Abril

Cashna nishpa tapurishunchij: “¿Pi ñucata consejajpica ima shinataj chasquini? ¿Quejarishpachu caita chaita nini? ¿Shujtajcunatachu culpani?”. Bibliapi parlaj Diosta sirvijcunamanta yachashpapish cashna nishpa tapurishunchij: “¿Paicuna shina ima llaquicunahuantaj chꞌimbapuracuni? ¿Paicunapaj alli ejemplotaca ima shinataj catisha?”. Ñucanchij congregacionpi sirvij mayorllacunamanta, jovenllacunamantapishmi achcata yachai tucunchij. Por ejemplo, huaquin jovencunataca escuelapica paicunapaj compañerocunachari mana allicunata rurachun animancuna. Cutin shujtaj huauqui panicunataca paicunapaj familiacunachari Diosta ama sirvichun jarcancuna. Shujtajcunapish ungushcacunachari cancuna. Paicuna ima shina ahuantajta ricushpami ñucanchijpish ima llaquita charishpaca ahuantai tucushun. Chaimantami cai huauqui panicunataca achcata valoranchij (Hebreos 13:7). w22.04 pág. 13 párrs. 13, 14

Maipica ñucanchij causaipi ima llaquicunata charijpi, shuj pushaj anciano ñucanchijta uyajpi, animajpipish cushillami sintirinchij. Cutin ñucanchij Bibliamanta yachachinaman rijpi, shuj precursor ñucanchijta acompañashpa imapi mejoranata huillajpica animarishcami sintirinchij. Cashna ayudaj huauqui panicunaca shujtajcunata ayudashpami cushilla sintirincuna. Ñucanchijpish cushilla sintiringapajca shujtajcunatami ayudana canchij. Cai metata pajtachingapaj imata ruranata ricushun. Ima metata pajtachingapajca imallata rurana cashcatami alli ricuna canchij. Por ejemplo, maipica huauqui panicunatami ashtahuan ayudasha ninchij. Pero chashna yuyashpalla saquirinapaj randica huauqui panicunata ima shina ayudanatami ricuna canchij. Chai huashaca huauqui panicunata ima shina ayudanata, chaita pajtachingapajpish imata ruranatami shuj hojitapi anotai tucunchij. Chashnami ñucanchij metata pajtachi tucushun. w22.04 pág. 25 párrs. 12, 13

Cunan punllacunapica Jehová Diosca “pi mana yupai tucuipaj achca gentecunatami” tandachicun. Paicunamanca Paraíso Allpapi causachunca paipaj Gobiernota cazuna cashcatami yachachicun (Apocalipsis 7:​9, 10). Cai mundopica gentecunaca pꞌiñanacushpa, macanacushpami causancuna. Pero Diospaj pueblopi tandachishcacunaca shujtajcunahuan pꞌiñanacunatami saquishcacuna (Miqueas 4:3). Paicunaca guerracunapi macanacunapaj randica tucui gentecunamanmi Diosmanta yachachishpa, Diospaj munaimanta yachachishpa ayudacuncuna (1 Timoteo 6:19). Dios tandachishca puebloca Diospaj Gobiernota apoyacushcamantami maipica cullqui illaj saquirincuna o paicunapaj familiacunaca jarcaicunatami churancuna. Pero Jehová Diosca paicunamanca tucui minishtishcacunata cushpami ayudacun (Mateo 6:​25, 30-33; Lucas 18:​29, 30). Caicunata ricushpaca Diospaj Gobierno jahua pachapi ña mandacushcatami cuentata cunchij. Ñalla cai Allpatapish mandagrishcatami intindinchij. w22.12 pág. 6 párr. 13

1.000 huatacuna tucurijpica Adanmanta charishca juchataca ña mana charishunchu. Juchamantaca ña mana ashtahuan sufrishunchu (Romanos 5:12). Cai Allpapi causajcunaca jucha illajcunami cashun. Apocalipsis 20:​5-pica jucha illaj tucunataca cutin causarinahuanmi comparan. Satanasca Diosmanta tucui laya trampacunahuan caruyachisha nijpipish Jesusca mana caruyarcachu. ¿Jucha illaj gentecunata millai Diablo pruebacunata churajpica paicunaca Jesús shinallatajchu Jehová Diosmanta mana caruyangacuna? 1.000 huatacuna tucurijpica Satanasca jutcumantami llujchishca canga. Chaipimi Jehová Diosta sirvishpa catinata o mana catinata ricuchina tucunga (Apocalipsis 20:7). Cai tucuri pruebapi Diosta tucui shunguhuan sirvishpa catijcunaca huiñai causaitami chasquingacuna. Shinallataj juchamanta cacharichishca cashcamantami cushilla cangacuna (Romanos 8:21). Cutin Diablopaj lado tucujcunaca huiñaipajmi tucuchishca cangacuna (Apocalipsis 20:​8-10). w22.05 pág. 19 párrs. 18, 19

Jesusta huañuchingapaj judiocunaman, romanocunaman Diablo yuyaita cujpimi cai profeciaca pajtarirca (Lucas 23:​13, 20-24). Talonpi chugririshpaca asha tiempotami mana puri tucunchijman ¿nachu? Chai shinallatajmi Jesusca huañushca cashpaca casi quimsa punllacunallata mana imata rurai tucurca (Mateo 16:21). Pero huarmipaj huahuaca culebrapaj umatami saruna carca. Chaimi Jesús mana tucui vidapaj huañuna cashcata intindinchij. Jesusca quimsa punllacunallapimi mana huañunalla espíritu shina causarirca. Dios agllashca horaspicarin Diablota sarushpami tucuita tucuchinga (Hebreos 2:14). Jesuspish, paihuan mandangapaj agllashca ungidocunapish Diablopaj tucui catijcunatami tucuchinga (Apocalipsis 17:14; 20:​4, 10). w22.07 págs. 16, 18 párrs. 11, 12

Yaya mamacuna, cancunapaj huahuacuna alli amigocunata charichunmi ayudana canguichij. Bibliapi nishca shinaca ñucanchij amigocunaca allita rurachun o mana allita rurachunmi animancuna. Yaya mamacuna, ¿cancunapaj huahuacunapaj amigocunata rijsinguichijchu? ¿Cancunapaj huahuacuna alli amigocunata charichunca ima shinataj ayudai tucunguichij? (1 Corintios 15:33). Diosta sirvij huauqui panicunahuan tiempota pasangapajmi huasiman invitana canguichij (Salmo 119:63). Tony shuti shuj yayaca: “Ñuca huarmihuanca chꞌican chꞌican edadta charij, chꞌican chꞌican culturamanta caj huauqui panicunatami ñucanchij huasiman siempre invitashcanchij. Paicunahuanmi micunchij. Bibliamantapishmi tandalla estudianchij. Cai tucui huauqui panicuna cushicuihuan Diosta sirvicushcata ricushpaca ñucanchij huahuacunaca paicunapaj fetami sinchiyachishcacuna” ninmi. w22.05 págs. 29, 30 párrs. 14, 15

Ancianocunaca Jehová Dios munashca shina juchata rurajta juzgangapajmi esforzarina can. Juchata ruraj mana arrepintirijpica ancianocunaca congregacionmantami llujshichina can. Chashnami shujtaj huauqui panicunapish juchapi ama urmachun ayudancuna (1 Corintios 5:​6, 7, 11-13; Tito 3:​10, 11). Shinallataj juchata ruraj arrepintirichun, Jehová Diospajman cutin tigrachunmi ayudancuna (Lucas 5:32). Ancianocunaca Jehová Diostaca arrepintirijcunata ayudachun, sinchiyachichunpishmi mañancuna (Santiago 5:15). Juchata ruraj mana arrepintirijpica ancianocunaca paita juzgashpami congregacionmanta llujshichina can. Pero juchata ruraj shungumanta arrepintirijpi, mana allita ruranata saquijpica Jehová Diosca paita perdonangapajca listomi can (2 Crónicas 33:​9, 12, 13; Lucas 15:​17-24; 1 Timoteo 1:15). w22.06 pág. 9 párrs. 5, 6

Achca huauqui panicunaca Jehová Dios ayudajpimi manchaicunata mishai tucushcacuna (1 Pedro 5:9). Canpish manchaicunatami mishai tucungui. Jehová Dios mandashca shinami Jesuspish, paihuan mandajcunapish ñalla Diablopaj tucui ruraicunata tucuchinga (1 Juan 3:8). Chai huashaca cai Allpapica cushillami causashun. Imatapish ña mana manchashunchu (Isaías 54:14; Miqueas 4:4). Chai punlla chayangacamaca manchaita mishashpa catingapajmi esforzarina canchij. Manchaicunata mishashpa catingapajca Jehová Dios ñucanchijta cꞌuyashcata, cuidashcatami crina canchij. Chaipajca Jehová Dios ñaupa tiempopi paita sirvijcunata ima shina ayudashcata, ñucanchijtapish ima shina ayudacushcatami yuyarina canchij. Tucui chaicunatami shujtajcunamanpish parlana canchij. Jehová Diospaj ayudallahuanmi ñucanchijpish manchaicunata mishai pudishun (Salmo 34:4). w22.06 pág. 19 párrs. 19, 20

Chai estatuapaj chaquicunaca achca poderta charij tucuri mandajtami ricuchin. ¿Chai mandajca pitaj can? Reino Unido y Estados Unidos gobiernocunami can. Cai gobiernocunaca Primera Guerra Mundialmantami apoyarinacushpa mandai callarircacuna. Rey Nabucodonosor ricushca estatuapaj chaquicunaca orohuan, cullquihuan mana rurashcachu carca. Ashtahuanpish fierrohuan, barrohuan chagrushcami carca. Chai barroca gentecunami can. ¿Caica imatataj ricuchin? (Daniel 2:43). Fierroca barrohuan chagrushca cashpaca mana sinchi canchu. Chai shinallatajmi Estados Unidos y Reino Unido gobiernocunaca gentecuna jarcashcamanta paicuna munashca shinaca mana mandai tucushcacuna. Gentecunaca votacioncunapi, parocunapi, huelgacunapimi jarcashcacuna. w22.07 págs. 4, 5 párrs. 9, 10

Bautizarinata dudacushpaca Jesús ima nishcapi yuyai (Hechos 8:36). Paica Diospaj munaita ruranataca shuj sinchiyachij micunahuanmi chꞌimbapurarca. ¿Jehová Diosca can imata rurachuntaj munan? Paica can bautizarichun, paita sirvichunmi munan. Chaita pajtachishpaca sinchiyachij micunata micushca shinami canllataj beneficiaringui (Hechos 2:38). Caipi yuyai. Shuj amigo canman mishquijlla micunata carajpica mana dudashpami micunguiman ¿nachu? Chashnallatajmi Jehová Dios canta bautizarichun nijpica mana dudashpa bautizarinata decidina cangui. ¿Ima nishpataj huaquincunaca manaraj bautizarishcacuna? Paicunaca tal vez bautizaringapaj manaraj listo cashcatami yuyancuna. Yayitu Diosman mingarinata, bautizarinata mana jahua jahualla decidina cashpapish bautizarinataca mana yangamanta qꞌuipayanachu cangui. Chai decisionca tucuimanta yalli importantemi can. w23.03 pág. 7 párrs. 18-20

Jesucristoca espíritu santota chasquishpaca huarmipaj punta huahuami tucurca. Jesús causarishca huashaca Jehová Diosca cai pachatapish, jahua pachatapish mandachun, Diablopaj ruraicunatapish tucuchichunmi Jesusmanca achca poderta curca (Hebreos 2:7; Mateo 28:18; 1 Juan 3:8). ¿Génesis 3:​15-pi parlashca huarmipaj chaishuj huahuacunaca picunataj can? Apóstol Pabloca paicuna picuna cashcatami yachachirca. Paica jahua pachaman ringapaj agllashca judiocunaman, mana judiocunamanpish: “Cristota catijcuna cashpaca, Abrahampaj huahua huahuacunami canguichij. Abrahamman Dios cusha nishca herenciatapishmi chasquinguichij” nircami (Gálatas 3:​28, 29). Maijanpish jahua pachaman ringapaj espíritu santohuan agllashca cashpaca, huarmipaj caishuj huahuacunapuramantami tucun. Shinashpaca huarmipaj huahuacunaca Jesucristopish, jahua pachapi Jesushuan mandangapaj agllashca 144.000 ungidocunapishmi can (Apocalipsis 14:1). Paicunaca paicunapaj Yaya Jehová munashca shina yuyangapaj, causangapajmi esforzarincuna. w22.07 pág. 16 párrs. 8, 9

Cai tucuri punllacunapica tucuicunami llaquicunata charishun (2 Timoteo 3:1). Llaquicunahuan cashpa o llaquicuna huashan huashan shamujpicarin desanimadosmi sintirishun. Pero Jehová Dios ñucanchijmanta preocuparijpi, ñucanchijta ayudajpimi chai llaquicunataca ahuantai tucushun. Cunanca Jehová Dios Jobta ima shina ayudashcata ricushun. Jobtaca ratomi achca llaquicunaca japirca. Shuj punllallapimi paipaj animalcuna, paita sirvijcuna, paipaj huahuacunapish huañurcacuna (Job 1:​13-19). Qꞌuipacarin paitaca shuj millai ungüimi japirca. Chai ungüimantami Jobpaj tucui cuerpoca chugri carca (Job 2:7). Jehová Diosca Job ima tucushcataca allimi yacharca. Jobta cꞌuyashcamantami Diosca llaquicunata ahuantachun, paita sirvishpa catichun ayudarca. w22.08 pág. 11 párrs. 8-10

Jehová Dios ñucanchijta corregijpica maipica dimastijmi llaquiri tucunchij. Pero llaquirishpalla saquirishpaca, chai corregishcacuna ñucanchijpaj mana alli cashcata o yangamanta ñucanchijta corregishcatami yuyashun. Chashna yuyashpaca Jehová Dios ñucanchijta cꞌuyashcamanta corregishcataca mana cuentata cushunchu (Hebreos 12:​5, 11). Jehová Dios corregishcata chasqui. Jesucristoca huaquin cutincunami Pedrotaca shujtajcunapaj ñaupajpi corregirca (Marcos 8:33; Lucas 22:​31-34). Chaimi Pedroca pingarishcanga. Shinapish paica Jesusta catinataca mana saquircachu. Chaipaj randica Jesús corregishcatami chasquirca, mejorashpa catingapajpishmi esforzarirca. Chaimantami Jehová Diosca Pedrotaca achcata bendiciarca, valishca responsabilidadcunatapishmi paiman mingarca (Juan 21:​15-17; Hechos 10:​24-33; 1 Pedro 1:1). Jehová Dios ñucanchijta corregijpica mana pingarishpami corregishcata chasquina cangui, mejorangapajpishmi esforzarina cangui. Chashnami Jehová Diosta, huauqui panicunatapish ashtahuan alli sirvingui. w22.11 págs. 21, 22 párrs. 6, 7

Jehová Dios cꞌuyaj, llaquij, allita ruraj cashcatami Abrahamca alli yacharca. Jehová Diosca Abrahamtaca “cambaj churi Isaacmantami cambaj huahuacuna shamunga” nishpami huillashca carca. Chaita yachashcamantami apóstol Pablo nishca shinaca Abrahamca Jehová Dios paipaj churi Isaacta causachi tucushcata crirca (Hebreos 11:​17-19). Abrahamca Jehová Diosta achcata cꞌuyashcamantami Jehová Dios allita ruranapi confiarca. Paipaj sinchi cajpipish Jehová Diosta tucuipi cazunatami decidirca (Génesis 22:​1-12). ¿Abrahampaj ejemplota catingapajca imatataj rurana canchij? Jehová Diosta ashtahuan rijsingapajmi esforzarina canchij. Chashnami Jehová Diostaca ashtahuan cꞌuyashun, ñucanchij concienciatapish alli yachachishun (Salmo 73:28; Hebreos 5:14). Por ejemplo, shuj tentación ricurijpica Jehová Diosta ama llaquichingapajmi chaitaca mana rurashun. w22.08 págs. 28, 29 párrs. 11, 12

Apóstol Pablopish, Bernabepish Listra, Iconio y Antioquía llajtacunaman tigrashpaca congregacioncunapica ancianocunatami nombrarcacuna (Hechos 14:​21-23). Chai ancianocunaca cunan punllacunapi tiyaj ancianocuna shinallatajmi huauqui panicunataca achcata sinchiyachircacuna. Ancianocunaca llaquilla caj huauqui panicunata ayudangapajmi listos cana canguichij. Apóstol Pabloca huauqui panicunata animangapajca Diosta sirvijcuna Diospaj ayudahuan sinchi llaquicunata ahuantashcatami parlarca (Hebreos 12:1). Paicunamanta parlajpica huauqui panicunaca achcatami animarircacuna. Shinallataj Diosta sirvina yuyaillami catircacuna (Hebreos 12:22). Ñucanchijpish ñaupa tiempopi tiyaj Diosta sirvijcunamanta yachashpaca achcatami animarishun. Por ejemplo, Jehová Dios Gedeonta, Baracta, Davidta, Samuelta, shujtajcunata ima shina ayudashcata ricushpami achcata animarinchij (Hebreos 11:​32-35). w22.08 págs. 21, 22 párrs. 5, 6

¿Causarigrijcunataca manaraj huañushpa imata rurashcamantachu juzganga? Mana. Paicunaca huañushpami paicunapaj juchacunamanta ña perdonashca can. Paicunataca paraíso Allpapi Dios yachachishcacunata cazushcamanta o mana cazushcamantami juzganga. Diosta sirvij Noé, Samuel, David, Daniel, shujtajcunapish Jesucristomanta yachashpami paipi feta churana canga. Manaraj huañushpa mana allita rurajcunapish chaitami pajtachina canga. Pero ¿Diosta mana cazujcunahuanca imataj tucunga? Apocalipsis 20:​15-pica: “Ashtahuanpish causaita chasquinapaj libropi mana quillcashcacunaca nina cuchamanmi shitashca carcacuna” ninmi. Caipi nishca shinaca paicunataca huiñaipajmi tucuchinga. Chaimantami ñucanchij shuticuna causaita chasquinapaj libropi quillcashca cachun, chaimanta ama borrarichunpish esforzarina canchij. w22.09 pág. 19 párrs. 17-19

Bibliapaj yachachishcacunata alli ricushpami ñucanchij saludmanta cada uno alli decisioncunata agllana canchij (1 Timoteo 3:9). Chaimantami Filipenses 4:​5-pi ima nishcatapish pajtachina canchij. Chaipica alli yuyaiyujcuna, shujtajcunata respetajcuna cachunmi yachachin. Caita pajtachingapajca ñucanchij saludmanta mana yallitaj preocuparinachu canchij. Ñucanchij huauqui panicunaca paicunapaj saludta cuidangapajchari chꞌican chꞌican decisioncunata agllangacuna. Imata decidijpipish paicunatami cꞌuyashpa, respetashpa catina canchij (Romanos 14:​10-12). Callaripi nishca shinaca Jehová Diosmi ñucanchijmanca causaita cushca. Jehová Diosta agradicingapajca paitami sirvishpa catina canchij, ñucanchij causaitapishmi cuidana canchij (Apocalipsis 4:11). Jehová Diosca ungurishpalla, problemacunata charishpalla causachunca mana munarcachu. Ashtahuanpish llaquicuna illaj, huañui illaj causachunmi munan (Apocalipsis 21:4). Chai causaita charingacamaca ñucanchij causaita cuidashpa catishunchij. Jehová Diostapish tucui ñucanchij causaipi shungumanta sirvishpa catishunchij. w23.02 pág. 25 párrs. 17, 18

Jehová Diosca gobiernocunata yalli autoridadta charishcatami ricuchishca (Romanos 13:1). Quimsa ejemplocunata ricushun. Egipto llajtata mandajca Diospaj pueblotami sinchita trabajachishpa charirca. Chaimantami paicunataca mana richun saquirca. Pero Jehová Diosca paipaj pueblota quishpichingapajmi chai mandajtaca puca mama cuchapi ahuachirca (Éxodo 14:​26-28; Salmo 136:15). Babilonia llajtamanta rey Belsasarpish Jehová Diosta yanganchishpa platamanta, oromanta rurashca dioscunatami alabarca (Daniel 5:​22, 23). Pero chai jatun tucushca reytaca Jehová Diosmi chai tutallataj huañuchichun saquirca. Paipaj mandanatapish medocuna, persacuna japichunmi saquirca (Daniel 5:​30, 31). Palestina llajtata mandaj Herodes Agripa primeroca apóstol Santiagotami huañuchirca. Qꞌuipaca apóstol Pedrota huañuchisha nishpami carcelpi churarca. Pero Diosca Pedrota huañuchichunca mana saquircachu. Diospaj angelca Herodesmanca shuj ungüitami cacharca. Chaimi Herodesca huañurca (Hechos 12:​1-5, 21-23). w22.10 pág. 15 párr. 12

Diospaj Shimipica Jehová Diosllataj paita sirvijcunata ima shina cuidashcata yachashpaca, pai cusha nishcacunata pajtachij cashcatami tucui shunguhuan crinchij. Diospaj Shimipi nishca shimicuna cushichishcamanta, ahuantachun ayudashcamantami Dios cusha nishcacunata shuyacunchij (Romanos 15:4). Jehová Dios pai cusha nishcacunata pajtachij cashcata yuyarishunchij. Abrahampaj y Sarapaj ejemplopi yuyashun. Paicunaca mayorllacuna cashcamantami huahuacunataca ña mana chari tucurcacuna. Pero Jehová Diosca paicunataca shuj huahuata charigrishcatami huillarca (Génesis 18:10). Abrahamca feta charishcamantami achca llajtacunapaj yaya canata shuyacurca (Romanos 4:18). Runacunapajca Jehová Dios ima nishcaca mana pajtaipaj layami carca. Pero Abrahamca Jehová Dios ima nishcata pajtachinataca tucui shunguhuanmi crirca. Chaimantami Jehová Diosca Abrahamtapish, Saratapish shuj huahuata charichun ayudarca (Romanos 4:​19-21). Cashna laya ejemplocunamanta yachashpaca Jehová Diospimi ashtahuan confiashun. w22.10 págs. 26, 27 párrs. 13, 14

Cai shimicunaca Babilonia llajtamanta judiocuna llujshina horaspimi pajtarirca. Jehová Diosca tucuimanta yalli Alli Yachachij cashcatami ricuchirca. Judiocunaman yachachishcamantami judiocunaca Diosta alli adorai tucurcacuna. Cunan punllacunapipish Jehová Dios ñucanchijta yachachicushcamantami cushilla sintirinchij. Isaiasca cai versocunapica Jehová Dios shuj Yachachij shina cashcata, cutin ñucanchijcuna yachacujcuna shina cashcatami yachachin. Chaimantami Jehová Diosca ñucanchijpaj ñaupajpi yachachicuj shina can. Chaitaca ñucanchij ñahuicunallahuantajmi ricucunchij. Cai tiempopica Jehová Diosca paipaj organizacionta utilizashpami ñucanchijta alajata yachachicun. Por ejemplo, tandanacuicunapimi ñucanchijtaca yachachin. Shinallataj publicacioncunahuan, videocunahuan, shujtaj ruraicunahuanpishmi ñucanchijtaca yachachin. Chai yachachishcacunata catishpaca llaquicunata cushicuihuanmi ahuantai tucushun. w22.11 pág. 10 párrs. 8, 9

Jesusca Jerusalenpish, Diospaj templopish tucurinallamantaca mana parlasha nircachu. Ashtahuanpish cai millai punllacuna ima shina tucurinatapishmi nicurca. Chaimantami paica: “Ima punlla, ima hora shamunataca ni pi mana yachanchu. Jahua pacha angelcunapish, Churipish mana yachanchu. Chaitaca Yayallami yachan” nishpa cutichirca. Shinallataj paicunataca ‘Chaparacuichij, rijcharishca caichij’ nishpami consejarca (Marcos 13:​32-37). Jesusta punta catijcunaca causashpa catingapajca rijcharishcami cana carcacuna. Jesusca paipaj catijcunamanca: “Jerusalén llajta muyundijpi soldadocuna shayacujta ricushpaca, chai llajtata tucuchina ñalla chayamucushcatami yachanguichij” nishpa huillarca. Jesús ima nishcata cazushpami paicunaca urcucunapi miticunaman rina carcacuna. Jesuspaj nishcacunata cazujcunaca romanocuna Jerusalenta manaraj tucuchijpimi miticushpa rircacuna. Chashnami paicunapaj causaitaca quishpichi tucurcacuna (Lucas 21:​20, 21). Ñucanchijpishmi cai pachapaj ruraicuna tucurina punllacunapi causacunchij. Chaimantami Jesusta punta catijcuna shinallataj alli yuyaiyujcuna, chaparajcuna cana canchij. w23.02 págs. 14, 16 párrs. 1-3

Jehová Diosca paita sirvijcunamanca ama llullachun, allita rurachunmi yachachishca. Chaita pajtachishpaca Diosta sirvijcunaca paicunapaj shungupipish, yuyaipipish tranquilos, cushillami sintirincuna (Proverbios 13:​5, 6). Bibliata estudiai callari horasmantami canpish chashnallataj sintirishcangui. Yayitu Jehová canta pushachun saquinapish alli cashcatami intindishcangui (Salmo 77:13). Chaimantami Diospaj mandashcacunata cazunata, Diosmanta verdadta yachachinatapish munangui (Mateo 6:33). ¿Chaicunataca ima shinataj pajtachi tucungui? Canca Diablopaj llullacunata mana chasquishpami Bibliamanta yachashca verdadta difindina cangui. Diospaj mandashcacunatapish cazushpami Dios canta pushachun saquina cangui. Caicunataca cambaj tucui causaipimi pajtachina cangui. Chaimantami Jehová Diosta mañashpaca: “Ñuca tucui causaipimi canllata sirvisha” nishpa paiman mingarina cangui. Qꞌuipaca Diosman ña mingarishcataca tucuicunapaj ñaupajpi ricuchingapajmi bautizarina cangui. Caicama ricushca shinaca, bautizarina munaita charingapajca Bibliapi Diosmanta verdadtami yachana cangui. Allita ruranapish cambajllataj alli cashcatami intindina cangui. w23.03 pág. 3 párrs. 4, 5

Diosta mana sirvij gentecunaca Diospaj tranquilo, sumaj causaitaca mana charincunachu. Cutin ñucanchijcunaca Diospaj sumaj causaita chasquingapajca Jehová Dioshuanpish, paita cꞌuyajcunahuanpishmi alli apanacuna canchij (1 Tesalonicenses 5:23). Jehová Diosta rijsingapaj, paipi confiangapaj, paita tucuipi cazungapajpishmi esforzarina canchij. Caicunata rurashpaca Diospaj sumaj causaitami charishun. Ñucanchij shungupipish, yuyaipipish ima llaquicuna ricurijpica tranquilosmi sintirishun (Filipenses 4:​6, 7). ¿Millai ungüicuna tiyai horas, llaqui atraso japi horas, parota rurai horas o contracuna llaquichi horasca ñucanchij shungupipish, yuyaipipish tranquilo sintiri tucunchijchu? Cashna laya llaquicunata charishpaca achcatachari manchanchij. Pero cai punllapaj versopi catishpami achca huauqui panicunaca Diospaj ayudahuan llaquicunata charishpapish Dios cushca sumaj, tranquilo causaita charishcacuna. w22.12 pág. 16 párrs. 1, 2

Ima cambio tiyashcamanta ima asignacionta mana charishpapish, Jehová Diospaj valishca cashcatami yuyarina canchij. Ñucanchij munashca asignacionta charij huauqui panicunahuanpish mana compararinachu canchij (Gálatas 6:4). Chaimanta shujtajcunahuan compararinapaj randica Diosta ashtahuan sirvishpa, huauqui panicunata ayudashpa catishunchij. Ashtahuan responsabilidadcunata chasquingapajca minishtirishca cosascunallahuan, mana dibiyashpami causana cangui. Shinallataj ima responsabilidadcunata chasquingapajca puntaca chꞌican chꞌican metacunatami pajtachina tucunga. Por ejemplo, precursor regular cangapajca puntaca precursor auxiliarmi cai tucungui. Shinallataj siervo ministerial cangapajca puntaca ashtahuan predicangapajmi tiempota surcui tucungui. Chashna esforzarishpaca qꞌuipacarin ashtahuan responsabilidadcunatachari charingui. Ima laya cajpipish Jehová Diosta sirvishpa catingapaj tucui pudishcata rurai. w22.04 págs. 26, 27 párrs. 16, 17

Jehová Diosca llaquicunata ahuantachun, paita cushicuihuan sirvichunmi ayudasha nin. Ima llaquicunata ahuantachunca Jehová Diosca ñucanchijmanca fuerzasta cushpami ayudanga. Ñucanchij munashca shina chai llaquicuna mana tucurijpica, mana upallashpallami Jehová Diosta cutin cutin mañashpa catina canchij. Jehová Diosllatajmi ñucanchijmanca chashna mañachun yachachishca (Isaías 62:7). Jesucristopish Lucas capítulo 11, versos 8 al 10 y 13-pica huaquin chꞌimbapuraicunata churashpami espíritu santota cuchun Jehová Diosta mañana cashcata yachachirca. Shinallataj alli decisioncunata agllangapajca mana upallashpallami Jehová Diosta cutin cutin mañashpa catina canchij. w22.11 págs. 8-10 párrs. 1, 6, 7

Canpish, cambaj familiapish contracuna llaquichi horaspajmi allichirina canguichij. Pero chaipajca sinchi llaquicunata charigrishcataca mana yuyanachu canguichij. Ashtahuanpish allichiringapajca Jehová Dioshuan alli apanacungapajmi esforzarina cangui. Cambaj huahuacunapish Diospajman cꞌuchuyachunmi ayudana cangui. Maipica llaquilla o sustarishca cashpaca Jehová Diosmanmi ima shina sintirishcataca tucuita huillana cangui (Salmo 62:​7, 8). Cambaj familiahuanpish Jehová Diospi imamanta confiana cashcatami parlana cangui. Llaqui horaspaj cambaj huahuacunata preparachishca shinallatajmi, contracuna llaquichi horaspajpish preparachina cangui. Jehová Diospi tucui shunguhuan confiachunpishmi ayudana cangui. Chashnami cambaj huahuacunaca tranquilos tucuita ahuantai tucungacuna. Jehová Diosca tranquilo sintirichunmi ñucanchijta ayudan (Filipenses 4:​6, 7). Chashna ayudashcamantami ima pandemia tiyajpipish, ima llaquicuna tiyajpipish o contracuna llaquichijpipish tucuita ahuantai tucunchij. Ancianocunapish, huauqui panicunapish ñucanchijta ayudashcamantami seguros, tranquilo sintirinchij. Chashna ayudanacushcamantami shamuj punllacunapaj jatun llaquitacarin ahuantai tucushun (Mateo 24:21). w22.12 pág. 27 párrs. 17, 18

“Jesús huañushcamantami Jehová Diosca perdonangalla” nishpaca juchacunata mana rurashpa catinallachu canchij (Hebreos 10:​26-31). Cutin jatun juchata rurashcamanta arrepintirishca cashpa, Jehová Diospish, ancianocunapish ña ñucanchijta ayudashca cajpica mana llaquirishpalla catinachu canchij. Ashtahuanpish Jesús huañushcamanta Jehová Dios perdonashcapimi tucui shunguhuan crina canchij (Isaías 55:7; Hechos 3:19). Jesús huañushcamantami Jehová Diosca tucui ñucanchij juchacunata perdonai tucun. Paraíso Allpapica mana nunca aburrido sintirishunchu. Chaipica achca gentecunatami rijsi tucushun. Ñucanchij munashca trabajotapishmi charishun. Ashtahuancarin Jehová Diostapish punllanta punllantami rijsishpa catishun. Pai rurashcacunatapishmi alli rijsishpa catishun. w22.12 pág. 13 párrs. 17, 19

¿Cai huarmica Evachu carca? Mana. Caipi yuyashun. Cai profeciapica cai huarmipaj huahuaca culebrapaj umatami saruna can ninmi. Cai culebraca millai ángel Diablomi can. Shinashpaca Evapaj shuj huahua juchayuj cashcamanta Diablota mana tucuchi tucushcatami intindinchij. Shinaca ¿cai huarmica pitaj can? Apocalipsis libropica Génesis 3:​15-pi parlashca huarmi pi cashcatami yachachin (Apocalipsis 12:​1, 2, 5, 10). Cai huarmica mana aichayuj, mana tulluyujchu can. Apocalipsispi nishca shinaca lunaca cai huarmipaj chaqui ucupimi can. Paipaj umapipish 12 estrellacunayuj coronata churarishcami can. Shinallataj cai huarmica shuj huahuatami huachan. Cai huahuaca Diospaj Gobiernotami ricuchin. Diospaj Gobiernoca jahua pachapimi can. Chaimantami cai huarmipish jahua pachapi cana can. Génesis 3:​15-pi parlashca huarmica jahua pachapi tiyaj tucui angelcunatami ricuchin (Gálatas 4:26). Cunanca huarmipaj huahuacuna picuna cashcatami yachashun. Génesis 22-pi nishca shinaca huarmipaj punta huahuaca, Abrahampaj familiamantami shamuna carca (Génesis 22:​15-18). w22.07 págs. 15, 16 párrs. 6-8

Jehová Diosca Bibliatami ñucanchijman convidashca. Paipaj Shimicunaca alli yachaitami charin. Chai alli consejocunaca tucui gentecunapaj causaitami cambiai tucun. Bibliapaj punta librocunata Moisés quillcacushpaca israelitacunamanca: “Cai mandashcacunaca mana yangachu. Ashtahuanpish cancunaman causaita cujmi” nircami (Deuteronomio 32:47). Bibliapi tiyaj consejocunata cazujcunaca cushilla, allimi causarcacuna (Salmo 1:​2, 3). Achca tiempo huasha quillcashca cashpapish Bibliaca cunancamami gentecunata ayudashca. Yayitu Diospaj consejocunaca cunancamami tucui laya gentecunata ayudashpa caticushca. Chaimantami Bibliata liyina canchij, Bibliapaj consejocunapipish cutin cutinmi yuyana canchij. Chaita rurajpica Yayitu Diosllatajmi paipaj espíritu santohuan chai consejocunata pajtachichun ayudanga (Salmo 119:27; Malaquías 3:16; Hebreos 4:12). Yuyari, Yayitu Diosca shungumantami canta ayudasha nin. ¿Caita yachashpaca Bibliata tucui punllacuna liyina munaita charinguichu? w23.02 pág. 3 párrs. 5, 6

Apocalipsis capítulo 13-pica Reino Unido y Estados Unidos imata rurashcatami parlan. Chaipica: ‘Chai animalca malta ovejapaj shina ishqui gachucunayujmi carca. Shinapish shuj dragón shinami rimai callarirca. Gentecuna ricuchunpishmi jatun milagrocunata ruran. Shinallataj jahua pachamantami cai allpaman ninata uriyachin’ ninmi (Apocalipsis 13:​11-15). Y Apocalipsis capítulos 16 y 19-pica cai gobiernocunamanta parlashpaca ‘llulla profetami can’ ninmi (Apocalipsis 16:13; 19:20). Daniel libropipish Reino Unido y Estados Unidosmanta parlashpaca ‘jatuntami llaquichingacuna’ nircami (Daniel 8:​19, 23, 24). Chaica Segunda Guerra Mundialpimi pajtarirca. Estados Unidosmanta, Reino Unidomanta cientificocunaca jatun bombacunata rurashpami achca llaquita apamurcacuna. Chashnami cai poderyuj llajtacunaca cielomanta allpa pachaman ninata tamyachirca. w22.05 pág. 10 párr. 9