Septiembre

Shujtajcunaman cꞌuyaihuan parlajpica, paicunaca ñucanchij Jehová Diosta sirvij cashcatami cuentata cungacuna (Malaquías 3:18). Kimberly shuti panipi yuyashun. Shuj cutinca Kimberlyca escuelamanta paipaj compañerahuanmi shuj tareata ruracurcacuna. Paipaj compañeraca Kimberly shujtajcunata mana huashalla rimaj cashcata, cꞌuyaj cashcata, mana alli shimicunatapish mana rimaj cashcatami cuentata curca. Cai compañeraca Kimberly imamanta chashna cashcatami yachasha nirca. Tiempohuancarin paica Bibliamantami estudiai callarirca. Ñucanchijpish shujtajcunahuan cꞌuyaihuan parlajpica paicunapish Bibliamantami yachasha ningacuna. Chaimi Jehová Diosca cushilla sintiringa. Jehová Diosta jatunyachingapajca cushichij shimicunatami parlasha ninchij. w22.04 págs. 5, 6 párrs. 5-7

Jesús demoniocunamanta María Magdalenata quishpichijpica Jesushuanmi dimastij agradecida sintirirca. Chaimantami paica Jesuspaj catij tucurca. Shinami Paipaj cosascunahuanmi Jesusta ayudarca (Lucas 8:​1-3). María Magdalenaca Jesús paita ayudashcamantami achcata agradicirca. Shinapish Jesús gentecunata quishpichingapaj tucuicunamanta huañugrishcataca manaraj yachashcangachu (Juan 3:16). Chashnapish María Magdalenaca Jesustaca tucuipimi apoyarca. Jesús caspipi huarcushca cajpica Mariaca Jesustapish, chaipi cajcunatapish apoyashpami chai cꞌuchullapi saquirirca (Juan 19:25). Jesús huañushca qꞌuipaca Mariapish, shujtaj ishqui huarmicunapish mishquijllata ashnacuj qꞌuihuacunatami Jesuspaj pambana jutcuman apashpa rircacuna (Marcos 16:​1, 2). Mariaca Jesús causarishca huashami paita ricui tucurca, paihuanpishmi parlai tucurca. Shujtaj discipulocunaca Jesús causarishca huasha paitaca mana ricui tucurcacunachu. Pero María Magdalenaca cai bendiciontami chasquirca (Juan 20:​11-18). w23.01 págs. 27, 28 párr. 4

Dormiricuj shinaca mana saquirinachu canchij. Ñaupa laya Yayitu Diosta ña mana sirvi tucushpapish, tucui pudishcahuanmi paita sirvishpa catina canchij. Chashnami tucuri punllacunacama rijcharishca cashun (1 Corintios 15:58; Mateo 24:13; Marcos 13:33). Yayitu Diosta cushilla, tucui shunguhuan sirvishpa catishunchij. Laodiceapi causashca huauqui panicunaca Yayitu Diosta cushilla, tucui shunguhuan sirvinatami saquircacuna. Chaimantami Jesusca paicunataca: ‘Cancunaca llaquinayaj, pobrecunami canguichij’ nirca (Apocalipsis 3:​16, 17, 19). ¿Caimantaca imatataj yachai tucunchij? Yayitu Diosta cushilla, tucui shunguhuan sirvingapajca pai cushca bendicioncunamanta, paipaj organización ayudacushcamantaca agradecidomi cana canchij (Apocalipsis 3:18). Shinallataj achca cosascunata charinallapica mana yuyanachu canchij. Chaipaj randica Diosta sirvinatami punta lugarpi churana canchij. w22.05 págs. 3, 4 párrs. 7, 8

Jehová Diosca huaranga huatacunatami shuj valishca libropi achca shuticunata quillcacushca. Puntapica Abelpaj shutimi quillcashca can. Paimi puntataca Jehová Diosta sirvi callarirca (Lucas 11:​50, 51). Bibliapica cai librotaca yuyarina libro, causaita chasquinapaj libro, causagrijcunapaj rollo nishpami rijsin (Malaquías 3:16; Apocalipsis 3:5; 17:8). Cai libropica Diosta manchajcunapaj, Diosta respetajcunapaj, Diosta cꞌuyajcunapaj shuticunami quillcashca can. Caicunamanta huaquincunaca jahua pachapi causana esperanzatami charincuna. Cutin shujtajcunaca Paraíso Allpapi causana esperanzatami charincuna. Ñucanchijpaj shuticunapish Jehová Dioshuan alli apanacujpi, Jesuspi feta churajpica chai libropimi quillcashca canga (Juan 3:​16, 36). Tucuicunami ñucanchij shutica chai libropi quillcashca cachun munanchij ¿nachu? w22.09 pág. 14 párrs. 1, 2

Apocalipsis libropica pucanicuj jatun dragonmantami parlan (Apocalipsis 12:3). Cai dragonca Jesushuan, paipaj angelcunahuanmi macanacun (Apocalipsis 12:​7-9). Shinallataj gobiernocunaman poderta cushpami Diospaj pueblotapish catirashpa llaquichin (Apocalipsis 12:17; 13:4). ¿Cai dragonca pitaj can? Cai dragonca ‘ñaupa culebra, Diablo, Satanasmi’ can (Apocalipsis 12:9; 20:2). Paimi Diospaj tucui enemigocunataca controlacun. ¿Dragonhuanca imataj tucunga? Apocalipsis 20:​1-3-pica shuj ángel Satanasta jatun jutcupi shitanatami huillan. Chaica shuj carcelpi churashca shinami canga. Chaipimi Satanastaca 1.000 huatacunata huichcanga. 1.000 huatacuna tucuringacamami llajtacunataca mana pandachinga. Chai qꞌuipaca Satanastaca demoniocunandijmi azufrehuan rupacuj nina cuchapi shitanga. Diablopish, demoniocunapish para siempre tucuchishcami canga. ¿Satanaspish, demoniocunapish illajpica ima shinashi causashun? Paicuna illajpica maravillatami causashun. w22.05 pág. 14 párrs. 19, 20

Jesusca sinchitami trabajarca. Paica jovenraj cashpaca carpinteromi carca (Marcos 6:3). Jesusca paipaj familiata ayudangapajmi trabajarca. Chaimi paipaj yaya mamaca agradecidos cashcanga. Shinallataj Jesusca jucha illaj cashcamantami sumaj trabajocunata ruraj carca. Chaimantami achca clientecunatapish charishcanga. De seguro Jesusca sinchita trabajashcamantami cushilla sintirirca. Pero sinchita trabajashpapish Yayitu Diosta sirvingapajmi tiempota surcuj carca (Juan 7:15). Paica tiempo completota Yayitu Diosta sirvicushpaca: “Chingarijlla micunamantaca ama trabajaichijchu, ashtahuanpish huiñai causaiman apaj mana tucurij micunamanta trabajaichij” nircami (Juan 6:27). Urcupi yachachicushpapish cashnami nirca: ‘Jahua pachapi charinacunata huaquichishpa catichij’ (Mateo 6:20). Dios cushca yachaita charishpaca trabajollapi mana pasashunchu. Caipi yuyashunchij. Bibliapica ñucanchijtaca: “Allita rurashpa sinchita trabajachunmi” nin. w22.05 págs. 22, 23 párrs. 9, 10

Euniceca Timoteomanmi shuj alli ejemplota curca. Paica paipaj mama Jehová Diosta cꞌuyashcamanta ima ruraicunatapish ruraj cashcatami ricushcanga. Shinallataj Jehová Diosta sirvina cushi causaita cuj cashcatapishmi cuentata cushcanga. Cunan tiempopish achca mamacunaca ruraicunahuan ricuchishpami paipaj familiacunataca Diosta sirvichun ayudashcacuna (1 Pedro 3:​1, 2). Canpish chashnallatajmi ayudai tucungui. Puntaca Jehová Diospaj amigo canata mashcai (Deuteronomio 6:​5, 6). Achca mamacuna shinallatajmi canpish huahuacunaman ima minishtishcata cungapaj tucuita rurashcangui. Por ejemplo, cambaj tiempohuan, cullquihuanmi huahuacunataca ayudashcangui. Samarina tiempopipish ayudashpami catishcangui. Shujtaj cosascunatapishmi rurashcangui. Tucui chaicunata rurashpapish Jehová Diospaj amigo canataca mana descuidanachu cangui. Chaipajca canlla Diosta mañanata, Bibliata estudianata, tandanacuiman rinataca ama saquichu. Chashnami familiapajpish, shujtajcunapajpish alli ejemplota ricuchingui. w22.04 págs. 16, 19 párrs. 1, 12, 13

Jehová Diosca alli Juezmi can. Paica ima alli cashcata, ima mana alli cashcataca allimi yachan (Génesis 18:25). Chaimantami tucuicunataca alli juzganga (Romanos 14:​10-12). Caita yachashpaca tranquilosmi sintirinchij. Jehová Diosca ñallami tucui llaquicunata tucuchinga. Chaipica ima llaquita charishcataca ña mana cutin yuyarishunchu (Salmo 72:​12-14; Apocalipsis 21:​3, 4). Pero chai punlla chayangacamaca Jehová Dios shina shujtajcunata perdonashpa catingapajmi esforzarina canchij. w22.06 pág. 13 párrs. 18, 19

Shuj alli juezca leycunataca allimi rijsina can. Imacuna alli cashcata, imacuna mana alli cashcatapish allimi rijsina can. Shinallataj shuj alli juezca ima tucushcata alli yachashpami juzgana can. Jehová Diosca tucuita alli yachashcamantami ñucanchijta alli juzgashpa perdonai tucun. Paica runacuna shinaca mana juzganchu. Ashtahuanpish ima tucushcata alli yachashpami ñucanchijta juzgan (Génesis 18:​20, 21; Salmo 90:8). Jehová Diosca ñahuita ricushpallaca mana juzganchu. Paica ñucanchijcuna ima shina cashcata, ima shina huiñashcata, ñucanchij causaipipish ima tucushcata yachashpami juzgan. Ashtahuancarin paica ñucanchij shunguta, ñucanchij yuyaitapishmi alli rijsin (Hebreos 4:13). Chaimantami Jehová Diosca alli ricushpa, alli juzgashpa pitapish perdonan. w22.06 pág. 4 párrs. 8, 9

Diabloca ima shinami Jobta juchachirca, ñucanchijtapishmi chashnallataj juchachin. Diabloca ñucanchijcuna Jehová Diosta shungumanta mana cꞌuyashcatami nicurca. Shinallataj, “runaca paipaj causaita quishpichingapajmi Diosta sirvinataca saquinga” nishpami juchachirca. Ashtahuancarin “Diosca cancunataca mana cꞌuyanchu. Allita rurajpipish paica mana valichingachu” nishpami desanimachisha nin. Pero Jehová Diospi tucui shunguhuan confiashpaca Diablo nishca llullacunataca manataj crishunchu. Jobca llaquicunata chꞌimbapurashpami imapi mejorana cashcata cuentata curca. Por ejemplo, paica humilde cana cashcatami yacharca (Job 42:3). Ñucanchijpish llaquicunata chꞌimbapurashpami imapi mejorana cashcata cuentata cushun. Imapi fallacushcata cuentata cushpaca mejorangapajmi esforzarina canchij. w22.06 págs. 23, 24 párrs. 13, 14

¿Jehová Dios ñucanchijta apoyacushcataca ima shinataj yachanchij? Jehová Diosca ñucanchijtaca: “Yacuta chꞌimbacujpipish ñucami canhuan casha. Jatun yacucunata chꞌimbacushpapish, mana millpuringuichu. Nina jahuata pasashpapish, mana rupanguichu. Lunyacuj ninapish, canpica mana japiringachu” ninmi (Isaías 43:2). Caipi nishca shinaca predicacushpaca, maipica yacuta chꞌimbacuj shina o nina jahuata pasacuj shinami chꞌican chꞌican jarcaicunata charinchij. Pero Jehová Dios ayudajpimi predicashpa catinchij (Isaías 41:13). Cai tiempopi gentecunaca mana uyasha nincunachu. Pero mana uyasha nijpipish ñucanchijcuna mana alli predicajcuna cashcataca mana yuyanachu canchij. Ashtahuanpish predicashpa catishcamanta Jehová Dios cushilla cashcata yachashpaca achcatami animarinchij. Apóstol Pabloca: ‘Imata rurashcamantaca cada unomi japina cashcata japingacuna’ nircami (1 Corintios 3:8; 4:​1, 2). w22.11 pág. 4 párrs. 5, 6

Cunan punllacunapica tucui llajtacunamanta achca gentecunaca Diospaj Gobiernomanta, Diosmantapish yachai tucushcacuna. Caicuna ima shina pajtaricushcata ricushpaca achcatami cushiyarinchij (Zacarías 8:23; Sofonías 3:9). Jesuspaj ayudahuanmi 240 llajtacunapica 8 millón yalli Testigocuna canchij. Shinallataj cada huatami huaranga huaranga gentecuna bautizarishpa caticuncuna. Cai mushuj huauqui panicunaca Dios cushca mushuj causaitami chari callarishcacuna (Colosenses 3:​8-10). Chaimantami paicunaca huainayanata, pꞌiñarinata shujtajcunata llaquichinata saquishcacuna. Isaías 2:​4-pi nishca shinaca chai huauqui panicunaca shujtajcunahuan macanacunatami saquishcacuna. Chashna alli cualidadcunata charishpaca shujtajcunapish Jehová Diosta sirvichunmi ayudancuna. Ñucanchijta pushaj Jesucristotapish caticushcatami ricuchincuna (Juan 13:35). w22.07 págs. 9, 10 párrs. 7, 8

Jehová Diosca poderoso, jatunmi can. Chaimantami paitaca maipish cachunca mana mañana canchij. Ashtahuanpish paitaca respetohuanmi mañana canchij. Isaías, Ezequiel, Daniel y apóstol Juan muscuipi shina ima ricushcapi yuyashun. Isaiasca Jehová Diostaca “sumaj jatun tiyanapi tiyacujtami” ricurca (Isaías 6:​1-3). Ezequielpish jahua pachapi shuj jatun carropi shina Jehová Dios tiyacujta, Diospaj muyundijpipish shuj achij nicuj cuichi shina tiyacujtami ricurca (Ezequiel 1:​26-28). Shinallataj Danielpish ‘uni huatacunayuj yuyajtami’ ricurca. Paipaj churanaca rasu shina yuraj nicuj cashcata, paipaj jatun tiyanapish lunyacuj nina shina cashcatami ricurca (Daniel 7:​9, 10). Y apóstol Juanpish Jehová Diospaj “jatun tiyarina muyundijpica esmeralda rumiman rijchaj cuichi” tiyacushcatami ricurca (Apocalipsis 4:​2-4). Jehová Dios poderoso cashcamanta, jatun cashcamantami Jehová Diostaca respetohuan mañana cashcataca yuyaipi charina canchij. w22.07 págs. 20, 21 párr. 3

Satanasca jovencunataca Jehová Diospajman ashtahuan cꞌuchuyachun, espiritualmente sinchi cachunca mana munanchu. Chaimantami Bibliapi yachachishcacuna mana verdad cashcata crichun munan. Por ejemplo, maijancunaca evolucionpi crichunmi animangacuna. Huahuaraj cashpaca evolucionpica manachari crircangui. Pero cunanca escuelapi o colegiopimi evolucionmanta parlashpaca ciertotaj cashca shina yachachin. Chashna yachachishcamantachari canpish dudai callarishcangui. Paicunaca Dios tiyashcata yachangapajca mana nunca estudiashcacunachu. Proverbios 18:​17-pica: “Alli llujshingapaj punta huillajca, mana llullashca shinami ricurin. Ashtahuanpish paihuan pꞌiñanacuj shamushpaca, llullacushcata ricuchinllami” ninmi. Chaimantami escuelapi o colegiopi yachachishcacunata crinapaj randica Diospaj Shimita alli estudiana cangui. Shinallataj publicacioncunatapishmi alli investigana cangui. w22.08 págs. 2, 4 párrs. 2, 8

Bibliata liyicushpaca chaipi ima nishcatami alli intindina canchij. Chaita mana rurashpaca Bibliapaj nishcacunamantaca mana beneficiarishunchu. Moisespaj Leyta yachachij shuj runa Jesushuan imata parlashcata ricushunchij (Lucas 10:​25-29). Chai runaca huiñai causaita charingapaj imata rurana cashcatami Jesusta tapurca. Chaimi Jesusca: “¿Moisesman cushca leypica imataj quillcashca tiyacun? ¿Chaipica imatataj liyishcangui?” nishpa tapurca. Chai runaca: “Yayitu Diostami cꞌuyana cani, shujtajcunatapishmi cꞌuyana cani” nishpami cutichirca (Levítico 19:18; Deuteronomio 6:5). Pero qꞌuipaca: “¿Pi shujtajcunatataj cꞌuyana cani?” nishpami tapurca. Cai shimicunahuanmi chai runaca Bibliapi imata liyishcata mana intindishcata ricuchirca. Chaimantami paica Bibliapi nishcacunataca mana pajtachi tucurca. Diospaj Shimita alli intindingapajca Bibliata manaraj liyishpami Yayitu Diosta mañana canchij. Chaita rurajpica Yayitu Diosllatajmi paipaj espíritu santota cushpa alli concentrarichun ayudanga. Chaipajca cai liyishcacunata ñucanchij causaipi pajtachingapajpish ayudachunmi Yayitu Diosta mañana canchij. w23.02 pág. 9 párrs. 4, 5

Huauqui panicunahuan parlashpaca maipica paicunataca: “¿Ima shinataj Bibliamanta yachai callarircangui?” nishpami tapunchij. Huauqui panicuna Bibliamanta ima shina yachai callarishcata, Jehová Diosta ima shina rijsi callarishcata parlajpica paicunataca contentosmi uyanchij. Ñucanchijpish Bibliata ima shina rijsi callarishcatami parlanata munanchij (Romanos 1:11). Chashna huauqui panicunahuan parlanacushpaca testigo de Jehová cana valishca cashcatami yuyarinchij. Shinallataj Diosta cushichingapaj, paipaj bendicionta chasquingapaj esforzarina cashcatapishmi yuyarinchij. Bibliapaj yachachishcacunata rijsishcamantami Jehová Diostaca cꞌuyai callarircanchij. Chaimantami chai yachachishcacunataca achcata valoranchij. Por ejemplo, Bibliapica cai pachatapish, jahua pachatapish Jehová Dios rurashcatami yacharcanchij. Shinallataj Jehová Dios ñucanchijmanta preocuparij cashcatapishmi yachashcanchij (1 Pedro 5:7). w22.08 págs. 14, 15 párrs. 1, 3

Apóstol Pabloca shujtajcunata ayudashpa cꞌuyaita ricuchichunmi animarca (Hebreos 10:24). Pablopish shujtajcunamanca alli ejemplotami curca. Por ejemplo, Judeapi caj huauqui panicuna micunata mana charijpica Pablomi shujtaj huauqui panicuna cushca ayudata aparca (Hechos 11:​27-30). Shinallataj Pabloca shujtajcunaman yachachishpa ocupado cashpapish pobre huauqui panicunata ayudangapajmi listo carca. Chashna ayudajpica huauqui panicunaca Jehová Dios paicunata cuidacushcatami cuentata curcacuna. Cunan punllacunapish ñucanchij tiempohuan, ñucanchij fuerzahuan, ñucanchij yachashcacunahuanmi huauqui panicunataca ayudai tucunchij. Shinallataj labores de socorropi ayudanaman rishpa, obra mundialman cullquita cushpaca shujtaj huauqui panicunatapishmi ayudai tucunchij. Huauqui panicunata chashna ayudajpica paicunaca Jehová Dios siempre cuidanapimi confiangacuna. w22.08 pág. 24 párr. 14

Bibliapi tiyaj huaquin profeciacunataca pajtarinapaj achca huatacuna faltajpimi ña quillcashcacuna carca y tiempo qꞌuipaca chai tucui profeciacunami pajtarirca. Jehová Diosllataj chai profeciacunata quillcachishcamantami chashna pajtarirca. Babilonia jatun llajtamanta Bibliapi imata huillashcata yuyarishun. Babilonia llajta tucurinapaj 200 huatacuna yalli faltajpimi Jehová Diosca profeta Isaiastaca Babilonia llajta tucuchishca cana cashcata quillcachirca. Isaiasca mandaj Ciro chashna tucuchina cashcata, ima shina chaita rurana cashcatapishmi huillarca (Isaías 44:​27–45:2). Qꞌuipapish Isaiasca Babilonia llajta rumi montonlla saquirina cashcata, chaipi pi mana ña causana cashcatapishmi huillarca (Isaías 13:​19, 20). Jesús manaraj huacharijpi huata 539-pica medocuna y persacunaca tucui Babilonia llajtatami tucuchircacuna. Cunan punllacunapicarin chai llajtaca rumi montonllami saquirishca. w23.01 págs. 4, 5 párr. 10

Jehová Diosca ñucanchijtaca paipaj pueblo ucumanmi pushamushca. Chaimantami ñucanchijca achca bendicioncunata charishcanchij (Marcos10:​29, 30). Cai muyundij Allpapica achca huauqui panicunaca Jehová Diostami cꞌuyancuna, pai mandashcacunatapish cazungapajmi esforzarincuna. Ñucanchij huauqui panicuna shujtaj shimita parlajpipish, shujtaj llajtamanta cajpipish, shujtaj laya churarijpipish paicunata rijsishpaca cushillami sintirinchij. Shinallataj tandallami paicunahuan Yayitu Diosta adoranchij. Ñucanchij huauqui panicunahuanca allimi apanacuna canchij (Salmo 133:1). Paicunami llaqui horaspica ñucanchij ñaupajman catichun ayudancuna (Romanos 15:1; Gálatas 6:2). Shinallataj Jehová Diosta sirvishpa catichun, espiritualmente sinchi cachunmi animancuna (Hebreos 10:​23-25). Diabloca ñallami millai gentecunahuan Diospaj pueblota llaquichinga. Chai tiempopi huauqui panicunahuan mana apanacunaca llaquimi caiman. w22.09 págs. 2, 3 párrs. 3, 4

Ñucanchijca mana jarcarishpaca redes socialespichari ima mana huillana cashcata churashun. Chaicunataca achcacunami ricunga. Paicunaca shujtajcunamanpishmi chaicunata cachangacuna. Chaicunata rurashcamantami achcacunata llaquichishun. Cutin huaquin llajtacunapica autoridadcunaca Testigocuna ama predicachun, ama tandanacuchunmi jarcancuna. Chaipica ñucanchij contracunaca huauqui panicunamanta imatapish huillachunmi ningacuna. Pero ñucanchij upalla saquirishpaca jarcarijcuna cashcatami ricuchishun. Salmota quillcaj runapish chashnallatajmi nirca. Paica: “Ñuca shimipi frenota churashpami jarcarisha” nircami (Salmo 39:1). Ñucanchijpish imata ama parlangapaj jarcarijcuna cajpica ñucanchij familiacuna, amigocuna, huauqui panicuna, shujtaj gentecunapish ñucanchijpimi confiangacuna. w22.09 pág. 13 párr. 16

Cushilla causangapajca espiritualmentemi alimentarina canchij. Jesucristoca: “Runaca mana tandallahuan causanchu. Ashtahuanpish Jehová Dios rimashca shimicunahuanmi causan” nircami (Mateo 4:4). Chaimantami alli alimentarij shina cada punlla Bibliataca alli estudiana canchij. Jehová Diosca ñucanchijta cꞌuyashcamantami contento causangapaj imallata rurana cashcataca Bibliapi yachachin. Por ejemplo, ñucanchijcuna imapaj causashcata, paipaj amigos tucungapaj imallata rurana cashcata, ñucanchij juchacunata pai perdonachun imata rurana cashcatapishmi yachachin. Ashtahuancarin paica shamuj punllacunapi alaja causaita cunatami yachachin (Jeremías 29:11). Caicunamanta yachashpami de verastij cushilla sintirinchij. Llaquicunata charishpacarin ashtahuanmi Bibliata estudiana canchij, estudiashcapipishmi yuyana canchij. w22.10 págs. 6, 7 párrs. 4-6

Bibliapica huahuacuna shina ama cachunmi animan. Chaipajca Biblia yachachishcacunatami pajtachina canchij. Chashnami alli desicioncunata agllashun. Llaquicunapipish mana urmashunchu. Can imapi mejorana cashcapi yuyai. Por ejemplo, can ña achca tiempota Bibliata estudiashpapish, tandanacuicunaman rishpapish, ¿imamantataj manaraj Jehová Diosman mingarishcangui, manaraj bautizarishcangui? ¿O ña bautizado cashpaca ashtahuan alli predicangapaj, ashtahuan alli yachachingapajchu esforzarishcangui? ¿Imata decidingapajca Bibliapi tiyaj yachachishcacunata pajtachicunguichu? ¿Jesús shinallataj shujtajcunata alli tratangapajchu esforzaricungui? Imapi mejorana cashcata cuentata cushpaca Jehová Dios nishcacunata pajtachingapajmi esforzarina canchij. Chashnami alli yachajcuna tucushun (Salmo 19:7). w22.10 pág. 20 párr. 8

Ezequielca Jehová Dios paipaj espíritu santohuan achca poderta charij angelcunata ayudashcata, shuj jatun carropaj ruedacunata pushacushcatapishmi ricurca (Ezequiel 1:21). Chaita ricushpaca Ezequielca mancharishcami saquirirca. Chaimantami paica ñahui pambaman tupajta cumurirca (Ezequiel 1:28). Ezequielca imata ricushcata yuyarishpaca paipish Diospaj espíritu santohuan tucuita pajtachi tucushcatami yuyarij carca. Jehová Diosca Ezequieltaca: “Huañujlla aichayuj runalla, jatarishpa shayari, canhuanmi parlasha nini” nishpami mandarca. Chashna nishcahuanmi Diospaj espíritu santoca Ezequielmanca fuerzasta curca (Ezequiel 2:​1, 2). Qꞌuipaca Jehová Diosca paipaj maquita Ezequielpaj jahuapi churaj shinami paipaj espíritu santohuan pusharca (Ezequiel 3:22; 8:1; 33:22; 37:1; 40:1). w22.11 pág. 4 párrs. 7, 8

Cai punllapaj versopica Isaiasca Jehová Dios ñucanchij huashamanta yachachicujtami nirca. Jehová Diosca ñucanchijcuna alli ñanta purichunmi ñucanchij huashamanta yachachicuj shina can. Cunan tiempopica Bibliata liyishpaca paita uyacuj shinami canchij. Bibliapica ñaupa tiempopi quillcashca alaja yuyaicunami tiyacun. Chaicunata liyijpica Jehová Diosca ñucanchijpaj huashamanta yachachicuj shinami can (Isaías 51:4). ¿Cai versopi ima nishcataca ima shinataj pajtachina canchij? Dios ricuchishca ñanpi puricuj shinami pai yachachishcacunata pajtachina canchij. Bibliapi, Diospaj organización cushca publicacioncunapipish Jehová Dios imata rurachun munashcata, chaicunata ima shina pajtachinatami yachanchij. Caicunata rurashpaca llaquicunataca cushicuihuanmi ahuantashun, Jehová Dios ñucanchijta bendicianatapishmi seguros cashun. w22.11 págs. 10, 11 párrs. 10, 11

Casi tucui apostolcuna huañushca huashallami congregacionpica panda yachachijcuna tiyai callarirca (Mateo 13:​24-27, 37-39). Paicunaca llullacunata yachachishpa Jesusta catijcunata caruyachishpami paicunahuan pusharcacuna (Hechos 20:30). Por ejemplo, chai panda yachachijcunaca Cristo achcacunapaj juchacunata apangapaj shuj cutinlla huañushcataca mana yachachircacunachu, chaipaj randica Jesús cutin cutin huañuna cashcatami yachachi callarircacuna (Hebreos 9:​27, 28). Cunan punllacunapish achca gentecunaca chai panda yachachishcacunatami crishpa catincuna. Por ejemplo, huaquincunaca cada semana o tucui punllacuna iglesiaman rishpaca comunión o eucaristía nishcata japinamanmi rincuna. Shujtaj religioncunapica Jesús huañushcata yuyarina tandanacuita mana cada punlla rurashpapish, chaipi cajcunamanca Jesús imamanta huañushcataca mana yachachincunachu. w23.01 pág. 21 párr. 5

Jesusca cai Allpapi 1.000 huatacunata mandacushpami achca huañushca gentecunata causachinga. Shinallataj Jesusca cazuj gentecunatami jucha illaj cachun ayudanga. Pero cazuj gentecunallami Paraíso Allpapi huiñaipaj causai tucungacuna (Salmo 37:​10, 11, 29). Chai tiempopica tucui pꞌiñajcunamantaca huañuimi ultimopica tucuchishca canga. Chaica dimastij sumajmi canga (1 Corintios 15:26). Ñucanchijca mana yangallamantachu esperanzata charinchij. Ashtahuanpish Jehová Dios yachachishcacunata Bibliapi ricushpami chai esperanzata charinchij. Cai esperanzata charishcamantami cai sinchi tucuri punllacunapi tucui llaquicunata ahuantai tucunchij. Pero ñucanchij causaita quishpichingaraicullaca mana tucuita ahuantanchijchu. Ashtahuanpish Jehová Diosta, Jesusta cꞌuyashcamantami tucui llaquicunata ahuantacunchij (2 Corintios 5:​14, 15). Shinallataj Diospaj ejemplota catishpami tucuicunaman cushicuihuan huillacunchij (Romanos 10:​13-15). Shujtajcunamanta ashtahuan preocuparijpi, paicunata tucuipi ayudangapaj esforzarijpica Jehová Diosca huiñaipaj ñucanchij amigo canatami munanga. w22.12 pág. 7 párrs. 15, 16

Diospaj contracuna ñucanchijta catirashpa llaquichijpica llaquillami sintirinchij. Carcelman apanata yuyashpacarin preocupadosmi sintirinchij. Chashna sintirinaca mana juchachu can. Shinapish Jesús nishca shinaca ñucanchij feta ama chiriyachingapajmi cuidarina canchij (Juan 16:​1, 2). Jesucristoca contracuna catirashpa llaquichijpipish ñucanchijcuna tucuita ahuantai tucunatami huillarca (Juan 15:20; 16:33). Ñucanchijcuna predicachun, tandanacuchun jarcajpica sucursalpi trabajaj huauquicuna, ancianocunapish ñucanchijta cuidangapajmi instruccioncunata cungacuna. Diosmanta yachashpa catichun, predicashpa catichunpish imallata rurai tucushcatami huillangacuna. Chai instruccioncunata cazungapajmi esforzarina canchij (Santiago 3:17). Ashtahuancarin ñucanchij huauqui panicunamantapish mana huillana informaciontaca mana cunallachu canchij (Eclesiastés 3:7). w22.12 págs. 20, 21 párrs. 14-16

Jesusca pai ari nishcata pajtachicushcamantami Diospaj Gobiernomanta cai tucui Allpapi huillachun ayudacushca. Chaipajca Yayitu Diospaj organizacionhuanmi ima shina predicanata yachachicushca. Predicangapajpish achca herramientacunatami cucushca (Mateo 28:​18-20). Chaimantami ñucanchijcunaca cai millai mundo manaraj tucurijpiraj gentecunata predicashpa, predicangapajpish alli prepararishpa, tucuita alli yuyashpa causana canchij. Hebreos 6:​11, 12-pi ima nishcata pajtachishpacarin ñucanchij shuyacushca pajtarinataca tucuringacama tucui shunguhuanmi shuyashun (Hebreos 6:​11, 12). Jehová Diosca cai millai mundota ima punlla tucuchinataca ñami agllashcata charin. Chai punlla chayajpica Bibliapi tucui ima nishcatami pajtachinga. Ñucanchijpajca Diospaj punllaca dimastij demoracuj layachari ricurin (Habacuc 2:3). Shinapish chai punllaca manataj uniyangachu. Chaimantami ñucanchijca Miqueas 7:​7-pi ima nishcata pajtachina munaihuan cana canchij. Chaipica: “Ñucaca Mandaj Diostami chapasha. Ñucata quishpichij Taita Diostami shuyasha” ninmi. w23.02 pág. 19 párrs. 15, 16

Shuj runaca urcu puntacama chayanatachari munan. Shinapish alaja pushtucunata ricungapajca asha asha shayarishpami rina can. Chai shinallatajmi ñucanchijpish llaquicunata chari horas asha asha shayaricuj shina, Jehová Dios ñucanchijta ima shina bendiciacushcata ricuna canchij. Chaimanta llaquicunata charishpapish, “¿cai punllapica Jehová Diosca ima shinataj ñucata bendiciashca? ¿Chai llaquicunata ahuantashpa catichunca ima shinataj ñucata ayudacun?” nishpami tapurina canchij. Jehová Dios cada punlla ima shina bendiciacushcata ama cungaringapajmi esforzarina canchij. Jehová Diosta pruebacunata tucuchichun mañanaca allimi can (Filipenses 4:6). Shinapish llaquicunata chari horasca Jehová Dios ñucanchijta ima shina ayudacushcatami alli ricuna canchij. Jehová Diosca llaquicunata ahuantashpa catichunca fuerzastami cusha nin. Chashna ayudashcamanta paita pagui nishunchij. Shinami Jehová Dios ñucanchijta ayudacushcata manataj cungarishun (Génesis 41:​51, 52). w23.01 pág. 19 párrs. 17, 18

Cashna nishpa tapurishunchij: “¿Ñucaca chai yuyaillachu causacuni? ¿Ñuca estudiocunatapish yalli, ñuca trabajotapish yalli ñucapajca Jehová Dioschu ashtahuan importante can? ¿Jehová Dios ñuca familiata cuidanapichu confiani?”. Jehová Dios munashca shina causangapaj esforzarijpica paica dimastij cushillami sintiringa (Mateo 6:​25-27, 33; Filipenses 4:​12, 13). Ñucanchijca imata yuyacushcata, imata munacushcataca punllantami ricurana canchij. Chashnami imapi mejorana cashcata yachashpaca mejorangapaj esforzarishun. Corinto llajtapi causaj huauqui panicunataca apóstol Pabloca: “Cancunapaj fe sinchi cashcata yachangapaj cancunallataj alli ricurashpa catichij. Allita ruracushcatapish ricurashpa catichij” nircami (2 Corintios 13:5). Ñucanchij yuyaicunata, ñucanchij munaicunatami mushujyachishpa catingapajca punllanta Diospaj Shimita liyina, estudiana canchij. Imapi fallacushcata ricushpacarin cambiangapajpishmi esforzarina canchij (1 Corintios 2:​14-16). w23.01 págs. 9, 10 párrs. 5, 6