Agosto

Jehová Diosca paita mashnata cꞌuyashcata yachangapajmi ñucanchij parlashcacunata uyan. Jesusca: “Shungupi junda tiyashcatami shimica riman” nircami (Mateo 12:34). Chaimantami Malaquías 3:​16-pi nishca shinaca Diosca paita manchajcuna parlanacushcacunata alli uyan. Paicuna huiñai causaita charichunpishmi paicunapaj shuticunataca paipaj libropi quillcan. Paicunaca paicuna ima nishcacunahuanmi Jehová Diosta shungumanta cꞌuyashcata ricuchincuna. Jehová Dios ñucanchij adorashcata chasquichunca ñucanchij rimashcacunahuanmi paita jatunyachina canchij, shujtajcunatapish sinchiyachina canchij (Santiago 1:26). Diosta mana cꞌuyaj gentecunaca jatun tucushpa, pꞌiñarishpami shujtajcunata sinchita rimancuna (2 Timoteo 3:​1-5). Cutin ñucanchijca ñucanchij rimashcacunahuanmi Jehová Diosta cushichisha ninchij. Pero caipi yuyashun. Maijanpish tandanacuicunallapi, predicanallapi shujtajcunata alli tratashpapish, paipaj familiacunata pꞌiñarishpa sinchita rimajpica ¿Jehová Diosca ima shinataj sintiringa? (1 Pedro 3:7). w22.04 pág. 5 párrs. 4, 5

Diosca paipaj munaita rurachunmi chunga gachucunapish, manchanai millai animalpish paicunapaj shungupica shuj yuyaita churashca. Tucuicunami Babilonia Jatun llajtata tucuchina yuyaillata charincuna. Muyundij Allpapi tiyaj tucui panda religioncunataca pucanicuj jatun animalmi o Naciones Unidasmi tucuchinga. Pero chaita rurachunca Jehová Diosmi yuyaita cunga (Apocalipsis 18:​21-24). ¿Caimantaca imatataj yachanchij? Diosca “ima mapa illajlla” adorachunmi munan. Caita ruranaca importantemi can (Santiago 1:27). Babilonia Jatun llajta paipaj panda yachachishcacunahuan, panda costumbrecunahuan, maipish cachun causanahuan pandachichunca mana saquinachu canchij. Ashtahuanpish gentecunataca “chaimanta llujshichij” nishunchij. Chaita rurajpica Babilonia Jatun llajtapaj juchacunahuan mana chagrurij cashcatami Yaya Diosca ricunga (Apocalipsis 18:4). w22.05 pág. 11 párrs. 17, 18

Yaya mamacuna cambaj huahuacunaman Jehová Diosmanta ima shinalla yachachinata ricui. Jehová Diosmanta, pai cancunapaj imallata rurashcamanta parlai (Deuteronomio 6:​6, 7). Huasipi Bibliamanta estudiana sinchi cajpica pani Christinepi yuyai. Paica: “Huaquin ruraicunamantami ñuca huahuacunaman Jehová Diosmanta parlangapajca mana tanto tiempo tiyarca. Chaimi paicunahuan cashpaca Jehová Diospaj ruraicunamanta, shujtaj yachanacunamantapish parlaj carcani” ninmi. Canca Diospaj organizacionmanta, huauqui panicunamantaca allicunatami parlana cangui. Ancianocunamantapish mana huashalla imata ninachu cangui. Can chashna rurajpica huahuacunaca ima ayudata minishtishpaca ancianocunatami ayudata mañangacunalla. Huasipi alaja causai tiyachun ayudai. Cambaj cusaman, cambaj huahuacunaman cꞌuyaita siempre ricuchi. Cusamanta cꞌuyaihuan parlai, respetotapish ricuchi. Huahuacunamanpish chaillatataj rurachun yachachi. Chashna alaja causai tiyajpimi huahuacunapajca Jehová Diosmanta yachanaca mana sinchi canga (Santiago 3:18). w22.04 pág. 18 párrs. 10, 11

Efesopi causashca huauqui panicunaca achca llaquicunatami ahuantashpa catircacuna. Shinapish Jesusca paicunataca: “Canca callaripi charishca cꞌuyaitami saquishcangui” nishpami advirtirca. Chai discipulocunaca Jehová Diosta alli adorangapajca paitami shungumanta cꞌuyana carcacuna. Cunan punllacunapish ñucanchijca chꞌican chꞌican llaquicunatami ahuantacunchij. Pero Jehová Diosca chaicunata ahuantachunllaca mana munanchu. Ashtahuanpish paita cꞌuyachun, agradicichunmi munan (Proverbios 16:2; Marcos 12:​29, 30). Espiritualmente rijcharishca catishunchij. Sardispi causashca huauqui panicunaca Jehová Diostami alli sirvircacuna. Shinapish qꞌuipaca dormiricuj shinami saquirircacuna. Jesusca paicunataca: ‘Rijcharishca caichij’ nishpa advirtirca (Apocalipsis 3:​1-3). Jehová Diosca paita ima shina sirvishcataca manataj cungarinchu (Hebreos 6:10). w22.05 pág. 3 párrs. 6, 7

Salomonca: “Quiquin alli trabajashcamanta cushicunaca, Diosmantami shamun” nircami (Eclesiastés 5:​18, 19). Salomonca cai shimicuna cierto cashcataca allimi yacharca. Paica sinchita trabajashpami huaquin huasicunata, ciudadcunata shayachirca. Chagracunatapish, huertacunatapishmi tarpurca, jatun tanquecunatapishmi rurarca (1 Reyes 9:19; Eclesiastés 2:​4-6). Salomonca chashna sinchita trabajashcamantami alli sintirishca canga. Pero de verastij cushilla causangapajca mana chaillachu minishtirirca. Salomonca Yayitu Diosta adorangapajmi shuj alaja templota shayachirca. Chaita ruranataca canchis huatacunapimi tucuchirca (1 Reyes 6:38; 9:1). Salomonca chꞌican chꞌican cosascunata rurashpapish Yayitu Diosta sirvinami ashtahuan valishca cashcata cuentata curca. Chaimantami paica: “Cai tucuita yachachishca qꞌuipa, ña tucuchingapajca caitami nini: Diostaca manchashpa cazungui, pai mandashcacunatapish pajtachingui” nirca (Eclesiastés 12:13). w22.05 pág. 22 párr. 8

Bibliapica Jehová Dios huaquincunata perdonashcatami ricuchin. Canca rey Manasespichari yuyacungui. Rey Manasesca Diospaj ñaupajpica yallitaj millaitami rurarca. Paica yanga dioscunata adorachunmi animarca. Yanga dioscunata adorangapajpish paipaj huahuacunatami rupachirca. Qꞌuipacarin Diosta adorana huasipipish shuj yanga diostami churarca. Chaimantami Bibliapica: ‘Manasesca Mandaj Diospaj ñaupajpi chashna jatun millaita rurashpami, Diostaca yallitaj pꞌiñachirca’ nin (2 Crónicas 33:​2-7). Pero Manasés shungumanta arrepintirijpica Jehová Diosca paitami perdonarca (2 Crónicas 33:​12, 13). Rey Davidpipish yuyashun. Paica shuj huarmihuanmi huainayarca, chai huarmipaj cusatapishmi huañuchirca. Pero rey David chai juchacunamanta shungumanta arrepintirijpimi Jehová Diosca perdonarca (2 Samuel 12:​9, 10, 13, 14). Cai ejemplocunapi ricushca shinaca Jehová Diosca perdonangapajmi listo can. w22.06 pág. 4 párr. 7

Dios cusha nishcacuna pajtaringacama pacienciahuan shuyanaca maipica mana facilchu can. Jehová Diosca siempremi causashca. Ñucanchijpaj achca tiempota pasajpipish, Jehová Diospajca ashalla tiempota pasashca layami can (2 Pedro 3:​8, 9). Chaimantachari Jehová Diosca pai cusha nishcacunata ñucanchij munashca horaspica mana pajtachin. Pero ¿Dios cusha nishcacuna pajtaringacama pacienciahuan shuyashpa catingapajca imatataj rurana canchij? (Santiago 5:7). Bibliapica ‘esperanzata charingapajca Jehová Dios tiyashcata, pai ñucanchijta bendiciaj cashcata, pai cusha nishcacunatapish pajtachij cashcatami crina canchij’ ninmi. Chaimantami Dios cusha nishcacunata japina yuyailla cangapajca Jehová Dioshuan alli apanacuna canchij, paipimi confiana canchij (Hebreos 11:​1, 6). Jehová Diosta mañashunchij, Bibliatapish liyishunchij. Jehová Diosta mana ricui tucushpapish paipaj alli amigocunami cai tucunchij. Jehová Diosta mañajpica paica siempremi ñucanchijta uyan (Jeremías 29:​11, 12). w22.10 págs. 26, 27 párrs. 11-13

Job ima shina sintirishcapi yuyashun. Jobca ungushca cashcamantami ushpa jahuapi achca nanaihuan tiyacun (Job 2:8). Chashna cajpipish paipaj mana alli amigocunaca paimanta llullacunata nishpami desanimachincuna. Paipaj huahuacuna huañushcamantacarin Jobca achca llaquimi can. Callaripica Jobca upallami saquirin (Job 2:13). Paipaj mana alli amigocunaca Job upalla saquirishcata ricushpaca: “Jehová Diosta sirvinatami saquinga” nishpachari yuyancuna. Pero mana chashnachu can. Jobca paicunata ricushpaca: “Huañungacamami Diosta sirvishpa catisha” ninmi (Job 27:5). ¿Jobca maimantataj fuerzasta japirca? Paica Jehová Dios ayudanatami tucui shunguhuan crirca. Shinallataj huañushpapish Dios causachinatapishmi tucui shunguhuan confiarca. Chaimantami fuerzasta japirca (Job 14:​13-15). w22.06 pág. 22 párr. 9

Jehová Diosca tucuita ruraj cashpapish paihuan parlachunmi munan. Chaimantami ñucanchijca maipi cashpapish, ima shimita parlashpapish Yayitu Diostaca shungumanta mañai tucunchijlla. Hospitalpi cashpapish, carcelpi cashpapish Jehová Dios ñucanchijta uyanataca manataj cungarinachu canchij. Jehová Dios paita mañana regalota cushcamantami, paitaca shungumanta agradicinchij. Rey Davidpajca Yayitu Diosta mañanaca importantemi carca. Rey David Jehová Diosta cantacushpaca: “Quiquinta ñuca mañashcaca incienso shina quiquinpaj ñaupajman chayashca cachun” nircami (Salmo 141:​1, 2). David causashca tiempopica sacerdotecunaca Jehová Diosta adorangapajmi shuj inciensota alli rurajcuna carca (Éxodo 30:​34, 35). Davidca chai inciensota alli rurashca shinallatajmi Yayitu Diosta mañangapajpish alli yuyanaraj cashcata yacharca. Ñucanchijpish David shinami Jehová Diosta manaraj mañashpa alli yuyanaraj canchij. Chashnami Jehová Diostaca cushichishun. w22.07 págs. 20, 21 párrs. 1, 2, 4

Mana vengarinachu canchij. Shujtajcuna llaquichishcamanta vengarichunca Jehová Diosca mana munanchu (Romanos 12:​20, 21). Juchayujcuna cashcamantami Jehová Dios shinaca shujtajcunataca mana alli juzgai tucunchij (Hebreos 4:13). Huaquinpicarin pꞌiñarishca cashcamantami imata ruranataca mana alli decidi tucunchij. Chaimantami Santiago 1:​20-pica: “Pꞌiñarij runaca mana Dios munashca shina cashcata ruranchu” nin. Caita intindishpaca Jehová Dios llaquichijcunata alli juzganapimi confiana canchij. Minishtirijpica paillatajmi paicunata castiganga. Shujtajcunata perdonashpaca Jehová Dios tucuita allichinapi confiashcatami ricuchinchij. Paraíso Allpapica llaqui cosascunataca ña mana yuyarishunchu. Chaimantami contentos causashun (Isaías 65:17). w22.06 págs. 10, 11 párrs. 11, 12

Ñucanchijta llaquichicujpi chaita ahuantashpaca Diosta alli sirvijcuna cashcatami ricuchinchij (Mateo 5:​11, 12). Diabloca ima jarcaicunata churashpapish Jesustaca manataj mishai tucungachu. Jesús ñucanchijta ayudacushcamantami muyundij Allpapi achca gentecunaman predicacushcanchij. Jesusca apóstol Juantaca chꞌican chꞌican shimicunapi predicana cashcatami huillarca (Apocalipsis 14:​6, 7). ¿Caita pajtachina sinchi cajpipish imatataj rurashcanchij? JW.ORG paginapimi mil yalli shimicunapi publicacioncunata llujchishcanchij. Cuerpo Gobernantepi sirvij huauquicunapish Cushilla causai nishca librotaca 700 yalli shimicunapi traducichunmi saquishcacuna. w22.07 pág. 9 párrs. 6, 7

Jesusca tucui laya gentecunatami llaquirca. Mateoca: “Michij illajlla, shitashca, llaquichishca ovejacuna shina cajta ricushpami tucui chaipi caj gentecunamanta Jesusca yallitaj llaquirirca” ninmi (Mateo 9:36). Jehová Diospishmi gentecunataca achcata cꞌuyan. Chaimantami Jesusca: ‘Ñuca Yayaca cai humildecunamanta shujllapish chingarichunca mana munanchu’ nirca (Mateo 18:14). Jesusmanta ashtahuan yachashpaca Jehová Diostami ashtahuan cꞌuyashun. Jehová Diosta ashtahuan cꞌuyangapaj, espiritualmente sinchi cangapajca experienciata charij huauqui panicunahuanmi alli apanacuna cangui. Paicunaca Jehová Diosta sirvishpami contentos sintirincuna, Diosta sirvishcamantapish manataj arrepintirincunachu. Chaimantami paicunahuan parlangapaj tiempota llujchina cangui. Shinami ‘Achca consejajcuna tiyajpica, ima llaquipish mana japinchu’. Ima importante decisionta agllangapajpish chai huauqui panicunahuanmi parlana cangui. Paicunami alli consejocunata cushpa canta ayudanga. w22.08 pág. 3 párrs. 6, 7

Tucuicunami llaquicunata charishun. Pero mana ñucanchijllachu canchij. Jehová Diosca ñucanchijta cꞌuyaj Yaya cashcamantami ñucanchij mañashcacunata uyangapaj, ñucanchijta ayudangapajca listo can (Isaías 43:2). Jehová Diosca tucui laya llaquicunata ahuantachunmi achca ayudacunata cushca. Paita mañachun saquijpi, Bibliahuan, publicacioncunahuan, videocunahuan ñucanchijman yachachijpi, huauqui panicunapish ñucanchijta ayudajpimi llaquicunataca ahuantashun. Jehová Dios ñucanchijmanta siempre preocuparishcamantami shungumanta agradecidos, cushilla sintirinchij (Salmo 33:21). Diosta agradicingapajca pai cushca ayudacunatami aprovechana canchij. Shinallataj Diosta cazungapaj, pai munashca shina rurangapajmi esforzarina canchij. Caicunata pajtachijpica Jehová Diosca ñucanchijta ayudangapajca listomi canga. w22.08 pág. 13 párrs. 15, 16

Cunan punllacunapica achca gentecunaca politicocunata, cientificocunata, jatun negociocunata charijcunata respetashpapish paicunapi confianata o mana confianataca mana yachancunachu. Ashtahuanpish religioncunata pushajcuna llullashcamantami paicunapipish mana confiancuna. Chaimantami achca gentecunaca Biblia verdadta nishcatapish mana crincuna. Jehová Diosca cashcata rurajmi can. Chaimantami Diosta sirvijcunaca pai siempre verdadta nishcata, ñucanchij allipajllataj yachachij cashcata tucui shunguhuan crinchij (Salmo 31:5; Isaías 48:17). Biblia ima mana panda cashcatapishmi tucui shunguhuan crinchij. Bibliamanta yachaj shuj runaca: “Yayitu Dios nishcacunaca tucuimi cierto can. Chai nishcacunaca siempremi pajtarin. Diosta sirvijcunaca Diospi tucui shunguhuan confiashcamantami pai nishcacuna cierto cashcatapish crincuna” nircami. Ñucanchijpish cai nishcacunahuanmi de acuerdo canchij. w23.01 pág. 2 párrs. 1, 2

Huauqui panicuna Jehová Diospi sinchi feta charichunmi ayudana canchij. Maijan huauqui panicunaca Yayitu Diosta sirvicushcamantami paicunamanta burlarincuna. Shujtaj huauqui panicunaca ancha ungushca cashcamanta, o maijan huauqui o pani paicunata llaquichishcamantami dimastij llaquilla sintirincuna. Shujtajcunacarin Paraíso Allpa manaraj chayashcamantami llaquilla sintirincuna. Cashna laya jarcaicunahuan chꞌimbapuranaca mana facilchu can. Apóstol Pablo causashca tiempopi huauqui panicunapish cashna laya llaquicunatami charircacuna. Apóstol Pabloca Bibliahuanmi huauqui panicunapaj feta sinchiyachirca. Por ejemplo, chai tiempopica huaquin huauqui panicunataca paicunapaj familiacunaca: “Judiocunaca Diospaj pueblomi canchij. Jesusta catijcunaca mana imata yachancunachu” nishpami burlarijcuna carca. Chaimi huauqui panicunaca imata cutichinataca mana yacharcacuna. Pero apóstol Pabloca shuj cartata quillcashpami paicunata animarca (Hebreos 1:​5, 6; 2:​2, 3; 9:​24, 25). Chai huauqui panicunaca apóstol Pablo yachachishcacunata utilizashpami ima shina cutichinata yacharcacuna. w22.08 págs. 23, 24 párrs. 12-14

Jatun empresacuna, politicocuna, religionta pushajcunaca mana allicunata rurashcamantami gentecunaca paicunapica mana confiancuna. Shinallataj amigocunapish, vecinocunapish, huaquinpicarin hasta familiacunapishmi mana allita rurancuna. Chaimantami achcacunaca paicunapipish ña mana confiancuna. Shinapish ñucanchijca tucui caicunata ricushpaca mana sustarinchijchu. Bibliapica cai último punllacunapica gentecunaca shujtajcunamanta caruyana cashcata, yangamanta juchachijcuna cana cashcata, amigocunapajpish contra tucuna cashcatami huillarca. Chashnami gentecunaca Diablo ima shina cashcata ricuchincuna (2 Timoteo 3:​1-4; 2 Corintios 4:4). Cutin ñucanchijca Yayitu Diospimi tucui shunguhuan confianchij. Pai ñucanchijta cꞌuyashcata, ñucanchijta mana saquinataca segurosmi canchij (Salmo 9:10). Jesusca ñucanchijmantami huañurca, chaimantami paipipish confianchij (1 Pedro 3:18). Shinallataj Bibliapaj consejocunapish ñucanchijtami ayudashca, chaimantami Bibliapipish confiai tucunchij (2 Timoteo 3:​16, 17). w22.09 pág. 2 párrs. 1, 2

Ñucanchijcunaca tucui vidami cushilla causai tucunchij. Jesucristoca: “Diosmanta yachana munaita yuyaipi charijcunaca cushicuncunami” nircami (Mateo 5:3). Paica tucui gentecuna Jehová Diosta rijsichun, paita adorachun rurashca cashcatami alli yacharca. Chashna cushi Diosta adorashpaca ñucanchijpish cushillami causashun (1 Timoteo 1:11). ¿Alli causaita charishpallachu cushilla causai tucunchij? Mana. Jesucristoca: ‘Achca llaquicunata charishpapish cushillami causai tucunguichij’ nircami. Shinallataj paica: ‘Ñucata caticushcamanta catirashpa llaquichishca cajcunaca cushicuncunami’ nircami (Mateo 5:​4, 10, 11). Jesucristoca: ‘Llaquicunata charishpapish Jehová Diosta adorashpa, paihuan alli apanacushpaca cushillami causai pudinchij’ nishpami yachachirca (Santiago 4:8). w22.10 pág. 6 párrs. 1-3

Confianalla cangapajca alli yuyaiyujcunami cana canchij. Alli yuyaiyuj cashpaca ima hora upalla saquirina cashcata, ima hora parlana cashcatami yachashun (Eclesiastés 3:7). Maipica upalla saquirinaca imata parlanatapish yalli allimi can. Experienciata charij shuj anciano caita ima shina pajtachishcata ricushun. Paitaca shujtaj congregacioncunapi sinchi problemacuna tiyajpimi ayudachun cachancuna. Shujtaj ancianoca paimanta parlashpaca: “Shujtaj congregacioncunapi ima pasashcataca paica mana nunca huillanchu” ninmi. Cai ancianoca chashna imatapish mana parlajlla cashcamantami paipaj congregacionpi tiyaj ancianocunaca achcata respetancuna, paipimi confiancuna. Confianalla cangapajca honradosmi cana canchij. Honrados cashpaca siempremi imatapish verdadta nishun, chashna rurajpica shujtajcunaca ñucanchijpimi confiangacuna (Efesios 4:25; Hebreos 13:18). w22.09 págs. 12, 13 párrs. 14, 15

Alli yachai ñancunapi caparicuj shina cajpipish achcacunaca mana uyasha nincunachu (Proverbios 1:20). Bibliapica paicunataca yachai illajcuna, chanzata rurajcuna, chꞌahuanyashcacuna ninmi (Proverbios 1:​22-25). Achca gentecunataca religionta pushajcuna, politicocunami umashcacuna. Chai gentecunaca paicunata umashcata yachaj chayashpaca achcatami llaquirincuna. Pero Proverbios 1:​22-pica cai laya gentecunamantaca mana parlanchu. Chai versopica yachai illajcuna nishpaca, paicunata jahualla umachun saquijcunamantami parlan (Proverbios 14:15). Paicunaca paicunallataj yachai illaj canatami decidishcacuna (Jeremías 5:31). Chai gentecunaca Biblia ima nishcata, Bibliapi tiyaj mandashcacunataca mana yachasha nincunachu. Ñucanchijca cai yachai illajcuna shinaca mana casha ninchijchu (Proverbios 1:32; 27:12). w22.10 págs. 19, 20 párrs. 5-7

Yayitu Jehová Diospaj organizacionca ñucanchijta cuidangapajmi achca instruccioncunata cun. Por ejemplo, ancianocunaman ñucanchij direccioncunata cuchun, numerocunatapish cuchunmi mandashcacuna. Shinallataj Yayitu Diospaj organizacionca llaqui horaspi maipi saquiringapaj o maiman ringapaj o minishtishca cosascunata cungapajmi huaquin instruccioncunata cungacuna. Mana cashpaca pita ayudachun o ima hora ayudachunmi mandangacuna. Caicunata mana utca pajtachishpaca ñucanchijllataj, ñucanchij ancianocunatapishmi tal vez llaquipi churashun (Hebreos 13:17). Achca huauqui panicunaca llaqui atraso japishcamantami shujtaj ladopi causanaman rincuna. Paicunaca Diospajta rurashpa catingapaj, shujtaj ladopi amañarishpa catingapajmi esforzarincuna. Apostolcuna causashca tiempopipish huauqui panicunata catirashpa llaquichishcamantami shujtaj ladocunapi causanaman rircacuna. Chashnapish paicunaca Diospaj Shimimantami predicashpa catircacuna. Chai shinallatajmi ñucanchij huauqui panicunapish shujtaj ladopi causanaman rishpapish Diosmanta predicashpa caticuncuna (Hechos 8:4). Chaita rurashcamantami paicunapaj problemacunallapi mana yuyancuna. Ashtahuanpish Dios cusha nishcacunapi yuyashcamantami cushilla, tranquilo sintirincuna. w22.12 págs. 19, 20 párrs. 12, 13

Jehová Diosca cada unotami achcata valoran. Jesusca paipaj discipulocunata predicanaman manaraj cachashpaca paicunapaj contracunata ama manchachunmi yachachirca (Mateo 10:​29-31). Chaipajca uchilla pajaritocunamantami parlarca. Chai tiempopica uchilla pajaritocunaca ashalla cullquimi valijcuna carca. Shinapish Jesusca paipaj discipulocunataca: ‘Chashna cajpipish, paicunamanta shujllapish pambaman urmajpica cancunapaj Yayaca yachanmi. Cancunacarin cai tucui uchilla pajarocunatapish yalli valishcamari canguichij’ nircami. Cai shimicunata nishpami Jesusca Jehová Dios cada unota achcata valorashcata yachachirca. Jesuspaj discipulocunaca huillacushpa shuj pajaritota ricushpami Jesús ima nishcata yuyarishcangacuna. Chashnami paicunapaj contracunata mana manchashpa ñaupajman cati tucurcacuna. Canpish shuj pajaritota ricushpaca Jehová Dios canta achcata valorashcatami yuyarina cangui. Chaita yuyarishpaca Diospaj contracunata mana manchashpami Yayitu Diosta sirvishpa cati tucungui. w23.03 pág. 18 párr. 12

Maipica tal vez ñucanchij familiaca Diosta ama sirvichunmi jarcaicunata churan o quizás trabajo illajmi saquirishcanchij. Chashna laya llaquicunata achca tiempota charishpaca llaquillami sintirinchij. Chaicunata allichina esperanzatacarin mana charinchijchu. Chaimi Diabloca Jehová Dios ñucanchijta mana cꞌuyashcata crichun munan. Jehová Diostapish, paipaj organizaciontapish culpachunmi munan. Diabloca israelitacunatapishmi chashnallataj pandachirca. Callaripica israelitacunaca Egiptomanta paicunata llujchichun Aaronta, Moisesta Jehová Dios agllashcatami crircacuna (Éxodo 4:​29-31). Pero Egipto llajtata mandaj Faraón paicunata ashtahuan llaquichijpica Moisestapish, Aarontapishmi culparcacuna (Éxodo 5:​19, 20). Dios churashca pushajcunata chashna culpanaca mana allichu carca. Tal vez canpish achca tiempotami llaquicunata charingui. Pero ¿Jehová Diospi confiashpa catingapajca imatataj rurana cangui? Can ima shina sintirishcataca Jehová Diosmanmi tucuita huillana cangui. Pai canta ayudanapipishmi confiana cangui. w22.11 pág. 15 párrs. 5, 6

Jehová Diosca causaita cuj cashcamantami huañushcacunata causachi tucun. Por ejemplo, Jehová Diosca profeta Eliasmanca Sarepta llajtamanta shuj huarmipaj churita causachichunmi poderta curca (1 Reyes 17:​21-23). Profeta Eliseopish Diospaj poderta chasquishpami Sunem llajtamanta shuj huarmipaj churita causachirca (2 Reyes 4:​18-20, 34-37). Caicunamanta Bibliapi yachashpaca Jehová Dios huañushcacunata causachi tucushcatami cuentata cunchij. Jesucristo cai Allpapi cai horasca Jehová Diosca huañushcacunata causachichunmi paimanca poderta curca (Juan 11:​23-25, 43, 44). Cunanca Jesusca jahua pachapimi can. Jehová Diosca paimanca cai pachapipish, jahua pachapipish tucui autoridadtami cushca. Chai autoridadta chasquishcamantami Jesusca pambana jutcucunapi cajcunataca causachinga. Paicunaca huiñaita causana oportunidadtami charingacuna (Mateo 28:18; Juan 5:​26-29). w22.12 pág. 5 párr. 10

Cai punllapaj versopi nishca shinaca israelitacunaca Ezequielta mana uyashpaca Jehová Diostami mana uyasha nircacuna. Chaimantami Ezequielca pai mana alli profeta cashcataca mana yuyana carca. Gentecuna mana uyasha nijpipish paica tranquilomi sintirina carca. Ashtahuancarin Jehová Diosca Ezequieltaca: ‘Can nishcacuna pajtarijta israelitacuna ricushpaca paicunapurapi shuj profeta tiyashcataca allimi yachangacuna’ nircami (Ezequiel 2:5; 33:33). Caita uyashpami Ezequielca huillashpa catingapaj fuerzasta japirca. Jehová Diosca ñucanchijtapish predicachunmi cachan. Jehová Diosmanta huillajcuna cashcamantami cushilla sintirinchij (Isaías 43:10). Jehová Diosca Ezequielta animashca shinallatajmi ñucanchijtapish animashca. Paica ñucanchijtaca: “Ama manchaichijchu” ninmi (Ezequiel 2:6). Pero ¿imamantataj predicanataca mana manchana canchij? Jehová Dios ñucanchijtapish ayudanata yachashcamantami mana manchana canchij (Isaías 44:8). w22.11 págs. 3, 4 párrs. 4, 5

Ancianocunapish, siervo ministerialcunapish paicunaman mingashcacunataca allimi pajtachincuna. Cai huauquicuna ñucanchijta espiritualmente sinchiyachishcamantaca achcatami Yayitu Diosta agradicinchij. Shinapish ¿ñucanchijcuna confianalla cangapajca imatataj rurana canchij? Ñucanchij huauqui panicunata cꞌuyashcamantami paicunata ayudasha ninchij. Shinapish paicunapaj causaipica mana yallitaj satirinachu canchij. Apostolcuna causashca tiempopica huaquincunaca shujtajcunamanta yangata parlanata, shujtajcunapaj causaipi satirinata, ima mana parlana cashcata parlanatami yachajcuna carca (1 Timoteo 5:13). Ñucanchijca paicuna layaca mana casha ninchijchu. Por ejemplo, shuj panichari ñucanchijmanca pai ungushca cashcata o ima llaquicunata charishcata huillan. Shinapish piman ama huillachunchari ñucanchijman mañan. Chaipica pai imata parlashcataca shujtajcunamanca mana huillanachu canchij. w22.09 pág. 10 párrs. 7, 8

Ñucanchijcunaca huaquinllapica allicunataca mana ruranachu canchij. Ashtahuanpish ñucanchijcuna ima shina cashcata, imata yuyacushcatapishmi ricurashpa catina canchij. Chashnami ima cambiocunata rurana cashcata cuentata cushun. Chai cambiocunata pajtachingapajca punllantami esforzarishpa catina canchij. Ñucanchijca jucha illaj cashpallami Jehová Diosta tucuipi cushichi tucushun. Pero chaicamaca ñucanchij yuyaita cambiashpa catingapajmi esforzarina canchij. Romanos 12:​2-pica apóstol Pabloca ñucanchij yuyaita cambiashpa Diospaj munaita pajtachina cashcatami yachachirca. Chaimantami cai mundopi tiyaj millai ruraicunahuan, mapa yuyaicunahuan mana chagrurina canchij. Ashtahuanpish ñucanchijcunaca Dios munashca shina yuyacushcata, ruracushcataca allimi ricurashpa catina canchij. Chashnami alli decisioncunata agllashun. w23.01 págs. 8, 9 párrs. 3, 4

¿Jehová Diosca ñucanchijtaca tucuipichu cuidacun? ¿Ima llaquicuna ñucanchijta ama japichunchu cuidacun? Mana. Bibliaca chaitaca mana yachachinchu (Eclesiastés 8:9; 9:11). Chashna cajpipish ñucanchijcuna llaquicunata charijpica Jehová Diosca cada uno ima shina sintirishcataca allimi yachan. Paita ayudachun mañajpipish ñucanchijtami uyan (Salmo 34:15; Isaías 59:1). Ashtahuancarin llaquicunata ahuantashpa catichunmi ayudanga. Ima shina ñucanchijta ayudacushcata ricushun. Jehová Diosca ñucanchij minishticui horasmi cushichin, fuerzatapish cun (2 Corintios 1:​3, 4). ¿Jehová Diosca cantapishchu chashna cushichishpa ayudashca? Shuj prueba tucurishca qꞌuipaca Jehová Dios ñucanchijta ima shina ayudashcatami cuentata cunchij. w23.01 págs. 17, 18 párrs. 13-15

Cai animalca canchis umacunayuj jatun animal shinami can. Pero caica pucami can. Apocalipsis libropica cai animalmanta parlashpaca ‘pusaj jatun mandajmi can’ ninmi (Apocalipsis 13:​14, 15; 17:​3, 8). Apocalipsis 17:8 pi nishca shinaca pusaj jatun mandajca callaripica tiyarcami. Qꞌuipaca chingarircami. Shinapish qꞌuipaca cutinmi ricurirca. Organización de las Naciones Unidashuanmi chaica tucurca. Cai organizacionca cai Allpapi tiyaj gobiernocunatami apoyan. Callaripica cai organizaciontaca Sociedad de Naciones nishpami rijsircacuna. Qꞌuipaca Segunda Guerra Mundial callarijpica ña mana tiyarcachu. Pero tiempohuanca cutinmi tiyai callarirca. Cunanca cai organizaciontaca organización de las Naciones Unidas nishpami rijsinchij. Gobiernocunaca paicunapaj nishcacunahuan, ruraicunahuanmi Jehová Diospaj contra tucuchun, paipaj pueblopaj contra tucuchun gentecunataca animan. Chashna rurashpami Tucui poderta charij Diospaj Armagedón macanacuipaj cai pachapi tiyaj mandajcunata tandachicuj shina can (Apocalipsis 16:​13, 14, 16). w22.05 pág. 10 párrs. 10, 11

Jesusca shujtajcuna ima nishcacunallahuanca mana conformarircachu, ashtahuanpish paillatajmi Bibliataca liyirca. Chaimantami Jesusca Diospaj consejocunataca paipaj causaipi pajtachirca, Diospaj Shimitapish tucui shunguhuanmi cꞌuyarca. Por ejemplo, Jesusca 12 huatacunallata charishpami temploman rirca. Chaipica Moisespaj Leyta yachaj religionta pushajcunami carcacuna. Paicunaca Jesús Bibliamanta allita yachashcata ricushpa, paicunapaj tapushcacunata cutichijta ricushpaca achcatami mancharircacuna (Lucas 2:​46, 47, 52). Bibliata punllanta liyishpaca chaipi nishcacunatami alli rijsi tucunchij, cꞌuyai tucunchij. Pero Bibliapaj nishcacunamanta beneficiaringapajca Jesús, escribacunata, fariseocunata, saduceocunata, ima nishcata ricushun. Cai religionta pushajcunaca Bibliata liyina costumbretami charircacuna. Shinapish Bibliapaj cosejocunamantaca mana beneficiarircacunachu. Chaimi Jesusca paicuna beneficiarichun imata rurana cashcata yachachirca. Jesuspaj consejocunaca ñucanchijtapishmi ayudai tucun. Chaimantami ñucanchijcunapish 1) Bibliapaj nishcacunata alli intindina canchij, 2) valishca yuyaicunata tarina canchij, 3) Bibliapaj nishcacuna ñucanchij shunguman chayachunpish saquina canchij. w23.02 págs. 8, 9 párrs. 2, 3

Diosta sirvijcunaca caishujhuan chaishujhuan vacilashpa, yallitaj ubyashpa, yallitaj micushpa, llaquichij shimicunata nishpa, mana alli amigocunahuan apanacushpa, macanacuj peliculacunata ricushpa, pornografiata ricushpapish mana purinachu canchij (Salmo 101:3). Diabloca caicunahuanmi Jehová Diosmanta caruyachinata munan (1 Pedro 5:8). Cai mana allicunamanta mana caruyajpica Diabloca shujtajcunata envidiachun, mana honrados cachun, ashtahuan charinata munachun, shujtajcunata pꞌiñachun, jatun tucuchun, resentirishca saquirichunpishmi pandachinga (Gálatas 5:​19-21). Cai mana alli yuyaicuna, munaicunaca ñucanchij shungupica venenota charij shuj planta shinami asha asha huiñashpa catinga. Chaimantami caicuna ñucanchij shungupi manaraj huiñajpiraj sapimanta aisaj shina ñucanchij shungumanta caicunata anchuchina canchij (Santiago 1:​14, 15). Testigocunaca tucuicunatami cꞌuyaihuan, respetohuan tratanchij. Shinapish pihuan yalli apanacushpaca paicuna layami yuyai callarishun (1 Corintios 15:33). Chaimantami alli yuyaihuan causashpaca Diosta mana sirvijcunahuanca mana achca tiempota pasashunchu (Lucas 21:34; 2 Corintios 6:15). Ashtahuanpish llaquipi urmagrijta ricushpaca paicunamantami caruyashun. w23.02 págs. 16-18 párrs. 7, 10, 11

Jehová Diosmanta ashtahuan yachashpaca paitami ashtahuan cꞌuyai callarishcangui. De seguromi canca cunanpish, shamuj punllacunapish paihuan alli apanacunata munangui. Y chaitaca rurai tucunguimi. Chaipajca cambaj shimicunahuan, cambaj ruraicunahuanmi tucui vida Yayitu Diosta cushichinata decidina cangui. Yayitu Diosllatajmi chaita rurachun animacun (Proverbios 23:​15, 16). Chashnami Diosta shungumanta cꞌuyashcata ricuchingui. Chaica tucuimanta yalli shuj alli decisionmi can. ¿Jehová Diosta cꞌuyashcata ricuchingapajca imatataj rurana cangui? Puntaca Yayitu Diosman mingaringapajmi shuj mañaita rurana cangui (Salmo 40:8). Qꞌuipaca shujtajcunapaj ñaupajpi Yayitu Diosman mingarishcata ricuchingapajmi bautizarina cangui. Bautizarina punllaca shuj cushicui punllami can. Chai punllamantaca ña mana cambajchu causangui. Ashtahuanpish Yayitu Diospaj munaita rurangapajmi causangui (Romanos 14:8; 1 Pedro 4:​1, 2). Caica shuj jatun decisionmi can. Shinapish bautizarinata decidishpaca achca bendicioncunatami charingui. w23.03 págs. 5, 6 párrs. 14, 15