Octubre

Tucuicunami tandanacuipica cantashpa, alli comentariocunata cushpa Jehová Diosta alabai tucunchij. Huaquincunapajca comentariota cuna, cantanaca sinchimi cashca. Canpish chashna sintirishca cajpica huaquin huauqui panicuna ama manchashpa cantangapaj, comentangapaj imata rurashcata ricushun. Shungumanta cushicushpa cantashunchij. Tandanacuicunapi cantashpaca Jehová Diostami alabanchij. Chaimantami tandanacuicunapaj prepararicushpaca cantocunata ima shina cantanata alli practicana canchij. Cantocunamanta imata yachai tucushcatapish alli ricushunchij. Tandanacuicunapi comentashunchij. Huaquin huauqui panicunapajca tandanacuicunapi comentanaca sinchimi cashca. Pero manchaita charishpapish tandanacuicunapi comentangapajca allimi prepararin. Parrafopaj callari comentariota cucushpaca respuestallata ashalla shimicunapi cungapajmi esforzarin. Chashna sintirishpapish shungumanta comentashcata Jehová Dios valorashcatami yuyarina canchij. Jehová Diosca paita alabangapaj tucui pudishcata rurachunmi munan. w22.04 págs. 7, 8 párrs. 12-15

Cai versomanta parlashpaca huaquin diccionariocunapica: “Pi ayudata mañajpi chai rato volashpa ayudanaman chayajtami nisha nin” nincunami. Caipi nishca shinaca Jehová Diosmi volashpa ñucanchijta ayudanaman shamun, paica ñucanchijtaca shungumantami ayudasha nin. Chaimantami Jehová Dios ñucanchijhuan cajpica tucui laya llaquicunata ahuantai tucushun. ¿Jehová Diosca ima shinataj ñucanchijta ayudan? Isaías libropimi caita yachai tucunchij. Isaías libropi tiyaj nishcacunaca cunan punllacunapimi ñucanchijta ayudan. Chai libropica Jehová Dios ima shina cashcataca intindirinalla shimicunahuanmi yachachin. Por ejemplo, capítulo 30-pica Jehová Dios paipaj pueblota ima shina ayudashcata yachachingapajca alaja chꞌimbapuraicunatami churan. Chai capitulopica Jehová Dios ñucanchij mañashcacunata alli uyaj, cutichij cashcata, ñucanchijman yachachij cashcata, bendiciaj cashcatapishmi yachachin. w22.11 págs. 8, 9 párrs. 2, 3

Jesusca Esmirna y Filadelfia congregacioncunamanca: ‘Llaquita apanataca ama manchaichijchu. Cancuna ahuantajpica Diosmi cancunata bendicianga’ nircami (Apocalipsis 3:10). Ñucanchijtapish contracunaca catirashpami llaquichinga. Chashna llaquichijpipish ahuantanami canchij (Mateo 24:​9, 13; 2 Corintios 12:10). Apocalipsis libropica cunan punllacunapi Diosta sirvijcunata catirashpa llaquichinatami parlan (Apocalipsis 1:10). Capítulo 12-pica jahua pachapi Diospaj Gobierno mandai callarijpi shuj jatun guerra tiyashcatami parlan. Miguelca paipaj angelcunandijmi Diablohuan, paipaj demoniocunahuanpish macanacurcacuna. Miguelca Jesucristomi can (Apocalipsis 12:​7, 8). Chai macanacuipica Jesucristoca Diablotapish, demoniocunatapish jahua pachamantami cai Allpaman shitarca. Chaimantami cai Allpapi causaj gentecunaca achcata sufricushcacuna (Apocalipsis 12:​9, 12). w22.05 pág. 5 párrs. 12, 13

Jehová Diosca tucuicunatami alli juzgan. Ñahuita ricushpallaca mana juzganchu. Diosca charijcunata, pobrecunata, yachajcunatapish, tucuicunatami igual juzgan (1 Samuel 16:7; Santiago 2:​1-4). Jehová Diostaca ñucanchijta perdonachunca mana obligai tucunchijchu, cullquitapish mana cui tucunchijchu. Paica pꞌiñarishpallaca pita mana juzganchu. Ashtahuanpish perdonana cashpaca perdonanmi. Mana cashpaca castiganmi (Éxodo 34:7). Jehová Diosca ñucanchijta alli rijsishcamantami alli juzgai tucun (Deuteronomio 32:4). Antiguo Testamentopica Jehová Dios shina perdonaj ni pi mana tiyashcatami intindichin. Shuj libropica: ‘Antiguo Testamentotaca hebreo rimaipimi quillcashca carca. Chai shimipica Dios perdonanamanta parlacushpaca, Jehová Dioslla tucui ñucanchij juchacunata perdonai tucushcatami nisha nirca. Cutin runacunaca mana tucui juchacunata perdonai tucunchijchu’ ninmi. Caipi nishca shinaca Jehová Diosllami arrepintirijpica tucui ñucanchij juchacunata perdonai tucun. w22.06 págs. 4, 5 párrs. 10, 11

Canlla huahuacunata huiñachicushpapish, mana cashpaca Diosta mana sirvij cusata charishpapish, cambaj alli ejemplo shujtajcunata sinchiyachinatami yuyarina cangui. Can Diospaj Shimita yachachingapaj tucui esfuerzota rurajpipish, ¿cambaj huahua Jehová Diosta mana sirvisha nijpica imatataj rurana cangui? Huahuata alli huiñachingapajca tiempomi minishtirin. Canca shuj muyuta tarpushpaca “¿cai muyumantaca granungachu o manachu granunga?” nishpachari tapuringui. Mana yachashpapish huiñachunmi yacuta regashpa, cuidashpa catingui (Marcos 4:​26-29). Canpish mama cashcamantami “¿ñuca yachachishcaca ñuca huahuapaj shungumanca chayanchu o manachu chayan?” nishpa tapuringui. Mana yachashpapish cambaj huahuaman Diospaj Shimita yachachishpami tucuita rurangui. Chashna yachachishpa catishcamantami cambaj huahua Diospaj amigo tucuchun ayudangui. w22.04 págs. 19, 20 párrs. 16, 17

Salomonca Jehová Diosta sirvishpaca mana jatun tucurcachu. Paica jovenraj cashpaca pailla imatapish mana rurai tucushcataca allimi intindirca. Chaimantami Jehová Diostaca paiman yachaita cuchun, paita ayudachun mañarca (1 Reyes 3:​7-9). Shinallataj Salomonca mandai callarishpaca jatun tucunamanta cuidarina cashcatami intindirca. Pero qꞌuipaca paillatajmi cai consejotaca mana pajtachirca. Ña Salomonca huaquin huatacunata mandacushpaca jatun tucushpami Yayitu Diosta mana cazui callarirca. Por ejemplo, leypica reycunataca: “Taita Diosmanta paipaj shunguta ama anchuchingapajca chai jatun mandajca mana achca huarmicunata charinachu can” nishpami mandashca carca (Deuteronomio 17:17). Pero Salomonca caita mana cazushpami 1.000 huarmicunata charirca (1 Reyes 11:​1-3). Salomonca “Diosta mana cazushpapish mana ima tucushachu” nishpachari yuyashcanga. Shinapish Diosmanta caruyashcamantami achca llaquicunapi urmarca (1 Reyes 11:​9-13). w22.05 págs. 23, 24 párr. 12

Cunan punllacunapica gentecunaca Jehová Diospaj lado tucunata o millai Diablopaj lado tucunatami agllana can. Ishquindijpaj ladoca mana cai tucunchijchu. Diospaj lado tucushpaca huiñai causaitami charishun (Mateo 25:​31-33, 46). Jatun llaqui punllacunapica Diosca paipaj lado cajcunata quishpichingapajmi shuj señalta churanga. Cutin paipaj contracunata tucuchingapajca shujtaj señaltami churanga (Apocalipsis 7:14; 14:​9-11; Ezequiel 9:​4, 6). Jehová Diospaj Gobiernota apoyashpaca shuj alli decisiontami agllashcangui. Cunanca shujtajcunapish chaita agllachunmi ayudai tucungui. Diospaj Gobiernota apoyajcunaca bendicioncunatami charingacuna. Apocalipsis librota yachacushpami Jehová Diosta tucui shunguhuan sirvishpa catishun. Shinallataj shujtajcunapish Jehová Diosta sirvichun, Diosta ama saquichunmi ayudashun. w22.05 pág. 15 párrs. 1, 2

Ñucanchij contracunata uyanapaj randica Jehová Diostami uyana canchij. Jobca caitami pajtachirca. Jehová Diosca Jobtaca: “Canhuan ima tucushcataca allimi yachani. ¿Manachu ñuca canta ayudai tucushcata cringui?” nircami. Chashna sinchiyachijpica Jobca Diostaca achcatami agradicirca. Chaimantami Jobca: “Ñucaca parlashcallatami canmanta uyarcani. Cunanmi cantaca ñuca quiquin ñahuihuantaj ricuni” nirca (Job 42:5). Pero Jobca cashna nicushpaca chairaj ungüihuan, ushpa jahuapimi tiyacurca. Chashna cajpica Jehová Diosca paita cꞌuyashcata, paita ayudanata crichunmi ayudarca (Job 42:​7, 8). Maipica gentecunaca ñucanchijtami riman, imapaj mana valij shinami tratan. Huaquinpicarin Diospaj organizacionmanta, ñucanchijmantapishmi llullacunata nincuna. Pero chashna llaquichisha nijpipish, Jehová Diosca ñucanchijcuna paita sirvishpa catinatami confian. w22.06 págs. 24, 25 párrs. 15, 16

Babilonia Jatun llajta tucurijpipish jahua pachapica achca cushicuimi tiyanga (Apocalipsis 19:​1-3). Pero Malta Ovejapaj boda tiyajpicarin jahua pachapica ashtahuan cushillami cangacuna. Apocalipsis libropica cai valishca profeciamantami huillan. Armagedón macanacui manaraj callarijpimi tucui 144.000 agllashcacunaca jahua pachapi cangacuna. Shinapish chai tiempopica Malta Ovejapaj bodaca manaraj callaringachu (Apocalipsis 21:​1, 2). Ashtahuanpish Armagedón macanacui tucurishca qꞌuipa, Diospaj tucui contracunata tucuchishca huashami cai bodaca callaringa (Salmo 45:​3, 4, 13-17). ¿Malta Ovejapaj bodapica imataj tucunga? Ima shinami shuj bodapica shuj cꞌaripish, shuj huarmipish shuj shinalla tucun. Chashnallatajmi Ovejapaj bodapica Jesuspish, 144.000 ungidocunapish shuj shinalla tucushpa shuj mushuj gobierno tucungacuna. Chai gobiernoca 1.000 huatacunatami jahua pachamanta cai Allpata mandanga (Apocalipsis 20:6). w22.05 pág. 17 párrs. 11-13

Jesusca cai tucuri punllacunapi ñucanchijman yachachichunca alli cazuj, alli yuyaiyuj sirvij huauquicunatami agllashca (Mateo 24:45). Cai huauquicunaca agllashca ungidocunapuramantami ashallacuna can. Paicunaca Diosta sirvijcunaman, Diosmanta yachasha nijcunamanpishmi yachachishpa caticuncuna. Cai huauquicunaca ñucanchijta mandajcuna, amocuna shinaca mana cancunachu (2 Corintios 1:24). Ashtahuanpish paicunaca Diospaj pueblota Jesucristo pushacushcatami alli intindincuna (Isaías 55:4). Alli cazuj, alli yuyaiyuj sirvij huauquicunaca 1919 huatamantami gentecuna Diosmanta yachachun achca librocunata llujchishcacuna. Por ejemplo, 1921-pica inglés shimipimi El Arpa de Dios nishca librota llujchircacuna. Tiempohuanca shujtaj librocunatapishmi llujchircacuna. w22.07 págs. 10, 11 párrs. 9, 10

Jehová Diosca tucuicunamanta yalli generosomi can. Can imata cujpipish paica cantaca ashtahuanmi tigrachinga (Marcos 10:​29, 30). Cai mundo tucurimucujpipish Yayitu Diosca canmanca alaja, cushilla causaitami cunga. Shinapish can bautizarinaca shuj ñanta puri callarij shinallami can. Jehová Diosca canmanca paita huiñaipaj sirvina oportunidadtami cucun. Paita huiñai huiñaita sirvinata agllashpaca canpish, paipish mana tucurij cꞌuyaihuanmi cꞌuyanacushpa catinguichij. Jehová Diosca can cushilla causachunmi achca bendicioncunata canman cushca. ¿Pai tucuita cushcamantaca paimanca imatataj cui tucungui? Jehová Diosca tucuita ruraj cashpapish cambaj causaita, cambaj cꞌuyaita paiman cuchunca mana obliganchu. Chaimantami Diosta cꞌuyashcamanta cambaj causaita paiman mingashpa bautizarinata decidina cangui. Ima laya jaica laya tucushpapish tucui vidami Diosta sirvinata agllana cangui (Job 1:8; 41:11; Proverbios 27:11). Chaita decidijpica Jehová Diosca achcatami cushiyaringa. w23.03 pág. 6 párrs. 16, 17

Jovenyajpica cꞌarihuan, huarmihuan siririna munaicunamanta jarcarinaca mana jahuallachu can. Maipica chashna mana allita rurachunmi obligasha ningacuna. Satanasca chai juchapi urmachunmi munan. ¿Chai juchapi ama urmangapajca imatataj rurana cangui? (1 Tesalonicenses 4:​3, 4). Jehová Diostami mañana cangui. Mañacushpaca can ima shina sintirishcatami tucuita parlana cangui. Chai juchapi ama urmangapaj, fuerzata charingapajpishmi mañana cangui (Mateo 6:13). Jehová Diosca canta perdonangapajca listomi can (Salmo 103:​13, 14). Mana jahualla cajpipish cambaj taita mamahuanmi parlana cangui. Bibliata liyishpa, Biblia yachachishcacunapi cutin cutin yuyashpaca alli decisioncunata agllashpami Jehová Diosta cushichingui. Jehová Dios imata yuyashcata intindishpacarin imata rurangapajpish mana shuj leyta minishtinguichu. Shinami espiritualmente sinchi cashcata ricuchingui. w22.08 págs. 4, 5 párrs. 10-12

Canca cambaj familiata mantiningapajmi achcata esforzaricungui. Chaimantachari familiata ima shina mantininamanta, arriendotapish ima shina paganamanta achcata preocuparishcangui. “¿Trabajo illaj saquirishpaca imatashi rurashayari?” nishpachari tapurishcangui. Mana cashpaca “menos cullquihuan causanaca sinchimi canga” nishpachari preocuparishcangui. Diabloca chashna manchaita charishcamanta Diosta sirvinata saquichunmi munan. Diabloca “ñucanchij familiata mantiningapajca Jehová Diosca manataj ayudangachu” nishpa yuyachunmi munan. Chaita crishpaca asha ashami Diosmanta caruyashun. Trabajotapish punta lugarpimi churai callarishun. w22.06 pág. 15 párrs. 5, 6

Jehová Diosca cꞌuyaj, llaquij, allita ruraj, pacienciata charij cashcatami yachashcanchij (Éxodo 34:6; Isaías 61:8). Ñucanchijcuna llaquicunata charijpica Jehová Diospish llaquillami sintirin. Chaimantami ñalla tucui llaquicunata tucuchinga (Jeremías 29:11). Caicunata yachashcamantami Jehová Diostaca achcata cꞌuyanchij. Bibliapaj yachachishcacunaca cushilla causachunmi ayudan. Chaimantami cai yachachishcacunataca achcata valoranchij. Por ejemplo, Bibliapica shamuj punllacunapi alaja causai tiyagrishcatami yachashcanchij. Chashna alaja causanataca cushicushpami shuyacunchij. Yuyashun, barcota charij fierroca, barcota huaira ama aparichunmi sinchita charin. Chashnallatajmi Dios cusha nishcacunata shuyashpaca Diospi sinchita crishun, llaquicunatapish ahuantashun. Apóstol Pabloca jahua pachaman rina esperanzata charijcunamanmi cai punllapaj versopi cai shimicunataca nirca. Pero apóstol Pablo nishcacunaca Paraíso Allpapi causana esperanzata charijcunapajpishmi can (Juan 3:16). Tucui ñucanchijcunaca huiñaita causana esperanzata charishcamantami cushilla causanchij. w22.08 págs. 14, 15 párrs. 3-5

1 Corintios capítulo 13-pica cꞌuyaita charina imamanta valishca cashcatami yachachin. Chai consejocunaca shujtajcunapi ashtahuan confiachun, llaquichijpipish paicunapi cutin tigra confiachunmi ayudanga (1 Corintios 13:​4-8). Por ejemplo, 1 Corintios 13:​4-pica: “Cꞌuyaita charijca pacienciata charijmi, llaquijmi” ninmi. Ñucanchijca Jehová Diospaj ñaupajpi ima juchata rurajpipish paica ñucanchijtaca pacienciahuanmi tratan. Chaimantami ñucanchijpish shujtajcuna paicunapaj shimicunahuan o ruraicunahuan ñucanchijta llaquichijpica, Yayitu Dios shina paicunataca pacienciahuan tratana canchij. Cutin verso 5-pica: ‘Cꞌuyaita charijca mana jahualla pꞌiñarinchu. Llaquichijpipish mana yuyaipi charicunllachu’ ninmi. Caipi nishca shinaca ñucanchij huauqui panicuna ñucanchijta llaquichijpipish chai llaquichishcacunataca mana yuyaricunallachu canchij. Shinallataj Eclesiastés 7:​9-pi nishca shinaca ñucanchijca mana utca pꞌiñarinachu canchij. Jehová Diosca gentecunapaj pandarishcataca mana yuyaricunllachu. Chashnallatajmi ñucanchijtapish pi llaquichijpica mana yuyaricunalla canchij. Chashnami huauqui panicunapica ashtahuan confiai tucushun (Salmo 130:3). Ñucanchijca paicunapaj pandarishcacunallataca mana ricunachu canchij. Chaipaj randica paicunapaj alli cualidadcunatami ricuna canchij (Mateo 7:​1-5). w22.09 págs 3, 4 párrs. 6, 7

Daniel libropica cai tucuri punllacunapi ima tucuna cashcatami yachachin. Por ejemplo, Daniel 12:​1-pica jatun mandaj Miguel o Jesucristomi ‘Diospaj pueblota cuidangapaj, pushangapaj jataringa’ nircami. Cai shimicunaca huata 1914-pimi Diospaj Gobiernopi Jesús mandai callarijpi pajtari callarirca. Shinallataj Danielca cai tucuri punllacunapi jatun llaqui tiyanatami parlarca. Chai tiempopica Jesucristoca Diospaj pueblota quishpichingapaj shamunatapishmi nirca. Daniel 12:​1-pi, Mateo 24:​21-pipish chai jatun llaqui punllacunallamantatajmi parlan. Chai jatun llaqui punllacuna tucurigrijpi Armagedón nishca macanacui tiyajpica, Jesusca Diospaj pueblota difindingapajmi shamunga. Armagedonmanta quishpirigrijcunataca Apocalipsis libropica: ‘Pi mana yupai tucuipaj achca gentecunami can’ ninmi (Apocalipsis 7:​9, 14). w22.09 pág. 21 párrs. 4, 5

Ñucanchij ima juchata rurajpica Yayitu Diosca ñucanchij shuticunatami borrai tucunlla (Apocalipsis 3:5). Chaimantami ñucanchij shuticuna esferohuan quillcashca laya cachun, Jehová Dios ama borrachunca Jehová Diosta punllanta sirvishpa catina canchij. Maijan grupocunaca causaita chasquinapaj libropimi cancuna. Shuj grupoca jahua pachapi Jesushuan mandangapaj agllashca ungidocunami can. Apóstol Pabloca Filipos llajtapi causaj ungidocunamanca ‘cancunapaj shuticunaca causaita chasquinapaj libropimi quillcashca can’ nircami (Filipenses 4:3). Pero paicunapaj shuticuna chai libromanta ama borrarichunca Yayitu Diostami huañuna horascama sirvishpa catina can. Chashnami paicuna huañugrishpa, o jatun llaqui punllacuna callarigrijpi paicunaca sellashca canga. Paicuna sellashca cajllapimi paicunapaj shuticunaca chai libromanta ña mana borraringa (Apocalipsis 7:3). w22.09 págs. 15, 16 párrs. 3, 5, 6

Cai ejemplopi yuyashun. Shuj amigoca can munashca micunatami caran. Pero canca tiempota mana charishcamanta, can charishca problemacunallapi yuyashcamantami chaitaca utca, mana mishquichishpalla micungui. Pero ña tucuchicushpaca “¿imamantataj mana gushtulla, mana mishquichishpalla micurcani?” nishpachari tapuringui. Chai shinallatajmi maipica Bibliataca apurado, mana gushtullata liyinchij. Pero chaita ruranapaj randica imata liyicushcapi yuyangapajmi tiempota surcuna canchij. Chashna Bibliata liyishpaca cushillami sintirishun. Jesusca espiritualmente micunata carachunca “alli cazuj, alli yuyaiyuj sirvij” huauquicunamanmi mingashca (Mateo 24:45). Paicuna rurashca publicacioncunapish, videocunapish Bibliamantami japishca can (1 Tesalonicenses 2:13). w22.10 págs. 7, 8 párrs. 6-8

Bibliapica tucuri punllacunapica achca burlarijcunami tiyanga ninmi (2 Pedro 3:​3, 4). Paicunaca Biblia yachachishcacunata pajtachijcunamantami burlarincuna, millaita rurashpami causancuna (Judas 7, 17, 18). ¿Chanzata rurajcuna shina ama cangapajca imatataj rurana canchij? Quejarijcunallahuanca mana tandanacunachu canchij (Salmo 1:1). Chaimantami apostatacunapaj nishcacunataca mana liyina canchij, mana uyana canchij. Chaicunamanta mana caruyashpaca Diospaj pueblota pushaj huauquicunamantami quejari callarishun. Jehová Dios paipaj pueblota pushacushcatapish ña mana crishunchu. Imapi mejorana cashcata yachangapajca cai catij tapuicunapimi yuyana canchij: “¿Diospaj organización mushuj instruccioncunata cujpica ratochu quejarini? ¿Pushaj huauquicunapaj pandarishcacunallatachu ricuni?”. Caicunata saquingapaj esforzarijpica Jehová Diosca cushillami sintiringa (Proverbios 3:​34, 35). w22.10 pág. 20 párrs. 9, 10

Ezequielca Diospaj espíritu santota chasquishcamantami rumi shungu gentecunaman predicai tucurca. Jehová Diosca Ezequieltaca: “Cambaj umataca, sinchi rumitapish yalli sinchi diamanteta shinami rurarcani. Paicunataca ama manchanguichu. Paicunapaj ñaupajpi cashpapish, ama mancharinguichu” nircami (Ezequiel 3:​8, 9). Chashna nishpaca Jehová Diosca Ezequieltaca: “Paicuna desanimachichun ama saquichu, ñaupajman cati” nishpami fuerzasta cucuj shina carca. Qꞌuipaca Jehová Diosca Ezequieltaca paipaj espíritu santohuanmi maipimi huillagrin pushtucunaman pusharca. Ezequielca ‘Mandaj Diosca paipaj maquihuanmi ñucataca sinchita charirashpa pusharca’ nircami. Chai huashaca Ezequielca Dios ima nishcata intindishpa ima shina huillanata yachacushpami shuj semanata pasarca (Ezequiel 3:​14, 15). Qꞌuipacarin Ezequielca shuj chaquishca pambapi cashpami espíritu santohuan junda carca (Ezequiel 3:​23, 24). Chaimi paica shujtajcunaman predicangapaj listo carca. w22.11 págs. 4, 5 párrs. 8, 9

Profeta Habacucca achca llaquicunatami charirca. Chaimantachari Habacucca Jehová Dios paimanta mana preocuparishcata yuyashcanga. Chaimi paica ima shina sintirishcataca Jehová Diosman tucuita huillarca. Chashna mañajpimi Jehová Diosca paita cutichirca (Habacuc 2:​2, 3). Qꞌuipaca Habacucca Jehová Dios paipaj pueblota ima shina quishpichishcata yuyarishpami cushilla, tranquilo sintirirca. Ashtahuancarin Jehová Dios paita cꞌuyashcata, paita ayudanatapishmi tucui shunguhuan crirca (Habacuc 3:​17-19). ¿Habacucmantaca imatataj yachai tucungui? Canpish llaquicunata charishpaca Jehová Diostami mañana cangui. Can ima shina sintirishcataca tucuitami huillana cangui. Pai canta ayudanapipishmi tucui shunguhuan confiana cangui. Jehová Diosca llaquicunata ahuantachunmi canmanca fuerzasta cunga. Dios canta chashna ayudashcata ricushpaca cambaj fetami sinchiyachingui. Jehová Diosta sirvinata mana saquishpaca, problemacuna ricurijpipish ima dudacunata mana charishpami Jehová Diosmanta manataj caruyangui (1 Timoteo 6:​6-8). w22.11 págs. 15, 16 párrs. 6, 7

Ishqui shuhuacunaca caspipi huarcushca cai horasmi achcata sufricurcacuna (Lucas 23:​32, 33). Paicunaca Jesusmantami burlaricurcacuna (Mateo 27:44; Marcos 15:32). Pero paicunapuramanta shujca arrepintirishpami Jesustaca: “Jesús, can ña mandaj cashpaca ñucata yuyaripangui” nircami. Chashna nijpimi Jesusca cai punllapaj versopi nishcata cutichirca (Lucas 23:​39-42). Jesús ima nishcata yachashpaca Paraíso Allpapi ima shina causagrishcapimi yuyana canchij. Chaita intindingapajca rey Salomón mandacui horas sumaj causai tiyashcapimi yuyarina canchij. Bibliapica: ‘Jesusca Salomontapish yallimari can’ nishpami yachachin. Chaimantami Jesuspish, paihuan mandagrijcunapish cai Allpata shuj Paraisota ruranata tucui shunguhuan crinchij (Mateo 12:42). Pero shujtaj ovejacunamanta Diosta sirvijcunapish Paraíso Allpapi causangapajca imata rurana cashcatami yachana cancuna (Juan 10:16). w22.12 págs. 8, 9 párrs. 1, 4

Jehová Diosca shungumantami ñucanchijta ayudasha nin. Caita yachashcamantami ima llaquicunata charishpapish cushicuihuan tucuita ahuantashpa catishun. Yayitu Diosca ñucanchij mañashcacunatami uyan. Chaimanta capítulo 30-paj callari versocunapica Jehová Diosca tucuicunamanta parlashpami “cancuna” nin. Pero ñaupa quillcachishcacunapica Isaías 30, verso 19-pica: ‘Jatun Dios canta llaquishpa, can caparishpa mañashcata uyaihuan cutichishcamantaca ña manataj huacanguichu’ ninmi. Caipi nishca shinaca Jehová Diosca canmantami preocuparin. Paimi canta cꞌuyaj Yaya can. Chaimanta paica canmanta preocuparishpami can mañashcacunataca alli uyan (Salmo 116:1; Isaías 57:15). w22.11 pág. 9 párrs. 5, 6

Contracuna catirashpa llaquichijpipish predicashpa, gentecunaman yachachishpa catishpaca cushilla, tranquilomi sintirishun. Autoridadcunaca apostolcunatapish ama predicachunmi mandarcacuna. Pero apostolcunaca Diosta cazushpami predicashpa catircacuna. Chaimi cushilla, tranquilo sintirircacuna (Hechos 5:​27-29, 41, 42). Cunan tiempopipish autoridadcuna ama predicachun jarcajpica Diosta cazushpami cuidadohuan predicana canchij. Chashna gentecunaman predicanata mana saquishpaca cushillami sintirishun. Llaquicunahuan cai horasca Diospaj sumaj, tranquilo causaita chasquishpaca mana yallitaj preocuparishunchu. Jehová Diosllami chashna tranquilo sintirichun ayudai tucun. Chaimanta millai ungüicuna ricurijpi, llaqui atraso japijpi, contracuna catirashpa llaquichijpipish Jehová Diospi confiashpa catishunchij, Dios churashca pushaj huauquicunata cazushpa catishunchij, Dios cusha nishcacunapipish yuyashunchij. Caicunata rurajpica sumaj causaita cuj Diosca ñucanchijtami cushichinga (Filipenses 4:9). w22.12 pág. 21 párrs. 17, 18

Mushuj causaita causangapajca ñucanchij mana alli yuyaicunata, mana alli ruraicunata saquingapajmi esforzarina canchij (Efesios 4:​31, 32). Por ejemplo, resintirishca saquirinata, pꞌiñarishca, colera canatami saquina canchij (Proverbios 29:22). Pero Bibliapi nishca shinaca caicunata saquinaca maipica sinchimi can. Chaimantami bautizarishca qꞌuipapish cai mana allicunata saquingapajca esforzarishpa catina canchij (Romanos 7:​21-23). Ñucanchij ñaupa causaita saquingapajca Jehová Diosta ayudachun mañashunchij. Paimi ñucanchijta uyashpa ñaupa causaita saquichun fuerzasta cunga (1 Juan 5:​14, 15; 1 Pedro 5:10). Pero ¿ñucanchij mañashca shina ñaupa causaita saquingapajca imatataj rurashpa catina canchij? Mana alli yuyaicunapi mana yuyashpalla saquirinachu canchij. Ashtahuanpish mapa ruraicunahuan chagrushca cosascunata mana ricunachu canchij. Chashnami ñaupa causaita saquishpa catishun (Filipenses 4:8; Colosenses 3:2).w23.01 págs. 10, 11 párrs. 7, 9, 10

Shujtajcunata cꞌuyashcata ricuchingapajca tucuicunaman predicangapajmi esforzarina canchij. Gentecuna ima razamanta, ima llajtamanta cajpipish, pobrecuna, charijcuna cajpipish paicunamanmi predicasha ninchij. Jehová Diosca tucui laya gentecuna quishpirichun, mana llullata alli yachaj chayachunpishmi munan. Chaimantami ñucanchijpish tucuicunaman predicangapaj esforzarina canchij (1 Timoteo 2:4). Jehová Diosta, Jesustapish cꞌuyashcata ricuchingapajca huauqui panicunatami cꞌuyana canchij. Chaimantami huauqui panicunamanta preocuparina canchij. Paicuna llaquicunata chari horaspishmi ayudana canchij. Paicunapaj cꞌuyashca familiacuna huañujpica cushichinami canchij. Paicuna ungushcacuna cajpi o desanimados cajpica paicunata animanaman, visitanamanmi rina canchij (2 Corintios 1:​3-7; 1 Tesalonicenses 5:​11, 14). Shinallataj ñucanchijca Santiago 5:​16-pi ima nishcataca allimi yuyarinchij. Chaipica: “Cashcata ruraj runapaj mañaica poderta charinmi” ninmi. Chaimantami Jehová Diosta ñucanchij huauqui panicunamanta mañashpa catina canchij. w23.01 págs. 28, 29 párrs. 7, 8

Shuj albañilca tiempohuanca ashtahuan alli huasichinatami yachan. Chashnallatajmi ñucanchijpish tiempohuanca ñucanchij huauqui panicunataca ashtahuan sinchiyachinata yachana canchij. Por ejemplo, llaquicunahuan caj huauqui panicunataca Diosta sirvijcunapaj ejemplocunamanta parlashpami sinchiyachina canchij (Hebreos 11:​32-35; 12:1). Shinallataj ñucanchij huauqui panicunapaj alli ruraicunamanta shujtajcunaman parlashpa, tucuicunahuan alli apanacungapaj esforzarishpaca congregacionpi tucuicuna tandalla cachunmi ayudashun (Efesios. 4:3). Ñucanchij huauqui panicuna Biblia yachachishcacunata difindichunpishmi yachachina canchij. Paicuna imapi ayudachun minishtijpipish ayudanallami canchij. Chiriyashca huauqui panicunatapish sinchiyachishpami catina canchij. Ñucanchijpish huauqui panicunata espiritualmente sinchiyachishpaca cushillami sintirishun. Alli shayachishca huasipish tiempohuanca dañarinllami. Pero sinchiyachishca huauqui panicunaca huiñaipajmi causai tucuncuna. w22.08 págs. 21, 22, 25 párrs. 6, 17, 18

Jesusca “Bibliapaj consejocunamanta, nishcacunamanta beneficiaringapajca alli intindijcunami cana canguichij” nircami (Mateo 24:15). Alli intindijcunaca ima yuyaicuna igual cashcata, ima yuyaicuna chꞌican cashcatami cuentata cuncuna. Ashtahuancarin sinchi yuyaicunatapishmi intindincuna. Chaimantami Bibliapaj profeciacuna ima shina pajtarishcata cuentata cungapajca alli intindijcuna cana canchij. Chashnami Bibliapaj nishcacunamanta beneficiarishpa catishun. Jehová Diosca paita sirvijcunataca Bibliata alli intindichunmi ayudan. Chaimantami paita mañana canchij. Pero mañashpallaca mana saquirinachu canchij. Ashtahuanpish Bibliata liyicushpaca ima nisha nishcatami alli ricurana canchij. Imata yachashcahuan, imata yachacushcahuan chꞌimbapurashpapishmi alli intindina canchij. Chashna investigashpaca Bibliapi tiyaj yuyaicunatami alli intindishun (Hebreos 5:14). Chaicunata ñucanchij causaipi ima shina pajtachinatapishmi yachashun. Bibliata alli intindingapaj esforzarijpica Yayitu Diosllatajmi chaicunata alli intindichun ayudanga. w23.02 págs. 10, 11 párrs. 7, 8

Caipi yuyai, shuj amigoca canmanmi shuj huasita convidan. Chai huasica ashalla allichinata minishtishpapish achca millón cullquimi valin. Chaimantami canca chai huasita achcata valoranguiman, achcata cuidanguiman. Jehová Diospish shuj valishca regalota cushca shinami tucui ñucanchijmanca causaita cushca. Jehová Diospajca ñucanchij causaica dimastijmi valin (Juan 3:16). Chaimantami paipaj shujlla Churita ñucanchijta quishpichichun cacharca. Jehová Diosca tucui ñucanchijmanmi causaita cushca (Salmo 36:9). Chaimantami apóstol Pabloca: “Pai causaita cujpimi causanchij, purinchij, paillamantatajmi tiyanchij” nirca (Hechos 17:​25, 28). Jehová Diosca ñucanchijcuna causashpa catichunmi tucui minishtishcacunata cun (Hechos 14:​15-17). Pero paica ñucanchij causaita quishpichingapajca ima milagrocunataca mana rurangachu. Ashtahuanpish cada unomi ñucanchij saludta cuidangapaj, espiritualmente sinchi cangapajpish esforzarina canchij (2 Corintios 7:1). w23.02 pág. 20 párrs. 1, 2

Jehová Diostaca paipaj Shimita ñucanchijman convidashcamantami dimastij agradicinchij. Chashnami ima problemacunata charishpapish, Yayitu Diospaj consejocunata catishpaca tucui laya problemacunata allichi tucunchij. Shamuj punllacunapajcarin shuj alaja esperanzatami charinchij. Jehová Dios Bibliapi pai ima shina cashcata, ima cualidadcunata charishcata yachashpacarin paipajman cꞌuchuyanata, paipaj amigocuna canatami munanchij (Salmo 25:14). Jehová Diosca tucui gentecuna paita rijsichunmi munan. Chaimantami ñaupa punllacunapica muscuchishpa, muscuipi shina ricuchishpa, hasta angelcunata cachashpa paimanta huillachirca (Números 12:6; Hechos 10:​3, 4). Si caicunata Yayitu Dios mana quillcachishca cajpica, ñucanchijca imata mana yachai tucunchijmanchu. Shinapish Yayitu Diosca ñucanchijcuna paimanta yachaj chayachunmi, huaquin cꞌaricunata pai ima nisha nishcata shuj libropi quillcachirca. Salmo 18:​30-pi nishca shinaca “mandaj Diospaj ñanpica, ima panda mana tiyanchu”. Chaimantami Yayitu Diospaj Quillcachishcacuna ñucanchijta ayudanapi seguros canchij. w23.02 pág. 2 párrs. 1, 2

Metacunata churari. Alli metacunata churarishpaca cambaj fetami sinchiyachingui, Diostapishmi alli sirvingui (Efesios 3:16). Por ejemplo, Bibliata cada punlla liyingapaj, Bibliamanta ashtahuan yachangapajmi esforzari tucungui (Salmo 1:​2, 3). Shinallataj shungumanta Jehová Diosta mañangapajmi esforzari tucungui. Ima laya diversioncunata agllacushcata, mashna tiempota chai diversioncunapi pasacushcatapishmi alli ricuna cangui (Efesios 5:​15, 16). Shujtajcunata ayudashpaca Diosta alli sirvicushcatami ricuchingui. Por ejemplo, cambaj congregacionmanta mayorlla o ungushca huauqui panicunatami mandadocunata rurashpa ayudai tucungui. Mana cashpaca celularcunata, tabletcunata alli utilizachunmi ayudai tucungui. Shinallataj Diospaj Gobiernomanta alli huillaicunata huillashpami shujtajcunatapish cꞌuyashcata ricuchi tucungui (Mateo 9:​36, 37). Pudishpacarin Jehová Diosta tiempo completota sirvi. w22.08 págs. 6, 7 párrs. 16, 17