Marzo

Apóstol Pedroca ñucanchij yachashcahuan, imata rurai tucushcahuan Jehová Diosta, shujtajcunatapish sirvichunmi animarca. Paica: “Tucuicunami Diosmantaca chꞌican chꞌican rurai tucunata chasquircanguichij. Chai rurai tucunahuanca caishuj chaishujpaj allita ruraichij” nircami (1 Pedro 4:10). Chaimantami “ñuca allita rurashcamantaca shujtajcunami envidianga, o paicunatami desanimachisha” nishpaca mana yuyana canchij. Ñucanchij yachashcahuan o ima rurai tucushcahuan Jehová Diosta sirvishpapish mana yanga atirinachu canchij (1 Corintios 4:6). Jehová Dios ayudashcamanta imatapish rurai tucushcatami yuyarina canchij. Chaimantami ima yachashcahuan o ima rurai tucushcahuan mana jatunyarina canchij (Filipenses 2:3). Ashtahuanpish huauqui panicunata animangapaj, Jehová Diosta jatunyachingapajmi esforzarina canchij. Chashnami cushilla sintirishun. w22.04 págs. 11, 12 párrs. 7-9

Jesusca Diospaj Shimitaca achcatami cꞌuyarca. Chaimantami Salmo 40:​8-pica: “Ñuca Dioslla, ñuca cushicunaca quiquinpaj munaita ruranami. Quiquin mandashcaca ñuca shungu ucupimari” ninmi. Ñucanchijpish Yayitu Diospaj Shimita liyingapaj esforzarishpa, chaipi tiyaj consejocunata cꞌuyangapaj esforzarishpaca Jesús shinallatajmi Yayitu Diostaca cushicuihuan sirvishpa catishun (Salmo 1:​1-3). Jesuspaj nishcacunata yachashpa, paipaj ejemplota ricushpaca Bibliata alli estudiangapajmi esforzarisha ninchij. Bibliapi imata liyicushcata alli intindingapajca, puntapica Jehová Diostami mañana canchij, mana apuradoschu liyina canchij. Tapuicunata rurarishpa, uchilla notitacunata quillcashpapishmi estudiana canchij. Shinallataj ñucanchij publicacioncunapimi investigana canchij. Ashtahuancarin Bibliapaj nishcacunata pajtachingapajca humildadhuanmi liyina canchij. Caicunata rurashpaca Bibliapaj consejocunamantami beneficiarishun, Yayitu Diospajmanpishmi ashtahuan cꞌuchuyashun (Salmo 119:17; Santiago 4:8). w23.02 pág. 13 párrs. 15, 16

Imapi mejorana cashcata alli ricushunchij. Imapi mejoranata yachashpaca chaita pajtachingapajmi esforzarina canchij. Por ejemplo, alli yachachijcuna cangapajca Alli yachachij nishca folletotami alli estudiana canchij. Shinallataj manaraj shuj asignacionta cushpaca experienciata charij huauquitami ricuchun, uyachun mañana canchij. Chai huashaca imapi mejorana cashcata huillachunmi mañana canchij. Ashtahuancarin utcami ñucanchij asignacioncunata, conferenciacunataca preparana canchij. Chashnami alli yachachijcuna tucushun. Shujtajcunapish ñucanchij alli pajtachijcuna cashcatami ricungacuna (2 Corintios 8:22). ¿Imata pajtachina sinchi cajpica imatataj rurana canchij? Alli pajtachingapajmi esforzarishpa catina canchij. ¿Timoteoca alli yachachij tucurcachu? Chaitaca Bibliapica mana huillanchu. Pero paica apóstol Pablo ima nishcatami pajtachirca. Chaimi Timoteoca alli yachachij tucushcanga, ima mingashcatapish alli pajtachishcanga (2 Timoteo 3:10). w22.04 págs. 24, 25 párrs. 8-11

¿Canchis umacunayuj jatun animalca imatataj ricuchin? Apocalipsispi parlashca cai jatun animalca leopardoman rijchajmi can ninmi. Shinallataj osopaj chaquicunata shina, leonpaj shimita shina y chunga gachucunatami charin ninmi. Daniel capítulo 7-pipish chuscu animalcunamantami parlan. Shujca leonman rijchajmi carca. Shujca osoman rijchajmi carca. Caishujca leopardoman rijchajmi carca. Caishujpish chunga gachucunayujmi carca. Cai chuscu animalcunaca chuscu jatun mandajcunatami ricuchirca. Shinaca Apocalipsispi parlashca jatun animalca Daniel parlashca chuscu animalcuna shinallatajmi huaquin gobiernocunata ricuchin. Chaimantami Apocalipsis libropica: ‘Chai millai animalca tucui familiacunata, tucui pueblocunata, tucui rimaicunata, tucui llajtacunata mandangapajmi autoridadta chasquirca’ nin (Apocalipsis 13:7). Caita ricushpami canchis umacunayuj jatun animalca cai Allpapi tiyaj tucui gobiernocunata ricuchishcata intindinchij (Eclesiastés 8:9). Bibliapica chunga numerota utilizashpaca tucuita o completo cashcatami ricuchin. w22.05 pág. 9 párr. 6

¿Cai bendicioncunataca picunataj chasquingacuna? Apóstol Juan ricushca shinaca Armagedonmanta quishpirij achca gentecunami cai bendicioncunata chasquingacuna. Paraíso Allpapi huacharishca huahuacunapish, causarishcacunapishmi cai bendicioncunata chasquingacuna (Apocalipsis 20:​11-13). ¿Picunallataj cai Allpapica causaringacuna? Ñaupa punllacunapi Diosta sirvij gentecunami causaringacuna. Diosta sirvina oportunidadta mana charishca gentecunapishmi causaringacuna (Hechos 24:15; Juan 5:​28, 29). ¿Caica nisha ninchu tucuicuna causarinata? Mana, achca gentecunami manaraj huañushpa Jehová Diosta sirvina oportunidadta charircacuna. Pero chaita mana rurashcamantami mana causaringacuna (Mateo 25:46; 2 Tesalonicenses 1:9; Apocalipsis 17:8; 20:15). w22.05 págs. 18, 19 párrs. 16, 17

Jesusca alli cazuj, alli yuyaiyuj sirvij huauquicunahuanmi Diospaj pueblota pushacun (Mateo 24:45). Caita yachashpaca apóstol Pedro shinallatajmi sintirinchij. Paica cai punllapaj versopi nishcatami Jesusman nirca. Diospaj organizacionpi cashcamantami Jesucristoca sinchi feta charichun, alli yachachijcuna cachun, mushuj causaita charichunpish ayudacun (Efesios 4:24). Sinchi punllacunapipish Jesusca ñucanchijtaca ñaupajmanmi pushashpa caticun. COVID-19 ungüi ricurijpica achca gentecunaca imata ruranataca mana yacharcacunachu. Pero Jesusca ñucanchijmanca valishca instruccioncunatami curca. w22.07 pág. 12 párrs. 13, 14

Jehová Diosca israelita yaya mamacunataca: “Cancunapaj huahuacunamanca ñucamantami cada punlla yachachina canguichij” nircami (Deuteronomio 6:​6, 7). Chai tiempopica yaya mamacunaca huahuacunaman yachachingapajca achca oportunidadcunatami charircacuna. Por ejemplo, cꞌari huahuacunaca paicunapaj yayahuanmi tarpushpa o cosechashpa pasajcuna carca. Cutin huarmi huahuacunaca paicunapaj mamahuanmi huasipi ayudashpa o sirashpa pasajcuna carca. Yaya mamacunaca huahuacunahuan chashna tiempota pasashpaca Jehová Dios paicunata cꞌuyashcata, paicunata cuidashcatami yachachijcuna carca. Cunan tiempopica huaquin llajtacunapica yaya mamacuna trabajopi cashcamanta, huahuacuna escuelapi cashcamantami mana igual pasancuna. Chaimantami yaya mamacunaca huahuacunahuan pasangapaj, paicunahuan parlangapaj, paicunahuan Bibliamanta yachangapajpish tiempota surcuna can (Efesios 5:​15, 16). w22.05 págs. 28, 29 párrs. 10, 11

Jatun juchaca Jehová Diospajca mana allicunami can. Chaimantami jatun juchata rurashpaca Jehová Diosta perdonachun mañana canchij. Ancianocunamanpishmi huillana canchij (Salmo 32:5; Santiago 5:14). ¿Caita yachaj chayashpaca ancianocunaca imatataj rurana can? Jesús ñucanchijmanta huañushcamantami Jehová Diosca ñucanchij juchacunata perdonai pudin. Shina cashpapish ancianocunamanmi juzgana autoridadta cushca. Ancianocunaca juchata rurajtaca congregacionmanta llujshichinata o mana llujshichinatami decidina can (1 Corintios 5:12). Alli decidingapajca ancianocunaca cai catij tapuicunatami rurarina can: ¿pai munashcamantachu juchata rurarca?, ¿pacallachu juchata rurarca?, ¿ima horamantataj juchata ruracurca?, ¿shungumanta arrepentidochu can?, ¿Jehová Diosca ñachu paitaca perdonarca? (Hechos 3:19). w22.06 pág. 9 párr. 4

Jesusca allita rurana imamanta importante cashcatami yachachirca (Mateo 5:6). Chaimantami ñucanchijcunaca Yayitu Dios munashca shina allicunata rurangapaj esforzarina canchij. Canpish mana llullata, allita ruranatami munangui. Chaimantami llullacunata, tucui mana allicunataca pꞌiñangui (Salmo 119:​128, 163). Llullajcunaca cai mundota mandaj Diablo shinami llullashpa purincuna (Juan 8:44; 12:31). Diabloca Edén huerta tiyashca horasmantami Diospaj shutita malpi saquichisha nishpa llullacunata nishca. Diabloca Dios mitsa cashcata, llullaj cashcatami nirca (Génesis 3:​1, 4, 5). Diablopaj llullacunamantami achca gentecunaca Yayitu Dios mana alli cashcata yuyai callarishcacuna. Diosmanta verdadta mana yachashcamantami achcacunaca millaillata rurashpa purishcacuna (Romanos 1:​25-31). w23.03 págs. 2, 3 párr. 3

Mana allicunata saquinaca cambajca sinchimi canga. Chaimantachari “mana bautizari tucushachu” nishpa llaquilla sintiringui. Pero ¿ama saquiringapajca imatataj rurana cangui? Jehová Diosta cꞌuyashpa catingapajmi esforzarina cangui. Jehová Diosta cꞌuyanaca tucuimanta yalli valishcami can (Proverbios 3:​3-6). Paita cꞌuyashpaca ima llaquicuna, jarcaicuna ricurijpipish chaicunatami ahuantangui. Jehová Diosca paita sirvijcunataca mana tucurij cꞌuyaitami ricuchin. Chaimantami paicunataca manataj saquin. Canpish Diosman rijchaj rurashca cashcamantami Jehová Dios shina mana tucurij cꞌuyaita ricuchi tucungui (Génesis 1:26). Pero ¿chashna cꞌuyaita ricuchingapajca imatataj rurana cangui? Puntapica agradecidomi cana cangui (1 Tesalonicenses 5:18). Chaipajca “¿Jehová Diosca ñucata cꞌuyashcataca ima shinataj ricuchishca?” nishpami punllanta tapurina cangui. Jehová Dios canta ima shina bendiciashcata cuentata cushpaca chaicunamanta agradicingapajmi Diosta mañana cangui. w23.03 págs. 12, 13 párrs. 17-19

Jesusca paicunapaj discipulocuna pandarijta ricushpapish paicunahuan mana pꞌiñarirca. Ashtahuanpish Jesusca paipaj 12 apostolcunatami cꞌuyaihuan tratashpa catirca. Ñucanchijpish shujtajcuna pandarijpica mana pꞌiñarishpami cꞌuyaita ricuchingapaj esforzarina canchij. Chaipajca cashna nishpa tapurishunchij: “¿Chai huauqui o chai pani caita o chaita rurashcamantaca imamantataj pꞌiñarini? ¿Ñucachu imapi mejorana cani? ¿Paica ima llaquita charishcamantachu chashna pandarirca? ¿Ñucata llaquichishca cajpipish cꞌuyaita ricuchingapajchu paita perdonai tucunilla?”. Cashna cꞌuyaita siempre ricuchishpami Jesusta alli catijcuna cashcata ricuchishun. Jesús shinallataj ñucanchij huauqui panicunata intindingapajmi esforzarina canchij (Proverbios 20:5). Ñucanchijca huauqui panicunapaj shunguta mana rijsi tucushpapish paicuna pandari horas pacienciahuan, cꞌuyaihuanmi tratana canchij (Efesios 4:​1, 2; 1 Pedro 3:8). Huauqui panicunata alli intindingapajmi paicunata alli rijsina canchij. w23.03 pág. 30 párrs. 14-16

Llaqui atraso japijpimi mana Testigo familiacuna o doctorcunaca yahuarta churarichun o Dios mana munashca tratamientota catichun obligasha ningacuna. Ñucanchijca huañunataca mana munanchijchu. Pero huañujpipish Jehová Diosca ñucanchijta yuyarishpa, cꞌuyashpami catinga (Lucas 20:37; Romanos 8:​37-39). Paica huañushcacunata causachinata, huiñai causaita cunatapishmi munan (Job 14:15). Chaimantami paipaj cꞌuyashca Churita ñucanchijmanta huañuchun curca (Juan 3:16). Caita ricushpaca Jehová Dios ñucanchijta achcata cꞌuyashcata, cuidashcatami intindinchij. Chaimantami ungushca cashpapish, maijanpish huañuchisha nijpipish Yayitu Diosta sirvishpa catinchij. Llaquicunata ahuantangapajpish Diostaca fuerzata, yachaita cuchunmi mañanchij (Salmo 41:3). w22.06 pág. 18 párrs. 16, 17

Dios cushca yachaita chasquingapajca Proverbios 9:​10-pi ima nishcatami pajtachina canchij. Chaipica: “Alli yachaipaj callarica, Mandaj Diosta manchanami. Ima jucha illaj Diosta rijsinaca, alli yuyaimi” ninmi. Chaimantami importante decisioncunata agllangapajca Jehová Dios imata yuyashcata alli rijsina canchij. Chaipajca Bibliata, publicacioncunatapishmi estudiana canchij. Chaipi imata yachashcatapishmi pajtachina canchij. Chashnami alli yachajcuna cashcata ricuchishun (Proverbios 2:​5-7). Jehová Diosllami ñucanchijmanca alli yachaita cui tucun (Romanos 16:27). ¿Imamantataj chashna ninchij? Puntapica, Jehová Diosca tucuita ruraj cashcamantami tucuita alli rijsin (Salmo 104:24). Ishquipica, Dios tucui rurashcacunami pai yachaj cashcata ricuchin (Romanos 11:33). Quimsapica, Dios cushca consejocunaca ñucanchij allipajllatajmi can (Proverbios 2:​10-12). Chaimantami Jehová Dioslla ñucanchijman yachaita cui tucushcata crina canchij. Pai ñucanchijta pushachunpishmi saquina canchij. w22.10 pág. 19 párrs. 3, 4

Apocalipsis 12-pi nishca shinaca Jesusca paicunata mishashcamantami Diablotapish, demoniocunatapish cai Allpaman shitarca. Chaimi Diabloca achcata pꞌiñarishpa gentecunata llaquichi callarirca (Apocalipsis 12:​9-12). ¿Cai profeciamantaca imatataj yachacunchij? Mundo enteropi ima tucucushcata ricushpa, gentecunapish mana alli cosascunata ruracushcata ricushpami Diospaj Gobiernopi Jesús ña mandacushcata intindinchij. Bibliapi tiyaj profeciacuna pajtaricushcatapishmi seguros canchij (Salmo 37:1). Ashtahuancarin Armagedón macanacui chayangacamami llaquicunaca mirarishpa catinga. Pero caita yachashpaca mana dimastij preocuparinachu canchij (Marcos 13:8; 2 Timoteo 3:13). Jehová Diosca ñucanchijta cꞌuyashcamantami imamanta llaquicuna tiyashcata yachachin. Chashna yachachishcamantami paitaca shungumanta agradicina canchij. w22.07 págs. 3, 4 párrs. 7, 8

Maijan huauqui panicuna ungüicunahuan cajpi, jatun llaquicunata charijpi, guerra tiyashca llajtacunapi causajpi o paicunata catirashpa llaquichijpica Jehová Diostami paicunata ayudachun mañana canchij. Labores de socorropi ayudaj huauqui panicunamantapishmi mañana canchij. Cashna llaquicunata charij huauqui panicunata rijsishpaca paicunapaj shutita nombrashpami Yayitu Diosta mañana canchij. Ñucanchij huauqui panicunamanta mañashpaca paicunata shungumanta cꞌuyashcatami ricuchinchij. Congregacionta pushaj huauquicunapish paicunamanta Diosta mañachunmi munancuna. Chashna mañajpica Jehová Diosca paicunatami ayudan. Apóstol Pablopish: “Alli huillaicunata parlai callarijpi alli shimicunahuan mana manchashpa huillangapaj Dios ayudachun ñucamantapish mañaichij” nircami (Efesios 6:19). Cunan punllacunapipish congregacionta pushaj huauquicunaca ñucanchijta cuidangapajmi achcata esforzaricuncuna. Paicunamanta Jehová Diosta mañashpaca paicunata cꞌuyashcatami ricuchishun. w22.07 págs. 23, 24 párrs. 14-16

Shuj soldadoca contracuna paipaj umata ama llaquichichunmi cascota churarin. Chai shinallatajmi Diablo ñucanchijta ama llaquichichun, ama pandachichunca shuj cascota churarij shina Dios cusha nishcacunata japina esperanzahuan causana canchij. Diabloca tentacioncunapi urmachun, mana alli yuyaicunatapish charichunmi munan. Pero Dios cusha nishcacunata japina yuyailla cashpaca tentacioncunapi mana urmashunchu, mana alli yuyaicunatapish mana charishunchu. Ñucanchij munashcacunallapi yuyashpaca Dios cusha nishcacunapi crinatami saquishun. Corinto llajtapi causaj huauqui panicunahuan ima tucushcata ricushun. Paicunaca Dios causachinapi crinatami saquircacuna (1 Corintios 15:12). Apóstol Pabloca ‘Dios causachinapi mana crishcamantami paicunaca paicunapaj munashcacunallata pajtachingapaj causancuna’ nircami (1 Corintios 15:32). Cunan punllacunapipish achca gentecunaca Dios cusha nishcacunapica mana crincunachu. Chaimantami cushicunallapi, paicunapaj munashcacunallapi ocuparincuna. Cutin ñucanchijca Dios cusha nishcacunata japina yuyaillami causanchij. w22.10 págs. 25, 26 párrs. 8, 9

Jehová Diosca ñucanchijcuna ima shina sintirishcata huillachun, paita mañachunmi munan. Paita mañajpica Jehová Diosca cushillami ñucanchijtaca uyan (Proverbios 15:8). Pero ¿sololla sintirishpaca Jehová Diostaca imacunallamantataj mañana canchij? Ima shina sintirishcata, imamanta preocuparishcatami Jehová Diosman huillana canchij (Salmo 62:8). Imata rurana cashcata yachachichunpishmi Yayitu Diosta mañana canchij. Paitami yachaita cuchun, fuerzasta cuchun mañana canchij (Lucas 21:​14, 15). Cutin desanimachij yuyaicunata charishpaca shuj alli huauquihuan o alli panihuan parlangapajmi Jehová Diosta mañana canchij. Chai huauqui o pani canta intindichunpishmi Diosta mañana cangui. Pai ñucanchijta ima shina ayudacushcata ricushpa, shujtajcunapaj ayudata chasquishpaca mana sololla sintirishunchu. w22.08 pág. 10 párr. 6

Tesalonicapi mushuj congregación tiyai callarishca huashallami huaquin millai gentecunaca huauqui panicunata llaquichi callarircacuna. Shuj cutinca chai gentecunaca huaquin huauquicunataca “sirij sirijta aisashpa chai llajtata mandajcunapajman pusharcacuna” (Hechos 17:6). Chashna llaquichisha nijpica chai mushuj huauqui panicunaca achcata mancharishpami desanimari callarishcangacuna. Pero apóstol Pabloca paicuna desanimarichunca mana munarcachu. Chaimantami Pabloca shujtajcuna chai huauqui panicunata animachun saquircacuna. Qꞌuipaca apóstol Pabloca Tesalonicapi caj huauqui panicunataca: ‘Ñucanchij huauqui Timoteotami cancunapajman cachanchij. Paitami cancunata animachun, cushichichun, cancunapaj feta sinchiyachichun cachanchij’ nircami (1 Tesalonicenses 3:​2, 3). Timoteoca Listra llajtapi apóstol Pablo huauqui panicunata ima shina sinchiyachishcatami ricurca. Chaimantami Timoteopish Tesalonicapi caj huauqui panicunataca sinchiyachi tucurca (Hechos 14:​8, 19-22; Hebreos 12:2). w22.08 pág. 21 párr. 4

1870 huatamantami Charles Russellca shujtajcunahuanpish Bibliamanta ashtahuan estudiai callarircacuna. Paicunaca Jesús imamanta huañushcata, Jesús huañushcata ima shina yuyarina cashcatapishmi yachanata munarcacuna. ¿Chai huauqui panicuna Bibliata alli estudiashcamantaca ima shinataj beneficiarishcanchij? Ñucanchijpish Jesús imamanta huañushcata, Jesús huañushcamantami achca bendicioncunata charigrishcatapish alli intindishcanchij (1 Juan 2:​1, 2). Shinallataj Jehová Dios jahua pachapi causachun ashacunallata agllashcatami yachashcanchij. Cutin achca gentecunata paraíso Allpapi causachun bendiciagrishcatapishmi yachashcanchij. Jehová Dios ñucanchijta achcata cꞌuyashcamanta imata rurashcata yuyarishpa, Jesuspaj sacrificiopish ñucanchijta ima shina ayudashcata yuyarishpaca, Jehová Diospajmanmi ashtahuan cꞌuchuyashun (1 Pedro 3:18). Chaimantami achca huatacuna huashaman huauqui panicuna rurashca shinallataj, cai tandanacuiman shamuchun shujtajcunatapish invitangapaj esforzarinchij. w23.01 págs. 21, 22 párrs. 6, 7

Jesusca Diospaj Gobierno ima bendicioncunata apamunatami yachachirca. Jesús huañushcamanta Dioshuanpish, Jesushuanpish alli apanacui tucushcata yachashpapish achcatami contentarinchij. Jesucristopi feta churajcunaca para siempre causana esperanzata, paicunapaj huañushca familiacunata cutin ricuna esperanzatapishmi charincuna (Juan 5:​28, 29; Romanos 6:23). Ñucanchijca cai bendicioncunataca mana mericinchijchu. Jehová Diostapish, Jesustapish mana imata pagai tucunchijchu (Romanos 5:​8, 20, 21). Pero paicunataca ñucanchij ruraicunahuanmi agradici tucunchij. ¿Chaitaca ima shinataj pajtachishun? Chaipajca ñucanchij tiempohuan, fuerzahuan, cullquihuanpish Diosta sirvingapajmi esforzarina canchij. Por ejemplo, Diosta adorana huasicunata, edificiocunata shayachishpa, allichishpami ayudai tucunchij. w23.01 págs. 26-28 párrs. 3, 5

Diospaj Gobiernopi mandaj ungidocunaca cai tucui Allpapi tiyagrij achca millón gentecunatami mandangacuna. 144.000 ungidocunapish Jesús shinallatajmi mandajcuna, sacerdotecuna cangacuna (Apocalipsis 5:10). Moisesman cushca leypi nishca shinaca sacerdotecunaca tucui israelitacunatami alli cuidana carca, Diosmantapishmi yachachina carca. Chai “Leyca shamuj punllacunapi tiyana bendicioncunata ricuchij llandu shinallami” carca. Chaimantami Jesuspish, 144.000 ungidocunapish Paraíso Allpapi causaj gentecunata alli cuidangacuna, Jehová Diospajman cꞌuchuyachunpishmi ayudangacuna (Hebreos 10:1). Dios agllashca ungidocuna, Paraíso Allpapi gentecunahuan ima shina parlanataca mana yachanchijchu. Paicunaca tucui gentecunatami alli pushangacuna (Apocalipsis 21:​3, 4). w22.12 pág. 11 párrs. 11-13

Jehová Diospish, Jesuspish ñucanchijmanta imata rurashcata yachachunmi gentecunamanca Jesús huañushcata yuyarina tandanacuiman invitanchij (Juan 3:16). Gentecuna chai tandanacuiman rishpa Jehová Diosta rijsina munaita charichun, paita sirvina munaitapish charichunmi munanchij. Ñucanchijca Jehová Diosmanta caruyashcacunatapishmi cai tandanacuiman invitanchij. Paicunaca chai tandanacuiman rishpaca Jehová Dios paicunata cꞌuyashpa catishcata, Jehová Diosta sirvishpa cushilla causajcuna cashcatapishmi yuyaringacuna. Chaimantami paicuna chai tandanacuiman rijpica achcata cushiyarinchij (Salmo 103:​1-4). Gentecuna ñucanchij invitacionta chasquijpipish o mana chasquijpipish tucui pudishcatami ruranchij. Jehová Diosca chai tandanacuiman rishca cada unomantami achcata preocuparin (Lucas 15:7; 1 Timoteo 2:​3, 4). w23.01 págs. 20, 22, 23 párrs. 1, 9, 11

Huañunapaj ashalla horascuna faltajpimi Jesusca paipaj discipulocunata Diablomanta cuidachun Jehová Diosta mañarca (Juan 17:​15, 20). Jehová Diosca paita sirvijcunataca siempremi cuidan. Pero Jesusca paita sirvijcunata Diablo llaquichinata yachashpami paicunata cuidachun Yayitu Diosta mañarca. Cai millai mundopi causacushcamantami Diabloca Diosta sirvijcunataca achcata llaquichicun. Achca llaquicunata charishcamantami maipica Diosta sirvinaca mana jahualla can, huaquinpicarin desanimadosmi sintirinchij. Pero llaquicunahuan cashpapish mana manchanachu canchij. Jehová Diosca ñucanchijcuna ima llaquicunahuan chꞌimbapuracushcataca allimi yachan. Chaimantami ñucanchijta ayudangapajca listo can (Salmo 33:​18-20). w22.08 pág. 8 párrs. 1, 2

Jesús huañushcata yuyarina tandanacui manaraj chayajpica paipaj sacrificiota valorashcatami ricuchinchij. Por ejemplo, Jehová Diosta mañangapaj, Jesús imamanta huañushcata yuyaringapajpishmi tiempota llujchinchij. Shinallataj chai tandanacui ñucanchijpaj achca valishca cashcamantami tucui gentecunata chai tandanacuiman invitangapaj esforzarinchij. Ashtahuancarin chai tandanacuiman ringapajca ima jarcachunpish mana saquinchijchu. Jesús huañushcata yuyarina tandanacuiman rishpaca Jesús imamanta huañuna cashcata, Jehová Dios ñucanchij juchacunata ima shina Jesusmanta perdonai tucushcatami yachanchij. Shinallataj picunalla chai tandanacuipi tandata micuna cashcata, picunalla vinota ubyana cashcatapishmi ricuchin. Tandapish, vinopish imata ricuchishcatapishmi yachanchij (Lucas 22:​19, 20). Shinallataj chai conferenciata uyacushpaca cai Allpapi causagrijcuna ima bendicioncunallata chasquigrishcatami yuyarinchij (Isaías 35:​5, 6; 65:​17, 21-23). Caicunata intindinaca dimastij valishcami can. w23.01 págs. 20, 21 párrs. 2, 4

Jehová Dios paipaj Churita ñucanchijmanta huañuchun cushcamantami ñucanchijcunaca huiñaita causai tucunchij (Mateo 20:28). Apóstol Pablopish: “Ima shinami huañuica shuj runallamanta callarirca, chashnallatajmi huañushcacunapish shuj runallamanta causaringacuna. Adanmantaca tucui gentecunami huañurca. Shinallataj Cristomantaca tucuicunami causachishca cangacuna” nircami (1 Corintios 15:​21, 22). Jesucristoca paipaj discipulocunamanca Diospaj Gobierno shamuchun, cai Allpapipish Diospaj munaita pajtachichun nishpa Jehová Diosta mañachunmi yachachirca (Mateo 6:​9, 10). Jehová Diosca gentecuna cai Allpapi huiñaipaj causachunmi munan. Chaimantami Jehová Diosca Jesucristota Rey cachun nombrarca. Paihuan mandachunpish 144.000 gentecunatapishmi agllacushca. Paicunaca Diospaj munaitami cai Allpapi pajtachingacuna (Apocalipsis 5:​9, 10). w22.12 pág. 5 párrs. 11, 12

Shuj cꞌuyashca familia huañujpica achcatami llaquirinchij. Chai cꞌuyashca familia manaraj huañushpa achcata sufrishcata yuyarishpacarin ashtahuanmi llaquirinchij. Pero tiempohuanca pai ñucanchijta ima shina animashcata, imata yachachishcata o imata rurashcata yuyarishpami cushiyarinchij. Chai shinallatajmi Jesús huañushcata yuyarinapaj tiempopica, paipaj sacrificiopi yuyangapaj ashtahuan tiempota surcunchij. Jesús manaraj huañushpa achcata sufrishcata, paita achcata llaquichishcata yuyarishpaca dimastijmi llaquirinchij (1 Corintios 11:​24, 25). Shinapish Jesús cai Allpapi cai horas pai imata nishcata, pai imata rurashcata yuyarishpaca achcatami cushiyarinchij. Cunan punllacunapipish Jesús imata ruracushcata, shamuj punllacunapipish Jesús imata ruragrishcata yuyarishpacarin ashtahuan contentosmi sintirinchij. w23.01 pág. 26 párrs. 1, 2

Discipulocunaca paipaj amigo Jesús huañujpica esperanza illaj, achca llaquillami sintirishcangacuna (Lucas 24:​17-21). Shinapish Jesusca causarishca huashaca paipaj discipulocunataca huaquin profeciacuna paipi pajtaricushcatami intindichirca. Paicunamanca tucuicunaman huillachunpishmi mingarca (Lucas 24:​26, 27, 45-48). Jesús jahua pachaman rishca huashaca Jesuspaj discipulocunaca cushillami sintirircacuna. Paicunaca Jesús causarishcata, paicunata ayudagrishcata yachashpaca punllanta Diosta alabashpami catircacuna (Lucas 24:​52, 53; Hechos 5:42). Discipulocunapaj ejemplota catingapajca Diospaj Gobiernotami punta lugarpi churana canchij. Chashna Jehová Diosta cushicuihuan sirvishpa catingapajca achca esfuerzotami minishtinchij. Pero chashna esforzarijpica Jehová Diosca ñucanchijtami achcata bendicianga (Proverbios 10:22). w23.01 pág. 31 párrs. 15, 16

Ñucanchijca Adán y Eva shinaca mana casha ninchijchu. Chaipajca Jehová Dios ima shina cashcata, pai ima shina yuyashcataca allimi yachana canchij. Chashnami Jehová Diostaca ashtahuan cꞌuyashun. Abrahampaj ejemplopi yuyashunchij. Paica Jehová Diostaca tucui shunguhuanmi cꞌuyaj carca. Shuj cutinca Abrahamca Jehová Dios imata decidishcatami yachaj chayarca. Jehová imata decidishcata mana tucuita intindishpapish Diosta ashtahuan rijsingapajmi esforzarirca. Por ejemplo, Jehová Dios Sodoma y Gomorrapi causajcunata tucuchigrishcatami Abrahamca yachaj chayarca. Chaipica Abrahamca Jehová Dios alli gentecunata millaicunahuan tucuchinatami mancharca. Shinapish Abrahamca Yayitu Dios allita ruraj cashcata yachashpami paitaca respetohuan huaquin tapuicunata rurarca. Chashna tapujpica Jehová Diosca pacienciahuanmi tucuita cutichirca. Chaimi Abrahamca Jehová Dios tucuicunapaj shunguta alli rijsishcata, alli gentecunata millaicunahuan manataj tucuchinatapish alli intindirca (Génesis 18:​20-32). w22.08 pág. 28 párrs. 9, 10

Huata 455-pica Jerusalén llajtapi pircacunata shayachishca huashaca Nehemiasca confianalla cꞌaricunatami Jerusalenta mandachun churarca. Por ejemplo, Jerusalenpaj pircacunata cuidajcunata mandachunmi Hananiasta churarca. Hananiasca “shujtajcunata yalli Taita Diosta manchaj, imatapish chaitataj nij” runami carca (Nehemías 7:2). Paica Jehová Diosta cꞌuyashcamanta, paita manchashcamantami Dios mingashcacunataca alli pajtachij carca. Ñucanchijpish Hananías shina cajpica tucuicunami ñucanchijpi confiangacuna. Cunanca apóstol Pablota ayudaj Tíquico runamanta yachashun. Apóstol Pabloca Tiquicomanta parlashpaca, “Jesusta alli sirvij, cꞌuyashca huauquimi can” nirca (Efesios 6:​21, 22). Qꞌuipaca Éfeso llajtaman, Colosas llajtaman pai quillcashca cartacunata apachunmi mingarca. Shinallataj huauqui panicunatapish animachun, cushichichunmi mingarca. Cunan punllacunapipish Tíquico shinami ñucanchij pushaj ancianocunaca ñucanchijta cuidacun (Colosenses 4:​7-9). w22.09 págs. 9, 10 párrs. 5, 6

Joseca casi 13 huatacunatami sinchi llaquicunata charirca. Shinapish Joseca Jehová Dios paita mana cꞌuyashcata, paita saquishcataca mana yuyarcachu. Resintirishcallapish mana carcachu (Génesis 45:​4, 5). Ashtahuanpish alli yuyaiyuj cashcamantami paipaj huauquicunataca mana tigra llaquichirca. Ashtahuancarin paicunatami perdonarca. Joseca paillapi yuyanapaj randica Jehová Dios imata rurachun munashcataca allimi intindirca (Génesis 50:​19-21). ¿Josemantaca imatataj yachai tucungui? Cantapish llaquichijpica Jehová Dioshuanca mana resintirinachu cangui. Pai canta saquishcatapish mana yuyanachu cangui. Chaipaj randica llaquicunata ahuantachun Jehová Dios ima shina ayudacushcatami yuyana cangui. Shujtajcuna canta llaquichijpica cꞌuyaimantami paicunata perdonangapaj listo cana cangui. w22.11 pág. 21 párr. 4

Jehová Diosca profeta Danielmanca muscuipi shinami autoridadcunata yalli poderta charishcata ricuchirca. Profeta Danielca chuscu jatun animalcunatami ricurca. Chai chuscu animalcunaca ñaupa tiempopi tiyaj achca poderta charij gobiernocunata, cunan tiempopi tiyaj achca poderta charij gobiernocunatapishmi ricuchin. Chaicunaca Babilonia, Medopersia, Grecia y Roma llajtacunamanta gobiernocunatami ricuchirca. Cunan punllacunapi tiyaj Reino Unido y Estados Unidos gobiernocunatapishmi ricuchin (Daniel 7:​1-3, 17). Chai qꞌuipaca Danielca jahua pachapi shuj jatun tiyarinapi Jehová Dios tiyacushcatami ricurca (Daniel 7:​9, 10). Danielca gobiernocunapaj autoridadta Jehová Dios quichushcatami ricurca. Chai qꞌuipaca Jesucristoman, 144.000 ungidocunamanpish autoridadta cushcatami ricurca (Daniel 7:​13,14, 18). Paicunaca Diosta alli sirvijcuna, gobiernocunata yalli achca poderta charijcunami can. Profeta Danielca ‘Jehová Diosca Jatun Mandajcunatapish paimi churan. Paimi anchuchin. Mandaj cachunca Taita Diosca pita pai churasha nishcatami churan’ nircami (Daniel 2:​19-21). w22.10 pág. 14 párrs. 9-11