Septiembre

Apóstol Pedroca Joelpaj profeciata nicushpaca huaquin palabracunataca ashatami cambiarca (Hechos 2:16, 17). Joel huillashca profeciapica ‘cai tucuita rurashca qꞌuipa’ nishpami callarin. Pero Pedroca chaita ninapaj randica ‘qꞌuipa punllacunapi’ nishca shimicunatami nirca. Cai qꞌuipa punllacuna nishpaca Jerusalenpish chaipi tiyaj templopish tucuchishca cana punllacunamantami parlacurca. Chai punllacunapimi Jehová Diosca tucui laya huauqui panicunaman paipaj espíritu santota cuna carca. Chashnami Joel huillashca profecía pajtarichunca achca huatacuna pasashcata intindinchij. Jesusta punta catijcunaman Jehová Dios paipaj espíritu santota cujpimi paicunaca ashtahuan huillashpa catircacuna. Apóstol Pabloca Colosenses cartataca casi huata 61-pimi quillcarca. Chai cartapica Diosmanta alli huillaicunaca ‘tucui cai pachapi causajcunamanmi ña huillashca can’ nircami (Colosenses 1:23). “Tucui cai pachapi” nishpaca Pabloca chai punllacunapi rijsishca llajtacunamantami parlacurca. Cunan punllacunapipish Jehová Dios paipaj espíritu santohuan ayudajpimi muyundij Allpapi tucui llajtacunapi huillacushcanchij (Hechos 13:47). w20.04 págs. 6, 7 párrs. 15, 16

Jehová Diosca ñucanchijta, paimanta caruyajcunatapish achcatami cꞌuyan (Mateo 18:12-14). Diosca paipaj chingarishca ovejacunata mashcashpa, cutin paihuan alli tucuchun ayudasha nishcatami ricuchirca. Cai ovejacunata ayudangapaj imallata rurana cashcatapishmi huillarca. Pai michigrishcataca Israel llajtapi shuj michij imallata ruranahuanmi chꞌimbapurarca (Ezequiel 34:12-16). Puntapica, alli michijca paipaj oveja chingarishcatami mashcan. Chaipajca tal vez tiempo, esfuerzomi minishtirin. Chingarishca ovejata japishpaca cutinmi shujtaj ovejacunahuan tandachin. Chugririshca ovejata japishpaca michijca paipaj rigrapi apashpami ovejitataca jambinman. Mana cashpaca oveja yaricaihuan cajpica cꞌuyaihuanmi caranman. Ancianocunaca cai michij shinami congregacionmanta caruyashca huauqui panicunataca ayudancuna. Paicunaca Diospaj ovejacunata michijcunami can (1 Pedro 5:2, 3). Ancianocunaca chingarishcacunataca mashcashpami cutin congregacionman tigrachun ayudancuna. Shinallataj Dioshuan alli amigocuna tucuchun ayudashpami paicunaca cꞌuyaita ricuchincuna. w20.06 págs. 20, 21 párr. 10

¿Jesusca achca gentecuna paita catichun munashcamantachu, ñami campocunaca cozichanalla can nirca? Mana. Ashtahuanpish Bibliapica ashacunallami paipi crina cashcata huillarca (Juan 12:37, 38). Shinallataj Jesusca gentecunapaj shungupi ima tiyashcatami ricuj carca (Mateo 9:4). Mana tucuicuna paipi crinata yachashpapish tucuicunamanmi Diosmanta huillaj carca. Pero paipi crijcunatami ashtahuantajca ayudarca. Ñucanchijca gentecunapaj shungucunataca mana yachai tucunchijchu. Chaimantami maimanta cajpipish paicunataca mana juzgana canchij. Ashtahuanpish paicunataca Jesuspaj discipulocuna tucunata shinami ricuna canchij. Jesús paita catijcunaman imata nishcatami yuyaipi charina canchij. Jesusca “ña yurajyashca cꞌuchunallami” nishpaca granocunaca cozichanalla cashcatami nicurca. Gentecunaca paicunapaj causaipi cambiashpami Jesuspaj discipulocuna cai tucuncuna. Jehová Diospajca cai gentecunaca yallitaj valishcacunami can (Ageo 2:7). Ñucanchijpish gentecunataca Jehová Dios shina, Jesús shina ricushunchij. Chashnami paicuna ima shina causashcata, imata yuyashcata respetashun. Shinallataj paicunataca mana rijsishcacunata shinaca mana ricushunchu. Ashtahuanpish ñucanchij huauqui paicunata shinami ricushun. w20.04 pág. 13 párrs. 18, 19

Bibliapica Jehová Diosta cushichisha nishpaca Jesustami cꞌuyana canchij ninmi. Jesuspaj alli amigocuna cangapajca paitami alli rijsina canchij. Chaipajca Mateo, Marcos, Lucas, Juan librocunatami liyina canchij. Jesuspaj causaipi cutin cutin yuyashpami pai cꞌuyaj cashcata yachashun. Chashnami paitaca respetashpa cꞌuyai callarishun. Jesusca discipulocunapaj Amo cashpapish paicunataca esclavocunata shinaca mana tratarcachu. Ashtahuanpish paicunapaj amigo tucushpami Jesusca pai imata yuyashcata, ima shina sintirishcata huillarca. Paipaj discipulocuna llaquilla cajpica paipishmi llaquilla sintirishpa huacaj carca (Juan 11:32-36). Contracunapish Jesús paita uyajcunapaj alli amigo cashcatami cuentata curcacuna (Mateo 11:19). Jesús paipaj discipulocunata tratashca shina ñucanchijpish shujtajcunata tratashpaca paicunahuanmi alli apanacushun, cushillami sintirishun. Jesustapish ashtahuanmi cꞌuyashun, respetashun. w20.04 págs. 22, 24 párrs. 9, 10

1870 huatapajca Gran Bretañaca achca soldadocunatami charirca. Cai llajtaca achca llajtacunata mandajmi tucushcarca. Danielmanta profeciaca shuj uchilla gachu quimsa gachucunata anchuchishcatami huillan. Uchilla gachuca Gran Bretañatami ricuchin. Cutin caishuj quimsa gachucunaca Francia, España y Países Bajos nishcatami ricuchin (Daniel 7:7, 8). Primera Guerra Mundial casi tucuringacamami Gran Bretañaca ura ladomanta mandaj carca. Chai tiempopajca Estados Unidosmi tucui llajtacunamanta yalli achca cullquita charirca. Shinallataj Gran Bretañahuanca alli apanacushpami trabajai callarircacuna. Primera Guerra Mundial punllacunapimi Estados Unidos y Gran Bretañaca shujlla shina tucushpa shujtaj llajtacunamanta yalli poderyuj tucurcacuna. Shinallataj Daniel libropi nishca shinaca cai mandajcunami ‘ashtahuan cꞌari cꞌari achca soldadocunata tandachircacuna’. Cai último punllacunapica Estados Unidos y Gran Bretañaca ishquindijpura tandanacushpami ura ladomanta mandaj tucushcacuna. w20.05 pág. 4 párrs. 7, 8

Cai Allpa intimanta mana carupi, mana cꞌuchullapi cashcamantami yacuca tiyan. Por ejemplo, cai Allpa inti cꞌuchullapi cashpaca tucuimi chaquinman. Rupacuj jatun rumi shinami tucunman. Cutin Allpa intimanta asha carupi cajpica yacuca razumi tucunman. Jatun rundu shinami canman. Jehová Diosca Allpataca shuj alli lugarpimi churarca. Chaimantami yacuca mana tucurin. ¿Yacu illajca imamantataj mana saquirinchij? Intica mama cuchapi tiyaj yacucunata, Allpapi tiyaj huaquin cuchacunatami cunujyachin. Yacu cunujyashpaca pꞌuyucunami tucun. Cai pꞌuyucunapi tiyaj yacuca casi 10 punllacunatami cielopi saquirin. Chai huashaca cai yacuca tamya o razu tucushpami Allpaman cutin urman. Qꞌuipaca cai yacucunaca cutinmi mama cuchaman o cai Allpapi tiyaj cuchacunaman tigran. Chashnami Jehová Diosca cai Allpapi yacu ama tucurichun alajata rurashca. Paica shinami yachaisapa, tucuita ruraj cashcata ricuchishca (Job 36:27, 28). w20.05 pág. 22 párr. 6

Jesusca siempremi espíritu santota mañachun animarca (Lucas 11:9, 13). Jehová Diosca paipaj espíritu santotaca ‘tucuita rurai tucuj cashcata’ ñucanchijpi ricuchingapajmi utilizan (2 Corintios 4:7). Paipaj espíritu santohuan ayudajpimi ima problemacunatapish chꞌimbapurai tucushun. Yayitu Dios paipaj espíritu santota cujpimi pai ima mingashcataca pajtachi tucunchij. Imata ruranata yachajpica chaita ashtahuan alli rurachunmi ayudanga. Ñucanchijllaca imatapish mana pajtachi tucunchijchu. Diospaj espíritu santota chasquishpallami paipajtaca alli rurai tucunchij. ¿Espíritu santota valorashcata ricuchingapajca imatataj rurana canchij? Ñucanchij shungupi, yuyaipi ima mana alli munaicuna o yuyaicuna tiyashcata cuentata cungapajca Jehová Diostami mañana canchij (Salmo 139:23, 24). Yaya Diosca paipaj espíritu santota cushpami imapi cambiana cashcata ricuchinga. Mana alli yuyaicunata, mana alli munaicunata charishpaca chaicunamanta jarcaringapajmi Diostaca paipaj espíritu santohuan ayudachun mañana canchij. Chashnami mana alli ruraicunata mana rurasha nishcata ricuchishun. Chaipica Jehová Diosca paipaj espíritu santohuanmi ayudashpa catinga (Efesios 4:30). w20.05 pág. 29 párrs. 10-12

Diospaj shutita difindishpaca Jesuspaj ejemplotami caticunchij. Jesusca Diospaj shutita yachachishpallaca mana saquirircachu. Ashtahuanpish Jehová Dios ima shina cashcatami yachachirca. Por ejemplo, fariseocunaca Jehová Dios ñucanchij mana rurai tucushcata mandaj, ñucanchijta mana intindij, millai cashcatami yuyachisha nircacuna. Paicuna chashna yuyajpipish Jesusca Jehová Dios ñucanchijta intindij, pacienciata charij, cꞌuyaj, llaquij cashcatami yachachirca. Shinallataj Jesusca punllantami paipaj ruraicunahuan paipaj Yaya ima shina cashcata ricuchirca (Juan 14:9). Ñucanchijpish Jesús shinallatajmi Jehová Dios llaquij, cꞌuyaj cashcata gentecunaman huillana canchij. Chashnami Diablopish paita apoyajcunapish llullaj cashcata ricuchishun. Diospaj shutita jatunyachijpimi Diospaj shuti jucha illaj cashcata yachangacuna. Ñucanchij rimaicunahuan, ruraicunahuan Jehová ima shina cashcata ricuchinchij. Gentecuna Jehová Diosmanta ama panda yuyaicunata charichun ayudashpami Diospaj shutitaca jatunyachinchij. w20.06 págs. 6, 7 párrs. 17, 18

Redes socialesca familiacunahuan, amigocunahuan parlangapajmi alli can. Pero maijancunaca redes socialespi fotocunata churashpa, escribishpaca shujtajcunapaj ñaupajpi alli ricuringapajllami churancuna. ¿Canpish chaita ricushcanguichu? Cutin shujtajcunaca paicunapaj fotocunamanta shujtajcunapaj fotocunamantaca mana allicunatami comentancuna o mapa shimicunatami quillcancuna. Diosta sirvijcunaca caicunataca mana ruranchu. Ashtahuanpish paicunaca humildecunami cana can. Shujtajcunamantapish sustarishcatami ricuchina can (1 Pedro 3:8). Redes socialesta utilizacushpaca cashna nishpa tapurishunchij: “¿Ñuca churashca fotocuna, videocuna, comentariocunaca ima shinataj can? ¿Ñuca ima shina causashcata, ñuca imalla charishca cosascunata ricuchunchu munani? ¿Caicunata ricushpaca shujtajcunaca envidiai callaringachu?”. Diosta sirvijcunaca shujtajcuna jatunyachichunca mana munanchijchu. Cai punllapaj versopi ima nishcatami catina canchij. Humildecuna cashpaca, cai mundopaj yuyaicunahuanca mana chagrurishunchu. (1 Juan 2:16). w20.07 págs. 6, 7 párrs. 14, 15

Apóstol Pablotaca Jesuspaj discípulo manaraj tucujpica Saulo nishpami rijsijcuna carca. Paica Jesusta catijcunatapish catirashpa llaquichijmi carca (Hechos 7:58). Pero huauqui panicunata ama llaquichichunmi Jesusca Pablotaca jahua pachamanta parlashpa mandarca. Shinallataj ñahui mana ricujtami saquirca. Pabloca cutin ricungapajca pai llaquichishcacunallatatajmi ayudata mañarca. Humilde cashcamantami Jesusta catij Ananiaspaj ayudata chasquirca (Hechos 9:3-9, 17, 18). Asha tiempo qꞌuipaca Pabloca congregacionpimi rijsishca tucurca. Pero Pabloca Damasco ñanta ricujpi, Jesús jahua pachamanta parlashpa ima yachachishcataca mana cungarircachu. Paica humilde cashcamantami huauqui panicunapish paita ayudachun saquirca. Pabloca: ‘Paicunaca ñucata achcata cushichijcunapishmi carca’ nircami (Colosenses 4:10, 11). w20.07 págs. 18, 19 párrs. 16, 17

Jehová Diosca tucuita rurai tucuj cashpapish shujtajcunamanmi autoridadta cun. Por ejemplo, Jesusta 144 mil agllashcacunatapish paipaj Gobiernopi mandachunmi agllashca. Pero rey cachun, sacerdotecunata mandaj cachunmi puntaca Jesustaca yachachirca (Hebreos 5:8, 9). Shinallataj 144 mil agllashcacunatapish paipaj Churihuan mandachunmi yachachin. Pero paicunaman paipaj munaita pajtachichun mingashpapish, Yayitu Diosca paicunaca allichu pajtachinga o mana allichu pajtachinga nishpaca mana yuyanchu. Chaipaj randica paicunapimi confiashcata ricuchin (Apocalipsis 5:10). Jehová Diosca shujtajcunapaj ayudata mana minishtishpapish shujtajcuna ayudachunmi saquin. Ñucanchijcarin shujtajcuna ayudachunmi saquina canchij. ¿Familiata pushajcunapish congregacionta pushajcunapish ima shinataj Jehová Diospaj ejemplota cati tucuncuna? Shujtajcunaman trabajocunata mingashpa, chai trabajocunata ima shina pajtachichun yachachishpami ayudana can. Pero chaicunata pajtachicujta ricushpapish mana tucuita controlanachu can. Chashnami chai trabajotaca cushilla pajtachingacuna (Isaías 41:10). w20.08 págs. 9, 10 párrs. 5, 6

Jehová Diosca paimanta caruyashca huauqui panicunataca ¿ima shinataj ricuchun munan? Jesuspaj ejemplomantami yachai tucunchij. Paica Diospajca tucuicuna valishca cashcatami yacharca. Chaimantami Jesusca Israel llajtamanta chingarishca ovejacuna Diospajman cꞌuchuyachun ayudarca (Mateo 15:24). Jesuspish alli michij cashcamantami Jehová Diospaj ovejacuna ama chingarichunca achcata esforzarirca (Juan 6:39). Apóstol Pabloca Éfeso llajtapi causaj ancianocunamanca Jesuspaj ejemplotami catina canguichij nircami. Pabloca cashna nishpami escribirca: “Fuerza illaj cajcunata ayudangapajmi sinchita trabajana canguichij. Shinallataj Jesús nishcacunatami yuyarina canguichij. Paica: ‘Imatapish cujmi cushcata japijta yalli cushicun’ nircami” (Hechos 20:17, 35, NWT ). Cai versocunapi ricushca shinaca ancianocunapajca Diosta sirvijcunata cuidanami ashtahuan importante can. España llajtamanta shuj huauqui ancianoca: “Jehová Diosca paimanta caruyashcacunamantami achcata preocuparin. Caita yuyarishpami paicunata ayudangapajca tucui pudishcata rurani. Chaimantami Jehová Dios paicunata cuidachun munashcata intindini” ninmi. w20.06 pág. 23 párrs. 15, 16

Jehová Diosca pacienciata charishcamantami ñucanchij jucha illaj tucungacama mil huatacunata shuyanga. Chai tucui huatacunapimi ñucanchij juchacunataca perdonashpa catinga. Ñucanchijpish paipaj ejemplota catishpami shujtajcunapaj alli cualidadcunata ricuna canchij. Jehová Dios cai Allpata rurajpica Jesuspish, angelcunapish achcatami cushicurcacuna. Shinallataj paraíso Allpapi gentecuna jucha illaj tucushcata ricushpa, Jehová Diosta sirvicujta ricushpami cushilla sintiringacuna. 144 mil agllashcacunapish cai Allpata Jesushuan mandacujpica gentecunaca achcatami beneficiaringacuna (Apocalipsis 4:4, 9-11; 5:9, 10). Paraíso Allpapi ungüicuna illaj, llaquicuna illaj, huañuicuna illaj causanapi yuyai. Chai punlla chayamungacamaca Yaya Dios shina cꞌuyaita, alli yachaita, pacienciata ricuchingapajmi decididos cana canchij. Chaita rurashpaca llaquicunahuan chꞌimbapuracushpapish cushillami causashun (Santiago 1:2-4). Jehová Dios huañushcacunata causachinata yachashpaca achcatami agradicinchij (Hechos 24:15). w20.08 pág. 19 párrs. 18, 19

Jehová Diosca ñucanchijta cꞌuyashcamantami Bibliataca cushca. Paica ñaupa punllacunapimi paipaj ayudahuan huaquin cꞌaricunaman Bibliata quillcachun mingarca. Diosca ñucanchij causaimanta rurashca tapuicunatami paipaj Shimipi cutichin. Maipica cashna nishpachari tapurishcanchij: “¿Imamantataj tiyai callarircanchij? ¿Imapajtaj causanchij? ¿Shamuj punllacunapica imataj tucunga?” Jehová Diosca tucui gentecuna cai tapuicunamanta yachachunmi munan. Chaimantami ñaupa punllacunamanta, cunan punllacunacama Bibliata traducichunca gentecunata ayudashca. Cunan punllacunapica Bibliataca ashalla partecunata o tucuitami 3 mil yalli shimicunapi traducishcacuna. Bibliataca shujtaj librocunamanta yalli achca shimicunapimi traducishca. ¿Jehová Dios Bibliata cushcamantaca ima shinataj agradicishcata ricuchinchij? Bibliata tucui punllacuna liyishpa, ima yachachishcacunapi cutin cutin yuyarishpa, chaipi yachachishcacunata causaipi pajtachishpami paita agradicishcata ricuchinchij. Shinallataj gentecunaman Diospaj Shimimanta yachachingapaj esforzarishpami paita agradicishcata ricuchishun (Salmo 1:1-3; Mateo 28:19, 20). w20.05 págs. 24, 25 párrs. 15, 16

Profeta Jeremiasca gentecuna mana uyasha nij lugarcunapimi huillarca. Paica desanimarishca sintirishcamantami casi huillanata saquirca. Pero huillanataca ¿imamantataj manataj saquirca? Paica: ‘Diospaj shimicunaca ñuca shungupica nina rupachicuj shinami tucurca’ nircami. Chaimantami Jeremiasca huillanataca mana saquirca (Jeremías 20:9). Ñucanchijpish tucui punllacunami Diospaj Shimita liyishpa ima yachachishcataca ñucanchij shungupi huaquichina canchij. Chashnami ñucanchijpish Jeremías shina huillanataca manataj saquishun. Shinallataj huillanapipish cushillami sintirishun. Tal vez gentecunapish ashtahuan yachanatami munangacuna (Jeremías 15:16). Chaimanta desanimarishca cashpaca Diosman ima shina sintirishcata tucuita huillashunchij, paipaj ayudatapish mañashunchij. Paimi ñucanchij pandarijpipish, ungushca cajpipish ayudanga. Congregacionpipish ima mingashcacunahuan humildes cachunmi ayudanga. Predicajpi gentecuna mana uyasha nijpipish cushilla huillashpa catichunmi ayudanga. Jehová Diospaj ayudahuanmi desanimarishca canata mishashun. w20.12 pág. 27 párrs. 20, 21

Maijan panicunaca tandanacuicunallapi huauqui panicunahuan pasangapajmi oportunidadta charincuna. Chaimanta tandanacuicunapi alli chasquingapaj, paicunahuan parlangapaj, paicunamanta preocuparishcata ricuchingapaj esforzarishunchij. Jesús shinallataj panicunahuan pasangapaj tiempota surcushunchij (Lucas 10:38-42). Tal vez ñucanchijpaj huasipi micunata carangapaj, o paicunahuan tiempota pasangapajmi invitai tucunchij. Invitashpapish animaj shimicunahuan parlashunchij (Romanos 1:11, 12). Congregacionta pushajcunapish Jesuspaj ejemplotami catina can. Jesusca allimi yacharca huaquincunapaj soltero canaca mana fácil cashcata. Pero cazarashpalla o huahuacunata charishpalla cushi causaita chari tucushcataca mana nircachu. Chaipaj randica Diosta punta lugarpi churashpa cushilla causanatami yachachirca (Mateo 19:12; Lucas 11:27, 28). Congregacionta pushaj huauquicunaca Diosta sirvij panicunataca mamata shina, panita shinami ricuna can. Chaimantami tandanacuicuna manaraj callarijpi, o tandanacui tucurishca qꞌuipa paicunahuan parlangapaj tiempota surcuna can. Chashnami paicunamanta preocuparishcata ricuchincuna. w20.09 págs. 21, 22 párrs. 7-9

Israel llajtapica granota tarpuj runaca tamya callarishca huashami casi octubre chaupi quillapi tarpuj carca. Cutin chai tarpuj runaca tamya ña tucurigrijpimi abril chaupi quillapi granocunataca cosechaj carca (Marcos 4:28). Tarpuj runaca granota tarpushca horasmanta grano pꞌucungacamami pacienciata charin. Ñucanchijpish chashnallatajmi pacienciata charina canchij. Pero maipica pacienciata charinaca ñucanchijpajca sinchichari ricuringa. Juchayujcuna cashcamantami Bibliamanta yachacujcuna Diosta rato sirvichun munanchij. Cutin tarpuj runapi yuyashun. Paica granota tarpungapajca puntaca allpatami alajata rahuan chai huashaca granotami tarpun. Tarpushca huasha planta huiñajpica mana alli qꞌuihuacunatami anchuchin. Yacutapishmi churan. Chashna pacienciahuan cuidajpimi granocunaca alajata pꞌucunga. Gentecuna Jesuspaj discipulocuna tucuchunca ñucanchijpish pacienciatami ricuchina canchij. Gentecunaca Diosmanta yachangapajca tiempota, pacienciatami minishtincuna. Chaimanta gentecuna mana uyasha nijpica mana desanimarinachu canchij. Huaquincunaca Bibliataca allimi estudiancuna. Pero paicuna sinchi feta charichunca mana obliganachu canchij. Jesuspaj discipulocunapish Jesús yachachishcata alli intindingapajca tiempotami minishtirca (Juan 14:9). Ñucanchijca gentecunaman yachachishpapish paicunapaj fetaca mana sinchiyachi tucunchijchu. Ashtahuanpish Jehová Dioslla paicunapaj feta sinchiyachi tucushcataca mana cungarinachu canchij (1 Corintios 3:6). w20.09 págs. 10, 11 párrs. 10, 11

Tucuicunami yachacuj bautizarichun munanchij. Chaipajca yachacujtami tandanacuicunaman richun animana canchij. Yachacujcuna tandanacuicunaman rishpaca ratomi bautizarincuna. Huaquin yachachijcunaca yachacujtaca: “Huasipica mana tucuita yachai tucunguichu. Chaimantami tandanacuicunaman rina cangui” nishpami animancuna. Hebreos 10:24, 25-tami yachacujman liyina canchij. Shinallataj cai versocuna tandanacuiman rina imamanta importante cashcatami ricuchina canchij. Yachacujta ‘tandanacuicunamanmi rina cangui’ ninapaj randica ñucanchij tandanacuicunapi ima yachashcacunatami cushilla paiman parlana canchij. Tandanacuiman punta cutin rishpaca chaipi imata yachashcata imata uyashcata intindishpaca shujtaj religioncunapi mana nunca yachashcatami cuentata cunga (1 Corintios 14:24, 25). Tandanacuicunapica Diosta alli sirvijcunatami rijsinga. Diosta alli sirvijcunami yachacujcuna bautizarichunpish animanga. w20.10 pág. 11 párrs. 14, 15

Diospaj espíritu santomi Biblia yachachishcacunata causaipi pajtachichun ayudanga. Salmista shina Jehová Diosta mañashunchij. Paica: “Mandaj Dioslla, quiquinpaj ñanta yachachihuayari. Quiquinpaj mana llullapimi purisha. Quiquinpaj shutita manchashpa causanata ñuca shungupi sinchiyachiyari” nircami (Salmo 86:11). Chaimanta Bibliata, Diospaj organización cushca publicacioncunatapish estudiashpa catishunchij. Pero yachanallataca mana munanchijchu. Chaipaj randica ima yachashcata causaipi pajtachishpa causashunchij. Diospaj espíritu santomi caita pajtachichunca ayudanga. Huauqui panicunatapish animashunchij. Paicunaca ñucanchij familiacunami can (Hebreos 10:24, 25). Tandanacuicunapi comentangapaj, pai mingashcata pajtachingapajca paipaj espíritu santotami ayudachun mañana canchij. Caicunata pajtachishpaca Jehová Diosta, paipaj Churita, paipaj ovejacunata cꞌuyashcatami ricuchishun (Juan 21:15-17). Shinami Dios cushca yachaicunata estudiashpa ñucanchijta Yachachij Diosta uyashun. w20.10 págs. 24, 25 párrs. 15-17

¿Apostolcuna irquilla shina cajpipish Jesusca ima shinataj tratarca? Jesús pai causarishca qꞌuipa imata rurashcapi yuyashun. Paica Diosta sirvij huarmicunatami pai causarishcata apostolcunaman huillachun cacharca. Jesusca: ‘Ama manchaichijchu. Ñuca huauquicunaman huillanaman richij’ nircami (Mateo 28:10a). Paita catijcuna paita saquishpa rijpipish Jesusca “ñuca huauquicuna” nishpami catirca. Jesusca Jehová Dios shinallatajmi cꞌuyaj, perdonaj carca (2 Reyes 13:23). Huillanata saquijcunamantaca ñucanchijpish achcatami preocuparinchij. Paicunaca ñucanchij huauqui panicunami cashpa catincuna. Paicunataca achcatami cꞌuyanchij. Paicunaca Jehová Diosta sirvingapaj tucui pudishcata rurashcataca manataj cungarinchijchu. Maijancunaca huillanata manaraj saquishpaca Diospajca achca huatacunatami trabajashcacuna (Hebreos 6:10). Paicunataca ñucanchij yuyaipimi charinchij (Lucas 15:4-7). Ñucanchijca chiriyashca huauqui panicunatami tandanacuicunaman richun invitai tucunchij. ¿Chiriyashcacuna tandanacuicunaman cutin shamujpica ñucanchijpish imatataj rurana canchij? Paicunapajman cꞌuchuyashpami alli chasquina canchij. w20.11 pág. 6 párrs. 14-17

Santiagopaj Juanpaj mamaca Jesustaca: ‘Ñuca ishqui churicunataca Diospaj Mandanapi shujtaca alli ladoman, caishujtaca cambaj lluqui ladoman tiyachingui’ nircami. Shina nijpica ¿Jesusca imatataj nirca? Jesusca paipaj Yayalla chai autoridadta charishcatami intindichirca (Mateo 20:20-23). Chashnami paica mana tucui autoridadta charishcata ricuchirca. Jesusca Dios mandashcallatami rurarca. Chashnami humilde cashcata ricuchirca (Juan 12:49). ¿Ima shinataj Jesuspaj ejemplota cati tucunchij? Jesús shina humilde cangapajca cunan punllapaj versopi nishcatami cazuna canchij. Pi ñucanchijman consejota mañajpica mana ñucanchij yuyaillamantachu consejota cuna canchij. Ashtahuanpish alli yuyashpami Bibliapi, publicacioncunapi ricushpa consejana canchij. Chashnami Jehová Dioslla ñucanchijta yalli alli consejaj cashcata ricuchishun (Apocalipsis 15:3, 4). w20.08 págs. 11, 12 párrs. 14, 15

¿Shuj amigota consejangapajca imatataj yuyaipi charina canchij? Manaraj paihuan parlashpami cashna nishpa tapurina canchij: “¿Tucuipi cashcata ruraj shinachu cani?” Tucuitami cashcata rurani nishpa yuyaj gentecunaca Jehová munashca shinaca mana juzgancunachu. Paicunaca paicuna yuyashca shinami shujtajcunatapish juzgancuna. Shujtajcunaman cꞌuyaitapish ricuchinataca mana yachancunachu. Ñucanchijpish caita yachashca qꞌuipaca ñucanchij amigocunahuan parlana minishtirishca cashcata yachashpaca caita rurashunchij. Imamanta paihuan parlasha nishcata alli intindichishunchij. Imapi pandaricushcata cuentata cuchun tapushunchij. Pero consejacushpaca Biblia yachachishca shinami consejana canchij. Yuyarinami canchij paicunaca paicunapaj pandarishcamantaca mana ñucanchijman cuentata cungacunachu. Ashtahuanpish Jehová Diosmanmi cuentata cungacuna (Romanos 14:10). Picunaman consejacushpaca Biblia yachachishca shina consejashunchij. Shinallataj Jesús shina cꞌuyaihuan consejashunchij (Proverbios 3:5; Mateo 12:20). Yuyarishunchij Jehová Diosca ima shinami ñucanchij shujtajcunata tratanchij. Chashnallatajmi paipish ñucanchijtaca tratanga (Santiago 2:13). w20.11 págs. 21, 22 párr. 13

Gordo cajpi, flaco cajpi, ima color cajpipish ñahuillata ricushpa juzgachunca mana munanchijchu ¿nachu? Jehová Dios ñahuillata ricushpa mana juzgajpimi cushilla sintirinchij. Por ejemplo, paica Samuelmanca Jesepaj churica Israel llajtata mandajmi tucunga nircami. Samuelca Jesepaj churicunata ricushpaca mana Jehová Dios shina yuyarcachu. Jesepaj punta churi Eliabta ricushpaca paica: “Paitamari Mandaj Diosca jatun mandaj cachun agllashca canga” nircami. Chaimi Diosca Samueltaca: “Pai sumaj cashcallata, jatun runa cashcallataca ama ricuichu. Chashnacunataca ñucaca yanganchinimi” nircami. ¿Caimantaca imatataj yachanchij? “Runaca paipaj ñahuipi ricurishcallatami ricun. Ashtahuanpish Mandaj Diosca shungutamari ricun” (1 Samuel 16:1, 6, 7). Jehová Dios shina huauqui panicunata cꞌuyaihuanmi tratana canchij. w20.04 págs. 14, 15 párrs. 1, 3

Jesusca Galileaman ricushpaca ña granucuj cebada chagracunatami pasashpa rirca (Juan 4:3-6). Casi chuscu quillacunatami cebadata cozichangapajca faltashcanga. Chaimi Jesusca paipaj discipulocunamanca: “Chagracunata huichilla ricuichij, ña yurajyashca cꞌuchunallami” nirca (Juan 4:35, 36). ¿Jesusca imatataj nisha nicurca? Jesusca mana granota tandanamantachu parlacushcanga. Ashtahuanpish gentecunata tandachinamantami parlacushcanga. Ima tucushcapi yuyashun. Judiocunaca samaritanocunahuan mana apanacuj cajpipish Jesusca shuj samaritana huarmimanmi predicarca. Cai huarmica Jesús predicashcataca allimi uyarca. Shujtaj samaritanocunamanpish ima uyashcatami huillarca. Jesús ‘chagracuna ña yurajyashca, cꞌuchunallami’ nishpa parlacujpica cai huarmi parlashca samaritanocunaca ashtahuan yachangapajmi paipajman cꞌuchuyarcacuna (Juan 4:9, 39-42). Bibliamanta estudiaj shuj runaca caimanta parlashpaca: “Cai gentecuna Jesuspajman utca rishpaca cozichanalla granocuna laya cashcatami ricuchircacuna” ninmi. w20.04 pág. 8 párrs. 1, 2

Tandanacuicunapica alli yachachijcuna canata, alli predicajcuna canatami yachashun. Por ejemplo, tandanacuicunapimi publicacioncunahuan, videocunahuan ima shina yachachinata yachanchij. Pero tandanacuicunapajca allimi prepararina canchij. Chaipi yachashcacunatapish allimi uyana canchij. Yachashcacunatapish ñucanchijca pajtachinami canchij. Caicunata rurashpaca Diablopish paita apoyajcunapish ñucanchijta pandachichunca mana saquishunchu. Ashtahuanpish Diosta alli sirvijcuna cashcatami ricuchishun (2 Timoteo 2:3). Huaranga huaranga angelcunapaj ayudatapishmi charinchij. Isaías 37:36-pi ricushca shinaca shuj angelllami achca soldadocunata huañuchirca. Huaranga huaranga angelcunacarin imatapish ratomi mishai tucunga. Chaimantami demoniocunata, Diablota apoyajcunataca angelcunaca rato mishangalla. Ñucanchijmantaca maipica Diosta mana sirvij familiacuna, o escuelapi, trabajopi compañerocunami mana allicunata nincuna o burlarincuna. Pero mana ñucanchijlla cashcata yuyanachu canchij. Jehová Dios, Jesús, angelcunami ñucanchijhuan can (Jueces 6:16). Caita yuyaipi charishpami Diablo pandachichunca mana saquishun. w21.03 pág. 29 párrs. 13, 14

Tal vez Apóstol Pabloca Isaías 22:13-mantami parlacushcanga. Chaipica israelitacunaca Diospajman cꞌuchuyanapaj randica paicunapaj causaipi cushicunallata mashcashcatami ricuchin. Cunan punllapipish huaquin gentecunaca israelitacuna shinami: ‘Causaipi cushicushunchij. Causaica mana para siemprepajchu’ nincuna. Corinto llajtapi causaj huauqui panicunaca huañushcacuna causarinapi mana crijcunahuanca mana tandanacunachu carca. ¿Caimantaca imatataj yachanchij? Causaillapi cushicushpa causashunchij nishpa yuyaj gentecunahuan tandanacushpaca llaquipimi urmashun. Ñucanchij alli causacushcatami pandachingacuna. Shinallataj Dios mana munashcatapish rurachunmi pandachingacuna. Ñucanchijpish huañushcacuna causarinapi crishcamantami pihuan pasangapaj tiempota agllacushpaca, alli ricushpa agllana canchij. Pabloca: ‘Mana allicunahuan tandanacujpica alli yuyaihuan chapaichij, ama juchata ruraichijchu’ nishpami consejarca (1 Corintios 15:33, 34, NWT ). w20.12 pág. 9 párrs. 3, 5, 6

Cai versopica Jehová Dios picunaman autoridadta cushcatami yachachin. Diosca tucuicunamanta yallimi autoridadta charin. Chaimanta autoridadta chasquijcunaca imamanta chasquishcata, ima shina pajtachinatami alli yachana can (Romanos 14:10; Efesios 3:14, 15). Jehová Diosca Jesustami congregacionta pushachunca autoridadta cushca. Pero Jesusca ñucanchijta ima shina tratashcataca Jehová Diosmanmi cuentata cunga (1 Corintios 15:27). Jehová Diosca cusacunamanpishmi huarmita, huahuacunata alli pushachunca autoridadta cushca. ¿Cusacunaca paicunapaj familiata alli pushangapajca imatataj rurana can? Paica huarmita, huahuacunata alli pushangapajca Jehová ima nishcatami alli intindinaraj can. Shinallataj paipaj familia ucupi imamanta autoridadta charichun Jehová Dios churashcatami alli yachana can. Jehová Diospaj, Jesuspaj ejemplotapish ima shina catinatami yachana can. ¿Caicunata yachanaca imamantataj valishca can? Jehová Diosca cusacunamanmi familiacunata alli pushachun autoridadta cushca. Chaimanta paica cai autoridadtaca alli pajtachichunmi munan (Lucas 12:48b). w21.02 págs. 2, 3 párrs. 1-3

Yuyaita alli utilizangapajca Jehová Diospaj ejemplotami catina canchij. Por ejemplo, Diosca tucuita yuyarij cashpapish ñucanchij juchacunamanta arrepintirijpica paica perdonashpami cungarin (Salmo 25:7; 130:3, 4). Ñucanchijtapish shujtajcuna llaquichishpa, perdonahuai nijpica Jehová Diosca paicunata perdonachunmi munan (Mateo 6:14; Lucas 17:3, 4). Jehová Dios ñucanchijman ñutcuta cushcamantami paita jatunyachishpa agradicishcata ricuchinchij. Maijancunaca paicuna munashcallata rurangapajmi ñutcutaca utilizancuna. Chaimantami paicunallataj caita ruranaca alli, chaita ruranaca mana alli nishpa imatapish dicidincuna. Pero Jehová Diosmi ñucanchijta rurarca. Chaimantami pailla caita o chaita rurachun mandai tucushcata intindinchij (Romanos 12:1, 2). Diospaj mandashcacunata pajtachishpaca cushillami causanchij (Isaías 48:18). Jehová Dios ñucanchij causaipi imata rurachun munashcatapishmi yachanchij. Cꞌuyaj Diosta jatunyachingapaj, paita cushichingapajmi causanchij (Proverbios 27:11). w20.05 págs. 23, 24 párrs. 13, 14

¿Huauqui panicunaman shungumanta cꞌuyaita ricuchingapajca imatataj rurana canchij? Paicunataca allimi rijsina canchij. Chashnami paicunataca alli intindishun, ashtahuan cꞌuyashun. Mashna huatata charijpipish, ima culturamanta cajpipish paicunahuanmi alli apanacui tucunchij. Jonatanca Davidpaj 30 huatacunahuan yalli cashpapish paihuanmi alli apanacurca. Chaimantami ñucanchijpish congregacionpi mayorlla huauqui panicunahuanpish, jovenlla huauqui panicunahuanpish amigos tucungapaj esforzarina canchij. Chashna rurashpaca tucui huauqui panicunata cꞌuyashcatami ricuchishun (1 Pedro 2:17). Congregacionpi tucui huauqui panicunata cꞌuyashpapish maipica shujtajcunahuanmi ashtahuan alli apanacunchij. Maijan huauqui panicuna ñucanchij shina yuyashcamanta o ñucanchij munashca shina imatapish rurashcamantami paicunahuan ashtahuan alli apanacunchij. Jesuspish paipaj tucui apostolcunahuan alli apanacushpapish Juantami ashtahuan cꞌuyarca (Juan 13:23; 15:15; 20:2). Jesusca Juanta ashtahuan cꞌuyashpapish tucui apostolcunatami igual tratarca (Marcos 10:35-40). w21.01 págs. 23, 24 párrs. 12, 13

Apóstol Pabloca sinagogacunapi caj judiocunamanca shuj laya, Atenaspi causaj griegocunamanca shujtaj layami huillaj carca. Paica Atenas llajtapi imalla tiyashcacunata ricushpami gentecuna imata crishcata cuentata curca (Hechos 17:23). Chaita yuyaipi charishpami Bibliamanta yachachirca. Chashnami apóstol Pabloca Atenaspi causajcuna imata crishcata yuyaipi charishpa Diosmanta predicarca. Paicunamanca: ‘Cancunaca mana rijsishca Diostami adorasha ninguichij. Ñucaca chai Diosmantami huillacuni’ nircami. Pabloca Atenaspi causajcuna Diospaj Shimita mana yachajpipish Diostaca mana nunca sirvingachu nishpaca mana yuyarcachu. Ashtahuanpish cozichanalla granocunata shinami ricurca. Pablo shina alli ricujcuna cashunchij. Gentecuna imapi crishcata yachangapajca paicuna imalla charishcata ricushun. Por ejemplo, huasi muyundijpi ima tiyashcata, carrocunapi ima adornocunata churashcata, imata quillcashcatami ricuna canchij. Shinallataj paicunapaj shuticuna, ima shina allichirishcacuna, ima shina parlashcacunami maijan religionmanta cashcata ricuchin. w20. 04 págs. 9, 10 párrs. 7, 8