Octubre

Jesusta ashtahuan rijsishpaca, pai shinami yuyashun, rurashunpish. Chashnami paihuanca alli apanacushun. Jesusca paillapi yuyanapaj randica shujtajcunata ayudanapimi yuyarca (Mateo 20:28; Romanos 15:1-3). Chaimantami paicunamanta sustarishpa, paicunataca perdonaj carca. Paita yangamanta juchachijpipish mana rato colerajllachu carca (Juan 1:46, 47). Gentecunapaj pandarishcacunatapish mana cutin cutin yuyaricujllachu carca (1 Timoteo 1:12-14). Ñucanchijpish Jesuspaj ejemplotami catina canchij. Paica: “Chashna caishuj chaishuj cꞌuyanacujpimi, cancunataca ñuca yachacujcunataj cashcata tucuicuna rijsingacuna” nircami (Juan 13:35). Chaimanta cashna nishpa tapurishunchij: “¿Ñucapish Jesús shinachu huauqui panicunahuan alli apanacungapaj esforzaricuni?”. w20.04 pág. 24 párr. 11

Ñucanchijca Diosta yangapi churajcunahuanmi causanchij. Chaimantami Jehová Diosca jucha illaj, cashcata ruraj, alli, cꞌuyaj cashcata yachachina canchij. Jehová Dioslla ñucanchijta mandachun munashcatami ricuchina canchij. Tranquilo causaita, sumaj causaitami cunga nishpami gentecunamanca huillanapish canchij (Salmo 37:9, 37; 146:5, 6, 10). Bibliamanta estudiota cucushpaca Jehová Dioslla mandana derechota charishcatami yachachinchij. Chaica ciertomi can. Dios mandashcacunamanta parlashpapish gentecuna Jehová Diosta cꞌuyachun paita cazuchunmi yachachina canchij. Chaimantami Jehová Dios ima shina cashcata ricuchina canchij (Isaías 63:7). Caicunata rurajpica gentecunaca Jehová Diostami cꞌuyangacuna y paipaj mandashcacunatapishmi cazusha ningacuna. w20.06 págs. 6, 7 párrs. 16, 19

Gentecunapaj ñutcuca alli rurashcami can. Mamapaj huijsapi cai horasmantami Jehová Diosca ñucanchij ñutcu formarishpa catichun rurashca. Cada minutocunami achca celulacunaca ñucanchij ñutcupi formarincuna. Ñucanchij ñutcuca 3,3 libracunatami pesan. Shina cajpipish investigajcuna nishca shinaca ñutcuca casi 100 mil millones neuronacunatami charin. ¿Ñutcuta charishcamantaca imallatataj rurai tucunchij? Por ejemplo, shuj palabrata parlangapajca ñucanchij ñutcuca cꞌallupi, cungapi, shimipi, quijadospi, pechopi tiyaj musculocunatami cuyuchina can. Palabracuna alli intindirichunca cai musculocunami ordenpi cuyurina can. 2019 huatapimi shuj estudiota rurarcacuna. Chaipica llullu huahuacunaca huaquin palabracunatami intindi tucuncuna ninmi. Cai estudiomi huaquin investigajcunapaj nishcacuna ciertotaj cashcata ricuchin. Paicunaca chꞌican chꞌican shimicunata parlangapaj o intindingapajmi rurashca canchij nincunami. Parlanaca Dios cushca sumaj regalomi can. w20.05 págs. 22, 23 párrs. 8, 9

Abrahamca Ur llajtapi imalla charishcacunata alaja causaitami saquirca. ¿Imamanta? Paica, ‘alli sinchita shayachishca pueblota shuyacushcamantami’ chashna rurarca (Hebreos 11:8-10, 16). Abraham shuyacushca puebloca, Diospaj Gobiernotami ricuchin. Cai Gobiernopica Jesucristo, 144.000 agllashcacunami mandangacuna. Pabloca Diospaj Gobiernotaca “causaj Diospaj jahua pacha causaj Jerusalén” ninmi (Hebreos 12:22; Apocalipsis 5:8-10; 14:1). Jesusca paipaj discipulocunamanca: ‘Cambaj Gobierno ña chayamuchun. Ima shinami jahua pachapi can munashcata ruracun, shinallataj cai pachapipish can munashcata rurachun’ nishpa Yaya Diosta mañanguichij nircami (Mateo 6:10). Abrahamca Diospaj Gobierno ima laya cashcataca mana tucuita alli yacharcachu. Achca huatacunatami cai Gobierno ima cashcata pi mana yachai tucurca (Efesios 1:8-10; Colosenses 1:26, 27). Pero Jehová huillashca shinaca Abrahamca paipaj huahua huahuacuna mandaj tucuna cashcatami alli yacharca. Paica Jehová Dios ima huillashcata pajtachingacamami shuyana carca (Génesis 17:1, 2, 6). w20.08 págs. 2, 3 párrs. 2-4

Apostatacuna nishcacunataca mana uyanachu canchij. Apostolcuna causashca punllacunamantami Diabloca Diosta sirvijcunapaj fetaca chiriyachisha nishca. Chaimantami ima llulla cashcata, ima mana llulla cashcataca alli yachana canchij. Diospaj contracunaca Jehová Diospi confiachun, huauqui panicunatapish cꞌuyachunca mana munancunachu. Chaipajca paicunaca Internetpi o redes socialescunapimi llullacunata nincuna. Chai llullacunaca Diablomantami shamun. Chaimantami mana crina canchij (1 Juan 4:1, 6; Apocalipsis 12:9). Diablo ñucanchij feta ama chiriyachichunca Jesuspimi tucui shunguhuan crina canchij. Shinallataj Jehová Dios paipaj munaita Jesushuan pajtachicushcatami crina canchij. Diosca paipaj organizacionta ñaupajman pushangapajca Cuerpo Gobernante huauquicunatami churashca. Chaimantami paicunapi confiana canchij (Mateo 24:45-47, QC, 1989). Punllanta Bibliata estudiashpaca Jesuspi, Cuerpo Gobernante huauquicunapimi ashtahuan confiashun. Chashnami ñucanchij feca sapiyashca yura shina canga. Apóstol Pabloca Colosas llajtapi huauqui panicunaman cai punllapaj versopi nishcatami quillcarca. w20.07 págs. 23, 24 párrs. 11, 12

Juchayujcuna cashcamantami pitapish ñahuita ricushpalla juzganchij (Juan 7:24). Pero caipi yuyashun. Shuj doctorca experienciata charishpapish, yachaisapa cashpapish ungushcata jahua jahualla ricushpaca mana jambi tucungachu. Ima ungüicunallata charishcata, ima shina sintirishcata, ima nanaihuan cashcata yachangapajmi alli uyana can. Shinallataj ungushcapaj cuerpo ucucunata ricungapajca radiografiata surcuchunmi cachana can. Caita mana rurashpaca doctorca mana alli jambicunatami cui tucun. Ñucanchijpish huauqui panicunapaj jahua ñahuillata ricushpaca paicuna ima shina sintirishcataca mana yachai tucunchijchu. Ashtahuanpish paicunata alli rijsingapajmi esforzarina canchij. Ñucanchijca gentecunapaj shungutaca mana ricui tucunchijchu. Pero Jehová Dios shina ricungapajmi achcata esforzarina canchij. Paica paita sirvijcunataca allimi uyan. Paicuna ima shina huiñashcata, cunan punllacunapipish ima shina causashcataca allimi ricun. Chaita ricushpami cꞌuyaihuan tratan. w20.04 págs. 14, 15 párrs. 1-3

Jatun tucushcacunaca alli yuyaita charishcataca mana ricuchincunachu. Pero Diosta sirvijcunaca humildesmi cana canchij. Jatun tucushcacunaca pꞌiñanacushpa, paicunallapi yuyashpami causancuna. Ashtahuancarin paicuna yuyashcahuan, rurashcahuanca paicunallatajmi llaquipi urmancuna. Shinallataj shujtajcunatapishmi llaquichincuna. Paicunapaj yuyaita mana cambiajpica Diabloca paicunatami jahualla pandachinga (2 Corintios 4:4; 11:3). Humilde gentecunaca alli yuyayuj cashcatami ricuchincuna. Chaimantami paicunaca shujtajcuna paicunata yalli cashcata yuyancuna (Filipenses 2:3). 1 Pedro 5:5-pica, “jatun tucushcacunataca, Diosca mana ricunachinchu. Mana jatun tucushcacunamanca paipaj mana cꞌuyaipajta cꞌuyaj canatami cun” ninmi. Caita yuyarishpami alli yuyaita charijcunaca Diospaj ñaupajpi alli ricuringapaj esforzarincuna. Humilde cangapajca Colosenses 3:9, 10-pi ima nishcatami pajtachina canchij. Chaipica: ‘Cancunapaj mauca causaitaca, rurashcacunandij anchuchishpa, mushuj runata rurashca caichij’ ninmi. Chaipajca Jesusmanta yachashpa paipaj ejemplota catingapajmi esforzarina canchij (1 Pedro 2:21). w20.07 pág. 7 párrs. 16, 17

Congregacionpi huauqui panicunahuan Jehová Diosta sirvinaca shuj jatun bendicionmi can. Chaimantami tranquilo, cushilla sintirinchij. ¿Pero congregacionpica cada uno ima trabajotataj charinchij? Apóstol Pabloca congregacionpi cajcunataca cuerpopaj miembrocunahuanmi chꞌimbapurarca. Pablo quillcashca chꞌimbapuraimantaca achcatami yachai tucunchij (Romanos 12:4-8; 1 Corintios 12:12-27; Efesios 4:16). Romanos 12:4, 5-pica apóstol Pabloca: “Shinallataj cuerpopica, achca miembrocunatami charinchij. Chashna cashpapish, mana tucui miembrocuna chaillatataj ruranata charinchu. Ñucanchijca achcacuna cashpapish, Cristopica shuj cuerpollami canchij. Chashna cashcamantami, caishuj chaishuj shuj cuerpopajlla miembrocuna canchij” nircami. Apóstol Pablo nishca shinaca congregacionpi chꞌican chꞌican mingashcacunata pajtachishpapish tucuicunami valishca canchij. w20.08 págs. 20, 21 párrs. 1, 2, 4

¿Yaya mamacunaca Jehová Diospaj ejemplotaca ima shinataj cati tucuncuna? Yaya mamacunaca cancunapaj huahuacunahuan shuj trabajota ruracushpaca ¿ima shinataj chaitaca pajtachi tucunchij? nishpami tapuna can. Pudishpaca paicuna ima nishcatami chasquina can. Jehová Diosca mana utca pꞌiñarishpami humilde cashcata ricuchin. Paita sirvijcuna paihuan mana de acuerdo cajpipish paicunamanca pacienciatami ricuchin. Caipi yuyashun. Sodoma, Gomorra llajtacunata Jehová Dios tucuchisha nijpimi Abrahamca mana de acuerdo carca. Pero Jehová Diosca Abrahamtaca pai parlachunmi saquirca (Génesis 18:22-33). Shinallataj Saraca ña mayorlla cashcamantami shuj huahuata charinata yachashpaca asirca. Sara asirijpipish Diosca pꞌiñarinapaj randica cꞌuyaihuanmi tratarca (Génesis 18:10-14). Yaya mamacunapish congregacionta pushajcunapish Jehová Diospaj ejemplomantaca ¿imatataj yachai tucuncuna? Cambaj huahuacuna o congregacionpi caj huauqui panicuna can ima decidishcata mana chasquisha nijpica ¿imatataj rurangui? ¿Paicuna pandarishcatachu yuyangui? O ¿paicuna imamanta chashna nishcata intindingapajchu esforzaringui? Yaya mamacuna, congregacionta pushajcuna Diospaj ejemplota catijpica tucuicunami beneficiarinchij. w20.08 pág. 10 párrs. 7-9

Bibliamanta yachai callarishpaca shujtajcuna ñucanchijta ayudachunmi munarcanchij. Ashtahuan yachana cashcatapishmi intindircanchij (1 Corintios 3:1, 2). Shinapish Jehová Diosta achca huatacunata sirvishcamanta, achca experienciata charishcamantami shujtajcuna ayudachunca ña mana tanto munanchij. Ashtahuancarin cunanlla bautizarijcuna ayudasha nijpica chaita chasquinaca sinchimi can. Pero Jehová Diosca huauqui panicunahuanmi ñucanchijtaca sinchiyachin (Romanos 1:11, 12). Chaimantami paicunapaj ayudata chasquina canchij. Fuerzata charina, estudiado cana, cullquiyuj cana mana minishtirishcachu can. Ashtahuanpish Jehová Diospi tucui shunguhuan confiana, humilde canami canchij. Ñucanchijpish Jehová Diospi confiashunchij. Diosta alli sirvijcunamanta yachashunchij. Huauqui panicunapaj ayudatapish chasquishunchij. Chashnami irqui shina sintirijpipish Jehová Diosca sinchiyachishpa catinga. w20.07 págs. 14, 19 párrs. 2, 18, 19

Mana testigo familiacunaman predicanami huaquinpica pacienciata charinaca sinchi can. Chaimi Eclesiastés 3:1, 7-pi ima nishcata yuyarina canchij. Chaipica: ‘Upalla cangapajpish, rimangapajpish punllami chayan’ ninmi. Ñucanchij alli comportarijta ricushpaca ñucanchij familiacunaca Bibliamantachari yachasha ningacuna. Chaimi Jehová Diosmanta yachachingapajca listos cana canchij (1 Pedro 3:1, 2). Cushillami predicana, yachachina canchij. Pero ñucanchij familiaman shujtajcunamanpish pacienciahuan yachachingapajmi esforzarina canchij. Ñucanchijpish ñaupa tiempopi Diosta sirvijcunapaj pacienciamanta, cunan punllacunapi Diosta sirvijcunapaj pacienciamantami yachai tucunchij. Habacucca tucui mana allicuna tucurichunmi munarca. Pero shuyana cashcatami yacharca. Paica: “Chapachun ñucata churashcapimi shayacusha” nircami (Habacuc 2:1). Apóstol Pabloca alli huillaita huillanatami tucuchisha nirca. Paica tucuchinata munashpapish pacienciahuanmi huillashpa catirca (Hechos 20:24). w20.09 págs. 11, 12 párrs. 12-14

Jesusca alli ejemplotami ñucanchijmanca curca. Jehová Diospaj huashaca Jesusmi achca poderta charin. Chashna cashpapish Yaya Diosta yalli cashcataca mana yuyanchu. Jesús shinami humildecuna cashpaca cꞌuyaj cashcata, Diosta sirvijcuna cashcatami ricuchishun (Lucas 9:48; Juan 13:35). Congregacionpi tiyaj problemacunata ancianocuna mana utca allichijta shina ricushpaca ¿imatataj rurana canchij? Ñucanchijpura quejarinapaj randica humildes cashpaca ñaupajman pushajcunatami apoyana canchij (Hebreos 13:17). Chaipajca cashna tapurishunchij: “¿Ñuca ricushca problemacunaca jatunchu can? ¿Cai problemacunata allichina horaschu can? ¿Cai problemacunata allichinaca ñuca responsabilidadchu can? ¿Congregacionpi tandalla cachunchu ayudasha nini? O ¿shujtajcuna ñuca valishca cashcata ricuchunllachu munani?”. Imata rurangapaj yachaj cajpipish Jehová Diosca humilde cachunmi munan. Ashtahuanpish imatapish tandalla rurachunmi munan. Chaimanta ama jatun tucushpa Diosta sirvingapaj esforzarishunchij. Chashnami congregacionpica shujlla shina Diosta sirvishun (Efesios 4:2, 3). w20.07 págs. 4, 5 párrs. 9-11

Diosta sirvij huaquin huarmicunaca paicuna imalla charishcacunahuanmi Jesusta ayudarcacuna (Lucas 8:1-3). Jesusca paicunamanca valishca yachachishcacunata intindichirca. Por ejemplo, paicunamanca ima hora huañuna cashcata, ima hora causarina cashcataca allimi intindichirca (Lucas 24:5-8). Jesusca apostolcunaman yachachishca shinallatajmi chai huarmicunamanca pai huañuna horas chayajpi chai llaquicunahuan ima shina chꞌimbapuranata yachachirca (Marcos 9:30-32; 10:32-34). Jesusta huañuchingapaj japijpica Jesuspaj apostolcunaca miticushpami rircacuna. Pero Diosta sirvij huaquin huarmicunaca Jesús maderopi sufricujpipish paitaca manataj saquircacunachu (Mateo 26:56; Marcos 15:40, 41, NWT ). Diosta sirvij huaquin huarmicunaca Jesús causarishcatami puntaca yachaj chayarcacuna. Chaimi Jesusca paicunamanca ñuca causarishcata apostolcunaman huillagrichij nishpa mandarca (Mateo 28:5, 9, 10). Shinallataj huata 33-pica Jesusta catijcuna Pentecostés fiestata yuyaricujpica huaquin huarmicunapishmi Diospaj espíritu santota chasquishcangacuna. Chai huarmicunaca espíritu rimachishca shinallatajmi Yaya Dios chai tucui allita rurashcataca shujtaj rimaicunapi rimai callarishcangacuna (Hechos 1:14; 2:2-4, 11). w20.09 pág. 23 párrs. 11, 12

Gentecunaman yachachishpaca paicuna quishpirichunmi ayudanchij. Jesusca Mateo 28:19, 20-pica: ‘Tucui cai pachata richij, ñuca yachacujcunata ruraichij. Paicunataca bautizaichij’ nircami. Yachacujcunaca quishpiringapajca bautizarinami can. Pero bautizaringapajca Jesús ñucanchijta quishpichingapaj huañushcata, pai causarishcatami crina can. Apóstol Pedroca Jesusta catijcunataca: ‘Chai bautismoca cunan punlla quishpirinatami ricuchin. Chaica Jesucristo causarishcamantami’ nircami (1 Pedro 3:21). Bautizarishca qꞌuipaca huiñai causana oportunidadtami chari tucun. Gentecuna Jesusta catichun ayudangapajca mana pꞌiñarishpa, sumajtami yachachina canchij (2 Timoteo 4:1, 2). ¿Imamantataj sumajta yachachina canchij? Jesusca: ‘Cai pachata richij, ñuca yachacujcunata ruraichij, yachachichij’ nircami. Apóstol Pabloca Timoteotaca Jesús mandashcata pajtachishpa, esforzarichunmi yachachirca. “Chashna cashpami, canllatajpish quishpiringui, can yachachishcata uyajcunapish quishpiringacuna” nircami. w20.10 pág. 14 párrs. 1, 2

Apóstol Pedroca gentecunaman yachachinataca achcatami munaj carca. Jehová Dios ayudajpimi Pedroca alli huillaj tucurca (Hechos 2:14, 41). Maipica huillangapajmi manchaita charinchij. Pero Jehová Diosta cꞌuyashcamantami chai manchaitaca mishai tucunchij. Jesusca Pedrotaca gentecunaman huillachun invitashpaca: “Ama manchaichu” nircami (Lucas 5:8-11). Jesusca manaraj chashna nishpaca Diospaj poderhuanmi Pedrotaca achca pescadocunata japichun ayudarca. Chaimi Jesús achca poderta charijta ricushpaca Pedroca paihuanca mana huillai tucushachu nishpa yuyashcanga. Shinapish Pedroca Jesusta catinataca mana mancharcachu. ¿Canpish huillangapaj imallata rurana cashcata yachashpachu manchangui? Chashna sintirishpaca Jehová Diostapish, Jesustapish, shujtajcunatapish cꞌuyangapajmi esforzarina cangui. Chashnami Jesuspaj invitacionta chasquingui (Mateo 22:37, 39; Juan 14:15). w20.09 págs. 3, 4 párrs. 4, 5

Huiñai causaita gentecuna charichunca ñucanchij fuerzahuan, ñucanchij tiempohuan, imalla cosascunahuanmi ayudai tucunchij (Hechos 13:48). Chashnami Jesuspaj ejemplota catishun. Paica: “Ñuca micunaca ñucata cachaj Yayapaj munaita rurana, pai rurai nishcata pajtachinami” nircami (Juan 4:34; 17:4). Ñucanchijpish ñucanchijman mingashca trabajotami cushilla pajtachisha ninchij (Juan 20:21). Tucuicunami tandalla tucuringacama Diospaj trabajasha ninchij (Mateo 24:13). Jesús mingashcata pajtachinaca mana facilchu can. Pero mana ñucanchijllachu canchij. Jesusca cancunahuanmi casha nircami. Gentecunata Jesusta catichun ayudashpaca Jehová Diospajta paihuan rurajcunami canchij. Shinallataj Jesushuanmi tandalla trabajanchij (1 Corintios 3:9; 2 Corintios 2:17). Jesuspish, Jehová Diospish ayudajpica cai mingashcataca pajtachi tucushunmi. Ñucanchijpajca Jesús mandashcata pajtachinaca valishcami can. Shujtajcunapish chaillatataj rurachun ayudashunchij (2 Corintios 4:7). w20.11 pág. 7 párrs. 19, 20

Yaya mamacuna alli decisioncunata agllajpica huahuacunaca cushillami causangacuna. Cutin mana alli decisioncunata agllajpica huahuacunaca causaipimi problemacunata charingacuna. Pero huahuacunapishmi alli decisioncunata agllana can. Tucuicunami Jehová Diosta sirvinata decidina canchij (Salmo 73:28). Jesuspaj yaya mamaca paicunapaj huahuacuna Diosta sirvichunmi ayudanata munarcacuna. Paicunapaj ima decidishcahuanmi Diosta sirvina importante cashcata ricuchircacuna (Lucas 2:40, 41, 52). Jesuspish Jehová Diospaj munaita pajtachina decisiontami agllarca (Mateo 4:1-10). Jesusca jatunyashpaca Diosta tucuipi cazuj, mana manchaj, llaquij runami tucurca. Diosta sirvij tucui yaya mamacunaca paicunapaj huahuacuna Jesús shina cajpica cushillami sintirincunaman. w20.10 pág. 26 párrs. 1, 2

Cai quimsa ejemplocunapi yuyashun. Shuj yuyajlla panimi paipaj causaipi imalla allicuna pasashcata yuyarin. Pero cunanca paipaj causaica sinchimi can. Shinapish Jehová Diosta sirvishpa catingapajmi tucui pudishcata ruran (1 Corintios 15:58). Tucui punllacunami ña paraíso Allpapi paipaj cꞌuyashca familiahuan, amigocunahuan causacushcata yuyan. Caishuj panica congregacionmanta maijan paita mana alli tratashcatami yuyarin. Shinapish mana alli tratajpipish mana resentirishca saquirinchu (Efesios 4:32). Cutin shuj huauquica mana allicunata rurashcatami yuyarin. Pero cunanmanta pachaca Jehová Diosta alli sirvishpa catingapajmi decidido can (Salmo 51:10). Cai quimsa huauqui panicunaca paicunapaj causaipi imalla pasashcata yuyarishpapish mana chai solopi yuyashpami ñaupajman catinata decidincuna. ¿Imamantataj ñaupajman ricurashpa catina canchij? Maijan huashaman ricurashpa purishpaca mana rectota ñaupajman cati tucungachu. Chai shinallatajmi ñucanchij causaipi imalla pasashcata yallitaj yuyarishpaca, Jehová Diosta tucui shunguhuan sirvinataca mana pudishun (Lucas 9:62). w20.11 pág. 24 párrs. 1-3

Goliatca David irquilla huambra cajta ricushpami mana macanacui tucungachu nishpa yuyarca. Goliatca manchanai jatun runa, macanacungapajpish alli allichirishca runami carca. Cutin Davidca huambralla, macanacungapajpish mana allichirishca shinami carca. Pero paica Jehová Dios ayudanatami crirca. Jehová Dios paipaj poderhuan ayudajpimi Davidca Goliatta huañuchirca (1 Samuel 17:41-45, 50). Davidca shujtaj problemata chꞌimbapuracushpaca fuerza illaj shinami sintirishcanga. Paica Dios agllashca rey Saulta alli sirvijmi carca. Callaripica Saulca Davidtami respetaj carca. Pero qꞌuipaca jatun tucushcamantami Davidta envidiai callarirca, mana allipish tratai callarirca. Qꞌuipacarin huañuchinatami yuyarca (1 Samuel 18:6-9, 29; 19:9-11). Davidca rey Saulta Jehová Dios agllashcatami yacharca. Chaimantami pai mana alli tratajpipish respetarca (1 Samuel 24:6). Cai sinchi llaquicunata ahuantangapaj Yayitu Dios fuerzata cunatami crirca (Salmo 18:1). w20.07 pág. 17 párrs. 11-13

Caipimi Janaj ladomanta mandajca ura ladomanta mandajhuan macanacungacuna nin. Cai profeciaca ña casi tucuimi pajtaricun. Chaimantami cai profecía tucui pajtarinataca crinchij. ¿Daniel capítulo 11-pi parlashca profeciata alli intindingapaj imatataj yuyarina canchij? Cai profeciapica huaquin jatun mandajcunamanta parlashcatami yuyarina canchij. Paicunaca Diosta sirvijcuna causan llajtacunapimi mandashcacuna. Shinallataj huaquincunaca Diospaj pueblotami catirashpa llaquichishcacuna. Muyundij Allpapi Diosta sirvijcunaca ashallacunami canchij. Pero ¿paicunataca imamantataj cai Allpapi mandajcunaca catirashpa llaquichincuna? Diablopish paita apoyajcunapish Jehová Diosta, Jesusta sirvijcunatami tucuchinata munancuna (Génesis 3:15; Apocalipsis 11:7; 12:17). Daniel libropi parlashca profeciaca caishuj profeciacunahuanca igualmi cana can. Chai profeciata alli intindingapajca Bibliapi tiyaj shujtaj versocunatapishmi alli estudiana canchij. w20.05 pág. 2 párrs. 1, 2

Achca gentecunaca huañushca qꞌuipa ima tucunamantaca chꞌican chꞌican yuyaicunatami charincuna. Pero ¿causarinamantaca Bibliapica imatataj yachachin? Jehová Diosca jahua pachata, cai pachatami rurashca. Chaimanta pi huañushpa ismujpipish ¿maitataj Jehová Diosca mana mushuj cuerpohuan causachi tucunga? (Génesis 1:1; 2:7). Dios huañushcacunata mushuj cuerpohuan causachinata intindichingapajmi Apóstol Pabloca shuj ejemplohuan yachachirca. Pabloca: ‘Shuj muyuta allpapi tarpujpica granoca shuj plantami tucun. Cai plantaca ña mana muyu shinachu can’ nircami. Chashnallatajmi Jehová Diosca huañushcacunataca pai munashca mushuj cuerpohuan causachinga. Pablopish ‘jahua pachapi caj cuerpocunapish, cai pachapi caj cuerpocunapish tiyanmi’ nircami. ¿Cashna nishpaca Pabloca imatataj nisha nicurca? Cai Allpapi causajcunaca tulluyuj, aichayuj cuerpotami charinchij. Pero jahua pachapi causajcunaca espíritu cuerpocunatami charincuna. Angelcunami chashna cuerpota charin (1 Corintios 15:36-41). w20.12 págs. 10, 11 párrs. 7-9

Tucuicunami tranquilos, alli causanata munanchij. Pero maipica sinchi llaquicunatami ahuantana canchij. Huaquinpica rey David shinami sintirinchij. Paica Jehová Diostaca cai punllapaj versopi nishcatami tapurca. Maipica ima llaquicunata mana anchuchi tucushcamantami sustarinchij. Por ejemplo, micunacunapish, churanacunapish, arriendocunapish huatan huatanmi subishpa catin. Trabajopipish, escuelapipish compañerocunaca mai ratoca mana allita rurachunmi obligasha ningacuna. Ñucanchij causan lugarcunapipish ama shuhuachun, ama millai cosascunata rurachunca mana jarcai tucunchijchu. Achcacunaca Biblia yachachishcacunata mana catishcamantami chashna millaita rurashpa causancuna. Satanasca cai mundopi tiyaj llaquicunamanta yallitaj sustarishpa Diosta sirvinata saquichunmi munan (Mateo 13:22; 1 Juan 5:19). Chaimantami cai mundopica achca llaquicuna tiyan. w21.01 págs. 2, 3 párrs. 1, 3

Apóstol Juanca huauqui panicunata ama pꞌiñachunmi advirtirca. Cai mandashcacunata mana cazushpaca Diablo munashcatami rurashun (1 Juan 2:11). Apóstol Juan causacun punllacunapica Diabloca huauqui panicuna paicunapura pꞌiñanacuchun, chꞌicanyarinacuchunmi pandachirca. Por ejemplo, Diotrefesca congregacionpimi huauqui panicunata chꞌicanyachicurca (3 Juan 9, 10). Paica superintendente huauquicunatapish mana respetajchu carca. Chaimantami paicunata chasquij huauqui panicunataca congregacionmanta llujchisha nij carca. Cunan punllacunapish Diabloca huauqui panicuna paicunapura pꞌiñanacushpa causachunmi munan. Chaimanta ñucanchijca huauqui panicunataca mana pꞌiñanachu canchij. Tucuipimi apoyana canchij. w21.01 págs. 11, 12 párr. 14

Primera Guerra Mundialpimi Alemaniata mandajpish Gran Bretañata mandajpish Diosta sirvijcunataca guerrapi mana macanacusha nishcamanta llaquichircacuna. Estados Unidos llajtata mandaj gobiernocarin Diosmanta ama huillachunmi Diospaj obrata pushaj huauquicunataca carcelpi churarca. Chashnami Apocalipsis 11:7-10-pi parlashca profeciaca pajtarirca. Huata 1930 huasha, Segunda Guerra Mundial punllacunapipish janaj ladomanta mandajca dimastij pꞌiñarishpami Diosta sirvijcunata llaquichircacuna. Hitler, paita apoyajcunapishmi Diospaj pueblotaca ama huillachun jarcarcacuna. Cai millai mandajcunaca Diosta sirvijcunataca casi 1.500 huauqui panicunatami huañuchircacuna. Shinallatajmi maijancunatacarin campo de concentración nishcacunamanmi cacharcacuna. Paica: Janaj ladomanta mandajmi ‘Diospaj huasitapish yangata ruranga, Diosman cushpa rupachinatapish jarcangacunami’ nircami. ¿Caica imatataj ricuchin? Diosta sirvijcunata ama huillashpa catichun jarcanatami ricuchirca (Daniel 11:30b, 31a). Alemaniata mandaj Hitlerca Diosta sirvijcunataca tucuitami tucuchisha nirca. w20.05 pág. 6 párrs. 12, 13

Huauqui panicunata cꞌuyashpaca paicunata yalli canataca mana mashcashunchu. Jonatanca Davidtaca mana envidiarcachu. Davidpaj randi rey canatapish mana mashcarcachu (1 Samuel 20:42). Ñucanchijpish huauqui panicunapaj alli ruraicunataca mana envidianachu canchij. Ashtahuanpish Pablo nishcatami pajtachina canchij. Paica: “Ama jatun tucushpa caishujcunaca canta yalli cashcata yuyashpa, caishuj chaishuj cꞌuyanacuichij” nircami (Filipenses 2:3). Congregacionpica tucuicunami imatapish rurashpa ayudai tucushcata yuyarina canchij. Humildes cashpaca ñucanchij huauqui panicunapaj alli ruraicunatami ricushun. Shinallataj paicunapaj alli ejemplotapishmi catishun (1 Corintios 12:21-25). Huauqui panicunata cꞌuyashpami tandalla, cushilla Diosta sirvishun. Shinallataj Jesuspaj discipulocuna cashcatami ricuchishun. Cashna cꞌuyaita ricuchijpica shujtajcunapishmi Jehová Diosta sirvisha ningacuna. Ashtahuancarin cꞌuyaita ricuchishpaca Jehová Diostami jatunyachishun. “Paica llaquij Yayami, tucuipi cushichij Diosmi” can (2 Corintios 1:3). w21.01 págs. 24, 25 párrs. 14, 16

Cunan punllacunapipish achca gentecunaca testigo de Jehovacunataca mana respetancunachu. Chaimantami ñucanchijmantaca burlarincuna. Imapaj mana valishcata shina, imata mana yachajcunata shinami ricuncuna. ¿Imamantataj chashna yuyancuna? Diosta mana sirvijcunaca jatun tucushcacunata, valishca tucujcunata, autoridadta mana cazujcunatami jatunyachincuna. Ashtahuanpish ñucanchijca humilde cangapaj, manso shungu cangapaj, cazuj cangapajmi esforzarinchij. Politicapipish mana chagrurinchijchu. Cuartelmanpish mana rinchijchu. Chaimantami gentecunaca ñucanchijtaca imapaj mana valishcata shina ricuncuna (Romanos 12:2). Gentecuna imapaj mana valishcata shina ricujpipish Yayitu Diosca paipaj munaita pajtachichunmi ñucanchijtaca agllashca. Por ejemplo, mana nunca huillashca shina predicachunmi ñucanchijtaca ayudacun. Diosta sirvijcunaca chꞌican chiꞌcan shimicunapimi achca revistacunata traducinchij. Shinallataj achca gentecunatami alli causachun Bibliamanta yachachinchij. Tucui caicunataca Jehová Diospaj ayudahuanmi pajtachinchij. w20.07 págs. 15, 16 párrs. 5, 6

Jesusca yuyaisapa cashcamantami gentecunamanca intindirinalla shimicunahuan alajata yachachirca (Juan 7:45, 46). Jehová Diosca Jesús imatapish alli ruranata yachashcamantami tucui ima tiyashcata rurashpa ayudachun saquirca (Proverbios 8:30; Hebreos 1:2-4). Jesús causarishca qꞌuipaca Yayitu Diosca jahua pachapipish, cai Allpapipish mandana derechotami curca (Mateo 28:18). Jesusca yachaj, imatapish alli ruraj cashpapish Yayitu Diosta cꞌuyashcamantami siempre cazun. Cusacunaca caitami yuyarina can. Jehová Diosca cusacunaman autoridadta cushpapish huarmicunata mana valichishcata ricuchingapajca mana curcachu. Jehová Diosca huarmicunata valorashcamantami huaquin huarmicunatapish Jesushuan jahua pachapi mandachun agllashca (Gálatas 3:26-29). Jehová Diosca paipaj Churipi confiashcamantami paimanca autoridadta cushca. Shinallataj cusacunapish paicunapaj huarmicunapi confiashcamantami valishca ruraicunapi ayudachun saquingacuna. w21.02 pág. 11 párrs. 13, 14

Diospaj Shimica shuj espejo shinami can. Bibliapimi imapi mejorana cashcata, ima shina mejoranata yachai tucunchij (Santiago 1:23-25). Por ejemplo, Bibliata liyishpaca mana rato pꞌiñarina cashcatachari cuentata cunchij. Chashnami pi ñucanchijta mana alli tratajpi o ima problemacunata charishpaca mana rato pꞌiñarishun. Imamantapish mana rato pꞌiñarij cashpaca llaquicunahuan chꞌimbapurangapajmi alli decidishun (Santiago 3:13). Chaimantami Bibliata estudianataca manataj saquina canchij. Maijan gentecunaca paicuna pandarishcallata ricushpami caitaca mana ruranachu carcani nishpa yuyancuna. Pero ñucanchijca shujtajcunapaj ejemplota ricushpami allita ruranata yachana canchij. Santiagoca Abrampaj, Rahabpaj, Jobpaj, Eliaspaj, shujtajcunapaj causaimanta yachachunmi animarca (Santiago 2:21-26; 5:10, 11, 17, 18). Paicunaca llaquicunata charishpapish Jehová Diostaca cushillami sirvishpa catircacuna. Paicunapaj ejemplomi ñucanchijtapish llaquicunahuan cashpapish Jehová Diosta sirvishpa catichun ayudanga. w21.02 págs. 29, 30 párrs. 12, 13

Bibliamanta yachachicujca yachacujman Diospaj Shimimanta yachachina responsabilidadtami charin. Cutin ñucanchijta acompañachun mañajpica paicunata apoyana responsabilidadtami charinchij (Eclesiastés 4:9, 10). Pero ¿yachachij huauqui panicunata apoyangapajca imatataj rurana canchij? Alli prepararishunchij. Chaipajca yachachijtaca yachacujcunata ima shina ayudanatami tapuna canchij. Paitaca imallata yachachigrishcata o imata mana ninata, imata nina cashcatami tapuna canchij. Chashnami yachacujcunataca alli rijsi callarishun. Yachachijcunaca yachacujcunapaj causaimantaca mana tucuita parlangachu. Pero yachachij imallata nishcacunata pajtachingapajmi esforzarina canchij. Joy shuti misioneraca: “Yachachinaman acompañaj turi ñañacunamanca yachacujta ima shina ayudanatami parlani. Chashna parlajpica paicunaca yachacujcunamantami preocuparin. Shinallataj ima shina ayudanatami yachancuna” ninmi. w21.03 pág. 9 párrs. 5, 6

Cunan punllacunapish gentecunaca ima shinami ñaupa punllacunapi Sodoma, Gomorrapi mana allita, mapata rurashpa causarcacuna, chashnallatajmi causancuna (Judas 7). Pero ñucanchij Diospaj mandashcacunata cazujpimi paicunaca ñucanchijtaca pꞌiñancuna. Caishuj gentecunapish ñucanchijmantami burlarincuna. Shinallataj shujtajcunapish paicunapaj mana alli ruraicunata mana apoyajpimi yangamanta juchachincuna (1 Pedro 4:3, 4). Shujtajcuna llaquichijpi, pꞌiñajpica Jehová Dios ayudanapimi confiana canchij. Sinchi feta charishpallami chaicunataca ahuantashun (Efesios 6:16). Pero sinchi feta charinallaca mana minishtirinchu. Cꞌuyaita ricuchinapishmi minishtirin. Cꞌuyaita charishpaca shujtajcuna ñucanchijta llaquichijpica mana rato pꞌiñarishunchu. Llaquichijpipish ahuantai tucushunmi (1 Corintios 13:4-7, 13). Jehová Diosta, huauqui panicunata, contracunatapish cꞌuyashpa pꞌiñaita mishanatami ayudanga. w21.03 pág. 21 párrs. 3, 4

Huauqui panicuna imata nijpipish mana utca pꞌiñarishpami cꞌuyaita ricuchinchij. Jesús manaraj huañujpi ima tucushcata yuyashun. Jesusca paipaj discipulocunamanca huiñai causaita charingapajca ñuca aichatami micuna canguichij, ñuca yahuartami ubyana canguichij nircami (Juan 6:53-57). Caita uyashpaca achcacunami mancharishpa Jesusta catinata saquircacuna. Pero Jesuspaj amigocunapish mana tucuita intindishpapish paihuanmi saquirircacuna. Caita uyashpapish Jesusca pandaricunmi nishpaca mana yuyarcacunachu. Ashtahuanpish Jesús tucuipi verdadta nishcata yachashpami paipi confiarcacuna (Juan 6:60, 66-69). Shinallataj ñucanchijpish huauqui panicuna imata nijpipish mana utca pꞌiñarinachu canchij. Ashtahuanpish paicuna ima nisha nishcataca allimi intindinaraj canchij (Proverbios 18:13). w21.01 pág. 11 párr. 13