Mayo

Jehová Diosca ñucanchijta achcata cꞌuyashpami paipaj Churita ashtahuan rijsichunca Mateo, Marcos, Lucas, Juan librocunata quillcachishca. Chaipimi Jesuspaj causaimanta, pai huillashcamanta, pai imata rurashcamanta, ima shina sintirishcamanta yachai tucunchij. Chai librocunamanta yachanaca Jesuspaj sarushcata ricucuj shinami can. Chai librocunata alli estudiashpaca Jesustami ashtahuan rijsishun. Paipaj alli ejemplotapishmi catishun. Mateo, Marcos, Lucas, Juan librocunata liyishpallaca mana saquirinachu canchij. Ashtahuanpish alli estudiangapaj, yachacushcapi cutin cutin yuyangapajmi tiempota surcuna canchij (Josué 1:8-ta ricui). Cai librocunata liyicushpaca chaipi cashcata shinami yuyana canchij. Chaipajca chaipi parlaj gentecunamanta, lugarcunamanta, ñaupajman ima tucushcamanta, qꞌuipaman ima tucushcamantami ñucanchij publicacioncunapi investigana canchij. w21.04 págs. 4, 5 párrs. 11-13

Jesús manaraj cai Allpaman shamujpica Jehová Diosca: ‘Mesiastaca 30 cullquipimi cꞌatunga. Paita entregajca shuj amigomi canga’ nircami (Salmo 41:9; Zacarías 11:12, 13). Profeta Zacariaspish: “Can chai michijta chugrichijpica, ovejacunaca caita chaitami ringacuna” nircami (Zacarías 13:7). Alli shungu gentecunaca cai profeciacuna pajtarijta ricushpaca Jesús Mesías cashcapimi feta churanman carcacuna. ¿Cunan punllacunapish gentecunaca imatataj rurancuna? Huaquin rijsishca Testigocunaca Jehová Diosta sirvinata saquishpami apostatacuna o contracuna tucushcacuna. Paicunaca Internetpi, televisionpi, radiocunapimi testigo de Jehovacunamantaca llullacunata nincuna. Diospaj organizacionta saquichunmi chashna rurancuna. Pero Diosta alli sirvijcunaca cashna pandachichunca mana saquinchijchu. Bibliapi nishca shina panda yachachijcuna tiyanataca allimi yachanchij (Mateo 24:24; 2 Pedro 2:18-22). w21.05 págs. 11-13 párrs. 12, 18, 19

Diosta sirvijcunaca Bibliataca asha ashami intindinguichij nishcatami yuyarina canchij (Colosenses 1:9, 10). Jehová Diosca asha ashami yachachin. Chaimantami alli intindingapajca pacienciahuan shuyana canchij. Cuerpo gobernante huauquicunaca ima yuyaimanta alli intindishpaca chai yuyaitaca tucuicunamanmi rato alli intindichin. Cutin shujtaj religionta pushajcunaca paicunapaj gentecunata cushichingapaj o paicunapaj ñaupajpi alli ricuringapajllami ima decisionta agllancuna. Testigo de Jehovacunaca Diospajman ashtahuan cꞌuchuyangapajmi huaquin cambiocunata ruranchij. Shinallataj Jesús yachachishca shinami Yaya Diosta sirvinchij (Santiago 4:4). Ñucanchijca ima cambiocunata rurashpaca cai mundopi tiyaj gentecuna nishcallamantaca mana cambianchijchu. Ashtahuanpish Bibliata alli intindishcamantami huaquin cambiocunata ruranchij (1 Tesalonicenses 2:3, 4). w21.10 pág. 22 párr. 12

¿Sololla sintirishpaca imatataj rurana canchij? Jehová Dios ñucanchijta ima shina ayudacujta yuyashunchij (Salmo 55:22). Chashna yuyashpaca mana ñucanchijlla cashcata sintishunchu. Sololla sintirij huauqui panicunata Jehová Dios ima shina ayudashcata yuyashunchij (1 Pedro 5:9, 10). Hiroshi shuti huauquica achca huatacunatami paipaj familiamantaca pailla Testigo can. Paica: “Jehová ayudajpimi paita sirvingapaj tucui pudishcata ruranchij. Chaita yachashpaca ñucanchij familia mana Testigo cajpipish cushillami sintiri tucunchij” ninmi. Jehová Diosta mañashunchij, Bibliata liyishunchij, tandanacuicunaman rishunchij. Ñucanchij ima shina sintirishcataca shungumantami Jehová Diosmanca tucuita parlana canchij. Jehová Dios ñucanchijta cꞌuyashcata ricuchij versocunata liyishpami chaipi cutin cutin yuyana canchij. Huaquin huauqui panicunaca Salmo 27:10, Isaías 41:10 animaj versocunatami de memoria yachancuna. Cutin shujtajcunaca tandanacuicunapaj preparangapaj o Bibliata liyingapajca grabashca audiocunatami uyancuna. Chashnami paicunaca mana sololla sintirincuna. w21.06 págs. 9, 10 párrs. 5-8

¿Shuj cꞌuyashca familiata huañuipica imatataj rurana cangui? Cambaj feta sinchiyachingapajca Jehová Dios huañushcacunata causachishcatami Bibliapi liyina cangui. ¿Shinallataj shuj familiata congregacionmanta llujchijpica imatataj rurana cangui? Chaipajca Yayitu Dios paita mana cazujcunata imamanta corregishcatami Bibliapi estudiana cangui. Ima laya problemacunata charishpapish cambaj feta sinchiyachingapaj esforzari. Ima shina sintirishcatapish Jehová Diosman huillai. Huauqui panicunamantapish amataj caruyai (Proverbios 18:1). Llaquicunata charishpapish Jehová Diosta sirvishpa cati (Salmo 126:5, 6). Tandanacuicunaman rinata, huillanaman llujshinata, Bibliatapish liyinata amataj saqui. Shamuj punllacunapi Yayitu Dios sumaj bendicioncunata cunapipish yuyai. Pai ima shina ayudacushcata yachashpaca cambaj feca ashtahuanmi sinchiyanga. w21.11 págs. 23-25 párrs. 11, 17

¿Jesusta catijcunaca imapitaj uchilla huahuacuna shina can? Cai mundopi tiyaj gentecunapajca cullquiyujcuna, famosocuna, autoridadta charijcunami valishca can. Pero casi la mayoría Diosta sirvijcunaca mana chashnachu can. Chaimantami cai mundopaj gentecunaca Jesusta catijcunataca uchillacunata shina, imapaj mana valijcunata shina ricuncuna (1 Corintios 1:26-29). Pero Jehová Diospajca Jesusta catijcunaca valishcami can. Jesuspaj discipulocunaca Jesustaca: “Jahua pachamanta mandacujpica ¿maijanshi jatun cashun?” nishpami tapurcacuna. Chaimi Jesusca: ‘Huahuacuna shinami cana canguichij’ nirca (Mateo 18:1). Apostolcuna causashca punllamanta parlashpaca shuj yachaj runaca: “Chai punllapi caj judiocunaca paicunata alabachun, jatunyachichun, famoso cashcata shina ricuchun, paicunata respetachunmi munajcuna carca” ninmi. Achca judiocunaca shujtajcunata yalli cashcatami yuyajcuna carca. Chaimi Jesusca paita catijcuna humilde cangapaj esforzarina cashcata alli yacharca. w21.06 págs. 20-22 párrs. 2, 6, 8, 9

Apóstol Pabloca ancianocunapajca alli ejemplomi can. Por ejemplo, paica Tesalonicapi caj huauqui panicunatami consejarca. Pero paica manaraj consejota cushpaca cꞌuyaita ricuchishcamanta, Diosta sirvicushcamantami paicunataca felicitarca. Contracuna llaquichicushcata, shujtaj llaquicunatapish charishcataca allimi yacharca (1 Tesalonicenses 1:3; 2 Tesalonicenses 1:4). Shinallataj shujtajcunapajpish alli ejemplo cashcatami parlarca (1 Tesalonicenses 1:8, 9). Chaita yachashpaca Tesalonicapi caj huauqui panicunaca cushillami sintirishcangacuna. Apóstol Pablo paicunaman cꞌuyaita ricuchishcatapishmi ricushcangacuna. Chaimantami qꞌuipaca apóstol Pablo paicunata consejajpica alli chasquircacuna (1 Tesalonicenses 4:1, 3-5, 11; 2 Tesalonicenses 3:11, 12). w22.02 pág. 15 párr. 6

Panda religioncunaca cai mundopi tiyaj tucui llaquicunamantaca Yaya Diosmi culpata charin nishpami llullancuna. Shinallataj shuj huahua huañujpica Diosca jahua pachapi shuj angelta minishtishcamantami apan nishpami llullancuna. Chashnami Diabloca Jehová Diosta cꞌamishpa caticun. Pero ñucanchijca chaitaca mana crinchijchu. Ashtahuanpish ima ungüita charishpa o shuj familia huañujpica Yaya Diostaca mana culpanchijchu. Shinallataj Jehová Dios tucui llaquicunata tucuchinatami alli yachanchij. Chaimi tucuicunaman Jehová Diosca cꞌuyajmi can nishpa huillana canchij. Chaita rurajpica Jehová Diosca Diablo llulla cashcatami ricuchinga (Proverbios 27:11). Diosta sirvijcuna llaquicunata charijpi, paicunata catirashpa llaquichijpi, ima ungüita charijpica paipish llaquillami sintirin (Salmo 22:23, 24). Chaimantami tucui cai llaquicunataca Diosca tucuchisha nin (Éxodo 3:7, 8; Isaías 63:9 versocunata ricui). w21.07 pág. 10 párrs. 9, 10

Diosta cazujcunaca huiñaipaj Diosta cꞌuyana, adorana valishca regalotaca ñallami chasquingacuna. Jesuspish Adán Evamanta charishca llaquicunatami tucui tucuchinga. Jehová Diosca huañushcacunata causachishpaca cai paraíso Allpapi huiñaita causana oportunidadtami cunga (Lucas 23:42, 43). Cai paraíso Allpapi causaj gentecunaca jucha illaj tucushpaca Dios munashca shinami maravilla causaita charingacuna. Jehová Diosca cantaca achcatami cꞌuyan. Paica paraíso Allpapi causana esperanzata charijcuna paipaj familia cachunmi munan (Apocalipsis 7:9). Chaimanta Jehová Dios munashca shina causangapaj esforzarishpa catishunchij. Dios cusha nishcacuna yuyailla cada punlla causashunchij. Chashnami Yayitu Diosta huiñaita sirvina oportunidadta charishun. w21.08 pág. 7 párrs. 18, 19

Profeta Jeremiasca 40 huatacunata yallimi Jehová Diosmanta predicarca. Pero gentecunaca mana uyarcacunachu. Paicuna mana uyasha nijpi mana alli tratajpica Jeremiasca desanimarircami (Jeremías 20:8, 9). ¿Shinapish desanimarishca saquirinapaj randica paica imatataj rurarca? Paica gentecuna alli causaita charichunmi Jehová Diosmanta predicarca (Jeremías 29:11). Jehová paipaj shutimanta huillachun agllashcatapishmi yuyarirca (Jeremías 15:16). Cunan punllacunapish gentecunaca amsapi shinami causacuncuna. Ñucanchijca testigo de Jehová cashcamantami Jeremías shinallataj gentecunaman huillana canchij. Huillangapaj esforzarishpaca gentecuna uyajpipish mana uyajpipish mana desanimarishunchu. Chaimanta Bibliamanta yachacujcuna mana utca bautizarijpica mana desanimarinachu canchij. Chaipaj randica paicuna bautizaringacamami pacienciahuan shuyana canchij (Santiago 5:7, 8). w21.10 pág. 27 párrs. 12, 13

Jehová Diosta, Jesusta, Diospaj Gobiernota mana ricushpapish chaicunamanta alli investigashpami chaicuna tiyashcata crinchij. Pero mana ricushcacunapi ñucanchij feta mana sinchiyachijpica ñucanchij feca chiriyangami. Apóstol Pabloca feta chiriyachinataca jahualla urmachij juchami can nircami. Chaimanta ashalla tiempota, achca tiempota Diosta sirvicushpapish ñucanchij feta sinchiyachishpa catingapajmi esforzarina canchij. ¿Ñucanchij feta sinchiyachingapajca imatataj rurana canchij? (2 Tesalonicenses 1:3). Jehová Diosta paipaj espíritu santota cuchun cutin cutin mañashunchij. Espíritu santota chasquishpaca ñucanchij fetami tucuita ruraj Jehová Diospi ashtahuan sinchiyachishpa catishun (Gálatas 5:22, 23). Chaimanta Jehová Dios ñucanchijman espíritu santota cuchun, ñucanchij feta sinchiyachishpa ayudachun mañashpa catishunchij. Chashna mañajpica paica ayudangallami (Lucas 11:13; 17:5). Diospaj Shimita punllanta estudiashunchij (Salmo 1:2, 3). w21.08 págs. 18, 19 párrs. 16-18

Mayorlla huauqui panicunaca Diospaj organizacionpimi ayudai tucuncuna. Paicunaca ñaupa layaca manachari fuerzata charincuna. Shinapish paicunapaj experienciahuanmi ayudai tucuncuna. Bibliapica mayorlla huauqui panicuna Jehová Diosta sirvinata manataj saquishcatami parlan. Por ejemplo, Moisesca 80 huatacunata charishpami profeta tucurca. Shinallataj israelitacunata pushaj tucurca. Danielpish casi 90 huatacunata charishpapish Jehová Diostami profeta shina sirvishpa catirca. Apóstol Juanpish 90 yalli huatacunata charishpami Apocalipsis librota Jehová Diospaj ayudahuan quillcarca. Cutin Bibliapica “cashcata ruraj, Diosta manchaj” Simeonmantaca mana tanto parlanchu. Pero Jehová Diosca paitaca allimi rijsirca. Chaimantami Jesús huahuaraj cajpi Simeontaca ricuchun saquirca. Shinallataj Jesusmanta, paipaj mamamanta shuj profeciata huillachunmi ayudarca (Lucas 2:22, 25-35). w21.09 págs. 3, 4 párrs. 5-7

Yaya mamacunaca paicunapaj huahuacunataca shujtaj huahuacunahuanca mana comparanachu can. Imata mana rurai tucushcata rurachunca mana mañanachu can. Chaicunata rurachun mañajpica huahuacunaca desanimaringami (Efesios 6:4). Pani Sachikoca: “Escuelapica ñuca mamita: ‘alli notacunata llujchingui’ nijmi carca. Chaimi ñucaca examencunapi alli notata llujchingapaj achcata esforzarircani. Pero chashna esforzarishpapish mana tucuipi pajtachi tucurcanichu. Chaimantami achca huatacuna huashaman escuelamanta llujshishca cashpapish achcata esforzarishpapish Yayitu Diostaca mana cushichi tucuni nishpa yuyani” ninmi. Rey Davidca: “Ima jatun charinacunata japina yuyaitapish mana charishcanichu. Manapish ñucapaj cana ima jatunpi canatapish mana munashcanichu” nircami. Davidca humilde cashcamantami cushilla, tranquilo causarca (Salmo 131:2). Yaya mamacunapish David shinallatajmi humildes cana can. Chaimantami shujtajcunapaj ñaupajpi alli ricuringaraicullaca huahuacuna mana rurai tucushcata rurachunca mana mañana can. Ashtahuanpish huahuacunata paicuna imata rurai tucushcata rurachun mañajpica paicunaca chaita pajtachishpaca cushillami sintiringacuna. w21.07 págs. 21, 22 párrs. 5, 6

Jehová Diosca cada unotami paita sirvinata o mana sirvinata decidichun saquishca. Huaquin jovencunaca Jehová Diosta mana sirvij familia ucupi huiñashpapish Yayitu Diosta rijsishpaca paita sirvinataca manataj saquishcacunachu. Cutin shujtajcunaca Jehová Diosta sirvij familia ucupimi huiñashcacuna. Pero huiñashpaca Diosta sirvinatami saquishcacuna. Shinapish cada unomi Jehovata sirvinata o mana sirvinataca decidi tucuncuna (Josué 24:15). Chaimanta yaya mamacunaca paicunapaj huahuacuna Diosta sirvinata saquijpica mana culpables sintirinachu can. Maipica shuj yaya o mamami Jehová Diosta sirvinata saquincuna (Salmo 27:10). Huahuacunaca yaya mamacunapaj ejemplota catinatami munancuna. Pero paicuna Jehová Diosta sirvinata saquijpica huahuacunaca yallitajmi llaquilla sintirincuna. Cancunapaj yayata o mamata congregacionmanta llujchishca cajpica ñucanchijpish llaquillami sintirinchij. Jehová Diospish can ima shina sintirijtaca allimi yachan. Paica achcatami cꞌuyan. Cancuna paita sirvinata manataj saquijpica paica cushillami sintirin. Cancunapaj yaya mamacuna Jehová Diosta sirvinata saquishcamantaca cancunaca culpata mana charinguichijchu. w21.09 pág. 27 párrs. 5-7

Congregacionmanta llujchishcacunaca paicuna Jehová Diospaj amigo canata saquishcamantami cai oveja ungushca shina, shujtaj ovejacunata contagiai pudin (Santiago 5:14). Ima shinami shuj millai ungüica shujtajcunata contagian. Chashnallatajmi Yayitu Diospaj ñaupajpi jatun juchata rurashpaca shujtajcunata Diospaj amigo canamanta caruyachi tucuncuna. Chaimantami cashna huauqui panicunataca ancianocunaca congregacionmanta llujchina can. Chashna rurashpaca juchata rurajcunata Jehová Dios llaquishcatami ricuchincuna. Shinallataj jatun juchata rurajpish arrepintirishpa cutin Jehová Diosta sirvichunmi ayudancuna. Congregacionmanta llujchishcacunaca tandanacuicunaman rinataca manataj saquinachu can. Shinallataj paicunapaj feta sinchiyachishpami catina can. Chaipajca Jehová Dios cushca publicacioncunapi, JW Broadcasting^® programapimi yachai tucuncuna. Ancianocunaca congregacionmanta llujchishcacuna cambiocunata ruracujta ricushpaca paicunamanmi huaquin consejota cui tucuncuna. Chashna ayudajpica paicunaca cutinmi testigo de Jehová cai tucuncuna. w21.10 págs. 10, 11 párrs. 9, 11

Ima shinami punta siglopi Jesusta catijcuna Jehová Diosta sirvirca, chashnallatajmi Testigocunapish sirvinchij. Por ejemplo, punta siglopi Jesusta catijcunaca Diospaj organizacionta ñaupajman pushangapajca superintendentes viajantescuna, ancianocuna, siervo ministerialcunami tiyarca. Cunan punllapish Diospaj organizacionta ñaupajman pushangapajca testigo de Jehovacunaca chashnallatajmi ruranchij (Filipenses 1:1; Tito 1:5). Shinallataj punta siglopi Jesusta catijcunamanca Jehová Diosca matrimoniota valorana cashcata, yahuarta mana churarina cashcata, congregacionpipish maijan jatun juchata rurajpi, mana arrepintirijpica paicunata congregacionmanta llujshichichunmi mandarca. Jesusta catijcunaca chaitami pajtachijcuna carca. Cunan punllacunapica testigo de Jehovacunapish chaillatatajmi ruranchij (Hechos 15:28, 29; 1 Corintios 5:11-13; 6:9, 10; Hebreos 13:4). Bibliapica allimi intindichin shuj alli religionlla tiyashcata. Paicunami Jehová Diospaj munaita ruracuncuna (Efesios 4:4-6). Jehová Diospaj pueblopi cashcamanta, Jehová Diosta alli rijsishcamanta, paipaj munai maijan cashcata yachashcamantami cushilla sintirinchij. Chaimanta Jehová Dios munashca shina adorashpa catishunchij. w21.10 págs. 22, 23 párrs. 15-17

Mandaj Josafatca sinchi jarcaicunahuanmi chꞌimbapurarca. Paita, paipaj familiata, Judá llajtapi causajcunatami Amón, Moab, Seír llajtamanta mandajcunapaj soldadocunaca paicunata llaquichisha nircacuna (2 Crónicas 20:1, 2). ¿Josafatca imatataj rurarca? Paica Jehová Diostami fuerzasta cuchun mañarca. Pai ima shina Jehová Diosta mañashcataca 2 Crónicas 20:5 al 12-pimi ricui tucunchij. Chaipimi Yayitu Diospi tucui shunguhuan Josafat confiashcata yachai tucunchij. Jehová Diosca Josafat mañashcata cutichingapajca levita aillumanta Jahazielhuanmi cai punllapaj versopi cutichirca. Mandaj Josafatca contracunahuan macanacungapajca alli allichishca soldadocunataca mana ñaupachishpa cacharcachu. Ashtahuanpish Mandaj Diosta alabashpa cantajcunatami ñaupachishpa cacharca. Josafatca Diospi tucui shunguhuan confiashcamantami contracunataca misharca (2 Crónicas 20:18-23). w21.11 págs. 15, 16 párrs. 6, 7

Pruebacunata chꞌimbapurashpa Jehová Diosta sirvishpa catichunca paillatajmi ñucanchijta ayudanga (2 Corintios 4:7-9). Dios paipaj cꞌuyaita ricuchinata manataj saquinapimi siempre confiana canchij. Salmo librota quillcaj runaca: “Mandaj Diosca paita manchajcunamantaca paipaj ñahuitaca mana anchuchinchu. Paipaj llaquij cashcapi shunguta churajcunamantaca paipaj ñahuitaca mana anchuchinchu” nircami (Salmo 33:18-22). Ñucanchijtaca callari punllamantami Jehová Diosca cꞌuyashca. Pero paita rijsishcamanta, paita sirvi callarishca horasmantami Yayitu Diosca ñucanchijta cꞌuyanataca manataj saquishca. Chashna cꞌuyashcamantami Jehová Diosca paimanta amataj caruyachun cuidanga. Paipaj munai maijan cashcatapish ñucanchijpaj pajtachinga. Shinallataj paica ñucanchij alli causachunmi ayudanga (Salmo 46:1, 2, 7). Chaimanta ima problemacunahuan chꞌimbapuracushpapish Yayitu Dios ñucanchijman fuerzata cunataca manataj cungarinachu canchij. w21.11 pág. 7 párrs. 17, 18

Maipica casin la mayoría gentecunami paicunata trabajopi, escuelapi o familia llaquichijpica achca huatacunata resentirishca saquirincuna. Josepaj huauquicunapi yuyashun. Paicunaca Joseta pꞌiñai callarishpaca mana allitami rurarcacuna (Génesis 37:2-8, 25-28). Pero Joseca paicunataca mana tigra llaquichircachu. Pai autoridadta charishpaca paipaj huauquicunata llaquichinapaj randica cꞌuyaita ricuchishpami ayudarca. José chashna cꞌuyaita ricuchina horasca Levítico 19:18-ta manaraj quillcashcacunachu carca (Génesis 50:19-21). Diosta sirvijcunaca Jehová Diosta jatunyachingapajca Josepaj ejemplotami cati tucunchij. Ñucanchijta pi llaquichijpi resentirishca saquirinapaj randi o tigra llaquichinapaj randica paicunatami perdonana canchij. Jesusca ñucanchijta llaquichijpi paicunata ima shina perdonanata yachachirca (Mateo 6:9, 12). Apóstol Pablopish Diosta sirvijcunamanca cai consejotami nirca: ‘Ñuca cꞌuyashcacuna, cancunata llaquichijcunataca cancunallatajca ama llaquichishun nichijchu’ (Romanos 12:19). w21.12 págs. 11, 12 párrs. 13, 14

Huata 33, 14 de nisán tutapica Jesusca Olivocuna tiyan urcupimi Jehová Diostaca shungumanta mañarca (Lucas 22:39-44). Paica chai sinchi horaspica ‘jatunta caparishpa, huacashpa, rogashpami Diosta mañarca’ (Hebreos 5:7). ¿Imatataj Jesusca mañarca? Paica Jehová Diosta sirvingapaj, paipaj munaita pajtachingapaj fuerzasta cuchunmi mañarca. Jehová Diosca paipaj Churi mañashcata uyashpami shuj angelta cachashpa paita sinchiyachirca. Jesusca Diospaj shutita jatunyachingapajca huacashpa Jehová Diostaca ayudachunmi mañarca. Jesuspajca Diospaj shutita jatunyachina, paita cazunami tucuimanta valishca carca. Chaimantami Jehová Diosca pai mañashcata uyarca. Chashna mañajpica ñucanchij mañashcacunatami Yayitu Diosca uyanga (Salmo 145:18). w22.01 págs. 17, 18 párrs. 15-17

Achca gentecunaca testigo de Jehovacuna politicacunapi mana chagrurijpi, gobiernocunata agllangapajpish votocunata mana cujpimi ñitcarincuna. Pero ñucanchijca cai Allpapi mandaj gobiernocunata apoyashpaca Jehová Diospaj Gobiernota mana apoyacushcatami ricuchishun (1 Samuel 8:4-7). Cutin shujtajcunaca: “Testigo de Jehovacunaca hospitalcunata, escuelacunatami shayachina can. Mana cashpaca shujtaj ruraicunahuanmi gentecunata ayudana can” nishpami ñitcarincuna. Shinallataj ñucanchij predicanallata punta lugarpi churajpi, cai mundopi tiyaj problemacunata allichingapaj mana chagrurijpimi paicunaca ñitcarincuna. ¿Ama ñitcaringapajca imatataj rurana canchij? (Mateo 7:21-23). Jesús mingashcata pajtachina tucuimanta yalli valishca cashcatami yuyarina canchij. Testigo de Jehovacunaca gentecunataca achcatami cꞌuyanchij. Paicunapaj problemacunamantapishmi preocuparinchij. Pero ñucanchijca cai mundopi tiyaj problemacunata allichinapaj randica Jehová Dioslla paipaj Gobiernohuan allichinatami huillanchij. Chashnami gentecuna Jehová Diospaj amigocuna cachun ayudanchij. w21.05 pág. 7 párrs. 19, 20

Huaquin gobiernocunaca Diostami sirvinchij nishpapish paicunapaj mandanataca mana saquisha nishcacunachu. Jesuspaj punllacunapica Jesusta apoyajpimi Diosta sirvijcunataca catirashpa llaquichircacuna. Cunan punllacunapish Jesusta apoyajpimi Diosta sirvijcunataca catirashpa llaquichincuna (Hechos 4:25-28). Huaquin gentecunaca Jehová Diospaj Gobiernomantaca mana uyasha nincunachu. Jehová Diosca Salmo 2:10 al 12-pica: “Cunanca jatun mandajcuna alli yuyaita japichij. Cai pacha juezcunapish ñuca cunashcata uyaichij. Mandaj Diospajtaca manchaihuan ruraichigari. Chujchushpa cushicuichigari. Pai pꞌiñarishpa cancunapaj causaita ama chingachichun paipaj Churita alli nichij. Pai pꞌiñarishpaca mana saquingachu. Paipi shunguta churajcunaca cushichishcami canga” ninmi. Jehová Diosca cꞌuyaimantami paipaj Gobierno parte tucuchun cai laya gentecunamanca tiempota cun (Isaías 61:2). Chaimantami gentecunataca Jehová Diosta sirvichun, paipaj Gobiernota apoyachun utca ayudana canchij. w21.09 págs. 15, 16 párrs. 8, 9

Apóstol Pabloca imalla minishtirishca cosascunahuan cushilla causai tucushcatami nisha nicurca (Filipenses 4:12). Jehová Dioshuan alli apanacunami tucuimanta yalli valishca cana can (Habacuc 3:17, 18). Cunanca 40 huatacunata shitashca pambapi purishca qꞌuipa, israelitacunaman Moisés imata nishcata ricushun. Paica: “Mandaj Dios, cancunapaj Taita Diosca cancuna imata ruranapipish allimi nishcami. Cai tucui chuscu chunga huatatami Mandaj Dios cancunapaj Taita Diosca cancunahuan cashca. Paica cancunataca ima mana illajtami pushamushca” nircami (Deuteronomio 2:7). Casi 40 huatacunatami Jehová Diosca israelitacunamanca maná nishca micunata cararca. Paicuna churashca ropacunapish Egipto llajtamanta llujshishca qꞌuipaca mana ima rato maucayarcachu (Deuteronomio 8:3, 4). Ñucanchijpish imalla minishtirishca cosascunata cushcamanta, Jehová Diosta agradicijpica paica cushillami sintiringa. w22.01 págs. 4, 5 párrs. 10, 11

Cusacunaca familiata mantiningapaj, paicunata cuidangapajmi esforzarina canguichij. Chaimanta ima problemacuna ricurijpica cancunalla allichinapica ama yuyaichijchu. Ashtahuanpish Jehová Diosta mañashpa paipaj ayudata mashcaichij. Shinallataj cambaj huarmihuanpish Yayitu Diosta mañaichij. Imata decidingapajpish Bibliapi, publicacioncunapi Diospaj organizacionpi mashcaichij. Consejocunata tarishpaca cancunapaj causaipi pajtachichij. Maipica huaquin gentecunaca cancuna Biblia nishca shina decidijpica paicunaca mana de acuerdo cangacunachu. Tal vez paicunaca familiata cuidangapajca achca cullquita, achca cosascunatami charina canguichij ningacunachari. Pero Jehová Diospi mandaj Josafat confiashcamanta paita ima shina Dios ayudashcatami yuyarina canguichij (2 Crónicas 20:1-30). Diosca mandaj Josafattaca manataj saquircachu. Cancunatapish chashnallataj manataj saquingachu (Salmo 37:28; Hebreos 13:5). w21.11 págs. 15, 16 párrs. 6, 8

Diosman rijchaj cashcamantami tucuicuna allita rurachun, cashcata rurachun munanchij (Génesis 1:26). Pero maipica juchayuj cashcamantami pita juzgashpaca pandarinchij. Jonaspi yuyashunchij. Jehová Dios ninivitacunata perdonajpica Jonasca dimastijmi pꞌiñarirca (Jonás 3:10–4:1). Jonás pꞌiñarijpipish Jehová Dios perdonajpimi 120.000 ninivitacuna quishpirircacuna. Chaita yachashpaca Jonás pandarishca cashcatami intindinchij. Jehová Diosca mana pandarishcachu carca. Jehová Diosca imamanta pai imata decidishcata ñucanchijman huillana obligaciontaca mana charinchu. Ñaupa punllacunapica Jehová Diosca imata decidingapaj o imata rurangapajca paita sirvijcunatami maipica tapuj carca (Génesis 18:25; Jonás 4:2, 3). Shinallataj paica maipica imata decidishcatami paicunaman intindichij carca (Jonás 4:10, 11). Paica Tucuita Rurajmi can. Chaimantami ñucanchijca “Jehová Diosca caita o chaitami rurana can” nishpa mandana derechotaca mana charinchij (Isaías 40:13, 14; 55:9). w22.02 págs. 3, 4 párrs. 5, 6

Huahuacuna shina cangapajca shujtajcuna ñucanchijta yalli cashcatami yuyana canchij (Filipenses 2:3). Chashna humilde cangapaj esforzarishpaca shujtajcunataca manataj ñitcachishunchu. Huauqui panicunapaj alli cualidadcunata ricushpaca paicuna ñucanchijta yalli cashcatami cuentata cushun. Chaimanta apóstol Pablo ima nishcatami yuyarina canchij. Paica: “¿Pitaj cantaca caishujta yalli jatunyachin? ¿Can charishcacunataca manachu tucuita Dios cushca? Pai cushcallata charishpaca ¿ima nishpataj canllataj charishca shina jatun tucungui?” nircami (1 Corintios 4:7). Chaimanta imata ruranata yachashpapish shujtajcuna ñucanchijta jatunyachichunca mana saquinachu canchij. Shuj huauquica alli conferenciacunata cushpa o shuj pani Bibliamanta achca yachacujcunata charishpaca siempremi Jehová Diosta jatunyachina can. w21.06 pág. 22 párrs. 9, 10

Achca huauqui panicunapajca huasin huasin predicanaca sinchimi can. Huaquin huasicunapica timbrecunami tiyan. Cutin shujtaj jatun huasicunapica guardiacunami pungupi cuidancuna. Chaimantami huasiyujcuna mana pasachun nijpica mana huillai tucunchij. Maijan huauqui panicunaca caru lugarpi, ashalla gentecuna tiyan lugarpimi huillanaman rincuna. Pero chaiman chayajpica maipica gentecunaca huasipi mana canchu. Gentecuna huasipi cai horasmi predicana canchij. Chaita yachashpami maijan huauqui panicunaca chishi lado o amsayai horas predicancuna. Chai horasmi ashtahuan gentecunaca huasicunapi tiyan. Tal vez paicunaca huasipi cashcamantami parlangapajpish tiempota charingacuna. w21.05 pág. 15 párrs. 5, 7

¿Cunan punllacunapish gentecunaca imatataj yuyancuna? Achca gentecunaca testigo de Jehovacuna cumpleaños fiestata, navidadta, shujta fiestacunata mana rurajpimi pꞌiñarincuna. Shujtajcunaca cada llajtapaj fiestacunata mana rurajpi, huañushcacunata pambangapaj costumbrecunata mana catijpimi pꞌiñarincuna. Tal vez cai panda costumbrecunata catijcunaca Diosmi caitaca chasquinga nishpami yuyangacuna. Pero Biblia yachachishcacunata mana catijpica Jehová Diosca paicunataca mana chasquingachu (Marcos 7:8, 9). ¿Ama ñitcaringapajca imatataj rurana canchij? Jehová Diosta, paipaj mandashcacunatami cꞌuyana canchij (Salmo 119:97, 113, 163-165). Jehová Diosta shungumanta cꞌuyashpaca mana alli costumbrecunapica manataj participashunchu. Ashtahuancarin Jehová Diosllata sirvina tucuimanta valishca cashcata ricuchishun. w21.05 pág. 6 párrs. 15, 16

¿Ima shinataj apóstol Pablopaj consejota pajtachi pudinchij? Ñucanchij fe sinchi cachunca Bibliatami cada punlla estudiana canchij. Jehová Diostami mañana canchij. Dios mingashcapipish ocupadosmi pasana canchij (2 Timoteo 4:4). Ñucanchij fe sinchi cajpica ima llullacunata uyashpapish mana mancharishunchu (Isaías 28:16). Jehová Diosta, huauqui panicunata cꞌuyashpa, Diospaj Shimita cazushpaca contracuna llullacunata nijpipish Jehová Diosmantaca manataj caruyashunchu. Jesús cai Allpapi cajpica achcacunami ñitcarishpa Jesusta mana catircacuna. Pero shujtajcunaca Jesustami catircacuna. Caicunamanta shujca Arimateamanta José shuti mandajmi carca. Caishujcunaca achca sacerdotecunami carca (Hechos 6:7; Mateo 27:57-60; Marcos 15:43). Cunan punllacunapish achca millón gentecunaca Biblia yachachishcacunata alli intindishcamantami Jesusta cati callarishcacuna. Bibliapica: “Quiquin cushca mandashcacunata cꞌuyajcunaca, sumajta causanatami achcata charincuna. Ima ñitcarinaca paicunapajca mana tiyanchu” ninmi (Salmo 119:165). w21.05 pág. 13 párrs. 20, 21

Apóstol Pabloca Jehová Dios paipaj espíritu santohuan ayudajpimi contracuna llaquichijpipish, carcelpi cashpapish, problemacunata charishpapish Jehová Dios mingashcataca pajtachi tucurca. Joven Timoteopish Jehová Dios ayudajllapimi paiman mingashcata pajtachi tucurca. Por ejemplo, Timoteoca Pablotaca huaquin llajtacunapi huillangapajmi acompañarca. Shinallataj Pabloca Timoteotaca huaquin congregacioncunata visitashpa animachunmi mingarca (1 Corintios 4:17). Chaimi Timoteoca tal vez cai mingashcacunataca mana pajtachi tucushachu nishpa yuyashcanga. Chaimantachari apóstol Pabloca: “Pajta cantaca, huambrami nishpa pi rimanman” nirca (1 Timoteo 4:12). Timoteoca chai punllacunapica casi siempremi ungushca pasaj carca (1 Timoteo 5:23). Pero paica cai llaquicunata, jarcaicunata charishpapish Dios mingashcacunata pajtachingapaj, huauqui panicunata animangapaj Jehová fuerzasta cunataca allimi yacharca (2 Timoteo 1:7). w21.05 págs. 21, 22 párrs. 6, 7

Piman consejota cugrishpaca Santiago 1:19-pi ima nishcatami yuyarina canchij. Chaipica: “Chaimanta ñuca cꞌuyashca huauquicuna, imatapish uyanataca alli uyaichij. Manaraj alli yuyarishpaca ama rimaichijchu, ama utca pꞌiñarichijchu” ninmi. Chaimanta shuj ancianoca huauqui panicunata manaraj consejashpaca paicuna ima shina sintirishcata, ima tucushcatami tapuna can. Paicuna parlajpica allimi uyana can. Proverbios 18:13-pica: “Manaraj uyashpa imatapish cutichijca, upa cashca ricurishpa pingai tucunllami” ninmi. Ancianocunaca versocunata manaraj liyishpaca: “¿Imanallataj cangui? ¿Imanallataj sintiringui? ¿Ima shinataj ayudai tucuni?” nishpami tapui pudincuna. Ancianocunaca huauqui panicunamanta chashna preocuparishpaca paicunata ayudashpami animangacuna. Huauqui panicunata animangapajca versocunallata liyishpa o consejocunata cushpallaca mana saquirinachu canchij. Huauqui panicunaca paicunamanta preocuparichun, paicunata intindichun, ayudachunmi minishtincuna. w22.02 pág. 17 párrs. 14, 15