Julio

Jehová Diosca cꞌuyaimantami juchata ruraj huauqui panicunataca congregacionmanta llujshichichun mandashca. Chaita rurashpaca huauqui panicunatapish congregacionmanta llujshichishcacunatapishmi benefician. Huaquincunaca deganami chai huauqui panicunata congregacionmanta llujchin nishpachari yuyangacuna. Pero paicunaca allimi yachancuna cai juchata rurajcuna mana allita rurashcata. Tucuita mana alli yachashpapish ancianocunapimi confiana canchij. Comité judicialta ruraj huauquicunaca Biblia yachachishca shina, Jehová munashca shinami juzgancuna (2 Crónicas 19:6). Cambaj familiata ancianocuna congregacionmanta llujchijpi chai decisionta apoyashpaca paicuna Jehová Diospajman cutin tigrachunmi ayudashun. Pani Elizabethca: “Ñuca churita congregacionmanta llujchijpica paihuanca mana apanacui, parlai tucurcanichu. Chaimi ñucapajca sinchi carca. Pero ñuca churica cutin Jehová Diosta sirvinata decidishpaca: ‘Ñucata congregacionmanta llujchishcamantami achcata beneficiarishcani’ nircami” ninmi. w21.09 págs. 28, 29 párrs. 11, 12

Caipi yuyashun. Cai huajcha huarmica Jehová Diosmanca ashtahuanmi cusha nishcanga. Pero paica imalla charishcataca tucuimi curca. Jesuspish cai huarmi cushcacunamanta Jehová Dios valorashcataca allimi yacharca. ¿Caimantaca imatataj yachanchij? Jehová Diosca tucui almahuan, tucui shunguhuan sirvichunmi munan (Mateo 22:37; Colosenses 3:23). Chaimanta predicangapaj, tandanacuicunaman ringapaj fuerzasta, tiempota surcushunchij. Chaita rurajpica Jehová Diosca cushillami sintiringa. ¿Viuda huarmimanta imata yachashcataca ima shinataj pajtachina canchij? Ñucanchij huauqui panicunapi yuyashunchij. Maijan huauqui panicunaca mayorlla, ungushca cashcamantachari ña mana ñaupa laya imata rurai tucuncuna. Tal vez paicunaca ña mana tantochari predicai tucuncuna. w21.04 págs. 6, 7 párrs. 17, 19, 20

Jehová Diosca millai gentecunata tucuchingapajmi shuj punllata agllashpa charicun. Paipaj pacienciamantami achca gentecunaca Jehová Diosta sirvishpa, alabashpa caticunchij. Paicunaca huacharishpa, Jehová Diosta cꞌuyashpa, paiman mingarishpa sirvichun saquishcamantami agradicishca sintirincuna. Tucuringacama llaquicunata ahuantashpaca Jehová Dios pacienciata charishcamantami achca millón gentecunaca quishpirishun. Diablo cai pachata mandacushcamantami achca llaquicuna, problemacuna tiyan. Pero Jehová Diosca cushicuihuanmi cai llaquicunataca ahuantashpa caticun (1 Timoteo 1:11). Ñucanchijpish llaquicunataca Jehová Dios shinallatajmi cushicuihuan, pacienciahuan ahuantashpa catina canchij. Jehová Dios paipaj shutita jatunyachingacama, cai Allpata mandangacama, tucui problemacunata tucuchingacamami ahuantashpa catina canchij. w21.07 pág. 13 párrs. 18, 19

Huaquin gentecunaca Jesús yachachishcacunata mana chasquisha nircacunachu. Paicunaca: “Chai pobre carpinteropaj churillami” nishpami yuyajcuna carca. Ashtahuancarin Nazaret llajtataca shujtajcunaca imapaj mana valishcata shinami ricujcuna carca. Natanaelca Jesuspaj discípulo manaraj tucushpaca: ‘¿Nazaretpica ima allitaj tiyangari?’ nircami. Tal vez paica Miqueas 5:2-pi Mesías Belenpi huacharinata yachashcamantami chashna nishcanga. Profeta Isaías nishca shinaca Jesuspaj contracunaca Mesías maimanta shamuna cashcata, ima familiamanta shamuna cashcataca mana yachasha nircacunachu (Isaías 53:8). Mesiasmanta profeciacunata investigashpa, Jesuspaj causaimanta investigashpaca Jesuspaj contracunaca Jesús Belenpi huacharishcata, Davidpaj huahua huahuacunamanta shamushcatami intindinman carcacuna (Lucas 2:4-7). Miqueas 5:2-pi nishca shinaca Jesusca Belén llajtapimi huacharirca. Pero achca gentecunaca Dios Quillcachishcacunata mana alli investigashcamantami Jesús Mesías cashcataca mana crircacuna. w21.05 pág. 3 párrs. 4-6

Bibliapica huaquincunapish consejocunata chasquishcatami yachai tucunchij. Chaimantami Jehová Diosca paicunata bendiciarca. Jobpi yuyashun. Paica Diosta tucuipi cazusha nishpapish juchayujmi carca. Jobca sinchi llaquicunahuan cai horasca imatapish mana yuyashpami nirca. Chaimi Elihupish, Jehová Diospish paitaca aconsejarca. ¿Jobca ima shinataj cai consejotaca chasquirca? Paica: ‘Ñucaca mana ima yuyaita japishpa rimaricurcanillami. Cunanca shungumantami arrepintirishca cani’ nircami (Job 42:3-6, 12-17). Paica humilde cashcamantami, paipaj qꞌuipa huiñai Elihú consejajpica chasquirca (Job 32:6, 7). Chaimantami Jehová Diosca paitaca bendiciarca. Maipica ñucanchijpish pi consejachunca mana minishtinchijchu nishpami yuyanchij. Jovencuna consejota cujpicarin mana uyasha ninchijchu. Pero humildecuna cashpaca pi consejajpipish uyashunmi. Tucuicunami alli cualidadcunata charingapaj, alli yachachijcuna cangapajca shujtajcuna consejachunmi minishtinchij. w22.02 págs. 11, 12 párrs. 8, 12

Tucuicunami congregacionpi shujtajcuna alli sintirichun cꞌuyaita ricuchina canchij. Ñucanchij ima rurashcacunahuan, nishcacunahuanmi shujtajcunata animai tucunchij. ¿Ñucanchijpish mana Testigo familiacunata charij huauqui panicunamanca ima shinataj cꞌuyaita ricuchina canchij? Mushuj huauqui panicunahuan amigos tucungapaj esforzarishunchij. Paicunataca cꞌuyaihuanmi congregacionpica chasquina canchij (Romanos 15:7). Shinallataj respetota ricuchishpa, cꞌuyaita ricuchishpami paicunamantaca de verastij preocuparina canchij. Ashtahuancarin paicuna ima problemacunata charishcata intindingapajca cꞌuyaihuan, respetohuanmi tapuna canchij. Por ejemplo: “¿Canca Jehová Diostaca ima shinataj rijsircangui?” nishpami tapui tucunchij. Pero paicuna mana parlasha nishcata parlachunca mana obliganachu canchij. Ashtahuanpish paicuna ima nishcatami pacienciahuan uyana canchij. w21.06 pág. 11 párrs. 13, 14

Ñucanchij huauqui panicunahuan Jehová Diosta tandalla sirvicushcamantami cushilla sintirinchij. Organizados para hacer la voluntad de Jehová nishca libropi, página 165-pica: “Congregacionpica tucuicuna alli apanacuchunmi cada uno esforzarina canchij. Ima shinami Jehová Dios huauqui panicunata valoran. Chashnallataj ñucanchijpish paicunata valorashpaca paicunahuanmi alli apanacushun” ninmi. Jehová Diosca paita sirvijcunataca paipaj cꞌuyashca huahuacunata shinami ricun. Shinallataj ñucanchijpish huauqui panicunata ayudajpi, cuidajpica Jehová Diosca cushillami sintiringa (Mateo 10:42). Ñucanchij huauqui panicunataca achcatami cꞌuyanchij. Chaimantami paicunata ama ñitcachingapaj esforzarinchij (Romanos 14:13). Huauqui panicuna ñucanchijta yalli cashcata siempre yuyashunchij. Paicuna pandarijpi, llaquichijpipish shungumanta perdonashunchij. Chaimanta amataj ñitcarishunchij. Ashtahuanpish caishujmanta chaishujmanta sinchiyanacushpa shuj yuyailla ñaupajman catishunchij (Romanos 14:19). w21.06 pág. 24 párrs. 16, 17

Bibliata estudiashpa, Biblia yachachishcacunata ñucanchij causaipi pajtachishpaca asha ashami Jesuspaj ejemplota alli catishun. Jehová Diostapish allimi rijsishun. Jesusca Diospaj Gobiernomanta predicashcataca shuj tarpushca muyuhuanmi chꞌimbapurarca. Alli gentecunaca Diosmanta yachashpaca shuj muyuta tarpujpi huiñaj shinami Diostaca asha asha sirvi callarincuna. Jesusca: “Allpayujca tarpushpaca tutaca dorminmi, punllaca jatarinmi. Chashna cajpipish tarpushcaca tutapish punllapish huiñashpa catinllami. Allpayujca ima shina huiñajtaca mana yachanchu. Allpapica muyuca huiñanllami: Puntaca alcacermi tucun, chai qꞌuipaca caspami tucun. Chai caspapimi granoca jundarin” nircami (Marcos 4:27, 28). Jesús nishca shinallatajmi Bibliamanta yachacujcunaca paicunapaj causaipi asha asha cambiocunata rurancuna (Efesios 4:22-24). Pero yuyarinami canchij. Jehová Diosmi yachacujcunataca paita sirvichun shuj muyuta huiñachij shina ayudan. w21.08 págs. 8, 9 párrs. 4, 5

Cai versopi nishca shinaca imata mana charishcapi yuyailla canapaj randica imata charishcahuan, imata rurai tucushcahuanmi cushilla sintirina canchij. Tucuicunami imatapish ashtahuan yachasha ninchij o ashtahuan alli rurasha ninchij. Shinaca ¿ñucanchij ima rurai tucushcallahuanchu cushilla sintiri tucunchij? Ari, ñucanchij ima charishcacunallahuan, ima rurai tucushcacunallahuanmi cushilla Diosta sirvi tucunchij. ¿Ima shina? Chaipajca Jesús parlashca talento cullquimanta Mateo 25:14-manta 30-cama ricushun. Chaipimi ñucanchij rurai tucushcahuan cushilla sintiringapaj imata ruranata yachashun. w21.08 pág. 21 párrs. 5, 6

Jehová Diosca mana jatun tucushcacunamanta, shungu pꞌaquirishcacunamantami preocuparin. Ancianocunapish huauqui panicunapish caishujmanta chaishujmanta preocuparinacushpami ayudanacuna canchij. Ñucanchijpish shujtajcunamanta preocuparishpami paicunata Jehová Dios cꞌuyashcata ricuchishun (Proverbios 19:17). Shinallataj imata ruranata yachashpapish mana jatun tucunachu canchij. Chashnami huauqui panicuna envidiana munaita ama charichun ayudashun. Ashtahuanpish ñucanchij ima yachashcacunahuan, ima ruraicunahuan shujtajcunata ayudangapajmi esforzarina canchij (1 Pedro 4:10, 11). Shujtajcunata alli tratangapajca Jesús ima shina paipaj discipulocunata tratashcamantami yachai tucunchij. Jesusca importante cashpapish humilde, alli shungumi carca (Mateo 11:28-30). Humilde gentecunaman yachachicushpapish intindirinalla shimicunahuan, rijsishca ejemplocunahuanmi yachachirca (Lucas 10:21). w21.07 pág. 23 párrs. 11, 12

Mayorlla huauqui panicunahuan parlangapaj tiempota surcushunchij. Paicunaca manachari jovenpi laya alli ricuncuna, sinchita purincuna o sinchita parlancuna. Pero paicunaca Jehová Diostami shungumanta sirvishpa catincuna. Diospajpish rijsishcami cancuna (Eclesiastés 7:1). Jehová Diosca paicunataca achcatami valoran. Ñucanchijpish chashnallatajmi valorana canchij. Eliseoca Elías mayorlla cajpi, último punllapi cajpica cantaca manataj saquishachu nishpami quimsa cutin nirca (2 Reyes 2:2, 4, 6). Mayorlla huauqui panicunapaj experienciamanta yachangapajca respetohuan tapushunchij (Proverbios 1:5; 20:5; 1 Timoteo 5:1, 2). Por ejemplo: “¿Jovenraj cashpaca ima shinataj Jehová Diosta rijsircangui? ¿Diospajman ashtahuan cꞌuchuyangapajca imatataj rurarcangui? ¿Jehová Diosta cushilla sirvishpa catingapajca imataj ayudarca?” nishpami tapuna canchij (1 Timoteo 6:6-8). Paicuna parlajpica allimi uyana canchij. w21.09 págs. 5, 7 párrs. 14, 15

Gentecunaman predicashpa, Jesuspaj discipulocuna tucuchun ayudashpaca Jehová Diosta cꞌuyashcatami ricuchishun (1 Juan 5:3). Caipi yuyashun, callaripica huasin huasin predicanaca ñucanchijpajca sinchimi carca. Tal vez punta cutin huillanaman llujshishpaca achca manchaitachari charircanchij. Pero Jehová Diosta cꞌuyashcamanta, Jesús chai obrata pajtachichun nishcamantami predicai tucurcanchij. Chaimantami cunanca huasin huasin predicanata ña mana manchanchij. Cutin pimanpish Bibliamanta yachachingapajchari manchaita charinchij. Chashna sintirishpaca Jehová Diostaca mana manchashpa shujtajcunaman yachachingapaj fuerzasta cuchunmi mañana canchij. w21.07 págs. 3, 5 párr. 7

Ñaupa punllacunapica esclavocunami paicunapaj maquipi o frentepi señalta charijcuna carca. Chashnami paicunapaj pi amo cashcata yachai tucurcacuna. Cunan punllacunapipish gobiernocunaca tucuicuna maquipi o frentepi shuj señalta charichunmi munangacuna. ¿Caica imatataj ricuchin? Gentecunaca paicunapaj ruraicunahuan, paicunapaj yuyaicunahuan cai Allpapi tiyaj gobiernocunata apoyashpa, politicapish chagrurishpami paicunaca cai señalta charishcata ricuchincuna. ¿Ñucanchijpish cai señalta ama charingapajca imatataj rurana canchij? Cai señalta frentepi, maquipi ama charingapajca gobiernocunataca mana apoyanachu canchij. Shinallataj politicapipish mana chagrurinachu canchij. Paicunata mana apoyasha nishcamantami Diosta sirvijcunaca achca llaquicunata charishun. Apocalipsis libropica frentepi o maquipi mana señalta charijcunaca: ‘Pi mana cꞌatui tucungachu, imata mana randi tucungachu’ ninmi (Apocalipsis 13:17). Diosta sirvijcunaca allimi yachanchij Apocalipsis 14:9, 10-pi tiyaj señalta charijcunahuan ima tucunata. Pero ñucanchijca chai señaltaca mana charisha ninchijchu. Ashtahuanpish Jehová Diospajllami casha ninchij (Isaías 44:5). Cunanmantami Jehová Diospi tucui shunguhuan confiashcata ricuchina canchij. Chaita rurajpica Jehová Diosca paipajlla cashcamantami cushilla sintiringa. w21.09 pág. 18 párrs. 15, 16

Apostolcuna causashca punllacunapica Timoteoca ima shina huillanata, ima shina yachachinataca apóstol Pablomantami yacharca (1 Corintios 4:17). Ñucanchijpish Timoteo shinallatajmi predicangapajca experienciata charij huauqui panicunamanta yachai tucunchij. Shinallataj huillangapajca Jehová Dios ayudachunmi mañana canchij. Jehová Dios paipaj espíritu santota cujpimi imatapish pajtachi tucushun (Salmo 127:1; Lucas 11:13). Por ejemplo, Jehová Diosta mañacushpaca alli shungu gentecunaman, Bibliamanta yachasha nij gentecunaman predicangapajmi Jehová Diosta mañana canchij. Ashtahuanpish Bibliata estudiangapajmi tiempota surcuna canchij. Bibliapica: “Chashnami cancunallataj Diospaj munai alli cashcata, chasquinalla cashcata, jucha illaj cashcata yachanguichij” ninmi (Romanos 12:2). Ñucanchijllataj Bibliata alli estudiashpaca shujtajcunamanpish mana dudashpami yachachishun. w21.05 pág. 18 párrs. 14-16

Maipica maijancunaman Bibliamanta yachachijpica paicunaca mana cambiocunata rurasha nincunachu. Chaimantami paicunaman Bibliamanta yachachinata saquinchij. Maijancunacarin mana bautizarisha nincunachu. Chaica mana nisha ninchu predicashpa catichun Jehová Dios ñucanchijta mana ayudacushcata. ¿Jehová Dios munashca shina alli predicangapajca imatataj rurana canchij? Gentecuna uyajpipish mana uyajpipish mana shaicushpa huillangapaj esforzarishcataca Jehová Diosca achcatami valoran. Apóstol Pabloca: “Diosca cashcata ruraj cashcamantaca, cancunapaj rurashcacunata paipaj shutipi cꞌuyaihuan trabajashpa ricuchishcata, jucha illajcunapajta rurashpa cunancamapish ruracushcamantaca manataj cungaringachu” nircami (Hebreos 6:10). Bibliamanta yachacujcuna mana bautizarijpi ñucanchij paicunata yachachingapaj esforzarishcataca Jehová Diosca manataj cungaringachu. Apóstol Pablo cai punllapaj versopi ima nishcatami yuyaipi chari tucunchij. w21.10 pág. 25 párrs. 4-6

Jesusca paipaj tucui discipulocuna ima mingashcata igual rurachunca mana shuyarcachu. Ashtahuanpish cada uno imata rurai tucushcata pajtachichunmi saquirca. Chaimantami Jesusca paicunapaj esfuerzota valorarca. Jesusca apostolcunapaj esfuerzota valorashcataca shuj chꞌimbapuraihuanmi intindichirca. Paica: ‘Shuj amoca paipaj esclavo cada uno ima rurai tucushcata yachashpami paicunamanca trabajota mingarca. Shuj esclavoca caishuj esclovocunamanta yallimi paipaj amopajca ashtahuan cullquita ganarca. Pero amoca ishquindij trabajaj esclavocunataca allitami rurashcanguichij nishpami felicitarca’ nircami (Mateo 25:14-23). Jesusca ñucanchijmanpishmi cꞌuyaita ricuchin. Paica ñucanchij imata rurai tucushcataca allimi yachan. Chaimantami Jehová Diosta sirvingapaj esforzarijpica paica cushilla sintirin. w21.07 pág. 23 párrs. 12-14

Rey Davidca maipica mana siempre llaquijchu carca. Por ejemplo, Nabal Davidta, paipaj runacunata mana alli tratajpi, pi mana carasha nijpica Davidca dimastij pꞌiñarishpami Nabalta, Nabalpaj huasi ucu familiataca huañuchisha nirca. Chaimi Nabalpaj huarmi Abigailca cꞌuyaihuan, pacienciahuan Davidtaca paipaj huasi ucupura familiata ama huañuchichun jarcarca (1 Samuel 25:9-22, 32-35). Davidca dimastij pꞌiñarishca cashpaca Nabalta, paipaj runacunatami huañuchisha nirca. Shinallataj profeta Natán, Davidman shuj charij runami huajcha runapaj ovejata shuhuashca nijpica paica charij runataca huañuchichunmi mandarca. Chaimantachari tal vez cashna nishpa tapurinchij. ¿Davidca imamantataj chashna juzgarca? Pai jatun juchata rurashcamantami paipaj concienciapica mana alli sintirirca. Ñucanchijpish shujtajcunata sinchita juzgashpaca Yayitu Dioshuan mana alli apanacucushcatami ricuchishun. w21.10 págs. 12, 13 párrs. 17, 18, 20

¿Cai punllapaj versomantaca imatataj yachai tucunchij? Jehová Diosca jucha illajmi can. Pai shinami ñucanchijpish ruraicunapi, yuyaicunapi jucha illaj cai tucunchij. Pero maipica juchayuj cashcamantami chaita pajtachinaca sinchi laya ricurin. Apóstol Pedroca maipica pandarishpapish paipaj alli ruraicunahuan, alli ejemplohuanmi jucha illaj cai tucushcata ricuchirca. Jucha illaj can nijta uyashpaca gentecunaca chai persona mana asirij, upalla saquirij, alaja churarishca cajtami yuyancuna. Pero jucha illaj canaca mana chashnachu can. Bibliapica: ‘Jehová Diosca jucha illaj, paica cushi Diosmi’ can ninmi (1 Timoteo 1:11). Shinallataj Jehová Diosta adorajcunapish cushilla sintirishcatami nin (Salmo 144:15). Jesusca: ‘Runacunapi alli ricuringa raiculla pambata pꞌichajta churarijcunata, allita ruraj tucujcunataca mana chashna canachu canguichij’ nishpami rimarca (Mateo 6:1; Marcos 12:38). Diosta sirvijcunaca Bibliata liyishpami Jehová Dios jucha illaj cashcataca alli yachanchij. Diosca cꞌuyaj Diosmi can. Paica ñucanchij mana rurai tucushcata rurachunca mana mañanchu. w21.12 págs. 2, 3 párrs. 1, 3

Jehová Diosca paita adorana regalotami cushca. Paipaj mandashcacunata cazushpaca Yayitu Diosta cꞌuyashcatami ricuchishun (1 Juan 5:3). Por ejemplo, Jesusca paipaj discipulocunata rurachun, bautizachunmi mandarca (Mateo 28:19). Shinallataj caishujmanta chaishujmanta cꞌuyaita ricuchinacushpa causachunmi mandarca (Juan 13:35). Jehová Diosta tucuipi cazujpica paica paipaj familia ucupi cachunmi saquinga (Salmo 15:1, 2). Shujtajcunata cꞌuyashunchij. Jehová Diosca tucuimanta yalli cꞌuyajmi can (1 Juan 4:8). Ñucanchij Yayitu Diosta manaraj rijsijpica paimi ñucanchijta ña cꞌuyarca (1 Juan 4:9, 10). Shujtajcunata cꞌuyashpaca paipaj ejemplota caticushcatami ricuchishun (Efesios 5:1). ¿Ima shinataj shujtajcunaman cꞌuyaita ricuchina canchij? Tiempo tiyajpirajmi gentecunamanca Jehová Diosta rijsichun ayudana canchij (Mateo 9:36-38). Chashnami tiempohuanca paicunapish Diospaj familia parte tucungacuna. w21.08 págs. 5, 6 párrs. 13, 14

Jesusca Jehová Diosta achcata cꞌuyashcamantami gentecunamanpish cꞌuyaita ricuchirca (Juan 14:31). Cai Allpapi cashpaca gentecuna paita mana alli tratajpipish paica tucuicunatami llaquishpa alli tratarca. Shinallataj gentecunata cꞌuyashcamantami Jehová Diospaj Gobiernomantapish huillarca (Lucas 4:43, 44). Ashtahuancarin Jehová Diosta, gentecunata cꞌuyashcamantami paica llaquicunata apashpa ñucanchij juchacunamanta huañurca. Chashnami ñucanchijtapish huiñai causaita charichun ayudashca. Jehová Diosta cꞌuyashcamantami paiman mingarishpa bautizarircanchij. Chaimantami Jesús shina gentecunamanpish cꞌuyaita ricuchina canchij. Apóstol Juanca: “Maijanpish: ‘Ñucaca Diostami cꞌuyani’ nishpapish, paipaj huauquita pꞌiñajca llullami” nircami (1 Juan 4:20). w22.03 pág. 10 párrs. 8, 9

Maipica achca ocupados cashcamantami Jehová Diospajman cꞌuchuyangapajca tiempota mana charinchij. Trabajomanta, familiamanta, shujtaj cosascunamantami Yayitu Diosta mañangapaj, Bibliata estudiangapaj, chaipi yuyangapajca tiempota mana charinchij. Pero maipica mana importante ruraicunamantami Yayitu Diospajman cꞌuchuyangapajca tiempota mana charinchij. Por ejemplo, tucuicunami divirtirisha ninchij. Pero chaicunallapi yallitaj pasashpaca Diosta mañangapaj, Bibliata liyingapajca tiempota mana charishunchu. Chaimantami tiempota ama yangamanta pirdingapaj cuidarina canchij (Proverbios 25:27; 1 Timoteo 4:8). w22.01 págs. 26, 27 párrs. 2, 3

Jehová Diosca israelitacunataca shujtaj llajtamanta cajcunaman cꞌuyaita ricuchichunmi mandarca. Chashna nishpaca Diosca paicunapaj llajtallaman o paicunapaj razallaman cꞌuyaita ricuchichunca mana mandarcachu. Shinallataj Jehová Diosca shujtaj llajtamanta cajcuna paicunahuan cajpica paicunaman cꞌuyaita ricuchichunmi mandarca. Chaitaca Levítico libropimi ricuchirca (Levítico 19:33, 34). Shujtaj llajtamanta cajcunataca israelitacunaca paicunapaj propio llajtamanta shinallataj tratashpami paicunamanca cꞌuyaita ricuchina carcacuna. Por ejemplo, shujtaj llajtamanta cajcuna, huajchacuna chꞌalachunca ima granocunataca mana tucui cosechanachu carca (Levítico 19:9, 10). Cunan punllacunapish Diosta sirvijcunaca shujtaj llajtamanta cajcunamanmi cꞌuyaita ricuchina canchij (Lucas 10:30-37). Muyundij Allpapica gentecunaca paicunapaj llajtamanta llujshishpami shujtaj llajtacunapi causanaman rishcacuna. Tal vez maijancunaca ñucanchij causan cꞌuchullapichari causancuna. Chaimanta cꞌaricunata, huarmicunata, huahuacunata respetohuan tratashunchij. w21.12 págs. 12, 13 párr. 16

Cunan punllacunamanta Jehová Diospaj ayudata mashcashpaca, shamuj punllacunapica Jehová Dios ñucanchijta ayudanapimi confiashun. Por ejemplo, trabajopica ñucanchij jefetachari jatun tandanacuicunaman ringapaj, congregacionpi tiyaj tucui tandanacuicunaman ringapaj, huillanaman llujshingapajca permisota cuchun mañanchij. Chaipajca Jehová Diospi sinchi feta charinatami minishtinchij. Shinapish maipica jefeca ñucanchij permisota mañajpica manachari cunga. Chaimantachari maipicarin trabajo illaj saquirishun. Cashna trabajo illaj saquirishpaca Jehová Dios ñucanchijta manataj saquinata, minishtirishca cosascunata cushpa ayudanatami crina canchij (Hebreos 13:5). Tiempo completopi sirvij achca huauqui panicunaca Jehová Dios paicunata siempre ayudashcatami ricushcacuna. Jehová Dios ñucanchijhuan cashcamantami shamuj punllacunapi ima laya llaquicuna tiyajpipish mana manchana canchij. Paita punta lugarpi churajpica manataj saquingachu. w22.01 pág. 7 párrs. 16, 17

Ancianocuna shuj cꞌuyashca amigota o familiata congregacionmanta llujchijpica paicuna decidishcata apoyanaca maipica sinchichari ricurin. Chaipica: “¿Ancianocunaca ima tucushcata alli yachashpachu juzgarcacuna? ¿Dios munashca shinachu juzgarcacuna?” nishpachari tapurinchij. Pero paicuna imata decidishcapi imamanta confiana cashcatami ricushun. Mana arrepintirijcunata congregacionmanta llujchichunca Jehová Diosmi ancianocunamanca chai autoridadta cushca. Chaita mana rurajpica mana arrepintirijcunaca shujtajcunapajmi mana alli ejemplocuna canga (Gálatas 5:9). Ashtahuancarin mana arrepintirijcunaca paicunapaj yuyaita, paicunapaj causaita mana cambiashpami Jehová Diospajman tigranata mana decidingacuna (Eclesiastés 8:11). Ancianocunaca Jehová Dios paicunaman juzgana autoridadta cushcatami alli yachancuna. w22.02 págs. 5, 6 párrs. 13, 14

Huauqui panicuna consejashcata mana cazusha nijpi, mana pajtachisha nijpimi paicunaman cꞌuyaita ricuchina, pacienciata ricuchinaca importante can. Ancianocunapish huauqui panicuna consejota mana chasquisha nijpi, mana utca pajtachisha nijpica mana coleranachu can. Chaimanta ancianocunaca huauqui panicuna consejashcata uyachun, pajtachichunca Diospaj ayudatami mañana can. Huaquincunaca consejocunata pajtachingapajca tiempotami minishtincuna. Ancianocuna cꞌuyaihuan, pacienciahuan consejajpica imata consejashcatami pajtachingacuna. Pero ancianocunaca Biblia yachachishca shinami paicunataca consejana can. Cꞌuyaihuan consejota cujpica huauqui panicunaca cushillami chasquingacuna (Proverbios 27:9). w22.02 págs. 18, 19 párrs. 17, 19

Maipica ima problemata charishpaca fuerzasta cuchun o imapi mejorangapaj ayudachunmi Jehová Diosta mañanchij. Pero, ¿Jehová Diosca imamantataj maipica ñucanchij mañashcacunataca mana rato cutichin? Jehová Diosta mañashpaca paipi feta charishcatami ricuchinchij (Hebreos 11:6). Pero Jehová Diosca paita mañajpica paipaj munaita pajtachingapaj esforzaricushcata o mana esforzaricushcatami alli ricun (1 Juan 3:22). Chaimantami imapi mejorangapaj Yayitu Diosta ayudachun mañashpaca chaipi mejorangapaj esforzarina canchij. Shinallataj Jehová Diosta cutin cutin mañashpaca pai cutichingacamami shuyana canchij. Jesusca caimanta parlashpaca: “Mañashpa catichij Diosca cungallami, mashcashpa catichij japinguichijmi, punguta huajtashpa catichij Diosca pascangallami. Mañajpish chasquinmi, mashcajpish japinmi, punguta huajtajpajpish punguca pascashcami canga” nircami (Mateo 7:7, 8). w21.08 págs. 8, 10 párrs. 1, 9, 10

Ñucanchij feta tucuita ruraj Diospi sinchiyachishpa catingapajmi Bibliata estudiashpa catina canchij (Josué 1:8). Bibliata estudiacushpaca Biblia mana pandarij cashcata, chaipi tiyaj profeciacuna tucui pajtarishcata yachashunchij. Chaita rurashpaca ñucanchijta ruraj, yachaj, cꞌuyaj Jehová Diospimi ñucanchij feta sinchiyachishun. Shinallataj Yayitu Dios paipaj Shimita quillcachishcapimi confiashun (2 Timoteo 3:14; 2 Pedro 1:21). Bibliata estudiashpaca Bibliapi tiyaj consejocuna ñucanchijpaj valishca cashcatami cuentata cuna canchij. Por ejemplo, Bibliapica: ‘Cullquita ashtahuan charinata munashpaca achca llaquicunatami charishun’ nishpami yachachishca (1 Timoteo 6:9, 10; Proverbios 28:20; Mateo 6:24). Bibliapi nishca shinaca cullqui solopi yuyashpaca mana causanachu canchij. Pero Bibliapi tiyaj shujtaj consejocunapish ñucanchijta ima shina ayudashcapimi yuyana canchij. Bibliapaj consejocunata valorashpaca tucuita ruraj Jehová Diospimi ñucanchijca ashtahuan confiashpa catishun. Shinallataj cushillami causashun (Isaías 48:17, 18; Santiago 1:5). w21.08 págs. 17, 18 párrs. 12, 13

Mayorlla huauqui panicuna cancuna Jehová Diosta sirvingapaj esforzarishcataca paica manataj cungaringachu. Llaquicunatapish ahuantashpami Yayitu Diospaj mandashcacunata predicashpa difindishcanguichij. Shinallataj Diospaj mingashca responsabilidadcunatapish allimi pajtachishcanguichij, shujtajcunatapish yachachishpami ayudashcanguichij. Jehová Diospaj organizacionpi ima cambiocuna tiyajpipish cushillami chasquishcanguichij. Tiempo completopi sirvij huauqui panicunatapish Yayitu Diosta ashtahuan sirvichunmi animashcanguichij. Chaimantami Diosca paita sirvingapaj esforzarishcamantaca manataj saquishachu nin (Salmo 37:28). Ashtahuancarin: “Cancuna puzujlla uma tucungacamapish ñucallatajmi charirasha” ninmi (Isaías 46:4). Chaimanta: “Ñami mayorlla canchij, Diospaj organizacionpica mana tanto sirvi tucushunchu” nishpaca ama yuyaichijchu. Cancunaca Jehová Diospajca valishcami canguichij. w21.09 pág. 3 párr. 4

Jehová Diosca yachaj, llaquij Diosmi can. Bibliapica: ‘Jahua pachamanta yachaj canaca, llaquij canaca, allita ruranami can’ ninmi (Santiago 3:17). Ima shinami shuj yayaca paicunapaj huahuata cꞌuyan, chashnallatajmi Jehová Diospish ñucanchijtaca cꞌuyan (Isaías 49:15). Ñucanchij juchayujcuna cajpipish Jehová Diosca llaquij cashcamantami ñucanchijtaca perdonan. Pero Jehová Diosca yachaj Dios cashcamantami maijanpish jatun juchata rurajpica paicunataca mana llaquishcata ricuchin. Caipi yuyashun. Shuj huauqui o shuj panichari juchata rurana mana alli cajta yachashpapish achca huatacunata jatun juchata rurashpa causan. ¿Jatun juchata ruracujta yachaj chayashpaca imatataj rurana canchij? Apóstol Pabloca cashna laya gentecunahuanca ‘mana tandanacunachu canguichij’ nishpami shuj cartata quillcarca (1 Corintios 5:11). Jatun juchata rurajcuna paicuna mana arrepintirijpica congregacionmantami llujchina can. Chaita rurashpaca huauqui panicunatami cuidashun. Shinallataj Jehová Diospaj shutitapish mana mapayachishunchu. w21.10 págs. 9, 10 párrs. 7, 8

Diospaj obra ñaupajman catichunca cullquita cushpami Jehová Diosta adoranchij. Israelitacunaca Jerusalenpi tiyaj Diospaj temploman rishpaca paicuna cui tucushcacunatami Jehová Diospajca apajcuna carca (Deuteronomio 16:16). Chashnami paicunaca Jehová cuidashcamanta agradicishcata ricuchircacuna. Ñucanchijpish muyundij Allpapi Diospaj obra ñaupajman catichunmi contribucionta cushpa ayudai tucunchij. Apóstol Pabloca: “Maijanpish tucui shunguhuan ima charishcata cujpica, Diosca chasquinllami. Diosca imata mana charishcataca mana mañanchu” nircami (2 Corintios 8:4, 12). Jehová Diosca paiman shungumanta cullquita cujpica ashalla cajpipish achcatami valoran (Marcos 12:42-44). w22.03 págs. 22, 24 párr. 13

Ancianocunaca cai tucui llaquicunataca mana tucuchi pudincunachu. Pero Jehová Diosca ancianocunataca huauqui panicunata animachun, cuidachunmi mandan. ¿Ancianocunaca ocupados cashpapish huauqui panicunata ayudangapajca imatataj rurana can? Paicunaca apóstol Pablopaj ejemplotami catina can. Paica huauqui panicunata animangapaj, sinchiyachingapajmi tiempota surcurca. Chashnallatajmi ancianocunapish cꞌuyaihuan huauqui panicunata animangapaj, sinchiyachingapaj tiempota surcuna can (1 Tesalonicenses 2:7). Pabloca paipish, Jehová Diospish huauqui panicunata achcata cꞌuyashcatami intindichirca (2 Corintios 2:4; Efesios 2:4, 5). Paica huauqui panicunahuanpish shuj amigo shinami tiempota pasangapaj esforzarirca. Shinallataj huauqui panicunamanca pai ima shina sintirishcata, ima jarcaicunahuan chꞌimbapurashcatami parlarca. Chashnami huauqui panicunapi achcata confiashcata ricuchirca (2 Corintios 7:5; 1 Timoteo 1:15). Shinapish paipaj problemacunallapi yuyanapaj randica huauqui panicunata ayudangapajmi sinchita esforzarirca. w22.03 pág. 28 párrs. 9, 10