Mayo

Apóstol Juanca 144.000 agllashcacunata ricushca qꞌuipaca “achca gentecunatami” ricurca. 144.000-cunaca yupanallami carca. Pero cai achca gentecunaca mana yupaipajmi carca. Paicunaca Juan ricushca ishqui grupomi can. Chai achcacunamanta parlashpaca Juanca: “Paicunaca jatun llaquimanta quishpirijcunami. Paicunapaj suni churanacunata tajshashpami Malta Ovejapaj yahuarpi yurajyachishcacuna” nircami (Apocalipsis 7:14). Juan ricushca jatun llaquimanta quishpirij achca gentecunaca Paraíso Allpapimi causangacuna, sumaj bendicioncunatapishmi chasquingacuna (Salmo 37:​9-11, 27-29; Proverbios 2:​21, 22; Apocalipsis 7:​16, 17). Jahua pachaman ringapaj agllashcacuna cashpapish o Paraíso Allpapi causagrijcuna cashpapish, Apocalipsis capítulo 7-pi parlaj profecía pajtarinatami tucui shunguhuan crina canchij. Chai profecía pajtarijpica Diospaj Gobiernota apoyajcunaca cushillami causashun. w22.05 pág. 16 párrs. 6, 7

¿Ima valishca decisionta agllashcanguichu? Alli decidingapajca de seguromi Jehová Diosta yachaita cuchun mañarcangui (Santiago 1:5). Rey Salomonca: “Tucui imata rurangapajpish alli yachaitaraj mashcangui” nircami (Proverbios 4:7). Caipica Salomonca Dios cushca yachaimantami parlacurca. Pero ¿llaquicunahuan cajpica Diospaj yachaica ayudai tucunchu? Ari. Diospaj yachaita chasquingapajca Bibliapi tiyaj consejocunatami yachana, pajtachina canchij. Bibliapica ishqui yachaj runacunapaj valishca consejocunami tiyan. Puntapica, Salomonmantami yachashun. Bibliapica: ‘Taita Diosca Salomonmanca yachaisapa canata, allita yuyarij canatami curca’ ninmi (1 Reyes 4:29). Ishquipica, Jesusmantami yachashun. Jesusca tucuicunamanta yalli yachaj runami carca (Mateo 12:42). Jesusmanta parlashpaca Bibliapica: ‘Mandaj Diospaj Espiritumi paipi causanga. Chai espirituca: Yachaisapa canata, yuyaisapa canata cuj espiritumi canga’ ninmi (Isaías 11:2). w22.05 pág. 20 párrs. 1, 2

Mayorllacuna cashpapish Jehová Diosta ashtahuan sirvingapajmi metacunata churai tucunchij. 75 huatacunata charij pani Beverleypi yuyashun. Paica mana alli saludta charishcamantami mana tanto puri tucun. Pero Jesús huañushcata yuyarina campañapimi paica ayudanata munarca. ¿Chaipi ayudangapajca paica imatataj rurarca? Pai pajtachi tucushca metacunatami churarca. Chaita pajtachishpaca paica cushillami sintirirca. Pai chashna rurashpaca shujtajcunatapish ashtahuan huillachunmi animarca. Jehová Diosca mayorlla huauqui panicuna chashna esforzarijpica cushillami sintirin (Salmo 71:17). Pajtachi tucushca metacunata churashunchij. Chaipajca alli cualidadcunata charingapaj esforzarishunchij. Ñucanchij ruranapi, yachaipipish mejorashunchij. Huauqui panicunatapish shungumanta ayudashunchij. Chaicunata rurajpimi Jehová Diosca bendicianga. Ashtahuancarin huauqui panicunaca Timoteo laya Jehová Diosta alli sirvij cashcatami ricungacuna (1 Timoteo 4:15). w22.04 pág. 27 párrs. 18, 19

Cancunapaj huahuacunaman Diosta cꞌuyachun yachachishpa catichij. Pero shuj huahua Diosta sirvinata saquijpica mana alli yaya mama cashcataca mana yuyanachu canguichij. Jehová Diosca tucuicunatami paita sirvinata o mana sirvinata agllachun saquishca. Pai cutin Diospajman tigrai tucushcatami yuyarina cangui. Jesús parlashca chingarishca jovenhuan ima tucushcata yuyari (Lucas 15:​11-19, 22-24). Chai jovenca mana allita ruranatami decidirca. Pero qꞌuipaca Diospajmanmi tigrarca. Jehová Diosca yaya mamacunamanca huahuacunata paimanta yachachichunmi mingashca (Salmo 78:​4-6). Caita pajtachinaca mana jahuallachu can. Chaimantami cancuna tucui shunguhuan esforzarishcamanta achcata felicitanchij. Cancunapaj huahuacuna Jehová Diosta cꞌuyachun, Dios cushca consejocunata yachachunmi yachachishpa catina canguichij. Chaita rurajpica Jehová Diosca cushillami sintiringa (Efesios 6:4). w22.05 págs. 30, 31 párrs. 16-18

Diosta sirvingapaj tucui pudishcata rurashpaca congregacionpica tucuicunami tandalla cashun. Apostolcuna causashca tiempopica huauqui panicunaca chaitami rurarcacuna. Paicunaca congregacionpica chꞌican chꞌican ruraicunatami pajtachijcuna carca (1 Corintios 12:​4, 7-11). Chashnapish mana envidianacushpami Yayitu Diosta tandalla sirvircacuna. Apóstol Pabloca paicunataca tucui pudishcahuan Diosta sirvichun, tandalla cachunmi animarca. Paica: “Tucui crijcunaca paihuan shujlla cuerpo cashpami, aicha mucucuna huatarishca shina alli churashca cashpa paillamantataj huiñangapaj chasquicunchij. Chashna cashpami, tucui crijcuna quiquin rurana cashcata alli rurashpa, cꞌuyaihuan huiñashpa miraricun” nircami (Efesios 4:​1-3, 11, 12). Apóstol Pablo consejashcata catishpaca paicunaca tandalla, cushillami Diosta sirvircacuna. Cunan punllacunapish chashnallatajmi rurana canchij. Shinaca shujtajcunahuanca mana compararinachu canchij. Chaipaj randica Jesuspaj ejemplotami yachashpa catina canchij. Jehová Diosta sirvijpica ‘paipaj shutipi cꞌuyaihuan trabajashpa ricuchishcataca manataj cungaringachu’ (Hebreos 6:10). Jehová Diosca can imalla rurashcataca achcatami valoranga. w22.04 pág. 14 párrs. 15, 16

Jehová Dios juchata rurajta perdonachun o mana perdonachunca mana decidi tucunchijchu. Pero Jehová Dios alli juzganata yachashpaca tranquilosmi sintirinchij. Shinapish maijanpish ñucanchijta jatunta llaquichijpipish paita perdonanatami decidi tucunchij. Pai perdonta mañajpi o mana perdonta mañajpipish perdonanallami canchij. Chashna perdonashpaca resentidos o pꞌiñarishca mana saquirinachu canchij. Caita pajtachingapajca achca tiempotachari minishtishun. Pero sinchi cajpipish perdonanallami canchij. 15 de septiembre de 1994-pi llujshishca La Atalaya revistapica: “Ñucanchijta achcata llaquichijta perdonashpapish pai jatun juchata rurashcataca allimi intindinchij. Pero perdonashpaca Jehová Dios paita juzgachunmi saquicunchij. Jehová Diosllami paitaca alli juzgai tucun” nircami. w22.06 págs. 9, 10 párrs. 6, 7

Jehová Diosca Apocalipsis libropica cai tucuri punllacunapi tucui laya llajtacunamanta, tucui laya razacunamanta, achca gentecunatami paita adorachun tandachisha nirca (Apocalipsis 7:​9, 10). Cai profeciaca cai tiempopimi pajtaricun. Cunan punllacunapica chꞌican chꞌican llajtacunamanta, chꞌican chꞌican culturamanta caj achca cꞌaricuna, huarmicuna, huahuacunapishmi Jehová Diosta tandalla sirvicuncuna (Salmo 133:1; Juan 10:16). Paicunaca tucuicunaman Dios cusha nishcacunamanta predicangapajpish listosmi can (Mateo 28:​19, 20; Apocalipsis 14:​6, 7; 22:17). Canpish cai achcacunapuramanta cashpaca Dios cushca esperanzata charishcamantami cushilla sintiringui. Diabloca Jehová Dios cusha nishcacunata mana pajtachinata crichunmi munan. Diablo chashna pandachijpica fuerza illajmi saquirishun, Diosta sirvinatapishmi saquishun. w22.06 págs. 20, 21 párrs. 2, 3

Esperanzata charinaca barcota charicuj fierro shinami can. Cutin problemacunaca chai jatun huaira shinami can. Jesucristoca ñucanchijta catirashpa llaquichinatami huillarca (Juan 15:20). Pero ñucanchijca esperanzata charishpaca pi ñucanchijta catirashpa llaquichijpipish, llaquicunata charishpapish tucuitami ahuantashun. Jesusca huañunata yachashpapish esperanzata charishcamantami tucuita ahuantarca. Jesusca Yayitu Diospi confiashcata, tranquilo cashcatami ricuchirca. Chaimantami apóstol Pedroca huata 33 Pentecostés punllapica Salmos libropi Jesusmanta ima nishcata huillarca. Chaipica: ‘Ñucaca Diospimi shunguta churashpa causasha. Ñucataca Pambana Jutcupica mana saquinguichu. Canta tucui shunguhuan sirvijpaj cuerpo ismuchunpish mana saquinguichu. Cambaj ñaupajpi cajpica yallitajmi cushichingui’ ninmi (Hechos 2:​25-28; Salmo 16:​8-11). Jesusca Yayitu Dios paita cutin tigra causachinata, jahua pachapi Yayitu Dioshuan cutin tigra canatami seguro carca (Hebreos 12:​2, 3). w22.10 págs. 24, 25 párrs. 4, 5

Shuj cutinca Santiagopish, Juanpish Diospaj Gobiernopi alli puestotami charisha nircacuna. Chaimi paipaj mamataca Jesushuan parlachun cacharcacuna (Mateo 20:​20, 21). Chaita rurashpaca paicunaca jatun tucushcatami ricuchircacuna (Proverbios 16:18). Santiago y Juan chashna pandarijpica caishuj discipulocunapish cꞌuyaita ricuchinatami saquircacuna. Mateo 20:​24-pica: “Caishuj chunga catijcuna chaita uyashpaca chai ishqui huauquicunahuanmi pꞌiñarircacuna” ninmi. ¿Paipaj discipulocuna chashna pꞌiñarijta ricushpaca Jesusca imatataj rurarca? Paica mana rato pꞌiñarircachu. “Cancunapaj randi shujtaj humilde runacunatami mashcagrini” nishpapish mana rimarircachu. Chaipaj randica Jesusca paicunapaj alli shunguta rijsishcamantami cꞌuyaihuan, pacienciahuan yachachishpa catirca (Mateo 20:​25-28). Jesusca paicunata cꞌuyaihuan tratanataca manataj saquircachu. w23.03 págs. 28-30 párrs. 10-13

Canca Bibliata alli estudiangapaj esforzarircangui. Caita rurashcamantami Biblia, Diospaj Shimi cashcata crircangui. Jehová Diosta alli rijsishcamanta, paita cꞌuyashcamantami paita sirvingapaj bautizarina decisionta agllarcangui. Caita rurashcamantami achcata cushicunchij. Manaraj bautizarishpaca achca pruebacunatachari charircangui. Chaimantachari Jehová Diosta tucui shunguhuan sirvinaca mana jahualla cashca. Qꞌuipacunacarin shujtaj llaquicunapishmi ricuringa. Satanasca Jehová Diosta sirvinata saquichun, paita cꞌuyanata saquichunmi munan (Efesios 4:14). Pero canca Jehová Diostami tucui shunguhuan sirvishpa catina cangui. Chaipajca cambaj crishcacunatami sinchiyachishpa catina cangui (Hebreos 6:1). w22.08 pág. 2 párrs. 1, 2

Ñucanchij familia ñucanchijpi confiachunca ima mana parlana cashcataca mana parlanachu canchij. Por ejemplo, shuj cusaca paipaj huarmi asichij costumbrecunata charishcataca mana parlanachu can. Paita cꞌuyashcamanta, paita pingaipi ama churangapajmi chaitaca pajtachina can (Efesios 5:33). Yaya mamacunapish jovencitocuna respetohuan tratachun munashcatami yuyaipi charina can. Chaimantami paicunapaj huahuacunapaj pandarishcacunataca shujtajcunaman mana huillana can (Colosenses 3:21). Uchilla huahuacunapish familiata pingaipi churaj cosascunataca mana parlana cashcatami alli yachana can. Caicunata pajtachishpaca familia ucupica tucuicunami tandalla causangacuna. w22.09 págs. 10, 11 párr. 9

Jehová Diosca Jobhuan parlashpaca pai yachaj cashcata, tucuicunata cuidaj cashcatami yuyachirca. Achca animalitocunamantapishmi parlarca (Job 38:​1, 2; 39:​9, 13, 19, 27; 40:15; 41:​1, 2). Jehová Diosca Jobta ayudachun, consejachunmi Elihutaca cacharca. Chai joven Elihuca Jobtaca Jehová Dios paita sirvijcunata bendiciaj cashcatami yuyachirca. Shinallataj Job ama paillapi yuyachun, Jehová Dios tucuita ruraj cashcata, jatun cashcata yuyarichunmi cꞌuyaihuan ayudarca. Qꞌuipaca ama llaquicunallapi yuyachunmi Jehová Diosca Jobmanca paipaj quimsa amigocunamanta mañachun mingarca (Job 42:​8-10). ¿Cunan punllacunapica Jehová Diosca ñucanchijtaca ima shinataj ayudan? Ñucanchijcuna Bibliata liyijpica Jehová Dios ñucanchijhuan parlacushca shinami can. Bibliata liyinaca llaquicunahuan cashpapish ama desanimarichunmi ayudan (Romanos 15:4). w22.08 pág. 11 párrs. 10, 11

Ñaupa tiempopi Roma congregacionpi sirvij huauqui panicunahuan ima tucushcatami yuyarishun. Chai tiempopica huauqui panicunaca Moisesman cushca leytaca ña mana cazunachu carca. Chaimantami tucui laya micunacunataca micui tucurcacuna (Marcos 7:19). Huaquin judiocunaca chashna tucui micunacunataca micujcunallami carca. Pero shujtaj judiocunaca Moisesman cushca leyta valichishpa catishcamantami huaquin micunacunataca mana ricunayachircacuna. Chaimi apóstol Pabloca huauqui panicuna ama chꞌicanyarichun consejarca. Apóstol Pabloca chashna consejashpaca huauqui panicuna ama pꞌiñarinacushpalla alli apanacuchunmi ayudarca (Romanos 14:​19, 20). Apóstol Pablopish shujtajcunata ama pandachingapajmi esforzarirca (1 Corintios 9:​19-22). Ñucanchij huauqui panicunapish ñucanchij shina mana yuyajpi, mana rurajpipish apóstol Pablo shinallatajmi paicunahuan alli apanacungapaj esforzarina canchij. w22.08 pág. 22 párr. 7

Maipica ima metata charishpaca chaita pajtachingacamami esforzarinchij. Chashnallatajmi allita rurashpa catingapajca esforzarishpa catina canchij. Jehová Diosllatajmi chaita pajtachichun ayudanga (Salmo 84:​5, 7). Jehová Diosca ñucanchijta achcata cꞌuyashcamantami paipaj mandashcacunataca llashaj quipita shina ama ricuchun ayudan (1 Juan 5:3). Ashtahuanpish Dios cushca mandashcacunata cazushpaca allimi causashun. Apóstol Pablo parlashca pechopi fierro churanapi yuyashunchij (Efesios 6:​14-18). Ñaupa tiempopica soldadocunaca paicunapaj shunguta pi ama llaquichichunca pechopi fierro churanatami churarijcuna carca. Chashnallatajmi ñucanchij shungupi mana alli yuyaicuna, mana alli munaicuna ama tiyachunca Diospaj mandashcacunata cazuna canchij (Proverbios 4:23). w22.08 págs. 29, 30 párrs. 13, 14

Bibliapi tiyaj consejocunami Diosta sirvijcunata ayudacushca. Pero ¿caica ima shinataj pajtarishca? Jehová Diosmi chai ñaupa Quillcachishcacunamantaca copiacunata rurachirca. Chai copiajcunaca juchayujcuna cashpapish tucuitami con cuidado rurarcacuna. Chaimantami shuj yachaj runaca Ñaupa Testamentomanta parlashpaca: “Ñaupa Quillcachishcacunamantaca cai copiashcacunami exacto can” nircami. Cunancamami Bibliaca Yayitu Diospaj yuyaicunata yachachin. Bibliaca ñucanchijpajca dimastij valishca regalomi can. Chaimantami Santiago 1:​17-pica “tucui alli regalocunapish, ima ashtahuan allicunapish” Yayitu Jehová Diosmanta shamushcata parlan. Maijanpish ñucanchij minishtishca regalota cushpaca ñucanchijta alli rijsishcatami ricuchin. Dios cushca Bibliapish ñucanchij minishtishca regalo shinami can. Bibliata alli estudiashpaca Yayitu Diosmantami achcata yachanchij. Shinallataj pai ñucanchijta alli rijsishcata, ima minishtishcatapish alli yachashcatami intindinchij. w23.02 págs. 2, 3 párrs. 3, 4

Jesús cai Allpata 1.000 huatacunata mandacujpica ñucanchij huañushca familiacunapish, shujtaj huañushcacunapishmi causaringacuna. Chaita ricushpaca Jehová Diospish, tucui gentecunapishmi cushilla sintirishun (Job 14:15). Manaraj huañushpa allita rurajcunapaj shuticunaca causaita chasquinapaj libropimi quillcashca can. Chaimantami paicunaca huiñai causaita charingapaj causaringacuna (Hechos 24:15; Juan 5:29). Quizás ñucanchij huañushca familiacunaca callari causarigrijcunapuramantami canga. Ashtahuanpish Diosta rijsina, sirvina oportunidadta mana charijcunaca juzgashca cangapajmi causaringacuna. Cai Allpapi causarigrijcunaca achcatami yachana cangacuna (Isaías 26:9; 61:11). Chaimi achca millón gentecunaman yachachina tucunga (Isaías 11:10). w22.09 págs. 20, 21 párrs. 1, 2

Achca gobiernocuna tandanacushpa Diospaj pueblota llaquichisha nijpica, Jehová Diosca paicunata yalli poderta charishcatami ricuchishca. Shuj cutinca Jehová Diosca israelitacuna pai cusha nishca allpatapish quichuchunmi ayudarca (Josué 11:​4-6, 20; 12:​1, 7, 24). Jehová Diosca gobiernocunata yalli achca poderta charishcatami cutin cutin ricuchishca. Babilonia llajtamanta rey Nabucodonosorca jatun tucushpa pai achca poderta charishcatami yuyarca. Jehová Diostapish mana alabarcachu. Chaimi Jehová Diosca pai loco tucuchun saquirca. Qꞌuipaca rey Nabucodonosorca juilluta japishpami Jehová Dioslla tucuicunamanta yalli jatun cashcata, huiñaipaj Mandaj cashcata, tucuita rurai tucuj cashcata intindirca. Chaimantami paita alabarca (Daniel 4:​30, 33-35). Salmota quillcaj shuj runaca: “Mandaj Diosmi ñucanchij Diosca nij llajtaca cushichishcami. Mandaj Dios chꞌicanyachishcacunaca cushichishcami” nircami (Salmo 33:12). Chaimantami ñucanchijca Yayitu Diosta tucuipi causangapaj esforzarina canchij. Chashnami cushilla causashun. w22.10 págs. 15, 16 párrs. 13-15

Bibliapi tiyaj huaquin profeciacuna ña pajtarishcata ricushpaca shujtaj profeciacunapish shamuj punllacunapi pajtarigrishcatami tucui shunguhuan crinchij. Ñucanchijpish Salmota quillcaj shuj runa shinami sintirinchij. Paica: ‘Quiquin quishpichinapimi shuyani. Quiquin nishcacunapimi ñuca shunguta churani’ nircami (Salmo 119:81). Jehová Diosca ñucanchijta cꞌuyashcamantami Bibliapica alaja bendicioncunata cugrishcata huillashca (Jeremías 29:11). Chai esperanzata charishcamantami Jehová Diospi tucui shunguhuan confianchij. Runacuna ñucanchijta mana quishpichi tucushcataca allimi intindinchij. Chaimantami Bibliapi crishpa catingapajca Bibliapi tiyaj profeciacunata estudiashpa catina canchij. Bibliapi tiyaj consejocunaca achca gentecunatami ayudashca, chaimantami Bibliapi confiai tucunchij (Salmo 119:​66, 138). Por ejemplo, huaquin cusa huarmicunaca divorciarinatami yuyashcacuna carca. Pero Bibliapi tiyaj consejocunata catishcamantami cunanca cushilla, tandalla causacuncuna. Paicunapaj huahuacunapish cushilla, allimi sintirincuna (Efesios 5:​22-29). w23.01 pág. 5 párrs. 12, 13

Jesusca Jehová Dios ñucanchijman imalla minishtishcacunata cunatami huillarca (Mateo 6:​32, 33). Shinallataj paica Jehová Dios paipaj espíritu santota cushpa ñucanchijta ayudanatapishmi huillarca (Lucas 11:13). Jehová Diosca cai nishcacunatami pajtachishca. Ashtahuancarin Jehová Dios ñucanchijta ima shina perdonashcata, ima shina cushichishcata, ima shina yachachishcatami yuyarinchij (Mateo 6:14; 24:45; 2 Corintios 1:3). Jehová Dios cai tucuita ima shina pajtachishcata yuyarishpaca, shamuj punllacunapi pai cusha nishcacunata pajtachinatapishmi seguros cashun. Jehová Dios mana llullaj, tucuita pajtachij cashcamantami paipi confianchij. Jehová Dios pai cusha nishcacunata pajtachinata yachashpaca dimastij cushillami sintirinchij (Salmo 146:​5, 6). w22.10 págs. 27, 28 párrs. 15, 17

¿Cunan punllacunapica cai profeciaca ima shinataj pajtarishca? 1919 huatamantami achca millón gentecunaca Babilonia llajtamanta israelitacuna llujshishca shina panda religioncunamanta llujshircacuna. Paicunaca Jehová Diosta sirvicushcamantami shuj paraisopi causacushca laya Diosta tandalla sirvicuncuna (Isaías 51:3; 66:8). 1919 huatamantami ungido huauqui panicunaca shuj paraisopi cashca shina Jehová Diosta tandalla sirvicushcacuna. Shujtaj ovejacunamanta huauqui panicunapishmi shuj paraisopi cashca shina Jehová Diosta tandalla sirvicushcacuna. Paicunapish achca bendicioncunatami Jehová Diosmanta chasquishcacuna (Juan 10:16; Isaías 25:6; 65:13). Cai tiempopica Diosta sirvijcunaca chꞌican chꞌican llajtacunapimi Jehová Diosta sirvicunchij. Chashna chꞌican chꞌican llajtacunapi causacushpapish shuj paraisopi causacuj shinami Jehová Diosta tandalla sirvi tucunchij. Chaipajca Dios munashca shinami paita adorana canchij. w22.11 págs. 11, 12 párrs. 12-15

¿Jehová Dios huiñai causaita charishcata intindinaca cambajca sinchichu can? (Isaías 40:28). Achcacunapajmi caicunata crinaca sinchi can. Elihuca: ‘Dios causashca huatacunatapish manamari yupai tucunchijchu’ nircami (Job 36:26). Pero imacunata mana intindishcallamantaca mana ninachu canchij “chaicunaca mana tiyanchu”. Por ejemplo, luz ima shina achijyachijtaca manachari tucuita yachanchij, pero chaita mana intindishpapish luz mana tiyashcataca mana ni tucunchijchu. Chai shinallatajmi Jehová Dios huiñaita causaj cashcata mana intindishpapish Dios mana tiyashcataca mana crinalla canchij (Romanos 11:​33-36). Ashtahuanpish Jehová Diosca huiñaipaj causaj Diosmi can. Jehová Diosca cai pachapish, intipish, estrellacunapish manaraj tiyajpimi ña tiyarca. Bibliapica: ‘Paica jahua pachatami rurarca’ ninmi (Jeremías 51:15). w22.12 págs. 2, 3 párrs. 3, 4

Huaquinpica shujtajcunapaj ñaupajpi Yayitu Diosta mañachunmi ñucanchijta ningacuna. Por ejemplo, tal vez shuj panica Bibliamanta yachachinaman richunmi shujtaj panita invitanga. Chaimi cai panica acompañajtaca Yayitu Diosta mañachun ninga. Pero acompañaj panica yachacujta mana alli rijsishcamantami tucuri mañaita ruranata munanga. Shinami estudiashca huashaca yachacujmanta imata mañanata yachanga. Maipica shuj huauquitami predicanaman llujshingapaj mañachun o tandanacuicunapi mañachun ningacuna. Cai huauquicunaca Diosta mañagrishpaca imapaj tandanacushca cashcatami yuyarina can. Ña Diosta mañacushpapish pita mana consejanachu can, ima anunciotapish mana ninachu can. Tandanacuicunapica Diosta cantangapaj, Diosta mañangapajpish cinco minutocunallami tiyan. Chaimantami huauquicunaca Diosta mañacushpaca mana achcata demorana can. Tandanacui callarijpicarin huauquica ashalla shimicunapimi Diosta mañana can (Mateo 6:7). w22.07 págs. 24, 25 párrs. 17, 18

Jesucristoca: ‘Chꞌican chꞌican llajtacunapimi tucui laya ungüicuna tiyanga’ nircami (Lucas 21:11). Caita yachashcamantami cai tiempopi millai ungüicuna ricurijpipish mana yallitaj mancharinchij. Ashtahuanpish tranquilomi sintiri tucunchij. Jesusca ñucanchijtaca: ‘Cai llaquicuna tiyashcata ricushpapish ama mancharinguichijchu’ nircami. Shuj pandemia tiyajpica ñaupa layaca imatapish manachari rurai tucushun. Chashna cashpapish tandanacuicunaman rinata, Bibliamanta estudianataca manataj saquinachu canchij. Ñucanchij publicacioncunapi, videocunapica ñucanchij shinallataj achca llaquicunata charij huauqui panicunapaj experienciacunatami yachai tucunchij. Paicunaca tucuita ahuantashpami Jehová Diosta sirvishpa catishcacuna. w22.12 págs. 17, 18 párrs. 4, 6

Jacobca paipaj churi Josetami paipaj tucui huahuacunata yalli cꞌuyarca (Génesis 37:​3, 4). Chaimantami Josepaj huauquicunaca paita pꞌiñai callarircacuna. Qꞌuipacarin madianitacunamanmi esclavota shina cꞌatushpa cacharcacuna. Chai madianitacunaca carupi caj Egipto llajtamanmi Joseta apashpa rircacuna. Chaipica soldadocunata mandaj Potifar nishca runamanmi cꞌaturcacuna. Chashnami Joseca menos pensado esclavo tucurca (Génesis 39:1). Ñucanchijpish tucui gentecuna charishca llaquicunallatatajmi charinchij (1 Corintios 10:13). Ashtahuancarin Jesuspaj discípulo cashcamantami gentecunaca ñucanchijmanta burlarincuna, jarcaicunatapish churancuna, catirashpapishmi llaquichincuna (2 Timoteo 3:12). Cai llaquicunata charijpipish Jehová Diosmi tucui alli richun ayudai tucun. w23.01 págs. 14, 15 párrs. 3, 4

Maipica llaquichij huauqui panicunahuan problemata allichingapajmi paicunahuan parlasha ninchij. Pero manaraj paicunahuan parlashpaca cai catij tapuicunapimi yuyana canchij. ¿Pai imamanta chaita nishcata, rurashcataca tucuitachu yachani? (Proverbios 18:13). ¿Mana cuentata cushpachu ñucataca llaquichirca? (Eclesiastés 7:20). ¿Ñucapish pai shinachu pandarishcani? (Eclesiastés 7:​21, 22). ¿Paihuan parlashpaca chai problemataca allichi tucushachu o ashtahuanchu jatunyachisha? Cai tapuicunapi yuyashpaca problemata allichingapaj pihuan mana parlana cashcatami cuentata cushun. Ashtahuanpish pandarishcacunata cungarinalla cashcatami intindishun. Chaipajca ñucanchij huauqui panicuna pandarijpipish paicunaman cꞌuyaita ricuchingapajmi esforzarina canchij. Chaita rurajpica shujtaj gentecunapish testigo de Jehovacuna alli religión cashcatami intindingacuna. Jehová Diostapishmi adorasha ningacuna. Chaimanta caishujhuan chaishujhuan cꞌuyaita ricuchinacushpa catishunchij. w23.03 pág. 31 párrs. 18, 19

Bibliapica Yayitu Dios cꞌuyaj cashcatapishmi yachachin. Jehová Diosca ñucanchijta cꞌuyashcamantami yallitaj achca yachaicunataca Bibliapi mana churashca (Juan 21:25). Jehová Diosca paipaj Bibliahuanmi ñucanchijta cꞌuyaihuan parlacuj shina can. Paica tucui ñucanchij causaita controlasha nishpaca mana manchanai leycunata Bibliapi mandanchu. Ashtahuanpish shujtajcunapaj causaicunamanta parlashpa, shamuj punllacunapi ima tucuna cashcata huillashpa, alaja consejocunata cushpami ñucanchijllataj alli decisioncunata agllachun ayudan. Chashnami Bibliapaj consejocunaca Yayitu Diosta cꞌuyachun, paita shungumanta cazuchun ayudan. Bibliata liyishpaca ñucanchijcuna Jehová Diospaj dimastij valishca cashcatami yachashcanchij. Por ejemplo, Bibliapica achca gentecunapaj causaimantami yachashcanchij. Paicunamanta yachashpaca ñucanchijpish paicuna laya sintirishcatami ricushcanchij (Santiago 5:17). Ashtahuancarin Yayitu Dios paicunata ima shina tratashcata yachashpaca pai ñucanchijtapish cꞌuyaj, llaquij, alli intindij cashcatami cuentata cunchij (Santiago 5:11). w23.02 págs. 6, 7 párrs. 13-15

Bibliapaj tucuri libropica: “Jesucristoca paipaj angelta cachashpami shamuj punllacunapi ima tucunata paita sirvij Juanman señalcunahuan ricuchirca” ninmi (Apocalipsis 1:1). Caicunata intindishpaca ñucanchijpish cai mundopi ima tucucushcata ricushpa Bibliapaj profeciacuna ima shina pajtaricujtami yachasha ninchij. Caimantami hasta huauqui panicunahuanpish parlanata munanchij. ¿Profeciacuna pajtaricushcata parlacui horasca imamantataj achca cuidadota charina canchij? Ñucanchijcunaca congregacionpi cajcunata chꞌicanyachinataca mana munanchijchu. Chaimantami ñucanchij ima yuyashcallataca mana nina canchij. Por ejemplo, achca poderta charij gobiernocunaca seguro, tranquilo causaita charingapaj shuj problemata allichinatachari huillan. Pero 1 Tesalonicenses 5:​3-pi ima nishca pajtaricushcata yuyanapaj randica cunanlla llujshishca publicacioncunatami alli estudiana canchij. Ñucanchij organización cushca publicacioncunamanta parlashpaca tucuicunami tandalla, shuj yuyailla cashun (1 Corintios 1:10; 4:6). w23.02 pág. 16 párrs. 4, 5

¿Jesustaca imamantataj cꞌuyangui? Paica mana llullata difindij, humilde, allita rurajmi can. Cai Allpapi cashpaca paica mana manchashpami Diosmanta yachashca verdadta difindirca. Allita rurangapajpishmi esforzarirca (Juan 18:37). Jesús chashna cashcata yachashpaca paitami achcata cꞌuyangui. ¿Jesusca humilde cashcataca ima shinataj ricuchirca? Jesusca paipaj shimicunahuan, paipaj ruraicunahuanmi humilde cashcata ricuchin. Por ejemplo, paica shujtajcunapaj ñaupajpi alli ricurinata mashcanapaj randica tucuicunapaj ñaupajpimi Yayitu Diosta jatunyachin (Marcos 10:​17, 18; Juan 5:19). Jesús chashna humilde cashcata ricushpaca canpishmi paita cꞌuyanata, paipaj ejemplota catinata munangui. Shinapish ¿Jesusca imamantataj humilde can? Paipaj Yaya Jehová humilde cashcamantami paipish humilde can. Jesusca paipaj Yaya ima shina cashcatami tucuita ricuchin (Salmo 18:35; Hebreos 1:3). w23.03 págs. 3, 4 párrs. 6, 7

Bibliapica cashcata rurajcunapish, mana cashcata rurajcunapish causaringacunami ninmi. Cashcata rurajcunaca huañuna horascama Yayitu Diosta sirvijcunami can. Cutin mana cashcata rurajcunaca Yayitu Diosta mana rijsishpa huañushcacunami can. ¿Cai ishqui grupocunapaj shuticunaca causaita chasquinapaj libropichu quillcashca can? Cashcata rurajcuna manaraj huañujpimi paicunapaj shuticunaca causaita chasquinapaj libropi ña quillcashca carca. ¿Paicunapaj shuticuna huañushca huashaca borrarircachu? Mana. Ashtahuanpish Lucas 20:​38-pica: ‘Jehovaca huañushcacunapaj Diosca mana canchu. Ashtahuanpish causajcunapaj Diosmi can’ ninmi. Chaimantami paicunaca huañushca cashpapish Yayitu Diospaj yuyaipi cancuna. Paicuna causarijpica paicunapaj shuticunaca causaita chasquinapaj libropimi quillcashca canga. Pero paipaj shuticunaca lapizhuan quillcashca layallami canga (Lucas 14:14). w22.09 págs. 16, 17 párrs. 9, 10

Jehová Diosca punta cꞌari Adán cushilla causachunmi shuj jardinpi churarca. Adanca chai jardintaca allimi rijsina carca. Shinallataj tucui Allpa shuj paraíso tucungacamami chai jardinta cuidashpa catina carca (Génesis 2:​8, 9). Adanca plantitacuna huiñacujta, sisacujta ricushpaca cushillami sintirishcanga. Chai alaja jardinta cuidanaca Adanpajca shuj jatun bendicionmi carca (Génesis 2:​19, 20). Jehová Diosca Adanmanpish animalitocunata shuticunata churachunmi mingarca. Jehová Diosca paillatajmi chaita pajtachi tucunman carca. Pero Adán cushilla sintirichunmi chaita pajtachichun paiman mingarca. Adanca animalitocunata alli ricushpa, cada animalito imata ruraj cashcata ricushpami cada unota shuticunata churarca. Chaita rurashpaca Jehová Dios yachaj, cꞌuyaj, tucuita sumajta ruraj cashcatapishmi yachaj chayarca. w23.03 págs. 15, 16 párr. 3

Nabucodonosor ricushca estatuapaj chaquicunaca achca poderta charij tucuri gobiernomi can (Daniel 2:​31-33). Chai qꞌuipaca achca poderta charij shujtaj gobiernoca cai Allpapica ña mana ricuringachu. Cai poderyuj gobiernoca Estados Unidos y Reino Unidomi can. Paicuna mandacujpimi Armagedón macanacuica callaringa. Chai macanacuipimi Diospaj Gobiernoca chai gobiernotapish, shujtaj gobiernocunatapish tucuchinga (Apocalipsis 16:​13, 14, 16; 19:​19, 20). ¿Cai profeciamantaca imatataj yachai tucunchij? Cai profeciamanta yachashpami tucuri punllacunapi causacushcata intindinchij. 2.500 huatacuna huashamanca profeta Danielca “Babiloniapaj gobierno tucurishca huashaca chuscu poderyuj gobiernocunami ricuringa” nircami. Chai gobiernocunaca Diospaj pueblotami mandana carca. Shinallataj Danielca “Reino Unido y Estados Unidos gobiernomi tucuri mandaj canga” nircami. Pero Diospaj Gobierno, cai Allpapi tiyaj tucui gobiernocunata ñalla tucuchigrishcata yachashpami contentos sintirinchij. w22.07 págs. 4, 5 párrs. 9, 11, 12