Octubre

Testigo de Jehovacunaca Diospaj Shimi nishca shinami yachachincuna. Chashna yachachijpi, shujtaj religioncunapi shina mana manchanai fiestacunata rurajpimi huaquincunaca Jehová Diosta sirvinataca mana munancuna. ¿Ama ñitcaringapajca imatataj rurana canchij? Apóstol Pabloca Romapi caj Diosta sirvijcunamanca: “Crinaca huillashcata uyashcamantami shamun, chai uyashcaca Diospaj Shimimanta huillashcami” nircami (Romanos 10:17). Panda religioncunapi alaja, manchanai fiesta cajpipish mana participanachu canchij. Ñucanchijca alli religionpi cashcata cringapajca jahua pachapi señalcuna ricurichun mana minishtinchijchu. Ashtahuanpish ñucanchij fe sinchi cachunca cada unomi Bibliata alli estudiana canchij. Chashnami ima dudacunatapish mana charishun, Jehová Diostapish cushichishun (Hebreos 11:1, 6). w21.05 págs. 4, 5 párrs. 11, 12

Apóstol Pabloca achca llaquicunahuanmi chꞌimbapurarca. Paita macajpi, rumicunahuan shitajpi, carcelpi churajpimi fuerzasta minishtirca (2 Corintios 11:23-25). Paica llaquilla sintirishpaca mana pingashpami pai ima shina sintirishcataca shujtajcunaman huillarca (Romanos 7:18, 19, 24). Ashtahuancarin apóstol Pabloca garrochahuan tujsicuj shina ñuca aichamanta jatun nanaita anchuchihuayari nishpami Diostaca mañarca (2 Corintios 12:7, 8). Jehová Diosca apóstol Pablo llaquicunahuan cajpipish pai mingashcata pajtachichunmi fuerzasta cushpa ayudarca. Por ejemplo, apóstol Pabloca Romapi prezu cashpaca Diospaj alli huillaicunatami achca gentecunapaj ñaupajpi, gobiernocunapaj ñaupajpi difindirca. Shinallataj guardiacunaman, paita visitajcunaman predicashpa catirca (Hechos 28:30, 31; Filipenses 1:13). Jehová Diosca Pablotaca carcelpi cajpimi huaquin cartacunata quillcachun ayudarca. Cai cartacunaca apostolcuna causashca punllacunapipish, cunan punllacunapipish Diosta sirvijcunataca achcatami beneficiashca. w21.05 pág. 21 párrs. 4, 5

Rey Uziasca alli yuyayuj runami carca. Chaimantami Jehová Dios paita bendiciajpi achca macanacuicunapi mishaj carca. Jatun torrecunata shayachij carca. Achca chagracunata charij carca (2 Crónicas 26:3-7, 10). Pero paica jatun tucushpami llaquipi urmarca. Jehová Diosca templopi sacerdotecunalla inciensota rupachichunmi saquij carca. Pero rey Uziasca jatun tucushcamantami chai inciensota rupachisha nirca. Chaimi Jehová Diosca achcata pꞌiñarishpa paitaca lepra ungüihuan castigarca (2 Crónicas 26:16-21). Ñucanchijpish rey Uzías shina jatun tucushpa jatun juchapi ama urmangapajmi cuidarina canchij. Jehová Diospaj ayudallahuan ima responsabilidadta pajtachi tucushcata, imata rurai tucushcatami yuyarina canchij (1 Corintios 4:7). Ñucanchij jatun tucushca cajpica Jehová Diosca pai mingashcacunata pajtachichunca mana saquingachu. w21.06 págs. 16, 17 párrs. 7, 8

Jesusca allimi yacharca paipaj discipulocuna huillanapica mana tucuipi alli llujshina cashcata. Shinallataj Jesuspaj discipulocunata uyajcunaca mashnacuna Diosta sirvi callarishcataca mana yachanchijchu. Jesusta catijcunaca gentecuna uyajllapi cushilla sintirinapaj randica Jehová Dios paicunapaj esfuerzota valorashcamanta cushilla sintirinatami yachana carcacuna. Predicanata manataj saquishpaca huiñai causaitami charishun. Gentecunata predicangapaj, yachachingapaj esforzarishpaca Jehová Dios paipaj espíritu santohuan ñucanchijta ayudachunmi saquinchij. Gentecunata bautizarichun mana ayudashpapish mana shaicushpa huillajpica Jehová Diosca ñucanchijmanca huiñai causaitami cunga (Gálatas 6:7-9). w21.10 pág. 26 párrs. 8, 9

Shuj cutinca Jesuspish, paipaj discipulocunapish punlla enterota gentecunaman predicashcamantami shaicushca carcacuna. Chaimantami samarinaman rircacuna. Pero achca gentecunaca paicunatami catishpa rircacuna. Chaimi Jesusca chai tucui gentecunamanca achca yachaicunata yachachirca. Jesusca cai gentecuna achca llaquicunata charishcata, ima esperanzata mana charishcataca allimi yacharca. Chaimantami paicunata ayudarca. Cunan punllacunapish gentecunaca ñahui ricuillapica cushilla shinami can. Pero ima esperanzata mana charincunachu. Paicunaca chꞌingarishca ovejacuna shina, michij illajcuna shinami causancuna (Efesios 2:12). Ñucanchij causan lugarpi gentecuna ima shina sintirijta ricushpami paicunata ayudana munaita charishun. Paicunata ayudangapajca Bibliamantami yachachina canchij. w21.07 pág. 5 párr. 8

Jatun tucushpa ñucanchijllapi yuyashpa, envidiashpaca shujtajcunata yalli canatami mashcashun. Envidiashpaca shujtajcunapajta charinatami munashun. Shinallataj “paicunaca imata mana charinachu can” nishpami yuyashun. Chashna envidiashpaca shujtajcunata pꞌiñashcatami ricuchishun. Jatun tucuna, ñucanchijllapi yuyana, envidianaca shuj yurata cꞌurucuna asha asha micuj shinami can. Cꞌurucuna yurata asha asha micujpica yuraca urmangami. Chashnallatajmi jatun tucushpa, envidiashpaca llaquipi urmashun (Proverbios 16:18). Yayitu Diosta sirvinatapishmi saquishun. Shujtajcunatapishmi llaquichishun. Ama jatun tucungapaj, ama ñucanchijllapi yuyangapajca apóstol Pablopaj consejotami cazuna canchij. Paica: “Imata rurashpapish mishanacushpa yanga jatun tucunapajllaca ama ruraichijchu. Chaipaj randica, ama jatun tucushpa caishujcunaca canta yalli cashcata yuyashpa, caishuj chaishuj cꞌuyanacuichij” nircami (Filipenses 2:3). w21.07 págs. 15, 16 párrs. 6-8

Huaquin gentecunaca alli religionca tucui paicuna tapushcatami cutichina can nishpami yuyancuna. Paicuna rurashca tapuicunata Biblia mana cutichijpipish chai tapuicunatami cutichina can nincunami. ¿Chaica ciertochu can? Apóstol Pablo, Jesusta catijcunaman imata nishcata ricushun. Paica: “Tucui imalla yachachishcataca, alli cashcata mana alli cashcata alli ricuichij” nircami. Paica chashna nishpaca paipish mana tucuita intindishcatami ricuchirca (1 Tesalonicenses 5:21). Shinallataj Pabloca: ‘Cunanca ashallatami yachanchij. Amsalla espejopi shinallami chingajllata ricucunchij’ nircami (1 Corintios 13:9, 12). Pabloca mana tucuita yacharcachu. Chashnallataj ñucanchijpish mana tucuita yachanchijchu. Pero paica Diosmanta, paipaj munai imalla cashcataca allimi intindirca. Chashnami Pabloca Dios munashca shina adorashcata yacharca. ¿Ima shinataj alli religionpi cashcata yachai tucunchij? Chaipajca Jesús paipaj catijcunata ima shina yachachishcamanta, cunan punllacunapish testigo de Jehovacuna ima shina Diosta sirvicushcamantami yachai tucunchij. w21.10 págs. 18, 19 párrs. 2-4

Mayorlla huauqui panicunaca tiempo completota sirvishpapish, mana sirvishpapish shujtajcunatami ayudai tucuncuna. Chaipajca ima cambiocuna tiyajpipish pajtachishpa, shujtaj metacunata churashpa, imata rurai tucushcahuanmi ayudai tucuncuna. Rey Davidca Diospaj templotami shungumanta ruranata yuyarca. Pero Jehová Diosca cai templotaca joven Salomonmi shayachinga nircami. Chaita yachashpaca Davidca humildadhuanmi paipaj churi Salomontaca tucuipi apoyarca (1 Crónicas 17:4; 22:5). Davidca ñucami experienciata charini. Salomonca huambrarajmi can, mana experienciata charinchu nishpaca mana yuyarcachu (1 Crónicas 29:1). Paica allimi yacharca Jehová Diospaj bendicionhuan Salomón chai templota shayachi tucushcata. Cunan punllacunapish mayorlla huauqui panicunaca mana ñaupa laya responsabilidadta charincunachu. Cushillami Yayitu Diosta sirvishpa caticuncuna. Pero Jehová Dios jovenlla huauquicunata paicuna charishca responsabilidadcunata ayudanatami yachancuna. w21.09 págs. 9, 10 párrs. 4, 5, 8

Maipica Jehová Diosta ashtahuan sirvingapajmi metacunata churanchij. Pero cada uno imata rurai tucushcata pajtachingapajmi metacunata churana canchij. Shujtajcunahuan compararinapajllaca ima metacunataca mana churanachu canchij. Chaita rurashpaca desanimarishunmi (Lucas 14:28). Cada unomi Jehová Diospajca valishca canchij. Jehová Diosca ñucanchijtaca yachaj cajllapi o imata ruranata yachajllapica mana paipaj pueblomanca pushamurcachu. Ashtahuanpish ñucanchijcuna humildecuna cajpi, paimanta yachanata munajpi, paita sirvinata munajpimi paipaj puebloman pushamurca. Paita tucui pudishcahuan sirvijpica Yayitu Diosca cushillami sintirin. Chashna sirvingapaj esforzarishpaca alli shunguta charishcatami ricuchishun (Lucas 8:15). Chaimanta Jehová Diostaca tucui shunguhuan sirvishpa catishunchij. Chashna rurashpaca ñucanchij imata rurai tucushcata pajtachishcamanta, shujtajcunahuan mana compararishcamantami cushilla sintirishun (Gálatas 6:4). w21.07 págs. 23, 25 párrs. 15, 20

Maipica ñucanchijta shujtajcuna mana alli tratajpimi pacienciata charina canchij. Por ejemplo, ancianocunaca shuj huauqui o pani congregacionpi jatun juchata rurajpimi paicunata ayudangapaj Jehová Diospaj ayudata mashcancuna (Santiago 3:17). Shinallataj paicunaca juchata ruraj huauqui panicuna Diospajman cutin tigrachunmi ayudancuna (Santiago 5:19, 20). Congregacionpi cajcunapish tucui chuya cachunmi ricuncuna. Llaquichishca huauqui panicunatapishmi ayudancuna (2 Corintios 1:3, 4). Ancianocunaca congregacionpi maijan huauqui o pani jatun juchata rurajpica ima tucushcatami alli yachanaraj can. Chaita rurangapajca tiempomi minishtirin. Qꞌuipaca Yayitu Diostami ayudachun mañana can. Biblia yachachishca shinami juchata rurajtaca aconsejana can. Juchata rurajmanca minishtishca disciplinatapishmi cuna can (Jeremías 30:11). Ancianocunaca pita juzgangapajca mana ucui jahua juzganachu can. Ancianocuna Jehová Dios munashca shina juzgajpica huauqui panicunaca achcatami beneficiaringacuna. w21.08 pág. 11 párrs. 12, 13

Israel llajtapi dimastij yaricai tiyashcamantami Noemica paipaj cusahuan, paipaj ishqui churicunahuan Moabman rirca. Chai llajtapimi Noemipaj cusaca huañurca. Qꞌuipaca paipaj churicunaca cazararcami. Pero paicunapishmi huañurca (Rut 1:3-5). Cashna sinchi llaquicunata charishpami Noemica dimastij desanimarishca sintirirca. Chaimantami paica maipicarin Jehovata culpai callarirca. Paica: ‘Mandaj Dios llaquichishcamanta jatun llaquitamari rurahuarca. Ñucahuan pꞌiñarishcata ricushpa, pai tucuita ruraj tucuj cashcahuan llaquichijpimi llaquihuan cani’ nircami (Rut 1:13, 20, 21). Jehová Diosca shuj yachaj runapish paita pi llaquichijpica upa runa shina tucujtaca allimi yachan (Eclesiastés 7:7). Chaimi Jehová Diosca Noemiman cꞌuyaita ricuchingapajca Ruthuan ayudarca. Rutca cꞌuyaihuanmi Noemitaca yuyaipipish tranquila sintirichun ayudarca. Diostapish cushilla sirvishpa catichunmi ayudarca. w21.11 págs. 9-11 párrs. 9, 10, 13

Diosta sirvingapaj achcata esforzaricushpapish ñami tucuita rurashcanchij nishpaca mana yuyanachu canchij. Cutin ashtahuan alli predicaj, alli yachachijcuna cangapajmi metacunata churana canchij. Chai metacunata pajtachingapajca ñucanchijcunapi yuyailla canapaj randica shujtajcunata ayudana yuyaillami cana canchij (Proverbios 11:2; Hechos 20:35). ¿Ima laya metacunatataj churana canchij? Ima metacunata pajtachi tucushcata cuentata cungapajca Jehová Diostami ayudachun mañana canchij (Proverbios 16:3). Por ejemplo, tal vez precursor auxiliar o regular cangapaj, Betelpi, construccionpi sirvingapajmi metacunata churai tucunchij. Mana cashpaca tal vez shujtaj shimita yachangapajmi esforzari tucunchij. Maipimi huillangapaj minishtirin lugarpipishmi ayudai tucunchij. w21.08 págs. 23, 24 párrs. 14, 15

Jehová Diospajca cꞌuyaj canata manataj saquinami importante can (Oseas 6:6). Jehová Diosca profeta Miqueashuanmi cꞌuyaj, llaquij canata amataj saquichun animarca (Miqueas 6:8). Caita pajtachingapajca cai cualidad ima cashcatami alli intindina canchij. Cꞌuyanata manataj saquinamantaca La Biblia. Traducción del Nuevo Mundo Bibliapica casi 230 cutinmi ricurin. Huaquin Bibliacunapica cꞌuyanata manataj saquinataca “llaquij o cꞌuyaj” nishpami traducishcacuna. ¿Cꞌuyanata manataj saquinaca imatataj nisha nin? Huaquincuna shujtajcunata cꞌuyashpaca paicunata cꞌuyashpa catinata, paicunamanta manataj caruyanatami nisha nin. Cꞌuyaita ricuchinata manataj saquinamanta parlashpaca Jehová Diosca casi siempre gentecunata cꞌuyashcamantami parlan. Pero maipica gentecunapish shujtajcunaman cꞌuyaita ricuchinata manataj saquinamantami parlan. Diosmi shujtajcunaman cꞌuyaita ricuchinata manataj saquichunca alli ejemplota cun. Chaimantami Davidca: “Mandaj Dios quiquinpaj llaquij cashcaca jahua pachacunacamami chayan. ¡Taita Dioslla, quiquin llaquij cashcaca yallitaj sumajmari! Chaimantami huañujlla aichayujcunaca, quiquinpaj alas ucupi miticuncuna” nirca (Salmo 36:5, 7). Ñucanchijpish David shinallatajmi cai cualidadtaca valorana canchij. w21.11 págs. 2, 3 párrs. 1, 2, 4

Jehová Diosca shuj familiatami charin. Paicunamantaca Jesuspish, angelcunapishmi Yayitu Diostaca tandalla adorancuna (Colosenses 1:15; Salmo 103:20). Jesús cai Allpapi cashpaca paita catijcunamanca Jehovataca Yaya ni tucunguichijmi nircami. Shuj cutincarin paipaj discipulocunamanca Jehová Diosca ‘Ñuca Yaya cancunapaj Yayami can’ nircami (Juan 20:17). Ñucanchij Yayitu Diosman mingarishpa, bautizarishpaca huauqui panicunapajmi shuj familia shina tucunchij (Marcos 10:29, 30). Jehová Diosca cꞌuyaj Yayami can. Jesuspish Jehová Diosta Yaya nichunmi yachachirca. Shuj cꞌuyaj Yaya cashcamanta, Jehová Dios autoridadta charijpipish paihuanca ima horaspish parlai tucunchijmi. Jesusca paipaj discipulocunamanca: “ñucanchij Yaya” nishpa mañachunmi yachachirca. Bibliapica Jehová Diosmanta parlashpaca tucuita ruraj, jatun Mandaj, huiñaipaj Dios nishpami yachachin (Génesis 49:25; Isaías 40:28; 1 Timoteo 1:17). Pero Jesusca Jehová Diostaca “Yaya” nishpa ni tucushcatami yachachirca. w21.09 págs 20, 21 párrs. 1, 3

Mandaj Manasesmi Jehová Dios paipaj profetacunahuan advertijpica mana uyasha nirca. Chaimi Jehová Diosca: “Paicunata llaquichichunca, Asiria llajtata jatun mandajpaj soldadocunata mandajcunata apamurca. Paicunami Manasestaca, cadenacunahuan huatashpa Babilonia llajtaman prezu aparcacuna” Manasesca Babilonia prezupi cashpaca: ‘Paipaj ñaupa yayacunapaj Diospaj ñaupajpica tucui shunguhuanmi llaquirirca. Chashna llaquirishpami Mandaj Diostaca mañarca’. (2 Crónicas 33:10-12). Manasesca Jehová Diosta shungumanta mañashpami paica arrepintirishca cashcata ricuchirca. Yaya Diosca pai mañashcatami chasquirca. Qꞌuipacarin cutin Judá llajtata mandachunmi saquirca. Manasesca paipaj ruraicunahuanmi de verdadtaj arrepintirishcata ricuchirca. w21.10 pág. 4 párrs. 10, 11

Áquila, Priscilaca paicunaca Romamanta llujshishpami Corinto llajtaman rircacuna. Corinto llajtapica maipi causanatami mashcashcangacuna. Shinallataj imapi trabajanatami ricushcangacuna. Paicunaca Corinto llajtapica huauqui panicunata ayudangapaj, apóstol Pablota, caishuj huauqui panicunatapish sinchiyachingapajmi esforzarircacuna. Tiempo huashacarin paicunaca maipimi Diosmanta ashtahuan huillana minishtirin lugarman rishpami Diospaj Gobiernomanta predicashpa catircacuna (Hechos 18:18-21; Romanos 16:3-5). Chashna Yayitu Diosta sirvingapaj ocupados cashcamantaca paicunaca cushillami sintirishcangacuna. Cunan punllacunapica cazarashcacunaca Priscilamanta, Aquilamantami Yayitu Diospaj Gobiernota punta lugarpi churangapajca yachai tucuncuna. Manaraj cazarashpa Yayitu Diosta sirvingapaj metacunata churajpica chai metacunata pajtachichunca Jehová Diosllatajmi paipaj espíritu santohuan ayudanga (Eclesiastés 4:9, 12). w21.11 págs. 17, 18 párrs. 11, 12

Yaya, mamata cazunguichij nishca mandashcatami pajtachina canchij. Levítico 19:2-pica: ‘Diosca ima jucha illajlla cashcamanta, cancunapish ima jucha illajlla caichij’ ninmi. Cutin verso 3-pica: ‘Yaya mamata cazuichij’ ninmi. Cai nishcacunatami siempre yuyarina canchij. “¿Jehová Diosta sirvijcunaca ‘yaya mamata cazunguichij’ nishca mandashcata pajtachicunchijchu?” nishpami tapurina canchij. Tal vez ñaupa punllacunapi yaya mamacunata ayudangapaj mana esforzarishca cashpaca paicunata ashtahuan ayudangapajmi metacunata churana canchij. Por ejemplo, yaya mamahuan imalla cosascunata rurashpa pasangapajmi tiempota surcui tucunchij. Shinallataj minishtirishca cosascunahuan o Jehová Diosta ashtahuan sirvichun, paita rijsichunmi ayudai tucunchij. Caita rurashpaca Levítico 19:3-pi yaya mamata cazunguichij nishcatami pajtachishun. w21.12 págs. 4, 5 párrs. 10-12

Rey David jatun juchata rurajpi Jehová Dios paita ima shina tratashcata ricushun. Por ejemplo, Davidca Betsabehuan huainayashpami chai huarmipaj cusatapish huañuchirca (2 Samuel 11:2-4, 14, 15, 24). Chaita rurashpaca Davidca paillataj, paipaj familiata, shujtajcunatami llaquichirca (2 Samuel 12:10, 11). Shinallataj shuj cutincarin Davidca Israel llajtapi mashna soldadocuna tiyashcata cuentachunmi mandarca. Pero Diosca chaita rurachunca mana mandashcachu carca. Chaita rurashcamantaca 70.000 israelitacunami shuj millai ungüimanta huañurcacuna (2 Samuel 24:1-4, 10-15). Tal vez Davidta juzgashpaca “Diosca paitaca mana perdonanachu can” nishpami yuyanchijman carca. Pero Jehová Diosca mana chashna yuyarcachu. Ashtahuanpish paica tucui causaipi paita sirvishcata, shungumanta arrepentido cashcatami ricurca. Chaimanta David jatun juchata rurashca cajpipish paitaca perdonarcami. Diosca David paita achcata cꞌuyashcata, allita rurangapaj esforzarishcatami ricurca. Yayitu Dios ñucanchij alli ruraicunata ricushcata yachashpaca cushillami sintirinchij (1 Reyes 9:4; 1 Crónicas 29:10, 17). w21.12 pág. 19 párrs. 11-13

Jesusca mana uyajcunata, mana ricujcunataca cꞌuyaihuanmi tratarca. Bautizaj Juanpaj discipulocunaman Jesús ima nishcata ricushun. Paica: ‘Richij, cancuna imata ricushcata, uyashcata, ñahui mana ricujcuna ricushcata, cojocuna purishcata, leprahuan cajcuna alliyashcata, mana uyajcuna uyashcata, huañushcacuna causarishcata huillagrichij’ nircami. Jesús chashna milagrota rurashcata yachashpami tucui chaipi cajcunaca Taita Diosta alabarcacuna (Lucas 7:20-22). Cunan punllacunapish Diosta sirvijcunaca chashnallatajmi Jesuspaj ejemplota catinchij. Chaimantami mana ricujcunata, mana uyajcunataca cꞌuyaihuan, pacienciahuan ayudanchij. Shinapish cunan punllacunapica paicunataca shuj milagrota rurashpaca mana jambi tucunchijchu. Pero cashna laya gentecunaman Jehová Diosmanta huillashpaca cai mana uyajcuna, mana ricujcuna paraíso Allpapi alli saludta, huiñai causaita chari tucuchunmi ayudashun (Lucas 4:18). Huaquincunacarin cai shimicunata yachashpami cunan punllacunapipish Diospaj puebloman yaicushpa paita alabacuncuna. w21.12 pág. 9 párr. 5

Santiagoca Bibliapi tiyaj yuyaicunamantami yachachirca. Paica Jehová Dios ima shinami Jobta ayudarca, chashnallataj ñucanchijtapish ayudanatami yachachirca. Ashtahuancarin intindirinalla shimicunahuan, yuyaicunahuanmi intindichirca. Chashnami paica Jehová Diosta jatunyachirca. Santiago shina intindirinalla yuyaicunahuan Jehová Diospaj Shimita yachachishunchij. Gentecunaman yachachicushpaca alli yachajcuna cashcataca mana ricuchisha ninchijchu. Ashtahuanpish Jehová Dios yachaj, ñucanchijmanta preocuparij cashcatami ricuchisha ninchij (Romanos 11:33). Chaipajca siempremi Bibliamanta yachachingapaj esforzarina canchij. Por ejemplo, yachacujcuna imata tapujpica “ñucaca caita o chaitami ruraniman” ninapaj randica, Biblia ima yachachishcata paicunallataj intindichunmi yachachina canchij. Shinallataj Jehová Dios imata munashcatapishmi ricuchina canchij. Chashna yachachijpica paicunaca shungumantami Jehová Diosta cazungacuna. w22.01 págs. 10, 11 párrs. 9, 10

Jehová Diosca shujtajcunata alli tratachunllaca mana mandanchu. Diosta jatunyachingapajca shujtajcunata cꞌuyashpami pai mandashcata pajtachina canchij. Jesusca Levítico 19:18-pi tiyaj mandashcata pajtachina importante cashcatami ricuchirca. Shuj cutinca shuj fariseomi Jesustaca cashna nishpa tapurca: “Yachachij, mandashcacunamantaca ¿maijantaj ashtahuan yalli alli?” nijpi, Jesusca: “Cambaj Mandaj Taita Diosta tucui shunguhuan, tucui almahuan, tucui yuyaihuan cꞌuyangui” nircami. Chai huashaca Jesusca Levítico 19:18-pi nishca layatami nirca. Chaipica: “Ashtahuanpish can quiquinta shinallataj shujtajcunatapish cꞌuyangui” ninmi (Mateo 22:35-40). Shujtajcunamanca cꞌuyaitaca tucui layami ricuchi tucunchij. Shujtajcunaman cꞌuyaita ricuchingapajca Levítico 19:18-pi ima nishcatami pajtachi tucunchij. Chaipica: “Cambaj llajtapi causajcunata canpish ama tigra llaquichinguichu, ama chai yuyailla puringuichu” ninmi. w21.12 págs. 10, 11 párrs. 11-13

Jesusca apóstol Pedrotaca maquimanta japishpa ayudarca. Pedroca Jesusta ricushpa, achca huaira yacuta cuyuchijpipish chai jahuapi purishpaca mana pambarircachu. Pero ñapish achca huairata, acapanata ricushpaca mancharishpami paica yacupi pambari callarirca (Mateo 14:24-31). Pedroca barcomanta uriyashpaca yacu jahuapimi puri callarirca. Paica pambarinataca mana yuyarcachu. Paipaj munaica Jesús maipi cashcaman chayanami carca. Shinapish achca yacuta, acapanata ricushcamantami yacupi pambari callarirca. Ñucanchijca mama cucha yacu jahuapica mana puri tucunchijchu. Pero ima shinami Pedro yacu jahuapi puringapaj feta minishtirca, cunan punllacunapish ñucanchijca chashnallatajmi problemacunata chꞌimbapurangapajca feta minishtinchij. Jehová Diospi, pai cusha nishcacunapi mana confiashpaca yacupi pambaricuj shinami ñucanchij feca chiriyanga. Chaimanta ima laya llaquicunata charishpapish Dios ñucanchijta ayudanapi confiashunchij. w21.12 págs. 17, 18 párrs. 6, 7

Yayitu Diosta mañashpa, Bibliata estudiashpa, estudiashcapi yuyashpaca Jehová Diostami adoranchij. Jehová Diosta mañashpaca ñucanchijta cꞌuyaj Yayahuanmi parlanchij. Bibliata estudiashpaca tucuita yachaj Jehová Diosmantami yachanchij (Proverbios 2:1-5). Bibliata estudiashcapi yuyashpaca Jehová Dios ima laya cashcata, paipaj munai maijan cashcatapishmi intindinchij. Chaicunata rurashpaca tiempotaca allimi aprovechashun. Pero tiempoca ratomi pasanlla. Chaimanta ¿ima shinataj tiempota alli aprovechana canchij? Jehová Diosta mañangapaj, estudiangapajca chulunlla pushtuta mashcashunchij. Jesusca bautizarishca qꞌuipaca 40 punllacunatami shitashca pambapi pasarca (Lucas 4:1, 2). Paica chaipi cashpaca Yayitu Diosta mañangapaj, paipaj munai maijan cashcata yuyangapajmi tiempota surcurca. Chashna rurashcamantami Jesusca sinchi pruebacunataca ahuantai tucurca. w22.01 págs. 27, 28 párrs. 7, 8

Maipica experienciata charij huauqui panicuna o pushaj ancianocunami ñucanchij imapi mejorachun ñahui ñahui consejota cunga. Paicunaca Bibliahuan consejashpaca ñucanchijta cꞌuyashcatami ricuchincuna. Chaimanta paicuna consejashcata alli uyashpa pajtachishunchij. Tucuicunami juchayuj cashcataca alli intindinchij. Pero maijanpish ñucanchijta imapi mejorachun consejajpica, maipica chaita chasquinaca sinchimi can (Eclesiastés 7:9). Chaimantachari shujtajcuna consejajpica, “ñucata mana alli sintichingapajllami chashna consejacun” nishpa yuyashun. Mana cashpaca “paica ñucata consejangapajca ima derechota mana charinchu, paipish pandarinllami” nishpachari yuyashun. Chashna yuyashpaca resintirishcami saquirishun. Ashtahuancarin ima consejota mana chasquisha nishpaca alli sintiringaraicullachari, quejarishpa shujtajcunaman parlashun. w22.02 págs. 8, 9 párrs. 2-4

¿Paraíso Allpapipish Jehová Diospi confiashpa catinatachu minishtishun? Caipi yuyashunchij. Jehová Diosmi Egipto llajtamantaca israelitacunataca llujchirca. Egiptomanta llujchishca qꞌuipallami israelitacunaca: “Egiptopica tucui laya micunacunatami charircanchij. Cunanca maná micunataca mana micushunchu” nishpa quejarircacuna (Números 11:4-6; 21:5). Ñucanchijpish Armagedonmanta quishpirishpaca mana chai rato alaja Paraíso Allpapi causai callarishunchu. Ashtahuanpish chaipica cai tucui Allpata allichina, pꞌichanami tucunga. Asha ashami Paraíso Allpata rurashpa catishun. Callaripica causaica manachari fácil canga. ¿Chai tiempocunapica Dios cushcacunata chasquishpa ama quejaringapajca imatataj rurana canchij? Cunanmantami Jehová Dios tucuita cushcahuan agradecidos cana canchij. Chashnami shamuj punllapicarin pai cushcacunahuanca agradicishca sintirishun. w22.02 pág. 7 párrs. 18, 19

Zacarías 8:23-pica “Judá llajtapi causaj runa” nishpa, “cancuna” nishpaca jahua pachaman rigrij ungidocunallamantatajmi parlan (Romanos 2:28, 29). Cutin ‘tucui llajtacunamanta 10 runacuna’ nishpaca shujtaj ovejacunamantami parlan. Paicunaca tandallami jahua pachaman rigrij ungidocunahuan Jehová Diosta sirvincuna. Cutin Ezequiel 37:15-19, 24, 25-pica Jehová Diosca ungidocunahuan, shujtaj ovejacunamanta cajcunahuan tandalla trabajachun tandachishcatami nin. Chai profeciapica ishqui caspimantami parlan. ‘Judapaj caspica’ jahua pachapi causagrij ungidocunatami ricuchin. Ñaupa punllacunapica Judapaj familiamantami israelitacunata mandachunca Jehová Diosca agllaj carca. Cutin “Efrainpaj caspica” Paraíso Allpapi causagrijcunatami ricuchin. Jehová Diosca cai ishqui caspita shujllapi tandachicuj shinami ungidocunapish, shujtaj ovejacunamanta cajcunapish paita tandalla sirvichun ayudashca (Juan 10:16). w22.01 pág. 22 párrs. 9, 10

Jesús cai Allpapi cajpica huaquincunaca gentecuna ricuchunllami pobrecunaman cullquita cuj tucurcacuna. Pero paicuna chashna cushcataca Jehová Diosca mana chasquircachu (Mateo 6:2-4). Ñucanchijllapi yuyanapaj randica shujtajcunapaj allita rurashpami ayudana canchij. Chaimanta cashna nishpa tapuri: “¿Shujtajcunata ayudangapajchu esforzaricuni? ¿Imamantataj shujtajcunapajca allita rurani?”. Jehová Diosca paipaj cualidadcunata pajtachichunca paipaj espíritu santotami cunga (Génesis 1:2). Santiagoca: ‘Alli ruraicunata mana rurajpica ñucanchij feca huañushcami can’ nircami (Santiago 2:26). Santiago nishca shinaca fetapish, shujtaj cualidadcunatapish pajtachicushcataca ñucanchij ruraicunahuanmi ricuchina canchij. Cada punlla cai cualidadcunata pajtachishpaca Jehová Diospaj espíritu santota charishcatami ricuchishun. w22.03 págs. 11, 12 párrs. 14-16

Diosta sirvijcunaca Jehová Diostami adoranchij. Shinallataj shujtajcunapajpishmi allicunata ruranchij. Apóstol Pedropish jucha illajmi cana canguichij nishca ñaupallaca caitami nirca: ‘Alli yuyaihuan chumbillirishca shina caichij’ (1 Pedro 1:13). ¿Chaica imatataj nisha nirca? Paica jahua pachaman rigrij Diosta sirvijcuna, Diosmanta muyundij Allpapi huillana cashcatami parlarca (1 Pedro 2:9). Cunan punllacunapish Diosta sirvijcunaca cai mingashcata pajtachina privilegiotami charinchij. Chaita rurashpaca shujtaj gentecunatami beneficiashun. Diospaj jucha illaj puebloca gentecunaman predicana, yachachina privilegiotami cada punlla valorana canchij (Marcos 13:10). Chaimanta cai versocunapi ima yachachishcacunata pajtachingapaj esforzarishunchij. Chaita rurashpaca Jehová Diosta, shujtajcunata cꞌuyashcatami ricuchishun. Ashtahuancarin tucui ñucanchij causaipi jucha illaj casha nishcatami ricuchishun. w21.12 pág. 13 párr. 18

Apóstol Pabloca huauqui panicunapaj alli ruraicunatami valorarca. Chaimantami paicunataca cꞌuyaihuan tratarca. Huauqui panicuna pandarijpipish paicuna allita rurangapaj esforzaricushcatami ricurca. Chashna yuyashpaca paicunata ayudangapajmi esforzarirca. Filipos llajtapi causaj huauqui panicunata Pablo ima shina ayudashcata ricushun (Filipenses 4:1-3). Shuj cutinca Diosta sirvij Evodia y Sintiqueca paicunapura pꞌiñanacushpami chꞌicanyanacushcacuna carca. Pero Pabloca paicunataca mana sinchita rimarcachu. Ashtahuanpish paicunapaj alli ruraicunata ricushpami felicitarca. Shinallataj Jehová Diospish paicunata cꞌuyashcatami ricuchirca. Chaimantami cꞌuyaihuan paicuna cutin alli tucuchun animarca. Chashna tratashpaca apóstol Pabloca huauqui panicunahuan alli apanacushpa, paicunahuan tandalla cashpaca cushillami sintirirca. w22.03 págs. 30, 31 párrs. 16-18

Jehová Diosta mañashpaca ima llaquicunahuan cashpapish ñucanchij yuyaipi, shungupimi tranquilo sintirishun. Luz shuti panica chashnami sintirirca. Paica: “Maipica ñucalla sintirishcamantami ‘Jehová Diosca ñucata mana cꞌuyanchu’ nishpa yuyani. Chashna yuyashpaca chai ratomi Jehová Diosmanca tucuita parlani. Diosta mañashpaca ñuca yuyaipimi tranquilo sintirini” ninmi. Cai pani shinallataj Diosta mañashpaca ñucanchijpish tranquilomi sintirishun (Filipenses 4:6, 7). Familiacuna huañujpi Jehová Dios, Jesús ñucanchijta ayudanapimi confiana canchij. Shinallataj Jehová Dios, Jesús shinami ñucanchijpish gentecunamanca cꞌuyaihuan predicana, yachachina canchij. Diospish, Jesuspish ñucanchijta ayudasha nincuna. Ñallami Jehová Diosca ñucanchij ‘ñahuicunamantaca tucui huiquita pꞌichanga’ (Apocalipsis 21:4). w22.01 págs. 15, 16, 19 párrs. 7, 19, 20

Jesusca: ‘Ishqui pungumi tiyan. Shuj punguca quichqui ñantami apan. Caishuj punguca ancho ñantami apan’ nircami (Mateo 7:14). Ishqui ñanllami tiyan. Chaimantami cada uno maijan ñanpi purinata agllana canchij. Quichqui ñanpi purinata agllashpaca huiñai causaitami charishun. Ancho ñanpi purina fácil cashcamantami achca gentecunaca chaita agllashcacuna. Huaquincunacarin chai ñanmantaca mana llujshishcacunachu. Paicunaca Diablo chai ancho ñanpi purishpa huañuiman apacushcataca mana cuentata cuncunachu (1 Corintios 6:9, 10; 1 Juan 5:19). Jesusca: ‘Caishuj ñanca quichquimi chaipi yaicunataca ashacunallami agllanga’ nircami. ¿Imamanta? Jesusca llullashpa yachachijcunamantaca cuidaringuichij nishpami advirtirca (Mateo 7:15). w21.12 págs. 22, 23 párrs. 3-5