Abril

Jesusca ñucanchijta cꞌuyashcamantami paipaj causaita curca (Juan 15:13). Paicuna chashna ñucanchijta achcata cꞌuyashcataca mana pagai tucunchijchu. Pero agradicingapajca Jehová Dios mandashca shinami causana canchij (Colosenses 3:15). Jesús huañushcamantami jahua pachaman rigrij ungidocunaca Diospaj ñaupajpi alli ricurishpa paipaj huahuacuna tucushcacuna (Mateo 20:28; Romanos 5:1; 8:15-17, 23). Cutin shujtaj ovejacunamanta cajcunaca Jesús huañushcapi feta churashpami Jehová Diosta sirvi tucuncuna. Jatun llaqui punllacunamantacarin quishpiri tucungacuna (Apocalipsis 7:13-15). Cai ishqui grupocunaca Jesús huañushcata yuyarina tandanacuiman rishpaca Jesús huañushcamantami agradicishcata ricuchincuna. w22.01 pág. 23 párrs. 14, 15

Jesusca contracuna Diostami cꞌamicungui, paitaca mana respetanguichu ninata yachashpami ashtahuan preocuparirca (Mateo 26:64-66). Jesusca paita yangamanta juchachichunca mana munarcachu. Chaimantami Jehová Diostaca cashna llaquimanta anchuchichun mañarca (Mateo 26:38, 39, 42). Judiocunaca Dios cushca mandashcacunata cazushun nishpapish paicunaca mana cazurcacunachu. Chaimantami paicunaca huañuiman, llaquiman condenashcacuna carca. Shinallataj Adanpaj culpamantapishmi paicunaca huañuiman, juchaman condenashcacuna carca (Romanos 5:12). Dios cushca leypica shuj runa jatun juchata rurashpaca huañunami carca. Cai runa huañujpica maipica paitaca caspipimi huarcujcuna carca (Deuteronomio 21:22, 23; 27:26). Judiocuna ama llaquiman, huañuiman condenashca cachunmi Jesusca paicunamanta shuj caspipi huarcushca huañuna carca. Paica judiocunapaj randimi chashna llaquichichun saquina carca (Gálatas 3:10). w21.04 págs. 16, 17 párrs. 5, 6

¿Jesusca huañuna ñaupallaca ima laya llaquicunatataj charirca? Paitaca Romamanta soldadocunaca prezu apashpami sinchita macarcacuna (Mateo 26:52-54; Juan 18:3; 19:1). Cai contracunaca Jesustaca manchanaita macashpami chugrichircacuna. Qꞌuipaca paita huañuchina lugarcama caspita apachunmi chashna chugrichishca jahuapi apachircacuna. Paicunaca Jesús mana apai tucushcata ricushpami shujtaj runa chai caspita apachun obligarcacuna (Mateo 27:32). Ña Jesusta huañuchina lugarman chayashpaca contracunaca maquipi, chaquipi clavashpami shuj caspipi huarcurcacuna. Pai huarcushca cashcamantami paipaj chaqui, maquica ashtahuan jutcurirca. Contracuna Jesusmanta burlarishpa llaquichicujpimi Jesuspaj amigocuna, paipaj mamaca achcata huacacurcacuna (Lucas 23:32-38; Juan 19:25). Paica huarcushca cashcamantami samaitaca mana aisai tucushcanga. Jesusca huaquin horascunatami chashna sufricurca. Paica Jehová Diosta tucuipi cazushcata yachashpami Jehová Diosta mañashpa umata huarcushpa huañurcalla (Marcos 15:37; Lucas 23:46; Juan 10:18; 19:30). w21.04 pág. 16 párr. 4

Jesusca paipaj 11 apostolcunamanca: ‘Ñuca yahuarta jichashcaca mushuj ari nicushcatami ricuchin’ nircami. Shinallataj “ñuca Yaya mandanata ñucaman cushca shinallataj, ñucapish cancunamanca mandanata cuni” nircami. Chashnami cai ishqui ari ninacushcata rurarca (Lucas 22:20, 28-30). Chashna ari nishpaca apostolcunata jahua pachapi mandachunmi agllarca. Qꞌuipacarin shujtajcunatapishmi agllagrirca (Apocalipsis 5:10; 14:1). Chaimanta Jesushuan mandachun agllashca ungidocunallami, Jesús huañushcata yuyarina tandanacuipica tandata micuncuna, vinotapish ubyancuna. Jehová Diosca Jesushuan jahua pachapi mandagrij ungidocunamanca mana huañuj, mana ismuj cuerpotami cunga. Shinallataj Jesushuan mandashpa 144.000-puracunamanta cana regalotapishmi cushca. Paicunapajca Jehová Diospaj ñaupajpi sirvinaca shuj valishca privilegiomi can (1 Corintios 15:51-53; 1 Juan 3:2). Pero cai Allpapiraj caj jahua pachaman rigrijcunaca huañuna horascama Jehová Diosta alli sirvina cashcatami yachancuna (2 Timoteo 4:7, 8). w22.01 pág. 21 párrs. 4, 5

Ishqui shuhuacunaca Jesuspaj ladopimi paicunapish clavashca, huarcushca carcacuna (Lucas 23:40, 41). Pero shujmi Jesús causarinata, pai mandaj tucunatami cuentata curca. Chaimi paica: “Jesús, can ña mandaj tucushpaca ñucata yuyaripangui” nirca (Lucas 23:42). Jesusca paipaj Yaya llaquij, perdonaj cashcata yachashpami chai huañugrij runamanca “ñucahuanmi paraisopi cangui” nishpa paillataj shuj promesata rurarca (Salmo 103:8; Hebreos 1:3). Ñucanchij juchacunamanta arrepintirijpi, Jesuspi feta churajpica Jehová Diosca perdonangami (1 Juan 1:7). Pero maipica: “Jehová Diosca ñucanchij juchacunataca mana perdonangachu” nishpachari yuyanchij. Chashna yuyashpaca caipi yuyashunchij. Jesusca shuj shuhua paipi recienlla feta churajpica paica perdonarcami. Jehová Dioscarin ñucanchij paita cazujpica perdonangami (Salmo 51:1; 1 Juan 2:1, 2). w21.04 pág. 9 párrs. 5, 6

¿Jesusca huañuna horascama Jehová Diosta tucuipi sirvishcamantaca imatataj ricuchirca? Puntapica, Diablo llulla cashcata, jucha illaj runapish Jehová Diosta tucuipi cazui tucushcatami ricuchirca. Ishquipica, paipaj causaitami ñucanchijta quishpichingapaj curca. Paipaj causaimantami gentecunaca Jehová Dioshuanpish alli apai tucuncuna, huiñai causaitapish chari tucuncuna. Quimsapica, Jesusca Jehová Diospaj Mandanata apoyashcata, paipaj shutita difindishcatami ricuchirca. Cada punlla Jehová Diosta cazungapajmi esforzarina canchij. Chashnami huañunata yachashpapish Jehová Diostaca cashna ni tucungui: “Canta tucuipi alli sirvingapajmi esforzarishcani. Diablotapish llulla cashcatami ricuchishcani. Cambaj shutitami jatunyachishcani. Cambaj Mandanallatami apoyacushcani”. w21.04 pág. 12 párrs. 13, 14

Jesustaca paipaj contracunaca yangamantami juchachin, burlarincuna, mana alli tratancuna, llaquinaita macancuna. Chai huashaca Jesustaca paicunaca shuj caspipimi clavashpa huarcuncuna. Jesusca maquicunapi, chaquicunapi clavashca cashcamantami samaita aisashpapish, parlashpapish achca nanaita charin. Pero nanaita sintishpapish imata nina cashcataca mana upalla saquirinchu. Jesús nishca tucuri shimicunamantaca shujtajcunata perdonana cashcata, Jehová Diospish ñucanchijta perdonaj cashcatami yachashcanchij. Shinallataj ñucanchij cꞌuyashca huauqui panicunapaj ayudata mañana cashcatami yachashcanchij. Ima pruebacunahuan cajpipish Jehová Dios ñucanchijta ayudanatami ricushcanchij. Ashtahuancarin causacushparaj Jehová Diosta tucuipi cazujpica ñucanchij huañujpipish pai causachinatami yachashcanchij. w21.04 págs. 8, 13 párrs. 1, 17

Jesuspaj ejemplota catishpaca huiñai causaitami charishun. Shuj charij joven, Jesusta huiñai causaita charingapajca imatataj rurana cani nishpa tapujpica Jesusca: “Ñucata catingui” nircami (Mateo 19:16-21). Shinallataj paipi mana crij judiocunamanpish Jesusca: ‘Ñuca ovejacunaca ñucata catinllami. Ñucaca paicunamanca huiñai causaitami cuni’ nircami (Juan 10:24-29). Ñucanchijpish Jesuspi feta charishcata ricuchingapajca pai yachachishcacunatami pajtachina canchij. Chaita rurashpaca huiñai causaiman apaj ñanpimi purishpa catishun (Mateo 7:14). Jesuspaj ejemplota alli catingapajca paitami alli rijsina canchij. Chaipajca Jesús ima shina cashcata, imata yuyashcata, imata yachachishcatami yachashpa catina canchij. Achca huatacunata Diosta sirvishpapish ashalla huatacunata sirvishpapish Jehová Diosta, Jesusta alli rijsingapajmi esforzarina canchij. w21.04 pág. 4 párrs. 9, 10

Apóstol Pabloca Diosta manaraj rijsishpaca Diosta sirvijcunatami catirashpa llaquichishpa carcelpi churarca. Shinallataj maijancunatacarin huañuchishpami ayudarca (Hechos 26:10, 11). Chaita rurashcata yuyarishpami Apóstol Pabloca imapaj mana valishca shina sintirishcanga (1 Timoteo 1:15). Caipi yuyashun, Apóstol Pabloca Diosta manaraj rijsishpaca Diosta sirvij cusa huarmitami huañuchichun apoyashcanga. Pero qꞌuipaca ¿paicunapaj churita rijsishpaca ima shinashi sintirishcanga? Pabloca llaquillami sintirishcanga. Pero pai ima rurashcapi yuyailla canapaj randica Jesús paipaj juchacunamanta huañushcatami tucui shunguhuan crirca. Chaimi Pabloca Diosca yallitaj llaquij cashcatami ñucamanca ricuchirca nirca (1 Corintios 15:3, 10). ¿Apóstol Pablomantaca imatataj yachanchij? Ñucanchijpish Jesús cada unomanta huañushcatami tucui shunguhuan crina canchij. Chashnami Jehová Dioshuanca alli apanacushun (Hechos 3:19). Jehová Diosca ñucanchij imapi pandarishcacunallataca mana ricunchu. Paica cunanmanta paita sirvingapaj esforzarishcatami ricun (Isaías 1:18). w21.04 pág. 23 párr. 11

Jesuspaj punllacunapica judiocunaca Mesías huañunataca mana shuyacurcacunachu. Pero Isaías 53:12-pica: ‘Mesiasca huañuchichun paillataj japi tucushpamari, millaita rurajcunahuan huañuchishca carca. Juchayujcunapaj randi huañushpamari, achcacunapaj juchata aparca. Millaita rurajcunamantapish mañarcami’ nircami. Chaimanta Jesusta yangamanta juchachishpa huañuchijpipish judiocunaca mana ñitcarinachu carca. Cai profecía pajtarijta ricushpaca Jesús Mesías cashcatami cuentata cuna carcacuna. Ama ñitcaringapajca Jesusca paita catijcunataca: ‘Achcacunami llullashpa, cꞌamishpa llaquichina yuyailla Diosta sirvijcunataca llaquichingacuna’ nircami (Mateo 5:11). Diabloca paita apoyajcunahuanmi Diosta sirvijcunamantaca achca llullacunata nincuna (Apocalipsis 12:9, 10). Pero tucui cai llullacunataca mana uyanachu canchij. Paicuna ñucanchijta manchachichun, ñucanchij feta chiriyachichunpish mana saquinachu canchij. w21.05 pág. 12 párrs. 14, 16

Bibliamanta yachacujcunata Jehová Diospi confiachun ayudashunchij. Jesusca paipaj discipulocunamanca: ‘Jehová Dios cancunata cꞌuyashcamantami tucuipi ayudanga’ nircami (Mateo 10:19, 20, 29, 30). Ñucanchijpish yachacujcunamanca Jehová Dios paicunata ayudanatami yuyachina canchij. Paicunahuan paicuna churashca metacunata pajtachichun Jehová Diosta mañashunchij. Chashnami paicunaca Jehová Diospi confiai callaringacuna. Poloniapi causaj huauqui Franciszekca: “Ñucaman yachachijca ñuca metacunata pajtachichunmi Jehová Diosta mañaj carca. Jehová Dios pai mañashcacunata cutichijta ricushpami ñucapish Yaya Diosta mañai callarircani. Por ejemplo, ñuca mushuj trabajopica tandanacuicunaman ringapajmi Jehová Diostaca ñuca jefe permisota cuchun nishpa mañarcani. Ñuca jefe permisota cujpica Jehová Dios ñuca mañashcacunata cutichishcatami cuentata curcani” ninmi. Pero ¿Bibliamanta yachacujcunata mana charishpaca gentecuna bautizarichun ayudai tucunchijchu? Ari. Chaipajca huauqui panicunata Bibliamanta yachachingapaj acompañashunchij. Jehová Diosca Bibliamanta yachacujcunamantaca achcatami preocuparin. Chaimanta yachacujcunata Jehová Diospajman cꞌuchuyachun ayudajpica paica ñucanchijtaca achcatami valoranga (Isaías 52:7). w21.06 pág. 7 párrs. 17, 18

Diospaj Shimita valorashcata ricuchingapajca cada punllami Bibliata estudiana canchij. Chaipajca shuj horariota rurashpami pajtachinataj canchij. Chaita rurashpaca ñucanchij fetami ashtahuan sinchiyachishun. Cai Allpapi tiyaj huaquin estudiadocunaca Diospica mana feta charincunachu. Pero ñucanchijca Bibliata alli estudiashcamantami Jehová Diospi feta charinchij (Mateo 11:25, 26). Chashna Bibliata estudiashcamantami imamanta llaquicuna tiyashcata, ñalla Jehová Dios imata ruranata yachashcanchij. Chaimanta ñucanchij feta sinchiyachishpa catishunchij. Shinallataj gentecunatapish tucuita ruraj Diospi feta charichun ayudashunchij (1 Timoteo 2:3, 4). Ñallami paraíso Allpapi causaj tucui gentecunaca Jehová Diosllata adorangacuna. Paicunaca: Jehová Dios ‘canca jatunmari cangui, allimari cangui. Can munashpa rurashcamantami tucui imapish tiyan’ ningacunami (Apocalipsis 4:11). w21.08 pág. 19 párrs. 18-20

Pushaj ancianocunaca shujtajcunata consejana responsabilidadtami charincuna (Proverbios 27:9). Ancianocunaca shujtajcunata cꞌuyashcamantami paicuna pandaricujpica consejocunata cuncuna (Gálatas 6:1). Paicunaca ima consejota cungapajca apóstol Pablo ima nishcapimi yuyarina can. Pabloca: ‘Cꞌuyaita charijca llaquita apajmi, alli shunguyujmi, tucui llaquita apanllami, tucuita crinllami, tucuita shuyanllami, tucuita ahuantanllami’ nircami (1 Corintios 13:4, 7). Cai versocunapi yuyashpaca ancianocunaca shujtajcunataca cꞌuyaihuanmi consejanata yachangacuna. Chashna consejajpica shujtajcunapish allimi chasquingacuna. w22.02 págs. 14, 15 párrs. 3, 5

Jehová Diosca angelcunatapish, runacunatapish jucha illajtami rurarca. Pero shuj angelca Diosta mana cazushcamantami Satanás tucurca. Paica jucha illaj Adanta, Evatapishmi Diospaj contra tucuchun pandachirca. Shujtaj angelcunapish, shujtaj runacunapishmi Diospaj contra tucushcacuna (Judas 6). Chaimantami Jehová Diosca shungu pꞌaquirishca sintirirca. Pero cai millai gentecunata tucuchingacamami paica ahuantashpa caticushca. Ñalla Jehová Dios tucui millai gentecunata tucuchijpica Diosta sirvijcunaca cushillami sintirishun. Diabloca Jobta, Diosta tucui sirvijcunatapishmi ‘Diostaca mana cꞌuyaimanta sirvinguichijchu’ nishpa juchachirca (Job 1:8-11; 2:3-5; Apocalipsis 12:10). Pero ñucanchijca llaquicunata ahuantashpa, Jehová Diosta cꞌuyaimanta sirvishpaca Diablo llulla cashcatami ricuchishun. w21.07 págs. 9, 10 párrs. 7, 8

Jesusca Jehová Diosta cushichingapajmi paipaj causaita saquishpa paita caspipi huañuchichun saquirca. Chashnallatajmi ñucanchijpish Jehová Diosta cushichingapajca mana alli ruraicunata, mana alli costumbrecunataca saquina canchij. Chaicunata saquishpaca mauca causaita shuj caspipi huarcushpa huañuchicuj shinami canman (Romanos 6:6). Chashnami alli concienciata, huiñai causaitapish charishun (Juan 17:3; 1 Pedro 3:21). Jehová Diosca ñucanchij alli sintirichunllaca paipaj mandashcacunataca mana cambiangachu. Ashtahuanpish ñucanchijmi paita cazungapajca esforzarina canchij (Isaías 1:17, 18; 55:9). Bautizarishca huashapish mana alli yuyaicunamanta jarcarishpami catina canchij. Jehová Diosta paipaj espíritu santohuan ayudachun mañai (Gálatas 5:22; Filipenses 4:6). Mauca causaita saquingapajca achcatami esforzarina canchij. w22.03 págs. 5, 6 párrs. 15-17

Jehová Diosca paipaj Gobiernota punta lugarpi churajpi, paipaj mandashcacunata cazujpica ñucanchijmanca micunata, ropitata, maipi causanatami cunga (Mateo 6:33). Chaimanta ima charishca cosascuna ñucanchijman cushi causaita cunata, cuidanataca ama yuyashunchij. Ñucanchijca Jehová Diosta sirvishpallami tranquilo, cushilla sintirishun (Filipenses 4:6, 7). Cullquita charishpapish ima cosascunata randishpaca: “¿Chaipi ocuparingapaj tiempota, fuerzasta charinichu?” nishpami tapurina canchij. Jehová Diosca paipaj familia ucupi huaquin mingashcacunata pajtachichunmi shuyan. Chaimanta Diosta sirvingapaj imapish jarcachunca mana saquinachu canchij. Shuj charij runaca Jesús paita catichun nijpica paipaj yallitaj charishca cosascunapi ocuparishcamantami Jesustaca mana catirca. Shinallataj Diospaj huahua cana oportunidadtami pirdirca. Pero ñucanchijca mana chashna casha ninchijchu. Chaimanta ima charishca cosascunallapi ama confiashunchij (Marcos 10:17-22). w21.08 págs. 6, 7 párr. 17

Bibliata estudiashpaca Jehová Dios cꞌuyaj, llaquij, perdonaj cashcatami yachashun. Shinallataj pai ima shina cajtaca pai rurashcacunata ricushpami yachai tucunchij. Yayitu Diosta alli rijsishpaca pai de verdadtaj tiyashcatami crishun (Éxodo 34:6, 7; Salmo 145:8, 9). Jehová Diosmanta ashtahuan yachashpaca ñucanchij fetami sinchiyachishun, paitami cꞌuyashun, paipaj amigospishmi tucushun. Huillacujpi maijancuna ‘¿Diosca tiyanchu?’ nishpa tapujpi chaita mana cutichi tucushpaca ¿imatataj rurana canchij? Alli cutichingapajca ñucanchijllatajmi publicacioncunapi investigana canchij. Shinallataj shuj huauqui o pani cai tapuita cutichingapaj ayudachunmi mañana canchij. Gentecuna Biblia yachachishcacunata chasquijpi o mana chasquijpipish ñucanchijllataj investigashcamantami ñucanchij fetaca ashtahuan Jehová Diospi sinchiyachishun. w21.08 pág. 18 párrs. 14, 15

Jehová Diosta ashtahuan sirvingapajca huaquin cosascunatami saquina tucunga. Pero chaica mana nisha ninchu tucuita saquina cashcata (Eclesiastés 5:19, 20). Shinapish charishca cosascunallapi yallitaj ocuparishpa, Diosta sirvingapaj mana esforzarishpaca Jesús parlashca runa layami tucushun. Cai runaca yallitaj charishca cosascunapi ocuparishpami Yayitu Diosta cungarirca (Lucas 12:16-21). Ima problemacunata charishpaca chai problemahuan chꞌimbapurangapajmi Jehová Diosta ayudachun mañana canchij (Proverbios 3:21). Jehová Diosca achcatami bendiciashca (Hebreos 13:15). Paita agradicishcata ricuchingapajca paita sirvingapajmi tucui pudishcata rurana canchij. Chaita rurajpica Jehová Diosca ñucanchijtami ashtahuan bendicianga. Shinallataj pai alli cajta, cꞌuyaj, cuidaj cajtami cuentata cushun (Salmo 34:8). Chaimi ñucanchijpish Jesús shinallataj: “Ñuca micunaca ñucata cachaj Yayapaj munaita rurana, pai rurai nishcata pajtachinami” nishun (Juan 4:34). w21.08 págs. 30, 31 párrs. 16-19

Diabloca pai laya jatun tucushpa huiñai causaita charinata chꞌingachichunmi munan. Chaimantami apóstol Pabloca: ‘Ñataj jatun tucushpa, Diablo urmashca shina urmanguichijman’ nishpa advirtirca (1 Timoteo 3:6, 7). Achca huatata o ashalla huatacunata Jehová Diosta sirvicushpapish jatun tucunamantami cuidarina canchij. Diabloca gentecuna ima problemacunata charishpa paicunallapi yuyashpa jatun tucuchunmi munan. Por ejemplo, pi ñucanchijta yangamanta juchachijpi, mana alli tratajpica Diabloca huauqui panicunata, Jehová Diosta culpachunmi munan. Ashtahuancarin ima problemata allichingapajca Yaya Diospaj mandashcacunata cazunapaj randica ñucanchijllapi confiachunmi munan (Eclesiastés 7:16, 20). w21.06 pág. 15 párrs. 4, 5

Jehová Diosca profeta Ageomanmi shuj valishca trabajota mingarca. Jesús manaraj cai Allpaman shamujpi huata 537-pica judiocunaca Babiloniamantami Jerusalenman tigrarcacuna. Paicunaca Jerusalenman tigrashcahuanmi Diospaj templotaca shayachi callarircacuna (Esdras 3:8, 10). Pero tiempo qꞌuipaca paicunatami contracunaca jarcai callarircacuna. Chaimi paicunaca desanimarircacuna, Diospaj templota shayachinatapish saquircacuna (Esdras 4:4; Ageo 1:1, 2). Chaimantami Jesús manaraj huacharijpi huata 520-pica Jehová Diosca Ageotaca paicunata animachun, Diospaj templo huasitapish shayachishpa ayudachun animarca (Esdras 6:14, 15). Ageo nishca shimicunaca judiocuna Jehová Diospi paicunapaj feta sinchiyachichunmi animashcanga. “Tucuita ruraj Jehová Dios” nishca shimita uyashpaca judiocunaca achcatami animarishcangacuna. Paicunaca Diospaj templota shayachingapajca Jehová Dios paipaj angelcunahuan ayudanapimi tucui shunguhuan confiana carcacuna. w21.09 pág. 15 párrs. 4, 5

Shujtaj religioncunamantaca cꞌuyaitaca mana ricuchincunachu. Pero testigo de Jehovacunaca muyundij Allpapimi charij cashpapish, huajcha cashpapish, ima raza cashpapish, maijan llajtamanta cashpapish shuj shinalla cꞌuyaita ricuchinchij. Chaitaca tandanacuicunapi, jatun tandanacuicunapimi ricui tucunchij. Chashnami testigo de Jehovacunaca Jehová Dios munashca shina paita adorashcata ricuchinchij (Juan 13:34). Bibliapica: “Tucuimanta yallica, cancunapurapi tucui shunguhuan cꞌuyaj caichij” ninmi (1 Pedro 4:8). Juchayuj cashcamantami maipica shujtajcunata llaquichinchij. Pero paicunata perdonashpami cꞌuyaita ricuchishun. Shinallataj shujtaj huauqui panicuna ñucanchijta mana alli tratajpipish paicunaman cꞌuyaita ricuchingapajca generosos cashunchij. Chashnami cꞌuyaita ricuchishun (Colosenses 3:12-14). Cashna cꞌuyaita ricuchishpaca de verdadtaj Jehová Diosta sirvijcuna cashcatami ricuchishun. w21.10 pág. 22 párrs. 13, 14

Maijancunaca jatun juchata rurashpaca mana arrepintirishcacunachu. Chaimantami ancianocunaca paicunataca congregacionmanta llujchishcacuna. Huaquincunaca: ‘Ñucanchijta llujchishcamantami causaipi cambiashpa Jehová Diospajman cutin tigrachun ayudashcacuna’ nincunami (Hebreos 12:5, 6). Cai ejemplopi yuyashun. Shuj michijchari shuj oveja ungushca cashcata cuentata cun. Cai ovejapaj ungüi caishuj ovejacunaman ama pasachunmi michijca chai ovejataca chꞌicanyachin. Ovejacunaca siempremi shuj ovejata paicunamanta caruyachijpica mancharincuna. ¿Ovejata caishuj ovejacunamanta chꞌicanyachishpaca michijca pai millai cashcatachu ricuchin? Mana. Chaita rurashpaca michijca cai ungushca oveja shujtaj ovejacunata ama contagiachunmi jarcan. Chashnami michijca caishuj ovejacunata cuidan. w21.10 pág. 10 párrs. 9, 10

Diospaj pueblopi cashcamantami achcata agradicinchij. Shujtajcunapish ñucanchijhuan Yayitu Diosta sirvichunmi munanchij. Chaimanta Jehová Diospaj shutitapish, Diospaj pueblotapish ama yangapi churangapajmi esforzarina canchij. Ñucanchij alli comportarijta ricushpami shujtajcunaca Jehová Diosta sirvinata munangacuna. Yayitu Diosmanta predicanata manataj saquijpimi huaquincunaca ñucanchijtaca catirashpa llaquichingacuna. ¿Mana manchashpa huillangapajca imatataj rurana canchij? Jehová Dios, Jesús ñucanchijta ayudanataca allimi yuyarina canchij. Jesusca paipaj discipulocunamanca: “Imatataj nishun, imatataj rimashun nishpa ama chai yuyailla canguichijchu. Cancuna ña rimagrijpica, imalla rimana cashcata Taita Diosmi rimachinga. Mana quiquincunapaj yuyaimantachu rimanguichij, ashtahuanpish cancunapaj Yayapaj espiritumi cancunataca rimachinga” nircami (Mateo 10:19, 20). w21.09 pág. 24 párrs. 17, 18

Moisespish cai shimicunallatatajmi utilizarca (Salmo 90:1). Paica manaraj huañushpaca: ‘Huiñaipaj Taita Diosca, can miticunami. Paipaj rigracunaca huiñaipaj canta charirajmi’ nishpami quillcarca (Deuteronomio 33:27). ¿Paipaj rigracunaca huiñaipaj canta charirajmi nishca shimicunaca imatataj nisha nin? Jehová Diosca ñucanchij miticuna Diosmi can. Chaimantami ñucanchijca seguros sintirinchij. Pero maipica llaquilla, desanimarishcami sintirinchij. ¿Chashna sintirijpica Jehová Diosca imatataj ruranga? (Salmo 136:23). Yayitu Diosca paipaj rigracunahuanmi ñucanchijtaca cutin shayachij shina cuidanga, animanga (Salmo 28:9; 94:18). Puntaca, mai lugarpi ñucanchij cashpapish paipimi miticui tucunchij. Ishquipica, Yayitu Jehová Diosca ñucanchij ima laya cajpipish paica cꞌuyanataca manataj saquinchu. Chaimantami siempre Jehovapi confiana canchij. w21.11 págs. 6, 7 párrs. 15, 16

Jesusca allimi yacharca paipaj discipulocunata shujtajcuna mana alli tratanata. Chaimi paicuna ahuantachunca Lucas libropi tiyaj shuj chꞌimbapuraimanta parlarca. Jesusca shuj viuda huarmica paita pꞌiñajcunata corregichunmi shuj jueztaca cutin cutin mañarca. Juezca paitaca ayudarcami. ¿Caimantaca imatataj yachanchij? Jehová Diosca cashcata rurajmi can. Chaimantami Jesusca: “Taita Dioscarin tutapish punllapish pai agllashcacuna caparijpica, ¿manachu imatapish mana uniyashpalla paicuna mañashcata cutichinga?” nircami (Lucas 18:1-8). Shinallataj paica: ‘Runa aichayuj shamushpaca ¿cai pachapica chashna crijtaca japingachu imashi?’ nircami. Pi ñucanchijta mana alli tratajpica pacienciatami charina canchij. Chashnami ñucanchijpish cai viuda huarmi shina sinchi feta charishun. Sinchi feta charishpaca Dios ayudanataca manataj cungarishunchu. Chaimanta Diosta mañanata amataj saquishunchij. w21.11 págs. 23, 24 párrs. 12, 14

Joven, ¿canca maipica Diospaj mandashcacunata cazunaca sinchimi can nishpachu yuyashcangui? Diablomi chashna yuyachun munan. Diabloca ancho ñanpi purij gentecuna cushilla causacushcata shina yuyachunmi munan. Chaimantami Diabloca escuelapi compañerocuna, internetpi ricurij gentecuna cushilla causacushcata shina ricuchun munan. Yaya Diospaj mandashcacunata cazunapish yanga shina cashcata ricuchunmi munan. Diabloca ancho ñanpi purijcuna ima shina tucurinata yachachunca mana munanchu (Mateo 7:13, 14). Pero Jehová Diosca paita sirvijcuna paipaj ñanpi purishpa huiñai causaita charinataca achijtami intindichishca (Salmo 37:29; Isaías 35:5, 6; 65:21-23). w21.12 págs. 23, 24 párrs. 6, 7

Shujtajcunata perdonana cashcataca allimi yachanchij. Pero maipica chaita ruranaca sinchimi can. Apóstol Pedrohuanpish chashnami tucurca (Mateo 18:21, 22). ¿Perdonangapajca imatataj rurana canchij? Puntapica, Jehová Dios ñucanchijta mana mitsashpa pai perdonashcapimi cutin cutin yuyarina canchij (Salmo 103:8-10; Mateo 18:32, 33). Jehová Dios cꞌuyaimanta ñucanchijta perdonashcamantami ñucanchijpish huauqui panicunataca cꞌuyaimanta perdonana canchij (1 Juan 4:11). Ishquipica, perdonajcuna cashpaca shujtajcunata ayudai tucushcatami yuyarina canchij. Por ejemplo, perdonashpaca ñucanchijta llaquichijcunatami ayudashun. Congregacionpipish huauqui panicunahuan tandallami causashun. Jehová Dioshuanpish allimi apanacushun. Shinallataj ñucanchijllatajmi tranquilos sintirishun (2 Corintios 2:7; Colosenses 3:14). Quimsapica, shujtajcunata perdonangapajmi Jehová Diosta ayudachun mañana canchij. Huauqui panicunahuan tandalla causanata Diablo jarcachunca manataj saquinachu canchij (Efesios 4:26, 27). w21.06 págs. 22, 23 párrs. 11, 14

Davidca mandaj Saúl paita huañuchisha nijpimi miticunaman rirca. Paica yaricachishpaca Nob llajtapimi paiman 5 tandata cuchun mañarca (1 Samuel 21:1, 3). Qꞌuipaca paipish, paipaj runacunapish jatun jutcupi miticunamanmi rircacuna (1 Samuel 22:1). ¿Davidca imamantataj chashna miticushpa puricurca? Davidca achca macanacuita mishashpami rijsishca carca. Chaimi mandaj Saulca paitaca achcata envidiarca. Shinallataj Saulca mana cazushcamanta Dios paita mandanata quichunatami alli yacharca. Davidta israelitacunata mandachun agllashcatapishmi yacharca (1 Samuel 23:16, 17). Pero mandaj Saulca achca soldadocunata charishcamanta, soldadocuna paita apoyashcamantami Israel llajtata mandashpa caticurca. Chaimantami Davidca paipaj causaita quishpichingapaj miticushpa rirca. Bibliapica David mandaj cachun Saúl jarcasha nishcataca mana huillanchu (Isaías 55:11). Pero chashna rurasha nishpaca Diospaj contrami tucunman carca. Jehová Diostaca mana pi mishai tucuncunachu. w22.01 pág. 2 párrs. 1, 2

Jesusca gentecunata achcata cꞌuyashcamantami paicunaman predicangapaj achcata esforzarirca (Lucas 19:47, 48). Maipica achca gentecuna Diosmanta yachasha nishcamantami paipish, paipaj discipulocunapish micungapaj tiempota mana charircacuna (Marcos 3:20). Shuj cutinca shuj runa tuta chayajpica Jesusca paihuan parlangapajmi listo carca. Achca gentecunaca Jesuspi mana crishpapish Diosmanta uyana oportunidadtami charircacuna. Cunan punllacunapish ñucanchijca tucui gentecunamanmi Diosmanta predicasha ninchij (Hechos 10:42). Caita pajtachingapajca huillanapimi ñucanchijpish huaquin cambiocunata rurana canchij. Ñucanchijpish ñucanchij munashca horaspi predicanapaj randica, gentecuna tiyan horas predicangapajmi tiempota surcuna canchij. Chaita rurashpaca Jehová Diostami cushichishun. w22.01 pág. 17 párrs. 13, 14

Cunan punllacunapica huaquin gentecunapajca autoridadcunapi confianaca sinchimi can. Gobiernocunaca paicunapaj leycunata churashpami charijcunata, rijsishca cajcunataca ayudancuna. Pero huajchacunataca mana ayudancunachu. Religionta pushajcunacarin mana alli cosascunatami rurancuna. Chaimi gentecunaca Diospica mana confiancuna. Pero ñucanchijca Bibliamanta yachacujcunataca Jehová Diospi confiachun, Dios churashca pushaj huauquicunapipish confiachunmi ayudana canchij. Ashalla huatacunata Diosta sirvicushpapish o achca huatacunata sirvicushpapish Diospi, paipaj organizacionpi confiashpami catina canchij. Maipica Jehová Dios imata rurashcataca mana alli intindinchijchu. Pero imatapish pai alli ruraj cashcapimi confiana canchij. w22.02 pág. 2 párrs. 1, 2