Septiembre

Huaquin gentecunaca Jesús alli yachachij cajpipish, milagrocunata rurachunmi mañarcacuna. Pero paicuna munashca horas Jesús mana milagrocunata rurajpimi paicunaca ñitcarishpa Jesuspi mana crircacuna (Mateo 16:4). ¿Mesiasmantaca Bibliapica imatataj yachachin? Mesiasmanta parlashpaca profeta Isaiasca: “Mana capariringachu. Mana jatun shimihuan rimangachu. Pai huillashcaca ñancunapica mana uyaringachu” nircami (Isaías 42:1, 2). Jesusca Dios mingashcata pajtachicushpaca paita jatunyachichunca mana munarcachu. Chaimanta jatun templocunata mana rurarcachu. Shinallataj fariseocuna shina manchanai, rijsishca churanacunatapish yachachingapajca mana churarircachu. Paica jatun yachachij nishca shuticunahuan cayachunpish mana munarcachu. Jesusca paipaj causai peligropi cajpipish mandaj Herodesta cushichingapajllaca mana milagrocunata rurarcachu (Lucas 23:8-11). Jesusca huaquinpi milagrocunata rurashpapish paipajca huillanami ashtahuan valishca carca. Chaimi paica paipaj discipulocunamanca ‘huillangapajmi shamushcani’ nirca (Marcos 1:38). w21.05 pág. 4 párrs. 9, 10

Alli shungu gentecunaman yachachingapaj mashcashunchij (Hechos 13:48). Paicuna Jesuspaj discipulocuna tucuchunca Biblia yachachishcacunata intindichun, chasquichun, paicunapaj causaipi pajtachichunmi ayudana canchij (Colosenses 2:6, 7; 1 Tesalonicenses 2:13). Pero congregacionpi caj tucuicunami yachacujcunaman cꞌuyaita ricuchishpa, tandanacuicunaman rijpi paicunata alli chasquishpa ayudana canchij (Juan 13:35). Yachachijca yachacuj ima panda crishcata saquichun o mana alli ruraita saquichunmi achca tiempota yachachishpa pasana canga (2 Corintios 10:4, 5). Chashna ayudana mana jahualla cajpipish tiempohuanca yachacujcunaca bautizaringacunami. w21.07 pág. 3 párr. 6

¿Testigo de Jehovacunaca Jehová Dios munashca shina adorashcataca tucui shunguhuanchu crinchij? ¿Jehová Diosca cunan punllapi ñucanchij ima shina paita adoracushcataca chasquinchu? Apóstol Pabloca Diospaj Shimita alli estudiashcamantami paica Diospaj yachachishcacuna verdadtaj cashcata tucui shunguhuan crirca (1 Tesalonicenses 1:5). Paica alli huillaicunaca Diosmantami shamun nircami (2 Timoteo 3:16). Pabloca Diospaj Shimita alli intindishpami Jesús Mesías cashcata intindirca. Pero judiocunaca Jesús Mesías cashcata yachangapajca Bibliata mana investigarcacunachu. Paicunaca Diostami sirvinchij nishpapish paicunapaj ruraicunahuanca Diosta mana sirvishcatami ricuchircacuna (Tito 1:16). Shinapish Pabloca Diospaj Shimipi ima partecunallata crinataca mana agllarcachu. Ashtahuanpish paica tucuitami huillarca, tucuitami crirca (Hechos 20:27). w21.10 pág. 18 párrs. 1, 2

Ñucanchijca gentecunaman yachachishpa, huillashpaca shuj plantitata tarpucuj shina, yaquituta churacuj shinallami canchij. Pero, Jehová Diosmi paicunataca shuj plantata huiñachij shina paita sirvichun ayudan (1 Corintios 3:6, 7). Jehová Diospajca gentecunapaj causaica valishcami can. Chaimantami cai tucuri punllacuna manaraj cꞌuchuyamujpi gentecunaman yachachishpa catichun mandashca (Ageo 2:7). Caipi yuyashun, minata japicujcuna allpa ucupi pambarijpica paicunata ayudangapajca achcacunami mashcancuna. Huaquincunalla pambarishcacunata japijpipish tucuicunami mashcashpa ayudarcacuna. Huillacushpapish chashnallatajmi can. Cai mundopi tiyajcunamanta mashnacuna Bibliamanta yachanataca mana yachanchijchu. Pero, Jehová Dios ñucanchijta ayudajpimi tucui ñucanchijca gentecuna Jehová Diosta sirvichun ayudai tucunchij. Boliviamanta Andreas shuti huauquica: “Gentecuna Bibliamanta yachachun, bautizarichunca tucuicunami ayudanchij” ninmi. Chaimanta cushilla huillashpa catishunchij. Chaita rurajpica Jehovami bendiciashpa catinga. w21.05 pág. 19 párrs. 19, 20

Cazaj runaca animalitocunata huañuchingapaj o japingapajca chꞌican chꞌican trampacunatami churan (Job 18:8-10). Chaipajca animalitocuna maipi purijta, maipi micujtami ricun. Chashnami menos pensado animalitocunataca trampapi urmachin. Chashnallatajmi Diablopish Diosta sirvijcunataca trampapi urmachisha nin. Paica ñucanchij imata munashcata, imata rurashcatami alli ricun. Shinami ñucanchijtaca menos pensado trampapi urmachi tucun. Pero Bibliapica cai trampacunapi ama urmangapaj imata rurana cashcata, chai trampacunapi urmashpapish chaimanta caruyangapaj imata rurana cashcatami yachachin. Ima shinami shuj runaca pajarocunata japingapaj umashpa trampacunapi urmachin. Chashnallatajmi Diablopish Diosta sirvijcunataca umashpa trampacunapi urmachisha nin (Jeremías 5:26). Por ejemplo, huaranga huaranga huatacunatami gentecuna jatun tucuchun, shujtajcunapajta munachun trampacunapi urmachishca. Pero Diosta sirvijcuna chai trampacunapi ama urmachunca Jehová Diosca Diablopaj trampacuna imacuna cashcatami yachachin (2 Corintios 2:11). w21.06 pág. 14 párrs. 1, 2

Mayorlla huauqui panicunaca Diospaj organizacionpica valishcacunami can. Diospaj Shimipica yuyajlla huauqui panicunapaj yurajlla ajchacunaca shuj sumaj corona shinami can ninmi (Proverbios 20:29). Maipica mayorlla huauqui panicuna valishca cashcata cuentata cunaca mana facilchu can. Pero joven huauqui panicuna, mayorlla huauqui panicunata valorajcunaca paicunamantami achcata beneficiarincuna. Jehová Diospajca mayorlla huauqui panicunaca valishcami can. Yayitu Diosca paicuna ima shina cajta, ima cualidadcunata charijtaca allimi yachan. Mayorlla huauqui panicuna jovencunaman paicunapaj experienciamanta parlashpa yachachijpica Yayitu Diosca cushillami sintirin (Job 12:12; Proverbios 1:1-4). Shinallataj paita sirvingapaj ahuantashcatapish achcatami valoran (Malaquías 3:16). Mayorlla huauqui panicunaca problemacunata charishpapish paicunapaj fetaca Jehová Diospimi sinchiyachishcacuna. Paicunaca Diosta rijsi horasmantaca Dios cusha nishcacunapipish paicunapaj fetami sinchiyachishcacuna. Jehová Diospaj shutitapish mayoryangacamami gentecunaman predicashpa catishcacuna. Chaimantami Jehová Diosca paicunataca achcata cꞌuyan (Salmo 92:12-15). w21.09 págs. 2, 3 párrs. 2, 3

Cai catij tapuicunapi yuyashun. ¿Ñucallataj alli sintiringapajca shujtajcunata yalli cashcatachu yuyani? ¿Imamantataj congregacionpi sirvingapaj esforzaricuni? ¿Shujtajcunata yalli cashcata ricuchingapajlla o Jehová Diosta tucui shunguhuan sirvingapaj? Bibliaca shujtajcunahuan mana compararichunmi yachachin. Shujtajcunahuan compararishpa, paicunamanta yalli cashcata yuyashpaca jatun tucushunmi. Shinallataj shujtajcunahuan compararishpa paicunamanta menos cashcata yuyashpaca desanimarishunmi (Romanos 12:3). Pero Jehová Diosca ñucanchijtaca alaja cashcallamanta o rijsishca cashcallamantaca mana paipaj puebloman pushamushcachu. Ashtahuanpish paita cꞌuyashcamanta, paipaj Churita cazushcamantami paipaj puebloman pushamushca (Juan 6:44; 1 Corintios 1:26-31). w21.07 págs. 14, 15 párrs. 3, 4

Ñucanchij shungutapish, yuyaitapish mushujyachingapajca Jehová Diostami mañana canchij. Bibliatapishmi estudiana canchij. Estudiashcapipish cutin cutinmi yuyana canchij. Diospaj espíritu santota chasquishpaca shujtajcunahuan compararinatami saquishun. Shinallataj Jehová Diosca ñucanchij jatun tucucushcata ricushpa o envidioso tucucujta ricushpaca chai rato cambiachunmi ayudanga (2 Crónicas 6:29, 30). Jehová Diosca ñucanchij shungutaca allimi rijsin. Por ejemplo, ñucanchijca cada punllami cai mundopaj ruraicunahuan, yuyaicunahuan chꞌimbapuracunchij. Shinallataj juchayujcuna cashcamantami allita rurangapaj siempre esforzaricunchij. Cashna esforzarijta yachashpami Yayitu Diosca ñucanchijtaca achcata cꞌuyan. Jehová Diosca ima shinami shuj mama paipaj huahuaman cꞌuyaita ricuchin chashnallatajmi paita sirvijcunamanca cꞌuyaita ricuchin (Isaías 49:15). Paita sirvingapaj esforzarijpica ñucanchijtaca cada punlla ashtahuan cꞌuyan. Caita yachashpaca cushillami sintirinchij. w21.07 págs. 24, 25 párrs. 17-19

Ñucanchijpish Diosta sirvingapaj imata mingajpica chaita alli pajtachingapaj tucui pudishcata rurashunchij. Congregacionpipish, huillanapipish alli pajtachingapaj sinchita esforzarishunchij (Hechos 18:5; Hebreos 10:24, 25). Por ejemplo, tandanacuicunapica alli comentariocunata cushunchij. Chashnami caishuj huauqui panicunata animashun. Ima demostracionta cuchun mañajpica chaitapish alli pajtachishunchij. Shinallataj congregacionpi imata ayudachun mingajpica puntuales, alli pajtachijcuna cashunchij. Congregacionpi huaquin mingashcacunaca ‘mana imapaj valinchu’ nishpapish ama yuyashunchij. Ashtahuanpish ima mingashcata alli pajtachingapaj esforzarishunchij (Proverbios 22:29). Diosta sirvinapi ocuparishpaca Jehovapaj amigomi tucushun. Shinallataj cushillami sintirishun (Gálatas 6:4). Ashtahuancarin ñucanchij munashca responsabilidadcunata shujtajcuna chasquijpica ñucanchijpish contentosmi sintirishun (Gálatas 5:26). w21.08 pág. 23 párr. 11

Humilde cashpa Jehová Dios yachachichun saquishunchij. Cuerpopi shuj millai ungüi tiyashpaca shungutami anchayachi tucun. Chashnallatajmi ñucanchijca jatun tucushpaca ñucanchij shungu rumiyajpi, Yayitu Diostaca mana shungumanta cazui tucushun. Fariseocunaca rumi shungucuna cashcamantami Jesús, Jehová Diospaj Churi cashcataca mana chasquisha nircacuna (Juan 12:37-40). Chaimantami paicunaca huiñaita causanatapish chingachircacuna (Mateo 23:13, 33). Cutin ñucanchijca Jehová Dios paipaj Shimihuan, paipaj espíritu santohuan yachachichunmi saquina canchij. Chashnami ñucanchijca imatapish alli decidishun. Santiagoca humilde cashcamantami Jehová Dios paita yachachichun saquirca. Paica humilde cashcamantami alli yachachij carca. w22.01 pág. 10 párr. 7

Jehová Diosta mañanata manataj saquijpica paica uyangami (Colosenses 4:2). Maipica Yayitu Diosta mañashca qꞌuipaca ñucanchij mañashcacunata mana rato cutichishcatami yuyanchij. Pero Jehová Diosca ñucanchij minishticun horasmi cutichinga (Hebreos 4:16). Chaimanta Jehová Dios ñucanchij mañashcacunata ñucanchij munashca horaspi mana cutichijpica Diosca pandaricunmi nishpaca mana yuyanachu canchij. Por ejemplo, achca huauqui panicunami Diospaj Gobierno cai millai mundota tucuchichun Diosta mañashpa caticuncuna. Jesusllatajmi chashna mañachun yachachirca (Mateo 6:10). Pero ñucanchij munashca horaspi Yayitu Dios cai millai mundota mana utca tucuchijpi paimanta caruyanaca llaquimi canman (Habacuc 2:3; Mateo 24:44). Chaita ruranapaj randica Jehová Dios cai mana alli mundota tucuchingacamami mañashpa catina canchij. Jehová Diosca cai mana alli mundota tucuchingapajca ñami shuj punllata agllashcata charicun. Chai punlla pajtaringacama shuyanaca tucuicunapaj allimi canga (Mateo 24:36; 2 Pedro 3:15). w21.08 pág. 10 párrs. 10, 11

Humildes huauqui panicunaca ña mayoryashpa Diospaj mana tanto rurai tucushcatami yachancuna. Por ejemplo, superintendente de circuito huauquicunaca 70 huatacunata charishpaca superintendente de circuito canata saquishpami shujtaj asignacionta chasquincuna. Pero cunanca paicunaca jovenlla huauquicuna cai asignacionta pajtachi tucushcatami cuentata cuncuna. Ñaupa punllacunapica levitacunaca 50 huatacunata charishpaca Diospaj carpa huasipi sirvinatami saquina carcacuna. Chai asignacionta charishpaca cushillami pajtachircacuna. Jovencunatapishmi ayudajcuna carca (Números 8:25, 26). Cunan punllacunapish maijan mayorlla huauquicunaca ña mana superintendente de circuito cancunachu. Paicunaca cunanca achca congregacioncunata ña mana visitai tucushpapish paicunapaj congregacionpimi shujtaj huauquicunata animashpa ayudancuna. w21.09 págs. 8, 9 párrs. 3, 4

Jesusca Lucas 15:11-32-pimi shuj chingarishca jovenpaj causaimanta parlarca. Cai jovenca yayata mana cazushpami shujtaj llajtapi causanaman rirca. Chai llajtaman chayashpaca pai munashca shinami causarca. Pero problemacunata charishpaca pai mana allita rurashcatami cuentata curca. Jesusca cai jovenca alli yuyarishpami huasiman tigranata decidirca. Shinallataj yayatapish perdonachunmi mañarca nircami. Cai jovenca paillataj mana alli decisioncunata agllashcata cuentata cushpami cambianata decidirca. Chingarishca jovenca shungumanta arrepintirishcatami ricuchirca. Pushaj ancianocunaca juchata ruraj huauquita panita juzgangapajca Jesús parlashca jovenpaj ejemplomantami yachai tucuncuna. Chashnami juchata rurajcuna de verdadtaj arrepintirishcataca cuentata cungacuna. w21.10 pág. 5 párrs. 14, 15

¿Imataj mana chujchuchishca o tucuchishca canga? Apóstol Pabloca: “Chaimanta mana cuyuchipaj shuj Gobiernota chasquigrishcamantaca Dios yallitaj llaquij cashcata ricuchishcamantami manchaihuan, achca respetohuan, pai munashca shina paitaca adorai tucunchij” ninmi (Hebreos 12:28). Ageo 2:6, 20 al 22-pi nishca chujchui pajtarishca qꞌuipaca Diospaj Gobiernollami tiyanga (Salmo 110:5, 6; Daniel 2:44). Mana achca tiempo tiyanchu. Chaimanta gentecunaca utcami Yayitu Diosta sirvinata agllana can. Cai mundota apoyashpaca tucui chingachishcacunami canga. Pero paicunapaj causaipi cambiocunata rurashpa Jehová Diosta sirvinata decidishpaca huiñai causaitami charingacuna (Hebreos 12:25). Ñucanchijpish gentecunaman predicashpa paicuna alli decisionta agllachun ayudashunchij. Jesús nishca shimicunatapish yuyaipi charishunchij. Paica: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qꞌuipami cai shina causaica tucuringa” nircami (Mateo 24:14). w21.09 pág. 19 párrs. 18-20

Pushaj ancianocunaca llaquilla caj familiacunata animana responsabilidadtami charinguichij (1 Tesalonicenses 5:14). Tandanacuicuna manaraj callarijpi o tucurishca huasha paicunata animangapaj esforzarichij. Paicunata visitashpapish Yayitu Diosta mañaichij. Pudishpaca paicunata predicanaman, familiahuan Diosta adoranamanmi invitai tucunguichij. Ancianocunaca llaquilla caj huauqui panicunamanmi cꞌuyaita ricuchina can. Shinallataj paicuna imapi minishtijpica ayudanami can (1 Tesalonicenses 2:7, 8). Jehová Diosca ‘shujllapish ama chingarichun, ashtahuanpish tucuicuna arrepintirichunmi’ munan (2 Pedro 3:9). Jehová Diosca ñucanchijta achcata cꞌuyashcamantami paipaj Churita curca. Maijan huauqui panicuna jatun juchata rurashpa congregacionmanta caruyajpipish Yayitu Diospajca paicunapaj causaica valishcami can. Paica paimanta caruyashcacuna cutin tigrachun, Jesús parlashca shuj chingarishca jovenmantapish yachachunmi munan (Lucas 15:11-32). w21.09 págs. 30, 31 párrs. 17-19

Tal vez canca mana alli saludta charishcamantachari ña mana tanto huillai tucungui. Pero Jehová Diosta sirvingapaj tucui pudishcata rurashcamantami cushilla sintiringui. Davidhuan ima tucushcapi yuyashun. Shuj cutinca Davipaj familiata, paipaj runacunapaj familiacunataca ima charishca cosascunatami amalequitacunaca shuhuashpa rircacuna. Chaimi Davidca paipaj runacunahuan amalequitacuna shuhuashcata cutin tigra apamurcacuna. David amalequitacunata catishpa risha nijpica 200 runacunaca shaicushcami canchij. Paicunahuanca mana macanacui tucunchijchu nircacunami. Chaimi Davidca huaquin cosascunata cuidashpa saquirichij nirca. Amalequitacunata mishashpa tigrashpaca Davidca tucuicunamanmi imalla cosascunataca igual chaupishpa curca (1 Samuel 30:21-25). Cunan punllacunapish huaquin huauqui panicunaca mana alli saludta charishpapish huillangapajmi tucui pudishcata rurancuna. Chashna rurashpaca gentecuna Jehová Diosta rijsijpi, paicuna Yayitu Diosman mingarishpa bautizarijpica tucuicunami cushilla sintirishun. Gentecunaman yachachingapaj sinchita esforzarijpica Jehová Diosca ñucanchijtami bendicianga. Huillanapi tucui pudishcata rurashpaca cushillami sintirishun (Juan 14:12). Jehová Diospish paita sirvingapaj esforzarishcamantami cushilla sintiringa. w21.10 págs. 27, 28 párrs. 15-17

Ña mayoryashpaca huaquin huauqui panicunaca ñaupa laya Jehová Diostaca ña mana tanto sirvi tucunchijchu nishpami llaquilla sintirincuna. Pero fuerzasta mana tanto charishpapish paicunapaj experienciahuan, ima yachashcacunahuanmi jovencunataca Jehová Diosta sirvichun, ashtahuan alli responsabilidadcunata charichun ayudai tucuncuna. Mayorlla huauqui panicunaca jovenlla huauqui panicunata ayudangapajca humildesmi cana can. Humildecunaca shujtajcuna paicunata yalli cashcatami yuyancuna (Filipenses 2:3, 4). Humilde mayorlla huauqui panicunaca mana tucuitapish paicuna munashca shina rurachunchu shuyan. Ashtahuanpish paicunaca imata rurangapajpish Biblia yachachishca shina rurana cashcatami cuentata cuncuna (Eclesiastés 7:10). Mayorlla huauqui panicunaca jovencunamanca paicuna imata yachashcata parlashpami ayudai tucuncuna. Paicunaca cai tiempopi huaquin cambiocuna tiyashcamanta mushuj yuyaicunata yachana cashcatapishmi cuentata cuncuna (1 Corintios 7:31). w21.09 págs. 8, 9 párrs. 1, 3

Jehová Diosca tucuipi jucha illaj cashcamantami ñucanchij mana alli ruraicunata rurachunca mana mañan. Israelitacuna causan punllacunapica sacerdotecunata mandajcunapaj frentepi churana fierropica ‘Mandaj Diosca jucha illajmi can’ nishca sellotami churajcuna carca. Chashnami Jehová Dios tucuipi jucha illaj cashcata ricuchircacuna (Éxodo 28:36-38). Israelitacunapaj punllacunapica sacerdotecunata mandajpaj frentepi tiyaj fierropi Jehová Diosca jucha illajmi can nishca shimita yachashpami pai tucuipi jucha illaj cashcataca alli yachai tucurcacuna. ¿Pero shuj israelita sacerdotecunata mandajpaj frentepi ima quillcashcata mana ricui tucushpaca, Jehová Dios jucha illaj cashcataca yachai tucurcachu? Ari. Ñaupa punllacunapica Diospaj leycunataca cꞌaricunaman, huarmicunaman, huahuacunaman, tucuicunamanmi voz altapi liyijcuna carca (Deuteronomio 31:9-12). Ñucanchijpish chaipi cashca cashpaca cai shimicunatami uyanchijman carca. Bibliapica: ‘Ñucaca Mandaj cancunapaj Diosmi cani. Ñuca jucha illaj caj shinallataj cancunapish ima jucha illajlla cana canguichij’ ninmi (Levítico 11:44, 45; 20:7, 26). w21.12 pág. 3 párrs. 6, 7

Maijan huauqui panicunaca minishtirishca cosascunata mana tanto charishcamantami yallitaj preocuparincuna. Tal vez paicuna causan llajtapi yallitaj pobreza tiyashcamanta, trabajo mana tiyashcamantami familiata mantiningapajca cullquita mana tanto charincuna. Mana cashpaca familiata mantinij huañushcamantachari familiacunaca minishtirishca cosascuna illaj saquirincuna. Yallitaj preocuparinapaj randica Jehová Diospimi confiana canchij. Paita punta lugarpi churajpica paillatajmi ñucanchijmanca minishtirishca cosascunata cusha nin (Mateo 6:32, 33). Yayitu Diosca pai imata pajtachisha nishcataca pajtachintajmi (Deuteronomio 8:4, 15, 16; Salmo 37:25). Diosca pajarocunata, sisacunata cuidanataca manataj saquinchu. Chaimanta ñucanchijca ¿imatataj micushun, imatataj churashun? nishpaca mana preocuparinachu canchij (Mateo 6:26-30; Filipenses 4:6, 7). Ima shinami yaya mamacunaca paicunapaj huahuacuna minishtirishca cosascunata charichun preocuparin, chashnallatajmi Jehová Diospish paita sirvijcunaman minishtirishca cosascunata cushpa cuidanga. w21.12 págs. 17, 18 párrs. 4, 5, 8

Tal vez maipica Diosta mana sirvij gentecuna o huauqui panicunami ñucanchijta llaquichishca. Por ejemplo, Joseca paipaj huauquicuna paita llaquichijpica chai llaquicunallapi yuyashpaca mana saquirircachu. Ashtahuanpish Yayitu Diosta sirvina yuyaillami carca. Chashna José pacienciahuan shuyashcamantami Jehová Diosca paita bendiciarca. Tiempo huashaca Joseca paipaj huauquicunatami perdonarca. Jehová Dios paita ima shina bendiciashcatapishmi cuentata curca (Génesis 45:5). Ñucanchijpish José shinallataj Yayitu Diospajman cꞌuchuyashpa, Dios llaquicunata tucuchingacama ahuantashpaca cushillami sintirishun (Salmo 7:17; 73:28). Pi ñucanchijta llaquichijpi, ima sinchi problemata charishpaca Jehová Dios shungupi llaquilla cajcunapaj cꞌuchullapi cashcatami yuyarina canchij (Salmo 34:18). Paica ñucanchij pacienciahuan shuyajpi, ñucanchij ima shina sintirishcata paiman huillajpica achcatami cꞌuyan (Salmo 55:22). Jehová Diosca tucuicunapaj Juezmi can. Paica imalla pasacujtaca allimi yachan (1 Pedro 3:12). Chaimanta sinchi llaquicunata mana allichi tucushpapish Yayitu Dios allichingacama pacienciahuan shuyashpa catishunchij. w21.08 págs. 11-13 párrs. 14, 16

Jehová Diospajman cꞌuchuyangapaj tiempota alli aprovechashunchij. Valishca ruraicunata punta lugarpi churashunchij. Maipica huaquin cosascunatami rurasha ninchij. Pero tiempota alli aprovechangapajca maijan valishca cashcatami ricuna canchij. Jesús, Mariata, Martata visitajpi ima tucushcata ricushunchij. Martaca Jesusta achcata cꞌuyashcamantami paica achca micunata yanushpa carasha nirca. Pero Mariaca Jesús ima yachachishcata uyanatami decidirca. Martaca yanunata decidishpaca ima mana allitaca mana rurarcachu. Pero Jesusca: “Mariaca ashtahuan allitami agllashca” nircami (Lucas 10:38-42). Tiempohuanca Mariaca ima micushcataca cungarishcangami. Pero Jesús yachachishcataca manataj cungarishcangachu. Mariaca Jesús yachachishcata uyangapajmi tiempota surcurca. Ñucanchijpish chashnallatajmi Jehová Dioshuan pasangapaj tiempota surcuna canchij. w22.01 pág. 27 párrs. 5, 6

Acabca llaquirishpapish paipaj rurashcacunahuanmi de verdadtaj mana arrepintirishcata ricuchirca. Paica Israel llajtapica Baal diosta adoranata mana anchuchircachu, israelitacunatapish Jehová Diosta cutin adorachun mana ayudarcachu. Jehová Diosca profeta Jehuhuanmi imamanta Acabta ayudarcangui nishpa rimachun cacharca. Jehuca: “Diosta mana manchaj runamari” nircami (2 Crónicas 19:1, 2). Caipi yuyashun. Acab de verdadtaj arrepintirishca cajpica Jehová Diosca Acab millai cashcata, paita pꞌiñashcataca mana huillachinmanchu carca. Chashnami yachanchij Acabca llaquirishpapish pai de verdadtaj shungumanta mana arrepintirishcata. ¿Acabpaj ejemplomantaca imatataj yachanchij? Elías, Acabta cambaj familiacunami llaquicunata charinga nijpica paica puntaca llaquirircami. Pero paipaj mana alli ruraicunahuanmi shungumanta mana arrepintirishcata ricuchirca. Shungumanta arrepintirishcataca ruraicunahuanmi ricuchina can. Mana llaquirishpalla saquirinachu can. w21.10 pág. 3 párrs. 4, 5, 7, 8

Isaiasca profetami carca. Paipaj huarmitapish Bibliapica profetami carca ninmi. Tal vez paipaj huarmica profeta layallatajmi huaquin trabajocunata rurashcanga (Isaías 8:1-4). Paicunapajca Jehová Diosta punta lugarpi churanami importante carca. ¿Ima shinataj cazarashcacunaca Isaiaspaj, paipaj huarmipaj ejemplota cati tucuncuna? Jehová Diosta ashtahuan sirvingapajmi esforzari tucuncuna. Shinallataj cancunapaj fetapish sinchiyachishpa, ishquindij Bibliapi tiyaj profeciacunamanta estudiashpa, ima shina chai profeciacuna pajtarijtapishmi yachana canguichij (Tito 1:2). Shinallataj Bibliapi tiyaj profecías ima shina pajtarichun chaipi imata rurai tucushcatapishmi yachana can. Por ejemplo, Jesusca manaraj cai shina causai tucurijpica tucui llajtacunapimi Diosmanta alli huillaicunaca huillashca canga nircami. Bibliapi tiyaj profeciacuna ima shina pajtaricujta yachashpaca cancunapish Jehová Diosta sirvingapajmi tucui pudishcata ruranguichij. w21.11 págs. 16, 17 párrs. 9, 10

Jesusca paipaj mama tal vez viuda cashcamanta pi cuidachunmi ricurca. Chaimantami paipaj cꞌuyashca amigo Juanman paipaj mamata Jehová Diosta sirvishpa catichun, ayudachun mingarca. Chai punllamanta huichimanmi Juanca paipaj mamata shina cuidashpa catirca. Chashnami Jesusca huachari horasmanta huañuna horascama paipaj mama paihuan cajpi paita cꞌuyashcata ricuchirca. ¿Imatataj yachanchij? Maipica ñucanchij familiacunaca ñucanchijtami mana alli tratancuna o saquishpa rincuna. Chaimantami huauqui panicunahuanca ñucanchij familiacunahuanpish yalli alli apanacunchij. Jesusca ‘Jehová Diosmanta mana caruyashpa, Jehová Diospaj organizacionpi catishpaca achca huauquicunata, panicunata, mamacunatami charinguichij’ nircami (Marcos 10:29, 30). Tucuicuna Jehová Diosta tandalla sirvishcamanta, huauqui panicunaman cꞌuyaita ricuchishcamantami cushilla sintirinchij (Colosenses 3:14; 1 Pedro 2:17). w21.04 págs. 9-11 párrs. 7, 8

Cꞌuyaita ricuchinata manataj saquishpaca desanimarishcacunata ayudangapajmi sinchita esforzarishun. Ñaupa punllacunapi Diosta sirvijcuna ima shinami cꞌuyaita ricuchinata manataj saquircacuna, chashnallatajmi cunan punllacunapish huauqui panicunaca cꞌuyaita ricuchinata manataj saquincuna. Por ejemplo, acapana, allpa chujchui tiyashcata yachaj chayashpaca huauqui panicunata imahuan ayudangapajmi tapuncuna. Shinallataj shuj huauqui o pani cullqui illaj cajta yachashpaca paicunata ayudangapajmi tapuncuna. Ñaupa punllacunapi Macedonia llajtapi Jesusta catijcuna ima shinami ayudashpa cushicurcacuna chashnallatajmi cunan punllacunapish ayudancuna (2 Corintios 8:3). Cunan punllacunapish chashnallatajmi congregacionta pushaj ancianocunaca shujtaj huauqui panicuna caishujcunaman cꞌuyaita ricuchinata manataj saquijpica felicitancuna. Chashna paicuna animajpica huauqui panicunaca shujtajcunata animashpami ñaupajman catincuna (Isaías 32:1, 2). w21.11 págs. 11, 12 párrs. 14, 21

Tucuicunami consejocunata cuchun minishtinchij. Maipica ñucanchijllatajmi shujtajcuna consejachun mañanchij. Cutin maipica maijan huauqui panicunaca ña ñucanchij pandarigrijta ricushpami, ama pandarichun ñucanchijman consejocunata cuncuna (Gálatas 6:1). Ancianocunapish ñucanchij ima juchapi urmashca qꞌuipacarin corregincunami. Ima laya cajpipish chasquinallami canchij. Chai consejocunaca ñucanchijpaj allipajllatajmi (Proverbios 6:23). Cai punllapaj versopica ‘yachaisapacuna yachachishcata’ uyachunmi animan. Tucuicunami yachashpa catinata minishtinchij. Chaimantami experienciata charijcunamanta yachana canchij (Proverbios 12:15). Imata rurangapajpish shujtajcuna siempre ayudachunmi minishtinchij. Chaimanta paicuna cushca consejocunata uyashunchij. Chashnami humildecuna cashcata ricuchishun. Jehová Diosca rey Salomonmanca: “Imapish alli cachunca taucapura yuyarinacushpami callarina” nishpami quillcachirca (Proverbios 15:22). w22.02 pág. 8 párrs. 1, 2

Shuj juchayujca arrepintirishpaca mana llaquirishpalla saquirinachu can. Ashtahuanpish paipaj yuyaipi, causaipimi ruraicunahuan cambiashcata ricuchina can. Shinallataj tucui mana allicunatapish huashaman saquishpami Yayitu Diospaj mandashcacunataca shungumanta cazuna can (Ezequiel 33:14-16). Jehová Diospaj amigo cangapaj cutin importante cashcatapish yuyaipimi charina can. Shuj huauqui o pani jatun juchata rurashcata yachaj chayashpaca ¿imatataj rurana canchij? Shuj amigo jatun juchata rurajpica mana upalla saquirinachu canchij. Chashna saquirishpaca paitami llaquichishun. Jehová Diosca tucuitami alli yachan (Proverbios 5:21, 22). Juchayuj amigocunata ayudangapajca ‘cancunataca ancianocunami ayudasha nin paicunaman huillai’ nishpami ayudana canchij. Paicuna mana huillasha nijpica ñucanchijmi ancianocunahuanca parlana canchij. Chashnami paicunataca de verdadtaj ayudasha nishcata ricuchishun. w21.10 pág. 7 párrs. 19-21

Jesús ima shina shujtajcunata ayudashcamantami ñucanchijpish yachai tucunchij. Bibliapica: ‘Jesusca tucuita saquishpa sirvij shinami tucurca’ ninmi (Filipenses 2:7). Alli sirvijca paipaj amota cushichinatami mashcan. Ñucanchijpish sirvijcunami canchij. Chaimantami Jehová Diosta sirvingapaj, huauqui panicunata ayudangapaj tucui pudishcata rurasha ninchij. Chaipajca cashna nishpa tapurishunchij: “¿Ñuca munashcata huashaman saquishpachu shujtajcunata ayudangapaj listo cani? ¿Jatun Tandanacuna Huasita pꞌichachun mañajpi o Tandanacuna Huasita allichichun mañajpica ayudangapajca listochu cani?”. Ayudana munaita mana charishpaca ima shina sintirishcata Diosman tucuita huillashunchij. Shinallataj ayudana munaita cuchun, chaita pajtachingapaj fuerzasta cuchun mañashunchij (Filipenses 2:13). w22.02 págs. 22, 23 párrs. 9-11

Jesusca alli shungu cashcamantami shujtajcunata ayudarca. Corregichun minishtijpica paicunata corregirca (Mateo 11:29, 30). Por ejemplo, Feniciamanta shuj huarmica paipaj ushushi ungujpimi Jesustaca jambichun mañarca. Jesusca puntaca imamanta mana jambi tucushcatami paimanca intindichirca. Pero qꞌuipaca cai huarmi sinchi feta charijta ricushpaca paipaj ushushitami cꞌuyaihuan jambirca (Mateo 15:22-28). Cutin apóstol Pedroca jatun tucushpami Jehová Diospaj munaita Jesús ama pajtachichun jarcasha nirca. Chaimi Jesusca caishuj discipulocunapaj ñaupajpi paitaca corregirca (Marcos 8:32, 33). Jesusca Pedrota malpi saquingapajllaca mana corregircachu. Ashtahuanpish Pedro, chaipi caj tucui discipulocuna ama jatun tucuchunmi chashna yachachisha nirca. Pedroca tal vez asha pingaihuanmi sintirishcanga. Pero chashna corregishcamantaca achcatami yachashcanga. Ñucanchijpish alli shungu cashcata ricuchingapajca maipica Jesús shinami cꞌuyaihuan shujtajcunata corregina canchij. Shinallataj Bibliahuanpishmi consejota cuna canchij. w22.03 pág. 11 párrs. 12, 13

Jehová Diosta alabashpaca paitami adoranchij (Salmo 34:1). ¿Paitaca ima shinallataj alabanchij? Jehová Diosta alabangapajca paipaj cualidadcunamanta, pai imallata rurashcamantami shujtajcunaman shungumanta parlana canchij. Jehová Dios ñucanchijta cuidashcata, ayudashcata yuyarishpaca shungumantami paita alabashun. Gentecunaman Jehová Diosmanta huillashpacarin paitami alabacunchij. Ima shinami Jehová Diosta mañangapajca alli yuyanchij, chashnallatajmi gentecunamanpish manaraj predicashpaca alli preparanaraj canchij. Gentecunaman shungumanta huillajpica ñucanchij “alabana sacrificioca” Jehová Diospajca sumajmi canga. w22.03 pág. 21 párrs. 8