Junio

Cai viudapaj causaica sinchimi can. Causangapajpish cullquitaca casi mana charinchu. Pero cashna mana charishpapish paica Diospaj templopi tiyaj cajapimi ishqui uchilla moneditacunata cun. Chai ishqui monedacuna uchilla cashcamantami tal vez mana chꞌilin nin. Pero Jesusca cai ishqui monedacuna ishqui leptón cashcataca allimi yachan. Chai tiempopica chai cullquica casi imapaj mana valijchu carca. Chaimantami shuj pajarota randingapajllapish mana alcanzaj carca. Jesusca cai viuda huarmi imata rurashcata ricushpaca mancharishcami saquirin. Chaimi paica paipaj discipulocunataca cai huarmi imata rurashcata shamuichij ricunguichij nishpaca: ‘Cai huajcha viudami, ofrendataca tucui shujtajcunamanta yallita churan. Tucui caishujcunaca achcata charishpapish, puchushcallatami churancuna. Ashtahuanpish paica, huajcha cashpapish, pai causanapaj tucui charishcatamari churan’ nirca. (Marcos 12:43, 44). Cai huajcha viuda huarmica chashna cullquita churashpaca Jehová paita ayudanapi, cuidanapimi confiarca (Salmo 26:3). w21.04 pág. 6 párrs. 17, 18

Jesusca cai Allpapi cashpaca cushicushpami huillashpa catirca. Paita catijcunapish cushilla huillashpa catichunmi munan (Juan 4:35, 36). Jesús cai Allpapi paipaj discipulocunahuan huillajpica paicunaca cushillami huillashpa catircacuna (Lucas 10:1, 5-11, 17). Pero Jesusta huañuchingapaj japijpica paipaj discipulocunaca desanimarircacunami (Juan 16:32). Cutinmi Jesusca pai causarishca qꞌuipaca paita catijcuna cushicuihuan huillashpa catichun animarca. Jesuspaj discipulocuna cushilla huillashpa catijpimi contracunaca cai punllapaj versopi nishcata nircacuna. Apostolcunataca Jesusmi predicashpa catichunca ayudarca. Jehová Dios bendiciashcamantami achca gentecunaca Diosmanta yachai callarircacuna. Por ejemplo, huata 33 Pentecostés punllapica 3.000 gentecunami bautizarircacuna (Hechos 2:41). Chai qꞌuipaca ashtahuan gentecunami Jesusta cati callarircacuna (Hechos 6:7). Jesusca: ‘Tucuri punllacunapipish achcacunami ñucata catingacuna’ nircami (Juan 14:12; Hechos 1:8). w21.05 pág. 14 párrs. 1, 2

Bibliamanta yachai callarishpaca cushillami sintirircanchij. Chaimantami ñuca amigocunapish, familiacunapish Bibliamanta yachashpaca cushillami causangacuna nishpa yuyarcanchij (Salmo 119:105). Ña yachai callarishpaca amigocunaman, familiacunamanmi ñucanchij ima yachashcacunataca parlarcanchij. Pero paicuna mana uyasha nijpica llaquillami sintirishcanchij. Gentecuna mana uyasha nijpica mana mancharinachu canchij. Jesús cai Allpapi cashpaca Jehová Diospaj ayudahuanmi achca milagrocunata rurarca. Chaita rurajpipish achca gentecunaca mana Jesuspaj discipulocuna tucurcachu. Por ejemplo, Jesús Lazarota causachijpica paipaj contracunaca chai milagrota rurashcatami cuentata curcacuna. Chaita ricushpapish Jesús Mesías cashcataca mana crisha nircacunachu. Ashtahuancarin Jesustapish, Lazarotapishmi huañuchisha nircacuna (Juan 11:47, 48, 53; 12:9-11). w21.05 pág. 2 párrs. 1, 2

Tucui tandanacuicunaman ringapajmi esforzarina canchij. Chaipimi caishujmanta chaishujmanta animanacunchij, huauqui panicunatapish ashtahuan rijsinchij. Huauqui panicuna mana ñucanchij edad cajpi o shujtaj culturamanta cajpi paicunahuan alli apanacungapaj esforzarishunchij. Bibliapica: “Yuyajcunami alli yachaita charincuna” ninmi (Job 12:12). Pero mayorlla huauqui panicunapish jovenlla huauqui panicunamantami yachai tucuncuna. Davidca Jonatanpaj qꞌuipa cashpapish paihuanmi alli amigo tucurca (1 Samuel 18:1). Paicunaca sinchi llaquicunata charishpapish ishquindijmi Jehová Diosta sirvishpa catingapaj apoyanacurcacuna (1 Samuel 23:16-18). Pani Irinaca familiamantaca paillami Testigo can. Paica: “Jehová Diosca ñucanchijmanca turi ñañacunatami shuj familiata shina cun. Chashnami Jehová Diosca tucuicunata cuidan” ninmi. Ñucanchij amigocunaca ñucanchijta ayudanatami munancuna. Pero paicuna ayudachunca ñucanchij ima shina sintirishcata, ima problemacunahuan cashcatami huillana canchij. w21.06 págs. 10, 11 párrs. 9-11

Jesusca cai chꞌimbapuraitami parlarca. Shuj jatun mandajca shuj esclavotami charirca. Chai esclavo achca cullquita debijpi paiman mana pagai tucujpica mandajca paitami perdonarca. Pero qꞌuipaca cai esclavoca caishuj esclavo ashalla cullquita debijpipish paitaca mana perdonasha nircachu. Chaimi jatun mandajca mana perdonaj esclavotaca pꞌiñarishpa carcelpi churarca. Cai millai esclavoca paillatajmi llaquipi urmarca. Shujtajcunatapishmi llaquichirca. Cai millai esclavoca paipaj compañerotaca ashalla cullquita mana pagasha nijpimi paica prezupi churachun mandarca. Caita yachaj chayashpaca shujtaj esclavocunapish achcatami llaquirircacuna (Mateo 18:30, 31). Ñucanchijpish shuj huauqui o pani ñucanchijta mana alli tratajpi paicunata mana perdonashpaca chai millai esclavo shinami cashun. Paicunata mana perdonashpaca paicunatami llaquichishun, cꞌuyaitapish mana ricuchishun. Maipicarin mana rijsishcata shinami tratashun. Chaita ricushpami shujta huauqui panicunapish llaquilla sintiringacuna. w21.06 pág. 22 párrs. 11, 12

Jehová Diosca runacunataca paiman rijchajtami rurarca. Pero Diabloca mana allicunata rurachunmi pandachin. Noepaj punllacunapica gentecuna millaita rurashcata ricushpaca Diosca shungupi nanarishpami llaquirirca (Génesis 6:5, 6, 11). ¿Chai punllamanta cunancamaca gentecunaca cambiashcachu? Mana. Diabloca shuj cꞌarihuan shuj huarmihuan huainayashpa o huarmipura, cꞌaripura huainayashpa causachunmi achca gentecunataca pandachishpa caticun (Efesios 4:18, 19). Diosta sirvijta huainayana trampapi urmachishpacarin Diabloca achcatami cushicun. Runacunaca paicunapura mandashpapish cai Allpapi tiyaj animalitocunata, Allpataca Jehová Dios munashca shinaca mana cuidashcacunachu (Eclesiastés 8:9; Génesis 1:28). Huaquin cientificocunaca runacunapaj culpamantami catij huatacunapica achca animalitocuna huañunga nincunami. w21.07 pág. 12 párrs. 13, 14

Maijan huauqui panicunaca ñaupa punllacunapi jatun juchacunata rurashcamantami llaquilla sintirincuna. Paicunaca ñucanchij arrepintirijpipish Diosca mana nunca perdonangachu nishpami yuyancuna. Pero can chashna sintirishpaca Jehová canta cꞌuyanata manataj saquinatami intindina cangui. Chaita rurashpaca tranquilomi sintiringui. Ñucanchij yuyaipi chuya, cushillami Jehová Diosta sirvi tucunchij. Bibliapica: “Paipaj Churi Jesucristopaj yahuarmi, ñucanchij tucui juchacunataca pꞌichan” ninmi (1 Juan 1:7). Ñaupa punllacunapi ima juchata rurashca cashpaca ñucanchij chai juchacunamanta arrepintirijpi Yayitu Dios ñucanchijta perdonangapaj listo cashcatami intindina canchij. Salmo librota quillcaj Davidca Dios cꞌuyanata manataj saquinamanta, pai perdonaj cashcamanta parlashpaca paica: “Paita manchajcunapajca, cai pachamanta jahua pachacamami, pai llaquij cashcataca jatunyachirca. Inti llujshinmanta, inti huashicuncamaca yallitaj carumari. Chai shinallatajmari ñucanchij mana cazushcacunatapish caruyachirca” nircami (Salmo 103:11, 12). w21.11 págs. 5, 6 párrs. 12, 13

Diosta sirvij cusacunaca paicunapaj huarmicunataca cꞌuyaihuan, allimi tratana can (1 Pedro 3:7). Paicunapaj huarmicunata valorashpa, paicuna mana rurai tucushcata mana mañashpa, shujtaj huarmicunahuan mana comparashpami paicunata respetashcata ricuchincuna. Pani Rosataca mana Testigo cusaca siempremi shujtaj huarmicunahuan comparanata yachan. Paipaj cusa sinchi shimicunahuan tratajpimi pani Rosaca imapaj mana valishca shina sintirin. Chaimantami paica: “Jehová Dios ñucata cꞌuyashcata siempre yuyachichun minishtini” nin. Pero Diosta sirvijcuna paicunapaj huarmicunata alli tratashpaca paicunahuanpish, Jehová Dioshuanpish allimi apanacuncuna. Alli cusacunaca paicunapaj huarmicunamantaca shujtajcunamanca allicunatami nincuna. Paicunaca ñucapajca valishcami canguichij nishpami cꞌuyaita ricuchincuna. w21.07 pág. 22 párrs. 7, 8

Caipi yuyashunchij. Maipica ñucanchij ima randishcata rato cachachunmi munanchij. Pero mana utca chayajpica tal vez preocuparishunmi. Ñucanchij randishca imamanta mana utca shamujta yachashpa, ñalla chayamunata yachashpaca pacienciahuanmi shuyashun. Proverbios 13:11-pica imamanta pacienciata charina cashcatami yachachin. Chaipica: ‘Rato charijyajcunaca, japishcahuanmi rato chingachincuna. Pero asha asha trabajashpa japijcunaca ashtahuanmi mirachincuna’ ninmi. ¿Caimantaca imatataj yachanchij? Imapish alli llujshichunca pacienciahuanmi asha asha pajtachina canchij. Proverbios 4:18-pica: “Ashtahuanpish cashcata rurajcunapaj causaica, pacarijpi achijlla inti llujshishpa, chaupi punllayajpi ashtahuan achijlla tucuj shinami” ninmi. Cai shimicunaca Yayitu Jehová Dios paipaj puebloman asha asha paimanta yachachishcatami ricuchin. Shinallataj cai versoca maijan Yayitu Diosmanta yachashpa, paipaj causaipi asha asha cambiocunata rurashpa Diosta sirvishcatami ricuchin. w21.08 págs. 8, 9 párrs. 1, 3, 4

Tucuri punllacuna cꞌuchuyamucushcamantami achca huauqui panicunaca Diosta ashtahuan sirvingapaj esforzaricuncuna (Mateo 24:14; Lucas 10:2; 1 Pedro 5:2). Por ejemplo, huaquincunaca precursores cangapaj, Betelpi sirvingapaj, Diospaj Tandanacuna Huasicunata shayachishpa, allichishpa trabajangapajmi metacunata churacuncuna. Shinallataj maijan huauquicunaca siervo ministerial cangapaj, anciano cangapajmi esforzaricuncuna (1 Timoteo 3:1, 8). Jehová Diosca huauqui panicuna paita sirvingapaj esforzarijta ricushpaca de verastij cushillami sintiringa (Salmo 110:3). Pero ima metacunata mana pajtachishcamantachari maipica desanimados sintirinchij. Chashna sintirishpaca ima shina sintirishcata Jehová Diosman parlashunchij (Salmo 37:5-7). Shinallataj experienciata charij huauquicunata imapi mejoranata tapushunchij. Paicuna consejajpica chaita pajtachingapaj esforzarishunchij. Chaita rurashpaca ñucanchij churashca metacunatami pajtachi tucushun. w21.08 págs. 20, 21 párrs. 1, 4

Ana huarmica profetami carca. Paica 84 huatacunata charishpa, viuda cashpapish Diospaj templopimi siempre pasaj carca. Diosca Anataca Jesús huahuaraj cajpi paita ricuchunmi saquirca (Lucas 2:36-38). Cunan punllacunapish mayorlla huauqui panicunaca jovenlla huauqui panicunapajmi alli ejemplocuna can. Mayorlla huauqui panicunaca Diospaj organizacionpi sirvishpami alaja experienciacunata charishcacuna. Paicunamanta yachashpaca ñucanchijca cushillami sintirishun. Mayorlla huauqui panicunaca Jehová Diospajpish, paipaj organizacionpajpish valishcami can. Paicunaca Yayitu Dios paipaj organizacionta ima shina bendiciashcatami ricushcacuna. Pandarishpapish imapi mejoranatami yachashcacuna. Paicunapaj alli experienciacunamanta yachangapaj esforzarishunchij (Proverbios 18:4). Paicunata ashtahuan alli rijsishpaca ñucanchij fetami sinchiyachishun. w21.09 págs. 3-5 párrs. 4, 7, 8, 11, 13

Diospaj puebloman yaicujcunaca alli cualidadcunatami charincuna. Paicunapaj alli ruraicunahuanmi Diospaj obrata apoyacuncuna. Chashnami paicunaca: “Llajtacunapaj lechetamari chuchunguichij” nishca profeciata pajtachicuncuna (Isaías 60:5, 16). Cashna huauqui panicunahuanmi 240 llajtacunapi Yayitu Diosmanta huillai tucushcanchij. Shinallataj publicacioncunatapish mil yalli shimicunapimi traducicunchij. Cunan punllacunapica llajtacunatami chujchuchisha nishca profeciaca gentecuna alli decidichunmi ayudacun. ¿Gentecunaca Diospaj Gobiernotachu apoyangacuna? ¿O cai mundopi tiyaj gobiernocunapichu confiangacuna? Diosta sirvijcunaca cai Allpapi tiyaj leycunataca cazunchijmi. Pero politicapica mana chagrurinchijchu (Romanos 13:1-7). Allimi yachanchij Diospaj Gobiernolla tucui llaquicunata tucuchina cashcata. Cai Gobiernoca mana cai mundopajchu can (Juan 18:36, 37). w21.09 págs. 17, 18 párrs. 13, 14

Shuj cꞌuyashca amigo, familia Jehová Diosta sirvinata saquijpica cancunapaj feta sinchiyachingapaj esforzari. ¿Chaipajca imatataj rurana cangui? Cada punlla Bibliata liyishpa, liyishcapipish cutin cutinmi yuyana cangui. Shinallataj tandanacuicunamanpishmi rina cangui. Pani Joannapaj ejemplopi yuyashun. Paipaj yaya, paipaj ñañaca Jehová Diosta sirvinatami saquirca. Pani Joannaca: “Ñucaca Abigailpaj, Esterpaj, Jobpaj, Josepaj, Jesuspaj ejemplomanta yachashpami tranquila sintirini. Paicunapaj ejemplomi ñuca yuyaipipish ama dimastij llaquilla sintirichun ayudan” ninmi. Can yallitaj sustarishca cashpaca Jehová Diosta mañanata amataj saqui. Imatapish alli yuyangapaj, alli decidingapaj Jehová Diosta ayudachun mañai (Salmo 32:6-8). Maipica dimastij llaquilla sintirishcamantami Jehová Diosman tucuita parlanaca sinchi can. Pero Yayitu Diosca can ima shina sintirijtaca allimi yachan. Chaimantami can ima shina sintirishcatapish shungumanta parlachunmi munan (Éxodo 34:6; Salmo 62:7). w21.09 pág. 28 párrs. 9, 10

Huata 32 pascua qꞌuipaca Pedro, Santiago, Juanca Jesús shujtajyarijtami shuj muscuipi shina ricurcacuna. Paicunaca tal vez Hermón urcupimi cashcangacuna. Jesusca paicunapaj ñaupajpimi shujtaj laya tucurca. Bibliapica: “Paipaj ñahuica inti shina achijnicuj, paipaj jahua churanapish luz shina achijnicujmi tucurca” ninmi (Mateo 17:1-4). Apostolcunaca Jehová Dios ima nijtami uyarcacuna. Diosca: “Caimi, ñuca cꞌuyashca Churi. Paipimi cushicuni. Paita uyaichij” nircami. Cai quimsa apostolcunaca Jesús ima yachachishcatami paicunapaj causaipi pajtachishcata ricuchircacuna. Ñucanchijpish chashnallatajmi paicunapaj ejemplota catisha ninchij. Jehová Dios paipaj Churihuan paipaj pueblota yachachicushcamantami achcata agradicinchij (Efesios 5:23). Pedro, Santiago, Juanca Jesús ima yachachishcatami pajtachircacuna. Ñucanchijpish chaillatatajmi rurasha ninchij. Huiñai causaiman apaj quichqui ñanpi purishpaca achca bendicioncunatami chasquishun, shamuj punllapicarin huiñaitami cushilla causashun. w21.12 págs. 22, 27 párrs. 1, 19

Corinto llajtapi Diosta sirvij runaca paipaj yayapaj huarmihuanmi huainayashpa causaj carca. Apóstol Pabloca cai runataca congregacionmanta llujshichichunmi mandarca. ¿Imamanta? Huaquin huauqui panicunaca Diosta sirvij runa jatun juchata rurajpica ñitcarircacunami. Cutin shujtajcunacarin chaitaca normalta shinami ricui callarircacuna (1 Corintios 5:1, 2, 13). Asha tiempo qꞌuipaca apóstol Pabloca congregacionpi jatun juchata ruraj runa arrepintirishcatami yachaj chayarca. Chaimi Apóstol Pabloca ancianocunataca paita ama yallitaj llaquichinguichij nircami. Pabloca: “Paitaca perdonashpa cushichinami canguichij” nircami. Apóstol Pabloca Diosta sirvij runa llaquilla sintirishcataca allimi yacharca. Jehová Diospaj ayudata, huauqui panicunapaj ayudata mashcachunmi Pabloca ayudarca (2 Corintios 2:5-8, 11). Jehová Diosca llaquij Diosmi can. Ancianocunapish chashnallatajmi llaquij cancuna. Maijan huauqui panicuna paicunata corregichun minishtijpica ancianocunaca cꞌuyaihuanmi paicunata corregincuna. Pero paicuna arrepintirijpica congregacionpi catichunmi saquincuna. Jatun juchata ruraj huauquita o panita congregacionmanta mana llujchijpica paicunaca juchata rurana normalta layami ricungacuna. Chashna ama tucuchunmi mana arrepintirij huauqui panicunataca congregacionmanta llujchina can. w21.10 págs. 11, 12 párrs. 12-15

Pi ñucanchijta llaquichijpi dimastij resentirishca saquirinaca shuj jatun chugri o mana tanto chugri shinami can. Por ejemplo, tal vez canchari silluta cortauñashuan utucushpaca dedota ashata chugrichingui. Tal vez asha punllacunataca nananmi, pero qꞌuipataca cungaringuichari. Chashnallatajmi shuj amigo ñucanchijta mana yuyashpa llaquichijpica tal vez chai ratoca ñucanchijca ashata llaquirinchij. Pero qꞌuipaca perdonashpami cungarinchij. Shinapish achcata chugririshpaca tal vez ñucanchijca doctorpajmanmi rina tucunga. Doctormi chugrita sirashpa o vendashpa cachan. Chugripi cada rato tuparijpica ashtahuanmi anchayanman. Chashnallatajmi maijan paita llaquichishcamanta dimastij resentirishca saquirishpa, llaquichishca solopi yuyashpa, mana perdonashpaca paillataj dañota ruran. Chaimantami cai punllapaj versopi ima nishca consejota pajtachishpa ama chashna sintiringapajca perdonana can. w21.12 pág. 12 párr. 15

Cai ejemplopi yuyashun. Shuj ancianoca shuj huauqui mana alli churarishcatachari ricun. Chaimi paica: “¿Cai huauquica Bibliahuan consejachunchu minishtin?” nishpa tapurina can. Pai yuyashcallata ama ningapajca shujtaj ancianotami ayudachun mañana can. Ña ishquindijmi ima shina churarinamanta, ima shina allichirinamanta apóstol Pablo nishcata ricuna can (1 Timoteo 2:9, 10). Apóstol Pabloca tucuita ima laya churarinataca mana huillarcachu. Paica mana pinganayajta alli yuyaihuan churarichunmi consejarca. Shinallataj Pabloca cai consejota catishpa, cada uno ima shina churarinata decidi tucushcataca allimi yacharca. Ancianocunaca consejota cungapaj o mana cungapajca, maijan huauqui o pani apóstol Pablo mandashcata pajtachicujta o mana pajtachicujtami alli ricuna can. Maijan huauqui panicunaca Biblia yachachishcata catishpami chꞌican chꞌican decidi tucuncuna. Chashna chꞌican decidishpapish shujca allita decidishcata o shujca mana allita decidishcataca mana nisha ninchu. Cada uno chashna chꞌican chꞌican decidinata yachashpaca ñucanchij munashca shina tucuita rurachunca mana obliganachu canchij. w22.02 pág. 16 párrs. 9, 10

Huauqui panicunaman cꞌuyaita ricuchinataca manataj saquinachu canchij. Proverbios libropi tiyaj huaquin versocunapica: ‘Llaquij canata, mana umaj canataca, amataj saquinguichu. Chashna alli cajpimi Taita Diospish, runacunapish cꞌuyashca, alli nishca tucungui. Pitapish llaquij runaca quiquin causaipajmari allita ruran. Cashcata ruraj canatapish, llaquij canatapish mana saquijca, cushi causaitapish ima allicunatapish charingami’ ninmi (Proverbios 3:3, 4; 11:17; 21:21). Proverbios libropica cꞌuyaita ricuchinata manataj saquinamantami quimsa yuyaicunata ricuchin. Puntaca, cꞌuyaita ricuchinata manataj saquishpaca Jehová Diospajca valishcami cashun. Ishquipica, ñucanchijllatajmi beneficiarishun. Shujtajcunahuanpish allimi apanacushun. Quimsapica shamuj punllapi huiñai causaitami chasquishun. Chaimantami Jehová caishujmanta chaishujmanta cꞌuyanata amataj saquichun nishcata cazuna canchij. Diosca: “Caishujhuan chaishujhuan cꞌuyanacushpa, llaquinacushpa causaichij” ninmi. w21.11 pág. 8 párrs. 1, 2

Canca pruebacunata charishpaca chai pruebacunata ahuantangapaj mana sinchi feta charishcatachari cuentata cungui. Chaita cuentata cushpaca cambaj feta ashtahuan sinchiyachingapaj esforzari. Sinchi pruebacunahuan cashpaca Jehová Diosta shungumanta mañangapaj esforzari. Familiacunapaj, huauqui panicunapaj ayudatapish chasqui. Pruebacunata chꞌimbapurangapajca Diospaj ayudata chasquishunchij. Chashna rurashpaca shamuj punllacunapi ima pruebacuna tiyajpipish Jehová Dios ayudanapimi confiashpa catishun. Jesusca paita catijcunatami ashtahuan feta charichun ayudarca. Pero paica allimi yacharca paipaj catijcuna Jehová Diospaj ayudahuan shamuj punllacunapi sinchi pruebacunahuan chꞌimbapurai tucushcata (Juan 14:1; 16:33). Achcacunaca sinchi feta charishcamanta jatun llaqui punllapipish quishpirinatami alli yacharca (Apocalipsis 7:9, 14). Canpish cunanmanta cambaj feta sinchiyachishpaca jatun llaqui punllapi quishpirishpami huiñai causaita chari tucungui (Hebreos 10:39). w21.11 pág. 25 párrs. 18, 19

Cunan punllacunapica Jehová Diosca shuj angelta cai Allpaman cachashpa o shuj milagrota rurashpaca paita sirvijcunataca manachari cuidanga. Pero paita sirvijcuna paipi confiashpa huiñai causaita charinatami yachanchij. Shamuj punllacunapica Jehová Dios ñucanchijta cuidanapi confianami minishtiringa. Magog llajtata mandaj Gog ñucanchijta llaquichisha nijpica “tal vez ñucanchijtami huañuchinga” nishpachari yuyashun. Chaipimi ñucanchijca Jehová Dios ayudanapica tucui shunguhuan confiana canchij. Magog llajtata mandaj Gogca tandanacushca llajtacunami can. Cai llajtacunaca ñucanchijtaca michij illajta layami ricungacuna (Ezequiel 38:10-12). Paicunaca ñucanchijmantaca: “Macanacungapajpish armacunata mana charincunachu, entrenashcapish mana cancunachu” nishpami yuyangacuna. Pero paicunaca Jehová Diospaj angelcuna ñucanchijta difindingapaj listos cashcataca mana yachancunachu. Ñucanchijca Jehová Diospi feta charishcamantami Diosllataj paipaj angelcunahuan ayudanataca alli yachanchij. Jehová Diospaj angelcuna ñucanchijta quishpichinaman shamujpica paicunaca mancharingacunami (Apocalipsis 19:11, 14, 15). w22.01 pág. 6 párrs. 12, 13

Jehová Diosca achca huatata paita sirvijcunatapish ashalla huatacunata paita sirvijcunatapish tucuicunatami cꞌuyan. Ñucanchijpish huauqui panicunata cꞌuyashcamantami paicunata cuidangapaj esforzarina canchij. Chaimanta shuj huauquita o panita llaquichishca cashpaca ‘paica ratomi resintirin, ima tucushcataca cungarinallami can’ nishpaca mana yuyanachu canchij. ¿Imamantataj huaquincunaca rato resintirincuna? Huaquincunaca uchillaraj cashpa ima problemacunata charishcamantami shujtajcunata menos cashcata yuyancuna. Cutin maijancunaca cunanllami Diospaj pueblopi cancuna. Chaimantami huauqui panicuna pandarijpica paicunata perdonanaca sinchi can. Ima laya cajpipish paicunahuan alli tucungapajmi esforzarina canchij. Pero maijanpish rato resintirijlla cashpaca chaipi mejorana cashcatami cuentata cuna can. Chaita rurashpaca paipish cushillami sintiringa, shujtajcunatapishmi cushichinga. w21.06 pág. 21 párr. 7

Jesusca ñucanchij ima shina sintirishcataca allimi intindin. Ñucanchijca llaquilla cashpaca pi ñucanchijta ayudachun, intindichunmi minishtinchij. Shuj amigoca ñucanchij shinallataj llaquicunata charishcamantami alli intindinga. Jesuspish chashnallatajmi intindi tucun. Paica fuerza illaj cashcamantami ayudata minishtirca. Shinallataj ñucanchij ima shina rurashca cashcata yachashpami, paica minishtirishca ayudacunata cunga (Hebreos 4:15, 16). Jesusca Olivo urcupi Diosta mañacushpaca shuj angelpaj ayudatami chasquirca. Ñucanchijpish chashnallatajmi Jehová Diospaj ayudata chasquina canchij. Jehová Diosca publicacioncunahuan, videocunahuan, conferenciacunahuan, pushaj ancianocunahuan, experienciata charij amigocunahuanmi ñucanchijta ayudan (Lucas 22:39-44). Jehová Diosca tranquilo sintirichunmi ayudanga. Jehová Diosta mañashpaca ima llaquicunahuan cashpapish ñucanchij yuyaipi, shungupimi tranquilo sintirishun (Filipenses 4:6, 7). w22.01 págs. 18, 19 párrs. 17-19

Jehová Diosca tucuipi cashcata ruraj Diosmi can. Paica paipaj pueblota pushachunmi huaquin pushajcunata churashca. Pero maipica ñucanchijpajca juchayuj cashcamanta paicunapi confianaca sinchimi can. Tal vez ñucanchijca: “¿Paicunaca Jehová Dios munashca shinachu ruracun? ¿O paicuna munashca shinachu ruracun?” nishpami maipica tapurishcanchij. Ima laya cajpipish Jehová Diospi confiashcata ricuchingapajmi ñucanchijca Dios churashca pushajcunapica confiana canchij. Cunan punllacunapica Jehová Diosca paipaj pueblota ñaupajman pushachunca “alli cazuj, alli yuyaiyuj sirvij” huauquicunatami churashca (Mateo 24:4). Apostolcuna causashca punllacunapi shinallatajmi cai huauquicunaca muyundij Allpapi predicachun organizancuna. Shinallataj congregacioncunamanpish huaquin instruccioncunatami cuncuna. Congregacionpica pushaj ancianocunami cai instruccioncunata pajtachichunca ayudancuna. Ñucanchijca cai pushaj huauquicunata cazushpaca Jehová Diospi confiashcatami ricuchishun. w22.02 pág. 4 párrs. 7, 8

Testigo de Jehová cashcamanta paipaj shutita gentecunaman predicashpaca cushillami sintirinchij. Jehová Diosta sirvisha nij gentecunata ayudashpaca animarinchijmi (Hechos 13:48). Jesuspaj discipulocunaca achca gentecunamanmi huillashpa tigrarcacuna. Paicunaca huillanapi ima shina rishca experienciatami Jesusman parlarcacuna. Chaimi paica ‘jucha illaj espíritu cushichijpimi achcata cushicurca’ (Lucas 10:1, 17, 21). Apóstol Pabloca Timoteomanca: ‘Canllatajpish cuidaringui. Imata yachachicushcatapish alli yuyaringui. Chashna cashpami, canllatajpish quishpiringui, can yachachishcata uyajcunapish quishpiringacuna’ nircami (1 Timoteo 4:16). Cai shimicunata pajtachishpaca gentecuna quishpirichunmi ayudashun. Diospaj Gobiernomanta huillajcuna cashcamantami tucuipi alli comportarina canchij. Chashnami Jehová Diospaj shutita jatunyachishun, huillashcapipish crishcata ricuchishun (Filipenses 1:27). Gentecunaman predicangapajca alli allichirishunchij. Mana manchashpa predicangapajpish Jehová Diospaj ayudata mañashunchij. w21.10 pág. 24 párrs. 1, 2

Mushuj causaita catingapajca Jehová Diospaj espíritu santotami minishtinchij. Jehová Diospaj espíritu santota chasquishpaca Dios shina yuyangapaj, rurangapajmi esforzarishun. Por ejemplo, mushuj causaita charijcunaca Jehová Diosta, huauqui panicunatami cꞌuyancuna (Mateo 22:36-39). Sinchi llaquicunata charishpapish paicunaca cushillami ahuantancuna (Santiago 1:2-4). Shujtajcunahuanpish alli apanacungapaj, pacienciata charingapajmi esforzarincuna (Mateo 5:9; Colosenses 3:13). Allita ruranata yachashpaca chaitami rurancuna (Lucas 6:35). Paicunapaj ruraicunahuanmi Jehová Diospi sinchi feta charishcatapish ricuchincuna (Santiago 2:18). Maijancuna paicunata mana alli tratajpipish mana pꞌiñarincunachu. Tentacioncunamantapish jarcarinatami yachancuna (1 Corintios 9:25, 27; Tito 3:2). Gálatas 5:22, 23-pipish, shujtaj versocunapipish huaquin cualidadcunamantami parlan. w22.03 págs. 8, 9 párrs. 3, 4

Ancianocunaca tucui laya predicangapajmi esforzarina can (Efesios 6:14, 15). Ima shinami apóstol Pabloca huillacushpaca caishujcunata capacitarca, chashnallatajmi ancianocunapish huauqui panicunata o siervo ministerialcunata capacitangapaj tiempota surcuna can (1 Pedro 5:1, 2). Ancianocunaca Diospaj pueblopi achca responsabilidadcunata charishpapish familiahuan Bibliamanta estudiangapaj, predicangapaj, huahuacunamanpish yachachingapajmi tiempota surcuna can (Mateo 28:19, 20). Chaimantami maipica ancianocunaca Diosta mañashca qꞌuipaca imata pajtachichun nijpica “mana pudishachu” nina can. Jehová Diosca paicuna pudishcallata rurachunmi munan. w22.03 págs. 27, 28 párrs. 4, 7, 8

¿Bibliamanta yachai callarishpaca testigo de Jehová canata mancharcanchijchu? Tal vez “ñucaca mana nunca predicai tucushachu” nishpachari mancharcanchij. Mana cashpaca “ñucanchij familiacuna, amigocunami Diosta sirvijpica ñucapaj contra tucunga” nishpami mancharcanchij. Chashna ñucanchijpish manchaita charishca cashpaca yachacujcuna ima shina sintirishcatami intindishun. Jesusca paipaj discipulocunataca: ‘Huaquincunaca manchaitami charinga. Pero manchai mishachunca mana saquinachu canguichij’ nircami (Mateo 10:16, 17, 27). Bibliamanta yachacujcuna paicuna ima yachashcacunata shujtajcunaman predicachun ayudashunchij. Jesuspaj discipulocunaca Jesús huillachun nijpica manchashcangacunami. Pero Jesús maipi huillanata, ima shina huillanata yachachijpica paicunaca huillai tucurcacunami (Mateo 10:5-7). ¿Ima shinataj Jesuspaj ejemplota cati tucunchij? Yachacujcunataca ima shina o maipi predicachunmi ayudana canchij. Por ejemplo, yachacujtaca tapushunchij: “¿Pitataj Biblia yachachishcacunaca ayudai tucun?”. w21.06 págs. 6, 7 párrs. 15, 16

Huata 2015-pica Nepal llajtapimi jatun terremoto tiyarca. Chaipi causajcunaca: “Tiendacunapish, jatun edificiocunapish ratomi urmarca. ‘Huaquin gentecunaca chai terremotoca mana achcata demorarcachu’ nircacunami. Pero ñucanchijpajca chai terremotoca achcatami demorarca. Gentecunaca dimastijmi mancharircacuna” nircacunami. Pero cunan punllacunapica shujtaj chujchuimi tiyan. Jehová Diosca ñaupa punllacunamanta cunan punllacunacamami tucui llajtacunataca chujchuchicun. Ageomi cai profeciamanta parlarca. Ageo 2:6-pica: “Tucuita Mandaj Diosca cashnapishmi nin: Ñallami jahua pachatapish, cai pachatapish chujchuchisha” ninmi. Terremoto tiyajpica achca llaquicunami tiyan. Pero Ageo parlashca profeciaca mana chashnachu can. Jehová Diosca: “Shinallataj tucui llajtacunapi causajcunatapish chujchuchishami. Tucui llajtacunapi causajcuna shamuchun munashcami shamunga. Shinallataj cai huasitaca sumajyachishami” ninmi. w21.09 pág. 14 párrs. 1-3

Dioshuan alli apanacungapajca ñucanchij ima shina sintirishcata, ima shina yuyashcata, imamanta preocuparishcatami shuj amigoman shina tucuita huillana canchij. Chashnami paipi confiashcata ricuchishun (Salmo 94:17-19; 1 Juan 5:14, 15). Huauqui panicunahuan pasangapaj tiempota surcushunchij. Jehová Diosca ñucanchijta cꞌuyashcamantami shuj familiata shina huauqui panicunataca cushca. Paicunaca ñucanchijtami cꞌuyancuna. Chaimantami shuj sumaj valishca regalo can (Proverbios 17:17; Santiago 1:17). Apóstol Pabloca Colosaspi tiyaj congregacionman cartata quillcacushpaca huaquin huauquicunami ñucata animashca, cushichishca nircami (Colosenses 4:10, 11). Jesucristopish paipaj amigocuna, angelcuna ayudachunmi minishtirca. Chaimantami paicuna ayudajpica shungumanta agradicirca (Lucas 22:43). Ñucanchijca desanimachij yuyaicunata charishpaca sinchi feta charij huauqui panicunahuanmi parlana canchij. Chaita rurashpaca mana sinchi feta charishcataca mana ricuchishunchu. Ashtahuanpish paicunapaj ayudata mañajpica ñucanchijtami sinchiyachingacuna. w21.04 págs. 24, 25 párrs. 14-16

Shuj huauqui pani ñucanchijta llaquichijpica maipica achcatami pꞌiñarinchij. Chashna sintirishpaca paicunahuan alli apanacungapajmi esforzarina canchij. Chaipajca ñucanchij ima shina sintirishcatami Jehová Diosmanca tucuita parlana canchij. Shinallataj ñucanchijta mana alli tratajcunata bendiciachun mañashunchij. Jehová Dios shina paicunapaj alli ruraicunata valorangapajpish mañashunchij (Lucas 6:28). Caita rurashpapish pꞌiñarishca catishpaca huauquihuan o panihuan parlangapajmi esforzarina canchij. Paihuan parlacushpaca pai llaquichina munaihuan llaquichishcataca mana yuyanachu canchij (Mateo 5:23, 24). Pero ¿pai mana alli tucusha nijpica imatataj rurana canchij? Caishuj chaishuj ahuantanacushpa perdonangapajmi esforzarina canchij (Colosenses 3:13). Shungupipish ama resintirishca saquirishunchij. Resintirishca saquirishpaca Jehová Dioshuan alli apanacunatami saquishun. Chaimanta imapish ñitcachichunca ama saquishunchij. Chashnami Jehová Diosta tucuimanta yalli cꞌuyashcata ricuchishun (Salmo 119:165). w21.06 págs. 23, 24 párr. 15