Marzo

Mateo 25:31-36-pica “ovejacuna” nishpaca Paraíso Allpapi causana esperanzata charijcunamantami parlacun. Paicunaca tucuri punllacunapimi Yayitu Diosta sirvishpa caticuncuna. Shinallataj paicunaca gentecunaman yachachishpa, predicashpami jahua pachapi causagrij ungidocunata ayudancuna (Mateo 24:14; 28:19, 20). Cada huatami shujtaj ovejacunaca gentecunata Jesús huañushcata yuyarina tandanacuiman invitashpaca ungidocunata apoyancuna. Shujtaj ovejacunamanta cajcunaca Jesús huañushcata yuyaringapajmi tucuita allichincuna. Jahua pachaman rigrij ungidocunata chashna apoyashpami paicunaca cushilla sintirincuna. Jesusca ungidocunata chashna apoyajpica paita apoyacushcata shinami ricun (Mateo 25:37-40). w22.01 págs. 22, 23 párrs. 11, 12

Ñucanchijpish Jehová Dios shina cꞌuyaj, llaquij, mana pꞌiñarij cangapajca Jesuspaj ejemplotami catina canchij. Por ejemplo, Jesusca leprahuan caj runatapish, ungushca caj huarmitapish llaquishpami jambirca. Huañuipi familiata chingachijcunatapish cꞌuyaihuanmi tratarca (Marcos 1:40, 41; 5:25-34; Juan 11:33-35). Ñucanchijpish Jehová Dios shina cangapaj esforzarishpaca paipajmanmi ashtahuan cꞌuchuyashun. Jesuspaj ejemplota catishpaca cai mundopaj ruraicunapica mana chagrurishunchu. Jesusca huañunapaj ashalla horascuna faltajpica: “Cai pachata mandajtaca ñami misharcani” nircami (Juan 16:33). ¿Paica caita nishpaca imatataj nisha nirca? Paica cai mundopaj ruraicunapi, yuyaicunapi mana chagrurishcatami nisha nicurca. Jesusca cai Allpapi cashpaca Jehová Diospaj shutita jatunyachina yuyailla, paipaj Gobiernota apoyana yuyaillami causarca. Ñucanchijpish cai pachapaj ruraicunapi ama chagruringapajca Jehová Diosta sirvina yuyaillami causana canchij. Chashnami Jesús shina cai pachataca mishashun (1 Juan 5:5). w21.04 págs. 3, 4 párrs. 7, 8

Apóstol Pabloca Jesuspi feta churajcunaca tucuicuna huiñai causaita chari tucushcatami alli intindirca (Juan 3:16; Romanos 6:23). Ashtahuanpish jatun juchacunamanta arrepintirijcunata Jehová Dios perdonanatami tucui shunguhuan crirca (Salmo 86:5). Caicunata alli intindishpami Pabloca cushilla sintirirca. Apóstol Pabloca Jehová Dios, Jesusta paimanta huañuchun cushcamantami paita achcata cꞌuyashcata crirca. Gálatas 2:20-pica apóstol Pabloca: “Diospaj Churica ñucata cꞌuyashpami paipaj causaita ñucamanta curca” nircami. Chashnami Jehová Dios huauqui panicunatapish, paitapish cꞌuyashcata intindirca. Chaimantami Romapi causaj huauqui panicunataca ‘ñucanchij juchayujcuna cajpiraj Cristo ñucanchijmanta huañujpimi Diosca ñucanchijta cꞌuyaj cashcata ricuchin’ nircami (Romanos 5:8). Apóstol Pabloca Jehová Dios paita cꞌuyashcataca tucui shunguhuanmi crirca. Shinallataj paica Jehová Dios israelitacuna pandarijpipish paicunata pacienciahuan perdonashcata, paicunaman cꞌuyaita ricuchishcataca allimi yacharca. w21.04 págs. 22, 23 párrs. 8-10

Bibliamanta yachacujcunataca Jehová Diosta cꞌuyachun ayudashunchij. Yachacujcunamanca Jehová Dios llaquij, cꞌuyaj, cushilla, ñucanchijta ayudaj Dios cashcata intindichishunchij (1 Timoteo 1:11; Hebreos 11:6). Shinallataj Biblia yachachishcacunata paicunapaj causaipi pajtachishpa ima beneficiocunata charinata yachachishunchij. Ashtahuancarin Jehová Diosman cꞌuyaita ricuchingapaj paita cazuna cashcatapish intindichishunchij (Isaías 48:17, 18). Yachacujcunaca Jehová Diosta ashtahuan cꞌuyashpaca paicunapaj causaipica ima cambiocunatapish rurangallami. Yachacujcunaca bautizaringapajca huaquin cosascunatami saquina can. Huaquincunaca imalla charishca cosascunatami saquina tucunga. Huaquincunaca Diosta mana cꞌuyaj amigocunamantapishmi caruyana tucungacuna. Cutin shujtajcunataca familiacunami Diosta sirvishcamanta pꞌiñancuna. Pero yachacujcuna Jehová Diosta sirvingapaj tucui cosascunata saquijpica Jehová Diosca cꞌuyaj familiatami cunga (Marcos 10:29, 30). w21.06 págs. 4, 5 párrs. 8, 9

Apóstol Pabloca Jesuspaj discipulocunata ruranataca shuj plantitata huiñachinahuanmi chꞌimbapurarca. Paica: ‘Ñucaca tarpurcanimi, Apolosca yacutami churarca. Cancunaca Diospaj chagrami canguichij’ nircami (1 Corintios 3:6-9). Apóstol Pablo nishca shinaca gentecunaman predicashpaca muyuta tarpuj shinami canchij. Pero mana chaillatachu ruranchij. Ashtahuanpish plantitapi yacuta churaj shina, cuidaj shinami gentecunaman yachachishpa catinchij. Pero caicunata rurajpipish Diosmi shuj plantitata huiñachij shina gentecunataca Jesuspaj discipulocuna tucuchun ayudan. Gentecunaman predicana, yachachinaca Dios cushca sumaj regalomi can. Caicunata pajtachishpaca cushillami sintirinchij. Apóstol Pabloca Tesalónica llajtapimi achca gentecunataca Jesuspaj discipulocuna tucuchun ayudarca. Paica chai mushuj discipulocunataca: “Amito Jesús tigramuna punllacunapica paipaj ñaupajpica ¿pitaj ñucanchij shuyana, ñucanchij cushicuna, cushichij premiopish canga? ¿Manachu cancuna canguichij?” nircami (1 Tesalonicenses 2:19, 20; Hechos 17:1-4). w21.07 págs. 3, 7 párrs. 5, 17

Jehová Diosca cada unotami paipaj puebloman pushamushca (Juan 6:44). Paica alli shungu gentecunata mashcacushpaca cai muyundij Allpapi millones gentecunapuramantami ñucanchijta paita sirvichun agllashca (1 Crónicas 28:9). Chaimantami paica ñucanchijta alli rijsin, intindin, cꞌuyan. ¿Manachu caita yachashpaca cushilla sintirinchij? Jehová Diosca canta, tucui huauqui panicunatami achcata cꞌuyan. Caita alli intindichingapajca Jesusca cai ejemplotami churarca. Paica: “¿Shuj michij runaca paipaj 100 ovejacunapuramanta shuj oveja chingarijpica imatashi ruranga? ¿Manachu japingacama mashcanga?” nircami. Michijca ovejata japishpaca mana pꞌiñarinchu. Ashtahuanpish dimastijmi cushicun. ¿Caimantaca imatataj yachanchij? Jehová Diospajca cada unomi tucuimanta yalli valishca can. Chaimantami Jesusca: ‘Jahua pachapi caj cancunapaj Yayapish, cai uchillacunamanta shujllapish chingarichunca manataj munanchu’ nirca (Mateo 18:12-14). w21.06 pág. 20 párrs. 1, 2

Jehová Dios cusha nishcacunapi yuyarishpaca Jehová Diostami ashtahuan cꞌuyanchij. Shinallataj paipajmanpishmi ashtahuan cꞌuchuyanchij (Romanos 8:38, 39). Chai tandanacuiman rishpaca Jesuspaj ejemplota catina cashcatami yuyarinchij (1 Pedro 2:21). Jesús huañushcata yuyarina punlla manaraj chayajpica, Bibliapimi Jesús cai Allpapi imata rurashcata, pai ima shina huañushcata, ima shina causarishcata yachai tucunchij. Cutin chai tutaca conferenciata uyashpami Jesús ñucanchijta mashnata cꞌuyashcata yuyarinchij (Efesios 5:2; 1 Juan 3:16). Jesuspaj ejemplomanta yachashpa, paipi yuyarishpaca paipaj ejemplotami catisha ninchij (1 Juan 2:6). Cai tandanacuiman rishpaca Jehová Diospaj amigos casha nishcatami ricuchishun (Judas 20, 21). Jehová Diosta tucuipi cazujpi, paipaj shutita jatunyachijpica Jehová Diosca ñucanchijtaca shungumantami cꞌuyashpa catinga (Proverbios 27:11; Mateo 6:9; 1 Juan 5:3). Jesús huañushcata yuyarina tandanacuiman rishpaca paita tucuipi cazungapajmi animarinchij. Paipaj amigos casha nishcatapishmi ricuchinchij. w22.01 págs. 23, 25 párrs. 17-19

Jehová Diosca cada uno imata decidichunmi saquishca. Chaimantami ñucanchij causaipi imata ruranata decidi tucunchij. Jehová Diosca ñucanchij causaipi paita sirvingapaj decidijpica cushillami sintirin (Salmo 84:11; Proverbios 27:11). Chaimantami alli decisioncunata agllangapaj esforzarina canchij. Jesusca shujtajcunamantami preocuparirca. Shuj cutinca paica samaringapajmi paipaj discipulocunahuan shuj chulunlla lugarman ricurcacuna. Chaiman ricujpica achca gentecunaca Jesús yachachishcata uyasha nishpami paicunata catishpa rircacuna. Jesusca paicunata ricushpaca mana pꞌiñarircachu. Ashtahuanpish cꞌuyaihuanmi paicunamanca Yayitu Diosmanta achcata yachachirca (Marcos 6:30-34). Ñucanchijpish shujtajcunata ayudangapajmi ñucanchij tiempo, fuerzasta llujchina canchij. Chashnami Jehová Diosta jatunyachishun (Mateo 5:14-16). w21.08 págs. 3, 5 párrs. 7, 8

Jehová Diosca chꞌican chꞌican cosascuna tiyachunmi munan. Chaimantami paica chꞌican chꞌican plantacunata, chꞌican chꞌican gentecunata, chꞌican chꞌican animalitocunata rurarca. Chashna rurashcamantami Jehová Diosca ñucanchijtaca mana shujtajcunahuan comparan. Ashtahuanpish Yaya Diosca ñucanchij shungupi ima tiyashcata, ñucanchij ima shina cashcata ricushpami valoran (1 Samuel 16:7). Shinallataj ñucanchij imata rurai tucushcata, imata mana rurai tucushcata, ima shina huiñashcataca allimi intindin. Caita yuyarishpaca ñucanchijpish shujtajcunata yalli cashcata o shujtajcunata menos cashcataca mana yuyashunchu (Romanos 12:3). Shujtajcunapaj alli ejemplomantami yachai tucunchij. Por ejemplo, shuj huauqui alli predicaj cajpica paimantami yachai tucunchij (Hebreos 13:7; Filipenses 3:17). Pero chashna paicunapaj ejemplomanta yachai tucushpapish paicunahuanca mana compararinachu canchij. w21.07 pág. 20 párrs. 1, 2

Dios rurashca animalitocunamanta, plantacunamanta, estrellacunamanta yachashpaca Yayitu Diospimi ñucanchij feta ashtahuan sinchiyachishun (Salmo 19:1). Dios rurashcacunamanta yachashpaca Dios ima shina cashcatami yachashun (Romanos 1:20). Por ejemplo, cai Allpapi causai tiyachunca intica achijyachin, rupaitami cun. Pero inti cai Allpata ama yallitaj rupajyachichunca ozono nishca gasmi muyundij Allpapi tiyan. Cai gasca shuj escudo shinami inti cai Allpata ama yallitaj rupajyachichun jarcan. Inti cai Allpata ashtahuan rupajyachijpica ozono nishca gaspish ashtahuanmi mirarin. Caita intindishpaca tucuita ruraj Dios yachaj, cꞌuyaj cashcatami cuentata cunchij. w21.08 pág. 17 párrs. 9, 10

Maijan bautizarijpica paicunataca cꞌuyashpa, respetashpami catina canchij. Chaita ricuchingapajca ñucanchij huauqui panicunapimi siempre confiana canchij (1 Juan 4:20). Paicuna de veras Jehová Diosta, huauqui panicunata cꞌuyaj cashcataca mana dudanachu canchij. Ashtahuanpish paicunata valorashpa ñucanchijta yalli cashcatami yuyana canchij (Romanos 12:10; Filipenses 2:3). Tucuicunata llaquishpa alli tratashunchij. Diospaj familia parte cangapajca Biblia yachachishca shinami causana canchij. Por ejemplo, Jesusca shujtajcunata llaquishpa alli tratachunmi mandarca. Ñucanchijta pꞌiñajcunatapish cꞌuyachunmi mandarca (Lucas 6:32-36). Caita pajtachinaca maipica sinchichari ricuringa. Sinchi cajpica Jesuspaj ejemplomantami yachana canchij. Jehová Diostapish tucuipi cazungapajmi esforzarina canchij. Chashnami Yayitu Diospaj familia parte casha nishcata ricuchishun. w21.08 pág. 6 párrs. 14, 15

Jehová Diospi confianata yachashunchij. Jehová Diospi confiajpi, paita sirvinata manataj saquijpica Yayitu Diosca achcatami bendicianga. Bibliapica huaquincuna Diosta ashtahuan sirvingapaj ima shina esforzarishcatami yachachin. Paicunaca puntaca Jehová Diospi confiashcatami ricuchircacuna. Chai qꞌuipami paicunataca Diosca bendiciarca. Por ejemplo, Abrahamca Dios cusha nishcacunapi confiashcamantami maiman rinata mana yachashpapish paipaj huasita saquirca (Hebreos 11:8). Chai qꞌuipami paica Yayitu Dios ima shina bendiciashcata ricurca. Shinallataj Jacobpish shuj angelhuan macanacushca qꞌuipami Diospaj bendicionta chasquirca (Génesis 32:24-30). Israelitacunapish sacerdotecunaraj río Jordanta chꞌimbajpimi Dios cusha nishca Allpaman chꞌimbai tucurcacuna (Josué 3:14-16). Cunan punllacunapish huaquin huauqui panicunaca Yayitu Diosta ashtahuan sirvingapajmi decidishcacuna. Paicunamantami yachai tucunchij. w21.08 págs. 29, 30 párrs. 12-14

Mayorlla huauqui panicuna cancunaca achca huatacunatami Jehová Diostaca sirvishpa caticushcanguichij. Pero cambiocuna tiyajpipish chai cambiocunata apoyana importante cashcatami yachanguichij. Cutin shujtaj mayorlla huauqui panicunaca cunanllachari Jehová Diosta rijsircanguichij. Cancunapish jovencunamanmi ayudai tucunguichij. Jovencunaca cancunapaj experienciamanta yachashpaca achcatami cushicungacuna. Cancunapaj experienciacunamanta siempre shujtajcunaman parlajpica Jehová Diosmi bendicianga (Lucas 6:38). Mayorlla huauqui panicunaca cancunapaj experienciahuan, ima yachashcahuanmi jovenlla huauqui panicunata ayudai tucunguichij. Cutin jovenlla huauqui panicunaca cancunapaj fuerzahuanmi ayudai tucunguichij (Romanos 1:12). Joven cashpapish, mayorlla cashpapish shuj shinalla Jehová Diosta sirvishpa catishunchij. Chaita rurashpaca Jehová Diostami jatunyachishun. Congregacionpajpish shuj bendicionmi cashun. w21.09 págs. 8, 9, 13 párrs. 3, 17, 18

Jesús shuj caspipi huarcushca huañujpimi judiocunaca: ‘¿Paica maitataj Mesías cangari? Paica juchayuj, millai runami canga’ nishpa yuyarcacuna (Deuteronomio 21:22, 23). Jesusta mana catij judiocunaca Jesús ima culpata mana charishcata, paita yangamanta juchachishcataca mana crisha nircacunachu. Pushajcunaca Jesustaca leycunapi nishca shinaca mana juzgarcacunachu. Ashtahuanpish ratomi paicuna munashca shina juzgarcacuna (Lucas 22:54; Juan 18:24). Mandajcunaca leypi nishca shina pruebacunata mashcanapaj randica Jesusta huañuchingapajca yangamanta juchachijcunatami uyarcacuna (Mateo 26:59; Marcos 14:55-64). Shinallataj mandajcunaca Jesús causarishcata ama pi crichunmi Jesusta maipi pambashcata cuidaj soldadocunaman achca cullquita pagarcacuna. Chai soldadocunaca llullashpami Jesusca mana causarircachu nishpa crichircacuna (Mateo 28:11-15). w21.05 págs. 11, 12 párrs. 12, 13

Jehová Diosca cai mana alli mundotaca pai munashcapimi tucuchi tucun. Pero ñucanchij beneficiarichunmi paica pacienciahuan shuyacun. Ñucanchijpish Adanpaj Evapaj huahua huahuacuna cashcamantami chai ungushca huahua shinallataj juchayujcuna canchij. Chashna cajpipish Jehová Diosca ñucanchijtami cꞌuyan, cuidan (1 Juan 4:19). Ashtahuancarin Jehová Diosca ñucanchij charishca llaquicunata tucuchingapajmi ña shuj punllata agllashpa charicun. Caita yachashpaca Jehová Diosta cꞌuyashcamantami llaquicunata charishpapish ahuantashpa cati tucunchij. Jehová Diosmi ñucanchij ahuantangapajca alli ejemplo can. Jesuspish cai Allpapi cashpaca paipaj ejemplotami catirca. Paita yangamanta juchachijpi, mana alli tratajpi, huañuchijpica ñucanchijmantami tucuita ahuantarca (Hebreos 12:2, 3). Ñucanchijpish Jehová Diospaj ejemplota catishpami llaquicunata ahuantai tucushun. w21.07 págs. 12, 13 párrs. 15-17

Jehová Diosca cꞌuyaj Diosmi can (Salmo 103:10-14). Jesuspish paipaj discipulocuna juchayujcuna cajpipish paicunatami cꞌuyashpa perdonarca. Ashtahuancarin tucuicunata cꞌuyashcamantami ñucanchijmanta huañurca (1 Juan 2:1, 2). Huauqui panicunata perdonashpaca paicunamanmi cꞌuyaita ricuchinchij (Efesios 4:32). Maipica juchayujcuna cashcamantami paicunata perdonanaca sinchi can. Chashna cajpipish paicunata perdonangapajmi esforzarina canchij. Shuj panitaca La Atalaya revistapi llujshishca “Perdónense liberalmente unos a otros” nishca temami paitaca shujtajcunata perdonachun ayudarca. Paica: “Caita yachashpaca shujtajcunata perdonana ñucapajllataj alli cashcatami intindircani. Perdonashpaca paicuna llaquichishcamantaca mana resentidos saquirishunchu. Ashtahuanpish paicunahuan alli apanacungapajmi esforzarishun” ninmi. Huauqui panicunata cꞌuyashpaca paicunatami perdonashun, Jehová Diospaj ejemplotapishmi catishun. w21.09 págs. 23, 24 párrs. 15, 16

Jesusca Biblia yachachishcacunatami cazurca, Diospaj munaitapishmi pajtachirca, shujtajcunamanpishmi yachachirca (Juan 18:37). Shinallatajmi cunan punllacunapipish Jesusta catijcunaca Diospaj yachachishcacunata cazuncuna (Juan 4:23). Jesusta catijcunamanta parlashpaca apóstol Pedroca mana llullata huillajcunami can nircami (2 Pedro 2:2). Punta siglopi Jesusta catijcunaca Diospaj mandashcacunata cazushcamantami paicunaca panda religioncunapaj yuyaicunata, costumbrecunata, shujtaj cosascunataca mana chasquijcuna carca (Colosenses 2:8). Cunan punllacunapish Diosta sirvijcunaca Dios munashca shina causangapajmi esforzarincuna (3 Juan 3, 4). Chaipajca Biblia yachachishca shinami Jehová Diosta cazushpa causanchij. Testigo de Jehovacunaca Bibliataca tucuitami alli intindinchij nishpaca mana ninchijchu. Chaimantami maipica Bibliamanta yachachicushpa o congregacionta pushacushpaca pandarishcanchij. Pero alli intindishpaca cambiocunata rurashcanchij. w21.10 págs. 21, 22 párrs. 11, 12

Ñaupa punllacunapica contracuna ama llaquichichunmi llajtacunapica pircacuna tiyarca. Chashnallatajmi Diospaj cꞌuyaica shuj pirca shina paita sirvinata amataj saquichun, pi ama pandachichunca ñucanchijta cuidan. Yayitu Dios cꞌuyanata manataj saquishcamantami paica ñucanchij paipajman cꞌuchuyachun ayudan (Jeremías 31:3). Davidca Jehová Dios paipaj pueblota ima shina cuidashcata parlashpaca cashnami salmocunata quillcarca: ‘Ñuca muyundij pircalla quiquintamari cantasha. Ñuca miticuna Taita Diosmari cangui’ nircami. Shinallataj: ‘Paica ñucata llaquijmi, ñuca miticuna jatun torremi. Ñucaman fuerzata cujmi, ñucata quishpichijmi, ñuca paca tucuna escudomi, paillapimi shunguta churani’ nircami (Salmo 59:17; 144:2). ¿Davidca Jehová Dios cꞌuyanata manataj saquinataca imamantataj muyundij pircahuan, jatun torrehuan chꞌimbapurarca? Diosta sirvijcuna maipi cajpipish Yayitu Diosmanta manataj caruyajpica Jehová Diosca ñucanchijta cuidanataca manataj saquingachu. w21.11 pág. 6 párrs. 14, 15

Shuj cutinca Jesusca paipaj discipulocunahuanmi barcopi carca. Ñapish achcatami sinchi huaira jatarirca. Chaipimi Jesusca paipaj discipulocuna ashtahuan sinchi feta charichun ayudarca (Mateo 8:23-26). Achca huaira, tamya tiyashcamantami barcotaca casi taparca. Chai ratoca Jesusca dormicurcami. Ñapish discipulocunaca achcata mancharishpami paicunaca Jesusta rijchachishpa ñucanchijta quishpichihuai nircacuna. Chaimi Jesusca: “¿Ima nishpataj mancharinguichij? Cancunaca ashallata crijcunami canguichij” nircami. Tal vez cambaj causaipica achca llaquicunahuanchari chꞌimbapurangui. Jatun terremoto o acapana tiyashcamantachari maipica chaicunahuan chꞌimbapurangui. Mana cashpaca ungushca cashcamantachari yallitaj preocuparishpa imata ruranata mana yachangui. Pero cashna llaquicunahuan chꞌimbapuracushpapish Diospi confianata amataj saquingui. Can ima shina sintirishcataca paiman tucuita huillai. Yayitu Dios canta ñaupa punllacuna ima shina ayudashcapi yuyashpapish cambaj feta sinchiyachi (Salmo 77:11). Chaita rurashpaca cunan punllapish, shamuj punllacunapish Jehová Dios canta cuidanatami tucui shunguhuan cringui. w21.11 pág. 22 párrs. 7, 10

Maijancunaca ama shuhuanguichij nishca shimita uyashpaca shujtajcunapajta japina mana alli cashcatachari yuyancuna. Pero paicuna mana yuyashcapimi shuhuacushcata ricuchi tucuncuna. Por ejemplo, shuj comerciante mana alli balanzata charishpa, mana alli medishpaca clientecunata shuhuacushcatami ricuchishcanga. Levítico 19 verso 13-pica shujtajcunapajta shuhuashpaca mana honrado cashcatami ricuchin. Chai versollapitaj: “Shujtajcunata ama llaquichinguichij, ama shuhuanguichijchu” ninmi. Chaimanta maijanpish paipaj negociopi o trabajopi mana honrado cashpaca shuhuacushcatami ricuchin. Éxodo 20:15-pica israelitacunataca Jehová Diosca ama shuhuanguichij nircami. Leviticopi tiyaj huaquin versocunata ricushpami Moisesman cushca mandashcata ima shina pajtachi tucushcata intindinchij. Levítico 19:11 al 13-ta yachashpaca ñucanchijpish cashna nishpami tapurina canchij: “¿Ñucanchij trabajopi, negociopi honrados cangapajca imapitaj mejorana canchij?”. w21.12 págs. 9, 10 párrs. 6-8

Imapi pandarishpaca cada punllami Jehová Diostaca perdonachun mañana canchij. Jatun juchapi urmashpaca congregacionta pushaj huauquicunamanpishmi huillana canchij. Paicunami alli uyashpa Bibliahuan consejangacuna. Shinallataj Jesús ñucanchijmanta huañushcamanta Yayitu Dios perdonachunmi mañangacuna (Santiago 5:14-16). Jesús huañushcata ñucanchij yuyaipi charishunchij. Paipaj causaita cungapaj llaquinaita sufrishcapi yuyacushpaca chashnallatajmi sintirishcanchij. Pero cutin cutin chashna yuyashpaca Jehová Diosta, Jesustami ashtahuan cꞌuyashun. Cada huata Jesús huañushcata yuyarina tandanacuiman rishpa, shujtajcunatapish chaiman richun invitashpaca paita agradicishcatami ricuchinchij. Jehová Diosca ñucanchijmanca paipaj Churimanta yachachina regalotami cushca. w21.04 págs. 18, 19 párrs. 13-16

Jesús shuj urcupi cajpica achca gentecunami paita ricunaman rircacuna. Paica casin tucui tuta Jehová Diosta mañashcamantami tal vez shaicushca cashcanga. Pero chaipi pobrella cajcunata, ungushcacunata ricushpaca cꞌuyaimantami ayudarca. Jesusca gentecunata jambishpa, shuj animaj conferenciatapishmi curca (Lucas 6:12-20). Jesusca pailla pasanata munashpapish shujtajcunahuan pasangapajmi tiempota surcurca. Jesusca paipaj amigo Bautizaj Juanta huañuchishcatami yachaj chayarca. Bibliapica: “Juan huañushcata yachashpami Jesusca, chai llajtamantaca shuj barcopi shitashca pambaman pailla rirca” ninmi (Mateo 14:10-13). Pero Jesús shitashca pambaman manaraj chayajpimi ña achca gentecuna chaipi cashca carca (Marcos 6:31-33). Jesusca chai gentecuna ayudata minishtishcata ricushpami, Diosmanta achcata yachachishpa rato ayudarca (Lucas 9:10, 11). w22.02 págs. 21, 22 párrs. 4, 6

¿Shuj huauquita o panita mana yuyashcapi llaquichishcata cuenta cushpaca paihuan alli apanacungapajca imatataj rurana canchij? Huauqui panicunahuan alli tucungapajca Jehová Dios ayudachunmi shungumanta mañana canchij. Imapi mejorana cashcata ricungapajmi tiempota surcuna canchij. Por ejemplo, cashna nishpa tapurishunchij: “¿Shuj huauquihuan panihuan alli tucungapajca mana jatun tucushpa ñucanchijrajchu paicunata perdonachun mañanchij? ¿Shuj huauquihuan panihuan alli tucungapaj esforzarijpica Jehová Diospish, Jesuspish ima shinataj sintiringacuna?”. Cai tapuicunapi yuyashpaca Jesús ima yachachishcata ima shina pajtachinatami ricushun. Chashnami huauqui panicunahuanpish alli tucushpa, alli sintirishun. Shuj huauquihuan panihuan alli tucungapajca mana jatun tucushpa respetohuan parlana canchij (Efesios 4:2, 3). Resintirishca cajcunahuanmi parlana canchij. Pi ima culpata charishcata ninapaj randica paicunahuan alli apanacunami importante can (1 Corintios 6:7). w21.12 págs. 25, 26 párrs. 13-16

Jesusca la mayoría judiocuna paipi mana crinatami yacharca. Chaimantami paica llaquilla sintirirca. Judiocuna Jesuspi mana crishcamantami Jerusalenca tucuchishca carca. Huaquin judiocunatacarin prezumanmi aparcacuna (Lucas 21:20-24). Ima shinami Jesús huillarca, chashnallatajmi achca gentecunaca Jesuspi mana crircacuna. Cunan punllacunapish gentecunaca Diospaj Gobiernomanta predicajpica mana uyasha nincunachu. Jehová Diosca gentecunatami cꞌuyan. Jesús huacashpaca Jehová Diospish gentecunamanta preocupariscatami ricuchirca. Diosca ‘shujllapish ama chingarichun, tucuicuna arrepintirishpa quishpirichunmi munan’ (2 Pedro 3:9). Ñucanchijpish gentecunata cꞌuyashcata ricuchingapajca, shungumanta Jehová Diosmanta huillangapajmi tucui pudishcata rurana canchij (Mateo 22:39). w22.01 págs. 16, 17 párrs. 10-12

Ñaupa punllapi Jehová Dios paipaj pueblota ima shina ayudashcapi yuyashpa, ñucanchijtapish ima shina ayudashcapi yuyarishpaca ñucanchij fetami ashtahuan sinchiyachishun. Jehová Diostami ashtahuan cꞌuyashun. Diosta cꞌuyashpaca paitami tucuipi cazushun. Paita sirvingapajmi imatapish rurashun. Ima llaquicunatapishmi ahuantashun (Mateo 22:37-39; 1 Corintios 13:4, 7; 1 Juan 5:3). Ñucanchijpajca Jehová Diospaj amigo canami tucuimanta valishca can (Salmo 63:1-7). Cai yachaipi ricushca shinaca Diosta mañashpa, Bibliata estudiashpa, estudiashcapi yuyashpaca Diostami adoranchij. Chaimanta Jesús shina Jehová Diosta mañangapajca chulunlla pushtucunata mashcashunchij. Shinallataj Bibliata estudiacushpapish alli concentrarishunchij. Mana concentrari tucushpaca Jehová Diosta ayudachun mañashunchij. Chashna tiempota alli aprovechajpica Jehová Diosca shamuj punllapicarin huiñai causaitami cunga (Marcos 4:24). w22.01 págs. 30, 31 párrs. 18-20

Imata cutin cutin yuyashpaca chaitami rurashun. Chaimantami Jesusca juchapi ama urmangapajca mana alli yuyaicunamanta jarcarichun yachachirca (Mateo 5:21, 22, 28, 29). Tucuicunami Jehová Diostaca cushichisha ninchij. Chaipajca ñucanchij yuyaicunaman mana alli yuyaicuna shamujpica chaimanta ratomi caruyana canchij. Jesusca: ‘Ima rimashca shimiman llujshijca, shungumantami llujshin’ nircami (Mateo 15:18). Jesús nishca shinaca ñucanchij rimashcacunahuanmi ima shina cashcata ricuchinchij. Chaimanta cashna nishpa tapurishunchij: “¿Siemprechu tucuipi verdadta nini? ¿Cazado cashpaca shujtaj cꞌarihuan o huarmihuan mana alli munaicunahuan ama parlangapajchu cuidarini? Huainayana parlocunamantapishchu jarcarini? ¿Shujtajcuna mana alli tratajpica mana pꞌiñarishpachu cutichini?”. Caipi yuyashun. Mauca causaita saquinaca mauca ropata saquina layami can. Cutin mana alli rimaicunata saquishpa, llullacunata saquishpaca mauca causaitami saquishun. w22.03 pág. 5 párrs. 12-14

Shujtajcunaman consejota mañajcunaca ima decisiontapish allimi agllancuna. Chaimanta ñucanchijpish shujtajcunaman consejota mañashunchij. ¿Imacunallata rurangapajtaj shujtajcunamanca consejocunata mañana canchij? Cai catij ejemplocunapi yuyashunchij. 1) Shuj panica Bibliamanta estudiota cungapajmi experienciata charij publicadortaca acompañachun mañan. Qꞌuipaca cai publicadortaca imapi mejorana cashcatami tapun. 2) Shuj soltera panica experienciata charij panitachari ropata randingapajca acompañachun mañan. Chaipica alli agllangapajmi consejota cuchun mañan. 3) Shuj huauquica congregacionpichari punta cutin shuj conferenciata cun. Qꞌuipaca experienciata charij huauquitami imapi mejoranata tapun. Experienciata charij huauquicunapish alli yachachijcuna cangapajca shujtajcunapaj consejotami mañana can. Mañashpaca chaitami pajtachina can (Proverbios 19:20). w22.02 pág. 13 párrs. 15-17

Jehová Diosca ima shinami paipaj Churi cai Allpapi cajpi cꞌuyaita ricuchirca. Chashnallatajmi ñucanchijmanpish cꞌuyaita ricuchin (Juan 5:20). Jehová Diosca Jesustaca paipaj feta sinchiyachishpa, preocupado cajpipish animashpa, tucui imalla minishtirishca cosasta cushpami ayudarca. Jesús tucuipi allita rurajpimi paica achcata cꞌuyarca (Mateo 3:16, 17). Jesusca paipaj Yaya paita ayudacushcamantami mana pailla sintirirca. Ñucanchijpish Jesús shinallatajmi Jehová Diospaj cꞌuyaita charishcanchij. Caipi yuyashun: Jehová Diosca ñucanchijta achcata cꞌuyashcamantami paipaj puebloman pushamushca. Diosta sirvijcunahuan tandalla cashpaca cushillami sintirinchij. Caishujmanta chaishujmantapishmi animanacunchij (Juan 6:44). Yayitu Diospaj ayudamantami ñucanchij feta sinchiyachingapajpish achca ayudacunata charinchij. Minishtirishca cosascunatapish cada punllami charinchij (Mateo 6:31, 32). Jehová Dios ñucanchijta achcata cꞌuyashcata yachashpaca ñucanchijpish paitaca ashtahuanmi cꞌuyanchij. w21.09 pág. 22 párrs. 8, 9

¿Testigo de Jehovacunahuan Bibliamanta manaraj estudiashpaca cambaj causaica ima shinataj carca? Huaquincunaca cai mundopi tiyaj mana allicunata rurashpa mana alli yuyaicunatami charij carcanchij. Chaimantami ima esperanzata mana charircanchij, Dios illajpish causarcanchij (Efesios 2:12). Pero Bibliamanta estudiai callarishpaca Jehová Dios canta achcata cꞌuyashcatami yachashcangui. Shinallataj Yayitu Diospaj ñaupajpi alli ricuringapaj, paipaj pueblopi cangapajca cambaj causaipi, yuyaipi cambiocunata rurana cashcatami cuentata cushcangui. Yayitu Diosta tucuipi cazuna cashcatapishmi intindishcangui (Efesios 5:3-5). Jehová Diosca tucuita ruraj cashcamanta, ñucanchij Yaya cashcamantami paica paipaj pueblopi cajcunaman ima shina causana cashcata yachachin. Jehová Diosca bautizarisha nijcunataca: ‘Cancunapaj mauca causaita saquishpa rurashcacunandij anchuchichij’ ninmi. w22.03 págs. 2, 3 párrs. 1-3

Shujtaj ovejacunamanta cajcunaca Jesús huañushcata yuyarina tandanacuiman rishpa chaipi imata rurajta ricushpaca cushilla sintirincuna. Paicunapish chai tandanacuipi alaja conferenciata cujtami uyasha nincuna. Chai conferenciapica 144.000 ungidocunapish, Jesuspish mil huatata mandacushpa cai Allpa shuj Paraíso tucuchun, gentecuna jucha illaj cachun ayudanatami yachachin. Chaita uyashpaca Paraíso Allpapi cushilla, maravilla causanatami yuyarincuna (Isaías 35:5, 6; 65:21-23; Apocalipsis 21:3, 4). Paicunapaj familiacunahuan, amigocunahuan sumaj causanata yuyarishpaca Jehová Diostami cushilla sirvishpa catincuna (Mateo 24:13; Gálatas 6:9). w22.01 págs. 21, 22 párrs. 5-7

¿Jesusca imamantataj huañuna carca? Moisesman cushca leypica shuj causaita chingachijpica caishuj causaihuanmi pagana carca (Éxodo 21:23, 24). Shinallataj Adán jucha illaj causaita pirdishcamantami Jesusca paipaj jucha illaj causaita cuna carca (Romanos 5:17). Jesusca paipaj causaita cushpami jucha illaj causaita randij shina carca (1 Corintios 15:22). Chashnami Jesuspi crijcunaca huiñai causaita chari tucuncuna. Chaimantami Jesusca paipi crijcunapaj ‘huiñaita causaj Yaya’ can (Isaías 9:6; Romanos 3:23, 24). Jesusca Jehová Diosta cꞌuyashpa, ñucanchijta cꞌuyashpami paipaj causaita curca (Juan 14:31; 15:13). Shinallataj paica huañungacamami Jehová Diospaj munaita rurarca. Chaimantami Jehová Dios munashca shina huiñai causaita charishun. w21.04 págs. 14, 16 párrs. 2, 3