Julio

Jehová Diosca parlana regalotami cushca. Pero Diabloca Jehová Dios cushca regalota mana alli utilizashpami Evata llullarca. Paipaj culpamantami tucuicuna juchayuj tucushcanchij (Génesis 3:​1-4). Adanpish pai pandarishcamantami Jehová Diosta, Evata culparca (Génesis 3:12). Cainpish paipaj huauquita huañuchishca qꞌuipaca Jehová Diosmanmi llullarca (Génesis 4:9). Cunan punllacunapish casi la mayoría peliculacunapipish, escuelacunapipish, trabajocunapipish mana alli shimicunatami utilizancuna. Gentecuna mana alli shimicunata nishcata o mapa shimicunata nishcataca casi siempremi uyanchij. Pero Diosta sirvijcunaca paicuna shina ama rimangapajmi cuidarina canchij. Ashtahuanpish ñucanchij shimicunahuan Jehová Diosta cushichingapajmi esforzarisha ninchij. w22.04 págs. 4, 5 párrs. 1-3

Jesusca micunata, ubyanatami munaj carca (Lucas 19:​2, 6, 7). Shuj cutinca paica achca yacutaca alli vinotami rurarca. Chaimi Jesús rurashca punta milagro carca (Juan 2:​10, 11). Shinallataj pai huañugrishca punllapica achcata valij churanatami churarishca carca (Juan 19:​23, 24). Pero Jesuspajca charishca cosascunaca mana ashtahuan importantechu carca. Ashtahuancarin Jesusca: ‘Diospaj Gobiernota punta lugarpi churajpica Jehová Diosca cancuna ima minishtishcatami cunga’ nircami (Mateo 6:​31-33). Achca huauqui panicunaca cullquillapi ama yuyangapaj Jehová Dios cushca consejocunata pajtachishcamantami beneficiarishcacuna. Daniel shuti soltero huauquipi yuyashunchij. Paica: “Ñucaca jovenraj cashpaca ñuca causaipi Jehová Diosta sirvinami ashtahuan importante canga nishpami decidircani” ninmi. Danielca minishtirishca cosascunallahuan causashcamantami paipaj tiempohuan, paipaj yachashcacunahuan labores de socorropi, Betelpipish ayudai tucushca. Danielca: “Dios cushca bendicioncunaca cullquita charinata yallimi valishca can” ninmi. w22.05 págs. 21, 22 párrs. 6, 7

Bibliapaj yachachishcacunata valorashcata ricuchingapajca Bibliatapish, publicacioncunatapishmi estudiana canchij. Achca huatacunata Bibliata yachashpapish ashtahuanmi yachashpa catina canchij. Shinami Bibliapaj yachachishcacunata yachashpa catingapajpish esforzarina canchij. Maipica Bibliata liyinata o estudianataca mana tanto munanchijchu. Pero Bibliamanta ashtahuan yachachunmi Jehová Diosca munan (Proverbios 2:​4-6). Bibliata alli estudiashpaca ñucanchijllatajmi beneficiarishun. Corey shuti huauquica Bibliata estudiacushpaca cada versotami alli investigan. Paica: “Shuj versota liyishca huashaca chai versopi tiyaj notacunatami ricuni. Chai qꞌuipaca chai versopaj Bibliapi ricuchij shujtaj versocunatapishmi ricuni. Chashna alli investigashpaca ashtahuanmi yachani” ninmi. Ñucanchijpish huauqui Corey shina Bibliata alli estudiashpaca Bibliapaj yachachishcacunata valorashcatami ricuchishun (Salmo 1:​1-3). w22.08 págs. 17-19 párrs. 13, 15, 16

Jesusca cai Allpaman shamushpaca paipaj discipulocunamanmi, Diospaj rurashcacunamanta parlashpa paipaj Yayamanta yachachirca. Pai imata yachachishcata ricushun. Jehová Diosca tucuicunamanmi cꞌuyaita ricuchin. Shuj cutinca Jesusca paipaj discipulocunamanca Intimanta, tamyamantapishmi yachachirca. Caicunamantami tucuicuna causashpa cati tucunchij. Jehová Diosca dimastij cꞌuyaj cashcamantami tucuicuna Intita, tamiatapish chasquichun saquin (Mateo 5:​43-45). Jesusca caimanta yachachishpaca ñucanchijpish tucuicunata cꞌuyana cashcatami yachachisha nirca. Jehová Diosca chaita rurachunmi munan. Chaimantami Inti alajata huashicucujta ricushpa o sumajta tamyacujta ricushpaca Jehová Dios tucuicunata cꞌuyaj cashcata yuyarina canchij. Chaita yuyarishpaca ñucanchijpish tucui laya gentecunaman cꞌuyaimantami predicanata munashun. w23.03 pág. 17 párrs. 9, 10

Apóstol Juanca pucanicuj manchanai millai animalpaj jahuapi shuj huarmi tiyacujtami ricurca. Cai huarmica achca poderta charij huainayaj huarmimi can. Paipaj shutica Babilonia Jatun llajtami can. Cai huarmica cai pachapi tiyaj gobiernocunahuanmi huainayan (Apocalipsis 17:​1-5). ¿“Babilonia Jatun llajtaca” pitaj can? Cai huarmica mana gobiernocunachu can. ¿Imamantataj chashna ninchij? Apocalipsis libropica cai huarmica cai mundopi tiyaj gobiernocunahuanmi huainayan ninmi (Apocalipsis 18:9). ‘Cai huarmica jatun animalpaj jahuapimi tiyacun’ ninmi. Chashna nishpaca cai huarmica gobiernocunata controlasha nishcatami nisha nin. Shinallataj cai huainayaj huarmica mundopi tiyaj jatun negociocunatapish mana ricuchinchu. Apocalipsis libropica “allpa pachamanta comerciantecuna” huainayaj huarmi cashcataca mana ninchu (Apocalipsis 18:​11, 15, 16). Ñaupa punllacunapica Babilonia llajtapica achca panda religioncunami tiyarca. Shinaca huainayaj huarmi Babilonia Jatun llajtaca tucui panda religioncunatami ricuchin (Apocalipsis 17:​5, 18). w22.05 pág. 11 párrs. 14-16

Yaya mamacunaca paicunapaj huahuacuna cai millai mundopaj ruraicunahuan chꞌimbapurana cashcataca allimi yachancuna. Chaimantami maipica mamacunaca “¿ñuca huahuacunaca Jehová Diosta sirvingachu?” nishpa tapurincuna. Huaquin mamacunacarin paicunallami huahuacunataca huiñachincuna. Mana cashpaca Diosta mana sirvij cusahuanmi huahuacunataca huiñachincuna. Diosta sirvij yaya mamacunapajca huahuacunata Jehová Diosta sirvichun yachachinaca mana facilchu can. Yayapajlla o mamapajlla huahuacunata Diosta sirvichun yachachinacarin sinchimi can. Chashna cajpica ama sustarichu. Jehová Diosmi canta ayudanga. Shinallataj caishuj yaya mamacuna publicacioncunahuan, videocunahuan huahuacunaman ima shina yachachijta tapui (Proverbios 11:14). Ashtahuancarin cambaj huahuacuna ima shina sintirishcata yachangapaj, paicunahuan alli parlanacungapajpish Jehová Diosta ayudachun mañai (Proverbios 20:5). w22.04 págs. 17, 18 párrs. 4, 7, 9

Jehová Diosta ashtahuan cꞌuyangapajca paipaj Churi Jesustapishmi rijsina canchij. Jesusca paipaj Yaya ima shina cashcatami alli ricuchirca (Hebreos 1:3). Jesús ima shina cashcata yachangapajca Mateo, Marcos, Lucas, Juan librocunatami alli estudiana cangui. Chaipajca cada punlla Bibliata liyingapajmi esforzarina cangui. Jesusca tucuicunatami alli trataj carca. Chaimantami gentecunaca paihuan canata, paihuan parlanata munajcuna carca. Uchilla huahuacunatapishmi cꞌuyaihuan trataj carca (Marcos 10:​13-16). Paipaj discipulocunapish paihuan cashpaca allimi sintirijcuna carca. Chaimantami paicunaca imata yuyashcataca mana manchashpalla nijcuna carca (Mateo 16:22). Jesusca paipaj Yaya shinallatajmi cꞌuyaj carca. Jehová Diosca paipajman cꞌuchuyachunmi munan. Chaimantami paita mañacushpaca imata yuyashcata, ima shina sintirishcata huillai tucunchij. Paica ñucanchijta cꞌuyashcamantami ñucanchijmanta preocuparin (1 Pedro 5:7). w22.08 pág. 3 párrs. 4, 5

Jehová Diosca ñucanchijta rurashcamantami cada unota alli rijsin (Salmo 139:​15-17). Ñucanchijcuna juchayuj huacharishcatapish allimi yachan. Ashtahuancarin ñucanchij tucui causaipi ima tucushcatapish allimi yachan. Chaimantami paica cada uno ima shina cashcataca alli intindin. Chashna ñucanchijta alli rijsishcamantami maipica pandarijpipish ñucanchijta perdonangapajca listo can (Salmo 78:39; 103:​13, 14). Caita yachashpaca cushillami sintirinchij. Jehová Diosca Adanpaj culpamanta juchayujcuna tucushcata, huañuna cashcatapish allimi yachan (Romanos 5:12). Huañuimanta, juchamanta quishpiringapajca pipish imata mana rurai tucunchijchu (Salmo 49:​7-9). Pero Jehová Diosca ñucanchijta llaquishcamantami quishpichinata munarca. Chaimantami Juan 3:​16-pica, Jehová Diosca paipaj Churita ñucanchijmanta huañuchunmi cacharca nin (Mateo 20:28; Romanos 5:19). w22.06 pág. 3 párrs. 5, 6

Shujtajcunata llaquishpa perdonajpica Jehová Diosca ñucanchijtapishmi perdonanga. Shuj cutinca Jehová Diosca Job shujtajcunata perdonashcamantami paitaca achcata bendiciarca. Elifaz, Bildad y Zofar shuti runacunaca llaquichij shimicunahuanmi Jobtaca achcata llaquichishcacuna carca. Chaimi Jehová Diosca Jobtaca paicunamanta mañachun nirca. Job paicunata ama llaquichichun mañajpica Jehová Diosca Jobtaca bendiciarcami (Job 42:​8-10). Resentido canaca mana valinchu. Resentidos saquirinaca shuj jatun cargata apacuj shinami can (Efesios 4:​31, 32). Chaimantami Jehová Diosca: “Pꞌiñarinata saqui. Pꞌiñarinata cungari” nishpa consejan (Salmo 37:8). Cai consejota catishpaca ñucanchij cuerpopipish, ñucanchij shungupipish allimi sintirishun (Proverbios 14:30). Cutin resentido canaca shuj venenota ubyacuj layami can. Ñucanchijllatajmi llaquilla causashun. Pero shungumanta perdonashpaca tranquilosmi sintirishun. Jehová Diostapish cushilla sirvishpami catishun. w22.06 pág. 10 párrs. 9, 10

Shuj cascota churarij shina mana alli yuyaicunamanta, mana alli munaicunamantapish jarcarishun (1 Corintios 15:​33, 34). Jobpaj mana alli amigo Elifazca: ‘¿Runaca mapa illaj cangapajca imatagari? Riqui, Diosca paipaj angelcunapipish manamari shunguta churanchu. Jahua pachapish paipaj ricuipica, manamari mapa illajchu’ nircami (Job 15:​14, 15). Pero cai shimicunaca mana ciertochu can. Diabloca chashna yuyachunmi munan. Pero Dios ñucanchijta mana cꞌuyashcata crishpa, huiñai causaita mana chasquinata crishpaca esperanza illajmi causashun. Chaimantami Dios ñucanchijta bendiciasha nishcata, Paraíso Allpapi causachun Jehovallataj ayudasha nishcatapish crina canchij (1 Timoteo 2:​3, 4). w22.10 págs. 25, 26 párrs. 8-10

Diabloca, “Diosta pꞌiñachishcamantami cai llaquicunata charini” nishpa yuyachunmi Jobtaca crichisha nirca. Chaimantami jatun acapanata cachashpa Jobpaj diez huahuacuna cashca huasita urmachirca (Job 1:​18, 19). Jahua pachamanta shuj ninata cachashpapish Jobpaj tucui animalcunata, paita sirvijcunatapishmi huañuchirca (Job 1:16). Cai jatun acapana, ninapish jahua pachamanta shamucujta ricushpaca Jobca “Diosmi cai llaquicunata cachacun” nishpami yuyarca. Chashna yuyashpapish Jobca mana pꞌiñarishpa Diostaca mana rimarcachu. Ashtahuanpish Jehová Dios paipaj tucui causaipi ima shina bendiciashcatami yuyarirca. Llaquicunata ahuantashpa catina cashcatapishmi intindirca. Chaimantami Jobca: “Mandaj Diosca alli nishca cachun” nirca (Job 1:​20, 21). w22.06 págs. 21, 22 párr. 7

Juan 17:​14-pi ricuchishca shinaca Jesusca paita catijcunamanca gentecuna paicunata pꞌiñana cashcatami huillarca. ¿Manachu cai último 100 huatacunapi cai profecía ima shina pajtaricushcata ricushcanchij? Caimanta parlashpa catishun. 1914 huatapimi Jesusca Diospaj Gobiernopi mandai callarirca. Chai huatallapitajmi Diablotaca jahua pachamanta shitarca. Ashtahuancarin ñallami Diablotaca tucuchinga (Apocalipsis 12:​9, 12). Chaita yachashpaca Diabloca achcata pꞌiñarishpami Diospaj pueblota llaquichicun (Apocalipsis 12:​13, 17). Diablo chashna llaquichisha nishcamantami gentecunapish ñucanchijta achcata pꞌiñacun. Pero Diablotapish, paita catijcunatapish mana manchanachu canchij. Ashtahuanpish apóstol Pablo shinami yuyana canchij. Apóstol Pabloca: “Dios ñucanchijhuan cajpica ¿pitaj ñucanchij contra cai tucungari?” nircami (Romanos 8:31). Chaita ricushpaca Jehová Dios nishcacuna tucui pajtarinatami tucui shunguhuan crinchij. w22.07 pág. 18 párrs. 14, 15

Jesusca cai tucuri punllacunapi achca gentecuna Diosmanta predicashpa purinatami alli yacharca. Cunan punllacunapica achca huauqui panicunami shungumanta Diospaj Gobiernomanta predicashpa caticuncuna (Salmo 110:3). Can chashna predicacushpaca Jesustapish, alli cazuj, alli yuyaiyuj sirvij huauquicunatapishmi apoyacungui. Shinapish Dios mingashcata pajtachingapajca huaquin jarcaicunami tiyan. Cai tiempopica achca jarcaicunatami charinchij. Por ejemplo, apostatacuna, gobiernocuna, religionta pushajcunapish ñucanchijmantaca llullacunatami nincuna. Chai llullacunata crishpami huaquinpica ñucanchij familiacuna, vecinocuna, trabajopi caj compañerocunapish Jehová Diosta ama sirvichun, ama predicachun jarcasha nincuna. Huaquin llajtacunapicarin ñucanchijta llaquichishpami carcelpi churancuna. w22.07 págs. 8, 9 párrs. 1, 5, 6

Jehová Diosca Bibliata estudiachun, estudiashcapipish yuyachunmi munan. Imata yachashcata pajtachishpaca ñucanchij fetami sinchiyachishun, Jehová Diospaj alli amigocunapishmi tucushun. Chashnami llaquicunata ahuantai tucushun, Diospaj espíritu santotapish chasquishun. Espíritu santota chasquishpacarin llaquicunata ahuantangapaj Dios cushca podertami charishun (2 Corintios 4:​7-10). Jehová Dios ayudajpica “alli cazuj, alli yuyaiyuj sirvij” huauquicunaca ñucanchij feta sinchiyachingapajmi achca publicacioncunata, videocunata, cantocunata rurashca (Mateo 24:45). Jehová Diosca ñucanchijpura cꞌuyanacuchun, ayudanacuchunmi yachachishca (2 Corintios 1:​3, 4; 1 Tesalonicenses 4:9). Huauqui panicunaca llaquicunata charijpica ñucanchijta ayudangapaj listosmi cancuna. w22.08 págs. 12, 13 párrs. 12-14

Ñucanchij huauqui panicunapaj alli cualidadcunamantaca shujtajcunamanpishmi parlana canchij. Chashnami caishujmanta chaishujmanta alli apanacushun. Sinchi feta charij huauqui panicunapish maipica mana de acuerdo cashcamantami pꞌiñanacuncuna. Por ejemplo, apóstol Pablopish, Bernabepish allimi apanacujcuna carca. Shinapish paicunahuan predicachun Marcosta invitana cashcata o mana invitana cashcataca mana de acuerdochu carcacuna. Chaimi paicunaca achcata pꞌiñarinacushpa cada quien paicunapaj ladota rircacuna (Hechos 15:​37-39). Pero qꞌuipaca Pablopish, Bernabepish, Marcospish cutin alli apanacungapajmi esforzarircacuna. Qꞌuipacarin Pabloca Bernabemanta, Marcosmantapishmi alli parlarca (1 Corintios 9:6; Colosenses 4:10). Ñucanchijpish huauqui panicunahuan pꞌiñanacushpapish paicunahuan alli tucungapajmi esforzarina canchij. Paicunapaj alli cualidadcunatapishmi ricuna canchij. Chaita rurashpaca congregacionpica tucuicunami tandalla cashun. w22.08 págs. 22, 23 párrs. 10, 11

Dios munashca shina allita rurangapaj esforzarishpapish shujtajcunataca mana juzganachu canchij. Ashtahuanpish Jehová Dioslla tucui cai pachapaj Juez cashcatami yuyarina canchij (Génesis 18:25). Diosca ñucanchijtaca shujtajcunata juzgachunca mana churashcachu. Josepaj ejemplopi yuyashunchij. Joseca allita rurajmi carca. Chaimantami paita mana alli tratajpipish shujtajcunata mana juzgarca. Josepaj huauquicunaca paitaca achcatami llaquichircacuna. Shuj esclavota shinami cꞌaturcacuna. Paicunapaj yayatapish “Joseca huañushcami” nishpami crichircacuna. Huaquin huatacuna huashaca Joseca jatun mandajmi tucurca. Paipaj huauquicunahuan tupajpica, paipaj huauquicunaca José tigra llaquichinatami mancharcacuna. Pero Joseca paicunataca mana juzgarcachu. Ashtahuanpish paipaj huauquicuna arrepentidos cashcata ricushpami cꞌuyaihuan tratarca. Joseca paipaj huauquicunataca: “Ama manchaichijchu. Ñucaca Taita Diospaj randi llaquichij cashpatajmari llaquichishari” nircami (Génesis 37:​18-20, 27, 28, 31-35; 50:​15-21). Joseca humilde cashcamantami Jehová Dioslla paipaj huauquicunata juzgana derechota charishcata yuyarirca. w22.08 págs. 30, 31 párrs. 18, 19

Jehová Diosca pushaj ancianocunata, siervo ministerialcunata, precursorcunata, jovencunata, mayorllacunata, cꞌaricunata, huarmicunatapishmi paita sirvijcunata animangapaj utilizan. Cantapishmi paita sirvijcunapaj mañashcacunata cutichingapaj utilizai tucun (Colosenses 4:11). Chaimantami Jehová Diosta sirvina, huauqui panicunatapish ayudanaca ñucanchijpaj valishca can. Pero ¿millai ungüicuna ricurijpi, llaqui atraso japijpi o contracuna llaquichijpica ima shinataj ñucanchij huauqui panicunata ayudai tucunchij? Huauqui panicunata ayudanaca sinchichari canga. Paicunata ayudasha nishpapish ñucanchij propio familiachari achca llaquicunata charicun. Chashna sinchi cajpipish Jehová Diosca huauqui panicunata tucui pudishcahuan ayudashpa catichunmi munan (Proverbios 19:17). w22.12 pág. 22 párrs. 1, 2

Confianalla cangapajca shujtajcunatami cꞌuyana canchij. Jesusca “Yayitu Diosta cꞌuyana, shujtajcunata cꞌuyanami ashtahuan importante can” nircami (Mateo 22:​37-39). Ñucanchijca Yayitu Diosta cꞌuyashcamantami pai shina confianalla casha ninchij. Huauqui panicunatapish cꞌuyashcamantami paicuna ñucanchijman ima parlashcataca mana cutin tigra huillana canchij. Ñucanchijca huauqui panicunata pingachinata, paicunata llaquichinataca mana munanchijchu. Confianalla cangapajca humildesmi cana canchij. Humildes cashpaca tucuita yachajcuna layaca mana puntarashca imatapish huillashpa purishunchu (Filipenses 2:3). Tucuicuna mana yachaipaj huillashcacunata yachashcatapish mana parlashpa purishunchu. Shinallataj Bibliapi ima yuyaicuna mana tiyajpi, ñucanchij publicacioncunapi ima yuyaicuna mana tiyajpica ñucanchij yuyaicunallataca mana parlashpa purishunchu. w22.09 pág. 12 párrs. 12, 13

Shuj angelca Danielmanca cai tiempopica Diospaj puebloca Daniel parlashca profeciacunataca alli intindina cashcatami huillarca. Ashtahuanpish chai angelca: ‘Millaicunaca imata mana intindingacunachu’ nircami (Daniel 12:10). Cai tiempopica millai gentecuna shinaca mana canachu canchij (Malaquías 3:​16-18). Jehová Diosca paipaj pueblopica alli shungu gentecunatami tandachicun. Ñucanchijpish chai tandachishcacunapuramanta cangapajmi esforzarina canchij. Cai tucuri punllacunapica Dios nishcacunami pajtaricun. Pero catij punllacunapipish pai nishcacunaca pajtarishpami catinga. Ñallami tucui millai gentecunaca tucuringa. Jehová Dios Danielman ima nishcapishmi pajtaringa. Jehová Diosca Danieltaca: “Tucuri punllacuna pajtajpimi can japina cashcata chasquingapaj jataringui” nircami (Daniel 12:13). Tucuicunami ñucanchij huañushca familiapish, Danielpish, shujtajcunapish causarichun munanchij. Chaimantami causaita chasquinapaj libropi ñucanchij shuticuna quillcashca cachunca Diosta sirvishpa catina canchij. w22.09 págs. 24, 25 párrs. 17, 19, 20

Jehová Diosca Ezequielta predicachun cachashpaca Moisesta, Isaiasta animaj shinallatajmi animarca (Éxodo 3:10; Isaías 6:8). Chaita uyashpaca Ezequielca achcatami animarirca. Ezequielca Jehová Dios chai profetacunata ayudashca shinallatajmi paitapish ayudanata tucui shunguhuan crirca. Ashtahuancarin achca cutincunami Ezequielca “Mandaj Diosca ñucataca cashnami nirca” nishpami quillcarca (Ezequiel 3:16; 6:1). Chaimantami Ezequielca Jehová Dios paita apoyacushcataca seguro carca. Ezequielpaj yayaca sacerdotemi carca. Chaimantami paipaj yayaca Jehová Dios profetacunata siempre apoyashcata yachachishcanga. Jehová Diosca Isaactapish, Jacobtapish, Jeremiastapish: “Ñucami canhuan casha” nishpami animarca (Génesis 26:24; 28:15; Jeremías 1:8). w22.11 pág. 3 párr. 3

Adán y Eva juchapi urmashcamantami tucuicuna huañunchij (Isaías 55:11). Chashna tucujpipish Jehová Diosca paipaj munaitaca mana cambiashcachu. Paica alli gentecuna huiñai causaita charichunmi munan. Jehová Dios ima nishcata, imata rurashcata ricushpami chaita yachanchij. Jehová Diosca huañushca gentecunatami causachisha nin y paicunamanca huiñai causaitapishmi cusha nin (Hechos 24:15; Tito 1:​1, 2). Jobca Jehová Dios huañushca gentecunata causachina munaita charishcatami seguro carca (Job 14:​14, 15). Profeta Danielpish huañushca gentecuna causarinata, huiñai causaita charigrishcatapishmi yacharca (Salmo 37:29; Daniel 12:​2, 13). Jesús causashca tiempopi tiyaj judiocunapish Jehová Dios paita sirvijcunaman huiñai causaita cui tucushcatapishmi crircacuna (Lucas 10:25; 18:18). Jesucristopish achca cutincunami causarinamanta parlarca. Jesús huañujpicarin Jehová Diosca paitami causachirca (Mateo 19:29; 22:​31, 32; Lucas 18:30; Juan 11:25). w22.12 págs. 4, 5 párrs. 8, 9

Jehová Diosca ñucanchij Dios, ñucanchij Yaya, ñucanchij amigomi casha nin. Chaimantami ñucanchijtaca paipajman cꞌuchuyachun mañacun (Santiago 4:8). Jehová Diosca ñucanchij mañashcacunataca siempremi cutichin. Ima llaquicunata charijpica ñucanchijta ayudangapajca listomi can. Ashtahuancarin paipaj organizacionhuanmi ñucanchijtaca alli cuidan, alajata yachachin. Jehová Diosta shungumanta mañashpa, Bibliata liyishpa, imata yachashcapi cutin cutin yuyashpami paipajmanca ashtahuan cꞌuchuyashun. Chashnami Jehová Diosta ashtahuan cꞌuyashun, paihuanpish agradecidos cashun. Jehová Diosta tucuipi cazunata, paita alabanatapishmi munashun (Apocalipsis 4:11). Jehová Diosta ashtahuan rijsishpa, paipaj organización ñucanchijta cuidacushcata ricushpaca Jehová Diospi, paipaj organizacionpimi tucui shunguhuan confiashun. Diabloca Jehová Diospi ama confiachun, paipaj organizacionpi ama confiachunmi munan. Pero sinchi feta charishpa, Jehová Diospi tucui shunguhuan confiashpaca Jehová Diosmanta, paipaj organizacionmantapish manataj caruyashunchu. Chashnami Diabloca ñucanchijtaca mana mishanga (Salmo 31:​13, 14). w22.11 pág. 14 párrs. 1-3

Ñaupa tiempopica quimsa jovencunaca huañunata mana manchashpami Diosta cazunata decidircacuna. Chaimantami Jehová Diosca paicunataca shuj hornopi ama rupachun quishpichirca. Cunan punllacunapipish Jesusta catijcunaca Jehová Diosta cꞌuyashcamantami huañunata mana manchashpa, carcelman rinata mana manchashpa Diosta tucuipi cazunata decidishcacuna. Davidpajca Jehová Diosta tucuipi cazunami valishca carca. Chaimantami paica: ‘Llajtacunapi causajcuna imalla rurashcataca Mandaj Diosmi ricuchinga. Mandaj Dioslla, ima pandata ñuca mana rurashcatapish chai shinallataj ricuchihuayari. Quiquinpish shunguta churashcamantaca ñuca cashcata ruraj cashca imapi mana pandaj cashca ñucataca huaquichichun’ nirca (Salmo 7:8; 25:21). Ñucanchijpish ima llaquicuna, ima jarcaicuna shamujpipish Jehová Diosta tucuipi cazushpa catingapajmi esforzarina canchij. Chashnami alli, cushilla causashun. Salmo 119:​1-pica: “Alli ñanllapi purijcunaca cushichishcacunami Mandaj Diospaj mandashcallapi purijcunaca cushichishcacunami” ninmi. w22.10 pág. 17 párrs. 18, 19

Jobca Jehová Dioshuan imata parlashcataca tucui vidami yuyarishca canga. Jehová Diosca Jobtaca pai imalla rurashcacunata ricushpa paimanta yachachunmi nirca. Chaita rurashpaca Jobca Jehová Dios yachaj cashcata, paipi confiai tucushcatapishmi cuentata curca. Por ejemplo, Jobca Jehová Dios animalitocunaman tucuita carashcatami ricurca. Chaimi Jehová Dios paitapish cuidanata tucui shunguhuan crirca (Job 38:​39-41; 39:​1, 5, 13-16). Jobca Jehová Dios imalla rurashcacunapi yuyarishpami Dios ima shina cashcata yacharca. Dios rurashcacunata ricushpaca ñucanchijpishmi Jehová Dios ima shina cashcata yachai tucunchij. Pero huaquinpica ciudadpi causashcamantami caita pajtachinaca mana jahualla can. Cutin campopi causacushpapish caita o chaita ruracushcamantami Dios rurashcacunamanta yachangapaj tiempota mana surcunchij. w23.03 pág. 15 párrs. 1, 2

Jesucristoca jatun terremotocuna, ashtahuan llaquicuna, ashtahuan millai gentecuna, macanacuicunapish tiyagrishcatami huillarca (Lucas 21:11; Mateo 24:12). Paica cai tucui llaquicunata Diosta mana sirvijcunalla charinataca mana nircachu. Ashtahuanpish cashna laya llaquicunataca Diosta sirvijcunapishmi ahuantashcacuna (Isaías 57:1; 2 Corintios 11:25). Jehová Diosca tal vez tucui llaquicunamantaca mana librangachu. Pero cai llaquicunata chari horas ñucanchij shungupipish, yuyaipipish tranquilo sintirichunmi ayudanga. Ima llaqui atraso manaraj japijpimi alli prepararina canchij. Chaita rurashpaca Jehová Dios ñucanchijta cuidanapi confiashcatami ricuchishun. ¿Imamantataj chaita ninchij? Bibliapica ñucanchijmanca ima llaqui ama japichun cuidarina cashcatami yachachin. w22.12 págs. 18, 19 párrs. 9, 10

José carcelpi cajpica Jehová Diosca Egipto llajtata mandaj faraontaca ishqui muscuicunatami muscuchirca. Chaimantami Faraonca Joseta cayachun cacharca. Joseca Diospaj ayudahuanmi chai ishqui muscuicuna ima nisha nishcata, faraón imata rurana cashcatapish huillarca. Faraonca Joseta Jehová Dios ayudaj cashcatami cuentata curca. Chaimantami Egiptopi tiyaj tucui granocunata ricuchun Joseta churarca (Génesis 41:​38, 41-44). Huaquin huatacuna qꞌuipaca Egipto llajtapi, Canaán llajtapimi jatun yaricai tiyarca. Canaán llajtapica Josepaj familiami causarca. Pero José Egipto llajtapi shuj jatun mandaj cashcamantami paipaj familiata ayudai tucurca. Tiempo qꞌuipacarin Josepaj familiamantami Mesías shamuna carca. Jehová Diosllatajmi Josetaca chashna bendiciarca. Josepaj huauquicuna paita llaquichina yuyaihuan chaita rurajpipish Jehová Diosca paipaj munaita pajtachichunmi Joseta utilizarca. w23.01 pág. 17 párrs. 11, 12

¿Cashna nishpaca Jesusca imatataj yachachisha nirca? Paica alli chaparacuj shina imacunalla Diosmanta caruyachi tucushcata ricurachunmi nirca. Chaicunamanta caruyana cashcatapishmi yachachisha nirca. Caicunata pajtachishpaca Yayitu Diosmantaca manataj caruyashunchu (Proverbios 22:3; Judas 20, 21). Apóstol Pabloca Diosta sirvijcunataca: ‘Imata ruracushcamanta cancunallataj ricuraichij’ nircami. Por ejemplo, Efesopi caj huauqui panicunataca: “Yuyai illajcuna shina ama puringapaj alli cuidarichij. Ashtahuanpish alli yuyaiyujcuna shina purichij” nishpami quillcarca (Efesios 5:​15, 16). Diabloca tucui laya rurashpami ñucanchijtaca Yayitu Diosmanta caruyachisha nin. Chaimantami Bibliapaj consejocunaca Diospaj munai maijan cashcata alli intindichun animan. Caicunata alli intindishpaca Diablopaj trampacunapica mana urmashunchu (Efesios 5:17). Chaimantami mana allicunamanta caruyangapajca Diospaj munai maijan cashcata alli intindina canchij. ¿Diospaj munai maijan cashcata yachangapajca imatataj rurana canchij? Punllantami Bibliata estudiana canchij, imata estudiashcapipish cutin cutinmi yuyana canchij. Chashna Diospaj munaita intindishpaca Jesucristo shinami yuyai callarishun. Bibliapi caita o chaita rurachun nishca ima ley mana tiyajpipish mana allicunamantapishmi caruyashun (1 Corintios 2:​14-16). w23.02 págs. 16, 17 párrs. 7-9

¿Cambaj huasita siempre limpiota charingapajca imatataj rurana cangui? Quizás chaipi causanaman manaraj yaicushpaca tucuitami alli pꞌicharcangui. Pero huasita pꞌichanata saquijpica ratomi achca basuracuna, allpapish jundanman. Chaimantami huasita siempre limpiota charingapajca punllanta pꞌichashpa catina cangui. Ñucanchij huasita punllanta pꞌichacuj shinallatajmi ñucanchij yuyaita, ñucanchij causaita mushujyachishpa, cambiashpa catingapaj esforzarina canchij. Manaraj bautizarishpaca ñucanchij cuerpotapish, yuyaitapish mapayachijcunata anchuchingapajmi esforzarircanchij (2 Corintios 7:1). Pero cunanca apóstol Pablo ima nishcata pajtachishpa catingapajmi esforzarina canchij. Paica: “Cancunapaj yuyaitaca punllantami mushujyachishpa catina canguichij” nircami (Efesios 4:23). Caita mana rurajpica ñucanchij huasi rato mapayacushca shinami, ñucanchij yuyaipish mana alli yuyaicunahuan, mana alli munaicunahuan rato jundanman. Chaimantami ñucanchij ruraicuna, munaicuna, yuyaicunapish Dios munashca shina cachun ñucanchijllataj ricurashpa catina canchij. w23.01 pág. 8 párrs. 1, 2

Jesús yachachishcacunata uyanaca alajami cashcanga. Paica huaquin versocunata de memoriami nij carca. Jesús bautizarishpa, Yayitu Diospaj espíritu santota chasquishpaca jahua pachapi ima shina causashcatami tucuita yuyarirca. Pai bautizarishca huashallapish, pai ñalla huañugricushpapish Bibliamanta huaquin versocunatami de memoria nirca (Deuteronomio 8:3; Salmo 31:5; Lucas 4:4; 23:46). Shinallataj quimsa huatacuna chaupita gentecunaman yachachicushpami Bibliata liyishpa, huaquin versocunata de memoria repitishpa alli intindichij carca (Mateo 5:​17, 18, 21, 22, 27, 28; Lucas 4:​16-20). Jesusca jovenmantapachami Bibliata liyina costumbreta charirca. Bibliamanta parlajcunatapish, Bibliata liyijcunatapish allimi uyaj carca. De seguromi Jesusca Mariatapish, Josetapish huasipi Bibliamanta parlacujpica alli uyashcanga (Deuteronomio 6:​6, 7). Tucui sabadocuna paipaj familiahuan Diosta adorana huasiman rishpapish Bibliamanta liyishcataca allimi uyaj carca (Lucas 4:16). w23.02 págs. 8, 9 párrs. 1, 2

Jehová Diosca tucuitami ñucanchijman cushca. Chaimantami paita cꞌuyana canchij. Por ejemplo, paica cada unomanmi causaita cushca. Shinallataj achca bendicioncunatapish, ima ashtahuan allicunatapish paillami cushca (Salmo 36:9; Santiago 1:17). Paica mana mitsa cashcamanta, ñucanchijta dimastij cꞌuyashcamantami tucui allicunata cushca. Jehová Diosca ñucanchijta quishpichingapajmi paipaj cꞌuyashca Churita curca. ¿Imamantataj caica shuj valishca regalo can? Jehová Diospish, paipaj Churipish miles de millones huatacunata cielopi causashcamantami dimastij cꞌuyanacurcacuna (Proverbios 8:​22, 23, 30). Chaimi Jesusca: ‘Yayaca ñucatami cꞌuyan. Ñucapish Yayatami cꞌuyani’ nirca (Juan 10:17; 14:31). Chaimantami Yayitu Diospajca paipaj cꞌuyashca Churita sufricujta ricuna, huañucujta ricunaca dimastij llaqui cashcanga. Shinapish Jehová Diosca ñucanchijta dimastij cꞌuyashcamantami paipaj cꞌuyashca Churita curca (Juan 3:16; Gálatas 2:20). ¿Tucui caicunata Yayitu Dios rurashcata ricushpaca manachu canpish paita cꞌuyasha ningui? w23.03 págs. 4, 5 párrs. 11-13

Pandachij apostatacuna yuyaicunamanta cuidarishunchij. Jesusca Pergamopi causashca huauqui panicunataca congregacionta chꞌicanyachicushcamantami consejarca (Apocalipsis 2:​14-16). Cutin Tiatirapi causashca huauqui panicunataca “Satanasmanta shamuj llulla yachachishcacunata” mana catishcamantami felicitarca. Bibliamanta verdadta yachashpa catichunpishmi animarca (Apocalipsis 2:​24-26). Shinapish huaquin discipulocunaca panda crishcacunata caticushcamantami arrepintirina carca. ¿Caimantaca imatataj yachai tucunchij? Ñucanchijpish panda crishcacunata, yanga yachachishcacunataca mana catinachu canchij. Apostatacunaca Yayitu Diosta caticuj shinami cancuna. Pero paicunaca Biblia ima nishcataca mana catincunachu (2 Timoteo 3:5). Chaimanta paicuna ñucanchijta ama pandachichunca Diospaj Shimita alli estudiashpa catishunchij (2 Timoteo 3:​14-17; Judas 3, 4). Jehová Dios ñucanchij adorashcata chasquichunca huaquin consejocunata pajtachina cashcatami ricushcanchij. Imapi mejorana cashcata cuentata cushpaca rato cambiangapaj esforzarishunchij (Apocalipsis 2:​5, 16; 3:​3, 16). w22.05 págs. 4, 5 párrs. 9, 11