Agosto

¿Caicunata nishpaca picunamantataj parlacushcanga? Tal vez Jesusca paita caspipi huarcuj romano soldadocunamantami parlacushcanga. Jesusca paita yangamanta llaquichishpa mana alli tratajpipish paica mana resintirishca saquirircachu (1 Pedro 2:23). Jesús shinallatajmi shujtajcunata perdonanalla canchij (Colosenses 3:13). Huaquinpica familiacuna o gentecunaca ñucanchij crishcacunata mana intindishcamantami llaquichincuna. Maijancunaca ñucanchijmantaca llullacunata nishpami ñucanchij publicacioncunata lliquincuna o de verdadtajmi llaquichisha nincuna. Pero pꞌiñarishca o llaquirishca saquirinapaj randica paicunapish Bibliamanta estudiachunmi Jehová Diosta mañana canchij (Mateo 5:44, 45). Huaquinpica ñucanchijta mana alli tratajpica paicunata perdonanaca sinchimi can. Pero llaquirishca, resintirishca saquirishpaca ñucanchijllatajmi llaquilla causashun (Salmo 37:8). Shujtajcunata perdonashpaca tranquilosmi sintirishun (Efesios 4:31, 32). w21.04 págs. 8, 9 párrs. 3, 4

Pita congregacionmanta llujchijpica familiacunapish, amigocunapish dimastij llaquillami sintirinchij. Jehová Diosca angelcuna paita sirvinata saquijpica llaquillami sintirishcanga (Judas 6). Israelitacunapish Yayitu Diostaca cutin cutinmi mana cazurcacuna. Chaimantami paica llaquilla sintirishcanga (Salmo 78:41). Cunan punllacunapish ñucanchij cꞌuyashca amigo o rijsishca Jehová Diosta sirvinata saquijpica Diosca llaquillami sintirin. Chaimantami paica llaquilla cajcunataca animashpa, apoyashpa catinga. Achca huauqui panicunaca paicunapaj churicuna Jehová Diosta sirvinata saquijpica: “¿Imapitaj paicunataca ayudana carcanchij?” nishpami yuyancuna. Shuj huauquica cashnami nirca: “Ñucami culpata charini nishpami yuyarcani. Huaquinpica dimastijmi preocupado sintirircani” ninmi. Shuj panipish casi chashnallatajmi sintirirca. Paica: “¿Imapitaj pandarircani? Ñuca churiman Yayitu Diosmanta yachachingapajca mana sinchita esforzarishcanichu nishpami yuyarcani” ninmi. w21.09 págs. 26, 27 párrs. 1, 2, 4

Huaquin gentecunaca: “Testigo de Jehovacunaca jatun yachana escuelacunamanca mana rishcacunachu. ¿Maitataj Bibliamantaca yachachingacunayari?” nishpami yuyancuna. Pero. Biblia yachachishcacunatami alli investigana can. Apóstol Lucasca Lucas librota escribingapajca allimi investigarca. Chashnami chai librota liyijcuna Jesusmanta alli intindichun ayudarca (Lucas 1:1-4). Berea llajtapi causaj judiocunapish punta cutin Jesusmanta alli huillaicunata uyashpaca Diospaj Quillcachishcacunapimi alli investigarcacuna. Chashnami ciertotaj cashcata intindircacuna (Hechos 17:11). Chashnallatajmi canpish testigo de Jehovacuna yachachishcataca cambaj Bibliallahuantaj comparana cangui. Shinallataj testigo de Jehovacuna ima shina cashcatapish canllatajmi yachana cangui. Chaita rurashpaca Testigocunamanta mana allicunata nijpica mana cringuichu. w21.05 págs. 3, 4 párrs. 7, 8

¿Ñucanchijpish picunatataj ayudai tucunchij? Huaquin huauqui panicunaca paicunapaj mana Testigo familia panda fiestacunata rurai horasmi llaquilla sintirincuna. Cutin shujtajcunaca paicunapaj familiacuna huañushca fecha chayajpimi llaquilla sintirincuna. Chai punllacunapimi paicunahuan pasangapajca tiempota surcuna canchij. Chashnami paicunaman cꞌuyaita ricuchishun (Filipenses 2:20). Diosta sirvijcunaca maipica imamantapish solollami sintiri tucunchij. Pero Jehová Diosca ñucanchij ima shina sintirishcataca allimi yachan. Chaimantami paica huauqui panicunahuan ñucanchijta sinchiyachishpa caticun (Mateo 12:48-50). Shinallataj ñucanchijpish huauqui panicunata ayudashpa catishunchij. Maipica ñucanchijlla sintirijpipish Jehová Diosca ñucanchijhuanmi canga. Paica ñucanchijtaca manataj saquingachu. w21.06 págs. 12, 13 párrs. 18-20

Jesusca gentecuna mana uyasha nijpipish cushillami predicashpa catirca. ¿Imamantataj chaita rurarca? Paica allimi yacharca gentecuna Jehová Diosmanta yachanata minishtishcata. Chaimi paica huillangapaj achcata esforzarirca. Shinallataj mana uyasha nij gentecuna qꞌuipaca Jehová Diosmanta yachashpa paita catijcuna tucunataca allimi yacharca. Por ejemplo, paipaj familiaca Jesús cai Allpapi quimsa huatacunata predicacujpica mana paita catijcuna tucurcachu (Juan 7:5). Ashtahuanpish Jesús ña causarishca qꞌuipami paipaj lahuauquicunaca Jesusta cati callarircacuna (Hechos 1:14). Gentecuna mana uyasha nijpipish huillashpami catina canchij. Tal vez qꞌuipaca paicunaca Diostami sirvisha ningacuna. Huaquincunaca Diosta sirvingapajca ashtahuan tiempotami minishtincuna. Cutin shujtajcunaca mana uyasha nishpapish ñucanchij alli comportarijta ricushpa, cushilla huillajta ricushpami Jehová Diostaca sirvi callaringacuna. w21.05 págs. 18, 19 párrs. 17, 18

Jesús cai Allpapi cashpaca paipaj discipulocunamanca predicachun, yachachichunmi mandarca. Chaimantami paica puntaca Diospaj Gobiernomanta ima shina predicanata yachachirca (Lucas 8:1). Gentecuna uyajpipish, mana uyajpipish ima shina predicanatapishmi yachachirca (Lucas 9:2-5). Shinallataj muyundij Allpapi predicana cashcatapishmi yachachirca (Mateo 24:14; Hechos 1:8). Jesusca paita catijcunataca: ‘Tucui ñuca mandashcacunata gentecuna cazuchun yachachinguichijpish’ nircami. Jesús nishca shinaca cai shina causai tucuringacamami gentecunaman predicashpa, yachachishpa catina canchij (Mateo 28:18-20). Apóstol Juanpish shuj muscuipica Jesuspaj tucui discipulocuna gentecunaman Diosmanta yachachina cashcatami ricurca (Apocalipsis 22:17). w21.07 pág. 3 párrs. 3, 4

Cai mundopi tiyaj gentecunaca shujtajcunata yalli casha nishpami shujtajcunata llaquichincuna. Por ejemplo, negociocunata charij runaca tal vez shujtajcunata yalli charisha nishpami shujtaj negociocunata charijcunata llaquichin. Cutin shuj pugllajca pai ganasha nishpachari shujtaj equipopi pugllajtaca chaquita lisian. Shuj estudiajca shuj rijsishca Universidadpi estudiasha nishpachari examencunata cungapajca trampacunata ruran. Diosta sirvijcunaca cai ruraicuna mana allicuna cashcataca allimi yachanchij (Gálatas 5:19-21). Pero congregacionpipish maijan huauqui panicunaca mana cuentata cushpami shujtajcunata yalli casha nincuna. Chashna yuyashpaca huauqui panicunatami congregacionmanta chꞌicanyachi tucuncuna. Chaimanta Bibliapi tiyaj Diosta sirvijcunapish shujtajcunamanta yalli cashcata ama yuyangapaj imata rurashcatami yachashun. w21.07 pág. 14 párrs. 1, 2

Cꞌuyaita ricuchinata manataj saquishpaca desanimarishcacunatami ayudashun. Cunan punllacunapica huaquin huauqui panicunaca llaquilla, desanimarishca cajcunamanmi cꞌuyaita ricuchinata manataj saquincuna. Paicunaca pudirishcahuanpish ayudangapajmi esforzarincuna (Proverbios 12:25; 24:10). Chaimanta apóstol Pablo nishcata pajtachishunchij. Paica: ‘Llaquilla cajcunataca cushichichij, manaraj alli yachajcunataca yachachipaichij. Tucuicunahuan alli caichij’ nircami (1 Tesalonicenses 5:14). Desanimarishca huauqui panicunata animangapajca maipica alli uyashpa, mana cashpaca ‘cancunataca achcatami cꞌuyanchij’ nishpami ayudai tucunchij. Diosca paita sirvijcunata ayudajtaca allimi yachan. Proverbios 19:17-pica: “Maijanpish huajcha runata llaquishpa imata cushpaca, Mandaj Diosman mañachishca shinami. Chai allita rurashcamantaca, cutichishcami canga” ninmi. w21.11 pág. 10 párrs. 11, 12

¿Shamuj punllacunapajca ima shinataj allichirina canchij? Minishtirishca cosascunata charishpa Jehová Diospaj amigos cashcamantami cushilla sintirina canchij. Jehová Diosta ashtahuan rijsishpaca Magog llajtata mandaj Gog ñucanchijta llaquichisha nijpipish, Jehová ñucanchijta ayudanapimi tucui shunguhuan crishun. Cai punllapaj versopi nishca shinaca Davidca Jehová, paita ayudashcatami ña ricushca carca. Chaimantami Jehová Diospi confiashpa catirca. Davidca jovenraj cashpaca Goliat runahuanmi macanacurca. Chaipimi paica: “Mandaj Diosmi cantaca ñuca maquipi churanga” nirca (1 Samuel 17:46). Qꞌuipacarin David, mandaj Saulpaj trabajacujpica Saulca paitaca achca cutinmi huañuchisha nirca. Chai ratoca Jehová Diosca Davidta cuidanataca manataj saquircachu (1 Samuel 18:12). Davidca Jehová Dios ñaupa punllacunapi ima shina ayudashcataca allimi yacharca. Chaimantami Davidca Jehová Dios paita ayudashpa catinataca mana cungarirca. Chashnallataj Jehová Dios ñucanchijta ima shina ayudashcata yuyarishpaca, shamuj punllacunapipish ñucanchijta ayudanapimi confiashun. w22.01 págs. 6, 7 párrs. 14, 15

Jehová Diosca imata rurangapaj, imata pajtachingapajca pacienciahuanmi ruran. Paica paipaj shutita jatunyachingapaj, shujtajcunata beneficiangapajmi chashna ruran. Por ejemplo, Jehová Dios cai Allpata gentecunapaj ima shina allichishcata ricushun. Bibliapica Jehová Diosca cai pacha mashna medina cashcataca allimi ricurca. Cai pachapi callari rumicunataca allimi churarca ninmi (Job 38:5, 6). Shinallataj Jehová Diosca pai rurashcacuna alaja cashcata ricungapajmi tiempota surcurca (Génesis 1:10, 12). Angelcunaca Jehová Dios tucui cosascunata alajata ruracujta ricushpaca cushillami sintirishcangacuna. Chaimantami paicunaca Yayitu Diostaca cushicushpa alabarcacuna. ¿Caimantaca imatataj yachanchij? Jehová Diosca jahua pachata, cai pachata, tucui imalla tiyajcunataca achca huaranga huatacunatami pacienciahuan rurarca. Yayitu Diosca pai tucui rurashcacunata ricushpaca tucui chaicuna yallitaj sumaj, alli cashcatami ricurca (Génesis 1:31). w21.08 págs. 9, 10 párrs. 6, 7

Shuj chꞌimbapuraipica Jesusca shuj runa viajeman rishcatami parlarca. Cai runaca manaraj viajeman rishpami paipaj esclavocunamanca cada unoman talento cullquita mingarca. Cada esclavocuna imata rurai tucushcata ricushpami shujmanca 5 talento cullquita mingarca. Cutin caishujmanca ishqui talento cullquita mingarca. Caishujmanpish shuj talento cullquitami mingarca. Ishqui esclavocunaca sinchita trabajashpami amopajca ashtahuan cullquita ganarca. Pero shuj talento cullquita chasquijca amopajca ima cullquita mana ganarcachu. Chaimi amoca paitaca despidirca. Ishqui talento cullquita chasquij esclavoca pichca talento cullquita chasquij esclavo shinami sinchita trabajarca. Chashna sinchita trabajashcamantami ishqui talento cullquihuan mirachirca. Chaita yachashpami paipaj amoca paitaca achcata felicitarca. Shinallatataj ashtahuan responsabilidadcunatapishmi mingarca. w21.08 págs. 21-23 párrs. 7, 9, 10

Jehová Diosca cai tucuri punllacunapica achca pacienciatami charishca. Paica tucuicuna arrepintirishpa paita sirvichunmi munan (2 Pedro 3:9). Pero Yayitu Diosca mana tucui vida shuyangachu. Paita mana chasquisha nijcunaca ima shinami Faraón causashca punllacunapi tucuchishca carca chashnallatajmi tucuchishca canga. Jehová Diosca faraontaca: “Ñucaca cantapish, can mandacun gentecunatapish llaquichingapaj ñuca maquita chutajpica ñami tucuicuna cai pachamanta illanguichijman. Ñucaca imatapish rurai tucuj cashcata canpi ricuchishpa, tucui cai pachapi ñuca shuti huillashca cachunmi cantaca churarcani” ninmi (Éxodo 9:15, 16). Tucui gentecunami Jehová Dioslla alli Mandaj cashcataca yachangacuna (Ezequiel 38:23). Cai punllapaj versopi tiyaj profeciaca Diosta mana sirvisha nijcuna Faraón shina tucurina cashcatami ricuchin. w21.09 págs. 18, 19 párrs. 17, 18

¿Pi cambaj cꞌuyashca congregacionmanta llujshijpica shungumanta nanarishcachu sintiringui? ¿Maijan huauqui panicuna paicuna nishcacunahuan canta llaquichijpica imatataj rurana cangui? Huauqui panicunaman pacienciata ricuchingapaj esforzarishunchij (Santiago 3:2). Juchayuj cashcamantami panicunaca ruraihuan o paicunapaj rimaihuanmi llaquichi tucuncuna. Apóstol Pabloca: ‘Maijan caishujta pꞌiñashpa juchachijpica, caishuj chaishuj ahuantanacushpa, perdonanacuichij’ nircami (Colosenses 3:13). Llaquilla caj familiacunaca paicunata cꞌuyachun animachunmi minishtincuna (Hebreos 10:24, 25). Huaquinpica huaquin huauqui panicunaca paicunapaj familiacunata congregacionmanta llujchijpica huaquin huauqui panicunaca paicunahuan mana parlashcata, paicunamanta caruyashcatami sintincuna. Pero chaitaca mana ruranachu canchij. Joven huauqui panicunaca paicunapaj yaya mamata congregacionmanta llujchijpica paicunata animachun, paicunata felicitachunmi ashtahuantajca minishtincuna. w21.09 págs. 29, 30 párrs. 13, 14, 16

Jovenlla huauqui, mayorlla huauquihuan parlashpaca ishquindijmi animarishca sintiringacuna (Romanos 1:12). Jovenlla huauquica Diosta sirvijcunata Jehová Dios ima shina cuidashcatami tucui shunguhuan cringa. Mayorlla huauquica paimanta preocuparishcatami cuentata cunga. Mayorlla huauqui panicuna Jehová Dios paicunata bendiciashcata jovencunaman parlajpica Diosca cushillami sintiringa. Mayorcunaca ña mana jovencuna shinachu can. Pero paicunaca Yayitu Diosta sirvinata manataj saquishcamantami huatacuna pasajpipish Jehová Diospajca valishca can (1 Tesalonicenses 1:2, 3). Paicunaca achca huatacunatami Yayitu Dios paipaj espíritu santohuan yachachichun saquishcacuna. Chaimanta mayorlla huauqui panicunata ashtahuan rijsishpaca paicunatami valorashun. Paicunamantapish achcatami yachashun. Chaicunata rurashpaca paicunataca shuj valishca diamante rumita shinami ricushun. Jovencunapish mayorcunapish, paicunapura valoranacushpaca congregaciontami achcata beneficiangacuna. w21.09 pág. 7 párrs. 15-18

Shujtajcunata sinchita juzganapaj randica Jehová Dios shina paicunata llaquingapaj esforzarishunchij (Efesios 2:4). Llaquij cashpaca shujtajcunapajmi allita rurashun. Chaimanta tucuicunami familiapi, congregacionpi, gentecunaman Diosmanta huillashpa paicunata llaqui tucunchij. ¿Ima shinataj ayudai tucunchij? Tal vez maijan huauqui panichari animota minishtin. Paicuna minishtijpica micunata apashpa o ima cosascunahuanmi ayudai tucunchij. Cutin shuj huauquita o panita testigo de Jehová cachun saquijpica paicunata animangapaj esforzarishunchij. Gentecunamanpish Yayitu Diosmanta huillangapaj esforzarishunchij (Job 29:12, 13; Romanos 10:14, 15; Santiago 1:27). Yayitu Diosca llaquij Diosmi can. Shujtajcunamanta preocuparishpaca paicuna ayudachun minishtishcatami yachashun. Paicunata ayudashpaca llaquij cashcatami ricuchishun. Cai cualidadta pajtachishpaca Jehová Diostami cushichishun. w21.10 pág. 13 párrs. 20-22

Salmo 23-pica Davidca Jehová Diosta sirvijcuna bendicioncunata chasquishcata, Diospish paicunata pushashcatami parlarca. Chashna cajpipish Davidca paipaj causaipi problemacuna tiyanatami yacharca. Chaimantami paica maipica desanimarishca, amsa pugru pambata puricushca shina cashcanga. Contracunatapishmi charirca. Pero Jehová Dios paita michij cashcataca allimi yacharca. Chaimi Davidca: “Ima llaqui japinata mana manchashachu” nirca. ¿Davidca imamantataj “ima illajpish” mana purirca? Paica cushilla sintiringapaj achca cosascunata mana minishtishcatami intindirca. Ashtahuanpish Jehová Dios ima cushcacunallahuan cushilla sintirinatami yacharca. Ashtahuancarin Davidpajca Jehová Diospaj bendicionta charina, pai cuidacushcata yachanami importante carca. ¿David nishca shimicunamantaca imatataj yachanchij? Maipica ima cosascunata charinaca allimi can. Pero chai cosascunata ñucanchij causaipi punta lugarpi churanami mana alli can. w22.01 págs. 3, 4 párrs. 5-7

Ñaupa punllacunamantami Diosta sirvijcunaca gentecunaman predicashcacuna. Pero gentecunaca mana uyashcacunachu. Por ejemplo, Noeca achca huatacunatami Diosmanta predicarca (2 Pedro 2:5). Noeca predicashcata gentecuna uyachunmi munaj carca. Pero Jehová Diosca Noeman shuj arcata rurachun mandashpaca: “Chaimanta canpish, cambaj churicunapish, cambaj huarmipish, cambaj churicunapaj huarmicunapish chai jatun huambuj huasiman yaicunguichij” nircami (Génesis 6:18). Noeca Jehová Dios ima laya arcata rurachun mandashcata yachashpami paica chai arcapi mana tucui gentecuna yaicuna cashcata cuentata curca (Génesis 6:15). Chai punllacunapica Noé, paipaj familiacunallami quishpirirca (Génesis 7:7). ¿Jehová Diosca Noetaca canca mana alli yachachij mana alli predicajmi cangui nishpachu nirca? Mana. Ashtahuanpish Noé cazushcatami Jehová Diosca valorarca (Génesis 6:22). w21.10 págs. 26, 27 párrs. 10, 11

¿Rutca cai shimicunata uyashpaca ima shinashi sintirishcanga? Rutca Noemita ayudangapajmi achcata esforzarirca. Paica pai llaquilla cajpipish animarcami. Paihuanmi huacarca. Sinchi punllacunapica manataj saquircachu. Shinapish Noemica: “Mandaj Diosca chushaj maquillatamari tigrachimun” nircami. Rutca chaita uyashpaca Noemí paita mana tanto valorashcatami ricushcanga. Chaita yachashpaca Rutca llaquillami sintirishcanga. Pero Noemitaca manataj saquircachu (Rut 1:3-18). Maipica shuj panica desanimada cashcamantachari paita ayudasha nijpica paica mana ayudachun munan. Shinallataj sinchi shimicunatapishchari nin. Pero ñucanchijca resintirishca saquirinapaj randica paita ayudangapajmi esforzarina canchij. Jehová Diostapish cashna llaquilla sintirijcunata ayudangapaj, paicunamanta amataj caruyangapaj fuerzata cushpa ayudachunmi mañana canchij (Proverbios 17:17). Por ejemplo, maipica shuj panita ayudasha nijpica tal vez paica: ‘Mana minishtinichu’ nishpachari puntaca cutichinga. Pero cꞌuyaita ricuchinata manataj saquishpaca paita ayudangapajmi esforzarishun (Gálatas 6:2). w21.11 págs. 11, 12 párrs. 17-19

Bibliapica tucuipi chuya cana, Jehová Diospajlla chꞌicanyachishca cana nisha ninmi. Jucha illaj cashcataca ñucanchij yuyaipi, ruraipi chuya cashpa, Jehová Dios munashca shina paita adorashpa, paihuan alli apanacushpami chaita pajtachi tucunchij. Juchayujcuna cashpapish jucha illaj Jehová Diospaj amigos canata yachashpaca cushillami sintirinchij. Jehová Diosca tucuipi jucha illaj Diosmi can. Pai tiyacun trono ladopi tiyaj angelcunaca Jehová Diostaca: ‘Jucha illaj, jucha illaj, jucha illaj Diosmari cangui’ nircacunami (Isaías 6:3). Cai angelcunaca Dioshuan alli apanacungapajca paicunallatajmi jucha illajcuna can. Chaimantami Diospaj shuj ángel cai Allpaman shamujpica chai lugarca jucha illaj o Diospajlla chꞌicanyachishca lugar carca. w21.12 pág. 3 párrs. 4, 5

Jovencunataca mana testigo familiacuna, profesorcunaca universidadcunapi estudiashpa cullquiyuj tucuchunmi animancuna. Chaita rurashpaca tal vez jovencitocunaca shujtaj cosascunata rurangapajca tiempotaca manachari charingacuna. Cutin congregacionpica yaya mamacuna, huauqui panicunaca jovencitocunataca Jehová Diosta ashtahuan sirvichunmi animancuna. ¿Diosta cꞌuyaj jovencitocunaca alli decidingapajca imatataj rurai tucuncuna? Jovencuna, cancunaca Efesios 5:15-17-pi ima yachachishcapimi yuyai tucunguichij. Chai qꞌuipaca cashna nishpami tapuri tucunguichij: “¿Jehová Diosca ñuca imataj rurachuntaj munan? ¿Ima shinataj Diosta cushichi tucuni? ¿Tiempota alli aprovechangapajca imatataj rurana cani?”. Tucuicunami cai millai mundo ñalla tucurinataca yachanchij. w22.01 pág. 27 párr. 5

¿Santiagoca ima shinataj Jesusta cati callarirca? Jesusca pai causarishpaca Santiagoman, shujtaj apostolcunamanmi ricurirca (1 Corintios 15:7). Santiagoca Jesús causarishca qꞌuipami Jesusta cati callarirca. Jesuspaj apostolcuna Jehová Diospaj espíritu santota chasquingapaj shuyacujpica Santiagopish paicunahuanmi carca (Hechos 1:13, 14). Tiempo qꞌuipacarin Santiagoca chai punllapi Diosta sirvijcunamantami cuerpo gobernantepi sirvij carca (Hechos 15:6, 13-22; Gálatas 2:9). Huata 62-pica jahua pachaman rinata shuyajcunapajmi shuj cartata quillcarca. Cai cartaca cunan punllapi jahua pachaman rinata shuyajcunapajpish, cai Allpapi causanata shuyajcunapajpish valishcami can (Santiago 1:1). Historiamanta parlaj Josefo runaca: “Sacerdotecunata mandaj Ananmi Santiagotaca huañuchichunca mandarca” nircami. Pero Santiagoca huañuna horascamami Jehová Diostaca cai Allpapica tucui shunguhuan sirvirca. w22.01 págs. 8, 9 párrs. 3, 5

Cai punllapaj versopi nishca shinaca “Jehová Diosca ima pruebacunata ama charichunca paimi cuidanga” nishpaca mana yuyanachu canchij. Jesusca huañuna cashpapish Jehová Diostaca tucuipimi cazurca. Ñucanchijpish huañuna cashpapish Jehová Diostaca tucuipimi cazuna canchij (Mateo 16:24, 25). Pero Jehová Diosca mana ahuantai tucushca pruebacunata charichunca mana saquingachu (1 Corintios 10:13). Contracunaca ima shinami Jesusta catirashpa llaquichirca. Chashnallatajmi ñucanchijta llaquichincuna (1 Pedro 2:19, 20). Paicunaca ñucanchij paicuna laya mana allita rurashcamantaca mana llaquichincunachu. Ñucanchij cai mundopaj ruraicunapi mana chagrurijpi, Diosmanta yachachijpimi ñucanchijtaca llaquichincuna (Juan 17:14; 1 Pedro 4:15, 16). Jesusca allimi yacharca imamanta llaquicunata ahuantana cashcata. Cutin huaquin huauqui panicunaca pruebacunahuan cashpaca Jehová Diostaca: “¿imamantataj pruebacunata charichun saquingui?” nishpachari tapuncuna (Habacuc 1:3). Pero Jehová Diosca paicuna chashna tapurijpipish paicunapaj fe mana sinchi cashcata shinaca mana yuyanchu. Chaipaj randica paica alli intindishcamantami cꞌuyaihuan, pacienciahuan ayudan (2 Corintios 1:3, 4). w21.04 pág. 11 párrs. 9, 10

Jehová Dios ñucanchij adorashcata chasquichunca pai munashca shina cꞌuyaihuan, respetohuanmi adorana canchij. Jehová Diosta achcata cꞌuyashcamantami shungumanta adorangapaj tucui pudishcata rurasha ninchij. Jehová Diosta shungumanta mañashpaca paitami adoranchij. Ñaupa punllapica israelitacunaca Jehová Diosmanca inciensotaca alli allichishpami paipaj templopi cujcuna carca. Chashna rurajpica paica cushillami chasquirca. Chashnallatajmi mishquita ashnacuj inciensota cucuj shina ñucanchij shungumanta Jehová Diosta mañajpica paica cushilla chasquinga (Proverbios 15:8; Deuteronomio 33:10). Diosca paita mañacushpa ñucanchij paiman cꞌuyaita, agradicishcata ricuchichunmi munan. Shinallataj ñucanchij ima munashcata, ima shina sintirishcata, imata shuyacushcatapish parlachunmi munan. Chaimanta paita mañagrishpaca shuj mishquijlla inciensota allichicuj shina imata ninata alli yuyashunchij. w22.03 págs. 20, 21 párrs. 2, 7

Armagedón punllapica Jehová Dioslla, Jesusllami picunata quishpichinata o mana quishpichinata decidingacuna (Mateo 25:34, 41, 46). ¿Chai tiempopi paicuna chashna decidishcapica tucui shunguhuanchu confiashun? Si cunanmanta Jehová Diospi confiashpaca shamuj punllacunapipish confiashunmi. Paraíso Allpapica alaja causai tiyanga. Chaipica ñallami panda religioncunapish, gentecunata llaquichij gobiernocunapish, millai gentecunapish mana tiyanga. Shinallataj chaipica mana mayoryashpa alli saludtami charishun. Ñucanchij cꞌuyashca familiacuna huañunatapish ña mana manchashunchu. Diablopish, demoniocunapish 1.000 huatatami huichcashca cangacuna. Tucui llaquicunaca ña mana ashtahuan tiyangachu (Apocalipsis 20:2, 3). Jehová Diospi cunanmanta confiashpaca chai tiempopica cushillami sintirishun. w22.02 págs. 6, 7 párrs. 16, 17

Jesusca paita mana alli tratajpipish paicunahuan alli tucungapajmi esforzarirca. Paita catijcunatapish chashnallataj rurachunmi yachachirca. Diosta sirvijcunataca paicunapura pꞌiñanacushpaca rato alli tucuchunmi yachachirca (Mateo 5:23, 24). Shinallataj Jesusca paipaj apostolcunatapish paicunapuramanta “maijanshi ashtahuan jatun canchij” nishpa pꞌiñanacujpimi, paica ama chashna pꞌiñanacushpa catichun animarca (Lucas 9:46-48; 22:24-27). Shujtajcunahuan alli apanacungapajca paicunata ama llaquichingapaj, pihuanpish pꞌiñanacushpaca alli tucungapajmi esforzarina canchij. Huauqui panicunatapish shujtajcunahuan alli apanacuchunmi animana canchij (Filipenses 4:2, 3; Santiago 3:17, 18). Chaimanta cashna nishpa tapurishunchij: “¿Shujtajcunahuan alli tucungapajca esforzaricunichu? ¿Maijan huauqui o pani ñucata llaquichijpica resintirishcachu saquirini? ¿Shujtajcunahuan alli tucungapajca ñucarajchu esforzarini?”. w22.03 págs. 10, 11 párrs. 10, 11

Bibliapica Diosta sirvijcuna, Jesús shina shungumanta Jehová Diosta sirvinatami huillarca (Salmo 110:3). Cai shimicunaca cunan punllacunami pajtaricun. Cada huatami Diosta sirvijcunaca achca horascunata mana cobrashpa predicancuna. Shinallataj paicunaca huauqui panicunata minishtirishca cosascunahuan ayudangapaj, animangapaj, paicunapaj feta sinchiyachingapajmi tiempota surcuncuna. Ashtahuancarin ancianocuna, siervo ministerialcunaca tandanacuicunapi conferenciata cungapajmi achca horasta allichincuna. Huauqui panicunata visitangapajpishmi tiempota surcuncuna. Paicunaca Jehová Diosta cꞌuyashcamanta, huauqui panicunata cꞌuyashcamantami chaita rurancuna (Mateo 22:37-39). Jesusca paillapi yuyanapaj randica shujtajcunatami ayudarca. Diosta sirvijcunapish paipaj ejemplotami catina canchij (Romanos 15:1-3). Chaita rurashpaca beneficiarishunmi. w22.02 pág. 20 párrs. 1, 2

Israel llajtapica casin la mayoría gentecunami agriculturapi trabajajcuna carca. Pero shujtajcunapaj trabajajcunamanca trabajashca huashallatajmi pagana carca. Shuj trabajadorman chai chishillataj cullquita mana pagajpica paica familiata mantiningapajmi cullqui illaj saquirij carca. Chaimantami Jehová Diosca: “Huajcha cashcamanta paica chai ganashcallahuan causajmi” nirca (Deuteronomio 24:14, 15; Mateo 20:8). Cunan punllacunapica achca trabajadorcunaca mana cada punlla cullquita cobrancunachu. Paicunaca quillapi shuj cutin o ishqui cutinmi cobrancuna. Pero huaquin jefecunaca paicunapaj trabajadorcunamanca mana cabalta pagancunachu. Trabajadorcunaca trabajota mana charishcamanta, familiata mantiningapajmi ashallata pagajpipish trabajashpa catincuna. Mana cabalta pagaj jefecunaca chashna rurashpaca shuhuacushcatami ricuchincuna. Diosta sirvijcunaca trabajadorcunata charishpaca Levítico 19:13-pi nishca shinaca cabaltami pagana can. w21.12 pág. 10 párrs. 9, 10

Jesusca achca llaquicunata apashcamantami yacunaihuan cashcanga. Jesusca ima shina sintirishcataca mana pingashpami shujtajcunaman huillarca. Ñucanchijpish imapi ayudachun minishtishpa o ima shina sintirishcataca mana pingashpami shujtajcunaman huillana canchij. Por ejemplo, mayorlla o ungushca cashpaca shujtajcuna ayudachunmi mañana canchij. Tal vez comprasta rurachun, doctorpajman pushachunmi ayudata mañana canchij. Desanimarishca cashpapish congregacionta pushaj huauquiman, mana cashpaca experienciata charij huauquiman o panimanmi ayudachun huillana canchij. Paicunami animai tucuncuna (Proverbios 12:25). Huauqui panicunaca ñucanchijtami ayudasha nincuna (Proverbios 17:17). Pero paicunaca ñucanchij imata minishtishcata o imata yuyashcataca mana yachancunachu. Chaimantami ñucanchijca tucui ima shina sintirishcataca huillana canchij. w21.04 págs. 11, 12 párrs. 11, 12

Tiempo completopi sirvij huaquin huauqui panicunaca shujtaj asignaciontami chasquishcacuna. Cutin shujtajcunaca ña mayoryashcamantami paicuna munashca asignacionta saquishcacuna. Chashna cambiocuna tiyajpica maipica llaquillami sintirinchij. Ñaupa punlla laya Jehová Diosta mana sirvi tucushpapish paita sirvishpa cati tucushcatami yuyarina canchij. Jehová Diosca paipaj munaita pajtachingapajca tucui ñucanchijcunatami paita ayudachun saquishca (1 Corintios 3:9). Jehová Diosca ñucanchijtaca cꞌuyashpami catinga. Caita yachashpaca imamanta ima cambiocuna tiyashcata mana yuyashpalla saquirinachu canchij. “Ñaupa punllacunapimi Jehová Diostaca ashtahuan alli sirvi tucurcani” nishpapish mana yuyashpalla saquirinachu canchij (Eclesiastés 7:10). Ima cambiocuna tiyajpipish Jehová Diosta cushillami sirvi tucunchij. w22.03 pág. 17 párrs. 11, 12

¿Jehová Diosca picunamantaj cꞌuyaita ricuchinataca manataj saquin? Bibliapica huaquin cosascunata cꞌuyai tucushcatami nin. Por ejemplo, chagracunata, correginata, yachaj canata, vinota, aceiteta (2 Crónicas 26:10; Proverbios 12:1; 21:17; 29:3). Pero cꞌuyaita ricuchinata manataj saquinaca cosascunapajca mana canchu. Ashtahuanpish gentecunaman cꞌuyaita ricuchinata manataj saquinami can. ¿Shinaca Diosca tucui gentecunamanchu cꞌuyaita ricuchinataca manataj saquin? Mana. Paica paihuan mana alli apanacujcunamanca cai cualidadtaca mana ricuchinchu. Ashtahuanpish paipaj amigocunallamanmi cꞌuyaita ricuchinataca manataj saquin. Shinallataj paicunapajca sumaj causaitami cusha nin. Jehová Diosca tucui gentecunamanmi cꞌuyaita ricuchishca. Jesusca Nicodemo runamanca: ‘Taita Diosca, cai pachapi causajcunataca c’uyashpami, paipaj shujlla Churita cacharca. Pipish paita crijca ama chingarishpa, ashtahuanpish huiñai causaita charichunmi cacharca’ nircami (Juan 3:1, 16; Mateo 5:44, 45). w21.11 págs. 2-4 párrs. 3, 6, 7

Cai mundopi causanaca mana jahuallachu can. Shamuj punllacunapicarin achca llaquicunahuanmi chꞌimbapurashun (Mateo 24:21). Ñallami Yayitu Jehová Diosca cai tucui mana allicunataca tucuchinga. Cai tucui llaquicunataca manataj yuyarishunchu (Isaías 65:16, 17). Chaimantami cunanmanta llaquicunata ima shina ahuantashpa catinata yachana canchij. Jesusca: ‘Ahuantashpa ñucata catirajcunaca quishpiringuichijmi’ nircami (Lucas 21:19). Llaquicunata ahuantashpa catingapajca shujtajcunapish ima shina llaquicunata ahuantacushcatami yachana canchij. Jehová Diosca achca huatacunatami llaquicunata ahuantashpa caticushca. Paimi ñucanchijmanca llaquicunata ima shina ahuantanata yachachin. Cai mundota Diablo mandacushcamantami achca problemacuna tiyan. Jehová Diosca cai llaquicunata, Diablotapish ratomi chingachi tucun. Pero paica pai agllashca punlla chayangacamami ahuantashpa catinata decidishca (Romanos 9:22). w21.07 págs. 8, 9 párrs. 2-4