenas llajtamanta gentecunaca yanga dioscunata adorashpa, huainayashpa, panda yachachijcuna nishcacunata crishpami causajcuna carca. Pero Apóstol Pabloca paita ajajpipish huillanataca manataj saquircachu. Paica ‘Diosta cꞌamij, catirashpa llaquichij, maipish cachun rimaj’ cashpapish Jesuspaj discipulomi tucurca (1 Timoteo 1:13). Jesusca Pablo paipaj discípulo canatami crirca. Chashnallatajmi apóstol Pablopish Atenas llajtapi causajcuna Jesuspaj discipulocuna canata crirca. Paicunaca apóstol Pablo yuyashca shinami Diosta sirvi callarircacuna (Hechos 9:13-15). Apostolcuna causacun punllacunapica tucui laya gentecunami Jesuspaj discipulocuna tucurca. Pabloca Corinto llajtapi causaj huauqui panicunaman quillcacushpaca, Diosta manaraj rijsishpaca maijancunaca shuhuacuna, huainayashpa causajcunami carcanguichij nircami. Pero qꞌuipaca: ‘Ña maillashcacuna, jucha illajta rurashcacunami canguichij’ nircami (1 Corintios 6:9-11). ¿Chai gentecuna paicunapaj causaipi cambiashpa, Jesuspaj discipulocuna tucunataca crinchijmanchu carca? w20.04 pág. 12 párrs. 15, 16

Huaquincuna “¿Jehová Diosta sirvinaca valishcachu?” nishpa tapujpica ancianocunaca mana rato juzganachu can. Juzganapaj randica imamanta chashna parlashcata, rurashcatami ancianocuna intindina can. Caita rurashca qꞌuipaca paicunaca Bibliahuanmi animai tucuncuna. Profeta Eliasca reina Jezabelmantami miticushpa rirca (1 Reyes 19:1-3). Paica ima rurashcacunapish mana valinchu nishpami yuyarca. Chaimantami huañusha nirca (1 Reyes 19:10). Elías chashna sintirijpipish Jehová Diosca paitaca ayudarcami. Ashtahuancarin, canca mana solollachu cangui, ñucapi confiailla, ñuca mingashcata pajtachinaca faltanrajmi nishpami animarca. Elías ima shina sintirishcata Jehová Diosman parlajpica paica cꞌuyaihuanmi uyarca. Ashtahuancarin huaquin ruraicunatami mingarca (1 Reyes 19:11-16, 18). Caimantaca ¿imatataj yachanchij? Diosta sirvijcunataca ñucanchijpish ancianocunapish cꞌuyaihuanmi tratana canchij. Shuj huauqui o pani pꞌiñarishca cajpi, Jehová Diosca ñucataca mana perdonanchu nishpa yuyajpica ancianocunaca allimi uyana can. Chai qꞌuipaca Diospaj valishca cashcata intindichunmi animana can. w20.06 págs. 22, 23 párrs. 13, 14

Jehová Diosca familiacunahuan, amigocunahuan tandalla, cushilla pasachunmi munan (Salmo 133:1). Jesuspish alli amigocunatami charirca (Juan 15:15). Bibliapica alli amigocunata charishpaca achca bendicioncunatami charishun ninmi (Proverbios 18:24). Ashtahuanpish shujtajcunamantaca mana caruyanachu canchij (Hebreos 10:24, 25). Achca gentecunami “ama ñucanchijlla sintiringapajca redes socialespimi alli amigocunata charina canchij” nincuna. Pero caicunata utilizashpapish cuidarinami canchij. Huaquincunaca redes socialesmanta parlashpaca ‘fotocunata, comentariocunata achca tiempota ricushpalla pasajcunaca huaquinpica sololla, llaquillami sintirincuna’ nincunami. ¿Imamantataj chashna sintirincuna? Achca gentecunami redes socialespica paicuna sumajta pasashcata, paicunapaj alaja fotocunata churancuna. Shinallataj paicunapaj amigocunahuan cashcata, alaja lugarcunapi cashcatami churancuna. Chaicunata ricujcunaca mana cushilla causacushcatami yuyancuna. w20.07 págs. 5, 6 párrs. 12, 13

La Atalaya del 1 de octubre de 1988-pica: “Congregacionpi ima decisionta agllangapaj o ima problemata allichingapajca pushajcuna tandanacujpica Jesusca tucuicunatami espíritu santohuan ayudan (Hechos 15:7-15). Diospaj espíritu santoca mana shuj pushajllata ayudanchu. Maijan pushajtapish Biblia ima nishcata yuyachishpami alli decisionta agllachun ayudai tucun” ninmi. Shuj pushaj huauquica respetota ricuchishpaca siempre pairaj parlanataca mana yuyanchu. Ashtahuanpish caishuj pushaj huauquicuna parlachunmi saquin. Shinallataj ñuca yuyashcapish tucuimi valishca can nishpaca mana yuyanchu. Chaipaj randica pai imata yuyashcataca mana jatun tucushpami parlan. Ashtahuancarin shujtajcuna ima nishcatami alli uyan. Biblia yachachishcacunata, Cuerpo Gobernante huauquicuna ima nishcatapishmi catin (Mateo 24:45-47, QC, 1989). Pushaj huauquicuna paicunapura cꞌuyaihuan, respetohuan tratajpica Diosca paipaj espíritu santohuanmi alli decidichun ayudanga (Santiago 3:17, 18). w20.08 págs. 27, 28 párrs. 5, 6

Religionta pushajcunaca Apóstol Pablotaca achca cutincunami macashpa prezupi churarcacuna. Shinallatajmi paipaj huaquin amigocunapish, congregacionpi caj huaquincunapish llaquichishcanga (2 Corintios 12:11; Filipenses 3:18, NWT ). Pero paipaj enemigocuna desanimachichunca mana saquircachu. Paicuna jarcajpipish predicashpami catirca. Huauqui panicuna pandarijpipish apóstol Pabloca paicunata cꞌuyashpami catirca. Ashtahuancarin Yaya Diostami huañuna horascama sirvirca (2 Timoteo 4:8). Jehová Diospi confiashcamantami caicunataca pajtachi tucurca. ¿Mana alli tratancuna o catirashpa llaquichincunachu? Gentecuna mana alli tratajpica Yaya Diosmanta, paipaj Shimimantami yachachina canchij. Caitaca ¿ima shinataj pajtachi tucunchij? Gentecuna tapuicunata rurajpica Bibliahuanmi cutichina canchij. Ñucanchijta mana alli tratajpipish respetohuan, cꞌuyaihuanmi tratana canchij. Shinallataj shujtajcunapaj, ñucanchij contracunapajpish allicunatami rurana canchij (Mateo 5:44; 1 Pedro 3:15-17). w20.07 págs. 17, 18 párrs. 14, 15

¿Jehová Diosca ciertochu humilde can? Ari, Davidca Jehová Diosmanta cai punllapaj versopi nishcata cierto cashcatami yacharca (Salmo 18:35). ¿Davidca imamantataj Jehová Diosmantaca chashna nirca? Shuj punllaca, Samuelca Davidpaj huasimanmi Israelta mandaj cachun agllanaman rirca. David último churi cajpipish Jehová Diosca Saulpaj randi mandachunmi agllarca. Davidca chaita yuyashpami cai shimicunata escribishcanga (1 Samuel 16:1, 10-13). Davidca Salmo 113-pi ima nishcahuanmi igual yuyarca. Chaipica: “Jehová Diosca jahua pachatapish cumurishpami ricucun. Paica cai pachatapish cumurishpami ricucun. Paimi huajchataca ñutu allpamanta jatarichin. Jatun mandajcunahuan tiyachingapajmi chashna ruran” ninmi (Salmo 113:6-8). Juchayuj gentecunata cꞌuyaihuan tratashpami Jehová Diosca humilde cashcata ricuchin. Paica paita adorachun, paipaj amigocuna cachunmi saquin (Salmo 25:14). Jehová Dios paipaj Churita ñucanchijmanta huañuchun cachashcamantami Diospaj amigo cai tucunchij. Chashnami Jehová Diosca llaquij cashcata ricuchishca. w20.08 págs. 8, 9 párrs. 1-3

Jehová Diosca mana allicunata tucuchingapajca shuj punllatami agllashca (Mateo 24:36). Shinallataj huañushcacunata causachisha nishpapish pai agllashca tiempopimi causachinga (Job 14:14, 15). Chai punlla chayangacamami shuyacun (Juan 5:28). Jehová Dios paciente cashcamantami achcata agradicinchij. Chaimantami achca gentecunapish ñucanchijpish juchacunamanta arrepintiri tucushcanchij. Jehová Diosca tucui gentecuna huiñai causaita charichunmi munan. Ñucanchijpish gentecunataca Yaya Diosta sirvichun, huiñai causaita charichunmi ayudana canchij (Hechos 13:48). Chashnami paicunapish ñucanchij shinallataj Diospaj pacienciamanta beneficiaringacuna. w20.08 pág. 18 párr. 17

Biblia yachachishcacunaca yachacujpaj shunguman, yuyaimanmi chayana can. Yachacuj Jehová Diosmanta yachachunmi munanchij. Pero pai yachashcaca shungumanmi chayana can. Chashnami paipaj causaipi pajtachi tucunga. Jesusca alli yachachijmi carca. Chaimantami pai yachachishcacunaca gentecunapaj yuyaiman chayarca. Jesús yachachishcacuna shunguman chayajpimi gentecunaca paita catircacuna (Lucas 24:15, 27, 32). Yachacujca Yayitu Dios de verdad tiyashcatami ricuna can. Paitaca Diostaj cashcata, shuj Yayata shina, shuj amigota shinami ricuna can (Salmo 25:5). Yachacujman yachachicushpaca Diospaj cualidadcunamantami yachachina canchij (Éxodo 34:5, 6; 1 Pedro 5:6, 7). Ima yachaimanta yachachicushpapish Jehová Dios ima shina cashcatami intindichina canchij. Chashna pai llaquij, cꞌuyaj cashcata valorachun ayudashunchij. Jesusca: ‘Cambaj Mandaj Taita Diosta tucui shunguhuan cꞌuyangui. Cai mandashcami tucuimanta ashtahuan yalli alli can’ nircami (Mateo 22:37, 38). Yachacujcunata Jehová Diosta de verdadtaj tucui shunguhuan cꞌuyachun ayudangapaj esforzarishunchij. w20.10 pág. 10 párr. 12

Jesusca tucui huarmicunataca respetohuanmi trataj carca (Juan 4:27). Jesusca paipaj Yayapaj munaita ruraj huarmicunataca ashtahuanmi valoraj carca. Paica:‘Ñuca Yayapaj munaita rurajcunami ñuca huauqui, ñuca pani, ñuca mamami can’ nircami (Mateo 12:50). Jesusca Mariahuan, Martahuanmi alli apanacuj carca. Paicunaca solteracunami carca (Lucas 10:38-42). Jesús alli parlajpi, alli tratajpica cushillami sintirircacuna. Shuj punllaca Jesusca paicunatami visitanaman rirca. Chaimi Mariaca Jesuspaj yachachishcacunata ashtahuan yachasha nishpa paipaj ñaupajpi tiyarirca. Cutin Martaca Jesushuan alli apanacuj cashcamantami paitaca ñucata ayudachun Mariata mandai nirca. Chai punllapica Jesusca paicunamanca valishca yachachishcacunatami intindichishpa ayudarca. Shinallataj paica Mariata, Martata, Lazarotaca shujtaj punllacunami visitaj carca. Chashnami paicunamanta preocuparishcata ricuchirca (Juan 12:1-3). Chaimantami Lázaro ungujpica María, Martaca Jesusta ayudachun mañarcacuna (Juan 11:3). w20.09 págs. 20, 21 párrs. 3, 6

Jesuspaj discipulocunapish romanocunapaj maquimanta quishpichichunmi shuyacurcacuna. Chaimantami Taita Diosca cunantajmari ña mandai callarigrin nishpa yuyarcacuna. Ñucanchijpish Diospaj Gobierno tucui mana allicunata tucuchishpa cai Allpata mushuj paraisota rurachunmi shuyacunchij (2 Pedro 3:13). Pai agllashca punllapi tucui llaquicunata tucuchingacamami pacienciahuan shuyana canchij. Jehová Diosca pacienciata charishcamantami Noetaca achca tiempopi arcata rurachun paimantapish predicachun saquirca (2 Pedro 2:5, NWT; 1 Pedro 3:20). Sodoma Gomorra llajtacunata Jehová Dios tucuchisha nijpimi Abrahamca mana de acuerdo carca. Chaimi Jehová Diosca Abrahamtaca pacienciahuan uyarca (Génesis 18:20-33). Jehová Diosca achca huatacunatami israelcunamanpish pacienciata ricuchirca (Nehemías 9:30, 31). Cunan punllacunapipish gentecuna arrepintirishpa paipaj amigocuna tucuchunmi pacienciahuan shuyacun (Juan 6:44; 1 Timoteo 2:3, 4; 2 Pedro 3:9). Shinallataj ñucanchijpish gentecunaman predicashpa yachachishpa catingapajca Jehová Dios shinami pacienciata charina canchij. w20.09 pág. 10 párrs. 8, 9

Jehová Diosca huañushcacunata causachishpaca manaraj huañushpa ima shina cashcata shinallatajmi causachinga. Paica ñucanchijta achcata cꞌuyashcamantami cada uno imata yuyashcata, ima shina sintirishcata, imata nishcata, imata rurashcatapish alli yachan. Chaimantami ñucanchijcuna huañujpipish ñucanchij ima laya cashcahuan paica causachi tucunga. Rey Davidca: ‘Jehová Diosca cada unotami alli rijsin’ nircami (Salmo 139:1-4). ¿Jehová Dios ñucanchijmanta preocuparishcata yachashpaca ima shinataj sintirinchij? Jehová Dios ñucanchijta alli rijsishcamantaca mana sustarinachu canchij. Paica ñucanchijtaca achcatami cꞌuyan. Ñucanchijca paipajca valishcami canchij. Shinallataj paica ñucanchij causaipi ima tucushcataca tucuimi yachan. Chaimantami ñucanchijtaca alli intindin. Caicunata yachashpaca cushillami sintirinchij. Ñucanchijlla cashcataca mana yuyanachu canchij. Jehová Diosca ñucanchijta ayudangapajmi listo can (2 Crónicas 16:9). w20.08 pág. 17 párrs. 13, 14

Jehová Diosca congregacionpimi paita sirvijcunataca yachachirca (Colosenses 1:9, 10). Jesusca Diospaj espíritu santohuanmi paita catijcunataca ayudarca (Juan 14:16). Jesusta catijcunaca Diospaj espíritu santo ayudajpimi Diospaj Shimita alli intindircacuna. Shinallataj Jesús imata nishcata, imata rurashcata yuyarichunmi ayudarca. Jesús imallata rurashcacunataca Mateo, Marcos, Lucas, Juan librocunapimi ricui tucurcacuna. Chashnami paicunapaj feta sinchiyachircacuna. Jehová Diostapish, Jesustapish, huauqui panicunatapish ashtahuanmi cꞌuyarcacuna. Caipi yachashca shinaca Diosca paipaj pueblotami yachachinata munan. Diosca paipaj huahuacuna paita rijsichun, cꞌuyachun, huiñaita causachunmi munan. Paipaj yachachishcacunata yachashpallami cai bendicioncunata chasqui tucunchij (Juan 17:3). Jehová Diosca cai tucuri punllacunapajca tucui ladomanta gentecuna “urcuman huichiyanatami” huillarca. Chashna nishpaca gentecuna paita sirvijcunahuan tandanacushpa paimanta ashtahuan yachanatami nisha nirca (Isaías 2:2, 3). Cunan punllacunami cai profecía pajtarishcataca ricunchij. w20.10 págs 24, 25 párrs. 14, 15

¿Huaquinpica imamantataj shuj amigopaj consejota mana chasquincuna? Jatun tucushca cashcamantami mana chasquincuna. Jatun tucushcacunaca paicuna mana allita rurashcacunata shujtajcuna uyachunllami mashcancuna. Chashnami “mana llullata uyanamantapish” anchurincuna (2 Timoteo 4:3, 4). Paicunaca tucuitami yachanchij, shujtajcunata yallipishmi canchij nishpami pi consejachunca mana saquincuna. Pero apóstol Pabloca: “Maijanca manapish ima cashpa yachajmi canchij nishpaca paillatajmi umarin” nircami (Gálatas 6:3). Rey Salomonpish: “Yuyaj jatun mandaj cashpapish rumi shungu cashpaca yuyaita cujpipish ña mana chasquisha ninchu. Chaipaj randica huajchalla huambra cashpapish yachaj cashpamari ashtahuan alli” nircami (Eclesiastés 4:13). Apóstol Pabloca Pedrotaca tucuicunapaj ñaupajpimi corregirca. ¿Chashna corregijpica Pedroca imatataj rurarca? (Gálatas 2:11-14). Pedroca Pablo ima shina rimashcamanta, maipi rimashcamantami pꞌiñari tucunman carca. Pero yachaj cashcamantami cai alli consejotaca chasquirca. Risintirishcapish mana saquirircachu. Asha tiempo qꞌuipaca Pedroca Pablotaca “ñucanchij cꞌuyashca huauqui” nircami (2 Pedro 3:15). w20.11 pág. 21 párrs. 9, 11, 12

¿Yachacujca Diosta ashtahuan sirvishpa catingapajca imatataj ruranata minishtin? Tandanacuicunamanmi rina can. Tandanacuicunapi imallata yachashpaca Diostami ashtahuan rijsinga, paipaj fepishmi sinchiyanga. Jehová Diostapish tucui shunguhuanmi cꞌuyanga (Hechos 15:30-32). Shinallataj shuj publicadorca Jehová Diosta cꞌuyashcamanta, paipaj mandashcacunata cazushcamantami paipaj viciota ima shina saquishcata parlashpami animai pudin (2 Corintios 7:1; Filipenses 4:13). Huauqui panicuna Diosta cꞌuyashcata, shujtajcunata cꞌuyashcata yachashpaca yachacujca Jesús mandashcata ima shina cazunatami cuentata cun (Juan 13:35; 1 Timoteo 4:12). Shinallataj yachacujca huaquin huauqui panicuna Diosta alli sirvingapaj paicunapaj causaipi ima cambiocunata rurashcatami yachai tucun. Chaita yachashpami yachacujpish Diosta sirvingapaj ima cambiocunata rurana cashcata cuentata cun (Deuteronomio 30:11). Congregacionpica tucuicunami yachacujcunataca ayudai tucunchij (Mateo 5:16). w20.11 págs. 5, 6 párrs. 10-12

Apóstol Pablo chashna nishpaca chai llajtapi tiyaj circopi huaquin animalcunahuan macanacushcatami nisha nicushcanga (2 Corintios 1:8; 4:10; 11:23). O tal vez judiocunapaj jarcaicunatami nisha nicushcanga. Mana cashpaca shujtajcuna pꞌiña animalcuna shina dimastij llaquichijcuna cashcatami nisha nicushcanga (Hechos 19:26-34; 1 Corintios 16:9). Pabloca cashna llaquicunahuan chꞌimbapurashpapish shamuj punllacunapi cushilla causaita charinata yachashpami ahuantarca (1 Corintios 15:30, 31; 2 Corintios 4:16-18). Cunan punllacunapish sinchi llaquicunapimi causacunchij. Huaquin huauqui panicunatapishmi contracunaca llaquichishcacuna. Cutin shujtajcunaca paicuna causan llajtapi macanacuicuna tiyashcamantami mana seguros causancuna. Maijan lugarcunapicarin huauqui panicuna huillachunca mana saquincunachu. Chashna jarcajpipish paicunaca Diosta sirvishpami catincuna. Huaquincunaca carcelman rinata yachashpapish, huañunata yachashpapish Diosta sirvishpami catincuna. Paicunaca huañunataca mana manchancunachu. Shamuj punllapi Jehová Dios sumaj causaita cusha nishcapi yuyashpami sirvishpa catincuna. Chaimantami paicunaca ñucanchijpajca alli ejemplocuna can. w20.12 pág. 9 párrs. 3, 4

Gentecunata huasipi mana tarishpa, paicuna mana uyasha nijpica huaquinpica desanimarinchijchari. Pero ama desanimarishpa huillangapajca ¿imatataj rurana canchij? ¿Cushilla predicashpa catinaca imamantataj valishca can? Jehová Diospaj shutimanta, paipaj Gobiernomanta huillana importante cashcataca mana cungarinachu canchij. Jesusca: ‘Huiñai causaiman apaj ñanpica ashacunallami yaicunga’ nircami (Mateo 7:13, 14). Predicashpaca Jehová Dioshuan, Jesushuan, angelcunahuanmi trabajanchij (Mateo 28:19, 20; Apocalipsis 14:6, 7). Ashtahuancarin Jehová Diosmi paita sirvisha nij gentecunataca paipaj organizacionman pushamucun (Juan 6:44). Huaquin gentecunaca huillajpica manachari uyasha nincuna. Pero qꞌuipami tal vez paicunaca uyanata munangacuna. Debora shuti panica: “Desanimarishca sintirinaca Diablopaj trampami can” nircami. Pero Jehová Diosllami tucuimanta yalli poderoso can. w20.12 págs. 26, 27 párrs. 18, 19, 21

Achca huauqui panicunami paicunapaj familiacunata mantiningapajca tiempo completota trabajancuna. Pero chashnapish paicunaca Diospaj organizaciontami apoyancuna. Por ejemplo, llaquipi caj huauqui panicunata ayudashpa, tandanacuna huasicunata shayachishpa o allichishpa, o muyundij Allpapi apoyangapaj cullquicunata cushpami apoyancuna. Shinallataj shaicushca cashpapish tandanacuicunamanmi rincuna. Tandanacuicunapipish manchaita mishashpami comentancuna. Llaquicunata charishpapish tandanacuicunapimi shujtajcunata animancuna. Chashnami Jehová Diostapish, huauqui panicunatapish cꞌuyashcata ricuchincuna (Hebreos 10:24, 25). Huauqui panicuna cashna cꞌuyaita ricuchishcamantami paicunataca achcata agradicinchij. w21.01 pág. 10 párr. 11

Jatun tucushcacunapajca shujtajcunata felicitanaca sinchimi can. Paicunaca paicunallatataj felicitachunmi munan. Shujtajcunahuan compararishpami paicunata yalli casha nincuna. Ashtahuanpish shujtajcunaman yachachinata, autoridadta cunataca mana munancunachu. Paicunallami imatapish alli ruranata yuyancuna. Jatun tucushcacunaca shujtajcunatami envidiancuna. Ñucanchijpish ama jatun tucungapajmi Jehová Diosta mañana canchij. Chashnami yuyaipipish shungupipish mana jatun tucuna munaita charishun (Romanos 12:2). Jehová Diosca paita sirvijcunata alli tratashpami humilde cashcata ricuchin. Chaimantami cushilla sintirinchij (Salmo 18:35). Paipaj ejemplotapishmi catisha ninchij. Ñaupa tiempopi Diosta sirvijcunapaj ejemplomantapishmi yachai tucunchij. Ñucanchijpish Jehová Diosta jatunyachinataca amataj saquishunchijchu (Apocalipsis 4:11). w20.08 pág. 13 párrs. 19, 20

Matrimonioca Dios cushca sumaj regalomi can. Pero juchayuj cashcamantami maipica matrimonio ucupica problemacuna ricuringa (1 Juan 1:8). Chaimantami Bibliapica: ‘Cazarashcacunaca paicunapaj causaipimi llaquicunata charingacuna’ ninmi. Cusacunaca paicunapaj familiacunamanca ima minishtishcacunata cushpami Yayitu Diosta sirvichun ayudana can (1 Timoteo 5:8). Shinapish cazarashca panicunaca cada punlla ocupada cashpapish Bibliata liyingapaj, liyishcapi yuyangapaj, Jehová Diosta shungumanta mañangapajmi paillataj tiempota surcuna can. Tiempota surcungapajmi esforzarina can. Jehová Diosca paita sirvijcuna cada uno paihuan alli apanacuchunmi shuyan (Hechos 17:27). Huarmicunaca cusacuna juchayuj cashcamantami paicunata respetangapaj, cazungapajca esforzarina can. Pero huarmicunaca imamanta cusata cazuna cashcata Bibliapi intindishpaca paicunata cazunaca jahuallami canga. w21.02 pág. 9 párrs. 3, 6, 7

Shuj espadata ninapi rupachijpica chiriyashpaca cai espadaca ashtahuan sinchimi tucun. Chashnallatajmi ñucanchijpish pruebacunata chꞌimbapurashpaca ñucanchij feta sinchiyachinchij. Chaimantami Santiagoca: “Ima llaquicunata ahuantashpaca ña alli crijcunatajmi canguichij” nirca (Santiago 1:4). Llaquicuna ñucanchij feta sinchiyachinata yachashpaca cushillami ahuantai tucunchij. Santiagoca huaquin problemacunami ñucanchij cushilla canata quichui tucun nircami. Problemacunahuan cashpaca Jehová Diosmanta manataj caruyasha ninchijchu. Huauqui panicunata sinchiyachinatapish manataj saquisha ninchijchu. Pero alli decidingapajpish, contracunaman imata ningapajpish Yayitu Diostami yachaita cuchunca mañana canchij (Jeremías 10:23). Shinapish huaquinpica imata ninata, imata ruranata mana yachashpami llaquilla sintirinchij. w21.02 págs. 28, 29 párrs. 7-9

Jehová Diosca ñucanchijta achcata cꞌuyashcamantami paita tucuipi sirvijpica mana saquisha nin (Romanos 8:38, 39). 1 Pedro 1:22-pica tucui shunguhuan cꞌuyana nishpaca huauqui panicunaman cꞌuyaita ricuchingapaj esforzarinatami nisha nin. Maijancuna ñucanchijta pꞌiñachijpica cꞌuyaimantami caishujmanta chaishujmanta mana pꞌiñarishpa llaquicunata apana canchij. Chashnami ñucanchij huauqui panicunahuan tandalla, alli causashun (Efesios 4:1-3). Huauqui panicunapaj pandarishcallataca mana ricunachu canchij. Chaipaj randica ima shinami Jehová Dios paicunata ricun, chashnallatajmi ñucanchijpish paicunata ricuna canchij (1 Samuel 16:7; Salmo 130:3). Huauqui panicuna pandarishcallata ricushpaca paicunaman cꞌuyaita ricuchinaca sinchimi canga. Apostolcuna causashca punllacunapimi Evodia y Sintique ñañacunaca chashna tucurca. Apóstol Pabloca paicunataca: “Apunchij Jesusmantaca ñañandij shina shuj yuyailla tucuchun” nishpa aconsejarca (Filipenses 4:2, 3, QC, 1989). w21.01 págs. 22, 23 párrs. 10, 11

Jovencitocuna, congregacionpi huauqui panicunahuan cancuna tandalla Diosta sirvijpica paicunaca cushillami sintirincuna (Sofonías 3:9). Congregacionpipish ima mingashcacunata cushilla pajtachijta ricushpaca paicunaca cushicuncunami. Chaimanta paicunaca cancunatami respetancuna, cancunapimi confiancuna. Jovencitocuna, Jehová Dios cancunata cꞌuyashcata, cancunapi confiashcataca amataj cungaringuichij. Yayitu Diosca ‘tucuri punllapica jovencunaca ñucata sirvingapajmi tucui pudishcata rurangacuna’ nircami (Salmo 110:1-3, NWT ). Yayitu Diosca can paita cꞌuyajta, paita sirvingapaj esforzarishcataca allimi yachan. Chaimanta canllatajpish shujtajcunahuanpish pacienciata charingapaj esforzari. Imapi pandarishpapish shujtajcuna consejajpi, corregijpica chasquingui. Tucui caicunaca Jehová Diosmantami shamun (Hebreos 12:6). Imata mingashcatapish alli pajtachi. Ashtahuancarin Jehová Diosta jatunyachingapaj, paita tucuipi cushichingapaj esforzari (Proverbios 27:11). w21.03 pág. 7 párrs. 17, 18

Chꞌican chꞌican cosascunamantachari desanimari tucunchij. Por ejemplo, ñucanchij juchacunamanta, imapi pandarishcacunamantachari desanimarinchij. Shinallataj ungushca cashcamanta, congregacionpi ima responsabilidadta mana chasquishcamantami tal vez desanimari tucunchij. Mana cashpaca Yayitu Diosmanta gentecuna mana uyasha nijpichari desanimarinchij. Ñucanchij pandarishcacunallapi yuyashpaca Yayitu Diosca paraíso Allpapi causachunca ñucata mana saquingachu nishpami yuyai callarishun. Chashna yuyashpaca ñucanchijllatajmi desanimarishun. Romanos 3:23-pica tucuicuna juchayujcuna cashcatami yachachin. Jesusllami mana juchayuj carca. Juchayujcuna cajpipish Jehová Diosca ñucanchij pandarishcacunallataca mana ricucunchu. Jucha illaj cachunpish mana shuyanchu. Paica cꞌuyaj, pacienciata charij Yayami can. Paica allita rurangapaj esforzarishcataca allimi yachan. Chaimantami ayudangapajca listo can (Romanos 7:18, 19). w20.12 págs. 22, 23 párrs. 1-3

Diosta sirvijcunapaj causaica shuj ñanpi viajacuj shinami can. Ñucanchijca Diospaj Gobierno mandacujpi paraíso Allpapi causanatami munanchij. Cada punllami huiñai causaiman apaj ñanpi puringapaj esforzarinchij. Pero Jesús nishca shinaca cai huiñai causaiman apaj ñanca quichquimi can. Chaimantami chai ñanpi purinaca huaquinpica sinchi can (Mateo 7:13, 14). Juchayujcuna cashcamantami chai ñanmantaca huaquinpica llujshinchij (Gálatas 6:1). Apóstol Pabloca “correginacushpa catichij” nircami. ¿Caica imatataj nisha nin? Huiñai causaiman apaj quichqui ñanpi puringapajca ñucanchij yuyaicunata, ruraicunata, ima munashcata cambiana cashcatami Pabloca nisha nicurca. Ñucanchij yuyaicunata, munaicunata ñucanchijllataj yachanaca sinchimi can. ¿Imamanta? Ñucanchij shunguca umajllami can. Chaimantami ñucanchij shungu munashcata rurashpaca ima tucunata mana yachanchij (Jeremías 17:9). Huaquinpica ñucanchijllatajmi umachij yuyaicunahuan pandarinchij (Santiago 1:22). Chaimantami ñucanchijllataj ima shina cashcata yachangapajca Bibliapi ricuna canchij. Bibliaca shungu ucupi imalla yuyashcata, munashcata ricuchin (Hebreos 4:12, 13). w20.11 págs. 18, 20 párrs. 1-3

Humildes cashpaca mana tucuita rurai tucushcatami intindishun. Chaimantami shujtajcuna ayudajpica shungumanta agradicishun. Chashnami cushilla sintirishun. Shuj cutinca Jesusca leprahuan caj 10 runacunatami jambirca. Paicunamantaca shujllami Jesusta agradicinaman tigrarca. Chai humilde runaca jambiringapaj Jesús ayudachun minishtishcatami cuentata curca. Chaimantami Jesustapish agradicirca, Jehová Diostapish jatunyachirca (Lucas 17:11-19). Humildes cashpaca shujtajcunahuanmi alli apanacushun. Alli amigocunatapishmi charishun. Humildecunaca shujtajcuna alli cualidadcunata charishcatami yachancuna. Chaimantami paicunapi confiancuna. Ashtahuancarin shujtajcuna Diosta alli sirvijpica paicunatami felicitancuna. w20.08 págs. 12, 13 párrs. 17, 18