Junio

Jobca Jehová Diospaj alli amigomi carca. Shuj jatun tandalla familiatapishmi charirca. Cullquiyuj runapishmi carca (Job 1:​1-5). Pero shuj punllallapimi ñapish tucuita chingachirca. Puntaca pai charishca tucui cosascunatami chingachirca (Job 1:​13-17). Qꞌuipaca paipaj cꞌuyashca tucui huahuacunami huañurca. Jobpish, paipaj huarmipish paicunapaj diez huahuacuna huañujpica dimastij llaquillami sintirishcangacuna. Achca llaqui sintirishcamantami Jobca paipaj churanatapish lliquishpa, uma ajchatapish raparishpa pambaman urmarca (Job 1:​18-20). Qꞌuipaca Diabloca Jobtaca millai ungüihuanmi unguchirca (Job 2:​6-8). Job alli cajpica gentecunaca paitaca respetajcunami carca. Consejotapish cuchunmi Jobpajman rijcuna carca (Job 31:18). Pero Job ungushca cashcamantami paipaj huauquicunapish, paipaj amigocunapish, familiacunapish, paita sirvijcunapish paitaca ña mana ricunayachirca (Job 19:​13, 14, 16). w22.06 pág. 21 párrs. 5, 6

Bautizarishca qꞌuipaca Éfeso llajtapi causaj huauqui panicunaman apóstol Pablo cushca consejotami pajtachina canchij. Paica espiritualmente sinchi cachunmi animarca (Efesios 4:13). Apóstol Pabloca espiritualmente sinchi canataca shuj huahuahuanmi compararca. Apóstol Pablopaj consejomi Jehová Diosta ashtahuan cꞌuyashpa catichun ayudanga (Filipenses 1:9). Apóstol Pabloca Filipos llajtapi causaj huauqui panicunapaj cꞌuyai ashtahuan huiñashpa catichunmi Jehová Diostaca mañarca. Caica ñucanchijpish Diosta ashtahuan cꞌuyai tucushcatami yachachin. Chaipajca alli yachaita, alli yuyaitami minishtinchij. Shinami Jehová Dios ima shina cashcata yachashpaca paita ashtahuan cꞌuyashun, paita llaquichinatapish mana munashunchu. Ashtahuanpish pai munashca shina causangapaj, tucuipi cazungapajpishmi siempre esforzarishun. w22.08 págs. 2, 3 párrs. 3, 4

Apocalipsis libroca ñucanchijpajmi quillcashca carca. Apocalipsis nishcacuna ñucanchijpaj cashcata yachashpaca cushillami sintirinchij. Apocalipsispi tiyaj profeciacunaca cunan punllacunapimi pajtaricun. Apóstol Juanca: “Diospaj espíritu yuyachijpimi Amitopaj punllapi carcani” nircami (Apocalipsis 1:10). Juanca Apocalipsis librotaca huata 96-pimi quillcarca. Pero chaipajca Jesuspaj punllaca manaraj chayarcachu (Mateo 25:​14, 19; Lucas 19:12). Ashtahuanpish Jesuspaj punllaca 1914 huatapimi callarirca. Chai huatamantami Jesusca jahua pachapi mandai callarirca. Apocalipsispi tiyaj profeciacunapish chai huatamantami pajtari callarirca (Apocalipsis 1:3). w22.05 pág. 2 párrs. 2, 3

“Caballo jahuapi tiyacujca manchanai millai animaltapish, llulla profetatapish paicuna causacujpiraj japishpami azufrehuan rupacuj nina cuchapi shitarca” ninmi. Cai gobiernocuna mandacujpimi Yaya Diosca paicunataca para siempre tucuchinga. ¿Ñucanchijca caimantaca imatataj yachanchij? Diosta sirvijcunaca Yaya Diosta, paipaj Gobiernotapishmi apoyana canchij (Juan 18:36). Politicapica mana chagrurinachu canchij. Pero maipica caita ruranaca sinchimi can. Gobiernocunaca ñucanchij nishcacunahuan, ruraicunahuanmi apoyachun munancuna. Paicunata apoyajcunaca jatun animalpaj sellotami chasquincuna (Apocalipsis 13:​16, 17). Pero chashna chasquishpaca Diospaj ñaupajpica mana alli ricurincunachu, huiñai causaitapish mana charingacunachu (Apocalipsis 14:​9, 10; 20:4). Chaimantami politicapica mana chagrurina canchij. w22.05 págs. 10, 11 párrs. 12, 13

Imata alli rurangapajmi metacunata churana canchij. Ñucanchij ruranapi, yachaipi mejorashpaca ashtahuan responsabilidadcunatami chasquishun. Por ejemplo, achca huauqui panicunaca sucursalcunata, Tandanacuna Huasicunatami shayachishpa, allichishpa ayudancuna. Paicunaca experienciata charij huauqui panicunamantami chashna trabajangapajca yachashcacuna. Cunan punllacunapish huauquicunapish, panicunapishmi chashna ayudai tucuncuna. “Huiñai huiñaita Jatun Mandaj” Jehová Diospish, “mandajcunapaj jatun mandaj” Jesuspish cashna alli trabajaj huauqui panicunamanmi valishca ruraicunata pajtachichun mingancuna (1 Timoteo 1:17; 6:15). Chaimantami ñucanchijpish sinchita trabajangapaj, imatapish alli rurangapaj esforzarisha ninchij. Chaita rurashpapish mana jatun tucunachu canchij. Ashtahuanpish Jehová Diosllatami jatunyachina canchij (Juan 8:54). w22.04 págs. 24, 25 párrs. 7, 11

Salomonca achca cullquita, achca cosascunatami charirca (1 Reyes 10:​7, 14, 15). Cutin Jesusca mana achca cosascunata charircachu, paipaj propio huasitapish mana charircachu (Mateo 8:20). Pero Salomonpish, Jesuspish Diospaj yachaita charishcamantami mana cullquillapi yuyarcacuna. Salomonca cullquihuanca ñucanchij minishtirishca, munashca cosascunata chari tucushcatami yacharca. Shinapish Salomonca ‘cullqui valishca cajpipish ashtahuan valishca cosascunami tiyan’ nircami. Por ejemplo, paica: “Alli nishca canaca jatun charij canatapish yallimari” nircami (Proverbios 22:1). Shinallataj Salomonca cullquita yalli cꞌuyajcuna mana cushilla causashcatami cuentata curca (Eclesiastés 5:​10, 12). Ashtahuancarin Salomonca cullqui chingarijlla cashcamantami chaipi ama confiachun nirca (Proverbios 23:​4, 5). w22.05 pág. 21 párrs. 4, 5

Jehová Dios cushca bendicioncunapi yuyashpaca paipajmanmi ashtahuan cꞌuchuyashun. Dios cusha nishcacunapi yuyashpaca ñucanchij fetami sinchiyachishun. Chashnami Jehová Diostaca cushilla sirvishpa catishun. Cai mundo tucurina horaspimi Jehová Diosca ñucanchijta quishpichinga. Ñucanchijca Jehová Dios allita ruraj cashcataca segurosmi canchij. Chaimantami Jehová Diosca cai mundopi tiyaj ruraicuna huiñaipaj tiyachunca mana saquinga. Cai mundota tucuchina punllaca manataj qꞌuipayangachu (Isaías 25:9). Chaimantami Jehová Diospish, ñucanchijpish pacienciahuan shuyashpa caticunchij. Chai punlla chayangacamaca Jehová Diosta shungumanta mañangapaj, paipaj Shimita estudiangapaj, pajtachingapaj, pai cushca bendicioncunapipish yuyangapajmi esforzarina canchij. Caicunata rurajpica Jehová Diosca tucui laya llaquicunata cushicuihuan ahuantachunmi ayudanga. w22.11 pág. 13 párrs. 18, 19

Bibliapica Timoteo ima shina bautizarishcataca mana parlanchu. Pero paipaj mama Euniceca paipaj churi Timoteo bautizarijpica cushillami sintirishcanga (Proverbios 23:25). Eunicepajca Timoteota Jehová Diosta cꞌuyachun, Jesucristota cꞌuyachun ayudanaca mana facilchu cashcanga. Paipaj churita bautizarichun ayudangapaj imacunahuan chꞌimbapurashcata ricushun. Timoteopaj yaya mamaca chꞌican religiontami charircacuna. Paipaj yayaca griegomi carca. Cutin paipaj mama, abuelaca judiacunami carca (Hechos 16:1). Tal vez Timoteo ña jatunyajpimi paipaj mama, paipaj abuelaca Jesusta cati callarishcangacuna. Pero paipaj yayaca paipaj religiontaca mana saquircachu. Timoteoca imata decidingapajpish suficiente edadtami charirca. ¿Imatashi rurarca? Cunan punllacunapish Diosta sirvij mamacunaca Eunice shinallatajmi familiacunata cꞌuyan. Ashtahuantajca paicunapaj huahuacunatami Jehová Diospaj amigos cachun ayudasha nincuna. Chashna esforzarijpica Jehová Diosca achcatami valoran (Proverbios 1:​8, 9). Jehová Diosca mamacuna paicunapaj huahuacunata paita cꞌuyachun, paita sirvichunmi ayudashca. w22.04 págs. 16, 17 párrs. 1-3

Ñallami Jehová Diosca gobiernocunamanca tucui panda religioncunata tucuchina yuyaita cunga. Chaimi gobiernocunaca tucui panda religioncunata tucuchinga (Apocalipsis 17:​1, 2, 12, 16). ¿Babilonia jatun llajta nishca panda religioncuna ñalla tucurinataca ima shinataj yachanchij? Ñaupa tiempopica Babilonia llajtata ama llaquichichunca chai llajta muyundijtami achca yacu pasaj carca. Apocalipsis libropica achca gentecunaca chai yacu shinami panda religioncunata apoyancuna, difindincunapish. Pero ‘cai yacucunaca chaquirinami can’ ninmi (Apocalipsis 17:15; 16:12). Chaica achca gentecuna panda religioncunata saquinatami ricuchin. Chaimantami cunan tiempopica achcacunaca panda religioncunata saquishpa, shujtaj ladocunapi ayudata mashcacuncuna. w22.07 págs. 5, 6 párrs. 14, 15

Jehová Dios ñucanchijta perdonashcata agradicingapajca shujtajcunatapishmi perdonana canchij. Jesusca caita intindichingapajca shuj chꞌimbapuraita churashpami parlarca. Shuj amoca paita sirvijpaj shuj jatun dibitami perdonarca. Pero cai sirvij runaca caishuj sirvijpaj ashalla dibitaca mana perdonarcachu (Mateo 18:​23-35). ¿Jesusca caimantaca imatataj yachachisha nirca? Jehová Diosca cai amo shinami ñucanchijta llaquishpa cutin cutin achca juchacunata perdonashca. Chashnallatajmi ñucanchijpish shujtajcunata perdonana canchij (Salmo 103:9). Achca huatacuna huashamanca La Atalaya revistapica: “Jesusmantami Jehová Diosca ñucanchijtaca cutin cutin perdonashca. Chaimantami ñucanchijpish shujtajcunata shungumanta perdonashpa catina canchij” nircami. Shujtajcunata llaquishpa perdonajpica Jehová Diosca ñucanchijtapishmi perdonanga. Jesuspish chaitami yachachirca (Mateo 5:7; 6:​14, 15). w22.06 pág. 10 párrs. 8, 9

Jesusca cai Allpaman shamushpaca paipaj Yaya ima shina cashcatami ricuchirca (Juan 14:9). Jesuspaj ejemplomantami Jehová Diosta rijsi tucushcanchij, paita cꞌuyai tucushcanchij. Jesusca ñucanchij ruraicunahuan, yuyaicunahuan Jehová Diosta ima shina cushichinatami yachachishca. Paita catijcunata alli pushacushcamantapishmi achcata beneficiarishcanchij. Ñucanchijmanta huañushcamantacarin achca bendicioncunatami chasquishcanchij. Jesús paipaj yahuarta jichashcamantami ñucanchij juchacunamanta quishpirina oportunidadta charinchij (1 Juan 1:7). Jesusca causarishcami. Jahua pachapipish mana huañunalla, achca poderta charij Mandajmi can (Génesis 3:15). Paica Diablota tucuchijpica Diosta sirvij tucui gentecunaca cushillami sintirishun. Jehová Diosca tucui gentecunamanca achca bendicioncunatami cunga. Chai punlla chayangacamaca mana shaicushpa, Jehová Diospi confiashpa catishunchij. w22.07 págs. 18, 19 párrs. 13, 19

Maipica ñucanchij causaipi ima cambiocuna tiyajpi o ima llaquicuna tiyajpica, ñucanchij churashca metataca manachari pajtachi tucushun. Chashna cajpipish tucui pudishcahuanmi Jehová Diosta sirvishpa catina canchij. Por ejemplo, apóstol Pabloca Tesalonicapi shuj congregación tiyachunmi ayudarca. Pero contracuna llaquichisha nijpica Pabloca chai llajtamantami rirca (Hechos 17:​1-5, 10). Pai chaipi saquirishca cajpica contracunaca mushuj huauqui panicunatami llaquichinman carca. Chashna jarcaicuna tiyajpipish Pabloca tucui pudishcahuanmi Diosta sirvishpa catirca. Qꞌuipacarin Timoteotami Tesalonicapi caj huauqui panicunata sinchiyachichun cacharca (1 Tesalonicenses 3:​1, 2). Tesalonicapi caj huauqui panicunaca cushillami sintirishcangacuna. ¿Apóstol Pablopaj ejemplomantaca imatataj yachai tucunchij? Ñucanchij causaipi ima cambiocuna tiyajpica ñucanchij churashca metacunataca manachari pajtachi tucushun (Eclesiastés 9:11). Chashna tucujpica pajtachi tucushca shujtaj metacunatami churana canchij. w22.04 págs. 25, 26 párrs. 14, 15

Romanos 8:​38, 39-pica: ‘Llaquicunaca Diospaj cꞌuyaimanta mana caruyachi tucunchu’ ninmi. Salmo 145:​18-pica: ‘Mandaj Diosca tucui paita mañajcunapaj cꞌuchupimi can’ ninmi. Jehová Diospi confiashpaca ima llaquicunata charishpapish chaicunatami cushilla ahuantashun (1 Corintios 10:13; Santiago 1:2). Shinallataj Bibliapica llaquicuna mana huiñaipaj cana cashcata, llaquicunatapish yalli achca bendicioncunata charigrishcatami yuyachin (2 Corintios 4:​16-18). Ashtahuancarin Jehová Diosca Diablota, paita catijcunatapish tucuchinatami yachachin (Salmo 37:10). Chaimantami llaquicunata ahuantangapajca de memoria huaquin versocunata yachana canchij. w22.08 pág. 11 párr. 11

¿“Dios mandashcataca mana pajtachi tucushachu” nishpa yuyashpaca imatataj rurana cangui? Jehová Diosca: “Can cashcata ruranaca mama cucha yacu jataricuj shinami canman” ninmi (Isaías 48:18). Por ejemplo, can mama cucha yacu filopi cashcapi yuyai. Chaipica yacu shamujta, cutin tigrajtami ricungui. Canca cai yacuca siempremi shamucushca y cutin tigracushca. Y chashnallatajmi tucui vida catinga. ¿Ñucanchijpajpish cashcata ruranaca mama cucha yacu shina cachunca imatataj rurana canchij? Ima decisionta manaraj agllashpaca Jehová Dios imata munashcatarajmi alli ricuna canchij. Pai imata munashcata alli intindishpaca chaita pajtachingapajmi esforzarina canchij. Maipica Diosta cazunaca sinchimi can. Shinapish paillatajmi allita rurashpa catichun ayudan (Isaías 40:​29-31). w22.08 pág. 30 párrs. 15-17

Diabloca 1.000 huatacuna huashaca cacharishcami canga. Chaimi jucha illaj gentecunataca pandachisha ninga. Chai tucuri pruebapica jucha illaj gentecunaca Diospaj Gobiernota shungumanta apoyashcata, Diospaj shutita jatunyachisha nishcata ricuchina oportunidadtami charingacuna (Apocalipsis 20:​8-10). Paicuna Diosta cazunata agllajpica paicunapaj shuticunaca causaita chasquinapaj libropimi huiñaipaj quillcashca canga. Huaquincunaca Adán y Eva shinami Diospaj Gobiernota mana apoyasha ningacuna. ¿Paicunahuanca imataj tucunga? Apocalipsis 20:​15-pica: “Causaita chasquinapaj libropi mana quillcashcacunaca nina cuchamanmi shitashca carcacuna” ninmi. Diosta mana cazusha nijcunaca huiñaipajmi chingachishca cangacuna. Pero achcacuna Diosta cazunata agllangacuna. w22.09 págs. 23, 24 párrs. 15, 16

Apóstol Pablopaj ejemplotami catina canchij. Chai tiempopica huaquin huauquicunaca gentecunapaj ñaupajpi alli ricurinallatami munarcacuna. Chaimantami bautizarishca mana judío huauquicunataca circunsicionta rurachun obligasha nircacuna (Gálatas 6:12). Apóstol Pabloca paicunahuanca mana de acuerdochu carca. Mana de acuerdo cashpapish pai imata yuyashcallataca mana nircachu. Ashtahuanpish Jerusalenpi tiyaj apostolcuna, ancianocunapish decidichunmi saquirca (Hechos 15:2). Chaita rurashpaca apóstol Pabloca huauqui panicuna tandalla, cushilla cachunmi ayudarca (Hechos 15:​30, 31). ¿Huauqui panicunahuan mana de acuerdo cashpaca imatataj rurana canchij? Dios churashca pushajcunapaj ayudacunatami mashcana canchij. Shinallataj Diospaj organización cushca publicacioncunata, instruccioncunatapishmi ricuna canchij. Chai instruccioncunata catishpaca ñucanchij yuyaicunallataca ña mana catishunchu. Ashtahuanpish congregacionpi tucuicuna tandalla cachunmi ayudashun. w22.08 pág. 22 párrs. 8, 9

Casi tucuicunami ñucanchij ima shina sintirishcataca shuj amigohuan parlanata minishtinchij. Huaquinpica ñucanchij ima shina sintirishcata parlanaca asha sinchimi can. Shuj amigo ñucanchij parlashcata shujtajcunahuan parlashcata yachaj chayashpacarin dimastij llaquillami sintirinchij. Cutin shuj amigo ñucanchij ima parlashcata paipaj shungupi chingachijpica cushillami sintirinchij. Ancianocunaca huauqui panicuna ima tucushcataca mana shujtajcunaman huillanachu can. Chashnami ancianocunaca shuj jatun acapanamanta miticuna laya can (Isaías 32:2). Ancianocuna shujtajcunaman ñucanchij ima nishcata mana parlajta yachashpaca paicunapimi confiai tucunchijlla. Chaimantami ñucanchijpish ancianocunamanca shujtajcunamanta parlachunca mana mañana canchij. Shinallataj ancianopaj huarmipish paipaj cusamanca huauqui panicunapaj causaimantaca mana tapunachu can. Chaimantami paicunataca achcata valoranchij. Ancianocunapish paicunapaj huarmicunaman huauqui panicuna parlashcata mana parlashpaca allitami rurancuna. w22.09 págs. 11, 12 párrs. 10, 11

Ñallami jatun llaqui punllacuna callaringa (Mateo 24:21; Daniel 12:1). Chaipica Magog llajtata mandaj Gog nishca achca gobiernocunami ñucanchijta llaquichisha ningacuna. Pero chai tiempopica Jehová Dios ñucanchijtapish quishpichinatami tucui shunguhuan crinchij. Naciones Unidas nishca organizacionpi tiyaj 193 gobiernocuna shuj shinalla macanacungapaj tandanacushca cajpipish, Jehová Diosca paipaj angelcunahuanmi paicunata tucuchinga. Jehová Diosca: ‘Shujtaj llajtacunapi causajcunapaj ñahuipica ima juchachina illajllami casha, jatunyachishcapishmi casha. Chashna rurajta ricushpami ñucataca Jehová Diostaj cashcataca yachangacuna’ ninmi (Ezequiel 38:​14-16, 23). Gobiernocuna Diospaj pueblota llaquichisha nijpica Armagedón macanacuimi callaringa. Chaipica Jehová Diosca cai Allpapi tiyaj tucui gobiernocunatami tucuchinga (Apocalipsis 16:​14, 16; 19:​19-21). Pero allita rurajcunallami cai Allpapica huiñaipaj causai tucungacuna (Proverbios 2:21). w22.10 págs. 16, 17 párrs. 16, 17

Ñucanchij huauqui panicunapaj shungutaca mana rijsi tucunchijchu. Jehová Diosllami paicunapaj shunguta rijsin. Chaimantami huauqui panicunataca mana juzgana canchij (Proverbios 16:2). Ashtahuanpish Jehová Diosca mai llajtamanta cajpipish, ima culturata charijpipish tucuicunatami cꞌuyan. Paica ñucanchijmanpish ñucanchij shunguta pascashpa tucuicunata cꞌuyachunmi mandan (2 Corintios 6:13). Ñucanchij huauqui panicunata juzganapaj randica, paicunata ashtahuan cꞌuyangapajmi esforzarina canchij. Mana Testigocunatapish mana juzganachu canchij. Por ejemplo, “ñuca familiaca mana nunca testigo de Jehovacuna tucungachu” nishpaca mana juzganachu canchij. Chashna juzgashpaca jatun tucushca cashcatami ricuchishun. Ashtahuanpish Jehová Diosca tucuicuna paita rijsichun, arrepintirichunmi munan. Chaimantami tucuicunaman shuj oportunidadta cucun (Hechos 17:30). Jehová Diosca jatun tucushcacunataca mana ricunayachinchu. Chaitaca siempremi yuyaipi charina canchij. Dios munashca shina allicunata rurashpaca cushillami causashun. Shujtajcunapajpish alli ejemplomi cashun. Allita ruranata mashcajpica shujtajcunaca Jehová Diostapish, ñucanchijtapish ashtahuanmi cꞌuyangacuna. w22.08 pág. 31 párrs. 20-22

Cai punllacunapica huaquin gentecunaca ñucanchijcuna ama predicachunmi jarcasha nincuna. Shamuj punllacunapipish ashtahuan jarcaicunata churanataca allimi yachanchij (Daniel 11:44; 2 Timoteo 3:12; Apocalipsis 16:21). Pero ñucanchijca Jehová Dios ayudanapimi confianchij. Jehová Diosca ñaupa tiempopipish paita sirvijcunapaj sinchi cajpipish shujtajcunaman predicachunmi ayudarca. Babiloniapi caj judiocunaman predicachun Jehová Dios ima shina Ezequielta ayudashcatami ricushun. Ezequielca pꞌiñaj gentecunaman, rumi shungu gentecunaman, mana cazujcunamanpishmi predicana carca. Paicunaca casha yuracuna shina, escorpioncuna shinami yallitaj millai carcacuna. Chaimantami Jehová Diosca Ezequieltaca “paicunataca ama manchaichu” nirca (Ezequiel 2:​3-6). Pero ¿Jehová Diosca Ezequieltaca ima shinataj ayudarca? 1) Jehová Diosca Ezequieltaca paillataj predicachun cachashcatami yuyachirca, 2) paipaj espíritu santohuanmi fuerzasta curca, 3) paipaj nishcacunahuanmi sinchiyachirca. w22.11 pág. 2 párrs. 1, 2

Jehová Dios rurashca tucui animalitocuna, tucui plantacuna, tucui yuracunapishmi tiempohuanca huañuna carca. Pero gentecunaca mana huañunachu carca. Jehová Diosca gentecunataca huiñaita causachunmi rurashca carca. Ashtahuanpish Jehová Diosca mana huañuna munaihuanmi ñucanchijta rurashca. Bibliapica ‘Jehová Diosca para siempre causana munaitaca gentecunapaj shungupimi churashca’ ninmi (Eclesiastés 3:​11, NWT). Chai munaita charishcamantami huañuica ñucanchijpajca shuj enemigo laya can (1 Corintios 15:26). Cai ejemplocunapi yuyashun. Ancha ungüita charishpaca mana huañunata munashpami doctorpajman rinchij, jambicunatapish ubyanchij. Shinallataj huañuica mayorllacunatapish, jovencunatapish ratomi japi tucun. Chaimi shuj cꞌuyashca familia o amigo huañujpica achca huatacunata llaquilla sintirinchij (Juan 11:​32, 33). Pero Jehová Diosca ñucanchijta cꞌuyashcamantami huiñai causaita ñucanchijman cunga. w22.12 págs. 3, 4 párrs. 5, 7

Shuj pandemia o shuj millai ungüi tiyajpica tal vez ñucanchij huauqui panicunaca ungushca o solollami sintiri pudin. Chaimantami paicunahuan mana chꞌimbapura parlai tucushunchu. Chashna cajpipish paicunahuan parlanacushpa catingapajmi esforzarina canchij. Chai llaqui horaspica apóstol Juan shinachari sintirishun. Paica paipaj amigo Gallota ñahui ñahui ricunatami munarca (3 Juan 13, 14). Pero mana ricui pudishcamantami paipaj amigomanca shuj cartata rurashpa cacharca. Chai shinallatajmi ñucanchijpish, ñucanchij huauqui panicunahuan mana ñahui ñahui ricui tucushpapish paicunahuanmi parlai tucunchij. Chashna paicunahuan parlashpa catishpaca mana sololla sintirishunchu. Ñucanchij shungupipish, yuyaipipish tranquilosmi sintirishun. Cutin yallitaj preocupado o llaquilla sintirishpaca ancianocunata ayudachunmi mañana canchij. Paicuna cꞌuyaihuan consejajpica tranquilo cangapajmi chai consejocunata pajtachina canchij (Isaías 32:​1, 2). w22.12 págs. 17, 18 párrs. 6, 7

Bibliapica shuj tiempopi Josepaj chaquicunata, cungatapish cadenacunahuan huatashcatami huillan (Salmo 105:​17, 18). Josepaj llaquicuna tucurinapaj randica paica ashtahuan llaquicunatami charirca. ¿Jehová Diosta ayudachun mañashpapish jahuanpi jahuanpichu achca llaquicunata charishcangui? Cai millai mundota Diablo mandacushcamantami Jehová Diosca ñucanchijcuna llaquicunata charichun saquinlla (1 Juan 5:19). Shinapish llaquicunata chari horas ñucanchijcuna ima shina sintirishcata, ima tucucushcataca paica allimi yachan (Mateo 10:​29-31; 1 Pedro 5:​6, 7). Chaimantami Jehová Diosca: “Cantaca manataj saquishachu, manataj shitashachu” nin (Hebreos 13:5). Jehová Diospaj ayudahuanmi mana tucuripaj laya llaquicunata ahuantashpa cati tucushun. w23.01 págs. 15, 16 párrs. 7, 8

Bibliapica Yayitu Diosca ñucanchijcuna ima juchapi urmajpipish arrepintirijpica ñucanchijta perdonanatami yachachin. Israelitacunaca cutin cutinmi juchacunapi urmajcuna carca. Pero paicuna shungumanta arrepintirijpica Yayitu Diosca siempremi paicunata perdonaj carca. Apostolcuna causan punllacunapipish Diosta sirvijcunaca Yayitu Dios paicunatapish achcata cꞌuyashcatami yacharcacuna. Por ejemplo, Jehová Diosca apóstol Pablotaca “pi ima juchata rurajpi, pai arrepintirijpica cancunaca perdonanami canguichij, paitami cushichina canguichij” nishpami quillcachirca (2 Corintios 2:​6, 7; 1 Corintios 5:​1-5). Caipi ricushca shinaca Yayitu Diosca pi juchapi urmajpipish mana rato paita saquijllachu carca. Ashtahuancarin cꞌuyaihuan corregishpami paipajman tigrachun ayudaj carca. Cunan punllacunapipish Jehová Diosca pi juchapi urmajpi, shungumanta arrepintirijpica paita perdonanatami yachachishca (Santiago 4:​8-10). Jehová Diosca Bibliapica Yayitu Dios cashcata ruraj, alli yachaj, ñucanchijta dimastij cꞌuyaj cashcatapishmi yachashcanchij. Yayitu Diosca Bibliata cushcamantami paita rijsichun, paipaj amigos tucuchun munashcata ricuchishca. w23.02 pág. 7 párrs. 16, 17

Cai mundopi ima tucucushcata ricushpaca Bibliapaj profeciacuna ima shina pajtaricushcatami cuentata cunchij. Chaimantami maipica noticiacunata, cai mundopi ima tucucushcata yachasha ninchij. Por ejemplo, Jesusca cai millai mundo tucurinapaj ashalla tiempo faltashcata yachachunca cai mundopi ima tucuna cashcatami huillarca (Mateo 24:​3-14). Apóstol Pedropish profeciacuna ima shina pajtaricushcata ricuchunmi consejarca. Chashnami ñucanchij feta sinchiyachishun (2 Pedro 1:​20, 21). Apóstol Pedro quillcashca cartapica profeciacunata alli estudiachunmi yachachin. Shinallataj Jehová Diospaj punlla shamunata shuyashpa chai yuyailla catichunmi animan (2 Pedro 3:​11-13). ¿Imamantataj Jehová Diospaj punlla shamuna yuyailla cana canchij? Ñucanchijcunaca Jehová Dios Armagedonta ima hora, ima punlla apamugrishcata yachanallataca mana munanchijchu. Ashtahuanpish Diosta tucui shunguhuan adoracushcatapish ruraicunahuan ricuchingapajmi ñucanchij tiempota aprovechasha ninchij (Mateo 24:36; Lucas 12:40). Chaimantami ñucanchijcunaca alli comportarinata mashcanchij. Diosta cꞌuyashcamantapish tucuipi allita rurangapajmi esforzarinchij. Shinapish chaipajca ñucanchijllatajmi imata ruracushcata alli ricurana canchij. w23.02 pág. 16 párrs. 4, 6

Shujtaj ovejacunaca huiñaipaj causangapajca cunanmanta Jesusta agradicingapajca achca oportunidadcunatami charincuna. Por ejemplo, Dios agllashca ungidocunaca Jesuspaj huauquicunami can. Paicunata cai Allpapi apoyashpaca Jesusta agradicishcata, cꞌuyashcatapishmi ricuchinchij. Ungidocunata apoyajpica Jesusca ñucanchijtaca achcatami bendicianga (Mateo 25:​31-40). Gentecunaman predicashpa, Jesuspaj discipulocunata rurashpaca ungidocunatami apoyanchij (Mateo 28:​18-20). Jehová Diosca Paraíso Allpapica alli gentecuna causachunmi munan. Chaimantami cunanmantapacha honrados cangapaj, ama llullangapaj, Diospaj Gobiernota punta lugarpi churangapaj esforzarina canchij. Shinallataj Jehová Diostapish, ñucanchij cusatapish o huarmitapish, huauqui panicunatapish shungumanta cꞌuyangapajmi esforzarina canchij. Caita pajtachinaca cai tiempopica mana facilchu can. Pero esforzarishpaca Paraíso Allpapi causangapaj preparados cashcatami ricuchishun. Paraíso Allpapicarin Diosta cazuna, pai munashca shina causanaca ashtahuan jahuallami canga. w22.12 págs. 11, 12 párrs. 14-16

Jesusca tucuicunamanta yalli alli mandajmi can. Jehová Diosllatajmi paitaca ñucanchijta mandachun agllashca. Alli mandaj cachunpishmi Jesusman yachachishca (Isaías 50:​4, 5). Ashtahuancarin Jesusca ñucanchijta dimastij cꞌuyashcatami ricuchishca (Juan 13:1). Chaimantami Jesús ñucanchijta mandachun munanchij, paitapish achcatami cꞌuyanchij. Jesusca: ‘Ñucata cꞌuyashpaca cancunaca ñuca mandashcacunatami cazunguichij. Ñuca mandashcacunata cazushpaca ñuca amigocunami canguichij’ nircami (Juan 14:15; 15:​14, 15). Jesuspaj amigocuna canaca shuj jatun bendicionmi can. Jesús humilde cashcatapish, paipaj Yaya shina cashcatapishmi intindishcangui. Shinallataj Jesús yaricaihuan cajcunaman micunata carashcata, llaquilla cajcunata cushichishcata, ungushca cajcunatapish jambishcatami yachashcangui (Mateo 14:​14-21). Canllatajmi Diospaj pueblota Jesús pushacushcatapish ricushcangui (Mateo 23:10). Shamuj punllacunapicarin Diospaj Gobiernopi Jesús mandacushpa achca bendicioncunata apamunatami seguro cangui. Cai tucuita intindishpaca ¿canca ima shinataj Jesusta cꞌuyashcata ricuchina cangui? Chaipajca paipaj ejemplota catishpami Jehová Diosman mingarishpa, bautizarina cangui. w23.03 pág. 4 párrs. 8, 10

Jehová Diosca jahua pachapipish, cai Allpapipish, yacupipish tucui laya alajacunatami rurashca. Chaicunamantami achcata yachai tucunchij (Salmo 104:24). Jehová Diosca tucui laya animalitocunata, alaja sisacunata, plantacunata, mishqui micunacunata tucuitami sumajta rurashca. Tucui chaicunata ricushpa, uyashpa, micushpa, alajata ashnachishpa, maquicunahuanpish chaicunata japishpami cushilla causai tucunchij. Jehová Diosmi chashna cushilla causachun ñucanchijta rurashca. Shinallataj Bibliapica Jehová Diosmanta ashtahuan yachangapajmi pai rurashcacunata ricuna cashcata yachachin (Romanos 1:20). Por ejemplo, animalitocunata, plantitacunata ricushpaca Jehová Dios yachaj cashcatami cuentata cunchij. Tucui laya achca micunacuna tiyashcatapish ricushpaca pai ñucanchijta cꞌuyaj cashcatami intindinchij. Chashna Jehová Diosta ashtahuan rijsishpaca paipajmanmi ashtahuan cꞌuchuyashun. w23.03 pág. 16 párrs. 4, 5

Cai mundopica ashtahuan llaquicunami tiyanga. Chaipica sinchi feta charinatami minishtishun. Chai tiempopica Bibliapi ama crichun, alli cazuj alli yuyaiyuj huauquicunapi ama confiachunmi gentecunaca ñucanchijta pandachisha ningacuna. Pero Biblia verdadta yachachishcata tucui shunguhuan crishpaca chashna pandachichunca mana saquishunchu. Chaipaj randica tucuringacama Jehová Diosta tucuipi cazungapajmi esforzarishun (Salmo 119:112). Shujtajcunamanpish Bibliapi confiachun yachachicushpaca ima pingaita mana charishunchu (Salmo 119:46). Ashtahuancarin sinchi llaquicuna ricurijpipish, contracuna catirashpa llaquichijpipish pacienciahuan, cushicuihuanmi ahuantashun (Colosenses 1:11; Salmo 119:​143, 157). Diospaj Gobierno ñalla shuj alaja causaita apamunatami cushilla, tranquilo sintirinchij. w23.01 pág. 7 párrs. 16, 17

Jesús huañunapajca ashalla tiempomi faltarca. Chashna cajpipish Jesusca paipaj discipulocunamantami preocuparirca. Chaimantami Jehová Diostaca Diablo ama pandachichun, paipaj discipulocunata cuidachun mañarca (Juan 17:15). Chashnami Jesusca paipaj discipulocunata cꞌuyashcata ricuchirca. Ñucanchijpish Jesús shinallatajmi ñucanchijllapica mana yuyanchij. Ashtahuanpish muyundij Allpapi caj ñucanchij huauqui panicunamantami mañanchij. Chashnami ñucanchij huauqui panicunata shungumanta cꞌuyashcata ricuchinchij. Huauqui panicunamanta mañanaca Yayitu Diospajca valishcami can. Santiago 5:​16-pica: “Cashcata ruraj runapaj mañaica poderta charinmi. Gentecunatapish ayudai tucunmi” ninmi. Huaquin huauqui panicunaca achca llaquicunahuanmi chꞌimbapuracuncuna. w22.07 págs. 23, 24 párrs. 13-15