Mayo

Chai tiempopica muyundij Allpapimi shuj jatun yaricaipish tiyarca. Chaimi Diosta sirvij yaya mamacunaca familiata mantinina cashcamanta achcata preocuparircacuna. Yaricai tiyashcamantaca jovencunapish: “¿Yayitu Diosta ashtahuan sirvingapajca shuyanachu cani?” nishpachari tapurishcangacuna. Chashna jarcaicunata charishpapish Jesusta punta catijcunaca predicacionpi tucui pudishcahuanmi apoyashpa catircacuna. Paicuna charishca cosascunatapishmi Judeapi caj huauqui panicunaman cujcuna carca (Hechos 11:​29, 30). Achca huauqui panicunaca minishtirishca cosascunata cushpa, imata rurashpami shujtaj huauqui panicunata ayudarcacuna. Chashna ayudashcamantami paicunaca dimastij cushilla sintirircacuna (Hechos 20:35). Shinallataj chai ayudata chasquij huauqui panicunapish Jehová Dios paicunata cuidacushcatami ricurcacuna (Mateo 6:​31-33). Chashna caishuj chaishujhuan ayudanacushcamantami ashtahuan tandalla carcacuna. w23.04 pág. 16 párrs. 12, 13

Diosca ñucanchij mañaicunata cutichingapajca huaquinpica paita mana sirvijcunatami utilizan. Por ejemplo, Jehová Dios yuyaita cujpimi mandaj Artajerjesca Jerusalenman tigrachun Nehemiasman permisota curca. Chashnami Nehemiasca Jerusalenta cutin shayachi tucurca (Nehemías 2:​3-6). Cunan punllacunapipishmi Jehová Diosca paita mana sirvijcunata utilizashpa ñucanchijta ayudai tucun. Jehová Diosca manachari shuj milagrota rurashpa ñucanchij mañashcacunata cutichinga. Pero ima laya cutichishpapish siempremi paimanta ama caruyachun ayudanga. Chaimantami Jehová Dios ñucanchij mañaicunata ima shina cutichijta ricungapaj atentos cana canchij. Jehová Dios ñucanchij mañashcacunata ima shina cutichishcata cuentata cungapajmi tiempota llujchina canchij (Salmo 66:​19, 20). Jehová Dios ñucanchij mañaicunata ñucanchij munashca shina mana cutichijpipish paipimi sinchi feta charishpa catina canchij (Hebreos 11:6). w23.05 págs. 12, 13 párrs. 13, 15, 16

Jehová Diosman mingarishpaca “canllatami sirvisha, can munashca shinami causasha” nishpami ari nircanchij. Chai ari nishcataca pajtachinatajmi canchij. Chaita pajtachinaca mana sinchichu can. ¿Imamanta? Jehová Diosllatajmi paipaj munaita rurachun ñucanchijtaca rurarca. Chaimantami pai munashca shina causanaca mana sinchi can (Apocalipsis 4:11). Shinallataj Jehová Diosca paimanta yachana munaita charichunmi ñucanchijtaca rurarca. Ñucanchijca Jehová Diosman rijchajtami rurashca canchij. Chaimantami paiman cꞌuchuyashpa, pai nishcacunata cazushpa cushilla causanata munanchij. Ashtahuanpish Jehová Diosta tucuipi cazushpa, paipaj Churipaj ejemplota catishpaca tranquilo causaitami chari tucunchij (Mateo 11:​28-30). Chashnami Jehová Diosta ashtahuan cꞌuyangapaj esforzarina canchij. Paica cantaca achcatami cꞌuyan. Shamuj punllacunapicarin sumaj bendicioncunatami cusha nin. Chaita yuyaipi charishpaca paitami ashtahuan cꞌuyangui. Y Jehová Diosta ashtahuan cꞌuyashpaca paita tucuipi cazunaca mana sinchichu canga (1 Juan 5:3). Shinallataj Jesuspaj ejemplotami catina cangui. Paica siempremi Jehová Diospaj ayudata mañaj carca. Shinallataj Jehová Dios paiman cusha nishcacuna yuyaillami causarca. Chaimantami Diospaj munaita ruranaca paipajca mana sinchi carca (Hebreos 5:7; 12:2). Ñucanchijpish Jehovapaj ayudatami mashcana canchij. Shinallataj paraisopi causana yuyaillami causana canchij. w23.08 págs. 27, 28 párrs. 4, 5

Ñucanchijca pacienciata charijcunahuanmi apanacunata munanchij ¿nachu? Por ejemplo, mana pꞌiñarishpa ñucanchijta shuyajpica achcatami agradicinchij. Shinallataj imapi pandarishca cajpi mana pꞌiñarijpica tranquilomi sintirinchij. Bibliamanta pacienciahuan ñucanchijman yachachishcamantapishmi achcata agradicinchij. Ashtahuantajca Yayitu Jehová Dios ñucanchijta pacienciata charishcamantami achcata agradicinchij. Ñucanchijhuan pacienciata charijpica cushillami sintirinchij ¿nachu? Pero ñucanchijllataj pacienciata charinaca huaquinpica sinchimi can. Por ejemplo, carrota apurado manejacushpa achca carrocuna tiyashcamantami rato pꞌiñari tucunchij. Shinallataj shujtajcuna imata rurajpi o imata nijpimi pacienciata charinaca sinchi cai tucun. Ashtahuanpish Jehová Dios cusha nishca bendicioncuna mana utca chayashcamantami ashata pꞌiñari tucunchij. Chaimantami ashtahuan pacienciata ricuchina canchij. w23.08 pág. 20 párrs. 1, 2

¿Jehová Dios ashalla soldadocunahuan saquirichun nijpica Gedeonca imatataj yuyashcanga? Tal vez, paica: “¿Chaita ruranaca allichu canga?” nishpami yuyashcanga. Chashna yuyashpapish Gedeonca Jehová Diostami cazurca. Ancianocunaca, ¿paimantaca imatataj yachai tucuncuna? Jehová Diospaj organización cambiocunata rurachun nijpica shungumantami cazuna can (Hebreos 13:17). Jehová Dios ‘ñuca pueblota cuidachun ñucami ayudasha’ nijpica Gedeonca tranquilomi sintirirca. Chaimi asha manchaita charishpapish Jehová Diosta tucuipi cazurca (Jueces 9:17). Cunan punllacunapica huaquin ancianocunaca Jehová Diosta libremente sirvichun jarcan llajtacunapimi causancuna. Paicunapishmi Gedeón shina can. Chaimantami autoridadcuna prezupi churanata, tapunaman cayanata, trabajomanta llujshichinata, llaquichinata yachashpapish tandanacuicunata organizashpa catincuna. Huauqui panicuna huillashpa catichunpishmi ayudancuna. Gran tribulación o Jatun llaqui punllacuna callarijpica millaicuna llaquichisha nijpipish, ancianocunaca Jehová Diospaj mandashcacunata cazungapajmi esforzarina cangacuna. Por ejemplo, tal vez Diospaj organizacionca millai gentecuna ñalla tucurigrishcata huillachunmi ninga. Chai huillaica jatun runducuna shinami canga. w23.06 págs. 5, 6 párrs. 12, 13

Jehová Diosca chai nishcacunataca Jehoiadapimi pajtachirca. Por ejemplo, Jehoiadá allita rurashcataca Bibliapimi quillcachirca (Romanos 15:4). Shinallataj Jehoiadá huañujpica ‘Davidpaj pueblopimi, jatun mandajcunata pambashca cꞌuchupi pambarcacuna. Paica israelitacunapajpish, Jehovapajpish, paipaj huasipajpishmi allita rurashcarca. Chaimantami paitaca chaipi pambarcacuna’ (2 Crónicas 24:​15, 16). ¿Jehoiadamantaca imatataj yachai tucunchij? Ancianocunaca Jehová Diospaj ovejitacunatami imata mana manchashpa cuidana can (Hechos 20:28). Cutin, mayorlla huauqui panicunaca ña mayorllacuna cajpipish Jehová Dios paicunata utilizai tucushcatami yuyarina can. Pero paicunata utilizachunca Jehová Diostami tucui shunguhuan manchana, cꞌuyana can. Shinallataj jovencunaca Jehová Dios Jehoiadata cꞌuyaihuan tratashcatami yuyarina can. Chashnami mayorlla huauqui panicunataca cꞌuyaihuan, respetohuan tratangacuna. Ashtahuantajca Jehová Diosta achca huatacunata sirvij mayorlla huauqui panicunamanmi respetota ricuchina can (Proverbios 16:31). Shinallataj ñucanchijpish Jehová Diospaj pueblota pushajcunatami tucui shunguhuan apoyana canchij (Hebreos 13:17). w23.06 págs. 17, 18 párrs. 14, 15

Comentariocunata cungapaj mashna cutincuna maquita alzagrishcataca allimi yuyana cangui. Tucui tiempo maquita alzajpica tal vez pushaj huauquica canllamanmi comentariocunata cunga. Chashnami shujtajcuna comentariocunata cuchunca mana saquishun. Shujtajcunacarin cada parrafopaj canlla maquita alzacujta ricushpaca “ñuca comentachunca mana minishtincunachu” nishpachari yuyangacuna (Eclesiastés 3:7). Achca huauqui panicuna comentariocunata cusha nijpica maipica manachari achca comentariocunata cui tucushun. Huaquinpicarin shuj cutinllapish comentariota manaraj cujpimi ña tandanacuica tucurin. Chashna tucujpica llaquillachari sintirinchij. Shinapish comentariocunata cuchun mana saquijpipish mana resintirinachu canchij (Eclesiastés 7:9). Ashallata comentai tucushpapish shujtajcunapaj comentariocunatami alli uyana cangui. Chashnami paicunataca tandanacui huasha felicitai tucungui. w23.04 págs. 23, 24 párrs. 14-16

Bibliata estudiana, chaipi nishcacunapimi yuyana canchij. Shuj yura ama urmachunca sinchi sapicunatami charina can. Ñucanchijpish Diablopaj trampacunapi ama urmangapajca sinchi fetami charina canchij. Shinallataj yura huiñashpa catijpica sapicunapishmi allpa ucujta huiñashpa catin. Chashna layallatajmi Bibliata estudiashpa catijpi, chaipi nishcacunapi yuyashpa catijpica ñucanchij feca huiñashpa catinga. Chashnami Jehová Dios yachachishcacuna valishca cashcata seguros cashun (Colosenses 2:​6, 7). Shinallataj ñaupa tiempopi Diosta sirvijcuna paita cazushcamanta cushilla causashcatami yuyarina canchij. Por ejemplo, Ezequielca muscuipi shinami shuj ángel Diospaj huasita medicujta ricurca. Chai muscuipi shina imata ricushcata yuyashcamantami Ezequielca paipaj crishcacunata sinchiyachirca. ¿Ñucanchijpish Ezequielmantaca imatataj yachanchij? Jehová Diospaj mandashcacunatami tucui shunguhuan cazuna canchij (Ezequiel 40:​1-4; 43:​10-12). Shinallataj Bibliapi tiyaj sinchi yachachishcacunata estudiangapaj, chaipi nishcacunapi yuyangapajmi tiempota surcuna canchij. Ñucanchijpish Jehová Diospimi ñucanchij shunguta churana canchij (Salmo 112:7). w23.07 págs. 18, 19 párrs. 15, 16

Bibliapimi Diosta alli sirvij cꞌaricunamanta yachai tucungui. Paicunaca Jehová Dios mingashcacunata alli pajtachijcuna, Diospaj pueblota alli cuidajcunami carcacuna. Shinallataj congregación ucupi, cambaj familia ucupimi alli ejemplocunata tari tucungui (Hebreos 13:7). Ashtahuanpish Jesuspaj ejemplotami cati tucungui (1 Pedro 2:21). Diosta alli sirvij cꞌaricunamanta yachacushpaca paicuna ima shina cashcata yuyai (Hebreos 12:​1, 2). Shinallataj paicuna shina cangapaj imata rurai tucushcata yuyai. Manaraj imata rurashpa alli yuyarinaca minishtirishcami can. Bibliapi nishcacunata alli yachashpa, chaicunata cazuna imamanta minishtirishca cashcata intindishpami yachaisapa tucungui. Shinallataj Bibliapi yachashcacunata yuyaipi charishpa Jehová Diospaj ñaupajpi alli ricuringapajmi alli decisioncunata agllangapaj esforzarina cangui (Salmo 119:9). Yachaisapa cangapaj esforzarishpaca espiritualmente sinchi tucucushcatami ricuchingui (Proverbios 2:​11, 12; Hebreos 5:14). w23.12 págs. 24, 25 párrs. 4, 5

Yaya mamacunaca huahuacuna mana pꞌiñarishpa paicunapaj crishcacunata explicachunmi yachachina can (Santiago 3:13). Huaquin yaya mamacunaca familiahuan Bibliata estudiacushpami tapuicunata ima shina cutichinata repasancuna. Shinallataj huaquin yaya mamacunaca paicunallataj profesorcuna, compañerocuna shina tucushpami huaquin tapuicunata ima shina cutichinata repasancuna. Huahuacunamanca alaja shimicunahuan, respetohuan parlana cashcatapishmi intindichincuna. Huahuacunaca tapuicunata ima shina cutichinata repasashpaca alaja shimicunahuanmi sinchi tapuicunataca cutichingacuna. Ashtahuanpish paicunallatajmi paicunapaj crishcacuna ciertotaj cashcata seguros cangacuna. JW.ORG paginapi “Los jóvenes preguntan” nishca partepica “Pónlo por escrito” nishca partemi tiyan. Chai partepica jovencunaca paicunapaj crishcacunata paicunapaj propio shimicunahuan ima shina cutichinatami yachai tucuncuna. Chaita rurashpaca paicunapaj crishcacunatami sinchiyachingacuna. Ashtahuanpish tucui familiami tapuicunata respetohuan ima shina cutichinata yachangacuna. w23.09 págs. 17-19 párrs. 10, 15, 16

¿Can churarishca metacunata pajtachinaca sinchichu cashca? Metacunata pajtachinaca achcacunapajmi sinchi cashca. Por ejemplo, Philipca Jehová Diostami tucui shunguhuan cutin cutin mañangapaj esforzarisha nirca. Pero chashna mañangapaj tiempota surcunaca mana facilchu carca. Cutin, Erika shuti panica huillana grupoman utca chayasha nishpapish siempremi qꞌuipayaj carca. Cambaj metacunata pajtachingapaj esforzaricushpapish mana pajtachi tucushpaca mana desanimarinachu cangui. Uchilla metacunata pajtachingapajpishmi tiempo, esfuerzo minishtirin. Ashtahuanpish chai metacunata pajtachingapaj esforzaricushcamantami Jehová Diosta tucui shunguhuan cꞌuyashcata, paita ashtahuan sirvisha nishcata ricuchingui. Cambaj esfuerzocunata ricushpami Jehová Diosca cushilla sintirin. Paica ñucanchij rurai pudishcallata rurachunmi mañan (Salmo 103:14; Miqueas 6:8). Chaimantami pajtachi tucushca metacunallata churarina canchij. w23.05 pág. 26 párrs. 1, 2

Diosta alli sirvijcuna cashpapish huaquinpica manchaitami charishun. Chashnapish allita rurangapajmi esforzarina canchij. Por ejemplo, Danielca mana manchaj jovenmi carca. Paica profeta Jeremías, shujtaj profetacuna quillcashcacunatami estudiaj carca. Chai quillcashcacunata estudiashcamantami paica judiocuna Babiloniamanta llujshishpa Jerusalenman tigrangapaj ashalla tiempo faltashcata cuentata curca (Daniel 9:2). Danielca profetacuna quillcashcacuna pajtaricushcata ricushpaca Jehová Diospimi ashtahuan confiai callarirca. Chaimantami paica mana manchaita charirca (Romanos 8:​32, 37-39-ta ricui). Ashtahuantajca Danielca cutin cutinmi Yaya Diosta mañaj carca (Daniel 6:10). Paica imapi pandarishcata, ima shina sintirishcata, imapi ayudachun minishtishcatami Jehová Diosman huillaj carca (Daniel 9:​4, 5, 19). Caicunata rurashcamantami Danielca juchayuj cashpapish mana manchaj canata yacharca. w23.08 págs. 3, 4 párrs. 4, 7

Autoridadcunata cazushpaca ñucanchijpish, shujtajcunapishmi beneficiaringacuna. Por ejemplo, leycunata pajtachijpica autoridadcunaca ima multata mana cobrangachu, imamantapish mana juchachingacunachu (Romanos 13:​1, 4). Shinallataj cada uno leycunata cazungapaj esforzarijpica autoridadcunaca testigo de Jehovacunamantaca allicunatami ningacuna. Achca huatacuna huashaman Nigeria llajtapi ima tucushcata yachashun. Huaquin gentecunaca impuestocunata ama pagangapajmi parota rurarcacuna. Chaimi soldadocunaca paicunata mashcangapajca Tandanacuna Huasiman yaicurcacuna. Pero chai soldadocunata mandajca: “Chaimanta llujshichij, testigo de Jehovacunaca ima impuestomanta mana parocunata rurashpa purincunachu” nishpami mandarca. Cai experienciapi ricushca shinaca autoridadcunapaj leycunata cada uno cazungapaj esforzarishpaca gentecuna Diospaj pueblomanta allicunata nichunmi ayudanchij. Shinallataj autoridadcunata cazushpaca shamuj punllacunapi ñucanchij huauqui panicunata ama llaquichichunpishmi ayudashun. w23.10 págs. 9, 10 párr. 13

Jehová Diosta sirvijcunamanta maijancunaca achca huatacunatami cai millai mundo ña tucurichun shuyacuncuna. Huaquincunaca “cai millai mundoca ñami tucurina horas can” nincunami. Jehová Diosca paita sirvijcuna ima laya sintirishcataca intindinmi. Chaimantami profeta Habacucmanca: “Muscuipi shina ricushcacunaca asha huatacunata qꞌuipayashpapish, utcami tucuringa, mana llullangachu. Qꞌuipayajpipish chaparacuilla, shamungami mana uniyangachu, chaica pajtangami” nirca (Habacuc 2:3). ¿Cai shimicunaca cunan punllacunapipish ñucanchijta animai tucunchu? Ari. Jehová Diosca apóstol Pablomanca Habacuc quillcashca shimicunata shinami ñucanchijpajpish quillcachirca. Chai shimicunata yuyarishpami Jehová nishca promesa mana uniyana cashcata, pajtarinataj cashcatapish seguros canchij (Hebreos 10:37). w23.04 págs. 30, 31 párr. 16

Israelitacunaca Jehová Dios paicunata pushachun Moisesta churashcataca mana crircacunachu. Chaimi Moisestaca mana cazusha nircacuna (Números 14:​10, 11). Moisés Jehová Dios churashca pushaj cashcata mana crishcamantami Jehová Diosca pai cusha nishca allpaman yaicuchunca mana saquirca (Números 14:30). Shinapish huaquin israelitacunaca Jehová Diostami tucuipi cazurcacuna. Por ejemplo, Jehová Diosca: ‘Calebca ñucataca tucui shunguhuanmi cazurca’ nircami (Números 14:24). Caleb cazushcamantami Jehová Diosca paitaca achcata bendiciarca. Shinallataj Canaán llajtapi maipi causanata paillataj agllachunmi saquirca (Josué 14:​12-14). Calebpish shujtaj israelitacunapish Jehová Diosta cazushcamantami pai cusha nishca allpaman yaicui tucurcacuna (Josué 21:​43, 44). Jehová Diosca Moisespaj randi israelitacunata pushachunca Josuetami agllarca (Josué 4:14). Calebpish shujtaj israelitacunapish Josuetaca ‘paipaj tucui causaipimi respetarcacuna’. w24.02 pág. 21 párrs. 6, 7

Ima shinami doctorcunaca ñucanchij pulsota ricushpa ñucanchij shungu alli o mana alli cashcata yachai tucuncuna, chashnallatajmi Jehová Diosta tucui shunguhuan cꞌuyashcata yachangapajca huauqui panicunata mashnata cꞌuyashcata ricuna canchij. Huauqui panicunata mana tanto cꞌuyashpaca Jehová Diostapishmi mana tanto cꞌuyashun. Pero huauqui panicunata shungumanta cꞌuyashcata ricuchingapaj esforzarishpaca Jehová Diostapish shungumanta cꞌuyashcatami ricuchishun. ¿Huauqui panicunata ña mana tanto cꞌuyashcata cuentata cushpaca maqui cruzashcachu saquirina canchij? Mana. Paicunata ña mana tanto cꞌuyashcata ricuchishpaca Jehová Diostapish ña mana cꞌuyacushcatami ricuchishun. Chaimi apóstol Juanca: ‘Maijanpish ñahuihuan ricushca huauquita mana cꞌuyashpaca, ¿ima shinataj mana ricushca Diostacarin cꞌuyangari?’ nirca (1 Juan 4:20). Shinashpaca Diospaj ñaupajpi alli ricuringapajca caishuj chaishujmi cꞌuyanacuna canchij (1 Juan 4:​7-9, 11). w23.11 págs. 8, 9 párrs. 3, 5, 6

Jatun Mandaj Jehoás huahuaraj cajpimi paipaj yayaca huañurca. Chaimi sumo sacerdote Jehoiadaca paita huiñachirca. Shinallataj Jehoiadaca Jehoasmanca Diosmantami yachachirca. Jehoasca Jehoiada yachachishcacunataca allimi chasquirca. Chaimantami paica Jehová Diosta sirvinata, paipaj pueblota ayudanata decidirca. Shinallataj Diospaj templota allichingapajmi esforzarirca (2 Crónicas 24:​1, 2, 4, 13, 14). Cambaj yaya mama o shujtaj gentecuna Diosmanta canman yachachicujpica achcatami agradicina cangui (Proverbios 2:​1, 10-12). Paicunaca canman Diosmanta yachachingapajca imatapish rurai tucuncuna. Cambaj yaya mama nishcacunata cazujpica paicunaca cushillami sintiringacuna. Jehová Diospaj shungutapishmi cushichingui. Ashtahuanpish paihuanca huiñai huiñaitami alli apanacui tucungui (Proverbios 22:6; 23:​15, 24). Shinashpaca Jehoaspaj ejemplota catishpaca cushillami causangui. w23.09 págs. 8, 9 párrs. 3-5

Jehová Diosca ñucanchij mañaicunata uyanatami nin. Paica paita sirvijcunata achcata cꞌuyaj cashcamantami siempre paicunapaj mañaicunataca uyan (Salmo 10:17; 37:28). Shinapish chaica Jehová Dios tucui ñucanchij imalla mañashcacunata cunataca mana nisha ninchu. Tal vez Jehová Dios tucui ñucanchij mañaicunata cutichichunca Paraíso shamungacamami shuyana canga. Jehová Diosca mañaicunata cutichingapajca cai Allpapi paipaj munai ima shina pajtarinapimi yuyan (Isaías 55:​8, 9). Paica pai churashca Gobiernota cazuj gentecunalla cai Allpapi causachunmi munan. Shinallataj paica paicuna tandalla, cushilla causachunmi munan. Shinapish Satanasca ‘gentecunallataj mandashpaca allimi causangacuna’ nircami (Génesis 3:​1-5). Jehová Diosca Diablo llullacushcata ricuchingapajca gentecunallataj mandachunmi saquirca. Chaimi cai Allpapica achca llaquicuna tiyan (Eclesiastés 8:9). Jehová Dios tucui llaquicunata cai rato mana tucuchinataca allimi yachanchij. w23.11 pág. 21 párrs. 4, 5

Jehová Diosca Abrahanmanca paipaj huahua huahuacunamanta achca llajtacuna bendiciashca canatami huillarca. Shinapish Abrahanpish, Sarapish mayorllacunami carca. Paicunaca 100 y 90 huatacunata charishpapish manaraj shuj huahuata charishcacunachu carca. Mana sinchi feta charishpaca Jehová Dios nishcacuna pajtarinata crinaca paicunapajca sinchimi canman carca. Shinapish “Abrahanca huahuacunata mana chari tucushpapish feta charishcamantami achca llajtacunapaj yaya canata shuyacurca” (Romanos 4:​18, 19). Jehová Diospaj nishcacunaca pajtarircami. Chaimi Abrahanca pai tucui shunguhuan shuyacushca huahuata charirca. Paipaj shutica Isaacmi carca (Romanos 4:​20-22). Ñucanchijpish Abrahán shinami Diospaj ñaupajpica cashcata rurajta shina ricuri tucunchij. Shinallataj Diospaj alli amigocunami cai tucunchij. Chaimantami Pabloca Abrahanmanta parlashpaca: “‘Diosca cashcata rurajta shinami ricurca’ nishca shimicunaca mana Abrahanpajllachu quillcashca carca. Ashtahuanpish ñucanchijpajpishmi quillcashca carca. Ñucanchijpish Amito Jesusta huañushcacunapaj chaupimanta causachij Diospimi crinchij. Chaimantami paica ñucanchijtapish cashcata rurajta shina ricunga” nirca (Romanos 4:​23, 24). Shinashpaca, Abrahán shina feta charishcataca ruraicunahuan ricuchishunchij. Pero esperanzatapishmi charina canchij. w23.12 pág. 7 párrs. 16, 17

Llaquicunata charishcamanta manchaihuan cashpaca ¿imatataj rurana cangui? Jehová Dios can ima llaquicunata apacushcata, can ima shina sintirishcata alli intindishcatami yuyarina cangui. Por ejemplo, israelitacuna Egipto llajtapi esclavocuna cashcamanta achcata sufricujpica Jehová Diosca paicuna ima shina sintirishcataca allimi yacharca (Éxodo 3:7). Llaquicunata apacushpaca manchaita charishcamantami Jehová Dios ñucanchijta ayudacushcata cuentata cunaca huaquinpica sinchi canga. Pero Jehová Dios ñucanchijta ayudacushcata cuentata cungapajca paitami ayudachun mañana canchij (2 Reyes 6:​15-17). Jehová Diosta mañashca qꞌuipaca cashna nishpa tapurishunchij: ¿Tandanacuipi shuj conferenciata, shuj comentariota uyashpaca animarishcanichu? ¿Mana cashpaca publicacioncunata liyishpa, shuj videota ricushpa o shuj cantota uyashpachu animarishcani? ¿O tal vez maijan huauqui o pani shuj animachij versota yuyachishpachu ñucata animashca? Publicacioncunapi imalla yachashcacunaca Jehová Diosmantami shamun. Shinallataj Jehová Dios yuyaita cujpimi huauqui panicunaca ñucanchijta animancuna. Pero huaquinpica chai ayudacuna Jehová Diosmanta shamushcata cuentata cunaca sinchimi can (Isaías 65:13; Marcos 10:​29, 30). Jehová Diosca publicacioncunahuan, huauqui panicunahuanmi ñucanchijmanta sustarishcata ricuchin. Chaimantami paipica tucui shunguhuan confiana canchij (Isaías 49:​14-16). w24.01 págs. 4, 5 párrs. 9, 10

Manaraj jahua pachaman rishpaca Jesusca paita catijcunamanca: “Jerusalenpi, tucui Judeapi, Samariapi, cai allpapi tiyaj caru llajtacunapipish ñucamanta huillanguichij” nircami (Hechos 1:8; Lucas 24:​46-48). Chai qꞌuipallami panda religionta pushajcunaca Pedrota, Juanta prezu japishpa Sanedrinman aparcacuna. Chaipica paicunataca ama huillashpa catichunmi mandarcacuna (Hechos 4:​18, 21). Pedropish, Juanpish cashna nishpami cutichircacuna: “Diosta cazunapaj randi cancunata cazuna Diospaj ñaupajpi alli cajpica cancunallataj juzgaichij. Shinapish ñucanchijca imata ricushcata, imata uyashcata huillanataca manataj saqui tucunchijchu” (Hechos 4:​19, 20). Panda religionta pushajcuna cai ishqui apostolcunata cacharijpica paicunaca shujtaj huauqui panicunahuanmi tandanacurcacuna. Chaipimi paicunaca tandalla Jehová Diosta mañarcacuna. Jehová Diosca paicuna mañashcataca cutichircami (Hechos 4:31). w23.05 pág. 5 párrs. 11, 12

Jehová Diosca shujtaj gentecuna, shujtaj angelcuna manaraj tiyai horasmantami Jesushuanca tandalla causashca. Chaimantami paica Jesustaca achcata cꞌuyan. Jesuspish Yaya Diostaca achcatami cꞌuyan. Cai punllapaj versopi nishca shinaca Jehová Diosca tucuicunapaj ñaupajpimi Jesusta achcata cꞌuyashcata nirca. Paica Jesús paipaj ñaupajpi alli ricurishcallataca mana nircachu. Ashtahuanpish Jesusta achcata cꞌuyashcata, paita cazushcamanta cushilla cashcata tucuicuna yachachunmi munarca. Chaimantami “caimi ñuca cꞌuyashca Churi” nirca (Efesios 1:7). Jesusca Jehová Diospaj achca valishca cashcataca allimi yacharca. Chaimantami cutin cutin Yaya Diosca ñucataca achcatami cꞌuyan nirca (Juan 3:35; 10:17; 17:24). w24.01 pág. 28 párr. 8

Cambaj cꞌuyashca amigo canmanta huashalla mana allicunata nijpica ¿ima shinataj sintiringuiman? Canca cambaj amigo nishcacuna mana cierto cashcatami yachangui. Shinapish maijancunaca pai nishcacunata crishpami shujtajcunamanpish parlancuna. Achca gentecuna chai llullacunata crinata yuyashpami achcata llaquiringuiman ¿nachu? ¿Cai ejemplomantaca imatataj yachanchij? Diabloca Jehová Diosmanta llullacunata nishpami paipaj shutita mapayachirca. Chaita ricushpaca Jehová Diosca llaquillami sintirirca. Evaca Diablo nishcacunata crishcamantami Jehová Diosta mana cazunata agllarca. Qꞌuipaca Adanpishmi Diosmanta caruyarca. Chaimantami tucuicuna juchayujcuna huacharishcanchij, huañunchijpish (Génesis 3:​1-6; Romanos 5:12). Diablo llullacunata nishcamantami cunancama muyundij Allpapica huañuicuna, macanacuicuna, llaquicuna tiyan. Diablopaj llullacunamanta cai Allpapi achca llaquicuna tiyajta ricushpaca Jehová Diosca achcatami llaquirin. Shinapish paica mana llaquicunallapi yuyashpachu causan. Shinallataj paica mana resentidochu saquirishca. Ashtahuanpish Bibliapi nishca shinaca Yaya Jehová Diosca ‘cushi Diosmi’ can (1 Timoteo 1:11). w24.02 pág. 8 párrs. 1, 2

¿José shina Jehová Diosta tucuipi cazungapajca imatataj rurana canchij? Tentacioncuna ricurijpi chaicunapi ama urmangapaj imata ruranatami cunanmanta yachana canchij. Shinallataj Dios millashca ruraicunamanta utca caruyanata, chaicunapi ama yuyashpa saquirinatami yachana canchij (Salmo 97:10; 119:165). Chashnami jatun juchacunapica mana urmashun. Canca Diospaj pueblopi cashcata, Jehová Diosta tucui shunguhuan sirvisha nishcataca segurochari cangui. Shinapish “Jehová Diosman mingarishpa bautizaringapajca manaraj listochu cani” nishpachari yuyangui. Chashna yuyacushpaca Jehová Diosman David imata mañashcatami yuyarina cangui. Paica Jehová Diostaca: “Taita Dioslla, ñucataca alli alli ricuhuailla. Ñuca shungu ima shina cashcata rijsihuailla. Ñuca yuyaicuna ima shina cajta ricuhuayari, rijsihuayari. Ñuca ñanta ricupayari, ñataj mana alli canman. Huiñaita mana tucurij ñanpi pushahuayari” nishpami mañarca (Salmo 139:​23, 24). Jehová Diosman mingarishpa bautizaringapaj esforzaricushcamantami paita tucui shunguhuan mashcacushcata ricuchingui. Bibliapi nishca shinaca Jehová Diosca chaita rurajcunatami bendician (Hebreos 11:6 ). w24.03 págs. 6, 7 párrs. 13-15

Jatun mandaj sacerdoteca tucui israelitacunamantami Jehová Diospaj ñaupajpi ricurij carca. Punta jatun mandaj sacerdoteca Aaronmi carca. Israelitacuna Diospaj carpa huasita Jehová Diosman mingajpimi paica Aaronta jatun mandaj sacerdote cachun agllarca. Shinapish Apóstol Pabloca: “Sacerdotecunaca huañushpami paicunaman mingashcataca mana pajtachishpa cati tucurcacuna. Chaimantami paicunaman mingashcataca catij caishuj sacerdotecuna pajtachishpa catina carcacuna” nircami (Hebreos 7:​23-26). Ashtahuanpish jatun mandaj sacerdotecunaca juchayujcuna cashcamantami paicunapaj juchacunamantapish sacrificiocunata cujcuna carca. Pero jatun mandaj sacerdote Jesucristoca jucha illaj cashcamantami chaitaca mana rurana can. Ñucanchij jatun mandaj sacerdote Jesucristoca “Dios shayachishca carpa huasipi, Diospajlla ashtahuan chꞌicanyachishca ucupi sirvijmi can. Cai carpa huasitaca mana runacunachu shayachishca” (Hebreos 8:​1, 2). Shinallataj Pabloca: ‘Jesusca huiñai huiñaitami causashpa catin. Chaimantami paipaj randica shujtaj sacerdotecunaca mana tiyanga. Paica ima mapa illaj, juchayujcuna shina mana cajmi can’ nircami. Shinaca Jesusca jucha illaj cashcamantami paipaj juchacunamanta sacrificiocunataca cada punlla mana cuna can. w23.10 pág. 26 párrs. 8, 9

Caipica ñaupaman tiyashca jahua pacha nishpaca cai Allpa pachata mandacuj gobiernocunamantami parlacun. Chai gobiernocunataca Diablo, demoniocunami mandacun (Mateo 4:​8, 9; 1 Juan 5:19). Shinallataj Bibliapica huaquinpica allpamanta parlashpaca gentecunamantami parlan (Génesis 11:1; Salmo 96:1). Chaimantami Apocalipsis 21:​1-pi “ñaupaman tiyashca allpa” nishpaca cunan punllacunapi tiyaj millai gentecunamanta parlacushcata intindinchij. Shinashpaca Jehová Diosca gobiernocunata, millai gentecunata ashallata allichinapaj randica libremi paicunataca tucuchinga. Chai huashaca mushuj allpata, mushuj jahua pachatami ruranga. ¿Chaica imatataj nisha nin? Shuj mushuj gobierno tiyanata, chai gobierno alli gentecunallata mandana cashcatami nisha nin. Profeta Isaías huillashca shinaca cai Allpaca Edén huerta shinami sumaj Paraíso tucunga. Shinallataj gentecunaca mushujyachishcami cashun. Por ejemplo, Jehová Diosca mana puri tucujcunata, mana ricujcunata, mana uyajcunatami alliyachinga. Huañushcacunapishmi causachishca cangacuna (Isaías 25:8; 35:​1-7). w23.11 pág. 4 párrs. 9, 10

‘Jatun llaqui punllaca’ ñapishmi callaringa (Mateo 24:21). Huaquin llaquicunaca mana yuyashcapimi shamun. Pero Jesusca jatun llaqui punlla shamunataca ñami 2.000 huatacuna huashaman huillarca. Chaimantami allichirishca caichij nirca. Chai punllapaj allichirishca cashpami llaquicunataca ahuantai tucushun, shujtajcunatapish ayudai tucushun (Lucas 21:36). ¿Chai sinchi punllacunapajca ima shinataj allichirina canchij? Jehová Diosta cazungapaj, ñucanchijta cuidagrishcapi cringapajca ima llaquitapish ahuantanami canchij. Cutin, ¿chai punllacunapi huauqui panicuna nimahuan saquirijpica imatataj rurashun? (Habacuc 3:​17, 18). Paicunata tucuipi ayudangapajca llaquijcuna canatami yachana canchij. Cutin, ¿gobiernocuna ñucanchijta llaquichijpi o shuj uchilla cuartopi huauqui panicunahuan tandalla causana tucujpica imatataj rurashun? (Ezequiel 38:​10-12). Cunanmantapachami huauqui panicunata cꞌuyanata yachana canchij. w23.07 pág. 2 párrs. 2, 3

Cazadocunaca Áquila y Priscilamantami achcata yachai tucuncuna. Paicunaca punta siglopimi causarcacuna (Romanos 16:​3, 4). Paicunamanta parlacushpaca siempremi ishquindij igual cashcata nin. Por ejemplo, ishquindijmi trabajajcuna, predicajcuna, shujtajcunata ayudajcuna carca (Hechos 18:​2, 3, 24-26). Cazadocuna, ¿Paicunapaj ejemplotaca ima shinataj cati tucunguichij? Imacunallapi ocuparijcuna cashcata yuyaichij. ¿Tal vez, huaquin ruraicunata cancunalla ruranapaj randica tandalla rurai tucunguichijchu? Por ejemplo, Áquila y Priscilaca tandallami huillajcuna carca. ¿Cancunapish chaita rurai tucunguichijchu? Shinallataj, Áquila y Priscilaca tandallami trabajajcuna carca. Bueno, tal vez cancunaca manachari igual trabajai tucunguichij. Pero, ¿huasipi ruraicunataca tandalla rurai tucunguichijchu? (Eclesiastés 4:9). Ishquindij huasipi ayudashpaca parlanacungapajmi tiempota charinguichij. w23.05 págs. 22, 23 párrs. 10-12

Tucuicunami mai ratoca manchaita charinchij. Por ejemplo, mandaj Saúl Rey Davidta huañuchingapaj caticujpimi Davidca Gat llajtata mandaj Akispajman rirca. Mandaj Akís David alli soldado cashcata, huaranga huaranga filisteocunata huañuchishcata yachaj chayajpica Davidca Akís paita llaquichinata yuyashpami achcata mancharirca (1 Samuel 21:​10-12). Pero ¿manchaita mishangapajca Davidca imatataj rurarca? Salmo 56-pica Davidca Gat llajtapi cashpa ima shina sintirishcatami quillcarca. Chai capitulopica Davidca imamanta manchaita charishcatami nirca. Shinallataj manchaita ama charingapaj Jehová Diospi confiashcatami quillcarca (Salmo 56:​1-3, 11). Davidca Diospaj ayudahuanmi mandaj Akís paita ama huañuchichun imata ruranata yuyarca. Chaimi paica loco cashcata Akista crichirca. Akisca David loco cashcata crishpami paita ama molestachun chaimanta richun saquirca. Chashnami Davidca quishpirirca (1 Samuel 21:13–22:1). w24.01 pág. 2 párrs. 1-3

Cai punllapaj versopi nishca shinaca ¿Paicunaca picunataj can? Jahua pachapi causarishca tucui ungidocunami can. Shinashpaca, ¿tucui ungidocuna jahua pachapi cashpaca puntapica imatataj rurangacuna? Paicunaca Diospaj enemigocunahuanmi macanacungacuna. Paicunaca jahua pachapi cashpaca Jesushuan, angelcunahuanmi shuj shinalla Diospaj enemigocunahuan macanacungacuna. Caipi yuyashun. Cai Allpapi caj maijan ungidocunaca yuyajllacuna cashcamantami ña mana achca fuerzata charincuna. Pero paicunaca jahua pachapi cashpaca mana tucurij causaita charishcamantami achca poderta charingacuna. Chashnami Armagedón macanacuipica Mandaj Jesusta apoyai tucungacuna. Chai qꞌuipaca ungidocunaca Diosta sirvijcuna jucha illajcuna tucuchunmi ayudangacuna. Ungidocunaca cai Allpapi cashpaca Diosta sirvijcunataca achcatami ayudashcacuna. Pero jahua pachaman rishpaca Diospaj pueblotaca ashtahuanmi ayudai tucungacuna. w24.02 págs. 6, 7 párrs. 15, 16

Maijancunaca Jehová Diosman mingarishpa bautizaringapajca ñami listos can. Shinapish manaraj decidirincunachu. Paicunaca “juchata rurajpica congregacionmantami llujshichingacuna” nishpami mancharincuna. Pero, bautizarijcunamantaca maijancunallami juchata rurashcamanta congregacionmanta llujshichishca can. ¿Imamanta? Bibliapi nishca shinaca Jehová Diosca pai munashca shina causashpa paita cushichichun, shinallataj allicunata rurachunca paillatajmi ayudanga (Colosenses 1:10). Yayitu Diosca pai munashca shina causachunca cantapishmi ayudanga. Chaimantami mana manchana cangui (1 Corintios 10:13). Juchayujcuna huacharishcamantami tucuicuna maipica mana alli yuyaicunata, mana alli munaicunata charinchij (Santiago 1:14). Pero mana alli yuyaicuna, mana alli munaicuna shamujpica cada unomi chaicunata ruranata o mana ruranata agllai tucunchij. Maijancunaca “mana alli munaicunamantaca mana jarcari tucunchijchu” nishpami yuyancuna. Pero chaica mana ciertochu can. Tucuicunami mana alli yuyaicunamanta, mana alli munaicunamanta jarcarinata yachai tucunchij. w24.03 págs. 5, 6 párrs. 11, 12